གུ་རུ་དྲག་པོའི་གསང་སྒྲུབ་ཡང་གསང་བླ་མེད་དོན་གྱི་སྙིང་པོ།
གུ་རུ་དྲག་པོའི་གསང་སྒྲུབ་ཡང་གསང་བླ་མེད་དོན་གྱི་སྙིང་པོ་བཞུགས་སོ༔
གུ་རུ་བཛྲ་ཀྲོ་དྷ་ཡེ༔ སྟ་གོན་བཅའ་ཚོགས་གཞུང་ལྟར་གྲུབ་ནས༔ ལས་བྱང་ཏིང་འཛིན་རྣམ་གསུམ་ཡན་ཆད་འདོན༔ ༈ རང་གི་སྙིང་གར་ཧཱུྃ་མེའི་མདོག་ཅན་ཅིག་བསམ༔ དེ་ནས་ཐུགས་ཀའི་ཧཱུྃ་ལས་ཨེ་ནག་པོ་ཞིག་ཆད༔ ཅེས་སོགས་ནས༔ དེ་ཡོངས་སུ་གྱུར་པ་ལས་ཀྱི་བར་ནི་ནང་སྒྲུབ་དང་ཁྲོ་རྒྱལ་སྟོབས་འདུས་ལྟར་རོ༔ ༈ སྐད་ཅིག་གིས་བདག་ཉིད་གུ་རུ་དྲག་པོ་མེའི་མདོག་ཅན༔ ཐོད་སྐམ་དང་རིགས་ལྔས་དབུ་ལ་བརྒྱན་པ༔ ཞལ་གསུམ་ཕྱག་དྲུག་ཞབས་བཞི་དོར་ཐབས་སུ་བསྒྲད་པ༔ གཡས་དཀར་གཡོན་སྔོ་དབུས་དམར་ནག་ཏུ་འབར་བ༔ སྤྱན་དགུ་སྡང་
མིག་བགེགས་ལ་གཟིར་བ༔ ཞལ་གདངས་ལྗགས་འདྲིལ་རྣོ་དབལ་གྱི་མཆེ་བ་ཟངས་ཡག་ཏུ་གཙིགས་པ༔ ཤངས་ནས་རླུང་འཚུབ་པ༔ སྨིན་མ་གློག་ལྟར་འཁྱུག་པ༔ ཨག་ཙམ་ལས་མེ་འབར་བ༔ རྐན་སྒྲ་རྡེབ་པ་ནམ་མཁའི་འབྲུག་དང་མཉམ་པ༔ ཕྱག་གཡས་ཀྱི་དང་པོས་གནམ་ལྕགས་ཀྱི་རྡོ་རྗེ་ཁ་གདེངས་བ་ནམ་མཁའ་ལ་ཕྱུར་བ༔ བར་པ་ན་གྲི་གུག་ཐུར་དུ་འཕྱང་བ༔ ཐ་མ་ན་རལ་གྲི་མེ་འབར་བ་འཛིན་པའོ༔ གཡོན་གྱི་དང་པོས་ཁཊཾ་དང་སྡིགས་མཛུབ་ཀྱི་རྩེ་ལ་མེ་འབར་བ༔ བར་པས་ཐོད་ཁྲག་ཐུགས་ཀར་འཛིན་པ༔ ཐ་མ་ན་ལྕགས་ཀྱི་སྡིག་པ་མགོ་དགུ་
པའི་སྐེ་ནས་བཟུང་བ༔ དབུ་སྐྲ་ཁམ་སེར་སྤྱི་བོར་བཅིངས་པ༔ ཟར་བུས་སྐུ་རྒྱབ་ཁེབས་པར་གཏིབས་པ༔ གླང་ཆེན་ཀོ་རློན་ཞིང་གི་གཡང་གཞི༔ སྟག་ལྤགས་ཀྱི་ཤམ་ཐབས་སྦྲུལ་རིགས་ལྔས་སྐུ་ལ་བརྒྱན་པ༔ གདོལ་བ་ནག་པོས་དོ་ཤལ་བྱས་པ༔ མི་མགོ་ཁྲག་འཛག་པ་ལྔ་བཅུ་དང་༔ ཐོད་སྐམ་སྤེལ་མར་བརྒྱུས་སོ༔ རྡོ་རྗེའི་གོ་ཁྲབ་ཀྱི་བར་མཚམས་ན་ལྕགས་ཀྱི་སྡིག་པ་ཕྲ་མོས་གཏམས་པ༔ དེའི་མདུན་དུ་ཡུམ་རྡོ་རྗེ་ཕག་མོ་མཐིང་ནག་འབར་བ་ཞལ་གཅིག་ཕྱག་གཉིས་པ༔ གཡས་གྲི་གུག་ཡབ་ཀྱི་མགུལ་ནས་འཁྱུད་པ༔ གཡོན་ཐོད་ཁྲག་ཡབ་ལ་སྟོབས་པ་ཡབ་དང་ཞལ་སྦྱོར་བ༔ སྤྱི་བོ་ནས་ཕག་ཞལ་ནག་པོ་གྱེན་དུ་ངུར་པ༔ ཞབས་གཡས་བརྐྱང་གཡོན་བསྐུམ་གར་སྟབས་ཀྱིས་སྦྱོར་བ༔ གཟིག་གི་ཤམ་ཐབས་གྲོལ་བ༔ རུས་པའི་རྒྱན་དྲུག་གིས་སྤྲས་པར་གྱུར་དབུ་སྐྲའི་ཐོར་ཚུགས་སུ་ཨོཾ་ཨཱཧཱུཾ་པདྨ་དྷ་རི་ནི་ཧཱུྃ༔ རིགས་བདག་སྣང་བ་མཐའ་ཡས་སྐུ་མདོག་དམར་པོ་མཉམ་བཞག་གི་ཕྱག་རྒྱ་ཅན༔ སྤྲུལ་སྐུའི་ཆ་ལུགས་སུ་བཞུགས་པ༔ དེའི་འོག་ཏུ་ཨོཾ་ཨཱཿཧཱུྃ་བཛྲ་ཁྲོ་གྷ་རུ་ཎ་ཙ་ལེ་ཙ་ལེ་ཧཱུཾ་ཕཊ༔ ཡེ་ཤེས་ཀྱི་ཁྱུང་དཀར་པོ་གནམ་ལྕགས་ཀྱི་མཆུ་སྡེར་ཅན༔ ཁྲོ་ཆུའི་རྭ་རྩེ་ནས་
