གུ་རུ་དྲག་པོའི་དྲིས་ལན་གསལ་བྱེད།
གུ་རུ་དྲག་པོའི་དྲིས་ལན་གསལ་བྱེད་བཞུགས་པའི་དབུ་ཕྱོགས་ལགས་སོ།།
གུ་རུ་དྲག་པོ་འདི་བཀའ་ཡིན་ནམ། བསྟན་ཆོས་ཡིན། རྒྱུད་ཡིན་ནམ། ལུང་ཡིན། གཞུང་ཡིན་ནམ། མན་ངག་ཡིན། །རྒྱ་འགྱུར་ཡིན་ནམ། བོད་འགྱུར་ཡིན། རྒྱུ་ཆོས་ཡིན་ནམ། བོད་ཆོས་ཡིན། འོ་ན་བཀའ་ཡིན་ན།་ཞལ་ནས་གསུངས་པའི་བཀའ་ཡིན་ནམ།་རྗེས་སུ་གནང་བའི་བཀའ་ཡིན་ནམ། བྱིན་གྱིས་བརླབས་པའི་བཀའ་ཡིན་ནམ། གཏེར་ནས་བཏོན་པའི་བཀའ་ཡིན། བསྟན་ཆོས་རྩིས་མགོ་གང་ལ་གཏོགས། རྒྱ་འགྱུར་ཡིན་ན། རྒྱ་གར་ནས་སུས་བསྒྱུར། རྒྱུ་ཆོས་ཡིན་ན། དེང་སང་རྒྱ་གར་ན་གུ་རུ་དྲག་པོ་འདི་དར་རམ། བོད་
ཆོས་ཡིན་ན་དུས་ནམ་ཙམ་དར། །བསྟན་པ་སྔ་དར་ཕྱི་དར་བར་དར་གསུམ་གང་ལ་གཏོགས། གུ་རུ་དྲག་པོའི་ངོ་བོ་གང་ཡིན། །ངེས་ཚིག་གང་ཡིན། གུ་རུ་དྲག་པོ་ལ་རྒྱས་པར་བྱེད་ན་དུ་ཙམ་ཡོད། བསྡུས་ན་གང་དུ་འདུས། གུ་རུ་དྲག་པོ་ཆོས་སྐུར་གཏོགས་སམ། སྤྲུལ་སྐུར་གཏོགས་སམ། རིགས་ལྔ་གང་གི་རིགས་སུ་གཏོགས། གུ་རུ་དྲག་པོ་སྤྲུལ་པའི་དོན་ཅི་ཡིན། །ཕྱི་སྒྲུབ་ནང་སྒྲུབ་གསང་སྒྲུབ་གསུམ་ཚང་ཟེར་བ་ཅི་ལྟར་ཚང་། ཆེ་བ་བདེ་གཤེགས་འདུས་པ་ལ་ཆོས་ཚན་དུ་ཡོད། འབྲིང་བ་དྲག་སྔགས་མེ་ཡི་སྤུ་གྲི་ལ་ཆོས་ཚན་དུ་ཡོད། ཆུང་བ་དཔའ་བོ་ལྷ་གསུམ་
ལ་ཆོས་ཚན་དུ་ཡོད། ཐོག་ལྟར་བརྩེགས་པའི་ལྷ་དེ་གང་ཡིན། རྒྱན་ལྟར་འདོགས་པའི་ལྷ་དེ་གང་ཡིན། འཁོར་དུ་བཀོད་པའི་ལྷ་གང་ཡིན། དམག་དཔོན་ལྟ་བུའི་ལྷ་བཅུ་ཡོད་ཟེར་བ་གང་ཡིན། ཁྲ་ལྟར་འགྱེད་པའི་ལྷ་གཅིག་ཡོད་ཟེར་བ་གང་ཡིན། སྤྲུལ་པ་ལྟ་བུའི་ལྷ་གསུམ་ཡོད་ཟེར་བ་གང་ཡིན། །མ་སྲིང་ལྟ་བུའི་ལྷ་ཡོད་ཟེར་བ་གང་ཡིན། འགུར་དྲག་གི་ཁུངས་ལ་མངོན་བྱང་ལྔ་ལས་བསྐྱེད་ལུགས་གང་ཡིན། ཡན་ལག་བཞི་རྫོགས་སུ་བསྐྱེད་ལུགས་གང་ཡིན། འདི་རྡོ་རྗེ་ཆོ་ག་གསུམ་ལ་བསྐྱེད་ལུགས་གང་ཡིན། སྙིང་པོ་ལས་བསྐྱེད་ལུགས་གང་ཡིན། ས་བོན་ལས་བསྐྱེད་ལུགས་གང་ཡིན། སྐད་ཅིག་གི་བསྐྱེད་ལུགས་གང་ཡིན། རྣམ་པ་གསལ་ལུགས་གང་ཡིན། རྣམ་དག་དྲན་པ་དེ་གང་ཡིན། ང་རྒྱལ་བརྟན་པ་དེ་གང་ཡིན། ངོ་བོ་བསྟན་པ་དེ་གང་ཡིན། མཚན་ཉིད་དབྱེར་མེད་པ་དེ་གང་ཡིན། ཉམས་བདེ་བ་དེ་གང་ཡིན། སྲུང་བ་རྡོ་རྗེའི་ཁྲབ་བདག་བསྲུང་ན་ཅི་ལྟར་བསྲུང་། གཞན་སྲུང་ན་ཅི་ལྟར་བསྲུང་། གནས་སྲུང་ན་ཅི་ལྟར་བསྲུང་། སྦ་བ་རྣམ་གསུམ་དེ་ཅི་ལྟར་ཡིན། ཟློག་པ་མཚོན་ཆ་ཟོར་དུ་འཕེན་པ་ལ། འཁོར་བའི་གནད་ཅིག་ཡོད་ཟེར་བ་དེ་གང་
ཡིན། གཟེང་ཐབས་ལྷའི་མན་ངག་གཅིག་ཡོད་ཟེར་བ་དེ་གང་ཡིན། བཟླས་པ་སྔགས་ཀྱི་མན་ངག་གཅིག་ཡོད་ཟེར་བ་དེ་གང་ཡིན། སྐྱོགས་གཉིས་ནང་ཐུག་ན། །རྒྱོགས་རྡོ་བར་སྣང་ནས་གཅོག་པའི་མན་ངག་གཅིག་ཡོད་ཟེར་བ་དེ་གང་ཡིན། སྔགས་པ་ནང་རྒྱས་བྱུང་ན་སྡེ་བརྒྱད་ཁ་འཐབས་ཀྱི་མན་ངག་གཅིག་ཡོད་ཟེར་བ་དེ་གང་ཡིན། བཙན་པོ་མཁར་ཞུགས་པ་དེ་གང་ཡིན། ཁམས་གསུམ་གཡུལ་དུ་བཅད་པ་རྣམ་གསུམ་མཚོན་གྱིས་བརྡུང་བ་དེ་གང་ཡིན། འཁོར་བའི་ཇག་པ་བཀྱེ་བ་དེ་གང་ཡིན། གཏོར་མ་ལ་བསྟབ་པ་རང་གཤེད་རང་ལ་བབ་པ་རྣམས་ཡོད་ཟེར་བ་དེ་གང་ཡིན། བསད་པ་སྡིག་པ་སྙིང་འཛིན་ལ་དགྲ་བསད་ན་ཅི་ལྟར་བསད། བྱད་མ་བསད་ལུགས་ཅི་ལྟར་ཡིན། འདྲེ་བསད་ལུགས་ཅི་ལྟར་ཡིན། དགྲ་འདྲེ་གཉིས་བླ་འགུགས་སམ། ལུས་འགུགས་སམ། སྲོག་འགུགས། བླ་འགུགས་ན་བླ་དེ་གང་ཡིན། སྲོག་འགུགས་ན་ཅི་ལྟར་འགུགས། ལུས་འགུགས་ན་འདྲེ་ལ་ལུས་ཡོད་དམ་མེད། ལུས་ཡོད་ན་ཅི་ལྟར་འགུགས། ཡང་དགྲ་འདྲེ་གཉིས་བླ་གསོད་དམ། སྲོག་གསོད་དམ། ལུས་གསོད་དམ། དེ་གསུམ་གྱི་གསོད་ལུགས་ཅི་ལྟར་བྱེད། འདྲེ་
