པདྨ་འོད་འབར་བསྙེན་ཐབས།
པདྨ་འོད་འབར་བསྙེན་ཐབས་ནི༔ ན་མོ་པྲ་ཝཱ་ཀ་ར་ཡེ༔ པདྨ་འོད་འབར་ཉམས་སུ་ལེན་ཚུལ་ལ༔ ཁྲིད་ལྟར་ཉམས་སུ་ལེན་པ༔ སྒྲུབ་ཆེན་ལྟར་ཉམས་སུ་ལེན་ཚུལ་མང་ན་ཡང་༔ འདི་ནི་ཤིན་ཏུ་བསྡུས་པ་ཉམས་སུ་ལེན་ཚུལ་ལ༔ ཕུགས་གཏོར་ཆ་ཚང་ཡོད་དམ༔ མེད་ནའང་བླ་མ་ཡི་དམ་མཁའ་འགྲོ་ཆོས་སྐྱོང་གཏོར་མ་བཤམ༔ མདུན་ན་ཨོ་རྒྱན་གྱི་སྐུ་འབུར་དོད་དམ༔ ཞལ་ཐང་ཡོད་ན་བཤམ༔ དང་པོ་སྔོན་འགྲོ་ལ་དཀར་གཏོར་བགེགས་གཏོར་ཕུལ༔ ཀུན་རིག་ལྟར་ཆ་གསུམ་བཏང་ན་ཡང་ཆོག༔ དེ་ནས་མཚམས་བསྡམ༔ སྒོ་རྩར་ཐོ་དཀར་པོ་བརྩེགས་པའི་རྩ་བར་གཞི་བདག་གཏོར་མ་ཕུལ༔ ཕྱིའི་བར་ཆད་ནང་དུ་མ་བཏང་༔ ནང་གི་དངོས་གྲུབ་ཕྱི་རུ་མ་བཏང་༔ ཞེས་བཀའ་བསྒོ༔ དེ་ནས་འོད་འབར་བསྙེན་པའི་བར་ཚར་གཅིག་འདོན་ལ༔ དེ་ཡང་མངོན་རྟོགས་ཚར་གཅིག་གིས་བདག་མདུན་གཉིས་དུས་གཅིག་བསྐྱེད༔ སྤྱན་འདྲེན་དུས་ཀྱང་དུས་གཅིག་སྤྱན་འདྲེན་རང་ལ་བསྟིམ༔ རང་གི་ཐུགས་ཀ་ནས་མཆོད་པའི་ལྷ་མོ་དཔག་ཏུ་མེད་པ་སྤྲོས་ལ༔ དེ་རྣམས་ཀྱིས་བདག་མདུན་གཉིས་ཀར་མཆོད་པ་འབུལ་ཞིང་བསྟོད་པ་བྱེད་པར་བསྒོམས་ལ་མཆོད་བསྟོད་
འདོན༔ དེ་ནས་རང་གི་སྙིང་དབུས་པདྨ་འདབ་མ་བརྒྱད་པའི་ལྟེ་བར་སྟེང་དུ་ཧཱུྃཡིག་ལངས་ཏེ་གནས་པའི་མཐར༔ བཛྲ་གུ་རུའི་སྔགས་ཀྱིས་བསྐོར་བར་བསྒོམ༔ དང་པོ་ཡིག་འབྲུ་མི་འཁོར་བར་འོད་ཟེར་ཁ་དོག་སྣ་ཚོགས་གཡས་སུ་འཁོར་བར་བསྒོམས་ལོ་སྟོང་ཙམ་འདོན༔ དེ་ནས་ཡི་གེ་གཡས་སུ་འཁོར་བར་བསྒོམ༔ ཧཱུྃཡིག་གཡོ་འགུལ་མེད་པ་གལ་ཆེ༔ དེ་ནས་ཡིག་འབྲུ་འཁོར་བཞིན་དེ་ཇེ་མགྱོགས་སུ་འཁོར་བ་ལས༔ འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས་པས༔ སངས་རྒྱས་བྱང་སེམས་ཐམས་ཅད་འོད་ཟེར་དེས་མཆོད༔ དེ་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་འཆི་མེད་ཚེའི་དངོས་གྲུབ་ཐམས་ཅད་འོད་ཟེར་ཁ་དོག་སྣ་ཚོགས་ཀྱི་ཚུལ་དུ་བསྡུས་ལ་རང་ལ་བསྟིམ༔ ཡང་འོད་ཟེར་འཕྲོས་པས༔ ས་ཆུ་མེ་རླུང་ནམ་མཁའི་བཅུད་དང་ཡོན་ཏན་ཐམས་ཅད་འོད་ཟེར་སྣ་ལྔའི་རྣམ་པར་བསྡུས་ནས་རང་ལ་བསྟིམ༔ ཡང་འོད་ཟེར་འཕྲོས་པས༔ ནང་བཅུད་ཀྱི་སེམས་ཅན་གྱི་སྡིག་སྒྲིབ་སྦྱངས༔ ལྷ་ཀླུ་མི་ལ་སོགས་པ་བསོད་ནམས་ཅན་རྣམས་ཀྱི་ཚེ་བསོད་ནམས་ཐམས་ཅད་འོད་ཟེར་དཀར་པོ་ཐིག་ལེའི་གཟུགས་དཀར་ལ་འཚེར་བ་སྣུམ་ལ་འདྲིལ་བ་དང་ཡི་གེ་ཧཱུྃ་ཡིག་ལྗང་གུ་བཀྲག་མདངས་
དང་ལྡན་པའི་རྣམ་པར་བསྡུས་ནས་རང་ལ་ཐིམ་པས་ཚེའི་དངོས་གྲུབ་ཐོབ་པར་བསྒོམས་ལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཨཱ་ཡུ་ཥ་ཧཱུྃ་ཧཱུྃ་ཛ༔ ཞེས་སྟོང་ཕྲག་མན་ཆད་ཅི་འགྲུབ་བཟླས༔ དེ་ནས་ཐུན་མཚམས་སུ༔ སྐྱབས་མེད་མགོན་མེད་སྐྱེ་འགྲོ་འདི་དག་ཀུན༔ ཞེས་སོགས་བཀྲ་ཤིས་བར་ཚང་བར་འདོན༔ བདག་བསྐྱེད་སྟོང་པར་བསྡུས༔ མདུན་བསྐྱེད་མི་གཤེགས་པར་བཞག་ལ༔ ཐུན་མཚམས་དེར་ངག་བཏང་དགོས་བྱུང་ན་བཏང་བས་ཆོག༔ མེ་མགོ་ལ་སོགས་བྱ་བ་ཅི་དགོས་སྒྲུབ༔ དེ་ནས་སྔར་ལྟར་ཐུན་བཟུང་སྟེ་དེ་འདྲའི་ཐུན་སྔ་དྲོ་ཉིན་གུང་དགོང་ཀ་གསུམ་ལ་བྱའོ༔ ནུབ་མོ་ཡང་འོད་འབར་ཚར་གཅིག་དང་དྲག་པོ་སེང་གདོང་མ་མགོན་པོ་ལྷ་མོའི་གཏོར་བསྔོས་གང་ཤེས་བྱ༔ ཆོས་སྤྱོད་ལ་སོགས་ཆག་མེད་ཡོད་ན་ཐུན་མཚམས་སུ་བྱེད༔ རྨི་ལམ་དུ་ནམ་མཁའ་ལ་འཕུར་བ༔ རི་རྩེར་ཕྱིན་པ༔ ལུས་ལས་རྣག་ཁྲག་མི་གཙང་བ་ཐོན་པ༔ མེ་ཏོག་དཀར་པོ་ཐུ་བ༔ གོས་དཀར་དྲི་མེད་གྱོན་པ༔ དཀར་གསུམ་དང་བདུད་རྩིས་ངོམས་པ༔ དར་ཕྱར་རྔ་རྡུང་ལུང་བསྟན་ཞལ་མཇལ་ཆོས་གཏེར་དང་ནོར་གཏེར་ཐོབ་པ་ལ་སོགས་རྨི་ལམ་ལེགས་པོ་འབྱུང་སྟེ༔ དེ་ལ་ང་
