ཕྱི་སྒྲུབ་ཁྲོ་འདུས་མེ་ཡི་འཁོར་ལོའི་འདོན་འགྲིགས།
ཕྱི་སྒྲུབ་ཁྲོ་འདུས་མེ་ཡི་འཁོར་ལོའི་འདོན་འགྲིགས་བཞུགས་སོ༔
གུ་རུ་བཛྲ་ཀྲོ་དྷ་ཀཱ་ཡ་ཝཱཀྐ་ཙིཏྟ་སིདྡྷི་ཧོ༔ སྟ་གོན་བཅའ་ཚོགས་གཞུང་བཞིན་བྱཱ༔ ལས་བྱང་ཏིང་འཛིན་རྣམ་གསུམ་ཡན་ཆད་འདོན༔ ༈ སྣང་སྲིད་ཐམས་ཅད་སྟོང་པ་ཉིད་དུ་གྱུར༔ ཕྱོགས་མཚམས་ཀུན་ཏུ་པདྨ་རཱ་གའི་མདོག་ལྟར་དམར་བའི་དབུས་སུ༔ དུར་ཁྲོད་བརྒྱད་ཀྱིས་བསྐོར་བའི་གཞལ་ཡས་ཁང་གི་དབུས་སུ༔ ཆོས་འབྱུང་གྲུ་གསུམ་གྱི་སྟེང་དབུས་སུ༔ ཉི་ཟླ་པདྨ་སྟོང་དང་ལྡན་པའི་སྟེང་དུ༔ བདུད་བཞི་རུ་ཏྲ་ཕོ་མོ་བྱི་ཆིངས་སུ་བསྣོལ་བའི་སྟེང་དུ༔ ཡེ་ཤེས་ཀྱི་དབྱིངས་ནས་ཧཱུྃ་དམར་པོ་འོད་དུ་འབར་བ་ཞིག་ཁྲ་ཐབས་སུ་བབས་ཏེ༔ འོད་ཟེར་སྟེང་འོག་
ཕྱོགས་བཅུར་འཕྲོས་པས༔ རྒྱལ་བ་ཐམས་ཅད་ལ་མཉེས་པའི་མཆོད་པ་ཕུལ༔ སེམས་ཅན་གྱི་ལས་དང་སྒྲིབ་པ་སྦྱངས༔ དགྲ་བགེགས་གདུག་པ་ཅན་རྒྱལ་བསེན་དམ་སྲི་ཐམས་ཅད་ཚར་བཅད་སླར་འོད་ཟེར་ཧཱུཾ་ལ་ཐིམ་པས༔ བདག་ཉིད་སྐད་ཅིག་གིས་མ་བཅོས་རྫོགས་པའི་ཁྲོ་རྒྱལ་ཟིལ་གནོན་ཆེན་པོ་པདྨ་དྲག་པོ་རྩལ་ཞེས་བྱ་བ༔ དམར་པོ་ཞལ་གཅིག་ཕྱག་གཉིས་མེའི་མདོག་ཅན༔ ཞལ་གདངས་ལྗགས་འདྲིལ་མཆེ་བ་བཞི་གཙིགས་པ༔ སྤྱན་གསུམ་སྡང་མིག་ཕྱོགས་བཅུར་གཡོ་བ༔ ཕྱག་གཡས་པས་གསེར་གྱི་རྡོ་རྗེ་རྩེ་དགུ་པ་ནམ་མཁར་ཕྱར་ཞིང་གསོར་བ༔ གཡོན་
པས་ལྕགས་ཀྱི་སྡིག་པ་ནག་པོ་ཁ་དགུ་མིག་དགུ་རྭ་བཅོ་བརྒྱད་ཁ་གདངས་བ་འཛིན་པ༔ ཞབས་གཉིས་བརྐྱང་བསྐུམ་དོར་སྟབས་སུ་བསྒྲད་པ༔ ཐོད་སྐམ་ལྔ་དང་རིགས་ལྔས་དབུ་ལ་བརྒྱན་པ༔ སྐུ་སྟོད་ལ་ཞིང་གི་གཡང་གཞི་གསོལ་བ༔ སྐུ་སྨད་ལ་སྟག་གི་ཤམ་ཐབས་དཀྲིས་པ༔ སྦྲུལ་རིགས་ལྔས་དབུ་དང་ཕྱག་ཞབས་ལ་བརྒྱན་པ༔ གདོལ་བ་ནག་པོའི་དོ་ཤལ་བྱས་པ༔ མི་མགོ་ཁྲག་འཛག་པ་ལྔ་བཅུའི་དོ་ཤལ་དང་༔ རྡོ་རྗེའི་གོ་ཁྲབ་གསོལ་བའི་བར་ཐམས་ཅད་ལྕགས་ཀྱི་སྡིག་པ་ཕྲ་མོས་གཏམས་པ༔ སྐུའི་བ་སྤུ་ལ་མེའི་ཚྭ་ཚྭ་འཕྲོ་བར་གྱུར་༔ དེའི་ཐུགས་ཀར་རྡོ་རྗེའི་དབུས་སུ་གསེར་གྱི་མཆོད་རྟེན་རི་རབ་བུམ་པ་བྲེ་ཏོག་དང་ལྡན་པའི་བུམ་པར༔ ཧཱུྃ་དམར་པོ་ལ་རྩ་བའི་སྔགས་ཀྱིས་བསྐོར་བ་གྱུར༔ མདུན་གྱི་ནམ་མཁར་སངས་རྒྱས་བྱང་ཆུབ་སེམས་དཔའ་ཐམས་ཅད་ཐུགས་རྗེ་ནུས་པ་བསྐྱེད་ནས་བཞུགས་པར་གྱུར༔ བདག་གིས་སྤྱི་གཙུག་ནོར་བུར་སྣང་བ་མཐའ་ཡས་དམར་པོ་མཉམ་བཞག་དང་༔ ལོངས་སྐུའི་རྒྱན་དང་ལྡན་པ༔ ཚོན་གང་བ་ཞིག་ཏུ་གྱུར༔ དེའི་འོག་ཏུ་གནམ་ལྕགས་ཀྱི་བྱ་ཁྱུང་མཐིང་ནག་མེའི་གཤོག་པ་རྡེབ་ཅིང་སྤྲུག་པ༔ ཀྲི་ཀྲི་ཧྲི་ཧྲི་ཞེས་པའི་སྒྲ་སྒྲོག་པ༔ ལག་
པ་གཉིས་ཀྱིས་སྦྲུལ་རིགས་ལྔའི་མགོ་ཁར་བཅུག་ནས་ཟ་བར་གྱུར༔ དཔྲལ་བར་གསེར་གྱི་འཁོར་ལོ་རྩིབས་བཞི་པའི་ལྟེ་བར༔ སྐུ་ཐམས་ཅད་འདུས་པའི་ལྷ་འཇམ་དཔལ་སེར་པོ་ཞལ་གཅིག་ཕྱག་གཉིས་ལོངས་སྐུའི་རྒྱན་རྫོགས་པ༔ གཡས་པས་ཤེས་རབ་རལ་གྲི་ཀླད་ལ་བསྐོར་བ༔ གཡོན་པས་སྡིགས་མཛུབ་དང་སྦྲུལ་ཞགས་བསྣམས་པ༔ དེའི་དཔྲལ་བར་ཨོཾ་སེར་པོ་འོད་ཟེར་དང་ལྡན་པ༔ མགྲིན་པར་པདྨ་དམར་པོ་འདབ་མ་བཞི་པའི་ལྟེ་བར༔ གསུང་གི་ལྷ་རྟ་མགྲིན་དམར་པོ་ཞལ་གཅིག་ཕྱག་གཉིས་པ༔ རབ་ཏུ་ཁྲོས་པའི་ཆ་ལུགས་དང་ལྡན་པ༔ སྤྱི་གཙུག་ན་རྟ་མགོ་ལྗང་ཞུར་རྔོག་མ་ལེ་བརྒན་སྤྲུག་ཅིང་རྟ་སྐད་སྟོང་གསུམ་ཁེངས་པར་འཚེར་བས་མ་མོ་མཁའ་་འགྲོ་ཐམས་ཅད་དབང་དུ་བསྡུ་བ༔ སྣང་སྲིད་གདོན་བགེགས་ཐམས་ཅད་འདར་ཞིང་བསྔངས་བ༔ ཕྱག་གཡས་རྡོ་རྗེའི་དབྱུག་པ་ནམ་མཁར་ཕྱུར་བ༔ གཡོན་པས་ཞགས་པ་དང་སྡིགས་མཛུབ་བསྒྲེང་བ༔ དེའི་མགྲིན་པར་གསུང་གི་ངོ་བོ་ཨཱདམར་པོ༔ བདག་གི་ཐུགས་ཀར་གོང་གི་མཆོད་རྟེན་བུམ་པར་ཐུགས་ཀྱི་ལྷ་གསང་བདག་ཕྱག་ན་རྡོ་རྗེ་མཐིང་ནག༔ ཞལ་གཅིག་ཕྱག་གཉིས་པ་རབ་ཏུ་ཁྲོས་པའི་བདག་