ལ་དངོས་སུ་གསོད་རྒྱུ་ཡོད་དམ་མེད། ཡོད་ན་འདྲེ་གཟུགས་ཇི་ལྟར་ཡོད། མེད་ན་གསོད་ཟེར་བ་གང་ལ་བྱེད། ཡང་སྨྲས་པ། བཀའ་དང་ལུང་དང་དབང་དང་གསུམ། །འདི་གསུམ་མ་ཐོབ་སྔགས་པ་མེད། །དཔེར་ན་མ་བཅོས་པའི་དཔོན་དང་འདྲ། །རྒྱུད་དང་ལག་ལེན་མན་ངག་གསུམ། །འདི་གསུམ་མི་ལྡན་སྔགས་པ་མེད། །དཔེར་ན་ཁ་སྦུབ་སྒྲུང་མཁན་འདྲ། །བསྙེན་སྒྲུབ་མེད་པའི་སྔགས་པ་དེ། །རྨིང་ནས་ཉིལ་བའི་བརྩེགས་པ་འདྲ། །ཁས་སྦྱོར་མི་ཤེས་སྔགས་པ་དེ། །གོ་མཚོན་མེད་པའི་དམག་མི་འདྲ། །རང་སྲུང་མེད་པའི་གཞན་སྲུང་དེ། །གཉའ་ཆད་རི་ལ་བསྐུངས་བཅས་འདྲ། །གསལ་གསུམ་གདེང་གསུམ་མི་ལྡན་ན། །རྩལ་ཆུང་རྟ་ལ་ཞོན་པ་འདྲ། །ཚེ་ལུང་ཁྲུས་ལུང་མ་ཤེས་ན། །དམག་དཔོན་ནང་གི་ཤན་པ་འདྲ། །འདི་དག་དོན་རྣམས་ཤེས་པ་ན། །མུན་ནག་ནང་གི་མར་མེ་འདྲ། །གུ་རུ་དྲག་པོར་དྲིས་པའི་ལེའུ་སྟེ་དང་པོའོ།། །།འགུར་དྲག་འདི་བཀའ་མ་ཡིན་ཏེ། ཀུན་ཏུ་བཟང་པོས་མ་གསུངས། རྒྱལ་བ་རིགས་ལྔས་ཀྱང་མ་གསུངས། རིག་འཛིན་མི་ཡི་ཐོད་པ་ལ་སོགས་པས་བཀའ་བསྡུས་པའི་དུས་སུ་མ་གསུངས། བསྡུས་བརྒྱུད་མ་
ཡིན། དགོངས་བརྒྱུད་བཅུ་ཡང་མི་གཏོགས་སོ། །ཏན་ཆེན་པོ་སྡེ་བཅོ་བརྒྱད་ལ་ཡང་མི་གཏོགས། གཞུང་མ་ཡིན་ཏེ། ཞི་ཁྲོ་བཀའ་བརྒྱད་ལ་མི་གཏོགས། རྒྱ་འགྱུར་ཡང་མ་ཡིན། ལོ་ཙཱ་བ་སུས་ཀྱང་མ་བསྒྱུར་། རྒྱུ་ཆོས་ཡང་མ་ཡིན་ཏེ། དེང་སང་རྒྱ་གར་ནས་མ་དར། འོ་ན་གང་ཡིན་ན། བསྟན་ཆོས་ཡིན་ནོ། །རྒྱ་ཡི་བསྟན་ཆོས་ཀྱང་མ་ཡིན་། བོད་ཀྱི་བསྟན་ཆོས་ཀྱང་མ་ཡིན། བོད་ཆོས་ལ་སྔ་འགྱུར། རྒྱན་དྲུག་མཆོག་གཉིས་ལ་སོགས་པས་མ་བསྒྱུར། བར་དུ་རིན་ཆེན་བཟང་པོ་ཇོ་བོ་རྗེས་མ་བསྒྱུར།་ཐ་མ་སྐ་ཅོག་རྣམས་ཀྱིས་མ་བསྒྱུར། འགུར་དྲག་གི་ཆེ་བརྗོད་འདོད་ན། འགུར་དྲག་གི་ངོ་བོ་ཨོ་རྒྱན་ཡིན། དེའི་ངོ་བོ་ཆོས་སྐུ་ཡིན། དེའི་ངོ་བོ་རང་སེམས་ཡིན། ལོགས་ན་མེད། ངེས་ཚིག་ནི་གུ་རུ་ཡིན། གུ་རུ་བླ་མ་ཡིན། དྲག་པོ་ནི་ཁྲོས་པ་ཡིན། རྒྱས་པར་བྱེད་ན་གཏེར་ཀ་རེ་ལ་འགྱུར་རེ་ཡོད། བསྡུ་ན་བདེར་གཤེགས་འདུས་པ་ལ་བསྡུས། སྐུ་གསུམ་ལས་སྤྲུལ་སྐུར་གཏོགས། རིགས་ལྔ་ལས་པདྨའི་རིགས་སུ་གཏོགས། དྲག་ཏུ་སྤྲུལ་དོན་ནི། པེ་ཀར་འདུལ་བའི་དོན་ཡིན། ཕྱི་སྒྲུབ་འཁོར་མང་དུ་སྒྲུབ་པ། ནང་སྒྲུབ་དབང་སྒྲུབ་ལྷ་
ལྔར་སྒྲུབ་པ། གསང་སྒྲུབ་ཧཱུྃ་སྒྲུབ་ཏུ་སྒྲུབ་པའོ། །བསྐྱེད་རྫོགས་ཐུན་ཅིག་གཅིག་ལ། ཕྱི་ནང་གསང་གསུམ་ཚང་ལུགས་ཤེས་དགོས། ཆེ་བ་བདེ་གཤེགས་འདུས་པ་ལ་ཆོས་ཚན་བཅུ་བདུན་ཏེ། རྨི་ལམ་དབང་དང་འབྲེལ་པའི་ཆོས་བརྒྱད། སྒྲུབ་ཐབས་མན་ངག་དང་འབྲེལ་བའི་ཆོས་བརྒྱུད། ཕྱི་གསོལ་འདེབས་ཀྱི་སྐོར། ནང་བྱིན་རླབས་ཀྱི་སྐོར། གསང་བ་དངོས་གྲུབ་ཀྱི་སྐོར། དྲག་པོ་ཕྲིན་ལས་ཀྱི་སྐོར་དང་བཞི་རུ་ཕྱེས་ཏེ། ཐུན་དུས་བླ་མའི་རྣལ་འབྱོར། ཆུང་བ་དཔའ་བོ་ལྷ་གསུམ་ལ་ཆོས་ཚན་གསུམ། འབྲིང་བ་དྲག་སྔགས་མེའི་སྤུ་གྲི་ལ་ཆོས་ཚན་ལྔ། ཐོག་ལྟར་བརྩེགས་པའི་ལྷ་ནི་སྤྱི་བོར་སྣང་བ་མཐའ་ཡས། དེའི་སྤྱི་བོར་རིག་འཛིན་བརྒྱུད་པའི་བླ་མ་བྷེ་པ་དེ་ཡིན། རྒྱུན་ལྟར་འདོགས་པའི་ལྷ་ནི། དཔྲལ་བར་འཇམ་དཔོལ། མགྲིན་པར་རྟ་མགྲིན། ཐུགས་ཀར་ཕྱག་རྡོར། ལྟེ་བར་མཁའ་འགྲོ་སྡེ་ལྔ། གསང་བོར་ཡཀཱ་མེ་དབལ་རྣམས་བྷེ་པ་དེ་ཡིན། འཁོར་དུ་བཀོད་ན་ཤར་དུ་ཕྱག་རྡོར། ལྷོར་འཇམ་དཔལ། ནུབ་ཏུ་རྟ་མགྲིན། བྱང་དུ་མེ་དབལ། དེ་ལྟར་བཀོད་པ་ཡིན། དམག་དཔོན་ལྟ་བུ་ལྷ་བཅུ་ནི་ཁྲོ་བོ་བཅུ་ཡིན། ཇག་པ་ལྟ་བུའི་ལྷ་བརྒྱད་ནི་སྡེ་