མེ་འབར་བ༔ མེའི་གཤོག་པ་རབ་ཏུ་རྡེབ་པ༔ ཀྲི་ཀྲི་སྒྲ་སྒྲོགས་པ༔ སྤྱི་གཙུག་སྟེང་དུ་ཡར་ལ་པད་འདབ་གསེར་གྱི་འོད་དུ་འབར་བ་ཉི་ཟླའི་གདན་ལ༔ ཐོད་ཕྲེང་རྩལ་སྐུ་མདོག་མཐིང་ནག་འབར་བ་གཡས་ཁཊཾ་གཡོན་ཐོད་ཁྲག་འཛིན་པ༔ གཡས་ཀྱི་གྲུ་མོ་ན་ཐོད་པ་སྟག་སྤྱོད་ཀྱི་རྔ་བཀལ་བ༔ དེ་ལས་སྒྲ་རང་གྲགས་སུ་འཁྲོལ་བ༔ སྟོང་གསུམ་ཀུན་ཀྱང་ཧཱུཾ་སྒྲ་ཏི་རི་རི་ཡོད་པར་བསྒོམ༔ དབུ་སྐྲ་ཐོར་ཚུགས་གྱེན་དུ་འཁྱིལ་བ༔ སྐུ་ལ་རུས་པའི་རྒྱན་དྲུག་གིས་སྤྱས་པར་གྱུར༔ དུར་ཁྲོད་ཀྱི་ཚེས་བརྒྱད་ཀྱིས་བརྒྱན་ཅིང་༔ ཞབས་རྡོ་རྗེའི་སྐྱིལ་ཀྲུང་དུ་བཞུགས་པ༔ དཔའ་བོ་དཔའ་མོ་འབུམ་གྱིས་བསྐོར་བར་གྱུར༔ དཔྲལ་བར་ཨོཾ་ཨཱཿཧཱུྃ་མཉྫ་ཤི་ཡ་མཱན་ཏ་ཀ་ཧཱུྃ་ཕཊ༔ སྐུ་ཡི་ལྷ་འཇམ་དཔལ་གཤིན་རྗེ་སེར་ནག་རལ་གྲི་དང་སྡིགས་མཛུབ་མཛད་པ༔ མགྲིན་པར་ཨོཾ་ཨཱཿཧཱུྃ་པདྨན་ཀྲི་ཏ་ཧྱ་གྷི་ཝ་ཧཱུྃ་ཕཊ༔ གསུང་གི་ལྷ་དབང་ཆེན་དམར་པོ་ཞལ་གཅིག་ཕྱག་གཉིས་གཡས་དབྱུག་ཐོ་དང་གཡོན་ཐོད་ཁྲག་འཛིན་པར་གྱུར༔ ཐུགས་ཀར་གསེར་གྱི་མཆོད་རྟེན་བང་རིམ་བཞི་པའི་བུམ་པར་ཨོཾ་ཨཱཿཧཱུྃ་བཛྲ་པཱ་ཎི་མ་ཧཱ་ཀྲོ་དྷ་ཧཱུྃ་ཕཊ༔ གསང་བདག་རྡོ་རྗེ་གཏུམ་པོ་ཞལ་གཅིག་ཕྱག་གཉིས་གཡས་རྡོ་
རྗེ་དང་གཡོན་སྡིགས་མཛུབ་སྦྲུལ་རིགས་ལྔས་བརྒྱན་པའོ༔ ལྟེ་བར་འདབ་བཞི་ཆོས་འབྱུང་གི་དབུས་སུ་ཨོཾ་ཨཱཿཧཱུྃ་ཧྲིམ་ཧ་རི་ནི་ས་ཧཱུྃ་ཕཊ༔ སངས་རྒྱས་མཁའ་འགྲོ་མཐིང་ནག་གྲི་ཐོད་བསྣམས་པ༔ དེའི་ཤར་དུ་རྡོ་རྗེ་མཁའ་འགྲོ་དཀར་མོ་གྲི་ཐོད་འཛིན་པ༔ ལྷོར་རིན་ཆེན་མཁའ་འགྲོ་སེར་མོ་གྲི་ཐོད་འཛིན་པ༔ ནུབ་ཏུ་པདྨ་མཁའ་འགྲོ་དམར་མོ་གྲི་ཐོད་འཛིན་པ༔ བྱང་དུ་ལས་ཀྱི་མཁའ་འགྲོ་ལྗང་མོ་གྲི་ཐོད་འཛིན་པ་རྣམས༔ གཡས་བསྐུམ་གཡོན་བརྐྱང་པདྨ་དང་རོའི་གདན་ལ་གར་ཐབས་སུ་བཞུགས་པ༔ ཁཊ་མཆན་དུ་བཅུག་པ་ཁོ་ནའོ༔ གསང་གནས་སུ་ཨོཾ་ཨཱཿཧཱུྃ་བཛྲ་ཧཱུཾ་ཡཀྵ་ཧཱུྃ་རཀཱ་ཧཱུྃ༔ ཕྲིན་ལས་ཀྱི་ལྷ་ཡཀཱ་མེ་དབལ་སྐུ་མདོག་སྨུག་ནག་ཁྲོས་པ༔ གཡས་དབྱུག་ཐོ་དང་གཡོན་སྡིགས་མཛུབ་དང་ཞགས་པ་འཛིན་པར་གྱུར༔ གསང་བའི་བདག་པོའི་ཐུགས་ཀར་ཙིཏྟ་རིན་ཆེན་གསེར་གྱི་མཆོད་རྟེན་ལང་པ་ཞིག་བསྒོམ༔ དེའི་ལྟེ་བར་བུམ་པའི་ནང་དུ་པདྨ་ཉི་མའི་གདན་ལ་ཧཱུྃ་ཅིག་བསྒོམ༔ དེ་ལ་དམ་ཚིག་སྟེ༔ ཨོཾ་བཛྲ་ཛྙཱ་ན་སཏཱ་བཛྲ་ཀྲོ་ཏ་ཧཱུྃ༔ ཞེས་པ་ཡེ་ཤེས་སེམས་དཔའ་བཛྲ་ཧེ་རུ་ཀ་ཚོན་གང་བ་ཞལ་གཅིག་ཕྱག་གཉིས་པ་གཡས་རྡོ་རྗེ་ཐུགས་ཀར་འཛིན་པ༔ གཡོན་དྲིལ་བུ་དཀུ་ལ་བརྟེན་པ༔
དུར་ཁྲོད་ཀྱི་ཆོས་བརྒྱད་ཀྱིས་བརྒྱན་ཅིང་༔ སྐུ་འགྱིང་བག་དང་ལྡན་པ༔ དེའི་ཐུགས་ཀར་རྡོ་རྗེ་ནས་ཙམ་ཞིག་བསྒོམ༔ དེའི་ལྟེ་བར་ཉི་ཟླའི་དཀྱིལ་འཁོར་གའུ་ཁ་སྦྱོར་ཡུངས་འབྲུ་ཙམ་གྱི་ལྟེ་བར་ཧཱུྃ་སྤུས་བྲིས་པ་ཙམ་གྱི་ཐ་མར་སྔགས་ཀྱིས་བསྐོར་བར་གྱུར༔ དེ་ལྟར་གསལ་བའི་ཐུགས་ཀར་ཧཱུྃ་དམར་པོ་བྱེ་རུའི་མདོག་ཅན་ལས་འོད་འཕྲོས་བདེ་ཆེན་དབང་དྲག་རོལ་པའི་དཀྱིལ་འཁོར་ནས་སྤྱན་དྲངས་ཏེ༔ གཉིས་སུ་མེད་པར་བདག་ལ་ཐིམ༔ ལྷ་གཞན་རྣམས་ཀྱང་རང་རང་ཐུགས་ཀར་ས་བོན་ལས་འོད་ཟེར་འཕྲོས༔ རང་འདྲ་བའི་ཡེ་ཤེས་སེམས་དཔའ་སྤྱན་དྲངས་ལ་བདག་ཉིད་ལ་ཐིམ་མོ༔ ཧཱུྃ༔ ཇི་སྙེད་རྒྱལ་བ་འཁོར་དང་བཅས༔ སྔོན་གྱི་ཐུགས་དམ་ཆེན་པོ་ནི༔ སྒྲུབ་ལ་དངོས་གྲུབ་སྩོལ་བ་དང་༔ བདུད་དང་བགེགས་རྣམས་གཞོམ་པ་དང་༔ ཕྲིན་ལས་མ་ལུས་སྒྲུབ་པའི་ཕྱིར༔ སྔོན་གྱི་ཐུགས་དམ་ཇི་བཞིན་དུ༔ དྲག་པོ་ཆེན་པོ་དྲག་ཤུལ་ཅན༔ འཇིགས་བྱེད་འཇིགས་པར་བྱེད་པ་པོ༔ དམར་ནག་མེ་ཡི་ཕྲེང་བ་ཅན༔ ཐུགས་དམ་དབང་གིས་སྤྱན་འདྲེན་ན༔ དམ་ཚིག་དབང་གིས་བདག་ལ་དགོངས༔ དབང་དྲག་རོལ་པའི་དཀྱིལ་འཁོར་ནས༔ གནས་འདིར་སྤྱན་
འདྲེན་གཤེགས་སུ་གསོལ༔ རྗེ་བཙུན་དྲག་པོ་ཐོད་ཕྲེང་རྩལ༔ ཁྲོ་ཚོགས་མང་པོ་སྤྲིན་ལྟར་གཏིབས༔ མཁའ་འགྲོ་འབུམ་གྱི་འཁོར་གྱིས་བསྐོར༔ ལྷ་སྲིན་སྡེ་བརྒྱད་བྲན་དུ་བཀོལ༔ ཡཀྵ་མེ་དབལ་སྐར་ལྟར་འཁྲུགས༔ ཧཱུཾ་དང་ཕཊ་ཀྱི་སྒྲ་ཆེན་སྒྲོག༔ ཁྱེད་ཀྱི་ཐུགས་དམ་དུས་ལ་བབ༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་བདག་ལ་དབང་བསྐུར་ཅིག༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ གུ་རུ་བཛྲ་ཀྲོ་དྷ་བྷ་ག་ཝན་སརྦ་མ་ཧཱ་གུ་རུ་ས་མ་ཡ་ཛ༔ ཛཧཱུྃ་བཾ་ཧོ༔ ཅེས་བྱིན་ཐིབ་ཀྱིས་བྱོན་ནས༔ རང་ལ་ཆུ་དང་ཆུ་འདྲེས་པ་ལྟར་དབྱེར་མེད་དུ་འདྲེས་པར་གྱུར༔ དེ་ནས་དཀྱིལ་འཁོར་བསྐྱེད་པ་ནི༔ ཨོཾ་སྭ་བྷ་ཝ་ཤུདྡྷསརྦ་དྷརྨ་སོགས༔ ཆོས་ཀྱི་དབྱིངས་དམིགས་མེད་སྟོང་པར་གྱུར༔ སྟོང་པའི་ངང་ལས་དཀྱིལ་འཁོར་གཞལ་ཡས་ཁང་གྲུ་བཞི་སྒོ་བཞི་རྟ་བབས་དང་བཅས་པ༔ ཡོངས་སུ་རྫོགས་པའི་ཕོ་བྲང་མཉམ་ཡང་འོད་དུ་འབར་བ༔ ཕྱི་གསལ་ནང་གསལ་ཡེ་ཤེས་ཀྱི་རང་སྣང་ལས་གྲུབ་པའི་དབུས་སུ༔ པདྨ་ཉི་ཟླ་བདུད་བཞིའི་སྟེང་དུ༔ ཧཱུྃ་དམར་ནག་མེའི་ཚ་ཟེར་འཕྲོ་བ༔ དེ་ལས་འོད་ཟེར་འཕྲོས༔ གདོན་བགེགས་
གདུག་པ་ཅན་ཐམས་ཅད་ཚར་བཅད༔ ཕྱོགས་དུས་རྒྱལ་བ་ཐམས་ཅད་ལ་མཉེས་པའི་མཆོད་པས་མཆོད༔ སེམས་ཅན་གྱི་ལས་སྒྲིབ་སྦྱངས༔ ཚུར་འདུས་ཧཱུྃ་ལ་ཐིམ༔ ཆེར་འོད་དུ་འབར་དེ་ཉིད་ཡོངས་སུ་གྱུར་པ་ལས༔ གུ་རུ་དྲག་པོ་དམར་ནག་མེའི་མདོག་ཅན༔ ཐོད་སྐམ་དང་རིགས་ལྔས་དབུ་ལ་བརྒྱན་པ༔ ཞལ་གསུམ་ཕྱག་དྲུག་ཞབས་བཞི་འདོར་ཐབས་སུ་བསྒད་པ༔ གཡས་དཀར་གཡོན་སྔོ་དབུས་དམར་ནག་ཏུ་འབར་བ༔ སྤྱན་དགུ་སྡང་མིག་བགེགས་ལ་གཟིར་བ༔ ཞལ་གདངས་ལྗགས་འདྲིལ་རྣོ་དབལ་གྱི་མཆེ་བ་ཟངས་ཡག་ཏུ་གཙིགས་པ༔ ཤངས་ནས་རླུང་འཚུབ་པ༔ སྨིན་མ་གློག་ལྟར་འཁྱུག་པ༔ ཨག་ཙམ་ལས་མེ་འབར་བ༔ རྐན་སྒྲ་རྡེབ་པས་ནམ་མཁའི་འབྲུག་དང་མཉམ་པ༔ ཕྱག་གཡས་ཀྱི་དང་པོས་གནམ་ལྕགས་ཀྱི་རྡོ་རྗེ་ཁ་གདེངས་པ་ནམ་མཁའ་ལ་གདེངས་བ༔ བར་པས་གྲི་གུག་ཐུར་དུ་འཕྱང་བ༔ ཐ་མ་ན་རལ་གྲི་མེ་འབར་བ་འཛིན་པའོ༔ གཡོན་གྱི་དང་པོས་ཁཊཾ་དང་སྡིགས་མཛུབ་ཀྱི་རྩེ་ལ་མེ་འབར་བ༔ བར་པས་ཐོད་ཁྲག་ཐུགས་ཀར་འཛིན་པ༔ ཐ་མ་ན་ལྕགས་ཀྱི་སྡིག་པ་མགོ་དགུ་པའི་སྐེ་ནས་བཟུང་བ༔ དབུ་སྐྲ་ཁམ་སེར་སྤྱི་བོར་
བཅིངས་པ༔ ཟར་བུས་སྐུ་རྒྱབ་ཁེབས་པར་གཏིབས་པ༔ གླང་ཆེན་གྱི་ཀོ་རློན་ཞིང་ལྤགས་ཀྱི་གཡང་གཞི༔ སྟག་ལྤགས་ཀྱི་ཤམ་ཐབས༔ སྦྲུལ་རིགས་ལྔས་སྐུ་ལ་བརྒྱན་པ༔ གདོལ་བ་ནག་པོས་དོ་ཤལ་བྱས་པ༔ མི་མགོ་ཁྲག་འཛག་པ་ལྔ་བཅུ་དང་ཐོད་སྐམ་སྤེལ་མར་བརྒྱུས་པའོ༔ རྡོ་རྗེའི་གོ་ཁྲབ་ཀྱི་བར་མཚམས་ནས་ལྕགས་ཀྱི་སྡིག་པ་ཕྲ་མོས་གཏམས་པ༔ དེའི་མདུན་དུ་ཡུམ་རྡོ་རྗེ་ཕག་མོ་མཐིང་ནག་འབར་བ་ཞལ་གཅིག་ཕྱག་གཉིས་པ༔ གཡས་གྲི་གུག་ཡབ་ཀྱི་མགུལ་ནས་འཁྱུད་པ༔ གཡོན་ཐོད་ཁྲག་ཡབ་ལ་སྟོབ་པ༔ ཡབ་དང་ཞལ་སྦྱོར་བ༔ སྤྱི་བོ་ནས་ཕག་ཞལ་ནག་པོ་གྱེན་དུ་ངུར་བ༔ ཞབས་གཡས་བརྐྱང་གཡོན་བསྐུམ་གར་སྟབས་ཀྱིས་སྦྱོར་བ༔ གཟིག་གི་ཤམ་ཐབས་གྲོལ་བ༔ རུས་པའི་རྒྱན་དྲུག་གིས་སྤྲས་པར་གྱུར༔ དབུ་སྐྲ་ཐོར་ཚུགས་སུ་ཨོཾ་ཨཱཧཱུཾ་པདྨ་དྷ་རི་ཧཱུྃ༔ ཞེས་གོང་དུ་བདག་བསྐྱེད་ལྟར་ནས༔ དེའི་ལྟེ་བར་ཉི་ཟླའི་དཀྱིལ་འཁོར་གའུ་ཁ་སྦྱོར་ཡུངས་འབྲུ་ཙམ་གྱི་ལྟེ་བར་ཧཱུྃ་སྤྱས་བྲིས་པ་ཙམ་གྱི་ཐ་མར་སྔགས་ཀྱིས་བསྐོར་བར་གྱུར་གྱི་བར་རོ༔ ཕྱི་རིམ་རྩིབས་བཞིའི་ཤར་དུ་བཛྲ་དྲག་པོ་རྩལ་སྐུ་མདོག་དཀར་པོ་ཞལ་གཅིག་ཕྱག་གཉིས་གཡས་རྡོ་རྗེ་དང་གཡོན་ལྕགས་སྡིག་གི་
མགུལ་ནས་བཟུང་སྟེ་གདེངས་པའོ༔ ལྷོར་རཏྣ་དྲག་པོ་རྩལ་སྐུ་མདོག་སེར་ནག་གཡས་བེ་ཅོན་དང་གཡོན་སྡིག་པ་འཛིན་པ༔ ནུབ་དུ་པདྨ་དྲག་པོ་རྩལ་སྐུ་མདོག་དམར་པོ་གཡས་གྲི་གུག་དང་གཡོན་སྡིག་པ་འཛིན་པ༔ བྱང་དུ་ཀརྨ་དྲག་པོ་རྩལ་སྐུ་མདོག་ལྗང་ནག་གཡས་རྒྱ་གྲམ་དང་གཡོན་སྡིག་པ་འཛིན་པའོ༔ ཀུན་ཀྱང་ཞིང་གི་གཡང་གཞི་སྟག་གི་ཤམ་ཐབས་སྦྲུལ་ཆུན་དང་མགོ་ཕྲེང་རྒྱན་དྲུག་ལ་སོགས་རབ་ཏུ་འཇིགས་པའི་ཆས་དང་ལྡན་པར་གྱུར༔ དེའི་ཕྱི་རིམ་རྩིབས་བརྒྱད་ལ་ཤར་དུ་རྡོ་རྗེ་མཁའ་འགྲོ་ཡབ་ཡུམ་དཀར་པོ་ཞལ་གཅིག་ཕྱག་གཉིས་གྲི་གུག་རྡོ་རྗེའི་མཚན་པ་དང་ཐོད་ཁྲག་བསྣམས་པ༔ ལྷོར་རིན་ཆེན་མཁའ་འགྲོ་ཡབ་ཡུམ་སེར་པོ་རིན་པོ་ཆེའི་མཚན་པའི་གྲི་གུག་དང་ཐོད་ཁྲག་བསྣམས་པ༔ ནུབ་ཏུ་པདྨ་མཁའ་འགྲོ་ཡབ་ཡུམ་དམར་པོ་གྲི་གུག་པདྨས་མཚན་པ་དང་ཐོད་ཁྲག་བསྣམས་པ༔ བྱང་དུ་ཀརྨ་མཁའ་འགྲོ་ཡབ་ཡུམ་ལྗང་གུ་གྲི་གུག་རྒྱ་གྲམ་གྱིས་མཚན་པ་དང་ཐོད་ཁྲག་བསྣམས་པ༔ ཡུམ་རྣམས་སྐུ་མདོག་ཡབ་དང་མཚུངས་པ༔ གཡས་གྲི་གུག་ཡབ་ལ་འཁྱུད་པ༔ གཡོན་རྣམས་ཐོད་ཁྲག་ཡབ་ལ་སྟོབ་པ༔ གཡས་བརྐྱང་གཡོན་བསྐུམས་པས་གར་ཐབས་སུ་སྦྱོར་
བ༔ ཞིང་ལྤགས་དང་སྟག་ཤམ་རྒྱན་དྲུག་གིས་སྤྲས་པ༔ དབུ་སྐྲ་ཐོར་ཅོག་ལ་རང་རང་རྟགས་ཀྱིས་མཚོན་པའི་རྡོ་རྗེ་ལ་སོགས་པས་མཚན་པའོ༔ ཤར་ལྷོར་གཤིན་རྗེ་ཚེ་བདག་སེར་ནག་གཡས་འཁོར་ལོ་གཡོན་ལྕགས་ཀྱུ་དང་ཞགས་པ་འཛིན་པ༔ ལྷོ་ནུབ་ཏུ་ཁྲོས་མ་ནག་མོ་གྲི་ཐོད་འཛིན་པ༔ ཁཊ་མཆན་དུ་བཅུག་པ༔ གཡས་བསྐུམ་གཡོན་བརྐྱང་པ་མི་མགོའི་དོ་ཤལ་ཅན༔ ནུབ་བྱང་དུ་བཛྲ་ཀཱི་ལ་ཡ་ཕུར་པ་འདྲིལ་བ༔ མཐིང་ནག་དུར་ཁྲོད་ཀྱི་ཆས་རྫོགས་པའོ༔ བྱང་ཤར་དུ་མཁའ་འགྲོ་སེང་གདོང་མ་མཐིང་ནག་གྲི་ཐོད་བསྣམས་ཤིང་ཐོད་ཕྲེང་དང་ཞིང་ལྤགས་སྟག་ཤམ་ཡོད་པའོ༔ དེའི་ཕྱི་རིམ་རྩིབས་བཅུ་ལ་རིམ་པར་ཤར་སྟོད་དུ་ཧཱུྃ་ཀཱ་ར་སྔོན་པོ་ཞལ་གཅིག་ཕྱག་གཉིས་མདའ་གཞུ་འཛིན་པ༔ སོགས་ནས༔ བྱང་སྒོར་སྤྱང་གདོང་མ་ལྗང་གུ་དྲིལ་བུ་འཛིན་པ༔ ཕྲིན་ལས་བཞི་ལ་མངའ་བརྙེས་པའི་ཚུལ་དུ་གྱུར༔ དེ་ནས་ལག་པ་རྡོ་རྗེ་རྩེ་ལྔ་པའི་ཕྱག་རྒྱ་བཅས་ལ༔ ལྷ་དེ་དག་རང་རང་པོ༔ མགྲིན་པ་ཨཱདམར་པོ༔ ཐུགས་ཀར་ཧཱུྃ་མཐིང་ནག༔ བདག་གི་གནས་གསུམ་དང་༔ དམ་ཚིག་དཀྱིལ་འཁོར་གྱི་ས་བོན་ལས་འོད་ཟེར་དཔག་ཏུ་མེད་པ་འཕྲོས༔ བདེ་ཆེན་
དབང་དྲག་རོལ་པའི་དཀྱིལ་འཁོར་ནས་ཡེ་ཤེས་པ་རྣམས་ཐུགས་དམ་གྱི་རྒྱུད་བསྐུལ་ཛཧཱུྃ་བཾ་ཧོས་སྤྱན་དྲངས་པར་གྱུར༔ ཐོད་རྔ་རྐང་ཆེན་དང་བཅས་དབྱངས་སྙན་པོས༔ ཧཱུྃ༔ ཡུལ་གྱི་མིང་ནི་རྔ་ཡབ་གླིང་ཞེས་པ་ནས་སྤྱན་འདྲེན་མཆོད་བསྟོད་ལས་བྱང་ལྟར་རོ༔ དམིགས་པ་སོགས་གསང་སྒྲུབ་གཞུང་ལྟར་བྱའོ༔ ཞེས་པ་འདི་ནི་ཟུར་མང་ནང་སོས་བསྐུལ་ནས༔ སྔགས་འཆང་རཱ་ག་ཨ་སྱས་བསྒྲིགས་པའོ༔ ༔དྲག་པོ་ཐོད་ཕྲེང་རྩལ་ལ་ཕྱག་འཚལ་ལོ༔ གུར་དྲག་གསང་སྒྲུབ་སྐབས་སུ༔ བདག་དྲག་པོ་དཀྱིལ་འཁོར་གཙོ་རྐྱང་བསྐྱེད༔ མདུན་གྱི་དཀྱིལ་འཁོར་བུམ་པ་དང་སྒྲུབ་གཏོར་གྱི་སྣོད་དབྱེར་མེད་པ་མདུན་བསྐྱེད་ཀྱི་གཞལ་ཡས་ཁང་ཞིག་ཏུ་བྷི༔ དཀྱིལ་འཁོར་དབུས་ཀྱི་ལྷ་ཚོམ་དང་བུམ་ཆུ་སྒྲུབ་གཏོར་དབྱེར་མེད་མདུན་བསྐྱེད་ཀྱི་ལྷ་ཚོགས་སུ་བསྒོམ༔ ལས་བྱང་ལ་གསང་སྒྲུབ་ཀྱི་མངོན་རྟོགས་ཁ་སབ་པ་དུས་བཞིར་གཏོང་༔ དགོང་མོ་བཀའ་སྲུང་གཉིས་འདོན་དབུ་འཛུགས་ནུབ་དང་ཚེས་བཅུ་དང་ཐོན་ནུབ་གསུམ་ཚོགས་བསྐང་བ་ཆད་མདོ་བྱ༔ རྒྱུན་ཏུ་མི་དགོས༔ དང་པོ་འབུམ་ཕྲག་གཅིག་ཞི་བར་བསྙེན་ཚེ༔ བདག་མདུན་དྲག་པོར་གསལ་
བའི་སྐུ་འཇམ་དཔལ་གྱི་དཔྲལ་བར་ཨོཾ་དཀར་པོ་རེ་རེ་བསྒོམ༔ བདག་གི་དཔྲལ་བའི་ཨོཾ་ལས་ཨོཾ་དཀར་པོའི་ཕྲེང་བ་འཕྲོས༔ མདུན་བསྐྱེད་ཀྱི་ཨོཾ་གྱི་རྩེར་ཐིམ༔ སྐུ་མཉེས་པའི་མཆོད་པར་གྱུར༔ མདུན་བསྐྱེད་ཨོཾ་གྱི་མཇུག་ནས་སྐུའི་དངོས་གྲུབ་བྱིན་རླབས་ཐམས་ཅད་ཨོཾ་དཀར་པོ་ཐིག་ལེ་འོད་དང་བཅས་པ་ཚུར་བྱོན་རང་གི་དཔྲལ་བའི་ཨོཾ་གྱི་རྐང་པ་ནས་ཡར་ཐིམ་འགྱུར་མེད་སྐུའི་དངོས་གྲུབ་ཐོབ༔ བདག་མདུན་མགྲིན་པའི་རྟ་མགྲིན་གྱི་མགྲིན་པར་པདྨ་དམར་པོ་འདབ་མ་བཞི་པའི་ལྟེ་བར་ཨཱཚེག་དྲག་དང་བཅས་པ༔ བདག་གི་ཨཱཡིག་གི་རྩེ་ནས་ཨཱདམར་པོའི་ཕྲེང་བ་ཐིག་ལེ་འོད་དང་བཅས་པ་བྱི་རུའི་ཕྲེང་བ་ལྟར་འཕྲོས༔ མདུན་བསྐྱེད་ཀྱི་ཡི་རྩེར་ཐིམ༔ གསུང་མཉེས་པའི་མཆོད་པར་གྱུར་ཨཱཡི་རྩ་བ་ནས་གསུང་གི་དངོས་གྲུབ་བྱིན་རླབས་ཨཱདམར་པོའི་ཕྲེང་བ་ཚུར་བྱོན༔ རང་གི་ཨཱཡི་རྐང་པ་ནས་ཡར་ཐིམ༔ འགགས་མེད་གསུང་གི་དངོས་གྲུབ་ཐོབ༔ བདག་མདུན་ཐུགས་ཀར་གསེར་གྱི་མཆོད་རྟེན་གྱི་བུམ་པར་ཕྱག་རྡོར༔ དེའི་ཐུགས་ཀར་ཡེ་ཤེས་སེམས་དཔའི་ཐུགས་ཀར་གསེར་གྱི་རྡོ་རྗེ་ལང་པ་དེའི་དབུས་སུ་ཧཱུྃ་མཐིང་དམར༔ དེའི་རྩེ་ནས་ཧཱུྃ་མཐིང་གའི་ཕྲེང་བ་འཕྲོ་བ༔ མདུན་
བསྐྱེད་ཀྱི་ཐུགས་ཀའི་ཧཱུཾ་གི་རྩེར་ཐིམ༔ ཐུགས་མཉེས་པའི་མཆོད་པར་གྱུར༔ ཧཱུྃ་གི་རྩེ་ནས་ཐུགས་ཀྱི་དངོས་གྲུབ་བྱིན་རླབས་ཐམས་ཅད་ཧཱུྃ་སྔོན་པོའི་ཕྲེང་བ་ཚུར་འཕྲོས༔ རང་གི་ཧཱུྃ་གི་ཞབས་ཀྱུ་ནས་ཡར་ཐིམ་པས༔ འཁྲུལ་མེད་ཐུགས་ཀྱི་དངོས་གྲུབ་ཐོབ་པར་གྱུར༔ དམིགས་པ་དེ་ཁོ་ན་བསྒོམ་ཞིང་བཛྲ་གུ་རུ་ཧཱུྃའབྱར་བ་འབུམ་ཕྲག་གཅིག་བཟླས་པ་ནི་བསྙེན་པའོ༔ ཐུན་མཚམས་སུ་འབྲུ་གསུམ་ཕྲེང་བ་ཕར་འཕྲོས་པ་རྫོགས་ནས་མི་སྤྲོའོ༔ ཚུར་ཡང་ཐིམ་ཚར་ནས་མི་སྤྲོའོ༔ དེ་ནས་ཁྲོ་བོ་སྒྲུབ་པ་ནི༔ བདག་མདུན་ཐུགས་ཀྱི་མཆོད་རྟེན་དབུས༔ ཡེ་ཤེས་སེམས་དཔའི་ཐུགས་ཀ་རུ༔ རྡོ་རྗེ་རྩེ་ལྔ་འགྲེང་པའི་མཐར༔ ཉི་མ་འོག་དང་ཟླ་བ་སྟེང་༔ གའུ་ཁ་སྦྱོར་དབུས་སུ་ནི༔ ཧཱུྃ་དམར་མཐའ་མར་ཨ་ཙིག་གི༔ སྔགས་ཕྲེང་གཡས་སུ་ཀྱི་ལི་ལི༔ དེ་ཡི་འོད་ཟེར་ལས་གྲུབ་པའི༔ སྔགས་ཕྲེང་བྱི་རུའི་ཕྲེང་བ་ལྟར༔ ཡེ་ཤེས་སེམས་དཔའ་གསང་བདག་གི༔ ཞལ་བརྒྱུད་མདུན་བསྐྱེད་ཞལ་ནས་ཐུགས་ཀར་ཐིམ༔ སྔགས་ཕྲེང་དྲག་འཁོར་ཐུགས་རྒྱུད་བསྐུལ༔ སླར་ཡང་དེ་ལས་སྔགས་ཕྲེང་འཕྲོས༔ ཚུར་འཕྲོས་རང་གི་ཐུགས་ཀར་ཐིམ༔ ཕར་ལ་མཆོད་པར་གྱུར་པས་
