གུ་རུ་དྲག་པོའི་ལས་བྱང་མེ་རླུང་འཁྱིལ་པའི་སྒོམ་ཁོག་དོན་འགྲེལ་གོ་བདེར་བཀོད་པ་བཞུགས་པའི་དབུ་ཡི་གཟིགས།
གུ་རུ་དྲག་པོའི་ལས་བྱང་མེ་རླུང་འཁྱིལ་པའི་སྒོམ་ཁོག་དོན་འགྲེལ་གོ་བདེར་བཀོད་པ་བཞུགས་པའི་དབུ་ཡི་གཟིགས་ཕྱོགས་ལགས་སོ༔
ན་མོ་གུ་རུ་པདྨ་ཀྲོ་ཏ་ཡེ༔ བླ་མ་དྲག་པོའི་ལྷ་ཚོགས་ཐམས་ཅད་ལ༔ ཕྱག་འཚལ་བཀའ་གནང་བྱིན་གྱིས་བརླབ་ཏུ་གསོལ༔ གུ་རུ་དྲགཱ་པོའི་ལས་བྱང་མེ་རླུང་འཁྱིལ་པ་ཞེས་བྱུ་བ༔ རཏྣ་གླིང་པའི་ཐུགས་ཏིག༔ འདིའི་དོན་འགྲེལ་སྒོམ་ཁོག་བཤད་པ་ལ༔ སྤྱི་དང་བྱེ་བྲག་གཉིས༔ སྤྱིར་ནི་ལྷའི་ངོ་བོ་གང་ཡིན་པ་དང་༔ རྒྱུད་གང་ནས་བཤད་པ་དང་༔ མན་ངག་འདི་གང་གིས་མཛད་པ་དང་གསུམ་མོ༔ དེ་ལ་ལྷ་འདིའི་ངོ་བོ་ནི་སངས་རྒྱས་སྣང་བ་མཐའ་ཡས་ཉིད་ཡིན་ཏེ༔ དྲག་པོ་བདེར་འདུས་ཀྱི་གཞུང་ལས༔ ཧཱུྃ༔ ཁམས་གསུམ་གནས་ནས་སྟོབས་
ལྡན་རྫུ་འཕྲུལ་ཅན༔ ནུབ་ཕྱོགས་བདེ་བ་ཅན་གྱི་ཞིང་ཁམས་ནི༔ སྣང་བ་མཐའ་ཡས་སྐུ་གསུང་ཐུགས་ལས་སྤྲུལ༔ ངོ་མཚར་རྨད་བྱུང་པདྨ་ཧེ་རུ་ཀ༔ ཞེས་སོགས་ནས༔ དྲག་པོ་པདྨའི་སྐུ་ལ་ཕྱག་འཚལ་བསྟོད༔ ཅེས་གསུངས་སོ༔ རྒྱུད་གང་ལས་གསུང་ན༔ སྤྱིར་ནི་གསང་སྔགས་རྙིང་མའི་དབང་དུ་བྱས་ན༔ རིག་འཛིན་རོལ་པའི་རྩ་རྒྱུད་ནི་གུ་རུ་ཞི་དྲག་གཉིས་ཀའི་རྒྱུད་ཡིན་ཏེ༔ རྙིང་མ་བཀའ་མ་སྟེ་གཏེར་དུ་མ་སོང་བ་གསང་སྔགས་རྒྱུད་འབུམ་ན་བཞུགས༔ གཏེར་མའི་དབང་དུ་བྱས་ན༔ དགོངས་འདུས་རྩ་བའི་རྒྱུད་ལྔ་ནི་གུ་རུ་ཞི་དྲག་གཉིས་
ཀའི་རྒྱུད་ཡིན་ཅིང་༔ གུ་དྲག་གི་དཀྱིལ་འཁོར་སྔགས་ཨ་ཙིག་དང་བཅས་པ་གསལ་བར་གསུངས༔ གསར་མའི་རྒྱུད་སྒྲོལ་མ་རལ་པ་གྱེན་བརྫེས་ཅན་གྱི་རྒྱུད་གླེགས་བམ་ཤིན་ཏུ་ཆེ་བ་ལས༔ པདྨ་དཀར་པོས་བརྒྱན་པ་ལ་སོགས་པ༔ རིག་འཛིན་གྱི་རྒྱལ་པོ་བཅོ་བརྒྱད་འཁོར་སྟོང་ཕྲག་བཅོ་བརྒྱད་མཐུ་ཆེན་པོ་བཅོ་བརྒྱད་དང་ལྡན་ཅིང་༔ བུད་མེད་རྣམས་དང་ལྷན་ཅིག་ཏུ་བརྩེ་བར་བྱེད་པ་ཞེས་དང་༔ དེའི་སྙིང་པོ་ནི༔ ཨོཾ་པདྨ་བཛྲ་ཧཱུྃ༔ ཞེས་གསུངས་པ་ནི་གུ་རུ་ཞི་བ་ཡིན་ལ༔ སངས་རྒྱས་ཐོད་པའི་རྒྱུད་ཅེས་བྱ་བ་རྒྱུད་ཆེན་པོ་བཞུགས་པ་ནི༔ གུ་རུ་དྲག་པོ་ཡིན་ཏེ༔ སངས་རྒྱས་ཐོད་པ་དང་༔ པདྨ་ཐོད་ཕྲེང་རྩལ་དང་༔ ཐོད་པ་རྩལ་ཆེན་དང་༔ རིག་འཛིན་ཆེན་པོ་ཐོད་པ་རྩལ་རྣམས་དོན་གཅིག་སྟེ༔ ཨོ་རྒྱན་གྱི་གསང་མཚན་ཡིན་པར་དགོངས་འདུས་ནས་གསུངས་སོ༔ དཔེར་ན་དབང་རྡོ་རྗེ་ཕྲེང་བ་དང་༔ མི་ཏྲ་བརྒྱ་རྩ་ནས༔ སངས་རྒྱས་ཐོད་པའི་དཀྱིལ་འཁོར་གསུངས་པ་རྣམས་ཀྱང་༔ གསར་མའི་ལུགས་གུ་དྲག་གི་དཀྱིལ་འཁོར་ཡིན་པ་ཤེས་པར་བྱ༔ མཁས་གྲུབ་ཁྱུང་པོ་རྣལ་འབྱོར་གྱིས་བསྒྱུར་བའི་ཕྱག་དྲུག་གི་ཆོས་བསྐོར་བཀའ་བསྒོ་
བདེན་ཚིག་གི་འཁོར་ལོ་ཞེས་བྱ་བའི་རྒྱ་གཞུང་ལས༔ སྔགས་ལ་ཨ་ཅིག་ཀྱང་འབྱུང་བས༔ གསར་མའི་རྒྱུད་གཞུང་ནས་གུ་དྲག་མ་གསུངས་པ་མ་ཡིན་ནོ༔ འོ་ན་གླུ་དྲག་དངོས་ཀྱི་རྒྱུད་དེ་གང་ཡིན་ཞེ་ན༔ སངས་རྒྱས་སྣང་བ་མཐའ་ཡས་ཀྱིས་གསུངས་པའི་གུ་རུ་དྲག་པོ་ཞལ་གསུམ་ཕྱག་དྲུག་ཕྲིན་ལས་ཀྱི་རྒྱུད༔ དྲེགས་པ་སྙིང་འབྱིན་ཞེས་བྱ་བ༔ སངས་རྒྱས་གླིང་པའི་གཏེར་མ་དང་༔ དྲག་པོ་ཁྲག་འཐུང་རོལ་པའི་རྩ་རྒྱུད་ཅེས་བྱ་བ་རིག་འཛིན་རྒོད་ལྡེམ་གྱི་གཏེར་མ་གཉིས་སྔར་ནས་ཡོད་ལ༔ རྩ་རྒྱུད་བརྒྱ་དང་རྩ་བརྒྱད༔ སྒོས་རྒྱུད་སུམ་འབུམ་ཉི་ཁྲི༔ སྤྱི་རྒྱུད་འབུམ་སྡེ་ས་ཡ་ཡོད་པར་གསུངས་ཏེ༔ ཕལ་ཆེར་གཏེར་དུ་བཞུགས༔ འགའ་ཞིག་མཁའ་འགྲོའི་ཕྱག་ཏུ་བཞུགས་པ་ལས། དུས་ཕྱིས་གནམ་ཆོས་ལས༔ གུ་རུ་དྲག་པོའི་རྒྱུད་འོད་ཟེར་འབྱུང་གནས་ཞེས་བྱ་བ་འབྱུང་བ་དང་༔ གཏེར་སྟོན་ཀློང་གསལ་སྙིང་པོའི་གཏེར་ཁ་ལས༔ གུ་རུ་དྲག་པོ་ཡེ་ཤེས་རབ་འབར་ཞེས་བྱ་བའི་རྒྱུད་རྒྱས་བསྡུས་གསུམ་བྱུང་ངོ་༔ མན་ངག་གང་གིས་མཛད་པ་ནི༔ རྒྱུད་ལ་བརྟེན་ནས་གཞན་གྱིས་འགྲེལ་བ་སྒྲུབ་ཐབས་མཛད་པ་ལ་ནི༔ འཁྲུལ་པ་ཅུང་ཟད་
ཡོད་སྲིད་དེ༔ བྱང་ཆུབ་སེམས་དཔའ་རྣམས་ལ་ཡང་༔ འཁྲུལ་པ་ཡེ་ཤེས་དུམ་བུར་གནས༔ ཞེས་གསུངས་སོ༔ རྒྱ་གར་ནས་པཎྜི་ཏ་དང་ལོཙྪ་བས་བསྒྱུར་བའི་རྒྱུད་རྒྱ་གཞུང་ལ་ནི༔ གསེར་འདོད་པས་པཎྜི་ཏས་རྒྱུད་རྒྱ་གཞུང་ལ་བཅོས་བརྒྱབ་པ་ཡང་ཡོད༔ པཎྜི་ཏ་ཡོན་ལ་མ་མགུ་ནས་མན་ངག་བཅད་པ་ཡང་ཡོད༔ ལོཙྪ་བའི་ཚིག་ལྷད་ཀྱང་འདྲེས༔ ཨོ་རྒྱན་ཉིད་ཀྱིས་མཛད་པ་ལ་སྐྱོན་དེ་རྣམས་མེད་པས་ཟབ་སྟེ་ཨོ་རྒྱན་ཉིད་ཀྱིས་བོད་སྐད་དུ་གསུང་པ་ཡིན༔ དཔེར་ན་སྤུ་གྲི་གླད་གཟེར་གྱི་རྒྱུད་མགོན་པོ་ཕྱག་བཞི་པ་ཉིད་ཀྱིས་གསུངས༔ ཕྱག་རྡོར་གྱི་རྒྱུད་རྣམས་ཕྱག་རྡོར་ཉིད་ཀྱིས་གསུངས༔ དེ་བཞིན་ལྷ་ཕལ་ཆེར་གྱི་རྒྱུད་ལྷ་སོ་སོའི་གསུངས་པ་ལྟར༔ ལས་བྱང་འདི་ཡང་ཨོ་རྒྱན་ཉིད་ཀྱིས་གསུངས་པས་ལས་བྱང་འདི་དོན་ལ་རྒྱུད་ཀྱང་ཡིན༔ རྒྱ་གར་གྱི་པཎྜི་ཏ་ཡན་ལག་མེད་པའི་རྡོ་རྗེ་ཞེས་ཀྱང་བྱ༔ པདྨ་སཾ་བྷ་ཝ་ཞེས་ཀྱང་བྱ༔ གྲུབ་ཆེན་པདྨ་བཛྲ་ཞེས་ཀྱང་བྱ་བ་དེས་མཛད་པའི་རྒྱ་གཞུང་ཡང་ལས་བྱང་འདི་ཀ་ཡིན༔ མཛད་པ་ནི་བསམ་ཡས་སུ་མཛད་པའི་བོད་གཞུང་ཡང་འདི་ཀ་ཡིན༔ དེས་ན་ལས་བྱང་འདི་འཆད་པ་ལ༔ རྒྱུད་དང་རྒྱ་གཞུང་གཞན་
གྱི་ལུང་འདྲེན་མི་དགོས་སོ༔ སྔོན་གྱི་གཏེར་ཁ་བརྒྱད་ནས་རཏྣ་གླིང་པ་ལུང་བསྟན་གསལ་བར་ཡོད་པ་དང་༔ ཀརྨ་པ་ཆོས་གྲགས་རྒྱ་མཚོ༔ འབྲུག་པ་རྒྱལ་དབང་ཆོས་རྗེ༔ སྣེལ་སྡོང་གོང་མ་ཆེན་པོ༔ དེ་དུས་དེ་གསུམ་ལས་ལྷག་པ་བོད་ན་མེད༔ དེ་གསུམ་གྱིས་གཏེར་ཆོས་ཀྱི་དབང་ལུང་རྣམས་ཞུས་པ་དང་༔ བུམ་སྒྲུབ་བཙུགས་ཤིང་ཁྲོམ་དབང་བསྐུར༔ རིལ་བུ་བཀྱེ་དུས་མེ་ཏོག་གི་ཆར་ཆུང་གྲ་ཡང་སེ་བའི་མེ་ཏོག་ཙམ་ཉི་མ་ཕྱེད་བར་དུ་བབ་པ་དང་༔ གཏེར་ཁྲོམ་གཏེར་བྱས་ནས་བཏོན་དུས༔ དགེ་བསྙེན་མཁའ་རི་ཁྲོམ་གྱིས་མཐོང་བར་དངོས་སུ་འོང་ནས་བྲག་ལ་ལྕག་ཚན་བཙུགས་ནས་གཏེར་འདི་ན་ཡོད༔ ཕ་ནོར་བུ་ལ་འཕྲོད་དོ་ཟེར་བ་ཀུན་གྱིས་ཐོས༔ དེའི་ཕྱིར་རཏྣ་གླིང་པ་ལ་སུས་ཀྱང་ཐེ་ཚོམ་མེད༔ དེ་སྔོན་དེང་སང་ཡན་ཆད་གཏེར་སྟོན་ཕྱེད་ཉིས་བརྒྱ་ལྷག་ཙམ་བྱོན་པར་སྣང་སྟེ༔ རྟེན་འབྲེལ་འཆུག་པ་དང་བར་ཆད་ཀྱི་དབང་དུ་ཤོར་བ་མང་༔ རཏྣ་གླིང་པ་ལ་རྟེན་འབྲེལ་མ་འགྲིགས་པ་དང་བར་ཆད་གཅིག་ཀྱང་མ་བྱུང་༔ དགུང་ལོ་ཡང་བདུན་ཅུ་དོན་ལྔ་ཙམ་བཞུགས་པས༔ སྐྱེ་བ་གསུམ་གྱི་གཏེར་ཁ་སྐྱེ་བ་གཅིག་
ལ་ཐོ༔ རཏྣ་གླིང་དང་འགྲོ་འདུལ་ཞིག་པོ་གླིང་༔ གཏེར་སྟོན་གཅིག་ལ་གླིང་པ་གསུམ་དུ་གྲགས༔ ཚེ་ཆུ་གཏེར་ནས་བཏོན་པ༔ སྲས་ཚེ་དབང་གྲགས་པ་ལ་དྲངས་པས༔ དགུང་ལོ་བརྒྱ་དང་བཅུ་ཐོབ༔ དེས་ན་རཏྣ་ལུགས་འདི་བཀྲ་ཤིས༔ བར་ཆད་མེད་པ་ཡིན༔ ཉང་དང་ཆོས་དབང་གི་གཏེར་ཁ་ཡང་མི་རབས་བརྒྱད་དུ་བྱིན་རླབས་འགྲོ་དོན་ཆེ་ཞིང་༔ དེ་ནས་དབང་ལུང་གི་བརྒྱུད་པ་ཡོད་ཀྱང་བྱིན་རླབས་ཅུང་ཞིག་ཉམས་པར་བཤད༔ པདྨ་གླིང་པའི་གཏེར་ཁ་ཡང་༔ ཚེ་ལོ་སུམ་ཅུ་ཁ་རལ་ནས་ནུབ་པར་བཤད་དེ༔ རཏྣ་ལུགས་ལ་བསྟན་པའི་རྫོགས་མཚམས་མེད་པས༔ སློབ་མ་ལས་ཀྱང་ཡང་སློབ་རྗེས་སློབ་ཀྱི་དུས་སུ་བསྟན་པ་མཐའ་རྒྱས་སུ་འགྲོ་བར་གསུངས་པའི་ཕྱིར་བྱིན་རླབས་ཀྱི་བཀའ་མི་ཡལ་ཞིང་བསྟན་པའི་བརྒྱུད་རིང་བ་ཡིན༔ བྱང་གཏེར་གྱི་དྲག་མཐིང་ནི་དབུས་གཙང་དུ་དར་སྲོལ་ཆེ་ཡང་༔ མངའ་རིས་པཎ་ཆེན་དང་མངའ་རིའི་རིག་འཛིན་ཆེན་པོ་སྐུ་མཆེད་ཀྱི་བར་ན་དམ་ཚིག་གི་སེལ་ཆེན་པོ་བྱུང་བ་ཡིན་ཞེས༔ ཞིག་པོའི་ཆོས་བརྒྱུད་རྣམས་ཀྱིས་འཛེམ་སྲོལ་སྣང་༔ རཏྣའི་ཆོས་བརྒྱུད་ལ་དེ་སྔོན་དམ་སེལ་གྱིས་མ་ཆོད་པས་ཁུངས་བཙུན།
ཀཿཐོག་པ་པདྨ་སེངྒེའི་ཞལ་ནས༔ འགུར་དྲག་རིགས་མི་འདྲ་བའི་གཏེར་ཁ་བརྒྱད་ཀྱི་དབང་ལུང་རྫོགས་པར་ཐོབ་སྟེ༔ དོན་ལ་ཁྱད་པར་མི་འདུག་གསུངས་པ་ལྟར༔ ལར་འགུར་དྲག་མང་ཡང་མ་འོངས་ཁམས་དང་གཙང་ཕྱོགས་སུ༔ བསྟན་པ་དར་ཞིང་རྒྱས་པར་འགྱུར༔ ཞེས་གསུངས་པ་ལྟར༔ རཏྠའི་གུ་དྲག་འདི་ཁམས་ཕྱོགས་སུ་བཀའ་བབས་པས༔ ཤར་ཀཿཐོག་གི་བླ་མ་རྣམས་ལ་འགུར་དྲེག་གི་རིགས་ཐམས་ཅད་ཀྱི་དབང་ལུང་བཞུགས་ཀྱང་༔ བཅའ་རྒྱུ་དང་འདོན་རྒྱུ་ནི་རཏྣ་ལུགས་འདི་ཡིན་པའི་ཕྱིར་ཤར་ཀཿཐོག་དགོན་དང་དགོན་ལག༔ བླ་མ་བརྒྱ་ཕྲག་སྒོམ་ཆེན་སྟོང་ཕྲག་ད་ལྟ་ཡང་ཡོད་པར་འདུག་པ་རྣམས་ཀྱིས་ཀྱང་འགུར་དྲག་རཏྣ་ལུགས་འདི་དར༔ རི་བོ་ཆེའི་ཆོས་རྗེ་མཁའི་དྲུང་གི་བླ་མཆན་ཚེ་ཆོག་པ་པདྨ་དབང་ཕྱུག་དེ༔ ཕྱོགས་ཐམས་ཅད་དུ་རྙིང་མའི་དབང་ལུང་ཞུར་བཏང་ནས༔ རྙིང་མའི་དབང་ལུང་ཐམས་ཅད་ཞུས་ཤིང་མཁར་དྲུང་པ་ལ་ཡར་ཕུལ༔ ཁོང་གིས་རྙིང་མའི་དབང་ལུང་མ་ཐོབ་པ་མེད་པ་ལྟ་བུ་ཡིན་པར་འདུག་པ་ལ༔ ཁོང་གིས་རཏྣ་ལུགས་ཀྱི་འགུར་དྲག་མིན་པ་གཞན་ཅི་ཡང་མི་འདོན་པ་ཡིན་སྐད༔ ཁྱེད་
ཀྱིས་དབང་ལུང་རྒྱ་མཚོ་ལྟ་བུ་ཐོབ་པ་ལ༔ མེ་རླུང་འཁྱིལ་པ་མ་གཏོགས་གཞན་ཅི་ཡང་མི་འདོན་པ་ཅི་ལགས་ཞུས་པས༔ འདི་འཐུས་ཆེ་འདི་ལ་མ་འདུས་པ་གཅིག་ཀྱང་མི་འདུག་གསུངས་སྐད༔ རི་བོ་ཆེ་ཟུར་མང་གྲྭ་རིས་དང་བཅས་པ༔ ཤར་རྒྱལ་མོ་རོང་ཚུན་ཆད་དུ་འགུར་དྲག་རཏཱ་ལུགས་འདི་དར་བ་ཡིན༔ སྤྱིར་འདི་ནི་དྲག་པོ་ཐུགས་ཀྱི་སྒྲུབ་པ་ཡིན་ཏེ་ཟབ་ཅིང་དཀོན༔ དྲག་པོའི་རྐྱང་སྒྲུབ་དང་དྲིལ་སྒྲུབ་ནི་ཤིན་ཏུ་མང་༔ སྙིགས་མའི་དུས་སུ་སའི་གཏེར་མི་ཐུབ་རང་རྡོལ་དུ་འབྱུང་བར་གསུངས་པ་ལྟར་དྭགས་པོར་ས་ལ་སྒང་པ་ཟེར་བའི་སྔགས་པ་ཞིག་གིས༔ གད་པ་ཆད་པའི་ནང་ནས༔ བསེ་སྒམ་ཞིག་རྙེད༔ དེའི་ནང་ནས་ཤོག་སེར་ཕབ་པ་གུ་རུ་ཞི་དྲག་བྱུང་བ་ལྟ་བུ་ལ་རྡོལ་ཆོས་ཟེར༔ པདྨ་གླིང་པས་མཚོ་ནང་ནས་གཏེར་བཏོན་དུས་གཏེར་ཤོག་ཕྱེད་ཙམ་ཆུ་ལ་ཤོར་ནས་གཏེར་སྟོན་རང་གིས་ཉམས་ཐོག་ནས་བརྩམ་དགོས་བྱུང་ཟེར་བ་ལ་རང་གཏེར་མ་ཆོག་པ་ཟེར༔ ཉང་ལུགས་དྲག་པོ་ལ་ལས་བྱུང་པོད་གཞུང་ནས་དུམ་བུ་མང་པོ་བསྒྲིག་དགོས་པ་ཞིག་ཡོད་པས༔ བླ་མ་ལ་ལས་མང་པོ༔ ལ་ལས་ཉུང་ངུ་སྣ་ཚོགས་བསྒྲིགས་པ་ལ་བཅོས་བསླད་ཟེར༔ དེ་དག་གི་
དོན་ཡང་རིཉྩ་ལུགས་ཀྱི་ཐེམ་དྲག་པོའི་བྱང་ལས༔ བོད་ཡུལ་མཐའི་དབུས་གཏེར་ཁ་དཔག་མེད་ཀྱང་༔ ཐུགས་སྒྲུབ་དྲག་པོ་ལྔ་ལས་སྦས་པ་མེད༔ རྐྱང་སྒྲུབ་དྲག་པོར་བཏགས་པའི་དྲིལ་སྒྲུབ་ནི༔ འགའ་རེ་སྦས་ཏེ་གང་ཟག་འགའ་རེའི་དོན༔ ཡིན་ཕྱིར་ཧཱུྃ་སྒྲུབ་ལ་སོགས་ཁ་འཐོར་རེ༔ མ་འོངས་དུས་ན་དམ་ཉམས་རྡོལ་ཅན་གྱིས༔ དྲག་སྒྲུབ་ཟེར་ཞིང་རིག་ཚད་ཁེངས་བར་འབྱུང་༔ དེ་ལ་བློ་གཏད་མི་རུང་རྟོག་ལ་དཔྱོད༔ གཏེར་ཆོས་ཟེར་ཞིང་རྡོལ་ཆོས་ཟོག་པོས་གང་༔ གཏེར་སྟོན་འགའ་ཡང་རང་གཏེར་མ་ཆོག་པར༔ ཁྱད་འདོད་དབང་གིས་བཅོས་སླད་སྣ་ཚོགས་འཆོར༔ ནས་གསེབ་ཕུབ་མ་བཏང་བཞིན་ང་ཡི་བཀའ་ལ་བསླད༔ ཤིན་ཏུ་དར་ཡང་ནམ་ཕུགས་བཀྲ་མི་ཤིས༔ བཀའ་ལུང་རྫོགས་ནས་གདུལ་བྱ་སོགས་བྱུང་ཚེ༔ མ་མོའི་ཆད་པས་བར་ཆད་དབང་དུ་མཆིས༔ བྱིན་རླབས་མི་ལྡན་ཉེས་པའི་རྩ་བ་ཡིན༔ ཚད་ལྡན་མིན་ན་ང་ཡི་བཀའ་མ་བསླད༔ ལུང་བཞིན་སྒྲུབ་ལ་དོན་དང་ལྡན་པར་སྤེལ༔ བཀྲ་ཤིས་བྱིན་རླབས་བསྟན་ལ་ཕན་པ་ཡིན༔ ཞེས་གསུངས་པ་ལྟར་རོ༔ འདི་ལ་ནི་གོང་གི་སྐྱོན་དེ་དག་མེད་ཅིང་གཏེར་གཞུང་
བཅོས་བསླད་མེད་པ་ཡིན་ནོ༔ དེ་ལ་ཡང་དག་གསང་བའི་སྐད་དུ༔ ཨོ་རྒྱན་མཁའ་འགྲོའི་ཡི་གེར་བྲིས་པ་ནི༔ གཤཱཊཊིན།ནཊ་གནཊཏབ།ཤཛྷ༔ མནཏྲཀཱཧཱུ༔ རྒྱ་གར་སྐད་དུ༔ ཤྲཱི་ཧེ་རུ་ཀ་ཀྲོ་དྷ་རཱ་ཛ་ཀ་པཱ་ལ་མཱ་ལ་ནཱ་མ༔ བོད་སྐད་དུ༔ དཔལ་ཁྲག་འཐུང་ཁྲོས་པའི་རྒྱལ་པོ་པདྨ་ཐོད་ཕྲེང་རྩལ་ལ་ཕྱག་འཚལ་ལོ༔ ཞེས་པ་ནི་ཤོག་སེར་བྲི་བའི་ཐོག་མར་མཚོ་རྒྱལ་གྱིས་མཆོད་བརྗོད་མཛད་པའོ༔ དེ་ལ་སྤྱིར་ཐེག་པ་ཆེ་ཆུང་གཉིས་ལས་ཐེག་པ་ཆེན་པོ་དེ་ལ་རྒྱུ་འབྲས་ཀྱི་ཐེག་པ་གཉིས་ལས༔ འབྲས་བུའི་ཐེག་པ་དེ་ལ་གསང་སྔགས་ཕྱི་པའི་རྒྱུད་གསུམ༔ ནང་པའི་རྒྱུད་གསུམ་དང་དྲུག་ལས་འདི་ནང་པའི་རྒྱུད༔ དེ་ལ་མ་ཧཱ་ཨ་ནུ་ཨ་ཏི་གསུམ་ལས༔ འདི་བསྐྱེད་པ་མ་ཧཱ་ཡོ་གའི་རྒྱུད༔ དེ་ལ་ཞི་དྲག་གཉིས་ལས་འདི་དྲག་སྒྲུབ༔ དེ་ལའང་རྩ་བ་གསུམ་ལས་འདི་བྱིན་རླབས་ཀྱི་རྩ་བ་བླ་མའི་སྒྲུབ་པ༔ དེ་ལ་རིགས་མཐའ་ཡས་པ་ཐམས་ཅད་ཀྱི་ཡང་སྙིང་༔ ཨོ་རྒྱན་རིན་པོ་ཆེའི་ཐུགས་ཀྱི་ཏཱི་ཀཱ་སྣོད་མིན་ལ་གསང་བའི་རྒྱ་ཅན༔ མན་ངག་ཟབ་མོའི་ཡང་ཞུན་འདི༔ ཕྱི་སྒྲུབ་ནང་སྒྲུབ་གསང་སྒྲུབ་ཡང་གསང་གི་སྒྲུབ་པ་ཉམས་སུ་བླངས་བའམ༔ གོ་ཆ་ལྷ་
ལྔའི་སྒྲུབ་པའི་རིམ་པ༔ གཏོར་ཟློག་བསྐང་བ་གྲིབ་སེལ་བྱབས་ཆོག་སོགས་ནི་མངོན་རྟོགས་དང་བསྟོད་པ་སོགས་སོ་སོའི་སྐབས་ལྟར་ལས་བྱུང་འདི་ཉིད་ཀྱི་གཞུང་བསྲུང་བ་ཆོ་གའི་རིམ་པ་འདི་ལ་བརྟེན་དགོས་པ་ལ་དོན་གསུམ་སྟེ༔ སྔོན་འགྲོ་སྟ་གོན་དང་དངོས་གཞི་བསྐྱེད་རྫོགས་ཀྱི་ཉམས་ལེན་རྗེས་ཀྱི་བྱ་བ་དང་གསུམ་མོ༔ དང་པོ་སྔོན་འགྲོ་དཀྱིལ་འཁོར་གྱི་ལས་རིམ་ནཱི༔ རབ་བྱིན་གྱིས་བརླབས་པའི་གནས༔ འབྲིང་བླ་མ་གོང་མས་ཞབས་ཀྱིས་བཅགས་པ༔ ཐ་མ་རང་གི་ཡིད་དང་མཐུན་པའི་གནཱས་ཁང་༔ མཛེ་ཅན་དང་དམ་ཉམས་སོགས་ཀྱི་ཤུལ་མ་ཡིན་པ་གཙང་མར༔ ལས་བྱང་འདི་ཁོ་ན་ལ་བརྟེན་ནས་སྒྲུབ་པ་བྱེད་ན་འབྱོར་པ་རབ་དང་དབང་པོ་ཐ་མའི་གང་ཟག་གིས༔ ས་ཐིག་ཆོག་སོགས་ཐུགས་སྒྲུབ་ཀྱི་སྒྲུབ་ཆེན་ལྟར་བྱས་ལ༔ དཀྱིལ་འཁོར་འབྲིང་མདའ་གང་༔ རབ་འདོམ་གང་༔ ཐ་མ་གྲུ་གང་ལ་སོགས་ཆེ་ཆུང་གནས་དང་བསྟུན་ཏེ༔ རབ་ཏུ་དབང་ཆོག་ནས་འབྱུང་བ་ལྟར༔ སྒྲུབ་པའི་དཀྱིལ་འཁོར་གཞུང་ལྟ་བུ་རྡུལ་ཚོན་གྱིས་བྲི༔ དབང་པོ་རབ་དང་འབྱོར་པ་འབྲིང་ལ༔ རས་བྲིས་སམ་འགྲིམ་དཀྱིལ་དུ༔ དབུས་
སུ་ཆོས་འབྱུང་དམར་པོ༔ ཟླ་གམ་དམར་པོ་སྒོ་གཅིག་པ༔ དེ་རྒྱབ་ཐོད་སྐམ་གྱི་ཕྲེང་བས་བསྐོར་བྲཱ༔ དེ་རྒྱབ་རྩིབས་བཞི་ནི་དྲག་པོ་རིགས་བཞི༔ དེ་རྒྱབ་རྩིབས་བརྒྱད་ནི་མཁའ་འགྲོ་བཞི་དང་ཕྲིན་ལས་བསྒྲུབ་པའི་ལྷ་བཞི༔ དེ་རྒྱབ་རྩིབས་བཅུ་ནི་ཁྲོ་བོ་བཅུ་སྟེ༔ རྩིབས་ཐམས་ཅད་ཀྱང་ལྷ་སོ་སོའི་ཁ་དོག༔ དེ་དག་ཏུ་ལྷ་སོ་སོའི་ས་བོན་ཡིག་འབྲུའམ༔ རང་མདོག་གི་ཐིག་ལེ་རེ་བཀོད༔ དེ་རྒྱབ་ཟླུམ་སྐོར་བྲིས་པས་ཀྱང་འཐུས་ལ༔ སྒོ་རྫོགས་དུར་ཁྲོད་རྡོ་ར་མེ་རི་དང་བཅས་པ་གྲུབ་ནཱ་ལེགས༔ དབང་པོ་རབ་དང་འབྱོར་པ་ཐ་མ་ལ༔ གཞི་དམར་པོའི་སྟེང་དུ༔ དྲི་བཟང་གི་ཆུས་སྦག་པའི་འབྲུའི་ཚོམ་བུ་ལྷ་སོ་སོའི་སྙིང་པོ་བརྗོད་ཅིང་ལྷ་གྲུངས་དང་མཉམ་པའི་ཚོམ་བུ་དབུས་མ་གཞན་ལས་སུམ་འགྱུར་གྱིས་ཆེ་བ་ལ་བརྟེན་ནོ༔ དེའི་དབུས་སུ་བུམ་པ་རྫས་ལྡན་ཁ་རྒྱན་མགུལ་ཆིངས་གཟུངས་ཐག་རྡོ་རྗེ་དང་བཅས་པ༔ དེའི་སྟེང་དུ་ཤིང་ཁྲིའམ་མདའ་གསུམ་གྱིས་ཨོཾ་བྱས་པའི་ཁར༔ སྒྲུབ་གཏོར་རིན་ཆེན་འབར་བ་ལ་གཙོ་བོའི་ཙཀླུ་དང་དར་གདུགས་དམར་པོ་བཙུགས༔ གཡས་གཡོན་གཉིས་སུ་མཉྫགཉིས་ཀྱི་ཁར༔ བྷནྡྲ་གཉིས་སུ་གཡས་སུ་བདུད་རྩི་
དང་ཡོན་དུ་རཀྟ་བཤམས༔ སྨན་རཀ་གཏོར་གསུམ་སོ་སོའི་རུ་རྩི་བཏབ༔ ཁྱད་པར་སྒྲུབ་གཏོར་ལ་སྤྱོད་ཀྱིས་བྲན་ཟེར་བ་ནི༔ གོ་སྙོད་ཀྱི་འབྲས་བུ༔ སྒོག་སྐྱ༔ གཡེར་མ༔ ཚྭ༔ སྒ་སྐྱ༔ འུ་སུ་དེ་རྣམས་ཞིབ་པར་བཏུལ་ནས་གཏོར་མ་ལ་བསྲེའོ༔ དང་པོ་སྔོན་འགྲོ་མཆོད་རྫས་བཤམས་པ་ནཱི༔ ཕྱི་རོལ་མཐའ་སྐོར་དུ༔ ཤར་དུ་མཆོད་ཡོན༔ ཤར་ལྷོར་ཞབས་བསིལ༔ ལྷོར་མེ་ཏོག༔ ལྷོ་ནུབ་ཏུ་བདུག་སྤོས༔ ནུབ་ཏུ་མར་མེ༔ ནུབ་བྱང་དྲི་ཆབ༔ བྱང་དུ་ཞལ་ཟས༔ བྱང་ཤར་དུ་ཏིང་ཤག༔ མེད་ན་ནས་ཏིང་གང་བཞག་པ་མཚམས་འཛིན་མེ་ཏོག་ཟེར༔ དེ་ནི་ཕྱིའི་མཆོད་པ་ཡིན་ལ༔ ནང་གི་མཆོད་པ་ནི༔ དྲག་པོའི་མཆོད་པ་སྟེ་དེ་དག་གི་དྲུང་དུ་བཤམས་ཏེ༔ ཁྲག་གི་མཆོད་ཡོན༔ བོང་ང་བཏབ་པའི་དུག་ཆུའི་ཞབས་བསིལ༔ དབང་པོ་རྣམ་ལྔའི་གཟུགས་བཟོས་པའི་མེ་ཏོག༔ ཚིལ་ཆེན་གྱི་སྤྲོས་མེད་ན་ཟན་ལ་སྤོས་ཀྱི་བཤོས་བུ་བྱས་ལ་ཚིལ་སྦྱར༔ རྐང་དང་ཚིལ་བཞུས་པའི་མར་མེ༔ ཁྲག་དང་ཞིག་བསྲེས་པའི་དྲི་ཆབ༔ ཤ་ཆེན་གྱི་ཞལ་ཟས༔ མེད་ན་ལྷ་བཤོས་དམར་པོ་ཟུར་གསུམ་ལ་ཤ་སྦྱར༔ ཐོད་པའི་ཌཱ་མ་
རུ་དང་རྐང་གླིང་བཤམས་པའི་རོལ་མོ་སྟེ༔ དེ་དག་དང་པོ་བྲན་ནས་གསོ་མི་དགོས་སྒྲུབ་རྫས་ལྟ་བུ་ཡིན༔ སྐབས་སུ་ཁ་དམའ་ན་གསོ༔ དེ་དག་ནི་རཏྣ་ལུགས་ཀྱི་སྒྲུབ་པ་གང་བྱེད་ཀྱང་བཤམས་ལུགས་འདྲའོ༔ དེ་ནས་རྒྱས་པར་འཛོམས་ན་མདའ་བཞི་གྲི་བཞི་ཚོན་སྐུད་དྲྭ་བ་སྟག་གི་སྒབ་སྐོར༔ སྟེང་དུ་བླ་བྲེ༔ དེ་རྣམས་ཀྱི་རྒྱབ་ནས་ཡོལ་བས་བཏུམ་པ་སོགས་གཞུང་རང་ནས་མ་བཤད་ཀྱང་རྙིང་མ་ཐམས་ཅད་ལ་དགོས༔ མ་ཧཱ་ཡོ་གའི་རྒྱུད་འདི་ལ་སྤྲོས་པ་དེ་དག་རྒྱས་ན་ཤིན་ཏུ་བསོད་ནམས་ཆེ་བས་རྒྱས་པར་བཤམས༔ མེད་ན་གང་འཛོམ་ཙམ་གྱིས་ཆོག་པས་སྐབས་དང་བསྟུན༔ ཕུགས་གཏོར་ལོགས་སུ་ཡོད་ན་ལྷ་གྲངས་དང་བསྐང་གཏོར་སོགས་གཞུང་ལྟར་ལོགས་སུ་གཏོར་སྒམ་མེད་ན་དཀྱིལ་འཁོར་གྱི་ཕྱི་མཆོད་པ་སྣ་བདུན་གྱི་ནང་དེར༔ ཤར་དུ་བླ་མ༔ ལྷོར་ཡི་དམ༔ ནུབ་ཏུ་མཁའ་འགྲོ༔ བྱང་དུ་ཆོས་སྐྱོང་སྤྱི་གཏོར༔ བྱང་ཤར་དུ་ནོར་ལྷ་སྤྱི་གཏོར༔ ནུབ་བྱང་དུ་སྨྱོ་ཁ༔ ལྷོ་ནུབ་ཏུ་སྤུ་གྲི་མཆེད་གསུམ༔ ཤར་ལྷོར་ཕྱི་རྒྱུད་དཀར་གཏོར་རྣམས་བཤམས༔ དཀྱིལ་འཁོར་གྱི་མདུན་དུ་ཅོག་ཙེ་སོགས་མཆོད་སྟེགས་ཀྱི་སྟེང་དུ་རྒྱུན་དུ་བརྗེ་རྒྱུའི་མཆོད་
པ་སྣ་བདུན༔ ཚོགས་གཏོར་འབུལ་ཆད་མདོ་བརྟན་སྐྱོང་༔ དེ་དག་བྲན་པའི་ནང་མཆོད་རྣམས་བཤམས༔ དེ་དག་གི་སྒྲུབ་པ་བྱེད་དུས་ཀྱི་བཤམས་ལུགས་ཡིན་ལ༔ རྒྱུན་ཁྱེར་དང་བསྐང་ཟློག་སོགས་ལ༔ དཀྱིལ་འཁོར་དང་སྒྲུབ་རྫས་དེ་དག་གང་ཡང་མི་དགོས་སོ༔ ཕུགས་གཏོར་སྤྱི་ལྟར་བཤམས༔ ཞལ་ཐང་སོགས་ཡོད་ན་བཤམས༔ མེད་ན་ཕུགས་གཏོར་རྩེར་མདུན་བསྐྱེད་བསྒོམ༔ རྣལ་འབྱོར་པ་དཀར་གཏོར་དུས་སྤྱན་རས་གཟིགས་སོགས༔ ལྷ་ཞི་བའི་བསྐྱེད་རིམ་སྐད་ཅིག་གིས་བསྒོམ་པ་དང་ལྡན་པས༔ དཀར་གཏོར་བསྔོའོ༔ བདེ་བའི་སྟན་ལ་འདུག་སྟེ་ཞེས་པ༔ སྒྲུབ་པ་མ་གྲོལ་བར་དུ་གདན་འགུལ་བ་དང་སྤྲུགས་པ་མི་རུང་ངོ་༔ དེའི་ཕྱིར་སྟན་བདེ་བར་བཤམས༔ གོས་དང་མལ་སྟན་སྤོས་ཀྱིས་བདུག༔ སྐྱབས་འགྲོ་སེམས་བསྐྱེད་ཐུགས་སྒྲུབ་ལྟར་རམ༔ སྔོན་དུ་སྤྱི་འགྲོ་ད་ནངས་སོང་བས་ཡང་དེས་འཐུས༔ ལ་ལས་པད་གླིང་དྲག་པོ་ནས་ཉུང་བསྡུས་སབ་སྲོལ་ཡང་འདུག༔ འབྱུང་གཏོར་བཏང་ལུ་ཞེས་པ༔ བགེགས་གཏོར་སྤྱི་མཚམས་བཏང་སྟེ༔ མཚམས་བསྡམས་ན་དང་པོ་དཀར་བགེགས་རྒྱས་པར་བཏང་ལ་རྒྱུན་དུ་མི་
དགོས༔ བསྐང་བ་ཟློག་པ་དུས་ཀྱང་དེ་དང་འདྲ༔ རྒྱུན་ཁྱེར་ལ་ནི་སྐྱབས་སེམས་ཡང་ད་ནངས་སྤྱི་མཚམས་སོང་བས་འཐུས༔ སྔོན་འགྲོ་སྟ་གོན་གྱི་རིམ་པའོ༔ དེ་ནས་བགེགས་ལ་བཀའ་བསྒོ་བ་ནི༔ འདི་མན་ཆད་རྙིང་མ་གྱེར་སྒོམ་ཡིན་པས་དལ་བུས་དབྱངས་དང་བཅས་ཏེ༔ ཧཱུྃ༔ ཞེས་ཐུགས་སྲོག་བརྗོད་པས་རང་ཉིད་འགུར་དྲག་ཞལ་གཅིག་ཕྱག་གཉིས་པ་ཡིན་པའི་ང་རྒྱལ་ནི་ཤིན་ཏུ་བརྟན་པས་ཁྲོ་བོའི་རྒྱལ་པོ་ཤིན་ཏུ་འཇིགས་པའི་སྐུར་བསྒོམས་ལ༔ གསུང་འབྲུག་སྒྲ་ལྟ་བུས་ཉོན་ཅིག་ཅེས་དཔུང་བཟང་གི་རྒྱུད་ལས་གསུངས་པའི་བགེགས༔ སྒྲུབ་པ་ལ་མི་དགའ་ཞིང་གླགས་ཚོལ་བ་བྱེ་བ་ཕྲག་བདུན༔ ཝ་ཡི་རིགས་བྱེ་བ་བཅོ་བརྒྱད༔ གཙུག་ཕུད་ཅན་བྱེ་བ་ཕྲག་དྲུག་ཅུ༔ ནེའུ་ལེའི་རིགས་ཁྲི་ཕྲག་བྱེ་བ་ཐེར་འབུམ༔ མེ་ཏོག་བདུག་སྤོས་མར་མེ་གསུམ་ལ་འཇུག་པའི་བགེགས་དཔུང་བཟང་གིས་ཞུས་པ་ལས་གསུངས་པའི་བགེགས་ཀྱི་རིགས་མང་པོ་དང་༔ རིག་པ་མཆོག་གི་རྒྱུད་ལས་གསུངས་པའི་ལོག་འདྲེན་པའི་སྤྱི་ཕུད་སོགས༔ ལོ་སྟོང་དུ་བསྒྲུབས་པའི་བསོད་ནམས་དང་༔ སྔགས་ཀྱི་ནུས་པ་མེད་པར་བྱེད་པ༔ གསང་སྔགས་རྙིང་མའི་རྒྱུད་ནས་
གསུངས་པའི་སྒྲུབ་པ་བྱེད་པ་ལ་ཞག་རེ་ལ་དུས་བཅུར་ཉུལ་ནས་བར་ཆད་བྱེད་པ་བཅུ་སོགས་ལོག་འདྲེན་ཀྱི་ཚོགས་ཁྱེད་རྣམས༔ དུ་དྲག་པོའི་སྐུར་གསལ་བའི་བཀའ་ལས་འདའ་བར་མ་བྱེད་ཅིག༔ གལ་ཏེ་བདག་ཁྲོ་རྒྱལ་འབར་བའི་བཀའ་བསྒོས་པ་འདི་ལས་ནི༔ བགེགས་དང་ལོག་འདྲེན་འབྱུང་པོ་གཱང་ཞིག་གིས་འདའ་བར་བྱེད་པ་ན༔ ཁྱེད་རྣམས་སུམ་ཅུ་རྩ་གསུམ་གྱི་ལྷ་རྣམས་ཀྱིས་ཀྱང་ཟློག་པར་མི་ནུས་མོད་ཀྱི༔ སྟོང་གསུམ་འཇིག་རྟེན་གྱི་ཁམས་འདི་ན་སྟོབས་དང་དྲག་ཤུལ་ཆེ་བ་དབང་ཕྱུག་ཁྲོས་པའི་དྲག་པོ་འཇིགས་བྱེད་ནག་པོ་ནི་དྲག་པོ་ཆུང་ངུ་ཙམ་ཡིན་ལ༔ དེ་ལས་ཀྱང་སྟོབས་ཤུགས་ཆེ་བ་དྲག་པོ་ཆེན་པོ་དྲག་ཤུལ་བསམ་གྱིས་མི་ཁྱབ་པ་ཅན༔ སྐུ་མདོག་དམར་ནག་མེའི་ཕྲེང་བ་ཅན་འཕྲོས་པའི་ཚུལ་བསྟན་ནས་ནི༔ སྤྲུལ་པའི་ཁྲོ་བོ་རང་འདྲ་བའི་ཚོགས་ཀྱིས་ནཱམ་མཁའ་གང་༔ ཁྲོ་མོ་ཁྲོས་མ་ནག་མོའི་ཚོགས་ཀྱིས་ས་གཞི་གང་༔ བགེགས་དང་ལོག་འདྲེན་གྱི་ཚོགས་ཡེ་ཤེས་ཀྱི་མེས་བསྲེགས་ནས༔ ལུས་ངག་ཐལ་བ་རྡུལ་ཕྲན་བཞིན་དུ་བརླག་སྟེ། འཇིག་རྟེན་འདིར་ཁྱེད་ཅག་མིང་ཡང་གྲག་པར་མི་འགྱུར་བའི་ཕྱིར་ནཱ༔ དེ་བས་ད་ལྟ་ཉིད་དུ་
དཔག་ཚད་རྒྱང་གྲགས་སུ་ཡང་མ་གནས་པར་ཕྱིར་དེངས་ཤིག༔ ཅེས་པའི་གསུངས་བགེགས་ཐམས་ཅད་ཀྱི་ཐོས་པར་བསྒོམས་ལ༔ ཕྱག་ན་རྡོ་རྗེ་ཁམས་གསུམ་རྣམ་རྒྱལ་ཞལ་བཞི་དང་ལྡན་པའི་སྔགས༔ ཧཱུཾ་བཞིས་ཕྱོགས་བཞིའི་བགེགས་མི་འགྲོ་བ་དེ་དག་རང་དབང་མེད་པར་བསྙད་པར་བསྒོམ་ཞིང་༔ ཨོཾ་དང་ཧཱུཾ་གཉིས་ལ་འཇུག་སྒོ་མང་སྟེ༔ རྒྱུད་ཀྱི་རྒྱལ་པོ་རྡོ་རྗེ་རྩེ་མོ་ལས༔ ཨོཾ་ནི་ཅི་ཞིག་ཡིན་པར་བརྗོད༔ མཆོག་དང་ནོར་སྟེར་དཔལ་དང་གཡང་༔ བསྐལ་བཟང་རྣམ་པ་དང་ལྡན་ཞིང་༔ དམ་བཅའ་བ་དག་བཀྲ་ཤིས་དོན༔ ནོར་བུ་འཛིན་པའི་སྙིང་པོ་ཡིན༔ ཡི་གེ་ཧཱུཾ་ནི་ཅི་ཡིན་བརྗོད༔ སྡུག་བསྔལ་འཆོས་ཤིང་འཇོམས་པར་བྱེད༔ སྲིད་པའི་ཞགས་པ་གཅོད་བྱེད་ཅིང་༔ གདུག་པ་བསྔངས་ཤིང་གཅོད་བྱེད་པའི༔ ཧཱུྃ་ནི་མཆོག་ཏུ་དྲན་པར་བྱ༔ ཞེས་གསུངས་པས་སྐབས་ཐོག་དང་སྦྱར་དགོས༔ འདིར་ཨོཾ་ནི་ཡེ་ཤེས་ལྔ༔ གནོད་མཛེས་དང་༔ ངེས་པར་གནོད་མཛེས་ནི་ཕྱག་རྡོར་གྱི་མཚན་ཡིན་པས༔ འདིའི་སྐབས་ཀྱི་ཧཱུྃ་ནི་གདུག་པ་ཅན་སྔངས་བར་གྱིས༔ ཕཊ་ནི་ཚར་གཅོད་ཟེར་བ་སྟེ༔ སུམ་བྷ་ནི་སུམ་བྷ་གནོད་མཛེས་ངེས་པར་
གནོད་མཛེས༔ བྷིནྡྷ་བྷིནྡྷ་ཟུང་ཟུང་༔ བྷིསྭཱ་པ་ཡ་གྷིནྡྷ་པ་ཡ་འཛིན་པར་གྱིས་འཛིན་པར་གྱིས༔ ཨཱ་ན་ཡ་ཧོ༔ བྷ་ག་ཝཱན་བིཅུ་རཱ་ཛ་ཁུག་ཅིག་བཅོམ་ལྡན་རྣམ་པར་རྒྱལ༔ ཀྲོ་ཏཱ་ཡ་ཧཱུྃ་ཕཊ་ནི༔ ཁྲོ་མཆོག་གི་མཚམས་ཆོད་ཅིག་ཅེས་པའོ༔ ཞེས་བཀའ་བསྒོས་ནས་བགེགས་ཕལ་ཆེར་འགྲོ་ལ༔ གལ་ཏེ་གདུག་པ་ཅན་འགའ་ཞིག་མི་འགྲོ་ན༔ ཁྲོ་ཆེན་འབར་བའི་ཏིང་ངེ་འཛིན་གྱིས་མཚམས་གཅོད་པ་ནི༔ ཧཱུྃ་ཞེས་བརྗོད་པ་ཙམ་གྱིས་བདག་ནི་གུ་རུ་དྲག་པོའི་སྐུ་ལས་ཡེ་ཤེས་ཀྱི་མེ་འབར་བ༔ ཁམས་ག༔ སུམ་དབང་དུ་བསྡུས་པའི་དབང་གི་བདག་ཉིད་ཅན་དེ་ཁྲོས་པའི་ཚུལ་བསྟན་པའི་ངང་ལས༔ སྐུ་ལས་ཁྲོ་བོའི་ཚོགས་དང་མཚོན་ཆ་སྣ་ཚོགས་ཀྱི་ཆུར་སེར་རྒོད་བབ་པ་ལྟར་འཕྲོས་ཏེ༔ དེ་ཡང་རྡོ་རྗེ་ཁ་གདེངས་བ༔ འཁོར་ལོ་དམ་བཅའ་བཞི་ལྡན༔ རལ་གྲི་བསམ་ཆོད༔ ཕུར་བུ་མེ་འབར་བ་དང་རྒྱ་གྲམ་ཁ་གདེངས་བ༔ མེ་དཔུང་དང་ཁྲོ་བོའི་ཚོགས་རླུང་ལྟར་དུ་འཚུབུ༔ གློག་ལྟར་དུ་འཁྱུགས༔ སྟེང་དང་༔ འོག་དང་༔ ཕྱོགས་བཞི་དང་མཚམས་ཀུན་ཏུ་ཁྱབ་པར་བསྒོམས་ནས༔ ད་ནི་སྲུང་འཁོར་སྒོམ་པ་འདི་ལ༔ བདུད་དང་
བདུད་ཀྱི་སྡེ་དང་བདུད་ཀྱི་དཔུང་དང་བཅས་པ་མ་རུངས་པ་གདུག་པའི་གཟུགས་ཅན་གྱི་ཚོགས་ཐམས་ཅད་སྲུང་བའི་འཁོར་ལོ་སྒོམ་ཞིང་མཚམས་བཅད་པ་ཚུན་ཆད་ཀྱི་ནང་འདིར་ཁྱེད་ཅག་འདུག་པའི་གནས་མེད་ཀྱིས་མ་འདུག་ཅིག༔ གསང་བའི་སྔགས་དང་ཕྱག་རྒྱ་ཏིང་ངེ་འཛིན་གྱི་འོད་ཟེར་གྱིས་དཀྱིལ་འཁོར་འདི་ལ་འདས་ན༔ ཡེ་ཤེས་ཀྱི་རྡོ་རྗེས་མགོ་བོ་དུམ་བུར་འགེམས་ཤིང་དམྱལ་བ་ཆེན་པོར་ལྟུང་བས༔ དེང་ཕྱིན་ཆད་འདའ་བར་མ་བྱེད་ཅིག༔ ཅེས་བགེགས་བསྐྲད་པ་དེ་དག་སྲུང་འཁོར་སྒོམ་པའི་ཚུན་ཆད་དུ་མི་འོང་བར་བཀའ་བསྒོས་ནསཿ༔ ཁྲོ་ཚོགས་མེ་དཔུང་མཚོན་ཆ་དེ་དག་ཚུར་འདུས་ནས་སྲུང་བའི་འཁོར་ལོ་སྒོམ་སྟེ༔ སྟེང་འོག་ཐམས་ཅད་རྡོ་རྗེའི་གུར་ས་གཞི་སྲུབ་མེད་པ༔ དེ་རྒྱབ་སྟེང་གསེར་གྱི་འཁོར་ལོ་རྩིབས་སྟོང་ཐུར་དུ་སྦུབ་པ་གཡས་སུ་འཁོར༔ འོག་ལྕགས་ཀྱི་འཁོར་ལོ་རྩིབས་སྟོང་གྱེན་དུ་ཁ་ཟེད་པ་གཡོན་དུ་འཁོར་བ༔ དེ་གཉིས་སོ་འཐབ་ཀྱི་བར་དུ་གནོད་བྱེད་དྲུག་ཧྲུག་གཏུབ་པ༔ དེ་རྒྱབ་རལ་གྲི་དང་༔ ཆུ་གྲི་དང་སྤུ་གྲི་དང་དགྲ་སྟ་དང་དབྱུག་པ་དང་༔ ཐོ་བ་ལ་སོགས་པ་རྩེ་ཕྱིར་བསྟན་ནས་རྩ་བ་གཅིག་ཏུ་གྱུར་པ་གཡས་ཕྱོགས་སུ་འཁོར་
བ༔ དེའི་རྒྱབ་ཏུ་རྡོ་རྗེ་རྒྱ་གྲམ་ཁ་གདེངས་བ་གསོར་ལྟར་འཁོར་བ་ཆེན་པོ་བཞི་རེའི་བར་དུ་ཆུང་ངུ་རེ་འཁོར་བས་བར་མཚམས་མེད་པར་འཁོར་བ༔ དེའི་རྒྱབ་ཏུ་ཕུར་པ་དབལ་ཕྱིར་བསྟན་པའི་གུར༔ དེ་རྒྱབ་མེ་ཁ་དོག་ལྔ་ལྡན་གྱི་གུར་སྲུབ་དང་བར་མཚམས་མེད་པ་སྒོ་ང་ལྟ་བུ༔ དེ་ལྟར་སྲུང་འཁོར་དྲུག་རིམ་གྱི་བར་མཚམས་རྣམས་སུ༔ འཆོལ་བའི་ཁྲོ་ཆུང་སྨུག་ནག་མཚོན་ཆ་སྣ་ཚོགས་ཐོགས་ཤིང་སྐར་ལྟར་འཁྲུག་ཅིང་རླུང་ལྟར་འཚུབ་པར་བསྒོམ༔ དེ་ལྟར་སྲུང་འཁོར་གྱི་ཏིང་ངེ་འཛིན་དེ་སྔགས་ཀྱི་བསྟན་པར་བྱ་བ་ནི༔ ཨོཾ་ཡེ་ཤེས་ལྔ༔ བཛྲ་རྡོ་རྗེ༔ ཙཀྲ་འཁོར་ལོ༔ ཏིག་རྣ་མཚོན་ཆ་ཀརྨ་ནི་ལས་ཏེ་རྒྱ་གྲམ༔ ཀཱི་ལ་ཡ་ཕུར་པ༔ ཛྭ་ལ་རཾ་རཾ་མེ་དཔུང་༔ བཛྲ་བྷི་ཤྭ་ཀྲོ་དྷ་ནི༔ རྡོ་རྗེ་ཁྲོ་བོ་སྣ་ཚོགས༔ ཛཱ་ལ་མ་དྷ་ལ་ཧཱུྃ་ཕཊ་ནི་འབར་བའི་དཀྱིལ་འཁོར་མཆོག་གིས་མཚམས་ཆོད༔ དེ་ནས་སྒྲུབ་པའི་དམ་བཅའ་བརྟན་པོར་བཟུང་བ་ནི༔ ཐུགས་སྲོག་ཧཱུྃ་གིས་ཚིག་མགོས་དྲངས་ཏེ༔ དུས་གསུམ་གྱི་བདེ་བར་གཤེགས་པ་ཐམས་ཅད་རྒྱལ་བ་འདུས་པའི་ངོ་བོ༔ ཞི་བ་ཆོས་སྐུ་སྣང་བ་མཐའ་ཡས༔ དེ་ནི་རང་གི་སེམས་ཉིད་ངོ་བོ་སྟོང་པ༔
ཁྲོ་བོ་དྲག་པོ་རིགས་ལྔ་སོགས་ལྷ་ཚོགས་མ་ལུས་པ་རྣམས་ནི༔ ཐམས་ཅད་ཆོས་ཀྱི་དབྱིངས་ནས་ཡེ་ཤེས་ལྔ་ཡི་རང་གཟུགས་ཤར་བ་སྟེ༔ དེ་ཐམས་ཅད་རིག་པའི་ཀློང་དུ་མ་བཅོས་ལྷུན་གྲུབ་ཏུ་རང་ལ་རྫོགས་ནས་འདུག་པའི་ཕྱིར༔ གནད་ཀྱི་གསང་འདི་བདག་གིས་མཐོང་ཕྱིར༔ ད་ནི་ནམ་ཡང་འདི་ལས་མི་འདའ་བའི་རྡོ་རྗེའི་དམ་ཚིག་བཟུང་བར་བྱའོ་བསམས་ལ༔ དམ་བཅའ་བརྟན་པའི་སྔགས༔ ཙིཏྟ་བཛྲ་ཧཱུྃ་ནི་མཆོག་གི་རྡོ་རྗེའི་སྙིང་པོ༔ ས་མ་ཏི་ཛ་ཧཱུྃ་ཏིང་ངེ་འཛིན་མཆོག་ཁུག༔ དེ་ནས་བྱིན་དབབ་པ་ནི༔ ཤ་ཆེན་དང་གུ་གུལ་སོགས་བསྲེགས་ན་བགེགས་འབྲོས་ཤིང་ལྷ་འབྱོན༔ རྔ་དུང་སོགས་རོལ་མོ་བསྒྲག་པ་ནི་བྱིན་དབབ་ཀྱི་རྫས་ཡིན༔ དད་མོས་གདུང་ཤུགས་དྲག་པོས་གྱེར་དབྱངས་འཐེན་ཅིང་༔ ཧཱུྃ་ཞེས་ཐུགས་སྲོག་ནས་བོས་ཏེ༔ སྟེང་ཕྱོགས་དུར་ཁྲོད་མེ་རི་འབར་བ་ཞེས་ཀྱང་བྱ༔ མགོན་པོའི་སྤྱི་རྒྱུད་ཁྲག་མཚོ་ཁོལ་ཆེན་ནས༔ རྣམ་པར་སྣང་མཛད་ཀྱི་དུར་ཁྲོད་ཅེས་ཀྱང་བཤད་དེ༔ དེ་ན་དབང་དྲག་རོལ་པའི་དཀྱིལ་འཁོར་ཏེ༔ ཁྲོ་བོའི་དཀྱིལ་འཁོར་དངོས་སུ་ཡོད་པ་ནི་ཁྲོ་བོའི་དཀྱིལ་འཁོར་ཆེན་པོ་དེ་ནས༔ སངས་རྒྱས་ཐམས་ཅད་
ཐུགས་ཆོས་ཉིད་ཞི་བའི་ངང་ལས་ནམ་ཡང་མ་གཡོས་ཀྱང་༔ བདུད་དང་ལོག་འདྲེན་གདུག་པ་ཅན་འདུལ་བའི་ཕྱིར་དུ༔ འབར་བའི་ཚོགས་ཁྱེད་རྣམས༔ ཁྲོ་བོ་ཆེན་པོ་སྐུ་ལས་ཡེ་ཤེས་ཀྱི་མེ་སྔོན་གྱི་ཐུགས་བསྐྱེད་དང་སྨོན་ལམ་ཐུགས་རྗེའི་དབང་གིས་གནས་འདིར་གཤེགས་སུ་གསོལ༔ དབང་གིས་རྒྱུད་སྨིན་དམ་ཚིག་དང་ལྡན་པའི་སྤྲུལ་ལྡན་བདག་ཅག་རྣམས་ཀྱིས་སྒྲུབ་པ་བྱེད་པའི་དཀྱིལ་འཁོར་དང་རྫས་འདི་རྣམས་ལ༔ སྐུ་གསུང་ཐུགས་ཀྱི་སྒོ་ནས་བྱིན་རླབས་ཆེན་པོ་དབབ་ཏུ་གསོལ༔ བདག་སྒྲུབ་པ་པོ་རྣམས་ལ་ཡང་ཡེ་ཤེས་ལྔ་ཡི་དབང་མཆོག་དམ་པ་བསྐུར་དུ་གསོལ༔ ཁྱེད་རྣམས་ལ་ཚད་མེད་པའི་ཐུགས་རྗེ་ཆེན་པོ་མངའ་བས༔ དབང་བཅུའི་དབང་དང་སྟོབས་བཅུའི་སྟོབས་མངའ་བས༔ བདག་ཅག་ལས་འཕྲོ་ཡོད་མེད་སོགས་ལ་མ་ལྟོས་པར༔ དུས་འདིར་ད་ལྟ་ཉིད་དུ་བྱིན་རླབས་དངོས་གྲུབ་ཐམས་ཅད་བསྩལ་དུ་གསོལ༔ ཞེས་གསོལ་བ་བཏབ་པས་སྟེང་ཕྱོགས་མེ་རི་འབར་བའི་ཞིང་ཁམས་ནས་ཡེ་ཤེས་ཀྱི་ཁྲོ་བོ་ཁྲོ་མོ་ཐམས་ཅད་ཀྱི་སྐུ་ལས་འོད་ཀྱི་ཐིག་ལེ་ཁ་དོག་སྣ་ཚོགས་ཆར་ལྟར་བབས་ནས༔ བདག་དང་དཀྱིལ་འཁོར་
སྒྲུབ་རྫས་རྣམས་ལ་ཐིམ་པར་བསྒོམས་ལ་བྱིན་འབེབས་ཀྱི་སྔགས་བརྗོད་དེ༔ གུ་རུ་དྷེ་ཝ་དྷཀྐི་ནཱི་ས་མ་ཡ་ནི་བླ་མ་ཡི་དམ་མཁའ་འགྲོའི་དམ་ཚིག༔ རུ་ལུ་རུ་ལུ་ཧཱུྃ་བྷྱོ་ཧཱུྃ་ནི་ཁྲག་འཐུང་ཁྲོ་བོའི་ལྷ་ཚོགས་ཐམས་ཅད་ཀྱི་སྙིང་པོ༔ ཨཱ་ཝེ་ཤ་ཡ་ནི་འབེབས་པ༔ ཨ་ཨཱ་ནི་སྐྱེ་བ་མེད་པ༔ དེ་ནས་མཆོད་པ་བྱིན་གྱིས་བརླབ་པ་ནི༔ བསང་ཆུ་གཏོར་ཟེར་བ་དུང་ཆོས་ཀྱི་ཆུས་བྲན་པར་བཤད་པ་དང་༔ ཆུ་གཉིས་བར་གྱི་ཆང་ཞེས་པ་དང་པོ་ཆུ་གཙང་༔ དེ་ནས་ཆང་དེ་ནས་ཡང་ཆུས་བྲན་སྲོལ་ཡང་འདུག༔ མཆོད་རྫས་དངོས་པོར་འཛིན་པ་ཐམས་ཅད་སྟོང་པར་བསམས་ལ། ཨོཾ་སྭ་བྷ་ཝ་ཤུདྡྷསརྦ་དྷརྨཱསཱ་བྷ་ཝ་ཤུདྡྷོཉཧཾ༔ དེ་བོད་སྐད་དུ་བསྒྱུར་ན༔ ཨོཾ་རང་བཞིན་གྱི་རྣམ་པར་དག་པའི་ཆོས་ཐམས་ཅད་རང་བཞིན་གྱིས་དག་པའོ༔ དེ་ནས་བདུད་རྩིས་བྱིན་གྱིས་བརླབ་པ་ནི་ཨོཾ་བརྗོད་པས་སྟོང་པར་གྱུར༔ ཨཱབརྗོད་པས་རླུང་མེ་ཐོད་སྐྱེད་ཀྱི་སྟེང་དུ་ཀ་པཱ་ལ་ཡངས་ཤིང་རྒྱ་ཆེ་བར༔ ཧཱུྃ་བརྗོད་པས་ཤ་ལྔ་བདུད་རྩི་ལྔའི་ཡེ་ཤེས་ལྔ་ཞུ་བ་བདུད་རྩིའི་རྒྱ་མཚོ་ཆེན་པོར་གྱུར༔ དེ་ནས་སྔགས་འདིས་བྱིན་གྱིས་བརླབས་ཏེ་མ་ཧཱ་སརྦ་པཉྩ་ཨ་མྲྀ་ཏ་ཧཱུྃ་ཧྲི་ཏྟཱ༔ སྔགས་འདིས་དོན་