བརྒྱད་ཡིན། སྤྲུལ་པ་ལྟ་བུའི་ལྷ་གསུམ་ནི་ལེགས་རྩ་ལ་མཆེད་གསུམ་ཡིན། མ་སྲིང་ལྟ་བུའི་ལྷ་ནི་རྡོ་རྗེ་ཕག་མོ་དང་མཁའ་འགྲོ་སྡེ་ལྔ་ཡིན། ཁྲ་ལྟར་འགྱེད་པའི་ལྷ་ནི་ལྕགས་སྡིག་ནག་པོ་ཡིན། གདན་པད་ཟླ་ལ། སྐུ་ཡོངས་རྫོགས་ལ། ཐུགས་ཕྱག་མཚན་ལ། གསུང་ཡིག་འབྲུ་ལ། ཕྲིན་ལས་ལྷུན་གྲུབ་ལ་བྱང་ཆུབ་པ་ལྔ། གཞིའི་ཡན་ལག་སྒྲུབ་པའི་བསྙེན་པའི་ཡན་ལག་དང་བཞི། སྒྲུབ་པ་ཆེན་པོའི་ཡན་ལག་དང་གཅིག །སྐུ་རྡོ་རྗེ། གསུང་རྡོ་རྗེ། ཐུགས་རྡོ་རྗེ་དང་གསུམ། སྙིང་པོ་བསྐྱེད་པ། ས་བོན་ཧཱུྃ་ཧཱུྃལས་སྐད་ཅིག་དྲན་རྫོགས་སུ་བསྐྱེད་པ། རྣམ་པ་གསལ་བ་ནི། རང་ལྷའི་སྐུ་མདོག་ཕྱག་མཚན་དང་ཕྱི་སྣོད་གཞལ་ཡས་ཁང་། ནང་བཅུད་ལྷ་དང་ལྷ་མོར་གསལ་བར་བྷེ། རྣམ་དག་དྲན་པའི་སྐུའི་གཞུང་། སྐུ་མདོག་ཕྱག་མཚན་རྒྱན་དང་བཅས་པ་དགོས། ང་རྒྱལ་བརྟན་པ་ནི། གསལ་མི་གསལ་ཅི་ཡིན། ཡི་དམ་ལྷ་ཡིན་སྙམ་པའི་ང་རྒྱལ་དང་དུས་རྟག་ཏུ་མ་བྲལ་བར་དྲན་པ་བརྟན་པའོ། །ངོ་བོ་སྟོང་པ་གདོས་བཅས་མ་ཡིན་པ་འཇའ་ཚོན་ལྟ་བུ་མེ་ལོང་གི་གཟུགས། ཆུ་ནང་ཟླ་བ་ལྟ་བུ། རྣམ་པ་གསལ་བ། །ངོ་བོ་སྟོང་པར་བྷེ་པའོ། །མཚན་ཉིད་
དབྱེར་མེད་ནི་ལྷ་ཡབ་ཡུམ་གཙོ་འཁོར་ཐམས་ཅད་སྣ་ཚོགས་སུ་སྣང་བ་དོན་དེ་ལ་རོ་གཅིག་ཏུ་བྷེ་པའོ། །ཉམས་བདེ་བ་ནི། ཉམས་གང་སྐྱེས་ཐམས་ཅད་ལ་སྤང་བླང་དགག་སྒྲུབ་བྲལ་བའི་ངང་ནས་བདེ་བ་སྤྱོད་དོ། །བདག་སྲུང་བ་ནི་རང་ཉིད་ཡི་དམ་དུ་གསལ་བ། ལུས་ལ་ལྷ་གོ་ཆ་ལྟར་བྷེ་པའོ། །གཞན་སྲུང་ན་གནས་ཁང་ངམ་ཕྱི་སྣོད་གཞལ་ཡས་ཁང་དུ་བསམ། ཕྱི་རོལ་གསེར་གྱི་འཁོར་ལོ་གཡས་དང་། མེའི་འཁོར་ལོ་གཡོན་དུ་འཁོར་བར་བསམ། དེའི་ཕྱི་རོལ་དུ་མཚོན་ཆ་དང་མེ་རིའི་གུར་ཁང་བྷེ། སྦ་