ཉིད༔ གཡས་པས་གསེར་གྱི་རྡོ་རྗེ་རྩེ་དགུ་པ་ནམ་མཁའ་ལ་ཕྱར་བ༔ གཡོན་པས་སྡིགས་མཛུབ་ཀྱི་རྩེ་ལ་མེ་འབར་བ་ཐུགས་ཀར་བསྒྲེང་བ༔ སྦྲུལ་དང་སྟག་ཤམ་གྱིས་བརྒྱན་པ༔ སྒེག་ཅིང་གཏུམ་པ༔ ཞབས་བརྐྱང་བསྐུམ་དུ་བཞུགས་པར་གྱུར༔ དེའི་ཐུགས་ཀར་ཧཱུཾ་མཐིང་ནག་འོད་དུ་འཕྲོ་བ་ཐུགས་ཀྱི་ངོ་བོ༔ བདག་ཉིད་ཀྱི་ལྟེ་བ་སྤྲུལ་པའི་འཁོར་ལོ་འདབ་བཞིའི་དབུས་སུ་ཕག་མོ་མཐིང་ནག་གྲི་གུག་དང་ཐོད་ཁྲག་འཛིན་པ༔ ཞབས་གཡས་བསྐུམ་པ་མཚན་མ་ལ་གཏད་པ༔ གཡོན་བརྐྱང་བ་རོའི་གདན་ལ་མནན་པ༔ ཁཊ་མཆན་དུ་བཅུག་པ༔ རྒྱན་དྲུག་དང་མི་མགོའི་ཕྲེང་བས་སྤྲས་པ༔ འདབ་བཞིའི་མདུན་དུ་རྡོ་རྗེ་མཁའ་འགྲོ་དཀར་མོ༔ གཡས་སུ་པདྨ་མཁའ་འགྲོ་དམར་མོ༔ གཡོན་དུ་རིན་ཆེན་མཁའ་འགྲོ་སེར་མོ༔ རྒྱབ་ཏུ་ལས་ཀྱི་མཁའ་འགྲོ་ལྗང་མོ༔ དེ་རྣམས་ཀྱང་བརྐྱང་བསྐུམ་གྲི་ཐོད་གར་ཐབས་བཅས་ཏེ་གཙོ་མོ་ལྟར་བསྐྱེད༔ ཐུགས་ཀར་མ་ཧ་རི་ནི་ས་རང་རྟགས་ཀྱི་སྙིང་པོ་རེ་རེ་སྟེ༔ ཡོན་ཏན་གྱི་ངོ་བོར་གྱུར༔ གསང་གནས་སུ་ཕྲིན་ལས་ཀྱི་ལྷ་ཡཀཱ་མེ་དབལ་མཐིང་ནག་ཞལ་གཅིག་ཕྱག་གཉིས་པ༔ གཡས་རྡོ་རྗེ་ནམ་མཁར་ཕྱར་བ༔ གཡོན་པས་ཞགས་པ་
དང་བརྡུང་བའི་ཐོ་བ་འཛིན་པ༔ སྐུའི་བ་སྤུ་རེ་རེ་ལས་ཀྱང་ཁྲོ་ཚོགས་རླུང་ལྟར་འཚུབ་ཅིང་སེར་རྒོད་ལྟར་འབེབས་པ༔ སྐུ་ལ་མེ་འོད་མཚོན་ཆའི་ཆར་དུ་འབེབས་པ་ཐུགས་ཀར་ཧཱུྃ་མཐིང་གིས་མཚན་པར་གྱུར༔ དེའི་ཤར་དུ་ཞི་བའི་རྡོ་རྗེ་དྲག་པོ་རྩལ་དཀར་པོ་ཞལ་གཅིག་ཕྱག་གཉིས་པ༔ རྡོ་རྗེ་གྲི་གུག་དང་ཐོད་ཁྲག་ཁྲོ་བོའི་ཆས་རྣམས་རྫོགས་པར་གྱུར༔ ལྷོར་རཏྣ་དྲག་པོ་རྩལ་སེར་ནག་བེ་ཅོན་དང་ཐོད་ཁྲག་ཁྲོ་བོའི་ཆས་རྣམས་རྫོགས་པར་གྱུར༔ ནུབ་ཏུ་པདྨ་དྲག་པོ་རྩལ་དམར་པོ་པདྨ་དང་ཐོད་ཁྲག་བསྣམས་པ་ཁྲོ་བོའི་ཆས་རྣམས་རྫོགས་པར་གྱུར༔ བྱང་དུ་ཀརྨ་དྲག་པོ་རྩལ་ལྗང་ནག་རྒྱ་གྲམ་ཐོད་ཁྲག་འཛིན་པ་ཁྲོ་བོས་ཆོས་རྣམས་རྫོགས་པར་གྱུར༔ དེ་དག་ཐམས་ཅད་ཁྲོ་བོའི་ཆས་རྣམས་རྫོགས་པ་གྱད་ཀྱི་དོར་སྟབས་སུ་བཞུགས་པར་གྱུར༔ དེའི་ཕྱི་རིམ་དུ་ཤར་དུ་རྡོ་རྗེ་མཁའ་འགྲོ་ཡབ་ཡུམ་དཀར་མོ་གྲི་ཐོད་འཛིན་པ༔ ལྷོར་རཏྣ་མཁའ་འགྲོ་ཡབ་ཡུམ་སེར་མོ་གྲི་ཐོད་འཛིན་པ༔ ནུབ་ཏུ་པདྨ་མཁའ་འགྲོ་ཡབ་ཡུམ་དམར་མོ་གྲི་ཐོད་འཛིན་པ༔ བྱང་དུ་ཀརྨ་མཁའ་འགྲོ་ཡབ་ཡུམ་ལྗང་ནག་གྲི་ཐོད་འཛིན་པ༔ ཀུན་ཀྱང་གཡས་བསྐུམ་གཡོན་བརྐྱང་༔ ཡུམ་རྣམས་ཀྱི་སྐུ་ཡབ་དང་
འདྲ་ཞིང་གྲི་ཐོད་འཁྱུད་པ༔ པདྨ་དང་མི་རོའི་གདན་ལ་བཞུགས་པར་བསྐྱེད༔ ཀུན་ཀྱང་དབུ་སྐྲའི་ཐོར་ཅོག་ལ་རྡོ་རྗེ་ལ་སོགས་རང་རྟགས་ཀྱིས་མཚན་པའོ༔ དེའི་ཤར་ལྷོ་ན་གཤིན་རྗེ་ཚེ་བདག་མཐིང་ནག་གཡས་འཁོར་ལོ་དང་༔ གཡོན་ལྕགས་ཀྱུ་དང་ཞགས་པ་འཛིན་པ༔ ལྷོ་ནུབ་ཏུ་ཁྲོས་མ་ནག་མོ་གྲི་གུག་དང་ཐོད་ཁྲག་འཛིན་པ༔ ཁཊཾ་ག་མཆན་ཁུང་དུ་བཅུག་པ༔ མི་མགོའི་དོ་ཤལ་ཅན༔ གཡས་བསྐུམ་གཡོན་བརྐྱང་གི་མི་རོའི་གདན་ལ་བཞུགས་པའོ༔ ནུབ་བྱང་དུ་བཛྲ་ཀཱི་ལ་ཡ་མཐིང་ནག༔ ཕྱག་གཉིས་ཐུགས་ཀར་ཕུར་པ་འདྲིལ་བ༔ དུར་ཁྲོད་ཀྱི་ཆས་བརྒྱད་རྫོགས་པ༔ མཁའ་འགྲོ་སེང་གེའི་གདོང་ཅན་མཐིང་ནག་གྲི་ཐོད་འཛིན་པ༔ ཞིང་ལྤགས་དང་སྟག་ཤམ་སྦྲུལ་དང་ཐོད་པའི་ཕྲེང་བས་བརྒྱན་པ༔ རོའི་གདན་ལ་བཞུགས་པའོ༔ དེའི་ཕྱི་རིམ་དུ་རྩིབས་བཅུ་ལ༔ ཤར་སྟོད་དུ་ཧཱུྃ་ཀ་ར་དཀར་པོ་མདའ་གཞུ་འགེངས་པ༔ ཤར་སྨད་དུ་རྣམ་རྒྱལ་དཀར་པོ་གཡས་འཁོར་ལོ་དང་གཡོན་ཁྲམ་ཤིང་འཛིན་པ༔ ཤར་ལྷོར་དབྱུག་པ་སྔོན་པོ་གཡས་དབྱུག་ཐོ་དང་གཡོན་མེ་དཔུང་འཛིན་པ༔ ལྷོར་གཤིན་རྗེའི་གཤེད་སྔོན་པོ་གཡས་བེ་ཅོན་དང་གཡོན་སྦྲུལ་ཞགས་འཛིན་པ༔ ལྷོ་ནུབ་ཏུ་མི་གཡོ་
མགོན་པོ་སྨུག་ནག་གཡས་རལ་གྲི་དང་གཡོན་སྦྲུལ་ཞགས་འཛིན་པ༔ ནུབ་ཏུ་རྟ་མགྲིན་དམར་པོ་དབྱུག་ཐོ་དང་ལྕགས་སྒྲོག་འཛིན་པ༔ ནུབ་བྱང་དུ་འདོད་རྒྱལ་དམར་སྐྱ་རྡོ་རྗེ་དང་ནེའུ་ལེ་འཛིན་པ༔ བྱང་དུ་བདུད་རྩི་འཁྱིལ་པ་ལྗང་ནག་རྒྱ་གྲམོ་དང་དྲིལ་བུ་འཛིན་པ༔ བྱང་ཤར་དུ་ཁམས་གསུམ་རྣམ་རྒྱལ་སྔོ་སྐྱ་འཁོར་ལོ་དང་ཞགས་པ་འཛིན་པ༔ བྱང་ཤར་སྨད་དུ་སྟོབས་པོ་ཆེ་ལྗང་ནག་གཡས་སྟ་རེ་དང་གཡོན་ཐོད་དབྱུག་འཛིན་པའོ༔ ཀུན་ཀྱང་དུར་ཁྲོད་ཀྱི་ཆས་བརྒྱད་དང་ལྡན་པ༔ ཞབས་གཡས་བསྐུམ་གཡོན་བརྐྱང་དོར་སྟབས་ཀྱིས་ཕྱོགས་སྐྱོང་བཅུའི་གདན་ལ་རབ་ཏུ་ཁྲོས་པའི་ཚུལ་གྱིས་བཞུགས་པའོ༔ དེའི་ཤར་སྒོ་རྟ་གདོང་མ་དཀར་མོ་ལྕགས་ཀྱུ་འཛིན་པ༔ ལྷོ་སྒོར་ཕག་གདོང་མ་ནག་མོ་ཞགས་པ་འཛིན་པ། ནུབ་སྒོར་སྤྲེལ་གདོང་མ་དམར་མོ་ལྕགས་སྒྲོག་འཛིན་པ༔ བྱང་སྒོར་སྤྱང་གདོང་མ་ལྗང་གུ་དྲིལ་བུ་འཛིན་པའོ༔ ལྷ་གཙོ་འཁོར་དེ་དག་རང་རང་གི་ས་བོན་དང་ཨོཾ་ཨཱཿཧཱུྃ་གིས་སྐུ་གསུང་ཐུགས་ཀྱིས་བྱིན་གྱིས་བརླབས༔ ཡེ་ཤེས་ལྔས་དབང་བསྐུར་བར་གྱུར༔ རང་རང་གི་ས་བོན་ལས་འོད་ཟེར་འཕྲོས༔ ཡེ་ཤེས་པ་རྣམས་འོག་མིན་ནས་སྤྱན་དྲངས་ཏེ་དམ་ཚིག་པ་རྣམས་
