པདྨ་འོད་འབར་གྱི་སྒོ་ནས་སེར་བ་ཟློག་ཐབས།
པདྨ་འོད་འབར་གྱི་སྒོ་ནས་སེར་བ་ཟློག་ཐབས་བཞུགས་སོ༔
ན་མོ་པྲ་ཝཱ་ཀ་ར་ཡེ༔ པདྨ་འོད་འབར་སྐུ་ལ་རབ་བཏུད་ནས༔ དེ་ཡི་སྒོ་ནས་སེར་སྲུང་མན་ངག་བྲི༔ ཆོས་བདག་ཌཱཀིས་བཀའ་ཡི་གནང་བ་སྩོལ༔ དེ་ལ་ནངས་སྔ་ནམ་མཁའ་བྱིན་རླབས་ནི༔ ཧཱུྃ༔ རང་ཉིད་སྐད་ཅིག་པདྨ་འོད་འབར་གསལ༔ ནམ་མཁའི་དབུས་སུ་ཉི་ཟླ་པདྨའི་སྟེང་༔ སངས་རྒྱས་འོད་དཔག་མེད་པ་སྐུ་མདོག་དམར༔ མཚན་དཔེས་རབ་བརྒྱན་སྐྱིལ་ཀྲུང་མཉམ་གཞག་ཅན༔ དམ་ཡེ་དབྱེར་མེད་ཐུགས་སྲོག་ཧཱི༔ཡིས་མཚན༔ དེ་ལས་འོད་ཟེར་ཕྱོགས་བཅུར་འཕྲོས་པ་ཡིས༔ སེར་བདག་ལྷ་འདྲེ་ཀུན་གྱི་གདུག་རྩུབ་ཞི༔ བྱམས་དང་སྙིང་རྗེའི་བསམ་པ་རབ་ལྡན་ནས༔ སྡེ་བརྒྱད་
ལྷ་འདྲེ་སེར་བདག་མ་ལུས་པ༔ ཐམས་ཅད་སྤྱན་རས་གཟིགས་ཀྱི་སྐུ་རུ་གྱུར༔ ཐམས་ཅད་ཡིག་དྲུག་འུར་འུར་འདོན་པར་གྱུར༔ ན་མོ་བུདྡྷ་ཡ༔ ན་མོ་དྷརྨཱ་ཡ༔ ན་མསངྒྷ་ཡ༔ ཨོཾ་ཨ་མི་དྷེ་ཝ་ཧཱི༔ པདྨ་དྷ་རི་ཧཱུྃ༔ ཡུལ་འདི་ཞེས་ཆེ་གེ་མོར་སེར་བ་སྲུངས་ཤིག་རཀྵ་རཀྵ༔ ཞེས་པ་སྲུང་བ་ལན་བདུན༔ ཉེར་གཅིག་བརྒྱའམ་སྟོང་གང་འགྲུབ་བཟླས༔ བླ་མེད་དཀོན་མཆོག་གསུམ་གྱི་བདེན་པའི་མཐུས༔ ཐོག་སེར་ལ་སོགས་གནོད་པ་ཞི་གྱུར་ཅིག༔ སེར་བདག་ལྷ་འདྲེ་འོད་དཔག་མེད་ལ་ཐིམ༔ དེ་ཡང་མི་དམིགས་སྟོང་ཉིད་སྤྲོས་བྲལ་གྱུར༔ དེ་ལྟར་བྱས་པས་གནམ་ཡུལ་འཇམ་པ་ཡིན༔
དེ་ནས་དགོང་མོ་སེར་སྤྲིན་བརྟག་པ་ནི༔ གཡག་ནི་ཁམ་པའི་རྔ་མ་ལངས་འདྲ་དང་༔ ར་ནི་རྒྱ་བོའི་སྤོ་འདྲ་ཁྱུང་ནག་གཤོག་པ་འདྲ༔ སྡིག་པའི་རྭ་འདྲ་ནག་པོ་རྟ་རྔ་འདྲ༔ སྲིན་མོའི་རལ་པ་གསིགས་འདྲ་སེར་སྤྲིན་ཡིན༔ དེ་ནས་སེར་སྤྲིན་དམིགས་པས་གཏོར་བ་ནི༔ ཧཱུྃ༔ བདག་ཉིད་པདྨ་འོད་འབར་སྐུ་རུ་གསལ༔ སེར་སྤྲིན་དབུས་སུ་གུ་རུ་དྲག་པོ་ནི༔ རྡོ་རྗེ་སྡིག་པ་འཛིན་ཅིང་མེ་དཔུང་འབར༔ སེར་སྤྲིན་བསྲེགས་ཤིང་སེར་བ་ཆུ་རུ་བཞུས༔ སེར་བདག་ཐམས་ཅད་རྒྱ་མཚོའི་འགྲམ་དུ་བྲོས༔ སེར་བ་ཞུ་ནས་ཆར་དུ་འབེབས་པར་གྱུར༔ ཨོཾ་ཨཱ༔ཧཱུྃ་བཛྲ་གུ་རུ་པདྨ་སིདྡྷི་ཡ་ཧཱུྃ་ཕཊ༔ ནཱ་ཤ་ཡ༔ ནཱ་ག་ཐེད་ཐེད་སྭཱ་ཧཱ༔ ནཱ་ཤ་ཡ༔ ནཱ་ག་སྭཱ་ཧཱ༔ ཏྲི་མཱ་ར་ཡ་ན་སྭཱ་ཧཱ༔ ཞེས་བརྗོད་སེར་སྤྲིན་གཏོར་རམ་ཞི་བར་འགྱུར༔ གལ་ཏེ་སེར་སྤྲིན་གཏོར་བར་མ་ཐུབ་ན༔ དེ་ནས་གདོང་ཟློག་དམིགས་པ་འདི་ལྟར་བྱ༔ ཧཱུྃ༔ བདག་ཉིད་པདྨ་འོད་འབར་ཐུགས་ཁྲོས་ནས༔ དབང་དྲག་འབར་བ་གུ་རུ་དྲག་པོ་རྩལ༔ དམར་ནག་ཞལ་གཅིག་ཕྱག་གཉིས་ཁྲོ་ཆས་རྫོགས༔ ཕྱག་གཡས་རྡོ་རྗེ་གཡོན་པས་ལྕགས་སྡིག་འགྱེད༔ བསྐལ་པའི་མེ་དཔུང་དབུས་སུ་སྔགས་སྒྲ་སྒྲོག༔ ནམ་མཁའ་ཐམས་ཅད་པདྨ་འོད་འབར་གང་༔ བར་སྣང་ཐམས་
ཅད་གུ་རུ་དྲག་པོས་གང་༔ ས་གཞི་ཐམས་ཅད་སེང་གདོང་ལྷ་མོས་གང་༔ སྙེ་མ་ཐམས་ཅད་ཁྲོ་བོ་ཁྲོ་མོའི་སྐུ༔ ནས་འབྲུ་རེ་རེ་ཧཱུྃ་ཡིག་རེ་རེ་གསལ༔ སྐུ་ལས་མེ་རླུང་འཚུབ་མའི་ཚྭ་ཚྭ་འཐུལ༔ སེར་བ་སེར་བྱེད་ཐམས་ཅད་བསྲེག་པར་གྱུར༔ ཨོཾ་ཨཱ༔ཧཱུྃ་ཨརྩིག་ནི་རྩིག་སོགས། ཧཱུྃ་ཧཱུྃ་ཕཊ༔ ཨཡཐམདུརུཙཤནཆར་ནི་ཆུར་ནི་སྭཱ་ཧཱ། ཞེས་བརྗོད་དམིགས་པ་གསལ་བར་བྱ་བ་ཡིན༔ ལྕགས་བརྡུང་འབྲུག་སྒྲ་གང་དུ་གཟེར་བ་ར༔ ཐོག་སྲུང་དམིགས་པ་འདི་བཞིན་གལ་ཆེའོ༔ སྤྱི་གཙུག་ནམ་མཁར་གསེར་གྱི་འཁོར་ལོ་ནི༔ རྩིབས་སྟོང་སྟེང་དུ་བསྐལ་བཟང་སངས་རྒྱས་སྟོང་༔ དབུས་སུ་སངས་རྒྱས་ཤཱཀྱ་ཐུབ་པ་བཞུགས༔ ཕྱོགས་མཚམས་རྡོ་རྗེའི་རྭ་བ་གུར་དུ་ཕུབ༔ རྐང་པའི་འོག་ཏུ་གཡུ་ཡི་གྲོད་པ་མནན༔ ཨོ་མ་ཧཱ་ཤི་བཛྲ་ཀྲོ་ཏ་ཧཱུྃ་ཕཊ༔ སརྦ་ས་ཁྱི་ཁ་ལི་བྷ་དྲ༔ ཛཱ་ལ་ཛཱ་ལ་ཧཱུྃ་ཕཊ༔ རཾ་རཾ༔ ཞེས་བརྗོད་སྡིགས་མཛུབ་ཕྱོགས་བཅུར་གཡུགས༔ བཅུ་གསུམ་བཟླས་ན་འབྲུག་གི་སྐད་ཡང་འཆག༔ ཉེར་གཅིག་བཟླས་ན་ཐོག་ཀྱང་ར་མར་ལྟར༔ ཞུ་ནས་དངོས་པོ་མེད་པར་འགྱུར་བར་གསུངས༔ དེས་ཀྱང་མ་ཐུབ་སེར་རྐང་བཙུགས་བྱུང་ན༔ ཧཱུྃ༔ རང་ཉིད་དྲག་པོའི་ཕྱག་གཡས་རྡོ་རྗེ་ལས༔ གནམ་ལྕགས་འཁོར་ལོ་མེ་དཔུང་