བ་གསུམ་ནི་ལུས་སྲུང་བའི་གུར་དུ་བྷ། སྲུང་འཁོར་དང་གོ་ཆའི་ནང་དུ་སྦ། ངག་སྔགས་ཀྱི་གུར་དུ་སྦ། ཡིད་ས་བོན་གྱི་དཀྱིལ་དུ་སྦ། འཁོར་ལོ་གནད་ནི་སྲུང་བའི་དུས་སུ་འཁོར་ལོ་གུར་ཐབས་སུ་གཡས་འཁོར་དུ་བྷོ་། བསད་ཟློག་དུས་སུ་གཡོན་དུ་མཚོན་ཆའི་འཁོར་ལོ་འཁོར་བར་ཧཱུཾ། གཟིགས་ཐབས་ཀྱི་གནད་ནི་བསྲུང་བའི་དུས་སུ་ལྷའི་ཞལ་ནང་དུ་གཟིགས། མདོས་ཟློག་དུས་སུ་ལྷའི་ཞལ་ཕྱི་ན་གཟིགས། སྔགས་ཀྱི་གནད་ནི། སྲུང་བའི་སྔགས་ཀྱི་བར་དུ་རང་དང་བསྲུང་བྱའི་བར་དུ་མིང་དང་མཐར་རཀྵ་བཏགས་སོ། །བཟློག་པའི་དུས་སུ་ཟློག་དང་། བསད་པའི་དུས་
སུ་མཱ་ར་ཡ་བཏགས་སོ། །སྦྱོར་ཅིག་ཟློག་ཅིག་པའི་སྔགས་དང་། སྡེ་བརྒྱད་ཁ་འཐབ་སྐྱོགས་རྡོ་རྗེ་ལམ་དུ་བཅག་པ། དེའི་མན་ངག་ནི། འགོམ་ཡུག་མ་སོང་བའི་ས་ལ་རཏྣ་ལྔ་ཆུ་གཙང་གིས་སྦྲུས་ལ་སྡེ་བརྒྱད་ཅི་ཙམ་བོས་པ་བཅས་ལ་དེའི་ཁོག་པ་སྟོང་པ་བྱས་ལ་ཨ་མུ་ཀའི་ལིངྒ་བཞག་ལ་དེ་འདྲ་བྱས་ཏེ། སྒྲུབ་ཁང་ངམ་གྲོང་གི་ཕྱོགས་གཅིག་ཁ་ཕྱིར་བསྟན་ལ་བཞག །མིས་མ་མཐོང་བར་བྱས་ལ། ཞག་རེ་ཟློག་སྔགས་ཤམ་བུ་བརྒྱ་རྩ་བཟླས། རྗེས་ལ་བདེན་སྟོབས་བརྗོད། ཐལ་མོ་རྡབ། རང་གཤེད་དུ་བབ་པ་ལས། །སྔགས་པ་རང་གཤེད་དུ་བབ་པའོ། །སྒྲུབ་ཁང་ཕུག་ལ་བཅས་ཏེ། ཕྱི་ནང་དཔག་ཁྲབ་བྱུང་ལ། དེའི་ནང་དུ་ལིངྒ་རྩ་གསུམ་ཟག་རྫས་བྱུག །འགུགས་གཞུག་དྲག་ཏུ་བྱས། གུ་གུལ་དང་ཡུགས་ས་མའི་ཞབས་ལས་རྡུལ་ས་ལྷ་དང་ཕྲལ། ཡུགས་ས་མའི་ཞབས་ལས་བཏུམ་ལ། སྒྲུབ་ཁང་ནང་དུ་བཞག་གོ །རབ་བདུན་འབྲིང་བཅུ་གཅིག་ཐ་མ་ཉེར་གཅིག་ཐུན་གྱིས་བྲབ། རྩ་སྔགས་ཤམ་བུ་དགྲ་བོ་ཨ་མུ་ཀ་ཎི་ཧུར་ཐུམ་ཛ། དགྲ་བོའི་སྲོག་མཱ་ར་ཡ་སོད། ཅེས་ཐུན་གྱིས་བྲབ་ཅིང་གདོང་མི་འཕྲད་པར་ངག་མཚམས་བྱའོ། །བསད་སྔགས་
