གུ་རུ་དྲག་པོའི་ཚེ་དཔག་མེད་སྒྲུབ་པའི་འདོན་འགྲིགས།
གུ་རུ་དྲག་པོའི་ཚེ་དཔག་མེད་སྒྲུབ་པའི་འདོན་འགྲིགས་བཞུགས་སོ༔
དེ་ནས་སྟ་གོན་གཞུང་ལྟར་བྱས་ལ༔ བགེགས་གཏོར་ནི་ནམ་འདོན་བཏང་བར་བྱ༔ དེ་ནས་ལས་བྱང་ནི༔ ལྷ་བསྐྱེད་ཀྱི་མཇུག་ཏུ༔ ལྕགས་ཀྱུ་ཞགས་པ་ལྕགས་སྒྲོག་དྲིལ༔ ཞེས་པ་ཡན་ཆད་བདག་བསྐྱེད་ཡིན་པ་ལ༔ མདུན་བསྐྱེད་ནི༔ ༈ དམིགས་མེད་ངང་ལས་གཏོར་མ་ཚེ་དཔག་མེད༔ མཉམ་བཞག་ཚེ་བུམ་རིན་ཆེན་རྒྱན་གྱིས་སྤྲས་བུམ་པའི་ནང་དུ་ཧཱུྃཨཱཧཱུྃ་ཧཱུྃ་བཞི་བསྒོམ༔ གཞན་ཡང་ལྷ་དང་རིག་འཛིན་ཚོགས༔ ཞེས་པ་ཡན་ཆད་ལས་བྱང་གཞུང་ལྟར་རོ༔ དེ་ནས་བསྙེན་པའི་སྐབས་སུ༔ མདུན་བསྐྱེད་བུམ་པའི་ནང་དུ་ཧཱུྃཨཱཧཱུྃ་ཧཱུྃ་བཞི༔ བཀྲག་མདངས་དང་
འབྲུ་བཞི་འོད་དང་གཟི་བརྗིད་རྒྱས་པར་གྱུར༔ ཨོཾ་གུ་རུ་ཨཱ་ཡུ་ཛྙཱ་ན་བཛྲ་ཨཱ་ཡུ་ཥ་ཧཱུཾ་ཧཱུཾ་ཚྭ་ཛ་སིདྡྷི་ཕ་ལ་ཧཱུྃ་ཨ༔ ཐུན་མཚམས་སུ༔ ཧཱུྃ༔ ཨོ་རྒྱན་པདྨ་རིག་འཛིན་ཚེ་དཔག་མེད༔ རྒྱལ་བའི་ཐུགས་ཀྱི་གསང་མཛོད་དམ་པ་ནས༔ འགྱུར་མེད་རྡོ་རྗེའི་ཚེ་མཆོག་དམ་པ་སྩོལ༔ སྐལ་ལྡན་བདག་ལ་འཆི་མེད་ཚེ་ཡི་གཏེར༔ སྐུ་གསུང་རྡོ་རྗེའི་དབྱིངས་སུ་བསྐུལ་ནས་ཀྱང་༔ འཆི་མེད་རྡོ་རྗེའི་དངོས་གྲུབ་བསྩལ་དུ་གསོལ༔ ཞེས་གསོལ་བ་བཏབ་པས༔ འཆི་མེད་རྡོ་རྗེའི་བདུད་རྩིའི་ལུས་གང་སྤྱི་བོར་ལུད༔ དྭངས་མ་ཀུན་འདུས་ཡིག་འབྲུ་བཞི་ལ་ཐིམ༔ ཡིག་འབྲུ་བཞི་ཡང་ཉི་
