དབང་དྲག་པདྨའི་ཟོར་ཟློག་དང་རྩང་གྱེར།
དབང་དྲག་པདྨའི་ཟོར་ཟློག་དང་རྩང་གྱེར་བཞུགས་སོ༔ གསང་སྔགས་བསྟན་དགྲ་བསྒྲལ་བའི་མཚོན་ཆར་ཤོག༔
ཧཱུྃ༔ དབང་དྲག་འབར་བ་དྲག་པོ་ཐོད་ཕྲེང་རྩལ༔ སྐུ་མདོག་དམར་ནག་དུས་མཐའི་མེ་ལྟར་འབར༔ འཁོར་འདས་སྡང་དགྲ་གནོད་པ་བཟློག་ཏུ་གསོལ༔ དམར་ལ་ཟླུམ་པའི་སྤྱན་གསུམ་ཕྱོགས་བཅུར་གཟིགས༔ དུག་གསུམ་མི་དགེ་བཅུ་རྣམས་བཟློག་ཏུ་གསོལ༔ ཐོད་སྐམ་ལྔ་ཡི་དབུ་ལ་བརྒྱན་པ་ཡིས༔ དུག་ལྔ་ལས་གྱུར་ནད་གདོན་བཟློག་ཏུ་གསོལ༔ དབུ་སྐྲ་རལ་པས་ནམ་མཁར་ཁྱབ་པ་ཡིས༔ སྟེང་གདོན་གཟའ་སྐར་ལྷ་གདོན་བཟློག་ཏུ་གསོལ༔ ཤངས་ནས་འབྲུག་སྒྲ་རླུང་ནག་འཚུབ་པ་ཡིས༔ ཐོག་སེར་ལོ་ཉེས་མུ་གེ་བཟློག་ཏུ་གསོལ༔ ཞལ་
གདངས་ལྗགས་འདྲིལ་མཆེ་བཞི་གཙིགས་པ་ཡིས༔ ཟ་འདྲེ་བདུད་བཞིའི་གནོད་པ་བཟློག་ཏུ་གསོལ༔ ཕྱག་གཡས་གསེར་གྱི་རྡོ་རྗེ་ཕྱར་བ་ཡིས༔ མཐའ་དམག་དུས་འཁྲུག་རོ་ལངས་བཟློག་ཏུ་གསོལ༔ གཡོན་པས་སྤྲུལ་པའི་སྡིག་རྒོད་འགྱེད་པ་ཡིས༔ རྒྱལ་འགོང་དམ་སྲི་སྨྱོ་འདྲེ་བཟློག་ཏུ་གསོལ༔ སྦྲུལ་རིགས་ལྔ་ཡི་དབུ་ལ་བརྒྱན་པ་ཡིས༔ ཀླུ་རིགས་ལྔ་ཡི་གནོད་པ་བཟློག་ཏུ་གསོལ༔ མི་མགོ་རློན་པས་དོ་ཤལ་བྱས་པ་ཡིས༔ འཆི་བདག་གཤིན་རྗེའི་ཕོ་ཉ་བཟློག་ཏུ་གསོལ༔ གླང་ཆེན་ཀོ་རློན་སྟོད་གཡོགས་བྱས་པ་ཡིས༔ བགེགས་དང་བདུད་ཀྱི་སྟོབས་
ནུས་བཟློག་ཏུ་གསོལ༔ ཞབས་གཉིས་བརྐྱང་བསྐུམ་དྲེགས་པ་མནན་པ་ཡིས༔ སྲིད་དང་ཞི་བའི་མཐའ་གཉིས་བཟློག་ཏུ་གསོལ༔ སྟག་གི་པགས་པས་སྨད་དཀྲིས་བྱས་པ་ཡིས༔ ཤ་ཟ་སྡེ་བརྒྱད་གནོད་པ་བཟློག་ཏུ་གསོལ༔ རུས་པའི་རྒྱན་དྲུག་སྐུ་ལ་གསོལ་བ་ཡིས༔ དུར་སྲི་དུར་འདྲེའི་གནོད་པ་བཟློག་ཏུ་གསོལ༔ སྐུ་ལས་ཁྲོ་ཆུང་ཚྭ་ཚྭ་འཕྲོ་བ་ཡིས༔ ཁྲོ་བོ་ཁྲོ་མོས་བཀའ་ཆད་བཟློག་ཏུ་གསོལ༔ བསྐལ་པའི་མེ་དཔུང་ཀློང་ན་བཞུགས་པ་ཡིས༔ མ་རིག་འཁོར་བའི་སྡུག་བསྔལ་བཟློག་ཏུ་གསོལ༔ མཁའ་འགྲོ་མ་ཚོགས་རོལ་དུ་ཁྲིད་པ་ཡིས༔ ཡེ་ཤེས་འཇིག་རྟེན་སུན་མ་བཟློག་ཏུ་གསོལ༔ མེ་དབལ་ཁྲོ་ཚོགས་གཡས་ན་ཧཱུཾ་སྒྲ་ཡིས༔ སྲིད་པ་ཕོ་རྒྱུད་གནོད་པ་བཟློག་ཏུ་གསོལ༔ མཁའ་འགྲོ་མ་ཚོགས་གཡོན་ན་ཕཊ་སྒྲ་ཡིས༔ སྲིད་པ་མོ་རྒྱུད་གནོད་པ་བཟློག་ཏུ་གསོལ༔ ཡེ་ཤེས་ཁྱུང་ཆེན་ནམ་མཁར་ལྡིང་བ་ཡིས༔ ཀླུ་གཉན་ས་བདག་གནོད་པ་བཟློག་ཏུ་གསོལ༔ ཕྱོགས་མཚམས་སྤྲུལ་པའི་ལྕགས་སྡིག་ཤིགས་སེ་ཤིག༔ འབྱུང་པོ་དམ་སྲི་འགོང་པོ་བཟློག་ཏུ་གསོལ༔ སྡེ་བརྒྱད་དམག་དཔུང་བྲན་དུ་བསྐོལ་བ་ཡིས༔ དགྲ་སྣ་དམག་སྣ་ཇག་རྐུན་བཟློག་ཏུ་
གསོལ༔ བཟློག་བསྒྱུར་བཅོལ་བའི་ཕྲིན་ལས་འགྲུབ་པར་མཛོད༔ ཧཱུཾ་བྷྱོ༔ དབང་དྲག་འབར་བའི་ཡུམ་གཅིག་སེང་གདོང་མ༔ སྐུ་མདོག་མཐིང་ནག་ཆོས་ཉིད་འགྱུར་བ་མེད༔ ལས་ངན་འཁོར་བའི་བག་ཆགས་བཟློག་ཏུ་གསོལ༔ སེང་གེའི་ཞལ་གདངས་ངར་སྒྲ་སྒྲོག་པ་ཡིས༔ བོན་དང་མུ་སྟེགས་ཚོགས་རྣམས་བཟློག་ཏུ་གསོལ། ལོངས་སྤྱོད་རྫོགས་སྐུའི་ཆས་རྣམས་རྫོགས་པ་ཡིས༔ མུ་སྟེགས་ལྟོག་འགོང་དབུལ་སྲི་བཟློག་ཏུ་གསོལ༔ ཕྱག་གཡས་གྲི་གུག་ནམ་མཁར་ཕྱར་བ་ཡིས༔ ལས་བྱེད་སྲོག་གཅོད་དབུགས་ལེན་བཟློག་ཏུ་གསོལ༔ གཡོན་པས་ཐོད་ཁྲག་ཐུགས་ཀར་བསྣམས་པ་ཡིས༔ མ་མོའི་ཁྲག་ནད་དལ་ཡམས་བཟློག་ཏུ་གསོལ༔ ཁ་ཊཾ་རྩེ་གསུམ་མཆན་དུ་བཅུགས་པ་ཡིས༔ དུག་གསུམ་ནད་གསུམ་གདོན་གསུམ་བཟློག་ཏུ་གསོལ༔ རུས་རྒྱན་མེ་ལོང་དྲིལ་བུ་གཡེལ་ཁ་ཡིས༔ དཔའ་བོ་ཌཱཀིའི་སུན་མ་བཟློག་ཏུ་གསོལ༔ ཡེ་ཤེས་མེ་དཔུང་སྐུ་ལ་འབར་བ་ཡིས༔ གཟུང་འཛིན་གྲིབ་དང་མི་གཙང་བཟློག་ཏུ་གསོལ༔ གར་ཐབས་པད་ཉི་རོ་སྟེང་འགྱིང་བ་ཡིས༔ སྣང་ཞིང་སྲིད་པའི་གདོན་ཚོགས་བཟློག་ཏུ་གསོལ༔ སྐུ་
