གུ་རུ་དྲག་པོ་ལས་ཡང་གསང་བླ་མེད་དོན་གྱི་སྙིང་པོའི་འདོན་འགྲིགས།
གུ་རུ་དྲག་པོ་ལས་ཡང་གསང་བླ་མེད་དོན་གྱི་སྙིང་པོའི་འདོན་འགྲིགས་བཞུགས་སོ༔
གུ་རུ་བཛྲ་ཀྲོ་དྷ་ཡེ༔ སྟ་གོན་ནི་གཞུང་ལྟ་བུ་ལ༔ ལས་བྱང་ཏིང་འཛིན་རྣམ་གསུམ་ཡན་ཆད་འདོན༔ དེ་ནས་རང་གི་སྙིང་གར་ཧཱུྃ་མེའི་མདོག་ཅན་ཅིག་ཏུ་གྱུར༔ ཐུགས་ཀའི་ཧཱུྃ་ལས་ཨེ་ནག་པོ་ཞིག་ཆད༔ ནམ་མཁས་གར་ཁྱབ་ཨེའི་རང་བཞིན་ཟུར་གསུམ་ཕྲ་བ༔ ཟུར་གཅིག་འོག་ཕྱོགས་སུ་ཟུག་པ་ཁ་གདེངས་པ༔ དེའི་སྟེང་དུ་ཨེའི་ཀློང་༔ ཡཾ་ལས་བསྐལ་པའི་རླུང་ནག་འཚུབ་ཅིང་འཁྱིལ་བ༔ དེའི་སྟེང་དུ་ཧཱུྃ་ལས་རཾ་ཆད་པས་བསྐལ་པའི་མེ་དཔུང་དམར་ནག་ཏུ་འབར་བར་ཆད་པས་རཀྟའི་རྦ་ཀློང་འཁྲུག་པ༔ ཁྲག་གི་ལྦུ་བ་རི་རབ་ཙམ་འཕྱོ་བའི་ཀློང་ན༔ ཞིང་ཆེན་
ཞིང་ཆུང་རི་གད་ཉིལ་བ་ལྟ་བུའི་རྦ་ཀློང་ཡོད་པ༔ སུཾ་ཆད་པ་ལས་ཤ་ཆེན་གྱི་ས་གཞི༔ རོ་རུལ་བ་མ་རུལ་བ༔ བམ་པ༔ ཐོད་སྐམ་ལས་མེ་འབར་བ༔ དྲི་མནམ་པ༔ བྱ་གཅན་མང་པོ་ནམ་མཁའ་ལ་ལྡིང་བ༔ གཅན་གཟན་མང་པོས་རྒྱུག་འདྲལ་བྱེད་པ༔ ལྷ་སྲིན་དང་ཞིང་སྐྱོང་མང་པོས་ཀུའི་སྒྲ་དང་ཧ་ཧའི་སྒྲས་འདེབས་པ༔ དེའི་སྟེང་དུ་ཀེ་ཆད་པ་ལས་ཀེ་ལས་རུས་པའི་རི་རབ་གྲུ་བཞི་པ་བང་རིམ་དང་བཅས་པ༔ དེའི་སྟེང་དུ་ཧཱུཾ་ཆད་པ་ལས་ཐོད་པ་སྐམ་རློན་རད་རིད་ཀྱི་རྩིག་པ༔ གནམ་ལྕགས་ཀྱི་གཟེར་གྱིས་བསྡམས་པ༔ ཀླུ་བརྒྱད་ཀྱི་ཀ་གདན༔ ལྷ་བརྒྱད་ཀྱི་ཀ་
བ༔ གཟའ་བརྒྱད་ཀྱི་གདུང་མ༔ ཉི་ཟླའི་སྐར་ཁུང་༔ གཟའ་སྐར་དྲལ་ལྕམ་དུ་བྱས་པ༔ ཞིང་ལྤགས་ཀྱི་བླ་རེ༔ ཞིང་ཆུང་གི་ཁ་བད༔ ཞིང་དང་ཐོད་པའི་རྒྱལ་མཚན། འཁོར་ལོ་གདུགས་ཏོག་རྩེར་ཐོད་སྐམ་གྱི་ཏོག་ཡོད་པ༔ ནང་གི་སྒོ་བཞི་གྲུ་བཞི་རྟ་བབས་དང་བཅས་པ༔ སྒོ་ཁང་ལ་ཁྱུང་གི་ཡ་ཕིབ༔ སྦྲུལ་ནག་གི་སྐྱེས་བུ༔ ཞིང་ཆེན་གྱི་སྒོ་གཡོགས༔ ཆུ་སྲིན་དང་འབྲུག་གི་སྐྱེས་བུ༔ རྒྱུ་ཕྲེང་གི་བླ་རེ་དང་དྲ་ཕྱེད༔ རུས་ཆེན་གྱི་སོ་བད༔ གསུར་ཆེན་གྱི་དུད་པ་འཁྲིགས་པ༔ དེའི་ཕྱི་རིམ་རྡོ་རྗེའི་དྲ་མིག་ཁྲོ་ཆུང་གིས་གཏམས་པ༔ དེའི་ཕྱི་རོལ་དུ་པད་སྡོང་དང་མེའི་ཚྭ་ཚྭ་འཕྲོ་བ༔ བར་ཐམས་ཅད་མཚོན་ཆ་ལྔ་དང་ཁྲོ་ཆུང་སྡིག་པས་གཏམས་ཤིང་འཁྲུག་པར་གྱུར༔ ཕོ་བྲང་དེའི་དབུས་སུ་ཆོས་འབྱུང་མཐིང་ནག་ཟླ་གམ་དམར་པོ༔ དེའི་ཕྱི་རིམ་འཁོར་ལོ་རྩིབས་བརྒྱད་མུ་ཁྱུད་ཐོད་ཕྲེང་གིས་བསྐོར་བ༔ པདྨ་ཉི་ཟླའི་སྟེང་དུ་བདག་ཉིད་སྐད་ཅིག་གིས༔ ཧཱུྃ་མཐིང་ནག་ལས་འོད་ཟེར་འཕྲོས༔ རྒྱལ་བ་ཐམས་ཅད་ལ་མཉེས་པའི་མཆོད་པ་ཕུལ༔ སེམས་ཅན་གྱི་སྒྲིབ་པ་སྦྱངས༔ གནོད་བྱེད་འབྱུང་པོ་ཐམས་ཅད་ཚར་བཅད་ཚུར་འདུས་པ་ལས་ཡང་གསང་དྲག་པོ་
ཐོད་ཕྲེང་རྩལ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ༔ ཞལ་ཞི་མ་ཁྲོ་ཅུང་ཟད་ཁྲོས་པ༔ ཕྱག་གཡས་རྡོ་རྗེ་ཐུགས་ཀར་འཛིན་པ༔ གཡོན་དྲིལ་བུ་ཡུམ་ལ་བརྟེན་པ༔ ཞབས་རྡོ་རྗེ་སྐྱིལ་ཀྲུང་དུ་བཞུགས་པ༔ དབུ་རྒྱན་ལ་སོགས་རིན་པོ་ཆེའི་རྒྱན་དུ་མས་སྤྱས་པ་དེའི་མདུན་དུ་ཡུམ་ཡེ་ཤེས་ཀྱི་མཁའ་འགྲོ་མ༔ མཚོ་རྒྱལ་སྐུ་མདོག་དམར་མོ་བཅུ་དྲུག་ལོན་པའི་གཞོན་ཚུལ་ཅན༔ གྲི་གུག་འཁྱུད་ཅིང་ཐོད་ཁྲག་སྟོབས་པ༔ ཞབས་གཉིས་ཡབ་ཀྱི་སྐེད་ནས་འཁྲིལ་བ༔ རིན་པོ་ཆེ་དང་རུས་པའི་རྒྱན་གྱིས་སྤྲས་པ༔ གཅེར་བུ་སྐུ་གྲོལ་བ་གཉིས་མེད་དུ་སྦྱོར་བའི་ཚུར་དུ་གྱུར༔ དེའི་སྤྱི་གཙུག་ཏུ་ཨོཾ་ཨཱཧུཾ་པདྨ་དྷ་རི་ནི་ཧཱུྃ༔ རིགས་བདག་སྣང་བ་མཐའ་ཡས༔ དེའི་འོག་ཏུ་ཨོཾ་ཨཱཿཧཱུྃ་ཁྲོ་གྷ་རུ་ཎ་ཙ་ལེ་ཙ་ལེ་ཧཱུཾ་ཕཊ༔ ཁྲོ་རྒྱལ་ཀུན་གྱི་སྤྲུལ་པ་ལྕགས་ཀྱི་བྱ་ཁྱུང་༔ ཨོཾ་ཨཱཿཧཱུྃ་མཉྫ་ཤི་ཡ་མཱན་ཏ་ཀ་ཧཱུྃ་ཕཊ༔ དཔྲལ་བར་འཇམ་དཔལ༔ ཨོཾ་ཨཱཿཧཱུྃ་པདྨན་ཀྲིཏ་བྱ་གྲི་ཝ་ཧཱུྃ་ཕཊ༔ མགྲིན་པར་དབང་ཆེན་རྟ་མགྲིན༔ དེའི་ཐུགས་ཀར་ཙིཏྟ་རིན་ཆེན་གསེར་གྱི་མཆོད་རྟེན་ལངས་པ་ཞིག༔ དེའི་ལྟེ་བར་ཨོཾ་ཨཱཿཧཱུྃ་བཛྲ་པཱ་ཎི་མ་ཧཱ་ཀྲོ་དྷ་ཧཱུྃ་ཕཊ༔ ཐུགས་ཀར་ཕྱག་ན་རྡོ་རྗེ༔ དེའི་ཐུགས་
ཀའི་སྟོད་དུ་པདྨ་ཉི་ཟླའི་གདན་ལ་ཧཱུྃ༔ ཨོཾ་བཛྲ་ཛྷཱ་ན་སཏཱ་ཀྲོ་དྷ་ཧཱུྃ༔ ཡེ་ཤེས་སེམས་དཔའ་བཛྲ་ཧེ་རུ་ཀ་ཚོན་གང་བ༔ ཞལ་གཅིག་ཕྱག་གཉིས་གཡས་རྡོ་རྗེ་ཐུགས་ཀར་འཛིན་པ་གཡོན་དྲིལ་བུ་དཀུ་ལ་བརྟེན་པ༔ དུར་ཁྲོད་ཀྱི་ཆས་བརྒྱད་ཀྱིས་བརྒྱན་ཅིང་༔ སྐུ་འགྱིངས་བག་དང་ལྡན་པ༔ དེའི་ཐུགས་ཀར་རྡོ་རྗེ་ནས་ཙམ༔ དེའི་ལྟེ་བར་ཉི་ཟླའི་དཀྱིལ་འཁོར་གའུ་ཁ་སྦྱོར་ཡུངས་འབྲུ་ཙམ་གྱི་ལྟེ་བར་ཧཱུྃ་སྤུས་བྲིས་པ་ཙམ་གྱི་ཐ་མར་སྔགས་ཀྱིས་བསྐོར་བར་གྱུར༔ ཨོཾ་ཨཱཿཧཱུྃ་མ་ཧ་རི་ནི་ས༔ ལྟེ་བར་མཁའ་འགྲོ་སྡེ་ལྔ༔ ཨོཾ་ཨཱཿཧཱུྃ་བཛྲ་ཧཱུཾ་ཡཀྵ་ཧཱུཾ་རཀྵ་ཧཱུྃ༔ ་གསང་གནས་སུ་ཡཀཱ་མེ་དབལ༔ ཧེ་རུ་ཀ་ཡི་འོག་ཏུ་ཆོས་སྐུ་ཀུན་ཏུ་བཟང་པོ་ལ་ཞི་བ་བཞི་བཅུ་རྩ་གཉིས་ཀྱི་ལྷ་ཚོགས༔ མགྲིན་པར་རྟ་མགྲིན་གྱི་འོག་ཏུ་དག་པ་རིག་འཛིན་གྱི་ལྷ་ཚོགས༔ སྤྱི་བོར་འཇམ་དཔལ་གྱི་འོག་ཏུ་ཁྲག་འཐུང་ཁྲོ་བོའི་ལྷ་ཚོགས༔ བདག་ལུས་རྩ་གསུམ་འཁོར་ལོ་ལྔ་ཡི༔ རང་ཉིད་དེ་ལྟར་གསལ་བའི་སྤྱི་བོ་བདེ་ཆེན་གྱི་འཁོར་ལོའི་དབུས་སུ་རྡོ་རྗེ་མཁའ་འགྲོ་དཀར་མོ་གྲི་ཐོད་འཛིན་པ༔ གཡས་བསྐུམ་གཡོན་བརྐྱང་གར་ཐབས་སུ་བཞུགས་པ༔ རྒྱན་དྲུག་དང་ཞིང་གི་པགས་པ་གསོལ་བ༔ ཁཊ་མཆན་དུ་བཅུག་ཅིང་དབུ་