འགྱུར་ནི༔ བདུད་རྩི་ལྔ་ཐམས་ཅད་བདུད་རྩི་ཆེན་པོ་མཆོག་གི་སྙིང་པོར་བྱིན་གྱིས་བརླབས་སོ༔ དེ་ནས་གཏོར་མ་བྱིན་གྱིས་བརླབ་པ་ནི༔ ཨོཾ་བརྗོད་པས་སྟོང་པར་གྱུར༔ ཨཱབརྗོད་པས་བྷནྡྷ་ཕྱི་དཀར་ལ་ནང་དམར་བ་སྟོང་གསུམ་དང་མཉམ་པ༔ ཧཱུྃ་བརྗོད་པས་གཏོར་མ་ངོ་བོ་ཤ་ལྔ་བདུད་རྩི་ལྔའི་རྣམ་པ་དཔལ་གྱི་གཏོར་མ་རི་རབ་ཙམ༔ རླངས་པ་མཆོད་པའི་སྤྲིན་ཕུང་དཔག་ཏུ་མེད་པ་འཕྲོ་བར་བསྒོམས་ལ༔ མ་ཧཱ་བ་ལིཾ་ཏ་ཏེ་ཛཱ་བ་ལིཾ་ཏ་བ་ལ་བ་ཏེ་གླུ་ཧུ་ཧྲི་ཤུ་ས་མ་ཡེ་ཧཱུྃ་སྭཱ་ཧཱ༔ འདིའི་ཏེ་ཛུ་དང་བ་ལ་བ་ཏེ༔ བོད་སྐད་དུ་ཅིར་འགྱུར་གྱིས་གསལ་ཆ་མ་མཐོང་༔ དོན་འགྱུར་གྱི་དབང་དུ་ནི༔ མཆོག་གི་དམ་ཚིག་སྣ་ཚོགས་སྙིང་པོ་གསང་བའི་དམ་རྫས་གསང་བའི་གཏོར་མ་ཆེན་པོ་འབར་བས་གཞི་ཚུགས་ཞེས་པའོ༔ རཀྟ་བྱིན་བརླབ་ནི༔ ཨོཾ་བརྗོད་པས་སྟོང་པར་བསམ༔ ཨཱབརྗོད་པས་བྷནྡྲ་ལྕང་ལོ་ཅན་ཡངས་ཤིང་རྒྱ་ཆེ་བར༔ ཧཱུྃ་བརྗོད་པས་རིགས་དྲུག་འཁོར་བའི་རྒྱུ་ཁྲག་གི་རྒྱ་མཚོ་མ་ཧཱ་རཀྟ་ཛྭ་ལ་མཱ་དྷུ་ལ་ཧཱུྃ་ཧཱིཋཱ༔ ཞེས་བརྗོད་པས་དུག་གསུམ་འཇོམས་པའི་རཀྟ་འཁོར་བའི་རྒྱ་མཚོ་སྟོང་བྱེད་དུ་བསམ་སྟེ༔ སྔགས་དོན་ནི་ཁྲག་ཆེན་
འབར་བའི་དཀྱིལ་འཁོར་མཆོག་གི་གྱུར་ཅིག༔ དེ་ནས་དབང་པོ་ལྔའི་མེ་ཏོག་དང་ཐོད་རྔ་སོགས་སྐུ་གསུང་ཐུགས་ཀྱི་རིག་མ་ལ་སོགས་རེ་རེ་ལ་ཡང་གྲངས་མེད་པར་འཕྲོས་པར་བསམས་ལ༔ ཨོཾ་བྷོ་དྷི་ཙིཏྟ་གྷ་ན་གྷ་ཡ་ས་མ་ཡ་ཧཱུྃ༔ སྔགས་དོན་ནི༔ ཡེ་ཤེས་བྱང་ཆུབ་སྙིང་པོའི་ཚོགས་གསང་བའི་དམ་ཚིག་མཆོག་ཏུ་གྱུར་ཅིག༔ དེ་ནས་མེ་ཏོག་མ་མེ་ཏོག་འཛིན་པ་སོགས་མཆོད་པའི་ལྷ་མོ་རྣམས་རང་རང་གི་ཕྱག་མཚན་ཐོགས་པ་དེ་དག་སངས་རྒྱས་ཀྱི་ཞིང་ཐམས་ཅད་ཁྱབ་པར་འཕྲོ་བར་བསྒོམས་ལ༔ ཨོཾ་བཛྲ་པུཥཱི་དྷུ་པེ་ཨཱ་ལོ་ཀེ་གྷནྡྷེ་ནེ་ཝིདྱ་ཤབྡ་ཨཱཿཧཱུྃ༔ སྔགས་དོན་ནི་ཡེ་ཤེས་ཀྱི་རྡོ་རྗེའི་མེ་ཏོག་བདུག་སྤོས་མར་མེ་དྲི་ཆབ་ཞལ་ཟས་མཆོག་ཏུ་བྱིན་གྱིས་རློབས་ཞེས་པའོ༔ ཨོཾ་བཛྲ་ཤབྡ་སརྦ་པཱུ་ཙ་ཨཱཧཱུྃ༔ འདིའི་སྐབས་སུ་རོལ་མོ་བྱ་སྟེ༔ ཞེས་ཕྱི་ནང་གསང་གསུམ་བྱིན་གྱིས་བརླབས་པའོ༔ ཨོཾ་བཛྲ་ཤབྡ་ནི་ཡེ་ཤེས་ཀྱི་རྡོ་རྗེའི་རོལ་མོ༔ སརྦ་པཉྩནི་ནང་མཆོད༔ པུ་ཙ་ནི་མཆོད་པ་ཐམས་ཅད་དང་ཕྱི་མཆོད༔ ཨཱཧཱུྃ་ནི་ཟག་མེད་མཆོག་ཏུ་བྱིན་གྱིས་བརླབས་པའོ༔ དེ་ནས་དཀྱིལ་འཁོར་འགའ་ཞིག་ལ་རྡོར་སེམས་སྒོམ་བཟླས་བྱ་བའི་ཚབ་བཤགས་པ་བྱ་བ་ནི་
སྡིག་པ་བཤགས་པའི་རྟེན་གྱི་སྟོབས་སོ༔ ཧཱུྃ་ཞེས་ལྷའི་སྙིང་པོའི་ཐོག་དྲངས་ཏེ་སངས་རྒྱས་ཀུན་གྱི་ཐུགས་རྗེ་ལྷག་པའི་ལྷ་ནི་སྤྱན་རས་གཟིགས༔ ཁྱད་པར་སྙིགས་མའི་དུས་འདིར་མཆོག་ཏུ་ཐུགས་རྗེ་ཆེ་བ་པདྨ་འབྱུང་གནས༔ དེ་ཡང་དབང་དྲག་ཁྲོས་པའི་སྐུ་བཞེངས་པ༔ དཀྱིལ་འཁོར་གྱི་ལྷ་ཚོགས་རྣམས་ལ་སྙན་གསན་ཕབ་ནས༔ བདག་ཅག་འཁོར་བ་ཐོག་མ་མེད་པའི་དུས་ནཱས༔ རང་གི་སེམས་ཉིད་ཆོས་སྐུ་རྗེན་པ་ཡིན་ཀྱང་༔ དེ་རང་ངོ་རང་གི་མ་ཤེས་པས༔ མཐའ་མེད་འཁོར་བར་འཁྱམས་པའི་ཚེ༔ མ་རིག་འཁྲུལ་པའི་དབང་གི་ལས༔ མི་དགེ་བཅུ་དང་མཚམས་མེད་པ་ལྔ་དང་༔ དེ་དང་ཉེ་བ་ལྔ་སོགས་རང་བཞིན་གྱིས་ཁ་ན་མ་ཐོ་བའི་སྡིག་པ་དང་༔ ཡང་བསྟན་པའི་སྒོར་ཞུགས་ཀྱང་བག་མེད་པའི་དབང་གིས༔ སོ་སོར་ཐར་པའི་སྡོམ་པ་དང་འགལ་བ་དང་༔ བྱང་ཆུབ་སེམས་དཔའི་བསླབ་བྱ་དང་འགལ་བ་དང་༔ གསང་སྔགས་ཀྱི་དམ་ཚིག་དང་འགལ་བ་ཅི་བགྱིས་པ་ཐམས་ཅད་ཡིད་ལ་དམིགས་ཏེ༔ དེ་རྣམས་རྣམ་པར་སུན་འབྱིན་པའི་སྟོབས་ནི་དེ་དག་ལ་རང་ངོ་གནོང་ཞིང་དུག་ཁོང་དུ་སོང་བ་ལྟར་འགྱོད་པའི་སེམས་ཀྱིས་མཐོལ་ལོ་
བཤྭགས་སོ༔ ཚེ་འདིའི་བར་ཆད་ཀྱི་རྐྱེན་དུ་མི་འགྱུར་ཞིང་༔ ཕྱི་མ་ས་ལམ་ཐོབ་པ་ལ་སྒྲིབ་པར་མ་གྱུར་ཅིག༔ སྡིག་པ་ཐམས་ཅད་དག་ཅིང་སྡོམ་པ་དམ་ཚིག་རྣམས་ཚང་པའི་དངོས་གྲུབ་བསྩལ་དུ་གསོལ༔ གསེར་འོད་ལས། ལན་གཅིག་རབ་ཏུ་བཤགས་པ་ཡིས། །དེ་དག་ཐམས་ཅད་དག་པར་འགྱུར་གསུངས། །བཛྲ་ས་མ་ཡ་ཤུདྡྷེ་ཨ་ནི༔ རྡོ་རྗེའི་དམ་ཚིག་དམ་པ་སྐྱེ་མེད་ཆོས་ཀྱི་དབྱིངས༔ གཤམཤཱ༔ བརྡའ་ཡིག་འདི་ནི་ཨོ་རྒྱན་མཁའ་འགྲོའི་ཡི་གེ་སྟེ༔ གསང་སྔགས་ཀྱི་ཆོས་ཐམས་ཅད་ཀྱི་འབྱུང་ཁུངས་ནི་མཁའ་འགྲོའི་ཡུལ་ཡིན་ཏེ༔ དེ་ནས་མཁའ་འགྲོའི་བརྡའ་ཡིག་འདི་སྐབས་སྐབས་སུ་ཡོད་པ་རྣམས་ནི་ཁུངས་བཙུན་པར་སྟོན་པ་སྟེ༔ འདི་བཀྲོལ་དགོས་པ་ནི་མ་ཡིན་ནོ༔ དེ་ནས་ཏིང་ངེ་འཛིན་རྣམ་པ་གསུམ་ལས་གསར་མའི་ཆོ་ག་རྣམས་ལ་ཚད་མེད་བཞི་སྒོམ་པའི་དོན་ནོ༔ ཚད་མེད་པ་བཞི་པོ་ཡང་དོན་འདི་ལ་འཐུས་པ་ཡིན་པས༔ དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི༔ ཧཱུྃ་ཞེས་ཡེ་ཤེས་ལྔ་ཡི་ངོ་བོ་མགོས་དྲངས་ཏེ༔ དོན་ཡིད་ལ་བསྒོམ་ཞིང་ཚིག་གིས་གསལ་གདབ་པ་ནི༔ ཆོས་རྣམས་ཐམས་ཅད་ཀྱི་ཆོས་ཉིད་ནི་སྤྲོས་པའི་མཐའ་
ཐམས་ཅད་དང་བྲལ་བ༔ སྨྲ་བསམས་ཀྱང་བརྗོད་དུ་མེད་པ་དེ་ཁོ་ན་ཉིད་ཀྱི་དེ་བཞིན་ཉིད་ཡེ་ནས་མ་བཅོས་པ༔ རང་བྱུང་ཆོས་ཀྱི་སྐུ་དེ་ནི་འཁོར་བར་འཁྱམས་པས་ངན་དུ་མ་སོང་༔ མྱ་ངན་ལས་འདས་ཀྱང་བཟང་དུ་མ་སོང་༔ འཁོར་འདས་མཉམ་པ་ཉིད་དུ་བརྡལ་བ་ཆེན་པོར་ལྷུན་གྱིས་གྲུབ་པའི་ལྟ་བ་འཁོར་འདས་དབྱེར་མེད་གཞི་ཕྱག་རྒྱ་ཆེན་པོ་ཀུན་ཏུ་བཟང་པོའི་དགོངས་པ་དེ་དག་གསལ་བཏབ་ནས་ཨོཾ་དབྱིངས་དང་ཡེ་ཤེས་ཆེན་པོ་རྡོ་རྗེའི་གདོད་ནས་དག་པའོ༔ ཞེས་བྱིན་གྱིས་བརླབས་པ་ལ༔ ཨོཾ་མ་ཧཱ་ཤུ་ནྱ་ཏཱ་ཛཱ་ནཱ་བཛྲ་སྭ་བྷཱ་ཝ་ཤུདྡྷོཉཧཾ༔ གཉིས་པ་ཀུན་ཏུ་སྣང་བའི་ཏིང་ངེ་འཛིན་ནི༔ བརྩེ་བ་སྙིང་རྗེ་ཆེན་པོ་ཡིན་ཏེ་སྙིང་རྗེ་ནི་སྤྲུལ་སྐུ་འབྱུང་བའི་རྒྱུ༔ འབྲུ་གསུམ་གྱི་ནང་ནས་ཧཱུྃ་ནི་སྤྲུལ་སྐུ་འབྱུང་བའི་རྒྱུ༔ ཆོས་རྣམས་ཐམས་ཅད་ནི་ཅི་ཡང་མེད་པའི་སྟོང་པ་ཕྱལ་ཆད་མ་ཡིན་ཏེ༔ ཡེ་ཤེས་ཀྱི་སྙིང་པོ་ཅན་ཡིན་ཡེ་ནུས་ཕུང་པོ་ལྔ་རིགས་ལ༔ ཁམས་ལྔ་ཡུམ་ལྔ་སོགས་ཕྱི་ནང་སྣོད་བཅུད་ཐམས་ཅད་སངས་རྒྱས་ཀྱི་ངོ་བོ་ཉིད་ཡིན་ཀྱང་༔ དེའི་དོན་རང་གིས་མ་ཤེས་པ་དང་༔ ཤེས་ཀྱང་བརྟན་པ་མ་ཐོབ་པས༔ འཁྲུལ་པའི་དབང་གིས་
འཁོར་བ་མཐའ་མེད་དུ་འཁྱམས་པའི་སེམས་ཅན་ཐམས་ཅད་སྙིང་རེ་རྗེ་བསམས་པ་བྱས་ལ༔ དྷརྨ་དྷཱ་ཏུ་སྭ་བྷ་ཝ་ཤུདྡྷོཉཧཾ༔ ཆོས་ཀྱི་དབྱིངས་རང་བཞིན་གྱིས་དག་པའོ༔ གསུམ་པ་རྒྱུ་ཡི་ཏིང་ངེ་འཛིན་ནི༔ རྒྱུ་ཡི་ཡི་གེ་ཧེ་རུ་ཀའི་ས་བོན་ཧཱུྃ་ཡིན་པས་སྣ་དྲངས་ཏེ༔ ཆོས་ཐམས་ཅད་རྟེན་ཅིང་འབྲེལ་བར་འབྱུང་བའི་རྒྱུ་དང་འབྲས་བུའི་ངང་ཚུལ་ཅན་ཏེ་རྒྱུ་ལས་མ་བྱུང་བའི་འབྲས་བུ་ནི་གང་ཡང་མེད་པས༔ རྟེན་འབྲེལ་སྙིང་པོའི་སྔགས་དོན་ཡང་༔ ཆོས་རྣམས་ཐམས་ཅད་རྒྱུ་ལས་རབ་ཏུ་བྱུང་ཞེས་གསུངས༔ དང་པོ་སྟོང་པ་ཉིད་ཀྱི་ཏིང་ངེ་འཛིན་སྒོམ་པས༔ དེ་ལྟར་མ་རྟོགས་པའི་སེམས་ཅན་ལ་སྙིང་རྗེ་ཤུགས་ཀྱིས་སྐྱེ༔ སྟོང་ཉིད་སྙིང་རྗེ་ཟུང་འཇུག་གི་རང་གཟུགས་རང་གི་སེམས་ཉིད་ཧཱུཾ་ཡིག་དམར་པོ་བསྒོམ་པ་ནི༔ གཞལ་ཡས་དང་ལྷ་ཐམས་ཅད་བསྐྱེད་པའི་རྟེན་རྒྱུའི་ས་བོན་ཉིད་ཡིན་ཏེ༔ དེ་ཡང་རང་བྱུང་དུ་ཐིག་ལེ་ཟླ་ཚེས་ཧ་ཁོག་འ་ཆུང་ཞབས་ཀྱུ་ལྔ་ལ་ཡེ་ཤེས་ལྔ་ཚང་བས་སངས་རྒྱས་ཐམས་ཅད་ཀྱི་སྙིང་པོར་བསྒོམས་ལ༔ ཧཱུྃ་ཙིཏྟ་བཛྲ་ས་མ་ཏཱི་ཧཱུྃ༔ ཞེས་བྱིན་གྱིས་བརླབས་ཏེ༔ ཡེ་ཤེས་རྡོ་རྗེའི་སྙིང་པོ་ཏིང་ངེ་འཛིན་མཆོག་ཅེས་པའོ༔ དེ་ནས་རཾ་ཡཾ་ཁྲི་བརྗོད་
པས་འཇིག་རྟེན་འཇིག་པ་དང་སྒོ་བསྟུན་ནས༔ བར་སྣང་དུ་རང་སེམས་རྒྱུའི་ཡི་གེ་ཧཱུཾ་ལས་རཾ་འཕྲོས་པས་མེའི་བསྐལ་པས་འཇིག་རྟེན་གྱི་དངོས་འཛིན་ཐམས་ཅད་བསྲེགས༔ ཡཾ་འཕྲོས་པས་རླུང་གི་བསྐལ་པས་རྣམ་རྟོག་གཟུང་འཛིན་ཐམས་ཅད་གཏོར༔ ཁཾ་འཕྲོས་པས་ཆུའི་བསྐལ་པས་བག་ཆགས་ཞེན་སྣང་ཐམས་ཅད་བཀྲུས༔ དེ་ལྟར་མ་དག་པ་དག་པར་བྱེད་པའི་ཡི་གེ་འབྲུ་གསུམ་འོད་ཟེར་གྱིས་ཕྱི་སྣོད་ཀྱི་འཇིག་རྟེན་གྱི་དངོས་འཛིན་ནང་བཅུད་སེམས་ཅན་གྱི་དུག་གསུམ་གྱི་དྲི་མ་ཐམས་ཅད་རྣམ་པར་དག་ནས་ནམ་མཁའ་སྟོང་པའི་ཀློང་༔ རྣམ་པར་དག་པའི་ཆོས་ཀྱི་དབྱིངས་སུ་གྱུར་པར་བསྒོམས༔ མཁའ་ཀློང་རྣམ་པར་དག་པའི་དབྱིངས༔ དེ་ནས་རང་བྱུང་རྒྱུའི་ཡི་གེ་བར་སྣང་གི་ཧཱུཾ་དེ་ལས༔ ཡེ་ཤེས་ལྔའི་ངང་ལས་ཡུམ་ལྔའི་ངོ་བོ༔ རང་བྱུང་དུ་འབྱུང་བ་ཆེན་པོ་ལྔའི་ས་བོན་ཨེ་ཡཾ་ར་སུཾ་ཀེ་རོ་བྷཾ༔ ཐུར་དུ་ཆད་པས༔ ཨེ་ལས་ནམ་མཁའ་ཆོས་འབྱུང་གྲུ་གསུམ་མཐིང་ནག་གདེང་ཀ་ཆེ་བ་གྱེན་དུ་བསྟན་པ༔ རང་གི་སེམས་ཉིད་རྣམ་པར་དག་པའི་ངོ་བོ་དེ་ལས་ཡཾ་ལས་རླུང་གི་དཀྱིལ་འཁོར་ཟླ་གམ་ལྗང་གུ༔ དབུགས་དག་པའི་ངོ་བོ༔ ར་
ལས་རཀྟའི་རྒྱ་མཚོ་ཟླུམ་པོ་ཁྲག་དག་པའི་ངོ་བོ་བསྟན༔ སུཾ་ལས་གསེར་གྱི་ས་གཞི་གྲུ་བཞི་ས༔ ཤ་རྣམ་པར་དག་པའི་ངོ་བོ༔ ཀེ་ལས་རུས་པའི་རི་རབ་བང་རིམ་བཞི་པ༔ རུས་པ་དག་པའི་ངོ་བོ༔ རཾ་ལས་བསྐལ་པའི་མེ་ཆེན་འབར་བ་དྲོད་དག་པའི་ངོ་བོའི་དབུས་སུ་ཧཱུཾ་ལས་རི་རབ་ཀྱི་སྟེང་དུ་ཡེ་ཤེས་ཀྱི་གཞལ་ཡས་ཁང་ཕོ་བྲང་ཕྱི་ནཱང་གི་བཀོད་པ་ཐམས་ཅད་ཡོངས་སུ་རྫོགས་པ༔ དབུས་སུ་ཆོས་འབྱུང་དམར་པོ་འབར་བ་ཨེ་ཡི་དབྱིབས་ཅན་དབུས་ཀྱི་སྟེང་དུ་སྣ་ཚོགས་པདྨ་དང་ཉི་མ་དམ་སྲི་སྲིན་པོ་ཕོ་མོ་བསྣོལ་བའི་གདན༔ དེའི་ཕྱི་རོལ་དུ་དཀྱིལ་འཁོར་ཟླ་གམ་དམར་པོ་སྒོ་གཅིག་པ༔ དེའི་ཕྱི་རོལ་ཐོད་སྐམ་གྱི་ཕྲེང་བས་བསྐོར་བ༔ དེ་རྒྱབ་རྩིབས་བཞི༔ དེ་རྒྱབ་རྩིབས་བརྒྱད༔ ཕྱི་ནང་གི་ཕྱོགས་བཞིར་རྩིབས་ཕྱོགས་མདོག་དང་༔ མཚམས་བཞི་ལྗང་གུ༔ དེའི་ཕྱི་རོལ་རྩིབས་བཅུ་མཐིང་ག་རྩིབས་མཆན་དམར་པོ༔ དེ་རྒྱབ་ཐོད་སྐམ་གྱི་ར་བ༔ ནང་གམ་གསུམ་དང་༔ རྩིབས་བཞིའི་རྩིབས་མཆན་མཐིང་ག་ཕྱིའི་དཀྱིལ་འཁོར་ནི་གྲུ་བཞི་སྒོ་བཞི༔ རྟ་བབས་བང་རིམ་བཞི་པའི་སྟེང་དུ་གདུགས་དང་ཆོས་འཁོར་རི་དྭགས་ཕོ་མོ་དང་
བཅས་པ༔ རིན་པོ་ཆེ་སྣ་ལྔའི་རྩིག་པ་ལ་ནང་ནས་རིམ་བཞིན་པདྨ་རཱ་ག་དང་བཻཌཱུརྱ་དང་གསེར་དང་ཤེལ་དང་མར་གད་ལས་གྲུབ་པ༔ རྩིག་པ་རེ་ལ་ཞེང་དུ་ཁྲུ་རེ་འཕངས་སུ་འདོམ་ཕྱེད་གསུམ་ལྷགས་པའི་སྟེང་ན༔ ཐོད་པ་སྐམ་རློན་རྙིང་པ་གསུམ་གྱིས་རྩིག་པ་ལ༔ བར་མཚམས་ཁྲག་ཞག་གིས་བསྡམས་ཤིང་༔ གནམ་ལྕགས་འབར་བའི་གཟེར་གྱིས་བསྣམས་པ༔ ལྟ་བརྒྱད་ཀྱི་ཀ་བ༔ ཀླུ་བརྒྱད་ཀྱི་ཀ་གདན༔ ཉི་མ་ཟླ་བ་ལ་སོགས་པའི་གཟའ་ཆེན་པོ་བརྒྱད་ཀྱི་གདུང་མ༔ གཟའ་བྲན་དང་རྒྱུ་སྐར་གྱི་དྲལ་འཕྱམ༔ རུ་ཏྲའི་ཞིང་ལྤགས་ཀྱིས་ཐོག་ཕུབ་པ༔ སྦྲུལ་ནཱག་གི་སྒོ་སྐྱེས་བུར་རིང་པོར་བཙུགས་པ༔ རིན་པོ་ཆེའི་ཕ་གུའི་སྟེང་དུ་མུན་ཁང་ལས་ཆུ་སྲིན་པ་ཏྲའི་ཁ་ནས་བྱུང་བའི་ཐོད་ཚལ་དང་མུ་ཏིག་གི་ཟ་ར་ཚག༔ དྲིལ་བུ་དང་རྔ་ཡབ་མེ་ལོང་དང་ཟླ་བ་རླུང་གིས་བསྐྱོད་པས་བརྒྱན་པ༔ ཐོག་གི་སྟེང་དུ་ཤེལ་གྱི་མཆོད་རྟེན་རྩ་བརྒྱད་ཀྱིས་བསྐོར་བའི་བར་རྣམས་སུ་གདུགས་དང་རྒྱལ་མཚན་དང་བ་དན་དང་རྔ་ཡབ་དང་ཟུར་བཞིར་ཞིང་གི་རྒྱལ་མཚན༔ བྱ་འདབ་ལས་ཐུར་དུ་འཕྱང་བའི་རིན་པོ་ཆེའི་ཤར་བུ༔ སྒོ་ཁང་གི་སྟེང་དུ་ཞིང་ལྤགས་ཀྱི་
རྒྱལ་མཚན་བརྒྱད༔ ཕོ་བྲང་གི་སྟེང་མཆོད་རྟེན་བུམ་པ་སུལ་བརྒྱད་བྲེ་དང་བཅས་པའི་སྟེང་དུ་གདུགས་ཏོག་ཆོས་འཁོར་ཉི་ཟླ་དར་དཔྱང་གིས་སྤྲས་པ༔ ཕོ་བྲང་གི་ཕྱི་རོལ་དུ་ཤར་དུ་དུར་ཁྲོད་ཆེན་པོ་བསིལ་བའི་ཚལ༔ ལྷོར་སྐུ་ལ་རྫོགས་པ༔ ནུབ་ཏུ་ལང་ཀ་བརྩེགས་པ༔ བྱང་དུ་པདྨ་བརྩེགས་པ༔ ཤར་ལྷོར་ལྷུན་གྲུབ་གཏེར༔ ལྷོ་ནུབ་ཏུ་གསང་ཆེན་རོལ་པ༔ ནུབ་བྱང་དུ་ཧེ་ཆེན་གདལ་བ༔ བྱང་ཤར་དུ་འཇིག་རྟེན་བརྩེགས་པ༔ དེ་བརྒྱད་ན་ཤིང་བརྒྱད་ཀྱི་རྩ་བར་ཞིང་སྐྱོང་བརྒྱད་རང་རང་གི་ཕྱག་མཚན་བཞོན་པ་དང་བཅས་པ། ཤིང་བརྒྱད་ལ་གནས་པའི་ཞིང་སྐྱོང་བརྒྱད་ནི༔ ལུས་ཀྱི་སྨད་ཤིང་ལོའི་ནང་དུ་ནུབ་ཅིང་༔ ཁོག་སྟོད་གྲི་གུག་ཐོད་ཁྲག་འཛིན་ཅིང་སོ་སོའི་ཕྱོགས་སྐྱོང་གི་བཞོན་པའི་མགོ་ཅན་ནོ༔ དུར་ཁྲོད་བརྒྱད་དང་ལྡན་པའི་ཁོར་ཡུག་ཏུ་བསྐོར་བའི་བར་མཚམས་བཅད་པའི་ཆུ་བརྒྱད༔ དེ་ལ་གནས་པའི་ཀླུ་བརྒྱད༔ དེའི་སྟེང་གི་ནམ་མཁའ་ལ་སྤྲིན་བརྒྱད་རང་བྱུང་གི་མཆོད་རྟེན་བརྒྱད༔ དེ་ལ་གནས་པའི་མ་མོ་བརྒྱད་ནི་ཀོའུ་རི་མ་བརྒྱད༔ མཆོད་རྟེན་བརྒྱད་ལ་སྐུ་རྒྱབ་གཏད་པའི་གྲུབ་ཐོབ་བརྒྱད་ནི་བཀའ་བརྒྱད་ཀྱི་རིག་འཛིན་བརྒྱད་
ཡིན༔ རང་བྱུང་གི་མེ་བརྒྱད་ལ་གནས་པའི་ཕྲ་མེན་བརྒྱད་ནི་སེང་ཧ་མ་བརྒྱད་དོ༔ གཞན་ཡང་དཔའ་བོ་དང་མཁའ་འགྲོ་མ་དཔག་ཏུ་མེད་པ༔ རོ་ལངས་དང་འདྲེ་དང་སྲིན་པོ་དང་ཤ་ཟའི་ཚོགས༔ བྱ་གཅན་དང་རོ་གསར་རྙིང་དང་ཀེང་རུས་ཀྱི་ཚོགས་དང་བཅས་པའོ༔ པདྨའི་ར་བ་དུར་ཁྲོད་ཀྱི་ཕྱིར་བྱེད་པ་དང་ནང་དུ་བྱེད་པའི་ལུགས་གཉིས་ཡོད་དེ༔ འདིར་དཀྱིལ་འཁོར་གྱི་འོག་ནི་མཚོ་ཡིན་ལ༔ མཚོ་དཀྱིལ་ནས་མེ་ཏོག་པདྨ་འདབ་མ་འབུམ་ལྡན་ཞིག་སྐྱེས༔ དེའི་ཟེའུ་འབྲུའི་སྟེང་ནས་ཉི་མའི་དཀྱིལ་འཁོར་གཅིག་བཀབ་པས༔ ཉི་མ་མེ་ཤེལ་དྭངས་བས་འོག་ཟེའུ་འབྲུའི་མདོག་ལྗང་གུར་གྱུར་པ་ནི༔ དཀྱིལ་འཁོར་གྱི་ཁྱམས་ལྗང་གུར་གྱུར་པ་དེ་ཡིན་ལ༔ དེ་རྒྱབ་པདྨའི་རྭ་བ་ནི་འོག་གི་མེ་ཏོག་དེའི་འདབ་མ་འབུམ་རྣམས་ཡིན་པས༔ དེ་ཅུང་ཞིག་མཐོ་དུར་ཁྲོད་དམའ་བ་སྟེ༔ འོག་མཚོ་ཡིན་པ་ལ༔ སྤང་ཐིག་བརྒྱད་ཡར་བུད་པ་ནི་དུར་ཁྲོད་བརྒྱད༔ ཆུ་བརྒྱད་ནི་གཙང་ལག་བརྒྱད་ཀྱིས་དུར་ཁྲོད་བརྒྱད་ཀྱི་མཚམས་ཕྱེས་པ་ལྟ་བུ༔ དེ་རྒྱབ་རྡོ་རྗེའི་རྭ་བ་ནི་ལྕགས་རི་ལྟ་བུ༔ དེ་རྒྱབ་མེ་རི་ནི་འོད་ཀྱི་ཕྲེང་བ་སྟེ་མེ་ཁ་དོག་ལྔའི་ཕུང་པོ་ཕྲེང་བར་
བསྒྲིགས་པའོ༔ དེ་རྒྱབ་ཏུ་རིན་པོ་ཆེའི་བྲགཱ་རི་ཆེན་པོས་ལྕགས་རི་ལྟར་བསྐོར་བ༔ དེ་རྒྱབ་རི་རབ་ཀྱི་ཟུར་བཞིའི་སྟེང་དུ་གཏེར་གྱི་བུམ་པ་ཆེན་པོ་བཞིའི་ཁ་ནས་སྐྱེས་པའི་དཔག་བསམ་གྱི་ཤིང་ལོ་མ་མེ་ཏོག་རྒྱས་ཤིང་འབྲས་བུ་རིན་པོ་ཆེ་སྣ་ཚོགས་པ་སྨིན་པས་མཛེས་པའོ༔ དེ་ཡང་ཆོ་ག་རྒྱས་པ་རྣམས་ལ་ནི་དང་པོའི་སྲུང་འཁོར་དེ་བསྡུས་ནས་མེད་ཀྱང་འདི་ཆོ་ག་བསྡུས་པ་ཡིན་པས༔ དང་པོ་མཚམས་གཅོད་དུས་ཀྱི་སྲུང་འཁོར་དྲུག་རིམ་དེ་མ་བསྡུས་པར་བཞག་ནས༔ དེའི་ནང་དུ་འབྱུང་བ་རིམ་བརྩེགས་སོགས་བདག་མདུན་རྣམས་སྒོམ་པ་ཡིན༔ དེ་ཡང་མདུན་དུ་དཀྱིལ་འཁོར་རྒྱས་པར་བསམ་ཡོད་ན༔ མདུན་བསྐྱེད་གཙོ་ཆེ་བས་མདུན་བསྐྱེད་ཀྱི་ཤར་སྒོའི་ཁྱམས་སུ་བདག་བསྐྱེད་དཀྱིལ་འཁོར་སྒོམ༔ མདུན་དུ་དཀྱིལ་འཁོར་རྒྱས་པ་མེད་ན་བདག་བསྐྱེད་གཙོ་ཆེ་བས་བདག་བསྐྱེད་ཀྱི་དཀྱིལ་འཁོར་གྱི་ཤར་གྱི་ཁྱམས་སུ་མདུན་བསྐྱེད་ཀྱི་དཀྱིལ་འཁོར་བསྒོམ༔ མདུན་བསྐྱེད་གཙོ་བོའི་མདུན་གཡས་གཡོན་གཉིས་སུ་སྒྲུབ་གཏོར་དཀྱིལ་འཁོར་ཆ་གཅིག༔ བུམ་པའི་ནང་དུ་བུམ་ལྷ་དཀྱིལ་འཁོར་ཆ་གཅིག༔ བུམ་པའི་སྟེང་དུ་ཐོད་པའི་སྟེང་གི་མེ་ལོང་ལ་བུམ་ལྷའི་འོད་ལས་
གྲུབ་པའི་དཀྱིལ་འཁོར་ཆ་གཅིག༔ དེ་ལྟར་སྒྲུབ་པ་དང་དབང་དུས་དཀྱིལ་འཁོར་ཆ་ལྔ་མངོན་རྟོགས་གཅིག་གིས་སྒོམ༔ བསྐང་བ་དང་ཟློག་པའི་དུས་བདག་མདུན་གཉིས་ཀྱིས་ཆོག༔ དེ་ཐམས་ཅད་ཕྱི་ནས་བལྟས་ན་ནང་གསལ་བ་ནཱང་ནས་བལྟས་ན་ཕྱི་གསལ་བའི་སྲུང་འཁོར་གྱི་བར་དུ་ཟང་ཐལ་དུ་གསལ་བ༔ འཇའ་དང་འོད་ཕུང་ཐིག་ལེ་ཐིག་ཕྲན་གྱི་ཀློང་བཀྲག་མདངས་གསལ་ཞིང་དྲི་མ་མེད་པ༔ གདོས་བཅས་མ་ཡིན་པར་ཡེ་ཤེས་ལྔ་ཡི་རང་མདངས་ལས་གྲུབ་པ༔ རྒྱལ་བ་ཐམས་ཅད་ཀྱི་ཞིང་ཁམས་ཀྱི་བཞུགས་གནས་དང་དབྱེར་མེད་པ༔ ཞི་བའི་ཕོ་བྲང་རིན་པོ་ཆེའི་གཞལ་ཡས་ཁང་ཡང་ཡིན་པ༔ ཁྲོ་བོའི་དཀྱིལ་འཁོར་ཐོད་པ་སྐམ་རློན་བརྩེགས་པའི་གཞལ་ཡས་ཀྱང་ཡིན༔ འོད་ཀྱི་ཕུང་པོ་འབར་བའི་ཕོ་བྲང་དེ་ལྟར་གསལ་བཏབ་ནས་སྔགས་ཀྱིས་བྱིན་གྱིས་བརླབ་པ་ནི༔ བྷྱཱ་ས་བོན་དང་བྷི་ཤྭ་བྷི་ཤུདྡྷེ༔ དུག་ལྔ་རྣམ་པར་དག་པ༔ ཨེ་ཛྙཱ་ན་ཙཀྲ་མཎྜ་ལཱ་ནི་དབྱིངས་ཡེ་ཤེས་ཀྱི་འཁོར་ལོའི་དཀྱིལ་འཁོར་དུ་ཧཱུཾ་ཞེས་པ་ས་བོན་གྱིས་བྱིན་གྱིས་བརླབས་པ༔ བཻ་ནི་བམ་རོའི་ས་བོན༔ རུ་ཏཱ་ཏི་ར་བ་ནི་བདུད་ཀྱི་རོ་བསྣོལ་བ༔ མ་ཉི་མའི་ས་
བོན༔ སཱུརྱ་མ་དྷ་ལ་ཉི་མའི་དཀྱིལ་འཁོར༔ ཨ་ཟླ་བའི་ས་བོན༔ ཙཎཱ་མ་དྷུ་ལ་ནི་ཟླ་བའི་དཀྱིལ་འཁོར༔ པཾ་པདྨའི་ས་བོན༔ པདྨ་མ་དྷུ་ལ་ནི༔ པདྨའི་དཀྱིལ་འཁོར་རམ་གདན༔ བྷཾ་གྱིས་བྱིན་གྱིས་བརླབས༔ ཧཱུྃ་གིས་སྡུག་བསྔལ་འཇོམས་པ༔ སྤུ་ར་ན་སྤྲོ་བ༔ ཕཊཀྱིས་ཚར་གཅོད་པ་སྟེ༔ གདན་དེ་ལས་འོད་ཟེར་འཕྲོས་པས་བདུད་བཞི་དང་ལོག་འདྲེན་ཐམས་ཅད་ཀྱི་སྟོབས་དང་ནུས་པ་ཐམས་ཅད་འཕྲོག༔ སཾ་ཧཱ་ར་ནཱ་བསྡུ་བ་སྟེ་འོད་ཟེར་གྱིས་བསྡུས་ནས་གདན་ལ་བསྟིམ༔ ཧཱུྃ་ནི་དེ་དག་བསྔངས་ཤིང་གཟིར་བར་བྱེད་པའོ༔ དེ་ནས་དཀྱིལ་འཁོར་བདག་བསྐྱེད་རྩ་བའི་ལྷ་དང་མདུན་བསྐྱེད་དང་བུམ་པ་གཏོར་མ་ལྷར་བསྐྱེད་པ་མངོན་རྟོགས་གཅིག་འདི་བཏོན་པས་ཐམས་ཅད་དུས་གཅིག་ལ་བསྐྱེད་པ་ཡིན༔ བདག་མདུན་ཐ་མི་དད་སྟོན་ཏེ༔ དེ་ཡང་ཁུངས་བཙུན་པར་སྟོན་ཕྱིར་མཁའ་འགྲོའི་བཀའ་རྟགས་ཀྱི་ཡིག་འབྲུ་བཅུ་གཉིས་ནི༔ དན་ནུ༔ གཤཊ༔ བར་ཤཱ༔ ཧཱུྃ༔ ཞེས་བརྗོད་པས་དང་པོ་རྒྱུའི་ཏིང་ངེ་འཛིན་དུས་བསྒོམ་པ་ལྟར༔ ཆོས་ཀྱི་དབྱིངས་རྣམ་པར་དག་པའི་ནམ་མཁའ་སྟོང་པའི་མཁའ་ཀློང་ནས༔ བདག་མདུན་
བུམ་པ་སོགས་སྤྱི་ལྟར་དཀྱིལ་འཁོར་གྱི་ཕོ་བྲང་གི་ཆོས་འབྱུང་ཨེ་ཡི་སྟེང་༔ བདུད་བཞི་དམ་སྲི་ཕོ་མོ་དང་པདྨ་ཉི་ཟླའི་དཀྱིལ་འཁོར་གྱི་སྟེང་དུ༔ ནམ་མཁའ་ནས་རང་གི་སེམས་ཉིད་ཀྱི་ངོ་བོ་རྒྱུ་ཡི་ཡི་གེ་ཧཱུྃ་དམར་པོ་འོད་ཀྱི་རང་བཞིན་དེ་བབས་ནས་བཞུགས་པ་ལས་འོད་ཟེར་ཕྱོགས་བཅུར་སྤྲོས༔ སངས་རྒྱས་ཐམས་ཅད་མཆོད་སེམས་ཅན་རྣམས་ཀྱི་སྒྲིབ་པ་སྦྱངས་ཏེ་དྲེགས་པ་ཅན་ཐམས་ཅད་ཚར་བཅད༔ རྒྱལ་བ་སྲས་བཅས་ཀྱི་བྱིན་རླབས་སེམས་ཅན་རྣམས་ཀྱི་ཚེ་བསོད༔ དྲེགས་པ་ཅན་རྣམས་ཀྱི་མཐུ་སྟོབས་བསྡུས༔ ཧཱུྃ་དམར་པོ་ལ་ཐིམ་པས་སྦྱོར་བའི་སྟོབས་དེ་ལས་མདུན་བསྐྱེད་བུམ་བསྐྱེད་གཏོར་བསྐྱེད་རྣམས་ཀྱང་༔ ཁྲོ་བོའི་རྒྱལ་པོ་དྲག་པོའི་སྐུ་བདག་ཉིད་རིག་པའི་ངོ་བོ་ཧཱུཾ་དེ་ལས་ཀྱང་འཇིག་རྟེན་པའི་འཇིགས་བྱེད་དགུ་དང་དྲག་པོ་འཇིགས་བྱེད་ལ་སོགས་པ་ཐམས་ཅད་འཇིགས་པར་བྱེད་ཅིང་སྐག་པར་བྱེད་པ་འཇིག་རྟེན་ཆེན་པོ་རྡོ་རྗེ་ཐོད་ཕྲེང་རྩྭ་ལ༔ པདྨའི་རིགས་ཀྱི་འགྲོ་ལ་རྗེས་སུ་ཆགས་པས་སྐུ་མདོག་དམར་ནག་མེའི་མདོག་ཅན༔ སྐུ་གསུམ་མཚོན་པའི་ཞལ་གསུམ༔ ཕ་རོལ་ཕྱིན་དྲུག་རྫོགས་པའི་ཕྱག་དྲུག་པ༔ ཐེག་པ་རིམ་
དགུར་རྟོགས་པའི་བརྡར་སྤྱན་དགུ་གྱེན་ཐུར་ཐད་དཀར་གཟིགས་པ༔ གཡས་ཞལ་དཀར་པོ་བཞད་པ༔ གཡོན་ཞལ་སྔོན་པོ་རྔམ་པ༔ དབུས་ཞལ་དམར་པོ་གཤེ་བ༔ ཕྱག་གཡས་གསུམ་གྱི་དང་པོས་གནམ་ལྕགས་ཀྱི་རྡོ་རྗེ་རྩེ་དགུ་ལྷ་ཚངས་པའི་གྲུ་གང་པ་ནམ་མཁའ་ལ་ཕྱར་བ༔ ཧཱུྃ་དགུ་ཕཊ་དགུ་རཾ་དགུས་མཚན་པ་ཀླད་ལ་བསྐོར་བ༔ བར་པས་རྡོ་རྗེས་མཚན་པའི་གྲི་གུག་ཐུར་དུ་འཕྱང་བ༔ ཐ་མས་རལ་གྲི་མེ་འབར་བ་ཕྱར་བ༔ གཡོན་གསུམ་དང་པོས་བྷནྡྷ་ཁྲག་གིས་བཀང་བ་ཐུགས་ཀར་འཛིན་པ༔ བར་པས་ཁཊུ་ཕྱར་ཐབས་སུ་འཛིན་པ༔ ཐ་མས་གནམ་ལྕགས་ཀྱི་སྡིག་པ་འགྱེད་ཐབས་འཛིན་པ༔ ཞབས་བཞི་གཡོན་གཉིས་བརྐྱང་ཞིང་གཡས་གཉིས་བསྐུམ་པའི་འདོར་ཐབས་སུ་བསྒྲད་པས༔ བདུད་བཞི་དང་དམ་སྲི་སྲིན་པོ་ཕོ་མོ་མནན་པ༔ རྡོ་རྗེ་དང་རིན་པོ་ཆེའི་གཤོག་པ་གཡས་གཡོན་དུ་གདེངས་བ༔ དབུ་ལ་ཐོད་སྐམ་ལྔའི་རྩེར་རིན་པོ་ཆེའི་པྲོག་ཞུ་འོད་འབར་བ་ལྔའི་ནང་དུ་ཁྲག་འཐུང་རིགས་ལྔ་གསལ་བ༔ དཔྲལ་བར་ཐལ་ཆེན་གྱི་ཚོམ་བུ༔ མཁུར་བར་ཁྲག་གི་ཐིག་ལེ༔ ཨོག་མར་ཞག་གི་ཟོ་རིས་ཏེ་བྱུག་པའི་རྫས་གསུམ་བྱུག་པ་ཐོད་
རློན་གྱི་དོ་ཤལ༔ སྦྲུལ་གྱི་ཆུན་འཕྱང་༔ རུས་པའི་རྒྱན་དྲུག་སྟེ་བཏགས་པའི་རྒྱན་དྲུག་བཏགས་པ༔ སྐུ་སྟོད་ལ་གླང་ཆེན་གྱི་ཀོ་བའི་སྟོད་གཡོགས༔ ཞིང་ཆེན་གྱི་པགས་པའི་རྐེད་དཀྲིས༔ སྟག་གི་པགས་པའི་ཤམ་ཐབས་ཏེ་བགོ་བའི་གོས་གསུམ་མནབས་པ༔ དེ་ལྟར་བྱུག་པའི་རྫས་གསུམ་གཅིག་ཏུ་བརྩིས་པས་དུར་ཁྲོད་ཀྱི་ཆས་བརྒྱད༔ སོ་སོར་བརྩིས་པའི་དཔལ་གྱི་ཆས་བཅུས་རྫོགས་པར་གྱུར་པ༔ སྐུ་སྒེག་པ་དང་དཔའ་བ་དང་འཇིགས་སུ་རུང་བ༔ གསུང་རྒོད་པ་དང་གཤེ་བ་དང་རྔམ་པ༔ ཐུགས་སྙིང་རྗེ་ཆེ་བ་དང་ཞི་བ་དང་འབར་བ་སྟེ་གར་གྱི་ཉམས་དགུ་གསལ་བ༔ སྐུ་ལ་རྡོ་རྗེའི་གོ་ཁྲབ་གསོལ་བའི་བར་མཚམས་ན་ལྕགས་ཀྱི་སྡིག་པ་ནག་པོ་ཕྲ་མོས་གཏམས་པ༔ རང་འོད་ཀྱི་རིག་མ་ཡུམ་ཆེན་རྡོ་རྗེ་ཕག་མོ་མཐིང་ནག་འཁྲིལ་བ༔ ཕྱག་གཡས་གྲི་གུག་ཡབ་ཀྱི་མགུལ་ནས་འཁྱུད་ཅིང་གཡོན་པས་ཐོད་ཁྲག་ཡབ་ཀྱི་ཞལ་དུ་སྟོབ་པ༔ ཞབས་གཡས་བརྐྱང་ཞིང་གཡོན་བསྐུམས་པས་ཡབ་དང་ཞལ་སྦྱོར་བ༔ དེ་ལྟར་ཡབ་ཡུམ་གྱི་སྐུར་གསལ་བའི་ཡབ་ཀྱི་སྐུ་ཕྱི་དར་དམར་གྱི་གུར་ཕུབ་པ་ལྟ་བུ་ལ་ནང་སྟོང་པ་ཕྲུ་མ་ཕུས་བཏབ་པ་ལྟ་བུར་
སྒོམ༔ དེ་ཡང་ལས་བྱང་འདི་རང་གི་བསྐྱེད་པ་མ་ཧཱ་ཡོ་གའི་ལུགས་ཡིན་པས༔ སྐུ་ལུས་ཀྱི་ནང་དུ་རྩ་འཁོར་སོགས་སྒོམ་དགོས་པ་ནི་མ་ཡིན་ནོ༔ དེ་གཏེར་སྟོན་སྐུ་ཚེའི་སྟོད་ལ༔ མཁར་ཆུ་དཔལ་གྱི་ཕུག་རིང་ནས་དྲག་པོའི་ཆོས་སྐོར་རྣམས་གཏེར་ནས་བཏོན་ཏེ༔ དེ་ལ་ལས་བྱང་ལ་སབ་རྒྱུའི་གོ་ཆ་ལྷ་ལྔ་ནི་མེད་པར་འདུག་པས་གཏེར་སྟོན་ཉིད་ཀྱིས་མཛད་པའི་ཉུང་ངུ་ཞིག་དང་༔ ཡང་ཟུར་མང་གི་བླ་མ་ཞིག་གིས་མཛད་པ་དེ་ལས་མང་ཙམ་ཡོད་པ་ཟུར་མང་གི་ཆོས་རྒྱུད་རྣམས་ལ་དར༔ གཏེར་སྟོན་སྐུ་ན་བགྲེས་པོའི་དུས༔ ཙཱ་རིའི་དམར་ནག་རཀྟ་མཚོ་ནས་ཤོག་དྲིལ་གཅིག་ཐོན་པ་གོ་ཆ་ལྷ་ལྔ་རྒྱན་གྱི་ཤོག་དྲིལ་འདི་ཡིན༔ འདིའི་ཡིག་ཆུང་རྣམས་ནི་དོན་གསལ་བས་བཀྲོལ་མ་དགོས༔ དཔལ་ཆེན་ཧེ་རུ་ཀཱ་ཁྲོས་པའི་རྒྱལ་པོ་པདྨ་ཐོད་ཕྲེང་རྩལ་ལ་ཕྱག་འཚལ་ལོ༔ སྲུ་བཙའི་གོ་ཆ་བཙན་པའི་རྫོང་ཆེན་བསྟན༔ དཔའ་བའི་ངར་ཆེན་རྣོ་བའི་མཚོན་ཆ་ཐོགས༔ གུ་རུ་དྲུག་པོ་མེ་ཀློང་འཁྱིལ་པ་ཡི༔ ཁོག་པའི་སྙིང་འདུ་གྲོ་ཆུ་ལྷ་ལྟ་འདཱི༔ གཞོ་སྟོད་ཏི་སྒྲོ་གསང་བའི་གནས་མཆོག་ཏུ༔ སྣང་སྲིད་སྤྱི་འདུལ་པདྨ་འབྱུང་གནས་ལ༔ བདག་འདྲ་བུད་མེད་ཡེ་
ཤེས་མཚོ་རྒྱལ་གྱིས༔ མ་འོངས་སྐལ་ལྡན་ལས་འཕྲོ་ཅན་གྱི་དོན༔ གསེར་གྱི་མཎྜལ་ཕུལ་ནས་ཡང་ཡང་ཞུས༔ ཡི་གེ་མི་དགོས་སྙན་བརྒྱུད་དྲུག་ཏུ་འཛིན༔ ཅེས་གསུངས༔ བདག་ཉིད་མངོན་རྫོགས་རྒྱལ་པོར་བསྒོམ་དགོས་པ་ལ༔ དཔེར་ན་ས་མདོར་རྫོང་བཙུན་པོ་དངའདུ་བ་ལ༔ དེ་ལ་གཅེས་པའི་རྫོང་དེ་སྲུང་བའི་དཔའ་བོ་གྲྭ་ཁྲུབ་ཅན་ཞིག་དགོས༔ དེའི་ཕྱིར་ན་གུ་རུ་དྲག་པོའི་ལྷན་ཐབས་སུ་བཀྲད༔ ཅེས་པ་ནས༔ བདག་ཉིད་དྲག་པོ་སྐུ་སྟོང་ཞིང་གསལ་བའི་ཐུགས་ཀ་རུ༔ ཐུགས་རིན་པོ་ཆེ་འབར་བ་འོད་ཀྱི་གུར་ཁང་གི་རྣམ་པའི་དབུས་ཉིད་དུ༔ གསེར་གྱི་མཆོད་རྟེན་སེར་པོར་སྒོམ་པ་ནི༔ འོག་ཏུ་རི་རབ་ཀྱི་བང་རིམ་སེང་ཁྲི༔ དེ་སྟེང་བང་རིམ་བཞི་བུམ་གདན་བུམ་པ་བྲཱ༔ ཆོས་ཀྱི་འཁོར་ལོ་གདུགས་ཏོག་དང་བཅས་པ༔ བྱང་ཆུབ་ཆེན་པོའི་མཆོད་རྟེན་འོད་ཟེར་ཉི་མ་ལྟར་འབར་བ༔ དེའི་བུམ་པའི་དབུས་ཉི་མ་དང་ཟླ་བའི་གདན་གྱི་སྟེང་དུ༔ ཡེ་ཤེས་སེམས་དཔའ་བཛྲ་ཧེ་རུ་ཀ་སྐུ་མདོག་མཐིང་ནག་ཞལ་གཅིག་སྤྱན་གསུམ་ཁྲོ་ཞིང་འཛུམ་པ་དབུ་སྐྲ་དམར་སེར་གྱེན་དུ་འཁྱིལ་བ༔ ཕྱག་གཡས་རྡོ་རྗེ་རྩེ་ལྔ་ཐུགས་ཀར་
འཛིན་ཅིང་གཡོན་དྲིལ་བུ་དཀུར་བརྟེན་པ༔ སྐུ་ལ་རུས་པ་དང་རིན་པོ་ཆེས་བརྒྱན་ཅིང་ཞབས་གཉིས་སེམས་དཔའི་སྐྱིལ་ཀྲུང་གིས་བཞུགས་པ༔ འདི་དང་ཆེ་མཆོག་དང་བཛྲ་ཧེ་རུ་ཀ་རྡོ་རྗེ་འཆང་རྣམས་དོན་གཅིག༔ དེའི་ཐུགས་ཀ་རུ་པདྨ་ཉི་ཟླའི་སྟེང་དུ་རྡོ་རྗེ་སྔོན་པོ་རྩེ་ལྟ་པ་གྱེན་དུ་འགྲེང་བའི་ལྟེ་བ་ལ༔ ཐིག་ལེ་དཀར་དམར་མཚོན་པས་ཉི་མ་འོག་དང་ཟླ་བ་སྟེང་དུ་སྒྲུབ་པའི་གའུ་ཁ་སྦྱོར༔ དེའི་དབུས་སུ་ཡང་ཉི་མའི་གདན་གྱི་སྟེང་དུ་དྲག་པོའི་ཐུགས་སྲོག་ཧཱུྃ་དམར་པོ་བྱི་རུའི་མདོག་ཅན༔ ཡིག་མགོའི་ངོས་དེ་མདུན་ཡིན་པས་སྔོན་དུ་བསྟན༔ ཧ་ཡི་ཁུགས་སོ་སྒལ་ཚིགས་ངོས་ལ་བསྟན་ཏེ༔ སྤང་ལ་ཕུར་པ་བཏབ་པ་ལྟར་གཡོ་འགུལ་མེད་པར་འགྲེང་སྟེ་གནས་པར་བསྒོམ་པས་སེམས་རླུང་སོགས་མི་འོང་བའི་གནད༔ ཧཱུྃ་གི་ཐིག་ལེའི་ནང་དུ་བླ་མ་རྡོ་རྗེ་འཆང་གི་ཆ་ལུགས་སུ་བསྒོམ་པས་རང་ལ་བྱིན་རླབས་འཇུག་པའི་གནད༔ དེའི་འཁོར་དུ་རང་ལ་དྲིན་ཆེ་བའི་བླ་མ་རྣམས་ཀྱིས་བསྐོར་བར་བསྒོམ་པས་ཁོང་རྣམས་ཀྱི་སྐུ་རིམ་དུ་འགྱུར་བའི་གནད༔ ཧཱུྃ་གི་ཟླ་ཚེས་ཀྱི་ནང་དུ་སྤྱན་རས་གཟིགས་སོགས་རང་གི་ཡི་དམ་གཙོ་བོ་གཞན་ཞིག་ལ་རང་གི་ཡི་དམ་ཐམས་ཅད་ཀྱིས་
སྐོར་བར་བསྒོམས་པས་ཡི་དམ་སྤྱོང་བློང་མི་འོང་ཞིང་དངོས་གྲུབ་མྱུར་དུ་ཐོབ་པའི་གནད༔ ཧཱུྃ་ཡིག་ནི་དཔེར་ན་ཟངས་སྨྲའི་སྦྲ་གུ་ཀུག་ནས་ཧཱུྃ་ཡིག་བཟོས་པ་ལྟ་བུའི་ནང་སྟོང་པ་ཡིན་ཏེ༔ ཧཱུྃ་གི་མགོ་སྐྱེའི་ནང་དུ་ཕག་མོ་སོགས་མཁའ་འགྲོ་རིགས་ཀྱི་ཡི་དམ་བསྒོམ་ཡང་རུང་༔ ཧ་ཁོག་པའི་ནང་དེར་རང་གི་བླ་སྲོག་རྣམ་ཤེས་ཀྱི་ངོ་བོ་ནཱཾ་ཡིག་ལྗང་གུའི་ནི་མིག་ཏུ་ཨ་ཡིག་དཀར་པོས་མཚན་པ་ནི་རང་བསྲུང་བའི་གནད༔ དེའི་མཐའ་བསྐོར་དུ་རང་གི་བུ་སློབ་དང་གཉེན་འདུན་ཡོན་བདག་སོགས་དམ་ཚིག་ལ་སེལ་མེད་ཅིང་ངོ་ལོག་བྱེད་དོགས་མེད་པ་རྣམ་བསྒོམ་སྟེ༔ དེ་དག་ཀྱང་ཡི་དམ་ལྷའི་སྐུར་སྒོམ་པ་དང་༔ མིང་ཡིག་དང་པོ་བསྒོམས་ནས་དེ་ལ་བསྟིམ་པ་དང་༔ ཐ་མལ་པའི་གཟུགས་དངོས་སུ་སྒོམ་པ་གསུམ་ལས་ཐ་མལ་པ་སྒོམ་པ་དེ་ཕན་ཆེ༔ ཕོ་ཐམས་ཅད་གཡས་མོ་ཐམས་ཅད་གཡོན་ཞིང་ཁང་སྦྲ་གུར་སོགས་རྒྱབ༔ ཟས་ནོར་རྣམས་ནི་ཡིག་གི་མདུན་དུ་སྒོམ་པའོ༔ ཧཱུྃ་གི་འ་ཆུང་གི་ནང་དུ་རང་གི་ཆོས་སྐྱོང་གལ་ཆེ་རིམ་རྣམས་སྒོམ་པས་ལྷ་དབྱེའི་མི་ཚུགས༔ ཧཱུྃ་གི་ཞབས་ཀྱུའི་ནང་དུ་ཨ་ཡ་མ་དུ་རུ་ཙ་ཤ་ན་ཡིག་མགོ་ཐུར་བསྟན་སྤུས་བྲིས་པ་ཙམ་བསྒོམས་
པས་འཁུ་ལྡོག་མི་འོང་བའི་གནད་དེ༔ སྡེ་བརྒྱད་ཀྱི་སྲོག་རང་གི་ཐུགས་ཀར་ཡོད་པས་རང་སྲོག་རང་གིས་མི་གཅོད་པ་བུ་རྟིས་བཟུང་བ་ལྟ་བུའོ༔ དེ་ལྟར་ཧཱུཾ་ཡིག་གི་ནང་དུ་དེ་རྣམས་མི་ཤོང་སྙམ་ན༔ དངོས་པོ་གཟུགས་ཅན་སྣོད་དུ་བཅུག་པ་ལྟ་བུ་ཡིན་ན་མི་ཤོང་བ་བདེན་ཏེ༔ འདི་ཡིད་ལ་བསམ་པས་ཆོག་པས་བསམ་མི་རུང་བ་ཅི་ཡོད༔ བསམས་པས་ཆོག་གམ་ཞེ་ན༔ རྒྱ་གཞུང་གི་སྒྲུབ་ཐབས་རྣམས་ལའང་སྒོམ་ཟེར་བ་ལ་བསམ་ཟེར་བ་ཡོད་པས་སྒོམ་པ་དང་བསམ་པ་དོན་གཅིག་སྟེ༔ དེ་ལྟར་དངོས་སུ་མི་ཤོང་བ་རྣམས་ཤོང་བར་བསྒོམ་པས་ཅི་འོང་སྙམ་ན་སྟོང་གསུམ་ཡུངས་འབྲུར་ཚུད་པ་དང་ནམ་མཁའ་ལག་མཐིལ་མཉམ་པའི་རྫུ་འཕྲུལ་དེ་འཐོབ་པའི་རྒྱུར་འགྱུར་རོ༔ དེ་ནས་ཧཱུྃ་ཡིག་དམར་པོའི་མཐར་ཉི་མའི་སྟེང་དུ་རྩ་བའི་སྔགས་ཨ་ཅིག་གི་ཡི་གེའི་ངོ་ཕྱིར་བསྟན་གཡོན་སྐོར་གྱིས་བསྐོར་བ༔ ཡི་གེ་ཐམས་ཅད་ལངས་ཏེ་གནས་པ༔ དཔེར་ན་བྱི་རུའི་ལག་རྩ་སྐོར་རྡོག་པོ་ཉི་ཤུ་རྩ་གཅིག་ཧཱུྃ་གི་མཐའ་སྐོར་དུ་བཞག་པ་ལྟ་བུ་གཅིག་བསམ༔ ཡབ་ཀྱི་དབུས་ཞལ་སྤྱི་གཙུག་རལ་པ་སྤྲིན་ལྟར་གཏིབས་པའི་སྐྲ་གསེབ་ཏུ༔ པདྨ་འབྱུང་གནས་སྐུ་མདོག་མཐིང་
ནག༔ སྤྱན་གསུམ་དབུ་སྐྲ་ཐོར་ཅོག་ལ་མཆེ་བ་ཅུང་ཟད་གཙིགས་པ༔ ཕྱག་གཡས་ཁུཊཾ་ནཱམ་མཁའ་ལ་གཡུག་ཅིང་༔ གཡོན་པས་ཐོད་ཁྲག་ཐུགས་ཀར་བསྐྱིལ་བ༔ གྲུ་མོ་གཡས་པ་ན་གསེར་གྱི་ཌཱ་མ་རུ་བཀལ་བ་སྐུ་གཅེར་བུར་སྟག་གི་ཤམ་ཐབས༔ ཞབས་གཉིས་བཞེངས་པའི་སྟབས་སུ་བཞུགས་པ་སྐུ་ལ་རུས་པའི་རྒྱན་དྲུག་གསོལ་བ་ཞལ་ནཱས་ཧཱུྃ་ཧཱུྃ་ཕཊ་ཕཊབློ་བྷོ་དང་ནི༔ ཕོ་ཝེ་ཨ་ར་ལིའི་སྒྲ་སྒྲོག་ཅིང་དེའི་འཁོར་དུ་རང་གི་དད་མོས་གང་ཡོད་ཀྱི་བླ་མ་ཐམས་ཅད་དང་༔ རྒྱ་གར་གྱི་རིག་འཛིན་བརྒྱད་སོགས་གྲུབ་ཆེན་བརྒྱད་ཅུ༔ རྗེ་འབངས་ཉེར་ལྔ་གཏེར་སྟོན་བརྒྱ་རྩ༔ དབང་ལུང་ཁྲིད་རིམ་གང་ལས་ཐོབ་པའི་རྩ་བ་དང་བརྒྱུད་པར་བཅས་པ༔ ལྷ་ཡི་དམ་ཞི་བ་དང་ཁྲོ་བོ་རབ་འབྱམས་ཐམས་ཅད་དང་༔ ཡུལ་ཉི་ཤུ་རྩ་བཞིའི་དཔའ་བོ་ཉི་ཤུ་རྩ་བཞི་དཔའ་མོ་ཉི་ཤུ་རྩ་བཞི་སོགས་འབུམ་ཕྲག་ཙམ་མོས་པ་ཙམ་དུ་བསྒོམ་སྟེ༔ སྤུ་གྲི་སྲོག་གཅོད་ལས༔ ནམ་མཁར་དགའ་རབ་རྡོ་རྗེ་ཤྲཱི་སེངྷ་ཁྲི་སྲོང་ལྡེའུ་བཙན་སོགས་བསྒོམ་གསུངས་པ་དང་དོན་གཅིག༔ བླ་མའི་རྣལ་འབྱོར་གྱི་དོན་ཚང་བས་ཉམས་རྟོགས་སྐྱེ་བ་དང་༔ དྲག་པོའི་སྒྲུབ་པ་
