གུ་རུ་དྲག་པོའི་རྒྱུན་བསྙེན་བྱེད་པ་ལ་ཉེ་བར་མཁོ་བའི་ཟིན་བྲིས་ཕྱག་རྒྱ་ཆེན་པོ་ལྔ་ལྡན་གྱི་དོན་རྩ།
གུ་རུ་དྲག་པོའི་རྒྱུན་བསྙེན་བྱེད་པ་ལ་ཉེ་བར་མཁོ་བའི་ཟིན་བྲིས་ཕྱག་རྒྱ་ཆེན་པོ་ལྔ་ལྡན་གྱི་དོན་རྩ་བཞུགས་པའི་དབུ་ཕྱོགས་ལགས་སོ།།
ན་མོ་པྲ་ཝཱ་ཀ་ར་ཀྲོ་དྷ་ཡེ། དལ་འབྱོར་མི་ལུས་ཐོབ་པར་དཀའ། །ཨེ་བདེན་འབུ་སྲིན་གྲངས་ལ་ལྟོས། །ནམ་འཆི་ཆ་མེད་ངེས་པར་འཆི། །ཨེ་བདེན་གཞོན་ཤི་ཚོ་ལ་ལྟོས། །རྒྱུ་འབྲས་བསླུ་མེད་ངེས་པར་སྨིན། །ཨེ་བདེན་འདྲ་ཡི་མི་ཀུན་ལ། །སྐྱིད་སྡུག་ཚེ་ཡི་རིང་ཐུང་ལྟོས་། །འཁོར་བའི་སྡུག་བསྔལ་བཟོད་བླག་མེད། །ཨེ་བདེན་བཤས་ལུག་ཚོ་ལ་ལྟོས། །རང་ཐོག་བྱུང་ན་ཅི་ཁམས་སམ། །དེ་ཚོ་མིག་གིས་མཐོང་ཚད་ཙམ། །ངན་སོང་སྡུག་བསྔལ་ཤི་ལོག་ལྟོས། །དེ་ལས་ཐར་ཐབས་དམ་པའི་ཆོས། །ཆོས་ཕུང་བརྒྱད་ཁྲི་བཞི་སྟོང་གི །སྙིང་པོ་གསང་
སྔགས་ཐེག་པ་ཡིན། །དེ་ལ་རྒྱ་ཆེ་གྲངས་མང་ཡང་། །དེང་སང་སྙིགས་མ་ལྔ་བརྒྱའི་དུས། །ཆོས་གཞན་བྱིན་རླབས་ཡལ་བའི་དུས། །ལྷ་གཞན་ཐུགས་རྗེ་རྡུགས་པའི་དུས། །པདྨ་འབྱུང་གནས་ཐུགས་རྗེ་མྱུར། །དེང་སང་སྣང་སྲིད་ལྷ་འདྲེའི་ཚོགས། །ཁ་འཕྱུར་ཞི་བས་མི་ཐུལ་དུས། །གུ་རུ་དྲག་པོར་བཞེངས་པ་ཟབ། །དབང་ལུང་ཟབ་མོའི་རྒྱུད་སྨིན་ཅིང་། །ཞི་བསྙེན་རབ་གཅིག་སོང་འདུག་པས། །ད་ནི་དྲག་པོའི་རྒྱུན་བསྙེན་མཛོད། །མདོ་སྔགས་གསར་རྙིང་ཐམས་ཅད་ཀུན། །གཅིག་ཏུ་དྲིལ་བའི་ཉམས་ལེན་གནད། །སྟན་ཐོག་གཅིག་ཏུ་ཉམས་ལེན་པ། །
ཕྱག་རྒྱ་ཆེན་པོ་ལྔ་ལྡན་ཡིན། །འདི་ཡི་ཁོག་ནས་ཉམས་ལེན་མཛོད། །དེ་ཡི་ཞལ་གདམས་གོ་བདེ་བ། །ལུང་འདྲེན་བཤད་པ་ན་ཡམ་བསྐྱུར། །ཉམས་ལེན་རྒན་མོའི་མཛུབ་ཚུགས་འདི། །ཉམས་སུ་ལོངས་དང་འདི་ཕྱིར་བདེ། །དང་པོ་ད་ནངས་བསམ་པ་ལ། །ཕ་མ་སེམས་ཅན་ཐམས་ཅད་ཀུན། །འཁོར་བའི་སྡུག་བསྔལ་ལས་གྲོལ་ནས། །རྫོགས་པའི་སངས་རྒྱས་འཐོབ་པའི་ཕྱིར། །བདག་གི་གུ་རུ་དྲག་པོ་ཡི། །བསྐྱེད་རྫོགས་སྒོམ་བཟླས་བྱའོ་ཞེས། །ཁ་ཞེ་མེད་པའི་སེམས་བསྐྱེད་བྱ། །སེམས་བསྐྱེད་འདི་དག་མི་ལྡན་ན། །བྱང་ཆུབ་ལམ་དུ་མི་འགྲོ་ཞིང་། །གསང་སྔགས་དོན་དང་མི་ལྡན་ནོ། །རང་ཉིད་ཕྱི་མ་བདེ་ཐབས་དང་། །ཚེ་འདིར་ནད་གདོན་ཞི་ཐབས་སུ། །བསྙེན་སྒྲུབ་དཔག་མེད་བྱས་ན་ཡང་། །གསང་སྔགས་འགྲུབ་པར་མི་འགྱུར་ཏེ། །སྔགས་ནག་ཅེས་བྱ་ཐ་མལ་པ། །ངག་ནུས་ཆེན་པོ་བྱུང་ན་ཡང་། །ཕྱི་མ་བདུད་དང་སྲིན་པོར་སྐྱེ། །སེམས་བསྐྱེད་བཟང་པོ་དེ་ཡོད་ན། །སངས་རྒྱས་ཐོབ་པའི་ལམ་ཟབ་མོ། །གལ་ཏེ་སེམས་བསྐྱེད་དེ་ལྡན་ན། །འདྲེ་བརྡུང་མཐུ་གཏད་ལ་སོགས་པ། །བྱས་ཀྱང་མི་གནོད་བྱང་ཆུབ་སེམས། །གང་འདུལ་ཕྲིན་ལས་རྣམ་
བཞི་ཡི། །ངག་ནུས་ལ་སོགས་མ་བསམ་ཡང་། །རང་བཞིན་ཤུགས་ལས་འབྱུང་བ་ཡིན། །ལོ་ནི་གཏིང་ནས་ཡག་ཐུབ་ན། །སོག་ཕུབ་ཞོར་ལ་འབྱུང་དང་འདྲ། །བྱང་ཆུབ་སེམས་ཀྱི་རྟ་ཕོ་ལ། །གཞན་ཕན་གྱི་དཀྱུས་ཐག་མ་བཅད་ན། །ཁྲོམ་ལྷ་མིའི་བདེ་སྐྱིད་མི་འབྱུང་བས། །ལར་སེམས་བསྐྱེད་འདི་ལ་ནན་ཏན་མཛོད། །དེ་ལྟར་གསུངས་ལྟར་ལྔ་ལྡན་དང་པོའོ།། ༈ །།མདོ་ལུགས་སངས་རྒྱས་གྲངས་མེད་གསུམ་ལས་འཐོབ། །གསང་སྔགས་བླ་མེད་ཚེ་འདིར་སངས་རྒྱས་པའི། །ལམ་གྱི་ཉེ་རིང་ཟབ་དང་མི་ཟབ་ཁྱད། །ལུས་ཀྱི་དེ་ཉིད་རྟོགས་དང་མ་རྟོགས་ཁྱད། །མདོ་ལུགས་ལུས་འདི་མི་གཙང་ཤ་ཁྲག་ལུས། །དེ་ལས་ལྷག་པའི་ལྷ་གཅིག་བཞུགས་པར་འདོད། །བླ་མེད་གསང་སྔགས་རང་ལུས་སངས་རྒྱས་དངོས། །ཡིན་པར་ངོ་སྤྲོད་ལྷ་ཡི་སྐུར་བསྒོམས་པས། །དངོས་སུ་གྱུར་ནས་མྱུར་དུ་སངས་རྒྱས་གསུངས། །དེ་ནི་གསང་སྔགས་གསར་རྙིང་དགོངས་པ་མཐུན། །གཟུགས་ཀྱི་ཕུང་པོ་བུདྡྷ་དྲག་པོ་རྩལ། །རྣམ་ཤེས་ཕུང་པོ་རྡོ་རྗེ་དྲག་པོ་རྩལ། །ཚོར་བའི་ཕུང་པོ་རཏྣ་དྲག་པོ་རྩལ། །འདུ་ཤེས་ཕུང་པོ་པདྨ་དྲག་པོ་རྩལ། །འདུ་བྱེད་ཕུང་པོ་ཀརྨ་དྲག་པོ་རྩལ། །
