པདྨ་འོད་འབར་གྱི་ཚེ་སྒྲུབ་ཉུང་བ་བཞུགས་པའི་དབུ་ཕྱོགས།
པདྨ་འོད་འབར་གྱི་ཚེ་སྒྲུབ་ཉུང་བ་བཞུགས་པའི་དབུ་ཕྱོགས་ལགས་སོ༔
ན་མོ་གུ་རུ་དྷེ་ཝ་ཌཱཀི་ནཱི་ཡེ༔ པད་འབྱུང་ཧཱུྃ་ནག་མེ་འབར་སེང་གདོང་མ༔ རྩ་བ་གསུམ་ལ་གུས་པས་ཕྱག་འཚལ་ནས༔ པདྨ་འོད་འབར་སྒོ་ནས་ཅུང་ཟད་བྲི༔ ཆོས་བདག་སྲུང་མས་བཀའ་ཡི་གནང་བ་སྩོལ༔ དེ་ལ་པདྨ་འོད་འབར་གྱི་སྒོ་ནས་ཚེ་སྒྲུབ་པ་ལ༔ རྒྱས་པར་མདུན་བསྐྱེད་གཙོ་ཆེ་བས༔ དཀྱིལ་འཁོར་བུམ་པ་དང་བཅས་ཤིང་དམིགས་པའི་འཕྲོ་འདུ་ཟིན་དཀའ་བ་དང་༔ སྒྲུབ་པ་ཆེན་པོ་ཡིན་པས་བཀའ་གཉན་ཏེ་འདིར་མ་བརྗོད༔ བདག་བསྐྱེད་རྐྱང་སྒྲུབ་འདི་སྒྲུབ་རྫས་མི་དགོས་པས་སྟབས་བདེ༔ བདག་བསྐྱེད་གཙོ་ཆེ་སྟེ་བསྙེན་པ་ཡིན་པས་བཀའ་ཅུང་ཟད་
ཡོད༔ དམིགས་པ་ཉུང་བས་ཟིན་སླ་ཕྱིར་འདི་ཉིད་བཤད༔ དང་པོ་ཕུགས་གཏོར་བླ་མ་ཡི་དམ་མཁའ་འགྲོ་ཆོས་སྐྱོང་སྤྱི་འདུས་གཅིག༔ ཕྱི་རྒྱུད་པའི་དཀར་གཏོར༔ ནོར་ལྷ་སྤུངས་བ་དང་ལྔ་བཤམས༔ རྒྱས་པར་འདོད་ན་ལྷ་གྲངས་བཅའ་འོ༔ སྒྲུབ་ཁང་ཕྱགས་བདར་བྱ༔ རྣམ་འཇོམས་གཟུངས་ཆུས་ཁྱིམ་ལ་ཆག་ཆག་བཏབ༔ གུ་གུལ་སྤོས་མེད་ན་ཤུག་དུད་ཀྱིས་ཁང་པ་དང་གོས་གདན་བསང་བར་བྱས༔ རང་ཉིད་ཀྱང་ཡན་ལག་ལྔ་ཁྲུས་བྱས༔ ཨོ་རྒྱན་གྱི་ཞལ་ཐང་ཡོད་ན་བཤམ༔ ཕུགས་གཏོར་མདུན་དུ་མཆོད་པ་རྣམ་ལྔ་ལྷ་བཤོས་སོགས༔ སྔོན་འགྲོ་ཅོག་རྡོག་
གཉིས༔ ཚོགས་གཏོར་འབུལ་མཐེབ་སྐྱ་མང་པོ་བཤམ༔ རང་གི་ཉལ་ས་དང་པོ་བཟོས་ནས་སྟན་མི་བསྒུལ་ལ༔ མི་དང་ངོ་མི་གཏུགས༔ དེ་ནས་སྐྱབས་འགྲོ་སེམས་བསྐྱེད་མཆོད་པ་བྱིན་རླབས་སོགས་བྱ༔ སྔོན་འགྲོ་དཀར་གཏོར་བགེགས་གཏོར་འབུལ༔ དེ་དག་འདོན་ལུགས་སྔོན་འགྲོའི་འདོན་ཆ་དེ་ཉིད་ཇི་ལྟ་བར་འདོན༔་གབ་འཁྲུགས་མེད་མཚམས་དེར་ཐུན་ཐམས་ཅད་དུ་ཐུན་ནམ་ཡུངས་ཀར་ནས་ལྕག་གིས་བྲབ་ཅིང་དྲག་སྔགས་སུཾ་བྷ་ནི་སོགས་གང་ཤེས་བརྗོད༔ དེ་ནས་རྔ་བརྡུང་ཞིང་འོད་འབར་མགོ་ནས་བཛྲ་གུ་རུའི་བསྙེན་པའི་བར་དུ་འདོན༔ དེ་ནས་བསྙེན་པ་བྱེད༔ དང་པོ་དཀར་བགེགས་ཕུལ་ནས༔ དེ་ནས་མཚམས་མ་གྲོལ་བར་དུ་དཀར་བགེགས་སྔོན་འགྲོ་གཉིས་ཕུལ་མི་དགོས༔ སྐྱབས་འགྲོ་སེམས་བསྐྱེད་སོགས་དེ་རྣམས་ནངས་མ་རེ་རེར་འདོན། ཐུན་ཐམས་ཅད་ལ་མི་དགོས༔ འོད་འབར་གཞུང་དེ་རབ་དུས་དྲུག་འདོན་ཏེ༔ ནམ་ལངས༔ ཉི་མ་རྩེ་ཤར༔ ཉིན་ཕྱེད༔ དགོང་ཁ༔ ཉི་ཐལ༔ སྲོད་དང་དྲུག༔ དེ་ཙམ་མ་འཕྲོད་ན༔ ཞོགས་པ༔ ཉིན་ཕྱེད༔ དགོང་ཁ༔ སྲོད་དང་ཐུན་བཞི་བྱེད༔ ཐུན་ཟེར་བའི་དོན་འོད་འབར་དབུ་བཙུགས་ནས་བསྙེན་པ་སྟོང་
ཚོ་ལྔ་དྲུག༔ མང་ཉུང་ཅི་རིགས་ཤིག་མ་ཐོན་བར་དམིགས་པ་མ་ཡེངས་པར་བྱེད་པ་ཐུན་ཡིན༔ ཐུན་མཚམས་ཟེར་བའི་དོན་དེ་ནས་བསྐྱེད་རིམ་དམིགས་པ་རང་འོད་འབར་བསྒོམ་པ་དེ་སྟོང་ཉིད་དུ་བསྡུས་ནས༔ བསྔོ་བ་སྨོན་ལམ་རྒྱས་བཏབ་ཚརཿ༔ སྔགས་འདོན་པ་དང་དམིགས་པ་ལ་སེམས་རྩེ་གཅིག་མེད་པར་རང་ལྷ་དམ་ཚིག་པའི་མོས་པ་ཙམ་ཞིག་གི་ངང་ནས༔ གཞན་ལས་ཀ་སོགས་བྱ་བ་གཞན་སྒྲུབ་པ་ལ་ཐུན་མཚམས་ཟེར༔ ངག་རྒྱུན་དུ་བཅད་ཐུབ་ན་བྱིན་རླབས་ཆེ་སྟེ༔ ངག་བཅད་མ་བཅད་གཉིས་ལ་བྱིན་རླབས་ཆེ་ཆུང་བཅུ་འགྱུར་དུ་བཤད༔ གལ་ཏེ་ངག་བཏང་དགོས་བྱུང་ན་ཐུན་མཚམས་སུ་བཏང་རུང་༔ ཐུན་དཀྱིལ་དུ་བཏང་ན་མཚམས་རལ༔ བཟླས་པའི་དམ་ཚིག་ཉམས་པ་ཡིན༔ ཚོགས་གཏོར་འབུལ༔ དཀར་གཏོར་འབུལ་བ་རྣམས༔ དང་པོ་ནུབ་པར་དང་ཚེས་བཅུ་དང་༔ མར་ངོའི་ཚེས་བཅུ་སྟེ་ཉི་ཤུ་ལྔ་དང་༔ དགུ་གཏོར་ཡིན་པས་ཉི་ཤུ་དགུ་དང་༔ མཚམས་གྲོལ་ནུབ་བྱའི་རྒྱུན་དུ་མི་དགོས༔ གཏོར་བསྔོས་དགོང་ཁའི་འོད་འབར་གྱི་བསྟོད་པའི་གོང་༔ པཉྩ་རཀྟ་བྷ་ལིཾ་ཏ་ཁཱ་ཧི་ཟེར་བ་དེ་ན་ཅུང་ཟད༔ དེ་ནས་ཧཱིརྒྱལ་བ་ཐམས་ཅད་སོགས་བསྟོད་
པ་བྱའི༔ ཐུན་ཐམས་ཅད་ལ་གཏོར་བསྔོས་མི་དགོས༔ དགོང་ཁའི་འོད་འབར་མཇུག་ཏུ་དྲག་པོ་སེང་གདོང་མ་གཉིས་འདོན་པར་བྱའི༔ ཐུན་ཐམས་ཅད་ལ་མི་དགོས༔ གཞན་ཡི་དམ་གང་ཡོད་དྲག་པོའི་འོག་ཏུ་འདོན༔ ཆོས་སྐྱོང་གང་ཡོད་སེང་གདོང་མའི་འོག་ཏུ་འདོན༔ བོན་ལུགས་ཀྱི་ལྷ་གཞུང་གཅིག་ཀྱང་འདོན་མི་རུང་༔ ལྷ་གཞུང་ཐམས་ཅད་རྫོགས་པ་དང་དཀར་གཏོར་ཕུགས་གཏོར་མཐའི་དེ་ལ་ཕྱི་རྒྱུད་པ་དང་གཞི་བདག་ལ་རྒྱུན་དུ་བསྔོས༔ གཏོར་འབུལ་ཡོད་ན་གཏོར་འབུལ་སྔོན་དུ་དཀར་གཏོར་ལ་ལ་སླར་གཞི་བདག་ལ་བསྔོ་བ་གལ་ཆེ། ནུབ་ཉལ་ཁ༔ སྔགས་ཕྲེང་གསེར་གྱི་རྡོ་རྗེར་བསྡུ༔ ཞེས་སོགས་མཇུག་གི་བསྔོ་བ་དང་༔ རྫོགས་རིམ་བཀྲ་ཤིས་རྣམས་འདོན་ལ་གཉིད་ལོག༔ ནངས་སྔ་ཐོ་རངས་གཉིད་སད་ནས་སྐད་ཅིག་ལ་རང་འོད་འབར་བསྒོམས་ལ་བསྙེན་པ་བྱེད་ཀྱང་རུང་༔ གཏོར་གསོ་མ་འཕྲོད་ན༔ ནམ་ལངས་ཀྱི་ཐུན་དེ་ཐོ་རངས་ནས་བཟུང་ཡང་ལེགས༔ སླར་རྔ་བརྡུངས་ནས་འདོན། དམིགས་པ་རྒྱས་པར་དཀའ་ནའང་༔ མཚམས་གཅོད༔ བཛྲ་རཀྟ་ཛྭ་ལ་རཾ་ཟེར་དུས༔ རྡོ་རྗེ་ར་བ་གུར་ས་གཞི་ཕྱི་རོལ་མེའི་ཕུང་པོ་འབར་བའི་ནང་དུ་རང་དང་བསྲུང་བྱ་ཚུད་པར་
བསྒོམ་པ་དང་༔ ཨོཾ་ཧཱུྃ་ཧཱུྃ་ཧཱུྃཨཱཟེར་དུས་མཆོད་གཏོར་དེ་དག་བསམ་གྱིས་མི་ཁྱབ་པ་བདུད་རྩིའི་རང་བཞིན༔ ལྷའི་ལོངས་སྤྱོད་ལྟ་བུར་གྱུར་པར་བསྒོམ་པ་དང་༔ ལྷ་བསྐྱེད་དུས་རང་ཉིད་ཨོ་རྒྱན་པདྨ་འོད་འབར་བསྒོམ་པ་དང་དུས་གཅིག་ཏུ་མདུན་གྱི་སྒྲུབ་རྟེན་གཏོར་མ་རིན་ཆེན་འབར་བའི་ཚེ་གཏོར་དེ་ཡང་༔ པདྨ་འོད་འབར་གྱི་སྐུར་བསྒོམ༔ ཧཱུྃ༔ སྔོན་གྱི་བསྐལ་པའི་དང་པོ་སོགས་སྤྱན་འདྲེན་དུས༔ ཟངས་མདོག་དཔལ་རི་ནས་ཨོ་རྒྱན་རིན་པོ་ཆེའི་སྐུ་ཆེ་ཆུང་ཁ་བ་བུ་ཡུག་ལྟར་བྱོན་ནས་རང་ཉིད་དང་མདུན་བསྐྱེད་ལ་སིབ་སིབ་ཐིམ་པར་བསྒོམ༔ མཆོད་པ་དང་བསྟོད་པ་དུས༔ རང་གི་ཐུགས་ཀ་ནས་མཆོད་པའི་ལྷ་མོ་དཔག་ཏུ་མེད་པ་འཕྲོས་ནས༔ མཆོད་པ་སྣ་ཚོགས་ཀྱིས་བདག་པདྨ་འོད་འབར་དང་མདུན་བསྐྱེད་གཉིས་ཀ་མཆོད༔ བདུད་རྩི་དང་གཏོར་མ་ལྔའི་བདུད་རྩིའི་རྒྱ་མཚོ་ཆེན་པོ་ནས་ཀ་པཱ་ལས་བཅུས་ནས་བདག་དང་མདུན་བསྐྱེད་ལ་མཆོད༔ ལྷ་མོ་རྣམས་ཀྱིས་གླུ་དབྱངས་སྙན་པོས་རང་དང་མདུན་བསྐྱེད་ལ་བསྟོད་པ་ཕུལ་ནས་མཐར་ལྷ་མོ་རྣམས་བདག་མདུན་ལྷའི་དབང་པོ་ལྔ་ལ་ཐིམ་པས༔ ཟག་མེད་ཀྱི་བདེ་བས་ཐུགས་དགྱེས་པར་བསྒོམ་པར་བྱའོ༔ གཏོར་བསྔོས་དུས་
མདུན་གྱི་ཨོ་རྒྱན་དེ་གཞན་ལས་སྐུ་ཆེ་ཞིང་གཟི་བརྗིད་འབར་བ་དང་༔ འཁོར་བླ་མ་ཡི་དམ་ཆོས་སྐྱོང་ཐམས་ཅད་ཀྱིས་བསྐོར་བ་ལ༔ མཆོད་པའི་ལྷ་མོ་རྣམས་ཀྱིས་གཏོར་མ་བདུད་རྩིའི་རྒྱ་མཚོ་ལས་བྷནྡས་བཅུས་ཏེ་ལྷ་སོ་སོར་དྲངས་བར་བསྒོམ༔ བྷནྡྷ་རེ་རེ་སོ་སོའི་ཕྱག་ཏུ་ཕུལ་ནས་གསོལ་བར་བསྒོམ་ཡང་རུང་ངོ་༔ ཡང་ལྷ་སོ་སོའི་ལྗགས་ལས་འོད་ཀྱི་སྦུ་གུ་གཏོར་མ་ལ་ཟུག་ནས་གསོལ་བར་བསྒོམ་པ་ནི༔ གཏོར་མ་དེ་ནུབ་ནས་བཀྲོལ་ཞིང་རྒྱབ་རེས་བསྔོ་མི་དགོས་ན་བྱའི༔ གཏོར་མ་བཞག་རྒྱུ་ལ་དེ་ལྟར་བྱས་ན༔ འཁོར་གྱི་གསོལ་ལྷག་དེ་རྒྱབ་རེས་གཙོ་བོ་ལ་མཆོད་དགོས་པས་མི་ལེགས་སོ༔ ཧཱུྃ༔ བསྙེན་པའི་དམིགས་པ་དངོས་ནི༔ རང་ཨོ་རྒྱན་པདྨ་འོད་འབར་གྱི་ཐུགས་ཀར་པདྨ་དཀར་པོ་འདབ་མ་བརྒྱད་པའི་ལྟེ་བར་ཟླ་བའི་དཀྱིལ་འཁོར༔ དེའི་སྟེང་དབུས་སུ་ཧཱུྃཡིག་དཀར་པོ་འགྲེང་སྟེ་གནས་པའི་མཐར༔ སྔགས་བཛྲ་གུ་རུ་ཚེ་སྒྲུབ་པའི་སྔགས་དེ་ཉིད་འགྲེང་ཐབས་སུ་ཡིག་ངོ་ཕྱིར་བསྟན་ནས་མདུན་ནས་གཡོན་ངོས་སུ་བསྐོར་ཏེ་སྔགས་མཇུག་མདུན་ངོས་ཨོ་གྱི་དྲུང་དུ་ཡོད་པར་བསྒོམ་སྟེ་ཁ་དོག་དཀར་པོ་འོད་ལྔའི་མདངས་ཅུང་ཟད་ཡོད་པར་བསྒོམ་སྟེ༔ དང་པོ་ཞག་གསུམ་ལ་སྔགས་དེ་ཡི་གེ་
ཀློག་པའི་ཚུལ་དུ་འདོན༔ དེ་ནས་སྔགས་ཕྲེང་དེ་ལས་འོད་ཁ་དོག་སྣ་ལྔ་པ་སྟོང་སྐུད་ལྔ་སྒྲིམ་ལྟ་བུ་གཅིག་བྱུང་བ་ཡི་གེ་མི་འཁོར་བར་འོད་དེ་གཡས་སྐོར་དུ་ཀྱི་ལི་ལི་འཁོར་བ་ལ་དམིགས་པ་གཏད་ནས་ཞག་གསུམ་ཙམ་བསྙེན༔ དེ་ནས་ལྟེ་བའི་བྷིཡིག་མི་འཁོར་བར་སྟན་ལ་ཁབ་བཙུགས་པ་ལྟར་གཡོ་འགུལ་མེད་པར་བསྒོམ་པ་གལ་ཆེ༔ དེ་འཁོར་ན་སྨོའོ༔ མཐའི་བཛྲ་གུ་རུ་ཨཱ་ཡུ་ཟེར་བ་སྔགས་ཕྲེང་དེ་ཡིག་འབྲུ་རྣམས༔ མི་མང་པོས་བསྐོར་བ་བྱེད་པ་ལྟར་ཡི་གེ་ལངས་ཐབས་སུ་གཡས་སུ་དང་པོ་དལ་བུས་འཁོར༔ དེ་ནས་ཇེ་མགྱོགས་མཐར་ཤིན་ཏུ་མགྱོགས་པ་ཨེ་འཁོར་མི་རིག་པ་ཙམ་དུ་མགྱོགས་པར་འཁོར་བ་ཞག་གསུམ༔ དམིགས་པ་དེ་གསུམ་ནི་འདིའི་ལུགས་ཀྱི་བསྙེན་པ་དང་༔ ཉེ་བར་བསྙེན་པ་དང་༔ སྒྲུབ་པའི་དམིགས་པ་ཡིན་ནོ༔ དེ་ནས་སྒྲུབ་པ་ཆེན་པོ་ནི༔ རང་གི་ཐུགས་ཀའི་སྔགས་ཕྲེང་འཁོར་བཞིན་པ་ལས་འོད་ཟེར་ཁ་དོག་ལྔ་ལྡན་དཀར་པོ་ཤས་ཆེ་བ༔ འོད་ཟེར་གྱི་རྩེ་མོ་རྣོ་བ་འགུགས་པ་ལྕགས་ཀྱུའི་དབྱིབས་འདྲ་བ་དཔག་ཏུ་མེད་པ་ཤར་ཕྱོགས་སུ་འཕྲོས་པས༔ དྲི་ཟ་ལ་སོགས་པ་ཤར་ཕྱོགས་ཀྱི་གདོན་བགེགས་ལྷ་འདྲེ་ཐམས་ཅད་ཀྱིས་རང་གི་ཚེ་
