རཱ་ག་ཨ་སྱས་བསྒྲིགས་པ་ཡི༔ ཁྱུང་དམར་མེ་ཕྲེང་ཐོག་རྒོད་ཀྱི་ལས་བྱང་དང་གཏོར་ཟློག
རཱ་ག་ཨ་སྱས་བསྒྲིགས་པ་ཡི༔ ཁྱུང་དམར་མེ་ཕྲེང་ཐོག་རྒོད་ཀྱི་ལས་བྱང་དང་གཏོར་ཟློག་བཞུགས་སོ༔
བདག་མདུན་ཁྲོ་དམར་པོ་ལས་འོད་ཟེར་འཕྲོས་ཀླུ་གཉན་ས་བདག་གདུག་པ་ཅན་ཐམས་ཅད་ཚར་བཅད་ཚུར་འདུས༔ ཁྲོ་ཡོངས་སུ་གྱུར་པ་ལས༔ བདག་མདུན་བྱ་ཁྱུང་དམར་པོ༔ མེའི་མདོག་ཅན༔ གཤོག་པ་གཡུ༔ མཆུ་སྡེར་གནམ་ལྕགས་ལས་གྲུབ་པ་སྤྱི་བོར་ནོར་བུའི་བརྒྱན་ཅིང་༔ སྦྲུལ་རིགས་ལྔ་ཡི་མགོ་ཁར་བཅུག་ཅིང་ཟ་བ༔ དེའི་ལུས་ལ་མེའི་འོད་ཟེར་ཕྱོགས་བཅུར་འཕྲོས་ནས༔ ཏོང་ཏོང་གི་སྒྲ་བཏོན་པས༔ ཀླུ་རིགས་གཉན་རིགས་ས་བདག་ཐམས་ཅད་སྙིང་འདར་བར་གྱུར༔ ཧཱུྃ༔ རི་རབ་ཆེན་པོ་རི་ཡི་རྩེ་མོ་ནས༔ དཔག་བསམ་
རྒྱས་པ་ཤིང་གི་སྡོང་པོ་ནས༔ འཇིགས་བྱེད་སྲིད་པའི་བྱ་ཁྱུང་ཁྲོ་བོའི་རྒྱལ༔ བདག་གིས་དད་པ་དང་ནི་དམ་ཚིག་གིས༔ ཚུར་གཤེགས་ཚུར་གཤེགས་དཔལ་ཆེན་བཅོམ་ལྡན་འདས༔ གང་འདུལ་ཐབས་ཀྱིས་བྱ་ཁྱུང་སྐུ་རུ་སྤྲུལ༔ ཁྲོ་རྒྱལ་དག་དང་དགོངས་པ་མཉམ་པར་བཞུགས༔ ཐབས་དང་ཤེས་རབ་གཉིས་མེད་ཡུམ་དང་སྦྱོར༔ གནམ་ལྕགས་ངར་མའི་མཆུ་སྡེར་ཕྱར་བ་ཡིས༔ ས་བདག་ཀླུ་གཉན་འདར་ཞིང་འཇིགས་པར་བྱེད༔ ཁྲོ་ཆུའི་རལ་པ་བསྐལ་པའི་མེ་ཆེན་འབར༔ གཤོག་པ་གསེར་གྱི་རལ་གྲི་མེ་དཔུང་འབར༔ སྣང་སྲིད་མ་ལུས་ཟིལ་གྱིས་
གནོན་པར་བྱེད༔ མཇུག་མ་གཡུ་ཡི་མཚོན་ཆ་རལ་གྲི་ཁ༔ འཁོར་ལོ་རིན་ཆེན་འབར་བས་དབུ་ལ་བརྒྱན༔ རྣལ་འབྱོར་བདག་གིས་བྱ་ཁྱུང་བོས་པའི་ཚེ༔ སྔོན་གྱི་ཐུགས་དམ་ལས་མངག་པ་ཡི༔ སྤྱན་ནས་ཁྲག་གི་རྦ་རླབས་ཀྱི་ལི་ལི༔ ཁྱུང་སྐད་ཏོང་ཏོང་ཀླུ་རྣམས་སྲོག་རྩ་འདར༔ གཤོག་པ་གཡས་པས་ཉི་ཟླ་ཚོགས་པོར་འཕེན༔ གཤོག་པ་གཡོན་པས་ས་གཞི་གདར་ཤ་གཅོད༔ ལྕགས་སྡེར་བསྒྲད་པས་ཚངས་པའི་ཡུལ་ས་གནོན༔ གཤོག་པ་བརྡབས་པས་གཟའ་ཀླུ་དབང་དུ་སྡུདཿ༔ སྤུ་གྲིའི་མཆེ་གཙིགས་གནམ་ལྕགས་ངར་མོའི་མཆུ༔ ཀླུ་ཆེན་བརྒྱད་པོ་འདར་ཞིང་ལས་ལ་ཁོལ༔ བྱང་ཁྱུང་རྒྱལ་པོ་འབོད་དོ་སྙན་མ་སྲ༔ བྱ་ཁྱུང་རྒྱལ་པོ་གཡབ་བོ་སྤྱན་མ་རྟུལ༔ བྱ་ཁྱུང་རྒྱལ་པོ་བརྟེན་ནོ་རྒྱང་མ་རིང་༔ བྱ་ཁྱུང་རྒྱལ་པོ་བསྒྲུབ་བོ་མཐུ་མ་ཆུང་༔ བྱ་ཁྱུང་རྒྱལ་པོ་བསྐུལ་ལོ་རྩལ་མ་ཞེན༔ ཀླུ་གདོན་བཟློག་ཅིང་ཕྲིན་ལས་བསྒྲུབ་པའི་ཕྱིར༔ ཐུགས་དམ་མ་གཡེལ་གནས་འདིར་གཤེགས་སུ་གསོལ༔ ཨོ་ཁྲོ་གྷ་རུ་ཎ་ཨེ་ཧྱ་ཧི་བཛྲ་ས་མ་ཡ་ཛ༔ ཛཿཧཱུྃ་བཾ་ཧོཿ ཧཱུྃ༔ དུར་ཁྲོད་ཆེན་པོ་མེ་ཀློང་འབར་བའི་དབུས༔ ཁྱུང་ཆེན་རོལ་པའི་དཀྱིལ་འཁོར་ཆེན་
པོ་འདིར༔ ཁྲོ་རྒྱལ་དྲེགས་འཇོམས་ཁྱུང་གི་ལྷ་ཚོགས་རྣམས༔ ཉི་ཟླ་པདྨའི་གདན་ལ་བཞུགས་སུ་གསོལ༔ ཁྲོ་ག་རུ་ཎ་ས་མ་ཡ་ཏིཥྛ་ལྷན༔ ཧཱུྃ༔ དྲག་པོ་ཁྱུང་དམར་མེ་ཕྲེང་ཐོག་རྒོད་རྣམས༔ ཧཱུྃ་སྒྲ་སྒྲོག་ཅིང་བགེགས་རྣམས་འདུལ་མཛད་ལྷ༔ འབར་བའི་ཁྲོ་རྒྱལ་འཁོར་དང་བཅས་པ་ལ༔ བརྐྱང་བསྐུམ་སྲིན་པོའི་གར་གྱིས་ཕྱག་འཚལ་ལོ༔ ཨ་ཏི་པཱུ་ཧོ༔ པྲ་ཏི་ཛ་ཧོ༔ ཧཱུྃ༔ ཁྱུང་དམར་མེ་ཕྲེང་ཐོག་རྒོད་ལ༔ མེ་ཏོག་དང་ནི་བདུག་སྤོས་དང་༔ མར་མེ་དྲི་དང་ཞལ་ཟས་དང་༔ སིལ་སྙན་ཡིད་འོང་མཆོད་སྤྲིན་རྣམས༔ ཀུན་བཟང་བླ་མེད་མཆོད་པའི་སྤྲིན༔ སྐུ་གསུང་ཐུགས་ལ་མཆོད་པ་འབུལ༔ ཨོ་བཛྲ་ཨགྷཾ་སོགས། ཧཱུྃ༔ གཟུགས་སྒྲ་དྲི་རོ་རེག་བྱ་ཆོས༔ ཕུང་པོ་ལྔ་ཉིད་ཡེ་ཤེས་ལྔ༔ འདོད་ཡོན་གླུ་གར་མཆོད་ཡིད་ཚིམ༔ རྣམ་དག་མཆོད་པ་བཞེས་སུ་གསོལ༔ མ་ཧཱ་པཉྩ་པཱ་ཙ་ཧོ༔ ཧཱུྃ༔ ཐབས་དང་ཤེས་རབ་གཉིས་སུ་མེད༔ གཉིས་མེད་སྦྱོར་བའི་འཕྲོ་འདུ་ལས༔ བྱང་ཆུབ་སེམས་ཀྱི་འོད་ཟེར་འཕྲོ༔ ཐབས་ཤེས་བདེ་བ་ཆེན་པོར་བཞེས༔ མ་ཧཱ་མུ་དྲ་ས་མ་ཡ༔ གུ་ཧྱ་པཱུ་ཙ་ཧོ༔ ཧཱུྃ༔ རང་བྱུང་གདོད་ནས་རྣམ་པར་
དག༔ རྩ་བརྒྱད་སྟོང་ལ་སྦྱར་བའི་སྨན༔ རིགས་ལྔ་དམ་ཚིག་ལྔ་ཡི་དངོས༔ ཡེ་ཤེས་ལྔ་རྫོགས་སྒྲུབ་པའི་རྫ་ས༔ རྒྱུད་ལྔ་སེམས་ཅན་ཀུན་གྲོལ་ཕྱིར༔ དུག་ལྔ་སེལ་བའི་བདུད་རྩི་ཆེ༔ ངོ་མཚར་རྨད་བྱུང་ཡེ་ཤེས་མཆོག༔ ཁྱུང་ཆེན་འབར་བའི་ཚོགས་རྣམས་ལ༔ མཉམ་ཉིད་ཆེན་པོར་འབུལ་ལགས་ན༔ ཐུགས་རྗེས་བརྩེར་དགོངས་བཞེས་སུ་གསོལ༔ བཞེས་ནས་རྣལ་འབྱོར་བདག་ཅག་ལ༔ སྐུ་གསུང་ཐུགས་ཀྱི་དངོས་གྲུབ་སྩོལ༔ ཨོཾ་ཨཱཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧི༔ ཧཱུྃ༔ དམ་རྫས་གཏོར་ཆེན་འབར་བ་འདི༔ བརྗིད་ལྡན་རོ་མཆོག་བརྒྱད་དང་ལྡན༔ འདོད་ཡོན་ལྷ་མོའི་ཚོགས་ཀྱིས་སྤྲས༔ ཡེ་ཤེས་རྒྱ་མཚོའི་མཆོད་སྤྲིན་འདི༔ ཁྱུང་དམར་མེ་ཕྲེང་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ མ་ཧཱ་བ་ལིཾ་ཏ་ལ་ཁ་རཾ་ཁཱ་ཧི༔ ཧཱུྃ༔ མ་རིག་ལོག་རྟོག་འཁྲུལ་པ་ཡི༔ ཞིང་བཅུ་གདུག་པའི་རུ་དྲ་བསྒྲལ༔ ལྕང་ལོར་བཅས་པའི་བྷན་དྷ་རུ༔ ཁམས་གསུམ་བསྒྲལ་བའི་རཀྟ་བསྐྱིལ༔ ཁྱུང་ཆེན་འབར་བའི་ལྷ་ཚོགས་ཀྱི༔ ཞལ་དུ་བསྟབ་བོ་ཁ་རཾ་ཁཱ་ཧི༔ མ་ཧཱ་རཀྟ་ལ་ཁ་རཾ་ཁཱ་ཧི༔ ཧཱུྃ༔ ཡང་དག་དོན་རྟོགས་ཤེས་རབ་
