གུ་རུ་དྲག་པོ་དམར་ནག་མེའི་ཕྲེང་བ་ཅན་གྱི་ཚོགས་ཀྱི་འདོན་འགྲིགས་ཤིན་ཏུ་གསལ་བ།
གུ་རུ་དྲག་པོ་དམར་ནག་མེའི་ཕྲེང་བ་ཅན་གྱི་ཚོགས་ཀྱི་འདོན་འགྲིགས་ཤིན་ཏུ་གསལ་བ་བཞུགས་སོ༔
ཤམཐཐཾ༔ ཐཐརྐྱམྱཊ༔ དེ་ནས་མཆོད་པ་རྒྱ་ཆེན་ཚོགས་པའི་རིམ་པ་བྱ་སྟེ༔ ཞིང་ངམ་སྤྱན་གཟན་གྱི་པགས་པའི་སྟེང་དུ༔ ཚོགས་ཀྱི་ཡོ་བྱད་རྒྱས་པར་བཤམས༔ བསང་ཆུ་གཏོར༔ ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ༔ སརྦ་དྲ་བྱི་ཤཱ་དྷ་ནི་ཧཱུྃ་ཕཊ༔ རཾ་ཡཾ་ཁཾ་སྭཱ་ཧཱ༔ ཧཱུྃ༔ ངང་ཉིད་རྡོ་རྗེ་ཆོས་དབྱིངས་ལས༔ སྐྱེ་བའི་ཆོ་འཕྲུལ་འབྲུ་གསུམ་གྱིས༔ དངོས་འཛིན་མཚན་མའི་བག་ཆགས་སྦྱངས༔ དག་པར་མ་གྱུར་གང་ཡང་མེད༔ དག་པའི་ངང་ལ་གནས་གྱུར་ཅིག༔ ཨོཾ་ཨཱཧཱུྃ་ཧཱུྃ༔ ཧཱུྃ༔ ཆོས་དབྱིངས་རོལ་པའི་དཀྱིལ་འཁོར་ནས༔ བྱིན་རླབས་འཕྲོ་འདུས་འོད་ཟེར་གྱིས༔ དཔག་མེད་ནམ་
མཁའི་མཐར་གྱུར་པའི༔ འདོད་ཡོན་ལོངས་སྤྱོད་སྤྲིན་ལྟར་གཏིབས༔ ཧཱུཾ་གིས་རྣམ་རྟོག་དབྱིངས་སུ་སྦྱངས༔ ཨཱཡིས་དྲི་མེད་བདུད་རྩིར་གྱུར༔ ཨོཾ་གྱིས་འདོད་ཡོན་སྤྲིན་ཚོགས་གཏིབས༔ ཧཱིཝཡིས་སྣང་སྲིད་མཆོད་པས་བཀང་༔ མཆོད་པའི་ལྷ་མོ་དཔག་མེད་ཀྱིས༔ གསེར་དངུལ་གཡུ་ཡི་གཞོང་པ་ནང་༔ ལོངས་སྤྱོད་དཔག་མེད་ཚོགས་ཀྱིས་བཀང་༔ གར་དང་ཕྱག་རྒྱ་བསྒྱུར་ཞིང་མཆོད༔ ཨ་ལ་ལ་སྟེ་མཆོད་པར་བཞེས༔ དགྱེས་བསྐང་བདག་ལ་དངོས་གྲུབ་སྩོལ༔ ཧཱུྃ༔ བདེ་ཆེན་དག་པའི་ཞིང་ཁམས་ནས༔ རིགས་བདག་སྣང་བ་མཐའ་ཡས་ལ༔
རིགས་ལྔ་བུདྡྷ་བཞི་བཅུ་གཉིས༔ ཕྱོགས་བཅུ་དུས་གསུམ་རྒྱལ་བའི་ཚོགས༔ བྱང་སེམས་ཉན་རང་དགྲ་བཅོམ་བསྐོར༔ འདིར་གཤེགས་ཚོགས་ཀྱི་མཆོད་པ་བཞེས༔ གནས་ཁང་འདི་ལ་བྱིན་གྱིས་རློབས༔ ཚོགས་གཏོར་འདི་ལ་བཅུད་ཅིག་ཕོབ༔ འདིར་ཚོགས་སྐལ་ལྡན་བདག་ཅག་ལ༔ མཆོག་དང་ཐུན་མོང་དངོས་གྲུབ་སྩོལ༔ པོ་ཊ་ལ་ཡི་གནས་མཆོག་ནས༔ ལོངས་སྐུ་ཐུགས་རྗེ་ཆེན་པོ་ལ༔ རིགས་ལྔ་སེམས་དཔའ་བཅུ་དྲུག་དང་༔ ཐུབ་པ་དྲུག་དང་སྒོ་བ་བཞི༔ བསྐལ་བཟང་སངས་རྒྱས་སྟོང་གིས་བསྐོར༔ འདིར་གཤེགས་ཚོགས་ཀྱི་མཆོད་པ་བཞེས༔ གནས་ཁང་འདི་ལ་བྱིན་གྱིས་རློབས༔ ཚོགས་གཏོར་འདི་ལ་བཅུད་ཅིག་ཕོབ༔ འདིར་ཚོགས་སྐལ་ལྡན་བདག་ཅག་ལ༔ མཆོག་དང་ཐུན་མོང་དངོས་གྲུབ་སྩོལ༔ པདྨ་འོད་ཀྱི་གཞལ་ཡས་ནས༔ གུ་རུ་པདྨ་ཐོད་ཕྲེང་ལ༔ རིག་འཛིན་ལྔ་དང་རིག་འཛིན་བརྒྱད༔ རྗེ་འབངས་ཉེར་ལྔ་གྲུབ་ཆེན་བརྒྱད༔ གཏེར་སྟོན་བརྒྱ་རྩ་བརྒྱད་ཀྱིས་བསྐོར༔ འདིར་གཤེགས་ཚོགས་ཀྱི་མཆོད་པ་བཞེས༔ གནས་ཁང་འདི་ལ་བྱིན་གྱིས་རློབས༔ ཚོགས་གཏོར་འདི་ལ་བཅུད་ཅིག་ཕོབ༔ འདིར་ཚོགས་
སྐལ་ལྡན་བདག་ཅག་ལ༔ མཆོག་དང་ཐུན་མོང་དངོས་གྲུབ་སྩོལ༔ རཀཱ་སྲིན་པོའི་ཡུལ་དབུས་ནས༔ དམར་ནག་མེ་ཕྲེང་ཡབ་ཡུམ་ལ༔ དྲག་པོ་རིགས་བཞི་ཌཀི་བཞི༔ ཚེ་བདག་ཁྲོས་ནག་སེང་གདོང་མ༔ རྡོ་རྗེ་གཞོན་ནུ་སོགས་ཀྱིས་བསྐོར༔ འདིར་གཤེགས་ཚོགས་ཀྱི་མཆོད་པ་བཞེས༔ གནས་ཁང་འདི་ལ་བྱིན་གྱིས་རློབས༔ ཚོགས་གཏོར་འདི་ལ་བཅུད་ཅིག་ཕོབ༔ འདིར་ཚོགས་སྐལ་ལྡན་བདག་ཅག་ལ༔ མཆོག་དང་ཐུན་མོང་དངོས་གྲུབ་སྩོལ༔ སྲིད་པའི་རི་རབ་རྩེ་མོ་ནས༔ ཡེ་ཤེས་ཁྱུང་ཆེན་འབར་བ་ལ༔ སྤྲུལ་པའི་ཁྱུང་ཆེན་ཉི་ཤུ་གཅིག༔ ཏ་ཀྲི་ཁྲོ་བོ་ལྔ་བཅུ་དྲུག༔ ཡང་སྤྲུལ་མ་མོའི་ཚོགས་ཀྱིས་བསྐོར༔ འདིར་གཤེགས་ཚོགས་ཀྱི་མཆོད་པ་བཞེས༔ གནས་ཁང་འདི་ལ་བྱིན་གྱིས་རློབས༔ ཚོགས་གཏོར་འདི་ལ་བཅུད་ཅིག་ཕོབ༔ འདིར་ཚོགས་སྐལ་ལྡན་བདག་ཅག་ལ༔ མཆོག་དང་ཐུན་མོང་དངོས་གྲུབ་སྩོལ༔ ལྷོ་ཕྱོགས་འོག་མིན་གནས་མཆོག་ནས༔ འཇམ་དཔལ་གཤིན་རྗེའི་གཤེད་པོ་ལ༔ སྲས་མཆོག་རིགས་བཞི་ཡབ་དང་ཡུམ༔ ཕྱོགས་བཅུའི་གཤིན་རྗེ་ཡབ་ཡུམ་སོགས༔ འཇམ་དཔལ་ལྷ་ཚོགས་
