བཀའ་རྫོགས་པ་ཆེན་པོ་ཡང་ཟབ་དཀོན་མཆོག་སྤྱི་འདུས་ལས༔ གདབ་ལས་བསད་པའི་ལས་རིམ་བཞི།
བཀའ་རྫོགས་པ་ཆེན་པོ་ཡང་ཟབ་དཀོན་མཆོག་སྤྱི་འདུས་ལས༔ གདབ་ལས་བསད་པའི་ལས་རིམ་བཞི་བཞུགས་སོ༔
པདྨ་དྲག་པོ་རྩལ་ལ་ཕྱག་འཚལ་ལོ༔ རིག་འཛིན་དྲག་པོའི་བསྒྲལ་ལས་དོན་བཞི་ཡོད་པ་འདི་ལ༔ དང་པོ་ཧོ་བསྐྱེད་པ༔ དགུག་གཞུག་བྱ་བ༔ ལྷ་དང་ཕྲལ་བ༔ གཟུགས་ལ་དབབ་པ༔ ཐུན་བརྡེག་པ༔ ཞལ་དུ་བསྟབ་པའོ༔ དེ་ལ་ཧོ་བསྐྱེད་པ་ནི༔ ཨོཾ་སྭ་བྷ་ཝས་སྦྱངས༔ སྟོང་པའི་ངང་ལས་རང་ཉིད་སྐད་ཅིག་གིས་ཡི་དམ་དུ་གསལ་བའི་མདུན་དུ༔ ལས་སྣ་ཚོགས་སྨིན་པ་ལས་གྲུབ་པའི་གནམ་ལྕགས་འབར་བའི་ཁང་སྒོམ་ཟུར་གསུམ་པ༔ ཁ་དོག་ལ་གཏིང་ཟབ་པ༔ འོག་ན་འདོད་ཆགས་ཀྱི་ཆུ་ལྟར་ཁོལ་བ༔ བར་ན་གཏི་མུག་གི་མུན་པ་འཐིབས་པ་སྟེང་ན་ཞེ་སྡང་གི་བྲག་རི་ཉིལ་བ༔ ལོགས་ལ་
ང་རྒྱལ་གྱི་ཐོག་སེར་འབེབས་པ༔ ཕྱི་ན་ཕྲག་དོག་གི་འབྲུག་སྒྲ་དང་མེ་རླུང་འཚུབ་པ༔ ཕྱོགས་དང་ཕྱོགས་མཚམས་ཐམས་ཅད་ནས༔ གཤིན་རྗེའི་ལས་མཁན་བསམ་གྱིས་མི་ཁྱབ་པ༔ མཚོན་ཆ་སྣ་ཚོགས་ཟིང་ཟིང་ཐོགས་ནས་སྤྲུལ་པ་ཡང་སྤྲུལ་དཔག་ཏུ་མེད་པ་ཞལ་ནས་ཧ་ཧ་དང་ཕཊ་ཕཊ་རྒྱོབ་སོད་ཀྱི་ཀུ་སྒྲ་ཆེན་པོ་སྒྲོག་ཅིང་དགྲ་བགེགས་འབྱུང་པོ་རང་དབང་མེད་པར་ཚུད་པའི་གནས་སུ་གྱུར༔ དེ་ཡི་ནང་དུ་དམ་ཉམས་པའི་དགྲ་བོ་འདི་ཉིད་སྔོ་ལ་ཧམ་པ་སྐྱ་ལ་རིད་པ༔ མགོ་བོ་ལྷོ་ནུབ་མཚམས་སུ་བསྟན་པ༔ རྐང་པ་བྱང་ཤར་མཚམས་སུ་བསྟན་པ༔ ལག་