འདི་དྲག་སྔགས་ཡིན་པས་ནོན་དཀའ་བ་ནོན་པའི་གནད་ཡིན༔ གོ་ཆའི་མངོན་རྟོགས་རྣམས་ཀྱི་ཚིག་མཇུག་འདིར༔ སྤྲོ་བསྡུའི་དམིགས་པ་རེ་བཤད་པ་ནི༔ འདིར་ཚར་གཅིག་འདོན་ཆེ་སྒོམ་ལུང་མེད་པས་རྗེས་ནས་སོ་སོའི་བསྙེན་པའི་སྐབས་སུ་སྒོམ་པ་ཕྱག་ལེན་ཡིན་པས་འདིར་མི་བཤད༔ ཐོད་ཕྲེང་རྩལ་གྱི་སྤྱི་གཙུག་པད་ཉིའི་སྟེང་དུ༔ མཁའ་ལྡིང་ག་རུ་ཊ་སྐུ་མདོག་དཀར་པོ་གནམ་ལྕགཱས་འབར་བ་སྟེ་ཐོག་ལས་གྲུབ་པའི་མཆུ་དང་སྡེར་མོ་ཅན༔ ཡེ་ཤེས་ཀྱི་མེ་ལས་གྲུབ་པའི་གཤོག་པ་རྡེབ་ཅིང་རང་ལ་གནོད་པའི་ཀླུ་རིགས་ཐམས་ཅད་སྦྲུལ་རིགས་ལྔ་ཡི་རྣམ་པར་ཟས་སུ་ཟ་བ༔ སྤུ་རྣམས་སྤུ་གྲིའི་རྣམ་པ་སྤྲུགས་པས་རྡོ་རྗེའི་ཐོག་གིས་ཆར་ཆེན་པོ་འབེབས་པ་རྫུ་འཕྲུལ་སྟོབས་ཀྱིས་རི་ཡི་རྒྱལ་པོ་རི་རབ་ཀྱང་བསྙིལ་ཞིང་༔ ཉི་ཟླ་ཡང་ཚོགས་པོར་འཕེན་པའི་སྟོབས་དང་ལྡན་ཞིང་ཡེ་ཤེས་ཀྱི་ཁྲོ་རྒྱལ་ཆེན་པོ་བཅུ་དྲུག་དང་དགོངས་པ་མཉམ་པ༔ ཉེ་བའི་སྲས་བརྒྱད་སོགས་རྒྱལ་སྲས་བྱང་ཆུབ་སེམས་དཔའི་ཚོགས་ཐམས་ཅད་ཀྱིས་བསྐོར་བ༔ དེའི་སྤྱི་གཙུག་རྭ་བར་ནོར་བུའི་ཏོག་གིས་རྩེར་པདྨ་དམར་པོ་འདབ་མ་སྟོང་ལྡན་གྱི་ལྟེ་བ་དང་༔ འདབ་མ་རྣམས་ལ་ཉི་
ཟླའི་གདན་རེ་རེའི་སྟེང་དུ༔ བཅོམ་ལྡན་འདས་པདྨ་རིགས་ཀྱི་བདག་པོ༔ སྣང་བ་མཐའ་ཡས་ནི་ཞལ་གཅིག་ཕྱག་གཉིས་སྐུ་མདོག་པདྨ་རཱ་ག་ལྟར་དམར་བ། ཞབས་གཉིས་རྡོ་རྗེའི་སྐྱིལ་ཀྲུང་གིས་བཞུགས་ཤིང་༔ ཕྱག་གཉིས་མཉམ་བཞག་གི་སྟེང་དུ་ཚེ་བུམ་འཛིན་པ་ལ་ལོངས་སྐུ་ཚེ་དཔག་མེད་པའམ་སྤྲུལ་སྐུ་ཆོས་གོས་ཅན་བསྒོམ་ཡང་རུང་བར་གསང་སྒྲུབ་ནས་གསུངས༔ འདབ་མ་སྟོང་ལ་བསྐལ་བཟང་གི་སངས་རྒྱས་སྟོང་གི་འཁོར་གྱིས་བསྐོར་བ་ཐམས་ཅད་ཀྱང་སྤྲུལ་སྐུ་གསེར་མདོག་གཡས་སྐྱབས་སྦྱིན་དང་གཡོན་ཚེ་བུམ་འཛིན་པ༔ དྲག་པོའི་ཞལ་དབུས༔ ཀླད་པ་དུང་ཁང་གི་གཞུལ་ཡས་སུ་གསེར་གྱི་འཁོར་ལོ་རྩིབས་བཞི་པའི་གདན་གྱི་དབུས་སུ༔ སྐུའི་ལྷ་འཕགས་པ་འཇམ་དཔལ་སྐུ་མདོག་སེར་པོ༔ ཁྲོ་བོའི་ཆ་ལུགས་ཞབས་གཉིས་བརྐྱང་བསྐུམ་འདོར་ཐབས་སུ་བཞེངས་པ༔ ཕྱག་གཡས་ཤེས་རབ་ཀྱི་རལ་གྲི་ནམ་མཁར་ཕྱུར་ཞིང་༔ གཡོན་པས་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་ཐུགས་ཀར་འཛིན་པ༔ དཔལ་གྱི་ཆས་བཅུ་དང་དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ༔ དེའི་དཔྲལ་བར་སངས་རྒྱས་ཐམས་ཅད་ཀྱི་སྐུའི་ངོ་བོ་ཨཱོཾ་
དཀར་པོས་མཚན་པར་བསྒོམ༔ དྲག་པོའི་མགྲིན་པ་སྟེ༔ རྐན་ཕུག་ཏུ་པདྨ་འདབ་བཞིའི་དབུས་སུ༔ པདྨ་གསུང་གི་ལྷ་མཆོག་རྟ་མགྲིན་ནི༔ སྐུ་མདོག་དམར་པོ་ཞལ་གཅིག་ཕྱག་གཉིས་དབུའི་གཙུག་ན་རྟ་མགོ་ལྗང་ཞུར་རྟ་སྐད་ཕྱོགས་བཅུར་འཚེར་བ༔ རྟོག་མ་ལེ་བརྒན་ཏེ་དམར་སྨུག་ལ་མེ་དཔུང་འབར་བ༔ ཕྱག་གཡས་རྡོ་རྗེས་མཚན་པའི་མི་མགོའི་དབྱུག་པ་ཕྱར་བ༔ གཡོན་པས་སྡིགས་མཛུབ་དང་བཅས་པའི་སྦྲུལ་ཞགས་བསྣམས་པ༔ ཞབས་གཉིས་གཡོན་བརྐྱང་གཡས་བསྐུམ་པའི་འདོར་ཐབས་སུ་བཞེངས་པ༔ མི་ལྤགས་ཀྱི་གཡང་གཞི་དང་སྟག་ལྤགས་ཀྱི་ཤཱམ་ཐབས་དང་རུས་པའི་རྒྱན་དྲུག་སོགས་ཀྱིས་སྤྲས་པ༔ དེའི་མགྲིན་པར་པདྨ་དམར་པོའི་ཟེའུ་འབྲུ་ལ་སངས་རྒྱས་ཐམས་ཅད་ཀྱི་གསུང་གི་རྡོ་རྗེའི་ངོ་བོ་ཨཱཙྪདམར་པོས་མཚན་པ༔ དྲག་པོའི་ཐུགས་ཀར་མཆོད་རྟེན་གྱི་བུམ་པའི་ནང་དུ༔ ཡེ་ཤེས་སེམས་དཔའི་ཕྱི་ཡེ་ཤེས་སེམས་དཔའ་ནི་གསང་བདག་གི་ནང་དུ་བཞུགས་པ་སྟེ༔ ཕྱག་ན་རྡོ་རྗེ་ཐུགས་ཀྱི་ལྷ་ནི་སྐུ་མདོག་མཐིང་ནག་ཞལ་གཅིག་ཕྱག་གཉིས་པ༔ ཕྱག་གཡས་རྡོ་རྗེ་རྩེ་ལྔ་ནམ་མཁར་གསོར་ཞིང་གཡོན་པས་སྡིགས་མཛུབ་
ཐུགས་ཀར་བསྒྲེངས་བའི་རྩེ་ནས་བྱ་ཁྱུང་ཁྲ་ཐབས་སུ་འགྱེད་པ༔ ཞབས་འདོར་ཐབས་སུ་བསྒྲད་ཅིང་༔ ཀླུ་བརྒྱད་ཀྱི་ངོ་བོ་སྤྲུལ་བརྒྱུད་ཀྱི་ཡན་ལག་བརྒྱན་ཅིང་། དོ་ཤལ་དང་དར་སྔོན་པོའི་སྟོད་གཡོགས་དང་༔ སྟག་གི་ཤཱམ་ཐབས་ཅན༔ ཐོད་སྐམ་དང་རིན་པོ་ཆེའི་དབུ་བརྒྱན་ཅན༔ ཤིན་ཏུ་ཁྲོ་ཞིང་གཏུམ་པའི་ཆ་ལུགས་ལ༔ སྐུ་གནོད་སྦྱིན་ཁྲོས་པའི་ཆ་ལུགས་ཐུང་ལ་སྒེག་པ༔ དེའི་ཐུགས་ཀའི་སྟོད་དུ་ཡེ་ཤེས་སེམས་དཔའ་བཞུགས་པའི༔ ཐུགས་ཀའི་ཆ་སྨད་དུ་ཉི་མའི་དཀྱིལ་འཁོར་གྱི་སྟེང་དུ་སངས་རྒྱས་ཐམས་ཅད་ཀྱི་ཐུགས་རྡོ་རྗེའི་ངོ་བོ་ཧཱུྃ་མཐིང་ནག་གིས་མཚན་པར་བསྒོམ༔ དྲག་པོའི་ལྟེ་བར་སྤྲུལ་པའི་འཁོར་ལོ་ཆོས་འབྱུང་དམར་པོ་ཟུར་དྲུག་གི་སྟེང་དུ༔ པདྨ་འདབ་མ་བཞི་པའི་ཟེའུ་འབྲུ་དང་བཅས་པའི་འདབ་མ་བཞིར་ཉི་མའི་གདན་རེ་རེ་སྟེ༔ དབུས་སུ་རྣམ་རྟོག་མེད་པ་མཚོན་པའི་རོ་མགོ་བོ་གཡས་སུ་བསྟན་པའི་གདན་སྟེང་དུ༔ བཅོམ་ལྡན་འདས་མ་རྡོ་རྗེ་ཕག་མོ་ཉན་ཐོས་དང་རང་སངས་རྒྱས་བྱང་ཆུབ་སེམས་དཔའ་དང་རྫོགས་པའི་སངས་རྒྱས་ཐམས་ཅད་ཀྱི་ཡོན་ཏན་བསྐྱེད་པའི་ཡུམ་ནི་སྐུ་མདོག་མཐིང་ནག་ཞལ་གཅིག་སྤྱན་གསུམ་
དབུ་སྐྲ་ཐོར་ཚུགས་ལ་ཕག་ཞལ་མཐིང་ནག༔ ཕག་ཟེ་ལ་མེ་འབར་ཞིང་ངུར་སྒྲ་འབྲུག་ལྟར་སྒྲོག་པ༔ ཕྱག་གཡས་རྣམ་རྟོག་གཅོད་པར་བྱེད་པའི་གྲི་གུག་ཕྱུར་ཞིང་༔ གཡོན་པས་ཐོད་ཁྲག་ཐུགས་ཀར་དངོས་གྲུབ་བཅུད་ཀྱི་ངོ་བོར་རྒྱ་མཚོར་བསྐྱིལ་བ༔ གྲུ་མོར་ཡབ་ཧེ་རུ་ཀའི་ངོ་བོར་ཁ་ཊཾ་གྱེན་དུ་བསླང་བ༔ ཞབས་གཡས་བསྐུམ་པ་འཁོར་བའི་སྒོ་བཀག་པའི་ཕྱིར་རྟིང་པ་བྷ་གར་གཏད་པ༔ རང་དོན་ཞི་བདེར་མི་གནས་པའི་ཕྱིར་ཞབས་གཡོན་བརྐྱང་པ་རོའི་སྙིང་ཁར་བརྫི་ས་པ་སྐྱིལ་ཀྲུང་ཕྱེད་པའི་གར་ཐབས་སུ་བཞེངས་པས༔ སྐུ་ལ་རུས་པའི་རྒྱན་ཆ་དྲུག་དང་དུར་ཁྲོད་ཀྱི་ཆས་བརྒྱད་གསོལ་བ༔ དེའི་ཤར་དུ་རྡོ་རྗེ་མཁའ་འགྲོ་མ་སྐུ་མདོག་དཀར་མོ་གཡས་རྡོ་རྗེས་མཚན་པའི་གྲི་གུག་ནཱམ་མཁའ་ལ་ཕྱར་བ༔ ལྷོར་རིན་ཆེན་མཁའ་འགྲོ་མ་སྐུ་མདོག་སེར་མོ་གཡས་རིན་པོ་ཆེས་མཚན་པའི་གྲི་གུག༔ ནུབ་ཏུ་པདྨ་མཁའ་འགྲོ་མ་སྐུ་མདོག་དམར་མོ་གཡས་པདྨས་མཚན་པའི་གྲི་གུག༔ བྱང་དུ་ལས་ཀྱི་མཁའ་འགྲོ་མ་སྐུ་མདོག་ལྗང་མོ་གཡས་རྒྱ་གྲམ་གྱིས་མཚན་པའི་གྲི་གུག༔ འཁོར་བཞི་ཀའང་རྒྱནཱ་དང་ཆ་ལུགས་གཙོ་མོ་དྭང་མཐུན་པར་བསྒོམ༔ རང་
རྟགས་ཀྱི་སྙིང་པོ་ནི༔ གཙོ་མོའི་ཐུགས་ཀར་ཧཱུྃ་ཧི༔ མཾ་བ་བཞི་པོ་གང་རུང་བསྒོམ་ཡང་རུང་མོད་ཀྱི༔ མ་མཐིང་ནག༔ རྡོ་རྗེ་མཁའ་འགྲོ་ལ་ཧ་དཀར་པོ༔ རིན་ཆེན་མཁའ་འགྲོ་ལ་རི་སེར་པོ༔ པདྨ་མཁའ་འགྲོ་ལ་ནི་དམར་པོ༔ ལས་ཀྱི་མཁའ་འགྲོ་ལ་ས་ལྗང་གུ་བསམ༔ དྲག་པོའི་གསང་གནས་བདེ་སྐྱོང་གི་འཁོར་ལོ་གྲུ་གསུམ་ཨེ་ཡི་དབྱིབས་གདན་ཐབས་ཀྱི་དབུས་སུ༔ ཁྲོ་བོ་ཐམས་ཅད་ཀྱི་ཕྲིན་ལས་ཀྱི་རང་བཞིན་ཕྱག་ན་རྡོ་རྗེའི་སྐུའི་སྤྲུལ་པ་གནོད་སྦྱིན་གོས་སྔོན་ཅན་ཞེས་ཀྱང་བྱ༔ གནོད་སྦྱིན་རྡོ་རྗེ་འཆང་བ་ཞེས་ཀྱང་བྱ༔ རི་རབ་ཀྱི་རྩེའི་ཕྱོགས་བཞི་ན་ལྔ་བརྒྱ་ཚན་བཞི་གནས་པར་བཤད་པ་ངོ་བོ་དེ་ཉིད་ཡིན་པ་ལ༔ ཟུར་ཆག་གི་སྐད་དུ་ཡཀྵ༔ བོད་སྐད་དུ་གནོད་སྦྱིན་གདུག་རྩུབ་ཆེ་བས་མེའི་དབལ་དང་ལྡན་པ་ནི༔ སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་པ་ཞལ་གདངས་ཤིང་ལྗགས་འདྲིལ་བ་མཆེ་བ་སྟག་གཟིག་གི་སོ་ལྟར་གཙིགས་པ༔ ཕྱག་གཡས་གནམ་ལྕགས་ཀྱི་རྡོ་རྗེ་ཁ་གདེངས་པ་ནམ་མཁའ་ལ་ཕྱར་ཞིང་༔ གཡོན་པས་ཁྲོ་ཆུའི་ཐོ་བས་གནོད་བྱེད་ཀྱི་ཀླད་པ་འཇོམས་པ༔ མེའི་ཞགས་པ་བསྣམས་པས་གནོད་བྱེད་
འཆིང་བ༔ སྐུ་སྟོད་ལ་བསྐལ་པའི་མེ་དཔུང་འབར་ཞིང་མཆེད་པ༔ སྐུ་སྨད་ལ་སྟག་ལྤགས་ཀྱི་ཤམ་ཐབས་ལ་སོགས་པ་སྐུ་ལ་དུར་ཁྲོད་ཀྱི་ཆས་བརྒྱད་གསོལ་བ༔ སྐུ་ལས་སྤྲུལ་པའི་ཁྲོ་ཚོགས་སེར་རྒོད་ལྟར་འབེབས་པ༔ དེའི་ཐུགས་ཀར་ཧཱུྃ་མཐིང་ནག་གིས་མཚན་པར་བསམ༔ དེ་ལྟར་གོ་ཆའི་ལྷ་རྣམས་ཀྱི་སྐུ་མདོག་ཕྱག་མཚན་གསལ་བར་སྒོམ་པ་ནི་བདག་མདུན་བུམ་པ་གཏོར་མ་ལྷར་བསྐྱེད་པ་སོ་སོར་དུས་གཅིག་ལ་གསལ་བཏབ༔ དེ་ལྟར་རྣམ་པ་གསལ་བར་བསྒོམ་ཞིང་༔ ཁྱད་པར་བདག་བསྐྱེད་ལ་རྣམ་དག་དྲན་པ་གལ་ཆེ་བས༔ རང་གི་རྣམ་ཤེས་དང་གཟུགས་དང་ཚོར་བ་དང་འདུ་ཤེས་དང་འདུ་བྱེད་ཀྱི་ཕུང་པོ་ལྔ་ནི༔ གདོད་མ་ནས་དཔའ་བོ་དྲག་པོ་རིགས་ལྔའི་ངོ་བོ་ཡིན་ལ༔ རང་གི་ཤ་དང་ཁྲག་དང་དྲོད་དང་དབུགས་དང་ཁམས་བཞི་ལུས་ཀྱི་སྦྱབ་སྟོང་པ་དང་ལྔ་ནི༔ ཡུམ་ཁྲོས་མ་ལ་སོགས་པ་དཔའ་མོ་ལྔའི་ཚོགས་ཡིན་པར་ཤེས་པས༔ ཁྲག་དང་ཆུ་ཁམས་ཀྱིས་ཞི་བ༔ ཤ་དང་ས་ཁམས་ཀྱིས་རྒྱས་པ༔ དྲོད་དང་མེ་ཁམས་ཀྱིས་དབང་༔ དབུགས་དང་རླུང་ཁམས་ཀྱིས་དྲག་པོའི་ཕྲིན་ལས་ལྷུན་གྱིས་གྲུབ་པ་སྟེ༔ གཞུང་ཚིག་ནི༔ ཕུང་པོ་ལྔ་དང་
ཁམས་གསུམ་བསྡུས་པ་རྣམས༔ དེ་བཞིན་རྡོ་རྗེ་རིན་ཆེན་པདྨ་དང་༔ ལས་ཀྱི་རིགས་ཀྱི་དཔའ་བོ་དཔའ་མོའི་ཚོགས༔ གདོད་ནས་མ་སྐྱེས་རང་བཞིན་ལྷུན་གྱིས་གྲུབ༔ ཞི་རྒྱས་དབང་དྲག་ཕྲིན་ལས་ལྷུན་གྱིས་གྲུབ༔ ཞི་རྒྱས་དབང་དྲག་ཕྲིན་ལས་ལྷུན་གྱིས་གྲུབ༔ དེ་ལྟར་རང་གི་ལུས་ལ་དཀྱིལ་འཁོར་གྱི་ལྷ་ཡང་ཚང་བ་ཡིན༔ གཞལ་ཡས་ཁང་ཡང་ཚང་སྟེ་ལུས་འདོམ་གང་ནི་གྲུ་བཞི༔ ཁ་སྣ་གསང་བཤང་བཞི་ནི་སྒོ་བཞི་པགས་པ་ནི་ཡེ་ཤེས་ལྔའི་རང་བཞིན་རྩིག་པ་རིམ་པ་ལྟ་དང་འཇའ་དང་འོད་ཀྱི་རང་བཞིན་མེ་རི་ཁ་དོག་ལྟ༔ ལུས་འདི་སྐུ་གསུམ་ལྷུན་གྱིས་གྲུབ་པའི་གཞལ་ཡས་ཁང་རྒྱན་རྟ་བབས་ཡོངས་སུ་རྫོགས་པ༔ སྟེང་ན་སྐུ་གདུང་མཆོད་རྟེན་འབར་བའི་དབྱིབས་ལ་བ་སྤུ་རྣམས་ཆོས་ཀྱི་འཁོར་ལོ༔ རི་དྭགས་ཆོས་ཉན་དང་གདུགས་ཀྱི་སྟེང་དུ་ནོར་བུའི་ཏོག་འོད་འབར་བ༔ དེ་རྣམས་ཀྱི་དོན་ལུས་ལ་ཚང་བར་ཤེས་པར་བྱ་ཞིང་༔ དེ་དང་དེར་སྒོམ་དགོས་རྒྱུ་ནི་མིན༔ དེ་ལྟར་བདག་བསྐྱེད་དྲག་པོའི་སྐུར་གསལ་བའི་བ་སྤུའི་རྩེ་ནས༔ མེའི་ཚྭ་ཚྭ་སེར་བ་འབེབས་པ་ལྟར་འཕྲོས་པས་ཕྱོགས་བཅུ་རྣམས་ཀུན་ཏུ་འཁྲིགས་པ་སྟེ༔ སྒྲུབ་པ་ལ་བར་ཆད་བྱེད་པའི་བགེགས་དང་ཉུལ་ལེ་
སོགས་ཉེ་མི་ནུས་པས་རང་གི་སྐུ་ལ་སྣ་ཚོགས་རྡོ་རྗེ་རྒྱ་གྲམ་གྱི་གོ་ཁྲབ་ཧཱུྃ་ཡིག་དམར་པོའི་ཐག་པས་རྒྱུན་པར་གསོལ་བའི༔ རྒྱུ་གྲམ་གྱི་དྲྭ་མིག་རྣམས་སུ་ལྕགས་ཀྱི་སྡིག་པ་ནག་པོ་ཕྲ་མོ་ནས་འབྲས་ཙམ་གྱིས་གཏམས་པ་ནི༔ ནང་གི་བར་ཆད་བསྲུང་བའོ༔ ཞེས་པ་ནཱས༔ གུ་རུ་དྲག་པོ་མེ་རླུང་འཁྱིལ་བ་ཡི༔ ཐུགས་ཀྱི་ཡང་སྙིང་རྡོ་རྗེའི་ཕྲེང་བ་འདི་བདག་འདྲ་བུད་མེད་མཁར་ཆེན་མཚོ་རྒྱལ་གྱིས༔ སྐལ་ལྡན་ལས་ཅན་དོན་དུ་གཏེར་དུ་སྡུས༔ སྤུ་གྲི་མཆེད་གསུམ་གཏེར་གྱི་སྲུང་མར་བཅོལ༔ དགེ་བསྙེན་མཁའ་རི་ཕྱི་ཡི་བྱུ་ར་བ༔ ཐུབ་པར་སྲུངས་ཤིག་དུས་ལ་མ་བབ་བར༔ ས་མཱ་ཡ༔ རྒྱ་རྒྱ་རྒྱ༔ དུས་མཐུའི་གཏེར་སྟོན་འགྲོ་འདུལ་གླིང་ལ་གཏོད༔ ཀུན་ལ་གཅེས་པ་ལུས་ཡིན་ཏེ༔ ལུས་ལ་གཙེས་པ་སྙིང་ཡིན་ནོ༔ སྙིང་གི་དྭངས་མ་ཁྲག་དྭང་འདྲ༔ ལས་འཕྲོ་ཅན་དང་འཕྲད་པར་ཤོག༔ ས་མཱ་ཡ༔ གཏེར་སྟོན་རཏྣ་གླིང་པས་ཙཱ་རིའི་གསང་མཚོ་དམར་ནག་རཀྟའི་གཏེར་མའོ༔ ་༈ དེ་ནས་འཁོར་གྱི་ལྷ་བསྐྱེད་པ་ནི༔ བུམ་བསྐྱེད་དང་མདུན་བསྐྱེད་ཀྱི་ཚེ་འཁོར་རྣམས་གཞུང་ལྟར་དྲན་རྫོགས་སུ་སྒོམ་པས་ཆོག༔ བདག་བསྐྱེད་ཀྱི་ཚེ་
དེས་མི་ཆོག་སྟེ༔ གཞུང་ཚིག་ལས༔ ཡབ་ཡུམ་གསལ་བའི་ཐུགས་ཀ་ནས༔ ཕྱོགས་བཞི་འཁོར་ལོ་རྩིབས་བཞིའི་སྟེང་༔ ཞེས་པ་འདི་ལ་དོན་རྒྱས་འབྲིང་བསྡུས་གསུམ་ཡོད་དེ༔ གཙོ་བོ་ཡབ་ཡུམ་གཉིས་སྦྱོར་བ་བྱས་པས༔ བདེ་བའི་སྒྲ་ཧ་ཧ་སི་སི་ཀུན་ཏུ་བཛྲ་དྷིཀ་ཅེས་པའི་སྒྲས་ཕྱོགས་བཅུའི་སངས་རྒྱས་བྱང་སེམས་ཁྲོ་བོ་ཁྲོ་མོ་ཐམས་ཅད་སྤྱན་དྲངས་ནས༔ ཡབ་རྣམས་ཡབ་ཞལ་དང་ཡུམ་རྣམས་ཡུམ་ཞལ་དུ་ཞུགས༔ བྱང་སེམས་དཀར་དམར་གྱི་ངོ་བོར་ཞུ༔ ཡབ་ཀྱི་རྡོ་རྗེའི་སྲུབ་ནས་ཡུམ་གྱི་གསང་བའི་པདྨར་བབས་པས༔ བྱང་སེམས་དཀར་དམར་འདྲེས་པའི་འཁོར་གྱི་ལྷ་རྣམས་སུ་གྱུར་པ༔ སྲས་ཀྱི་ཚུལ་དུ་གསང་བའི་སྦྱོར་མཚམས་ནས་སྤྲོས་ཏེ༔ ཕྱིའི་སོ་སོའི་གདན་ལ་བཞུགས་པར་སྒོམ་པ་ནི༔ རྒྱས་པ་མངལ་འབྱིན་གྱི་ལུགས་ཏེ་བླ་མེད་རྒྱུད་ཀྱི་དགོངས་པའོ༔ འབྲིང་གིས་རང་གཙོ་བོའི་ཐུགས་ཀ་ནས༔ འཁོར་ལྷ་རྣམས་རིམ་པར་སྤྲོས་ཏེ་གདན་ལ་འཁོད་པ་ནི་རྣལ་འབྱོར་རྒྱུད་ཀྱི་དགོངས་པའོ༔ བསྡུས་པ་སྦྱོར་མཚམས་ནས་སྤྲོའམ་ཐུགས་ཀ་ནས་སྤྲོ་ཡང་རུང་སྟེ༔ ས་བོན་སོ་སོའི་ཡིག་འབྲུ་སྤྲོ་བ་ལས་ལྷ་དེ་དང་དེའི་སྐུར་སྒོམ་
པ་ཡིན་ཏེ༔ མཁའ་འགྲོ་སྡེ་བཞི་ལ་ཧ་རི་ནི་ས་སྒོ་མ་བཞི་ལ་ཛཧཱུྃ་བཾ་ཧོ༔ གཞན་ཐམས་ཅད་ཧཱུྃ་རང་མདོག་ཡིན་ནོ༔ དབུས་ཀྱི་གཙོ་བོ་ཡབ་ཡུམ་ནི་གཟུགས་ཀྱི་ཕུང་པོ་དང་ནམ་མཁའ་རྣམ་པར་དག་པ༔ རྣམ་པར་སྣང་མཛད་དང་དབྱིངས་ཕྱུག་མའི་ངོ་བོ་ཡིན་ལ༔ དེ་ནི་དཀྱིལ་འཁོར་གྱི་དབུས་ཆོས་འབྱུང་པད་ཉི་རོའི་སྟེང་ན་བཞུགས་པ༔ དེ་རྒྱབ་ཏུ་དཀྱིལ་འཁོར་ཟླ་གམ་དམར་པོ་སྒོ་ཅིག་པ༔ དེ་ནི་གཟིམ་ཆུང་ལྟ་བུ་སྟེ༔ དཀྱིལ་འཁོར་དབུས་མ་ཟླ་གམ་སྒོ་གཅིག་གི་ནང་ན་གཙོ་བོ་ཡབ་ཡུམ་གཉིས་ལས་གཞན་མེད༔ དེ་རྒྱབ་དེའི་རྩིག་པའི་རྩ་བར་ཐོད་པའི་ཕྲེང་བས་བསྐོར་བ༔ དེ་རྒྱབ་རྩིབས་བཞི་དང་༔ བརྒྱད་དང་བཅུ་རྣམས་ནང་མ་རྣམས་ཅུང་ཟད་མཐོ་ཞིང་ཕྱི་མ་རྣམས་རིམ་གྱིས་དམའ་བ༔ སྟན་ཆེ་ཆུང་གསུམ་བརྩེགས་པ་ལྟ་བུའོ༔ འཁོར་ལོ་རྩིབས་བཞིའི་སྟེང་༔ ཤཱར་དུ་རྣམ་ཤེས་ཀྱི་ཕུང་པོ་དང་ཞེ་སྡང་རྣམ་པར་དག་པ་བཅོམ་ལྡན་འདས་རྡོ་རྗེ་སེམས་དཔའི་ངོ་བོ་རྡོ་རྗེ་དྲག་པོ་རྟུལ་སྐུ་མདོག་དཀར་པོ༔ ཕྱག་གཡས་ཞེ་སྡང་འཇོམས་པའི་རྡོ་རྗེ་ཕྱར་ཞིང་༔ གཡོན་ཞེ་སྡང་ལས་གྱུར་པའི་གདོན་རྣམས་འདུལ་བའི་གནམ་ལྕགས་ཀྱི་སྡིག་པ་གདེངས་ཐབས
སུ་འཛིན་པ༔ ལྷོར་ཚོར་བའི་ཕུང་པོ་དང་ང་རྒྱལ་རྣམ་པར་དག་པ་བཅོམ་ལྡན་འདས་རིན་ཆེན་འབྱུང་ལྡན་གྱི་ངོ་བོ་ར་དྲག་པོ་རྩལ༔ སྐུ་མདོག་སེར་ལ་ཅུང་ཟད་ནག་པའི་མདངས་ཅན༔ གཡས་ང་རྒྱལ་འཇོམས་པའི་རྡོ་རྗེ་ཕྱར་ཞིང་༔ གཡོན་ང་རྒྱལ་ལས་གྱུར་པའི་གདོན་རྣམས་འདུལ་བའི་སྡིག་པ་གདེངས་ཐབས་སུ་འཛིན་པ༔ ནུབ་ཏུ་འདུ་ཤེས་ཀྱི་ཕུང་པོ་དང་འདོད་ཆགས་རྣམ་པར་དག་པ་བཅོམ་ལྡན་འདས་སྣང་བ་མཐའ་ཡས་ཀྱི་ངོ་བོ་པདྨ་དྲག་པོ་རྩལ༔ སྐུ་མདོག་དམར་པོ་གཡས་འདོད་ཆགས་འཇོམས་པའི་རྡོ་རྗེ་ཕྱར་ཞིང་༔ གཡོན་འདོད་ཆགས་ལས་གྱུར་པའི་གདོན་འདུལ་བའི་སྡིག་པ་གདེངས་ཐབས་སུ་འཛིན་པ༔ བྱང་དུ་འདུ་བྱེད་ཀྱི་ཕུང་པོ་དང་ཕྲག་དོག་རྣམ་པར་དག་པ་བཅོམ་ལྡན་འདས་དོན་ཡོད་གྲུབ་པའི་ངོ་བོ་ཀརྨ་དྲག་པོ་རྩལ༔ སྐུ་མདོག་ལྗང་ནག་གཡས་ཕྲག་དོག་འཇོམས་པའི་རྡོ་རྗེ་ཕྱར་ཐབས་སུ་འཛིན་ཅིང་༔ གཡོན་ཕྲག་དོག་ལས་གྱུར་པའི་གདོན་འདུལ་བའི་སྡིག་པ་གདེངས་ཐབས་སུ་འཛིན་པ༔ དེ་ལྟར་དྲག་པོ་ལྷ་བཞི་ཀུན་ཀྱང་ཁྲོ་བོའི་ཆ་ལུགས་དང་ལྡན་ཞིང་༔ གཏུམ་ལ་རྔམ་ཞིང་བརྗིད་པ་སོགས་འབར་བའི་གར་དགུ་
དང་ལྡན་ཞིང་༔ དུར་ཁྲོད་ཀྱི་ཆས་བརྒྱད་དང་དཔལ་གྱི་ཆས་བཅུ་རྫོགས་པ་ཡེ་ཤེས་ཀྱི་མེ་འབར་བའི་སྐུར་བསྒོམ༔ དེའི་ཕྱི་རིམ་འཁོར་ལོ་རྩིབས་བརྒྱད་ལ༔ ཤཱར་དུ་ཆུ་ཁམས་དང་ཁྲག་རྣམ་པར་དག་པ་མེ་ལོང་ཡེ་ཤེས་ཀྱི་ངོ་བོ༔ རྡོ་རྗེ་མཁའ་འགྲོ་མ་སྐུ་མདོག་དཀར་མོ་གཡས་རྡོ་རྗེའི་ཡུ་བ་བྱས་པའི་གྲི་གུག་དང་༔ གཡོན་ཐོད་ཁྲག་འཛིན་པ༔ ལྕོར་ས་ཁམས་དང་ཤ་རྣམ་པར་དག་པ༔ མཉམ་ཉིད་ཡེ་ཤེས་ཀྱི་ངོ་བོ་རིན་ཆེན་མཁའ་འགྲོ་མ་སྐུ་མདོག་སེར་མོ༔ གཡས་རིན་པོ་ཆེས་ཡུ་བ་བྱས་པའི་གྲི་གུག་དང་༔ གཡོན་ཐོད་ཁྲག་འཛིན་པ༔ ནུབ་ཏུ་མེ་ཁམས་དང་དྲོད་རྣམ་པར་དག་པ་སོར་རྟོག་ཡེ་ཤེས་ཀྱི་ངོ་བོ་པདྨ་མཁའ་འགྲོ་མ༔ སྐུ་མདོག་དམར་མོ་གཡས་པདྨས་ཡུ་བ་བྱས་པའི་གྲི་གུག་དང་༔ གཡོན་ཐོད་ཁྲག་འཛིན་པ༔ བྱང་དུ་རླུང་ཁམས་དང་དབུགས་རྣམ་པར་དག་པ་བྱ་གྲུབ་ཡེ་ཤེས་ཀྱི་ངོ་བོ༔ ཀརྨ་མཁའ་འགྲོ་མ་སྐུ་མདོག་ལྗང་ནཱག་གཡས་རྡོ་རྗེ་རྒྱ་གྲམ་གྱིས་ཡུ་བ་བྱས་པའི་གྲི་གུག་དང་༔ གཡོན་ཐོད་ཁྲག་འཛིན་པ༔ རིགས་བཞིའི་མཁའ་འགྲོ་དེ་དག་ཀུན་ཀྱང་དབུ་སྐྲ་སིལ་མས་སྐུ་རྒྱབ་ནོན་པོ༔ བཅུ་དྲུག་ལོན་པའི་ན་ཚོད་སྒྲིག་ཅིང་བཞད་པ་ཁྲོ་ཞིང་
འཛུམ་པ༔ ཞབས་གཡས་བརྐྱང་ཞིང་གཡོན་བསྐུམས་པས་པད་ཉི་དང་རོའི་གདན་ལ་འདོར་ཐབས་སུ་བསྒྲད་པ༔ སྐུ་སྟོད་ལ་མི་ལྤགས་ཀྱི་གཡང་གཞིའི་ན་བཟའ་དང་༔ སྐུ་སྨད་ལ་སྟག་ལྤགས་ཀྱི་ཤམ་ཐབས་གཉིས་ནི༔ གསར་པ་ཁྲག་དང་བཅས་པ༔ སྐུ་ལ་རུས་པའི་རྒྱན་དྲུག་ཁྲ་ཆེམས་སེ་སྤྲས་པར་བསྒོམ༔ ཤར་ལྷོར་དུས་མིན་འཆི་བ་དང་གཤིན་རྗེའི་ཕོ་ཉ་ཟློག་པའི་ལྷ༔ གཤིན་རྗེའི་གཤེད་ཚེ་བདག་སྐུ་མདོག་སེར་ལ་ནཱག་པའི་མདངས་ཅན་འོད་འབར་བ༔ ཕྱག་གཡས་འཁོར་ལོ་རྩིབས་བརྒྱད་བསྐོར་བས་གནོད་བྱེད་དུམ་བུར་གཏུབ་ཅིང་༔ གཡོན་ལྕགས་ཀྱུས་གནོད་བྱེད་ཀྱི་སྙིང་ནས་བཟུང་ཞིང་༔ ཞགས་པས་མགུལ་ནས་འཛིན་པ༔ ལྷོ་ནུབ་ཏུ་སྣང་སྲིད་ལྷ་འདྲེ་ཟིལ་གྱིས་གནོན་མཛད་ཐུགས་རྗེ་ཁྲོས་མ་ནག་མོ་སྒོམ་པ་ནི༔ སྐུ་མདོག་མཐིང་ནག་གཡས་གྲི་གུག་དང་གཡོན་ཐོད་ཁྲག་འཛིན་ཅིང་ཁུཊཾ་ག་ལ་འཁྱུད་ནས་གར་མཛད་པ༔ དབུ་སྐྲ་སྤྲིན་ལྟར་འཁྲིགས་པའི་གསེབ་ནས་ཕག་སྐད་ངུར་བས་སྣང་སྲིད་གཡོ་ཞིང་འགུལ་བར་བསྒོམ༔ ནུབ་བྱང་དུ་བདུད་དང་དམ་སྲི་འདུལ་བའི་ལྷ་རྡོ་རྗེ་གཞོན་ནུ་བཛྲ་ཀཱི་ལ་ཡ་སྐུ་མདོག་ལྗང་ནག་ཕྱག་གཉིས་
ཕུར་པ་འདྲིལ་ཞིང་གནོད་བྱེད་ལ་འདེབས་པ༔ བྱང་ཤར་དུ་བྱད་ཁ་རྦོད་གཏོང་ཟློག་པའི་ལྷ༔ མཁའ་འགྲོ་སེང་གདོང་མ་སྐུ་མདོག་མཐིང་ནཱག་གྲི་གུག་ཐོད་ཁྲུག་འཛིན་ཅིང་ཁའི་ག་ལ་འཁྱུད་ནས་གར་སྟབས་སུ་བཞུགས་པ༔ དེ་ལྟར་ཕྲིན་ལས་བསྒྲུབ་པའི་ལྷ་བཞི་ཀ་ཀུན་ཀྱང་༔ པད་ཉི་བམ་གྱི་གདན་ལ་བཞུགས་ཤིང་སྐུ་ལ་དུར་ཁྲོད་ཀྱི་ཆས་བརྒྱད་གསོལ་ནས་ཡེ་ཤེས་ཀྱི་མེ་དཔུང་གི་ཀློང་དུ་བཞུགས་པར་བསྒོམ༔ དེའི་ཕྱི་རིམ་རྩིབས་བཅུ་ལ་སངས་རྒྱས་ཐམས་ཅད་ཀྱི་ཕ་རོལ་ཏུ་ཕྱིན་པ་བཅུའི་རང་གཟུགས༔ རང་གི་རྐང་ལག་གི་ལྷུ་བརྒྱད་མགོ་དང་གསང་གནས་ཏེ་བཅུ་རྣམ་པར་དག་པའི་རང་གཟུགས་ལས་བྱུང་བ༔ ཟིལ་གནོན་ཁྲོ་བོའི་རྒྱལ་པོ་བཅུ་བསྒོམ་པ་ནི༔ ནང་སྒྲུབ་ཀྱི་ཁྲོ་བཅུ་ནི་འདིར་སྦྱར་བར་མི་འཐད་དེ༔ གཙོ་བོ་ཞལ་གཅིག་ཕྱག་གཉིས་ཡིན་པའི་ཕྱིར༔ འདིར་གསང་སྒྲུབ་ལས་བྱུང་བ་ལྟར་ཁྲོ་བཅུ་བསྐྱེད་དེ༔ ཤར་སྟོད་དུ་ཧཱུྃ་ཀཱ་ར་སྐུ་མདོག་སྔོན་པོ་ཞལ་གཅིག་ཕྱག་གཉིས་མདའ་གཞུ་འཛིན་པ༔ ཤར་སྨད་དུ་རྣམ་རྒྱལ་དཀར་པོ་གཡས་འཁོར་ལོ་དང་གཡོན་ཁཊྭཱྃ་འཛིན་པ༔ ཤར་ལྷོར་དབྱུག་སྔོན་ཅན་སྔོན་པོ་གཡས་དབྱུག་ཏོ་དང་གཡོན་མེ་དཔུང་
འཛིན་པ༔ ལྷོར་གཤིན་རྗེའི་གཤེད་སྔོན་པོ་གཡས་བེ་ཅོན་དང་གཡོན་སྣ་མོ་འཛིན་པ༔ ལྷོ་ནུབ་ཏུ་མི་གཡོ་མགོན་པོ་སྨུག་ནག་གཡས་རལ་གྲི་དང་གཡོན་སྦྲུལ་ཞགས་འཛིན་པ༔ ནུབ་ཏུ་རྟ་མགྲིན་དམར་པོ་གཡས་དབྱུག་ཏོ་དང་གཡོན་ལྕགས་སྒྲོག་འཛིན་པ༔ ནུབ་བྱང་དུ་འདོད་རྒྱལ་དམར་སྐྱ་རྡོ་རྗེ་དང་ནེའུ་ལེ་འཛིན་པ༔ བྱང་དུ་བདུད་རྩི་འཁྱིལ་པ་ལྗང་ནག་རྒྱ་གྲམ་དང་དྲིལ་བུ་འཛིན་པ༔ བྱང་ཤར་དུ་ཁམས་གསུམ་རྣམ་རྒྱལ་སྔོ་སྐྱ་འཁོར་ལོ་དང་ཞགས་པ་འཛིན་པ༔ བྱང་ཤར་སྨད་དུ་སྟོབས་པོ་ཆེ་ལྗང་ནག་གཡས་སྟ་རེ་དང་གཡོན་ཐོད་དབྱུག་འཛིན་པ༔ ཀུན་ཀྱང་ཁྲོ་བོའི་ཆས་བཅུ་དང་ལྡན་པ༔ གཡས་བསྐུམ་གཡོན་བརྐྱང་ཕྱོགས་སྐྱོང་གི་གདན་ལ་བཞུགས་པའོ༔ ཞེས་གསུངས་པ་ལྟར་སྒོམ་སྟེ༔ གལ་ཏེ་སོ་སོར་དམིགས་པ་ཟིན་དཀའ་ན་ཡང་༔ འདིའི་རྡུལ་ཚོན་གྱི་སྐབས་སུ་རྩིབས་བཅུ་ཐམས་ཅད་སྔོན་པོར་གསུངས་པ་ལྟར༔ གཏེར་གོང་མའི་ཁྲོ་བཅུ་ཐམས་ཅད་མཚུངས་པའི་སྐུ་མདོག་མཐིང་ནག་རྡོ་རྗེའི་ཐོ་བ་དང་ལྕགས་ཀྱུ་འཛིན་པར་གསུངས་པ་ལྟར་ཁྲོ་བོ་བཅུ་ཀ་སྐུ་མདོག་མཐིང་ནག་རབ་ཏུ་འཇིགས་པ༔ ཁྲོ་བོའི་རྒྱལ་པོའི་ཆས་རྣམས་
ཡོངས་སུ་རྫོགས་ཤིང་༔ ཡེ་ཤེས་ཀྱི་མེ་དཔུང་འབར་བའི་སྐུ་གོང་དུ་བཤད་པའི་རང་རྟགས་ཀྱི་ཕྱག་མཚན་སྣ་ཚོགས་འཛིན་པའམ༔ བསྡུ་ན་གཡས་ཐམས་ཅད་རྡོ་རྗེ་ཐོ་བ་དང་གཡོན་ཐམས་ཅད་ལྕགས་ཀྱུ་འཛིན་པ༔ ཁྲོ་བོ་བཅུ་ཀ་ཀུན་ཀྱང་ཧཱུྃ་གི་སྒྲ་འབྲུག་སྟོང་དུས་གཅིག་ལྡིར་བ་ལྟར་སྒྲོག་ཅིང་སྲུང་བའི་དུས་སུ་ཞལ་ནང་དུ་གཟིགས༔ ཟློག་པའི་དུས་སུ་ཞལ་ཕྱིར་གཟིགས་ནས་བཞུགས་པར་བསྒོམ༔ དཀྱིལ་འཁོར་ཆེན་པོའི་སྒོ་བཞི་རུ༔ ལྕགས་ཀྱུ་ཞགས་པ་ལྕགས་སྒྲོག་དྲིལ༔ ཞེས་པ་ནི༔ ཤར་སྒོར་སྟག་གདོང་མ་དཀར་མོ་ལྕགས་ཀྱུ་འཛིན་པ༔ ལྷོ་སྒོར་ཕག་གདོང་མ་སེར་མོ་ཞགས་པ་འཛིན་པ༔ ནུབ་སྒོར་སྤྲེལ་གདོང་མ་དམར་མོ་ལྕགས་སྒྲོག་འཛིན་པ༔ བྱང་སྒོར་སྤྱང་གདོང་མ་ལྗང་གུ་དྲིལ་བུ་འཛིན་པ་ཕྲིན་ལས་བཞི་ལ་མངའ་བརྙེས་པའི་ཚུལ་དུ་བསྐྱེད་དོ༔ གཞན་ཡང་ལྷ་དང་རིག་འཛིན་ཚོགས༔ དཔག་མེད་སྤྲིན་ཚོགས་ལྟ་བུར་གཏིབས༔ ཞེས་པ་འདི་ལ་གནད་ཆེན་པོ་ཡོད་དེ༔ གསར་མ་སོགས་ཕལ་ཆེར་གྱི་ལུགས་ལ༔ ཡི་དམ་གཅིག་གི་དཀྱིལ་འཁོར་དང་མངོན་རྟོགས་བསྒོམས་ན༔ དེའི་ཆོ་ག་རྫོགས་ནས་མ་བསྡུས་ཀྱི་བར་དུ་གཞན་འདོན་
སྲོལ་མེད༔ འདི་ཡི་ལུགས་ལ་རྩ་བའི་ཡི་དམ་གུར་དྲག་ལྟ་བུའི་དཀྱིལ་འཁོར་བསྐྱེད་ནས༔ མཆོད་བསྟོད་དང་བསྙེན་པ་ཚར་རྗེས༔ རང་ཉིད་དྲག་པོའི་བདག་བསྐྱེད་ཀྱི་དཀྱིལ་འཁོར་གྱི་ཕྱི་རྡོ་ར་དུར་ཁྲོད་ཀྱི་ནང་གི་མཚམས་དེར་ཕུར་པ་བཀའ་བརྒྱད་རྟ་མགྲིན་སོགས་ཡི་དམ་གཞན་མང་པོའི་བདག་བསྐྱེད་ཀྱི་དཀྱིལ་འཁོར་བསྒོམ་སྟེ༔ དེ་ཡང་རྩ་བའི་དཀྱིལ་འཁོར་གྱི་ལྷོ་སྨད་དང་༔ ནུབ་དང་བྱང་སྟོད་ངོས་སུ་བདག་བསྐྱེད་མང་པོ་ཛྷེ༔ མདུན་བསྐྱེད་གཙོ་བོ་དྲག་པོའི་དཀྱིལ་འཁོར་གྱི་མཐའ་བསྐོར་དུ་ཡང་༔ དེ་རྣམས་ཀྱི་མདུན་བསྐྱེད་ཀྱི་དཀྱིལ་འཁོར་རྣམས་དང་ཆོས་སྐྱོང་གཏོར་མགྲོན་རྣམས་བྷེ༔ དེ་ལྟར་བྱས་པས་གུར་དྲག་ལྟ་བུ་རྩ་བའི་ཡི་དམ་གྱིས་ཁོག་ནས་ཡི་དམ་ཆོས་སྐྱོང་མང་པོའི་ལས་བྱང་འདོན༔ དེ་ནས་རྩ་བའི་ཡི་དམ་གུར་དྲག་ལྟ་བུའི་ཚོགས་བྱས་པས་ཐམས་ཅད་ཀྱི་ཚོགས་གོ་ཆོད༔ བསྐང་བ་བྱིན་བརླབས་གཅིག་བྱས་ལ་བསྣང་བ་མཐའ་དག་འདོན་ཆོག༔ གཏོར་འབུལ་གཅིག་བཤམས་བཀུག་གཞུག་བྱས་ལ་ཆོས་སྐྱོང་གང་ཡོད་ཀྱི་གཏོར་འབུལ་འདོན་ཅིང་༔ རྩ་བའི་གུར་དྲག་གི་ཆད་མདོ་གཏོར་སྐྱོང་བྱས་པས་ཆད་མདོ་གཏོར་
སྐྱོང་ཐམས་ཅད་ཀྱི་གོ་ཆོད༔ མཐར་རྩ་བའི་ཡི་དམ་གཅིག་གི་རྗེས་ཆོག་བྱས་པས་རྗེས་ཆོག་ཐམས་ཅད་ཀྱི་གོ་ཆོད་པ་སྟེ༔ ཐུགས་སྒྲུབ་ལས་ཀྱང་༔ ཕྱི་རིམ་བར་ཁྱམས་འཁོར་ཡུག་ལ༔ བདག་སྐྱོབ་ལྷ་དང་རིག་འཛིན་ཚོགས༔ ཞེས་དང་༔ ཨོ་རྒྱན་རིན་པོ་ཆེའི་ཞལ་ནས༔ རྒྱལ་བ་གཅིག་གི་དཀྱིལ་འཁོར་དུ༔ རྒྱལ་བ་ཀུན་གྱི་ལས་གཞུང་བསྲང་བདེ་གཤེགས་གཅིག་བསྒྲུབ་ཀུན་གྱི་ངང་༔ ཞེས་གསུངས་པའི་དོན་ཡིན་ཏེ༔ གུ་རུ་ཆོས་དབང་དང་རཏྣ་གླིང་པ་ཟངས་མདོག་དཔལ་རིར་བྱོན་དུས༔ སྒྲུབ་ཆེན་གྱི་དཀྱིལ་འཁོར་རེ་རེ་ལ་ཡང་དེ་ལྟར་ལྷ་མང་པོའི་དཀྱིལ་འཁོར་གཏོང་ཞིང་འདུག་གསུངས༔ འོ་ན་མདུན་བསྐྱེད་ནི་དེ་ལྟར་ལྷ་མང་པོ་བྷེ་རུང་གི༔ བདག་བསྐྱེད་ནི་སྐད་ཅིག་སྐད་ཅིག་ལ་གནས་འགྱུར་བ་ཡིན་གྱི༔ བདག་བསྐྱེད་མང་པོ་གཅིག་བསྒོམ་པ་གང་ལས་བཤད་ཅེ་ན༔ བཀའ་བརྒྱད་བདག་བསྐྱེད་ཀྱི་སྐབས་སུ་དཔལ་དགུ་ཀ་བདག་བསྐྱེད་ཡིན་པ་དང་༔ དགོངས་འདུས་བདག་བསྐྱེད་ཀྱི་སྐབས་སུ་གཙོ་བོ་བཅུ་ཀ་བདག་བསྐྱེད་ཡིན་པ་དང་༔ ཞི་ཁྲོ་བདག་བསྐྱེད་ཀྱི་སྐབས་སུ་ཀུན་བཟང་རིགས་ལྔ་ཁྲག་འཐུང་རིགས་དྲུག་རྣམས་བདག་བསྐྱེད་ཡིན་
ཅིང་༔ གསར་མའི་ཀུན་རིག་བདག་བསྐྱེད་ཀྱི་སྐབས་སུ་ཡང་ལྷ་ཐམས་ཅད་བདག་ཉིད་ཡིན་པར་བསྒོམས་ནས་སྔགས་བཟླ་བར་བཤད་པ་དང་༔ བདག་བསྐྱེད་མང་པོ་བསྒོམ་ཞིང་བསྙེན་པའི་ཚེ་ལྷ་དེ་དང་དེའི་ང་རྒྱལ་བཟུང་བ་ཡིན་ནོ༔ དེ་དག་ཐམས་ཅད་ཀུན་ཀྱང་སོ་སོར་མ་འདྲེས་པ་འཇའ་ཚོན་ལྟ་བུར་གསལ་བས༔ དེ་དག་སོ་སོར་དཀྱིལ་འཁོར་ཡོངས་སུ་རྫོགས་པར་ཆ་རེ་རེ༔ དེ་ཡང་གཙོ་བོ་དྲག་པོའི་དཀྱིལ་འཁོར་ནི༔ གུར་ཆེན་པོ་ཕུབ་པ་ལྟ་བུ་ལ༔ གཞན་དཀྱིལ་འཁོར་རྣམས་གུར་དེ་ལ་ཅོག་པུ་མང་པོས་བསྐོར་བ་ལྟ་བུ༔ བདག་མདུན་གཉིས་ནི་དེ་འདྲ་གཉིས་ཕན་ཚུན་སྒོ་སྤྲོད་དུ་སྒར་བརྒྱབ་པ་ལྟ་བུར་བསྒོམ༔ དེའི་གནད་ཀྱིས་རྙིང་མ་པ་རྣམས་ཀྱིས་སྔར་ནས་ལས་བྱང་མང་པོ་དུས་གཅིག་འདོན་ཆོག་པ་དེའི་དོན་ཡིན་ནོ༔ གསར་མ་བ་རྣམས་ཀྱིས་ནི་ཡི་དམ་གང་ཡིན་གཅིག་གི་བདག་བསྐྱེད་འདོན་ནས༔ དེ་ལ་མདུན་བསྐྱེད་ཆོས་སྐྱོང་གི་གཏོར་མགྲོན་སྦྱར་བ་ཙམ་ལས༔ ཡི་དམ་གཅིག་གི་དཀྱིལ་འཁོར་བསྡུ་ཆོག་མ་ཚར་བར་ཡི་དམ་གཞན་འདོན་སྲོལ་མེད༔ བཏོན་ན་ལྷ་རྒྱབ་མས་སྔོན་མ་མནན་པ་འདྲ་ཞིག་འོང་ཟེར༔ དེ་ནི་ཅུང་
ཞིག་རྟོགས་པ་དམའ་བའི་དབང་དུ་ཡིན༔ རྟོགས་པ་མཐོ་བས་ལྷ་སྔོན་མ་རྒྱབ་མའི་སྐུར་གནས་འགྱུར་རུང་ཟེར༔ འོན་ཀྱང་གྲྭ་ས་ཆེན་པོ་རྣམས་སུ་ནི་དཀྱིལ་འཁོར་གཅིག་གི་བསྡུ་ཆོག་མ་ཚར་བར་ལྷ་གཞན་འདོན་སྲོལ་མེད་དོ༔ དེ་ནས་འདིའི་ལུགས་ལ་དེ་ལྟར་མངོན་རྟོགས་གཅིག་གིས་བདག་མདུན་ཆ་གཉིས་སམ་བུམ་བསྐྱེད་གཏོར་བསྐྱེད་སོགས་ཆ་བཞི་དུས་གཅིག་ལ་བསྐྱེད་ལ་བསྐྱེད་པ་དེ་བརྟན་པའི་ཕྱིར་སྔགས་ཀྱིས་བྱིན་གྱིས་བརླབ་པ་ནི༔ བཛྲ་གུ་རུ་ཀྲོ་དྷ་ནི་རྡོ་རྗེ་སློབ་དཔོན་ཁྲོས་པ༔ སརྦ་ས་མ་ཡ་ནི་དམ་ཚིག་ཐམས་ཅད༔ ཨ་མི་དྷེ་ཝཱ་འོད་ཀྱི་ལྷ༔ ཁྲོ་གྲྭ་རུ་ཏུ་བྱ་ཁྱུང་༔ ཡ་མཱནྟ་ཀྲྀ་གཤིན་རྗེ་མཐར་བྱེད༔ བྱཱ་གྷི་ཝ་རྟ་མགྲིན༔ བཛྲ་པཱ་ཎི་ལག་ན་རྡོ་རྗེ༔ ཧ་རི་ནི་ས་མཁའ་འགྲོ་སྡེ་བཞིའི་སྲོག་ཡིག༔ བཛྲ་ཡཀྵ་རྡོ་རྗེ་གནོད་སྦྱིན༔ ཡ་མ་རཱ་ཛ་གཤིན་རྗེའི་རྒྱལ་པོ༔ བཛྲ་བྷ་ར་ཧཱི་ནི་རྡོ་རྗེ་ཕག་མོ༔ བཛྲ་ཀཱི་ལ་ཡ་ཕུར་པ༔ སེང་ཧ་མུ་ཁ་སེང་གདོང་མ༔ བཛྲ་ས་མ་ཡ་ཧཱུྃ་ནི་རྡོ་རྗེའི་དམ་ཚིག་མཆོག༔ དེ་ལྟར་ལྷ་བྷི་པ་དེ་བྱིན་གྱིས་བརླབས་ནས༔ ལུང་ཨ་ནུ་ཡོ་ག་དང་རྫོགས་པ་ཆེན་པོ་ཨ་ཏི་ཡོ་ག་ལྟར་ན༔ རང་གི་སེམས་ཉིད་ལྷ་ཡེ་ཤེས་པ་ཡིན་གྱི༔
གཞན་ནས་སྤྱན་འདྲེན་རྒྱུ་མེད༔ ལྷ་ཡེ་ཤེས་པ་ལ་རྣམ་པར་རྟོག་པ་མེད་པས་སྤྱན་འདྲེན་བྱས་ཀྱང་གཤེགས་པ་དང་བཞུགས་པའི་མཚན་མ་མི་མངའ་བས༔ ཆུ་ཟླ་ན་དུ་གར་དམིགས་དེར་སྣང་བ༔ ཞེས་གསུངས༔ དྲན་རྫོགས་སུ་ལྷའི་སྐུར་གསལ་བཏབ་པ་ཙམ་གྱིས་དམ་ཡེ་དབྱེར་མེད་ཡིན་པར་བཞེད་པས༔ རྫོགས་ཆེན་ལུགས་འགའ་ཞིག་ལ་སྤྱན་འདྲེན་མེད་པ་མང་ན་ཡང་༔ འདི་ནི་བསྐྱེད་པ་མ་ཧཱ་ཡོ་གའི་ལུགས༔ གསང་སྔགས་ཕྱི་པའི་རྒྱུད་གསུམ་དང་ཡང་སྒོ་བསྟུན་ཏེ༔ སྤྱན་འདྲེན་པ་ནི༔ དེ་ནས་ཤ་ཆེན་དང་གུ་གུལ་སོགས་སྤོས་བསྲེགས་ཤིང་༔ རྔ་དང་རོལ་མོས་བྱིན་ཕབ་ཅིང་༔ སྙན་པའི་དབྱངས་ཀྱིས་སྤྱན་འདྲེན་པ་ནི༔ དེ་ཡང་རྫོགས་པའི་སངས་རྒྱས་ཐམས་ཅད་ཀྱིས་ཉིན་ལན་གསུམ་མཚན་ལན་གསུམ་དུ་སངས་རྒྱས་ཀྱི་སྤྱན་གྱིས་སོ་སོར་གཟིགས་པས༔ དཀྱིལ་འཁོར་དང་མཆོད་གཏོར་བཤམས་པ་ཡང་གཟིགས་སོ༔ རྡོ་རྗེའི་སྙན་གྱིས་དུས་རྟག་ཏུ་སེམས་ཅན་ཐམས་ཅད་ཀྱི་ངག་ནས་ཅི་སྨྲས་ཚད་མ་འདྲེས་པར་སོ་སོར་གསན་པས༔ སྤྱན་འདྲེན་གྱི་ཚིག་འདི་རྣམས་ཀྱང་གསན་ནོ༔ རྡོ་རྗེའི་ཐུགས་ཀྱིས་སེམས་ཅན་ཐམས་ཅད་ཀྱི་
ཡིད་ལ་རྣམ་རྟོག་ཅི་འགྱུས་ཚད་མ་འདྲེས་པ་སོ་སོར་དགོངས་པས༔ དད་གུས་ཀྱིས་སྤྱན་འདྲེན་མཆོད་བསྟོད་བྱེད་པ་ཡང་དགོངས་སོ༔ དེས་ན་བདག་མདུན་ལྷ་ཐམས་ཅད་ཀྱི་ཐུགས་ཀའི་ས་བོན་ལས་འོད་ཟེར་ཁ་དོག་སྣ་ཚོགས་དམར་པོ་ཤས་ཆེ་བ་ཉི་མའི་ཟེར་ལྟ་བུ་རྩེ་མོ་ལྕགས་ཀྱུའི་དབྱིབས་སུ་ཡོད་པ་སངས་རྒྱས་ཀྱི་ཞིང་ཐམས་ཅད་དུ་ཁྱབ་པར་འཕྲོས་པས༔ ལྷ་སོ་སོའི་ཐུགས་ཀར་འོད་ཟེར་དེས་རེག་པ་ཙམ་གྱིས༔ སྔོན་གྱི་ཐུགས་བསྐྱེད་དང་སྨོན་ལམ་དང་ཐུགས་དམ་གྱི་དམ་ཚིག་རྗེས་སུ་དྲན་ནས༔ རང་རང་གི་འཁོར་ཚོགས་དཔག་ཏུ་མེད་པ་དང་བཅས་ཏེ་མདུན་གྱི་ནམ་མཁར་བྱོན་པར་བྷོ་ཞིང་༔ ཧཱུྃ་ཞེས་ཐུགས་སྲོག་ནས་བོས་ཏེ༔ ཡུལ་གྱི་མིང་ནི་ཐུབ་པས་མདོ་ལང་ཀར་གཤེགས་པ་ནས་གསུངས་པའི་ལངྐའི་ཡུལ་ཞེས་ཀྱང་བྱ༔ ནུབ་ཕྱོགས་ཨོ་རྒྱན་ཡུལ་དང་ཐག་ཉེ་བར་རྒྱ་མཚོས་ཆོད་པའི་ཕར་ཀ་དེ་ཡིན་པས༔ ཨོ་རྒྱན་ཟངས་གླིང་ཞེས་ཀྱང་བྱ༔ འཛམ་བུ་གླིང་གི་གླིང་གཡོག་ཡིན་པས༔ རྔ་ཡབ་གླིང་ཞེས་ཀྱང་བྱ༔ གླིང་དེའི་མི་ཐམས་ཅད་ནི་སྲིན་པོ་ཁོ་ན་ཡིན་པས༔ རཀྵ་སྲིན་པོའི་ཡུལ་ཞེས་ཀྱང་བྱ༔ སྲིན་པོའི་ཡུལ་གླིང་ཆེན་པོ་དགུའི་དབུས་སུ་མཚོ་ཆེན་པོ་གཡུའི་
མདོག་འདྲ་བ་ཞིག་ཡོད༔ དེའི་དབུས་ན་ཟངས་ཀྱི་མདོག་ཅན་དཔལ་གཏོར་ཟུར་གསུམ་རྩེ་མོ་བྲེག་པ་འདྲ་བའི་རི༔ དེ་ནི་སྔོན་དུས་རུ་ཏྲ་བསྒྲལ་དུས་གསང་སྔགས་གང་དུ་འབྱོན་པའི་གནས་དམོད་བོར་ནས༔ རུ་དྲའི་ཤ་ཁྲག་དོན་སྙིང་རྣམས་ནམ་མཁའ་ལ་གཏོར་ནས༔ རུ་དྲའི་སྙིང་དེར་བབ་པ་ནི་རི་དེ་ཡིན་པས༔ གསང་སྔགས་འབྱོན་པའི་གནས་ཀྱི་མཆོག་ཏུ་སངས་རྒྱས་རྣམས་ཀྱིས་བྱིན་གྱིས་བརླབས་པར་ཡིན་པར་ཁ་ཅིག་གིས་འདོད༔ ཙིཏྟ་ཨོ་རྒྱན་ཡུལ་དུ་བབ་པ་ལས་ཞེས་པའི་དོན་ཡིན་ཏེ༔ ཨོ་རྒྱན་ཟངས་གླིང་གི་ཡུལ་ཡིན་པའོ༔ ཁ་ཅིག་གིས་དེ་ནི་མ་ཡིན་ཏེ༔ སྙིང་རྒྱ་གར་རྡོ་རྗེ་གདན་དུ་བབ་པ་ཡིན༔ ཙིཏྟ་མ་ཡིན་ཅི་ཏ་ཡིན་ཏེ་ཅི་ཏ་ནི་རུ་ཏྲའི་གསང་རྡོར་གྱི་མིང་ཡིན་པས༔ རི་དེ་རུ་ཏྲའི་གསང་རྡོར་ཡིན་ཞེས་གསུངས་ཏེ༔ གང་ལྟར་རི་དེའི་རྩེར་སྲིན་པོའི་ཕོ་བྲང་ཐོད་མཁར་ཡོད་པ་བཤིགས་ནས༔ ཕོ་བྲང་པདྨ་འོད་ཀྱི་གཞལ་ཡས་ཁང་གྲུ་བཞི་སྒོ་བཞི༔ གུ་རུ་ཞི་བའི་དཀྱིལ་འཁོར་དངོས་སུ་བཞེངས་ནས༔ དེ་ལ་ཡང་ཕོ་བྲང་རིམ་པ་གསུམ་གྱི་སྟེང་ཁང་དུ་གུ་རུ་ཆོས་སྐུ་རྡོ་རྗེ་འཆང་གི་ཆ་ལུགས་སུ་བཞུགས༔ བར་ཁང་དུ་གུ་རུ་ལོངས་སྐུ་ཐོད་
