བཀའ་རྫོགས་པ་ཆེན་པོ་ཡང་ཟབ་དཀོན་མཆོག་སྤྱི་འདུས་པདྨ་འོད་འབར་གྱི་དབང་གི་རིམ་པ་ལས༔ ཐོག་མར་སྟ་གོན་དང་དབང་བཤད།
བཀའ་རྫོགས་པ་ཆེན་པོ་ཡང་ཟབ་དཀོན་མཆོག་སྤྱི་འདུས་པདྨ་འོད་འབར་གྱི་དབང་གི་རིམ་པ་ལས༔ ཐོག་མར་སྟ་གོན་དང་དབང་བཤད་ཡོད་ལགས་སོ༔
ན་མོ་པྲ་ཝ་ཀ་ར་ཡེ། ཨོ་རྒྱན་རྗེ་ལ་ཕྱག་འཚལ་སྐྱབས་སུ་མཆི། །འདི་བྲིས་བཀའ་ཡི་གནང་བ་བསྩལ་དུ་གསོལ། །དེ་ལ་པདྨ་འོད་འབར་གྱི་དབང་རྫས། བུམ་པ་རྫས་ལྡན། བྷནྡྷ་བདུད་རྩིས་བཀང་བ། ཁཊོ་ཤེལ་རྡོ། བཀའ་སྲུང་སེང་གདོང་མའི་དམར་གཏོར་བཤམས། ཚེ་དབང་བྱེད་ན། ཚེ་གཏོར་བུམ་པའི་དབྱིབས། བུམ་པ་རྫས་ལྡན། ཚེ་རིལ་ཚེ་ཆང་། ཚེ་ནས། མདའ་དར་ཁ་དོག་ལྔའམ་གཅིག་བཤམ། གཞན་ཡང་བླ་མ་གཏོར་མ། སྔོན་འགྲོ་སོགས་དང་། དྲག་པོར་དམར་གཏོར་གཅིག་དང་། ཚད་མདོར་དམར་གཏོར་གཅིག །གཞི་བདག་གཏོར་མ་སྤྱི་ལྟར་བཤམ། དང་པོ་བདག་བསྐྱེད་ཚར་གཅིག །དེ་ནས། དབང་རྫས་ངོ་བོ་པདྨ་འོད་འབར་སྐུ༔
ཞེས་སོགས་མན་ཆད་མདུན་བསྐྱེད་ཚར་གཅིག །དེ་ནས་དབང་བསྙེན་བརྒྱའམ་སྟོང་བྱ། ༈ སླར་བདག་འཇུག་བླངས་ལ། དེ་ནས་དབང་བསྐུར་རོ།། ༈ བསྡུ་ན་རྙིང་མ་སྤྱི་ལྟར་ཆོ་ག་ཚར་གཅིག་གིས། བདག་མདུན་བུམ་གསུམ་དུས་གཅིག་ལ་བསྐྱེད་བསྙེན་པ་བརྒྱ་སྟོང་སོགས་གང་འགྲུབ་བྱས་ལ། ཏིང་འཛིན་གྱི་དབང་བླང་ན་ཆོག ། ༈ དེ་ནས་སློབ་མ་འཚོགས་ནས། ཇི་ལྟར་བལྟམས་པ་ཙམ་སོགས་ཁྲུས་བྱས། མེ་ཏོག་ལག་ཏུ་བཀྲམ་ནས། བགེགས་གཏོར་སྔོན་འགྲོ་བྲན་ལ་མཆོད་གཡོག་པས་བཟུང་ལ་རོལ་མོ་དང་བཅས་པས། ཨོ་ཨཱཧཱུྃ༔ བགེགས་དང་ལོག་འདྲེན་ལན་ཆགས་འབྱུང་པོའི་ཚོགས༔ བགེགས་འདུལ་ཁྲོ་ཆེན་འབར་བའི་བཀའི་བྱུང་གིས༔ གླུད་གཏོར་ཁྱེར་ལ་
རང་རང་གནས་སུ་དེངས༔ བཀའ་ལས་འདས་ན་བརླག་པར་གདོན་མི་ཟ༔ གཏོར་མ་དོར། ཨོཾ་སརྦ་བིགྷཱན་ཨུ་ཙ་ཏ་ཡ་ཕཊ༔ ཧཱུྃ༔ བདག་ཉིད་འགྱུར་མེད་ཡེ་ནས་རྡོ་རྗེའི་སྐུ་སོགས་ནས། ཨོཾ་བཛྲ་རཀྟ་ཛྭ་ལ་རཾ༔ རོལ་མོ་བྱ། ༈ འོ་ན་ད་ལམ་ཁྱེད་རྣམས་ཀྱིས་བཀའ་རྫོགས་པ་ཆེན་པོ་ཡང་ཟབ་དཀོན་མཆོག་སྤྱི་འདུས་ཀྱི་དབང་ཞུ་བའི་ཐོག་མར་ཡིད་ཆེས་པའི་དོན་དུ་ལོ་རྒྱུས་ཅུང་ཟད་ཅིག་ཞུ་ན། གུ་རུ་རིན་པོ་ཆེ་སློབ་དཔོན་ཆེན་པོ་པདྨ་འབྱུང་གནས་འདི་ནི་སྤྱིར་དུས་གསུམ་སངས་རྒྱས་ཐམས་ཅད་ཀྱི་སྤྲུལ་པ་ཡིན་ཏེ། གསེར་འོད་དམ་པའི་མདོ་ལས་ཀྱང་པདྨ་འབྱུང་གནས་འདི། འདས་པ་དང་མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་ལ་མངོན་པར་བསྟོད་དོ། །ཞེས་པ་དང་། ཡང་རྒྱལ་བསྟོད་པདྨ་འབྱུང་གནས་འདི་འདྲ་བ། །ཚེ་རབས་དེ་དང་དེར་ནི་རྙེད་གྱུར་ཅིག །ཅེས་དང་། མཚན་བརྗོད་ལས། དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡ་ཤེས་མཛོད་འཛིན་པ། །སངས་རྒྱས་ཀུན་གྱི་རང་བཞིན་ཅན། །ཞེས་གསུངས་སོ། །དོན་ལ་སྟོན་པ་ཤཱཀྱ་ཐུབ་པ་དངོས་ཡིན་ཏེ། སྟོན་པ་ཉིད་ཀྱིས་ལུང་བསྟན་པ་ནི། ཨེ་མ་
