བཀའ་རྫོགས་པ་ཆེན་པོ་ཡང་ཟབ་དཀོན་མཆོག་སྤྱི་འདུས་པདྨ་འོད་འབར་གྱི་ཟིན་བྲིས།།
བཀའ་རྫོགས་པ་ཆེན་པོ་ཡང་ཟབ་དཀོན་མཆོག་སྤྱི་འདུས་པདྨ་འོད་འབར་གྱི་ཟིན་བྲིས་བཞུགས་སོ།།
གུ་རུ་དྷེ་ཝ་ཌཱཀི་ནཱི། པདྨ་འོད་འབར་རྒྱས་པར་འདོད་ན། དཀྱིལ་འཁོར་པདྨ་འདབ་བཞིའི་དབུས་སུ། བུམ་པ་རྫས་ལྡན་ཁ་རྒྱན་མགུལ་ཆིངས་དང་ཙཀྐི་བཙུགས་པ། ཚེ་གཏོར་ཚེ་ཆང་ཚེ་རིལ་དང་། གཡས་སུ་སྨན་མཆོད། གཡོན་དུ་བདུད་རྩི། མདུན་དུ་རཀྟ། གཏོར་མ་རིན་ཆེན་འབར་བ་ལ་མཐར་མཆོད་པ་སྐོར་བཤམ་འགྲུབ་ན་ལེགས། མེད་ན་མདུན་བསྐྱེད་ཀྱི་རྟེན་ཨོ་རྒྱན་སྐུ་འདྲའམ་ཐང་སྐུ། དེ་ཡང་མེད་ན་བླ་མ་གཏོར་མའི་རྩེར་མདུན་བསྐྱེད་འོད་འབར་བསྐྱེད་ལ། གཏོར་མ་དེ་ཉིད་བདུད་རྩི་རྒྱ་མཚོ་འདོད་ཡོན་མཆོད་སྤྲིན་འཕྲོ་བར་བསྒོམས་པས་ཆོག །སྔོན་འགྲོ་དཀར་བགེགས་ནི་དང་པོ་གཅིག་བཏང་བས། རྒྱུན་དུ་མི་དགོས་སོ། །སྐྱབས་
འགྲོ་སེམས་བསྐྱེད་རྒྱས་པར་ཡོད་ན་ལེགས། མེད་ཀྱང་གཞུང་དེ་ཉིད་དུ་ཚང་ཡོད།། ༈ ཧྲཱི༔ བདག་ཉིད་འགྱུར་མེད་ཡེ་ནས་རྡོ་རྗེའི་སྐུ༔ ཞེས་སོགས་མཚམས་གཅོད་དུས། བདག་ཉིད་སྐད་ཅིག་གིས་པདྨ་འོད་འབར་གསལ་བཏབ་ནས། སྣོད་ཀྱི་འཇིག་རྟེན་པདྨ་འོད་འབར་གྱི་ཞིང་ཁམས་བདག་དང་སེམས་ཅན་ཐམས་ཅད་ཡེ་ནས་ཡི་དམ་པདྨ་འོད་འབར་ཡིན་པའི་དོན་དྲན་པ་ཙམ་བྱས་ལ། རང་ལས་སྤྲོས་པའི་འཇའ་འོད་དང་མཚོན་ཆ་སྣ་ཚོགས་ཀྱིས་ནམ་མཁའ་དང་བར་སྣང་ཁྱབ་པར་སྤྲོས་པས། བགེགས་དང་གནོད་བྱེད་ཐམས་ཅད་རྒྱ་མཚོའི་ཕར་འགྲམ་དུ་བསྐྲད་ལ། འོད་ཟེར་ཚུར་འདུས་མཚོན་ཆ་སྣ་ཚོགས་དང་རྡོ་རྗེའི་ས་གཞི་ར་བ་དང་གུར་གྱི་ཕྱི་རོལ་
