ཨོ་རྒྱན་རིན་པོ་ཆེའི་སྒོ་ནས་ཚེ་སྒྲུབ་དང་གཏོར་བསྔོས་བསྡུས་པ།
ཨོ་རྒྱན་རིན་པོ་ཆེའི་སྒོ་ནས་ཚེ་སྒྲུབ་དང་གཏོར་བསྔོས་བསྡུས་པ་ཡོད།།
བླ་མ་དཀོན་མཆོག་གསུམ་དང་ཡི་དམ་ལྷ། །མཁའ་འགྲོ་ཆོས་སྐྱོང་རྣམས་ལ་སྐྱབས་སུ་མཆི། །འགྲོ་ཀུན་སངས་རྒྱས་ས་ལ་འགོད་པའི་ཕྱིར། །བདག་གིས་བསྐྱེད་རྫོགས་ཟབ་མོ་བསྒོམ་པར་བྱ། །ཨ། ཆོས་རྣམས་ཡེ་ནས་སྟོང་ཉིད་ནམ་མཁའ་འདྲ། །དེ་ཡི་རང་མདངས་སྐད་ཅིག་དྲན་རྫོགས་སུ། །རང་ཉིད་བདེ་གཤེགས་ཀུན་འདུས་པདྨ་འབྱུང་། །དཀར་དམར་མདངས་ལྡན་མཚན་དང་དཔེ་བྱད་རྫོགས། །དབུ་ལ་པད་ཞྭ་སྒོ་དར་མེ་ལོང་བརྒྱན། །ཞལ་གཅིག་ཁྲོ་འཛུམ་སྤྱན་གཉིས་ནམ་མཁར་གཟིགས། །རྡོ་རྗེ་བྷནྡྷ་ཚེ་བུམ་ཁ་ཊཾ་བསྣམས། །ཕོད་ཀ་
ཆོས་གོས་ཟ་འོག་བེར་ཆེན་གསོལ། །རྡོ་རྗེའི་སྐྱིལ་ཀྲུང་པད་ཟླའི་གདན་ལ་བཞུགས། །འོད་དང་འོད་ཟེར་ཉི་མ་འབུམ་བཞིན་འབར། །རྔ་ཡབ་གླིང་ནས་གུ་རུ་པདྨ་འབྱུང་། །ཆ་ལུགས་སྣ་ཚོགས་བུ་ཡུག་བཞིན་དུ་བྱོན། །མཚོ་ལ་ཆར་བཞིན་རང་ལ་སིབ་སིབ་ཐིམ། རང་གི་སྙིང་དབུས་པདྨ་ཟླ་བའི་སྟེང་། །ཧཱི༔ཡིག་དཀར་པོ་འགྲེང་ཐབས་གནས་པའི་མཐར། །སྔགས་ཕྲེང་ཁ་དོག་ལྔ་ལྡན་གཡས་སུ་འཁོར། །དེ་ལས་འོད་ཟེར་ཕྱོགས་བཅུར་འཕྲོས་པ་ཡིས། །སངས་རྒྱས་བྱང་སེམས་ཀུན་གྱི་བྱིན་རླབས་དང་། །ས་ཆུ་མེ་རླུང་འབྱུང་བ་ལྔ་ཡི་བཅུད། །ལྷ་
ཀླུ་མི་ཡི་ཚེ་དང་བསོད་ནམས་ཀུན། །འོད་ཟེར་ཁ་དོག་སྣ་ཚོགས་རྣམ་པར་བསྡུས། །རང་ལ་ཐིམ་པས་ཚེ་དང་བསོད་ནམས་རྒྱས། །འཆི་མེད་ཚེ་ཡི་དངོས་གྲུབ་ཐོབ་པར་གྱུར། །ཨོ་ཨཱ༔ཧཱུྃ་བཛྲ་གུ་རུ་པདྨ་སིདྡྷི་ཨཱ་ཡུ་ཥ་ཧཱུཾ་རྦ་ཛ༔ ཞེས་བསྙེན་ནོ། །རྒྱུན་དུ་བཟླས་པས་རྨི་ལམ་དུ་ཉི་ཟླ་ཤར་བ། གོས་དཀར་གསར་པ་གྱོན་པ། ཆང་དང་འོ་མ་བདུད་རྩི་འཐུང་བ། རྡོ་རྗེ་དྲིལ་བུ་བུམ་པ་རྙེད་པ། མེ་ཏོག་དམར་པོ་ཁོ་ན་མ་ཡིན་པའི་ཚལ་དུ་ཕྱིན་པ། ཁྲུས་བྱས་པ་གོ་ཁྲབ་གྱོན་པ། རྫོང་དང་བྲག་བཙན་པོ་ན་འདུག་པ། ཁང་པ་གསར་པ་དང་རྫོང་བརྩེགས་པ། གྱེན་ལ་འགྲོ་བ། གངས་རི་ལ་འཛེགས་པ། རོལ་མོ་འབུད་དཀྲོལ་བྱས་པས་སྐད་རིང་པོ་འབྱུང་བ། ལོ་ཐོག་རྒྱས་པ། འབྲུ་དང་ཤིང་ཐོག་ལ་ལོངས་སྤྱོད་པ། ལ་སོགས་པ་ཉམས་དང་རྨི་ལམ་དུ་འབྱུང་། དངོས་སུ་ལུས་སེམས་བདེ་བ། དད་པ་དག་སྣང་ངེས་འབྱུང་ཆེ་བ། བག་དྲོ་བྱིན་ཆགས་དྲི་བཟང་འཐུལ་མར་མེ་འཛིན། གཏོར་མཆོད་དབྱར་མི་རུལ། དགུན་མི་འཁེང་། རྟོགས་པ་འཆར་བ་སོགས་བྱུང་བ་འགྲུབ་རྟགས་སོ། །ཡང་བསྙེན་པ་བྱས་ཤིང་རྨི་ལྟས་ངན་པ་རྩུབ་ཏུ་སོང་ན་རྐྱེན་ཁ་ཆེན་པོ་ཡོད་པ་སྣོད་བཀྲུས་པས་དྲི་མ་ལྡང་བ་ལྟར་སློང་ཡིན་པས་མི་སྐྱུར་བའི་བརྩོན་འགྲུས་ཆེར་བྱ། བཟང་ངན་བསྲེ་ཞིང་བྱུང་ན་རྐྱེན་མ་འགྱུར་བས་བཟླས་པ་ལ་འབད་དོ།། ༈ གཏོར་བསྔོས་བྱེད་ན། བླ་མ་གཏོར་མའམ་རིན་ཆེན་འབར་བ་གཅིག་གམ། བཅའ་མ་ཐོན་ན་
མར་རམ་ཐུད་དུ་ཡོད། ཐེབ་ཙེའི་ནང་དུ་ཕྱེ་མར་བཞག་ལ་བྲན་ནས་རང་ཉིད་གོང་ལྟར་ཨོ་རྒྱན་མངོན་རྟོགས་བསྒོམ་སྟེ། བདུད་རྩི་འཁྱིལ་པས་བསང་། ཨོཾ་ཨ་མྲྀ་ཏེ་ཧཱུྃ་ཕཊ༔ ཨོཾ་སྭ་བྷ་ཝས་སྦྱངས། སྟོང་པ་ཉིད་དུ་གྱུར། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར། དེའི་སྟེང་དུ་རཾ་ལས་མེའི་དཀྱིལ་འཁོར། དེའི་སྟེང་དུ་ཀཾ་གསུམ་ལས་ཐོད་པའི་སྒྱེད་པུ་རི་རབ་ཙམ་གསུམ་གྱི་སྟེང་དུ་ཨ་ཡིག་ལས་ཐོད་པ་དཀར་པོ་ཡངས་ཤིང་རྒྱ་ཆེ་བའི་ནང་དུ་ཤ་ལྔ་བདུད་རྩི་ལྔས་གང་བ་རླུང་གཡོས་མེ་སྦར་ཐོད་པ་དྲོས་ཞུ་ཞིང་ཁོལ་བས་བདུད་རྩིའི་རྒྱ་མཚོ་ཆེན་པོའི་སྟེང་དུ་ཨོ་ཨཱ༔ཧཱུྃ་གསུམ་རྩེག་མར་གནས་པ་རིམ་པ་བཞིན་ཞུ་ནས་ཐིམ་པས་སྐུ་གསུང་ཐུགས་ཀྱི་བདུད་རྩི་ཟག་མེད་ཀྱི་བདེ་བ་བསྐྱེད་པ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། །ཨོཾ་ཨཱཿཧཱུྃ་ཧ་ཧོ༔ཧཱིསྭཱ་ཧཱ། སྔགས་དེ་གསུམ་བརྗོད། རང་གི་ཐུགས་ཀ་ནས་འོད་ཟེར་འཕྲོས་པས་གཏོར་མགྲོན་ཐམས་ཅད་སྐད་ཅིག་ལ་ནམ་མཁའ་བར་སྣང་གང་བར་སྤྱན་དྲངས་པར་གྱུར། བའི་ཕྱག་རྒྱ་དཔྲལ་བར་སྐོར་བ་དང་། རྡོ་རྗེ་བསྡུ་བའི་ཕྱག་རྒྱ་ནི། སྤྱན་འདྲེན་ཐམས་ཅད་ཀྱི་མཆོག་བླ་མ་ཡི་དམ་མཁའ་འགྲོ་ཆོས་སྐྱོང་ཐམས་ཅད། གུ་རུ་དྷེ་ཝ་ཌཱཀྐི་ནཱི་སརྦ་དྷརྨ་པཱ་ལ་བཛྲ་ས་མ་ཡ་ཛ༔ཛཿ ཕེ༔ཕེ༔
ཨཱ་རལླི་ཛཧཱུྃ་བཾ་ཧོ༔ བླ་མ་ཡི་དམ་མཁའ་འགྲོ་ཆོས་སྐྱོང་ཐམས་ཅད་ནམ་མཁའ་བར་སྣང་གང་བར་སྤྲིན་འཁྲིགས་པ་ལྟར་གསལ་བར་གྱུར། ན་མོ་གུ་རུ་རཏྣ་ཨི་དཾ་བྷ་ལིཾ་ཏ་ཁ་ཁ་ཁཱ་ཧི༔ ཨོཾ་ཨཱ༔ཧཱུྃ་བཛྲ་གུ་རུ་པདྨ་སིདྡྷི་ཧཱུྃ་ཨི་དཾ་བྷ་ལིཾ་ཏ་༴ ཨོཾ་ཨཱ༔ཧཱུྃ་ཨར་རྩིག་ནེར་ཙིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཨ་ཧུ་ཧཱུྃ་ཕཊ༔ ཨི་དཾ༴ ཨོ་དེ་ཝ་པི་ཚུ་བཛྲ་ཧཱུྃ་ཧཱུྃ་ཕཊ་སྭཱ་ཧཱ། ཨི་དཾ༴ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིག་ནན་བཾ་ཧཱུྃ་ཕཊ༔ ཨི་དཾ༴ ཨོཾ་ཧཱི༔ཧ་ཧ་ཧཱུྃ་ཕཊ༔ ཨི་དཾ༴ མགོན་པོ་ཕྱག་བཞི་པ་ནི། ཨོཾ་བཛྲ་ཀ་ཝུ་ཝ་མ་ཧཱ་ཀཱ་ལ་ཡ་ཧཱུྃ་ཧཱུྃ་ཕཊ༔ སངས་རྒྱས་དབོན་གྱི་ཆོས་སྐྱོང་གུར། ཨོཾ་མ་ཧཱ་ཀཱ་ལ་ཡ་ཧཱུྃ་ཧཱུྃ་ཕཊ་སྭཱ་ཧཱ། ཨི་དཾ༴ དུད་སོལ་མ། ཨོ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ་ཨི་དཾ༴ མ་ནིང་། ཨོཾ་ཤྲཱི་མ་ཧཱ་ཀཱ་ལ་གྷ་ན་གྲུ་ཡ་རཾ་སིདྡྷི་ཧཱུྃ་ཕཊ༔ ཨི་དཾ༔ ཏྲཀྐད་ནི། ཨོཾ་མ་ཧཱ་ཀཱ་ལི་ཏྲཀྐད་མ་ཧཱ་ཀཱ་ལ་སི་ཏི་ཡཾ་དུ་ཛ༔ ཨི་དཾ༔ རྣམ་སྲས་ལྗང་གུ། ཨོཾ་བྷེ་ཤྲ་མ་ཎ་ཡེ་ཧཱུྃ་སྭཱ་ཧཱ། ཨི་དཾ༔ སྟག་ལུང་པའི་ནོར་ལྷ་གནོད་སྦྱིན་གཞན་གྱིས་མི་ཐུབ་པ། ཨོཾ་ཧཱུྃཨ་པ་ར་ཙིཏྟ་ཛ༔ ཨི་དཾ༴ ཚེ་རིང་མ། ཨོ་ཨ་ཀ་ནི་ཙ་ལི་མི་ཐུ་ལྡི་ལི་རི་སྭཱ་ཧཱ། ཨི་དཾ༴ སངས་རྒྱས་དབོན་གྱི་བཀའ་སྲུང་ཤ་ཟ་མཁའ་འགྲོ་སྤུན་ལྔ། པཉྩ་ཌཱཀྐི་ནི་ཨི་