ཟླའི་གའུ་གྱུར༔ དེ་ཡང་སྙིང་གི་དཀྱིལ་ཞུགས་སྙིང་གི་ཕྱི༔ མི་འགྱུར་རྡོ་རྗེས་རྒྱས་གདབ་རྒྱ་ཡིས་བསྡམས༔ ལོ་བརྒྱའི་བར་དུ་གཡོ་འཇིག་མེད་པར་གྱུར་དེ་ལྟར་ཐུན་བཞིར་ཉམས་སུ་བླངས་པའོ༔ ཞག་བདུན་ནམ་ཉེར་གཅིག༔ ཡང་ན་རྟགས་ཐོན་ནས་ཚེ་གཏོར་གྱི་དབང་བླངས་བ་སོགས་གཞུང་ལྟར་རོ༔ ༈ གུ་རུ་དྲག་པོ་ཚེ་དཔག་མེད་སྒྲུབ་པའི་དམིགས་གསལ་གཞུང་གི་ཚིག་དོན་གསལ་བར་བཀོད་པ༔ རང་ཉིད་གུ་རུ་དྲག་པོར་གསལ་བ་ཡི༔ ཐུགས་ཀར་མཆོད་རྟེན་བུམ་པར་གསང་བའི་བདག༔ དེ་ཡི་ཐུགས་ཀར་ཡེ་ཤེས་སེམས་དཔའ་ཡི༔ ཐུགས་ཀར་གསེར་གྱི་རྡོ་རྗེ་འགྲེང་བ་ཡི་ལྟེ་བའི་ནང་དུ་ཉི་ཟླའི་གའུ་ནང་༔ ཧཱུྃ་མཐིང་ཁོག་པར་ཧྲཱིཿ དམར་དེ་ཡི་ནང་༔ ནི་ལྗང་མིག་ཏུ་ཨཱཝཡིག་དཀར་པོས་མཚན༔ མདུན་བསྐྱེད་ཚེ་གཏོར་ཚེ་དཔག་མེད་གསལ་བའི༔ ཐུགས་ཀར་ཟླ་སྟེང་ཧྲིལ་སྔགས་གཡས་འཁོར༔ དེ་ཡི་ཕྱག་གི་བུམ་པའི་ནང་དུ་ནི༔ ཧཱུྃ་ཧཱུྃཨཱཧཱུྃ་བཞི་པོ་གོང་ལྟར་གསལ༔ བདག་གི་ཐུགས་ལས་འོད་འཕྲོས་མདུན་བསྐྱེད་ཐུགས་ལ་ཕོག༔ མདུན་བསྐྱེད་སྔགས་འཁོར་དྲག་འཁོར་དེ་ཡི་འོད༔ བུམ་པར་ཕོག་པས་ཡིག་འབྲུ་བཞི་པོ་ལས༔ འོད་ཟེར་ཁ་དོག་སྣ་ཚོགས་
ཕྱོགས་བཅུར་འཕྲོས༔ སྣང་སྲིད་འཁོར་འདས་ཚེ་དཔལ་བཀྲག་བཅུད་བསྡུས༔ བདག་དང་བུམ་པ་ལ་ཐིམ་བདུད་རྩིས་གང་༔ ཡིག་འབྲུ་བཞི་པོ་བཀྲག་མདངས་འོད་དུ་འབར༔ དེ་ལས་འོད་འཕྲོས་འཇིག་རྟེན་འོད་ཀྱིས་ཁྱབ༔ ལྷ་ཡི་ཚེ་ཀུན་ཨཱཿཡིག་དཀར་པོ་དང་༔ མི་ཡི་ཚེ་ཀུན་ནཾ་ཡིག་ལྗང་གུ་དང་༔ ཀླུ་དང་ལྷ་འདྲེའི་ཚེ་ནི་ཧཱུཾ་མཐིང་གྱུར༔ སངས་རྒྱས་བྱང་སེམས་ཚེ་ཀུན་ཧྲིདམར་གྱུར༔ ཡིག་འབྲུ་བཞི་པོས་འཇིག་རྟེན་ཐམས་ཅད་གང་༔ སླར་ཡང་རང་གི་ཡིག་འབྲུ་བཞི་ལས་འོད་འཕྲོས་པས༔ ཐམས་ཅད་ཚུར་འདུས་བདག་དང་བུམ་པར་ཐིམ༔ བདག་དང་བུམ་པ་ཚེ་བཅུད་བདུད་རྩིས་གང་༔ ཡིག་འབྲུ་ཐམས་ཅད་སྙིང་དབུས་འབྲུ་བཞིར་ཐིམ༔ འབྲུ་བཞི་སྔགས་ལས་གཟི་མདངས་རབ་ཏུ་འབར༔ མདུན་བསྐྱེད་ཕྱག་གི་བུམ་པ་བདུད་རྩིས་གང་༔ དེ་ལྟར་བསྒོམ་ཞིང་བསྙེན་པ་རྩེ་གཅིག་འབད༔ ཐུན་མཐར་མཆོད་ཅིང་གསོལ་འདེབས་བྱས་པ་ཡིས༔ མདུན་བསྐྱེད་ཕྱག་གི་བུམ་པས་དབང་བསྐུར་བས༔ བུམ་པའི་བདུད་རྩི་ཚངས་བུག་ནས་ཞུགས་ཏེ༔ ལུས་གང་དྭངས་མའི་བཅུད་རྣམས་སྙིང་དབུས་ཀྱི༔ ཡིག་འབྲུ་བཞི་ལ་སིབ་སིབ་ཐིམ་པས་གཟི་བརྗིད་འབར༔ ཉི་ཟླའི་
གའུ་ཁ་ཡང་དམ་དུ་འགྲིགས༔ གའུ་འོག་གི་རྡོ་རྗེ་རྒྱ་གྲམ་གྱི༔ རྭ་བཞི་ཡར་ལངས་བསྣོལ་མར་རྒྱས་གདབ་བསྒོམ༔ ཐུན་བཞི་དྲག་པོའི་ལས་བྱང་ཚར་བཞི་དང་༔ གསོལ་འདེབས་ལ་སོགས་གཞུང་བཞིན་བྱ་བ་སྟེ༔ གྲོལ་ཁ་གཏོར་མ་སྤྱི་བོར་བཞག་པ་ཙམ༔ དེ་མིན་ཐུན་མཚམས་གྲོལ་ཁ་ཁྱད་པར་མེད༔ མཐར་ནི་མདུན་བསྐྱེད་རང་ལ་བསྟིམ༔ གྲོལ་ཁ་དྲག་པོའི་ཚོགས་ཆད་མདོ༔ བསྡུ་ཆོག་བཀྲ་ཤིས་ཐུགས་སྒྲུབ་ལྟར༔ རཱ་ག་ཨ་སྱས་གསལ་བརྗོད་དེས༔ ཚེ་འདིར་རིག་འཛིན་ཐོབ་པར་ཤོག༔ མངྒ་ལཾ༔ ༈ གུ་རུ་དྲག་པོ་དང་རིགས་བདག་སྣང་བ་མཐའ་ཡས་སྦག་སྒྲུབ་བདེ་བ་ཅན་དུ་སྐྱེ་ཐབས་ཟིན་བྲིས་བཞུགས་སོ༔ ན་མོ་གུ་རུ་པདྨ་ཀྲོ་དྷ་ཡེ༔ ཨོ་རྒྱན་ཆེན་པོའི་ལུང་བྱང་ལས༔ རཏྣའི་ཆོས་སྐོར་ཁམས་དང་གཙང་ཕྱོགས་སུ༔ མ་འོངས་བསྟན་པ་དར་རྒྱས་ལུང་བསྟན་ལྟར༔ དེང་སང་མདོ་ཁམས་ཤར་གྱི་ཕྱོགས་འདི་ན༔ སྔགས་ལ་མོས་པའི་སྐྱ་སེར་ཕལ་ཆེར་གྱིས༔ རཏྣའི་གུར་དྲག་ཡི་དམ་བྱེད་པ་མང་༔ གུར་དྲག་ལས་ལྷག་ཡི་དམ་གཞན་མེད་ཀྱང་༔ མཐར་ཐུག་རྫོགས་པའི་སངས་རྒྱས་ཐོབ་པ་དང་༔ བདེ་བར་དག་པའི་ཞིང་ཁམས་ཐོབ་པ་ཡི༔ དང་པོ་སེམས་
བསྐྱེད་འདུན་པ་མེད་པ་ཡི༔ སྲུང་ཟློག་ངག་ནུས་ལྷ་འདྲེ་འདུལ་བའི་ཕྱིར༔ བཏོན་པས་ཙན་དན་སོལ་བ་བྱས་པ་ལྟར༔ ཕྱི་མའི་ས་ལམ་ཕན་པ་ཆུང་བར་སོམ༔ རྫོགས་པའི་བྱང་ཆུབ་ཐོབ་ཕྱིར་ལ་དམིགས་ན༔ ལྷ་འདྲེ་འདུལ་དང་རིག་ནུས་ཞོར་ལ་འབྱུང་༔ དེ་ཕྱིར་ཐོག་མར་སེམས་བསྐྱེད་གཟབ་པ་གཅེས༔ བྱང་ཆུབ་དམིགས་ཀྱང་བྱང་ཆུབ་ཧ་ཐག་རིང་༔ ཤཱཀ་ཐུབ་ཀྱིས་ཀྱང་གྲངས་མེད་གསུམ་འགོར་སྐད༔ རང་རེ་དེ་བས་བརྩོན་འགྲུས་མི་ཆེ་འམ༔ ངན་སོང་སྡུག་བསྔལ་འདི་ཡང་ཡ་རེ་ང་༔ མཐོ་རིས་སྐྱེ་བ་ཁོ་ན་བརྒྱུད་དགོས་ན༔ སྐྱེ་འཆི་གྲངས་མེད་མྱོང་དགོས་དཀའ་བ་ལགས༔ འགའ་ཞིག་ཨོ་རྒྱན་ལ་མོས་རྒྱུ་མཚན་གྱིས༔ ཟངས་མདོག་དཔལ་རིར་སྨོན་ལམ་འདེབས་མོད་ཀྱང་༔ འཇའ་ལུས་རིག་འཛིན་གྲལ་ན་ཚུད་པར་དཀའ༔ དེང་སང་ཁྲོ་བོའི་བསྐྱེད་རིམ་ང་རྒྱལ་དང་༔ ལྷ་འདྲེ་ཐུབ་པ་བྱས་དང་ངན་སོང་སོགས༔ ལས་ཀྱི་རྒྱུ་མཐུན་སྲིན་པོའི་ལུས་སུ་གྱུར༔ ཨོ་རྒྱན་ཞལ་མཐོང་དམ་ཆོས་ཐོབ་མོད་ཀྱང་༔ སྐྱེ་རྒ་ན་འཆི་སྡུག་བསྔལ་འདི་དང་འདྲ༔ དེ་ནས་ནུབ་ཕྱོགས་བདེ་ཆེན་ཞིང་ཁམས་སུ༔ སྨོན་ལམ་བཏབ་ན་རྟག་པའི་བདེ་བའོ༔ སྨོན་ལམ་ཁ་
བསྒྱུར་སྔགས་ལ་དམིགས་པའི་གནད༔ བསྒྱུར་ཁ་ཤེས་ན་གུ་རུ་དྲག་པོ་ལས༔ བདེ་བ་ཅན་དུ་སྐྱེ་ཐབས་ཟབ་པ་མེད། ཅི་ཕྱིར་ཞེ་ན་གུ་རུ་དྲག་པོ་འདི༔ འོད་དཔག་མེད་ཀྱི་སྤྲུལ་པའི་ཁྲོ་བོ་ལུགས༔ ཚེ་དཔག་མེད་དང་འོད་དཔག་མེད་པ་དང་༔ སྣང་བ་མཐའ་ཡས་དོན་གཅིག་མཚན་གྱི་གྲངས༔ གུ་དྲག་ཁྲག་འཐུང་རོལ་པའི་རྩ་རྒྱུད་ལས༔ ཆེ་མཆོག་པདྨ་ཐོད་ཕྲེང་རྩལ༔ རིགས་བདག་སྣང་བ་མཐའ་ཡས་ཁྲོས་པའི་ཧེ་རུ་ཀཿ ཞེས་དང་༔ གུར་དྲག་བདེ་གཤེགས་འདུས་པའི་གཞུང་ཆེན་ལས༔ ཆོས་སྐུ་ཀུན་བཟང་ཐུགས་ལས་མ་གཡོས་ཀྱང་༔ ལོངས་སྤྱོད་རྫོགས་སྐུ་འོད་དཔག་མེད་དུ་ཤར༔ སྤྲུལ་སྐུ་ཨོ་རྒྱན་འགྲོ་བའི་དཔལ་དུ་བྱོན༔ སྐུ་གསུམ་ཡེ་ཤེས་ངང་ལ་ཕྱག་འཚལ་ལོ༔ ཧཱུྃ༔ ཁམས་གསུམ་གནས་ནས་སྟོབས་ལྡན་རྫུ་འཕྲུལ་ཅན༔ ནུབ་ཕྱོགས་བདེ་བ་ཅན་གྱི་ཞིང་ཁམས་སུ༔ སྣང་བ་མཐའ་ཡས་སྐུ་གསུང་ཐུགས་ལས་སྤྲུལ༔ ངོ་མཚར་རྨད་བྱུང་པདྨ་ཧེ་རུ་ཀ༔ མཐུ་ཆེན་པདྨ་དབང་ཕྱུག་གཟི་མདངས་ལྡན༔ དྲག་པོ་པདྨའི་སྐུ་ལ་ཕྱག་འཚལ་ལོ༔ གསུངས་པའི་དོན་ལ་གོ་བ་ངེས་ཤེས་སྐྱེ༔ ༈ དེ་ནས་རྒྱས་པར་གུ་དྲག་ལས་བྱང་འདོན༔ མ་ལྕོགས་དྲག་པོ་གཙོ་རྐྱང་དྲན་རྫོགས༔
བྷྲཻཾ༔ དབུ་གཙུག་བྱ་ཁྱུང་རྭ་བར་ནོར་བུའི་བར༔ ཕལ་ཆེར་ཚེ་དཔག་མེད་པ་བསྒོམ་བཤད་ཀྱང་༔ གསང་སྒྲུབ་གཞུང་ནས་སྣང་མཐའ་མཉམ་བཞག་མཛད༔ སྤྲུལ་སྐུའི་ཆ་ལུགས་བསྒོམ་པར་གསུངས་པའི་ཕྱིར༔ ༈ བྱ་ཁྱུང་རྭ་བར་ནོར་བུའི་རྩེ་མོ་ནས༔ སྐྱེས་པའི་མེ་ཏོག་པདྨ་དམར་པོ་ནི༔ འདབ་མ་སྟོང་ལྡན་ཆེ་ཞིང་ཡངས་པར་བསྒོམ༔ དེ་སྟེང་ཟེའུ་འབྲུ་སངས་རྒྱས་འོད་དཔག་མེད༔ པདྨ་རཱ་གའི་མདོག་ཅན་འོད་ཟེར་འཕྲོ༔ དབུ་ལ་གཙུག་ཏོར་ཞབས་ལ་འཁོར་ལོ་སོགས༔ མཚན་དང་དཔེ་བྱད་ཐམས་ཅད་ཡོངས་སུ་རྫོགས༔ ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས༔ སྐུ་ལ་ཆོས་གོས་ངུར་སྨིག་རྣམ་གསུམ་གསོལ༔ ཕྱག་གཉིས་མཉམ་བཞག་མཛད་པའི་སྟེང་དུ་ནི༔ བཻཌཱུརྱ་ཡི་ལྷུང་བཟེད་བདུད་རྩིས་བཀང་༔ ཐུགས་རྗེས་སྤྱན་གྱིས་བདག་ལ་གཟིགས་པར་བྷེ༔ འདབ་མ་སྟོང་གི་སྟེང་དུ་སངས་རྒྱས་སྟོང་༔ ཆ་ལུགས་ཤཱཀྱ་ཐུབ་པ་འདྲ་བར་བྷེ་དེ་དག་མངོན་རྟོགས་དུས་ནས་གསལ་བར་བསྒོམ༔ སྤྱན་འདྲེན་དུས་སུ་སྤྱན་དྲངས་མཉམ་དུ་བསྟིམ༔ འོན་ཀྱང་དམིགས་པ་དེ་དག་མ་གསལ་རཿ༔ དྲན་རྫོགས་ཉིད་དུ་སླར་ཡང་གསལ་བཏབ་སྟེ༔ སྣང་བ་