མཉེས༔ ཚུར་ལ་དངོས་གྲུབ་ཐོབ་པར་བྷེ༔ དེ་ལྟར་དམིགས་པ་རྩེ་གཅིག་གིས༔ ཨ་ཙིག་སྔགས་འབྲུ་ཉི་ཤུ་པ༔ དེ་ལ་རབ་ཏུ་བདུན་འབུམ་དང་༔ འབྲིང་དུ་སུམ་འབུམ་ཐ་མ་ཡང་༔ འབུམ་ཕྲག་གཅིག་བཟླས་སྒྲུབ་པ་ཡིན༔ ཐུན་མཚམས་བདག་མདུན་བར་གྱི་སྔགས་ཕྲེང་བཅད༔ དེ་ནས་ལས་ལ་སྦྱོར་བའི་དམིགས་པ་ནི༔ བདག་མདུན་སྐུ་ཡི་འོད་ཟེར་ལས་གྲུབ་པའི༔ གནམ་ས་ལྕགས་སྲེག་འཁོར་ལོ་རྩིབས་སྟོང་པ༔ རྩིབས་རྩེ་རལ་གྲི་སོ་གཉིས་རྩེ་ལྟ་བུ༔ སྒོར་མོ་གའུ་ཁ་སྦྱོར་ལྟ་བུ་སྟེ༔ སྟེང་ནི་གཡས་སྐོར་འོག་ནི་གཡོན་སྐོར་རོ༔ སོ་འཐབ་བར་དུ་རྒྱལ་བསེན་གདོན་བགེགས་རྣམས༔ ཤ་ཁྲག་དམར་ཕྱར་མྱལ་མྱལ་གཏུབས་པ་དེ༔ རྩིབས་བར་སྤྲུལ་བའི་ལྕགས་སྡིག་མང་པོས་ཟོས༔ དེ་ལྟར་བསྒོམས་ཤིང་བཛྲ་ཧཱུྃ་སོགས་ཀྱི༔ སྡེ་བརྒྱད་ཤམ་བུ་ཅན་གྱི་སྔགས་དེ་ནི༔ སུམ་སྟོང་ཙམ་ཞིག་སྐབས་དང་བསྟུན་ལ་བཟླས༔ དེ་ནི་འདི་ཡི་ལས་སྦྱོར་ཡིན་པའོ༔ དེ་ནས་གྲོལ་ནས་དངོས་གྲུབ་བླང་བ་ནི༔ བདག་མདུན་འོད་ཟེར་དངོས་གྲུབ་རྫས་ལ་ཕོག༔ དེ་ལས་འོད་ཟེར་ཕྱོགས་བཅུར་འཕྲོས་པ་ཡིས༔ ཕྱོགས་བཅུའི་སངས་རྒྱས་བྱང་སེམས་རྩ་གསུམ་གྱི༔ མཆོག་ཐུན་སྐུ་
གསུང་ཐུགས་ཀྱི་དངོས་གྲུབ་ཀུན༔ ཨོཾ་དཀར་ཨཱདམར་ཧཱུྃ་མཐིང་རྣམ་པ་རུ༔ ཆར་ལྟར་བབས་ནས་རིན་ཆེན་འབར་བར་བསྟིམ༔ པདྨ་ཀྲོ་ཏ་ལ་སོགས་དངོས་གྲུབ་སྔགས༔ སྟོང་ཚོ་གསུམ་ཙམ་བཟླས་རྗེས་དངོས་གྲུབ་རྫས༔ ལག་ཏུ་བླང་ལ་དངོས་གྲུབ་་བླངས་བའི་ཚིག༔ ཧཱུྃ༔ མ་འགགས་རོལ་པའི་དཀྱིལ་འཁོར་ནས༔ འཛད་མེད་ནམ་མཁའི་མཛོད་གླིང་རྡོལ༔ མི་འཛད་རིན་ཆེན་གཏེར་ལ་སྤྱོད༔ ཁམས་གསུམ་སྲིད་གསུམ་དབང་དུ་སྡུད༔ སྣང་སྲིད་ཆོས་ལ་དབང་བསྒྱུར་ཞིང་༔ ནམ་མཁའི་མཛོད་ལ་ལོངས་སྤྱོད་ཤོག༔ ཨོཾ་ན་མ་སརྦ་ཏ་ཐཱ་སོགས༴ ག་ག་ཁཾ་སརྦ་ཨ་བྷི་ཥིཉྩ་ཧཱུྃ༔ ཞེས་བརྗོད་འབྲང་རྒྱས་དེ་ཉིད་རོལ༔ སྒྲུབ་གཏོར་བུམ་པ་ལག་ཏུ་ཐོགས་ལ་སྒྲུབ་གཞུང་གི༔ ཧཱུྃ༔ ཕྱོགས་དུས་རྒྱལ་བ་ལ་སོགས་དབང་ཚིག་རྗེས༔ ཀཱ་ཡ་ཝཱཀ་སོགས་བརྗོད་གནས་བཞིར་གཏུགས༔ ཚོགས་དང་བསྐང་བ་གཏོར་འབུལ་ཚང་བར་བྱ༔ ཧཱུྃ༔ ཆོས་སྐུ་སྐྱེ་མེད་སྟོང་པའི་ངང་ཉིད་སོགས༔ བསྡུ་རིམ་སྨོན་ལམ་བཀྲ་ཤིས་ཐུགས་སྒྲུབ་ལྟར༔ པདྨ་ནམ་མཁས་བསྐུལ་བའི་ཕྱིར༔ རཱ་ག་ཨ་སྱས་འཕྲལ་དུ་སྨས༔ སརྦ་མངྒ་ལཾ༔ ཨོཾ་ཨཱཿཧཱུྃ་ཨ་རྩིག་ནིར་ཙིག་ན་མོ་བྷ་
ག་ཝ་ཏེ་ཧཱུྃ་ཧཱུྃ་ཕཊ༔ ཧཱུྃ་ཧཱུྃ་ཕཊ༔ སྔགས་བྱང་ངོ་། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།