དུ་མེ་ཁ་དོག་སྣ་ལྔ་འུ་རུ་རུ་འབར་བར་བསྒོམས་ལ། ཨོཾ་བཛྲ་རཀྟ་ཛྭ་ལ་སོགས་བརྗོད་དོ། །དམིགས་པ་མ་ཟིན་ན་སྔགས་དེ་མང་དུ་བརྗོད། ༈ དེ་ནས། ཨོཾ་ཨཱ༔ཧཱུྃ༔ སྐྱབས་གནས་དམ་པ་ཞེས་སོགས་བརྗོད་པ་ཙམ་གྱིས་མདུན་གྱི་ནམ་མཁར་པདྨ་འོད་འབར་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྐོར་བ་སྤྲིན་གྱི་ཕུང་པོ་ལྟ་བུར་བཞུགས་པར་བྷྱོ་ལ། སེམས་ཅན་ཐམས་ཅད་ལ་སྙིང་རྗེ་དྲག་པོར་བསྒོམས་ལ། རྒྱུད་དྲུག་འཁོར་བར་སོགས་བརྗོད་ཅིང་། གཏོང་ལེན་དམིགས་པ་ཐུན་གཅིག་བསྒོམ། དམིགས་པ་མ་ཟིན་ན་སྐྱབས་སེམས་ཚིགས་བཅད་དེ་གཉིས་དབྱངས་དང་བཅས་པས་ཚར་མང་དུ་འདོན་ནོ། ༈ །དེ་ནས་ཡན་ལག་བདུན་པ་ནི། འདི་སྤྲོས་མེད་དོན་གྱི་ཡན་ལག་བདུན་པ་ཡིན་པས་དམིགས་པ་བསྒོམ་མི་དགོས་ཏེ། མ་ཡེངས་སེམས་ངོ་སྐྱོངས་ནས་འདོན་པས་ཆོག་དོན་ཐམས་ཅད་ཚང་བའོ། ༈ །དེ་ནས་གཞུང་ལྟར་རང་གི་སྤྱི་བོར་ངོ་བོ་ཨོ་རྒྱན་ཡིན་པ་ལ་རྣམ་པ་རྡོར་སེམས་བསྒོམས་ལ་དམིགས་པ་གཞུང་ལྟར་བྱ་ཞིང་། ཡིག་བརྒྱ་རབ་བརྒྱ་ཚར། འབྲིང་ཉེར་གཅིག །ཐ་མ་ཚར་བདུན་བརྗོད་ལ། སྐུ་ལས་བདུད་རྩིའི་རྒྱུན་བབས་ནས་ནད་གདོན་སྡིག་གྲིབ་ཐམས་ཅད་དག །ནད་ཐམས་ཅད་རྣག་ཁྲག་དུད་ཁུའི་རྣམ་པར་ཕྱིར་ཐོན། གདོན་ཐམས་ཅད་འབུ་སྲིན་གྱི་རྣམ་པར་ཐོན་ནས་འཇའ་ཡལ་བ་
ལྟར་བསྒོམ། རྡོ་རྗེ་སེམས་དཔའ་ཡང་འོད་དུ་ཞུ་ནས་རང་ལ་ཐིམ་པར་བསྒོམ། ༈ དེ་ནས་སྔར་ལྟར་སྐྱབས་ཡུལ་ནམ་མཁར་ཨོ་རྒྱན་ལ་རྩ་བ་གསུམ་གྱི་ལྷ་ཚོགས་རྣམས་ཡོད་པ་དེ་གསལ་འདེབས་བྱས་ལ། རང་གི་ལུས་སེམས་ལོངས་སྤྱོད་དགེ་རྩ་དང་བཅས་པ་མཎྜལ་དུ་དམིགས་ཏེ་ཕུལ་བའི་མོས་པས་མཎྜལ་དེ་ལན་གསུམ་མམ་བདུན་ནམ་ཕུལ། དེ་ནས་ནམ་མཁའི་ཨོ་རྒྱན་རྩ་བ་གསུམ་གྱི་ལྷ་ཚོགས་རྣམས་ལ་གསོལ་བ་བཏབ་པས། གནས་གསུམ་ནས་འོད་ཟེར་དཀར་དམར་མཐིང་གསུམ་བྱུང་ནས་རང་གི་གནས་གསུམ་དུ་ཐིམ། ལྷ་ཚོགས་འོད་དུ་ཞུ་ནས་རང་ལ་ཐིམ་པས་དབང་བཞི་ཐོབ་པར་བསྒོམ། ༈ མཆོད་པ་བྱིན་རླབས་དུས་རང་པདྨ་འོད་འབར་གྱི་དཔྲལ་བ་མགྲིན་པ་ཐུགས་ཀ་གསུམ་དུ་ཡི་གེ་ཨོཾ་ཨཱ༔ཧཱུྃ་གསུམ་གསལ་བ་ལས་འོད་ཟེར་འཕྲོས་པས། མཆོད་རྫས་མ་དག་པ་ཐམས་ཅད་རཾ་ཡཾ་ཁཾ་ལས་འོད་ཟེར་མེ་ཆུ་རླུང་གསུམ་གྱི་རྣམ་པས་བསྲེགས་བཀྲུས་གཏོར་ནས་དག་པའི་མཆོད་རྫས་ཕྱི་མཆོད་མེ་ཏོག་བདུག་སྤོས་སོགས། ནང་མཆོད་སྨན་རཀ་གཏོར་གསུམ་ངོ་བོ་ཡེ་ཤེས་ཀྱི་བདུད་རྩི་རྣམ་པ་ལྷ་མིའི་ལོངས་སྤྱོད་ཟད་པ་མེད་པས་འཇིག་རྟེན་ཁེངས་པར་མོས་ལ། ཨོཾ་ཨཱཿཧཱུྃ༔ སརྦ་པཉྩ་ཨ་མྲི་ཏ་སོགས་བརྗོད། ༈ དེ་ནས་ཆོས་རྣམས་ཐམས་ཅད་སྟོང་ཉིད་ནམ་མཁའ་ལྟ་བུར་མོས་པའམ། ཡང་ན་རང་གི་ཉམས་ལེན་སེམས་ངོ་ལ་
ཡུད་ཙམ་བལྟ་ཞིང་། ཨོཾ་ཨཱཿཧཱུྃ༔ འདི་ལྟར་སྣང་སྲིད་ཅེས་སོགས་བརྗོད། སྟོང་ཉིད་དེའི་ངང་ལས་རང་སེམས་པདྨ་འོད་འབར་མངོན་རྟོགས་ལྟར་བསྐྱེད། རྙིང་མའི་ལུགས་འདི་ལ་མངོན་རྟོགས་ཚར་གཅིག་གིས་བདག་བསྐྱེད། མདུན་བསྐྱེད། བུམ་བསྐྱེད། དབང་དུས་ཡིན་ན་གཏོར་མ་ལྷར་བསྐྱེད་པ་ཐམས་ཅད་དུས་གཅིག་བསྒོམ། རྒྱུན་དུ་བདག་མདུན་དུས་གཅིག་ལ་བསྒོམ་མོ། །དེ་ལྟར་དམིགས་པ་ཟིན་དཀའ་བའི་ཕྱིར། རང་གིས་གང་ཤེས་དབྱངས་དང་བཅས་པས། ༈ ཧྲཱིཿ བདག་ཉིད་ཐ་མལ་རང་སེམས་ཞེས་སོགས་འདོན་སྒོམ་བྱས་པས་དམིགས་པ་ཟིན་འོང་ལ། དེ་ནས་བདག་མདུན་ཐམས་ཅད་ཀྱི་ཐུགས་ཀའི་ཧཱི༔ལས་འོད་ཟེར་ཁ་དོག་སྣ་ཚོགས་པ་དམར་པོ་ཤས་ཆེ་བ་ལྷོ་ནུབ་རྔ་ཡབ་གླིང་དུ་འཕྲོས་པས། ཨོ་རྒྱན་རིན་པོ་ཆེའི་ཐུགས་ཀར་འོད་ཟེར་དེས་རེག་པས་ཐུགས་རྗེས་དགོངས་ནས། བསྒོམ་པ་ལྟ་བུའི་ཨོ་རྒྱན་དཔག་ཏུ་མེད་པ་ཁ་བ་བུ་ཡུག་འཚུབ་པ་ལྟར་རོལ་མོའི་སྒྲ་དང་བཅས་ཏེ་བྱོན་ནས། བདག་མདུན་རྣམས