བཀའ་རྫོགས་པ་ཆེན་པོར་ཡང་ཟབ་དཀོན་མཆོག་སྤྱི་འདུལ་ལས་དབང་དྲག་འབར་བའི་བྱུང་ཟློག
བཀའ་རྫོགས་པ་ཆེན་པོར་ཡང་ཟབ་དཀོན་མཆོག་སྤྱི་འདུལ་ལས་དབང་དྲག་འབར་བའི་བྱུང་ཟློག་བཞུགས་སོ།།
གུ་རུ་བཛྲ་ག་རུ་ཊ་སིདྡྷི་ཧཱུྃ༔ དབང་དྲག་འབར་བའི་བྱུང་ཟློག་ནི༔ དམར་གཏོར་ཤ་ཁྲག་གིས་བརྒྱན་པ༔ དཔལ་བཤོས་རྣོ་ཞིང་དབལ་དང་ལྡན་པ་ལྔ་བཤམས༔ དགུག་གཞུག་སྤྱི་ལྟར་བྱ༔ སྨན་དང་བདུད་རྩི་རཀྟས་བྲན་ལ་འདི་སྐད་དོ༔ ཧཱུྃ༔ དྲག་པོ་པདྨ་ཐོད་ཕྲེང་སྤྱི་གཙུག་ནས༔ ཕྲིན་ལས་ལྷུན་གྲུབ་མཐའ་ཡས་རབ་ཁྲོས་པའི༔ སྤྱི་བོའི་གཙུག་ནས་ལྷ་འདྲེ་གཉན་པོ་ལྡིང་༔ བྱ་ཁྱུང་མཐིང་ནག་མེ་ཡི་གཤོག་པ་ཅན༔ ཁྲོ་གཉེར་སྤྱན་གསུམ་རྡོ་རྗེའི་མཆུ་སྡེར་གྱིས༔ ཞེ་སྡང་གདུག་པའི་ཀླུ་རྣམས་ཞལ་དུ་གསོལ༔ གནམ་ལྕགས་རྭ་ལ་རྡོ་རྗེའི་ཚྭ་ཚྭ་འཕྲོས༔ རིགས་ཀྱི་བདག་པོ་སྤྱི་བོའི་གཙུག་
ན་བཞུགས༔ མི་འགྱུར་འབར་བ་རྡོ་རྗེའི་བ་སྤུ་ལ༔ སྤྲུལ་པ་ཡང་སྤྲུལ་བྱ་ཁྱུང་མང་པོ་འགྱེད༔ རལ་གྲི་འབར་བའི་གཤོག་པ་གཡས་གཡོན་ལ༔ ཡེ་ཤེས་དབལ་གྱི་མེ་དགྲ་འབྲུག་སྟོང་ལྡིར༔ མཐའ་ཡས་ཁྲོས་པའི་ཁྱུང་ལ་ཕྱག་འཚལ་ལོ༔ ཁྱུང་ཆེན་རྭ་ཅོ་ལྡིང་བ་ཡིས་འབྱུང་བ་ཀུན་འཁྲུག་ལྟས་ངན་ཟློག༔ རིགས་ལྔའི་སངས་རྒྱས་དབུ་ལ་བརྒྱན༔ ཉོན་མོངས་ལས་ཀྱི་ལྟས་ངན་ཟློག༔ སྤྱན་གསུམ་ཁྲོ་ཆུ་ཁོལ་མ་འདྲེ༔ ས་བདག་དམོད་པའི་ལྟས་ངན་ཟློག༔ གཡས་ཀྱི་གཤོག་ཟུར་བཅུ་པོ་ལ༔ གསོད་བྱེད་ཁྲོ་བོ་བཅུ་རུ་ཤར༔ གསོད་བྱེད་བཅུ་ཡི་ལྟས་
ངན་ཟློག༔ གཡོན་གྱི་གཤོག་ཟུར་བཅུ་པོ་ལ༔ ཟ་བྱེད་ཁྲོ་མོ་བཅུ་རུ་ཤར༔ སྒྲོལ་བྱེད་ཡུམ་གྱི་ལྟས་ངན་ཟློག༔ ཁྱུང་གི་འཇུག་སྒྲོ་སྤྲུལ་པ་ཡིས༔ སྲིད་པའི་མ་མོའི་ལྟས་ངན་ཟློག༔ ཁྱུང་གི་སྡེར་མོ་བསྒྲད་པ་ཡིས༔ སྔགས་པའི་ཕུར་ཁའི་ལྟས་ངན་ཟློག༔ ཁྱུང་གི་ཟེར་སྒྲ་སྒྲོག་པ་ཡིས༔ རྦོད་གཏོང་ངན་པའི་ལྟས་ངན་ཟློག༔ ཁྱུང་གི་རྐན་སྒྲ་བརྡབ་པ་ཡིས༔ ལྷ་སྲིན་འཁྲུག་པའི་ལྟས་ངན་ཟློག༔ ལྕེ་ནི་གློག་ལྟར་དམར་བ་ཡིས༔ བན་བོན་ངན་པའི་ལྟས་ངན་ཟློག༔ སྲེག་པའི་ཚྭ་ཚྭ་ཕྱོགས་བཅུར་འཕྲོས༔ དྲང་སྲོང་དམོད་པའི་ལྟས་ངན་ཟློག༔ བྷྱོ་བྷྱོ༔ ཁྲོ་ག་རུ་ཎ་ཙ་ལེ་ཙ་ལེ་ནཱ་ག་ཧཱུྃ་ཕཊ༔ ཁྲོ་ཡིག་ཡོངས་སུ་གྱུར་པ་ལས༔ འོད་ཟེར་སྣ་ཚོགས་ཕྱོགས་བཅུར་འཕྲོས༔ ནད་གདོན་བར་ཆད་བསལ་ནས་ཀྱང་༔ མཆོག་ཐུན་དངོས་གྲུབ་སྩོལ་བ་དང་༔ མི་ནད་ཕྱུགས་ནད་ཞི་བར་མཛོད༔ ཤ་ཁྲག་དམར་གྱི་གཏོར་མ་འདི༔ ཁྱུང་ཆེན་འབར་བའི་ལྷ་ཚོགས་ཀྱིས༔ བཞེས་ཤིག་རོལ་ཅིག་ཁོ་རཾ་ཁཱ་ཧི༔ དགྲ་བགེགས་བསྒྲལ་བའི་ཤ་ཁྲག་རུས༔ ཕུང་ཁམས་སྐྱེ་མཆེད་མ་ལུས་པ༔ ཁྱུང་ཆེན་འབར་བའི་ཞལ་དུ་བསྟབ༔ བདག་གིས་བྱང་ཆུབ་བསྒྲུབ་པ་
ལ༔ འགལ་རྐྱེན་བར་ཆད་ཞི་བ་དང་༔ མཐུན་རྐྱེན་བསམ་པ་མྱུར་དུ་སྒྲུབས༔ རྣལ་འབྱོར་བདག་ཅག་འཁོར་བཅས་ཀྱི༔ ཀླུ་གདོན་ཐམས་ཅད་བཟློག་ཏུ་གསོལ༔ སྨྱོ་ནད་ཐམས་ཅད་བསྒྱུར་དུ་གསོལ༔ རིམས་ནད་ཐམས་ཅད་བསལ་དུ་གསོལ༔ མི་མཐུན་གནོད་པའི་རྐྱེན་ངན་རྣམས༔ སྣང་བ་དགྲ་བོའི་ཡུལ་ལ་བྷྱོ༔ གནོད་པར་བྱེད་པའི་བགེགས་ལ་བྷྱོ༔ ཟ་བར་བྱེད་པའི་འདྲེ་ལ་བྷྱོ༔ ཕུང་བར་བྱེད་པའི་སྲི་ལ་བྷྱོ༔ ཡིད་ལ་བརྣག་པའི་སྟེང་ལ་བྷྱོ༔ བྷྱོ༔ བཛྲ་ག་རུ་ཊ་ཙ་ལེ་ཙ་ལེ་ཧཱུཾ་ཕཊ༔ ཨེ་ན་མ་ཡ་བྷྱོ་བཟློག་ཅིག༔ ཅེས་གཏོར་མ་མདོས་ནང་དུ་འབུལ༔ ཕྲིན་ལས་གང་བཅོལ་བསམ༔ སྒྲུབ་པའི་བར་ཆད་ཟློག་པར་ཐེ་ཚོམ་མེད་དོ༔ ཞེས་དགེ་སློང་ཡང་དག་གིས་བསྐུལ་ཕྱིར་ཀརྨ་རཱ་ག་ཨ་སྱས་སྦྱར་བ་འདི་ཡིས་སྔགས་འཆང་མང་པོ་ལ་ཕན་ཐོགས་པར་ཤོག། །། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།