གུ་རུ་དྲག་པོའི་ཁྲོ་རྒྱལ་སྟོབས་འདུས་ཀྱི་འདོན་འགྲིགས།
གུ་རུ་དྲག་པོའི་ཁྲོ་རྒྱལ་སྟོབས་འདུས་ཀྱི་འདོན་འགྲིགས་བཞུགས་ལགས་སོ༔
ལས་བྱང་ཏིང་འཛིན་རྣམ་གསུམ༔ ཙིཏྟ་བཛྲ་ས་མ་ཏི་ཧཱུྃ༔ རང་གི་སྙིང་གར་ཧཱུྃ་མེའི་མདོག་ཅན་ཅིག་བསམས༔ དེ་ནས་ཐུགས་ཀའི་ཧཱུཾ་ལས་ཨེ་ནག་པོ་ཞིག་ཆད༔ ནམ་མཁས་གར་ཁྱབ་ཨེའི་རང་བཞིན་ཟུར་གསུམ་ཕྲ་བ༔ ཟུར་གཅིག་འོག་ཕྱོགས་སུ་ཟུག་པ༔ ཁ་གདེངས་པ༔ དེའི་སྟེང་དུ་ཨེའི་ཀློང་༔ ཡཾ་ལས་བསྐལ་པའི་རླུང་ནག་འཚུབ་ཅིང་འཁྱིལ་བ༔ དེའི་སྟེང་དུ་ཧཱུྃ་ལས་རཾ་ཆད་པས་བསྐལ་པའི་མེ་དཔུང་དམར་ནག་རབ་ཏུ་འབར་བ༔ ར་ཆད་པས་རཀྟའི་རྒྱ་མཚོ་རྦ་ཀློང་འཁྲུགས་པ༔ ཁྲག་གི་སྦུ་བ་རི་རབ་ཙམ་འཕྱོ་བའི་ཀློང་ན༔ ཞིང་ཆེན་ཞིང་ཆུང་རི་གད་ཉིལ་བ་ལྟ་
བུའི་རྦ་ཀློང་ཡོད་བ༔ སུཾ་ཆད་པ་ལས་སུ་ལས་ཤ་ཆེན་གྱི་ས་གཞི་རོ་རུལ་བམས་པ༔ ཐོད་སྐམ་ལ་མེ་འབར་བ་དྲི་མ་མནམ་པ༔ བྱ་གཅན་མང་པོ་ནམ་མཁའ་ལ་ལྡིང་བ༔ གཅན་གཟན་མང་པོས་རྒྱུག་འདྲལ་བྱེད་པ༔ ལྷ་སྲིན་དང་ཞིང་སྐྱོང་མང་པོས་ཀུའི་སྒྲ་དང་ཧ་ཧའི་སྒྲས་འདེབས་པ༔ དེའི་སྟེང་དུ་ཀ་ཆད་པ་ལས་ཀེ་ལས་རུས་པའི་རི་རབ་གྲུ་བཞི་བང་རིམ་དང་བཅས་པ༔ དེའི་སྟེང་དུ་ཧཱུཾ་ཆད་པ་ལས་གཞལ་ཡས་ཀྱི་ཁང་པ་ཐོད་པ་སྐམ་རློན་རཏྣའི་རྩིག་པ༔ གནམ་ལྕགས་ཀྱི་གཟེར་གྱིས་བསྡམས་པ༔ ཀླུ་བརྒྱད་ཀྱི་ཀ་གདན༔ ལྷ་བརྒྱད་ཀྱི་ཀ་བ༔ གཟའ་བརྒྱད་ཀྱི་གདུང་
མ༔ ཉི་ཟླའི་མཐོང་ཁུང་༔ གཟའ་སྐར་གྱི་དྲལ་ལྕམ་བྱས་པ༔ ཞིང་ལྤགས་ཀྱི་བླ་རེ༔ ཞིང་ཆུང་གི་ཁ་བད༔ ཞིང་དང་ཐོད་པའི་རྒྱལ་མཚན༔ འཁོར་ལོ་གདུགས་ཏོག་རྩེར་ཐོད་སྐམ་གྱི་ཏོག་ཡོད་པ༔ ནང་གི་སྒོ་བཞི་གྲུ་བཞི་རྟ་བབས་དང་བཅས་པ༔ སྒོ་ཁང་ལ་ཁྱུང་གི་ཡ་ཕིབ༔ སྦྲུལ་ནག་གི་སྐྱེས་བུ༔ ཞིང་ཆེན་གྱི་སྒོ་གཡོགས༔ ཆུ་སྲིན་དང་འབྲུག་གི་སྐྱེས་བུ༔ རྒྱུ་ཕྲེ་ང་གི་བླ་རེ་དང་དྲ་ཕྱེད༔ རུས་ཆེན་གྱི་སོ་བད༔ གསུར་ཆེན་གྱི་དུད་པ་འཁྲིགས་པ༔ དེའི་ཕྱི་རིམ་འཁོར་ལོ་རྩིབས་བརྒྱད་ཀྱི་གུར༔ དེའི་ཕྱི་རིམ་རྡོ་རྗེའི་དྲ་མིག་ཁྲོ་ཆུང་གིས་གཏམས་པ༔ དེའི་ཕྱི་རོལ་དུ་དུར་ཁྲོད་ཆེན་པོ་བརྒྱད་ཀྱིས་བསྐོར་བ༔ དེའི་ཕྱི་རོལ་དུ་པད་སྡོང་དང་མེའི་ཚྭ་ཚྭ་འཕྲོ་བ༔ བར་ཐམས་ཅད་མཚོན་ཆ་ལྔ་དང་ཁྲོ་ཆུང་དང་སྡིག་པས་གཏམས་ཤིང་འཁྲུགས་པར་བསྒོམ༔ ཕོ་བྲང་དེའི་དབུས་མཐིང་ནག་གྲུ་གསུམ་འབར་བ་ཟླ་གམ་དམར་པོ༔ དེའི་ཕྱི་རིམ་གསེར་གྱི་འཁོར་ལོ་རྩིབས་བཞི་པ༔ བདུད་བཞི་དང་དམ་སྲི་ཕོ་མོའི་རོ་བསྣོལ་བའི་སྟེང་དུ༔ ཉི་ཟླ་པདྨའི་གདན་ལ་ཧཱུྃ་ཆད་པ་ལས་རྡོ་རྗེ་རྩེ་དགུ་པ་ཞིག་བསྒོམ༔ ཧཱུྃ་རྡོ་རྗེ་དང་བཅས་པ་ལས་འོད་ཟེར་དཔག་ཏུ་མེད་པ་འཕྲོས༔ རྒྱལ་བ་ཐམས་ཅད་
ལ་མཉེས་པའི་མཆོད་པ་ཕུལ༔ སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས༔ གདུག་པ་ཅན་རྒྱལ་བསེན་དམ་སྲི་སྡེ་བརྒྱད་དྲེགས་པ་ཅན་ཐམས་ཅད་ཚར་བཅད༔ ཚུར་འདུས་ཧཱུྃ་ལ་ཐིམ་འོད་དུ་འབར༔ སླར་རྡོ་རྗེ་རྩེ་དགུ་པར་གྱུར༔ དེ་ཡོངས་སུ་གྱུར་པ་ལས༔ ༈ བདག་ཉིད་རྡོ་རྗེ་དྲག་པོ་ཐོད་ཕྲེང་རྩལ་ཞལ་གསུམ་ཕྱག་དྲུག་ཞབས་བཞི་བསྒྲད་པ༔ ཞལ་གཡས་དཀར་གཡོན་མཐིང་དབུས་དམར་ནག་ཏུ་འབར་བ༔ སྤྱན་དགུ་སྡང་མིག་ཏུ་བསྒྲད་པ༔ ཞལ་གདངས་བ་མཆེ་བ་བཞི་གཙིགས་ཤིང་ཁྲོ་གཉེར་བསྡུས་པ༔ སྨིན་མ་དང་ཨག་ཚོམ་ལས་མེ་འབར་བ༔ སྐུ་ཆེ་ལ་ཡན་ལག་རགས་པ༔ ཕྱག་གཡས་དང་པོས་གྲི་གུག་འཛིན་པ༔ བར་པ་ན་གནམ་ལྕགས་ཀྱི་རྡོ་རྗེ་རྩེ་དགུ་རཾ་དགུས་མཚན་པ་གསོར་ཞིང་ནམ་མཁར་ཕྱར་བ༔ ཐ་མ་ན་རལ་གྲི་མེ་འབར་བའོ༔ གཡོན་དང་པོས་ཐོད་ཁྲག༔ བར་པས་ཁ་ཊཾ༔ ཐ་མས་སྡིག་པ་མགོ་དགུ་རྭ་བཅོ་བརྒྱད་མིག་དགུ་བསྐྲད་ཅིང་བརྒྱངས་ནས་འཛིན་པའོ༔ རྡོ་རྗེ་དང་རིན་པོ་ཆེའི་གཤོག་པ་ལ་མེ་འབར་བ་བརྐྱང་བ་༔ དུར་ཁྲོད་ཀྱི་ཆས་བརྒྱད་རྫོགས་པར་གསོལ་བ༔ སྐུ་ལ་རྡོ་རྗེའི་གོ་ཁྲབ་གསོལ་བ༔ བར་ཐམས་ཅད་ན་
སྡིག་པ་ཕྲ་མོས་གཏམས་པར་གྱུར༔ དབུ་སྐྲ་ཁམ་སེར་གྱེན་དུ་བརྗེས་པ་འཇིགས་སུ་རུང་བ་ཞིག་ཏུ་བསྒོམ༔ དེའི་ཐུགས་ཙིཏྟ་རིན་ཆེན་གསེར་གྱི་མཆོད་རྟེན་ལངས་པ་ཅིག་ཏུ་གྱུར་དེའི་ལྟེ་བར་བུམ་པའི་ནང་དུ་པདྨ་ཉི་མའི་གདན་ལ་ཧཱུྃ་ཅིག་བསྒོམ༔ དེ་དམ་ཚིག་སྟེ༔ ཨོཾ་བཛྲ་ཛྷཱ་ན་སཏཱ་ཀྲོ་དྷ་ཧཱུྃ༔ ཅེས་པ་ཡེ་ཤེས་སེམས་དཔའ་བཛྲ་ཧེ་རུ་ཀ་ཚོན་གང་བ་ཞལ་གཅིག་ཕྱག་གཉིས་པ་གཡས་རྡོ་རྗེ་ཐུགས་ཀར་འཛིན་པ༔ གཡོན་དྲིལ་བུ་དཀུ་ལ་བརྟེན་པ༔ དུར་ཁྲོད་ཀྱི་ཆས་བརྒྱད་ཀྱིས་བརྒྱན་ཅིང་སྐུ་འགྱིང་བག་དང་ལྡན་པ༔ དེའི་ཐུགས་ཀར་རྡོ་རྗེ་ནས་ཙམ་ཞིག་བསྒོམ༔ དེའི་ལྟེ་བར་ཉི་ཟླའི་དཀྱིལ་འཁོར་གའུ་ཁ་སྦྱོར་ཡུངས་འབྲུ་ཙམ་གྱི་ལྟེ་བར་ཧཱུྃ་སྤུས་བྲིས་པ་ཙམ་གྱི་ཐ་མར་སྔགས་ཀྱིས་བསྐོར་བར་བསྒོམ༔ རང་གི་སྤྱི་གཙུག་སྟེང་དུ་ཡར་ལ་པད་འདབ་གསེར་གྱི་འོད་དུ་འབར་བ༔ ཉི་ཟླའི་གདན་ལ་ཐོད་ཕྲེང་རྩལ་སྐུ་མདོག་མཐིང་ནག་འབར་བིཾ༔ གཡས་ཁ་ཊཾ་གཡོན་ཐོད་ཁྲག་འཛིན་པ༔ གཡས་ཀྱི་གྲུ་མོ་ན་ཐོད་པ་ལྟག་སྤྲོད་ཀྱི་རྔ་བཀལ་བ་དེ་ལས་སྒྲ་རང་གྲག་ཏུ་འཁྲོལ་བ༔ སྟོང་གསུམ་ཀུན་ཀྱང་ཧཱུཾ་སྒྲ་དི་རི་རི་ཡོད་པར་བསྒོམ་༔ དབུ་སྐྲ་ཐོར་ཚུགས་གྱེན་དུ་འཁྱིལ་བ༔ སྐུ་ལ་རུས་པའི་རྒྱན་དྲུག་