་ལ་སིབ་སིབ་ཐིམ་པར་བསྒོམ་ཞིང་སྤོས་དང་རོལ་མོ་བྱའོ། །མེད་ཀྱང་དད་གུས་བྱས་ལ་དབྱངས་སྙན་པོས་བྱའོ། །བག་དྲོ་ཐེབ་ཐེབ།་ཉམས་དགའ་ཡལ་ཡལ་དང་། ཉམས་རྟོགས་གློ་བུར་དུ་སྐྱེ་བ་དང་། དད་པའི་དབང་གིས་མཆི་མ་འཁྲུགས་པ་བྱུང་ན་ཨོ་རྒྱན་བྱོན་པའི་རྟགས་སོ། །དེ་ཚེ་དགའ་སྤྲོ་གྱིས་
ལ་བདུད་མ་ཞུགས་པ་གལ་ཆེ། ༈ ཧྲཱི༔ སྔོན་གྱི་བསྐལ་པའི་དང་པོ་ལ༔ ཞེས་སོགས་དེར་སྤྱན་དྲངས་ཤིང་། དམིགས་པ་མ་ཟིན་བར་དུ་མ་བཅོས་ངང་ནས་ཚར་གསུམ་བྱ། འདི་ལ་བཞུགས་གསོལ་མི་དགོས་སོ། །སྐད་ཅིག་གིས་དམ་ཚིག་པ་ལ་བསྟིམ་སྟེ། བདག་མདུན་དུས་གཅིག་ལ་བསྟིམ་པར་བྱའོ། ༈ །དེ་ནས་མཆོད་པ། ཨོཾ་ཨཱ༔ཧཱུྃ༔ མཆོད་འོས་ཕྱི་ནང་སྣོད་བཅུད་ཀུན༔ སོགས་ཀྱི་སྐབས་སུ་རང་གི་ཐུགས་ཀ་ནས་མཆོད་པའི་ལྷ་མོ་དཔག་ཏུ་མེད་པ་སྤྲུལ་ནས། མེ་ཏོག་མ་མེ་ཏོག་ཐོགས་པ་གྲངས་མེད་པ་འཕྲོས་ཏེ། བདག་མདུན་ཐམས་ཅད་ཀྱི་སྤྱན་ལ་མཆོད་ནས་ལྷ་མོ་རྣམས་ཀྱང་སྤྱན་ལ་ཐིམ་པ་སོགས། བདུག་སྤོས༔ མར་མེ་མ༔ དྲི་ཆབ་མ༔ ཞལ་ཟས་མ༔ རོལ་མོ་མ་རྣམས་ཀྱང་གཞུང་ཚིག་ལྟར་སོ་སོར་མཆོད། སླར་ཡང་སྤྲུལ་པའི་ལྷ་མོ་རྣམས་ཀྱིས་ཕྱག་ན་ཀ་པཱ་ལ་རེ་རེ་ཐོགས་ནས། སྨན་མཆོད་བདུད་རྩི་རྒྱ་མཚོ་རྣམས་དང་། གཏོར་མ་བདུད་རྩི་རྒྱ་མཚོ་རྣམས་བཅུས་ཏེ་བདག་མདུན་སོ་སོ་ལ་མཆོད། ལྷ་མོ་དམར་མོའི་ཚོགས་སྤྲོས་ཏེ་རཀྟ་བདུད་རྩི་དམར་པོ་ནས་བཅུས་ཏེ་མཆོད་པར་བསྒོམས་ལ། པཉྩ་ར་བྷ་ལིང་ཏ་ཁཱ་ཧི༔ བརྗོད། དེ་ནས་གཏོར་བསྔོས་སྐབས་འདིར་སྦྱར་ཀྱང་ལེགས། ལོགས་སུ་བྱས་ཀྱང་རུང་། དེ་ནས་མཆོད་པའི་ལྷ་མོ་རྣམས་ཀྱིས་མགྲིན་གཅིག་ཏུ་