ཕྲེང་སྡེ་ལྔའི་ཆ་ལུགས་སུ་བཞུགས༔ རེ་རེ་ལ་འཁོར་འབུམ་ཕྲག་རེ་རེ༔ འོག་ཁང་དུ་གུ་རུ་སྤྲུལ་སྐུའི་ཆ་ལུགས་སུ་བཞུགས༔ དེ་ལ་རྗེ་འབངས་ཉེར་ལྔ་སོགས་རིག་འཛིན་དཔག་ཏུ་མེད་པ་དང་༔ སྲིན་པོའི་ཁྲོམ་ཆེན་པོ་ལ་རྟག་ཏུ་ཆོས་ཀྱི་འཁོར་ལོ་ཆེན་པོ་བསྐོར་ཞིང་བཞུགས་པའི་གཞལ་ཡས་ནས༔ གུ་རུ་ཐོད་ཕྲེང་རྩལ་གྱི་ཆ་ལུགས་འཁོར་རིག་འཛིན་གྲུབ་ཐོབ་རྩ་བརྒྱུད་ཀྱི་བླ་མ་དང་བཅས་པས་བསྐོར་བ་སྤྱན་དྲངས༔ ཕོ་བྲང་དེའི་བྱང་ཕྱོགས་སུ་ཁྲག་འཐུང་ཁྲོ་བོ་རོལ་པའི་དཀྱིལ་འཁོར་དུ་སྤྲུལ་ནས༔ དམར་ནཱག་ཡེ་ཤེས་ཀྱི་མེ་དཔུང་འབར་བའི་ཀློང་དཀྱིལ་ནས༔ བཀའ་ལ་མི་ཉན་དམ་ལ་མི་གནས་པའི༔ སྲིན་པོ་དང་ལྷ་སྲིན་གདུག་པ་ཅན་མ་ལུས་པ་བསྒྲལ་ནས་ཤ་ཁྲག་ཚོགས་སུ་རོལ་ནས༔ རྣམ་ཤེས་དབྱིངས་སུ་སྤར་ཏེ་འདུལ་བར་མཛད་པའི་ཕྱིར༔ རྗེ་བཙུན་ཨོ་རྒྱན་ཉིད་གུ་རུ་དྲག་པོ་པདྨ་ཐོད་ཕྲེང་རྩལ་གྱི་སྐུར་བཞེངས་ནས་བཞུགས་པ་དེ༔ གནས་འདིར་སྤྱན་འདྲེན་གྱིས་ཁྱེད་ཀྱི་བཞེད་དགོངས་དང་ཐུགས་དམ་ནི་ལྷ་སྲིན་གདུག་པ་ཅན་ཁོ་ན་འདུལ་བ་ཡིན་ན༔ ཁྱེད་ཀྱི་འདུལ་ཞིང་ཡང་འདི་ན་ཡོད་ཀྱིས་གཤེགས་སུ་གསོལ༔ ནུབ་ཕྱོགས་བདེ་བ་ཅན་གྱི་
ཞིང་ཁམས་ཆགས་པ་ཡོད་ལ་འཇིག་པ་མེད་པ་ལོངས་སྤྱོད་ཕུན་སུམ་ཚོགས་པའི་དབྱིངས་ཀྱི་དབུས༔ བྱང་ཆུབ་ཀྱི་ཤིང་དཔག་ཚད་སྟོང་དྲུག་བརྒྱ་པའི་དྲུང་༔ རིན་ཆེན་སྣ་ཚོགས་ལས་གྲུབ་པའི་ཕོ་བྲང་ནས༔ པདྨའི་རིགས་ཐམས་ཅད་ཀྱི་བདག་པོ་ཆོས་སྐུ་སྣང་བ་མཐའ་ཡས་ཞེས་ཀྱང་བྱ༔ ཀུན་བཟང་སྣང་བ་མཐའ་ཡས་དང་༔ འོད་དཔག་མེད་དང་༔ དཔག་མེད་རྒྱལ་པོ་དང་༔ ཚེ་དཔག་མེད་དང་༔ འོད་ཀྱི་ལྷ་དང་༔ གསུང་རྡོ་རྗེ་དང་༔ པདྨ་གར་གྱི་དབང་ཕྱུག་དང་༔ འོད་མཐའ་ཡས་དང་༔ སྐུ་ཚེ་དཔག་མེད་དང་༔ འཆི་མེད་དབང་པོ་ཞེས་བྱ་བ་དེ་གཤེགས་སུ་གསོལ༔ གླིང་བཞི་བྱེ་བ་ཕྲག་བརྒྱའི་དབུས་སུ་རི་རབ་འབར་བ་བྱེ་བ་ཕྲག་བརྒྱའི་བྱང་ཤར་ན༔ ཡོངས་འདུས་ཤིང་བྱེ་བ་ཕྲག་བརྒྱ་ཡོད་པས་རྩེ་མོ་ནས་སྤྲུལ་པའི་ཁྱུང་ནཱག་འབར་བ་བྱེ་བ་ཕྲག་བརྒྱ་ཡོད་པ་བྱ་ཁྱུ་འགྲོགས་པ་ལྟར་གཤེགས་སུ་གསོལ༔ འོག་མིན་ལ་ཆེ་ཆུང་གཉིས་ཏེ༔ ཆེན་པོ་ནི་འཐུག་པོ་བཀོད་པའི་ཞིང་ཁམས་དེ་ན་སངས་རྒྱས་རྣམ་པར་སྣང་མཛད་ཆེན་པོའི་ཕྱག་མཉམ་བཞག་གི་ཕྱག་མཐིལ་སྤོས་ཆུའི་རྒྱ་མཚོ་ཆེན་པོའི་དབུས་ན་མེ་ཏོག་ཆེན་པོ་ཉི་ཤུ་རྩ་ལྔ་
བརྩེགས་མར་སྐྱེས་པའི་བཅུ་གསུམ་པའི་སྟེང་ན་འཇིག་རྟེན་འདི་ཆགས་ནས་ཡོད༔ འཐུག་པོ་བཀོད་པ་ནི་ལོངས་སྐུ་ཞིང་ཁམས་ཡིན་ཏེ༔ དེ་ན་འཇམ་དབྱངས་སོགས་ས་བཅུའི་སེམས་དཔའ་བཞུགས་པས་སྐུ་ཚད་ཀྱང་རི་རབ་ལས་ཆེ་བ་ཡོད༔ འོག་མིན་ཆུང་ངུ་སྟེང་ཕྱོགས་གཟུགས་ཁམས་ཀྱི་ལྷ་གནས་ན་ཆོས་སྐུ་རྡོ་རྗེ་འཆང་བཞུགས་པའི་འཁོར་དུ་འཇམ་ད་བྱངས་གཅིག་བཞུགས༔ ཆོས་ཀྱི་དབྱིངས་ནི་ནམ་མཁས་ཁྱབ་ཚད་ཡིན་ལ་དེར་སངས་རྒྱས་ཀྱི་ཞིང་ཁམས་གྲངས་མེད་ཚད་མེད་པ་ཡོད་དེ༔ དེ་དག་རྣམས་སུ་ཡང་འཇམ་དབྱངས་ཀྱི་སྐུའི་སྤྲུལ་པ་རེ་རེ་ཡོད༔ འཛམ་གླིང་བྱེ་བ་ཕྲག་བརྒྱ་རྒྱ་ནག་རི་བོ་རྩེ་ལྔ་བྱེ་བ་ཕྲག་བརྒྱའི་རྩེ་ལྔ་ན་ལས་མ་དག་པས་བལྟས་ན་གངས་རི༔ དག་པས་བལྟས་ན་མཆོད་རྟེན་ལྔ་མཐོང་དེའི་བུམ་པའི་ནང་ན་ཕོ་བྲང་ལྔ་ཡོད་པ་ནཱ༔ སྐུ་མཆོག་འཇམ་དཔལ་རིགས་ལྔ་བཞུགས་པ་འདིར་གཤེགས་སུ་གསོལ༔ སྟེང་ཕྱོགས་དུར་ཁྲོད་མེ་རི་འབར་བ་ཞེས་ཀྱང་བྱ༔ རྣམ་པར་སྣང་མཛད་ཀྱི་དུར་ཁྲོད་ཅེས་ཀྱང་བྱ༔ ཁྲོ་བོའི་ཞིང་ཁམས་འཇིགས་སུ་རུང་བ་སྔགས་ཀྱི་རིག་འཛིན་གྲུབ་པ་ཐོབ་པ་མ་གཏོགས་ཉན་ཐོས་དགྲ་བཅོམ་པ་དང་རང་སངས་རྒྱས་
དང་ས་གནས་ཀྱི་སེམས་དཔའ་རྣམས་དེར་ཕྱིན་ན་སྐྲག་ཅིང་འབྲོས་པར་བྱེད་པ་ཞིག་ཡོད༔ དེའི་དབུས་ན་ཁྲོ་བོའི་དཀྱིལ་འཁོར་དགུ་གླིང་དུ་ཡོད་པའི་ནུབ་ཕྱོགས་སུ་དབང་དྲག་རོལ་པའི་དཀྱིལ་འཁོར་ཡོད་པ་ནས༔ པདྨ་ཧེ་རུ་ཀ་ཞེས་ཀྱང་བྱ༔ རྟ་མཆོག་རྒྱལ་པོ་ཧེ་རུ་ཀ་པདྨ་དབང་ཆེན་གནས་འདིར་གཤེགས་སུ་གསོལ་ལྕང་ལོ་ཅན་ལ་ཆེ་ཆུང་གཉིས་ཏེ༔ ཆེ་བ་དུར་ཁྲོད་མེ་རི་འབར་བ་དེ་ཉིད་ཀྱི་ཤར་ཕྱོགས་སུ་ཁྲོ་བོའི་དཀྱིལ་འཁོར་ཡོད་པ་ནས༔ ཕྱག་ན་རྡོ་རྗེ་སྟོན་པ་གཞོན་ནུ་དཔའ་བོ་སྟོབས་ལྡན་ཞེས་ཀྱང་བྱ་བཛྲ་ཧེ་རུ་ཀ་ཞེས་ཀྱང་བྱ༔ ཧེ་རུ་ཀའི་ཆ་ལུགས་སུ་བཞུགས་པ་དང་༔ རི་རབ་ཀྱི་བྱང་ཕྱོགས་བྱེ་བ་ཕྲག་བརྒྱ་ན༔ གནོད་སྦྱིན་གྱི་རྒྱལ་པོ་རྣམ་ཐོས་སྲས་ཀྱི་གནས་ལྕང་ལོ་ཅན་གྱི་ཕོ་བྲང་བྱེ་བ་ཕྲག་བརྒྱ་ཡོད་པ་ནས༔ གནོད་སྦྱིན་གྱི་སྡེ་དཔོན་གྱི་ཚུལ་དུ་གསང་བདག་གཏུམ་པོ་བྱེ་བ་ཕྲག་བརྒྱ་བཞུགས་པ་འདིར་གཤེགས་སུ་གསོལ༔ གསར་མའི་ལུགས་ལ་རྒྱ་གར་རྡོ་རྗེ་གདན་གྱི་ཕྱོགས་མཚམས་བརྒྱད་དུ་ཡོད་པས་དུར་ཁྲོད་བརྒྱད་ཡིན་ལ༔ འདིར་ནི་ནུབ་ཕྱོགས་ཨོ་རྒྱན་ཡུལ་གྱི་ཕྱོགས་མཚམས་བརྒྱད་དུ་ཡོད་པས་དུར་ཁྲོད་ཆེན་པོའི་གནས་
བརྒྱད་ནས་སྤྱན་འདྲེན་ཏེ༔ མཁའ་འགྲོ་ཞེས་པ་ནམ་མཁའ་ལ་རྫུ་འཕྲུལ་གྱིས་ཐོགས་མེད་དུ་འགྲོ་བས་མཁའ་འགྲོ་ཞེས་བྱ༔ མཁའ་འགྲོ་ནི་ལྷ་ཕོ་ཡིན་ཏེ༔ དཔེར་ན་བདེ་མཆོག་རྡོ་རྗེ་མཁའ་འགྲོ་ཟེར་བ་ལྟར༔ དེ་བཞིན་དུ་སཾ་བྷུ་ཊི་སོགས་ལས༔ རྒྱལ་བ་རིགས་ལྔ་ལ་མཁའ་འགྲོ་ལྔ་ཡི་དཀྱིལ་འཁོར་ཞེས་པ་འབྱུང་༔ མཁའ་འགྲོ་མ་ནི་ལྷ་མོ་ཡིན་པ་ཀུན་གྱིས་ཤེས༔ གིང་ཞེས་པ་ནི་ལས་བྱེད་པའི་མིང་སྟེ༔ དེ་ལ་ཡང་གིང་ཕོ་གིང་མོ་གཉིས་ཡོད༔ ཤར་ཕྱོགས་གཏུམ་དྲག་དུར་ཁྲོད་ན་རྡོ་རྗེ་མཁའ་འགྲོ་དང་རྡོ་རྗེ་གིང་ཆེན་བཞུགས༔ ལྷོ་ཕྱོགས་གད་རྒྱངས་དུར་ཁྲོད་ན་རིན་ཆེན་མཁའ་འགྲོ་དང་རིན་ཆེན་གིང་ཆེན་བཞུགས༔ ནུབ་ཕྱོགས་པདྨ་འཁྱིལ་པའི་དུར་ཁྲོད་ན་པདྨ་མཁའ་འགྲོ་དང་པདྨ་གིང་ཆེན་བཞུགས༔ བྱང་ཕྱོགས་ཀཱི་ལ་ཡའི་དུར་ཁྲོད་ན་ལས་ཀྱི་མཁའ་འགྲོ་དང་ལས་ཀྱི་གིང་ཆེན་བཞུགས༔ ཤར་ལྷོ་རབ་ཏུ་འཇིགས་པའི་དུར་ཁྲོད་དུ་དམ་ཚིག་མཁའ་འགྲོ༔ ལྷོ་ནུབ་གཏུམ་པའི་དུར་ཁྲོད་དུ་སྣ་ཚོགས་མཁའ་འགྲོ༔ ནུབ་བྱང་རབ་རྒྱུའི་དུར་ཁྲོད་དུ་ཐམས་ཅད་མཁའ་འགྲོ༔ བྱང་ཤར་རྒྱུག་བྱེད་དུར་ཁྲོད་དུ་འཇིག་རྟེན་མཁའ་འགྲོ༔ དེ་བཞི་པོ་ལ་
ཤུགས་འགྲོ་ཞེས་ཀྱང་བྱ་སྟེ༔ ནམ་མཁའ་བར་སྣང་ལ་རང་བཞིན་ཤུགས་ཀྱིས་འགྲོ་བས་ཤུགས་འགྲོ་ཟེར༔ རིགས་བཞི་མཁའ་འགྲོའི་གཡོག་མོ་ཡིན་པ་དང་བཅས་པ༔ དེ་རྣམས་འདིར་གཤེགས་སུ་གསོལ༔ འཛམ་བུ་གླིང་འདིའི་ལྷོ་ཕྱོགས་དཔག་ཚད་བརྒྱད་ཁྲི་འདས་པའི་ཕ་རོལ་རིམ་དགུ་སའི་འོག་ཏུ༔ རབ་ཏུ་འཇིགས་པ་གཤིན་རྗེའི་ཡུལ་གཤིན་རྗེའི་ལས་མཁན་གཏུམ་པོ་བྱེ་བ་དུང་ཕྱུར་གྱིས་གང་བའི་དབུས༔ ལྕགས་སྲེག་གི་ས་གཞི་ན་སྡིག་ཅན་རྣམས་སྲེག་ཅིང་གཏུབས་པའི་དུར་ཁྲོད་ནས༔ ངོ་བོ་ཀུན་ཏུ་བཟང་པོ་དང་འཇམ་དབྱངས་ཀྱི་སྤྲུལ་པ་ཡིན་ཀྱང་༔ རྣམ་པ་ས་བརྒྱད་ཀྱི་སེམས་དཔའ་གཤིན་རྗེའི་སྡེ་དཔོན་གྱི་ཚུལ་བཟུང་ནས་དགེ་སྡིག་གིས་དྲང་ཤན་ཕྱེ་ཞིང་རྒྱུ་འབྲས་ཀྱི་ཆོས་སྟོན་པ༔ སྐུའི་ཆ་ལུགས་ཅིར་ཡང་སྟོན་ཅིང་འཆི་བདག་ནག་པོ་དང་སྲོག་བདག་ནག་པོ་དང་ཆོས་ཀྱི་རྒྱལ་པོ་དང་༔ ཚེ་བདག་ནག་པོ་ཞེས་ཀྱང་བྱ་བ་དེ་འདིར་གཤེགས་སུ་གསོལ༔ བདེ་ཆེན་གསང་བའི་གནས་འདི་ལ་ཆེ་ཆུང་འཇུག་པ་མང་ན་ཡང་༔ ཆེ་བ་ནི་འོག་མིན་དུར་ཁྲོད་མེ་རི་འབར་བའི་ཤར་ལྷོ་མཚམས་ཀྱི་གནས་མཆོག་ནས༔ ཆོད་གཏོང་མ་མོའི་གཙོ་མོ་ཉིར་
བཞི་མུ་ཁ་ལེ་དང་༔ ནུབ་ཕྱོགས་ཨོ་རྒྱན་གྱི་ཡུལ་དབུས་ཨོ་རྒྱན་གནྡྷོའི་གཙུག་ལག་ཁང་ཞེས་བྱ་བ་རང་བྱུང་རྡོ་ལས་གྲུབ་པའི་ལྷ་ཁང་གི་དབུས་ན་ཡུམ་རྡོ་རྗེ་ཕག་མོ་མཁའ་འགྲོ་རྣམས་ལ་ཆོས་སྟོན་ཅིང་བཞུགས་པ་དེ་འདིར་གཤེགས་སུ་གསོལ༔ སྟེང་ཕྱོགས་མེ་རི་འབར་བའི་ཞིང་ཁམས་ཀྱི་བྱང་ཕྱོགས་མེ་དཔུང་འབར་བའི་ཀློང་དཀྱིལ་ནས༔ ལྷ་མཆོག་རྡོ་རྗེ་གཞོན་ནུ་བཛྲ་ཀཱི་ལཱ་ཡ་འདིར་གཤེགས་སུ་གསོལ༔ ཨོ་རྒྱན་ཡུལ་གྱི་གསང་ཆེན་རོལ་པའི་དུར་ཁྲོད་ཅེས་ཀྱང་བྱ༔ རབ་འབར་འཁྲིགས་པའི་དུར་ཁྲོད་ནས༔ མཁའ་འགྲོ་སེང་གདོང་མ་འདིར་གཤེགས་སུ་གསོལ༔ རི་བོ་མཆོག་རབ་ཀྱི་སྟེང་སུམ་ཅུ་རྩ་གསུམ་ལྷའི་གནས་ཡོད༔ དེའི་ཕྱོགས་བཞི་ན་རི་རབ་རྩེ་བཞི་དཔག་ཚད་ལྔ་བརྒྱ་རེ་གྱེན་དུ་འཕག་པ་ཡོད་པ་ནི༔ སྒོ་སྲུང་གནོད་སྦྱིན་གྱི་གནས་ཡིན་པས༔ རྩུབ་འགྱུར་མེ་བས་ཚ༔ མེའི་ཚྭ་ཚྭ་དང་གློག་འོད་འཁྲུགས་པའི་ཀློང་ནས་ཕྱག་རྡོར་གྱི་སྤྲུལ་པ་ལྔ་བརྒྱ་ཚན་བཞི་བཞུགས་པ་གནོད་སྦྱིན་གོས་སྔོན་ཅན་ནག་པོ་གནོད་སྦྱིན་ཞེས་ཀྱང་བྱ༔ གནོད་སྦྱིན་གསང་བ་པ་ཞེས་ཀྱང་བྱ༔ གནོད་སྦྱིན་ཡཀཱ་མེའི་དབལ་ཅན་གནས་འདིར་གཤེགས་སུ་གསོལ༔ རང་
བཞིན་གྱི་བཞུགས་གནས་ནི་སངས་རྒྱས་ཀྱི་ཞིང་ཁམས་ཐམས་ཅད་ཡིན་ལ༔ ཁྱད་པར་འཛམ་བུ་གླིང་འདིའི་ཡུལ་ཉི་ཤུ་རྩ་བཞི༔ གནས་སུམ་ཅུ་སོ་གཉིས་ཐམས་ཅད་ནས༔ ས་ལ་གནས་པའི་རིག་འཛིན་ས་ཐོབ་པ་ཐམས་ཅད་ཡིན་ནོ༔ ཚེ་ལ་དབང་བའི་རིག་འཛིན་ནི་འཆི་མེད་གྲུབ་པ་ཐོབ་པ་ཡིན་ནོ༔ ཕྱག་རྒྱ་ཆེན་པོའི་རིག་འཛིན་ནི་རྟོགས་པ་མཆོག་ཐོབ་པའི་གྲུབ་ཆེན་ཐམས་ཅད་ཡིན༔ ལྷུན་གྱིས་གྲུབ་པའི་རིག་འཛིན་ནི་གསང་སྔགས་ཀྱི་སྒོ་ནས་སངས་རྒྱས་ཐོབ་པ་ཐམས་ཅད་ཡིན༔ རིག་འཛིན་ཞེས་པའི་དོན་ནི་དང་པོ་གསང་སྔགས་ཀྱི་རིག་པ་དེ་ཉམས་སུ་བླང་བས་གྲུབ་པ་ཐོབ་ནས་ཀྱང་གསང་སྔགས་ཀྱི་རིག་པ་དེ་འཛིན༔ རང་དོན་འགྲུབ་ནས་ཀྱང་གསང་སྔགས་ཀྱི་རིག་པ་དེས་གཞན་རྗེས་སུ་འཛིན་པས་ན་རིག་འཛིན་ཟེར༔ རྒྱ་གར་གྱི་རིག་འཛིན་བརྒྱད་རྗེ་འབངས་ཉི་ཤུ་ལྔ་གཏེར་སྟོན་བརྒྱ་རྩ་བརྒྱད་སོགས་རྩ་བརྒྱུད་ཀྱི་བླ་མ་ཐམས་ཅད་དང་གཞན་ཡང་ཡི་དམ་རྒྱུད་སྡེ་དྲུག་གི་ལྷ་ཚོགས༔ མཁའ་འགྲོ་གོང་དུ་སོང་བ་ནི་དཀྱིལ་འཁོར་གྱི་ནང་ཡིན་ལ༔ འདིར་མཁའ་འགྲོ་ཟེར་བ་གུ་དྲག་གསང་བའི་བཀའ་སྲུང་མཁའ་འགྲོ་སྡེ་ལྔ་ཡིན་ཏེ༔ གཙོ་
མོ་ནི་རྡོ་རྗེ་ཕག་མོ་འཁོར་བཞི་ནི་མཁའ་འགྲོ་བདུད་འདུལ་མ་ཞི་བ་འཚོ་སོགས་རྒྱ་མཚོའི་གླིང་གི་མཁའ་འགྲོ་བཞི་ཡིན༔ གོང་དུ་གིང་ཞེས་པ་ཡེ་ཤེས་ཀྱི་གང་ཡིན་ལ༔ འདིར་གིང་ཞེས་པ་ནི་ལས་དང་འཇིག་རྟེན་གྱི་གིང་ཡིན་ཏེ༔ ལས་ཀྱི་གིང་ནི་རྒྱལ་ཆེན་སྡེ་བཞི་ཁྲོ་བོའི་སྐུར་བཞེངས་པ་ཡིན༔ འཇིག་རྟེན་གྱི་གིང་ནི་མགར་ནག་འཁོར་གྱི་གིང་ཆེན་སྡེ་བཞི་དང་གཅིག་སྟེ༔ ཆ་ལུགས་ནི་ཁྲོ་བོ་གཅེར་བུ་གྲི་ཐོད་ཅན་ཡིན༔ དམ་ཅན་ཆོས་སྐྱོང་ནི་སྤྱིར་བསྟན་པ་སྲུང་བའི་དམ་ཚིག་ཅན་ཐམས་ཅད་ཡིན༔ ཁྱད་པར་འདིའི་བཀའ་སྲུང་མགོན་པོ་སེང་གདོང་ཡབ་ཡུམ་ཡིན༔ བཀའི་སྲུང་མ་སྤུ་གྲི་མཆེད་གསུམ༔ གཏེར་སྲུང་དགེ་བསྙེན་སྨྱོ་ཁ་དང་བཅས་པ་མ་ལུས་ཐམས་ཅད་གཤེགས་སུ་གསོལ༔ ཞེས་སྤྱན་འདྲེན་བྱས་པས་ཐམས་ཅད་ནམ་མཁའ་ལ་སྤྲིན་འཁྲིགས་པ་ལྟར་བྱོན་ཏེ༔ ཞི་བ་རྣམས་ནི་རིན་པོ་ཆེའི་རྒྱན་ཆ་མང་པོ་དང་ཕྱག་གདུབ་ཞབས་གདུབ་རོལ་མོ་རྣམས་ཁྲོ་ལོ་ལོ༔ རིན་པོ་ཆེའི་ཅོད་པན་དང་དར་དཔྱངས་རྣམས་རླུང་གིས་བསྐྱོད་ཅིང་པུ་རུ་རུ༔ ཁྲོ་བོ་རྣམས་ནི་རང་གི་སྐུ་ལུས་ལས་སྐྱེས་པའི་བསྐལ་པ་འཇིག་དུས་ཀྱི་མེ་ལྟར་བྱིན་རླབས་ཀྱི་མེ་དཔུང་འུ་རུ་རུ༔ དུར་
ཁྲོད་ཀྱི་རྒྱན་ཆུ་མང་པོ་སྤུངས་སེ་སྤུང་༔ ཞལ་ནས་ཧཱུྃ་ཧཱུྃ་གི་སྒྲ་འབྲུག་སྟོང་དུས་གཅིག་ལྡིར་བའི་སྒྲ་ལྟར་དི་རི་རི༔ བདག་དང་སློབ་མ་དང་སྒྲུབ་པའི་གྲོགས་དང་༔ དཀྱིལ་འཁོར་དམ་རྫས་དང་བཅས་པ་བྱིན་གྱིས་བརླབ་ཕྱིར་གཤེགས་སུ་གསོལ༔ གུ་རུ་བཛྲ་ཀྲོ་ཏ་ནི་བླ་མ་རྡོ་རྗེ་ཁྲོ་བོ༔ དྷེ་ཝ་དྷཱ་ཀི་ནཱི་ཡི་དམ་མཁའ་འགྲོ༔ སརྦ་ས་མཱ་ཡ་ནི་ཐམས་ཅད་དམ་ཚིག༔ སྔགས་དེ་བརྗོད་པ་ཙམ་གྱིས་སྤྱན་དྲངས་པའི་ལྷ་ཐམས་ཅད་དྲག་པོའི་དཀྱིལ་འཁོར་གྱི་ལྷ་ཚོགས་ཆ་བཞིའམ་གཉིས་སུ་གྱུར་ཏེ༔ བདག་མདུན་བུམ་གསུམ་གཏོར་མ་ལྷར་བསྐྱེད་པ་བཞིའི་ཐད་ཀྱི་བར་སྣང་ལ་ཛཞེས་པས་སྤྱན་དྲངས༔ ཧཱུྃ་ཞེས་པས་དམ་ཚིག་པ་ལ་ཡེ་ཤེས་པ་རྣམས་གཞུག༔ བྲོ་ཞེས་པས་དམ་ཚིག་པ་དང་ཡེ་ཤེས་པ་དབྱེར་མེད་ཆུ་དང་འོ་མ་ལྟར་འདྲེས༔ ཧོ༔ ཞེས་པས་ཡེ་ཤེས་པ་དེ་ཐུགས་མི་དགྱེས་པ་མེད་ཅིང་མཉེས་པར་བསྒོམ༔ ཧཱུྃ་དུར་ཁྲོད་ཆེན་པོ་བརྒྱད་དང་མེ་དཔུང་འབར་བས་བསྐོར་བའི་དབུས༔ པདྨ་དབང་ཆེན་དྲག་པོ་རོལ་པའི་དཀྱིལ་འཁོར་དངོས་སུ་བཤམས་པ་དང་ཡིད་ཀྱིས་བྷོ་པའི་ཕོ་བྲང་ཆེན་པོ་འདིར༔ ཁྲོ་བོའི་རྒྱལ་པོ་དྲེགས་པ་སྡེ་བརྒྱད་འཇོམས་པ་
གུ་རུ་དྲག་པོའི་ལྷ་ཚོགས་རྣམས་ཐབས་དང་ཤེས་རབ་མཚོན་པ་ཉི་མ་དང་ཟླ་བ༔ འཁོར་བའི་སྐྱོན་གྱིས་མ་གོས་པའི་བརྡར་པདྨའི་གདན་ལ་བཞུགས་སུ་གསོལ༔ གུ་རུ་བཛྲ་ཀྲོ་ཏ་དྷེ་ཝ་དྷཱ་ཀི་ནི་བླ་མ་རྡོ་རྗེ་ཁྲོ་བོ་ཡི་དམ་མཁའ་འགྲོ༔ ས་མ་ཡ་ཏིཥྛ་ལྷན༔ དམ་ཚིག་པ་བརྟན་པར་བཞུགས༔ ཕྱག་འཚལ་འདི་ལ་གཏེར་ཤོག་ལས་ཚིག་གསུམ་ལས་མེད་པ་ལས་ཧཱུྃ་སྒྲ་སྒྲོག་ཅིང་ཞེས་པ་ཚིག་གཅིག་གཏེར་སྟོན་གྱིས་བསྣན་པ་ཡིན་སྐད༔ ཧཱུྃ་ནི་མཆོག་གུ་རུ་དྲག་པོ་པདྨ་ཐོད་ཕྲེང་རྩལ་གྱིས་དཀྱིལ་འཁོར་གྱི་ལྷ་ཚོགས་རྣམས་ཧཱུཾ་ཧཱུཾ་གིས་སྒྲ་སྒྲོག་ཅིང་བར་ཆད་ཀྱི་བགེགས་རྣམས་མ་ལུས་འདུལ་བར་མཛད་པའི་ལྕུ༔ འབར་བའི་གར་དགུ་དང་ལྡན་པའི་ཁྲོ་བོའི་རྒྱལ་པོ་འཁོར་དང་བཅས་པ་ལ༔ ཞེས་པ་བསྟོད་དབྱངས་གླུ་ཡི་མཆོད་པ་ཡིན་ལ༔ གཡས་བརྐྱང་གཡོན་བསྐུམ་པ་ནི་དཔའ་བོའི་གར༔ གཡོན་བརྐྱང་གཡས་བསྐུམ་ནི་དཔའ་མོའི་གར༔ རྔམ་ཞིང་རྐང་པ་ས་ལ་རྡེག་པ་ནི་སྲིན་པོའི་གྲྭར་ཡིན་གྱི༔ དེ་ལྟར་གླུ་བྲོ་གར་དང་བཅས་ཏེ་ཕྱག་འཚལ་བ་སྟེ༔ ཨ་ཏི་པཱུ་ཧོ༔ ཞེས་བདག་བསྐྱེད་ཀྱིས་མདུན་བསྐྱེད་ལ་ཕྱག་འཚལ་བས་པྲ་ཏི་ཛ་ཧོ༔ ཞེས་མདུན་བསྐྱེད་ཀྱིས་
བདག་བསྐྱེད་ལ་ཕྱག་ལན་མཛད་པར་བྷེ༔ དེའི་དོན་བདག་ཐ་མལ་པ་ལ་ལྷ་ཡེ་ཤེས་པ་མདུན་དུ་དཔོན་གཡོག་གི་ཚུལ་དུ་བསྒོམ་པ་བྱ་རྒྱུད་ཀྱི་ལུགས༔ ལྷ་ཡེ་ཤེས་པ་མདུན་དུ་བྷེ་རང་དམ་ཚིག་པ་རྒྱལ་བློན་གྱིས་ཚུལ་དུ་བྷོ་པ་སྤྱོད་རྒྱུད་ཀྱི་ལུགས༔ བདག་མདུན་དམ་ཚིག་པ་ལ་ཡེ་ཤེས་པ་བསྟིམས་ནས་ཕྱག་རྒྱ་བཞིའི་རྒྱས་བཏབ་སྟེ༔ ནུབ་མོ་ཞག་རེ་བཞིན་གཤེགས་དགོས་པ་རྣལ་འབྱོར་རྒྱུད་ཀྱི་ལུགས༔ འདིར་ནི་གསང་སྔགས་རྙིང་མ་ཡོ་ག་གསུམ་གྱི་ལུགས་ཡིན་པས༔ བདག་བསྐྱེད་ནམ་ཡང་མི་གཤེགས་ཕྱག་རྒྱ་སྒོ་བཅད་ཀྱི་སྒྲུབ་པ༔ མདུན་བུམ་སོགས་སྒྲུབ་པ་ནི་དབང་དེ་ཚར་དུས་གཤེགས་པ་ཡིན་ལ༔ བསྐྱེད་རིམ་བསྒོམ་པའི་དོན༔ ལུས་ཐ་མལ་དུ་ཞེན་པ་འདི་སྤངས་བའི་ཆེད་དུ་ཡིན་པས༔ མདུན་དུ་བྷོ་པ་འདི་ལྷ་ཡིན༔ རོང་ཐ་མལ་པ་ཡིན་བསམ་པའི་ཞེན་པ་དེ་སེལ་བའི་ཕྱིར་དུ་ཚུར་ཕྱག་ལེན་འཚལ་བ་ཡིན༔ དེ་ཡང་རུང་ངམ་སྙམ་ན༔ མདུན་བསྐྱེད་རྡུལ་ཚོན་དང་རས་བྲིས་ཀྱི་དཀྱིལ་འཁོར་ནི༔ ལྷ་མིན་པ་ལ་ལྷར་བྷོ་པ་ཀུན་བརྟགས་ཀྱི་དཀྱིལ་འཁོར་ཞེས་བྱ་སྟེ་ཁམས་ཆུང་༔ རང་གི་ལུས་ཀྱི་ཕུང་ཁམས་སྐྱེ་མཆེད་རྩ་རླུང་ཐིག་ལེའི་
རྣམ་པ་ནི༔ ཡེ་ནས་ལྷའི་དཀྱིལ་འཁོར་ཡིན་པ་ལ་ཡིན་པར་གསལ་བཏབ་པ་ནི་ཡོངས་གྲུབ་ཀྱི་དཀྱིལ་འཁོར་ཞེས་བྱ་སྟེ་མདུན་བསྐྱེད་ལས་ལྷག་པ་ཡིན་ནོ༔ དེ་ནས་ཕྱི་ནང་གསང་བའི་མཆོད་པ་རྣམ་པ་གསུམ་འབུལ་བ་ནི༔ དང་པོ་ཕྱི་མཆོད་ལ་དངོས་སུ་ཅི་འབྱོར་བཤམས་པའི་མཆོད་པ་དང་༔ ངག་ནས་བརྗོད་པ་ཚིག་གི་མཆོད་པ་དང་༔ ཡིད་ཀྱིས་དཔག་མེད་སྤྲུལ་ནས་མཆོད་པ་དང་༔ འཇིག་རྟེན་གྱི་ཁམས་གཞན་ན་ཡོད་པའི་མཆོད་པ་རྣམས་བློས་བླངས་ཏེ་འབུལ་པའི་མཆོད་པ་དང་༔ སྔགས་ཀྱི་མཆོད་པ་དང་༔ ཕྱག་རྒྱའི་མཆོད་པ་དང་དྲུག་ཚང་བ་ཡིན་ཏེ༔ ཧཱུྃ་ཞེས་ཐུགས་སྲོག་ནས་བོས་ཏེ་མཆོད་ཡུལ་བདག་མདུན་བུམ་པ་གཏོར་མ་ལ་བསྒོམ་པའི་བླ་མ་ཡི་དམ་མཁའ་འགྲོ་ཐམས་ཅད་ལ་མཆོད་པ་འབུལ་བའི་སྙན་གསན་དབབ་ནས་མདུན་དུ་བཤམས་པའི་མཆོད་པ་དམིགས་རྟེན་ཙམ་དུ་བྱས་ཏེ༔ རང་གི་ཐུགས་ཀ་ནས་སྤྲུལ་པའི་མཆོད་པའི་ལྷ་མོ་མེ་ཏོག་མ་དཀར་མོས་ཕྱག་ན་མེ་ཏོག་འཛིན་པ་དང་༔ བདུག་སྤོས་མ་སྔོན་མོས་སྤོས་ཕོར་ནས་སྤོས་སྤྲིན་སྤྲོ་བ་དང་༔ མར་མེ་མ་དམར་མོས་མར་མེ་འཛིན་པ་དང་༔ དྲི་ཆབ་མ་ལྗང་གུས་ཕྱག་གཡོན་དུང་ཆོས་ནས་གཡས་
པས་བྱུག་པ་འབུལ་བ་དང་༔ ཞལ་ཟས་མ་སེར་མོས་མཁར་གཞོང་ནང་དུ་རོ་བརྒྱ་པའི་ཞལ་ཟས་འཛིན་པ་དང་༔ རོལ་མོ་མ་སྔོན་མོས་སིལ་སྙན་དཀྲོལ་བ༔ དེ་ཐམས་ཅད་མཛེས་ཤིང་ཡིད་དུ་འོང་བ་ལག་ཏུ་ཐོགས་པའི་མཆོད་པ་དེ་དག་ལས་མཆོད་པའི་སྤྲིན་སངས་རྒྱས་ཀྱི་ཞིང་ཐམས་ཅད་ཁྱབ་པར་སྤྲོ་བ༔ ལྷ་མོ་དེ་རྣམས་ནི་བྱེ་བ་དུང་ཕྱུར་སྤྲོས་པས་བདག་མདུན་བུམ་པའི་ལྷ་ལ་སོ་སོར་དུས་གཅིག་ཏུ་མཆོད༔ གཞན་ཡང་འཕགས་པ་ཀུན་ཏུ་བཟང་པོའི་རྣམ་པར་ཐར་པ་སྟེ༔ རིན་པོ་ཆེའི་རྒྱན་ཕྲེང་ལྷའི་ན་བཟའ་སྤོས་ཕྱེའི་ཐུམ་པོ་རི་རབ་དང་མཉམ་པ་དག་པའི་ཞིང་ཁམས་རྣམས་ན་ཡོད་པའི་མཆོད་པ་ལྟ་བུ༔ དེ་བས་ལྷག་པའི་མཆོད་པ་ནི་མེད་པས་ན་བླ་ན་མེད་པའི་མཆོད་པའི་སྤྲིན་གྱིས་མཆོད་ཅིང་༔ དེ་ལྟར་མཆོད་པའི་ལྷ་མོ་མཆོད་པ་དང་བཅས་པ་རྣམས་མཆོད་ཡུལ་རྣམས་ཀྱི་སྐུ་གསུང་ཐུགས་ལ་ཐིམ༔ མེ་ཏོག་མ་སྤྱན༔ བདུག་སྤོས་མ་ཤངས༔ ཞལ་ཟས་མ་ལྗགས༔ དྲི་ཆབ་མ་ཞབས༔ མར་མེ་མ་ཐུགས་ཀར༔ རོལ་མོ་མ་སྙན་ལ་ཐིམ་དེ་ལྟར་མཆོད་པ་དང་༔ མཆོད་པ་འབུལ་མཁན་ལྷ་མོ་ཡང་ཐིམ་པས་ཟག་མེད་ཀྱི་བདེ་བས་
ཐུགས་དགྱེས་པར་བསྒོམ༔ ཨོཾ་བཛྲ་པུཥཱ་སོགས་ཀྱིས་མཆོད་ཅེས་པས༔ སྔགས་སོ་སོ་དང་མཉམ་དུ་མཆོད་པའི་ཕྱག་རྒྱ་རྣམས་བྱས་ན་མཆོད་པ་དྲུག་ཚང་བར་གྱུར༔ རྣལ་འབྱོར་རྒྱུད་ལ་སྔགས་དང་ཕྱག་རྒྱ་གང་ཆད་འདྲ་ནའང་༔ འདི་བླ་མེད་རྒྱུད་ཡིན་པས་ཕྱག་རྒྱ་གྲུབ་ན་ལེགས་མ་གྲུབ་ཀྱང་ཆད་པའི་སྐྱོན་ནི་མེད༔ སྔགས་དོན་ནི༔ ཨོཾ་རྡོ་རྗེའི་མེ་ཏོག་བདུག་སྤོས་མར་མེ་དྲི་ཆབ་ཞལ་ཟས་རོལ་མོ་མཆོད་པ་ཨཱ༔ ཧཱུྃ༔ ཧཱུྃ་ཞེས་བརྗོད་པས་རང་གི་ཐུགས་ཀ་ནས་གཟུགས་རྡོ་རྗེ་མ་དཀར་མོས་མེ་ལོང་ཐོགས་པ༔ སྒྲ་རྡོ་རྗེ་མ་སྔོན་མོས་པི་ཝཾ་ཐོགས་པ༔ དྲི་རྡོ་རྗེ་མ་སེར་མོས་སྤོས་ཕོར་ཐོགས་པ༔ རོ་རྡོ་རྗེ་མ་དམར་མོས་ཞལ་ཟས་ཐོགས་པ༔ རེག་བྱ་རྡོ་རྗེ་མ་ལྗང་གུས་ན་བཟའ་ཐོགས་པ༔ ཆོས་དབྱིངས་རྡོ་རྗེ་མ་དཀར་མོས་ཆོས་འབྱུང་ཐོགས་པ༔ བྱེ་བ་དུང་ཕྱུར་དཔག་ཏུ་མེད་པ་སྤྲོས་ཏེ༔ དེ་རྣམས་ཀྱིས་གར་སྟབས་སྣ་ཚོགས་བྱེད་ཅིང་ཤིན་ཏུ་སྙན་པའི་དབྱངས་ཀྱིས༔ ཕུང་པོ་ལྟ་ཉིད་ཡེ་ཤེས་ལ༔ འདོད་ཡོན་གླུ་གར་མཆོད་ཡིད་ཚིམ༔ རྣམ་དག་མཆོད་པ་བཞེས་སུ་གསོལ༔ ཞེས་པའི་གླུ་དབྱངས་ལེན་ཅིང་གཟུགས་རྡོ་རྗེ་མ་སྤྱན༔ སྒྲ་རྡོ་རྗེ་མ་སྙན༔ དྲི་རྡོ་རྗེ་
མ་ཤངས༔ རོ་རྡོ་རྗེ་མ་ལྗགས༔ རེག་རྡོ་རྗེ་མ་སྐུ༔ ཆོས་དབྱིངས་རྡོ་རྗེ་མ་ཐུགས་ཀར་ཐིམ་པར་བསྒོམས་ལ༔ མ་ཧཱ་པཉྩ་པཱུ་ཙ་ཧོ༔ སྔགས་དོན་ནི་ཆེན་པོ་མཆོད་པ་ལྔ་ཡིས་དགྱེས༔ འདི་ནི་ཕྱི་མཆོད་ཀྱི་ནང་མཆོད་ཡིན་ནོ༔ ཧཱུྃ་ཞེས་བརྗོད་པས་སྐུའི་རིག་མ་དཀར་མོ་མེ་ལོང་དང་པདྨ་འཛིན་པ༔ གསུང་གི་རིག་མ་དམར་མོ་རྔ་ཟླུམ་འཛིན་པ༔ ཐུགས་ཀྱི་ལྷ་མོ་མཐིང་ཁ་པི་ཝཾ་སྒྲོག་པ༔ ཡོན་ཏན་གྱི་རིག་མ་སེར་མོ་གླིང་བུ་འབུད་པ་ཕྲིན་ལས་ཀྱི་རིག་མ་ལྗང་མོ་སིལ་སྙན་བཀྲོལ་བ༔ ཐམས་ཅད་ཀྱང་བཅུ་དྲུག་ན་ཚོད་དབུ་སྐྲ་སིལ་བུར་བསིལ་ཞིང་༔ རིན་པོ་ཆེའི་རྒྱན་སྣ་ཚོགས་ཀྱིས་སྤྲས་པ༔ བྱེ་བ་དུང་ཕྱུར་དཔག་ཏུ་མེད་པ་སྤྲོས་ཏེ༔ ཐབས་ཀྱི་རང་བཞིན་ལྷ་ཡབ་རྐྱང་རྣམས་ཀྱི་གནས་ལྔར་ཐིམ་པ་དང་༔ ཤེས་རབ་ཀྱི་རང་བཞིན་ལྷ་ཡུམ་རྐྱང་རྣམས་ནི་གཡོན་གྱི་ཁཊཾ་ལ་ཐིམ༔ གཉིས་སུ་མེད་པའི་རང་བཞིན་ལྷ་ཞལ་སྦྱོར་རྣམས་ཀྱི་ཡུམ་ལ་ཐིམ་པས་ཡབ་ཡུམ་གཉིས་སུ་མེད་པར་སྦྱོར་བའི་སྦྱོར་མཚམས་ནས་འོད་ཟེར་འཕྲོས་༔ ཕྱོགས་བཅུའི་སངས་རྒྱས་བྱང་སེམས་ཐམས་ཅད་བཀུག་ནས་འདུས་ཏེ༔ ཡབ་ཡུམ་གྱི་ཞལ་དུ་
ཞུགས་ཞུ་བ་ལས་ཡབ་ཡུམ་གྱི་པདྨར་བབ་པ་ལས་བྱང་ཆུབ་ཀྱི་སེམས་ཀྱི་ཐིག་ལེ་དེ་ལས་གུ་རུ་དྲག་པོའི་དཀྱིལ་འཁོར་ཡོངས་སུ་རྫོགས་པ་ཞིག་ཏུ་གྱུར༔ དེ་ཉིད་འོད་ཟེར་གྱི་ཚུལ་དུ་ཕྱིར་འཕྲོས་པས་དཀྱིལ་འཁོར་གྱི་ལྷ་ཐམས་ཅད་ལ་ཐིམ༔ ལྷ་ཐམས་ཅད་ཐབས་ཤེས་གཉིས་སུ་མེད་པ་བདེ་བ་ཆེན་པོའི་ངོ་བོར་གྱུར༔ དེ་ནི་གསང་བའི་མཆོད་པ་ཡིན་པས་བཞེས་ཤིག༔ མ་ཧཱ་མུ་དྲུ་སུ་མཱ་ཡཱ་ནི་ཕྱག་རྒྱ་ཆེན་པོའི་དམ་ཚིག་སྟེ༔ ལྷ་ཡབ་ཡུམ་ཞལ་སྦྱོར་བ་ནི་ཕྱག་རྒྱ་ཆེན་པོ་ཡིན་ཏེ༔ ཡབ་ནི་ཐབས༔ ཡུམ་ནི་ཤེས་རབ༔ ཞལ་སྦྱོར་བ་ནི་ཟུང་འཇུག་གོ༔ གུ་ཧུ་པཱུ་ཙ་ཧོ་ནི་གསང་བའི་མཆོད་པས་དགྱེས༔ བརྡའ་རྙིང་པ་ལ་པཱུ་ཙ་དང་༔ གསར་མ་ལ་པཱུ་ཛ་སྟེ་གསར་རྙིང་གི་ཁྱད་དོ༔ ཧཱུྃ་ཞེས་མཆོག་གི་སྙིང་པོ་བརྗོད་པས༔ སྣོད་རང་བྱུང་ནི་བྷནྡྷ༔ བཅུད་རང་བྱུང་བདུད་རྩི་ལྔ་སྟེ༔ གདོད་ནས་རིགས་ལྔ་ཡེ་ཤེས་ལྔའི་ངོ་བོ་རྣམ་པར་དག་པ༔ ནང་གི་རྩྭ་བ་བརྒྱད་ཀྱང་མིའི་ལུས་ལ་ཚང་ཕྱིའི་རྩ་བ་བརྒྱད་ནི་ཙན་དན་དམར་པོ་ལ་ཚང་༔ དེ་ལས་གཞན་རྫས་སྣ་སྟོང་ལ་སྦྱར་བའི་བདུད་རྩི་ཆོས་སྨན་ནི༔ རྡོ་རྗེ་དང་༔ རིན་ཆེན་དང་༔ པདྨ་དང་༔ ལས་
དང་༔ དེ་བཞིན་གཤེགས་པ་རིགས་ལྟའི་བཟའ་བའི་དམ་ཚིག་སོགས༔ དམ་ཚིག་ལྟ་བསྲུང་བའི་དངོས་གཞི༔ ཆོས་དབྱིངས་ཡེ་ཤེས༔ མེ་ལོང་ཡེ་ཤེས༔ མཉམ་ཉིད་ཡེ་ཤེས༔ བྱ་གྲུབ་ཡེ་ཤེས༔ སོར་རྟོག་ཡེ་ཤེས༔ ལྟ་རྫོགས་པར་གྲུབ་པའི་རྫས༔ ངན་སོང་གསུམ༔ ལྷ་མ་ཡིན་ནི་ལྷ་ངན་པ་ཡིན་པས་ལྷར་རྩི༔ མི་དང་འགྲོ་བ་ལམ་རྒྱུད་ལྔའི་སེམས་ཅན་ཀུན་རིགས་ལྔའི་གོ་འཕང་ལ་བསྒྲལ་བའི་ཕྱིར་འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག་སྟེ་དུག་ལྔ་ནི་བདུད་ཡིན་པས༔ དེ་སེལ་བའི་རྩི་ནི་འདི་ཡིན་པས་བདུད་རྩི་ཆེན་པོ༔ ཉན་རང་སོགས་ཀྱི་བསྐལ་པ་དུ་མར་སྒྲུབ་པའི་དངོས་གྲུབ་ཀྱང་འདི་ལྕེ་ལ་རེག་པ་ཙམ་གྱིས་ཐོབ་པར་ངོ་མཚར་ཆེ༔ ཟེགས་མ་འཐོར་བ་ལྷ་ལ་ཕོག་ན་ཐུགས་དམ་བསྐང་༔ མཆེད་ལྕམ་ལ་ཕོག་ན་ཉམས་ཆག་དག༔ འདྲེ་གདོན་ལ་ཕོག་ན་རྡུལ་དུ་བརླགས་པས་རྗད་དུ་བྱུང་༔ ཚོགས་དང་མཆོད་རྫས་ལ་ཕོག་ན་ཟག་མེད་ཡེ་ཤེས་ཀྱི་མཆོད་པ་མཆོག་ཏུ་གྱུར་པའི་བདུད་རྩི་འདི༔ རིགས་ཀྱི་བདག་པོ་རྒྱལ་བ་འོད་དཔག་ཏུ་མེད་པ་མན་ཆད་དཀྱིལ་འཁོར་གྱི་མཐའི་དུར་ཁྲོད་དུ་བཞུགས་པའི་ཤ་ཟ་ཞིང་སྐྱོང་
ཡན་ཆད༔ བདག་མདུན་བུམ་པའི་དཀྱིལ་འཁོར་གྱི་ལྷ་ཚོགས་རྒྱ་མཚོའི་ཚོགས་རྣམས་ལ༔ ཆེ་ཆུང་ཕམ་རྒྱལ་མེད་པར་མཉམ་ཉིད་ཆེན་པོར་བདུད་རྩི་འབུལ་ལགས་ན༔ དེ་བཞེས་ནས་དངོས་གྲུབ་མ་སྩལ་ནི་ལྷ་རང་རང་སོ་སོའི་དམ་ཚིག་ཉམས་པར་གྱུར་ནའང་༔ དེ་མི་བཞེས་པར་མ་མཛད་ལ༔ ཐུགས་རྗེ་ཆེན་པོའི་བདག་ལ་ཕན་པའི་ཕྱིར༔ ཐུགས་བརྩེ་བས་དགོངས་ཏེ་བཞེས་སུ་གསོལ༔ བཞེས་ནས་རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་པ་ལ༔ འགྱུར་མེད་སྐུ༔ འགག་མེད་གསུང་༔ འཁྲུལ་མེད་ཐུགས་ཀྱི་དངོས་གྲུབ་སྩོལ་ཅིག༔ ཨོཾ་ཨཱཿཧཱུྃ་ནི་སྐུ་གསུང་ཐུགས༔ སརྦ་པཉྩ་ཐམས་ཅད་ལ༔ ཨ་མཱི་ཏཱ་བདུད་རྩི༔ ཧཱུྃ་ཧཱིཏྟ་ནི་མཆོག་གི་སྙིང་པོ་དམ་པ༔ ཞེས་ལྷ་དང་སྲུང་མ་ཐམས་ཅད་ལ་མཚན་དོན་སྦྱར་ལ་འབུལ་ལོ༔ ཞེས་པའི་དོན༔ རྒྱས་པར་སྤྲོ་ན་ལག་གཡོན་དུ་བདུད་རྩི་ཐོགས༔ གཡས་པའི་མཐེབ་སྲིན་གྱིས་བླ་མ་རྣམས་ནམ་མཁའ༔ ཡི་དམ་རྣམས་བར་སྣང་༔ ཆོས་སྐྱོང་རྣམས་ས་གཞིའི་ཕྱོགས་སུ་གཏོར་ཞིང་༔ བདུད་རྩི་ཟེགས་མ་རེ་རེ་ལ་ཡང་མཆོད་པའི་ལྷ་མོ་ལག་ན་བྷནྡྷ་བདུད་རྩིའི་གང་བ་ཐོགས་པ་དཔག་ཏུ་
མེད་པར་གྱུར་ནས༔ ལྷ་སོ་སོའི་ཞལ་དུ་བདུད་རྩི་དྲངས་པར་བྷེ་ཞིང་དབྱངས་དང་བཅས་པས༔ ཆོས་སྐུ་སྣང་བ་མཐའ་ཡས་ཞལ་དུ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི༔ ལོངས་སྐུ་ཐུགས་རྗེ་ཆེན་པོའི་ཞལ་དུ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི༔ སྤྲུལ་སྐུ་པདྨ་འབྱུང་གནས་ཞལ་དུ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི༔ མཁའ་འགྲོ་ཡེ་ཤེས་མཚོ་རྒྱལ་ཞལ་དུ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི༔ གཏེར་སྟོན་རཏྣ་གླིང་པའི་ཞལ་དུ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི༔ དྲིན་ཆེན་རྩ་བརྒྱུད་བླ་མའི་ཞལ་དུ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི༔ ཡི་དམ་དྲག་པོའི་ལྷ་ཚོགས་ཞལ་དུ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི༔ ཆོས་བདག་མཁའ་འགྲོ་སྡེ་ལྔའི་ཞལ་དུ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི༔ ཆོས་སྐྱོང་སེང་གདོང་ཡབ་ཡུམ་ཞལ་དུ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི༔ བཀའ་སྲུང་སྤུ་གྲི་མཆེད་གསུམ་ཞལ་དུ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི༔ གཏེར་སྲུང་དགེ་བསྙེན་སྨྱོ་ཁའི་ཞལ་དུ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི༔ ཞེས་སམ་བསྡུ་ན༔ བྱིན་རླབས་ཀྱི་རྩ་བ་སྐུ་གསུམ་བརྒྱུད་པའི་བླ་མ་རྣམས་ཀྱི་ཞལ་དུ་ཨོཾ་ཨཱཿཧཱུྃ༔ དངོས་གྲུབ་ཀྱི་རྩ་བ་ཡི་དམ་དབང་དྲག་པདྨའི་ལྷ་ཚོགས་རྣམས་ཀྱི་ཞལ་དུ་ཨོཾ་
ཨཱཿཧཱུྃ༔ ཕྲིན་ལས་ཀྱི་རྩ་བ་ཆོས་སྐྱོང་སྲུང་མ་རྣམས་ཀྱི་ཞལ་དུ་ཨོཾ་ཨཱཿཧཱུྃ༔ གཞན་ཡང་འགྲོ་བ་རིགས་དྲུག་སེམས་ཅན་ཐམས་ཅད་ཡི་དམ་ལྷར་གསལ་བའི་ཞལ་དུ་ཨོཾ་ཨཱཿཧཱུྃ༔ དེ་ལྟར་མཆོད་པས་ལྷ་ཐམས་ཅད་ཀྱི་མཆོག་ཐུན་མོང་གི་དངོས་གྲུབ་ཆར་ལྟར་བབས་ནས་བདུད་རྩི་ལ་ཐིམ་པས༔ ཨོཾ་དཀར་དམར་ཧཱུྃ་མཐིང་གའི་རྣམ་པར་འདུག་པ་རང་གི་གནས་གསུམ་དུ་ཐིམ་པར་བྷོ་ལོ༔ ཀཱ་ཡ་སིདྡྷི་ཨོ༔ ཝཀྐ་སིདྡྷི་ཨཱཿ ཙིཏྟཱ་སིདྡྷི་ཧཱུྃ༔ ཞེས་གནས་གསུམ་དུ་ཐིག་ལེ་བྱ༔ ཐིགས་པ་ལྕེ་ལ་བཞག་པས་དངོས་གྲུབ་ཐམས་ཅད་ཐོབ་པར་བསམ༔ དེ་དག་ཚེས་བཅུའི་དུས་སམ༔ ཆང་ཕུད་འཛོམ་དུས་ཡིན་གྱི་རྒྱུན་དུ་མི་དགོས་སོ༔ ཧཱུྃ༔ རྣལ་འབྱོར་པས་དཱམ་ཚིག་བསྲུང་བའི་རྫས་གཏོར་མ་རིན་ཆེན་འབར་བ་འདི༔ རི་རབ་ལྟར་ཆེ་ཞིང་གཟི་བརྗིད་དང་ལྡན་པ་རོ་མཆོག་བརྒྱ་དང་ལྡན་ཞིང་༔ རྣམ་པ་ནི་བདུད་རྩི་རྒྱ་མཚོའི་རླངས་པ་ལ་གཟུགས་མཛེས་པའི་མཆོད་པའི་ལྷ་མོ་དུ་མ་འཕྲོ་བ་མཚོའི་རླབས་ལ་སྒྲ་སྙན་པ་དཔག་ཏུ་མེད་པའི་སྒྲ་གྲག་པ༔ དྲི་ཞིམ་པོ་དུ་མའི་ངད་ལྡང་བ་ཀ་ར་སྦྲང་རྩི་ལྟར་རོ་མངར་བ་ཟོས་ན་ལུས་སེམས་ལ་ཟག་མེད་ཀྱི་བདེ་བ་བསྐྱེད་པ༔ དེ་
ལྟར་འདོད་ཡོན་ལྔ་ཚང་ཞིང་༔ མཆོད་པའི་ལྷ་མོའི་ཚོགས་རྒྱན་གྱིས་སྤྲས་ཤིང་༔ ལག་ན་བྷནྡྷའི་སྐྱོགས་ཐོགས་ནས་ཡེ་ཤེས་ཀྱི་བདུད་རྩི་རྒྱུ་མཚོ་དེ་ལས་བཅུས་ནས༔ མཆོད་པའི་ལྷ་མོ་སྤྲིན་ལྟར་འཐིབས་པ་འདི་རྣམས་ཀྱིས༔ བྱིན་རླབས་ཀྱི་རྩ་བ་བླ་མ༔ དངོས་གྲུབ་ཀྱི་རྩ་བ་ཡི་དམ༔ ཕྲིན་ལས་ཀྱི་རྩ་བ་མཁའ་འགྲོ་ཆོས་སྐྱོང་གསུམ་གྱི་ལྷ་ཚོགས་རྣམས་ལ་འབུལ་བས༔ ཤིན་ཏུ་མཉེས་ནས་ཐུགས་དམ་བསྐང་༔ ཐུགས་དམ་བསྐངས་བར་གྱུར་ན་དབང་བཞི་ཡི་དབང་དོན་གྱི་ཡེ་ཤེས་དང་༔ མཆོག་དང་ཐུན་མོང་གི་དངོས་གྲུབ་སྩོལ་ཅིག༔ མ་ཧཱ་བ་ལིཾ་ཏཱ་ལ་ཁ་རཾ་ཁཱ་ཧི་ནི༔ གཏོར་མ་ཆེན་པོ་ཟོ་ཟོ་ཤིག༔ དེ་རང་གིས་ཀྱང་གཏོར་བསྔོས་བསྡུས་པ་ཚང་བས༔ གཏོར་བསྔོས་གཞན་མ་བྱས་ཀྱང་རུང་༔ གུ་དྲག་རང་གཙོ་བོར་བྱེད་ན་གཏོར་བསྔོས་བྱེད་པ་འདིར་ཡིན་ཀྱང་༔ གུ་དྲག་རྐྱང་པའི་གཏོར་བསྔོས་ཡིན་ན་འདིར་རུང་གི༔ གསར་རྙིང་བསྲེས་མའི་གཏོར་བསྔོས་མང་པོ་ཡོད་ན་འདིར་མི་རུང་སྟེ། གཏེར་གཞུང་གི་ལས་བྱང་འདི་ལ་བཅོས་སླད་མི་རུང་བའི་ཕྱིར༔ ལས་བྱང་ཚར་བའི་ཐུན་སྐབས་ཤིག་ཏུ་གཏོར་བསྔོས་རྒྱས་པ་ཡོད་ན་
བྱའོ༔ སྨན་རཀ་གཏོར་གསུམ་ནི་ནང་མཆོད་ཡིན་ལ༔ སྦྱོར་མཆོད་སྒྲོལ་མཆོད་གཉིས་ནི་གསང་མཆོད་ཡིན་ཀྱང་༔ གཞུང་ཡོད་ཚུགས་ལས་གོ་རིམ་བསྒྲིག་མི་ཕོད་དེ་བཅོས་སླད་དུ་འགྱུར་བའི་ཕྱིར་རོ༔ ཧཱུྃ་ཞེས་གདུག་པ་ཅན་འདུལ་བའི་སྔགས་བརྗོད་ནས༔ རང་ངོ་རང་གིས་མ་རིག་སྟེ༔ ལོག་པར་རྟོག་པའི་འཁྲུལ་བའི་དབང་གིས༔ བསྒྲལ་བའི་ཞིང་བཅུ་ཚང་བ་བསྟན་པའི་སྤྱི་དགྲ་དང་༔ བསྟན་པ་དང་སེམས་ཅན་ལ་གནོད་པའི་གདུག་པའི་རུ་ཏུ་རྣམས་བསྒྲལ་བའི༔ ཐོད་པ་རློན་པ་ལྕང་ལོ་དང་བཅས་པའི་བྷན་ཡངས་ཤིང་རྒྱ་ཆེ་བ་རུ༔ འདོད་ཁམས་གཟུགས་ཁམས་གཟུགས་མེད་ཁམས་གསུམ་གྱི་སེམས་ཅན་ཐམས་ཅད་སྐུ་གསུམ་གྱི་ཞིང་ཁམས་སུ་བསྒྲལ་བའི་དུག་ལྔ་དང་༔ ཉོན་མོངས་པ་རྣམས་རཀྟའི་རྒྱ་མཚོར་བསྐྱིལ་བར་བསྒོམས་ནས༔ རྒྱ་གར་སྐད་དུ༔ ཧེ་རུ་ཀ༔ བོད་སྐད་དུ་ཁྲུག་འཐུང་ཡེ་ཤེས་ཀྱི་མེ་འབར་བའི་ལྷ་ཚོགས་རྣམས་ཀྱི་ཞལ་དུ་འཁོར་བ་ཁྲག་གི་རྒྱ་མཚོ་འདི་བསྟབ་བོ་ཁ་རཾ་ཁཱ་ཧི༔ མ་ཧཱ་རཀྟ་ལ་ཁ་རཾ་ཁཱ་ཧི༔ ཁྲག་ཆེན་པོ་ཟོ་ཟོ་ཤིག༔ ཧཱུྃ་ལ་ཡེ་ཤེས་ལྔ་ཚང་༔ ཡང་དག་པར་ན༔ རང་གི་སེམས་ཉིད་ཆོས་སྐུ་རྗེན་པ་ཡིན་པའི་