འབར་བ་འཕྲོས༔ སེར་རྐང་ལ་བརྒྱབ་སེར་རྐང་བཅད་ཅིང་གཏུབ༔ སེར་བ་སེར་བྱེད་སྣ་འདྲེན་དང་བཅས་པ༔ སྟམྦྷ་ཡ༔ ནཱ་ཤ་ཡ་མཱ་ར་ཡ་ཧཱུྃ་རཾ༔ ཕཊ་རཾ༔ བྷྱོ་རཾ༔ ཏྲག་རཾ༔ སེར་བ་རཾ་ཆོད་སྤྲིན་ནག་གཏོར༔ དྲག་ཏུ་རཾ་རཾ༔ ཛྭ་ལ་རཾ་རཾ་ཧཱུྃ་ཕཊ༔ དྲག་ཏུ་བཟླས་ཤིང་དྲག་ཏུ་ཐུན་ཡང་འཕེན༔ ཤིང་རལ་གཡུག་ཅིང་དམིགས་པ་དྲག་ཏུ་བྱ༔ སྡིགས་མཛུབ་དག་གིས་ཞིང་སོགས་མི་གནོད་སར༔ སེར་བའི་ལམ་བསྟན་འདི་བཞིན་བརྗོད་ལ་དམིགས༔ སྤང་རི་ལ་རྒྱོབ༔ བྲག་རི་ལ་རྒྱོབ༔ རྫ་རི་ལ་རྒྱོབ༔ ནགས་རི་ལ་རྒྱོབ༔ དེ་ལྟར་བརྗོད་པས་ཐུབ་པར་སླ་བ་ཡིན༔ འདི་ལྟར་དམིགས་པ་ཟིན་ན་ངེས་པར་ཐུབ༔ གལ་ཏེ་མ་ཐུབ་ཅུང་ཟད་བབས་གྱུར་ཀྱང་༔ སེར་བའི་ཤུགས་འཆག་ལོ་ལ་གནོད་མི་སྲིད༔ དེ་ནས་ལྷ་འདྲེ་སྨྲས་འགྲམ་གསོ་བ་ནི༔ ཧཱུྃ༔ རང་ཉིད་སྐད་ཅིག་འཕགས་པ་སྤྱན་རས་གཟིགས༔ ནམ་མཁའ་བར་སྣང་ཐམས་ཅད་སྐུ་ཡིས་ཁྱབ༔ ༔ ཕྱག་གཡོན་པདྨ་གཡས་པས་མཆོག་སྦྱིན་མཛད༔ མཆོག་སྦྱིན་མཐིལ་ནས་བདུད་རྩིའི་རྒྱུན་བབས་པས༔ ལྷ་འདྲེ་སེར་བདག་ཁྲུས་བྱས་བདུད་རྩི་འཐུང་༔ སྨྲས་འགྲམ་སྡུག་བསྔལ་ཐམས་ཅད་རབ་ཏུ་ཞི༔ བཀྲག་མདངས་གཟི་བརྗིད་ཐམས་ཅད་སྔར་བས་ཚེ༔ ཐམས་ཅད་དད་གུས་ཕྱག་
འཚལ་སྐོར་བ་བྱས༔ བྱམས་དང་སྙིང་རྗེ་སྐྱེ་ཞིང་ཡིག་དྲུག་འདོན༔ ཨོཾ་མ་ཎི་པདྨེ་ཧཱུྃ༔ ཡིག་དྲུག་དེ་ལ་ཕྲེང་སྐོར་ཡན་ཆད་འདོན༔ འདི་ལྟར་སེར་བ་བཟློག་པའི་དགེ་བ་འདིས༔ དབུ་ནག་མི་ལ་ཟང་ཟིང་སྦྱིན་པར་ཤོག༔ འབུ་སྲིན་རྣམས་ལ་སྐྱབས་ཀྱི་སྦྱིན་པར་ཤོག༔ ལྷ་འདྲེ་རྣམས་ལ་ཆོས་ཀྱི་སྦྱིན་པར་ཤོག༔ ཀུན་ཀྱང་བླ་མེད་བྱང་ཆུབ་མྱུར་ཐོབ་ཤོག༔ ཁྲོ་ཚོགས་སྲུང་འཁོར་ཐམས་ཅད་བདག་ལ་ཐིམ༔ དེ་ཡང་མི་དམིགས་སྟོང་ཉིད་སྤྲོས་བྲལ་གྱུར༔ ཅེས་བརྗོད་སེམས་ཉིད་མ་བཅོས་ངང་ལ་བཞག༔ དེ་ལྟར་བྱས་པས་ལྷ་འདྲེའི་མཁོན་ཞི་ཞིང་༔ ཉེས་འགལ་མི་སྒྲིབ་བྱང་ཆུབ་ལམ་དུ་འགྲོ༔ བླ་མ་སྲུང་གིས་བསྐུལ་ཕྱིར་བསྡུས་པ་འདི༔ སྔགས་འཆང་༧ རཱ་ག་ཨ་སྱ་ཞེས་བྱས་བྲིས༔ ཉེས་འགལ་མཆིས་ན་ལྷར་བཤགས་དགེ་བ་བསྔོ༔ ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།