རང་གི་ཕུང་པོ་ལྔ་པོ་དེ་རྣམས་ནི། །ཡེ་ནས་དྲག་པོ་རིགས་ལྔའི་ངེས་ཤེས་བསྐྱེད། །རང་གི་ཁྲག་ནི་རྡོ་རྗེ་མཁའ་འགྲོ་མ། །རང་གི་ཤ་ནི་རིན་ཆེན་མཁའ་འགྲོ་མ། །རང་གི་དྲོད་ནི་པདྨ་མཁའ་འགྲོ་མ། །རང་གི་དབུགས་ནི་ཀརྨ་མཁའ་འགྲོ་མ། །ལུས་ནང་སྟོང་པའི་སྒྲུབ་ནི་གང་ཡོད་རྣམས། །སངས་རྒྱས་མཁའ་འགྲོའི་ངོ་བོར་ངེས་ཤེས་བསྐྱེད། །སྤྱི་བོའི་རྩ་མདུད་འཇམ་དཔལ་སྐུ་ཡི་ལྷ། །མགྲིན་པའི་རྩ་མདུད་རྟ་མགྲིན་གསུང་གི་ལྷ། །སྙིང་ཁའི་རྩ་མདུད་ཕྱག་རྡོར་ཐུགས་ཀྱི་ལྷ། །ལྟེ་བའི་རྩ་མདུད་ཌཱཀི་ཡོན་ཏན་ལྷ། །གསང་གནས་རྩ་མདུད་མེ་དབལ་ཕྲིན་ལས་ལྷ། །རང་ལུས་སྤྱིར་ནི་གུ་རུ་དྲག་པོ་སྟེ། །དབུ་མའི་རྩ་ནི་ཡུམ་མཆོག་ཁྲོས་མ་ཡིན། །རྐང་ལག་ལྷུ་བརྒྱད་སྤྱི་གཙུག་རྐང་མཐིལ་བཅུ། །ཡེ་ནས་ཁྲོ་བོ་བཅུ་ཡི་རང་བཞིན་ཉིད། །རང་ལུས་འདོམ་གང་གྲུ་བཞི་དཀྱིལ་འཁོར་དངོས། །ཁ་སྣ་གསང་བ་བཞི་ནི་སྒོ་བཞི་འོ། །དེ་དག་ཡིན་ལ་ཡིན་བཞིན་ངེས་ཤེས་བསྐྱེད། །དེ་མ་ཤེས་ན་ལྷ་གཟུགས་གསལ་ན་ཡང་། །གྱ་ནོམ་ལྷར་སྣང་ཞེས་བྱ་གོལ་ས་སྟེ། །གསང་སྔགས་བསྐྱེད་རིམ་གོ་ཆོད་འོང་བ་མིན། །དེ་ནས་རྒྱས་པར་དཀྱིལ་འཁོར་ཡོངས་རྫོགས་ལྟར། །ལས་བྱང་
འདོན་ཞིང་སྤྱན་འདྲེན་བྱས་པ་སྟེ། །མངོན་རྟོགས་གཅིག་གིས་བདག་མདུན་དུས་གཅིག་བསྐྱེད། །སྤྱན་འདྲེན་ཚེ་ན་ལྷ་ཚོགས་དཔག་མེད་པ། །ཁ་བ་བུ་ཡུག་ལྟར་དུ་སྤྱན་དྲངས་ཏེ། །བདག་མདུན་སོ་སོར་ཐིམ་པར་བསྒོམ་པ་སྟེ། །བདག་གི་ཐུགས་ལས་མཆོད་པའི་ལྷ་མོ་ནི། །གྲངས་མེད་སྤྲུལ་ཏེ་བདག་བདུན་སོ་སོ་ལ། །མཆོད་བསྟོད་ལ་སོགས་སོ་སོར་བྱེད་པར་བསྒོམ། །གལ་ཏེ་གཏོར་མ་མེད་ན་ཡང་། །ལས་བྱང་འདོན་ཡང་མ་ལྕོགས་ན། །རང་ཉིད་སྐད་ཅིག་དྲན་རྫོགས་སུ། །རང་ཉིད་གུ་དྲག་གཙོ་རྐྱང་ནི། །གོ་ཆའི་ལྷ་དང་བཅས་པ་གསལ་བར་བསྒོམ། །སྤྱན་འདྲེན་མཆོད་བསྟོད་ལ་སོགས་མི་དགོས་སོ། །རང་ལུས་ཡེ་ནས་ཡེ་ཤེས་སེམས་དཔའ་སྟེ། །ཡི་དམ་ལྷ་ཡི་ངོ་བོར་གྱུར་པ་ལ། །དེ་ཉིད་སེམས་ཀྱི་ལྷ་རུ་གསལ་འདེབས་པས། །དེ་ནི་ཡེ་ཤེས་སེམས་དཔའ་ཉིད་ཡིན་པས། །སྤྱན་འདྲེན་མི་དགོས་བླ་མེད་ཨ་ཏིའི་ལུགས། །དེ་ནས་གུར་དྲག་རྒྱན་དང་ཆ་ལུགས་དང་། །གོ་ཆའི་ལྷ་ཚོགས་མངོན་རྟོགས་ནང་ལྟར་དུ། །འདོན་ནི་མི་དགོས་ཡིད་ལ་གསལ་བར་བསྒོམ། །དོན་ལ་བསྒོམ་པ་གསལ་བ་རེས་འགའ་འཐུས། །དམིགས་པ་མ་ཟིན་མངོན་རྟོགས་བཏོན་
ན་ཡང་། །འདོན་རྒྱུ་ཚང་ཡང་དོན་ལ་ཚང་བ་མིན། །དེ་ཡང་ཆ་ལུགས་གསལ་བོར་མ་ཟིན་ན། །ཐང་སྐུ་ལེགས་པར་ཡང་ཡང་ལྟ་ཞིང་བསྒོམ། །རྒྱན་དང་ཆ་ལུགས་མ་འཆུགས་གསལ་བ་ནི། །ཐང་སྐུ་ལེགས་པོ་ལྟར་དུ་གསལ་བ་ན། །དེ་ལ་བསྐྱེད་རིམ་རྣམ་པ་གསལ་བ་ཟེར། །རྒྱན་ཆ་གསལ་ན་ལོངས་སྤྱོད་ཆེ་བ་ཡིན།་།མེ་རི་གསལ་ན་བར་ཆད་ཉུང་བ་ཡིན། །ཞབས་དང་པད་གདན་གསལ་ན་སྡོད་ཚུགས་སོ། །སྤྱན་རྣམས་གསལ་ན་མིག་གསལ་མངོན་ཤེས་འཆར། །ཞལ་དང་མཆེ་བ་གསལ་ན་བཀའ་བསྒོ་ལ། །ལྷ་འདྲེའི་ཉན་པ་ལ་སོགས་ཡོན་ཏན་ཡོད། །མ་གསལ་བ་ལ་དེ་ཡི་སྐྱོན་འབྱུང་ངོ་། །དེ་ལྟར་གསལ་ཡང་གདོས་བཅས་འདག་སྐུ་ལྟར། །སྒོམ་ན་ཨ་འཐས་ཐེར་གཟུགས་གོལ་ས་སྟེ། །ནུས་པ་བྱུང་ཡང་ཕྱི་མ་ལྷ་འདྲེའི་རིགས། །ཁྲོ་བོས་སྐུ་གཟུགས་འདྲ་བར་སྐྱེ་བ་ཡིན། །དེ་ཕྱིར་རྣམ་དག་དྲན་པར་བྱ་བ་ལ། །སྣང་སྟོང་འཇའ་ཚོན་ལྟ་བུར་བསྒོམ་པ་དང་། །ཆ་ལུགས་དེ་ནི་དག་པ་ཞེས་བྱ་སྟེ། །ཆོས་ཉིད་དོན་དམ་སྟོང་ཉིད་ཆོས་ཀྱི་སྐུ། །དེ་ནི་གུ་རུ་དྲག་པོ་ལ་སོགས་པ། །སངས་རྒྱས་ཀུན་གྱི་ངོ་བོ་ཡིན་མོད་ཀྱི། །དེ་ལ་གཟུགས་དང་ཁ་དོག་ཆ་ལུགས་མེད། །