དབྱངས་སྙན་པོས། བདག་མདུན་ཐམས་ཅད་ལ་དུས་གཅིག་ལ་བསྟོད་པ་བྱེད་པར་བསྒོམ་ལ། ༈ ཧྲཱི༔ རྒྱལ་བ་ཐམས་ཅད་ཡེ་ཤེས་སོགས་བསྟོད་པ་བྱའོ། །བསྟོད་པ་ཚར་ནས་ལྷ་མོ་རྣམས་རང་ལ་བསྟིམ། ༈ དེ་ནས་བསྙེན་སྒྲུབ་ནི། སྒྲུབ་ཁང་བྱི་དོར་བྱས་ལ། གོང་ལྟར་མཆོད་གཏོར་ལ་སོགས་བཤམས་ནས། བསང་ཆུས་ཁྱིམ་ལ་ཆག་ཆག་བཏབ་ནས། གུ་གུལ་ལམ་སྤོས་སམ་མེད་ན་ཤུག་དུད་ཀྱིས་ཁང་པ་གོས་ལྷམ་གདན་ལ་སོགས་བསང་བར་བྱའོ། །རང་ཉིད་ཀྱང་ཡན་ལག་ལྔ་ཁྲུས་བྱས་ནས། །ཨོ་རྒྱན་གྱི་ཞལ་ཐང་ཡོད་ན་བཤམ། ཕུགས་གཏོར་མདུན་དུ་མཆོད་པ་རྣམ་ལྔ་སོགས་དང་། སྔོན་འགྲོ་དཀར་བགེགས་ཚོགས་གཏོར་འབུལ་སོགས། གཏོར་གསོས་མཐེབ་སྐྱུ་མང་པོ་བཟོ། དང་པོ་རང་གི་མལ་ས་བཟོས་ནས་གདན་མི་སྤྲུག །མི་དང་ངོ་མི་གཏུག །དེ་ནས་སྐྱབས་སེམས་མཆོད་པ་བྱིན་རླབས་རྔ་བྱིན་རླབས་སོགས་བྱ། སྔོན་འགྲོ་དཀར་གཏོར་དང་བགེགས་གཏོར་ཕུལ། དེ་དག་འདོན་ལུགས་དང་སྔོན་འགྲོའི་འཆའ་དེ་རྣམས་ཇི་ལྟར་བསྒོམ། གབ་འཁྲུགས་མེད། དེ་མཚམས་ཁྱིམ་ཐམས་ཅད་དུ་ཐུན་ནམ་ཡུངས་ཀར་རམ་ནས་ལྕག་བྲབས་ཤིང་དྲག་སྔགས་སུམ་བྷ་ནི་སོགས་གང་ཤེས་བརྗོད། ༈ དེ་ནས་རྔ་བསྐུལ་ཞིང་འོད་འབར་མགོ་ནས་བཛྲ་གུ་རུ་བསྙེན་པའི་བར་འདོན། དེ་ནས་བསྙེན་པ་བྱེད། དང་པོ་དཀར་
བགེགས་ཕུལ་ནས། དེ་ནས་མཚམས་མ་གྲོལ་བར་དུ་དཀར་བགེགས་མི་དགོས། སྐྱབས་འགྲོ་སེམས་བསྐྱེད་སོགས་ནངས་རེ་ཚར་རེ་ཆོག་པས་ཐུན་མཚམས་ལ་མི་དགོས། འོད་འབར་གཞུང་དེ་རབ་ཐུན་དྲུག་ལ་འདོན་ཏེ། ནམ་ལངས། ཉི་མ་རྩེ་ཤར། ཉིན་ཕྱེད། ཉི་མྱུར། དགོང་ཁ། སྲོད་ནི་དྲུག་གོ །དེ་ཙམ་མ་འཕྲོད་ན་ཞོགས་པ། ཉིན་ཕྱེད། དགོང་ཁ། སྲོད་དང་ཐུན་བཞི་བྱེད། ཐུན་ཟེར་བའི་དོན་ནི། འོད་འབར་དབུ་བཙུགས་ནས་བསྙེན་པ་སྟོང་ཚོ་ལྔ་དྲུག་གམ་མང་ཉུང་དེ་ཙམ་མ་ཐོན་བར་དམིགས་པའི་ངང་ལ་མ་ཡེངས་མ་བཅོས་པར་བྱེད་པ་ཐུན་ཡིན། ཐུན་མཚམས་ཟེར