འཕྲོག་པ༔ བརྐུས་པ༔ ཡར་བ༔ འཁྱམས་པ་ཐམས་ཅད་འོད་ཟེར་དཀར་ལ་འཚེར་བ་སྣུམ་ལ་འདྲིལ་བ་ཐིག་ལེའི་རྣམ་པར་བཀུག་ནས་རང་གི་སྤྱི་བོའི་གཙུག་ནས་རང་ལ་མར་སིབ་སིབ་ཐིམ་པར་བསྒོམ༔ དམིགས་པ་དེ་མ་ཟིན་བར་དུ་སྔགས་མང་ཉུང་ཅི་རིགས་འདོན༔ དེ་བཞིན་དུ་རང་གི་ཐུགས་ཀ་ནས་འོད་ཟེར་ཁ་དོག་ལྔ་ལྡན་ལ་སེར་པོ་ཤས་ཆེ་བའི་རྩེ་མོ་མཉན་པ་ཕྲ་བ་འཁྱུགས་པ་ཞིགས་པའི་དབྱིབས་ཅན་དཔག་ཏུ་མེད་པ་ལྷོ་ཕྱོགས་སུ་འཕྲོས་པས༔ གཤིན་རྗེ་ལ་སོགས་པ་ལྷོ་ཕྱོགས་ཀྱི་གདོན་དང་འབྱུང་པོ་ལྷ་འདྲེ་དབང་ཆེ་བ་རྣམས་ཀྱིས་ཚེ་འཕྲོག་པ་ཆུང་བ་རྣམས་ཀྱིས་བརྐུས་པ་བླ་ཁྱེར་བ༔ ཚེ་ཡར་བ་ཐམས་ཅད་འོད་ཀྱི་ཐིག་ལེ་དཀར་པོ་སྣུམ་ལ་འདྲིལ་བའི་རྣམ་པར་བསྡུས་ཤིང་བཀུག་ནས་རང་གི་སྤྱི་བོ་ནས་མར་སིབ་སིབ་ཐིམ༔ ཡང་རང་གི་ཐུགས་ཀ་ནས་འོད་ཟེར་དམར་པོ་ཤས་ཆེ་བའི་རྩེ་མོ་ལྕགས་སྒྲོག་གི་དབྱིབས་ལྟར་འགུགས་པ་ཅིག་ལ་འབྲེལ་བ་འཁྱུག་པ་ལུ་གུ་རྒྱུད་དམ་གློག་གི་ཕྲེང་བ་ལྟར་ནུབ་ཕྱོགས་སུ་འཕྲོས་པས༔ ཀླུ་བདུད་ལ་སོགས་པ་ནུབ་ཕྱོགས་ཀྱི་ལྷ་འདྲེ་གདོན་བགེགས་རྣམས་ཀྱིས་ཚེ་འཕྲོག་པ་བརྐུས་པ་བླ་སྲོག་ཁྱེར་བ་ཐམས་ཅད་འོད་ཟེར་དཀར་ལ་འཚེར་བ་སྣུམ་ལ་འདྲིལ་
བའི་འོད་ཟེར་གྱི་ཐིག་ལེའི་གཟུགས་སུ་བསྡུས་ཤིང་བཀུག་ནས་རང་གི་སྤྱི་བོ་ནས་སིབ་སིབ་ཐིམ་པར་བསྒོམ་མོ༔ ཡང་རང་གི་ཐུགས་ཀ་ནས་འོད་ཟེར་ཁ་དོག་ལྔ་ལྡན་ལྗང་གུ་ཤས་ཆེ་བ་རྩེ་མོ་དྲིལ་བུའི་དབྱིབས་སུ་ཡོད་པ་བྱང་ཕྱོགས་སུ་འཕྲོས་པས༔ གནོད་སྦྱིན་ལ་སོགས་པ་བྱང་གི་གདོན་བགེགས་འབྱུང་པོ་ལྷ་འདྲེ་ཐམས་ཅད་ཀྱིས༔ རང་གི་ཚེ་འཕྲོག་པ་བླ་ཁྱེར་བ་ཚེ་སྲོག་བརྐུས་པ་ཐམས་ཅད་འོད་ཟེར་དཀར་ལ་འཚེར་བ་སྣུམ་བག་དང་ལྡན་པའི་འོད་ཀྱི་ཐིག་ལེ་ཟླུམ་པོ་སྒོ་ངའམ་རིང་བསྲེལ་འདྲ་བ་བཀུག་ནས་རང་གི་སྤྱི་བོ་ནས་རང་ལ་སིབ་སིབ་ཐིམ་པར་བསྒོམ༔ ཡང་རང་གི་ཐུགས་ཀ་ནས་འོད་ཟེར་ཁ་དོག་ལྔ་ལྡན་སྔོན་པོ་ཤས་ཆེ་བ་སྟེང་ཕྱོགས་ཀྱི་ནམ་མཁའ་ཁྱབ་ཅིང་སྲིད་པའི་རྩེ་མོའི་བར་འཕྲོས་པས༔ ཚངས་པ་བརྒྱ་བྱིན་བདུད་སྡིག་ཏོ་ཅན་དགའ་རབ་དབང་ཕྱུག་ལ་སོགས་པ་ལྷ་གདོན་ཐམས་ཅད་དང་༔ བར་ཁམས་ཀྱི་གཟའ་དང་རྒྱུ་སྐར་ཐམས་ཅད་ཀྱི་ལག་ནས་རང་གི་ཚེ་སྲོག་ཁྱེར་བ་དང་འཕྲོག་པ་དང་བརྐུས་པ་ཐམས་ཅད་འོད་ཀྱི་ཐིག་ལེ་དཀར་པོའི་རྣམ་པར་བསྡུས་ཤིང་བཀུག་ནས་རང་ལ་ཐིམ་པར་བསམ་མོ༔ ཡང་རང་གི་ཐུགས་ཀ་ནས་འོད་ཟེར་ཁ་དོག་ལྔ་ལྡན་ལ་མཐིང་ཀ་ཤས་ཆེ་