གཞན་དང་རྟགས་ཐེམ་པའི་དུས་ཉི་མ་དམར་ལ་ཆུ་མིག་བྱང་དུ་བསྟན་པ་ལྐུག་པ་ཁ་གཏད་སྤྱི་དང་མཐུན་པར་ཞལ་ལས་ཤེས་སོ། །གཏོར་མ་ལ་བསྟན་ནས་རང་གཤེད་རང་ལ་བབ་པའི་མན་ངག་ནི། རྔམས་ཟློག་སྐབས་སུ་ཤེས་པར་བྱའོ།། །བསད་པ་ནི་དགྲ་འདྲེ་གཉིས་ཀྱི་བླ་བཙོན་དུ་བཟུང་དགོས། སྲོག་ཨར་ལ་གཏད་དགོས། གཟུགས་ལིངྒ་ལ་བྲིས་ནས་རང་ཉིད་ཡི་དམ་གྱི་ཐུགས་ཀ་ནས་སྤོས་པའི་ཕོ་ཉ་ལྕགས་ཀྱུ་ཅན་གྱིས་དགྲ་འདྲེའི་སྙིང་ཁའི་ཚྭ་དང་འགྱེལ་ནས་བཏབ་སྟེ། བཀུག་ནས་དགྲ་དང་ལིངྒའི་སྙིང་ཁའི་འདྲེའི་སྙིང་ཁའི་དྲི་ལ་བསྟིམས།་ཞགས་པ་ཅན་གྱིས་དགྲ་འདྲེའི་མགུལ་ནས་ཁྲིད་ནས་ལིངྒ་དེ་ལ་ཐིམ་པར་བྷེ། ལྕགས་སྒྲོག་ཅན་གྱིས་དགྲ་འདྲེའི་ཡན་ལག་བསྡོམ་པར་བྷེ། དྲིལ་བུ་ཅན་གྱིས་དེད་ནས་གཟུགས་དང་ལིངྒ་དབྱེར་མེད་དུ་བྷེ། བླ་ནི་བླ་ཆེན་དྲུག་དང་། སྤྲུལ་པ་དྲུག་རྣམས་བླ་ཁྱེར་དུ་ཤེས་པར་བྱའོ། །བླ་དག་ནི་མི་ངན་དུ་ཤེས་པར་བྱའོ། །དགྲ་འདྲེའི་གཟུགས་དངོས་སུ་བསྒྲལ་རྒྱུ་མེད་ཀྱང་། རྣམ་པ་ཙམ་ལ་བསྒྲལ་རྒྱུ་ཡོད། དགྲ་ལ་ནི་དངོས་སུ་བསམ་དགོས། འདྲེ་ནི་ཕོ་སྲི་ཤ་བའི་མགོ་ཅན་མོ་སྲི་དྲེད་མོང་གི་མགོ་ཅན། སྲིད་པའི་འདྲེ་དགུ་གཙུག་ལག་གི་གདོན་
བཅུའོ། །བྱིས་སྦྱའི་གདོན་ཆེན་བཅོ་ལྔ་ལ་སོགས་རང་གི་གཟུགས་སུ་རྣམ་ཤེས་བཀུག་ནས་བསྒྲལ་དགོས། ལུས་བསྒྲལ་ནས་ཤ་ཁྲག་ཚོགས་སུ་འབུལ་དགོས། ཡི་བསྒྲལ་ནས་རྣམ་ཤེས་ཆོས་ཀྱི་དབྱིངས་སུ་འཕེན་དགོས། དེ་དག་ཐམས་ཅད་སྙིང་རྗེའི་ཟིན་དགོས། གུ་རུ་དྲག་པོའི་དྲིས་ལན་གསལ་བྱེད་འདི། སློབ་མའི་བསམ་པ་ཚིམས་པ་དང་ཕ་རོལ་རྒོལ་་་་་་་་ཨ་རཱ་གས་གསུང་པ་འདྲ་ཡང་ཡིག་ཆུང་སྣེ་ཆད་འདུག་ཞུ།། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།