ཧོ༔ ང་ནི་མྱ་ངན་འདས་འོག་ཏུ། །བདག་བས་རྟགས་བཞིས་ཁྱད་འཕགས་པ། །པདྨ་འབྱུང་གནས་ཞེས་བྱ་ཞིག །ལོ་ནི་བཅུ་གཉིས་དུས་སུ་འབྱུང་། །ང་ཉིད་དངོས་ཡིན་དེ་གཞན་མིན། །སངས་རྒྱས་བསྟན་པ་འཛིན་སྐྱོངས་དེ་ཡིས་བྱེད། །འཁོར་རྣམས་མྱ་ངན་མ་བྱེད་ཅིག །ནམ་མཁའི་དབྱིངས་ནས་ཉི་ཟླ་བཞིན། །ང་བས་ལྷག་པའི་པདྨ་འབྱུང་། །རྒྱ་མཚོའི་གླིང་ནས་ནོར་བུ་བཞིན། །ང་བས་ལྷག་པའི་པདྨ་འབྱུང་། །སྨན་མཆོག་གླིང་ནས་རྣམ་རྒྱལ་བཞིན། །ང་བས་ལྷག་པའི་པདྨ་འབྱུང་། །བསྟན་པ་རྣམ་གསུམ་འཛིན་སྐྱོངས་དེ་ཡིས་བྱེད། །འཁོར་རྣམས་མྱ་ངན་མ་བྱེད་ཅིག །ཅེས་གསུངས་ཏེ་བགྲེས་རྒུད་དང་འདས་གྲོངས་མི་མངའ་བ་དང་། བདུད་ཐམས་ཅད་སྟོབས་ཀྱིས་བཅོམ་པ་དང་། སྙིང་པོ་སྔགས་ལ་སྤྱོད་པ་སོགས་བཞིའི་ཁྱད་པར་འཕགས་གསུངས་སོ། །དེ་ཡང་རྒྱུ་མཚན་ཉིད་ཐེག་པ། སྡེ་སྣོད་གསུམ་པོ་བཅོམ་ལྡན་འདས་ཉིད་མཆོག་གི་སྤྲུལ་སྐུའི་ཚུལ་གྱིས་གསུངས་ནས། འབྲས་བུ་གསང་སྔགས་བླ་ན་མེད་པ་སྟོན་པའི་ཕྱིར་དུ་སློབ་དཔོན་ཆེན་པོ་པདྨ་འབྱུང་གནས་སུ་སྤྲུལ་པ་ཡིན་ཏེ། དབུས་འགྱུར་ཚལ་ལུང་བསྟན་
པའི་མདོ་ལས། ང་ནི་འདས་ནས་བཅུ་གཉིས་སུ། །དྷ་ན་ཀོ་ཤའི་མཚོ་གླིང་དུ། །པདྨའི་སྟེང་དུ་རང་འཁྲུངས་པའི། །གསང་སྔགས་བསྟན་པའི་བདག་པོ་འབྱུང་། །ཞེས་སོགས་མདོ་རྒྱུད་དུ་མ་ནས་ལུང་བསྟན་པ་དང་མཐུན་པར། བཅོམ་ལྡན་འདས་ཤཱཀྱ་ཐུབ་པ་སྐུ་མྱ་ངན་ལས་འདས་པའི་ཚུལ་བསྟན་ནས། སངས་རྒྱས་ཀྱི་བསྟན་པ་ཉམས་དམའ་བར་གྱུར་ཏེ། བདུད་དང་མུ་སྟེགས་རྣམས་དར་ནས་ནང་པའི་བསྟན་པ་ལ་གནོད་པ་མང་དུ་བྱུང་། ཀུན་དགའ་བོ་སོགས་ཉན་ཐོས་རྣམས་ཀྱིས་བཏུལ་ཡང་མ་ཐུལ་ནས། མུ་སྟེགས་པའི་བསྟན་པ་ཤིན་ཏུ་དར། ནཱ་ལེནྡྲ་སོགས་གཙུག་ལག་ཁང་རྣམས་ལའང་གནོད་པ་ཆེན་པོ་བྱས། ཡམས་ནད་དང་མུ་གེ་ཆེན་པོ་བྱུང་ནས་ཐམས་ཅད་སྡུག་བསྔལ་བར་གྱུར་ཏེ༔ དགྲ་བཅོམ་པ་རྣམས་ཀྱིས་ཐུབ་པ་ཉིད་ལ་འབོད་ཅིང་མྱ་ངན་གྱི་ངུ་སྒྲ་ཆེན་པོ་བསྒྲགས་པས། །དེའི་ཚེ་ལེགས་ཉེས་སྟངས་འཛིན་གྱི་དཔའ་བོ་མཁའ་འགྲོ་ཐམས་ཅད་དག་པའི་ཞིང་ཁམས་ཐམས་ཅད་དུ་སོང་ནས། སངས་རྒྱས་ཐམས་ཅད་ལ་ཚབ་ཅིག་ཞུས་པས། ཕྱོགས་བཅུའི་སངས་རྒྱས་ཐམས་ཅད་ཀྱི་ཐུགས་ཀ་ནས་འོད་ཟེར་གོང་བུ་གཅིག་ཏུ་དྲིལ་ནས།
ནུབ་ཕྱོགས་ཨོ་རྒྱན་གྱི་ཡུལ་ལྷོ་ནུབ་འོ་མ་ཅན་གྱི་མཚོར་ཐིམ་པས་བཀྲ་ཤིས་པའི་ལྟས་མང་པོ་དང་བཅས་ཏེ་མེ་ཏོག་པདྨའི་སྙིང་པོ་ལ་ཁྱེའུ་ལོ་བརྒྱད་པའི་ན་ཚོད་དུ་བྱོན་པ་ལྷ་དང་ཀླུ་དང་དཔའ་བོ་མཁའ་འགྲོ་ཐམས་ཅད་ཀྱིས་ཕྱག་འཚལ་ཞིང་མཆོད་པ་དཔག་ཏུ་མེད་པས་མཆོད། དེར་གསང་སྔགས་ཀྱི་ཆོས་དཔག་ཏུ་མེད་པ་གསུངས། དེ་ནས་ཨོ་རྒྱན་ཡུལ་གྱི་རྒྱལ་པོ་མཛད་ནས་ཐམས་ཅད་ཆོས་ལ་བཀོད་པས། མཚན་པདྨ་རྒྱལ་པོ་ཞེས་བྱ་བ་བྱུང་། དེ་ནས་རབ་ཏུ་བྱུང་ཞིང་དབུ་ལ་གཙུག་ཏོར་བྱུང་། མཚན་ཤཱཀྱ་སེང་གེ་གསོལ། དེ་ནས་བསིལ་བའི་ཚལ་དུ་བྱོན་ནས་བཀའ་སྲུང་ཐམས་ཅད་དམ་ལ་བཏགས། རྡོ་རྗེ་གདན་དུ་བདུད་དང་མུ་སྟེགས་ཐམས་ཅད་ཚར་བཅད་པས་མཚན་སེང་གེ་སྒྲ་སྒྲོག་ཏུ་གྲགས་། དེ་ནས་འཛམ་བུའི་གླིང་གི་ཡུལ་གྲུ་ཐམས་ཅད་དུ་བྱོན་ནས། གྲུབ་ཆེན་བརྒྱད་ཅུ་དང་མཇལ་ཏེ་ཆོས་དང་མན་ངག་མང་པོ་ཞུ་རེས་མཛད། དུར་ཁྲོད་ཆེན་པོ་བརྒྱད་དུ་བཞུགས་ནས་དཔའ་བོ་ཌཱཀི་རྣམས་ལ་ཆོས་གསུངས། གཏེར་ཁ་མང་དུ་སྦས། དེ་ནས་དགུང་ལོ་སུམ་སྟོང་བཞེས་དུས་བོད་ཡུལ་དུ་འཇམ་དབྱངས་ཀྱི་སྤྲུལ་པ་ཁྲི་སྲོང་ལྡེའུ་བཙན་