འཁོར་གྱིས་བསྐོར༔ འདིར་གཤེགས་ཚོགས་ཀྱི་མཆོད་པ་བཞེས༔ གནས་ཁང་འདི་ལ་བྱིན་གྱིས་རློབས༔ ཚོགས་གཏོར་འདི་ལ་བཅུད་ཅིག་ཕོབ༔ འདིར་ཚོགས་སྐལ་ལྡན་བདག་ཅག་ལ༔ མཆོག་དང་ཐུན་མོང་དངོས་གྲུབ་སྩོལ༔ དབང་དྲག་རོལ་པའི་དཀྱིལ་འཁོར་ནས༔ རྟ་མགྲིན་པདྨ་དབང་ཆེན་ལ༔ དབང་ཆེན་རིགས་བཞི་ཡབ་དང་ཡུམ༔ ཟིལ་གནོན་ཡབ་ཡུམ་ལ་སོགས་པའི༔ པདྨ་གསུང་གི་འཁོར་གྱིས་བསྐོར༔ འདིར་གཤེགས་ཚོགས་ཀྱི་མཆོད་པ་བཞེས༔ གནས་ཁང་འདི་ལ་བྱིན་གྱིས་རློབས༔ ཚོགས་གཏོར་འདི་ལ་བཅུད་ཅིག་ཕོབ༔ འདིར་ཚོགས་སྐལ་ལྡན་བདག་ཅག་ལ༔ མཆོག་དང་ཐུན་མོང་དངོས་གྲུབ་སྩོལ༔ ལྕང་ལོ་ཅན་གྱི་གནས་མཆོག་ནས༔ གསང་བདག་རྡོ་རྗེ་གཏུམ་པོ་ལ༔ ཁྲག་འཐུང་རིགས་ལྔ་ཡབ་དང་ཡུམ༔ ཐུགས་སྲས་རིགས་བཞི་ཀེ་སེང་སོགས༔ ཡང་དག་ལྷ་ཚོགས་འཁོར་གྱིས་བསྐོར༔ འདིར་གཤེགས་ཚོགས་ཀྱི་མཆོད་པ་བཞེས། གནས་ཁང་འདི་ལ་བྱིན་གྱིས་རློབས༔ ཚོགས་གཏོར་འདི་ལ་བཅུད་ཅིག་ཕོབ༔ འདིར་ཚོགས་སྐལ་ལྡན་བདག་ཅག་ལ༔ མཆོག་དང་ཐུན་མོང་དངོས་གྲུབ་སྩོལ༔ ནུབ་ཕྱོགས་
ཨོ་རྒྱན་གཞལ་ཡས་ནས༔ ཡུམ་མཆོག་རྡོ་རྗེ་ཕག་མོ་ལ༔ སྤྲུལ་པ་འབུམ་ཕྲག་ཉི་ཤུ་དང་རིགས་བཞི་སྡེ་བརྒྱད་མཁའ་འགྲོའི་ཚོགས༔ རྦོད་གཏོང་མ་མོའི་འཁོར་གྱིས་བསྐོར༔ འདིར་གཤེགས་ཚོགས་ཀྱི་མཆོད་པ་བཞེས༔ གནས་ཁང་འདི་ལ་བྱིན་གྱིས་རློབས༔ ཚོགས་གཏོར་འདི་ལ་བཅུད་ཅིག་ཕོབ༔ འདིར་ཚོགས་སྐལ་ལྡན་བདག་ཅག་ལ༔ མཆོག་དང་ཐུན་མོང་དངོས་གྲུབ་སྩོལ༔ གྲུ་གསུམ་ཨེ་ཡི་དཀྱིལ་འཁོར་ནས༔ ཁྲོ་རྒྱལ་ཡཀཱ་མེ་དབལ་ལ༔ ཁྲོ་བཅུ་ཡབ་ཡུམ་ཁྲ་ཐབས་བཅས༔ ཕུར་སྲུང་བཅུ་དྲུག་ལ་སོགས་པ༔ ཕྲིན་ལས་ལྷ་ཚོགས་འཁོར་གྱིས་བསྐོར༔ འདིར་གཤེགས་ཚོགས་ཀྱི་མཆོད་པ་བཞེས༔ གནས་ཁང་འདི་ལ་བྱིན་གྱིས་རློབས༔ ཚོགས་གཏོར་འདི་ལ་བཅུད་ཅིག་ཕོབ༔ འདིར་ཚོགས་སྐལ་ལྡན་བདག་ཅག་ལ༔ མཆོག་དང་ཐུན་མོང་དངོས་གྲུབ་སྩོལ༔ ཕོ་བྲང་མཁའ་སྤྱོད་ཙཱ་རི་ནས༔ བདུད་མགོན་སེང་གདོང་ཡབ་ཡུམ་ལ༔ ནག་པོ་སྟོང་དང་ཤ་ཟ་འབུམ༔ མ་མོ་བྱེ་བ་གནོད་སྦྱིན་ཁྲི༔ དམ་ཅན་རྒྱ་མཚོའི་ཚོགས་ཀྱིས་བསྐོར༔ འདིར་གཤེགས་ཚོགས་ཀྱི་མཆོད་པ་བཞེས༔ ཕྲིན་ལས་རྣམ་བཞི་བསྒྲུབ་
