དགོངས་གསོལ།
ཧོཿ དགོངས་སུ་གསོལ་ལོ། །ལན་གསུམ། ཆོས་དབྱིངས་སྐྱེ་བ་མེད་པའི་ཀློང་ཡངས་ནས། མ་འགགས་གཟུགས་སྐུ་ཁྲོས་པའི་ཚུལ་བསྟན་པ། ཁྲོ་བོའི་རྒྱལ་པོ་དཔལ་ཆེན་གུ་རུ་དྲག་པོ། ཡུམ་མཆོག་དྲག་མོ་སེངྒེའི་གདོང་པ་ཅན། འཁོར་ཚོགས་སྤྲུལ་པ་ཡང་སྤྲུལ་དང་བཅས་པ། ཤ་ཁྲག་ལ་དགྱེས་ཤིང་སྲོག་ལ་རྔམས་པ། ཁྱེད་རྣམས་ཀྱིས་ཞིང་བཅུ་ཚང་བའི་བྱད་མ། སངས་རྒྱས་པདྨ་འབྱུང་གནས་ཀྱི་བསྟན་ལ་སྡང་བ། ཁྱད་པར་དུ་རྣལ་འབྱོར་པ་བདག་ཅག་དཔོན་སློབ་མི་ནོར་ཡོན་མཆོད་ལ་གནོད་ཅིང་འཚེ་བར་བྱེད་པའི་གཟུགས་ཅན་གྱི་དགྲ་གཟུགས་མེད་ཀྱི་བགེགས། དམག་ཇག་དང་རྐུན་སྣ་སྟོན་པ། མཐུ་བུ་ལོན་བཞིན་དུ་བསྙག་པ། དགྲ་ཡ་དང་རྩོད་ཡ་བྱེད་པ། སྔགས་པ་མཐུ་མེད་ཟེར་མི། གསོས་པའི་ལེ་དགུ་ལྷ་ལོག །སློབ་པའི་སློབ་བུ་དམ་ལོག །བརྟེན་པའི་མགོ་དཔོན་ཁྲིམས་མེད། བཞག་པའི་བྲན་འཁོར་སྙིང་རིང་། བཅོས་པའི་ནད་པ་གསོས་ལོག །གཏམ་པའི་ཤག་རོགས་མནའ་ཟན། དམ་ཉམས་པའི་དགྲ་བོ་འདི་ཉིད་སྐྱོབ་བྱེད་ལྷ་སྲུང་དང་ཁང་ཁྱིམ་རྣམས་ལ་ཁྲོལ་ཅིག །ཀ་ཆ་སྒོ་ཟོག་དང་འཁོར་གཡོག་
རྣམས་རློགས་ཤིག །ནད་བཞི་བརྒྱ་རྩ་བཞི་དང་ཡེ་འདྲོགས་གློ་བུར་རྣམས་ཐོངས་ཤིག །དབང་ཐང་རླུང་རྟ་ལ་གནོད་པའི་ཚེ་སྲོག་ཆོད་ཅིག །ལོ་དང་ཟླ་བ་ཞག་དང་ཟ་མར་མ་འགྱང་བར་ད་ལྟ་ཉིད་དུ་ཐལ་བ་རྡུལ་ཕྲན་བཞིན་དུ་རློགས་ཤིག །ནམ་མཁའ་སྟོང་པ་ལ་ཚད་མ་བཙུགས། ཚེ་ཕྱི་མ་ལ་དུས་མ་འདེབས། སྐྱེ་འཆི་གཉིས་ལ་ཁུང་མ་ཕྱིན། ལས་ཀྱི་དབང་བཙན་ལ་སྙད་མ་འདོགས་པར་མྱུར་དུ་རྟགས་དང་མཚན་མ་སྟོན་ཅིག །ཤ་ཁྲག་ལས་མཁན་རྣམས་ཀྱིས་དཔའ་ཟས་མཛོད་ཅིག །མཐར་རྣམ་པར་ཤེས་པ་བདེ་བ་ཅན་དུ་སངས་རྒྱས་པའི་ཕྲིན་ལས་མཛོད་ཅིག །ཅེས་ཟོར་འཕང་བ་འདི་རྣལ་འབྱོར་རང་དོན་མ་གཏོགས་གར་ཐོད་ཐོད་དུ་བྱ་མི་རུང་བས། ཀརྨ་ཨ་རཱ་གའི་ཐུགས་གཏེར་རོ། །མངྒ་ལཾ། །ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།