སྤྲུལ་མཁའ་འགྲོ་སེང་གདོང་དཀར་མོ་ཡིས༔ བནྡེའི་བྱད་ཁ་རྒོད་གཏོང་བཟློག་ཏུ་གསོལ༔ གསུང་སྤྲུལ་དམར་མོ་སྟག་གི་གདོང་ཅན་གྱིས༔ བན་བོན་ངན་སྔགས་བྱད་ཁ་བཟློག་ཏུ་གསོལ༔ ཐུགས་སྤྲུལ་ལྗང་མོ་དོམ་གྱི་གདོང་ཅན་གྱིས༔ མུ་སྟེགས་ངན་པའི་སྦྱོར་ངན་བཟློག་ཏུ་གསོལ༔ ཡོན་ཏན་སྤྲུལ་པ་མ་མོ་འབུམ་སྡེ་ཡིས༔ མ་མོའི་དལ་ཁ་རིམས་ནད་བཟློག་ཏུ་གསོལ༔ ཕྲིན་ལས་སྤྲུལ་པ་སྤྱང་གདོང་ལྗང་མོ་ཡིས༔ གཏད་སེལ་ཕྲ་མེན་རླུང་འཁོར་བཟློག་ཏུ་གསོལ༔ ཡང་སྤྲུལ་ཕོ་ཉ་རི་རབ་རྡུལ་མཉམ་གྲངས༔ དགྲ་འདྲེའི་ལྟས་ངན་ཡེ་འདྲོགས་བཟློག་ཏུ་གསོལ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ དབང་དྲག་འབར་བ་ཡབ་ཡུམ་གྱི་རྩང་བསྟོད་བཞུགས་སོ༔ ཧཱུཾ་བྷྱོ༔ དབང་དྲག་འབར་བའི་ཡབ་ཡུམ་གཏོར་ཆེན་གྱི༔ ཕྱི་རིམ་ལྕགས་རི་དཀྱིལ་འཁོར་མུ་རན་ལ༔ དམར་ནག་ཅུང་ཕུར་ཉི་ཤུ་རྩ་བརྒྱད་བཀོད༔ དངུལ་ལམ་དཀར་པོའི་ཤིང་ལ་བྱས་པ་ཡི༔ ཤར་ཕྱོགས་ཞི་བའི་ལས་མཛད་རྩང་ཕུར་བདུན༔ ཞི་བའི་རྩང་ཕུར་ཟླུམ་པོ་ཨ་ལོང་རིས༔ ཡར་གྱི་རྩེ་ལ་དུང་སེང་རལ་པ་བསིག༔ མར་གྱི་རྩེ་ལ་ཆུ་སྲིན་མཆེ་བ་གཙིགས༔ སྐེད་པ་
རྒྱ་མདུད་ཟླུམ་པོའི་གཞལ་ཡས་ཁང་༔ ཞི་བའི་ལས་མཛད་ཤར་གྱི་མ་བདུན་གནས༔ ནད་གདོན་འཇིགས་པ་བརྒྱད་སོགས་ཞི་བ་དང་༔ ཤར་ཕྱོགས་དགྲ་བགེགས་བཟློག་པའི་ཕྲིན་ལས་མཛོད༔ གསེར་རམ་རྒྱས་པའི་ཤིང་ལ་བྱས་པ་ཡི༔ རྒྱས་པའི་ལས་མཛད་ལྷོ་ཡི་རྩང་ཕུར་བདུན༔ རྒྱས་པའི་རྩང་ཕུར་གྲུ་བཞི་ཨ་ཁང་རིས༔ ཡར་གྱི་རྩེ་ལ་རྒྱ་སྟག་འཛུམ་དྲུག་རྒྱས༔ མར་གྱི་རྩེ་ལ་ཕག་རྒོད་མཆེ་བ་གཙིགས༔ སྐེད་པ་རྒྱ་མདུད་གྲུ་བཞི་གཞལ་ཡས་ཁང་༔ རྒྱས་པའི་ལས་མཛད་ལྷོ་ཡི་སྲིང་བདུན་གནས༔ ཚེ་བསོད་འབྱོར་པ་དྲུག་པོ་རྒྱས་པ་དང་༔ ལྷོ་ཡི་དགྲ་བགེགས་བཟློག་པའི་ཕྲིན་ལས་མཛོད༔ ཟངས་སམ་དབང་གི་ཤིང་ལ་བྱས་པ་ཡི༔ དབང་གི་ལས་མཛད་ནུབ་ཀྱི་རྩང་ཕུར་བདུན༔ དབང་གི་ལས་མཛད་ཟླ་ཕྱེད་ཟླ་གམ་རིས༔ ཡར་གྱི་རྩེ་ལ་གཟིག་ཆེན་ཐིག་ལེ་ངར༔ མར་གྱི་རྩེ་ལ་དོམ་ནག་མཆེ་བ་གཙིགས༔ སྐེད་པ་རྒྱ་མདུད་ཟླ་གམ་གཞལ་ཡས་ན༔ དབང་གི་ལས་མཛད་ནུབ་ཀྱི་མ་བདུན་གནས༔ སྣང་སྲིད་མ་ལུས་དབང་དུ་སྡུད་པ་དང་༔ ནུབ་ཀྱི་དགྲ་བགེགས་བཟློག་པའི་ཕྲིན་ལས་མཛོད༔ ལྕགས་སམ་
དྲག་པོའི་ཤིང་ལས་བྱས་པ་ཡི༔ དྲག་པོའི་ལས་མཛད་བྱང་གི་རྩང་ཕུར་བདུན༔ དྲག་པོའི་རྩང་བཙུགས་གྲུ་གསུམ་ཕུར་སོ་རིས༔ ཡར་གྱི་རྩེ་ལ་བསྲེ་ཡི་བྱ་གླག་འཇུམ༔ མར་གྱི་རྩེ་ལ་ལྕགས་ཀྱི་ཕོ་རོག་གྲག༔ སྐེད་པ་རྒྱ་མདུད་གྲུ་གསུམ་གཞལ་ཡས་ཁང་༔ དྲག་པོའི་ལས་མཛད་བྱང་གི་བྲན་བདུན་གནས༔ བདུད་བཞིའི་དགྲ་བགེགས་དམ་སྲི་བསྒྲལ་བ་དང་༔ བྱང་གི་དགྲ་བགེགས་བཟློག་པའི་ཕྲིན་ལས་མཛོད༔ དཀྱིལ་འཁོར་མཐའ་སྐྱོང་དབང་མོ་ཉེར་བརྒྱད་དང་༔ རྩང་ཕུར་ཉེར་བརྒྱད་འཚུབ་མ་རིས་སུ་བཙུགས༔ ཡར་རྩེ་ཟུར་གསུམ་མཁའ་ལ་ཟེངས་སེ་ཟེང་༔ སྟེང་ཕྱོགས་གཟའ་དང་རྒྱུ་སྐར་དབལ་ཟེར་ཟློག༔ མར་རྩེ་ཟུར་གསུམ་ངན་སོང་གསུམ་ལ་གཟིར༔ འོག་ཕྱོགས་ཀླུ་དང་ས་བདག་གནོད་པ་ཟློག༔ སྐེད་པ་རྒྱ་མདུད་བར་ན་ཁྲིགས་སེ་ཁྲིག༔ བར་ཕྱོགས་ལྷ་སྲིན་གནོད་པ་བཟློག་ཏུ་གསོལ༔ རྩང་སྟོད་དམར་པོ་མེ་འབར་ལམས་སེ་ལམ༔ དམར་པོ་བཙན་དམག་རྟ་རྒྱུག་ཤ་ར་ར༔ བཙན་གྱི་གྲི་འཐབ་གཟེར་ནད་དགྲ་ལ་ཟློག༔ གཙང་སྨད་ནག་པོ་མུན་པ་ཐིབས་སེ་ཐིབ༔ ནག་པོའི་བདུད་དམག་བྲོ་བརྡུང་ཁྲིགས་སེ་ཁྲིག༔ བདུད་