ཏུ་གསོལ༔ བཙན་བདུད་ཀླུ་ཡི་སྐུ་མཁར་ནས༔ བཀའ་སྲུང་སྤུ་གྲི་མཆེད་གསུམ་ལ༔ ཕྱི་ནང་གསང་བའི་སྡེ་བརྒྱད་དང་༔ སྔགས་བདག་དྲེགས་པ་བཅོ་བརྒྱད་སོགས༔ གཏེར་སྲུང་རྒྱ་མཚོའི་ཚོགས་ཀྱིས་བསྐོར༔ འདིར་གཤེགས་ཚོགས་ཀྱི་མཆོད་པ་བཞེས༔ དགྲ་བགེགས་བྱད་མ་རྡུལ་དུ་རློགས༔ མི་མཇེད་འཇིག་རྟེན་ཞིང་ཁམས་ནས༔ གཏེར་སྲུང་དགེ་བསྙེན་སྨྱོ་ཁ་དང་༔ སྡེ་དཔོན་སུམ་ཅུ་སྡེ་འཁོར་བཅས་དགེ་བསྙེན་ཉེར་གཅིག་བརྟན་མའི་ཚོགས༔ སློབ་དཔོན་པདྨའི་བཀའ་ཉན་རྣམས༔ འདིར་གཤེགས་ཚོགས་ཀྱི་མཆོད་པ་བཞེས༔ རྣལ་འབྱོར་བདག་གི་སྡོང་གྲོགས་མཛོད༔ དེ་ནས་ཚོགས་བཀྱགས་ཤིང་འཆམ་སྟབས་བྱེད་ཅིང་༔ ཧཱུྃ༔ དྲག་པོ་པདྨའི་ལྷ་ཚོགས་ལ༔ ཚོགས་ཀྱི་མཆོད་པ་འབུལ་བ་ནི༔ གཟུགས་ཀྱི་ལྷ་མོས་མེ་ལོང་འཛིན༔ སྤྱན་ལ་ཚོགས་འབུལ་བཞེས་སུ་གསོལ༔ སྒྲ་ཡི་ལྷ་མོས་པི་ཝཾ་འཛིན༔ སྙན་ལ་ཚོགས་འབུལ་བཞེས་སུ་གསོལ་་དྲི་ཡི་ལྷ་མོས་སྤོས་ཕོར་འཛིན༔ ཤངས་ལ་ཚོགས་འབུལ་བཞེས་སུ་གསོལ༔ རོ་ཡི་ལྷ་མོས་ཞལ་ཟས་འཛིན༔ ལྗགས་ལ་ཚོགས་འབུལ་བཞེས་སུ་གསོལ༔ རེག་གི་ལྷ་མོས་ན་བཟའ་
འཛིན༔ སྐུ་ལ་ཚོགས་འབུལ་བཞེས་སུ་གསོལ༔ ཆོས་ཀྱི་ལྷ་མོས་ཆོས་འབྱུང་འཛིན༔ ཐུགས་ལ་ཚོགས་འབུལ་བཞེས་སུ་གསོལ༔ ཐབས་དང་ཤེས་རབ་རྫས་ཀྱི་མཆོག༔ ཏིང་འཛིན་སྔགས་ཀྱིས་བྱིན་བརླབས་ནས༔ དད་པའི་སེམས་ཀྱིས་འབུལ་ལགས་ན༔ དགྱེས་པའི་ཚུལ་གྱིས་བཞེས་སུ་གསོལ༔ བྱིན་རླབས་ཀྱི་རྩ་བ་བཀའ་བརྒྱུད་བླ་མ་རྣམས་ཀྱི་ཞལ་དུ་ག་ཎ་ཙཀྲ་ལ་ཁཱ་ཧི༔ དངོས་གྲུབ་ཀྱི་རྩ་བ་ཡི་དམ་ལྷ་ཚོགས་རྣམས་ཀྱི་ཞལ་དུ་ག་ཎ་ཙཀྲ་ལ་ཁཱ་ཧི༔ ཕྲིན་ལས་ཀྱི་རྩ་བ་ཆོས་སྐྱོང་སྲུང་མ་རྣམས་ཀྱི་ཞལ་དུ་ག་ཎ་ཙཀྲ་ལ་ཁཱ་ཧི༔ དེ་ནས་ཚོགས་ཕུད་འབུལ་བ་ནི༔ བླ་མ་ཡི་དམ་མཁའ་འགྲོ་ལ༔ འདོད་ཡོན་ཚོགས་ཀྱི་མཆོད་པ་འབུལ༔ དགྱེས་པ་ཆེན་པོས་རོལ་ནས་ཀྱང་༔ འདོད་པའི་དངོས་༈ གྲུབ་ཐམས་ཅད་སྩལ་དུ་གསོལ༔ གུ་རུ་དྷེ་ཝ་ཌཱཀི་ནི་གྷ་ན་ཙཀྲ་པཱུ་ཛ་ཁཱ་ཧི༔ རྒྱས་པར་འདོད་ན་འདིར་གཏོར་བསྔོས་བྱའོ༔ དེ་ནས་ཚོགས་བར་པས་བསྐང་བ་གསོས་ལ༔ བསྐང་བ་རྒྱས་པར་འདོན༔ གལ་ཏེ་བསྡུས་པ་བྱེད་ན༔ ཧཱུྃ་ཧཱི༔ པདྨ་རིགས་ཀྱི་བདག་པོ་སྟེ༔ སྣང་བ་མཐའ་ཡས་ཐུགས་དམ་བསྐང་༔ བུདྡྷ་ཞེ་གཉིས་དུས་གསུམ་དང་༔ ཕྱོགས་བཅུའི་སངས་རྒྱས་ཐུགས་དམ་
བསྐང་༔ ལོངས་སྐུ་ཐུགས་རྗེ་ཆེན་པོ་དང་༔ སངས་རྒྱས་སྟོང་གི་ཐུགས་དམ་བསྐང་༔ པདྨ་ཐོད་ཕྲེང་རིག་འཛིན་ལྔ༔ གྲུབ་ཆེན་བརྒྱད་ཅུའི་ཐུགས་དམ་བསྐང་༔ རྗེ་འབངས་ཉེར་ལྔ་རིག་འཛིན་བརྒྱད༔ གཏེར་སྟོན་བརྒྱ་རྩའི་ཐུགས་དམ་བསྐང་༔ གཏི་མུག་འདུལ་བྱེད་ཁྲོ་བོའི་རྒྱལ༔ དམར་ནག་མེ་ཕྲེང་ཐུགས་དམ་བསྐང་༔ མ་རིག་འདུལ་མཛད་ཁྲོ་མོའི་རྒྱལ༔ རྡོ་རྗེ་ཕག་མོའི་ཐུགས་དམ་བསྐང་༔ འཆི་བདག་གཤིན་རྗེ་འདུལ་མཛད་པ༔ འཇམ་དཔལ་ལྷ་ཚོགས་ཐུགས་དམ་བསྐང་༔ ཀླུ་གདོན་ས་བདག་འདུལ་མཛད་པ༔ རྟ་མགྲིན་ལྷ་ཚོགས་ཐུགས་དམ་བསྐང་༔ སྟེང་ཕྱོགས་གཟའ་གདོན་འདུལ་འཛད་པ༔ གསང་བདག་ལྷ་ཚོགས་ཐུགས་དམ་བསྐང་༔ དངོས་གྲུབ་སྣ་ཚོགས་སྩོལ་མཛད་པ༔ མཁའ་འགྲོའི་ལྷ་ཚོགས་ཐུགས་དམ་བསྐང་༔ དགྲ་བགེགས་གདུག་པ་འདུལ་མཛད་པ༔ མེ་དབལ་ལྷ་ཚོགས་ཐུགས་དམ་བསྐང་༔ ཀླུ་གཉན་གདུག་པ་ཚར་གཅོད་པའི༔ ཁྱུང་གི་ལྷ་ཚོགས་ཐུགས་དམ་བསྐང་༔ ཉོན་མོངས་བདུད་བཞི་འདུལ་མཛད་པ༔ དྲག་པོ་རིགས་བཞིའི་ཐུགས་དམ་བསྐང་༔ ཕྲིན་ལས་རྣམ་བཞི་སྒྲུབ་མཛད་པའི༔
མཁའ་འགྲོ་སྡེ་བཞིའི་ཐུགས་དམ་བསྐང་༔ བྱད་མ་རང་གཤེད་འབེབས་མཛད་པའི༔ ཚེ་བདག་ནག་པོའི་ཐུགས་དམ་བསྐང་༔ བརྟུལ་ཞུགས་རྫུ་འཕྲུལ་དབང་སྒྱུར་བའི་ཁྲོས་མ་ནག་མོའི་ཐུགས་དམ་བསྐང་༔ བྱད་ཁ་རྦོད་གཏོང་ཟློག་བྱེད་པའི༔ སེང་གདོང་མ་ཡི་ཐུགས་དམ་བསྐང་༔ བདུད་དང་དམ་སྲི་འདུལ་མཛད་པའི༔ རྡོ་རྗེ་གཞོན་ནུའི་ཐུགས་དམ་བསྐང་༔ ཕྱོགས་བཅུའི་གདོན་ཚོགས་འདུལ་མཛད་པའི༔ ཁྲོ་བོ་བཅུ་ཡི་ཐུགས་དམ་བསྐང་༔ འགུགས་འཆིང་སྡོམ་དགྱེས་ལས་མཛད་པའི༔ སྒོ་སྲུང་བཞི་ཡི་ཐུགས་དམ་བསྐང་༔ བཀའ་ཡི་བསྟན་པ་སྐྱོང་བྱེད་པའི༔ སེང་གདོང་ཡབ་ཡུམ་ཐུགས་དམ་བསྐང་༔ སྡང་དགྲ་རྩད་ནས་གཅོད་བྱེད་པའི༔ སྤུ་གྲི་མཆེད་གསུམ་ཐུགས་དམ་བསྐང་༔ སྒྲུབ་པ་པོ་ཡི་གྲོགས་མཛད་པའི༔ དགེ་བསྙེན་སྨྱོ་ཁའི་ཐུགས་དམ་བསྐང་༔ གང་བཅོལ་ཕྲིན་ལས་བསྒྲུབ་པའི་ཕྱིར༔ དམ་ཅན་རྒྱ་མཚོའི་ཐུགས་དམ་བསྐང་༔ གྷ་ན་ཚོགས་ཀྱིས་ཐུགས་དམ་བསྐང་༔ བྷ་ལི་གཏོར་མས་ཐུགས་དམ་བསྐང་༔ རཀྟ་དམར་གྱིས་ཐུགས་དམ་བསྐང་༔ བདུད་རྩི་སྨན་གྱིས་ཐུགས་དམ་བསྐང་༔ ལྟ་སྒོམ་སྤྱོད་
པས་ཐུགས་དམ་བསྐང་༔ ཐུགས་དམ་བསྐངས་བའི་བྱིན་རླབས་ཀྱིས༔ ཕྱི་ནང་བར་ཆད་བཟློག་ཏུ་གསོལ༔ ཆག་ཆེན་ཉམ་ང་བཟློག་ཏུ་གསོལ༔ ཕྲིན་ལས་རྣམ་བཞི་བསྒྲུབ་ཏུ་གསོལ༔ ཨཱ་ས་མ་ཡ༔ ཨཱས་མ་ཡ༔ ཧཱུྃ་ས་མ་ཡ༔ ཨོཾ་ག་ཎ་ཙཀྲ་སཏཱ་སཱ་མ་ཡ་སོགས་ནས་ཡིག་བརྒྱ་སཏྭ་ཨཱཿ ཞེས་པའི་བར་དང་༔ དཔང་གྱུར་སྐྱབས་མཆོག་མ་ལུས་རྣམས༔ ཚེ་རབས་སྔོན་ནས་ད་ལྟའི་བར༔ འགལ་གྱུར་ཉམས་ཆག་མ་ལུས་པ༔ ཚོགས་ཀྱིས་བསྐང་ཞིང་བཤགས་པར་བགྱི༔ བྷུ་རུ་དྷེ་ཝ་དྷཀྐི་ནཱི་གྷ་ན་ཙཀྲ་ཁཱ་ཧི་ཤུདྡྷེ་ཨཱཿ དེ་ནས་གཏོར་ཟློག་ཡིན་ན་བསྒྲལ་ལས་རྒྱས་པར་བྱའོ༔ བསྡུ་ན་ཆོགས་ཟན་ལིངྒ་བྱ་བའམ་མ་ལྕོགས་ན་ཟན་དུམ་ཤ་དུམ་བྲན་ལ༔ ཧཱུྃ༔ དྲག་པོའི་ལྷ་ཚོགས་བདེན་པའི་མཐུས༔ སྡང་བའི་དགྲ་དང་གནོད་པའི་བགེགས༔ བར་ཆད་བྱེད་པའི་དམ་སྲི་རྣམས༔ ཚོགས་སུ་བསྒྲལ་ཕྱིར་ཚོགས་ལ་ཁུག༔ ཛལས་རྟ་གདོང་ལྕགས་ཀྱུ་མ༔ གཅིག་ལས་བརྒྱ་སྟོང་བྱེ་བ་འབུམ༔ ལྕགས་ཀྱུ་འབར་བས་ཁུག་ལ་ཤོག༔ ཁུག་ཅིག་བཛྲ་ཨཾ་ཀུ་ཤ་ཛ༔ ཧཱུྃ་ལས་ཕག་གདོང་ཞགས་པ་མ༔ གཅིག་ལས་བརྒྱ་སྟོང་བྱེ་བ་འབུམ་ཞགས་པ་འབར་བས་ཆིངས་ལ་ཤོག༔ ཆིངས་ཤིག་བཛྲ་པཱ་ཤ་