ལོངས་སྤྱོད་རྫོགས་པའི་ཞིང་ཁམས་སངས་རྒྱས་རྣམས། །རྒྱན་དང་ཆ་ལུགས་བརྡ་རིས་བསྟན་པ་ནི། །འཁོར་རྣམས་ཆོས་ཀྱི་དོན་རྣམས་ཁོང་དུ་ཆུད། །ཚིག་གི་སྒོ་ནས་ཆོས་ནི་གསུང་མི་དགོས་། །དེ་ཕྱིར་གུ་དྲག་ལོངས་སྤྱོད་རྫོགས་སྐུ་ཡིན། །རྒྱན་དང་ཆ་ལུགས་རྣམས་ནི་ཆོས་ཀྱི་བརྡ། །ཡིན་གྱི་མི་ཡི་ཤ་ཚུགས་ལྟ་བུ་མིན། །ཞལ་གསུམ་ཆོས་སྐུ་ལོངས་སྐུ་སྤྲུལ་སྐུ་གསུམ། །ཕྱག་དྲུག་ཕ་རོལ་ཕྱིན་པ་དྲུག་ཡིན་ཏེ། །གཤོག་པ་གཉིས་ནི་ཐབས་ཤེས་ཟུང་དུ་འཇུག །ཞབས་བཞི་ཚད་མེད་བཞི་ཡིས་འགྲོ་བ་འདུལ། །ཡབ་ཡུམ་སྦྱོར་བས་སྣང་སྟོང་ཟུང་དུ་འཇུག །ཡེ་ཤེས་མེ་རིས་གཟུང་འཛིན་སྒྲིབ་པ་བསྲེགས། །ཕྱོགས་དུས་རྒྱལ་བའི་སྐུ་གསུང་ཐུགས་ཡོན་ཏན། །ཕྲིན་ལས་ཐམས་ཅད་འདུས་རྟགས་གོ་ཆའི་ལྷ། །དེ་ལྟར་ཤེས་པར་བྱས་པས་གོལ་ས་ཆོད། །དེ་ལ་རྣམ་དག་དྲན་པའི་བསྐྱེད་རིམ་ཟེར། །བདག་ནི་ཐ་མལ་སེམས་ཅན་ཡིན་པ་ལ། །གུ་དྲག་དངོས་མིན་མོས་པ་ཙམ་ཡིན་ནོ། །ཉམས་ན་ནུས་པ་བྱིན་རླབས་རྟགས་མི་ཐོན། །མིན་པ་ཡིན་པར་བསྒོམས་པས་མི་འོང་སྟེ། །ཕལ་པའི་རྡོ་ལ་དངུལ་གྱི་ཞད་མེད་ཕྱིར། །བསྐལ་པར་བསྲེག་ཀྱང་དངུལ་ནི་འབྱུང་མི་འགྱུར། །
དངུལ་རྡོ་ལ་ནི་དངུལ་གྱི་རྒྱུ་ཡོད་ཕྱིར། །ལེགས་པར་བསྲེགས་ན་དངུལ་ནི་འབྱུང་བ་ལྟར། །རང་ལུས་ཡི་དམ་ལྷ་ཡི་ངོ་བོ་རུ། །གསར་རྙིང་རྒྱུད་སྡེ་ཀུན་ནས་གསུངས་པའི་ཕྱིར། །ཡིན་ལ་ཡིན་བཞིན་སྒོམ་པ་དངོས་སུ་གྲུབ། །གཞི་ཡི་གུ་དྲག་སེམས་ཅན་ཐམས་ཅད་ཡིན། །ཡིན་ལ་ཡིན་པར་མ་ཤེས་འཁོར་བར་འཁྱམས། །ལམ་གྱི་གུ་དྲག་དབང་གི་རྒྱུད་སྨིན་ཅིང་། །གུ་དྲག་བསྐྱེད་རྫོགས་ཉམས་ལེན་བྱེད་རྣམས་ཡིན། །ཡིན་རྟགས་ལྷ་འདྲེའི་བཀའ་ཉན་ཕྲིན་ལས་སྒྲུབས། །འབྲས་བུའི་གུ་དྲག་རྔ་ཡབ་གླིང་བཞུགས་པའི། །སྲིན་པོས་ཁ་གནོན་ཨོ་རྒྱན་ཉིད་ཡིན་པས། །ལམ་དུ་གུ་དྲག་བསྐྱེད་རྫོགས་ཉམས་བླངས་པས། །འབྲས་བུ་གུ་དྲག་རབ་ནི་ཚེ་འདི་དང་། །འབྲིང་ནི་བར་དོ་ཐ་མ་སྐྱེ་བ་ནི། །བདུན་གྱི་ས་ནས་དབྱེར་མེད་གཅིག་ཏུ་འགྲུབ། །དེ་དོན་གནད་ཤེས་རང་ཉིད་གུ་དྲག་ནི། །དངོས་མིན་སྙམ་པའི་ངེས་ཤེས་ཐེ་ཚོམ་སྤང་། །དེ་བྱས་ལྷ་འདྲེ་བགེགས་རིགས་རྨི་ལམ་དུ། །མི་རུ་མི་མཐོང་གུ་དྲག་དངོས་སུ་མཐོང་། །གནོད་པར་མི་ནུས་ཅི་བསྒོས་བཀའ་ལ་ཉན། །དེ་ལ་བསྐྱེད་རིམ་ང་རྒྱལ་བརྟན་པ་ཟེར། །རང་ལུས་ཡི་དམ་གྱི་རྒྱལ་པོ་ལ། །གཞི་འགྱུར་མེད་ཀྱི་