གིས་སྤྲས་པར་བསྐྱེད༔ ཞབས་རྡོ་རྗེའི་སྐྱིལ་མོ་ཀྲུང་དུ་བཞུགས་པ༔ དཔའ་བོ་དང་དཔའ་མོ་འབུམ་གྱིས་བསྐོར་བར་གྱུར༔ དེའི་སྤྱི་གཙུག་ཏུ་ཨོཾ་ཨཱཧཱུཾ་པདྨ་དྷ་རི་ནི་ཧཱུྃ༔ བདག་གི་སྤྱི་གཙུག་ཏུ་སྣང་བ་མཐའ་ཡས་སྐུ་མདོག་དམར་པོ་མཉམ་བཞག་གི་ཕྱག་རྒྱ་ཅན༔ ཚོན་གང་བ་གཅིག་ཏུ་གྱུར༔ འོག་ཏུ་ཨོཾ་ཨཱཿཧཱུྃ་བཛྲ་ཁྲོ་གྷ་རུ་ཎ་ཙ་ལེ་ཙ་ལེ་ཧཱུྃ་ཕཊ༔ ཁྲོ་རྒྱལ་ཀུན་གྱི་སྤྲུལ་པའི་བྱ་ཁྱུང་མཐིང་ནག་མེའི་གཤོག་པ་རྡེབ་ཅིང་སྤྲུག་པ༔ ཀྲི་ཀྲི་ཧྲི་ཧྲི་ཞེས་པའི་སྒྲ་སྒྲོགས་པ༔ ལག་པ་གཉིས་ཀྱི་སྦྲུལ་རིགས་ལྔའི་མགོ་ཁར་བཅུག་ནས་བཟུང་ཞིང་ཟ་བ༔ དཔྲལ་བར་ཨོཾ་ཨཱཿཧཱུྃ་མཉྫཤྲཱི་ཡ་མཱནྟ་ཀ་ཧཱུྃ་ཕཊ༔ སྐུ་ཐམས་ཅད་འདུས་པའི་ལྷ་འཇམ་དཔལ་སེར་པོ༔ ཞལ་གཅིག་ཕྱག་གཉིས་ལོངས་སྐུའི་རྒྱན་རྫོགས་པ༔ གཡས་པས་ཤེས་རབ་ཀྱི་རལ་གྲི་ཀླད་ལ་བསྐོར་བ་༔ གཡོན་པས་སྡིགས་མཛུབ་དང་སྦྲུལ་ཞགས་འཛིན་པ༔ དཔྲལ་བར་ཨོཾ་སེར་པོས་མཚན་པར་གྱུར༔ མགྲིན་པར་པདྨ་དམར་པོ་འདབ་མ་བཞི་པའི་ལྟེ་བར་ཨོཾ་ཨཱཧཱུཾ་པདྨ་ཏ་ཀྲི་ཏ་ཧྱ་གྷི་ཝ་ཧཱུྃ་ཕཊ༔ གསུང་གི་ཁྲོ་བོ་རྟ་མགྲིན་དམར་པོ་ཞལ་གཅིག་ཕྱག་གཉིས་པ༔ རབ་ཏུ་ཁྲོས་པའི་ཆ་ལུགས་དང་ལྡན་པ༔ སྤྱི་གཙུག་ན་རྟ་མགོ་ལྗང་ཞུར་
རྔོག་མ་ལེ་བརྒན་སྤྲུག་ཅིང་རྟ་སྐད་སྟོང་གསུམ་དུ་ཁེངས་པར་འཚེར་བས་མ་མོ་དང་མཁའ་འགྲོ་དབང་དུ་སྡུད་པ༔ སྣང་སྲིད་གདོན་བགེགས་འདར་ཞིང་བསྔང་བ༔ གཡས་པས་རྡོ་རྗེའི་དབྱུག་པ་ནམ་མཁའ་ལ་ཕྱུར་བ༔ གཡོན་པས་ཞགས་པ་དང་སྡིགས་མཛུབ་བསྒྲེང་བ༔ དེའི་མགྲིན་པར་གསུང་གི་ངོ་བོ་ལ་ཨཱདམར་པོས་མཚན་པ༔ བདག་ཉིད་ཀྱི་ཐུགས་ཀར་གསེར་གྱི་མཆོད་རྟེན་གྱི་ལྟེ་བར་ཨོཾ་ཨཱཿཧཱུྃ་བཛྲ་པཱ་ཎི་མ་ཧཱ་ཀྲོ་དྷ་ཧཱུྃ་ཕཊ༔ ཐུགས་ཀྱི་ལྷ་གསང་བདག་ཕྱག་ན་རྡོ་རྗེ་སྐུ་མདོག་མཐིང་ནག་ཞག་གཅིག་ཕྱག་གཉིས་རབ་ཏུ་ཁྲོས་པའི་བདག་ཉིད་གཡས་པས་གསེར་གྱི་རྡོ་རྗེ་རྩེ་དགུ་པ་ནམ་མཁའ་ལ་ཕྱར་བ༔ གཡོན་པས་སྡིགས་མཛུབ་ཀྱི་རྩེ་ལ་ཁ་ཊཾ་ཐུགས་ཀར་བསྒྲེང་བ༔ སྦྲུལ་དང་སྟག་ཤམ་གྱིས་བརྒྱན་པ༔ སྒེག་ཅིང་གཏུམ་པ་བརྐྱང་བསྐུམ་དུ་བཞུགས་པའི་ཐུགས་ཀར་ཧཱུྃ་མཐིང་ལ་ཐུགས་ཀྱི་ཁྲོ་བོ་ཧཱུྃ་མཐིང་ནག་གིས་མཚན་པ༔ བདག་གི་ལྟེ་བར་སྤྲུལ་བའི་འཁོར་ལོ་འདབ་མ་བཞིའི་དབུས་སུ་ཨོཾ་ཨཱཿཧཱུྃ་ཧྲིམ་ཧ་རི་ནི་ས་ཧཱུྃ༔ ཕག་མོ་མཐིང་ནག་གྲི་གུག་ཐོད་ཁྲག་འཛིན་པ༔ ཞབས་གཡས་བསྐུམས་པ་མཚན་མ་ལ་གཏད་པ༔ གཡོན་བརྐྱངས་བས་རོའི་གདན་ལ་བཞུགས་པ༔ ཁ་ཊོ་མཆན་དུ་
བཅུག་པ༔ མགོ་ཡི་ཕྲེང་བས་སྤྲས་པ༔ འདབ་མ་བཞི་ཡི་མདུན་དུ་རྡོ་རྗེ་མཁའ་འགྲོ་དཀར་མོ༔ གཡས་སུ་པདྨ་མཁའ་འགྲོ་དམར་མོ༔ གཡོན་དུ་རིན་ཆེན་མཁའ་འགྲོ་སེར་མོ༔ རྒྱབ་ཏུ་ལས་ཀྱི་མཁའ་འགྲོ་ལྗང་གུ༔ དེ་རྣམས་ཀྱང་བརྐྱང་བསྐུམ་གྲི་གུག་ཐོད་ཁྲག་གར་སྟབས་དང་བཅས་ཏེ་གཙོ་མོའི་ཆ་ལུགས་དང་མཚུངས་པ༔ ཐུགས་ཀར་ཧ་རི་ནི་ས་རང་སྐྱེས་ཀྱི་སྙིང་པོ་རེ་ཡོན་ཏན་གྱི་སྙིང་པོར་གྱུར༔ གསང་གནས་སུ་གྲུ་གསུམ་མཐིང་ནག་གི་དབུས་སུ་ཨོཾ་ཨཱཧཱུཾ་ཡཀྵ་ཧཱུཾ་རཀཱ་ཧཱུྃ༔ ཕྲིན་ལས་ཀྱི་ལྷ་ཡཀ་མེ་དབལ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ༔ གཡས་གཉིས་རྡོ་རྗེ་ནམ་མཁར་ཕྱར་བ༔ གཡོན་པས་ཞགས་པ་དང་རྡུང་བའི་ཐོ་བ་འཛིན་པ༔ སྐུའི་བ་སྤུ་རེ་རེ་ལས་ཀྱང་ཁྲོ་བོ་རླུང་ལྟར་འཚུབ་ཅིང་སེར་རྒོད་ལྟར་འབབ་པ༔ སྐུ་ལས་མེ་འོད་མཚོན་ཆའི་ཆར་དུ་འབབ་པ༔ ཐུགས་ཀར་ཧཱུྃ་ནག་པོས་མཚན་པར་གྱུར༔ ཨོཾ་ཨཱཿཧཱུྃ་ཨ་ཙིག་ནིརྩིག་ན་མོ་བྷ་ག་ཝ་ཏེ་ཧཱུཾ་ཧཱུཾ་ཕཊ༔ ཡཀཱ་མེ་དབལ་གྱི་ཐུགས་ཀ་ནས་མདུན་དུ་སྡིག་པ་ནག་པོ་ཁ་དགུ་མིག་དགུ་རྭ་བཅོ་བརྒྱད་དང་ལྡན་པ༔ གནོད་བྱེད་ལ་ཧབ་ཀྱིས་འདེབས་པ༔ རང་གི་དཔུང་པ་གཡས་སུ་ཕྱག་ན་རྡོ་རྗེ༔ གཡོན་དུ་རྟ་