་བའི་དོན་ནི། དེ་ནས་བསྐྱེད་རིམ་དམིགས་པས་པདྨ་འོད་འབར་དུ་བསྒོམ། དེ་སྟོང་ཉིད་དུ་བསྡུས་ནས། སྨོན་ལམ་གྱིས་རྒྱས་བཏབ་ཚར་ན་ཐུན་མཚམས་ཟེར། ངག་རྒྱུན་དུ་བཅད་ཐུབ་ན་བྱིན་རླབས་ཆེ་སྟེ། ངག་བཅད་ན་འབུམ་འགྱུར་དུ་བཤད། གལ་ཏེ་ངག་བཏང་དགོས་བྱུང་ན། ཐུན་མཚམས་སུ་བཏང་རུང་། ཐུན་གྱི་དཀྱིལ་དུ་བཏང་ན་བྱིན་རླབས་ཉམས་པ་ཡིན། ཚོགས་གཏོར་འབུལ་རྣམས་ནུབ་དང་པོ་དང་། ཚེས་བཅུ། དགུ་༧གཏོར་ཡིན་པའི་ཉི་ཤུ་དགུ་དང་། མཚམས་གྲོལ་ནུབ་ལ་བྱའོ། །རྒྱུན་དུ་མི་དགོས། དགོང་ཁའི་འོད་འབར་མཇུག་ཏུ་དྲག་པོ་སེང་གདོང་མ་གཉིས་བྱ། ཐུན་ཐམས་ཅད་ལ་མི་དགོས་སོ། །གཞན་ཡི་དམ་གང་
འདོད་དྲག་པོའི་འོག་ཏུ་འདོན། ཡང་ཆོས་སྐྱོང་གང་ཡོད་སེང་གདོང་མའི་འོག་ཏུ་འདོན། ཕུགས་གཏོར་མཐའི་དཀར་གཏོར་དེ་ཕྱི་ཡུལ་ལྷ་བཟང་དབྱ་མཛད་རོག །གཏོར་འབུལ་གྲལ་དཀར་གཏོར་གཅིག་སླར་གཞི་བདག་ལ་བསྔོ་བ་གལ་ཆེ། ནུབ་ཉལ་ཁར་སྔགས་ཕྲེང་གསེར་གྱི་རྡོ་རྗེར་བསྡུ། བསྔོ་བ་སྨོན་ལམ་བཀྲ་ཤིས་རྣམས་བརྗོད་ནས་གཉིད་ལོག །ནངས་སྔ་དང་ཐོ་རངས་གཉིད་སད་ནས་སྐད་ཅིག་ལ་རིང་པདྨ་འོད་འབར་བསྒོམས་ལ་བསྙེན་པ་བྱེད་ཀྱང་རུང་། གཏོར་མ་གསོ་ནས། འཕྲོད་ན་ནམ་ལངས་ཀྱི་ཐུན་དེ་ཐོ་རངས་ནས་བཟུང་ཡང་ལེགས་པས་རྔ་རྡུང་ནས་འདོན་པར་བྱའོ། །དམིགས་པ་རྒྱས་པ་ཟིན་དཀའ་ནའང་དྲན་རྫོགས་སུ་མཚམས་གཅོད་བཛྲ་རཀྟ་ཛྭ་ལ་རཾ་ཟེར་དུས་རྡོ་རྗེའི་ར་བ་དྲྭ་བ་གུར་ས་གཞི་ཕྱི་རོལ་དུ་མེའི་ཕུང་པོ་འབར་བའི་ནང་དུ་རང་དང་བསྲུང་བྱ་ཚུད་པར་བསྒོམས་ལ། ཨོཾ་ཧཱུཾ་ཏྲཾ་ཧྲཱིཿ ཨཱཿ ལྔ་ཟེར་དུས་མཆོད་གཏོར་དེ་དག་བསམ་གྱིས་མི་ཁྱབ་པའི་བདུད་རྩིའི་རང་བཞིན་ལྷ་མིའི་ལོངས་སྤྱོད་ལྟ་བུར་གྱུར་པར་བསྒོམ་པ་དང་། ལྷ་བསྐྱེད་དུས་རང་ཉིད་ཨོ་རྒྱན་པདྨ་འོད་འབར་དུ་བསྒོམ་པ་དང་། དུས་གཅིག་ལ་མདུན་གྱི་སྒྲུབ་རྟེན་གཏོར་མ་རིན་ཆེན་འབར་བའམ་ཚེ་གཏོར་ཚེ་རིལ་ཐམས་ཅད་པདྨ་འོད་འབར་གྱི་སྐུར་བསྒོམ། ༈ ཧྲཱི༔ སྔོན་གྱི་བསྐལ་པའི་དང་པོ་ལ་སོགས་སྤྱན་འདྲེན་དུས་ཟངས་མདོག་དཔལ་རི་ནས་ཨོ་རྒྱན་རིན་པོ་ཆེ་སྐུ་
ཆེ་ཆུང་དཔག་ཏུ་མེད་པ་འཕྲོས་ནས་ཁ་བ་བུ་ཡུག་འཚུབ་པ་ལྟ་བུར་བྱོན་ནས་རང་ཉིད་དང་མདུན་བསྐྱེད་ལ་སིབ་སིབ་ཐིམ་པར་བསྒོམ། མཆོད་པ་བསྟོད་པ་དུས། རང་གི་ཐུགས་ཀ་ནས་མཆོད་པའི་ལྷ་མོ་དཔག་ཏུ་མེད་པ་འཕྲོས་ནས་མཆོད་པ་སྣ་ཚོགས་ཀྱིས། བདག་པདྨ་འོད་འབར་དང་། མདུན་བསྐྱེད་གཉིས་ཀ་མཆོད། བདུད་རྩི་གཏོར་མ་རཀྟ་བདུད་རྩི་རྒྱ་མཚོ་ཆེན་པོ་ནས་ཀ་པཱ་ལར་བཅུས་ནས་བདག་དང་མདུན་བསྐྱེད་གཉིས་ཀ་ལ་དུས་གཅིག་མཆོད། ལྷ་མོ་རྣམས་ཀྱིས་གླུ་དབྱངས་སྙན་པོས་རང་དང་མདུན་བསྐྱེད་ལ་བསྟོད་པ་ཕུལ་ནས། མཐར་ལྷ་མོ་རྣམས་བདག་མདུན་ལྷ་འདིའི་དབང་པོ་ལ་ཐིམ་པས་ཟག་མེད་བདེ་བའི་ཐུགས་དགྱེས་པར་བསྒོམ་པར་བྱའོ། །གཏོར་བསྔོས་དུས་མདུན་གྱི་ཨོ་རྒྱན་དེ་བཞིན་ལ་སྐུ་ཆེ་ཞིང་གཟི་བརྗིད་འབར་བ་ལས། འཁོར་བླ་མ་ཡི་དམ་མཁའ་འགྲོ་ཆོས་སྐྱོང་སྲུང་མ་མ་ལུས་པ་ཐམས་ཅད་ཀྱིས་བསྐོར་བ་ལ། མཆོད་པའི་ལྷ་མོ་རྣམས་ཀྱིས་གཏོར་མ་བདུད་རྩིའི་རྒྱ་མཚོའི་ནས་བྷནྡས་བཅུས་ཏེ་སོ་སོར་མཆོད་པར་བསྒོམ། བྷན་རེ་རེ་སོ་སོར་ཕྱག་ཏུ་ཕུལ་ནས་མཆོད་པར་བསྒོམ་ཡང་རུང་ངོ་། །ཡང་ལྗགས་ལས་འོད་ཟེར་གྱི་སྦུ་གུས་གཏོར་མ་གསོལ་བར་བསྒོམ། རྒྱལ་བ་རྣམས་མཆོད་པས་མཉེས་ནས་བྱིན་རླབས་མ་ལུས་སྩོལ། ཡི་དམ་ལྷ་ཚོགས་མཉེས་ནས་མཆོག་ཐུན་མོང་གི་དངོས་གྲུབ་ཐོབ། མཁའ་འགྲོ་ཆོས་