དཾ༴ སྤུག་བཙན། ཙནྟ་པྲ་མ་ནི་དྷ་ར་དྷ་ར་ས་མ་ཡ་ཛ་ཛ༔ ཨི་དཾ༴ དམ་ཅན་འདི་མེད་ཀྱང་རུང་། ༀ་བཛྲ་སཱ་དྷུ་ས་མ་ཡ། ཨི་དཾ༴ ཆོས་སྐྱོང་ཐམས་ཅད། ཨོཾ་སརྦ་དྷརྨ་པ་ལ་ཨི་དཾ༴ བཙན་གསར་པ་དེ། ཨོཾ་ཤུ་ཏྲི་ཤུ་ཏྲི་ཧཱུྃ་དམར་ཏྲི་ཤུ་དམར་ར་ཏྲི་སོད། ཨི་དཾ༴ ཨགྷཾ་པཱཏྱཾ་པུཊྚེ་དྷུ་པེ་ཨཱ་ལོ་ཀེ་གྷནྡྷེ་ནེ་ཝི་ཏྱཱ་ཤབྡ་པྲ་ཏཱིཙྪ་ཨཱཿཧཱུྃ། དམ་རྫས་བདུད་རྩིའི་གཏོར་མ་རྒྱ་ཆེན་པོ། །འདོད་པའི་ཡོན་ཏན་ལྔ་དང་ལྡན་པ་འདི། །བསྔོ་ཞིང་འབུལ་བའི་གནས་སུ་གྱུར་པ་ནི། །པདྨ་འབྱུང་གནས་སྐུ་ལྔ་མཚན་བརྒྱད་དང་། །རིག་འཛིན་བརྒྱད་དང་རྗེ་འབངས་ཉི་ཤུ་ལྔ། །སྟག་ལུང་ཐང་པ་གཏེར་སྟོན་སངས་རྒྱས་དབོན། །དྲིན་ཆེན་བཀྲ་ཤིས་དཔལ་གྲུབ་ལ་སོགས་པ། །རྩ་བར་བརྒྱུད་པའི་བླ་མའི་ཞལ་དུ་ཁ་རཾ་ཁཱ་ཧི༔ གུ་རུ་དྲག་པོ་ཀྱེ་ཡི་རྡོ་རྗེ་དང་། །རྡོ་རྗེ་གཞོན་ནུ་འཁོར་ལོ་སྡོམ་པ་དང་། །སེང་གདོང་ལྷ་མོ་རྡོ་རྗེ་ཕག་མོ་སོགས། །ཡི་དམ་ལྷ་ཚོགས་ཞལ་དུ་ཁ་རཾ་ཁཱ་ཧི། བྱ་རོག་མཚན་ཅན་བྱ་སེང་ཡུམ་དང་བཅས། །གུར་གྱི་མགོན་པོ་བཀའ་སྡོད་ལྕེ་སྤྱང་གདོང་། །དུད་སོལ་ལྷ་མོ་དཔོན་གཡོག་འཁོར་དང་བཅས། །མ་ནིང་ནག་པོ་བདུད་མགོན་ཏྲཀྴད་
སོགས། །ཆོས་སྐྱོང་སྲུང་མའི་ཞལ་དུ་ཁ་རཾ་ཁཱ་ཧི། རྣམ་སྲས་ལྗང་གུ་ཨ་པར་ཙིཏྟ་དང་། །ཚེ་རིང་མཆེད་ལྔ་ཤ་ཟ་ཌཀྐི་ལྔ། །ནོར་ལྷ་གཏེར་བདག་ཞལ་དུ་ཁ་རཾ་ཁཱ་ཧི། །སྤྲུག་གི་བཙན་རྒོད་གུར་དཀར་སྨན་ཅིག་ཡུམ། །རྒྱབ་རྟེན་རྡོ་རྗེ་ལེགས་པ་ལ་སོགས་པ། །བཙན་ཁོར་སུམ་བརྒྱ་དྲུག་ཅུ་ཡང་འཁོར་བཅས། །དབྱི་རྒྱལ་ལྡག་ལྷ་རི་བཀྲ་ནོར་བདག་དང་། །བཙན་རྒོད་འོད་ཟེར་བཀྲ་ཤིས་རྟ་འདྲ་སོགས། །བཀའ་སྲུང་རྣམས་ཀྱི་ཞལ་དུ་ཁ་རཾ་ཁཱ་ཧི། །དངོས་འབྱོར་ཡིད་སྤྲུལ་མཆོད་སྤྲིན་རྒྱ་མཚོས་མཆོད། །གསོལ་ལོ་མཆོད་དོ་ཐུགས་དམ་བསྐང་གྱུར་ཅིག །ཡིད་རབ་དྭངས་བའི་བསྟོད་དབྱངས་རྒྱ་མཚོས་བསྟོད། །འགལ་འཁྲུལ་ནོངས་པ་ཅི་མཆིས་མཐོལ་ཞིང་བཤགས། །ཚེ་རིང་ནད་མེད་དཔལ་འབྱོར་ཆོས་སྲིད་འཕེལ། །དོན་གཉིས་ལྷུན་གྱིས་གྲུབ་པའི་དངོས་གྲུབ་སྩོལ། །རང་གནས་གཤེགས་སམ་རྟེན་ལ་ཅི་བདེར་བཞུགས། །བདེ་ལེགས་ཕུན་སུམ་ཚོགས་པའི་བཀྲ་ཤིས་ཤོག །དགེ་བས་འགྲོ་ཀུན་བྱང་ཆུབ་ཐོབ་ཕྱིར་བསྔོ། །ཞེས་བརྗོད་པས་གཏོར་བསྔོས་བསྐང་བ་གསོལ་ཁ་ཐམས་ཅད་ཚང་ངོ་། །དེ་ནས་རྫོགས་རིམ་ལ་ནི་འདོན་མི་དགོས་ཡིད་ལ་འཆར་རྒྱུ་སྟེ། དེ་ལྟར་སྒོམ་
མཁན་སེམས་ལ་ལྟོས། །ངོ་བོ་སྟོང་པ་ཆོས་ཀྱི་སྐུ། །རང་བཞིན་གསལ་བ་ལོངས་སྤྱོད་རྫོགས། །སྣ་ཚོགས་འགག་མེད་སྤྲུལ་པའི་སྐུ། །མ་ཡེངས་དྲན་རྫི་ཉམས་ལེན་ངོས། །མ་བཅོས་ཀློད་པ་གདམས་ངག་མཆོག ། གང་ཤར་དཔེ་ཆོས་རྟོགས་པའི་གདེང་། །འཇའ་འོད་ཐིག་ལེ་ཐིག་ཕྲན་ལ། །བསྲེ་ཞིང་ལྟ་བ་བོགས་འདོན་མཆོག །འཆི་བ་དྲན་པ་བརྩོན་འགྲུས་ལྕག །ལས་འབྲས་བསླུ་མེད་སྤྱོད་པའི་གྲོགས། །བསྟན་དང་བླ་མའི་ཆག་ཕྱི་ལ། །ཁ་ཞེ་མེད་པར་བྱས་ཚད་ཆོས། །བདེན་རྫུན་ཤན་འབྱེད་ཆོས་རྒྱལ་གསུངས། །དཔོན་གྱི་ཐུགས་དམ་བསྐང་བའི་ཕྱིར། །རཱག་ཨ་སྱས་འཕྲལ་དུ་བྲིས། །མངྒ་ལཾ།། ༈ གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅས་དང་། །འཚོ་བ་སྦྱོར་བའི་ཡོན་བདག་རྣམས། །ཚེ་འདིར་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་༧ ཨ་རཱ་གས་སོ།། །། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།