ཀྱིས༔ གཟུང་འཛིན་གདུག་པའི་དགྲ་བགེགས་བསྒྲལ༔ རྒྱལ་བའི་ཚོགས་རྣམས་དེ་ལ་དགྱེས༔ ཆོས་དབྱིངས་རོལ་པའི་མཆོད་པ་བཞེས༔ མ་ཏྲཾ་རུ་ཏྲ་པྲ་བྷན་ཙཀྲ་པྲ་ཝེ་ཤ་ཡ་ཁཱ་ཧི༔ ཧཱུྃ༔ ས་བོན་ཁྲོ་ལས་མེ་ཡི་བྱ་ཁྱུང་ནི༔ མཁའ་ལྡིང་འཇིགས་བྱེད་རྒྱལ་པོ་གྷ་རུ་ཎ༔ གནམ་ལྕགས་ཁྲོ་ཆུ་ཞུན་མའི་ལུས་པོ་ལ༔ རྡེབ་བྱེད་མེ་ཡི་གཤོག་པ་ལྷབས་སེ་ལྷབ༔ འཇིགས་བྱེད་རྡོ་རྗེའི་སྡེར་མོ་ལྗིབས་སེ་ལྗིབ༔ རྡུང་བྱེད་ཟངས་ཀྱི་རྭ་ནི་ཟངས་སེ་ཟང་༔ གསེར་གྱི་སྤྱན་མིག་འབར་བ་ཀྱི་ལི་ལི༔ གནམ་ལྕགས་རྡོ་རྗེའི་མཆུ་ནི་ཐམས་སེ་ཐམ༔ འཇིགས་བྱེད་གློག་དམར་ལྕེ་ནི་ལྗིབས་སེ་ལྗིབ༔ དུང་གི་སྤུ་གྲིའི་སོ་ནི་ཐམས་སེ་ཐམ༔ རིན་ཆེན་སྣ་ཚོགས་སྤུ་ནི་སྤྲུག་པ་ལས༔ གནམ་ལྕགས་རྡོ་རྗེའི་སེར་རྒོད་ཤ་ར་ར༔ ཀླུ་རིགས་སྦྲུལ་མགོ་ལྔ་ནི་ཁར་བཅུག་ནས༔ ལག་པས་བཟུང་ཞིང་རྒྱ་མཚོའི་སྟེང་ནས་འདྲེན༔ ཀྲང་ཀྲི་སྒྲ་སྒྲོག་འཇིག་རྟེན་རླབས་ཀྱིས་གཅོད༔ གཤོག་པ་གཡས་པས་རི་རབ་ཐལ་བར་བཤིགས༔ གཤོག་པ་གཡོན་པས་ཉི་ཟླ་ཐང་ལ་འཕེན༔ ནོར་བུ་རིན་ཆེན་འབར་བས་དབུ་ལ་བརྒྱན༔ ཁྲོ་རྒྱལ་དག་དང་དགོངས་པ་
མཉམ་པར་བཞུགས༔ མཁའ་ལྡིང་ཁྱུང་ཆེན་སྐུ་ལ་ཕྱག་འཚལ་བསྟོད༔ གནོད་བྱེད་ས་བདག་ཀླུ་གཉན་བསྒྲལ་དུ་གསོལ༔ ཐུགས་དམ་དབང་གིས་བཅོལ་བའི་ཕྲིན་ལས་མཛོད༔ དེ་ནས་སྐབས་དེར་བསྙེན་པ་གཅིག་བྱ༔ ཨོ་ཁྲོ་གྷ་རུ་ཎ༔ ནཱ་ག་ལེ༔ དུ་པ་ལེ༔ པ་ཏཾ་ཏེ༔ ཀུ་རུ་ཧཱུྃ་ཧཱུྃ༔ བྷྱོ་བྷྱོ་ཛ་ཛ་ཛ༔ ཕཊ་ཕཊ་ཕཊ༔ དེ་ནས་ལིངྒ་དང་གཏོར་མ་ལ་བཀུག་གཞུག་བྱས་ལ༔ ན་མོ༔ དཀོན་མཆོག་གསུམ་དང་རྩ་བ་གསུམ་གྱི་བདེན་པ་དང་༔ ཁྱུང་ཆེན་འབར་བའི་བདེན་པ་དང་༔ བདག་དང་བསྲུང་བྱ་ལ་གནོད་ཅིང་འཚེ་བར་བྱེད་པའི་ཀླུ་གཉན་ས་བདག་གང་ཡིན་པ་ཐམས་ཅད་ལིངྒ་དང་གཏོར་མ་འདི་ལ་ཁུག་ཅིག༔ བཛྲ་ཨཾ་ཀུ་ཤ་ཛ་ཛ་ཛ༔ བཛྲ་པཱ་ཤ་ཧཱུྃ་ཧཱུྃ་ཧཱུྃ༔ བཛྲ་སྤོ་ཊ་ཐཾ་ཐཾ་ཐཾ༔ བཛྲ་གནྡྷེ་ཧོ་ཧོ་ཧོ༔ བཛྲ་ཨཱ་ཝེ་ཤ་ཡ་ཨ་ཨ་ཨ༔ རྒྱབ་རྟེན་ཐམས་ཅད་པྲ་ཝེ་ཤ་ཡ་ཕཊ་ཕཊ་ཕཊ༔ ཧཱུྃ༔ ང་ནི་ཁྲོ་རྒྱལ་སྤྲུལ་པའི་ཁྱུང་༔ སྲས་དང་སྤྲུལ་པ་དཔག་མེད་ཀྱི༔ གནམ་ལྕགས་མཆུ་སྡེར་ཁྲོ་ཆུའི་རྭ༔ དམ་ཅན་ཕྱག་མཚན་མཚོན་ཆ་ཡིས༔ གནོད་བྱེད་ལྔ་ཕུང་རྡུལ་དུ་རློགས༔ རྣམ་ཤེས་ཆོས་ཀྱི་དབྱིངས་སུ་སྒྲོལ༔ རྩ་སྔགས་ལ༔ ཨོཾ་ན་མོ་བྷངྒཱ་ཡ༔ བཛྲ་ཀཱི་ལི་ཀཱི་ལ་ཡ༔ ཨ་ཡ་
མ་དུ་རུ་ཙ་ཤ་ན༔ ནཱ་ག་དུན་ཙན་ཙནྡྷེ་མི་ལི་མི་ལི༔ བྷནྡྷ་བྷནྡྷ༔ ནཱ་ག་ནི་སྭཱ་ཧཱ༔ མཱ་ར་ཡ་ཛྭ་ལ་རཾ༔ མཱ་ར་ཡ་ཕཊ༔ ཅེས་བསྒྲལ༔ ཧཱུྃ༔ རྣལ་འབྱོར་བདག་ཅག་འཁོར་དང་བཅས་པ་ཡི༔ བྱང་ཆུབ་སྒྲུབ་ལ་བར་ཆད་བྱེད་པའི་བགེགས༔ ཀླུ་གཉན་ས་བདག་ནད་འདྲེ་གཅོང་སྲི་སོགས༔ དྲག་པོས་བསྒྲལ་བའི་ཤ་ཁྲག་རུས་པའི་ཚོགས༔ ཁྱུང་དམར་མེ་ཕྲེང་ཐོག་རྒོད་ཞལ་དུ་བསྟབས༔ ཐུགས་རྗེའི་དབང་གིས་བཞེས་ནས་བར་ཆད་སོལ༔ ཨོ་ཁྲོ་གྷ་རུ་ཊ་གནོད་བྱེད་ཀླུ་གཉན་ས་བདག་གི་ཚྭ་ས་ལ་ཁཱ་ཧི། རཀྟ་ལ་ཁཱ་ཧི༔ ཙིཏྟ་ལ་ཁཱ་ཧི༔ བཱ་སུ་ཏ་ལ་ཁཱ་ཧི༔ ཀེ་ནི་རི་ཏི་ལ་ཁཱ་ཧི༔ ཧཱུྃ༔ ཁྱུང་དམར་མེ་ཕྲེང་སྤྲུལ་པའི་བྱ་ཁྱུང་འགྱེད༔ ཡང་སྤྲུལ་ཁྱུང་གིས་སྟོང་གསུམ་འཇིག་རྟེན་གང་༔ ག་རུ་ཊ་ཡི་ཐུགས་དམ་དབྱིངས་ནས་བསྐུལ༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ ཁྱུང་ཆེན་འབར་བ་མེ་ཕྲེང་ཐོད་རྒོད་ཀྱི༔ ཁྱུང་གི་རལ་ནག་སྤུག་པ་ཡིས༔ སྲིད་པའི་མ་མོ་ཐམས་ཅད་འཁྲུག༔ གཞན་སྤྲུལ་ཁྲོ་བོའི་ཚོགས་ཀྱིས་གང་༔ གཡས་ཀྱི་གཤོག་ཟུར་ལྔ་པོ་ལས༔