དོན་རྟོགས་པའི་ཤེས་རབ་ཀྱི་རལ་གྲི༔ གཟུང་བའི་ཡུལ་དང་འཛིན་པའི་སེམས་སྟོང་པ་ཉིད་དུ་རྟོགས་པས་བདག་བསྒྲལ་དེ་ལྟར་མ་རྟོགས་པའི་སེམས་ཅན་ལ༔ སྙིང་རྗེ་དྲག་པོས་གདུག་པའི་སེམས་དང་ལྡན་པའི་གཟུགས་ཅན་གྱི་དགྲ་བསྟན་པ་ལ་གནོད་པ༔ གཟུགས་མེད་ཀྱི་བགེགས་བྱང་ཆུབ་སྒྲུབ་པ་ལ་བར་ཆད་བྱེད་པ་རྣམས་བསྒྲལ་ན་རྒྱལ་བའི་ཚོགས་རྣམས་ཐམས་ཅད་དེ་ལ་དགྱེས་པས༔ ཆོས་དབྱིངས་རོལ་པའི་མཆོད་པ་ཆེན་པོ་ཡིན་པས་བདག་གིས་ཀྱང་དེ་ལྟར་བྱ་ཡི་མཆོད་པ་ཆེན་པོ་བཞེས་ཤིག་མ་ཏྲཾ་རུ་ཏུ་པྲ་བྷུན་ཙཀྲ་ནི་བདུད་ཀྱི་འཁོར༔ པྲ་ཝེ་ཤཱ་ཡ༔ ཁཱ་ཧཱི་ནི་རྣམ་ཤེས་གནས་སུ་སྤར་ཏེ་ཟོ་ཞིག༔ ཅེས་ཕྱི་ནང་གསང་གསུམ་སྨན་གཏོར་རཀྟ་ལ་སོགས་པ་གཏེར་གཞུང་ནས་བྱུང་བ་ལྟར་རིམ་པར་མཆོད་ནས༔ རྔ་དུང་སིལ་སྦུབ་སོགས་རོལ་མོའི་ཚོགས་ཀྱིས་ཀྱང་མཆོད༔ ཅེས་པས་རྒྱུན་དུ་རྔ་རྡུང་བའམ་མིན་ན་ཐུན་མཚམས་སུ་རྔ་རོལ་མོ་འུར་རྡུང་མཆོད་རོལ་དགོས་པའི་དོན་ནོ༔ ཤམཤཋཱ༔ མཊམ་། བརྡ་ཡིག་ཚན་གཉིས་ནི་དང་པོ་མཆོད་པའི་མཇུག་དང་༔ རྗེས་མ་བསྟོད་པའི་མགོ་སྟེ༔ འདི་ལ་སྣོན་
ཕྲི་མི་རུང་བའི་ཕྱག་དམ་བཀའ་རྟགས་མཁའ་འགྲོའི་ཡི་གེའོ༔ དེ་ནས་བསྟོད་པ་རྒྱས་པ་རྣམ་རྒྱལ་འབར་མ༔ བསྡུས་པ་འདི༔ བསྐུལ་ནི་རྣམ་རྒྱལ་འབར་མའི་མཇུག་གི་ལེའུ་དང་༔ སྤུ་གྲིའི་བསྐུལ་པ་དང་གསུམ་ལས༔ དང་པོ་གཙོ་བོ་ལ་དོན་རྟགས་དྭང་མཐུན་པར་བསྟོད་པ་ནི་༔ ཧཱུྃ་ནི་མཆོག་བསྐལ་པ་འཇིག་དུས་ཀྱི་མེ་ལྟར༔ ཡེ་ཤེས་ཀྱི་མེ་དཔུང་འབར་བའི་ཀློང་དཀྱིལ་ནས༔ ཏཱི་ར་ནི་དྲེགས་པ་ཅན་རྣམས་རོ་ལྟར་མནན་པའི་ཁྲི་ནི་ཉི་ཟླ་དང་པདྨའི་གདན་སྟེང་དུ༔ སྣང་སྲིད་ཀུན་གྱི་ཆེ་བཙན་འགྲན་ཟླ་དང་བྲལ་བ༔ ཁྲོ་བོ་ཀུན་ལས་ཆེ་བའི་ཆེ་མཆོག་དྲག་པོ་པདྨ་ཐོད་ཕྲེང་རྩལ༔ དེའི་སྐུ་མདོག་ཆ་ལུགས་ཕྱག་མཚན་རྣམས་སླར་ཡང་བསྟོད་པའི་ཚིག་གིས་གསལ་བཏབ་སྟེ༔ སྐུ་མདོག་ནི་དམར་ནག་མེའི་མདོག་འདྲ་ཞིང་༔ དམར་དཀར་སྔོ་བའི་ཞལ་གསུམ་ཕྱག་དྲུག་པ༔ ཞལ་རེ་རེ་ལ་སྤྱན་གསུམ་གསུམ་སྟེ་སྤྱན་དགུ་སྡང་མིག་ཏུ་བསྒྲད་པ༔ དབུ་སྐྲ་དམར་སེར་གྱེན་དུ་བརྗེས་པ་མཐོ་སྲིད་པའི་རྩེ་མོར་སླེབས་པ༔ དབུ་ལ་ཐོད་སྐམ་ལྔའི་ནང་ན་ཁྲག་འཐུང་རིགས་ལྟ་བཞུགས་ཤིང་༔ དེའི་རྩེ་མོར་རིན་པོ་ཆེའི་རྩེ་ཕྲན་ལྔའི་ནང་ན་རྒྱལ་བ་རིགས་ལྔ་
བཞུགས་ཤིང་༔ འཁོར་རིགས་ལྔའི་སངས་རྒྱས་བྱང་སེམས་སྤྲིན་ལྟར་གཏིབས་པ༔ ཞལ་གསུམ་གདུངས་ཤིང་ལྗགས་འདྲིལ་བ༔ རྣོ་དབལ་དང་ལྡན་པའི་མཆེ་བ་ཟླ་བ་ཚེས་པ་ལྟར་བཅུ་གཉིས་གཙིགས་པ༔ ཕྱག་གཡས་དང་པོས་གནམ་ལྕགས་ཀྱི་རྡོ་རྗེ་རྩེ་དགུ་པ་ལྷ་ཚངས་པའི་གྲུ་གང་བ༔ སངས་རྒྱས་ཐམས་ཅད་ཀྱི་ཕ་རོལ་ཏུ་ཕྱིན་པ་དྲུག་སྤྱད་པའི་བདེན་མཐུ་ལས་གྲུབ་པ༔ དེ་ཚད་པ་ཙམ་གྱིས་དབུས་ཀྱི་རི་བོ་མཆོག་རབ་ཀྱང་ཐལ་བར་བརླག་པའི་ནུས་པ་ཅན་ཕྱིར་ཐབས་སུ་འཛིན་པ༔ ཕྱག་བར་པས་རྡོ་རྗེས་མཚན་པའི་གྲི་གུག་བདག་འཛིན་གཅིག་པུ་གཅོད་པའི་མཚོན་སོ་གཅིག་པ༔ རྣོ་ངར་རབ་ཏུ་འབར་བས་སྤུ་གྲི་རེག་གཅོད་ལྟ་བུ་གདེངས་ཐབས་སུ་འཛིན་པས་འཁོར་བའི་སྡུག་བསྔལ་སྐྱེ་ཤི་འཁྲུལ་འཁོར་རྩོད་ནས་གཅོད་པ༔ ཕྱག་ཐ་མས་ཤེས་རབ་ཀྱི་རལ་གྲི་མེ་འབར་བ་ཕྱར་བས་གཟུགས་ཅན་གྱི་དགྲ་དང་གཟུགས་མེད་ཀྱི་བགེགས་ཐམས་ཅད་དུམ་བུར་གཏུབ་པ༔ ཕྱག་གཡོན་གྱི་ཐ་མས་ལྕགས་ཀྱི་སྡིག་པ་ཁ་དགུ་མིག་དགུ་རྭ་བཅོ་བརྒྱད་པ་འགྱེད་ཐབས་སུ་འཛིན་པ་དེ་ལས་དེ་འདྲ་གྲངས་མེད་པ་འཕྲོས་པས་གནོད་བྱེད་རྒྱལ་བསེན་དམ་སྲི་རྣམས་ཀྱི་
སྙིང་ཁྲག་འཐུང་བར་བྱེད་པ༔ ཕྱག་གཡོན་བར་པས་བྷནྡྷ་འབར་བས་ཡངས་ཤིང་རྒྱ་ཆེ་བར་ཁམས་གསུམ་གྱི་སེམས་ཅན་རྣམས་ཀྱི་ཉོན་མོངས་པ་དུག་ལྔ་དུག་གསུམ་ཐམས་ཅད་ཁྲག་ཏུ་བྱིན་གྱིས་བརླབས་ཏེ་རོལ་པས་འཁོར་བའི་རྒྱ་མཚོ་སྐེམ་པར་མཛད་པ༔ ཕྱག་གཡོན་དང་པོས་ཁཊཾ་རྩེ་གསུམ་པ་འཛིན་པས་ཉོན་མོངས་པ་དུག་གསུམ་མ་སྤངས་གནས་སུ་དག་ནས་སྐུ་གསུམ་གྱི་དབྱིངས་སུ་སྦྱོར་བར་མཛད་པ༔ ཐབས་ཤེས་མཚོན་པའི་གཤོག་པ་གཉིས་ཏེ་ཐིལ་ཕྲན་རྡོ་རྗེས་མཚན་པའི་གཤོག་པ་གཡས་སུ་གདེངས་ཤིང་༔ རིན་པོ་ཆེས་མཚན་པའི་གཤོག་པ་གཡོན་དུ་གདེངས་བ༔ སྟོབས་བཅུ་རྫོགས་པའི་ཕྱིར་གླང་ཆེན་གྱི་ཀོ་བ་རློན་པས་སྟོད་གཡོགས་པ༔ བདུད་དང་སྲིན་པོ་འདུལ་བའི་ཕྱིར་མི་ལྤགས་ཀྱི་གཡང་བཞི་རྐེད་ལ་དཀྲིས་པ༔ བདུད་བཞིའི་གཡུལ་ལས་རྒྱལ་བའི་ཕྱིར༔ སྟག་གི་པགས་པའི་ཤཱམ་ཐབས་སོགས་ཁྲག་འཐུང་འབར་བའི་ཆས་ཀྱིས་བཀླུབས་པ༔ ཀླུ་རིགས་ལྔ་འདུལ་བའི་ཕྱིར༔ སྦྲུལ་རིགས་ལྟས་ཡན་ལག་དཀྲིས་པ་དང་སྦྲུལ་ནཱག་དང་ཐོད་ཕྲེང་གི་དོ་ཤལ་བརྒྱན་པ༔ ཞབས་བཞི་ཀློང་ཆེན་རབ་འབྱམས་པས་ནི་གཡས་བརྐྱང་གཡོན་བསྐུམ་དུ་
བཞེད་ཀྱང་༔ དེང་སང་ཀུན་གྱི་ཡོངས་གྲགས་ལ་གཡོན་བརྐྱང་གཡས་བསྐུམ་གྱད་ཀྱི་འདོར་ཐབས་ཀྱིས་ནི་གྱད་སྟོབས་པོ་ཆེ་རྣམས་ཀྱི་ཤེད་བགྲད་དུས་ཀྱི་རྐང་སྟབས་ལྟར་བགྲད་པ༔ སྐུའི་བ་སྤུའི་རྩེ་མོ་ཐམས་ཅད་ལ་གནམ་ལྕགས་རྡོ་རྗེའི་རང་བཞིན༔ མེའི་ཚྭ་ཚྭ་མགར་གྱི་སོལ་མེ་ནས་བྱུང་བའི་ལྕགས་སྲེག་གི་ཚྭ་ཚྭ་ལྟར་སིལ་སྒྲ་དང་བཅས་ཏེ་འཕྲོ་བ༔ སྐུ་ལས་སྤྲུལ་པའི་ཁྲོ་བོ་སྐུ་ཆུང་ལ་ཡན་ལག་དོད་པ༔ ཆ་ལུགས་ཡཀཱ་མེ་དབལ་འདྲ་བ་གྲངས་མེད་པ་མང་པོ་སྐར་ལྟར་འཁྲུག་པ༔ གློག་ལྟར་འཁྱུག་པ་རླུང་ལྟར་འཚུབ་པ་ཁྲོ་བོ་རྣམས་ཀྱི་ཞལ་ནས་གསུང་པ་དང་༔ རང་བཞིན་གྱི་སྒྲ་གྲག་པའི་ཧཱུཾ་ཧཱུཾ་དང་ཕཊ་ཕཊ་ཀྱི་སྒྲ་ཆེན་པོས་སྟོང་གསུམ་སྟོང་གི་འཇིག་རྟེན་གྱི་ཁམས་ནམ་མཁའ་ས་གཞི་བར་སྣང་ཐམས་ཅད་གང་སྟེ༔ ས་རྣམ་པ་དྲུག་ཏུ་གཡོས་ཤིང་རི་རབ་འགུལ་རྒྱ་མཚོ་འཁྱོམ༔ གཙོ་བོའི་སྐུ་ལས་སྤྲུལ་པའི་ཁྲོ་ཚོགས་ནི་མེ་དཔུང་ཆེན་པོ་དང་བཅས་ཏེ༔ ནམ་མཁའི་ཐོག་ལྟར་གནོད་བྱེད་ཀྱི་སྟེང་དུ་འབེབས་པ༔ དེ་ལྟར་བཅོམ་ལྡན་ཁྲོ་བོ་ཆེན་པོ་འབར་བའི་གར་དགུ་དང་ལྡན་པ་ལ་ལུས་ངག་ཡིད་གསུམ་གུས་པའི་སྒོ་ནས་ཕྱག་འཚལ་བསྟོད༔ ཁྱེད་ཀྱི་
ཡོན་ཏན་ནི་རྡོ་རྗེའི་ལྗགས་ཀྱིས་ཀྱང་བརྗོད་པར་མི་ནུས་ན༔ བདག་ལྟ་བུས་བརྗོད་པར་ག་ལ་ནུས་ཏེ༔ འོན་ཀྱང་སྐུའི་ཆ་ལུགས་ལ་ཟུར་ཙམ་བསྟོད་པ་ནི༔ བདག་དང་སེམས་ཅན་ཐམས་ཅད་ཀྱི་སྐུ་རྡོ་རྗེའི་གོ་འཕང་ཐོབ་པའི་ཕྱིར་དུ་ཕྱག་འཚལ་བསྟོད་དོ༔ ཡུམ་ཁྲོས་མ་ནག་མོའི་ཐུགས་སྲོག་ཧཱུྃ་ཞེས་བོས་ནས་ཐབས་ཀྱི་རང་བཞིན་ཡབ་ཀྱི་སྐུ་མཆོག་དེ་ལ་དགྱེས་པར་སྦྱོར་བའི་ཤེས་རབ་ཀྱི་རང་བཞིན་ཡུམ་ནི༔ ཐུགས་ཀྱི་ཕག་མོ་མཐིང་ནག་ཞབས་གཡས་བརྐྱང་ཞིང་གཡོན་བསྐུམ་པའི་སྟབས་ཀྱིས་སྦྱོར་བ་ནི། ཐབས་ཤེས་ཟུང་འཇུག༔ བདེ་སྟོང་ཟུང་འཇུག༔ གསལ་སྟོང་ཟུང་འཇུག༔ སྣང་སྟོང་ཟུང་འཇུག༔ བདེན་གཉིས་ཟུང་འཇུག་གི་བརྡའ་སྟོན་པ་སྟེ་ཆགས་པ་སྤྱད་པ་ལྟ་བུ་ནི་མ་ཡིན་ནོ༔ སྤྱི་གཙུག་ན་ཕག་ཞལ་མཐིང་ནག་ཕག་སྐུད་ངུར་སྒྲ་འབྲུག་ལྟར་སྒྲོགས་པས༔ དཔའ་བོ་མཁའ་འགྲོ་ཐམས་ཅད་དབང་དུ་བསྡུ་ཞིང་༔ ཕྱག་གཡས་རྣམ་རྟོག་གཅོད་པའི་གྲི་གུག་ཡབ་ཀྱི་མགུལ་ནས་འཁྱུད་པ༔ གཡོན་འཁོར་བའི་རང་བཞིན་ཐོད་ཁྲག་ཡབ་ཀྱི་གཡས་ཞལ་ཆོས་སྐུའི་ཞལ་ལ་སྟོབས་པ༔ འཕོ་མེད་བདེ་བ་ཆེན་པོ་སངས་རྒྱས་ཐམས་ཅད་ཀྱི་སྐུ་གསུང་
ཐུགས་གསང་བ་བསམ་གྱིས་མི་ཁྱབ་པའི་བདག་མོ་ཆོས་སྐུ་ཡུམ་ཆེན་མོ་དེ་ལ་ཕྱག་འཚལ་བསྟོད་དོ༔ ཧཱུྃ་ཞེས་མཆོག་གི་ས་བོན་ནས་བོས་ཏེ༔ པདྨའི་རིགས་ཀྱི་བདག་པོ་སངས་རྒྱས་བཅོམ་ལྡན་འདས་སྣང་བ་མཐའ་ཡས་ནི༔ ཐུགས་རྗེས་འགྲོ་ལ་ཆགས་པས་སྐུ་མདོག་དམར་གསལ༔ སྐྱོན་ཐམས་ཅད་དང་བྲལ་བས་དྲི་མ་མེད་པ་དཔེར་ན་རིན་པོ་ཆེ་པདྨ་རཱ་གའི་མདོག་ལྟ་བུ༔ ཆོས་སྐུ་ཉག་གཅིག་མཚོན་པའི་ཞལ་གཅིག་ཞི་ཞིང་འཛུམ་པ༔ ཐབས་ཤེས་ཟུང་དུ་འཇུག་པའི་ཕྱུག་གཉིས་མཉམ་བཞུག་བསྣོལ་བའི་སྟེང་ན་ཚེའི་བུམ་པ་འཆི་མེད་བདུད་རྩིའི་བཀང་བ་འཛིན་པ༔ སྔོན་གྱི་ཐུགས་བསྐྱེད་དང་སྨོན་ལམ་དང་ཐུགས་རྗེའི་རང་བཞིན་གྱི་བྱིན་རླབས་ནི་སྤྲིན་གྱི་ཚོགས་ཆེན་པོ་ལྟར་གཏིབས་པ༔ སེམས་ཅན་གང་ཡང་རུང་བས་སྐུ་དེ་ཡིད་ལ་དྲན་ཅིང་མོས་པ་དང་༔ གུས་པས་དེའི་སྙིང་པོ་བཟླས་ན་ཚེའི་དངོས་གྲུབ་སྩོལ་བ་ལ་ཐེ་ཚོམ་མེད་པ༔ གུ་རུ་དྲག་པོའི་དབུ་གཙུག་ན་རིགས་ཀྱི་བདག་པོར་བཞུགས་པའི་སངས་རྒྱས་འོད་དཔག་མེད་འཁོར་བསྐལ་བཟང་གི་སངས་རྒྱས་སྟོང་གིས་བསྐོར་བ་ལ་ཕྱག་འཚལ་བསྟོད་དོ༔ ཧཱུྃ་ཞེས་འཇམ་
དཔལ་གཤིན་རྗེའི་གཤེད་ཀྱི་ཐུགས་སྲོག་ནས་བོས་ཏེ༔ དུས་གསུམ་སངས་རྒྱས་ཐམས་ཅད་ཀྱི་སྐུའི་སྤྲུལ་པ་འཇམ་དཔལ་གཞོན་ནུར་གྱུར་པ་དེ་ཉིད༔ འཆི་བདག་གཤིན་རྗེ་འདུལ་བའི་ཕྱིར་ཁྲོ་བོར་བཞེངས་པ་གཤིན་རྗེའི་གཤེད་ཞལ་གཅིག་ཕྱག་གཉིས་སྐུ་མདོག་སེར་ལ་ཅུང་ཟད་ནཱག་པའི་མདངས་ཅན་འོད་འབར་བའི་སྐུ༔ ཕྱག་གཡས་པས་ཤེས་རབ་ཀྱི་རལ་གྲི་ནམ་མཁའ་ལ་ཕྱར་བས་བདག་འཛིན་འཁོར་བའི་རྩ་བ་གཅོད་པ༔ གཡོན་པས་སྡིགས་མཛུབ་དང་བཅས་པའི་ཤེར་ཕྱིན་གྱི་པོ་ཏི་ཐུགས་ཀར་འཛིན་པས་ཤེར་ཕྱིན་གྱི་དོན་སེམས་ལ་འཆར་བར་བྱེད་པ༔ རབ་ཏུ་འཇིགས་པའི་སྐུ་འཆི་བདག་གཤིན་རྗེ་རྣམས་ཀྱང་སྐྲག་པར་བྱེད་པའི་ཁྲོ་བོའི་རྒྱལ་པོ་འབར་བའི་གྲྭར་དགུ་དང་ལྡན་པ༔ དཔལ་ཆེན་ཆེ་མཆོག་གཙོ་དགུའི་ནང་ནས་འཇམ་དཔལ་སྐུའི་དཀྱིལ་འཁོར་གྱི་གཙོ་བོ་ཚེ་བདག་འཆི་བདག་དང་སྲོག་བདག་དང་ཁ་ཐུན་དང་དགྲ་ནག་དང་གདོང་དྲུག་དང་གཤེད་དམར་ནག་དང་མཐར་བྱེད་དང་རྡོ་རྗེ་འཇིགས་བྱེད་ལ་སོགས་པ་དོན་གཅིག་ལ༔ ཆ་ལུགས་དང་མཚན་མི་འདྲ་བ་མང་པོ་ཅན༔ སྐུའི་རིགས་ཀྱི་ཁྲོ་བོའི་རྒྱལ་པོ་དེ་ལ་ཕྱག་འཚལ་བསྟོད་དོ༔ རྟ་
མགྲིན་གྱི་ཐུགས་སྲོག་ཧཱུྃ་ཞེས་བོས་ནས་སངས་རྒྱས་ཐམས་ཅད་ཀྱི་གསུང་གི་སྤྲུལ་པ་པདྨ་དབང་ཆེན་རྩྭ་མགྲིན་ནི༔ སྐུ་མདོག་དམར་པོ་ཞལ་གཅིག་ཕྱག་གཉིས་ཡེ་ཤེས་ཀྱི་མེ་དཔུང་དམར་ནག་འབར་བའི་ཀློང་ན་བཞུགས་པ༔ དབུ་གཙུག་ན་རྟ་མགོ་ལྗང་ཞུར་རྟ་སྐད་ནམ་མཁའི་དབྱིངས་སུ་འཚེར་བས་ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པ༔ ཞལ་ནས་ཧཱུཾ་ཧཱུཾ་དང་ཕཊ་ཕཊ་ཀྱི་སྒྲ་སྒྲོག་པ༔ གཡས་པས་པདྨས་མཚན་པའི་དབྱུག་ཐོ་ནམ་མཁའ་ལ་ཕྱར་བས༔ གདོན་བགེགས་ཀྱི་གླད་པ་འཇོམས་ཤིང་༔ གཡོན་པས་སྡིགས་མཛུབ་བསྒྲེང་བ་ལས་མེ་འབར་བས་གནོད་བྱེད་བསྲེགས་པ༔ སྤྲུལ་གྱི་ཆུན་པོ་དང་ཐོད་པ་སྐམ་རློན་གྱི་ཕྲེང་བ་དང་ཞིང་གི་གཡང་གཞི་སྟག་ཤུམ་ལ་སོགས་པ་ཁྲོ་བོའི་ཆས་ཐམས་ཅད་ཀྱིས་བརྒྱན་པ༔ པདྨ་ཧེ་རུ་ཀ་དང་རྟ་མཆོག་རྒྱལ་པོ་དང་པདྨ་དབང་ཆེན་ཞེས་ཀྱང་བྱ༔ འཕགས་པ་སྤྱན་རས་གཟིགས་ཁྲོས་པའི་རྒྱལ་པོ་དེ་ལ་ཕྱག་འཚལ་བསྟོད་དོ༔ ཧཱུྃ་ཞེས་ཕྱག་རྡོར་གྱི་ཐུགས་སྲོག་ནས་བོས་ཏེ༔ སངས་རྒྱས་ཐམས་ཅད་ཀྱི་ཐུགས་ཀྱི་སྤྲུལ་པ་སངས་རྒྱས་ཐམས་ཅད་ཀྱི་སྐུ་གསུང་ཐུགས་གསང་བ་
བསམ་གྱིས་མི་ཁྱབ་པའི་བདག་པོ༔ གཏུམ་པོ་ཆེན་པོ་དང་གཏུམ་ཆུང་དང་གོས་སྔོན་ཅན་དང་འཁོར་ཆེན་དང་འབྱུང་འདུལ་དང་ལྕགས་སྨྱུག་ཅན་དང་འགྲོ་བཟང་དང་༔ བཛྲ་ཧེ་རུ་ཀ་ལ་སོགས་པ་དོན་གཅིག་མཚན་གྱི་རྣམ་གྲངས་ནི༔ སྐུ་མདོག་མཐིང་ནག་འབར་བ་ཁྲོ་བོ་ཞལ་གཅིག་པ་ཕྱག་གཉིས་པ་གར་དགུའི་ཉམས་དང་ལྡན་ཞིང་གོས་སྔོན་པོའི་སྟོད་གཡོགས་དང་༔ ཁྲོ་བོའི་རྒྱན་ཐམས་ཅད་ཡོངས་སུ་རྫོགས་པ༔ སངས་རྒྱས་གངྒཱའི་ཀླུང་དྲུག་ཅུ་རྩ་གཉིས་ཀྱི་བྱེ་མ་རྙེད་ཀྱི་མཐུ་སྟོབས་ཀྱི་བདག་པོར་དབང་བསྐུར་བའི་དབང་རྟགས་ཕྱག་གཡས་རྡོ་རྗེ་ཕྱར་བ༔ གཡོན་པས་སྡིགས་མཛུབ་ཐུགས་ཀར་གདེངས་བའི་རྩེ་མོ་ན་ཁྱུང་ཁྲ་ཐབས་སུ་འཕྲོ་བ༔ ཞབས་གཉིས་པད་ཉིའི་སྟེང་དུ་འདོར་ཐབས་སུ་བསྒྲད་ཅིང་༔ གདུག་པ་ཅན་གྱི་གཟའ་ཀླུ་དང་སྡེ་བརྒྱད་ཐམས་ཅད་འདུལ་ཞིང་འཇོམས་པར་མཛད་པ༔ ཡང་དག་ཐུགས་མཆོག་འགྱུར་བ་མེད་པའི་ལྷ་དེ་ལ་ཕྱག་འཚལ་སྟོད་དོ༔ ཧཱུྃ་ཞེས་གདུག་པ་ཅན་འདུལ་བའི་སྙིང་པོ་བརྗོད་ནས༔ ཁྲོ་བོ་ཐམས་ཅད་ཀྱི་ཡོན་ཏན་གྱི་ཆ་ལས་སྤྲུལ་པའི་བྱུ་ཁྱུང་གསར་མ་བ་རྣམས་ཀྱིས་ལེགས་སྦྱར་གྱི་སྐད་ལ་གྷ་རུ་ཊ་བྱ་ཁྱུང་༔ ཀ་རུ་
ཎ་སྙིང་རྗེར་འཇུག་པས་མ་དག་ཟེར་ཀྱང་འདི་ནི་ཀ་རུ་ཎ་དག་སྟེ༔ བྱ་ཁྱུང་ཞེས་པ་བོད་སྐད་སྔོན་དུ་སོང་ནས༔ སེམས་ཅན་གདུག་པ་ཅན་གྱི་ཀླུ་དང་དེའི་ནད་ཀྱིས་ཉེན་པའི་སེམས་ཅན་སྙིང་རྗེ་ཆེན་པོས་ཁྱུང་གི་སྐུར་སྤྲུལ་པ་ཡིན་པའི་ཕྱིར༔ བྱ་ཁྱུང་གི་ངོ་བོ་སྙིང་རྗེ་ཡིན་པའོ༔ ཁྱུང་རིགས་ལྔ་འདི་སྐུའི་བྱ་ཁྱུང་སྐུ་མདོག་དཀར་པོ་གནམ་ལྕགས་ཏེ་ཐོག་གི་རྒྱུ་ལས་གྲུབ་པའི་མཆུ་སྡེར་ཅན༔ རལ་གྲི་མེ་འབར་བ་གཤིབས་པའི་གཤོག་པ་རྔུབ་ཅིང་༔ ཀླུ་མངལ་སྐྱེས་དང་སྒོང་སྐྱེས་དྲོད་གཤེར་ལས་སྐྱེས་པ་དང་བརྫུས་སྐྱེས་ཏེ་ཀླུ་རིགས་བཞི་ཀ་ཟས་སུ་ཟ་བ༔ ཐིལ་ཕྲན་སྤུ་གྲི་འབར་བ་རྣམས་སྤྲུགས་པས་བྱེ་ཚན་གྱི་ཆར་དང་རྡོ་རྗེའི་ཐོག་དང་སེར་བ་འབེབས་པས་ཀླུ་རྣམས་ཀྱི་ཤ་རུས་འབྱེད་པ༔ གལ་ཏེ་ཁྲོས་ནས་རི་རབ་ཀྱང་རྩད་ནས་བཤིག་ཅིང་༔ ཉི་མ་དང་ཟླ་བ་ཡང་དཔག་ཚད་དུ་ཚོགས་པོར་འཕེན་པའི་ནུས་པ་ཅན༔ ཁྲོ་རྒྱལ་ཐམས་ཅད་ཀྱི་ཡོན་ཏན་གྱི་ཆ་ལས་སྤྲུལ་པའི་ཁྲོ་རྒྱལ་ཁྱུང་གི་སྐུ་ལ་ཕྱུག་འཚལ་བསྟོད་དོ༔ ཧཱུཾ་ཞེས་ནག་མོ་ཐུགས་ཀྱི་སྒྲུབ་པའི་ས་བོན་ནས་བོས་ཏེ༔ མཆོག་ཐུན་མོང་གི་དངོས་གྲུབ་ཐམས་ཅད་ཀུན་གྱི་འབྱུང་གནས་ཕྱི་ལྟར་ན་འབྱུང་བ་
ལྔ་ནང་ལྟར་ན་ཁམས་ལྔ་གསང་བ་ལྟར་ན་ཡེ་ཤེས་ལྔ༔ དེ་ཉིད་གཟུགས་ཀྱི་སྐུར་བཞེངས་པ་མཁའ་འགྲོ་སྡེ་ལྟའི་ཚོགས༔ རང་རྟགས་མཐིང་དཀར་སེར་དམར་ལྗང་བའི་སྐུ་མདོག་ཕྱག་མཚན་རྡོ་རྗེ་འཁོར་ལོ་རིན་ཆེན་པདྨ་རྒྱ་གྲམ་གྱིས་མཚན་པའི་གྲི་ཐོད་འཛིན་ཅིང་༔ ཞབས་གཡོན་བརྐྱང་གཡས་བསྐུམ་དཔའ་མོའི་གར་སྟབས་ཀྱིས་ཡབ་དཔའ་བོ་ཁཊཾ་དུ་བསྒྱུར་ནས་མཆན་ཁུང་དུ་བཅུག་པ༔ རུས་པའི་རྒྱན་དྲུག་དང་༔ མེ་ལོང་གི་ཤར་བུ་དང་དྲིལ་བུ་གཡེར་ཁའི་སྒྲ་སིལ་སིལ་ཆེམ་ཆེམ་དུ་སྒྲོག་ཅིང་ནད་གདོན་བར་ཆད་ཐམས་ཅད་ཞི་བ་དང་༔ ཚེ་དང་བསོད་ནམས་རྒྱས་པ༔ ཁམས་གསུམ་དབང་དུ་སྡུད་པ༔ དྲག་པོས་དགྲ་བགེགས་ཚར་གཅོད་པའི་ཕྲིན་ལས་རྣམ་པ་བཞི་པོ་ཐོག་པ་མེད་པར་བསྒྲུབ་པའི་ལྷ་ནི༔ ཡེ་ཤེས་དང་ལས་དང་འཇིག་རྟེན་གྱི་མཁའ་འགྲོ་སྡེ་ལྔའི་ཚོགས་ཡིན་པ་དེ་ལ་ཕྱག་འཚལ་བསྟོད་དོ༔ ཧཱུྃ་ཞེས་མེ་དབལ་གྱི་ཐུགས་སྲོག་ནས་བོས་ཏེ༔ ཁྲོ་བོ་ཐམས་ཅད་ཀྱི་ཕྲིན་ལས་ཀྱི་སྤྲུལ་པ་སྒྲ་སྔ་འགྱུར་ལ་ཡཀྵ༔ ཕྱི་འགྱུར་ལ་ཡཀྵ་སྟེ་གནོད་སྦྱིན༔ རྣོ་མྱུར་ཚ་ངར་མེ་དང་འདྲ་བའི་ཕྱིར་གནོད་སྦྱིན་མེ་དབལ་ཞེས་ཀྱང་བྱ་བ་ནི༔ སྐུ་མདོག་མཐིང་ནག་
རབ་ཏུ་འཇིགས་པ་གནོད་སྦྱིན་ཁྲོས་པའི་ཚུལ༔ ཡན་ལག་རིགས་ཤིང་ལྟོ་བ་འཕྱང་བ༔ མིག་དམར་ཞིང་མཆེ་བ་སྤུ་གྲི་ལྟར་རྣོ་བའི་བར་ནས་མེའི་ཁ་རླངས་འཕྲོ་བ༔ ཕྱག་གཡས་གནཱམ་ལྕགས་ཀྱི་རྡོ་རྗེ་ཁ་གདེངས་བ་ནཱམ་མཁའ་ལ་གསོར་ཞིང་༔ གཡོན་པས་ཐོ་བས་གནོད་བྱེད་རྒྱལ་གསེན་གྱི་ཀླད་པ་བཅོམ་པར་བྱེད་པ༔ སྐུ་ལས་ཁྲོ་ཆུང་གི་ཚྭ་ཚྭ་དང་མེའི་ཕུང་པོ་འབར་བས་གནོད་བྱེད་གདུག་པ་ཅན་ཐམས་ཅད་འདུལ་བར་མཛད་པ༔ སྐུའི་རིགས་ཀྱི་ཕྱག་ན་རྡོ་རྗེ་གོས་སྔོན་ཅན་གྱི་རིགས་སུ་གཏོགས་པ༔ གནོད་སྦྱིན་ཡཀྵ་རྒྱལ་པོ་དེ་ལ་ཕྱག་འཚལ་བསྟོད་དོ༔ ཧཱུྃ་ཞེས་གདུག་པ་འཇོམས་པའི་ས་བོན་བརྗོད་དེ༔ གཤིན་རྗེ་ཚེ་བདག་འབར་བ་དང་༔ ཐུགས་རྗེ་ཁྲོས་མཱ་ནཱག་མོ་དང་ལྷ་མཆོག་བཛྲ་ཀཱི་ལ་ཡ་དང་༔ མཁའ་འགྲོ་སེང་གེའི་གདོང་མ་སྟེ༔ ཕྲིན་ལས་སྒྲུབ་པའི་ལྷ་བཞི་ནི༔ རབ་ཏུ་འཇིགས་པའི་སྐུ་ཅན་འབར་བའི་གར་དགུ་དང་ལྡན་ཞིང་རང་རང་གི་ཕྱག་མཚན་སྣ་ཚོགས་སོ་སོར་འཛིན་པ༔ གནོད་བྱེད་ཐམས་ཅད་ཟ་བར་བྱེད་ཅིང་རབ་ཏུ་རྔམ་པ་དང་གསོད་པར་བྱེད་ཅིང་ཁྲོས་པའི་ཐུགས་རྗེས་མ་རུངས་པ་ཐམས་ཅད་འདུལ་བར་
མཛད་པས༔ དགྲ་དང་བགེགས་ཀྱི་གཉན་པོར་ཆེར་བསྔགས་པ༔ གང་ལ་གང་འདུལ་གྱི་ཕྲིན་ལས་རབ་འབྱམས་མཛད་པ་ལ་ཕྱག་འཚལ་བསྟོད་དོ༔ ཧཱུྃ་ཞེས་ཐུགས་སྲོག་ནས་བོས་ཏེ༔ ཕྱོགས་སྐྱོང་བཅུའི་གདོན་འདུལ་བའི་ཕྱིར༔ སངས་རྒྱས་ཐམས་ཅད་ཀྱི་ཕ་རོལ་ཏུ་ཕྱིན་པ་བཅུ་ལས་རང་བྱུང་དུ་སྤྲུལ་པའི་ཁྲོ་བོའི་རྒྱལ་པོ་ཆེན་པོ་བཅུ༔ སྟེང་ཚངས་པ་དང་འོག་ས་བདག་གཉིས་ཤར་ནུབ་ཏུ་བྱས་པའི་ཕྱོགས་མཚམས་གདོན་གྱི་གཙོ་བོ་ཕྱོགས་སྐྱོང་བཅུ་བསྣོལ་བའི་གདན་སྟེང་དུ༔ སྐུ་མདོག་ཕྱག་མཚན་མ་ངེས་ཏེ༔ རྒྱས་པར་གསང་སྒྲུབ་ལྟར་རམ༔ བསྡུས་པར་ན་ཐམས་ཅད་མཐིང་ནག་རྡོ་རྗེ་ཐོ་བ་ཅན༔ དེ་ལྟར་སྣ་ཚོགས་འཛིན་པ་དུར་ཁྲོད་ཀྱི་ཆས་བརྒྱད་སྐུའི་རྒྱན་དུ་རྫོགས་པ༔ ཧཱུཾ་ཧཱུཾ་དང་ཕཊཙཝ་ཕཊ་ཀྱི་སྒྲ་ཆེན་པོ་འབྲུག་སྒྲ་སྟོང་ལྟར་སྒྲོགས་པས༔ ཕྱོགས་བཅུའི་གདོན་ཐམས་ཅད་ནམ་མཁའི་ཕ་མཐར་བསྐྲད་པར་མཛད་པ༔ ཁྲོ་བོའི་རྒྱལ་པོ་ཆེན་པོ་མེ་འབར་བའི་ཚོགས་ལ་ཕྱག་འཚལ་བསྟོད་དོ༔ ཧཱུྃ་ཞེས་གདུག་པ་འདུལ་བའི་སྙིང་པོ་བརྗོད་ནས་ཕྱི་དཀྱིལ་འཁོར་གྱི་སྒོ་བཞི་སྐྱོང་༔ ནང་ལུས་ཀྱི་སྒོ་བཞི་སྲུང་༔ གསང་བ་རྟག་ཆད་མུ་བཞིའི་མཐའ་སྲུང་
བར་མཛད་པ༔ སངས་རྒྱས་ཐམས་ཅད་ཀྱི་སྙིང་རྗེ་བྱམས་པ་དགའ་བ་བཏང་སྙོམས་བཞིའི་ངོ་བོ༔ ལྕགས་ཀྱུ་ཞགས་པ་དང་ལྕགས་སྒྲོག་དྲིལ་བུ་འཛིན་པའི་སྒོ་སྲུང་བཞི་ལ་སོགས་པ་དཀྱིལ་འཁོར་ཡོངས་སུ་རྫོགས་པའི་ལྷ༔ འགྲོ་བ་གང་ལ་གང་འདུལ་དུ་ཞི་བས་འདུལ་བ་ལ་ཞི་བ་དང་༔ ཁྲོ་བོས་འདུལ་བ་ལ་ཁྲོ་བོ་དང་༔ ཞི་མ་ཁྲོ་དང་རོལ་པའི་གཱར་སྣ་ཚོགས་སུ་སྤྲུལ་པ༔ དེ་ཐམས་ཅད་ཀྱང་ཐེར་ཟུག་མ་ཡིན་པ༔ མ་འགག་ཆོས་དབྱིངས་རོལ་པའི་ཀློང་ནས་ནམ་མཁའ་ལ་འཇའ་ཤར་བ་ལྟར་སྐུ་མདོག་ཕྱག་མཚན་དང་ཆ་ལུགས༔ གསུང་ཡིག་འབྲུ་དང་སྔགས་ཀྱི་རང་སྒྲ༔ ཐུགས་གདོད་ནས་ཆོས་སྐུ་སྐྱེ་བ་མེད་པ་སྟེ༔ སྐུ་གསུམ་ཡོངས་སུ་རྫོགས་པའི་ལྷ་ལ་ཕྱག་འཚལ་བསྟོད་དོ༔ ཞེས་བསྟོད་པར་བྱའོ༔ དེ་ནས་གཙོ་འཁོར་ཐུན་མོང་དུ་བཤགས་པ་བྱ་བ་ནི༔ སྲིད་པའི་ཞགས་པ་གཅོད་པའི་ས་བོན་ཧཱུྃ་བརྗོད་ནས༔ བཅོམ་ལྡན་འདས་དྲག་པོ་ཐོད་ཕྲེང་རྩལ་གྱི་ལྷ་ཚོགས་རིག་འཛིན་བརྒྱུད་པའི་བླ་མ་གཞན་ཡང་ལྷ་དང་སྲུང་མའི་ཚོགས་ཐམས་ཅད་དགོངས་སུ་གསོལ་ལོ༔ བདག་ཅག་བསྐལ་པ་གྲངས་མེད་པའི་སྔོན་ནས་དུས་ད་ལྟའི་བར་དག་ཏུ༔ རང་
ཡེ་གདོད་མ་ནས་ཆོས་ཀྱི་སྐུར་བཞུགས་པ་འདི་དང་དབྱེར་མེད་པའི་ལྷ་ཁྱེད་རྣམས་དང་མ་མོཇལ་ཏེ༔ བདག་མེད་པ་ལ་བདག་དང་གཞན་གཉིས་སུ་འཛིན་པའི་འཁྲུལ་པའི་རྟོག་པས་བསྒྲིབས་ཏེ༔ རང་གིས་རང་མ་རིག་པའི་དབང་གིས་བཅས་པ་དང་༔ རང་བཞིན་གྱི་ཁ་ན་མ་ཐོ་བའི་སྡིག་ལྟུང་ཉམས་ཆག་ཏུ་གྱུར་པའི་ལས་ཅི་བགྱིས་པ་ཐམས་ཅད༔ ལྟ་བ་འཁོར་འདས་དབྱེར་མེད་ཆོས་དབྱིངས་སྟོང་པ་ཉིད་ཀྱི་ཀློང་དུ་བཟོད་པར་གསོལ༔ ཨོཾ་གུ་རུ་བཛྲ་སཏྭ༔ ཡེ་ཤེས་ལྔའི་བླ་མ་རྡོ་རྗེ་སེམས་དཔའ༔ ཞེས་ཡི་གེ་བརྒྱ་པ་བཟླའོ༔ ས་མ་ཡ་མ་ནུ་པཱ་ལ་ཡ༔ དམ་ཚིག་རྗེས་སུ་སྐྱོངས་ཤིག༔ གུ་རུ་ཏེ་ནོ་པ་ཏིཥྛ༔ བླ་མ་ཉིད་ཀྱིས་ཉེ་བར་གནས༔ དྲི་དྷོ་མེ་བྷ་ཝཱ༔ བདག་ལ་བརྟན་པར་མཛོད༔ སུ་ཏོ་ཁྱོ་མེ་བྷ་བ༔ བདག་ལ་ཤིན་ཏུ་དགྱེས་པར་མཛོད༔ ཨ་ནུ་རཀྟ་མེ་བྷཱུ་པ༔ བདག་ལ་རྗེས་སུ་ཆགས་པར་མཛོད༔ སུ་པོོ་མེ་བྷ་བ༔ བདག་ལ་ཤིན་ཏུ་རྒྱས་པར་མཛོད༔ སརྦ་སིདྡྷི་མྨེ་པྲ་ཡཙྪ༔ དངོས་གྲུབ་ཐམས་ཅད་བདག་ལ་སྩོལ༔ སརྦ་ཀརྨ་སུ་ཙ་མེ༔ ཙིཏྟཾ་ཤེ་ཡཿཀུ་རུ་ཧཱུྃ༔ ལས་རྣམས་ཐམས་ཅད་ལའང་བདག་གི་སེམས་ལ་
དགེ་ལེགས་མཛོད༔ ཧ་ཧ་ཧ་ཧ་ཧོ༔ ཧཱ་བཞི་ནི་ཚད་མེད་པ་བཞིའམ་དགའ་བ་བཞི༔ ཧོནི་དགྱེས་པ༔ བྷ་ག་ཝཱན༔ བཅོམ་ལྡན་འདས་གུ་རུ་བླ་མ༔ སརྦ་ཏུ་ཐཱ་གཱ་དྷྱ༔ དེ་བཞིན་གཤེགས་པ་ཀུན་གྱི༔ མཱ་མེ་མུཉྩ་གུ་རུ་བྷུ་ཝུ༔ བདག་མ་འདོར་བླ་མ་མཛོད༔ མ་ཧཱ་ས་མ་ཡ་ས་ཏྭ་ཨཱ༔ དམ་ཚིག་སེམས་དཔའ་ཆེན་པོ་སྐྱེ་བ་མེད་པའོ༔ སྐབས་འདིར་དྲག་པོར་སྒྲུབ་ཅིང་ཞི་བར་བསྙེན་པ་དང་༔ དྲག་པོར་སྒྲུབ་ཅིང་དྲག་པོར་བསྙེན་པ་དང་༔ ཞི་དྲག་སྦྲེལ་མར་སྒྲུབ་པའི་ཐབས་གསུམ་གང་ཡང་རུང་བ་སྟེ༔ རྒྱུན་ཁྱེར་ལ་ནི་འཛབ་ཞི་དྲག་སྦྲེལ་ཏེ་སྔགས་རྣམས་ཚར་གཅིག་གམ་བདུན་གསུམ་སོགས་བཟླས་པས་སྔགས་མཆོད་ཡིན་ལ༔ སྔོན་དུ་ཞི་བའི་བསྙེན་པ་མ་སོང་བའི་གསར་བུས༔ འདིའི་རྒྱུན་ཁྱེར་བསྙེན་པ་བྱེད་ན༔ ཞི་བ་ཐོད་ཕྲེང་རྩལ་དང་དྲག་པོ་ཨ་ཙིག་ཨ་ཧཱུཾ་ཧཱུཾ་ཕཊ་ཕཊ་ཡན་སྦྲེལ་ཏེ་ལས་བྱང་གི་མཇུག་འདིར་འཛབ་བརྒྱ་སྟོང་ལ་སོགས་པ་བཟླས་པ་བྱའོ༔ དེས་གསར་བུ་ཡིན་ཀྱང་སློང་དང་འཁུ་ལྡོག་མི་འབྱུང་བའི་གནད་དོ༔ སྔོན་དུ་བསྙེན་སྒྲུབ་མང་དུ་ཐེམས་པས་ནི༔ སྦྲེལ་མི་དགོས་ཏེ་ཨ་ཙིག་སྔགས་འབྲུ་ཉི་ཤུ་པ་རང་
བཟླས་པས་ཆོག་གོ༔ དེ་ཡང་ལས་བྱང་འདི་ཁོ་ན་ལ་བརྟེན་ནས་སྒྲུབ་པ་བྱེད་ན༔ དང་པོ་ཆོས་སྐུ་སྣང་བ་མཐའ་ཡས་སྒྲུབ་སྟེ༔ གུར་དྲག་གི་ལས་བྱང་ཚར་རྗེས༔ སྤྱི་གཙུག་ཁྱུང་གི་ར་བར་ནོར་བུའི་ཏོག་གི་རྩེར་སྣང་བ་མཐའ་ཡས་ཀྱི་ཐུགས་ཀར་ཟླ་བའི་སྟེང་དུ་ཧཱིཡིག་དམར་པོ་འགྲེངས་ཏེ་གནས་པའི་མཐར་སྔགས་ཕྲེང་དམར་པོ་གཡས་ཕྱོགས་སུ་འཁོར་བ་དང་༔ འཁོར་སངས་རྒྱས་སྟོང་གི་ཐུགས་ཀ་ནས་འོད་ཟེར་ཕྱོགས་བཅུར་འཕྲོས་པས་ཕྱོགས་བཅུའི་རྒྱལ་བ་སྲས་དང་བཅས་པ་རྣམས་ཀྱི་ཐུགས་རྗེ་བྱིན་རླབས་ཚེའི་དངོས་གྲུབ༔ ལྷ་ཀླུ་མི་གསུམ་གྱི་ཚེ་དང་བསོད་ནམས་འབྱུང་བ་ལྔའི་བཅུད་ཐམས་ཅད་འོད་ཟེར་ཁ་དོག་སྣ་ཚོགས་ཀྱི་རྣམ་པར་བསྡུས་ཏེ༔ ཕྱག་གི་ཚེ་བུམ་གྱི་ནང་དུ་ཐིམ་པས་འཆི་མེད་ཀྱི་བདུད་རྩིར་གྱུར་པ་ཕྱུར་ཞིང་ལུད་པས༔ རང་དྲག་པོར་གསལ་བའི་སྤྱི་བོ་ཚངས་བུག་ནས་ཞུགས༔ ལུས་ཀྱི་རྩ་གནས་ཐམས་ཅད་འཆི་མེད་བདུད་རྩིས་གང་བས་འཆི་བ་མེད་པ་ཚེའི་དངོས་གྲུབ་ཐོབ་སྟེ༔ སྐྱེ་འཆི་མེད་པ་རྡོ་རྗེའི་སྐུར་གྱུར་པར་བྷེ་ཞིང་༔ ཨོཾ་ཨ་མི་དྷེ་ཝ་ཨཱ་ཡུ་སིདྡྷི་ཧཱུྃ་ཧཱུྃ༔ ཡེ་ཤེས་འོད་ཀྱི་ལྷ་ཚེའི་དངོས་གྲུབ་མཆོག་གི་སྙིང་པོ༔ དེ་ལ་ཅི་ཙམ་བཟླས་པའི་
ཐུན་མཇུག་ཏུ༔ སྣང་བ་མཐའ་ཡས་སངས་རྒྱས་སྟོང་དང་བཅས་པའི་དཔྲལ་བ་ནས་འོད་ཟེར་དཀར་པོ་འཕྲོས༔ རང་གི་དཔྲལ་བར་ཐིམ་སྐུའི་དབང་དང་བྱིན་རླབས་ཐོབ༔ མགྲིན་པ་ནས་འོད་ཟེར་དམར་པོ་འཕྲོས༔ རང་གི་མགྲིན་པར་ཐིམ་གསུང་གི་དབང་དང་བྱིན་རླབས་ཐོབ༔ ཐུགས་ཁ་ནས་འོད་ཟེར་སྔོན་པོ་འཕྲོས༔ རང་གི་སྙིང་ཁར་ཐིམ་ཐུགས་ཀྱི་དབང་དང་བྱིན་རླབས་ཐོབ༔ སྐུའི་ཆ་ཐམས་ཅད་ལས་འོད་ཟེར་ཁ་དོག་སྣ་ཚོགས་འཕྲོས༔ རང་ཉིད་དྲག་པོའི་སྐུའི་ཆ་ཐམས་ཅད་ལ་ཐིམ་པས་སྐུ་བཞི་ཡོངས་རྫོགས་ཀྱི་དབང་དང་བྱིན་རླབས་ཐམས་ཅད་ཐོབ་པར་བསྒོམ་སྟེ༔ འཆི་མེད་ཚེའི་དངོས་གྲུབ་སྩོལ༔ བདག་ལ་དབང་བསྐུར་བྱིན་གྱིས་རློབས༔ ཞེས་པའི་དོན་ཡིན་ཏེ༔ འདི་མིན་གྱི་དམིགས་པ་རྣམས་ཀྱང་གོ་ཆ་ལྷ་ལྔ་རྒྱན་གྱི་ཤོག་དྲིལ་གྱི་གཞུང་ཚིག་གི་དོན་བཀྲོལ་བ་ཡིན་པས༔ གཞན་ནས་ཁ་སབ་པ་དང་རིག་བཟོ་སོགས་མ་ཡིན་པའི་ཕྱིར༔ ཐེ་ཚོམ་སྤངས་ཏེ་ཉམས་སུ་བླང་བར་བྱའོ༔ སྔགས་འདི་ནི་ཐུགས་རྗེ་ཆེན་པོ་གསང་བ་འདུས་པའི་རྒྱུད་ལས་གསུངས་ཤིང་ཚེ་སྒྲུབ་ཀྱི་མཆོག་ཡིན་པས༔ ལས་ཚོགས་ཀུན་གྱི་ཐོག་མར་ནི༔ རིག་
འཛིན་ཚེ་ཉིད་བསྒྲུབ་པར་བྱ༔ མཆོག་ཐུན་མོང་རང་དོན་གཞན་དོན་གང་བསྒྲུབས་ཀྱང་༔ རྣལ་འབྱོར་པ་ཚེ་རིང་ན་དོན་འགྲུབ་པས༔ ཚེ་སྒྲུབ་ལ་ནན་ཏན་བྱ་བ་ནི་པདྨ་རྒྱལ་པོ་ང་ཡི་ཐ་ཚིག་གོ༔ ཞེས་གསུངས་པས་སྔགས་འདི་དང་དམིགས་པ་འདི་ལ་ནན་ཏན་བྱ༔ གསང་སྒྲུབ་ནས་གསུངས་པ་ལྟར་སྤྲུལ་སྐུ་འོད་དཔག་མེད་བསྒོམ་ན༔ བདུད་རྩི་ལྷུང་བཟེད་དུ་བསྡུ་བ་མ་གཏོགས་དམིགས་པ་གོང་དང་འདྲ༔ འོད་དཔག་མེད་དེ་སྤྱི་བོར་བྷེ་ནས་མཆོད་བསྟོད་དང་ཚེགས་མཆོད་འབུལ་བས་བསོད་ནམས་ཚད་མེད་པ་ཐོབ༔ སྔགས་པ་གསར་བུ་ཡིན་ན་འདི་ལ་ཐོག་མར་བྱེ་བ་ཙམ་བསྙེན་པར་བྱའོ༔ ཡང་མཚམས་སྒྲུབ་བྱེད་ན་གུར་དྲག་གི་ལས་བྱང་ཐུན་བཞིར་བཏང་ལ༔ སྔགས་གཞན་རྣམས་སྔགས་མཆོད་ཀྱི་ཚུལ་དུ་ཚར་འགའ་ཟུང་བཏོན་རྗེས་འོད་དཔག་ཁོ་ན་བསྙེན་པར་བྱའོ༔ རྒྱུན་ཁྱེར་བྱེད་ན་ལས་བྱང་ཚར་གཅིག་གི་རྗེས་སུ་འདི་ཅི་ནུས་བསྙེན་པར་བྱའོ༔ དེ་ལྟར་བྱས་པས་དངོས་ཉམས་རྨི་ལམ་དུ་སྒྲིབ་པ་དག་པ་དང་༔ ཚེ་འཕེལ་བའི་རྟགས་ཀྱང་འབྱུང་ངོ་༔ དེ་ནས་ལོངས་སྐུ་ཐོད་ཕྲེང་རྩལ་བསྙེན་པ་ནི༔ རང་དྲག་པོའི་སྐྲ་གསེབ་པད་འབྱུང་མཐིང་ཀའི་ཐུགས་ཀའི་བཟླ་
བྱའི་སྔགས་གཡས་སུ་འཁོར་བ༔ གྲུ་མོར་གསེར་གྱི་ཌཱ་མ་རུ་བཀལ་བ་ལས་ཧཱུྃ་གི་སྒྲ་རང་གྲག་ཏུ་གྲགས་པས༔ སྟོང་གསུམ་ཐམས་ཅད་ཧཱུྃ་གི་སྒྲ་དི་རི་རི་བསྐལ་པའི་འབྲུག་སྒྲ་ལྟར་གྲགས་པས༔ བླ་མ་སྐུ་གསུམ་རྒྱ་བོད་ཀྱི་རིག་འཛིན་བརྒྱུད་པ་དང་བཅས་པ་ཡི་དམ་རྒྱུད་སྡེ་དྲུག་གི་ལྷ་ཚོགས༔ ལྷ་ཞི་བ་དང་ཁྲོ་བོ་རབ་འབྱམས་སྲིད་ཚད་དང་༔ ཡུལ་ཉི་ཤུ་རྩ་བཞི་གནས་སུམ་ཅུ་རྩ་གཉིས་ཀྱི་དཔའ་བོ་དཔའ་མོ་ཐམས་ཅད༔ ཡེ་ཤེས་ཀྱི་ཆོས་སྐྱོང་བའི་སྲུང་མ་མ་ལུས་པ་ཀུན་གྱིས༔ ཧཱུྃ་གི་སྒྲ་དེ་ཐོས་པ་ཙམ་གྱིས་ཤོག་སྐྱ་རླུང་གིས་སྐྱོད་པ་བཞིན་དུ་སྟེང་འོག་ཕྱོགས་མཚམས་ཀུན་ནས་ཀྱི་ལི་ལི་འུ་རུ་རུ༔ རང་དབང་མེད་པར་བྱོན་ནས་ནི༔ སྤྱི་གཙུག་གུ་རུ་པདྨ་ཐོད་ཕྲེང་རྩལ་གྱི་སྐུ་ལ་ཐིམ་པས༔ རྩ་བ་གསུམ་གྱི་ལྷ་ཚོགས་ཀུན་འདུས་ཀྱི་སྐུར་གྱུར༔ དེའི་དཔྲལ་བའི་ཨོཾ་ལས་འོད་ཀྱི་ཐིག་ལེ་དཀར་པོ་ཨོཾ་གྱིས་མཚན་པ་འཕྲོས༔ རང་གི་དཔྲལ་བར་ཐིམ༔ སྐུའི་དབང་བསྐུར་ལུས་སྐུ་རྡོ་རྗེར་བྱིན་གྱིས་བརླབས༔ དེ་ནས་མགྲིན་པའི་ཨཱཋལས་འོད་ཀྱི་ཐིག་ལེ་དམར་པོ་ཨཱ༔ ས་མཚན་པ་འཕྲོས༔ རང་གི་མགྲིན་པར་ཐིམ༔ གསུང་གི་དབང་བསྐུར་ངག་གསུང་རྡོ་རྗེར་
བྱིན་གྱིས་བརླབས༔ ཐུགས་ཀའི་ཧཱུྃ་ལས་འོད་ཀྱི་ཐིག་ལེ་མཐིང་ཀ་ཧཱུྃ་གིས་མཚན་པ་འཕྲོས༔ རང་གི་ཐུགས་ཀར་ཐིམ༔ ཐུགས་ཀྱི་དབང་བསྐུར་སེམས་ཐུགས་རྡོ་རྗེར་བྱིན་གྱིས་བརླབས༔ ལྟེ་བའི་ཧི༔ལྗང་གུ་ལས་འོད་ཀྱི་ཐིག་ལེ་ལྗང་གུ་ཧཱིས་མཚན་པ་འཕྲོས༔ རང་གི་ལྟེ་བར་ཐིམ༔ ཡོན་ཏན་གྱི་དབང་བསྐུར་སྐུ་གསུམ་དབྱེར་མེད་ངོ་བོ་ཉིད་རྡོ་རྗེར་བྱིན་གྱིས་བརླབས༔ ཕྱག་ཞབས་བཞི་ཡི་ཧ་རི་ནི་ས་ར་ཙ་ཧཱིཡའི་ཡིག་འབྲུ་བརྒྱད་ལས་འོད་ཀྱི་ཐིག་ལེ་ཁ་དོག་སྣ་ཚོགས་འཕྲོས༔ བདག་གི་ཕྱག་ཞབས་རྣམས་ལ་ཐིམ་པས་ཕྲིན་ལས་ཀྱི་དབང་བསྐུར༔ ཕྲིན་ལས་གང་བརྩམ་ཐོགས་པ་མེད་པར་བྱིན་གྱིས་བརླབས་པར་བསྒོམ་ཞིང་༔ ཨོཾ་ཨཱཿཧཱུྃ་ནི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་སྲོག་སྔགས༔ བཛྲ་གུ་རུ་པདྨ་ནི་རྒྱ་གར་སཾ་སྐྲྀ་ཏའི་སྐད་དེ༔ བོད་སྐད་དུ༔ རྡོ་རྗེ་སློབ་དཔོན་པདྨ་སྟེ༔ ཨོ་རྒྱན་གྱི་མཚན་སྔགས༔ ཐོད་ཕྲེང་རྩལ་ནི་བོད་སྐད་དེ༔ ཨོ་རྒྱན་གྱི་གསང་མཚན༔ དེ་ཡང་པདྨ་ཞེས་པ་ནི་རྒྱ་སྐད་ཡིན་ཏེ༔ བོད་སྐད་སྒྲ་འགྱུར་ལ་མེ་ཏོག་གི་བྱེ་བྲག་གཅིག་ཡིན༔ མེ་ཏོག་པདྨ་དངོས་ནི་རྒྱ་གར་ན་ཡོད༔ དེའི་རིགས་ཐོབ་པ་ནི་མེ་ཏོག་རྒྱ་ཉེས་ཡང་
ཡིན་ཏེ༔ ཉི་མ་ཤར་དུས་ཁ་བྱེ་ཞིང་ཟླ་བ་ཤར་དུས་ཁ་ཟླུམ་པ་པདྨའི་རིགས༔ ཟླ་བ་ཤར་དུས་ཁ་བྱེ་ཞིང་༔ ཉི་མ་ཤར་དུས་ཁ་ཟླུམ་པ་ནི༔ ཀུ་མུཏྟའི་རིགས་ཡིན་ནོ༔ དོན་གྱི་དབང་དུ་ནི༔ མེ་ཏོག་པདྨ་ནི་མི་གཙང་ལུད་ཀྱི་ནང་དུ་འཁྲུངས་ན་ཡང་༔ མི་གཙང་བས་མ་གོས་པ་ལྟར༔ ཨོ་རྒྱན་རིན་པོ་ཆེའི་སེམས་ཅན་གྱི་དོན་ལ་འཁོར་བའི་གནས་འདིར་བཞུགས་ཀྱང་འཁོར་བའི་སྐྱོན་གྱིས་མ་གོས་པ་པདྨ་སྟེ༔ སྤྱན་རས་གཟིགས་ཀྱི་མཚན་དངོས་ཀྱང་པདྨ་ཡིན་ནོ༔ ཐོད་ཕྲེང་རྩལ་ནི་ཨོ་རྒྱན་གྱི་གསང་མཚན་བོད་སྐད་ཡིན་ཏེ་སྐུ་ལ་ཐོད་པའི་ཕྲེང་བས་བརྒྱན་ཅིང་༔ མཐུ་སྟོབས་རྫུ་འཕྲུལ་གྱི་རྩལ་དང་ལྡན་པ༔ སྒྲ་དོན་ཡིན་ལ༔ སངས་རྒྱས་ཐོད་པ་དང་༔ ཐོད་པ་རྩལ་ཆེན་དང་༔ ཐོད་ཕྲེང་རྩལ་རྣམས་དོན་གཅིག༔ སངས་རྒྱས་ཐོད་པ་ནི་མཚན་ཡིན་ལ༔ རྩལ་ནི་རིག་པ་རྩལ་གྱི་དབང་ལ་མངའ་བརྙེས་པའོ༔ བཛྲ་ས་མཱ་ཡ་ནི་རྡོ་རྗེའི་དམ་ཚིག༔ ཛནི་ཚིག་འགྱུར་ལ་ཤོག་ཟེར༔ འདིར་དོན་འགྱུར་ལ་སྤྱན་འདྲེན༔ སིདྡྷི་དངོས་གྲུབ༔ ཕ་ལ་དོན་འགྱུར་ལ་བཟང་པོ༔ ཚིག་འགྱུར་ལ་ཁམས་ཆེན་པོ་ཞིག་ལ་འཇུག་པར་སྣང་༔ ཧཱུྃ་