བ་འོག་ཕྱོགས་རྒྱ་མཚོ་ཆེན་པོའི་འོག་གི་ནང་དུ་འཕྲོས་པས་དགའ་བོ་འཇོག་པོ་ལ་སོགས་པ་ཀླུ་རིགས་ཐམས་ཅད་དང་ས་བདག་གཉན་ཆེན་པོ་སྡེ་བཞི་སོགས༔ ས་ལ་གནས་པའི་ལྷ་འདྲེ་བདུད་བགེགས་ཐམས་ཅད་རང་གི་ཚེ་སྲོག་འཕྲོག་བཅོམ་བརྐུས་ཁྱེར་གང་བྱས་ཐམས་ཅད་རང་དབང་མེད་པར་བསྡུས་ནས༔ འོད་ཀྱི་ཐིག་ལེ་དཀར་པོ་རང་གི་སྤྱི་བོ་ནས་མར་ཐིམ་པར་བསྒོམ་པ་རྣམས་ནི་ཚེ་འགུགས་ཀྱི་དམིགས་པ་འོད་འབར་རང་གི་ལུགས་ཡིན་ནོ༔ དེ་ནས་རང་གི་ཐུགས་ཀ་ནས་འོད་ཟེར་ཁ་དོག་ལྔ་ལྡན་ནམ་མཁའ་གང་བ་འཕྲོས་པས༔ འབྱུང་བ་སའི་བཅུད་ཐམས་ཅད་འོད་ཟེར་སེར་པོ་གསེར་བཙོ་མ་ལྟ་བུར་བསྡུས་ནས་རང་ལ་ཐིམ་པས༔ ཤའི་ཁམས་ནས་ཚེ་ཉམས་པ་སོར་ཆུད་པའི་སྟོབས་རྩལ་ཡོན་ཏན་གྱི་ཚེ་བརྟན་པ་དང་ལུས་སྲ་ཞིང་བརྟན་པ་རྡོ་རྗེ་ཕ་ལམ་ལྟ་བུར་གྱུར༔ ཡང་རང་གི་ཐུགས་ཀ་ནས་འོད་ཟེར་ཁ་དོག་ལྔ་ལྡན་འཕྲོས་པས༔ འཇིག་རྟེན་ཁམས་ཀྱི་ཆུའི་བཅུད་ཐམས་ཅད་འོད་ཟེར་དཀར་པོ་ཆུ་ཤེལ་ལྟ་བུར་བསྡུས་ནས་རང་ལ་ཐིམ་པས༔ ཁྲག་གི་ཁམས་ནས་ཚེ་ཉམས་པ་སོར་ཆུད་དེ༔ ལུས་ལ་ཆུའི་སྟོབས་རྩ་ལ་ཡོན་ཏན་རྫོགས་པས་ཚེ་རྒྱུད་རིང་བ་དང་ལུས་བག་ཅན་དུ་གྱུར༔ ཡང་རང་གི་
ཐུགས་ཀ་ནས་འོད་ཟེར་སྣ་ལྔ་འཕྲོས་པས་འཇིག་རྟེན་བཀང་ནས༔ འབྱུང་བ་མེ་དང་ཉི་མ་ལ་སོགས་དྲོད་ཀྱི་བཅུད་ཐམས་ཅད་འོད་ཟེར་དམར་པོ་བྱུ་རུ་ལྟ་བུར་བསྡུས་ནས་རང་ལ་ཐིམ་པས༔ ལུས་ལ་མེའི་སྟོབས་རྩལ་རྫོགས་ནས༔ དྲོད་ཀྱི་ཁམས་ནས་ཚེ་ཉམས་པ་ཐམས་ཅད་སོར་ཆུད༔ ལུས་བཀྲག་མདངས་དང་ལྡན་པར་གྱུར༔ ཡང་རང་གི་ཐུགས་ཀ་ནས་འོད་ཟེར་འཕྲོས་པས་འཇིག་རྟེན་གྱི་ཁམས་གང་༔ འབྱུང་བ་རླུང་གི་བཅུད་ཐམས་ཅད་འོད་ཟེར་ལྗང་གུ་ཨིནྡྲ་ནི་ལའམ་གཡུའི་མདོག་ལྟ་བུར་བསྡུས་ཤིང་རང་ལ་ཐིམ་པས༔ རླུང་གི་སྟོབས་རྩལ་ཡོན་ཏན་རྫོགས་པས༔ དབུགས་ཀྱི་ཁམས་ནས་ཚེ་ཉམས་པ་ཐམས་ཅད་སོར་ཆུད༔ ལུས་ཡང་ཞིང་རྩལ་ཆེ་བར་གྱུར་པར་བསྒོམ་པ་ནི་འབྱུང་བའི་བཅུད་བསྡུས་པའོ༔ ཡང་རང་གི་ཐུགས་ཀ་ནས་འོད་ཟེར་ཁ་དོག་སྣ་ཚོགས་འཇིག་རྟེན་ཁྱབ་པར་འཕྲོས་པས་ལྷ་དང་ཀླུ་དང་མི་ལ་སོགས་པ་འཇིག་རྟེན་ལོངས་སྤྱོད་རྒྱ་ཆེ་བ་མངའ་ཐང་ཆེ་བ༔ བསོད་ནམས་ཀྱི་སྟོབས་དང་ལྡན་པ་རྣམས་ལ་ཕོག་པས་དེ་རྣམས་ཀྱི་ཚེ་དང་བསོད་ནམས་སྟོབས་དང་ཡོན་ཏན་ཐམས་ཅད་བསྡུས་ནས་རང་ལ་ཐིམ་པས༔ རང་གི་ཚེ་དང་བསོད་ནམས་ཉམས་པ་སོར་ཆུད༔ མཐུ་
སྟོབས་ཚེ་བསོད་རྒྱས་པར་བསྒོམ་པ་ཚེ་བསོད་ནམས་བསྡུས་པའོ༔ ཡང་རང་གི་ཐུགས་ཀ་ནས་འོད་ཟེར་སྣ་ཚོགས་ཀྱིས་ཞིང་ཁམས་ཐམས་ཅད་ཁྱབ་པར་འཕྲོས་པས༔ ཕྱོགས་བཅུ་དུས་གསུམ་གྱི་རྒྱལ་བ་རབ་འབྱམས་ཐམས་ཅད་དང་༔ རིགས་གསུམ་མགོན་པོ་ལ་སོགས་པ་བྱང་ཆུབ་སེམས་དཔའ་དང་ཉན་ཐོས་རང་སངས་རྒྱས་ཐམས་ཅད་ཀྱི་བྱིན་རླབས་ཚེའི་དངོས་གྲུབ་ཐམས་ཅད་འོད་ཟེར་གྱི་རྣམ་པར་སྤྱན་དྲངས་ནས་རང་ལ་ཐིམ་པས་འཆི་མེད་ཚེའི་དངོས་གྲུབ་སྐྱེ་འཆི་མེད་པ་རྡོ་རྗེའི་སྐུ་ཐོབ་པར་བསྒོམ་པ་རྒྱལ་བའི་བྱིན་རླབས་བསྡུ་བ་སྟེ༔ དམིགས་པ་འདི་རྣམས་པདྨ་འོད་འབར་རང་གཞུང་གི་དམིགས་པ་ཚེ་དབང་སྐབས་ནས་འབྱུང་བ་གོ་བདེ་བར་བཀྲོལ་བ་ཡིན་པས༔ བསྲེ་བསླད་རིག་བཟོ་ཡིན་པར་མི་དགོངས་འཚལ༔ ཨོཾ་ཨཱ༔ཧཱུྃ་བཛྲ་གུ་རུ་པདྨ་སིདྡྷི་ཨཱ་ཡུ་ཥེ་ཧཱུྃ་ནཾ་ཛ༔ ཞེས་པ་རིབ་འབུམ་ཕྲག་བཅུ་དྲུག་སྟེ་འབྲུ་འབུམ༔་འབྲིང་བྱེ་བའམ་བདུན་འབུམ༔ ཐམ་མ་སུམ་འབུམ༔ ཡང་ཐ་འབུམ་ཕྲག་གཅིག ། བསྙེན་པ་ནི་གྲངས་ཀྱི་བསྙེན་པ༔ རབ་ཟླ་དྲུག༔ འབྲིང་ཟླ་གསུམ༔ ཐ་མ་ཞག་ཉེར་གཅིག༔ ཡང་མཐའ་ཞག་བདུན༔ བསྙེན་པ་དུས་ཀྱི་བསྙེན་པའོ༔ རྟགས་རབ་ཞལ་མཐོང་བ༔ ལུང་
སྟོན་པ༔ དྲི་བཟང་པོ་བྲོ་བ༔ རོལ་མོའི་སྒྲ་སྙན་པོ་ཐོས་པ༔ འཇའ་དང་འོད་འཁྱིལ་བ༔ གཏོར་མ་ཁོལ་ཞིང་ནུ༔ དབྱར་མི་རུལ༔ དགུན་མི་འཁྱག༔ བདུད་རྩི་འཕྱུར༔ མར་མེ་འཛིན༔ དད་པ་དག་སྣང་རྟོགས་པ་སྐྱེ༔ འབྲིང་ཉམས་སྣང་དུ་ཞལ་མཇལ༔ ཚེ་ཚད་ལུང་སྟོན་པ་འབྱུང་༔ ཐ་མ་རྨི་ལམ་དུ་ཆུ་བོ་ལས་བརྒལ་བ༔ གྱེན་ལ་འགྲོ་བ་དང་༔ ལུས་ལ་གོ་ཆ་གྱོན་པ་དང་༔ ཉི་ཟླ་ཤར་བ༔ འབྲས་བུ་ལ་ལོངས་སྤྱོད་པ་དང་༔ ལྕགས་ཀྱི་རྡོ་རྗེ་རྙེད་པའམ་མཐོང་བ༔ ཆང་དང་འོ་མ༔ བདུད་རྩི་འཐུང་བ༔ བུམ་པ་རྡོ་དྲིལ་རྙེད་པ༔ རོལ་མོ་ལ་སྐད་རིང་པོ་བྱུང་བ༔ མཆོད་རྟེན་ཚ་ཚ་མཐོང་བ༔ ལོ་ལེགས་པ༔ མེ་ཏོག་སྣ་ཚོགས་ཐུ་བ༔ རྫོང་བཙན་པོའམ༔ བྲག་བཙན་པོ་ན་འདུག༔ གཞན་གྱིས་ཕྱག་འཚལ་བ༔ གོས་གསར་གྱོན་པ་ལ་སོགས་པ་རྨི་ལྟས་བཟང་པོ་བྱུང་ན་ཚེ་བསྲིང་བའི་རྟགས་སོ༔ དེ་ནས་མཚམས་གྲོལ་དུས་ཚོགས་གཏོར་འབུལ་བྱའོ༔ ཕྱིར་ནངས་བསང་ཐོན་ན་ལེགས༔ ཞག་གཅིག་ཅུང་ཟད་ཀློད་ནས་ཁད་ཀྱིས་བཀྲོལ་རྒྱུ་བྱུང་ན་བཟང་༔ རྒྱུན་དུ་ཡང་འོད་འབར་བསྒོམ་ཞིང་བསྙེན་པ་བྱེད་ཚེ་དམིགས་པ་བསྡུས་པ་ནི༔ རང་
གི་ཐུགས་ཀའི་སྔགས་ཕྲེང་གི་འོད་ཟེར་གྱིས་སངས་རྒྱས་བྱང་སེམས་རྩ་བ་གསུམ་དང་༔ ཆོས་སྐྱོང་ཐམས་ཅད་ཀྱི་བྱིན་རླབས་དང་འབྱུང་བའི་བཅུད་དང་སྨན་ཐམས་ཅད༔ དྲང་སྲོང་རིག་འཛིན་ཚེ་ལ་དབང་བ་ཐམས་ཅད་ཀྱི་བྱིན་རླབས༔ མདོར་ན་སེམས་ཅན་དཀར་པོ་དགེ་བའི་ལས་སྒྲུབ་ཅིང་༔ དབང་ཆེ་བ་དང་རྩལ་དྲག་པ༔ འཁོར་མང་བ་ཡོན་ཏན་ཆེ་བ༔ སྟོབས་དང་སྙན་གྲགས་དང་ལྡན་པ༔ གདུལ་བྱ་ཕྲིན་ལས་ཅན་རྣམས་ཀྱི་ཚེ་དང་བསོད་ནམས་ཐམས་ཅད༔ འོད་ཟེར་ཁ་དོག་སྣ་ཚོགས་ཀྱི་རྣམ་པར་བསྡུས་ནས་རང་ལ་ཐིམ་པར་བསྒོམ༔ རྒྱུན་བསྙེན་བྱའོ༔ ཕན་ཡོན་ནི༔ ཨེ་མ་ཧོ༔ དེ་ལྟར་སྒྲུབས་པའི་ཕན་ཡོན་ནི༔ རྐྱེན་ངན་བར་ཆད་ཐམས་ཅད་བཟློག༔ དུས་ཟད་པ་ཡི་མི་ཡིན་ཀྱང་༔ ཚངས་པའི་ཚེ་དང་མཉམ་པར་འགྱུར༔ འཆི་བ་རྣམ་པ་བརྒྱད་མི་འབྱུང་༔ ལས་འཕྲོ་ཅན་རྣམས་ཉི་ཟླའི་ཚེ༔ རྡོ་རྗེ་གཡུང་དྲུང་ལྟ་བུ་ཡི༔ ཚེ་ཡི་རིག་འཛིན་ཨེ་མ་ཧོ༔ ལས་འཕྲོ་ཅན་དང་འཕྲད་པར་ཤོག༔ ཅེས་གསུངས་པས༔ ཉང་བན་གྱི་ཞུས་ལན་མཇུག་ནས་ཀྱང་༔ ཚེ་དང་བསོད་ནམས་ལ་སོགས་པ་འབྱོར་པ་དྲུག་ཏུ་འགྱུར་རོ༔ ཞེས་དང་༔ ཚེ་ཟད་པ་དང་ཉམས་པ་ཡང་གསོ་བར་
ནུས༔ ཞེས་གསུངས་སོ༔ ཚེ་སྒྲུབ་བསྡུས་པའི་ཟིན་བྲིས་གཡུང་དྲུང་གི་རིགས་ལས་འཁྲུངས་པའི་སྔགས་པ་ཞི་ཁྲོ་སྐྱབས་ཀྱིས་བསྐུལ་ནས་ཨ་རཱ་གས་འཕྲལ་དུ་བྲིས་པ་ལ་སྦ་འོས་གསལ་བཀོད་སོགས་ཉེས་པ་ལྷ་ལ་བཤགས་ཤིང་༔ དགེ་བས་སེམས་ཅན་ཐམས་ཅད་ཨོ་རྒྱན་ཚེ་དཔག་ཏུ་མེད་པ་འགྲུབ་པར་གྱུར་ཅིག༔ མངྒ་ལཾ། ། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།