པ་མྱ་ངན་གྱི་ཕྱག་རྒྱས་བསྡམས་པ༔ ཡན་ལག་ལྕགས་སྒྲོག་གིས་བཅིངས་བ༔ འགུལ་བསྐྱོད་མི་ནུས་ཤིང་འདར་ལྡི་ལི་ལི་མིག་ནས་མཆི་མ་ཁྲག་ལྟར་དུ་འབབས་པ༔ དབུགས་སླེབ་སླེབ་སྐད་ངན་ཙི་རི་རི་འདོན་པ་ཞིག་ཏུ་གྱུར༔ འགུགས་པ་ནི་ཕྱག་རྒྱ་དང་བཅས༔ ན་མོ༔ དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་༔ སངས་རྒྱས་ཀྱི་བཀའ་བདེན་པ་དང་༔ ཆོས་ཀྱི་བཀའ་བདེན་པ་དང་༔ དགེ་འདུན་གྱི་བཀའ་བདེན་པ་དང་༔ གསང་སྔགས་དང་༔ རིག་སྔགས་དང་༔ སྙིང་པོ་དང་༔ ཕྱག་རྒྱ་དང་༔ ཏིང་ངེ་འཛིན་གྱི་བཀའ་བདེན་པ་དང་༔ ཡི་དམ་དཀྱིལ་འཁོར་ཀྱི་ལྷ་ཚོགས་རྣམས་ཀྱི་བཀའ་བདེན་པ་དང་༔ མ་གནས་གསུམ་གྱི་མཁའ་འགྲོ་མ་རྣམས་ཀྱི་བཀའ་བདེན་པ་དང་༔ དཔལ་མགོན་དམ་པ་ཆོས་སྐྱོང་བའི་སྲུང་མ་རྣམས་ཀྱི་བཀའ་བདེན་པ་དང་༔ ཁྱད་པར་དུ་ཡང་རིག་འཛིན་ཆེན་པོ་པདྨ་དྲག་པོ་རྩལ་གྱི་ལྷ་ཚོགས་རྣམས་ཀྱི་བཀའ་བདེན་པ་དང་༔ མཁའ་འགྲོ་སེང་གེའི་གདོང་ཅན་གྱི་ལྷ་ཚོགས་རྣམས་ཀྱི་བཀའ་བདེན་པ་དང་༔ ཆོས་ཉིད་རྣམ་པར་དག་ཅིང་རྒྱུ་འབྲས་བསླུ་བ་མེད་པའི་བདེན་པ་ཆེན་པོའི་
མཐུས༔ བདག་ཅག་དཔོན་སློབ་ཡོན་མཆོད་མི་ནོར་འཁོར་དང་བཅས་པ་ལ་གནོད་ཅིང་འཚེ་བར་བྱེད་པའི་གདོན་བགེགས༔ སྔ་དགྲ་ལག་གིས་བརྡར་བ༔ ཕྱི་དགྲ་ཡིད་ལ་བསམ་པ༔ ད་དགྲ་དངོས་སུ་བྱེད་པ༔ ལྷ་ཁྱེད་ལ་མཐུ་མེད་ཟེར་བ༔ མི་ང་ལ་ལྷ་མེད་ཟེར་བ༔ དགྲ་སྣ་རྐུན་སྣ་ཇག་སྣ་སྟོན་པ༔ བསམ་ངན་སྦྱོར་རྩུབ་བྱེད་པ་དེ་དག་ཐམས་ཅད་སྐད་ཅིག་རང་དབང་མེད་པར་སྦྱར་མ་རླུང་གིས་ཁྱེར་བ་ལྟར་གཟུགས་ལིངྒ་འདི་ལ་ཁུག་ཅིག༔ བཛྲ་ཨངྐུ་ཤ་ཛ༔ བཛྲ་པ་ཤ་ཧཱུྃ༔ བཛྲ་སྤོ་ཊ་བཾ༔ བཛྲ་གྷནྡྷེ་ཧོ༔ ཨ་ཝེ་ཤ་ཡ་ཨ་ཨཱཿ ལན་གསུམ༔ ཕོ་ཉ་བསྐུལ་བ་ནི༔ ཧཱུྃ༔ དམ་ཚིག་ཆེན་པོའི་དུས་ལ་བབ༔ དབང་དྲག་ཡབ་ཡུམ་ལྷ་ཚོགས་རྣམས༔ སྤྲུལ་པ་འགྱེད་པའི་དུས་ལ་བབ༔ དགྲ་བགེགས་འགུགས་པའི་དུས་ལ་བབ༔ གང་ལ་བྱ་བ་ཁྱོད་ཀྱིས་ཤེས༔ ཡིད་ལ་བརྣག་པའི་དགྲ་བོ་འདི༔ རང་དབང་མེད་པར་འདིར་ཁུག་ཅིག༔ དབང་དུ་བསྡུས་ལ་འདིར་ཁུག་ཅིག༔ ཧཱུྃ༔ ཁྲོ་བོའི་སྤྲུལ་པས་འོད་ཟེར་ཁྱུག༔ ལྕགས་ཀྱུ་སྤྲུལ་པས་ནམ་མཁའ་གང་༔ ཞགས་པ་སྤྲུལ་པས་ས་གཞི་གང་༔ ལྕགས་སྒྲོག་སྤྲུལ་པས་བར་སྣང་གང་༔
དྲིལ་བུ་སྤྲུལ་པས་ཕྱོགས་མཚམས་གང་༔ འཁོར་བཅས་ལག་ཏུ་ཤོར་མི་འཚལ༔ ཞེས་བཀུག་གོ༔ དགྲ་བོ་ལྷ་དང་ཕྲལ་བའི་བྱ་རོག་འུག་པའི་དང་རུ་གཡབ་ལ༔ ཧཱུྃ༔ དམ་ཉམས་དགྲ་བོ་སྡིག་ཅན་ལ༔ མགོན་པར་བྱེད་པའི་ལྷ་ཁྱོད་ཉོན༔ དམ་ཉམས་དགྲ་བོ་སྡིག་ཅན་འདིས༔ དང་པོ་སངས་རྒྱས་བསྟན་པ་བཤིག༔ བར་དུ་དཀོན་མཆོག་དབུ་འཕང་སྨད༔ ཐ་མ་གསང་སྔགས་གཉེན་པོ་བྲལ༔ དགེ་བ་བཅུ་ནི་ཁྱད་དུ་བསད༔ མི་དགེ་བཅུ་ནི་དང་དུ་བླངས༔ མཚམས་མེད་ལྔ་ཡི་འབྲས་བུར་སྨིན༔ འདི་ནི་བསྒྲལ་བའི་ཞིང་ཡིན་ཕྱིར། འདི་ཡི་མགོན་སྐྱབས་མ་བྱེད་པར༔ ཡེ་ཤེས་ལྷ་ནི་དབྱིངས་སུ་གཤེགས༔ འཇིག་རྟེན་ལྷ་ནི་རང་གནས་སོང་༔ གལ་ཏེ་མི་འགྲོ་སྐྱབས་བྱེད་ན༔ ཡེ་ཤེས་ལྷ་ནི་ཐུགས་དམ་ཉམས་པར་འགྱུར༔ འཇིག་རྟེན་ལྷ་རྣམས་རྡུལ་དུ་རླག་པར་བྱེད༔ དེ་བས་འདི་ཡི་མགོན་སྐྱབས་མ་བྱེད་ཅིག༔ ཨཱ་ཡུ་ཛྷཱ་ན་ཤག་ཕྱེས༔ དེ་ནས་ཕུར་པ་བསྐྱེད་པ་ནི༔ ཧཱུྃ༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲོ་རྒྱལ་རོལ་པའི་དུར་ཁྲོད་ཆེན་པོ་ནས༔ ཤིན་ཏུ་མི་བཟད་རབ་འཇིགས་སྐུར་སྟོན་པ༔ དཔལ་ཆེན་འཁོར་བཅས་དྲག་པོའི་ཕྲིན་ལས་