ཧཱུྃ༔ པཾ་ལས་སྤྲེལ་གདོང་ལྕགས་སྒྲོག་མ༔ གཅིག་ལས་བརྒྱ་སྟོང་བྱེ་བ་འབུམ༔ ལྕགས་སྒྲོག་འབར་བས་སྡོམ་ལ་ཤོག༔ སྡོམས་ཤིག་བཛྲ་སྤོ་ཊ་བཾ༔ ཧོལས་སྤྱང་གདོང་དྲིལ་བུ་མ༔ གཅིག་ལས་བརྒྱ་སྟོང་བྱེ་བ་འབུམ༔ དྲིལ་བུ་འབར་བས་གཟུགས་ལ་ཕོབ༔ མྱོས་པར་གྱིས་ཤིག་གྷནྡྷེ་ཧོ༔ ཧཱུྃ༔ ཆེ་མཆོག་པདྨ་ཐོད་ཕྲེང་རྩལ༔ རྔམ་བྱེད་འབར་བའི་ཁྲོ་ཚོགས་བཅས༔ རྡོ་རྗེ་ཕུར་པ་ལྕགས་ཀྱུ་དང་༔ ཞགས་པ་ཐོ་ཆེན་འབར་བ་ཐོགས༔ དགྲ་བགེགས་གདུག་པའི་ལྔ་ཕུང་འདི༔ ལྕགས་ཀྱུས་ཟུངས་ལ་ཕུར་པས་ཐོབ༔ རྡུལ་ཕྲན་བཞིན་དུ་བརླག་པར་མཛོད༔ རྣམ་ཤེས་ཆོས་ཀྱི་དབྱིངས་སུ་སྤོར༔ གུ་རུ་བཛྲ་ཀྲོ་དྷ་ནི་ཏྲི་དགྲ་བགེགས་ཤ་ཧཱུཾ་མཱ་ར་ཡ་རྦད༔ ཅེས་བསྒྲལ་ནས་བསྟབ་པ་བྱ་བ་ནི༔ ཧཱུྃ༔ བླ་མ་ཡི་དམ་མཁའ་འགྲོ་ཞལ་ཕྱེས་ཤིག༔ ཁམས་གསུམ་ཡོངས་སྒྲོལ་དགྲ་བགེགས་ཞལ་དུ་བསྟབ༔ རྔམ་བྱེད་ཧོ་ཁུང་ཡངས་པའི་མགུལ་དུ་བསྟིམ༔ འཁོར་འདས་མཉམ་ཉིད་ངང་དུ་མཆོད་པ་བཞེས༔ གུ་རུ་དྷེ་ཝ་དྷཱ་ཀི་ནཱི་དགྲ་བགེགས་ཀྱི་ཤ་ཁྲག་རུས་པ་ལ་ཁ་ཁ་ཁཱ་ཧི་ཁཱ་ཧི༔ དེ་ནས་རྡོ་རྗེ་སློབ་དཔོན་ནས་རིམ་པར་དྲངས་ཏེ༔ གཟིགས་ཤིག་
མཛེས་ལྡན་དམ་པའི་ཆོས༔ འདི་ལ་ཐེ་ཚོམ་བྱར་མི་རུང་༔ བྲམ་ཟེ་ཁྱི་དང་གདོལ་པ་ཕག༔ རང་བཞིན་གཅིག་ཏུ་དགོངས་ཏེ་རོལ༔ ལག་པ་གཉིས་པདྨའི་ཕྱག་རྒྱས་བླངས་ཏེ༔ ཧོ་རིན་ཐང་མེད་པ་ལེགས་འོང་ཆོས༔ གཟུང་འཛིན་མཚན་མ་ཀུན་སྤངས་པའི༔ བླང་དོར་ཆོས་ཀུན་བྲལ་བ་ཡི༔ དེ་བཞིན་ཉིད་ལ་བདག་ཕྱག་འཚལ༔ ཨ་ལ་ལ་ཧོ༔ ཞེས་རོལ་ལ༔ དེ་ནས་ལྷག་མ་བྲན་ལ༔ ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ༔ ཨོཾ་སྭ་བྷ་ཝ་སོགས། ཚོགས་གཞོང་བྷནྡའི་སྣོད་ཡངས་ཤིང་རྒྱ་ཆེ་བར༔ ལྷག་མའི་ངོ་བོ་དེ་ཉིད༔ འདོད་ཡོན་གྱི་ལོངས་སྤྱོད་ཤ་ཆེན་གྱི་ཕུང་པོ༔ རཀྟའི་རྒྱ་མཚོ་སྟོང་གསུམ་གང་བར་གྱུར༔ ཨོཾ་ཨཱཿཧཱུྃ་ཧ་ཧོ་ཧྲཱིཿ སྔགས་དེ་ལན་གསུམ་གྱིས་བྱིན་གྱིས་བརླབས་ནས༔ ཧཱུྃ༔ ཆོས་དབྱིངས་རོལ་པ་ཆེན་པོ་ལས་སྤྲུལ་པའི་ཁྲོ་རྒྱལ་ཆེན་པོ་ཤར༔ འཁོར་འདས་སྣང་སྲིད་ང་ཡི་དབང་༔ ང་ནི་ཆེ་མཆོག་ཧེ་རུ་ཀ༔ དང་པོ་ཕུད་ཀྱིས་མི་མཆོད་རྒྱུ༔ དྲག་པོའི་ལྷ་ཚོགས་ཕུད་ལ་དགྱེས༔ བར་དུ་ལྷག་མ་མི་བསྲེ་རྒྱུ༔ དམ་ཅན་མཁའ་འགྲོ་ལྷག་ལ་དགྱེས༔ ལྷག་མ་ཁ་ཆུས་མི་བྲན་རྒྱུ༔ རྣལ་འབྱོར་བདག་དང་གཡར་དམ་གཅིག༔ དཀྱིལ་འཁོར་མཐའ་