མགྲིན༔ མདུན་དུ་འཁོར་ལོ་རྩིབས་བཞི་པ་རྣོ་བའོ༔ གཡས་སུ་བྷཱཀི་ར་ཙ༔ གཡོན་དུ་ཁྲོས་ནག༔ རྒྱབ་ཏུ་སྟོབས་པོ་ཆེ༔ མདུན་དུ་སྤུ་གྲི་མཆེད་གསུམ་སྐུ་མདོག་ཕྱག་མཚན་རྒྱན་ཆ་ལུགས་དང་ལྡན་པ་བཀའ་ཉན་ལས་བྱེད་ཀྱི་ཚུལ་དུ་གནས་པར་གྱུར༔ བདག་གི་ཐུགས་ཀ་ནས་འོད་ཟེར་ཕྱོགས་བཅུར་འཕྲོས་པས༔ རྔ་ཡབ་ནས་ཡེ་ཤེས་པ་རང་འདྲ་བ་སྤྱན་དྲངས་བར་བསྒོམ༔ བཛྲ་གྷ་རུ་ཀྲོ་ཏ་སརྦ་ས་མ་ཡ༔ ཨམི་དྷེ་ཝ་ནས་བཛྲ་ས་མ་ཡ་ཧཱུྃ་གི་བར༔ ཧཱུྃ༔ ཡུལ་གྱི་མིང་ནི༴ ཞེས་པ་ནས་ཡིག་བརྒྱའི་བར་ལས་བྱང་ལྟར༔ བདག་གི་ཐུགས་ཀ་ནས་འོད་ཟེར་ཕྱོགས་བཅུར་འཕྲོས་པས༔ ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིག་འཛིན་དཔའ་བོ་མཁའ་འགྲོ་བཀའ་བརྒྱུད་རྒྱལ་བ་རྒྱ་མཚོ་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་བསྡུས་ནས་བདག་ལ་ཐིམ་པར་གྱུར༔ དེ་ལྟར་བསྒོམ་ཞིང་པདྨ་དྷ་རི་ཕྲེང་བསྐོར་ཙམ་བཟླ་བ་དེ་ནི་བསྙེན་པའོ༔ བདག་གི་གནས་གསུམ་གྱི་ལྷ་ལས་འོད་ཟེར་ཕྱོགས་བཅུར་འཕྲོས་པས༔ ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིག་འཛིན་དཔའ་བོ་མཁའ་འགྲོ་བཀའ་བརྒྱུད་རྒྱལ་བ་རྒྱ་མཚོ་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་
རླབས་ཐམས་ཅད་ཨོཾ་དཀར་པོ་ཨཱདམར་པོ་ཧཱུྃ་མཐིང་ག་དཔག་ཏུ་མེད་པར་གྱུར༔ འོད་ཟེར་ཚུར་འདུས་རང་གི་གནས་གསུམ་གྱི་ལྷ་ལ་ཐིམ་པས་མཐུ་དང་ནུས་པ་བྱིན་རླབས་དཔག་ཏུ་མེད་པ་བྱུང་བར་གྱུར༔ དེ་ལྟར་བསྒོམ་པ་གལ་ཆེ་ཞིང༔ མཉྫ་འི་དང་པདྨ་ཏ་ཀྲི་ཏ་དང་བཛྲ་པཱ་ཎིའི་སྔགས༔ གོང་གི་དེ་གསུམ་རེ་རེ་ལ་བརྒྱ་རེ་ཙམ་བཟླ་བ་ཉེ་བར་བསྙེན་པའོ༔ བདག་གི་ཐུགས་ཀའི་ཧཱུཾ་ལས་འོད་ཟེར་སྟེང་འོག་ཕྱོགས་བཅུར་འཕྲོས༔ ཕྱོགས་བཅུའི་རྒྱལ་བ་ཐམས་ཅད་ཀྱི་ཐུགས་རྗེ་དང་ནུས་པ་ཐམས་ཅད་བསྡུས་ནས་བདག་ལ་བསྟིམ༔ དམིགས་པ་དེ་རྒྱུན་དུ་བསྒོམ་ཞིང་༔ ཨོཾ་ཨཱཿཧཱུྃ་ཨ་ཙིག་ནིར་ཙིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཨ་ཧཱུྃ་ཧཱུྃ་ཕཊ༔ འདི་ཉིད་བརྒྱ་སྟོང་ཅི་འགྲུབ་ཚན་ཆེར་བཟླ་བ་སྒྲུབ་པའོ༔ བདག་ལས་འོད་ཟེར་དམར་པོ་ཕྱིར་འཕྲོས༔ གནམ་གསེར་གྱི་འཁོར་ལོ་རྩིབས་སྟོང་ཐུར་དུ་གུག་པ་རྩིབས་རྩེ་སྡིག་པ་ཕྲ་མོས་མཚན་པ༔ རྣོ་བའི་ངར་དང་ལྡན་པ་གཡས་སུ་འཁོར་བར་གྱུར༔ ཡང་བདག་གི་ཐུགས་ཀ་ནས་འོད་ཟེར་ཕར་འཕྲོས༔ བདེ་བར་གཤེགས་པ་ཐམས་ཅད་ཀྱི་ནུས་པ་བསྡུས་ནས་བདག་ལ་བསྟིམ་ཞིང་འོད་ཟེར་ཕར་འཕྲོས་པས༔ ས་གཞི་མེའི་འཁོར་ལོ་རྩིབས་
སྟོང་ཚ་ཞིང་བསྲེགས་པའི་ངར་དང་ལྡན་པ་རྩིབས་རྩེ་གྱེན་དུ་བསྟན་པ་གཡོན་དུ་འཁོར་བར་གྱུར༔ འཁོར་ལོ་གཉིས་རྩེ་བསྣོལ་བའི་བར་དུ་རྒྱལ་བསེན་དམ་སྲི་སྡེ་བརྒྱད་འབྱུང་པོ་ཐམས་ཅད་ཕྱེ་མར་བཏང་བར་གྱུར༔ གོང་གི་ཨ་ཙིག་མཇུག་ཏུ༔ བཛྲ་ཧཱུཾ་ཡཀྵ་ཧཱུཾ་རཀྵ་ཧཱུྃ་ཨ་ཡ་མ་དུ་རུ་ཙ་ཤ་ན་ས་མ་ཡ་མཱ་ར་ཡ་ཧཱུྃ་ཕཊ༔ ཅེས་གོང་གི་ཨ་ཙིག་ཅི་ཙམ་བཟླས་པའི་སུམ་ཆ་གཅིག་ཙམ་བཟླ་བ་སྒྲུབ་པ་ཆེན་པོའོ༔ ཡང་བདག་གི་ཐུགས་ཀའི་ཧཱུྃ་དམར་པོ་ལས་ཧཱུྃ་གྲངས་མེད་པ་ཕྱིར་འཕྲོས་པས་འཇིག་རྟེན་གྱི་ཁམས་ཐམས་ཅད་ཡཀྵ་མེ་དབལ་གྲངས་མེད་པ་གཡས་རྡོ་རྗེ་གཡོན་རྡུང་བའི་ཐོ་བ་མེའི་ཕྲེང་བ་འཁོར་བ་སྐུ་ལས་བསྐལ་པའི་མེ་འབར་བ༔ གདོན་བགེགས་རྣམས་མྱ་སྒྲ་ཙི་རི་བརྡུང་གསོད་བཅོམ་འཇིགས་པའི་གད་རྒྱངས་དང་བཅས་ཏེ༔ ཁ་བ་བུ་ཡུག་འཚུབ་པ་ལྟ་བུས་གང་བར་གྱུར༔ བདག་གི་ཐུགས་ཀ་ནས་མེའི་འཁོར་ལོ་མེའི་དབལ་དང་ལྡན་པ་གཡས་བསྐོར་དུ་ཕྱིར་འཁོར་ཕྱི་རོལ་མེ་དབལ་རྣམས་ཀྱི་ཐུགས་ཀ་ནས་མེའི་འཁོར་ལོ་མེའི་དབལ་དང་ལྡན་པ་རྩེ་ནང་དུ་བསྟན་པ་གདུབ་བུ་ལྟ་བུ་གཡོན་དུ་འཁོར་བའི་བར་དུ་གནོད་བྱེད་ཐམས་ཅད་ཀྱི་སྐེ་རྦད་རྦད་གཅོད་ཅིང་ལུས་དུམ་བུར་རྡུལ་ཕྱེ་མར་བཏང་ཞིང་