དང་གཉིས་སུ་མེད་པར་གྱུར༔ ཁྱད་པར་དུ་གཙོ་བོའི་ཡེ་ཤེས་པ་འོད་ཀྱི་ལམ༔ སྲིན་པོའི་རོ་བསྣོལ་བའི་སྟེང་ནས༔ སྔོན་གྱི་ཐུགས་དམ་གྱིས་སྐད་ཅིག་ལ་རབ་ཏུ་ཁྲོས་ནས་གནས་འགྱུར་ཏེ་བྱོན་ནས་དབྱེར་མེད་དུ་གྱུར༔ ༈ ཧཱུྃ༔ ཡུལ་གྱི་མིང་ནི་རྔ་ཡབ་གླིང་ཞེས་པ་ནས་བསྟོད་པ་ལ་མ་ཐུག་བར་འདོན༔ དེ་ནས་བསྟོད་པ་ནི་རྣམ་རྒྱལ་འབར་བ་བྱ་ལ༔ ཐུགས་དམ་དབྱིངས་ནས་བསྐུལ་ཞེས་པ་སྐྱུར་ལ༔ ཕྱག་འཚལ་བསྟོད་ཁོ་ན་བྱའོ༔ སྔགས་ནི༔ ཨ་ཧཱུྃ་ཧཱུྃ་ཕཊ་ཕཊ༔ ཡན་ཆད་རྒྱུན་དུ་བཟླས་ཤིང་༔ དེ་ནས་ཕྱོགས་བཅུའི་རྒྱལ་བ་རྣམས་དང་རང་མདུན་གྱི་བུདྡྷའི་ཐུགས་དམ་བསྐུལ༔ འོད་ཟེར་དམར་པོའི་ཚུལ་དུ་བདག་ལ་ཐིམ༔ འདི་ནི་རྒྱུན་དུ་བསྒོམ་ཞིང་དམིགས་པའོ༔ དེ་ལ་བསྙེན་གྲངས་ཐེམ་ནས་འཁོར་ལོ་འཁོར་བ་སོགས་གཞུང་གི་དྲག་པོའི་དེ་རྣམས་བསྒོམ་པའོ༔ སྔགས་རིང་ཁྲི་ཕྲག་ལས་མི་མང་བ་བཟླའོ༔ དེ་ནས་རྗེས་རྣམས་ནི་གཞུང་ལྟར་རོ༔ དྷྭཾ༔ གུ་དྲག་ཕྱི་སྒྲུབ་དམིགས་པའི་གསལ་བྱེད་འདི༔ རང་གི་ཐུགས་ཀའི་ཧཱུྃ་ཡིག་དམར་པོ་ལས༔ འོད་ཟེར་དམར་པོ་མདུན་བསྐྱེད་ལྷ་ལ་ཕོག༔ ཐུགས་དམ་རྒྱུད་བསྐུལ་བྱིན་རླབས་དངོས་གྲུབ་ཀུན༔ འོད་ཟེར་
དམར་པོའི་ཚུལ་དུ་བདག་ལ་ཐིམ༔ སླར་ཡང་ཐུགས་ཀའི་ཧཱུྃ་ཡིག་ལས༔ འོད་ཟེར་དཔག་ཏུ་མེད་པ་ཕྱོགས་བཅུར་འཕྲོས༔ ཕྱོགས་བཅུའི་རྒྱལ་བ་རྣམས་ཀྱི་ཐུགས་རྒྱུད་བསྐུལ༔ དེ་དག་ཀུན་གྱི་ཐུགས་རྗེ་བྱིན་རླབས་ཀུན༔ འོད་ཟེར་དམར་པོའི་ཚུལ་དུ་བདག་ལ་ཐིམ༔ དེ་ལྟར་བསྒོམ་ཞིང་ཨ་ཙིག་རྐྱང་པ་བཟླ༔ བདག་མདུན་ཐུགས་ཀར་མཆོད་རྟེན་བུམ་པ་རུ༔ གསང་བདག་ཐུགས་ཀར་ཉི་མའི་དཀྱིལ་འཁོར་སྟེང་༔ ཧཱུྃ་ཡིག་དམར་པོ་གྱེན་དུ་འགྲེང་བའི་མཐར༔ ཨ་ཙིག་སྔགས་འབྲུ་ཉི་ཤུ་གཡས་སུ་འཁོར༔ དེ་ལས་འོད་ཟེར་དམར་པོ་གྱུར་ནས་ཀྱང་༔ བདག་བསྐྱེད་ཞལ་ནས་མདུན་བསྐྱེད་ཞལ་དུ་ཞུགས༔ མདུན་བསྐྱེད་སྔགས་ཕྲེང་ལ་ཐིམ་ཐུགས་རྒྱུད་བསྐུལ༔ མདུན་བསྐྱེད་ཐུགས་ཀའི་འོག་ནས་ཚུར་བྱུང་ནས༔ རང་གི་ཐུགས་ཀར་ཐིམ་པས་དངོས་གྲུབ་ཐོབ༔ རྗེས་ནས་འོད་ཟེར་དེ་ཡང་སྔགས་ཕྲེང་བསྒྱུར༔ དེ་ནི་འདི་ཡི་ལུགས་ཀྱི་བསྙེན་པ་ཡིན༔ བདག་མདུན་ཐུགས་ཀའི་ཧཱུྃ་ལས་ཧཱུྃ་དམར་པོ༔ གྲངས་མེད་འཕྲོས་པས་འཇིག་རྟེན་ཐམས་ཅད་ཁེངས༔ དེ་དག་ཐམས་ཅད་མེ་དབལ་སྐུ་རུ་གྱུར༔ ཀུན་ཀྱང་རྡོ་རྗེ་དང་ནི་ཐོ་བ་འཛིན༔ རང་ལ་གནོད་པའི་གདོན་
བགེགས་རྒྱལ་འགོང་རྣམས༔ ཐོ་བས་བརྡུང་ཞིང་གསོད་པར་བྱེད་པ་དང་༔ ལ་ལས་མཚོན་ཆའི་འཁོར་ལོ་བཟུང་ནས་གཏུབས༔ ལྷག་མ་སྐུ་ལས་མེ་དཔུང་འབར་བས་བསྲེགས་གཞན་རྣམས་བསྔང་སྐྲག་འདར་དང་བརྒྱལ་ཞིང་འབོག༔ དམྱལ་སྒྲ་ཙིར་སྒྲས་གང་ཞིང་དེང་ཕྱིན་ཆདཿ་ཅི་གསུངས་བཀའ་ཉན་ཐ་ཚིག་འབུལ་བར་བསྒོམ༔ དེ་ལྟར་ཁྲོ་བོས་འཇིག་རྟེན་གང་ནས་ཀྱང་༔ སྔགས་སྒྲ་འབྲུག་སྟོང་ལྡིར་བཞིན་སྒྲོག་བྷོ་ལ༔ སྔགས་རིང་བཟླ་བ་འདི་ནི་སྒྲུབ་པ་ཡིན༔ ༈ ལས་སྦྱོར་དམིགས་པ་འདི་ལ་རིགས་གཉིས་ཡོད༔ བདག་མདུན་དྲག་པོའི་སྐུ་ཡི་འོད་ཟེར་ལས་མེ་ཡི་འཁོར་ལོ་རྩིབས་སྟོང་གུར་འདྲ་བ༔ དེ་ཡི་ནང་དུ་བདག་མདུན་བསྲུང་བྱ་ཚུད༔ མེའི་འཁོར་ལོ་སྤུ་གྲི་ལྟར་རྣོ་བ༔ རྩིབས་བར་རྣམས་སུ་གནམ་ལྕགས་སྡིག་རྒོད་རེ༔ ཕྱི་རོལ་ནམ་མཁའི་ཁམས་ཀུན་མེ་དབལ་ནས༔ དེ་དག་འོད་ཟེར་མེ་ཡི་འཁོར་ལོ་ནི༔ རྩིབས་སྟོང་ལྡན་པ་རྩིབས་རྩེ་ནང་དུ་བསྟན༔ དེ་ཡང་རྩིབས་བར་རྣམས་སུ་སྡིག་པས་མཚན༔ གདུབ་བུ་ལྟ་བུ་གཡོན་དུ་དྲག་ཏུ་འཁོར་ཕྱི་ནང་རྩིབས་གཉིས་སོ་ནི་འཐབས་པའི་བར༔ རྒྱལ་བསེན་སྡེ་བརྒྱད་སྐྱེ་ནས་རྦད་རྦད་བཅད༔ མགོ་ལུས་ཤ་