གྱིས་གདན་དྲངས། དགེ་བསྙེན་ཉི་ཤུ་རྩ་གཅིག་མ་སྲིང་བརྟན་མ་བཅུ་གཉིས། གཟའ་ཆེན་བརྒྱད། རྒྱུ་སྐར་ཉི་ཤུ་རྩ་བརྒྱད་སོགས་ལྷ་སྲིན་གདུག་པ་ཅན་ཐམས་ཅད་དམ་ལ་བཏགས། དཔལ་གྱི་བསམ་ཡས་ལ་སོགས་པའི་གཙུག་ལག་ཁང་མང་དུ་བཞེངས། གསང་སྔགས་ཀྱི་ཆོས་དཔག་ཏུ་མེད་པ་གསུངས་ནས་གྲུབ་ཐོབ་ཀྱིས་ལུང་པ་བཀང་། སྒྲུབ་གནས་ཐམས་ཅད་བྱིན་གྱིས་བརླབས་ཤིང་སངས་རྒྱས་ཀྱི་བསྟན་པ་ཉི་མ་ཤར་བ་ལྟ་བུ་མཛད། དེའི་དུས་སུ་མྱང་བན་ཏིང་འཛིན་བཟང་པོ་ཞེས་བྱ་བ། བྱང་ཆུབ་སེམས་དཔའ་ནམ་མཁའི་སྙིང་པོའི་སྤྲུལ་པ་བྱུང་སྟེ། ལོ་ཉེར་གཅིག་ནས་ཨོ་རྒྱན་དང་མཇལ། ལོ་ཙཱ་མཁས་པར་གྱུར་ནས་རྒྱ་གར་དུ་བྱོན་ནས་ཆོས་མང་དུ་བསྒྱུར། སློབ་དཔོན་བི་མ་ལ་མི་ཏྲ་དང་མཇལ་ནས། རྫོགས་ཆེན་ལ་བཀའ་བབས་པས། རྒྱལ་པོ་ཁྲི་སྲོང་ལྡེའུ་བཙན་གྱི་བླ་མར་ཡང་གྱུར་ཏེ། ལོ་བརྒྱད་ཅུ་གྱ་བཞིའི་བར་དུ་ཨོ་རྒྱན་རིན་པོ་ཆེའི་ཆག་ཕྱི་ཤས་ཆེར་མཛད། དེའི་དུས་སུ་སྤྱིར་ཆོས་དང་གདམས་ངག་དཔག་ཏུ་མེད་པ་གནང་བའི་ནང་ནས་ཟབ་ཅིང་ཆེར་ཟབ་པ། ཡང་ཟབ་དཀོན་མཆོག་སྤྱི་འདུས་གནང་བས། ཚེ་ལོ་བཞི་བཅུ་ཁ་
རལ་གྱི་དུས་སུ་མྱང་བན་གྱི་སྤྲུལ་པ་ཞིག་གིས་འདོན་ནས་སེམས་ཅན་ལ་ཕན་པར་ལུང་བསྟན་སྨོན་ལམ་དང་བཅས་ཏེ། ཤར་ཀོང་པོའི་ཡུལ་ཀླུ་གནས་པའི་མཚོ་འགྲམ་བྲག་རི་རྡོ་རྗེ་འདྲ་བ་ལ་གཏེར་དུ་སྦས་སོ། །བོད་ཀྱི་ས་རྟ་རྨིག་ཙམ་ཡང་མ་ལུས་པ་ཞབས་ཀྱིས་བཅགས། གཏེར་ཁ་བྱེ་བ་ཙམ་སྦས། མ་འོངས་ལུང་བསྟན་དཔག་ཏུ་མེད་པ་གསུངས་ནས། ཤཱཀ་ཐུབ་མྱ་ངན་འདས་འོག་ཏུ༔ ལོ་ཡང་སུམ་སྟོང་ཉེ་བ་ན༔ འཛམ་གླིང་སྲིན་གྱིས་ཕུང་འགྱུར་ཞེས༔ དབུས་འགྱུར་ལུང་བསྟན་མདོ་ལས་གསུངས༔ དེ་རྣམས་འདུལ་བར་བདག་ལུང་བསྟན༔ ད་ནི་དེ་ཡི་དུས་ལ་བབ༔ དེ་ཕྱིར་སྲིན་པོ་འདུལ་དུ་འགྲོ༔ ཞེས་གསུངས་ནས་བོད་ཀྱི་རྒྱལ་བློན་ལྷ་འདྲེ་ཐམས་ཅད་ཀྱིས་བཤོལ་ཡང་མ་གནང་ནས། ད་སྐུ་དངོས་ཀྱི་གདུལ་བྱ་རྫོགས་ཐུགས་རྗེའི་སྤྲུལ་པ་ནི་འཁོར་བ་མ་སྟོངས་ཀྱི་བར་དུ་འབྱུང་ཞིང་༔ ཁྱད་པར་དུ་པད་འབྱུང་ལ་དད་ཅིང་མོས་པའི་མི་དང་པདྨ་བདག་ལ་འདུ་འབྲལ་སྐད་ཅིག་ཀྱང་མེད་དོ་གསུངས་ནས་ལྷ་དང་དཔའ་བོ་མཁའ་འགྲོ་ཐམས་ཅད་ཀྱིས་ནམ་མཁའ་ནས་རོལ་མོའི་སྒྲ་དང་མཆོད་པའི་སྤྲིན་གྱིས་བསུས་ཏེ༔ རྟ་མཆོག་དང་དར་
གྱི་འོད་དཀྱིལ་ལ་སྤྱན་དྲངས་ཏེ༔ འཇའ་འོད་དུ་མེ་རེ་འཁྱིལ་ཞིང་ལྷོ་ནུབ་རྔ་ཡབ་གླིང་དུ་བྱོན་ནས་སྲིན་པོ་རྣམས་ཆོས་ལ་བཀོད་ཅིང་བཞུགས་སོ༔ དེ་ནས་དུས་སྙིགས་མའི་ཚེ་དུས་ལ་བབ་ནས་མྱང་བན་ཏིང་འཛིན་བཟང་པོའི་ཐུགས་སྤྲུལ་གཏེར་སྟོན་ཆེན་པོ་འཇའ་ཚོན་སྙིང་པོ་ཞེས་ཀྱང་བྱ༔ ཧཱུྃ་ནག་མེ་འབར་ཞེས་ཀྱང་བྱ༔ ལས་འཕྲོ་གླིང་པ་ཞེས་ཀྱང་བྱ༔ པདྨ་བཀའ་ཡི་ཐང་ཡིག་ལས༔ ལྷོ་ཀོང་བྱང་ཀོང་སྦས་པའི་གཏེར་ཁ་འདི༔ མི་བཞག་འདོན་པའི་རྟགས་དེ་བསྟན་ནས་འབྱུང་༔ གཏེར་སྟོན་འཇའ་ཚོན་སྙིང་པོ་ཞེས་བྱ་འབྱུང་༔ ཞེས་གསུངས་ནས་ལུང་བསྟན་པ་ལྟར༔ སྐུ་འཁྲུངས་དུས་ཀྱང་སྒྲ་འོད་ཟེར་གསུམ་སོགས་ལྟས་བཟང་པོ་དང་༔ སྐུ་ཆུང་ངུ་ནས་དུས་བཟང་ཐམས་ཅད་དུ་ཨོ་རྒྱན་རིན་པོ་ཆེ་དང་རྒྱུན་དུ་མཇལ༔ ལོ་བཅུ་གསུམ་སྐུ་མཚམས་ལ་བཞུགས་པར༔ རྨང་ལམ་དུ་རྗེ་དབང་ཕྱུག་རྡོ་རྗེ་ཡང་ཡང་བྱོན་ནས་གེགས་སེལ་བོགས་འདོན་གནང་༔ མཁའ་འགྲོ་མ་རྣམས་དང་གུ་རུ་རིན་པོ་ཆེས་གནས་སྒོ་འབྱེད་པ་དང་གཏེར་འདོན་པའི་ལུང་བསྟན་ཡང་ཡང་དུ་བྱུང་ཞིང་༔ ཕྱག་རྡོར་བསྙེན་པ་དུང་ཕྱུར་ཐོན་དུས་སྤྱན་གཉིས་ལས་འོད་ཟེར་ཆེན་པོ་བྱུང་བ་གཏེར་གང་
ཡོད་དུ་ཟུག་ནས་གསལ་བར་གཟིགས་ནས༔ གཏེར་ཁ་མང་དུ་བཏོན་པ་དང་གནས་སྒོ་ཕྱེ་བ་དང་རྡོ་ལ་ཕྱག་ཞབས་ཀྱི་རྗེས་མང་དུ་བཞག་པ་དང་༔ མངོན་ཤེས་པ་ལ་ཐོགས་པ་མེད་པ་ལ་སོགས་རྫུ་འཕྲུལ་དུ་མ་བསྟན༔ ཁྱད་པར་དཀོན་མཆོག་སྤྱི་འདུས་འདི་ཉིད་ཞལ་ཕྱེས་ཏེ༔ སློབ་མའི་གཙོ་བོ་ཨོ་རྒྱན་རིན་པོ་ཆེས་ལུང་བསྟན་པ་ལྟར་ཆོས་ཀྱི་བདག་པོ་རྗེ་ཆོས་དབྱིངས་རྡོ་རྗེ་དང་༔ འབྲུག་པ་དཔག་བསམ་དབང་པོ་དང་༔ བི་མ་ལའི་སྤྲུལ་པ་དྭགས་པོ་ནོར་བུའི་བརྒྱན་པ༔ འབྲི་ཁུང་ཞབས་དྲུང་ཆོས་ཀྱི་གྲགས་པ་བཀྲ་ཤིས་དང་༔ དུང་དཀར་རས་ཆེན་སོགས་སྐྱེས་བུ་དམ་པ་འགྲན་ཟླ་མེད་པ་རྣམས་ཀྱིས་ཀྱང་༔ ཐུགས་དད་གུས་ཀྱི་སྒོ་ནས་གཏེར་ཆོས་རྣམས་གསན༔ ལས་ལྡན་གྱི་སློབ་མ་རྣམས་ལས་འཕྲོས་ཏེ༔ དེང་སང་གཏེར་ཆོས་ཀྱིས་བོད་ཡུལ་ཁྱབ་པར་གྱུར་པ་འདི་ཡིན་ལ༔ དེ་ཨོ་རྒྱན་རིན་པོ་ཆེའི་བཀའ་མ་འོངས་ལུང་བསྟན་ལས༔ ཁྱད་པར་དུ་ཡང་ཟབ་གཏེར་འདི་རྣམས་ཀྱིས་ཕན་ཐོགས་པའི་དུས༔ ཚེ་ལོ་ཡང་བཞི་བཅུ་ཁ་རལ་སུམ་ཅུ་ལ་ཉེ་བར་སོང་ནས༔ ནམ་མཁའ་ལ་ཆར་མེད་དེ་མེ་འབར༔ ས་གཞིའི་ལོ་ཐོག་ཐམས་
ཅད་ལོ་ནད་སྣ་ཚོགས་ཀྱིས་སྐམ༔ ནད་རྟགས་མེ་ཆུ་གོ་ལོག་ཏུ་འབྱུང་བས་རྩི་སྨན་གྱིས་མི་ཕན་དུག་ཏུ་འགྲོ༔ ས་གཡོས་དང་ཐོག་སེར་དང་འཁྱུགས་དང་གནམ་རྡོ་མང་དུ་ལྷུང་སྐྱེས་པ་ཚེ་ཐུང་བས་མོ་རིགས་མའི་ཁྱུ་ཆེ༔ མིང་སྲིང་དང་ཕུ་ནུ་ཉེ་དྲུང་དམེ་འཁྲུག་འདྲེན༔ ཁྲིམས་ལྡན་གྱི་ཆོས་པ་ནི་ཉིན་སྐར་ལས་ཉུང་༔ ཟབ་པོ་དང་བསྟན་བཤིག་ནི་དབྱར་གྱི་ཆུ་བཞིན་དུ་རྒྱས༔ སྟེང་འོག་བར་གསུམ་འཁྲུག༔ མཐའ་དམག་དབུས་སུ་ཤོར༔ མི་མ་ཡིན་གྱིས་ཉིན་མོ་ཡང་ཅ་ཅོ་སྒྲོག༔ རི་བྱ་མང་པོ་ཤོད་དུ་འབབ༔ སྔར་མེད་ཀྱི་གཅན་གཟན་མང་པོ་འུར་རྒྱུག་བྱེད༔ རྒན་དང་བྱི་སྦ་ལྟོགས་ནད་ཀྱིས་འགུམ༔ དར་མ་ཀུན་དབང་མེད་དུ་ཁོལ་པོར་འགྲོ༔ བྱོལ་སོང་རྣམས་ཧབ་ཐོབ་ལ་སྤྱོད་ཅིང་ལུང་པ་ཐམས་ཅད་ཁྲག་གིས་གང་བར་འོང་བར་འདུག་གསུངས༔ སྡུག་བསྔལ་དེ་རྣམས་ལས་སྐྱོབ་པའི་ཐབས་ནི༔ ཁོ་བོ་པདྨའི་ཐུགས་རྗེ་བྱིན་རླབས་ཐམས་ཅད་དེའི་ཚེ་ཤུགས་ཆེ་བས་ས་སྟེང་ཆོས་ཀྱིས་བཀང་ནས་ཡོད་པ་ཡང་དེ་རྣམས་ལ་དགོངས་པ་ཡིན༔ ཁྱད་པར་ཐུགས་སྒྲུབ་ཀུན་གྱི་ནང་ནས༔ ཡང་ཟབ་དཀོན་མཆོག་སྤྱི་འདུས་འདི་མྱང་བན་ཏིང་འཛིན་བཟང་པོའི་སྤྲུལ་པ་
ཞིག་གིས་རྙེད་ནས༔ དུས་ངན་སེམས་ཅན་འགའ་ཞིག་ལ་ཕན་པ་འོང་༔ ཆོས་འདི་ཞལ་ཕྱེས་པ་ཐམས་ཅད་ཀྱི་མཐའ་དམག་ཕྱིར་བསྲིང་ནུས༔ ས་ཕྱོགས་དེར་ཡང་ལོ་ཕྱུགས་ལེགས་པ་དང་རླུང་འཚུབ་ཆུང་༔ དད་འདུན་བྱེད་པའི་དུད་འགྲོ་ཡན་ཆད་བདེ་ཆེན་དག་པའི་ཞིང་ཁམས་སུ་འགྲོའོ༔ གཞན་ཡང་ཟབ་གཏེར་འདི་ཉིད་བྱིན་རླབས་ཀྱི་སོ་མ་ཉམས་པར་དད་ལྡན་རྣམས་ལ་དབང་ལུང་བཏོན་པ་ན༔ དུས་མཐའི་སྐྱེ་འགྲོ་རྣམས་ཡིད་བཞིན་ནོར་བུ་རྙེད་པ་ལས་འཚིང་ཆེའོ༔ དེར་མ་ཟད་འདི་ཉིད་འཆང་བ་དང་༔ མཆོད་བསྟོད་བསྔགས་པ་བརྗོད་ཅིང་བསྙེན་པ་ཐོན་པ་ཅི་ཡང་བདེ་བར་གཤེགས་པའི་སྲས་དམ་པར་འགྱུར་རོ༔ ལས་སྒྲིབ་ཐམས་ཅད་དུང་དཀར་ཕྱིས་པ་ལྟར་འགྱུར་རོ༔ ཚོགས་གཉིས་ཀྱི་བྱ་བ་དཀར་ཚོགས་རྒྱས་པ་ལྟར་འགྱུར་རོ༔ རྒྱལ་པོའི་ཆད་པ་ལ་སོགས་འཇིགས་པ་བརྒྱད་ལས་གྲོལ་བར་འགྱུར་རོ༔ མཛེ་ལ་སོགས་པའི་རྣམ་སྨིན་གྱི་ནད་ཐམས་ཅད་སྲབ་ཅིང་བྱང་བ་དང་༔ གཅོང་ནད་ཞ་གྲུམ་དང་༔ མིག་ནད་ལ་སོགས་པ་ཐམས་ཅད་ལས་གྲོལ་བར་འགྱུར་རོ༔ ཚེ་དང་བསོད་ནམས་ལ་སོགས་པ་འབྱོར་པ་དྲུག་ཏུ་འབྱོར་ཞིང་བུ་འདོད་