རྒྱལ་དང་རློམ་སེམས་སྤང་༔ ཚེ་རབས་ལས་སྒྲིབ་ལ་སློང་གི་ནད་ན་བ་དང་༔ བློ་མི་བདེ་བ་རྨིས་ལྟས་རྩུབ་པོ་བྱུང་ཡང་ལོག་ལྟ་དང་རྣམ་རྟོག་མི་བྱ༔ དང་པོ་ནུབ་དང་གྲོལ་ཁ་ནུབ་མོ་ཚེས་བཅུ་རྣམས་སུ་ཚོགས་དང་གཏོར་འབུལ་ཆད་མདོ་ཆོས་སྐྱོང་གང་ཤེས་གཏོར་མ་འབུལ༔ རྒྱུན་དུ་མི་དགོས༔ གྲོལ་ཁ་གཞི་བདག་དཀར་གཏོར་ཕུལ༔ ཐོ་བཤིག་དེ་ནས་མཚམས་གྲོལ་ནས་ཞག་གཉིས་གསུམ་དུ་ཐག་རིང་དུ་མི་འགྲོ༔ ༈ ཡང་མཚམས་མ་ཐོན་ན་རྒྱུན་དུ་འོད་འབར་ཚར་རེ་འདོན་ལ་དམིགས་པ་རྣམས་བྱེད་ཅིང་སྔགས་དེ་ཉིད་སྟོང་ཙམ་མམ་སུམ་བརྒྱ་ཙམ་བསྙེན༔ དེ་ཚེ་ངག་གཅོད༔ དེ་ནས་སྐྱབས་མེད་མགོན་མེད་སོགས་མན་ཆད་ཚང་བར་འདོན༔ ཐུན་བསྡུས་བཀྲ་ཤིས་བར་སྔ་དྲོ་བྱ༔ ནུབ་མོ་ཡང་འོད་འབར་ཚར་གཅིག་བཏོན་ལ་གཏོར་མ་གསོ་བྲན་བྱས་ལ༔ ཡི་དམ་ཆོས་སྐྱོང་གང་ཤེས་གཏོར་བསྔོས་བྱ༔ ཕུགས་གཏོར་དེ་རྣམས་ཀྱི་རྩེར་ལྷ་སོ་སོའི་ཕོ་བྲང་དང་བཅས་པ་བཞུགས་པ་ལ་གཏོར་མའི་རྐེད་པ་མན་ཆད་མཆོད་རྫས་དཔག་ཏུ་མེད་པར་བདུད་རྩིའི་རྒྱ་མཚོར་གྱུར་པར་བསྒོམས་ལ་རྒྱུན་དུ་གཤེགས་གསོལ་མི་དགོས༔ གཏོར་བསྔོས་དུས་རང་གི་ཐུགས་ཀ་ནས་མཆོད་པའི་ལྷ་མོ་སྤྲུལ་
ནས་ཕྱག་ན་བྷན་རེ་ཐོགས་ནས་བདུད་རྩིའི་རྒྱ་མཚོ་ལས་བཅུས་ཏེ་ལྷ་སོ་སོར་མཆོད་པར་བསྒོམ༔ ཐུན་མཚམས་སུ་བྱ་བ་གང་དགོས་བསྒྲུབ༔ ཅེས་༧ རཱ་ག་ཨ་སྱས་གསུངས་སོ༔ མངྒ་ལཾ། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།