སྐྱོང་རྣམས་ཐུགས་དམ་བསྐངས་ནས་ཕྲིན་ལས་རྣམ་བཞི་ཐོབ་པར་བསྒོམ། སླར་ཡང་དམ་ཚིག་ཡེ་ཤེས་པ་རྣམས་རང་ལ་ཐིམ། འཇིག་རྟེན་པ་རྣམས་རང་གནས་སུ་གཤེགས་པར་བསམ། ༈ བསྙེན་སྒྲུབ་རང་གི་དམིགས་པ་ནི། བདག་དམ་ཚིག་ཡེ་ཤེས་པ་གཉིས་མེད་དུ་བསྒོམས་པའི་ཐུགས་ཀར་པད་ཟླའི་སྟེང་དུ་གསེར་གྱི་རྡོ་རྗེ་ཧཱུཾ་ངམ་ཧཱིཡིག་གིས་མཚན་པ་ལ་སྔགས་ཀྱི་ཕྲེང་བ་གཡས་སུ་འཁོར་བ་ལས་འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས་པས། རྒྱལ་བ་ཐམས་ཅད་ཀྱི་ཐུགས་རྒྱུད་བསྐུལ་འོད་ཟེར་ཚུར་འདུས་རང་ལ་ཐིམ། མཆོག་ཐུན་མོང་གི་དངོས་གྲུབ་ཐོབ། ཡང་སེམས་ཅན་ཐམས་ཅད་ལ་ཕོག་ནས་སྡིག་པ་དང་སྒྲིབ་པ་ཐམས་ཅད་དག་ནས། པདྨ་འོད་འབར་གྱི་སྐུར་གྱུར་ནས་སྔགས་སྒྲ་འུ་རུ་རུ་སྒྲོག་པར་བསྒོམ། བསྐྱེད་རིམ་དྲན་རྫོགས་སུ་བསྒོམ་པས་ཆོག །དྲན་པ་ཙམ་གྱིས་རྫོགས་པ་ཉིད། །ལྟ་བ་གྱད་ཀྱི་ལྷ་ཞེས་བྱ། །རྡོ་རྗེ་ལྟ་བུའི་ཏིང་འཛིན་ཡན། །རྫོགས་རིམ་མ་བཅོས་ངང་ནས་བཟླས་པ་མཆོག །སེམས་ཉིད་མ་བཅོས་པདྨ་འབྱུང་གནས་ཡིན། །ལོགས་ནས་བསྒོམ་ཞིང་བསྒྲུབ་ཏུ་མེད། །པདྨ་མ་བསྒྲུབ་སྲོག་ཐོབ་འགྲུབ། །ཅེས་གསུངས། བསྐྱེད་རིམ་རྫོགས་རིམ་བསྲེ་ཞིང་སྙིང་པོ་བཟླ། འདོན་ལུགས་ཀྱི་དམིགས་པ་རྣམས་ཁྱད་མེད་ཅིང་། ནངས་སྔའམ། ནུབ་རེ་ལ་སྔགས་ཐུན་རེ་ལ་སྟོང་རེ་ཙམ་བྱ། དུས་ནམ་ཡང་
ཉལ་ཁ། ཕྱི་ནང་སྣོད་བཅུད་ཐམས་ཅད་ཀུན་ཞེས་སོགས་བསྡུ་རིམ་ཚང་མ་ནི་དགོས་སོ། །མཚམས་གྲོལ་དུས་མདུན་བསྐྱེད་ཐང་སྐུ་སོགས་ལ་བསྟིམ། མེད་ན་གཤེགས་པའམ་རང་ལ་བསྡུ། བདག་བསྐྱེད་ཡེ་ཤེས་པ་ནམ་ཡང་མི་གཤེགས་རང་ལ་བསྟིམ་པར་བྱ། ཞེས་པ་འདིའང་སློབ་མ་རྣམས་ལ་ཕན་ཕྱིར་༧ ཨ་རཱ་གས་སྦྱར་བ་དགེ་བར་གྱུར་ཅིག །སརྦ་མངྒ་ལཾ།། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།