པ་ལ་ཡང་རིགས་རྒྱུད་འཕྲལ་དུ་འཕེལ་བར་འགྱུར་རོ༔ མོས་ཚུལ་བཞིའི་དབང་དང་ལྡན་ཞིང་༔ ལྷ་སྲིན་སྡེ་བརྒྱད་དཔུང་དང་བཅས་པ་ཡང་ཕྱི་བཞིན་དུ་འབྲང་བ་དང་བཀའ་ཉན་པར་འགྱུར་རོ༔ ཚེ་ཟད་པ་དང་ཉམས་པ་ཡང་གསོ་ནུས་སོ༔ བློ་གྲོས་མི་ཟད་པ་དང་ཤེས་རབ་ཕྱོགས་མེད་དུ་འབར་བར་འགྱུར་རོ༔ དྲག་པོའི་ལས་རྣམས་འཕྲལ་དུ་འགྲུབ་ཅིང་དུས་ཀྱི་འཆི་བ་ཡང་བར་མ་དོར་རང་ངོ་ཤེས་ཤིང་བདེ་བ་ཅན་དུ་སྐྱེ་བར་འགྱུར་རོ༔ ཆོས་འདི་ལ་ཐེ་ཚོམ་ཡོན་ཏན་འབྱུང་བར་མི་རིགས་པར་ལྟ་བ་ཀུན་ཀྱང་ཐུན་མོང་ཟིན་ཏེ༔ ལས་ངན་མྱོང་རྗེས་སུ་ལམ་སྣ་ཐར་པ་ལ་སྦྱོར་བར་འགྱུར་རོ༔ དེ་བས་སྒྲུབ་མཆོད་བསྒོམ་པ་ལྟ་ཅི་སྨོས་ཞེས་གསུངས༔ འདིའི་དབང་ཐོབ་ན་ཕན་ཡོན་བསམ་གྱིས་མི་ཁྱབ་སྟེ༔ སྨོན་ལམ་དང་ལྡན་པའི་ཆོས་བདག་ཉེར་ལྔ་ལས་མཆེད་དེ༔ འབྲེལ་ཐོགས་བྱེ་བ་འབུམ་དང་འབུམ་ཕྲག་འབྱུང་བར་ལུང་བསྟན་ཅིང་དེ་ཚང་ནས་ཆོས་འདི་ཡང་ཆོས་བདག་མཁའ་འགྲོ་མ་སེང་གེའི་གདོང་པ་ཅན་མས༔ ཆོས་འདི་བོད་དུ་མི་བཞག་ཨོ་རྒྱན་མཁའ་འགྲོའི་གནས་སུ་གདན་འདྲེན་པར་གསུངས༔ དེས་ན་ད་རེས་ཁྱེད་རྣམས་དབང་འདི་ཐོབ་ནས༔
འབྲེལ་ཐོགས་བྱེ་བ་གསུམ་དང་འབུམ་ཕྲག་གི་ནང་དུ་ཚུད་པས་ཁྱེད་རྣམས་ཀྱང་ཨོ་རྒྱན་རིན་པོ་ཆེའི་ལུང་བསྟན་དུ་ཚུད༔ ཐུགས་རྗེས་ཟིན་པ་ཡིན་པས་སྐལ་བ་ཤིན་ཏུ་བཟང་ཞིང་ཕན་ཡོན་ཆེ༔ འོན་ཀྱང་ཆོས་འདིའི་བཀའ་སྲུང་ནི་ཡེ་ཤེས་ཀྱི་མཁའ་འགྲོ་སེང་གེའི་གདོང་ཅན་མ་དང་༔ འཇིག་རྟེན་གྱི་ཀླུ་བདུད་དང་མཚོ་སྨན་གཉིས་བཀའ་སྲུང་ཡིན་པའི་ཕྱིར་བཀའ་ཤིན་ཏུ་གཉན་པས༔ འདིའི་དབང་ཞུས་ནས་བཛྲ་གུ་རུ་ལ་བྱེ་བ་གཅིག་བས་མི་ཉུང་བའི་ཁས་ལེན་དགོས། དེ་མ་བྱས་ན་མཁའ་འགྲོ་དང་བདུད་ཀྱིས་ཀོ་ལོང་བྱེད་ཉན་ཡོད་པས༔ དབང་ཚར་བ་དང་མཉམ་དུ་བཛྲ་གུ་རུ་ཁས་ལེན་མཛད་དགོས༔ དེ་ལྟ་བུའི་ཟབ་ཅིང་བཀའ་གཉན་པའི་དབང་ཟབ་མོ་འདི་ཞུ་བའི་ཕྱིར་མཎྜལ་ཕུལ། ས་གཞི་སྤོས་ཆུས་བྱུགས་སོགས། ཞེས་པ་རཱ་ག་ཨ་སྱས་བསྒྲིགས་པའོ།། ཨོཾ༔ བཀའ་རྫོགས་པ་ཆེན་པོ་ཡང་ཟབ་དཀོན་མཆོག་སྤྱི་འདུས་པདྨ་འོད་འབར་གྱི་དབང་ཆོག་བཞུགས་སོ། །དེ་ཡང་དབང་བསྐུར་གྱི་ལེའུ་ནས༔ དབང་བཞི་སྟན་ཐོག་གཅིག་ཏུ་བསྐུར་སོགས་གསུངས་པ་ནི༔ ཐོག་མར་བགེགས་བསྐྲད་པ༔ སྲུང་འཁོར་བསྒོམ་པ༔ མཎྜལ་འབུལ་བ༔ གསོལ་བ་གདབ་པ༔ དམ་ལ་བཞག་པ༔ བྱིན་རླབས་སྦྱར་བའོ༔ གོང་མ་གསུམ་གོང་དུ་གསལ་
ལ༔ གསོལ་བ་འདེབས་པ་ནི༔ ཨེ་མ་ཧོ༔ དཀོན་མཆོག་སྤྱི་འདུས་བླ་མ་ནི༔ རིགས་རྣམས་ཀུན་བདག་ཆེ་བའི་མཆོག༔ དཔའ་བོ་ཆེན་པོས་རྗེས་སུ་བཟུང་༔ དབང་གི་སྨིན་གྲོལ་དངོས་གྲུབ་སྩོལ༔ ལན་གསུངས་པ་ནི། དེ་ལྟར་ཡིན་ན་ཧེ་རུ་ཀའི༔ དམ་དུ་བཞག་ཅིང་སྨིན་པར་བྱ༔ བླ་མེད་ཡང་གསང་བྱིན་རླབས་འདི༔ གནས་ཁང་འདི་ཡི་ཕྱི་རོལ་དུ༔ དམ་མེད་པ་ལ་སྨྲ་མི་རུང་༔ དེ་ཕྱིར་སྙིང་ནས་བྲོ་བོར་ཅིག༔ བཛྲ་རཀ་སི་ཧཱུྃ༔ ས་མ་ཡ་ཨི་དན་ན་ར་ཀ༔ སློབ་མ་སྐད་ཅིག་གིས་པདྨ་འོད་འབར་དུ་བསྐྱེད་ལ་ཞེས་པས། སློབ་མའི་ངོ་བོ་པདྨ་འོད་འབར་སྐུ༔ དཀར་གསལ་མདངས་ལྡན་མཛེས་འཛུམ་རྒྱན་གྱིས་སྤྲས༔ སོགས་ནས། ཏིལ་གྱི་གོང་བུ་ཁ་བྱེ་བ་ལྟར་དཔག་ཏུ་མེད་པ་སྤྱན་དྲངས༔ ཧྲཱི༔ སྔོན་གྱི་བསྐལ་པའི་དང་པོ་ལ༔ སོགས་ནས། ཨོཾ་ཨཱ༔ཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨཱཿ སྤྱན་འདྲེན་བྱིན་འབེབས་ཡེ་ཤེས་སེམས་དཔའ་བསྟིམ༔ བུམ་པ་ཐོགས་ལ། ཧཱི༔ དཀོན་མཆོག་སྤྱི་འདུས་རིགས་ཀྱི་བདག༔ དུས་གསུམ་སངས་རྒྱས་ཐམས་ཅད་ཀྱི༔ སྐུ་གསུང་ཐུགས་མཆོག་རིན་པོ་ཆེ༔ བྱིན་རླབས་ཀློང་ཡངས་རང་བཞིན་འབར༔ ཨོཾ་ཨཱཿཧཱུྃ༔ སྐུ་
ཡི་སྨིན་མཚམས་ཨོ་དཀར་ལས་འོད་ཟེར་སྐར་མདའ་ཆད་པ་ལྟར༔ སྐལ་ལྡན་ལུས་ལ་གཉིས་མེད་ཐིམ༔ བུམ་དབང་ཐོབ་ནས་སྣང་སྟོང་བསྒོམ༔ པདྨ་འབྱུང་གནས་སྐུ་ཡི་དབང་ཐོབ་ཤོག༔ ཨོཾ་ཨཱ༔ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཀཱ་ཡ་ཨ་བྷི་ཥིཉྩ་ཨོཾ༔ ཞེས་སྤྱི་བོར་བསྐུར༔ བདུད་རྩི་ཐོགས་ལ༔ ཧཱུྃ༔ དཀོན་མཆོག་སྤྱི་འདུས་རིགས་ཀྱི་བདག༔ དུས་གསུམ་སངས་རྒྱས་ཐམས་ཅད་ཀྱི༔ སྐུ་གསུང་ཐུགས་མཆོག་རིན་པོ་ཆེ༔ བྱིན་རླབས་ཀློང་ཡངས་རང་བཞིན་འབར༔ ཨོྃ་ཨཱ༔ཧཱུྃ༔ གསུང་གི་ལྗགས་སྟེང་ཨཱདམར་ལས༔ འོད་ཟེར་མར་མེའི་རྩེ་མོ་ལྟར༔ སྐལ་ལྡན་ལྕེ་ལ་གཉིས་མེད་ཐིམ༔ གསང་དབང་ཐོབ་ནས་སྔགས་རླུང་བསྒོམ༔ པདྨ་འབྱུང་གནས་གསུང་གི་དབང་ཐོབ་ཤོག༔ ཨོྃ་ཨཱ༔ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཝཀྐ་ཨ་བྷི་ཥིཉྩ་ཨཱ༔ ཞེས་མགྲིན་པར་བསྐུར༔ ཁཊ་ཐོགས་ལ༔ ཧྲཱི༔ དཀོན་མཆོག་སྤྱི་འདུས་རིགས་ཀྱི་བདག༔ དུས་གསུམ་སངས་རྒྱས་ཐམས་ཅད་ཀྱི༔ སྐུ་གསུང་ཐུགས་མཆོག་རིན་པོ་ཆེ༔ བྱིན་རླབས་ཀློང་ཡངས་རང་བཞིན་འབར༔ ཨོ་ཨཱཧཱུྃ༔ ཐུགས་ཀའི་ཧཱུྃ་མཐིང་འོད་འབར་ལས༔ འོད་ཟེར་སྤོས་རེངས་
དུད་པ་ལྟར༔ སྐལ་ལྡན་སེམས་ལ་གཉིས་མེད་ཐིམ༔ ཤེར་ཡེའི་དབང་ཐོབ་གསལ་སྟོང་བསྒོམ༔ པདྨ་འབྱུང་གནས་ཐུགས་ཀྱི་དབང་ཐོབ་ཤོག༔ ཨོཾ་ཨཱ༔ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཙིཏྟ་ཨ་བྷི་ཥིཉྩ་ཧཱུྃ༔ ཞེས་སྙིང་གར་བསྐུར། ཤེལ་རྡོ་ཐོགས་ལ། ཧཱུྃ༔ དཀོན་མཆོག་སྤྱི་འདུས་རིགས་ཀྱི་བདག༔ དུས་གསུམ་སངས་རྒྱས་ཐམས་ཅད་ཀྱི༔ སྐུ་གསུང་ཐུགས་ཡོན་ཕྲིན་ལས་རྣམས༔ འདུས་པའི་འོད་ཟེར་སྣ་ཚོགས་ནི༔ མཁའ་དང་ཆུ་ལ་འཇའ་ཤར་ལྟར༔ སྐལ་ལྡན་གནས་ལྔར་གཉིས་མེད་ཐིམ༔ དབང་བཞི་ཡོངས་ཐོབ་རྫོགས་ཆེན་བསྒོམ༔ པདྨ་འབྱུང་གནས་རང་བཞིན་དབང་ཐོབ་ཤོག༔ ཨོཾ་ཨཱ༔ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ སརྦ་དྷརྨཱ་ཨ་བྷི་ཥིཉྩ་ཧོ༔ ཞེས་གནས་ལྔར་བསྐུར༔ བུམ་པ་ཐོད་པ་བཀྲྀ་ཤེལ་རྡོའི་དབང་བསྐུར༔ སྲོག་ཕུར་གྱི་ལེའུ་འདོན་གསུངས་པ་ནི༔ དེ་ནས་པདྨའི་སྲོག་ཕུར་བསྟན༔ སེམས་ཉིད་པདྨ་འབྱུང་གནས་དེ༔ ལོགས་ན་བསྒོམ་དང་བསྒྲུབ་ཏུ་མེད༔ རང་སེམས་གསལ་ལ་མ་འགགས་པ༔ རང་བྱུང་རང་ཤར་ཅིར་ཡང་སྣང་༔ ཞི་བ་ཚེ་དཔག་མེད་དུ་སྣང་༔ འཕགས་པ་སྤྱན་རས་གཟིགས་སུ་སྣང་༔ ཁྲོ་རྒྱལ་དབང་ཆེན་རྟ་མགྲིན་སྣང་༔ ཞལ་དང་ཕྱག་ནི་ཅིར་