ཨཱཿའཇུག་པ་མང་ཡང་༔ འདིར་སྩོལ་ཅིག་ཅེས་པར་འགྱུར་བས༔ སྐུ་གསུང་ཐུགས་ཀྱི་རྡོ་རྗེ་སློབ་དཔོན་པདྨ་ཐོད་ཕྲེང་རྩལ་རྡོ་རྗེ་དམ་ཚིག་འདིར་བྱོན་དངོས་གྲུབ་བཟང་པོ་སྩོལ་ཅིག༔ ཅེས་པའོ༔ སྔོན་དུ་གུ་རུ་ཞི་བའི་བསྙེན་པ་མ་སོང་ན༔ འདི་ལ་རབ་བྱེ་བ་འབྲིང་བདུན་འབུམ་ཐ་ན་ཡང་སུམ་འབུམ་ཐེམ་པར་བྱའོ༔ དེ་ནས་ཨ་ཙིག་བསྙེན་ཀྱང་སློང་དང་ཆོ་འཕྲུལ་མི་འབྱུང་བས་འཇམ་མོ༔ ཨོ་རྒྱན་ཉིད་ཀྱི་གསུངས་པའི༔ གུ་དྲག་གི་བསྟོད་པ་ལས༔ ནུབ་ཕྱོགས་བདེ་བ་ཅན་གྱི་ཞིང་ཁམས་ན༔ སྣང་བ་མཐའ་ཡས་སྐུ་གསུང་ཐུགས་ལས་སྤྲུལ༔ ངོ་མཚར་རྨད་བྱུང་པདྨ་ཧེ་རུ་ཀ༔ ཞེས་གསུངས་པས༔ གུ་དྲག་ནི་སྤྲུལ་སྐུ་ཡིན་པས་སྤྲུལ་སྐུ་གུར་དྲག་གི་སྒྲུབ་པ་ནི༔ ཐུགས་དབུས་ཧཱུྃ་དམར་པོའི་མཐར་ཨ་ཅིག་གི་སྔགས་ཕྲེང་དེ་ཀློག་པའི་ཚུལ་གྱིས་ཅུང་ཞིག་བཟླ༔ དེ་ནས་ཕྲེང་བ་མི་འཁོར་ཕྲེང་ལུང་འཁོར་བ་ལྟར་ཡིག་འབྲུ་མི་འཁོར་འོད་ཟེར་ཁ་དོག་ལྔ་ལྡན་གཡས་ཕྱོགས་སུ་ཀྱི་ལི་ལི་འཁོར་བར་བྷེ་ལ་ཅུང་ཞིག་བཟླ༔ དེ་ནས་དཔེར་ན་མཆོད་རྟེན་གཅིག་ལ་མི་ཉི་ཤུས་སྐོར་བ་བྱེད་པ་ལྟར༔ དབུས་ཀྱི་ཧཱུྃ་གཡོ་འགུལ་མེད་པར་ཨ་ཙིག་ཡིག་འབྲུ་ཉི་ཤུ་པ་ཐམས་ཅད་
འགྲེངས་ཏེ་གནས་པ༔ གཡས་ཕྱོགས་སུ་དང་པོ་དལ་བུ་རྗེས་ནས་ཇེ་མགྱོགས་སུ་འཁོར་བར་བྷེ་དག་ནི་བསྙེན་པ་ཡིན་ལ༔ སྔགས་ཕྲེང་འཁོར་བཞིན་པ་ལས་འོད་ཟེར་འཕྲོས་པས་རྔ་ཡབ་གླིང་དུ་ཨོ་རྒྱན་རིན་པོ་ཆེའི་ཐུགས་ཀར་ཕོག༔ སྐད་ཅིག་གིས་གུ་རུ་དྲག་པོའི་སྐུར་གྱུར་པ་ལས༔ དེའི་སྐུ་ལས་གུ་རུ་དྲག་པོའི་སྐུ་ཆེ་ཆུང་སྣ་ཚོགས་པ༔ གསུང་སྔགས་ཕྲེང་བྱི་རུའི་ཕྲེང་བ་ལྟ་བུ༔ ཐུགས་གནམ་ལྕགས་ཀྱི་རྡོ་རྗེ་ཁ་གདེངས་བ་ཧཱུྃ་དམར་པོའི་མཚན་པ་དཔག་ཏུ་མེད་པ་ཆར་ལྟར་བབ༔ རང་གི་ལུས་ངག་ཡིད་གསུམ་ལ་སིབ་སིབ་ཐིམ་པར་བྷེ་ཞིང་བཟླ་བ་ཉེ་བའི་བསྙེན་པ༔ དེ་ནས་རང་གི་ཐུགས་ཀར་སྔགས་ཕྲེང་ས་བོན་ལ་འཁོར་བར་བྷེ་པ་ནི༔ ཟླ་དཀར་ཕྲེང་བ་ལྟ་བུའི་བཟླས་པ་ཟེར༔ མགལ་མེ་ཀླད་ལ་བསྐོར་བ་ལྟ་བུའི་བཟླས་པ་ནི༔ རང་གི་ཐུགས་ཀའི་སྔགས་ཕྲེང་ལས་འོད་ཟེར་ཁ་དོག་ལྔ་ལྡན་སྟོང་སྐུད་བསྒྲིམས་པ་ལྟར་འཕྲོས༔ རང་གི་ཞལ་ནས་ཐོན༔ བདག་བསྐྱེད་རྐྱང་པ་ཡིན་ན་ཡུམ་གྱི་ཞལ་དུ་ཞུགས༔ སྐུ་ལུས་བརྒྱུད་པདྨ་ནས་ཐོན་རང་གི་རྡོ་རྗེའི་སྦུག་ནས་ཡར་ཐུགས་ཀར་ཐིམ་མདུན་བསྐྱེད་ཡོད་ན་མདུན་བསྐྱེད་ཀྱི་
གཙོ་བོའི་ཞལ་དུ་ཞུགས༔ གོ་ཆའི་ལྷ་རྣམས་ཀྱིས་ཀྱང་སྐུ་ལུས་བརྒྱུད་སྦྱོར་མཚམས་ནས་ཐོན༔ རང་གི་སྦྱོར་མཚམས་ནས་ཡར་ཞུགས༔ ཐུགས་ཀར་ཐིམ་དེ་ཡང་དང་པོ་འོད་ཟེར་དང་ཕྱིས་ནས་འོད་ཟེར་སྔགས་ཕྲེང་དུ་བསྒྱུར་ཏེ༔ ཕར་འཕྲོས་དུས་མཆོད་པའི་ཚུལ་དང་ཚུར་འོང་དུས་དངོས་གྲུབ་ཀྱི་ཚུལ་ལོ༔ དེ་ལྟར་ཡབ་ཡུམ་མམ་བདག་མདུན་གྱི་བར་སྔགས་ཕྲེང་ཀྱི་ལི་ལི་འཁོར་བ་དེ་ལས་འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས་པས༔ ཕྱོགས་བཅུའི་བླ་མ་ཡི་དམ་སངས་རྒྱས་བྱང་ཆུབ་སེམས་དཔའ་ཐམས་ཅད་འོད་ཟེར་དེས་མཆོད་པར་གྱུར་པས་ཤིན་དུ་མཉེས༔ དེ་ཐམས་ཅད་ཀྱི་སྐུ་གསུང་ཐུགས་ལས་གུ་རུ་དྲག་པོའི་སྐུ་ཆེ་ཆུང་སྣ་ཚོགས་པ༔ གསུང་སྔགས་ཕྲེང་ཐུགས་རྡོ་རྗེ་ཧཱུྃ་ཡིག་གིས་མཚན་པ་རྩེ་ལྔ་པའི་རྣམ་པ་ཆར་ལྟར་བབས་ནས་བདག་མདུན་རྣམས་ལ་ཐིམ་པར་བསྒོམ༔ དེ་ནི་སྒྲུབ་པའི་དམིགས་པ་དངོས་གཞི་ཡིན༔ དེ་ནས་རྒྱལ་པོའི་ཕོ་ཉ་འགྱེད་པ་ལྟ་བུའི་འཛབ་དགོངས་ནི་བདག་གཙོ་བོའི་ཐུགས་ཀའི་སྔགས་ཕྲེང་གཡས་སུ་འཁོར་བ་ལས་འོད་ཟེར་འགྲོ་བ་རིགས་དྲུག་གི་གནས་སུ་འཕྲོས༔ རིགས་དྲུག་སོ་སོའི་སྡུག་བསྔལ་དང་སྡིག་སྒྲིབ་ཐམས་ཅད་བ་མོ་
ལ་ཉི་ཟེར་ཕོག་པ་ལྟར་དག་ནས༔ དམྱལ་བ་ཐམས་ཅད་རྡོ་རྗེ་དྲག་པོ༔ ཡི་དྭགས་ཐམས་ཅད་པདྨ་དྲག་པོ༔ དུད་འགྲོ་ཐམས་ཅད་བུདྡྷ་དྲག་པོ༔ ལྷ་དང་མི་གཉིས་རིཏྟ་དྲག་པོ༔ ལྷ་མ་ཡིན་ཀརྨ་དྲག་པོ་རྩལ་གྱི་སྐུ་ཤ་སྟག་ཏུ་གྱུར༔ སྣོད་ཀྱི་འཇིག་རྟེན་ཡང་གདོད་ནས་རྣམ་པར་དག་པའི་གཞལ་ཡས་ཁང་གི་རང་བཞིན་དུ་གྱུར་ཏེ་སེམས་ཅན་ཐམས་ཅད་དྲག་པོ་རིགས་ལྔའི་སྐུར་གྱུར་པ་རང་གི་རམ་བུ་བཀྱག་པའི་ཚུལ་དུ་སྔགས་ཟིར་དི་རི་རི་འདོན་རོགས་བྱེད་པར་བསྒོམ་པ་ནི་བུང་བ་ཚང་ཞིག་པ་ལྟ་བུའི་བཟླས་པ་སྟེ༔ སྒྲུབ་པ་ཆེན་པོའོ༔ དེ་ལྟར་མཚམས་བྱེད་ན་ལས་བྱང་ཐུན་བཞི་དང་དམིགས་པ་དེ་རྣམས་ཐུན་བཞི༔ རྒྱུན་ཁྱེར་ཡིན་ན་ལས་བྱང་ཚར་གཅིག་དང་དམིགས་པ་དེ་རྣམས་ཐུན་རེ་བྱ༔ ཐུན་མཚམས་ནུབ་མོ་ཉལ་ཁ་འཁོར་འདས་སྣོད་བཅུད་ལྷར་གསལ་བ་དེ་འོད་དུ་ཞུ་ནས་གཞལ་ཡས་ཁང་ལ་ཐིམ༔ གཞལ་ཡས་ཁང་འཁོར་ལ༔ འཁོར་གཙོ་བོ་ལ༔ གཙོ་བོ་དབུ་ཞབས་ནས་འདུས་ཏེ་ཐུགས་ཀའི་ཧཱུྃ་ལ༔ ཧཱུྃ་ཞབས་ཀྱུ་ནས་གྱེན་རྫོགས་སུ་སྟོང་པར་ཡལ་ཏེ༔ ཅི་ཡང་མི་དམིགས་པར་ཉམས་ལེན་ངོ་བོའི་སྟེང་དུ་བཞག༔ ནུབ་མོ་གཉིད་དུས་
ཀྱང་དེའི་ངང་ལ་ཉལ་ན་འོད་གསལ་ཟིན་པར་བཤད༔ སྔགས་ཨར་ཙིག་ནི༔ ཨར་ཅིག་མ་ཡིན༔ ཨ་ཙིག་ཡིན་ཏེ༔ མཁར་དྲུང་གི་པར་མ་ལ་ཡང་ཨ་ཅིག་ཡོད༔ དྲག་པོ་ཁྲག་འཐུང་རོལ་པའི་རྩ་རྒྱུད་ལས༔ ང་ནི་དུས་གསུམ་སངས་རྒྱས་དང་༔ བདེ་གཤེགས་ཐམས་ཅད་འདུས་པའི་སྐུ༔ སངས་རྒྱས་ཀུན་འདུས་ལྷ་གཅིག་ཡིན༔ སྔགས་ཀྱང་བདེ་གཤེགས་སྤྱི་སྒྲུབ་ལས༔ ང་ལ་སྒོས་སུ་རྡུལ་ཙམ་མེད༔ ཨཱི་དང་ཨཱདང་ཧཱུྃ་དང་གསུམ༔ སངས་རྒྱས་ཀུན་གྱི་སྐུ་གསུང་ཐུགས༔ ཨ་ནི་སྐྱེ་མེད་ཡིག་འབྲུ་གཅིག་ཙིག་ནི་སྡེ་བརྒྱད་ཆོ་འཕྲུལ་འདུལ༔ ནིར་སྨྲིག་ཆོས་ཉིད་རང་བྱུང་གསུང་༔ ན་མོ་གུས་པའི་བློ་བསྐྱེད་ལ༔ བྷ་ག་ཝཱ་ཏེ་བཅོམ་ལྡན་འདས༔ ཧཱུཾ་གཉིས་སྔགས་ཀྱི་ང་རོ་སྒྲོག༔ སྡེ་བརྒྱད་ལྷ་སྲིན་དབང་དུ་གནོན༔ ཕཊ་ཀྱིས་དྲེགས་པ་ཚར་བཅད་པ༔ ཨ་ནི་སྐྱེ་མེད་ཆོས་སྒྲ་སྒྲོག༔ ཧཱུྃ་ཧཱུྃ་ཕཊ་ཕཊ་ཐོག་མདའ་འཕེན༔ སྣང་སྲིད་དྲེགས་པ་འདར་ཞིང་ཆུམ༔ ཉི་ཤུ་རྩ་གཅིག་རྩ་སྔགས་འདི༔ སངས་རྒྱས་འདུས་པའི་ཡང་སྙིང་ཡིན༔ བདེར་གཤེགས་འདུས་པའི་སྙིང་པོ་ཡིན༔ ཡི་དམ་འདུས་པའི་རྩ་བ་ཡིན༔ ཁྲོ་བོ་འདུས་པའི་རང་སྒྲ་
ཡིན༔ ལྷ་སྲིན་འདུས་པའི་གཉའ་གནོན་ཡིན༔ སྡེ་བརྒྱད་འདུས་པའི་སྙིང་གཟེར་ཡིན༔ ཙིག་ཧུ་ཁྲི་ཕྲག་གཅིག་གིས་སྡེ་བརྒྱད་ཐུལ༔ སྟོང་ཕྲག་གཅིག་གིས་དམ་སྲི་ཆོམ༔ བརྒྱ་ཕྲག་གཅིག་གིས་རྒྱལ་བསེན་ཆུན༔ མཆོག་ལ་འབུམ་ལས་མི་དགོས་སོ༔ འབུམ་ཕྲག་ཉི་ཤུ་སོང་བའི་མི༔ རྟོགས་ལྡན་རྣལ་འབྱོར་དབང་ཕྱུག་ཡིན༔ ལྷ་སྲིན་སྡེ་བརྒྱད་དེ་ལ་སྐྱོབས༔ སྲ་བའི་གོ་གྱོན་བཙན་མཁར་ཟིན༔ དད་ཅན་རྒྱུན་ཁྱེར་ཉམས་ལེན་སྲིད༔ དེ་ལས་བསྒྲུབ་པར་མ་གསུངས་སོ༔ འོན་ཀྱང་དངོས་གྲུབ་དེ་ལས་ཀྱང་༔ མཆོག་དང་ཐུན་མོང་སྦྲག་མ་ཡིན༔ ཉིད་ལས་མི་ཞན་རྣལ་འབྱོར་ཐོབ༔ ཅེས་གསུངས༔ ཨོ་རྒྱན་རིན་པོ་ཆེའི་ཞལ་ནས༔ ཁྱད་པར་དུ་གསང་སྔགས་ཐམས་ཅད་ཀྱི་སྙིང་པོ་འདི༔ བརྒྱ་ཙམ་བཟླས་པས་ལས་ངན་སྒྲིབ་པ་བྱུང་༔ སྟོང་ཙམ་བཟླས་པས་ཉམས་ཆག་ཐམས་ཅད་བསྐང་༔ ཁྲི་ཚོ་བཟླས་ན་སྡེ་བརྒྱད་དམ་ལ་འདུས༔ འབུམ་ཚོ་བཟླས་ན་པདྨ་ཉིད་དང་མཇལ༔ འབུམ་ཕྲག་དྲུག་གིས་མཆོག་གི་དངོས་གྲུབ་ཐོབ༔ ཐོས་དང་དྲན་པ་ཙམ་གྱི་ལྷ་འདྲེ་ལས་ལ་ཁོལ༔ དྲེགས་པ་སྡེ་བརྒྱད་ལ་བཀའ་བཙན་པར་
འགྱུར༔ ཡོན་ཏན་ཐམས་ཅད་འདི་ལ་ཚང་༔ སྐྱོན་རྣམས་ཐམས་ཅད་འདི་ཡིས་སེལ༔ དངོས་གྲུབ་ཐམས་ཅད་འདི་ལས་འབྱུང་༔ དཔེར་ན་ཡིད་བཞིན་ནོར་བུ་འདྲ༔ ལུས་ལ་བདེ་དྲོད་མེ་ལྟར་འབར༔ མི་ནོར་ཟས་གསུམ་ཆར་ལྟར་འབབ༔ དཔའ་བོ་མཁའ་འགྲོ་སྤྲིན་ལྟར་འདུ༔ ཕྱི་ནང་ཆོས་སྐྱོང་བྲན་ལྟར་ཉན༔ ཕྲིན་ལས་ཅི་སྒྲུབ་ཐོགས་རྡུགས་མེད༔ གང་འདོད་སྔགས་ཀྱི་ཤམ་བུ་བསྒྱུར༔ འདོད་པའི་དོན་རྣམས་ཐམས་ཅད་འགྲུབ༔ ཚེ་འདིར་ཐུན་མོང་དངོས་གྲུབ་ཐོབ༔ འགྲོ་བ་མ་ལུས་འདུལ་བར་འགྱུར༔ ཕྱི་མ་སློབ་དཔོན་པདྨ་ཡི༔ ཐུགས་རྗེའི་ལྕགས་ཀྱུས་བཟུང་ནས་ཀྱང་༔ བདེ་གཤེགས་འདུས་པ་བླ་མའི་གོ་འཕང་ཐོབ༔ ཅེས་གསུངས་སོ༔ སྔགས་འབྲུ་ཉི་ཤུ་པ་དེ་རྒྱུན་དུ་བཟླ་རྒྱུ་ཡིན་ལ༔ མེ་དབལ་སྡེ་བརྒྱད་ཀྱི་ཤམ་བུ་ནི༔ ལས་སྦྱོར་དགོས་དུས་མ་གཏོགས་བཟླ་མི་རུང་ངོ་༔ དེ་ནས་གོ་ཆ་སོ་སོའི་ལྷའི་བཟླས་པ་ནི༔ རང་གི་དཔྲལ་བར་འཇམ་དཔལ་གྱི་ཐུགས་ཀར་ཟླ་བའི་སྟེང་དུ་ཨོཾ་དཀར་སེར༔ དེའི་མཐར་སྔགས་ཕྲེང་གཡས་སུ་འཁོར་དེ་ལས་འོད་ཟེར་དཀར་ལ་སེར་བའི་མདོག་ཅན་ཕྱོགས་བཅུར་འཕྲོས་པས༔ འདས་
པ་དང་མ་བྱོན་པ་དང་ད་ལྟར་གྱི་དུས་གསུམ་གྱི་སངས་རྒྱས་ཕྱོགས་བཅུའི་རྒྱལ་བ་སྲས་བཅས་ཀྱི་སྐུ་ལ་མཉེས་པའི་མཆོད་པ་ཕུལ༔ སྐུའི་བྱིན་རླབས་ཐམས་ཅད་མ་ལུས་པ་ཀུན་འོད་ཟེར་དེས་བསྡུས་ནས༔ འཕགས་པ་འཇམ་དཔལ་གྱི་སྐུ་ལ་ཐིམ་པས་སྐུའི་ནུས་པ་བསྐྱེད་དེ་སངས་རྒྱས་ཐམས་ཅད་ཀྱི་སྐུ་རྡོ་རྗེའི་ངོ་བོར་གྱུར་པར་བསམ༔ ཨོཾ་ཧྲིལླི་ཝི་ཀྲི་ཏཱ་ན་ན་ཧཱུཾ་ཕཊ༔ སྔགས་འདི་བཟླ་ལུགས་མི་འདྲ་བ་མང་ཡང་༔ ཧྲིས་ཁ་དྲི་དང་༔ ཧྲིས་ཏྲ་རི་དང་༔ ཧྲིས་ཁ་དྲི་དང་༔ ཧྲིས་ཏྲེ་རྣམས་ལས་ཕྱི་མ་འདི་དག་གོ༔ ཧྲི་ཡིག་བཅུ་འདི་ནི༔ འཇམ་དབྱངས་རྡོ་རྗེ་འཇིགས་བྱེད་སྐུར་བཞེངས་པའི་དུས༔ ཕྱོགས་སྐྱོང་བཅུ་རང་རང་གི་སྲོག་གི་སྙིང་པོ་ཡི་གེ་འབྲུ་རེ་རེ་ཕུལ་བས༔ ཉིད་ཀྱི་ཐུགས་ཀར་བསྡུས་ཏེ་སྙིང་པོར་བྱིན་གྱིས་བརླབས་པ་ཡིན༔ མཚན་སྔགས་མ་ཡིན་སྲོག་སྔགས་ཡིན་པའི་ཕྱིར༔ བོད་སྐད་དུ་ནི་བཀྲོལ་རྒྱུ་མེད༔ གསར་རྙིང་གཏེར་གསུམ་གྱི་རྒྱུད་སྡེ་ཐམས་ཅད་ནས་གཤིན་རྗེའི་གཤེད་ཀྱི་སྙིང་པོ་མཆོག་ཏུ་གྱུར་པ་ཡིན་གསུངས་ཤིང་༔ རྡོ་རྗེ་འཇིགས་བྱེད་མེའི་སྤུ་གྲིའི་སྒྲུབ་སྔགས་ཀྱང་འདི་ཡིན་པས༔ འདི་བཟླས་པས་རྡོ་རྗེ་འཇིགས་
བྱེད་ཀྱི་བསྙེན་པ་ཡང་ཐེམ་པར་འགྱུར་ཞིང་༔ ས་བླ་ས་འོག་ས་སྟེང་གི་སེམས་ཅན་ཐམས་ཅད་ཀྱི་འཁྲུལ་པའི་དྲི་མ་ཐམས་ཅད་སྦྱངས་ནུས་ཏེ༔ རྒྱུད་ལས༔ ཁྱོད་ཀྱི་ཧྲིའི་གསང་སྔགས་གང་༔ ས་གསུམ་པ་ཡི་འཁྲུལ་པ་སེལ༔ ཅེས་གསུངས༔ རང་ཉིད་དྲག་པོའི་མགྲིན་པར་རྟ་མགྲིན་གྱི་ཐུགས་ཀར་པདྨ་དམར་པོའི་ཟེའུ་འབྲུར་ཨཱཿཡིག་དམར་པོ་ལས་འོད་ཟེར་ཕྱོགས་བཅུར་འཕྲོས་པས༔ འདས་པ་དང་མ་བྱོན་པ་དང་ད་ལྟར་གྱི༔ དུས་གསུམ་གྱི་སངས་རྒྱས་ཐམས་ཅད་ཀྱི་གསུང་ལ་མཉེས་པའི་མཆོད་པ་ཕུལ༔ དེ་དག་ཐམས་ཅད་མ་ལུས་པ་ཀུན་གྱིས༔ གསུང་གི་བྱིན་རླབས་དང་བདེན་ཚིག་གིས་ནུས་པ་བསྡུས་ནས༔ མགྲིན་པའི་དབང་ཆེན་རྟ་མགྲིན་གྱི་གསུང་ལ་ཐིམ་པས༔ རང་གི་གསུང་གི་ནུས་པ་བསྐྱེད་དེ༔ ངག་བདེན་ཚིག་འགྲུབ་པར་བསམ༔ ཨོཾ་ནི་ཡེ་ཤེས༔ པདྨ་ནི་རྒྱ་སྐད་རང་ཡིན་ཏེ༔ མེ་ཏོག་གི་བྱེ་བྲག་ཏ་ཀྲྀཏཱ་ནི་མཐར་བྱེད༔ མ་ཧཱ་ཆེན་པོ་ཀྲོ་དྷ་ཁྲོ་བོ༔ དྷུ་གྷི་ཝ་རྟ་མགྲིན༔ ཧུ་ལུ་ཧུ་ལུ་ཞུགས་ཤིག་ཞུགས་ཤིག༔ ཧཱུཾ་ནི་མཆོག༔ ཕཊནི་ཚར་གཅོད་པ༔ དོན་འགྱུར་གྱི་དབང་དུ་བྱས་ན༔ ཡེ་ཤེས་པདྨ་མཐར་བྱེད་ཁྲོ་བོ་ཆེན་པོ་རྟ་མགྲིན་
ཞུགས་ལ་སྡུག་བསྔལ་ཚར་ཆོད༔ ཅེས་པའོ༔ རྟ་མགྲིན་རྣམ་པར་བཀོད་པའི་མདོ་ལས༔ རྟ་མགྲིན་གྱི་མཚན་དང་སྔགས༔ བྱ་དང་རི་དྭགས་ཀྱི་རྣ་བར་གྲག་ཀྱང་༔ ངན་སོང་གི་སྐྱེ་སྒོ་ཆོད་ནས་ཕྱི་མ་བྱང་ཆུབ་སེམས་དཔའ་འགྲོ་བའི་དོན་བྱེད་ནུས་པར་འགྱུར་བར་གསུངས་ན༔ འདི་ཡི་བསྙེན་པ་བྱས་ན་ཕན་ཡོན་སྨོས་ཅི་དགོས༔ དྲག་པོའི་ཐུགས་ཁའི་ཕྱག་རྡོར་གྱི་ཐུགས་ཀའི་སྟོད་དུ་ཡེ་ཤེས་སེམས་དཔའི་ཐུགས་ཀའི་ཆ་སྨད་དུ་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་མཐིང་གི་མཐར་སྔགས་གཡོན་དུ་བཀོད་ནས་གཡས་སུ་འཁོར་བར་བསྒོམ་སྟེ༔ ཨོཾ་ནི་ཡེ་ཤེས༔ བཛྲ་རྡོ་རྗེ༔ ཙཎྜ་གཏུམ་པོ༔ ཙནྡྲ་ནི་ཟླ་བ་ཡིན་པས་མི་དག༔ མ་ཧཱ་ཆེན་པོ༔ རོ་ཥ་ཎ་འཇིགས་རུང་༔ རོ་ཤ་ན་ནི་བརྡ་རྙིང་པ་ཡིན་ཏེ་མ་དག་རྒྱུ་ཡང་མིན༔ ཧཱུྃ་ནི་མཆོག༔ ཕཊ་ནི་ཚར་ཆོད༔ དོན་འགྱུར་ལ༔ ཡེ་ཤེས་ཀྱི་རྡོ་རྗེ་གཏུམ་པོ་འཇིགས་རུང་ཆེན་པོ་མཆོག་གིས་ཚར་ཆོད༔ ཅེས་པའོ༔ སྔགས་འདི་ཕྱག་རྡོར་ནག་པོ་ཀླུ་འདུལ་གྱི་རྒྱུད་ནས་གསུངས་ཤིང་༔ དུས་མ་ཡིན་པའི་འཆི་བ་དང་༔ གཤིས་ངན་གྱི་འཆི་བ་བཅུ་གསུམ་གྱིས་དུས་བྱེད་པར་མི་འགྱུར་ཞིང་༔ ཕྱི་མ་
བདེ་བ་ཅན་དུ་སྐྱེ་བར་གསུངས༔ སྔགས་དེ་བཟླ་ཚེ་ཐུགས་ཀའི་ཧཱུཾ་དེ་ལས་འོད་འཕྲོས་པས༔ འདས་པ་དང་མ་བྱོན་པ་ད་ལྟར་གྱི་དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་ལ་མཉེས་པའི་མཆོད་པ་ཕུལ༔ དེ་རྣམས་ཀྱི་ཐུགས་ཀྱི་ཡེ་ཤེས་དང་མཁྱེན་པ་ཐམས་ཅད་མ་ལུས་པ་ཀུན་འོད་མཐིང་ཀའི་རྣམ་པར་བསྡུས་ནས༔ རང་གི་ཐུགས་ཀའི་ཕྱག་ན་རྡོ་རྗེའི་ཐུགས་ཀར་ཐིམ་པས་ཐུགས་མཁྱེན་པ་དང་བརྩེ་བ་རྣམས་ཀྱི་ནུས་པ་བསྐྱེད་དེ༔ རྟོགས་པ་མཆོག་ཏུ་གྱུར་པ་ཐོབ་པར་བསམ༔ ལྟེ་བའི་མཁའ་འགྲོ་སྡེ་ལྔ་ལས་འོད་ཁ་དོག་སྣ་ཚོགས་འཕྲོས༔ འདས་པ་དང་མ་བྱོན་པ་དང་ད་ལྟར་གྱི་དུས་གསུམ་གྱི་སངས་རྒྱས་ཐམས་ཅད་ལ་མཉེས་པའི་མཆོད་པ་ཕུལ༔ དེ་རྣམས་ཀྱིས་བྲལ་བ་དང་རྣམ་པར་སྨིན་པའི་ཡོན་ཏན་དྲུག་ཅུ་རྩ་བཞི་ཐམས་ཅད་མ་ལུས་པ་ཀུན་འོད་ཟེར་གྱི་རྣམ་པར་བསྡུས་ནས༔ མཁའ་འགྲོ་སྡེ་ལྔའི་སྐུ་ལ་ཐིམ་པས༔ རང་གི་ཡོན་ཏན་གྱི་ནུས་པ་བསྐྱེད་དེ༔ ཡོན་ཏན་ཐམས་ཅད་ལྷུན་གྱིས་གྲུབ་པའི་དངོས་གྲུབ་ཐོབ་པར་བསམ༔ དྷཱ་ཀི་ནཱི་མཁའ་འགྲོའི་མཚན༔ ཧཱ་རི་ནི་ས་རིགས་བཞིའི་མཁའ་འགྲོའི་སྲོག་སྙིང་༔ ཧཱུྃ་ནི་སྡུག་བསྔལ་བདེ་ལ་བསྒྱུར་བ་སྟེ༔ ཕཊ་
ནི་ཚར་གཅོད་པ་སྟེ༔ མཁའ་འགྲོ་སྡེ་ལྔས་སྡུག་བསྔལ་ཚར་ཆོད་བདེ་བར་བསྒྱུར༔ ཞེས་དོན་འགྱུར་རོ༔ ཡཀཱ་མེ་དབལ་གྱི་ཐུགས་ཀའི་ཧཱུཾ་ལས་འོད་ཟེར་ལྗང་ནག་འཕྲོས་པས༔ འདས་པ་དང་མ་བྱོན་པ་དང་ད་ལྟར་གྱི༔ དུས་གསུམ་གྱི་སངས་རྒྱས་དང་ཁྲོ་བོ་ཐམས་ཅད་ལ་འོད་ཟེར་དེས་མཉེས་པའི་མཆོད་པ་ཕུལ༔ དེ་ཐམས་ཅད་མ་ལུས་པ་ཀུན་གྱི་ཕྲིན་ལས་ཀྱི་ནུས་མཐུ་ཐམས་ཅད་འོད་ཟེར་གྱི་རྣམ་པར་བསྡུས་ནས༔ ཁྲོ་བོ་ཡཀྵ་མེ་དབལ་གྱི་སྐུ་ལ་ཐིམ་པས༔ རང་གི་ཕྲིན་ལས་ཀྱི་ནུས་པ་བསྐྱེད་དེ༔ ཕྲིན་ལས་གང་བརྩམ་ཐོགས་པ་མེད་པའི་དངོས་གྲུབ་ཐོབ་པར་བསམ༔ ཨོཾ་བཛྲ་ཧཱུྃ་ནི་ཡེ་ཤེས་རྡོ་རྗེ་མཆོག༔ ཡཀྵ་ཧཱུྃ་ནི་གནོད་སྦྱིན་གདུག་པ་འཇོམས་པ་སྟེ༔ གནོད་སྦྱིན་གོས་སྔོན་ཅན་གྱི་སྙིང་པོའོ༔ རཀྟ་ཧཱུྃ་ནི་སྲིན་པོ་གདུག་པ་ཅན་བསྔངས་བར་བྱེད་པ་སྟེ༔ ལྕགས་སྡིག་གི་སྙིང་པོའོ༔ དེ་ནས་ཕྲིན་ལས་བསྒྲུབ་པའི་ལྷ་བཞིའི་སྔགས་འདི་ལས་བྱང་གི་མཇུག་ཏུ་སྔགས་མཆོད་ཀྱི་ཚུལ་དུ་ཚར་འགའ་ཟུང་ལས་མི་འདོན་ན༔ གཞུང་ལྟར་སྔགས་བཞི་པོ་སྦྲེལ་ལ་འདོན༔ སོ་སོར་ཅུང་ཟད་བསྙེན་ན་རང་གི་ཐུགས་ཀ་ནས་འོད་ཟེར་སེར་
ནག་འཕྲོས༔ ཤར་ལྷོར་གཤིན་རྗེ་ཚེ་བདག་གི་ཐུགས་ཀར་ཕོག་པས༔ ཧཱུྃ་གི་མཐར་སྔགས་ཕྲེང་གཡས་སུ་འཁོར༔ སྐུ་ལས་རང་འདྲའི་གཤིན་རྗེ་དཔག་ཏུ་མེད་པ་འཕྲོས་པས་འཇིག་རྟེན་གང་༔ བདག་ལ་གནོད་པར་བྱེད་པའི་བགེགས་རིགས་སུམ་བརྒྱ་དྲུག་ཅུ༔ དུས་མ་ཡིན་པར་འཆི་བ་ཕོ་གདོན་གཤིན་རྗེའི་ཕོ་ཉ༔ བཀའ་སྲུང་གིས་འཁུ་ལྡོག་གི་གནོད་པ་ཐམས་ཅད༔ བྱ་སྤུ་རླུང་གིས་གཏོར་བ་ལྟར་ནམ་མཁའི་ཕ་མཐར་བསྐྲད༔ སྤྲུལ་པའི་ཁྲོ་བོ་རྣམས་ཚུར་འདུས་ཏེ༔ གདོན་མི་འགྲོ་བའི་གདུག་པ་ཅན་རྣམས་ལྕགས་ཀྱུས་སྙིང་ནས་བཟུང་ཞགས་པས་མགུལ་ནས་ཁྲིད༔ སྤྲུལ་པའི་ཁྲོ་བོ་སྤྲུལ་གཞི་ཚེ་བདག་ལ་ཐིམ༔ ཚེ་བདག་ཞབས་འོག་ཏུ་གདོན་དེ་མནན་ནས༔ ལྕགས་ཀྱུ་དང་ཞགས་པས་བཟུང་བཞིན་དུ༔ གཡས་གསེར་གྱི་འཁོར་ལོ་སྤུ་གྲི་ལྟར་རྣོ་བ་བསྐོར་བས༔ ཀླད་ཁྲག་འཐོར་ལ་ཁད་དུ་གྱུར་ནས་སྐྲག་ཅིང་བསྔངས་ཏེ༔ གནོད་པ་མི་བྱེད་པར་ཁས་བླངས་ཤིང་། སྲོག་སྙིང་ཕུལ་བར་བསྒོམ་ཞིང་༔ ཡ་མ་རཱ་ཛ་ཧཱུྃ་ཕཊ༔ ཡ་མ་ནི་གཤིན་རྗེ༔ བརྡ་རྙིང་མ་ལོ་ར་ཙ་ཟེར༔ གསར་མ་ལ་རཱ་ཛ་ཏེ་རྒྱལ་པོའོ༔ སྔགས་དོན་ནི༔ གཤིན་རྗེའི་
རྒྱལ་པོ་མཆོག་གིས་ཚར་ཆོད༔ ཅེས་པའོ༔ ཡང་རང་གི་ཐུགས་ཀ་ནས་འོད་ཟེར་མཐིང་ཀ་འཕྲོས༔ ལྷོ་ནུབ་ཁྲོས་མའི་ཐུགས་ཀར་ཕོག༔ ཐུགས་ཀའི་ཧཱུྃ་གི་མཐར་སྔགས་ཕྲེང་གཡོན་དུ་འཁོར༔ སྐུ་ལས་ཁྲོ་མོ་རང་འདྲ་བ་འཇིག་རྟེན་ཁྱབ་པར་འཕྲོས་ཏེ༔ མོ་དང་རྨི་ལམ་དང་མཚན་མ་དང་ལྟས་ངན་པ་ཐམས་ཅད་བྱ་སྤུ་རླུང་གིས་གཏོར་བ་བཞིན་དུ༔ ཕྱིའི་རྒྱ་མཚོའི་ཕར་མཐར་བསྐྲད༔ ཚུར་འདུས་ཁྲོ་མོ་རྣམས་ཁྲོས་མ་ལ་ཐིམ་པར་བསྒོམ༔ བཛྲ་བྷ་ར་ཧཱི་ནི་རྡོ་རྗེ་ཕག་མོ༔ ཧཱུྃ་ཕཊ་ནི་མཆོག་གིས་ཚར་ཆོད༔ ཡང་རང་གི་ཐུགས་ཀ་ནས་འོད་ཟེར་ལྗང་ནག་འཕྲོས༔ ནུབ་བྱང་གི་རྡོ་རྗེ་གཞོན་ནུ་ལ་ཕོག༔ ཐུགས་ཀའི་ཧཱུྃ་ལྗང་སྔོན་གྱི་མཐར་སྔགས་ཕྲེང་གཡས་སུ་འཁོར་བས་སྐུ་ལས་རང་འདྲ་བའི་ཁྲོ་བོ་དཔག་ཏུ་མེད་པ་འཕྲོས༔ ཀུན་གྱིས་ཕྱག་ན་ཕུར་པ་འདྲིལ་བས་བདག་གིས་བྱང་ཆུབ་སྒྲུབ་པ་ལ་བར་ཆད་བྱེད་པའི་བདུད་དང་དམ་སྲི་ཐམས་ཅད་ཀྱི་སྤྱི་བོ་དང་སྙིང་གར་ཕུར་པ་བཏབ་ནས་བསྒྲལ༔ སྤྲུལ་པའི་ཁྲོ་བོ་རྣམས་ཚུར་འདུས་ནུབ་བྱང་གི་ཁྲོ་བོ་ལ་ཐིམ༔ བཛྲ་ཀཱི་ལི་ཀཱི་ལ་ཡ་ནི་རྡོ་རྗེ་ཕུར་པ༔ ཧཱུྃ་ཕཊ་ནི་མཆོག་གིས་ཚར་ཆོད༔ ཡང་རང་གི་
ཐུགས་ཀ་ནས་འོད་ཟེར་མཐིང་ག་འཕྲོས༔ བྱང་ཤར་གྱི་མཁའ་འགྲོ་སེང་གདོང་མ་ལ་ཕོག༔ ཐུགས་ཀར་ཉི་སྟེང་ཧཱུྃ་གི་མཐར་སྔགས་ཕྲེང་གཡོན་དུ་འཁོར་བ་ལས༔ སྐུ་ལས་རང་འདྲ་བའི་ཁྲོ་མོ་སེར་རྒོད་བབ་པ་ལྟར་འཇིག་རྟེན་ཁྱབ་པར་འཕྲོས༔ བྱད་ཁ་ཕུར་ཁ་ཟོར་ཁ་གཏད་སེལ་ངག་མནན་རླུང་འཁོར་ཕྲ་མེན་ལ་སོགས་པའི་གནོད་པ་ཐམས་ཅད༔ བྱ་སྤུ་རླུང་གིས་གཏོར་བ་ལྟར་ཕྱིའི་ནམ་མཁའི་ཕར་མཐར་བསྐྲད༔ ཁྲོ་མོ་རྣམས་ཚུར་འདུས་སེང་གདོང་མ་ལ་ཐིམ་པར་བསྒོམ༔ བཛྲ་སེང་ཧ་མུ་ཁ་ཧཱུྃ་ཕཊ་ནི་རྡོ་རྗེ་སེང་གདོང་མ་མཆོག་གིས་ཚར་ཆོད༔ དེ་ལྟར་སོ་སོར་བསྙེན་ཚེ་སྔགས་ཚན་བཞི་ཀ་ལ་ཧཱུྃ་ཕཊ་སྦྱར༔ ཨོཾ་མེད་པ་ནི་གོང་གནོན་མེད་ཕྱིར་སྔགས་ཁ་ཡན་རྣོ་བར་བཤད༔ ཕྲིན་ལས་སྒྲུབ་པའི་ལྷ་བཞི་འདི་ལ་འཁོར་ནི་མཁོ་དུས་ཡོད་པས༔ ཚེ་བདག་གི་གཏོར་ཟློག༔ ཁྲོས་མའི་གཏོར་ཟློག༔ ཕུར་ཟློག༔ ཕུར་མདོས༔ སེང་གདོང་མའི་གཏོར་ཟློག་ལ་སོགས་སོ་སོར་བཅས་ན་ཡང་༔ དེ་དག་གི་ལས་བྱང་འདོན་མི་དགོས་པར༔ བདག་བསྐྱེད་གུ་དྲག་གིས་ཆོག་ཅིང་༔ དེ་རྣམས་མདུན་བསྐྱེད་བྱེད་ནས་འདོན་ཆོག་པ་དང་༔ ཚེ་བདག་ཁྲོས་ནག་ཕུར་པ་
སེང་གདོང་མ་བཞི་པོ་འདི༔ ལས་ཚོགས་ཕྱུག་པའི་ལྷ་བཞི་ཡིན་པས༔ འདི་བཞིའི་ལས་ཚོགས་ཐམས་ཅད་འགུར་དྲག་ལ་སྦྱར་ཆོག་པའི་ཕྱིར༔ ཕྲིན་ལས་སྒྲུབ་པའི་ལྷ་བཞི་ཞེས་བྱ་སྟེ༔ སྔོན་མར་ཐང་གི་བླ་མ་ཚེ་ཆོག་པ་པདྨ་དབང་ཕྱུག་དེས༔ རྙིང་མའི་དབང་ལུང་མ་ཐོབ་པ་མེད་པ་ལྟ་བུ་ཡིན་པ་ལ༔ ཁོང་གི་རྒྱུན་གྱི་ཐུགས་དམ་རིཏྟ་ལུགས་ཀྱི་གུ་དྲག་ལས་གཞན་ཅི་ཡང་མི་གསུངས་སྐད༔ དེ་ཅི་ལགས་ཞུས་པས༔ འདི་འཐུས་ཆེ་འདི་ལ་མ་འདུས་པའི་ལྷ་གཅིག་ཀྱང་མེད་གསུངས་སྐད༔ ལེགས་པར་དཔྱད་ན་དེ་ཤིན་ཏུ་ཐུགས་བདེན་པར་འདུག༔ ཁྱུང་གི་བསྙེན་པ་འདི་ཀླུའི་གནོད་པ་ཡོད་ན་མང་བཅུག༔ དེ་མིན་ཅུང་ཟད་རེས་ཆོག༔ སྤྱི་གཙུག་བྱ་ཁྱུང་གི་ཐུགས་ཀར་ཉི་མའི་སྟེང་དུ་ཁྲོ་ཡིག་གི་མཐར་སྔགས་ཕྲེང་གཡས་སུ་འཁོར་བ༔ དེ་ལས་འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས་པས༔ ས་དང་པོ་ནས་བཅུ་པའི་བར་གྱི་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྒྱུད་བསྐུལ༔ དེ་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་ནུས་མཐུ་ཐམས་ཅད༔ འོད་ཟེར་ཁ་དོག་སྣ་ཚོགས་ཀྱི་རྣམ་པར་བསྡུས་ནས་བདག་ལ་ཐིམ་པས༔ སྐུ་གསུང་
ཐུགས་ཡོན་ཏན་ཕྲིན་ལས་ཀྱི་དབང་བསྐུར་བྱིན་གྱིས་བརླབས་པར་བསྒོམ་པ་ནི༔ སྒོམ་རིམ་བསྙེན་པའི་དམིགས་པ་དང་༔ ཡང་ཁྱུང་ལས་སྤྲུལ་པའི་ཁྱུང་ནམ་མཁའ་བར་སྣང་ས་གཞི་ཐམས་ཅད་གང་སྟེ༔ ལ་ལ་ལྡིང་༔ ལ་ལ་འཇུམ༔ ལ་ལ་འཕུར་ཞིང་ཀྲང་ཀྲང་ཀྲིང་ཀྲིང་གི་སྒྲ་དང་བཅས་ཏེ༔ རང་ལ་གནོད་ཅིང་འཚེ་བའི་ཀླུ་གཉན་ས་བདག་ཐམས་ཅད་སྦྲུལ་གྱི་རྣམ་པར་ས་འོག་ནས་ཇུར་ཇུར་བཏོན་ཞིང་ཟོས༔ གཏད་སེལ་དུ་བཅུག་པ་ཐམས་ཅད་སྡེར་མོས་བྲུས༔ ཐན་དང་ལྟས་ངན་ཐམས་ཅད་རྭ་ཅོས་བརྡུང་༔ གཤོག་པ་བརྡབས་པས་ནམ་མཁའི་ཕར་མཐར་བསྐྲད༔ སྤུ་གསེབ་ནས་བྱེ་ཚན་གྱི་ཆར་བབས་པས་གནོད་བྱེད་ཀླུ་ས་བདག་རྣམས་ཀྱི་ཤ་རུས་ཕྱེས༔ ཐམས་ཅད་ཚུར་འདུས་རྩ་བའི་ཁྱུང་ལ་ཐིམ༔ ཨོཾ་ནི་ཡེ་ཤེས༔ ཁྲོ་ནི་ཁྱུང་གི་ས་བོན༔ གྷ་རུ་ནི་བརྡ་རྙིང་༔ ག་རུ་ཊ་བརྡ་གསར་པ་སྟེ་ཁྱུང་ལ་འཇུག༔ ཙ་ལེ་ཙ་ལེ་ནི་སྲོག་སྔགས་ཡིན་པར་སེམས་སོ༔ ཧཱུྃ་ཕཊནི་གདུག་པ་འཇོམས་ཤིང་ཚར་གཅོད་པའོ༔ དེ་ནས་འཁོར་གྱི་ཁྲོ་བཅུ་ལ་དམིགས་པ་གཏད་དེ༔ ཁྲོ་བོ་བཅུའི་ཐུགས་ཀར་ཧཱུྃ་མཐིང་ནག་རེ་རེ་གསལ༔ ཁྲོ་བོ་བཅུ་ལས་རང་འདྲའི་ཁྲོ་
བོ་ཕྱོགས་བཅུར་བར་མཚམས་མེད་པར་གང་བར་སྤྲོས་ནས༔ ཐམས་ཅད་ཀྱིས་ཧཱུྃ་སྒྲ་འབྲུག་ལྟར་དུ་ལྡིར་བས༔ ཕྱོགས་བཅུའི་གདོན་ཐམས་ཅད་ནམ་མཁའི་ཕར་མཐར་བྲོས་པར་བྷེ་ལ༔ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ༔ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ༔ དེ་ལྟར་ཧཱུྃ་དབྱངས་གཅིག་དང་ཧཱུྃ་ཐུང་ཅི་མང་བཟླས༔ ཞེས་འཛབ་བརྒྱ་སྟོང་ལ་སོགས་ཅི་འགྲུབ་བཟླའོ༔ ཞེས་པ་ནི༔ རྒྱུན་ཁྱེར་ཡིན་ལ༔ དེ་ལྟར་མཚམས་སྒྲུབ་བྱེད་པའམ༔ རྒྱུན་ཁྱེར་ཡིན་ཀྱང་རུང་སྟེ༔ དྲག་པོའི་མཚན་ལྟས་གསལ་བའི་མེ་ལོང་ལས༔ དྲོད་ཚད་རྟགས་ཀྱི་མཚན་མ་འདི་ལྟར་འབྱུང་༔ རབ་ནི་ཞལ་མཐོང་དབང་བསྐུར་བྱིན་གྱིས་བརླབས༔ ཐོད་རྔ་རྐང་དུང་སྒྲ་སྒྲོག་ལུང་བསྟན་འབྱུང་༔ ཞིང་སྐྱོང་མཁའ་འགྲོས་དངོས་སུ་གཏོར་མ་ལེན༔ བཀའ་སྲུང་ཆོས་སྐྱོང་ཐམས་ཅད་སྤྲིན་བཞིན་འདུ༔ སྣང་སྲིད་ལྷ་འདྲེ་ཀུན་གྱིས་རང་སྲོག་འབུལ༔ གང་བརྩམས་ལས་རྣམས་ཐོགས་མེད་འགྲུབ་པར་འགྱུར༔ འབྲིང་ནི་ཉམས་དགའ་བག་དྲོ་བྱིན་ཆེན་འབེབས༔ སྨན་རཀ་གཏོར་མ་ཁོལ་དང་རླངས་པ་འབྱུང་༔ རང་ལུས་སྦྲིད་ཅིང་འཕར་འདར་རང་དབང་མེད༔ དབེན་གནས་དྲིས་གང་འཁོར་དུ་མཁའ་འགྲོ་
འབབ༔ ལེགས་ཉེས་སྨྲ་ཞིང་སྒྲ་སྐད་སྣ་ཚོགས་འབྱིན༔ ཐ་མ་རྨི་ལམ་མཚན་མ་འདི་ལྟར་འབྱུང་༔ ལུས་ལས་མི་གཙང་རྣག་ཁྲག་འབབ་པ་དང་༔ ཁྲུས་བྱེད་ཆས་གོས་གསར་པ་གྱོན་པ་དང་༔ ཉི་ཟླ་འཆར་དང་མེ་ཏོག་སྣ་ཚོགས་བཏ༔ རི་བོའི་རྩེར་འདུག་རི་གཞན་མཐོང་ལ་སོགས༔ ལས་ངན་སྒྲིབ་པ་དག་པའི་མཚན་མ་ཡིན༔ མེ་ཏོག་ཆར་བབ་བདུད་རྩིའི་རྫིང་ལ་འཐུང་༔ དར་ཕྱར་དུང་འབུད་ཆོས་འཆད་ཁྲི་ལ་འདུག༔ བུད་མེད་ཚོགས་ཀྱིས་ཕྱག་བྱེད་ཟས་ནོར་སྟེར༔ དངོས་གྲུབ་བྱིན་རླབས་ཞུགས་པའི་མཚན་ལྟས་ཡིན་གོ་གྱོན་མཚོན་ཐོགས་དམག་ཆེན་ཁ་ལོ་བསྒྱུར་༔ རི་ལུང་མེར་བསྲེགས་སེམས་ཅན་སྣ་ཚོགས་བསྒྲལ༔ བཙན་པོའི་རྫོང་ཞུགས་ང་རྒྱལ་སྒྲ་ཆེན་འདེབས༔ བར་ཆད་བགེགས་ལས་རྒྱལ་བའི་མཚན་མ་ཡིན་རྨི་ལམ་དག་ཏུ་བླ་མ་མཁའ་འགྲོའི་ཚོགས༔ ཞལ་སྟོན་ཆོས་འཆད་ལུང་བསྟན་བྱེད་པ་དང་༔ རང་ཉིད་རུས་རྒྱན་ཐོགས་ནས་ནམ་མཁར་འཕུར༔ ལྷ་ཡི་གནས་སོགས་ཨོ་རྒྱན་ཡུལ་དུ་ཕྱིན༔ ཞིང་ཁམས་བཀོད་པ་ཁྱད་འཕགས་མཐོང་བ་ནི༔ ཨོ་རྒྱན་པདྨ་འགྲུབ་པའི་མཚན་མ་ཡིན༔ རལ་གྲི་ཨུཏྤལ་ཆོས་ཀྱི་པོ་ཏི་རྙེད༔ སེང་གེ་
གླང་ཆེན་ཁྲི་ལ་འདུག་པ་རྣམས༔ འཇམ་དཔལ་ཡ་མཱན་ཀའི་མཚན་མ་ཡིན༔ གོས་དམར་གྱོན་དང་མེ་ཏོག་དམར་པོས་བརྒྱན༔ རྟ་སྐད་འབྱིན་དང་ལུས་ལ་མེ་ཆེན་འབར༔ གསུང་གི་ལྷ་མཆོག་རྟ་མགྲིན་མཚན་མ་ཡིན༔ རི་རབ་ཀླད་བསྐོར་རྒྱ་མཚོ་ཧུབ་ཀྱིས་འདེབས༔ རྡོ་རྗེ་དྲིལ་འཁྲོལ་མེ་ཏོག་སྔོན་པོ་འཐུ༔ གསང་བདག་ཕྱག་ན་རྡོ་རྗེའི་མཚན་མ་ཡིན༔ བུད་མེད་ཚོགས་འདུ་ཟས་གོས་དངོས་གྲུབ་སྟེར༔ མ་སྲིང་མཛའ་མོར་སྤྲུལ་ནས་གསང་ཚིག་ཡོན་ཏན་མཁའ་འགྲོ་སྡེ་ལྔའི་མཚན་མ་ཡིན༔ ལུས་ལ་འདབ་རྒྱས་ནམ་མཁར་འཕུར་བ་དང་༔ རྒྱ་མཚོ་སྐམ་དང་སྦལ་སྦྲུལ་ཟ་བ་རྣམས༔ ཕྲིན་ལས་བྱ་ཁྱུང་འགྲུབ་པའི་མཚན་མ་ཡིན༔ ལག་ན་སྣ་ཚོགས་མཚོན་ཆའི་འཁོར་ལོ་འཕེན༔ དུད་འགྲོ་སེམས་ཅན་སྣ་ཚོགས་བསད་པ་དང་༔ བརྡུང་དང་བཏག་དང་མགོ་ལུས་ཕྲལ་ལ་སོགས༔ སྤྲུལ་པ་ཡཀྵ་མེ་དབལ་མཚན་མ་ཡིན༔ ཞེས་གསུངས་སོ༔ དེ་ལྟར་གང་དུ་སྒྲུབ་པའམ་རྒྱུན་བསྙེན་ཡིན་ཀྱང་རུང་སྟེ༔ སྒྲུབ་པའི་རྟགས་དེ་རྣམས་ཐོན་པར་བྱ༔ གང་ཟག་འགའ་ཞིག་བསྙེན་སྒྲུབ་ཚན་ཆེར་བྱས་ཀྱང་རྟགས་མི་འོང་བའི་རིགས་ཡོད་
པས༔ ཨ་ཙིག་བྱེ་བ་གཉིས་ཡན་ཆད་ཐོན་ན་ལས་སྦྱོར་ནི་རུང་༔ ལས་སྦྱོར་ནི་རང་ངམ་གཞན་ལ་སྡེ་བརྒྱད་ལྷ་འདྲེའི་གནོད་པ་བྱུང་ན་བྱ་བ་སྟེ༔ དུས་མ་ཡིན་པར་ནི་བྱ་མི་རུང་ངོ་༔ གུར་དྲག་གི་ལས་བྱང་སྔོན་དུ་སོང་ནས༔ ཞི་དྲག་གོ་ཆ་དང་བཅས་པའི་བསྙེན་པ་ཅུང་ཞིག་བྱས་རྗེས༔ རང་ཉིད་དྲག་པོའི་དཀྱིལ་འཁོར་དུ་གསལ་བའི་ཕྱི་རོལ་དུ༔ གནམ་གསེར་གྱི་འཁོར་ལོ་རྩིབས་སྟོང་རྩིབས་རྣམས་ཐུར་དུ་གུག་པ་གཡས་སུ་འཁོར་བ༔ འོག་གི་ས་གཞི་ལྕགས་སྲེག་གི་འཁོར་ལོ་རྩིབས་སྟོང་ཕྲག་གྱེན་དུ་ཟིང་བ་གཡོན་དུ་འཁོར་བ༔ ཐམས་ཅད་རལ་གྲི་སོ་གཉིས་མའི་སོ་ལྟར་རྣོ་བ་གཡས་གཡོན་དུ་འཁོར་བ་སོ་འཐབ་པའི་བར་དུ་གནོད་བྱེད་རྣམས་ཀྱི་སྐེ་རྡོག་རྡོག་ལུས་དུམ་བུར་ཧྲུག་ཧྲུག་གཏུབ་པ༔ སྤྲུལ་པའི་ལྕགས་སྡིག་རྣམས་ཀྱིས་ཧབ་ཧབ་ཟ་བ་དང་༔ སྤྲུལ་པའི་ཡཀྵ་མེ་དབལ་བྱེ་བ་དུང་ཕྱུར་གྱི་འཇིག་རྟེན་ཐམས་ཅད་གང་ནས༔ གནོད་བྱེད་ཐམས་ཅད་ཀྱི་མགོ་ལུས་ཐོ་བས་བརྡུངས་པས་ཤ་སྐྱོ་ཁྲག་སྐྱོར་གྱུར་པ༔ སྐུ་ལས་འབར་བའི་ཡེ་ཤེས་ཀྱི་མེས་བསྲེགས་ནས་རྗེས་མེད་པར་བསྒོམ་ཞིང་༔ ཨ་ཙིག་མེ་དབལ་དང་སྡིག་པའི་སྔགས་ཤམ་བུ་དང་༔ དཀར་པོ་
ལྷ་རིགས་དང་ཡུལ་ལྷ་ཐམས་ཅད་ཀྱི་སྲོག་ཨ༔ འཆི་བདག་གཤིན་རྗེ་ཐམས་ཅད་ཀྱི་སྲོག་ཡ༔ ནད་བདག་མ་མོ་ཐམས་ཅད་ཀྱི་སྲོག་མ་ནག་པོ་བདུད་རིགས་ཐམས་ཅད་ཀྱི་སྲོག་དུ༔ དམར་པོ་བཙན་རིགས་ཐམས་ཅད་ཀྱི་སྲོག་རུ༔ དཀོར་བདག་རྒྱལ་པོ་ཐམས་ཅད་ཀྱི་སྲོག་ཙ༔ གཏེར་བདག་གནོད་སྦྱིན་ཐམས་ཅད་ཀྱི་སྲོག་ཤ༔ ཀླུ་ས་བདག་རྣམས་ཀྱི་སྲོག་ན༔ མཱ་ར་ཡ་ཕཊ་འདི་སྒྲ་འགྱུར་ལ་བདུད་ཟེར་བ་ཞིག་འོང་༔ དོན་འགྱུར་ལ་སོད་ཡིན༔ གཞུང་གི་སྔགས་འདི་ཤིན་ཏུ་ནུས་པ་ཅན་དག་གིས་སྡེ་བརྒྱད་སྤྱི་འདུལ་ལ་བཟླ་རྒྱུ་ཡིན་ཏེ༔ དུས་འཁྲུག་དང་༔ ནད་ཡམས་དང་མུ་གེ་དང་༔ མཐའ་དམག་ལ་སོགས་པའི་སྡེ་བརྒྱད་ཀྱི་གཡོས་ཆེན་པོ་བྱུང་དུས་བཟླས་ན་སྡེ་བརྒྱད་ཟིལ་གྱིས་གནོན་པས་སྤྱི་ལ་ཕན་ནོ༔ ནུས་པ་མེད་པས་དེ་ལྟར་བྱས་ན་རང་ཉིད་ལ་བར་ཆད་ཆེན་པོ་འབྱུང་བས་མི་བྱའོ༔ ནའི་མཇུག་དེར་གནོད་བྱེད་མཱ་ར་ཡ་ཕཊ༔ ཅེས་སྦྱར་བ་སྡེ་བརྒྱད་ལ་མི་ཕོག་སྡེ་བརྒྱད་ལས་མཁན་དུ་གྱུར་ནས་གནོད་བྱེད་གང་ཡིན་པ་བསད་པར་གྱུར་ཏེ༔ དཔེར་ན༔ ཟ་འདྲེ་ཤི་གཤེད་ཅེས་པའམ༔ ཆུང་སྲི་གོད་འདྲེ༔ ནད་འདྲེ་གཅོང་སྲི༔
སྨྱོ་འདྲེ་སྒབ་འདྲེ༔ དམ་སྲི་དེ་ལ་སོགས་པའི་གང་གནོད་ཀྱི་མིང་སྦྱར་བར་བྱ༔ དམིགས་པ་ནི་གོང་ལྟར་རོ༔ ཐུལ་བའི་རྟགས་བྱུང་ན་ཚོད་བཟུང་བ་གལ་ཆེའོ༔ །ཤམཐ། ཐཾ༔ བརྡ་ཡིག་འདི་ནི་མཁའ་འགྲོའི་བཀའ་རྟགས་ཀྱི་ཡི་གེ་སྟེ་བསྒྱུར་ན༔ ས་མ་ཡ་ཁ་ཐཾ༔ དེ་ཡན་གྱི་ལས་བྱང་དངོས་གཞིའི་རིམ་པ་ཚར༔ ཀརྟ།རྐཙམ༔ དེ་ནས་བསོད་ནམས་རྒྱ་ཆེན་པོ་ཐོབ་པ་དང་༔ དམ་ཚིག་ཉམས་ཆག་ཐམས་ཅད་བསྐང་བའི་ཐབས༔ ཚོགས་ཀྱི་རིམ་པ་འདི་ལ༔ ཚོགས་ཀྱི་འཁོར་ལོ་དང་དཔའ་བོའི་དགའ་སྟོན་དང་༔ དཔའ་མོའི་དགའ་སྟོན་སོགས་ནི༔ སྔར་རྒྱ་གར་དང་༔ སྔོན་བོད་ཀྱི་རྗེ་འབངས་རྣམས་ཀྱི་མཛད་མོད་ཀྱིས༔ དེང་སང་ནི་འབྱོར་པ་ཆུང་བ་དང་༔ གྲུབ་པ་ཐོབ་པའི་རྣལ་འབྱོར་ཕོ་མོ་ཡང་ཉུང་བས༔ ཇི་ལྟ་བ་ཕྱག་ལེན་ལ་མི་ཐེབས་པའི་ཕྱིར༔ འདིར་བཤད་པ་ལ་ཡང་དགོས་པ་མེད༔ དེང་སང་ཚོགས་ཀྱི་མཆོད་པ་བྱ་སྟེ༔ འདི་ལ་ཡང་ཚོགས་མཆོད་དང་༔ ལྷ་ཚོགས་དང་༔ ཟས་ཚོགས་གསུམ་དུ་ཡོད༔ རས་སོགས་ལ་ཞིང་ལྤགས་གཉིས་བྲི༔ གཅིག་གི་དཀྱིལ་དུ་དགའ་བ་འཁྱིལ་བ་བྲིས་པའི་སྟེང་དུ་༔ ཚོགས་དང་
ཤ་སོགས་ཐབས་ཀྱི་རྫས་དཀྱིལ་འཁོར་གྱི་གཡས་སུ་བཞག༔ ཞིང་ལྤགས་གཅིག་གི་སྟེང་དུ་གཡུང་དྲུང་བྲིས་པར༔ ཚོགས་ཆང་སོགས་བཏུང་བའི་རིགས་ཤེས་རབ་ཀྱི་རྫས་གཡོན་དུ་བཞག༔ ཡང་ན་གཅན་གཟན་གྱི་པགས་པའམ་སྟན་ཁེབས་ཀྱི་སྟེང་དུ་མདུན་དུ་བཤམས༔ ཚོགས་ཀྱི་ཡོ་བྱད་རབ་ཟས་སྣ་བརྒྱ་རྩ་བརྒྱད༔ འབྲིང་ཉི་ཤུ་རྩ་གཅིག་རྒྱས་པར་བཤམས༔ ཐ་ན་ཡང་ཤ་ཆང་ཟན་གསུམ་འཛོམ་པར་བྱ༔ བསང་ཆུ་ནི་དུང་ཆོས་ནང་དུ་ཆུ་གཙང་བླུག་པ་གཏོར་ཞིང་བྲན་ཏེ༔ ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧཱུྃ་ཧ་ན་ཧ་ན་ཧཱུྃ་ཕཊ༔ ནི་རྡོ་རྗེ་བདུད་རྩི་འཁྱིལ་པ་མཆོག་གིས་ཚར་ཆོད༔ སརྦ་པྲ་བྱི་ཤོ་དྷ་ནི་ཧཱུྃ་ཕཊ༔ འདིའི་དོན་འགྱུར་ལ༔ མ་དག་པ་ཐམས་ཅད་བཅོས་ཤིང་ཚར་ཆོད༔ ཅེས་པའི་སྔགས་ཀྱིས་མི་གཙང་བ་སྦྱངས༔ རང་ཉིད་དྲག་པོའི་ཐུགས་ཀ་ནས་ཡི་གེ་གསུམ་འཕྲོས་པར་བསམས་ལ༔ རཾ་ཡཾ་ཁཾ་སྭཱ་ཧཱ་ཞེས་བརྗོད༔ ཧཱུྃ་ཞེས་སྲིད་པའི་ཉེས་སྐྱོན་གཅོད་པའི་སྙིང་པོ་བརྗོད་ནས༔ ཆོས་ཐམས་ཅད་སྐྱེ་བ་མེད་པའི་ངང་ཉིད་ཐུགས་རྡོ་རྗེ་ཆོས་ཀྱི་དབྱིངས་ལས༔ རིག་པའི་རང་རྩལ་ལས་སྐྱེ་བའི་ཆོ་འཕྲུལ་རཾ་ཡཾ་ཁཾ་གསུམ་གྱི་ཡིག་འབྲུ་གསུམ་