མཐའ་ཡས་ཐུགས་ཀར་ཟླ་བའི་སྟེང་༔ དྷཱི༔ཡིག་དམར་པོའི་མཐའ་སྐོར་སྔགས་གཡས་འཁོར༔ དེ་ལས་འོད་ཟེར་ནུབ་ཀྱི་ཕྱོགས་འཕྲོས་པས༔ བདེ་བ་ཅན་ནས་རིགས་བདག་སྣང་མཐའ་ཡས༔ སངས་རྒྱས་སྟོང་བཅས་ཡང་ཡང་སྤྱན་དྲངས་བསྟིམ༔ ངེས་པར་སྤྱི་བོར་བཞུགས་པའི་ངེས་ཤེས་བྱ༔ དེ་ནས་བསྙེན་པ་བྱེད་ཚེ་དམིགས་པ་ནི༔ སྣང་བ་མཐའ་ཡས་དཔྲལ་མགྲིན་ཐུགས་ཀ་དང་༔ ལྟེ་བ་གསང་གནས་ལྔ་ནས་འོད་ཟེར་ནི༔ དཀར་དམར་མཐིང་སེར་ལྗང་གུ་ལྔ་འཕྲོས་ཏེ༔ རང་གི་དཔྲལ་མགྲིན་སྙིང་ག་ལྟེ་བ་ནས༔ གསང་གནས་ལྔ་རུ་ཡང་ཡང་ཐིམ་པ་ཡིས༔ དུག་ལྔའི་སྒོ་ནས་བསགས་པའི་སྡིག་སྒྲིབ་དག༔ སྐུ་གསུང་ཐུགས་ཡོན་ཕྲིན་ལས་ལྔ་པོ་ཡི༔ དབང་དང་བྱིན་རླབས་དངོས་གྲུབ་ཐོབ་བསྒོམ་ཞིང་༔ བསྙེན་པ་འདི་ལ་ཅི་ནུས་བཟླ་བར་བྱ༔ ཨོཾ་ཨཱཿཧཱུྃ་སརྦ་སིདྡྷི་ཧཱུྃ༔ དེ་ནས་སྒྲུབ་པ་ཚེ་སྒྲུབ་གཉིས་ཀ་ནི༔ འོད་དཔག་མེད་པའི་ཐུགས་ཀའི་ས་བོན་ལས༔ འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས༔ རྒྱལ་བ་སྲས་བཅས་ཀུན་གྱི་བྱིན་རླབས་དང་༔ ལྷ་ཀླུ་མི་གསུམ་ཀུན་གྱི་ཚེ་བསོད་ནམས༔ འབྱུང་བའི་བཅུད་དང་དྭངས་མ་ཐམས་ཅད་བསྡུས༔ ལྷུང་བཟེད་ནང་
ཞུགས་འཆི་མེད་བདུད་རྩིར་གྱུར༔ ཁོལ་ཞིང་ལུད་པས་རང་གི་སྤྱི་བོ་ནས༔ ཚངས་བུག་ཏུ་ཞུགས་ལུས་ཀུན་བདུད་རྩིས་གང་༔ འཆི་མེད་ཚེ་ཡི་དངོས་གྲུབ་ཐོབ་བསྒོམ་ཞིང་༔ ཨོཾ་ཨ་མི་དྷེ་ཝ་སརྦ་སིདྡྷི་ཧཱུཾ༔ ཞེས་པ་ཅི་ཙམ་ནུས་པའི་བར་དུ་བྷེ༔ འདི་ལྟར་སྒོམ་བཟླས་བྱས་པའི་དགེ་བ་འདིས༔ མཆོག་དང་ཐུན་མོང་དངོས་གྲུབ་མྱུར་ཐོབ་ཅིང་༔ ནམ་ཞིག་འཕོས་ཚེ་བདེ་ཆེན་ཞིང་ཁམས་སུ༔ མེ་ཏོག་པདྨའི་སྦུབས་ལ་བརྫུས་སྐྱེས་ནས༔ སྣང་བ་མཐའ་ཡས་མཆོད་པས་མཉེས་བྱེད་ཤོག༔ ཅེས་བརྗོད་དེ་ལྟར་རྒྱུན་དུ་ཉམས་བླངས་ན༔ ། བདེ་བ་ཅན་དུ་སྐྱེ་བར་ཐེ་ཚོམ་མེད༔ དེ་ཡང་ཐུན་མགོར་བསྐྱེད་རིམ་གསལ་གདབ་ཕྱིར༔ དང་པོ་རང་ལུས་གུར་དྲག་གསལ་གདབ་ལ༔ ཨ་ཙིག་བདུན་ནམ་ཉེར་གཅིག་བརྒྱ་ལ་སོགས༔ རང་གི་ཅི་ཙམ་འདོད་པ་བཟླས་པའི་རྗེས༔ སྣང་བ་མཐའ་ཡས་ཁོ་ནའི་བསྙེན་པ་བྱ༔ བསྙེན་པ་དང་ནི་སྒྲུབ་པའི་དམིགས་པ་གཉིས༔ མང་ཉུང་ཕྱེད་ཕྱེད་ཙམ་རེ་བྱ་བ་ཡི༔ འདི་ནི་གུར་དྲག་རིགས་བདག་སྦྲག་སྒྲུབ་སྟེ༔ གུར་དྲག་བསྒོམ་ཞིང་ཅུང་ཟད་བཟླས་པ་དེས༔ སྙིགས་དུས་སྡེ་བརྒྱད་གནོད་པ་སྲུང་བའི་མཆོག༔ བསྒྲུབ་པའི་སྔགས་དང་དམིགས་པ་དེ་གཉིས་
པོ༔ ཚེ་སྒྲུབ་མཆོག་ཡིན་ཚེ་ཡི་བར་ཆད་སེལ༔ བསྙེན་པའི་སྔགས་དང་དམིགས་པ་དེ་གཉིས་ནི༔ བདེ་བ་ཅན་དུ་སྐྱེ་བའི་ས་བོན་ཏེ༔ ཕྱི་མ་གར་སྐྱེ་ལས་འབྲས་དབང་ཆེ་བས༔ དེ་ཡིས་བདེ་ཆེན་སྐྱེ་བའི་ལས་འཕྲོ་བཞག༔ འདི་ནི་བླ་མེད་རྫོགས་ཆེན་ལུགས་ཡིན་པས༔ བསྐྱེད་རིམ་བསྡུ་བའི་དམིགས་པ་མི་དགོས་ཏེ༔ སྒོམ་མཁན་སེམས་ཀྱི་ངོ་བོ་བལྟས་པས་འཐུས༔ རང་གི་ཇི་ལྟར་ཉམས་སུ་བླངས་པ་ལྟར༔ ༧ རཱ་ག་ཨ་སྱས་གཞན་ཕན་བསམ་པས་སྨྲས་པདྨ་མཐར་ཕྱིན་ཞེས་བྱས་ཡི་གེར་བྲིས༔ ཉེས་འགལ་མཆིས་ན་ཆོས་བདག་སྲུང་མར་བཤགས༔ དགེ་བས་སྔགས་འཆང་འགའ་ལ་ཕན་པར་ཤོག༔ སརྦ་མངྒ་ལཾ༔ ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།