གཏུབས་པར་གྱུར༔ སྔགས་གོང་མ་གཉིས་སྦྲེལ་བའི་མཇུག་ཏུ༔ ར་ཙ་གནོད་བྱེད་ཀྱི་སྙིང་ལ་མཱ་ར་ཡ་ཧཱུྃ་ཕཊ༔ ཅེས་ཨ་ཙིག་ཅི་ཙམ་བཟླས་པའི་བཅུ་ཆའི་ཚད་ཙམ་བཟླ་བ་ལས་སྦྱོར་རོ༔ དེ་ལྟར་རྒྱུན་བསྙེན་བྱེད་ཚེ་གཏོར་བསྔོས་ཀྱི་རྟེན་གོང་གཏོར་གསོ་བའམ༔ མེད་ན་མར་ཕུད་སོགས་བྲན་ཙམ་གྱིས་ཆོག༔ ཉིན་རེ་ལས་བྱང་དང་སྦྱར་བའི་མངོན་རྟོགས་ཚར་གཅིག༔ དེ་མན་སྤྱོད་ལམ་ཐམས་ཅད་དུ་སྔགས་དང་དམིགས་པ་ཁོ་ནར་འབད༔ ཐུན་མཇུག་ཉལ་ཁ་རྫོགས་རིམ་ནི༔ སྤྲུལ་པའི་ཁྲོ་བོ་འཁོར་ལོ་རྣམས་གཞལ་ཡས་ཁང་ལ་བསྡུ༔ གཞལ་ཡང་ཁང་འཁོར་ལ་འཁོར་གཙོ་བོ་ལ་གཅོ་བོ་ཐུགས་ཀའི་ཧཱུྃ་ལ་ཧཱུཾ་གྱེན་རྫོགས་སུ་ཡལ་སྟོང་ཉིད་ཀྱི་ངང་ལ་བཞག་གོ༔ རྒྱུན་བསྙེན་ཡུན་རིང་བྱས་པས་འགྲུབ་པའི་རྟགས་ཡིག་ལྟར་འབྱུང་ཞིང་གལ་ཏེ་རྟགས་ཐོན་ཞིག་ཏུ་བསྒྲུབས་ན་ལས་བྱང་དང་མངོན་རྟོགས་ཐུན་བཞིར་འདོན་ཅིང་༔ པདྨ་དྷ་རི་འབུམ་ཕྲག་གཅིག༔ སྐུ་གསུང་ཐུགས་ཀྱི་ལྷ་གསུམ་ལ་འབུམ་ཕྲག་རེ་རེ་བཟླས་པ་གོང་གནོན༔ ཨ་ཙིག་འབུམ་ཕྲག་གསུམ་བཟླས་པ་དངོས་གཞི༔ ཡ་མ་སྦྱར་བའི་སྔགས་ཁྲི་ཕྲག་གཅིག༔ ར་ཙ་སྦྱར་བ་ཁྲི་ཕྲག་གཅིག་སྟེ་བདུན་འབུམ་ཉི་ཁྲིས་
འགྲུབ་བོ༔ དེ་ལ་དཀྱིལ་འཁོར་སྒྲུབ་རྫས་མི་དགོས་སོ༔ གཏོར་མ་ཙམ་གྱིས་ཆོག༔ བསྐྱེད་རིམ་བརྟན་ཞིང་རྟོགས་པ་མཐོ་བ་ལ་ནི་ལས་བྱང་མངོན་རྟོགས་གང་ཡང་མི་དགོས༔ སྔགས་དང་དམིགས་པ་ཁོ་ན་ལ་རྟགས་འབྱུང་བ་མྱོང་བས་འགྲུབ༔ རཱ་ག་ཨ་སྱས་བསྒྲིགས་པའོ༔ ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།