ཀྱི་ཞགས་པ་ཡེ་འདྲོགས་དགྲ་ལ་ཟློག༔ རྩང་སྐེད་སེར་པོ་རྒྱ་མདུད་ཁྲམ་ཤིང་རིས༔ གཤིན་རྗེའི་ཁྲམ་ཐོག་སྲོག་ལེན་ཡེ་རེ་རེ་འཆི་བདག་གཤིན་རྗེའི་ཁྲམ་ཁ་དགྲ་ལ་ཟློག༔ རྩང་ཕུར་སྨད་ནི་སྲིན་མོ་འགྲོས་སུ་བཙུགས༔ སྲིན་མོ་བླ་རྐུན་ཚོགས་ནི་ཞུངས་སེ་ཞུང་༔ མ་མོའི་ཁྲག་ནད་དལ་ཡམས་དགྲ་ལ་ཟློག༔ རྩང་སྐེད་དྲ་མིག་མཁའ་འགྲོ་དྲུ་བས་སྡོམ༔ དཔའ་བོ་ཌཱཀྐིའི་གར་བྱེད་ཤིགས་སེ་ཤིག༔ གནས་དང་ཡུལ་གྱི་མཁའ་འགྲོའི་སུན་མ་ཟློག༔ རྩང་རྩེ་ཤ་དང་ལིངྒས་བརྒྱན་པ་ཡིས༔ ཤ་ཟ་ཞིང་སྐྱོང་རྣམས་ཀྱི་དལ་ཁ་ཟློག༔ བཱ་སུ་ཏ་དང་སྔོ་དམར་ཞགས་པས་དཀྲིས༔ རྒྱུ་གཟེར་ནད་སྤྲིན་སྔོ་དམར་དགྲ་ལ་ཟློག༔ དམར་ནག་རྩང་གི་ཕུར་པ་ཉི་ཤུ་བརྒྱད༔ དྲག་པོའི་རྩང་ཕུར་མདའ་ལ་ཉེ་རིང་མེད༔ ཐུན་རྫས་ཡུངས་ཀར་རྦབ་ལ་གྱེན་ཐུར་མེད༔ ཕོ་ཉ་མངག་པའི་ལས་ལ་དཀའ་སླ་མེད༔ དྲག་སྔགས་དམིགས་པའི་འབེན་ལ་ཆེ་ཆུང་མེད༔ སྡང་བའི་དགྲ་བགེགས་འབྱུང་པོ་གནོད་བྱེད་རྣམས༔ དྲག་པོ་རྩང་གི་ཕུར་པས་རྡུལ་དུ་རློག༔ ཤ་ཁྲག་དམར་གྱི་གཏོར་མ་འདི་བཞེས་ལ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔
ཅེས་བར་བསྒོ་དབོན་པོས་བསྐུལ་ནས༔ རཱ་ག་ཨ་སྱས་འཕྲལ་དུ་བྲིས་པ་ལ༔ ཉེས་འགལ་མཆིས་ན་ལྷ་དང་སྲུང་མ་རྣམས་ལ་བཤགས༔ དགེ་བས་གསང་སྔགས་བསྟན་པ་མཐའ་རྒྱས་ཤོག༔ བཀྲ་ཤིས་པར་ཤོག༔ ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།