བཀའ་རྫོགས་པ་ཆེན་པོ་ཡང་ཟབ་དཀོན་མཆོག་སྤྱི་འདུས་ཀྱི༔ ཞི་དྲག་སེང་གསུམ་གྱི་ཟིན་བྲིས་བསྡུས་པ།
བཀའ་རྫོགས་པ་ཆེན་པོ་ཡང་ཟབ་དཀོན་མཆོག་སྤྱི་འདུས་ཀྱི༔ ཞི་དྲག་སེང་གསུམ་གྱི་ཟིན་བྲིས་བསྡུས་པ་བཞུགས་སོ༔
ན་མོ་གུ་རུ་སིདྡྷི་ཧཱུྃ༔ རྫོགས་ཆེན་དཀོན་མཆོག་སྤྱི་འདུས་ཀྱི༔ སྒྲུབ་པ་ལ་སོགས་བྱ་འདོད་ན༔ མ་ཧཱ་ཡོ་གའི་བསྐྱེད་རིམ་དང་༔ ལས་བྱང་གཉིས་པོ་གབ་སྤྲད་བྱ༔ རྗེས་ནས་ཕྲིན་ལས་བཞི་སྒྲུབ་དང་༔ ལས་བཞིའི་སྦྱིན་སྲེག་སྦྲགས་པར་བྱ༔ ཚེ་སྒྲུབ་བྱེད་ན་དབང་ཆོག་དང་༔ ལས་བྱང་གཉིས་པོ་གབ་སྤྱད་བྱ༔ དེ་ལྟར་སྒྲུབ་པའི་ཆོ་ག་དང་༔ རྒྱུན་བསྙེན་ལས་བྱང་རྒྱུན་ཁྱེར་བྱ༔ ཚེས་བཅུ་ལ་སོགས་བྱེད་པའི་དུས༔ པདྨ་འོད་འབར་ལས་བྱང་འདོན༔ གསར་མའི་ལུགས་དང་མི་གཅིག་པའི༔ ལས་བྱང་ཚར་གཅིག་འདོན་པ་དེས༔ བདག་མདུན་བུམ་པ་གཏོར་མ་
སོགས༔ གསུམ་མམ་གཉིས་པོ་དུས་གཅིག་བསྐྱེད༔ ཡེ་ཤེས་མང་པོ་སྤྱན་འདྲེན་ནས༔ གཅིག་གིས་སོ་སོར་བསྟིམ་པ་དང་༔ སྤྲུལ་པའི་ལྷ་མོ་མང་པོ་ཡིས༔ སོ་སོར་མཆོད་བསྟོད་བྱེད་དམིགས་ནས༔ མཆོད་བསྟོད་ཚར་གཅིག་གིས་ཆོག་པ༔ རྙིང་མ་རང་གཞུང་ལུགས་སུ་ངེས༔ གསར་ཞེན་ཆེ་བ་ལ་ལ་ཡིས༔ དེ་ལ་ངེས་པ་མ་རྙེད་ནས༔ རྙིང་མར་བདག་མདུན་ནན་གྱིས་བཟོས༔ ཆོས་བསླད་བྱིན་རླབས་ཆུང་བ་དང་༔ གཏེར་སྲུང་མཁའ་འགྲོ་ཁྲོས་པ་ཡིས༔ མི་འཕྲུག་རྐྱེན་ངན་གཏོང་བར་གསུངས༔ རང་ཉིད་འོད་འབར་ཐུགས་ཀ་རུ༔ པདྨའི་སྟེང་དུ་ཡེ་
ཤེས་སེམས༔ གསེར་གྱི་རྡོ་རྗེ་རྩེ་ལྔ་པ༔ གྱེན་དུ་ལངས་བའི་ལྟེ་བའི་ནང་༔ ཟླ་སྟེང་ཧྲཱིཿལ་སྔགས་ཕྲེང་བསྐོར༔ དེ་ནི་གཏེ་ར་སྟོན་ཉིད་ཀྱིས་གསུངས༔ འོན་ཀྱང་ཐུགས་ཀར་པདྨ་དང་༔ ཟླ་སྟེང་ཧྲཱིཿལ་སྔགས་བསྐོར་ཆོག༔ སྔགས་ཕྲེང་ཧཱུྃཡིག་དང་བཅས་པ༔ དཀར་པོ་འོད་ལྔའི་མདངས་ཆགས་པའི༔ གཡས་སུ་སྔགས་ཕྲེང་འཁོར་བ་ལས༔ འོད་ཟེར་དཀར་པོ་ཕྱོགས་བཅུར་འཕྲོས༔ སངས་རྒྱས་བྱང་སེམས་རྩ་བ་གསུམ༔ མཆོད་ཅིང་བྱིན་རླབས་དངོས་གྲུབ་ཀུན༔ བསྡུས་ནས་རང་ཐིམ་དངོས་གྲུབ་ཐོབ༔ མར་འཕྲོས་རིགས་དྲུག་སེམས་ཅན་གྱི༔ སྒྲིབ་སྦྱངས་ཐམས་ཅད་པད་འབྱུང་གྱུར༔ བར་དུ་ལྷ་སྲིན་སྡེ་བརྒྱད་ལ༔ ཕོག་པས་དམ་བཏགས་སྲོག་སྙིང་དང་༔ མཐུ་སྟོབས་བསྡུས་ནས་རང་ཐོབ་གྱུར༔ བདག་བསྐྱེད་ཁོ་ནས་དམིགས་པ་བྱ༔ མདུན་བསྐྱེད་མཆོད་བསྟོད་འབུལ་བ་ནི༔ ཚོགས་བསགས་ཞིང་ཙམ་ཡིན་པའོ༔ བཛྲ་གུ་རུ་ཅི་ནུས་བཟླས༔ དེ་ནི་བྱིན་རླབས་རྩ་བ་ས༔ བླ་མ་ཨོ་རྒྱན་སྒྲུབ་པའོ༔ ༈ དེ་ནས་དྲག་པོ་བཏོན་ཙམ་ནི༔ བདག་མདུན་ཞི་བ་གནས་འགྱུར་ནས༔ གུ་རུ་དྲག་པོའི་སྐུར་གྱུར་ཏེ༔ ཞི་བའི་སྐུ་ནི་ཆུང་ངུ་ཞིག༔ རིགས་བདག་ཚུལ་དུ་
དབུ་ལ་བརྒྱན༔ སྤྱན་འདྲེན་ཚིག་དེ་བརྗོད་པའི་ཚེ༔ སྲིན་ཡུལ་ཟངས་མདོག་དཔལ་རི་ནས༔ ཨོ་རྒྱན་དྲག་པོའི་སྐུར་གྱུར་ནས༔ མང་པོ་སྤྱན་དྲངས་བདག་མདུན་ཐིམ༔ དྲག་པོའི་མཆོད་བསྟོད་གཞུང་ལྟར་འདོན༔ རང་ཉིད་ཐུགས་ཀར་ཉི་མའི་སྟེང་༔ ཧཱུྃ་ཡིག་བྱི་རུའི་མདོག་ཅན་མཐར༔ རྩ་སྔགས་སྡེ་བརྒྱད་མི་སྦྱར་བ༔ གཡས་སུ་དྲག་ཏུ་འཁོར་བ་ལས༔ འོད་ཟེར་དཔག་མེད་འཕྲོས་པ་ཡིས༔ ཁྲོ་བོ་ཀུན་གྱི་མཐུ་སྟོབས་དང་༔ ལྷ་སྲིན་དྲེགས་པའི་སྟོབས་ནུས་རྣམས༔ འོད་ཟེར་ཚུར་བསྡུས་རང་ལ་ཐིམ༔ ཨརྩིག་རྩ་སྔགས་ཅི་ནུས་བཟླས༔ དངོས་གྲུབ་རྩ་བ་ཡི་དམ་ལྷ༔ གུ་རུ་དྲག་པོ་སྒྲུབ་པའོ༔ དེ་ནས་སྐུ་ལས་སྤྲུལ་པ་ཡི༔ ཁྲོ་ཆུང་དཔག་ཏུ་མེད་པ་དང་༔ གནམ་ལྕགས་སྡིག་པ་གྲངས་མེད་དང་༔ མེ་དཔུང་རླུང་འཚུབ་བཅས་པ་འཕྲོས༔ ཁྲོ་ཆུང་ཡཀཱ་མེ་དབལ་དེ༔ དམར་ནག་ཐོ་བ་ཞགས་པ་འཛིན༔ གནོད་བྱེད་གདོན་རིགས་ཐམས་ཅད་ནི༔ ཞགས་པས་བཅིངས་ཤིང་ཐོ་བས་བརྡུང་༔ སྡིག་པ་རྣམས་ཀྱིས་སྟོབ་ཅིང་ཟོས༔ ལྷག་མ་མེས་བསྲེགས་རླུང་གིས་གཏོར༔ སྡེ་བརྒྱད་ཤཾ་བུ་བློ་ཟློག་ཅན༔ སྔགས་བཟླས་གཤམ་བཅས་སྦྱར་བ་དེ༔ གོང་
གི་ཨརྩིག་ཅི་ཙམ་བཏོན༔ དེ་ཡི་བཅུ་ཆའི་ཆ་ཙམ་འདོན༔ ༈ དེ་ནས་བདག་མདུན་གུ་དྲག་དེ༔ སྐད་ཅིག་སེང་གདོང་ལྷ་མོར་གྱུར༔ ཡབ་ནི་གུ་རུ་དྲག་པོ་དངོས༔ ཁ་ཊཾ་དུ་བསྒྱུར་མཆན་དུ་སྦྱོར༔ ཞི་བ་པདྨ་འོད་འབར་ནི༔ ཆུང་ངུ་མཁའ་འགྲོའི་དབུ་རྒྱན་ཚུལ༔ ཨོ་རྒྱན་སྤྲུལ་སྐུའི་ཞིང་ཁམས་ནས༔ སེང་གདོང་ལྷ་མོ་སྤྱན་དྲངས་ལ༔ བདག་མདུན་ལ་ཐིམ་མཆོད་བསྟོད་བྱ༔ ཐུགས་ཀར་ཉི་མའི་དཀྱིལ་འཁོར་སྟེང་༔ ཧཱུྃ་ཡིག་མཐིང་གའི་མཐའ་སྐོར་ལ༔ སྔགས་ནི་གཡོན་དུ་འཁོར་བར་དམིགས༔ ཡི་གེ་བཅུ་བཞི་ཅི་ནུས་བཟླས༔ རང་ཉིད་སེང་གདོང་ལྷ་མོ་ཡི༔ ཕྱག་གཡོན་ཉི་མ་གཡས་ཟླ་བ༔ ཉི་མར་བསྐལ་པའི་མེ་དཔུང་འབར༔ ཟླ་བར་བསྐལ་པའི་ཆུ་ཆེན་འབྲུབ༔ སྟེང་ནས་རླུང་ནག་འཚུབ་མ་འཕྲོས༔ ནད་གདོན་གནོད་བྱེད་ཐམས་ཅད་ནི༔ ཕུར་མ་རླུང་གིས་བསྡུས་པ་ལྟར༔་ཕྱག་གཡོན་ཉི་མའི་མཐིལ་དུ་སྤྱངས༔ ཕྱག་གཉིས་ཉི་ཟླ་ཆ་ལང་བརྡབས༔ གནོད་བྱེད་སྒོ་ང་བྲག་བརྒྱབ་བཞིན༔ མེས་སྲེག་ཆུས་བཀྲུས་ཐལ་བ་ཡང་༔ ས་འོག་གཤིན་རྗེའི་ཁར་སོང་དམིགས༔ ཆོས་སྤྱོད་ནང་ནས་འབྱུང་བ་ལྟར༔ ཐལ་རྡེབ་དམོད་བཅོལ་ལ་སོགས་བྱ༔ ཕྲིན་ལས་རྩ་
བ་མཁའ་འགྲོ་མའི༔ སྒྲུབ་པ་ལས་ཚོགས་རྐྱེན་ཟློག་ཟབ༔ ༈ དེ་ནས་ཚོགས་འཁོར་སོགས་ཡོད་ན༔ སྐད་ཅིག་བདག་ཉིད་སེང་གདོང་མ༔ པདྨ་འོད་འབར་ཞི་བར་བསྒྱུར༔ དེ་ནི་ཞི་དྲག་དབྱེར་མེད་དེ༔ སེང་གདོང་མ་ནི་ཁ་ཊཾ་དུ༔ བསྒྱུར་ནས་མཆན་དུ་བཅུག་པའོ༔ མདུན་གྱི་སེང་གདོང་ལྷ་མོ་ནི༔ དབུ་གཙུག་ཞི་བ་སྐུ་ཆེར་གྱུར༔ ནམ་མཁའི་ཁམས་གང་བླ་མས་བསྐོར༔ གཡོན་གྱི་ཁ་ཊཾ་གུ་དྲག་བསྒྱུར༔ བར་སྣང་ཁམས་བཞུགས་ཡི་དམ་བསྐོར༔ སེང་གདོང་མ་ནི་ས་ཡི་སྟེང་༔ མཁའ་འགྲོ་ཆོས་སྐྱོང་རྒྱ་མཚོས་བསྐོར༔ དེ་ལ་ཚོགས་མཆོད་ཕུལ་བར་དམིགས་ཚོགས་ཕུད་ཕུལ་ནས་གཏོར་བསྔོས་དང་༔ བསྐང་བ་ལ་སོགས་གང་འདོད་སྦྱར༔ གཏོར་བསྔོས་གསར་རྙིང་གང་འདོད་དེ༔ གསང་སྔགས་ནང་གཏོར་མ་དག་མ༔ མཁའ་འགྲོ་སྤྱི་གཏོར་དཀར་གཏོར་སོགས༔ ཐམས་ཅད་སྦྱར་བར་རུང་བའོ༔ ཚོགས་རོལ་ལྷག་མ་ཕུལ་ནས་ནི༔ དཀར་གཏོར་ཆུང་བ་གཅིག་དང་ནི༔ དམར་གཏོར་ཆེ་བ་གཅིག་བཤམས་ལ༔ དཀར་གཏོར་གཞི་བདག་སྤྱི་དང་ནི༔ ཆད་མདོ་ལ་ཡང་དགོས་པའོ༔ དམར་གཏོར་འགུགས་གཞུག་སྤྱི་ལྟར་བྱས༔ དྲག་པོའི་
གཞུང་གི་བསྐུལ་པ་ནི༔ ཧཱུྃ༔ དམར་ནག་གྲུ་གསུམ་འབར་བའི་མན་ཆད་ནས༔ སེང་གདོང་མ་ཡི་སྨད་ཀྱི་བསྐུལ་བར་དེ༔ གོང་དུ་མི་འདོན་དམར་གཏོར་འདི་ལ་འདོན༔ དེ་ནས་ཆད་མདོ་བརྟན་སྐྱོང་འོད་འབར་གཞུང་༔ དམར་གཏོར་དཀར་གཏོར་ལག་གཉིས་གཡས་གཡོན་འཛིན༔ མཚན་མོ་ཡིན་ན་མེ་རི་བཙུགས་བྱས་ཏེ༔ མཆོད་གཡོག་པ་ཡིས་བཀྱགས་ནས་འདོན་བྱ་དགོས༔ ཞིང་སྐྱོང་དཔའ་རོམ་བསྐང་བའི་མཇུག་གི་ནི༔ བདག་ཅག་འཁོར་དང་བཅས་ལ་གནོད་པ་ཡི༔ ཞེས་ནས་བཟུང་སྟེ་མཇུག་གི་བར༔ ལྟས་ངན་ཆོ་འཕྲུལ་དགྲ་བོའི་སྟེང་དུ་ཟློག༔ ཅེས་པའི་བར་དུ་བཏོན་ན་ཤིན་ཏུ་ལེགས་པ་སྟེ༔ འདི་ནི་ཆོས་སྐྱོང་སྤྱི་ཡི་ཟློག་པ་ཡིན༔ ཡང་ན་མགོན་པོ་པར་བུའི་ནང་གི་ནི༔ རྡོ་རྗེ་གར་གྱི་སྐོག་བསྒྱུར་ཟློག་པ་འདོན༔ དེ་ཡང་སྤྱི་ཡི་ཟློག་པ་ཡིན་ཞེས་བྱ༔ ཟློག་པ་མ་བཏོན་ན་ཡང་མ་ཚང་མེད༔ གཏོར་མ་ཕྱི་རོལ་ཕྱོགས་ནི་གཙང་སར་ཕུལ༔ དེ་ནས་འོད་འབར་མཇུག་གི་རྗེས་ཆོག་འདོན་མདུན་བསྐྱེད་སྐུ་གསུང་ཐུགས་རྟེན་ལ་ཐིམ་དམིགས༔ བདག་བསྐྱེད་ཡེ་ནས་མི་གཤེགས་བསྡུ་རིམ་བསྒོམ༔ རྙིང་མའི་ལུགས་ལ་བདག་བསྐྱེད་ཡེ་ཤེས་པ༔ ནམ་ཡང་མི་གཤེགས་ཡང་