མཛོད༔ དེ་ནས་ཕུར་པ་ཐོགས་ལ༔ ཧཱུྃ༔ ང་ནི་དབང་དྲག་ཡབ་ཡུམ་སྐུ༔ སྲས་འཁོར་སྤྲུལ་པ་བྱེ་བ་འབུམ༔ བཀའ་སྡོད་རབ་འཇིགས་ཕོ་ཉ་བཅས༔ དབང་དྲག་ལྷ་ཚོགས་དུས་ལ་བབ༔ གཡས་ཀྱི་ཕྱག་ན་ཕུར་པ་འདྲིལ་༔ གཡོན་གྱི་ཕྱག་ན་ལྕགས་ཀྱུ་འཛིན༔ ལྕགས་ཀྱུས་ཟུངས་ལ་ཕུར་པས་ཐོབ༔ གནོད་བྱེད་དགྲ་བགེགས་རྡུལ་དུ་རློགས༔ ཨོཾ་ཨཱ༔ཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཨཀསམརཿཙཤདརཿསཿམཿརཿཡ༔ ཕཊ༔ གནོད་བྱེད་དགྲ་བགེགས་ནི་ཏྲི་ཤ་ཧཱུཾ་མཱ་ར་ཡ་རྦད་སོད་སོད༔ སྙིང་དཀར་ནག་མཚམས་སུ་གདབ་བོ༔ དེ་ཡི་རྣམ་པར་ཤེས་པའི་རྟེན༔ དཀར་པོ་མཆིལ་པའི་སྒོ་ང་ཙམ༔ དེ་ཡི་ནང་ན་སྲོག་དྭངས་མ༔ ཚྭ་ཡིག་ལྗང་གུ་ཕུར་རྩེ་ནས༔ རེག་པས་ཡི་གེ་ཨ་རུ་གྱུར༔ ཨ་དེ་ནམ་མཁར་ཡལ་ནས་ནི༔ ཀུན་བཟང་ཡབ་ཡུམ་ཐུགས་ཀ་རུ༔ ཐེ་ཚོམ་མེད་པར་རྒྱངས་སེ་ཐོན༔ དབྱེ་བ་མེད་དོ་གཤེགས་པར་གྱུར༔ ཕཊ༔ མདུན་བསྐྱེད་ཀྱི་ཐུགས་ཀར་བསྟིམ་མོ༔ ལས་ཕུར་ནི༔ ཧཱུྃ༔ རྡོ་རྗེ་ཕུར་པ་ཀཱི་ལ་ཡ༔ སངས་རྒྱས་ཡོངས་རྫོགས་ཕྲིན་ལས་སྐུ༔ ཕུར་ཐུན་དྲག་པོ་ཐོག་ལྟར་འབེབས༔ དགྲ་བགེགས་གཟུགས་ཕུང་
རྡུལ་དུ་རློགས༔ ཧཱུྃ༔ ཡུངས་དཀར་རྒྱལ་པོ་ཤ་རི་རམ༔ ཁྲོ་རྒྱལ་ཡོངས་རྫོགས་གྱད་ཀྱི་སྐུ༔ དགྲ་བགེགས་ལྔ་ཕུང་རྡུལ་དུ་རློགས༔ ཧཱུྃ༔ རཀྟའི་རྒྱ་མཚོའི་རྦ་ཀློང་འཁྲུག༔ མ་མོ་ཡོངས་རྫོགས་བྱེད་ཀྱི་སྐུ༔ དགྲ་བགེགས་ལྔ་ཕུང་རྡུལ་དུ་རློགས༔ ཧཱུྃ༔ མཚེ་མདའ་དྲག་པོ་སྐར་ལྟར་འཁྲུག༔ དྲེགས་པ་འཇོམས་མཛད་ཙམ་གྱི་སྐུ་དགྲ་བགེགས་ལྔ་ཕུང་རྡུལ་དུ་རློགས༔ ཧཱུྃ༔ སྟོབས་ཆེན་འདུས་པ་རྡོ་ཡི་ཐུན༔ བདུད་འཇོམས་ཡོངས་རྫོགས་གྱད་ཀྱི་སྐུ༔ དགྲ་བགེགས་ལྔ་ཕུང་རྡུལ་དུ་རློགས༔ ཧཱུྃ༔ དཔལ་ཆེན་དྲག་པོ་མདའ་ཡི་ཐུན༔ དྲེགས་པ་ཡོངས་རྫོགས་གྱད་ཀྱི་སྐུ༔ དགྲ་བགེགས་ལྔ་ཕུང་རྡུལ་དུ་རློགས༔ ཧཱུྃ༔ འབྱུང་བ་དུག་ཐུན་རླུང་ལྟར་འཚུབ༔ གདུག་པའི་དུག་སྣ་ཡོངས་རྫོགས་སྐུ༔ དགྲ་བགེགས་ལྔ་ཕུང་རྡུལ་དུ་རློགས༔ ཧཱུྃ༔ མཚོན་ཆེན་འབར་བ་ཆེན་པོ་ཡི༔ ལུས་ནི་དུམ་བུར་གཏུབ་པར་བྱ༔ དབང་པོ་རྩད་ནས་བཅད་པར་བྱ༔ རྡུལ་ཕྲན་བཞིན་དུ་བརླག་པར་བྱ༔ དུམ་བུ་དུམ་བུ༔ ཤག་ཤག་ཚལ་པ་ཚལ་པ༔ རྦད་རྦད༔ ལིང་རོ་དུམ་བུར་གཏུབ་བོ༔ དེ་ནས་ཞལ་དུ་བསྟབ་པ་ནི༔ ཤ་ཁྲག་བདུད་རྩི་བསྟབ་ལ༔ ཧཱུྃ༔ རིག་འཛིན་
དཀྱིལ་འཁོར་ལྷ་ཚོགས་ཞལ་ཕྱེས་ཤིག༔ དམ་ཉམས་དགྲ་བགེགས་ཤ་ཁྲག་རུས་པའི་ཚོགས༔ དབང་དྲག་པདྨའི་ལྷ་ཚོགས་ཞལ་དུ་བསྟབ༔ ཌོཀི་སེང་གདོང་ལྷ་ཚོགས་ཞལ་དུ་བསྟབ༔ བཀའ་སྲུང་དམ་ཅན་རྒྱ་མཚོའི་ཞལ་དུ་བསྟབ༔ ཞལ་དུ་བསྟབ་བོ་ཁ་རཾ་ཁཱ་ཧི༔ མགུལ་དུ་བསྟིམ་མོ་ཨཱ་ར་ལི༔ དབྱིངས་སུ་བསྟིམ་མོ་ས་མ་ཡ༔ དགྲ་བགེགས་ཀྱི་ཤ་ཁྲག་རུས་པ་ལ་ཁ་རཾ་ཁཱ་ཧི༔ དྲག་པོས་བསྒྲལ་ལས་ནི༔ སྤྲུལ་པའི་གཏེར་སྟོན་འཇའ་ཚོན་སྙིང་པོས་གཏེར་བྱོན་གྱི་བཀའ་དགོངས་ཕུར་གསུམ་སོགས་ནས་ཁོལ་དུ་ཕྱུང་བ་ཀུན་ལ་མེད་པའི་མདོར་བསྡུས་ཧ་ཅང་མི་ཉོབ་པ་འདོན་ཆ་ལག་ལེན་ཁྱེར་བདེ་ཡིན་ནོ༔ སྔགས་འཆང་རཱ་གའི་མིང་གིས་སོ། །མངྒ་ལཾ།། །། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།