ཡང་སྣང་༔ དེ་དག་སེམས་ཀྱི་ཆོ་འཕྲུལ་ཡིན༔ རང་བྱུང་རང་ཤར་རང་སར་གྲོལ༔ ངོ་བོ་སྟོང་པ་ཆོས་ཀྱི་སྐུ༔ མ་འགགས་རང་གསལ་ལོངས་སྤྱོད་རྫོགས༔ རིག་རྩལ་འགགས་མེད་སྤྲུལ་པའི་སྐུ༔ སྐུ་གསུམ་རང་ཆས་མ་བསྒྲུབ་འགྲུབ༔ རང་ཉིད་ཡེ་ནས་པད་འབྱུང་ཡིན༔ སྲོག་ཕུར་གྱི་ལེའུ་སྟེ་ལྔ་པའོ༔ ཤོག་སེར་གྱི་བུ་དཔེ་ལག་ཏུ་གཏད་ནས་འདི་སྐད་དོ༔ ཨོཾ་ཨཱཿཧཱུྃ༔ སངས་རྒྱས་ཀུན་གྱི་ངོ་བོ་པདྨ་འབྱུང་༔ ཟབ་གཏེར་ཐུགས་སྒྲུབ་ཡིད་བཞིན་ནོར་བུ་འདི༔ ལས་ཅན་རྣམས་ལ་སྒྲུབ་བཤད་བསྟན་ནས་ཀྱང་༔ མ་འོངས་དོན་ལྡན་འགྲོ་ཀུན་གྲོལ་བར་ཤོག༔ ཨོཾ་བཛྲ་སཏཱ་ས་མ་ཡ་སོགས་ནས། སཏཱ་ཨཱཿ་ཨ་ཨཱ༔ ཨི་ཨཱི༔ སོགས་ནས། ཨོཾ་ཨ༔ ཀ་ཁ་ག་གྷ་ང་སོགས་ནས། ཧ་ཀྵ༔ ཅེས་ཡིག་བརྒྱ་དང་ཨཱ་ལི་ཀཱ་ལི་ཚར་གཅིག་དང་བཅས་སློབ་མའི་ལག་ཏུ་གཏད༔ དུང་འབུད་པ་དང་༔ དར་ཕྱར་བ་བྱའོ།། དེ་ནས་གཏེར་བདག་གཏོར་མ་ལག་ཏུ་གཏོད་ནས། ཧཱུཾ་བྷྱོ༔ དུས་གསུམ་རྒྱལ་བའི་ཡུམ་གཅིག་སེང་གདོང་མ༔ ནམ་མཁའི་མདོག་ཅན་འོད་ཟེར་སྤྲུལ་པ་འགྱེད༔ མཐོང་དང་དྲན་པ་ཙམ་གྱིས་ཡེ་ཤེས་སྐྱེ༔ སྐལ་ལྡན་བུ་ལ་ལུས་དང་གྲིབ་མའི་ཚུལ༔ མི་འབྲལ་བྱིན་རླབས་ཕྲིན་ལས་
དབང་ཐོབ་ཤོག༔ ཨོཾ་ཨཱཿཧཱུྃ་ཌཱཀྐི་སེང་ཧ་མུ་ཁ་ཨ་བྷི་ཥིཉྩ་ཧཱུྃ༔ གཞན་ཡང་ཕྱི་ནང་གི་གཏེར་སྲུང་ཀུན་གྱིས་སྐལ་ལྡན་འདི་ལ༔ སྲུང་བ་དང་༔ བསྐྱབ་པ་དང་༔ སྦ་བར་མཛད་དུ་གསོལ༔ ཞེས་སོ། གུད་དུ་སྦས་པ། སླར་ཡང་ཚིག་དབང་རིན་པོ་ཆེའི་དོན་གྱི་ངོ་བོ་བསྟན་པ་ནི་སློབ་མས་གསེར་གྱི་མཎྜལ་ཕུལ་ནས། ཡེ་ཤེས་པ་དབབ་པ་ནི། ཧཱུྃ༔ སྔོན་གྱི་བསྐལ་པའི་དང་པོ་ལ༔ སོགས་ནས། སིདྡྷི་ཕ་ལ་ཧཱུྃ་ཨཱ༔ བུ་ཡི་སྙིང་གར་ཨཱདཀར་པོ་སྲན་མ་ཙམ༔ ཡེ་ཤེས་ཀྱི་འོད་ལྔ་འཕྲོ་བའི་སྟོབས་ཀྱིས་ལུས་ནམ་མཁར་ཡོད་པར་བསྒོམ༔ བླ་མས་ཐོད་རྔ་སྒྲོག་ཅིང་། ཨཱཿནི་སྐྱེ་བ་མེད་པ་ལ༔ ལུས་ནི་ཡེ་ཤེས་ལྔ་ཡི་ལུས༔ ནམ་མཁའི་ངང་ནས་རང་གསལ་འབར༔ ལུས་མེད་ཉམས་ཀྱི་ངོ་བོ་ལྟོས༔ ཞེས་བརྗོད་པས་ཉམས་སྐྱེའོ། །དེ་ནས་སློབ་བུ་ལ་རྣམ་སྣང་ཆོས་བདུན་བྱེད་དུ་བཅུག་སྟེ། ལྟ་སྟངས་དང་རིག་པ་ནམ་མཁར་ལྟོས་ཤིག༔ བྱས་ལ། བུ་ཁྱོད་སེམས་ཀྱི་ངོ་བོར་ལྟོས༔ བལྟས་པས་མི་མཐོང་ངང་ལ་ཞོག༔ ཁྱོད་ཀྱི་རིག་པ་ཕྱོགས་བཞིར་ཐོངས༔ བཏང་ཚེ་ཕྱི་ནང་འགྲོ་འོང་མེད༔ འགྲོ་བར་སྙམ་ཡང་རང་གི་སེམས༔ སེམས་ནི་ངོས་བཟུང་འཛིན་པ་བྲལ༔ ངོ་བོ་སྟོང་ལ་རང་བཞིན་གསལ༔ བུ་ཁྱོད་འདི་ཡི་རང་
ཞལ་ལྟོས༔ འདི་ཞེས་མཚན་མར་མ་གྲུབ་ཀྱང་༔ དེ་དོན་རྟོགས་ན་རྩལ་དབང་ས༔ ཚེ་གཅིག་ཐར་ལམ་བགྲོད་པར་འགྱུར༔ རྒྱས་པར་འདོད་ན་སྲོག་ཕུར་དང་ཨ་ཏིའི་ལེའུ་བཤད་པར་བྱ་བ་ནི། དེ་ནས་པདྨའི་སྲོག་ཕུར་བསྟན༔ སེམས་ཉིད་པདྨ་འབྱུང་གནས་དེ༔ ལོགས་ན་བསྒོམ་དང་བསྒྲུབ་ཏུ་མེད༔ རང་སེམས་གསལ་ལ་མ་འགགས་པ༔ རང་བྱུང་རང་ཤར་ཅིར་ཡང་སྣང་༔ ཞི་བ་ཚེ་དཔག་མེད་དུ་སྣང་༔ འཕགས་པ་སྤྱན་རས་གཟིགས་སུ་སྣང་༔ ཁྲོ་རྒྱལ་དབང་ཆེན་རྟ་མགྲིན་སྣང་༔ ཞལ་དང་ཕྱག་ནི་ཅིར་ཡང་སྣང་༔ དེ་དག་སེམས་ཀྱི་ཆོ་འཕྲུལ་ཡིན༔ རང་བྱུང་རང་ཤར་རང་སར་གྲོལ༔ ངོ་བོ་སྟོང་པ་ཆོས་ཀྱི་སྐུ༔ མ་འགགས་རང་གསལ་ལོངས་སྤྱོད་རྫོགས༔ རིག་རྩལ་འགགས་མེད་སྤྲུལ་པའི་སྐུ༔ སྐུ་གསུམ་རང་ཆས་མ་བསྒྲུབ་འགྲུབ༔ རང་ཉིད་ཡེ་ནས་པད་འབྱུང་ཡིན༔ ཨོཾ༔ ཨ་ཏི་ཁྱབ་གདལ་ཆེན་པོ་ནི༔ གུ་རུ་པདྨ་འོད་འབར་དེ༔ ལོགས་ན་ཡོད་པ་མ་ཡིན་ནོ༔ རང་ཉིད་ལྷ་རུ་སྣང་བ་དེ༔ ལྷ་འདི་རང་ལ་རང་ཉིད་ལྷ༔ སེམས་ཉིད་རྟོགས་ན་ཕྱག་རྒྱ་ཆེ༔ སེམས་ལས་སངས་རྒྱས་གཞན་མ་ཚོལ༔ སྐུ་མདོག་ཕྱག་