སྐྲའི་ཐོར་ཅོག་ལ་རྡོ་རྗེས་མཚན་པ༔ ཞབས་པདྨ་དང་ཉི་ཟླའི་གདན་ལ་བཞུགས་པར་གྱུར༔ དེའི་མཐའ་བསྐོར་དུ་རྡོ་རྗེ་མཁའ་འགྲོ་འཁོར་སུམ་བརྒྱ་དང་དྲུག་ཅུ་སྐུ་མདོག་དཀར་མོ་ཆ་ལུགས་གཙོ་མོ་དང་མཐུན་པའོ༔ མགྲིན་པ་ལོངས་སྤྱོད་འཁོར་ལོའི་དབུས་སུ་རིན་ཆེན་མཁའ་འགྲོ་སྐུ་མདོག་སེར་མོ་གྲི་གུག་དང་ཐོད་ཁྲག་བསྣམས་ཤིང་རྒྱན་དང་ཆ་ལུགས་གོང་གི་གཙོ་མོ་དང་མཐུན་པ༔ མཐའི་རྩ་འདབ་བཅུ་དྲུག་ལ་ཡང་གཙོ་མོ་དང་མཐུན་པ་སྐུ་མདོག་སེར་མོ་བསྐྱེད་དོ༔ སྙིང་ག་ཆོས་ཉིད་འཁོར་ལོ་རྩ་འདབ་སུམ་ཅུ་རྩ་གཉིས་ཀྱི་དབུས་སུ་སངས་རྒྱས་མཁའ་འགྲོ་མཐའ་བསྐོར་དུ་འཁོར་རྣམས་སྐུ་མདོག་མཐིང་ག་གྲི་ཐོད་བསྣམས་ཤིང་ཆ་ལུགས་གར་སྟབས་སོགས་གཙོ་མོ་དང་མཐུན་པ༔ ལྟེ་བ་སྤྲུལ་བའི་འཁོར་ལོ་རྩ་འདབ་དྲུག་ཅུ་རྩ་བཞིའི་དབུས་སུ་པདྨ་མཁའ་འགྲོ་སྐུ་མདོག་དམར་མོ་གྲི་ཐོད་འཛིན་པ་ཆ་ལུགས་གར་སྟབས་དང་ལྡན་པའི་མཐའ་བསྐོར་དུ་འཁོར་རྣམས་ཀྱང་སྐུ་མདོག་ཆ་ལུགས་གཙོ་མོ་དང་མཐུན་པར་གྱུར༔ གསང་བ་བདེ་སྤྱོད་འཁོར་ལོ་རྩ་འདབ་ཉི་ཤུ་རྩ་བརྒྱད་ཀྱི་དབུས་སུ་ལས་ཀྱི་མཁའ་འགྲོ་སྐུ་མདོག་ལྗང་གུ་གྲི་ཐོད་འཛིན་པ༔ བརྐྱང་བསྐུམ་གར་སྟབས་དང་ལྡན་པ༔ མཐའ་
བསྐོར་གྱི་འཁོར་རྣམས་ཀྱང་སྐུ་མདོག་ཆ་ལུགས་གཙོ་མོ་དང་མཐུན་པར་གྱུར༔ དེ་ལྟར་འཁོར་ལོ་ལྔ་ལ་གཙོ་འཁོར་དེ་རྣམས་ཀྱི་མཐའ་བསྐོར་དུ་དྷ་ཀི་མ་གྲངས་ལས་འདས་པ་ཏིལ་གྱི་གའུ་ཁ་ཕྱེས་པ་ལྟར་ཡོད་པར་བསྒོམ༔ དེ་ནས༔ རང་གི་སྙིང་བུམ་སྐུའི་ཚུལ་དུ་གནས་པའི་དབུས་སུ༔ པདྨ་དཀར་པོ་འདབ་མ་སྟོང་དང་ལྡན་པའི་ཟེའུ་འབྲུའི་སྟེང་དུ་ཉི་ཟླའི་གདན་ལ་ཀུན་ཏུ་བཟང་པོ་ཡབ་ཡུམ་སྐུ་མདོག་མཐིང་ག་མཉམ་བཞག་གི་ཕྱག་རྒྱ་ཅན༔ ཆོས་ཀྱི་སྐུའི་ཐིག་ལེ་འཇའ་འོད་ཀྱི་ཟེར་དུ་འཕྲོ་བའི་མཐའ་བསྐོར་དུ་ཞི་བ་བཞི་བཅུ་རྩ་གཉིས་འོད་ཟེར་ཁ་དོག་ལྔ་ལྡན་འཇའ་དང་འོད་ཀྱི་རང་བཞིན༔ ཐིག་ལེ་ལུ་གུ་རྒྱུད་ཀྱི་ཚོམ་བུ་ལྔ་ལྡན་འོད་ཀྱི་རང་བཞིན་དུ་གསལ་བ༔ ལྷ་དེ་དག་གི་སྐུ་ལས་འོད་ཟེར་དཀར་པོ་ཤེལ་གྱི་སྣམ་བུ་ལྟ་བུ་ཡར་ཟང་ཐལ་དུ་ཡོད་པ༔ ཐོད་པ་དུང་ཁང་གཞལ་ཡས་ཁང་འོད་ཀྱི་ཁང་པ་ལྟ་བུའི་དབུས་ནི༔ པདྨ་འདབ་མ་སྟོང་དང་ལྡན་པའི་སྟེང་དྲེགས་པ་པདྨ་ཉི་ཟླའི་གདན་ལ༔ བཅོམ་ལྡན་འདས་བྷདྨ་ཧེ་རུ་ཀ༔ སྐུ་མདོག་དམར་སྨུག་ཞལ་གསུམ་ཕྱག་དྲུག་ཡུམ་དང་བཅས་པ༔ དུར་ཁྲོད་ཀྱི་ཆས་བརྒྱད་རྫོགས་པ༔ དེའི་མཐའ་བསྐོར་དུ་ཁྲག་འཐུང་ལྔ་བཅུ་རྩ་བརྒྱད་ཐམས་ཅད་ཀྱང་འོད་ཀྱི་
རང་བཞིན་འཇའ་འོད་ཟེར་གསུམ་གྱི་ཐིག་ལེ་དང་ཐིག་ཕྲན༔ ཚོམ་བུ་ལུ་གུ་རྒྱུད་འོད་ཟེར་བ་ཐག་གཟེངས་པ་ལྟ་བུ་ལྷུན་གྲུབ་ལོངས་སྐུའི་དཀྱིལ་འཁོར༔ རྩ་གནས་དཔའ་བོ་མཁའ་འགྲོ་ཏིལ་གྱི་གང་བུ་ཁ་ཕྱེས་པ་ལྟ་བུས་གང་བ༔ ཐམས་ཅད་ཀྱ་རིང་གནས་ན་སྔགས་ཀྱི་སྒྲ་ཏི་རི་རི་བུང་བ་ཚང་ཞིག་པ་ལྟར་དུ་བཟླས་པར་གྱུར༔ དེའི་ཕྱི་རིམ་ཤར་གྱི་རྩིབས་སྟེང་དུ་རྡོ་རྗེ་མཁའ་འགྲོ་ཡབ་ཡུམ་དཀར་མོ་གྲི་ཐོད་བསྣམས་ཤིང་གཡས་བསྐུམ་གཡོན་བརྐྱང་གིས་སྦྱོར་བ༔ གཅེར་བུ་རུས་པའི་རྒྱན་གྱིས་བརྒྱན་བར་གྱུར༔ ལྷོར་རིན་ཆེན་མཁའ་འགྲོ་ཡབ་ཡུམ་སེར་པོ་གྲི་ཐོད་བསྣམས་ཤིང་༔ གཡས་བསྐུམ་གཡོན་བརྐྱང་གིས་སྦྱོར་བ༔ གཅེར་བུ་རུས་པའི་རྒྱན་གྱིས་བརྒྱན་པར་གྱུར༔ ནུབ་ཏུ་པདྨ་མཁའ་འགྲོ་ཡབ་ཡུམ་དམར་པོ་གྲི་ཐོད་བསྣམས་ཤིང་༔ གཡས་བསྐུམ་གཡོན་བརྐྱང་གིས་སྦྱོར་བ༔ གཅེར་བུ་རུས་པའི་རྒྱན་གྱིས་བརྒྱན་པར་གྱུར༔ བྱང་དུ་ལས་ཀྱི་མཁའ་འགྲོ་ཡབ་ཡུམ་ལྗང་གུ་གྲི་ཐོད་བསྣམས་ཤིང་༔ གཡས་བསྐུམ་གཡོན་བརྐྱང་གིས་སྦྱོར་བ༔ གཅེར་བུ་རུས་པའི་རྒྱན་གྱིས་བརྒྱན་པར་གྱུར༔ བུམ་པ་ཧཱུྃ་ལས་ཡེ་ཤེས་ཀྱི་གཞལ་ཡས་ཁང་དུ་གསལ་བའི་དབུས་སུ་