ཡང་ཚུར་བསྟིམ་པ༔ ཕྱག་རྒྱ་སྒོ་བཅད་སྒྲུབ་པ་བྱ་བ་སྟེ༔ བྱང་ཆུབ་ཐོབ་དུས་སྒྲུབ་པ་ཐེམ་པ་ཡིན༔ དེ་ལྟར་བདག་བསྐྱེད་སྒྲུབ་པ་རྫོགས་དུས་མེད༔ ཚོགས་འཁོར་མེད་ན་ཚོགས་ལས་སྐྱར་བར་བྱ༔ རྫོགས་རིམ་རང་སེམས་བལྟས་པས་ཆོག་པ་ཡིན༔ དེ་ནི་སྤྲོས་བཅས་རྒྱུན་ཁྱེར་དམིགས་རིམ་མོ༔ ༈ སྤྲོས་མེད་ལས་བྱང་འདོན་ཡང་མི་ལྕོགས་ལ༔ གཏོར་མ་ལ་སོགས་ཅི་ཡང་མ་འབྱོར་ན༔ མངོན་རྟོགས་ངག་གིས་འདོན་ཡང་མི་དགོས་པར༔ རང་ཉིད་པདྨ་འོད་འབར་སྐུར་བསྒོམ་པའི་༔ ཐུགས་ཀར་པདྨ་དཀར་པོ་འདབ་བརྒྱད་སྟེང་༔ ཧཱུྃཡིག་མཐའ་ལ་སྔགས་ཕྲེང་གཡས་སུ་འཁོར༔ དེ་ལས་འོད་འཕྲོས་རྔ་ཡབ་གླིང་ཕྲན་ནས༔ ཨོ་རྒྱན་གྲངས་མེད་ཁ་བ་བུ་ཡུག་ལྟར༔ བྱོན་ནས་དབྱེར་མེད་རང་ལ་སིབ་སིབ་ཐིམ༔ སྔགས་ཕྲེང་དེ་ལ་འོད་ཟེར་ཁ་དོག་ལྔ༔ ཕྱོགས་བཅུར་འཕྲོས་པས་འཁོར་འདས་སྣང་སྲིད་ཀྱི༔ ཚེ་ཡི་དངོས་གྲུབ་བསོད་ནམས་འབྱུང་བའི་བཅུད༔ ཐམས་ཅད་འོད་ཟེར་ལྔ་དང་ནི་ལྗང་གུ༔ ཐིམ་ནས་དམར་པོ་འོད་ཟེར་བཅས་པ་རུ༔ བསྡུས་ནས་རང་ཐིམ་ཚེ་ཡི་དངོས་གྲུབ་ཐོབ༔ དམིགས་པ་དེ་ཉིད་རྒྱུན་དུ་བསྒོམ་པ་དང་༔ དབང་ཆོག་ནང་གི་ཚེ་
སྒྲུབ་སྔགས་དེར་བཟླས༔ དེ་ནི་ཚེ་སྒྲུབ་རྒྱུན་ཁྱེར་ཟབ་ཅིང་བདེ༔ དེ་ཡན་མ་ཧཱ་ཡོ་གའི་བསྐྱེད་རིམ་ལུགས༔ ༈ རང་ཉིད་པདྨ་འོད་འབར་གསལ་བཏབ་པའི༔ སྙིང་ཁར་ཞི་བ་བཞི་བཅུ་རྩ་གཉིས་དང་༔ མགྲིན་པར་རིག་འཛིན་གཙོ་བོ་ཡབ་ཡུམ་བཅུའི༔ གཙོ་བོ་པདྨ་གར་དབང་སྤྱན་རས་གཟིགས༔ སྤྱི་བོར་ཆེ་མཆོག་ཁྲག་འཐུང་ཁྲོ་བོའི་ཚོགས༔ ལྟེ་བར་མཁའ་འགྲོ་སྡེ་ལྔ་གསང་གནས་སུ༔ རྡོ་རྗེ་ཕུར་པའི་ལྷ་ཚོགས་བཀྲག་ལམ་མེ༔ བཟའ་བཏུང་བདུད་རྩིར་སྒྱུར་ལ་དེ་རྣམས་མཆོད༔ རླུང་ནི་ནང་དུ་འཇུག་པ་ཡི་གེ་ཨོཾ༔ ཁོང་དུ་གནས་པ་ཨཱལ་ཕྱིར་དབྱུང་ཧཱུྃ༔ ཡེ་ནས་ཡིན་ལ་ཡིན་བཞིན་གསལ་བཏབ་བྱ༔ དེ་ལ་ཡེ་ཤེས་བསྟིམ་སོགས་མི་དགོས་ཏེ༔ རང་ལུས་ཡེ་ནས་དམ་ཚིག་སེམས་དཔའ་སྟེ༔ ཕུང་ཁམས་སྐྱེ་མཆེད་ལྷ་ཡི་དཀྱིལ་འཁོར་ཉིད༔ རང་སེམས་ཡེ་ཤེས་སེམས་དཔའི་ངོ་བོ་ཉིད༔ ཡིན་ལ་ཡིན་ཞེས་དེ་དེར་གསལ་འདེབས་དགོས༔ དེ་ནི་ཨ་ནུ་ཡོ་གའི་དམིགས་རིམ་མོ༔ ༈ རང་སེམས་ཡེ་ནས་སྐུ་གསུམ་ལྷུན་གྱིས་གྲུབ༔ ངོ་བོ་སྟོང་པ་ཆོས་སྐུ་སྣང་མཐའ་ཡས༔ རང་བཞིན་གསལ་བ་ལོངས་སྐུ་སྤྱན་རས་གཟིགས༔ ཅི་ཡང་འཕྲོ་བ་སྤྲུལ་སྐུ་པདྨ་འབྱུང་༔ སྟོབས་
ཀྱི་སྟོང་ཉིད་མཁའ་འགྲོ་སེང་གདོང་ཅན༔ ཐབས་ཀྱི་གསལ་ཆ་རྡོ་རྗེ་དྲག་པོ་རྩལ༔ གཞན་དུ་མ་གྲུབ་རང་གི་སེམས་ཉིད་འདི༔ མ་ཡི་རང་ངོ་སངས་རྒྱས་ས་བཞིན་བཞག༔ དེ་ནི་ཁྲེགས་ཆོད་གཞི་ཡི་ལྟ་བ་ཡིན༔ ཉི་ཟླ་མར་མེ་སྐར་ཁུང་ལ་སོགས་ལ༔ ཙཀྵས་ཟིམ་བུར་ལྟས་པས་འཇའ་ཚོན་ཤར༔ ཐིག་ལེ་གཅིག་གྲགས་ལུག་རྒྱུད་གསལ་བར་འཆར༔ དེ་ཉིད་ངོ་བོ་སེམས་དང་དབྱེར་མེད་བལྟས༔ གསལ་སྟོང་མངོན་སུམ་རྗེན་པ་དངོས་སུ་མཐོང་༔ དེ་ནི་ཨ་ཏི་ཡོ་གའི་ཉམས་ལེན་ནོ༔ དེ་དག་རྣམས་ཀྱིས་པདྨ་འོད་འབར་གྱི༔ རྒྱུན་ཁྱེར་ཉམས་ལེན་ཁྱེར་བདེ་ཚང་བ་ལགས༔ དེ་སྐད་ཨོ་རྒྱན་རྗེ་ལ་མི་ཕྱེད་པའི༔ དད་པའི་རྗེས་འབྲང་རཱ་ག་ཨ་སྱ་ལ༔ བླ་མ་ཀརྨ་རྒྱ་མཚོས་བསྐུལ་བའི་ཕྱིར༔ འཕྲལ་དུ་ཡི་གེར་བྲིས་ལ་འགལ་མཆིས་ན༔ ཆོས་བདག་ཀླུ་ཀི་ཀླུ་བདུད་ཕོ་ཉར་བཤགས༔ དགེ་བས་མང་པོ་འགའ་ལ་ཕན་པར་ཤོག༔ མངྒ་ལཾ༔ ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།