བཙན་ས་མ་ཟིན་ན། །མ་མཁའ་འགྲོའི་འཁོར་ཚོགས་མི་འདུ་བས། །ལུས་ཡི་དམ་ལྷ་ལ་ནན་ཏན་མཛོད། །ཅེས་གསུངས་ལྔ་ལྡན་གཉིས་པའི་དོན།། ༈ །།རང་ཉིད་གུ་དྲག་གསལ་བའི་དབུ་སྐྲའི་གསེབ། །པདྨ་ཉི་ཟླ་བརྩེགས་པའི་གདན་སྟེང་དུ། །དཀོན་མཆོག་ཀུན་འདུས་རྩ་གསུམ་གཅིག་འདུས་ལྷ། །པདྨ་འབྱུང་གནས་མཐིང་ནག་སྤྱན་གསུམ་པ། །ཁྲོ་འཛུམ་སྟག་ཤམ་རུས་པའི་རྒྱན་ཆ་ཅན། །ཕྱག་གཡས་ཁ་ཊཾ་གཡོན་པས་ཐོད་ཁྲག་འཛིན། །ཞབས་གཉིས་བཞེངས་ཐབས་སྤྱན་ནི་ནམ་མཁར་གཟིགས། །ཧཱུཾ་ཕཊ་བྷྱོ་དང་ཨཱ་ར་ལི་གསུངས་པས། །ཐུགས་སྲོག་ཧཱུྃ་ལས་འོད་ཟེར་ཕྱོགས་བཅུར་འཕྲོས། །གྲུབ་ཆེན་བརྒྱད་ཅུ་རྗེ་འབངས་ཉེར་ལྔ་དང་། །བཀའ་བརྒྱུད་བླ་མ་མཁའ་སྤྱོད་ནམ་མཁའི་མཚན། །གཡུ་ཐོག་མགོན་པོ་ཟུར་མཁར་ཆོས་རྗེ་སོགས། །རིག་འཛིན་གྲུབ་ཐོབ་ཐམས་ཅད་ཁ་བ་དང་། །བུ་ཡུག་ལྟར་བྱོན་པད་འབྱུང་སྐུ་ལ་ཐིམ། །སངས་རྒྱས་ཐམས་ཅད་འོད་དཔག་མེད་ལ་ཐིམ། །གུ་དྲག་ལ་སོགས་ཡི་དམ་ཐམས་ཅད་ནི། །ཆར་བཞིན་བབས་ནས་རང་ཉིད་སྐུ་ལ་ཐིམ། དེ་ལྟར་ཐིམ་པས་ཡེ་ཤེས་ཐིམ་པ་དང་། །ཕག་ཁྲོས་སེང་གསུམ་ལ་སོགས་མཁའ་
འགྲོའི་ཚོགས། །ཆར་ལྟར་བྱོན་ནས་རང་ཡུམ་ཁྲོས་མར་ཐིམ། །དེ་ལྟར་ཐིམ་པས་ཡེ་ཤེས་ཐིམ་པ་དང་། །དབང་བསྐུར་བྱིན་རླབས་ཐམས་ཅད་དུས་གཅིག་ཐོབ། །སྤྱི་བོར་པད་འབྱུང་བླ་མ་ཀུན་འདུས་ལ། །དད་གུས་གདུང་ཤུགས་བསྐྱེད་ཅིང་གསོལ་འདེབས་ཀྱི། །ཚུལ་དུ་སྔགས་འདི་ཅི་ནུས་བཟླ་བར་བྱ། །ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛསིདྡྷི་ཕ་ལ་ཧཱུྃ་ཨཱ༔ ཞི་བར་བསྙེན་ཅིང་དྲག་པོར་སྒྲུབ་པ་གཅེས། །གུ་རུ་དྲག་པོ་སྒྲུབ་པའི་གོང་གནོན་ཡིན། །སྔོན་དུས་ཞི་བའི་བསྙེན་པ་ཉུང་བ་དང་། །ཀུན་དྲིལ་ཡིད་བཞིན་བསྙེན་པ་མ་ཐོན་ན། །སྔགས་དང་དམིགས་པ་འདི་ཉིད་མང་ན་ལེགས། །རྒྱུན་དུ་བརྒྱའམ་སྟོང་སོགས་སྐབས་དང་སྦྱར། །ཨ་ཙིག་ཅི་ཙམ་འདོན་པའི་ཕྱེད་ཙམ་བྱ། །འདི་ནི་བླ་སྒྲུབ་ཐམས་ཅད་གཅིག་ཏུ་འདུས། །ལེའུ་བདུན་སོགས་གསོལ་འདེབས་གང་ཤེས་ཀྱང་། །དམིགས་པ་འདི་ཉིད་བསྒོམ་ཞིང་བཏོན་ན་ལེགས། །བླ་མ་སྐུ་བཞིའི་གངས་རི་ལ། །མོས་གུས་ཀྱི་ཉི་མ་མ་ཤར་ན། །བྱིན་རླབས་ཀྱི་ཆུ་རྒྱུན་མི་འབྱུང་བས། །སེམས་མོས་གུས་འདི་ལ་ནན་ཏན་མཛོད། །ཅེས་ལྔ་ལྡན་གསུམ་པའི་དོན་ཡིན་ནོ།། ༈ །།དེ་ནས་རང་ཉིད་གུ་
དྲག་གསལ་བ་ཡི། །ཐུགས་ཀར་གསེར་གྱི་མཆོད་རྟེན་བུམ་པའི་ནང་། །ཕྱག་རྡོར་གསལ་བའི་ཐུགས་ཀར་ཉི་མའི་སྟེང་། །ཡེ་ཤེས་སེམས་དཔའ་བཛྲ་ཧེ་རུ་ཀ །བདེ་མཆོག་གསང་འདུས་ཀྱེ་རྡོར་མཱ་ཡཱ་དང་། །ཆེ་མཆོག་རྡོར་འཆང་རྡོ་རྗེ་སེམས་དཔའ་རྣམས། །ཐམས་ཅད་དོན་གཅིག་མིང་གི་རྣམ་གྲངས་ཡིན། །མཐིང་ནག་ཁྲོ་འཛུམ་རྡོ་རྗེ་དྲིལ་བུ་འཛིན། །ཞབས་གཉིས་རྡོར་སྐྱིལ་ལམ་ནི་ཕྱེད་སྐྱིལ་བཞུགས། །དེ་ཡི་ཐུགས་ཀར་གསེར་གྱི་རྡོ་རྗེ་ནི། །འགྲེང་ཐབས་གནས་པའི་རྡོ་རྗེའི་ལྟེ་བའི་ནང་། །ཟླ་བ་སྟེང་དང་ཉི་མ་འོག་གནས་པའི། །ཉི་ཟླ་གའུ་ནང་དབུས་ཧཱུྃ་དམར་པོ། །དེ་མཐར་ཨ་ཙིག་ཡིག་འབྲུ་ཉི་ཤུས་བསྐོར། །ཧཱུཾ་དེ་གཡོ་འགུལ་མེད་པ་མཆོད་རྟེན་བཞིན། །ཡིག་མགོ་ངོས་ནི་རང་གི་མདུན་དུ་སྟོན་།་།དེ་མཐར་ཡིག་འབྲུ་ཉི་ཤུ་ལངས་བ་སྟེ། །ཡི་གེ་མདུན་ངོས་ཕྱི་ལ་བསྟན་ཏེ་བསྐོར། །དང་པོ་ཀློག་པའི་ཚུལ་དུ་ཅུང་ཟད་བཟླ། །དེ་ནི་བསྙེན་པ་ཞེས་བྱའི་བཟླས་པའོ། །དེ་ནས་ཡིག་འབྲུ་རྣམས་ལས་འོད་བྱུང་སྟེ། །ཕྲེང་བ་མི་འཁོར་ཕྲེང་ཐག་འཁོར་བ་ལྟར། །འོད་ཟེར་ཁ་དོག་ལྔ་ལྡན་གཡས་སུ་འཁོར། །དེ་ནི་ཉེ་བར་བསྙེན་པ་ཞེས་བྱའོ། །དེ་ནས་ཡིག་