སྟེང་གི་ཁྲོ་བོ་བཅུ་དང་ནི༔ གསང་བའི་ཁྲོ་མོ་བཅུ་རུ་འབར༔ སྤྱི་དཔལ་ཁྲོ་བོ་བཅུ་དང་ནི༔ རྫོགས་པ་ཆེན་པོའི་ཁྲོ་བཅུ་འབར༔ ཏ་ཀྲིཏ་ཁྲོ་བོ་བཅུ་དྲུག་ཤར༔ ལྟས་ངན་མི་རུང་སྣ་དགུ་ཡང་༔ བཟློག་གོ་ཁྱུང་ཆེན་འབར་བས་ཟློག༔ བསྒྱུར་རོ་ཆག་ཆེན་དགྲ་ལ་སྒྱུར༔ གཡོན་གྱི་གཤོག་ཟུར་ལྔ་པོ་ལ༔ སྲོག་རྩ་མ་མོ་སྤུན་བདུན་ཤར༔ ཨེ་ཀ་དྲག་མོ་སྤུན་དྲུག་སྤྲུལ༔ སྲིན་མོ་འབར་བ་སྤུན་བདུན་ཤར༔ གདོང་མོ་བཞི་དང་རྒྱལ་མོ་ལྔ༔ དབང་མོ་ཉེར་བརྒྱད་སྤྲུལ་པའི་ཁྱུང་༔ ལྟས་ངན་བརྒྱད་ཅུ་རྩ་གཅིག་དང་༔ ཡེ་འདྲོག་སུམ་བརྒྱ་དྲུག་ཅུ་དང་༔ གློ་བུར་དགུ་ཅུ་རྩ་གཅིག་ཟློག༔ བཟློག་གོ་སྡང་བའི་དགྲ་ལ་ཟློག༔ བསྒྱུར་རོ་གནོད་པའི་བགེགས་ལ་སྒྱུར༔ ཁྱུང་གི་མཇུག་སྒྲོ་བརྒྱད་པོ་ལ། རྒྱལ་མོ་བཞི་དང་གདོང་མོ་བཞི༔ སྤྲུལ་པའི་མ་མོ་བརྒྱད་དུ་ཤར༔ ཆག་ཆེན་ཉམ་ང་ཐམས་ཅད་ཟློག༔ བཟློག་གོ་ཁྱུང་ཆེན་འབར་བས་ཟློག༔ བསྒྱུར་རོ་ཆག་ཆེན་དགྲ་ལ་སྒྱུར༔ དགྲ་བགེགས་གཤེད་ཅན་བྱ་ཁྱུང་རྒྱལ་པོ་ཡིས༔ ལྟས་ངན་མ་ལུས་བཟློག་ཅིང་བསྒྱུར་བ་དང་༔ ལྟས་ངན་མི་ལུས་ཟློག་པའི་དུས་ལ་བབ༔ བཟློག་གོ་ལྟས་ངན་ཐམས་
ཅད་དགྲ་ལ་ཟློག༔ བསྒྱུར་རོ་ཆག་ཆེན་ཉམ་ང་བགེགས་ལ་སྒྱུར༔ ཁྲོ་རྒྱལ་མ་ལུས་འཁོར་དང་བཅས་པ་ཡིས༔ བཟློག་ཅིང་བསྒྱུར་བའི་ཕྲིན་ལས་ད་མཛོད་ཅིག༔ ཧཱུྃ༔ ཁྲོ་རྒྱལ་ཁམས་གསུམ་ཧཱུཾ་སྒྲ་སྒྲོག༔ ཟངས་ཁྲབ་གསོལ་ནས་མདུང་མར་ཐོགས༔ བ་དན་རྩེ་གསུམ་གཡབ་པའི་ཚེ༔ ལྷ་སྲིན་དབང་སྡུད་དགྲ་བགེགས་གསོད༔ བདུད་དཔུང་འཇོམས་ཤིང་སྲོག་དབུགས་དབང་༔ མདུང་དམར་དབལ་གྱིས་ལོག་འདྲེན་སྒྲོལ༔ དགྲ་བགེགས་ཐམས་ཅད་བཟློག་ཏུ་གསོལ༔ བྷྱོ་བྷྱོ་སྡང་བའི་དགྲ་ལ་བྷྱོ༔ བཟློག་བཟློག་གནོད་པའི་བགེགས་ལ་ཟློག༔ ས་བདག་ཀླུ་གཉན་གྱི་ནད་ཐམས་ཅད་ཁྱུང་གི་སྡེར་མོས་བྲད༔ གཤོག་པས་བརྡབས༔ མཆུ་ཡིས་ཟོས༔ རྡུལ་དུ་བརླག་པར་བསྒོམ༔ ཧཱུྃ༔ གདུག་པའི་ཀླུ་གདོན་ས་བདག་ཁྱོད༔ དང་པོ་ཞེ་སྡང་ཕ་ཡི་རྒྱུད༔ བར་དུ་འདོད་ཆགས་མ་ཡི་མངལ༔ ཐ་མ་དྲི་ཟ་ལྟོ་བར་འཁོར༔ དེ་ནས་གཟུགས་ཕུང་ཡན་ལག་རྒྱས༔ ལྔ་ཕུང་རྩད་ནས་གཅོད་པའི་ཕྱིར༔ ཞེ་སྡང་སྙིང་ལ་གཏོར་ཟོར་ཡ༔ གཏི་མུག་ཤ་ལ་གཏོར་ཟོར་ཡ༔ འདོད་ཆགས་ཁྲག་ལ་གཏོར་ཟོར་ཡ༔ ང་རྒྱལ་རུས་ལ་གཏོར་ཟོར་ཡ༔ ཕྲག་དོག་
དབུགས་ལ་གཏོར་ཟོར་ཡ༔ གནོད་བྱེད་ནད་འདྲེ་གཅོང་སྲི་ལ༔ དྲག་པོ་གཏོར་མའི་ཟོར་རྒྱོབས་ལ༔ ལྔ་ཕུང་ཡན་ལག་རྡུལ་དུ་རློགས༔ ཁྱུང་དམར་རྔམས་པའི་ཞལ་དུ་བསྟབ༔ སྤྲུལ་པའི་ཁྱུང་གིས་མཆོད་པར་བཞེས༔ ཡང་སྤྲུལ་ཁྱུང་གིས་རྔམས་ཟས་མཛོད༔ སེམས་ནི་རྒྱལ་བའི་སྲས་སུ་སྤོར༔ བཅོལ་བའི་ལས་རྣམས་མཐར་ཕྱུངས་ཤིག༔ རྩ་སྔགས་ལ༔ ནཱ་ག་རཱ་ཙ་ཨུ་ཙ་ཏ་ཡ་ཧཱུྃ་ཕཊ༔ སུ་མ་རཱ་ཛ༔ སུ་ནི་རཱ་ཛ༔ མ་ཙ་ར་ཙ༔ ཟ་ཟ་ཏྲག་ཤ་ཏྲིག་ཧྲིང་ཧྲིང་༔ དུ་དུ་མ་མ་རཀ་མོ་སརྦ་བིག་ནན༔ ཨུ་ཙ་ཏ་ཡ་ཕཊ༔ འདི་བྲི་བསམ་མེད་ཀྱང་ཀླུའི་གནོད་པས་ལག་པ་ལ་གྲུམ་བུའི་ནད་བྱུང་༔ ཡི་གེ་བྲིས་པ་ལ་བར་ཆད་བྱས་པས་མི་བྲི་ཀ་མེད་བྱུང་༔ ཆོས་བདག་བཀའ་སྲུང་རྣམས་ཀྱིས་ཀོ་ལོང་ཡོད་ན་གདོན་དེ་ལ་ཆད་པ་ཆོད་ཅིག༔ ཅེས་རཱ་ག་ཨ་སྱས་བསྒྲིགས་པའོ༔ ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།