གྱིས༔ རཾ་ལས་ཡེ་ཤེས་ཀྱི་མེ་འབར་བས་ཚོགས་རྫས་དངོས་པོར་འཛིན་པ་བསྲེགས་ནས་རྣམ་པ་གསལ་ཡང་ངོ་བོ་སྟོང་པར་བྱས༔ ཡཾ་ལས་རླུང་འཕྲོས་ཏེ་ཚོགས་རྫས་ཐ་མལ་པར་འཛིན་པའི་མཚན་མ་གཏོར༔ ཁཾ་ལས་ཆུ་འཕྲོས་པས་ཚོགས་རྫས་ཐ་མལ་དུ་འཛིན་པའི་བག་ཆགས་སྦྱངས༔ ཚོགས་རྫ་ས་ཁོ་ནར་མ་ཟད༔ བདག་དང་མཆོད་པ་དང་གནས་ཁང་དང་བཅས་པ་ཐམས་ཅད༔ ཡེ་ནས་སྣང་སྟོང་སྒྱུ་མ་ལྟ་བུར་རྣམ་པར་དག་པར་མ་གྱུར་པ་ནི་གང་ཡང་མེད་དེ༔ དེ་ལྟར་ལྟ་བ་རྣམ་པར་དག་པའི་ངང་དུ་གནས་པར་གྱུར་ཅིག༔ དེ་ནས་རང་གི་ཐུགས་ཀ་ནས་ཨོཾ་ཨཱཿཧཱུྃ་ཧཱིའཕྲོས་པས༔ ཧཱུཾ་ཞེས་མཆོག་གི་སྙིང་པོ་བརྗོད་ནས༔ བདག་བསྐྱེད་ཆོས་དབྱིངས་རོལ་པའི་དཀྱིལ་འཁོར་གྱི་ཐུགས་ཀ་ནས༔ ཚོགས་རྫས་བྱིན་གྱིས་བརླབས་པའི་ཡི་གེ་དེ་བཞི་འཕྲོས་ཏེ༔ འདུས་པའི་འོད་ཟེར་གྱིས་སངས་རྒྱས་ཀྱི་ཞིང་ཁམས་དཔག་ཏུ་མེད་ཅིང་༔ ནམ་མཁའི་མཐར་ཐུག་པར་གང་བར་གྱུར་པའི་ཚོགས་རྫས་འདོད་པའི་ལོངས་སྤྱོད་སྣ་ཚོགས་པ་སྤྲིན་ལྟར་འཐིབས་པར་བསྒོམ་སྟེ༔ དེ་ཡང་ཡི་གེ་ཧཱུཾ་གི་འོད་ཟེར་གྱིས་བཤམས་པའི་མཆོད་རྫས་དང་༔ ཡིད་ཀྱིས་སྤྲུལ་པའི་ཚོགས་རྫས་
གཉིས་སོ་སོ་མ་ཡིན་པའི་རྣམ་རྟོག་དབྱིངས་སུ་སྦྱངས༔ ཨཱཡི་འོད་ཟེར་གྱིས་དེ་ཐམས་ཅད་དྲི་མ་མེད་པའི་བདུད་རྩི་ཆེན་པོར་བསྒྱུར༔ ཨོཾ་གྱི་འོད་ཟེར་གྱིས་ཚོགས་རྫས་འདོད་ཡོན་སྤྲིན་ཚོགས་བཞིན་དུ་གཏིབས་པར་བསྒོམ༔ ཧཱི༔ཡི་འོད་ཟེར་གྱིས་སྣང་སྲིད་འཁོར་འདས་ཐམས་ཅད་མཆོད་རྫས་དེ་འདྲ་བས་བཀང་༔ རང་གི་ཐུགས་ཀ་ནས་མཆོད་པའི་ལྷ་མོ་གྲངས་མེད་དཔག་ཏུ་མེད་པ་རྣམས་ཀྱིས༔ གསེར་དང་དངུལ་དང་གཡུ་ལ་སོགས་པའི་གཞོང་པ་ན༔ ཚོགས་རྫས་ལོངས་སྤྱོད་དཔག་ཏུ་མེད་པའི་ཚོགས་ཀྱིས་བཀང་བར་བསྣམས་ཏེ༔ ནམ་མཁའ་ས་གཞི་བར་སྣང་ཐམས་ཅད་གང་ནས༔ རྐང་པས་གར་སྟབས་དང་ལག་པས་ཕྱག་རྒྱ་སྣ་ཚོགས་བསྒྱུར་ཞིང་ལྷ་སོ་སོ་ལ་མཆོད༔ ཨ་ལ་ལ་ནི་ངོ་མཚར་བའི་ཚིག་སྟེ༔ ལྷ་རྣམས་ཀྱིས་མཆོད་པ་དེ་དག་དགྱེས་པར་བཞེས༔ དགྱེས་པས་ཐུགས་དམ་དབྱིངས་སུ་བསྐང་སྟེ༔ བདག་ལ་མཆོག་ཐུན་མོང་གི་དངོས་གྲུབ་ཐམས་ཅད་སྩོལ་བར་བསམ༔ དེ་ནས་རིམ་པ་གསུམ་དུ་བཅད་དེ༔ དང་པོས་བླ་མ་ཡི་དམ་རྣམས་ཀྱི་གཏོར་མ་གསོ་ལ་བྲན་པ་མཆོད་པ༔ བར་དུ་བཤགས་པས་བསྐང་བ་གསོ་ལ་བྲན༔ ཐ་མ་
བསྒྲལ་བར་བྱ་སྟེ༔ ལིངྒ་བཅས་པ་བྲན་པའམ༔ མ་གྲུབ་ན་ཟན་དུམ་ཤ་དུམ་སྦགས་ལ་བྲན༔ དང་པོ་མཆོད་པ་ནི༔ རྒྱས་པར་སྤྲོ་ན་གཏོར་བསྔོས་བྱ༔ བླ་མ་ཐོད་ཕྲེང་རྩལ་དང་རིགས་བདག་གི་གཙོར་བྱས་པའི༔ རྩ་བརྒྱུད་ཀྱི་བླ་མ་ཡི་དམ་དྲག་པོ་རིགས་ལྔ་ཁྲོ་བོ་བཅུ་སོགས༔ མཁའ་འགྲོ་མ་ཁྲོས་མ་ནག་མོ་མཁའ་འགྲོ་སྡེ་ལྔ་སོགས༔ བདག་མདུན་དཀྱིལ་འཁོར་གྱི་ལྷ་ཚོགས་ཐམས་ཅད་ལ༔ འདོད་པའི་ཡོན་ཏན་ལྔ་དང་ལྡན་པའི་ཚོགས་ཀྱི་མཆོད་པ་རྒྱ་ཆེན་པོ་འདི་འབུལ་ལོ༔ ཡེ་ཤེས་ཀྱི་ལྷ་ལ་བཀྲེས་པ་དང་སྐྱེམས་པ་མི་མངའོ་ཡང་༔ བདག་བསོད་ནམས་ཀྱི་ཚོགས་རྫོགས་པའི་ཕྱིར༔ དགྱེས་པ་ཆེན་པོས་བཀྲེས་པ་ཟས་དང་འཕྲད་པ་ལྟར་རོལ་ནས་ཀྱང་༔ བདག་ལ་འདོད་པའི་དངོས་གྲུབ་ཐམས་ཅད་ད་ལྟ་ཉིད་དུ་སྩལ་དུ་གསོལ༔ གུ་རུ་དྷེ་ཝ་ཌཱཀྐི་ནི་བླ་མ་ཡི་དམ་མཁའ་འགྲོ༔ ག་ཎ་ཙཀྲ་ཚོགས་ཀྱི་འཁོར་ལོ༔ པཱུ་ཙ་ལ་ཁཱ་ཧི་མཆོད་པ་གསོལ༔ བར་པས་བཤགས་པ་ནི༔ རྒྱས་པར་ན་བསྐང་བ་འདོན༔ ཧཱུྃ་ཞེས་སྲིད་པའི་ཞགས་པ་གཅོད་པའི་སྔགས་བརྗོད་ནས༔ བདག་དང་སེམས་ཅན་ཐམས་ཅད་ཀྱི་མི་དགེ་བ་དང་༔ དགེ་བའི་ལས་གང་
བསགས་ཐུགས་རྗེས་གསལ་བར་མཁྱེན་པའི་མངོན་པར་ཤེས་པ་དང་ལྡན་པར་གྱུར་པའི་དཔང་པོ་དུ་གྱུར་ལ༔ སྲིད་པ་འཁོར་བའི་སྡུག་བསྔལ་ཐམས་ཅད་དང་༔ ཞི་བ་ཕྱོགས་གཅིག་ཏུ་གོལ་བའི་ལམ་ལས་སྐྱོབས་པའི་སྐྱབས་ཀྱི་མཆོག༔ ཡི་དམ་དྲག་པོའི་ལྷ་ཚོགས་མ་ལུས་པ་རྣམས་དགོངས་སུ་གསོལ༔ བདག་དང་སེམས་ཅན་ཐམས་ཅད་ཚེ་རབས་བསྐལ་པ་དཔག་ཏུ་མེད་པའི་སྔོན་རོལ་ནས་དུས་ད་ལྟའི་བར་དུ༔ སོ་སོར་ཐར་པའི་སྡོམ་པ་དང་འགལ་བ་དང་༔ བྱང་ཆུབ་སེམས་དཔའི་བསླབ་བྱ་དང་འགལ་བར་གྱུར་པ་དང་༔ གསང་སྔགས་ཀྱི་དམ་ཚིག་ཉམས་པ་དང་༔ ཆག་པ་ཅི་ཡོད་པ་མ་ལུས་པ༔ ཟབ་མོ་ཚོགས་ཀྱི་མཆོད་པ་འདིས༔ དམ་ཚིག་ཉམས་ཆག་ཐམས་ཅད་བསྐང་ཞིང་༔ བཅས་པ་དང་རང་བཞིན་གྱི་ཁ་ན་མ་ཐོ་བ་ཐམས་ཅད་བཤགས་པར་བགྱིའོ༔ གུ་རུ་དྷེ་ཝ་ཌཱཀྐི་ནཱི༔ བླ་མ་ཡི་དམ་མཁའ་འགྲོ༔ ག་ཎ་ཙཀྲ་ཁཱ་ཧི༔ ཚོགས་ཀྱི་འཁོར་ལོ་བཞེས་པའོ༔ ཤུདྡེ་ཨ་ནི༔ དག་པ་སྐྱེ་བ་མེད་པ༔ ཐ་མ་བསྒྲལ་བ་ནི༔ ཟློག་པ་དུས་ཡིན་ན་ཚོགས་དུམ་རེ་དང་ལིངྒ་རེ་སྦྲགས་ལ༔ འགུགས་བསྟིམ་བསྒྲལ་ལས་ལས་འགྲིག་ལྟར་
བྱ་སྟེ༔ དཔོན་སློབ་ཤིན་ཏུ་མང་བར་ཡོད་ན༔ མཆོད་གཡོག་པ་གཉིས་གིང་དཀར་ནག་གི་ཆས་སུ་ཞུགས་ཏེ༔ ཕོད་ཁ་དཀར་ནག་ཁྲོ་འབག་སོགས་གྱོན་ལ༔ ལྕགས་ཀྱུས་འགུགས་ཚུལ་ཞགས་པས་བཅིངས་ཚུལ༔ ཕུར་བུས་འདེབས་ཚུལ་ཐུན་བྲབ་པ་སོགས་ལས་འགྲིག་གི་ཚིག་དང་བསྒྲིག་ཅིང་བྱ༔ བསྡུས་པ་རྒྱུན་ཁྱེར་ལ་གཞུང་ཚིག་དང་དམིགས་པ་ཙམ་གྱིས་འགྲུབ་སྟེ༔ ཧཱུྃ་ཞེས་གདུག་པ་འདུལ་བའི་སྔགས་བརྗོད་ནས༔ བདག་མདུན་ཆེ་མཆོག་དྲག་པོ་ཐོད་ཕྲེང་རྩལ་དུ་གསལ་བའི་སྐུ་ལས་རྔམ་བྱེད་འབར་བའི་ཁྲོ་བོ་ཡཀྵ་མེ་དབལ་གྱི་ཚོགས་གྲངས་མེད་པ་མེ་དཔུང་འབར་བ་དང་བཅས་པ་འཕྲོས༔ དེ་དག་གི་ཕྱག་ན་ལ་ལས་རྡོ་རྗེ༔ ལ་ལས་ཕུར་པ༔ ལ་ལས་ལྕགས་ཀྱུ༔ ལ་ལས་ཞགས་པ༔ ལ་ལས་ཐོ་ཆེན་མེ་འབར་བ་ཐོགས་ཏེ༔ བསྟན་པའི་སྤྱི་དགྲ་རྣལ་འབྱོར་པའི་སྒོས་དགྲ༔ བདག་དང་བསྲུང་བྱའི་ལུས་དང་སྲོག་དང་བྱང་ཆུབ་སྒྲུབ་པ་ལ་བར་དུ་གཅོད་པའི་བགེགས་གདུག་པའི་སེམས་དང་ལྡན་པ༔ ཞེ་སྡང་མེ་ལྟར་འབར་བ༔ འདོད་ཆགས་ཆུ་ལྟར་ཁོལ་བ༔ གཏི་མུག་མུན་ལྟར་གཏིབས་པ༔ ཕྲག་དོག་རླུང་ལྟར་འཚུབ་པ༔ ང་རྒྱལ་བྲག་
རི་ལྟར་གཟིང་བ༔ དེ་ལྟར་དུག་ལྔ་འདུས་པའི་ཕུང་པོ༔ བསྒྲལ་བའི་ཞིང་དུ་གྱུར་པ་འདི༔ ལྕགས་ཀྱུ་ཐོགས་པ་རྣམས་ཀྱིས་སྙིང་ནས་ཟུངས་ལ༔ ཚོགས་རྫས་ལིངྒ་འདི་ལ་ཁུག་ཅིག༔ ཕུར་པས་སྙིང་དཀར་ནག་མཚམས་སུ་ཐོབ་ལ་སོད་ཅིག༔ ཐོ་བ་ཅན་གྱིས་སྤྱི་བོ་ནས་ཆོམ་ལ་རྡུལ་ཕྲན་བཞིན་དུ་བརླག་པར་མཛོད་ཅིག༔ རྣམ་པར་ཤེས་པ་ཆོས་ཀྱི་དབྱིངས་ཀུན་ཏུ་བཟང་མོའི་མཁའ་ཀློང་དུ་སྤོར་ལ་སངས་རྒྱས་པར་མཛོད་ཅིག༔ གུ་རུ་བཛྲ་ཀྲོ་ཏ་ནི་བླ་མ་རྡོ་རྗེ་ཁྲོ་བོ༔ ཧྲི་དགྲ་བོའི་སྲོག༔ ཏྲི་བགེགས་ཀྱི་སྲོག༔ ཤ་ཏུཾ་ཚར་ཆོད༔ མཱ་ར་ཡ་རྦད་སོད་ཆོད༔ ཅེས་བསྒྲལ་ནས༔ ཤ་ཁྲག་ལས་མཁན་རྣམས་དང་༔ མདུན་གྱི་ཡི་དམ་ཆོས་སྐྱོང་རྣམས་ཀྱི་ཞལ་དུ་བསྟབ་པར་དམིགས་ལ༔ གཏོར་ཟློག་མེད་ན་ཡི་དམ་ཆོས་སྐྱོང་གི་གཏོར་མ་གསོ་བར་བྱའོ༔ དེ་ནས་མཆོད་གཡོག་པས་ལག་པ་གཡས་སུ་ཚོགས་དུམ་དང་ཤ༔ གཡོན་དུ་ཚོགས་ཆང་ཐོགས་ལ༔ རྡོ་རྗེ་སློབ་དཔོན་ནས་བཟུང་རིམ་པར་དྲངས་ཏེ༔ གཟིགས་ཤིག་ཅེས་བོས་ནས༔ ཚོགས་ཀྱི་དམ་རྫས་མཛེས་ཤིང་ཡིད་དུ་འོང་བ་རོ་བཅུད་དང་ལྡན་པ་དོན་དམ་པའི་བདུད་རྩིའོ༔ འདི་ཟོས་པས་
ཆོས་སྐུ་ཕྱག་རྒྱ་ཆེན་པོ་རྟོགས་པའི་རྫས་ཡིན་པས༔ འདི་ལ་བསྙེན་གནས་དང་༔ སྨྱུང་གནས་དང་འདུལ་ཁྲིམས་བསྲུང་བ་ཡིན་ཀྱང་༔ འདི་བདུད་རྩི་དངོས་ཡིན་སྙམ་པ་ལས། ཤ་ཆང་ཡིན་སྙམ་པའི་ཐེ་ཚོམ་བྱར་མི་རུང་སྟེ༔ ཐེ་ཚོམ་བྱས་ན་ཡི་དྭགས་མཆུ་བཅིངས་སུ་སྐྱེ་བར་བཤད་པའི་ཕྱིར༔ བྲམ་ཟེ་གཙང་སྦྲ་ལ་དགའ་བ་དང་༔ གདོལ་པ་ཤ་ཁྲག་ལ་དགའ་བ་དང་༔ ཁྱི་དང་ཕག་མི་གཙང་བ་ལ་དགའ་བ་རྣམས་མི་མཚུངས་ན་ཡང་༔ དེ་རྣམས་རང་བཞིན་གྱི་སྟོང་པ་ཉིད་དུ་རོ་གཅིག་ཏུ་དགོངས་ཏེ༔ བཞེས་ཤིག་རོལ་ཅིག །ཅེས་དྲངས་པ་དང་༔ ལག་པ་གཉིས་པད་ཀོར་བྱས་ལ༔ པདྨའི་ཕྱག་རྒྱས་བླངས་ཏེ༔ ཧོཞེས་ཐུགས་དགྱེས་པའི་སྔགས་བརྗོད་ནས༔ ཚོགས་ཀྱི་བདུད་རྩི་འདིའི་རིན་ཐང་ནི་གསེར་སྲང་བརྒྱ་རེ་བའི་ཟས་ཀྱིས་ཀྱང་འགྲན་དུ་མེད་པའི༔ རྒྱུད་སྡེ་ཟབ་མོ་རྣམས་ལས་ལེགས་པར་འོང་བའི་ཆོས་ཀྱི་བདུད་རྩི་བཟུང་ཡུལ་བཟའ་བཏུང་འདི་དང་༔ དེར་འཛིན་པའི་སེམས་དང་༔ ང་དང་བདག་ཏུ་འཛིན་པའི་སེམས་དངོས་པོར་འཛིན་པའི་མཚན་མ་ཀུན་སྤངས་བ༔ འདི་ནི་བླངས་བར་བྱའོ༔ འདི་ནི་དོར་བར་མི་བྱའོ༔ ཞེས་འཁོར་
འདས་ཀྱི་ཆོས་ཀུན་གང་ཤར་བཅོས་བསླད་དང་བྲལ་བའི་དེ་ཁོ་ན་ཉིད་དེ་བཞིན་གཤེགས་པའི་དགོངས་པ་འདི་ཉིད་ལ་བདག་ཀྱང་དད་ཅིང་གུས་པས་ཕྱག་འཚལ་ཞིང་༔ ལྟ་བ་དེ་ལྟ་བུའི་ངང་ནས་ལོངས་སྤྱོད་དོ༔ ཨ་ལ་ལ་ཧོ་ནི་དམ་རྫས་འདི་ལྟ་བུ་ནི་ངོ་མཚར་ཆེ་བས་བདག་བསྐྱེད་གོ་ཆའི་ལྷ་རྣམས་དགྱེས་པ་བསྐྱེད་པའོ༔ ཞེས་བདག་བསྐྱེད་ཀྱི་ལྷ་མཆོད་པར་དམིགས་ལ་རོལ་ལོ༔ དེ་ནས་ལྷ་རྣམས་མཆོད་ལྷག༔ རྣལ་འབྱོར་པ་རྣམས་ལ་མ་དྲངས་པའི་བར་དེ་ནས་བཞག་པ་ནི་གཙང་ལྷག་ཡིན༔ སློབ་དཔོན་ལ་དྲངས་མང་མ་ལ་མ་དྲངས་བའི་བར་དེར་ལྷག་མ་བཞག་ན་ཕུད་ལྷག་ཟེར༔ མང་མའི་ལྷག་མ་ནི་བཙོག་ལྷག་ཡིན་པས་བསྡུས་ཏེ༔ ལྷག་མའི་ཆོ་ག་བྱ་སྟེ༔ སློབ་དཔོན་གྱིས་ལག་པ་གཉིས་མཐེབ་མཛུབ་ལུ་གུ་རྒྱུད་དུ་སྤེལ༔ གུང་མོ་གཉིས་རྩེ་གཏུགས་ལག་པ་ནོར་བུ་མཁའི་གསང་གི་ཕྱག་རྒྱའི༔ ནང་ནས་ཚོགས་ཆང་གི་ཁ་ཕྲུ་བཏབ་སྟེ་བྲན༔ དེའི་སྟེང་དུ་སྔོན་བཞག་པའི་ཕུད་ལྷག་བསྲེས་ལ༔ མི་རྐང་གི་གཟར་བུས་རཀྟ་གཏོར་ཏེ་དམར་པོ་བྱས་ཤིང་༔ སྒྲུབ་ཆེན་དུས་སོགས་ཡིན་ན༔ མཆོད་གཡོག་པ་དང་རྣལ་འབྱོར་པ་མང་པོ་རྣམས་
ཀྱིས་སྔགས་ཆས་གྱོན་ལ༔ དཀྱིལ་འཁོར་ལ་བསྐོར་ཞིང་འཆམ་སྟབས་དང་བསྟུན་ཏེ༔ དབྱངས་རོལ་མོ་དང་བཅས་པ་བྱ༔ ཡེ་ཤེས་འཇིག་རྟེན་ཀུན་གྱི་ཐུགས་སྲོག་ཧཱུྃ་ཞེས་བརྗོད་པས༔ ཆོས་ཀྱི་དབྱིངས་སྟོང་ཉིད་རོལ་པ་ཆེན་པོ་གཟུགས་དང་དངོས་པོ་མེད་པ༔ ནམ་མཁའ་གཡའ་དག་པ་ལྟ་བུའི་ངང་ལ༔ རིག་པའི་རང་རྩལ་སྤྲུལ་པའི་ཁྲོ་རྒྱལ༔ དྲག་པོའི་དཀྱིལ་འཁོར་ཆེན་པོ་ནམ་མཁའ་ལ་འཇའ་ཤར་བ་ལྟ་བུར་གསལ༔ དེ་ལྟར་སྣང་སྟོང་ཟུང་འཇུག་གི་བསྐྱེད་རིམ་གསལ་བས་སྣང་སྲིད་འཁོར་འདས་ཐམས་ཅད་ང་ཡི་དབང་དུ་འདུས་ཏེ༔ ང་ནི་ལམ་དུས་ཀྱི་ཆེ་མཆོག་ཧེ་རུ་ཀ་དངོས་ཡིན་ནོ༔ ཞེས་ང་རྒྱལ་བསྐྱེད་ནས༔ ལྷག་མ་ལ་དབང་བ་ཐམས་ཅད་ཁྲོམ་ལྟར་འཁྲིགས་པར་བསམ་སྟེ༔ དེ་དག་ལ་ཚོགས་ཀྱི་དོན་དང་དགོས་ཆེད་བཤད་པ་ནི༔ དང་པོ་ཚོགས་ཕུད་ཀྱི་མི་མཆོད་མི་རུང་པ་མཆོད་པའི་རྒྱུ་མཚན༔ བཅོམ་ལྡན་འདས་གུ་རུ་དྲག་པོའི་ལྷ་ཚོགས་ཐམས་ཅད་ཕུད་ལ་དབང་ཞིང་ཕུད་ལ་དགྱེས་སོ༔ བར་དུ་ལྷ་ལ་ཕུལ་བའི་ལྷག་མ་མི་རྣམས་ཀྱི་ཕུད་ལྷག་དེས་མི་མཆོད་མི་རུང་པར་མཆོད་པའི་རྒྱུ་མཚན་ནི༔ ཡེ་ཤེས་ཀྱི་ཆོས་སྐྱོང་སྲུང་མ་དམ་ཅན་རྒྱ་
མཚོ་རྣམས་ཕུད་ལྷག་དེ་ལ་དགྱེས་སོ༔ བཙོག་ལྷག་མང་མའི་ལྷག་མ་ལ་ཁ་ཆུས་མི་བྲན་མི་རུང་བར་བྲན་པའི་རྒྱུ་མཚན་ནི༔ འཇིག་རྟེན་གྱི་དཔའ་བོ་མཁའ་འགྲོ་དེ་དག་དང་༔ རྣལ་འབྱོར་པ་བདག་དང་དམ་ཚིག་གཡར་དམ་གཅིག་སྟེ༔ གསང་སྔགས་ཀྱི་ལམ་འདི་ལ་བརྟེན་ནས༔ སངས་རྒྱས་ཐོབ་འདོད་པ་མཉམ་པའི་ཕྱིར་རིགས་མི་གཅིག་ཀྱང་དམ་ཚིག་གཅིག་པའི་མཆེད་གྲོགས་ཡིན༔ སྐྱེ་བ་མཐོ་དམན་མཉམ་ཞིང་ཡིད་མཐུན་པ་རྣམས་ཆང་ལྟར་འཐུང་བྱེད་པ་ལྟ་བུའོ༔ ལྷག་མགྲོན་འདི་དག་ཕལ་ཆེ་བ་ནི༔ ཤ་ཟ་དང་འབྱུང་པོ་ནད་བདག་རིམས་བདག་གདུག་པ་ཅན་རྣམས་ཡིན་ཀྱང་༔ དཀྱིལ་འཁོར་གྱི་མཐའ་མར་མི་བཞག་པར་མི་རུང་བར་འཛག་པའི་རྒྱུ་མཚན་ནི༔ ཡེ་ཤེས་ལྷའི་བྲན་གཡོག་ཕོ་དང་གཡོག་མོའི་ཚུལ་དུ་གནས་པ་ཡིན་ནོ༔ གུ་རུ་དྲག་པོའི་བཀའ་ཉན་ཅིང་གང་བཅོལ་གྱི་ལས་ཐོགས་པ་མེད་པར་བྱེད་པའི་ལྷག་མགྲོན་གྱི་ཚོགས་ནི་འདི་ལྟ་སྟེ༔ དཀྱིལ་འཁོར་གྱི་མཐའི་ཤར་ལ་སོགས་པའི་དུར་ཁྲོད་བརྒྱད་དུ་ཡང་གནས་ཤིང་༔ རྒྱ་གར་དང་ཨོ་རྒྱན་ཡུལ་གྱི་དུར་ཁྲོད་བརྒྱད་ལ་བརྟེན་བཅས་ཏེ་ཚོགས་མཆོད་གང་དུ་བྱས་པའི་ཕྱོགས་
མཚམས་བརྒྱད་ནས་འོངས་ནས་གཏོར་མ་ལེན་ཏེ༔ ཤར་གྱི་ཕྱོགས་ཀྱི་ལྷག་གཏོར་ལེན་མི་ནི༔ རྡོ་རྗེ་རིགས་ཀྱི་མཁའ་འགྲོའི་ཚོགས་དང་མཁའ་འགྲོ་མ་བྱེ་བ་འབུམ་སྡེ༔ ལྷོའི་ཕྱོགས་ཀྱི་ལྷག་གཏོར་ལེན་མི་ནི༔ རིན་ཆེན་རིགས་ཀྱི་མཁའ་འགྲོའི་ཚོགས་དང་མཁའ་འགྲོ་མ་བྱེ་བ་འབུམ་སྡེ༔ ནུབ་ཀྱི་ཕྱོགས་ཀྱི་ལྷག་གཏོར་ལེན་མི་ནི༔ པདྨ་རིགས་ཀྱི་མཁའ་འགྲོའི་ཚོགས་དང་མཁའ་འགྲོ་མ་བྱེ་བ་འབུམ་སྡེ༔ བྱང་གི་ཕྱོགས་ཀྱི་ལྷག་གཏོར་ལེན་མི་ནི༔ ལས་ཀྱི་རིགས་ཀྱི་མཁའ་འགྲོའི་ཚོགས་དང་མཁའ་འགྲོ་མ་བྱེ་བ་འབུམ་སྡེ་སྟེ༔ དེ་རྣམས་ནི་གནས་ཉི་ཤུ་རྩ་བཞི༔ ཡུལ་སུམ་ཅུ་སོ་གཉིས༔ དུར་ཁྲོད་ཆེན་པོ་བརྒྱད་ལ་གནས་པའི༔ ཡེ་ཤེས་དང་ལས་ལ་གྲུབ་པའི་མཁའ་འགྲོ་དང་མཁའ་འགྲོ་མ་རྣམས་ཡིན་ཏེ༔ མདོ་དང་གཟུངས་རྣམས་ནས་མཁའ་འགྲོའི་གདོན་གསུང་པ་དེ་ཡིན་ཏེ་གདོན་གྱི་རིགས་སུ་གཏོགས༔ དཀྱིལ་འཁོར་གྱི་ནང་དང་ལུས་ལྷར་བཀོད་པའི་མཁའ་འགྲོ་ནི་ཡེ་ཤེས་ཀྱི་མཁའ་འགྲོ་སྡེ་ལྔ་ཡིན་ཏེ༔ མིང་དང་ཆ་ལུགས་གཅིག་ཀྱང་དོན་མི་གཅིག༔ འོན་ཀྱང་ཡེ་ཤེས་པ་རྣམས་ཀྱིས་འཇིག་རྟེན་པ་དེ་རྣམས་བྱིན་གྱིས་བརླབས་པས་དེའི་
རིགས་ཐོབ་པའམ༔ བྱིན་གྱིས་བརླབས་པའི་སྤྲུལ་པར་འཇོག་པ་ཙམ་ཡིན་ཏེ༔ དཔེར་ན་ཡེ་ཤེས་ཀྱི་སྒྲོལ་དཀར་ཡིད་བཞིན་འཁོར་ལོ༔ འཇིག་རྟེན་གྱི་སྒྲོལ་དཀར་བཀྲ་ཤིས་ཚེ་རིང་མ༔ ཡེ་ཤེས་ཀྱི་སྒྲོལ་སྔོན་སེང་ལྡེང་ནགས་ཀྱི་སྒྲོལ་མ༔ འཇིག་རྟེན་གྱི་སྒྲོལ་སྔོན་རྡོ་རྗེ་གཡུ་སྒྲོན་མ་ཡིན་པ་ལྟ་བུའོ་གིང་དང་ཞེས་པ་ཡེ་ཤེས་ཀྱི་གང་དཔའ་བོ་སྡེ་བཞི་ནི༔ དཀྱིལ་འཁོར་གྱི་ནང་ན་བཞུགས་པ་དྲག་པོ་སྡེ་བཞི་དང་དོན་གཅིག་པ་དེ་འདི་ཡིན༔ ལས་ཀྱི་གིང་བཞི་ནི་རྒྱལ་ཆེན་སྡེ་བཞི་དང་ངོ་བོ་གཅིག༔ འཇིག་རྟེན་གྱི་གིང་ནི་སྲོག་བདག་གཤིན་རྗེ་བཙན་བདུད་རྣམས་ཡིན༔ ལང་ཀ་ནི་དུར་ཁྲོད་ལ་གནས་པའི་སྲིན་པོ༔ དུར་ཁྲོད་བདག་པོ་ཀེང་རུས་ཀྱི་གཟུགས་ཅན༔ ཀེ་སེང་དབང་ཕྱུག་རྣམས་ནི་ཞི་ཁྲོའི་འཁོར་དང་དོན་གཅིག༔ སྡེ་བརྒྱད་ནི་སྡེ་བརྒྱད་ཀྱི་གཙོ་བོ་བརྒྱད་དེ་ངོས་བཟུང་ན༔ ཡར་ལྷ་ཤམ་པོ༔ ཆོས་རྒྱལ་སྲིད་པའི་རྒྱལ་མོ༔ རྐོས་རྗེ་དྲང་དཀར་ཡམ་ཤུད་དམར་པོ༔ བེ་གར༔ གང་བ་བཟང་པོ༔ ཀླུ་བདུད་མགོ་དགུ་ལ་སོགས་པའམ༔ དཔལ་ཆེན་གྱི་བཀའ་ཉན་ཅིང་ལྷག་མི་སྡུད་པ་དེ་ཐམས་ཅད་དཔའ་བོ་མཁའ་འགྲོའི་
ཆ་ལུགས་སུ་འབྱུང་སྟེ༔ དབུ་སྐྲ་ཐོར་ཅོག་ལ་དར་གྱི་ཅོད་པན་པུ་རུ་རུ་རླུང་གིས་བསྐྱོད་པ༔ སྐུ་ལ་རུས་པའི་རྒྱན་ཆ་མང་པོ་དང་༔ རིན་པོ་ཆེའི་ཕྱག་གདུབ་ཞབས་གདུབ་རྣམས་ཁྲོ་ལོ་ལོ༔ དཔའ་བོའི་ཆ་ལུགས་རྣམས་གཡས་སྐོར་དུ་ཐབས་ཀྱི་བྲོ་བརྡུང་ཁྲིགས་སེ་ཁྲིག༔ དཔའ་མོའི་ཆ་ལུགས་རྣམས་གཡོན་སྐོར་དུ་གླུ་ལེན་ཀྱུ་རུ་རུ༔ དེ་ལྟ་བུའི་སྤྱོད་འགྲོས་ཀྱི་གནས་རི་བཟང་པོ་རྣམས་དང་༔ དུར་ཁྲོད་ཆེན་པོ་རྣམས་སུ་གསང་སྔགས་ཀྱི་སྤྱོད་པས་དུས་རྟག་ཏུ་རོལ་བ༔ ཚོགས་ཁང་འདི་ཡང་དུར་ཁྲོད་ཉམས་རེ་དགའ་བར་སྒོམ་ཞིང་བྱིན་གྱིས་བརླབས་པའོ༔ གོས་བཟང་པོ་ཞིང་ལྤགས་ཀྱི་གཡང་གཞི་དང་༔ སྟག་ལྤགས་ཀྱི་ཤམ་ཐབས་རྣམས་བརྗིད་རེ་ཆེ༔ ཞལ་སྐྱོགས་ནི་ཕོར་པའི་མིང་ཡིན་ལ༔ རང་བྱུང་གི་སྣོད་བཟང་པོ་བྷནྡྷ་མཚན་རེ་བཟང་སྟེ༔ ཐོད་པ་མཚན་ལྡན་ནི་མི་ཡི་ནོར་བུ་ཡིན་པའི་ཕྱིར༔ སྐྱེམས་བཟང་ནི་བཏུང་བ་བཟང་པོ་སྟེ་པདྨ་རཀྟས་བདེ་དྲོད་བསྐྱེད་པ་དང་༔ མ་ཧཱ་རཀྟ་སྟེ་བསྟན་དགྲའི་སྙིང་ཁྲག་འཐུང་བས་བསྟན་པ་རྒྱས་པ་དང་༔ རཀྟ་བཅུད་རེ་ཆེ་སྟེ་བརྡའ་དོན་མང་པོ་ཡོད་པའི་ཕྱིར་རོ༔ ཟས་བཟང་ཚྭ་ས་སྟེ་མི་ཤ་ཁྱི་ཤ་རྟ་ཤ་བ་གླང་གི་
ཤ་བྱ་ཤ་སྟེ༔ རོ་རེ་ཞིམ་པའི་ཤ་ཆེན་ལྔ་ནི་དངོས་གྲུབ་ལྔ་འབྱུང་བའི་རྫས་ཏེ་ལྕགས་ཀྱུ་ལྔ་ཞེས་བྱའོ༔ རྟག་ཏུ་རྒྱ་གར་གྱི་དུར་ཁྲོད་ཆེན་པོའི་གནས་བརྒྱད་རྣམས་ཉུལ་ཞིང་༔ ཚོགས་འཁོར་བསྐོར་ཏེ་དུར་ཁྲོད་དེ་རྣམས་སུ་འདུས་ཤིང་ཚོགས་པ་ཐམས་ཅད་ནི༔ དཔལ་ཆེན་ཧེ་རུ་ཀའི་བྱིན་རླབས་ཀྱིས་ལོག་པར་མི་ལྟུང་བ་ཆོས་ཉིད་ཡིན་པའི་ཕྱིར་རོ༔ ལྷག་སྡུད་ཀྱི་མགྲོན་དེ་རྣམས་གསང་སྔགས་ཀྱི་དམ་ཚིག་སྲོག་ལྟར་བསྲུང་ཞིང་ནམ་མཁའ་བར་སྣང་ལ་སྐར་མདའ་དང་རླུང་ལྟར་ཐོགས་མེད་དུ་འགྲོ་སྟེ༔ ལས་སུ་ནི་བསྟན་དགྲ་དམ་ཉམས་རྣམས་གསོད་པ་དང་གཅོད་པ་ལ་བརྩོན༔ ཟས་སུ་ནི་ཤ་ལ་དགའ་བ་དང་ཁྲག་ལ་དགྱེས་སོ༔ དེ་དག་འགའ་ཞིག་ནི་འཇིག་རྟེན་ལས་འདས་པའི་ས་ལམ་མཐོན་པོ་ཐོབ་ཀྱང་༔ འཇིག་རྟེན་པའི་ཚུལ་བཟུང་ནས་བསྟན་པ་སྲུང་བའང་ཡོད་ལ༔ འཇིག་རྟེན་རང་རྒྱུད་པ་རྣམས་ཀྱང་ཡང་དག་པའི་དོན་ལ༔ འགྲོ་དྲུག་ཡི་དམ་ལྷའི་ཡང་སྤྲུལ་དུ་གསུང་པའི་ཕྱིར༔ མ་འོངས་པའི་སངས་རྒྱས་ཀྱང་ཡིན༔ བསྟན་པ་སྲུང་ཞིང་རང་རང་གི་དམ་ཚིག་བསྲུང་བའམ༔ ཐབས་ཀྱིས་དྲག་པོའི་དགྲ་བགེགས་བསྒྲལ་བའི་ཕྲིན་ལས་མཛོད༔
དམ་རྫས་བརྒྱན་པའི་མཆོད་པ་ལྷག་གཏོར་འདི་བཞེས་ལ༔ ནད་གདོན་བར་ཆད་ཞི་བ༔ ཚེ་བསོད་དཔལ་འབྱོར་རྒྱས་པ༔ སྣང་སྲིད་དབང་དུ་འདུ་ལ༔ དྲག་པོ་མངོན་སྤྱོད་ཀྱི་ལས་ཀྱིས་དགྲ་བགེགས་ཚར་གཅོད་པ་སོགས༔ བདག་གི་གང་བཅོལ་བའི་ཕྲིན་ལས་འདི་མྱུར་དུ་འགྲུབ་པར་མཛོད་ཅིག༔ ཨོཾ་ནི་བསྐལ་བཟང་༔ བཛྲ་བྷི་ར་ཡོ་ཀི་ནི༔ རྡོ་རྗེ་འཇིགས་མ་རྣལ་འབྱོར་མ༔ དྷ་ཀ་དྷ་ཀི་ནི༔ མཁའ་འགྲོ་མཁའ་འགྲོ་མ༔ བ་ལིཾ་ཏ་གཏོར་མ་ཁ་ཁ་ཁཱ་ཧི་ཁཱ་ཧི༔ བྲོ་ཟོ་ཟོ་ཞིག་ཟོ་ཞིག༔ ཅེས་གཏོར་མའི་ལྷག་མ་ཕྱི་རོལ་གཙང་སར་སྤྱོགས་སེ་བླུག༔ དེའི་སྟེང་དུ་བཤལ་ཆུ་བླུགས་ལ་བཏང་ངོ་༔ ལྷག་མ་གཏོར་ན་འཐབ་མོ་འོང་༔ ས་མི་གཙང་སར་བླུགས་ན་ནད་རིམས་འོང་༔ ཕྱོགས་བརྩི་མ་འཕྲོད་ཀྱང་འགལ་བ་མེད༔ དེ་ནི་ཚོགས་མཆོད་བྱ་ཚུལ་ལོ༔ ཤ་ཆང་སོགས་མེད་ན་ཚོགས་ཕུད་རིམ་པ་གསུམ་དང་ལྷག་མ་སོགས་གཞུང་ལྟར་བྱས་ལ༔ ཚོགས་སྤེལ་རྒྱུ་མེད་པ་ནི་ལྷ་ཚོགས་ཞེས་བྱའོ༔ ཡང་ཚོགས་གཏོར་མེད་ཀྱང་གློ་བུར་དུ་ཤ་ཆང་སོགས་ལོངས་སྤྱོད་རྒྱུ་བྱུང་དུས༔ བྱིན་བརླབས་མ་བྱས་པའི་ཤ་ཆང་ལ་ལོངས་སྤྱོད་ནི་འདུལ་ཁྲིམས་ཞུས་པ་
ཡིན་ན་ལྟུང་བ༔ སྔགས་པ་ཡིན་ཀྱང་ཞག་གསུམ་བར་སྔགས་ཀྱི་ནུས་པ་ཉམས་པར་གསུངས་པས་བྲན་ལ་ཚོགས་བྱ་སྟེ༔ གཞན་འདོན་ལུགས་གཞུང་ལྟར་ལས་ལྷག་མ་གཙང་ལྷག་བཞག་ལ༔ ལྷག་མའི་སྔགས་ཁོ་ནས་བསྔོ་ཆོག་གིས་ཚང་མ་འདོན་མི་དགོས་སོ༔ ཞེས་ལྷག་མའི་གཏོར་མ་བཏང་ངོ་ཞེས་པའི་དོན་ནོ༔ དེ་ནས་གཏོར་མ་རྣམས་དཀྱིལ་འཁོར་ནས་གོམ་པ་བདུན་ཅུའི་སར་དཔག་ལ་ཞེས་པ༔ གཏོར་ཟློག་ལ་སོགས་པ་གཏོར་འབུལ་དུས་དེ་བས་ཉེ་ན་འཁོར་ལ་གནོད་པར་བཤད་པས་དེ་ཕུལ་ས་ཡིན་གྱི། དེ་ན་འགྲོ་ནི་འདོན་དགོས་པ་ཡང་མིན༔ ཕུད་དང་རཀྟ་ཕྱོགས་བཅུར་གཏོར་ཞེས་པ༔ ཕུད་ཕྱོགས་བཅུར་གཏོར་བ་ནི་གསེར་སྐྱེམས་ཡིན་ལ༔ རཀྟས་གཏོར་མ་ལ་བྲན་གྱིས་གཏོར་བ་ནི་མ་ཡིན་ནོ༔ དེ་ཡང་དཀར་གཏོར་དམར་གཏོར་གཉིས་བཤམས་ན་ལེགས་ཏེ༔ ཀླུ་ལ་སོགས་པ་དཀར་གསུམ་ལ་དགྱེས་པ་དང་༔ བཙན་བདུད་ལ་སོགས་པ་དམར་ལ་དགྱེས་པ་རིགས་གཉིས་ཡོད་པའི་ཕྱིར་རོ༔ རོལ་མོ་བསྒྲགས་ཤིང་འདི་སྐད་དོ༔ ཧཱུྃ་ཞེས་གདུག་པ་ཟིལ་གྱིས་གནོན་པའི་སྔགས་བརྗོད་ནས༔ དུས་གསུམ་ལས་སྔོན་གྱི་དུས་
བསྐལ་པ་བཟང་པོ་འདི་ལ་སངས་རྒྱས་སྟོང་འབྱོན་པའི་དུས༔ བཞི་པ་ཤཱཀྱ་ཐུབ་པའི་བསྟན་པའི་དཀྱིལ་སྐེད་ཙམ་དུ༔ བོད་ཁ་བ་ཅན་གྱི་ཡུལ་འདིར་སངས་རྒྱས་ཀྱི་བསྟན་པ་ཡོངས་རྫོགས་དང་པོ་བོད་ལ་བསྒྱུར་བའི་དུས་ལ༔ བོད་ཀྱི་ལྷ་འདྲེ་གདུག་པ་ཅན་རྣམས་ཀྱིས་བར་ཆད་བརྩམས་པས༔ འཇམ་དབྱངས་ཀྱི་སྤྲུལ་པ་བཙད་པོ་ཁྲི་སྲོང་ལྡེའུ་བཙན་གྱིས༔ རྒྱུ་གར་རྡོ་རྗེ་གདན་དུ་སློབ་དཔོན་པདྨ་འབྱུང་གནས་བཞུགས་པ་སྤྱན་དྲངས་པའི་བང་ཆེན་ལ་གསེར་ཕྱེ་མང་པོའི་སྐྱེས་དང་བཅས་པ་བཏང་བའི་ཚེ༔ ཨོ་རྒྱན་རིན་པོ་ཆེ་ཚུར་ཕེབས་ནས་བལ་ཡུལ་ཡང་ལེ་ཤོད་དུ་རྡོ་རྗེ་ཕུར་པའི་བསྒྲུབས་པ་མཛད༔ ཕུར་སྲུང་བཅུ་དྲུག་དམ་ལ་བཏགས༔ རྒྱ་གར་གྱི་ལྷ་འདྲེ་ཐམས་ཅད་ནི་སྔར་ནས་བསིལ་བ་ཚལ་ནས་དམ་ལ་བཏགས་ཚར༔ ཨ་སུ་རའི་བྲག་ཕུག་སོགས་སུ་བལ་ཡུལ་གྱི་ལྷ་འདྲེ་ཐམས་ཅད་བཏུལ་ནས༔ བོད་ཡུལ་གྱི་ཕྱོགས་སུ་ཕེབས་ཏེ༔ མང་ཡུལ་གྱི་ལ་ཁ་ནས་མར་བྱོན་པའི་ཚེ༔ བོད་ཀྱི་ལྷ་སྲིན་ཐམས་ཅད་རིམ་པར་དམ་ལ་བཏགས་ཤིང་བྱོན་ཏེ༔ བདག་ནི་རིག་འཛིན་ཆེན་པོ་པདྨ་འབྱུང་གནས་དེ་དུས་བྱོན་པའི་དེའི་ཆོས་ཀྱི་གདུང་འཛིན་པའི་གདུང་འཛིན༔ རིག་པ་
འཛིན་པའི་རིག་འཛིན༔ བཀའ་ནས་བཀའ་རུ་བརྒྱུད་པའི་བཀའ་བརྒྱུད༔ རྗེས་སུ་སློབ་པའི་སློབ་བརྒྱུད༔ རྗེས་སུ་འབྲང་པའི་རྗེས་འབྲང་ཡིན་པས༔ སྔོན་སྡེ་བརྒྱད་དམ་ལ་བཏགས་པ་ལྟར༔ ད་ཡང་སློབ་དཔོན་ཁྱེད་ཀྱིས་ཏིང་ངེ་འཛིན་བསྒོམ་ཞིང་སྔགས་བཟླ་བ་སོགས་བྱེད་པས༔ སྡེ་བརྒྱད་གདུག་པ་ཅན་གྱི་བར་ཆད་ཀྱི་དབང་དུ་མི་གཏོང་འཚལ༔ བདག་དང་བསྲུང་བྱ་ལ་གདུག་པའི་སེམས་དང་ལྡན་པའི་སྡེ་བརྒྱད་ཐུལ་བར་མཛོད་ཅིག༔ ཅེས་གསོལ་བ་བཏབ་པ་ཙམ་གྱིས་བདག་མདུན་དྲག་པོའི་ཐུགས་ཀ་ནས༔ འོད་ཟེར་དམར་པོ་ཉི་མའི་ཟེར་ལྟ་བུ་རྩེ་མོ་ལྕགས་ཀྱུའི་དབྱིབས་ལྟར་གུག་པ༔ དཔག་ཏུ་མེད་པ་འཇིག་རྟེན་ཁྱབ་པར་འཕྲོས་པས་ལྷ་འདྲེ་ཐམས་ཅད་ཀྱི་སྙིང་ཁར་ཕོག་པ་ཙམ་གྱིས་སྔོན་གྱི་ཁས་བླངས་དམ་ཚིག་དྲན་ནས་སྐད་ཅིག་གློག་འགྱུ་བ་ཙམ་དུ་འདུས་ཏེ༔ དཀྱིལ་འཁོར་གྱི་མཐའ་དུར་ཁྲོད་ཀྱི་ནང་བར་ཁྱམས་དེར་ཁྲོམ་ཆེན་པོ་ལྟར་འཚོགས་ཏེ༔ ཐམས་ཅད་ཀྱིས་ལུས་ཐལ་མོ་སྦྱར་བས་དཔའ་བོ་ཆེན་པོས་ཅི་གསུངས་བཀའ་སྒྲུབ་པར་བགྱི་ཞེས་ཞུ་བ་འབུལ་བར་བསྒོམ༔ དེ་དག་གི་ཆ་ལུགས་ནི་བན་སྐྱེ་བུད་མེད་ཆས་བཟང་ཁྲོམ་
ལྟ་བུ་བསྒོམས་པས་འཐུས་ཏེ༔ དེ་དག་སོ་སོར་གང་ལ་གང་དགྱེས་ཀྱི་གཏོར་མ་དཀར་དམར་སོ་སོར་གསོལ་བས་ཤིན་ཏུ་མཉེས་པར་བསམ་དྲག་ལས་དུས་ཡིན་ན་བཀུག་གཞུག་གཅིག་བྱས་ལ༔ ངོ་བོ་དགྲ་བགེགས་ཀྱི་ཤ་ཁྲག་ལ་རྣམ་པ་སོ་སོའི་གང་ལ་ཅི་འདོད་ཀྱི་ལོངས་སྤྱོད་དུ་བསམས་ལ༔ གུར་དྲག་གི་ཆོས་སྐྱོང་གི་རྩ་བ་ཡིན་པས་ཞིང་སྐྱོང་ཡབ་ཡུམ་དང་༔ བཀའ་སྲུང་སྤུ་གྲི་མཆེད་གསུམ༔ གཏེར་སྲུང་དགེ་བསྙེན་སྨྱོ་ཁ་རྣམས་ཀྱི་བསྐུལ་པ་ཉུང་ངུ་རེ་འདོན་པའམ༔ མ་ལྕོགས་ན་སྔགས་བསྔོས་རེ་བྱ༔ ཨ་ཡ་མ་དུ་རུ་ཙ་ཤ་ན་ས་མ་ཡ་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ ལན་གསུམ་མམ་བདུན་གྱིས་བསྔོས་ནས༔ དེ་ནས་སྔོན་གྱི་དམ་བརྡར་བ་ནི༔ ཧཱུཾ་སྔོན་གྱི་བསྐལ་པ་ཞེས་སོགས་ནས༔ ཚིག་འབྲུ་དགུའི་དོན་ནི་སྔར་བཤད་པ་ལྟར་ཡིན་ལ༔ ཁྱེད་འདིར་བྱོན་གཏོར་ལེན་ལ་ཚོགས་པ་རྣམས་ཀྱང་༔ དེ་དུས་ཨོ་རྒྱན་ཕེབས་དུས་དམ་ལ་བཏགས་པའི་ལྷ་འདྲེ་རྣམས་ཀྱི་རིགས་ཡིན༔ དེ་ཡང་ཁྱོད་ལྷ་འདྲེ་འགའ་ཞིག་ནི་བསྐལ་པ་འདི་མ་འཇིག་གི་བར་དུ་མི་འཆི་བ་ཡང་ཡོད་དེ། དཔེར་ན་ཀམ་པོ་རྡོ་རྗེ་དཔལ་བརྩེགས་བྱང་ཆུབ་སེམས་དཔའ་བསྐལ་པའི་ཚེ་ཅན་ཡིན་པར་
བཤད་པ་ལྟ་བུར༔ འགའ་ཞིག་ནི་སངས་རྒྱས་བྱམས་པའི་བསྟན་པ་མ་བྱུང་གི་བར་དུ་མི་འཆི་བ་ཡང་ཡོད་དེ༔ ཀླུ་སྔགས་བདག་བྱམས་པའི་བསྟན་པ་ལ་ས་དྲུག་པའི་བྱང་ཆུབ་སེམས་དཔར་སྐྱེ་བར་གསུངས་པ་ལྟ་བུ༔ འགའ་ཞིག་ནི་ཚེ་འཕོས་ཀྱང་ལུས་མི་བརྗེ་བ་ཡོད་དེ༔ བརྒྱ་བྱིན་སྔོན་མ་ཚེ་འཕོས་དུས་རྒྱབ་མའི་རྣམ་ཤེས་ཞུགས་པ་ལས་ལུས་མི་བརྗེ་བ་ལྟ་བུ༔ ཡང་ཚེ་འཕོས་ཀྱང་དེའི་སྤྲུལ་པའི་ཆ་ཤས་ཀྱིས་ལུས་རྙིང་པ་བཟུང་བ་ཡོད་དེ༔ དཔེར་ན་ཕྱག་རྡོར་གྱིས་ལྷ་དབང་ཕྱུག་ཆེན་པོ་བསྒྲལ་བའི་སྤྲུལ་པའི་ཆ་ཤས་ཀྱིས་ལུས་རྙིང་པ་བཟུང་ནས༔ སྡེ་བརྒྱད་ཀྱི་དཔོན་བྱེད་པའི་ཚུལ་ལྟ་བུ་དང་༔ ཨོ་རྒྱན་སྲིན་ཡུལ་དུ་ཕེབས་ནས་ལོ་བདུན་བརྒྱ་ནས་མཁའ་རི་སྨྱོ་ཁ་གཉིས་ཚེ་འཕོས་ཏེ་རྔ་ཡབ་གླིང་དུ་སྲིན་པོའི་བུར་སྐྱེ་བར་བཤད་ཅིང་༔ ལོ་བདུན་བརྒྱ་རེད་རྟིང་པདྨ་གླིང་པ་མཁའ་རིའི་གདན་དྲངས་ནས་བསྙེན་བཀུར་བྱས་པའི་ལོ་རྒྱུས་བྱུང་བས༔ དེ་ཡང་སྤྲུལ་པའི་ཆ་ཤས་ཀྱིས་ལུས་བཟུང་བར་འདུག༔ ལྷ་འདྲེ་ཆེ་རིམ་རྣམས་ནི་རྒྱལ་ཆེན་སྡེ་བཞིའི་འཁོར་དུ་གཏོགས་པས༔ མིའི་ལོ་བཅུ་གཉིས་ལ་རྒྱལ་ཆེན་སྡེ་བཞིའི་ཞག་གཅིག་ཏུ་བརྩི་བའི་རང་ལོ་ལྔ་
བརྒྱ་ཚེ་ཚད་ཡིན་པས་མི་ལོ་ཁྲི་ཕྲག་དུ་མ་སྟེ་ད་རུང་ཡང་ཚེ་མ་འཕོས༔ ཚེ་འཕོས་པ་རྣམས་ཀྱང་དེའི་བུ་གཟུགས་དང་མིང་སྔོན་མ་འདྲ་བ་རེ་ཡོད༔ དེས་ན་ད་ལྟའི་ལྷ་འདྲེ་ཐམས་ཅད་ཀྱང་དེ་དུས་དམ་ལ་བཏགས་པའི་ལྷ་འདྲེ་དེ་དག་དངོས་སམ་དེའི་རིགས་རྒྱུད་ཡིན་པས༔ དེ་དུས་སློབ་དཔོན་ཆེན་པོ་པདྨ་འབྱུང་གནས་ཀྱིས༔ བཀའ་སྩལ་པའི་བཀའ་དེ་མ་བཅིག༔ སློབ་དཔོན་གྱིས་བཀའ་ཇི་སྐད་སྩལ་ཞེ་ན༔ སློབ་དཔོན་རྡོ་རྗེ་གྲོ་ལོད་ཀྱིས༔ ལྷ་སྲིན་ཀུན་ལ་བཀའ་ནན་གསུངས༔ ཕྱི་མ་མ་འོངས་དུས་དག་ཏུ༔ སློབ་དཔོན་པདྨ་འབྱུང་གནས་ཀྱི༔ མཚན་ཙམ་འཛིན་ཅིང་སྨོས་པ་ཡང་༔ ལྷ་སྲིན་གཏེར་སྲུང་ཐམས་ཅད་ཀྱི༔ གཡོ་སྒྱུ་མེད་ཅིང་གུས་ལྡན་པའི༔ སེམས་ཀྱིས་བླངས་ཏེ་སྤྱི་བོ་ཡི༔ གཙུག་ཏུ་བཞག་སྟེ་ཁུར་བར་བྱོས༔ དེ་ཡི་དགོས་པ་གང་ཡང་རུང་༔ མ་ལུས་རྫོགས་པར་བསྒྲུབ་པར་བྱོས༔ གལ་ཏེ་བཀའ་བཞིན་མ་བྱས་ན༔ ལྷ་སྲིན་ཁྱོད་ཀྱི་མགོ་ལུས་སྙིང་བཀའ་གཏུབ་དུམ་བུར་རྡུལ་མྱག་གྱུར་༔ ཡཀཱ་མེ་དབལ་ཁྲོ་བོ་ཡིས༔ སྙིང་ཁྲག་འཇིབས་ཏེ་འཐུང་བར་འགྱུར༔ ཕྱི་མ་རབ་ཏུ་ཚ་བ་སོགས༔ དམྱལ་བར་ལྟུང་སྟེ་འབོད་དོ་
ཞེས༔ བཀའ་སྩལ་རང་གིས་ཁས་བླངས་པའི་སྔོན་གྱི་ཐུགས་དམ་དྲན་པར་མཛོད༔ དམ་མནོས་བཞིན་དུ་དམ་ལ་འདུས༔ ཞེས་གསུངས་པ་ལྟར༔ དམ་རྫས་བརྒྱན་པའི་མཆོད་གཏོར་འདི་བཞེས་ལ༔ སྔོན་གྱི་ཐུགས་དམ་སློབ་དཔོན་གྱིས་གསུངས་བའི་བཀའ་དེ་དང་༔ ཁྱེད་རང་ལྷ་འདྲེ་རྣམས་ཀྱི་དམ་བཅས་པའི་དམ་ཚིག་དེ་ལས་མ་འདའ་བར༔ བདག་གིས་བཅོལ་བའི་ལས་འདི་མྱུར་མགྱོགས་སུ་སྒྲུབས་ཤིག༔ དེ་ལྟར་ཚིག་བདུན་པོ་དེ་འོག་མ་རྣམས་ལ་འགྲེས་ཡིན་པས་ཤེས་པར་བྱའོ༔ བྲེལ་བ་དུས་འགྲེས་མ་བཤང་བར་བཏོན་ཀྱང་དོན་ཚང་བར་འགྱུར་རོ༔ གཙང་གི་ཤང་འོ་ཡུག་གི་ཆུ་གཉིས་འདུས་པའི་དཀྱིལ་འཁོར་དུ༔ ཕ་ཝང་ལོང་བུའི་མཁར་དངོས་སུ་ཡོད༔ རི་ལ་དམ་ཅན་གྱི་སྐུ་རང་གྲུབ་ཡོད༔ སྤྱིར་རི་ལུས་མཚོ་སྙིང་ཆུ་མིག་སྲོག་ཅེས་བྱ་བ་སྟེ༔ ཆུ་མིག་ནི་ཤིན་ཏུ་གཉན་པ་ཡིན་ལ༔ ཁྱད་པར་གཙང་གི་གམ་པ་ཆུ་མིག་ཅེས་བྱ་བ་ཤིན་ཏུ་གཉན་ས་དེར༔ དགེ་བསྙེན་རྡོ་རྗེ་ལེགས་པ༔ དགེ་བསྙེན་སུམ་བརྒྱ་དྲུག་ར༔ དགེ་བསྙེན་ཉི་ཤུ་རྩ་གཅིག་རྣམས་དམ་ལ་བཏགས༔ གཙང་གི་རོང་གནུབས་ཀྱི་ཡུལ་གྱི་བྲག་དམར་
དང་༔ མངར་རི་རུ་ཐོག་བྲག་དམར་དང་༔ འཕན་ཡུལ་གྱི་སྒོ་མོ་བྲག་དམར་དང་དེར་དྲི་ཟ་ཕོ་མོ་དམ་ལ་བཏགས༔ མ་ཕམ་གཡུ་མཚོ༔ གཙང་ར་གཡུ་མཚོ༔ རྨ་རྐུང་ལུང་གཡུ་མཚོ༔ ཡར་འབྲོག་མཚོ་མོ་ཆེ༔ གནམ་མཚོ་འབྲུག་མོའམ་ཕྱུག་མོའི་ནང་ཤེད་དེར༔ སྲིད་པ་ཕོ་རྒྱུད་མོ་རྒྱུད་ཐམས་ཅད་དམ་ལ་བཏགས༔ འབྲོག་ཅེས་པ་ནི་བྱང་ཐང་གི་མིང་ཡིན་ཏེ༔ བྱང་ནམ་ར་མཆེད་བརྒྱད་ཅེས་ཀྱང་བྱ༔ ཐང་ལྷའི་རྒྱབ་ཕ་ཟད་དེར་ཡོད། འབྲོག་གི་ན་དམར་རྒོད་གོང་དེར་ལྷ་བཙན་གྱི་རིགས་ཐམས་ཅད་དམ་ལ་བཏགས། མ་དྲོས་ཀུན་གྱི་རྒྱ་མཚོ་ནི༔ མེ་གྲོའི་ཕུ་ན་མཚོ་ཆུང་ཞིག་ཡོད༔ དེར་བཀའ་གདམས་པའི་དགེ་བཤེས་འཆད་ཀ་བས༔ བྱམས་སྙིང་རྗེ་བསྒོམས་ནས་ཀླུ་དམ་ལ་བཏགས་ནས་གནས་དེ་ཕུལ་བས༔ མཚོ་བཀབ་པའི་སྟེང་ན་ལྷ་ཁང་བཞེངས༔ ཀླུའི་བླ་ཤིང་ཙན་དན་དཀར་པོའི་སྡོང་པོ་ཞིག་ཡོད་པ་སྐམ་ནས་ཆག་པའི་ཁེ་ཚེ༔ བཀྲ་ཤིས་ཁ་བཏགས་ཀྱིས་བཏུམ་ནས་ནང་རྟེན་གྱི་ཚུལ་དུ་ཡོད་ཟེར༔ དངོས་ནི་ཡིན་ཀྱང་དེང་སང་ལུང་པ་དེའི་མདའ་སྐྱི་ཤོད་གཙང་པོའི་མཚོ་ཁུག་ཆུ་འདུས་དེ་ཡིན་པར་བྱེད་ནས་ཆར་འབོད་སོགས་དེར་བྱེད་པ་
ཡིན་ཏེ༔ རི་ནི་རི་བོ་དགའ་ལྡན་གྱི་རི་དེ་ཡིན་པས༔ དེར་ཀླུའི་རྒྱལ་པོ་མ་དྲོས་དང་གཟི་ཆེན་གཉིས་བཞུགས་པའི་གནད་ཀྱིས༔ རི་དང་ས་ཕྱོགས་དེར་སྣུམ་བག་ཆགས་པ་ཡོད༔ དེར་ཀླུ་རིགས་ཐམས་ཅད་དམ་ལ་བཏགས༔ བསྐལ་པ་དང་པོ་དུས༔ མིའི་མིང་ལ་ཤད་བུ་དང་༔ ཤེད་བདག་དང་༔ ཤེད་ལས་སྐྱེས་དང་༔ སེམས་ཅན་དང་མི་རྣམས་རིམ་པར་འགྱུར་བ་ལྟར༔ ས་ཡི་མིང་ཡང་འགྱུར་བར་འདུག་སྟེ༔ རུ་དམ་ལུང་པ་ནག་པོ་དང་༔ རོ་ཧམ་ལུང་པ་ཁྲ་མོ་དང་༔ དེང་སང་ནི་རོག་སྟོམ་ཟེར༔ ཟིལ་ཁྲོམ་ཟེར་བའི་རི་གཉན་པོ་ཞིག་གི་རྒྱབ༔ བྱང་ཐང་ཞིག་ན་ཕ་བོང་མང་པོ་ལ་རྒྱ་ཡིག་དང་ཁྲོ་ཡི་ཐེལ་ཡོད་པའི་ཨོ་རྒྱན་གྱི་གཏེར་གནས་ཆེན་པོ་ཞིག་ཡོད་འདུག་པ་དེར་མ་ཡམས་ཐམས་ཅད་དམ་ལ་བཏགས༔ ཟིལ་ཕྲོམ་དེ་ལའང་ལྷ་མོའི་གཟུགས་ཤིག་ཡོད་འདུག་པས་མ་ཡམས་ཀྱི་རིགས་ཤིག་ཡིན་པར་འདུག༔ བསིལ་མ་ནི་གཙང་སེལ་མ་ལ༔ གཙང་གི་གངས་དཀར་ནི་ཇོ་མོ་གངས་དཀར་ཏེ༔ དེར་ཨོ་རྒྱན་གྱི་སྒྲུབ་གནས་ངོ་མཚར་ཅན་ཞིག་ཡོད༔ དེ་རུ་སྨན་དང་ལྷ་སྨན་ཐམས་ཅད་དམ་ལ་བཏགས༔ གཙང་གི་ཇོ་མོ་ཁ་རག་གང་