ལ་མི་བཞག་རྒྱུ༔ བྲན་གཡོག་ཕོ་མོའི་ཚུལ་དུ་གནས༔ དྲག་པོའི་བཀའ་ཉན་ལས་བྱེད་ཚོགས༔ ཤར་གྱི་ཕྱོགས་ཀྱི་གཏོར་ལེན་ནི༔ རྡོ་རྗེ་རིགས་ཀྱི་མཁའ་འགྲོའི་ཚོགས༔ ལྷོ་ཡི་ཕྱོགས་ཀྱི་གཏོར་ལེན་ནི༔ རིན་ཆེན་རིགས་ཀྱི་མཁའ་འགྲོའི་ཚོགས༔ ནུབ་ཀྱི་ཕྱོགས་ཀྱི་གཏོར་ལེན་ནི༔ པདྨ་རིགས་ཀྱི་མཁའ་འགྲོའི་ཚོགས༔ བྱང་གི་ཕྱོགས་ཀྱི་གཏོར་ལེན་ནི༔ ལས་ཀྱི་རིགས་ཀྱི་མཁའ་འགྲོའི་ཚོགས༔ གིང་དང་ལང་ཀ་དུར་ཁྲོད་བདག༔ ཀེའུ་སེང་དབང་ཕྱུག་ཉེར་བརྒྱད་སོགས༔ དཔལ་གྱི་བཀའ་ཉན་ལྷག་སྡུད་རྣམས༔ དར་གྱི་ཅོད་པན་པུ་རུ་རུ༔ རྒྱན་ཆ་མང་པོ་ཁྲོ་ལོ་ལོ༔ དཔའ་བོའི་བྲོ་བརྡུང་ཁྲབས་སེ་ཁྲབ༔ དཔའ་མོའི་གླུ་ལེན་ཀྱུ་རུ་རུ༔ གནས་བཟང་དུར་ཁྲོད་ཉམས་རེ་དགའ༔ གོས་བཟང་ཞིང་ལྤགས་བརྗིད་རེ་ཆེ༔ སྐྱོགས་བཟང་བྷནྡྷ་མཚན་རེ་བཟང་༔ སྐྱེམས་བཟང་རཀྟ་བཅུད་རེ་ཆེ༔ ཟས་བཟང་མཾ་ས་རོ་རེ་ཞིམ༔ རྟག་ཏུ་དུར་ཁྲོད་གནས་རྣམས་ཉུལ༔ དམ་ཚིག་སྲུང་ཞིང་མཁའ་ལ་འགྲོ༔ ལས་སུ་གསོད་དང་གཅོད་ལ་བརྩོན༔ ཟས་སུ་ཤ་དང་ཁྲག་ལ་དགྱེས༔ ཡང་དག་དོན་ལ་སངས་རྒྱས་ཀྱང་༔ ཐབས་
ཀྱིས་དྲག་པོའི་ཕྲིན་ལས་མཛོད༔ རྒྱན་གྱི་མཆོད་གཏོར་འདི་བཞེས་ལ༔ ཞི་རྒྱས་དབང་དྲག་མངོན་སྤྱོད་ལས༔ བཅོལ་བའི་ཕྲིན་ལས་འགྲུབ་པར་མཛོད༔ ཨོཾ་བཛྲ་བྷ་ར་ཧི་ཡོ་གི་ནི་དྷ་ཀ་དྷ་ཀི་ནི་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ཅེས་ཚོགས་གཏོར་ལྷག་མ་བཏང་ངོ་༔ ཞེས་ཚོགས་ཀྱི་འདོན་འགྲིགས་རཱ་ག་ཨ་སྱས་སྦྱར་བ་ལ་ཉེས་པ་གང་མཆིས་ལྷ་དང་སྲུང་མ་རྣམས་ལ་བཤགས་ཤིང་དགེ་བས་སེམས་ཅན་ཐམས་ཅད་ཚོགསགཉིས་རྫོགས་པར་གྱུར་ཅིག༔ ཅེས་དོན་འགྲུབ་ཀྱི་དོན་དུ་རྟ་ལོ་ས་གའི་ཚེས་བཅུ་ལའོ༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།