ཁྲག་སྡིག་པ་རྣམས་ཀྱིས་ཟོས༔ དེ་ལྟར་བསྒོམ་ཞིང་སྔགས་རིང་འདོན་པ་ཡིན༔ ༈ ཡང་ནི་བདག་མདུན་ཐུགས་ཀའི་འོད་ཟེར་ལས༔ གནམ་ནི་འཁོར་ལོ་རྩིབས་སྟོང་རྣོ་ངར་ལྡན༔ གའུ་སོ་ལྟར་རྩིབས་རྣམས་ཐུར་དུ་གུག༔ ས་གཞི་མེ་ཡི་འཁོར་ལོ་རྩིབས་སྟོང་པ༔ གའུ་ཁ་བཞིན་གྱེན་དུ་གུག་པ་སྟེ༔ སྟེང་འོག་རྩིབས་བར་ཐམས་ཅད་སྡིག་པས་མཚན༔ ཁ་སྦྱོར་ནང་དུ་བདག་མདུན་བསྲུང་བྱ་ཚུད༔ སྟེང་ནས་གསེར་གྱི་འཁོར་ལོ་གཡས་སུ་འཁོར༔ འོག་ནས་གནམ་ལྕགས་འཁོར་ལོ་གཡོན་དུ་འཁོར༔ རྩིབས་རྩེ་ཁ་སྤྱད་བར་དུ་རྒྱལ་བསེན་དང་༔ གནོད་བྱེད་སྐྱེ་ལུས་ཕྲུལ་ཕྲུལ་རྦད་རྦད་གཏུབས༔ ཤ་ཁྲག་རྩིབས་བར་སྡིག་པ་རྣམས་ཀྱིས་ཟོས༔ འཁོར་ལོའི་རྩིབས་ལས་མེ་འབར་གཞོབ་ཐུལ་བསྲེག༔ དེ་ལྟར་བསྒོམ་ཞིང་སྔགས་རིང་བཟླ་བའོ༔ དམིགས་པ་དེ་གཉིས་གང་བདེ་བྱས་ཀྱང་རུང་༔ མཐར་ནི་དེ་དག་འོད་དུ་ཞུ་ནས་ཀྱང་༔ བདག་མདུན་རྣམས་ལ་ཐིམ་པས་སྟོང་ཉིད་བསྒོམས༔ སྔགས་རིང་ལ་ནི་ཁྲི་གཅིག་ཚང་བར་བྱ༔ དེ་ལས་མང་ཉུང་རྟགས་ལ་ལྟ་བ་ཡིན༔ རྗེས་ཀྱི་བསྡུ་ཆོག་ལ་སོགས་ཕྱག་ལེན་ལྟར༔ གཞུང་གི་དམིགས་པ་རྒྱས་དྲག་གོ་དཀའ་
བས༔ དོན་འདུས་ཚིག་ཉུང་གོ་བར་སླ་བ་འདི༔ དབོན་ཆུང་ནམ་མཁས་འདི་ཉིད་སྒྲུབ་པའི་ཚེ༔ རཱ་ག་ཨ་སྱས་ཞལ་ནས་གདམས་པ་ལྟར༔ གླིང་ཚང་པདྨ་དད་པས་ཡི་གེར་བཀོད། ཉེས་འགལ་མཆིས་ན་ཆོས་བདག་སྲུང་མའི་ཚོགས་ལ་བཤགས༔ མ་འོངས་སྔགས་འཆང་ཀུན་ལ་ཕན་པར་ཤོག༔ མངྒ་ལཾ༔ ཨོཾ་ཨཱཧཱུྃ་ཨ་ཙིག་ནིར་ཙིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཨ་ཧཱུཾ་ཧཱུཾ་ཕཊ་ཕཊ༔ བསྙེན་པ་དངོས་གཞིའི་སྔགས་འདིའོ། །རྭ་ཙ་གནོད་བྱེད་ཀྱི་སྙིང་ལ་མཱ་ར་ཡ་ཧཱུྃ་ཕཊ༔ སྒྲུབ་པའི་སྔགས་འདིའོ། །ཨ་ཡ་མ་དུ་རུ་ཙ་ཤ་ན་ས་མ་ཡ་ཧཱུྃ་ཕཊ༔ ལས་སྦྱོར་དམིགས་པའི་ངར་དང་བཅས་འདི་ཡན་སྦྲེལ་ལ་བཟླ། ཨོཾ་བཛྲ་ཧཱུྃ༔ ཡཀྵ་ཧཱུྃ༔ རཀྟ་ཧཱུྃ༔ ལས་སྦྱོར་སྔགས་འདིའོ། ། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།