རིག་པའི་ཡེ་ཤེས་ལམ་གྱིས་བསྐྱེད་པའི་ལྷ་དྲག་པོ་ཐོད་ཕྲེང་རྩལ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ༔ ཞལ་ཞི་མ་ཁྲོ་ཅུང་ཟད་ཁྲོས་པ༔ ཕྱག་གཡས་རྡོ་རྗེ་ཐུགས་ཀར་འཛིན་པ༔ གཡོན་དྲིལ་བུ་ཡུམ་ལ་བརྟེན་པ༔ ཞབས་རྡོ་རྗེའི་སྐྱིལ་ཀྲུང་དུ་བཞུགས་པ༔ དབུ་རྒྱན་ལ་སོགས་རིན་པོ་ཆེའི་རྒྱན་དུ་མས་སྤྲས་པ༔ དེའི་མདུན་དུ་ཡུམ་ཡེ་ཤེས་ཀྱི་མཁའ་འགྲོ་མ༔ མཚོ་རྒྱལ་སྐུ་མདོག་དམར་མོ་བཅུ་དྲུག་ལོན་པའི་གཞོན་ཚུལ་ཅན༔ གྲི་གུག་འཁྱུད་ཅིང་ཐོད་ཁྲག་སྟོབས་པ༔ ཞབས་གཉིས་ཡབ་ཀྱི་རྐེད་ལ་འཁྲིལ་པ༔ རིན་པོ་ཆེ་དང་རུས་པའི་རྒྱན་གྱིས་སྤྲས་པ༔ གཅེར་བུ་སྐྲ་གྲོལ་བ༔ གཉིས་མེད་དུ་སྦྱོར་བའི་ཚུལ་དུ་གསལ་བའི་ཡབ་ཀྱི་ཐུགས་ཀར་ཉི་མའི་དཀྱིལ་འཁོར་གྱི་ལྟེ་བ་ལ་ཧཱུཾ་མཐིང་ནག༔ དེའི་མཐར་སྔགས་ཀྱིས་བསྐོར་བར་གྱུར༔ དེའི་ཕྱི་རིམ་ཤར་གྱི་རྩིབས་སྟེང་དུ་རྡོ་རྗེ་མཁའ་འགྲོ་ཡབ་ཡུམ་དཀར་པོ་གྲི་ཐོད་བསྣམས་ཤིང་གཡས་བསྐུམ་གཡོན་བརྐྱང་གིས་སྦྱོར་བ༔ གཅེར་བུ་རུས་པའི་རྒྱན་གྱིས་བརྒྱན་པར་གྱུར༔ ལྷོར་རིན་ཆེན་མཁའ་འགྲོ་ཡབ་ཡུམ་སེར་པོ་གྲི་ཐོད་བསྣམས་ཤིང་གཡས་བསྐུམ་གཡོན་བརྐྱང་གིས་སྦྱོར་བ༔ གཅེར་བུ་རུས་པའི་རྒྱན་གྱིས་བརྒྱན་པར་བསྒོམ༔
ནུབ་ཏུ་པདྨ་མཁའ་འགྲོ་ཡབ་ཡུམ་དམར་པོ་གྲི་ཐོད་བསྣམས་ཤིང་གཡས་བསྐུམ་གཡོན་བརྐྱང་གིས་སྦྱོར་བ༔ གཅེར་བུ་རུས་པའི་རྒྱན་གྱིས་བརྒྱན་པར་བསྒོམ༔ བྱང་དུ་ལས་ཀྱི་མཁའ་འགྲོ་ཡབ་ཡུམ་ལྗང་གུ་གྲི་ཐོད་བསྣམས་ཤིང་གཡས་བསྐུམ་གཡོན་བརྐྱང་གིས་སྦྱོར་བ༔ གཅེར་བུ་རུས་པའི་རྒྱན་གྱིས་བརྒྱན་པར་བསྒོམ༔ ལྷ་ཚོགས་དེ་དག་རང་རང་གི་སྤྱི་བོར་ཨོཾ༔ མགྲིན་པ་ཨཱཿ ཐུགས་ཀར་ཧཱུཾ་གསལ་བར་གྱུར༔ ཨོཾ་ཨཱཿཧཱུྃ༔ བདེ་ཆེན་དབང་གི་དཀྱིལ་འཁོར་དུ་འོད་འཕྲོས་པས༔ ཡེ་ཤེས་པ་སྤྱན་དྲངས༔ བསྐྱེད་པ་ལ་མངོན་དུ་བསྟིམ་མོ༔ དེ་ནས་ཐུགས་སྒྲུབ་ཉུང་བ་རྩ་གསུམ་མཆོད་ཕྲེང་གི༔ སྤྱན་འདྲེན་མན་ཆད་ཚང་བར་འདོན༔ དེ་ནས་བསྙེན་སྒྲུབ་ལས་སྦྱོར་དབང་བླངས་བ་སོགས་གཞུང་ལྟར་བྱའོ༔ ཞེས་པ་ཟུར་མང་ནང་སོས་བསྐུལ་ནས༔ སྔགས་འཆང་རཱ་ག་ཨ་སྱས་བསྒྲིགས་པ་སྟེ༔ རཏྣའི་ཡི་གེ་གཏེར་གཞུང་སླད་མེད་ཚིག་རྣམས་གབ་སྤྱད་ནས་བསྒྲིགས་པ་སྟེ༔ ཞལ་ཤེས་ཀྱི་མན་ངག་ལྟར་བྲིས་པ་ཡིན་གྱིས༔ རང་བཟོའི་རྩོམ་དུ་མ་དགོངས་ཤིག༔ ༧ བཀའ་བསྒོ་མཚམས་གཅོད་ནས་བཟུང་ཏིང་འཛིན་རྣམ་གསུམ་གྱི་ཙིཏྟ་བཛྲ་ས་མ་ཏི་ཧཱུྃ་ཡན་དྲག་པོའི་ལས་
བྱང་ལྟར་ལ་དཀྱིལ་འཁོར་འབྱུང་བ་རིམ་བརྩེགས་ནས་བདག་མདུན་གྱི་བསྐྱེད་རིམ་དབང་བསྐུར་ཡན་འདོན་འགྲིགས་འདི་བཞིན་དང་༔ སྤྱན་འདྲེན་ནས་བཟུང་མཆོད་བསྟོད་བཤགས་པ་ཡན་ཞི་བའི་ལས་བྱང་ཉུང་བ་ལྟར་དང་༔ ཐུན་མཚམས་སུ་མཇུག་གི་སྨོན་ལམ་དང་བཅས་རྫོགས་པར་བཏང་༔ དངོས་གཞི་སྤྲོ་བསྡུའི་དམིགས་པ་སྒྲུབ་གཞུང་གི་རྩ་བའི་ལྷ་ལས་འོད་འཕྲོས་ནས་བཟུང་༔ ནུས་པ་བསྡུས་ཡན་དང་༔ སླར་ཡང་མདུན་བསྐྱེད་ཡི་གེ་གསུམ་ལས་འབྲུ་གསུམ་བར་མ་ཆད་པ་བདག་གི་གནས་གསུམ་དུ་ཐིམ་ཕྱོགས་དུས་རྒྱལ་བ་ཐམས་ཅད་ཀྱི་མཐུ་ནུས་བྱིན་རླབས་ཀྱི་ངོ་བོར་གྱུར་པར་བསམ་ཞིང་ཡང་ཡང་སྤྲོ་བསྡུའི་བྱིན་རླབས་དང་གཟི་བརྗིད་བསྐྱེད་ཅིང་ནུས་པ་བསྡུའོ༔ མཚན་ཕྲན་བུ་འདི་སྒྲུབ་པའི་ཐུན་མཚམས་ཆུ་བྱི་ས་ག་ཟླ་བའི་ཚེས་བཅུ་ལའོ༔ ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།