གི་ལྷོ་ཕྱོགས་དེར༔ ཨོ་རྒྱན་གྱི་སྒྲུབ་གནས་ཡོད་པ་དང་དེའི་གནས་ཞིག་གུང་ཐང་ཁ་ལ་རོང་སྒོ་ཞེས་བྱ་བ་ཡོད་པ་དང་༔ དེ་ཡི་གནས་ཕྲན་ཞིག་རྫ་སྟོད་ན་ཁ་ལ་རོང་སྒོ་ཟེར་བའི་ཨོ་རྒྱན་གྱི་གཏེར་གནས༔ ཨོ་རྒྱན་གྱི་ཞབས་རྗེས་དང་༔ དམ་ལ་བཏགས་དུས་བརྟན་མ་རྣམས་ཀྱི་ཞབས་རྗེས་མང་པོ་ཡོད་པ་ཞིག་ཡོད་པ་དེར༔ བརྟན་མ་བཅུ་གཉིས་དམ་ལ་བཏགས༔ གཙང་གི་ཁ་རགོ་དཔུང་གངས་དང་༔ ཧ་འོ་གངས༔ ལྷ་རྒོད་གངས་སོགས་གངས་ཉི་ཤུ་རྩ་གཅིག་རྣམས་དེར༔ འབྲོག་གནས་ཐམས་ཅད་དམ་ལ་བཏགས༔ བསམ་ཡས་དབུ་རྩེ་རིམ་གསུམ་དང་༔ ཡར་ལུང་ཤེལ་བྲག་དང་༔ མཆིམས་ཕུ་དང་༔ ཏི་སྒྲོ་བྲག་དང་༔ ཀོ་བ་བྲག་རྣམས་དེར་རྒྱལ་བསེན་ཐམས་ཅད་དམ་ལ་བཏགས༔ འགོས་གྱི་གླུ་བ་རྐང་གཅིག་ནི་ལོ་ཙཱ་བ་འགོས་ཀྱི་ཡབ་ཡུམ་གླ་བ་རྐང་གཅིག་དངོས་ནི་དེར་ཡོད་འདུག༔ ཤིང་གླ་བའི་སྡོང་པོ་ཆེན་པོ་རྐང་གཅིག་ཁེར་སྐྱེས་ཤིག་ཡོད་རྒྱུར་སྣང་༔ དེའི་གནས་འདྲ་ཞིག་འདན་གྱི་གླ་བ་རྐང་གཅིག་ཨོ་རྒྱན་གྱི་སྒྲུབ་གནས་ཀྱང་ཡིན་པའི་གཉན་པོ་ཞིག་ཡོད༔ རྟོགས་ལྡན་བཟང་པོ་མ་གཏོགས་དེར་འདུག་མི་ཕོད༔ ཆོ་འཕྲུལ་ཆེན་པོ་འོང་
བ་ཞིག་ཡོད་ཟེར༔ རི་བོ་ཆེའི་འོག་འདི་ན་ཝ་སྦེ་ཐེའུ་རང་རྐང་གཅིག་ཟེར་བའི་རི་གཉན་པོ་ཞིག་ཡོད་པ་དེ༔ ཁོ་རང་ཚོས་གླ་བ་རྐང་གཅིག་ཡིན་པར་བྱེད༔ ནམ་མཁའ་མཛོད་ཀྱི་བྲག་ཕུག་དང་ཡང་དོན་གཅིག་པར་འདོད་པས༔ ཡེལ་ཕུག་མདུན་མཛོད་ཅེས་བྱ་བའི་གཏེར་གནས་ཤིག་ཡོད་པ༔ དེ་ནམ་མཁའ་མཛོད་ཀྱི་བྲག་ཕུག་ཡིན་པར་འབྲི་གུང་བས་གསུངས་འདུག༔ ཚ་བའི་སྨད་དངུལ་ཆུའི་ཕར་ཀ༔ སྤོ་བོ་ལུང་པའི་ཚུར་རྒྱབ་མངར་སྒང་༔ དེར་ཨོ་རྒྱན་གྱི་སྒྲུབ་གནས་ནམ་མཁའ་མཛོད་ཀྱི་བྲག་ཕུག་ཤིན་ཏུ་ཆེ་བ་དཀྱིལ་འཁོར་མར་ཕུབ་རང་བྱོན་དང་ཞབས་རྗེས་མང་པོ་ཡོད་ས་དེར༔ ཐེའུ་རང་ཐམས་ཅད་དམ་ལ་བཏགས༔ གཞན་ཚིག་བདུན་པོའི་དོན་སྔར་ལྟར་ཡིན་ལ༔ ད་ལྟ་ནི་བདག་གི་དབང་ལུང་གདམས་པ་ཐོབ་ཅིང་དམ་ཚིག་དང་ལྡན༔ ལུས་ལྷའི་སྐུར་གསལ་ངག་སྔགས་བཟླས༔ སེམས་ཏིང་ངེ་འཛིན་འཆང་བའི་དམ་ཚིག་འདི་མ་བཀྲལ༔ ངས་ཁྱེད་ཅག་ལ་གཏོར་མ་འབུལ་བར་དམ་བཅའ༔ ཁྱེད་ཅག་གིས་དམ་ཚིག་གི་རྫས་གཏོར་མ་ལེན་པར་ཁས་བླངས༔ དེ་ནས་བརྒྱན་གྱི་མཆོད་གཏོར་འདི་བཞེས་ལ༔ ཨོ་རྒྱན་གྱི་བཀའ་
བསྒོས་པ་བཞིན་དུ་ཕྲིན་ལས་སྒྲུབས་ཤིག༔ གཏོར་མ་བླངས་ནས་ཕྲིན་ལས་མ་བསྒྲུབས་ན༔ གཏོར་མ་དེ་ཡང་དུག་ཧ་ལར་འགྱུར་ཞིང་སྡུག་བསྔལ་བསྐྱེད་ལ༔ ཕྲིན་ལས་བསྒྲུབ་ན་བདུད་རྩི་འགྱུར་ནས་ཁྱེད་ཅག་གཟི་བརྗིད་བསྐྱེད་པ་ཡིན་པས༔ བཀའ་དང་དམ་ལས་མ་འདའ་ཞིག༔ བདག་གིས་བཅོལ་བའི་ཕྲིན་ལས་མྱུར་མགྱོགས་སུ་འགྲུབ་པར་མཛོད༔ ཅེས་ཐ་ཚིག་གནད་ནས་བསྐུལ་ཞིང་ཆད་མདོ་བྱའོ༔ ཆད་མདོ་ནི་སྔོན་ཁ་མཆུ་གཏམ་པའི་ཡི་གེ་ཕྱིས་བཏོན་པ་ལྟ་བུ་ཡིན་ནོ༔ དེ་ནས་ཕྱིར་ལ་བརྟན་མ་སྐྱོང་སྟེ་ཞེས་པ་ནི༔ སྔོན་དུ་ཆད་མདོའི་གཏོར་མ་གཉིས་ཕུལ་ནས་དེ་ནས་གཏོར་སྣོད་ཆང་ཕུད་ཀྱིས་བཀང་ནས་འདོན་རྒྱུ་ཡིན་ཀྱང་༔ དེང་སང་ནི་གཏོར་མ་རང་ལ་འདོན་སྲོལ་དར༔ བྷོཋཞེས་མ་མོ་སྤྱིའི་སྲོག་སྙིང་ནས་བོས་ཏེ༔ འཇིག་རྟེན་སྤྱི་དང་འཛམ་བུ་གླིང་ཐམས་ཅད་སྐྱོང་བའི་ཕྱིར་འཛམ་གླིང་བརྟན་མ་བཅུ་གཉིས་ཟེར༔ ལྷ་མོ་རྫུ་འཕྲུལ་ཅན་འདི་དག་གི་བླ་མཚོ་རྒྱ་གར་ན་ཡང་ཡོད་ཅིང་༔ རྡོ་རྗེ་གདན་གྱི་སྲུང་མ་ཡིན་པར་ཇོ་བོས་གསུངས༔ བླ་རི་རྣམས་ནི་བོད་ན་ཡོད་པས༔ ཁྱད་པར་བོད་ཁམས་སྐྱོང་བར་མཛད་པའི་ལྷ་མོ་ཡིན་ཏེ༔ བརྟན་མ་བཅུ་
གཉིས༔ སྐྱོང་མ་བཅུ་གཉིས༔ ཡ་མ་བཅུ་གཉིས་དང་སུམ་ཅུ་སོ་དྲུག་ནི་དཔོན་མོ་འདྲ་འདྲ་ཡིན༔ དེ་དག་ལ་ལ་ནི་མཆེད་གསུམ༔ ལ་ལ་ནི་མཆེད་ལ༔ ལ་ལ་ནི་མཆེད་བདུན༔ ལ་ལ་ནི་མཆེད་དགུ་རེ་ཡོད་པ་དང་༔ དེ་དག་རེ་རེ་ལ་ཡང་འཁོར་བདུད་མོ་བཙན་མོ༔ གནོད་སྦྱིན་མོ་ཀླུ་མོ་སྨན་མོ་འབུམ་ཕྲག་རེ་རེ་ཡོད་དེ༔ མདོར་ན་གཞི་བདག་མོ་རིགས་དང་སྨན་རིགས་བསྟན་མའི་འཁོར་དུ་མ་གྱུར་པ་མེད་པ་ནི་གཡོག་མོ་ཡིན་ལ༔ དེའི་ནང་ན་ལས་ལ་རྒྱུག་མཁན་གྱི་གདུག་པ་ཅན་རེ་རེ་ཡང་ཡོད་དེ་ལ་ཐུགས་སྒྲུབ་སོགས་ལས་བྱང་གཞན་རྣམས་ལ་ནི༔ བདུད་མོ་བཞི་གནོད་སྦྱིན་མོ་བཞི་སྨན་མོ་བཞི་སྟེ་གོ་རིམ་ཡོད་པ་ནི་བརྟན་མ་བཅུ་གཉིས་ཁོ་ནའི་དབང་དུ་ཡིན་ལ༔ འདིར་གོ་རིམ་མེད་པ་ནི་བརྟན་མ་བཅུ་གཉིས་རྐྱང་པ་མ་ཡིན་ཏེ༔ འདིར་ཀོང་ལྷ་ནི་ཀོང་བཙུན་དེ་མོ༔ གཙང་གི་ཁ་རག་ཁྱུང་བཙུན་མ༔ གངས་ཀྱི་ཡུམ་ཆེན་རྡོ་རྗེ་ཀུན་བཟང་མ༔ ཀླུ་མོ་གཟི་འབར་ནི་དབྱར་མོ་ཐང་གི་དབྱར་མོ་བསིལ་ཏེ༔ ཁྲི་ཤོར་རྒྱལ་མོའི་མཚོ་བདག་དེ་ཡིན༔ དེ་བཞི་པོ་ནི་བརྟན་མ་བཅུ་གཉིས་ཀྱི་གྲ་ཡིན༔ དཔལ་གནས་མ་དང་ཡང་དག་
ཤེས༔ མེ་སྟག་མ་ཟླ་འོད་མ་བཞི་པོ་སྐྱོང་མའི་གྲ་ཡིན༔ གཡུ་བུན་མ་ནི་ལྷོའི་སྤྱི་མཐིང་ཡ་མ་སྐྱོང་ཡིན་ལ༔ བྱང་རྒྱལ་མ་གསེར་ཐང་མ་ཤན་ཏིང་སྨན་བཞི་པོ་ནི་ཡ་མ་བཅུ་གཉིས་ཀྱི་གྲ་ཡིན༔ དེ་རྣམས་ལ་སོགས་པ་བརྟན་མ་སྐྱོང་མཛད་འཁོར་དང་བཅས་པ་སྨྲས་པས༔ དེ་ལྟ་བུ་སུམ་ཅུ་སོ་དྲུག་པོ་འཁོར་དང་བཅས་པ་ཚང་བ་ཡིན༔ ཁྱེད་རྣམས་སྔོན་དམ་ལ་བཏགས་དུས་དམ་ཚིག་གི་གཡར་དམ་བཅས་པ་ཡིན་ཏེ༔ སྔོན་ཨ་སུ་རའི་བྲག་ཕུག་སོགས་སུ་སློབ་དཔོན་ཆེན་པོ་པདྨ་ཐོད་ཕྲེང་རྩལ་དང་༔ སློབ་མ་མཐུ་ཆེན་གླང་ཆེན་དཔལ་སེང་གིས༔ དཀྱིལ་འཁོར་གྱི་མཐའ་ཞིང་ཆེན་བརྡལ་བའི་གདན་གྱི་སྟེང་དུ་རིག་འཛིན་རྣལ་འབྱོར་རྣམས་ཀྱི་ཚོགས་ཀྱི་གྲལ་དུ་བཞག༔ མ་འོངས་པ་ན་འབྲས་བུ་སངས་རྒྱས་པར་ཡང་ལུང་བསྟན༔ གསང་སྔགས་ཀྱི་དབང་ཟབ་མོ་རྣམས་བསྐུར་ཅིང་ཅོད་པན་སྤྱི་བོར་བཏགས༔ དབང་རྟགས་རྡོ་རྗེ་ཕུར་པ་ལག་ཏུ་གཏད༔ ལྕེ་ལ་དམ་ཚིག་བདུད་རྩི་བཞག༔ དམ་ཚིག་གཉེན་པོ་སྲུང་བའི་ཆོས་སྐྱོང་རྣམས་ཀྱི་གྲལ་དུ་བཞག་པ་ཡིན་པས༔ ད་རུང་ཁྱེད་རྣམས་འཇིག་རྟེན་ལས་འདས་པའི་གོ་འཕང་ནི་མ་ཐོབ་པས༔ ནམ་ཞིག་འཇིག་རྟེན་ལས་
མ་འདས་བར་དུ༔ སྔོན་ཚེ་ཞལ་གྱིས་བཞེས་པའི་དམ་ཚིག་ལ་གནས་བཞིན་དུ༔ དམ་རྫས་བཀའ་ཡི་གཏོར་མ་འདི་ལོངས་ལ༔ བདག་གིས་བཅོལ་བའི་ཕྲིན་ལས་མྱུར་དུ་འགྲུབ་པར་མཛོད་ཅིག༔ ཨོྃ་ནི་བཀྲ་ཤིས་པའི་སྔགས༔ ལོ་ཀ་ལོ་ཀི་ནི༔ འཇིག་རྟེན་འཇིག་རྟེན་མ༔ མ་མ་ཧྲིང་ཧྲིང་ནི༔ མ་མོའི་སྲོག་སྤྱན་དྲངས༔ ཨི་དམ་བ་ལི་ཏ་ནི་གཏོར་མ་ཟུངས༔ ཁ་ཁ་ཁཱ་ཧི་ཁཱ་ཧི་ནི༔ ཟོ་ཟོ་ཟོ་ཞིག་ཟོ་ཞིག༔ ཅེས་བརྗོད་ལ་སླར་གཏོར་གཞོང་བདུད་རྩིས་བཤལ་ཏེ་མཆོད་གྲུབ་ན་ལེགས༔ ཞེས་པ་ནི་ལས་བྱང་ཁ་རྐྱང་ཉམས་སུ་ལེན་ཚུལ་ཡིན་ལ༔ གཏོར་ཟློག་དང་རྡོ་ཟློག་དང་བྱབ་ཆོག་དང་རྣམ་རྒྱལ་འབར་བ་དང་༔ གྲིབ་སེལ་ཤེལ་གྱི་མེ་ལོང་སོགས་བྱེད་ན་ཡང་༔ ཚོགས་ཀྱི་སྐབས་སུ་སྦྱར་རྒྱུ་ཡིན་ཅིང་༔ ཕྱི་ནང་གསང་བ་ཡང་གསང་གི་སྒྲུབ་པ་དང་༔ གོ་ཆ་ལྷ་ལྔའི་སྒྲུབ་པ་སོགས་ལའང་ལས་བྱང་གིས་ཁོག་ཕུབ་སྟེ༔ མངོན་རྟོགས་བརྗེ་ཚུལ་ཟིན་བྲིས་སོ་སོར་བཀོད་པ་ལྟར་ཡིན༔ དེ་ནས་རྟ་བྲོ་ནི་ལས་བྱང་གང་རུང་ལྟར་བྱའོ༔ ཞེས་པ་རྒྱས་འདོད་ན་ཐུགས་སྒྲུབ་ལྟར༔ བསྡུས་པ་འདོད་ན་ཐུགས་རྗེ་ཆེན་པོ་གསང་འདུས་ལྟར་བྱ༔ ནང་
དུ་ལོག་ནས་ཚེ་འགུགས་ནི་རྒྱས་པར་འདོད་ན་ཚེ་སྒྲུབ་གསང་འདུས་ལྟར༔ བསྡུ་ན་ཐུགས་སྒྲུབ་ལྟར་བྱའོ༔ བཀྲ་ཤིས་དང་སྨོན་ལམ་ནི་ཐུགས་སྒྲུབ་ལྟར་བྱའོ༔ སྨོན་ལམ་གཞན་འདོད་ན་བདེ་སྨོན་སོགས་རྒྱས་བསྡུས་གང་རུང་བྱའོ༔ དེ་ནས་མདུན་བསྐྱེད་ཀྱི་ལྷ་ཡེ་ཤེས་པ་རྣམས་གཤེགས་པའམ་རྟེན་ལ་ཐིམ་པར་བསམ༔ དམ་ཚིག་པ་བདག་ལ་ཐིམ་པར་བསམ༔ བདག་བསྐྱེད་ཕྱི་སྣོད་གཞལ་ཡས་ཁང་དང་༔ ནང་བཅུད་ལྷར་གསལ་བ་དེ་བདག་བསྐྱེད་དཀྱིལ་འཁོར་ལ་ཐིམ༔ དཀྱིལ་འཁོར་རྣམས་འཁོར་ལ་ཐིམ༔ འཁོར་རྣམས་ཡུམ་ལ་ཐིམ༔ ཡུམ་ཡབ་ལ་ཐིམ༔ ཡབ་དབུ་ཞབས་ནས་འདུས་ཏེ་ཐུགས་ཀའི་ཧཱུཾ་ལ་ཐིམ༔ ཧཱུྃ་གྱེན་རྫོགས་སུ་ཡལ་ནས་ཉམས་ལེན་ཕྱག་རྒྱ་ཆེན་པོའི་ངང་ལ་བཞག༔ འདིའི་གཞུང་ནས་བདག་བསྐྱེད་ཀྱི་ཡེ་ཤེས་པ་གཤེགས་པར་མཛད་པ་ནི༔ ཆོ་ག་སྤྱིའི་ལུགས་ལྟར་ཡིན་ཀྱང་༔ བདག་བསྐྱེད་ཀྱི་ཡེ་ཤེས་པ་ནམ་ཡང་མི་གཤེགས་པ་ཕྱག་རྒྱ་སྒོ་བཅད་ཀྱི་སྒྲུབ་པ་རྙིང་མའི་ཟབ་ཁྲིད་ཡིན་པས་དེ་ལྟར་བྱའོ༔ དེ་ནས་སྟོང་པའི་ངང་ལས་ལུས་ལྷའི་དཀྱིལ་འཁོར་གཙོ་བོ་རྐྱང་པ་དམ་ཚིག་སེམས་དཔའ་ཞལ་གཅིག་ཕྱག་གཉིས་རྒྱན་
དང་ཕྱག་མཚན་མེད་པར་གསལ་བས༔ ལུས་ལ་རྡོ་རྗེའི་གོ་ཁྲབ་ཞུ་ལུབས་སུ་གྱོན་པར་བསམ་སྟེ༔ རྒྱུན་གྱི་རྣལ་འབྱོར་ཆོས་སྤྱོད་ལ་སོགས་སམ༔ བྱ་བ་གཞན་གང་དགོས་ལ་འཇུག་པར་བྱའོ༔ ཀྱེ་མ༔ དུས་ཀྱི་ཐ་མ་ལྔ་བཅུ་ཁ་རལ་དུས༔ སངས་རྒྱས་བསྟན་པ་དར་ལ་མ་སྨིན་པ༔ གསང་སྔགས་ཟེར་ཞིང་བཅོས་པའི་ཆོས་ཀྱིས་གང་༔ ཞེས་པའི་དོན་བཤད་ན༔ གཞན་ལ་ཟུར་ཟར་འགྲོ་བས་སྨྲ་མི་སྤོབས༔ ལྟར་སྣང་ལེགས་ཀྱང་གྲུབ་རྟགས་ཐོན་པ་མེད༔ དེ་འདྲའི་དུས་ན་རྒྱ་འགྱུར་མ་འཕྱུགས་པ༔ པདྨའི་ཐུགས་གཏེར་ཡིན་གྱིས་ཉམས་སུ་ལོངས༔ ཞེས་གསུངས་པའི་དོན་ནི༔ གཞན་ལས་འདི་ཟབ་ཅིང་ནུས་པ་ཆེ་བ་ཡིན་ཏེ༔ དྲག་པོ་ཁྲག་འཐུང་རོལ་པའི་རྩ་རྒྱུད་ལས༔ ཨ་ཙིག་མེ་དབལ་སྡེ་བརྒྱད་དང་བཅས་པའི་ལས་སྔགས་དེ་གསུངས་ནས༔ དེ་ལྟར་བསད་ན་སྡེ་བརྒྱད་འཆི༔ དེ་ལྟར་བསད་ན་སྡེ་བརྒྱད་བརླག༔ དེ་ལྟར་རྦད་ན་སྡེ་བརྒྱད་འགུམ༔ ཅིག་ཧཱུྃ་མ་ནིང་ཡེ་མགོན་ཡིན་ཀྱང་བསྒྲལ༔ ཏེ་རི་དུང་སྐྱོང་གཉིས་ཀྱང་འཆི༔ སྔགས་སྲུང་དེ་གར་རྣམས་ཀྱང་བརླག༔ གཟའ་གདོན་རྒྱལ་བསེན་སྨོས་ཅི་དགོས་ཏྲཀྴད་བེང་
མ་སྐད་ངན་འདོན༔ སྡེ་བརྒྱད་གུ་ལང་ར་ལྟར་གསོད༔ རྒྱལ་བསེན་དམ་སྲིན་ཕྱེ་མར་གཏོང་༔ ཁ་བ་ཅན་གྱི་དྲག་སྔགས་ལ༔ འདི་ཉིད་དོ་བ་མི་གདའ་འོ༔ ཞེས་གསུངས༔ རྩ་རྒྱུད་མན་ངག་གི་ཏན་ལས༔ ང་ཡི་མཐའ་རྒྱས་དྲག་སྔགས་ལ༔ སངས་རྒྱས་ཀྱིས་ཀྱང་ཚད་མི་ཟིན༔ ལས་ལ་སྟོང་ཕྲག་བཅུ་གཅིག་ཡོད༔ བནྡེ་བུ་ཆུང་བཀོལ་མི་ཟིན་༔ འཁོར་ལོ་ཁྲི་ཕྲག་བཅོ་བརྒྱད་ཡོད༔ བན་ཆུང་དཔུང་མེད་བཀོལ་མི་ཟིན༔ དྲག་སྔགས་བྱེ་བ་སོ་བརྒྱད་ཡོད༔ ཐོས་ཆུང་གསར་བུས་བསྲུང་མི་ཟིན༔ དམིགས་པའི་ལྷ་སྐུ་བརྗོད་ལས་འདས༔ དགེ་སློང་གསར་བུས་བསམ་མི་ཚར༔ ཅེས་གསུངས་སོ༔ གུ་རུ་དྲག་པོའི་དྲེགས་པ་སྙིང་འབྱིན་རྒྱུད་ལས༔ ལས་ཚོགས་མཐའ་རྒྱས་དེ་ལྟར་། ཏེ༔ གཞན་ལས་ཟབ་ཅིང་མྱུར་བར་འོང་༔ ཞེས་གསུངས༔ གུ་རུ་དྲག་པོའི་སྒོ་ནས་དགྲ་བགེགས་བསད་པ་རྣམས་ཀྱང་འདྲེན་པ་ཡིན་ཏེ༔ པདྨ་ཐོད་ཕྲེང་རྩལ་དང་་དྲག་པོ་ཁྲག་འཐུང་རོལ་པའི་རྩ་རྒྱུད་ལས༔ སེམས་ཅན་དོན་དུ་ལྷ་སྲིན་བཅོམ༔ སྡེ་བརྒྱད་ཁྱེད་རྣམས་སྙིང་རེ་རྗེ༔ རྗེས་སུ་བཟུང་བས་འདྲེ་ཡིན་ཀྱང་༔ མཐར་ཐུག་བདེ་བ་ཆེན་པོའི་
སྐུ༔ གཉིས་མེད་ངང་དུ་སངས་རྒྱའོ༔ ཞེས་གསུངས༔ ཁྲོ་རྒྱལ་སྟོབས་འདུས་ལས༔ མདོར་ན་ཁྲི་ཕྲག་གཅིག་གིས་དྲེགས་པ་སྡེ་བརྒྱད་ཐུལ་ཞིང་༔ སྐུ་གསུང་ཐུགས་ལ་འབུམ་ཕྲག་རེ་རེ་ནས་གསུམ་བཟླས་ན༔ མཆོག་ཐུན་མོང་གི་དངོས་གྲུབ་ཐོབ་ཅིང་༔ ཐོས་པ་དང་དྲན་པ་ཙམ་གྱིས་ཀྱང་ལྷ་སྲིན་བྲན་དུ་ཁོལ་ཞིང་ལས་བྱེད༔ སྤྲིངས་ཡིག་གིས་སྡེ་བརྒྱད་བཀའ་ལ་ཉན་པར་འགྱུར་རོ༔ ཞེས་དང་༔ སྲིད་གསུམ་ཟིལ་གནོན་ལས༔ དེ་ནི་ཚེ་འདི་ལ་བླ་མ་དྲག་པོའི་བྱིན་རླབས་བདག་དང་དབྱེར་མེད་དུ་གྱུར་ཏེ༔ མཆོག་ཐུན་གི་དངོས་གྲུབ་ཚེ་འདི་ཉིད་ལ་འཐོབ་པར་འགྱུར་རོ༔ ལུས་བརྗེས་རྣམ་ཤེས་འཕོས་མ་ཐག་ཏུ་ཨོ་རྒྱན་བདག་གིས་ལམ་སྣ་དྲངས་ཏེ༔ རྔ་ཡབ་པདྨ་འོད་ཀྱི་གཞལ་ཡས་སུ་རིག་འཛིན་རྣམས་ཀྱི་གཞི་འཐོབ་པར་འགྱུར་ཏེ་མི་བསླུ་བའི་ཐ་ཚིག་གོ༔ ཞེས་གསུངས་སོ༔ དྲག་པོའི་ཕྱི་སྒྲུབ་ལས༔ དྲག་པོའི་སྔགས་རྒོད་འདི་ཉིད་ལ༔ ཁྲི་ཚོ་གཅིག་བཟླས་ན་དྲེགས་པ་སྡེ་བརྒྱད་ཐུལ་བར་འགྱུར་རོ༔ འབུམ་ཕྲག་གཅིག་བཟླས་པར་འགྱུར་བ་ནི༔ མཆོག་གི་དངོས་གྲུབ་ཐམས་ཅད་ཐོབ་པར་འགྱུར་ལ༔ ལྷ་སྲིན་སྡེ་བརྒྱད་ཐམས་
ཅད་བཀའ་ཉན་སྲོག་སྙིང་འབུལ༔ ཅི་བཅོལ་དགོས་པའི་བཀའ་ཉན་པར་འགྱུར་ཏེ༔ མཐུ་དང་ནུས་པ་ཡོན་ཏན་བསམ་གྱིས་མི་ཁྱབ་བོ༔ ཞེས་དང་༔ དམིགས་པ་ངར་དང་ལྡན་པར་བྱས་ཏེ་བཟླས་པས༔ སྡེ་བརྒྱད་ཐམས་ཅད་ཐལ་བར་བརླག་པར་འགྱུར་ཏེ༔ བདག་མཐོང་བ་ཙམ་གྱིས་བརྒྱལ་བར་འགྱུར་རོ༔ ཞེས་དང་དྲག་པོའི་ནང་སྒྲུབ་ལས༔ འདི་ལ་འབུམ་ཕྲག་གཅིག་བསྙེན་ན་མཐུ་དང་ནུས་པ་པདྨ་ཧེ་རུ་ཀ་དང་མཉམ་སྟེ༔ ཀླུ་དང་རྒྱལ་བསེན་བཀའ་ཉན་དམ་ལ་འདུ་ཞིང་༔ ལྷ་སྲིན་སྡེ་བརྒྱད་བྲན་ལྟར་ཉན་པར་འགྱུར་རོ༔ ཞེས་དང་༔ ཡང་གསང་བླ་མེད་སྒྲུབ་པ་ལས༔ འབུམ་ཕྲག་བདུན་བཟླས་ན་མཆོག་གི་དངོས་གྲུབ་ཐོབ་ཅིང་༔ ཐུན་མོང་གི་དངོས་གྲུབ་ཐམས་ཅད་ཞོར་ལ་འགྲུབ་བོ༔ ཞེས་དང་༔ ཀུན་དྲིལ་ཡིད་བཞིན་ནོར་བུ་ལས༔ སུས་བསྒྲུབ་ཀྱང་བར་དོའི་ས་མཚམས་ནས༔ ཨོ་རྒྱན་རྗེའི་ཐུགས་རྗེས་མི་འཛིན་རེ༔ ཞེས་དབུ་བསྙུང་བཞེས་སོ༔ ཨོ་རྒྱན་ཐུགས་སྒྲུབ་དྲག་པོའི་སྒྲུབ་ཁོག་ལས༔ སྔགས་ཨ་ཙིག་གསུངས་ནས༔ ཞེས་པ་འབུམ་ཕྲག་གཅིག་ཏུ་བཟླས་ན༔ པདྨ་དངོས་དང་མཇལ་བར་འགྱུར༔ དང་པོ་
རྟགས་ནི་འོད་དང་མེ་ཆེན་འབར༔ ཉམས་དགའ་རིག་པ་འུར་བ་དང་༔ སྣང་བ་འགྱུ་དང་ཤེས་པ་འཕྱོ༔ དགའ་བྲོད་ལྷག་པའི་བསམ་པ་འབྱུང་༔ དེས་ནི་ཨོ་རྒྱན་ཐུགས་སྒྲུབ་ཀྱི༔ བྱིན་རླབས་སྙིང་ལ་ཞུགས་པའི་རྟགས༔ གཉིས་པའི་རྟགས་སུ་སྨྲ་བརྗོད་བདེ༔ ངག་བཙན་མགྲིན་པ་བདེ་བ་དང་༔ གསུང་མི་འགག་ཅིང་ཅིར་ཡང་སྨྲ༔ ངག་གི་ཚིག་ལས་གཞན་མི་འདའ༔ གླུ་ལེན་རྒོད་བྲོའི་ཉམས་འཆར་ཞིང་༔ མ་བསླབས་ཆོས་སྒོ་སྨྲ་བར་ནུས༔ སྒྲ་དང་བསྟན་བཅོས་རྩོམ་མཁས་ཤིང་༔ འཛིན་བཟང་སྨྲ་བདེ་ཤེས་རབ་རྣོ༔ དེ་ནི་ཨོ་རྒྱན་ཐུགས་སྒྲུབ་ཀྱི༔ བྱིན་རླབས་ངག་ལ་ཞུགས་པའི་རྟགས༔ གསུམ་པའི་རྟགས་སུ་གཟི་བརྗིད་ཆེ༔ ནད་མེད་ཚེ་རིང་གཞོན་ཤ་ཆགས༔ བཀྲག་ལེགས་མདངས་འཚེར་དབང་པོ་རྣོ༔ སྤྱན་གསལ་ཤ་རྒྱས་སྣུམ་པ་དང་༔ སྐྲ་དཀར་ནག་ཅིང་ཚེམས་དང་ལྡན༔ རླུང་གི་ཤུགས་ལྡན་རྐང་མགྱོགས་འགྲུབ༔ དྲེགས་པ་ཅན་རྣམས་ཟིལ་གནོན་ཞིང་༔ གཟུགས་མཛེས་གཞན་གྱི་ཡིད་དུ་འོང་༔ རྩལ་དང་ལྡན་ཞིང་སྟོབས་རྒྱས་འགྱུར༔ དེ་ནི་ཨོ་རྒྱན་ཐུགས་སྒྲུབ་ཀྱི༔ བྱིན་རླབས་ལུས་ལ་ཞུགས་
པའི་རྟགས༔ ཁྱད་པར་མཆོག་ལ་རྟགས་རྣམས་འབྱུང་༔ བག་ཆགས་བྱང་ཞིང་རྨི་ལམ་ཆད༔ འཁྲུལ་སྣང་བཟློག་ཕྱིར་འདི་ལྟར་འོང་༔ རང་བྱུང་ཡེ་ཤེས་ཤར་རྟགས་སུ༔ ལུས་ལ་ཉི་ཟླ་ཤར་བ་དང་༔ གཞན་དོན་འགྲུབ་རྟགས་ཚོང་དཔོན་བྱེད༔ ལྷ་སྲིན་སྡེ་བརྒྱད་བྲན་ཁོལ་རྟགས༔ དམག་ཚོགས་མང་པོའི་དཔོན་བྱེད་དང་༔ སེམས་ཅན་གཞན་དོན་འགྲུབ་རྟགས་སུ༔ ཆུ་བོ་ལས་སྒྲོལ་མཉེན་པ་བྱེད༔ མཆོག་དང་ཐུན་མོང་ཐོབ་པའི་རྟགས༔ མེ་ཏོག་དཀར་དམར་འཐུ་བ་དང་༔ མཁའ་འགྲོ་འགྲུབ་རྟགས་བུད་མེད་འདུ༔ དཔའ་བོ་འགྲུབ་རྟགས་སྐྱེས་པ་དགའ༔ སྒྲིབ་པ་བག་ཆགས་བྱང་བའི་རྟགས༔ རང་གི་ལུས་ལས་རྣག་ཁྲག་འཛག༔ བདུད་ཐུལ་རྟགས་སུ་ཁྱུང་ལ་ཞོན༔ ས་བཅུ་ནོན་རྟགས་གླང་ཆེན་ཆིབས༔ ཐར་ལམ་བགྲོད་རྟགས་ཟམ་པ་བཙུགས༔ འཁོར་བ་སྒྲོལ་ཕྱིར་ཆུ་ཆེན་སྒྲོལ༔ ཉོན་མོངས་ལས་ཐར་གངས་ལ་འཛེགས༔ གདེང་ཚད་ལྡན་ཕྱིར་ཆུ་བོ་བསྒྱུར༔ རིགས་ལྡན་བུད་མེད་ལུང་ཡང་སྟོན༔ རྨི་ལམ་པདྨའི་ཞལ་མཇལ་སོགས༔ གྲུབ་རྟགས་ལ་སོགས་རྨི་ལམ་འབྱུང་༔ དེ་ལྟར་འགྲུབ་པའི་རྟགས་མཐོང་ནས༔ དམ་ལ་
གནས་ཤིང་གཏོར་མ་བརྩོན༔ རྒྱུན་དུ་བཟླས་པས་སྒྲིབ་བྱང་ནས༔ བླ་མ་ཉིད་དང་འདུ་འབྲལ་མེད༔ དུས་གསུམ་རྒྱལ་བ་སྤྲིན་ལྟར་འདུ༔ མ་ཚོགས་མཁའ་འགྲོའི་བསྒོ་བ་ཉན༔ འབྱུང་པོ་དྲེགས་པ་བརྒྱལ་ཞིང་འབྲོས༔ ལྷ་སྲིན་སྡེ་བརྒྱད་བྲན་གཡོག་བྱེད༔ དེ་བས་དམ་ཅན་རྒྱ་མཚོའི་ཚོགས༔ ལུང་སྟོན་ཆོས་འཆད་ལེགས་ཉེས་སྨྲ༔ འདྲེ་གདོན་ཀུན་ལ་སྤྲིང་ཡིག་ཐེངས༔ དགྲ་བགེགས་གཉིས་ལ་ཁྲོས་པས་སྒྲོལ༔ ལོག་པར་ལྟ་བ་དྲན་པས་འདུལ༔ འདི་ལ་དངོས་གྲུབ་བརྗོད་མི་ལོངས༔ ཕྱི་མ་ཨོ་རྒྱན་ཡུལ་དུ་སྐྱེ༔ གུ་རུ་ཡབ་ཡུམ་བུ་བཞིན་སྐྱོང་༔ དེ་སོགས་ཡོན་ཏན་བསམ་མི་ཁྱབ༔ དངོས་གྲུབ་སྤྲིན་ལྟར་འཐིབས་པར་འགྱུར༔ འདི་ལས་ཟབ་པ་ཡོད་རེ་ཀན༔ དགྲ་ལ་རྣོ་ཞིང་བགེགས་ལ་མྱུར༔ སྒྲུབ་ཐག་ཉེ་ཞིང་དམ་ཚིག་སླ༔ རྫས་ཉུང་མཐུ་ཆེ་ཡོན་ཏན་མང་༔ འདི་དང་ལྡན་པའི་རྣལ་འབྱོར་ལ༔ ལྷ་སྲིན་རྣམས་ཀྱིས་སྲོག་སྙིང་འབུལ༔ འགྲོ་བ་མི་རྣམས་དབང་དུ་འགྱུར༔ བསོད་ནམས་ཆེ་ཞིང་བཀྲ་ཤིས་ཕྱུག༔ བསམ་པ་ཀུན་འགྲུབ་ཐེ་ཚོམ་མེད༔ གཞན་ཡང་ཐུགས་སྒྲུབ་འདི་དག་ནི༔ འགྲུབ་རྟགས་ཐེའུ་རང་
ལས་ཀྱང་མྱུར༔ སྟོབས་ནི་ཧེ་རུ་ཀ་ལས་ཆེ༔ སྒྲུབ་ཐག་ཉེ་ཕྱིར་སྔགས་ཁྲིས་འགྲུབ༔ སྟོབས་ཆེ་ཕྱིར་ན་ཡ་ཀི་ཡི༔ ཀུན་བཟང་ཡབ་ཡུམ་མན་ཆད་ཐུལ༔ རྣོ་ཚད་ཕྱིར་ན་མ་ཀི་ཡི༔ གྲོགས་རྒྱུན་ཐེའུ་རང་ལའང་ཕེབས༔ ཟབ་དང་མི་ཟབ་འགྲན་ཟླ་མེད༔ འདི་ཡི་ཐུན་མོང་དངོས་གྲུབ་ནི༔ བནྡེས་འདྲེ་བརྡུངས་བྱས་གྱུར་ཀྱང་༔ ཕྱི་མ་ཕྱག་རྒྱ་ཆེན་པོ་བརྙེས་འདི་འདྲའི་སྒྲུབ་པ་གཞན་ན་མེད༔ ཡོད་པ་ཨེ་འདུག་ལྟོས་ལ་གྱིས༔ སྒྲུབ་མྱུར་སྟོབས་ཆེ་འདི་འདྲ་དཀོན༔ ལས་སླ་དོན་ཆེ་འདི་འདྲ་དཀོན༔ རུ་ང་འཁུ་མེད་འདི་འདྲ་དཀོན༔ མཆོག་འགྲུབ་མཐུ་ཡོད་འདི་འདྲ་དཀོན༔ ཐུན་མོང་ལས་མེད་མཆོག་འགྲུབ་པའི༔ མཆོག་ཐུན་སྦྲག་པའི་སྒྲུབ་སྡེ་ནི༔ རྣལ་འབྱོར་སྐྱིད་འདོད་ཅན་གྱིས་ཉམས་སུ་ལོངས༔ སྔགས་འཆང་འདོད་ཁ་ཅན་གྱིས་ཉམས་སུ་ལོངས༔ བྱམས་སེམས་འགྲོ་དོན་ཅན་གྱིས་ཉམས་སུ་ལོངས༔ མཐུ་དགོས་ཆོས་འདོད་ཅན་གྱིས་ཉམས་སུ་ལོངས༔ བརྗེ་གྲགས་འདོད་ཅན་གྱིས་ཉམས་སུ་ལོངས༔ དད་ཅན་མོས་གུས་ཅན་གྱིས་ཉམས་སུ་ལོངས༔ ཚོགས་འདུལ་འཚོགས་པ་རྣམས་ཀྱིས་ཉམས་སུ་ལོངས༔ བསྲན་མེད་སྐྱིད་འདོད་ཅན་
གྱིས་ཉམས་སུ་ལོངས༔ ཁས་ཉེན་དགྲས་བརྙས་ཅན་གྱིས་ཉམས་སུ་ལོངས༔ དེ་དག་རྣམས་ལ་གཏེར་སྲུང་སྤུན་གསུམ་གྱིས༔ བཀའ་འདི་ཀློད་ལ་སྤེལ་ཅིག་ས་མ་ཡ༔ དམ་མེད་སྡིག་སྤྱོད་མཁན་ལ་ཤོར་ར་རེ༔ བློ་མང་དཀྲུགས་ཤིང་མཁན་ལ་ཤོར་ར་རེ༔ ལོག་ལྟ་སྐུར་འདེབས་མཁན་ལ་ཤོར་ར་རེ༔ རྣམ་རྟོག་ཐེ་ཚོམ་མཁན་ལ་ཤོར་ར་ར༔ ངན་པ་ལྐོག་སྨྲས་མཁན་ལ་ཤོར་ར་རེ༔ དམ་མེད་དཔེ་རྐུན་མཁན་ལ་ཤོར་ར་རེ༔ ཆོས་དྲེད་སྡིག་སྤྱོད་མཁན་ལ་ཤོར་ར་རེ༔ སློབ་མ་དམ་མེད་རྣམས་ལ་ཤོར་ར་རེ༔ དེ་རྣམས་ཀུན་ལ་མ་བསྟན་བཀའ་འདི་སྲུངས༔ སྐྱེས་བུ་ལེགས་རྩལ་སྤྱན་གསུམ་མ་གཡེལ་ཅིག༔ ཅེས་གསུངས༔ སྐལ་ལྡན་ལས་འཕྲོ་ཅན་དང་འཕྲད་ནས་ཀྱང་༔ ཞེས་པ་དངོས་བསྟན་ནི་རཏྣ་གླིང་པ་དང་འཕྲད་པའི་སྨོན་ལམ་ཡིན་ཀྱང་༔ ཤུགས་བསྟན་ནི་འདིའི་དཔེ་གང་ཞིག་གིས་མཐོང་ནས་དད་པ་སྐྱེས་ཏེ་ཉམས་སུ་ལེན་འདོད་ཆེན་པོ་བྱུང་བ་ནི༔ མཁའ་འགྲོའི་གཏད་རྒྱ་བརྒྱུད་པ་སྟེ༔ དེ་ཡང་སྐལ་ལྡན་ཡིན་པར་ཨོ་རྒྱན་དྲི་མེད་ཀུན་དགས་བཞེད༔ དེ་དང་མཐུན་པར་ཡེ་ཤེས་མཚོ་རྒྱལ་གྱི་གསུངས་ལས༔ མ་འོངས་གཏེར་
ལ་མོས་པའི་གང་ཟག་རྣམས༔ དེང་སང་གུ་རུའི་ཞལ་མཐོང་སྨོན་ལམ་བཏབ༔ ཐམས་ཅད་ལས་ཅན་ཡིན་པས་དགའ་བ་སྒོམས༔ ཁོ་མོའི་ཚིག་འདི་རིན་ཆེན་གསེར་ལས་དཀོན༔ ཞེས་གསུངས་པས༔ དེ་དུས་གཟུགས་ཅན་གྱི་འབུ་སྲིན༔ གཟུགས་མེད་ཀྱི་རྣམ་ཤེས་འཁྱམས་པོ་ཡན་ཆད༔ ཨོ་རྒྱན་རིན་པོ་ཆེའི་ཞལ་མཐོང་བ་ཞིག་མིན་ན་དེང་སང་གཏེར་ཆོས་ལ་ཞེ་ཐག་པ་ནས་བློ་གཏད་པ་ཞིག་མི་འོང་བ་ཡིན་ནོ༔ དེ་ལྟར་ལས་འཕྲོ་ཅུང་ཞིག་ཡོད་པ་ཞིག་དང་འཕྲད་ནས་ཀྱང་༔ མདོའི་བསྟན་པ་ནི་རྟགས་ཙམ་འཛིན་པ་ལ་ཉེ་ཞིང་༔ ལོ་ལྔ་བརྒྱ་ཕྲག་བཅུ་ལ་བསྟན་པ་མི་གནས་ཀྱང་༔ སྔགས་ཀྱི་བསྟན་པ་ནི་དེ་ལས་ཡུན་རིང་དུ་གནས་པ་དཔལ་དུས་ཀྱི་འཁོར་ལོའི་རྒྱུད་དང་༔ གྲི་གུག་བརྩེགས་པའི་རྒྱུད་ནས་བཤདི༔ དེ་ལྟར་སྤྱིར་མདོ་དང་སྔགས་གང་ལ་ཡང་ལྟར་སྣང་གི་བསྟན་པ་ཤིན་ཏུ་དར་ཏེ༔ སྲོང་བཙན་སྒམ་པོས༔ རྟགས་ཙམ་འཛིན་པའི་དུས་ན་ཡང་༔ བསྟན་པ་ཤིན་ཏུ་དར་བར་འབྱུང་༔ ཞེས་གསུངས་སོ༔ དེའི་ཚེ་སྒྲུབ་པ་ཚུལ་བཞིན་བྱེད་པ་དཀོན་ཞིང་༔ བྱས་ཀྱང་བསྒྲུབས་པའི་རྟགས་གཞུང་ནས་གསུངས་པ་རྣམས་ཐོན་པ་ནི་དཀོན་ཏེ་
ལྟར་སྣང་ལེགས་ཀྱང་བསྒྲུབས་རྟགས་ཐོན་མི་མེད་གསུངས་པའི་དོན་ནོ༔ དེ་ལ་ཚེ་ལོ་དྲུག་ཅུ་ནས་བཅུ་པའི་བར་དུ༔ ཀུན་ཏུ་བཟང་པོའི་ཐུགས་ཀྱི་བསྟན་པའི་དུས་ཡིན་པས༔ རྫོགས་པ་ཆེན་པོ་བསྒོམ་ན་གྲོལ་སླ་བར་རྫོགས་ཆེན་གྱི་རྒྱུད་རྣམས་ནས་བཤད་པ་དང་༔ ཨོ་རྒྱན་རིན་པོ་ཆེས༔ སངས་རྒྱས་བསྟན་འཇུག་ང་ཡི་གཏེར་གྱིས་སྐྱོངས༔ ཞེས་གསུངས་པ་ལྟར༔ འདི་ཉིད་ཚུལ་བཞིན་ཉམས་སུ་བླངས་བས་དུས་ཀྱི་མཐའ་ལ་ཡང་བསྐྱེད་རྫོགས་ལ་རྟགས་ཐོན་པའི་རྣལ་འབྱོར་པ་མང་པོ་འབྱུང་བས༔ གསང་སྔགས་མི་ནུབ་བསྟན་པའི་མཐའ་རྒྱས་ཤོག༔ ཅེས་ཨོ་རྒྱན་གྱིས་སྨོན་ལམ་བཏབ་ཅིང་༔ རཏྣའི་གཏེར་ཁ་རྣམས་སློབ་མ་བས་ཀྱང་ཡང་སློབ་རྗེས་སློབ་ཀྱི་དུས་སུ་བསྟན་པ་མཐའ་རྒྱས་སུ་འགྲོ་བར་ལུང་ཡང་བསྟན་ཏོ༔ མཁར་ཆུ་དཔལ་གྱི་ཕུག་རིང་ཨ་ཐོ་རྒྱ༔ ཞེས་པ་ནི་གཏེར་སྦས་པའི་ཚིག༔ རྒྱ་ཡིག་འདི་དག་ནི་བྲིས་པ་རྣམས་ཀྱི་རྒྱ་ཡིག་མི་ཤེས་པའི་སྟབས་ཀྱིས་ཅུང་ཞིག་མ་དག་པ་ཡང་འདུག་སྟེ༔ བརྡ་ཡིག དེ་ནི་ས་མ་ཡ་ཁ་ཐཾ༔ བྱགོཥཱ༔ དེ་ནི་མར༔ ག༔ དེ་ནི་གུ་ཧྱ༔ ཨྠྀི༔ ས་མ་ཡ་ནི་དམ་
ཚིག༔ ཁ་ཐཾ་ནི་སྣོད་མིན་ལ་གསང་དགོས་པའི་དོན༔ མན་ཏྲ་ནི་སྔགས་དེ་ཡིས་སྐྱོབ་པ༔ གུ་ཧུ་ནི་གསང་བ་སྟེ༔ གསང་སྔགས་གསང་བར་བསྔགས་པའི་དོན༔ ཨྠྀི༔ ནི་ཟབ་པའི་དོན༔ རྒྱ་རྒྱ་རྒྱ༔ ནི་སྐུ་གསུང་ཐུགས་ཀྱི་རྒྱས་བཏབ་ནས་གཏེར་དུ་སྦས་པའི་དོན༔ རྒྱ་ཞེས་པ་ནི་ཁ་རྒྱ་བྱས་ནས་ཐིལ་བརྒྱབ་པ་ལྟ་བུ་གཞན་གྱིས་ཀློག་དབང་མེད༔ བདག་པོས་ཁ་རྒྱ་བཀྲོལ་ནས་ཀློག་ཆོག་པ་ལྟར༔ ཆོས་རྒྱལ་རཏྣ་གླིང་པས་བྱི་བའི་ལོ་ལ་མཁར་ཆུ་དཔལ་གྱི་ཕུག་རིང་ནས་རྒྱ་བཀྲོལ་ཏེ་གདན་དྲངས་པའོ༔ ཤིན་ཏུ་གཉན་པའི་ཕྱིར་ལོ་བཅུ་ལ་བཀའ་རྒྱས་བཏབ་སྟེ་གཏེར་ཤོག་མ་ཕབ༔ བྱ་ལོ་ལ་བོད་ཀྱི་ས་བདག་རྒྱལ་པོ་གོང་མ་ཆེན་པོའི་ཕོ་བྲང་སྣེའུ་གདོང་དུ༔ ཤོག་སེར་ཞེང་འཁྱུད་གང་དཀྱུས་མཐོ་གསུམ་པ་ཞིག་ལ་འབྲུ་བཤུས་པའི་ཡི་གེ་པ་ནི་རྗེ་གཏེར་སྟོན་ཉིད་ཀྱི་སྲས་དབང་ཆེན་བཟང་པོའོ༔ རཏྣའི་གཏེར་ཤོག་འདི་རྣམས་རྒྱ་ཡིག་ཏུ་མེད་ཅིང་བོད་ཡིག་ཚེག་མེད་པ༔ བར་མཚམས་སུ་རྒྱ་ཡིག་ཀྱང་ད་ལྟའི་ཚིག་བསྟར་དུ་ཡོད་པས་ཕབ་སླ་ཞིང་རྒྱ་ཡིག་ཕབ་མ་ཐུབ་པའི་སྐྱོན་གྱིས་མ་དག་པ་ཟུར་ཙམ་ཡང་མེད་པ་ཡིན་སྐད༔ ཤོག་སེར་ནི་དམར་སེར་མདོག༔
ཤོག་བུ་ཤིན་ཏུ་འཐུགས་པས༔ ཡི་གེ་གར་ཡོད་ཀྱི་ཐད་ཀྱི་ཤོག་བུ་རྣམས་ཤིན་ཏུ་སྣུམ་ཕ་ལ་ལ་བྱེད་པ༔ དེང་སང་རཏྣའི་གཏེར་ཤོག་ཤོག་དྲིལ་རེ་རེ་ཞལ་ཕྱེས་ནའང་༔ སྤོས་དྲི་བཟང་པོས་ཁྱིམ་དེ་ཁྱབ་ནས་འོང་བ་ཞིག་འདུག་ཅེས་བདག་གི་སློབ་དཔོན་གྱིས་གསུངས༔ གཏེར་ཤོག་གི་དུམ་བུ་མཇལ་བ་ལ་ཡང་བོད་ཡིག་ཏུ་སྣང་༔ དེ་ནས་འདི་རྩོམ་པའི་དོན་ནི༔ ལག་རྩེད་དང་མཁས་འདོད་ཀྱིས་རང་གར་བྱས་པ་ནི་མ་ཡིན་ཏེ༔ རིག་འཛིན་ཆེན་པོ་ཀརྨ་འདུལ་བ༔ ཁོང་གིས་གུ་དྲག་སྔར་ནས་འགྲུབ་ཚར་བས་དེའི་འགྲེལ་པ་སོགས་དགོས་པ་མེད་ནའང་༔ ཕྱི་རབས་འདི་ལ་མོས་པའི་དགེ་བཤེས་གསར་བུ་དང་སྔགས་ཆུང་རྣམས་ལ་ཕན་པར་དགོངས་ནས་གལ་ཆེན་ནན་གྱིས་བསྐུལ༔ དེ་ཡང་འདི་བཀའ་གཉན་པའི་བཀའ་རྒྱ་བཀྲོལ་བའི་ཕྱིར་དང་༔ ཆོས་ལ་ཆེ་བ་མེད་ན་ཆོས་ཤི་བའི་རོ་དང་འདྲ་གསུངས་པའི་དོན་ལ་དགོངས་ནས༔ ཁོང་གི་མཆོད་རྟེན་མདའ་ཚད་ཙམ་འགའ་ཟུང་དངུལ་གྱིས་གཡོགས་པ་བཞེངས་པ་དང་༔ སངས་རྒྱས་སྟོང་སྐུ་ཁྲི་ར་ཅན་འབུར་དོད་ཚོན་བརྩི་དངུལ་སོགས་ལེགས་པར་གསོལ་བ་དང་༔ མདོ་འབུམ་བསྐལ་བཟང་
རྣམས་བརྒྱ་ཚར་རེ་ཀློག་པ་དང་༔ དེ་རྣམས་བླ་མ་དྲག་པོའི་དཀྱིལ་འཁོར་གྱི་ལྷ་ཚོགས་ལ་མཎྜལ་དུ་དམིགས་ནས་འབུལ་གྱིས༔ ལས་བྱང་མེ་རླུང་འཁྱིལ་པ་འདི་ལ་འབྲུ་འགྲེལ་ཞིག་དགོས་ཞེས་བཀའ་ཤོག་བྱུང་༔ ཁོང་ནི་དྲག་པོའི་པོད་གཞུང་ནས་ལུག་གི་ལོ་པ་དྲག་པོའི་བསྙེན་སྒྲུབ་ཚད་དུ་ཕྱིན་པ་ཞིག་འབྱུང་བར་ལུང་བསྟན་པ་ནི༔ ཁོང་ཡིན་པར་ངེས་ཏེ༔ དྲག་པོ་འདིའི་གསང་སྒྲུབ་འདི་ཁོ་ན་ལ་ངག་མཚམས་བསྡམས་ནས་ཨ་ཙིག་དུང་ཕྱུར་གཅིག་འགྲུབ༔ སླར་ཡང་དེའི་ངང་ནས་གསང་འདུས་ཡིག་བདུན་དུང་ཕྱུར་གཅིག་འགྲུབ༔ དེ་ལྟར་ལོ་ཉི་ཤུ་རྩ་ལྔ་ཙམ་ལ་སྐུ་མཚམས་ལ་ཡང་བར་ཆད་མ་བྱུང་བས༔ ཁོང་ཆོས་འདིའི་བདག་པོ་རིག་འཛིན་ཆེན་པོར་འདུག་པས་བསྐུལ་མི་བཟང་བ་དང་༔ ཁོང་ལ་དབང་འབྲེལ་ཞིག་ཞུས་ན༔ ལོ་བདུན་གྱི་བར་ཆད་སེལ་ཟེར་བའི་རྨི་ལམ་དུ་ལུང་བསྟན་ཡང་བྱུང་བས༔ གུ་དྲག་དང་གསང་འདུས་ཀྱི་དབང་རྒྱས་པ་ཁོང་ལ་ཞུ་ཝིག་བྱས༔ གཞན་ལུང་ཡང་འགའ་ཞིག་ཞུས་པའི་བླ་མ་ཡིན་པས༔ བླ་མའི་བཀའ་བཅག་མི་རུང་བའི་ཕྱིར༔ བཀའ་གཉན་པའི་བཀའ་རྒྱ་ཡང་དེས་གྲོལ་སྙམ་སྟེ་བརྩམས་པ་ཡིན༔ དེ་ལ་གཞུང་གི་
དོན་དང་ས་བཅད་དང་༔ ཚིག་གི་དོན་དང་༔ འབྲུའི་དོན་དང་༔ རང་ལུགས་བཞག་པ་དང་༔ གཞན་ལུགས་བཀག་པ་རྣམས་བྱས་ན༔ པོ་ཏི་ཆེན་པོ་འོང་ཞིང་ཡི་གེར་འཇིགས་པ་དང་༔ གསར་བུ་རྣམས་ཀྱིས་ཚར་གཅིག་ཀྱང་ཀློག་པར་ཡང་མི་ནུས་ན༔ ཉམས་སུ་ལེན་པར་ལྟ་ཅི་སྨོས༔ དེ་ལ་བརྡའ་རྙིང་པ་ལ་ཏི་ཀ་ཟེར༔ གསར་པ་ལ་ཊི་ཀ་ཟེར༔ ཡང་ཤོག་ལྡེབ་ངོས་རེ་ལ་གཞུང་གི་ཚིག་འབྲུ་བཞི་རེ་ཙམ་ཡི་གེ་དབུ་ཅན་དུ་བྲིས་ནས་དེའི་དོན་རྣམས་ཡིག་ཆུང་བྱས་ནས༔ ཚག་ཐོ་ཁྲིད་པ་ལ་མཚན་བརྒྱབ་པ་ཟེར༔ དེ་ལྟར་བྱས་ན་འབྲི་དཀའ་ཞིང་འདོན་མི་བདེ་བ་ཞིག་འོང་༔ དགོངས་འདུས་ཀྱི་གཞུང་ལས་ཨོ་རྒྱན་གྱི་ཞལ་གདམས༔ གསང་སྔགས་ཟབ་མོ་ལ་མཆན་དང་ཁྲི་ཀ་མ་རྩོམ་གསུང་འདུག་པས༔ དེ་གཉིས་མ་བྱས༔ དེ་གཉིས་མིན་པས་སྤྱི་བཤད་རྒྱས་པ་ལ་སྤྱི་དོན་ཟེར༔ དེ་བྱས་ན་གོ་བདེ་ཞིང་མང་ཉུང་མཚམས་པ་ཞིག་འོང་ཡང་༔ སྔོན་རབ་འབྱམས་པ་དཀར་པོ་ཝ་ཞེས་བྱ་བ་དང་པོ་ནས་མཚན་ཉིད་ལ་ཤིན་ཏུ་མཁས་པར་སྦྱངས་ནས༔ ཕྱིས་དགོངས་འདུས་ལ་མཁས་ཤིང་རྩ་རླུང་རྡོ་རྗེའི་དྲ་མིག་ལ་རྟགས་ཐོན་པས།
དཀར་ཆས་མཛད་པ་ཞིག་གིས༔ དགོངས་འདུས་ཀྱི་ལས་བྱང་མེ་ཏོག་ཕྲེང་མཛེས་ལ༔ སྤྱི་དོན་ལྡེབ་མ་བརྒྱ་ལྷག་ཙམ་ཞིག་བརྩམས༔ རྩོམ་ཤིན་ཏུ་ལེགས་པས༔ འབྲི་གུང་ཞབས་དྲུང་སོགས་ཀྱིས་ཐུགས་རྩིས་ཆེན་པོ་མཛད་སྐད་ཀྱང་༔ རྩོམ་ཚར་མ་ཐག་སྨྱུག་གྲི་ཟུགས་ནས་ཁོང་རང་འདའ་རྐྱེན་བྱུང་འདུག་པས༔ འདིར་ཡང་སྤྱི་དོན་མ་བྱས༔ འབྲུ་འགྲེལ་ནི་བཀའ་བརྒྱད༔ ཐུགས་སྒྲུབ་སོགས་ལ་སྔར་ནས་དར་འདུག་པ་དང་༔ གུ་དྲག་འདིའི་འབྲུ་འགྲེལ་ཞིག༔ གཏེར་སྟོན་ཉིད་ཀྱིས་མཛད་ནས་ཡོད་པ་ཐོས་ཀྱང་ཁམས་ཕྱོགས་སུ་མི་སྣང་༔ འདི་ལ་ཡང་བཤད་པའི་ལུགས་དང་ཉམས་ལེན་གྱི་ལུགས་གཉིས་ཡོད་དེ༔ གསར་མའི་མཚན་ཉིད་པོ་ཏི་ལྔ༔ ནང་རྟགས་རྒྱུད་གསུམ༔ སྡོམ་གསུམ་དགོངས་གཅིག་རྣམས་ལ་བཤད་པ་དར༔ རྙིང་མའི་མཛོད་བདུན༔ སྒྱུ་འཕྲུལ་གསང་བའི་སྙིང་པོ་ལ་བཤད་པ་དར༔ གུ་དྲག་ནི་རྙིང་མ་བ་ཐམས་ཅད༔ གསར་མ་བ་ཕལ་ཆེར་གྱིས་ཀྱང་ཉམས་སུ་ལེན་གྱིས༔ བཤད་པ་ནི་མི་དར་བས༔ འདིར་ཡང་ཉམས་ལེན་གྱི་ལུགས་སུ་བྱས་ཏེ༔ ༧ ཁོ་བོ་རཱ་ག་ཨ་སྱ་མཚམས་ཀྱི་བཅད་རྒྱ་དམ་ཅིང་སྒྲུབ་ཁང་ཕྱི་ན་
མི་འགྲོ་ཡང་༔ ཕུག་སྒོར་ཆོས་བཤད་ཀྱི་དབང་ལུང་ཞུ་མི་བར་མི་ཆད་པས༔ རྣམ་གཡེང་ཆེ་བ་དང་༔ སློབ་མ་རྣམས་ཀྱིས་ནན་ཏན་གྱིས་བསྐུལ་བས་དབང་རྡོ་རྗེ་ཕྲེང་བ་ལ་སོགས་རྔོག་དཀྱིལ་བདུན་སྒྲུབ་ཐབས་རྒྱ་མཚོ་སོགས༔ གབ་འཁྲུགས་བསལ་ནས་བཀོད་དགོས་ཟེར་བ་རྩོམ་སྐབས་དང་ཐུག་པས༔ དཔེ་མང་ལ་བལྟ་བ་དང་༔ བསམ་བློ་བཏང་ལོང་མེད་པར་ཐུན་སྐབས་ཐུན་སྐབས་སུ་གང་དྲན་སྨྲས་པས༔ ནོར་འཁྲུལ་དུ་གྱུར་པ་དང་༔ གཞུང་གི་འབྲུ་མ་ནོན་པ་དང་བྲིས་མཁན་དགེ་སློང་བརྩོན་འགྲུས་ཀྱིས་ཀྱང་དད་གུས་བསམ་པ་རྣམ་པར་དག་པས་བྲིས་ཀྱང་༔ ཆད་ལྷག་དང་ཐོབ་ཆ་མི་ཤེས་པའི་སྐྱོན་བྱུང་བ་རྣམས༔ གུ་རུ་དྲག་པོའི་དཀྱིལ་འཁོར་གྱི་ལྷ་ཚོགས༔ ཆོས་བདག་སྲུང་མ་དང་བཅས་པ༔ གང་ཟག་མཁས་པ་ཆོས་ཀྱི་སྤྱན་ལྡན་རྣམས་ཀྱི་དྲུང་དུ་མཐོལ་ལོ་བཤགས་སོ༔ ཚེ་འདིའི་བར་ཆད་ཀྱི་རྐྱེན་དང་༔ ཕྱི་མའི་ས་ལམ་ཐོབ་པ་ལ་སྒྲིབ་པར་མི་འགྱུར་བར་བྱིན་གྱིས་བརླབ་ཏུ་གསོལ༔ ཡེ་ཤེས་ཀྱི་མཁའ་འགྲོ་སྡེ་ལྔ༔ མགོན་པོ་སེང་གདོང་ལྕམ་དྲལ༔ བཙན་བདུད་ཀླུ་གསུམ༔ ཀླུ་བདུད་སྨྱོ་ཁ་འཁོར་དང་བཅས་པ་རྣམས་ཀྱིས་
ཀྱང་༔ ཆོས་འདི་མི་ནུབ་འཕེལ་ཞིང་རྒྱས་པ་དང་༔ འདི་ཉིད་ཉམས་སུ་ལེན་པ་ལ་སྡོང་གྲོགས་མེལ་རྩེ་མ་གཡེལ་ཅིག༔ འདི་རྩོམ་བསམ་པ་ཡིད་ལ་མེད་ཀྱང་༔ རིག་འཛིན་ཆེན་པོ་ཀརྨ་འདུལ་བའི་བཀའ་ཡིས་བསྐུལ་བའི་སྟབས་ཀྱིས་བྱུང་བ་སྟེ༔ གུ་དྲག་མེ་རླུང་འཁྱིལ་པ་ཉམས་སུ་ལེན་པའི་ཕྱི་རབས་ཀྱི་དགེ་བཤེས་དང་སྔགས་ཆུང་གསར་བུ་རྣམས་ལ་ལོང་བ་ལ་མིག་བྱིན་པ་ལྟ་བུ་ཡིན་པས་དགའ་བར་སོམ༔ འདི་ཉིད་མཐོང་ཐོས་དྲན་རེག་ཐམས་ཅད་ཚེ་འདིར་བསྐྱེད་རྫོགས་ལ་བརྟན་པ་ཐོབ་ནས༔ ཕྲིན་ལས་རྣམ་བཞི་ལྷུན་གྱིས་གྲུབ་པ་དང་༔ ཚེ་འཕོས་ནས་གུ་རུ་དྲག་པོའི་སྤྲུལ་གཞི་ཆོས་སྐུ་སྣང་བ་མཐའ་ཡས་ཀྱི་ཞབས་དྲུང་དུ་མེ་ཏོག་པདྨའི་སྒྲུབ་ལ་བརྫུས་ཏེ་སྐྱེ་བར་གྱུར་ཅིག༔ མངྒ་ལཾ་བྷ་ཝནྟུ༔ ༧ ཁམས་སྟོད་ནང་ཆེན་འབང་སྒང་བཟོ་ག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།