མཚན་ཆ་ལུགས་ཀྱང་༔ སེམས་ཉིད་སྣང་བ་དེ་ལྟར་ཡིན༔ སྣ་ཚོགས་གཟུགས་ཅན་ཡིད་ལས་སྐྱེས༔ གང་ལྟར་སྣང་བ་དེ་ལྟར་སྣང་༔ མ་སྒྲུབ་ཡེ་ནས་རང་བྱུང་གནས༔ མ་བཙལ་བཞག་པས་རང་ས་ཟིན༔ དེ་ལྟར་རྟོགས་ན་ཨོ་རྒྱན་མཁན༔ ཆོས་ཉིད་དོན་གྱི་པད་འབྱུང་ཡིན༔ གཟུང་འཛིན་སྐུ་རུ་ཞེན་པ་དེ་གྲོལ་བར་འདོད་ཀྱང་འཁོར་བར་འཆིང་༔ བསྒྲུབ་པར་འདོད་ཀྱང་འགྲུབ་མི་སྲིད༔ དེ་བས་ལྷུན་གྲུབ་ངང་ལ་ཞོག༔ ཅེས་སོ༔ གཏོར་དབང་ནི། དེ་ལྟར་དངོས་གཞི་རྩ་བའི་དབང་རྣམས་སོང་ནས། ད་ནི་གཏོར་མ་ལ་བརྟེན་ནས་བཀའ་བསྒོ་བའི་དབང་བྱེད་པ་ནི། གཏོར་མ་འདི་ཉིད་འདི་ལྟ་བུ་མ་ཡིན་པར། རྒྱལ་བ་དཀོན་མཆོག་སྤྱི་འདུས་པདྨ་འོད་འབར་དུ་གསལ་ཐོབ་ལ། དེའི་སྟེང་གི་ཆ་ལ་བཀའ་བརྒྱུད་བླ་མ། བར་གྱི་ཆ་ལ་ཡི་དམ་ལྷ་ཚོགས། འོག་གི་ཆ་ལ་ཆོས་སྐྱོང་སྲུང་མ་རྣམས། ཁྱེད་རང་གི་སྤྱི་བོར་བྱོན་ཏེ། ངེད་ཀྱི་གསོལ་བ་ཇི་ལྟར་བཏབ་པའི་བྱིན་རླབས་དང་དངོས་གྲུབ་ཐམས་ཅད་ཐོབ་བྱུང་སྙམ་པ་གྱིས་ཤིག །དུས་གསུམ་སངས་རྒྱས་ཐམས་ཅད་ཀྱིས༔ སྐུ་གསུང་ཐུགས་ཀྱི་བྱིན་བརླབས་ཤིང་༔ དངོས་གྲུབ་རྣམ་གཉིས་
འབྱུང་བའི་གནས༔ གཏོར་མའི་དབང་བསྐུར་ཆེན་པོ་སྦྱིན༔ ཛཧཱུྃ་བཾ་ཧོ༔ ཆོས་སྐུ་ཀུན་ཏུ་བཟང་པོ། དྲུག་པ་རྡོ་རྗེ་འཆང་ཆེན། སྟོན་པ་རྡོ་རྗེ་སེམས་དཔའ། རིག་འཛིན་དགའ་རབ་རྡོ་རྗེ། གུ་རུ་ཤྲཱི་སེང་ཧ། འཆི་མེད་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། ཉང་བན་ཏིང་འཛིན་བཟང་པོ། སྔགས་འཆང་ཧཱུྃ་ནག་མེ་འབར། ཆོས་བདག་བྷི་མའི་སྤྲུལ་པ། སྡོང་པོ་ཞྭ་དམར་ནག་།འབྲས་བུ་ལྔ། མེ་ཏོག་ལྟ་བུ་བཅུ། ལས་ཅན་ཆོས་བདག་ཉེར་གཅིག །གྲུབ་ཐོབ་རྟོགས་ལྡན་བརྒྱ་ཕྲག་ལ་སོགས་པ་རིག་འཛིན་བརྒྱུད་པའི་བླ་མ་དམ་པ་རྣམས་དང་། ཡི་དམ་ཆོས་སྐྱོང་སྲུང་མའི་ཚོགས་དང་བཅས་པས་བྱིན་གྱིས་རློབས་ཤིག །འདི་རྣམས་ལ་གནོད་ཅིང་འཚེ་བར་བྱེད་པའི་སྟེང་གདོན་གཟའ་རྒྱུ་སྐར། འོག་གདོན་ཀླུ་ས་བདག །བར་གདོན་གཉན་ཐེའུ་རང་། ཕྱོགས་མཚམས་ཀྱི་སྡེ་བརྒྱད་དྲེགས་པ། དུག་གསུམ་གྱི་འདྲེ་གདོན་འབྱུང་པོ། ན་འཆིའི་སྐག་དང་སྲི་ལང་ལ་སོགས་པའི་གནོད་པ་ཐམས་ཅད་ཉེ་བར་ཞི་བར་མཛོད་ཅིག །ཞི་རྒྱས་དབང་དྲག་གི་ཕྲིན་ལས་ཐམས་ཅད་ཐོགས་པ་མེད་པར་མཛོད་ཅིག །
མཆོག་ཐུན་མོང་གི་དངོས་གྲུབ་ཐམས་ཅད་སྩོལ་ཅིག །ཨོཾ་ཨཱ༔ཧཱུྃ། ཀཱ་ཡ་ཝཱཀྐ་ཙིཏྟ་ཨ་བྷི་ཥིཉྩ་ཧཱུྃ༔ རྒྱལ་བ་སྲས་བཅས་བདེན་པའི་བྱིན་རླབས་དང་། །གུ་རུ་པདྨ་འབྱུང་གནས་བྱིན་རླབས་ཀྱིས། །འགྲོ་བ་འདི་དག་བདག་གིས་སྲུངས་སོགས་དང་། བསྔོ་སྨོན་བཀྲ་ཤིས་དགེ་བསྐུལ་སོགས་བྱའོ། །འདི་ནི་གུད་དུ་སྦས་པས། སྒྲུབ་པ་ངེས་པར་བྱེད་པ་མ་གཏོགས་པ་གཞན་ལ་མི་བསྐུར་དམ་པར་བྱའོ། །དེ་ལྟར་རང་གིས་དབང་ལེན་པ་དང་། གཞན་ལ་སྦྱིན་པ་སོགས་ལ། མཚམས་གཅོད་སྲུང་འཁོར་སྐྱབས་འགྲོ་ནས་བཟུང་། ལས་གཞུང་ཚོགས་དང་བཅས། བཟླས་པ་སྒྲུབ་བསྐུལ་ལ་བརྩོན་པར་བྱའོ། །གཏེར་གཞུང་ཉིད་ལས༔ ༧ རཱ་ག་ཨ་སྱས་བསྒྲིགས།། །། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས། །