འབྲུ་དལ་བུས་གཡས་སུ་འཁོར། །དེ་ནས་ཇེ་མགྱོགས་ཤིན་ཏུ་མགྱོགས་པར་འཁོར། །ཟླ་སྐར་ཕྲེང་བ་ལྟ་བུའི་བཟླས་པའོ། །དེ་ནས་དེ་ལས་འོད་ཟེར་སྣ་ཚོགས་འཕྲོས། །སངས་རྒྱས་བྱང་སེམས་བླ་མ་ཡི་དམ་ཚོགས། །འོད་ཟེར་དེ་ཕོག་ཟག་མེད་མཆོད་པར་གྱུར། །སྐུ་གསུང་ཐུགས་མཉེས་བྱིན་རླབས་དངོས་གྲུབ་ཀུན། །འོད་ཟེར་ཚུལ་དུ་འདུས་ནས་རིང་ལ་ཐིམ་། །སླར་ཡང་འོད་འཕྲོས་འགྲོ་དྲུག་སེམས་ཅན་ལ། །ཕོག་པས་སོ་སོའི་སྡིག་སྒྲིབ་སྡུག་བསྔལ་དག །སྣང་སྲིད་ལྷ་སྲིན་སྡེ་བརྒྱད་ཀུན་ལ་ཕོག །སྔོན་གྱི་དམ་ཚིག་དྲན་ནས་བཀའ་ལ་ཉན། །གནོད་བྱེད་གདོན་བགེགས་བར་ཆད་བྱེད་ལ་ཕོག །གནོད་སེམས་སྡུག་བསྔལ་ཐམས་ཅད་ཞི་བར་བྱས། །དེ་ཀུན་མཐུ་སྟོབས་ནུས་པ་ཐམས་ཅད་བསྡུས། །འོད་ཟེར་ཚུལ་དུ་རང་ལ་ཐིམ་པ་ཡིས། །ཚེ་དང་བསོད་ནམས་ཡེ་ཤེས་ནུས་པ་འཕེལ། །དེ་ལྟར་བསྒོམ་ཞིང་རྩ་སྔགས་ཉི་ཤུ་པ། །རྒྱུན་དུ་ཆུ་བོའི་གཞུང་ལྟར་བཟླ་བར་བྱ། །ཨོ་ཨཱཧཱུྃ་ཨ་ཅིག་ནིར་ཙིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ་ཕཊ། ཨཱཧཱུཾ་ཧཱུཾ་ཕཊ། བརྒྱ་ཙམ་བཟླས་པས་ལས་ངན་སྡིག་སྒྲིབ་འདག །སྟོང་ཙམ་བཟླས་པས་ཕྱི་ནང་བར་ཆད་ཞི། །ཁྲི་ཙམ་བཟླས་པས་
ལྷ་སྲིན་བྲན་དུ་ཁོལ། །འབུམ་ཙམ་བཟླས་པས་མཆོག་གི་དངོས་གྲུབ་ཐོབ། །འབུམ་ཕྲག་ཉི་ཤུ་ཐམ་པ་བཟླས་པ་ནི། །ལྷ་འདྲེ་རྣམས་ལ་བཀའ་ཤོག་བསྐུར་ནས་ཀྱང་། །དེ་ལ་ཉན་ཅིང་གང་བཅོལ་ཕྲིན་ལས་སྒྲུབས། །བར་དོའི་སྐབས་སུ་ཨོ་རྒྱན་ཡབ་ཡུམ་གྱིས། །ལམ་སྣ་ང་འདོད་ཞིང་ཁམས་བགྲོད། །འཇའ་འོད་རིང་བསྲེལ་སྐུ་གདུང་འབྱོན་པར་གསུངས། །དེ་ནི་སྒྲུབ་པ་ཞེས་བྱའི་བཟླས་པ་ཡིན། །དེ་ནས་བདག་མདུན་སོ་སོར་བསྒོམ་ཡོད་ན། །རང་གི་ཐུགས་ཀའི་སྔགས་ཕྲེང་འཁོར་བ་བཞིན། །ཐུགས་སྲོག་ཧཱུྃ་དམར་རྩེ་ནས་སྔགས་ཕྲེང་འཕྲོས། །རང་གི་ཞལ་ནས་ཐོན་ཏེ་མདུན་བསྐྱེད་ཀྱི།་།ཞལ་དུ་མཆོད་པའི་ཚུལ་དུ་ཞུགས་གྱུར་ནས། །ཐུགས་སྲོག་ཧཱུྃ་དམར་རྩེར་ཐིམ་ཐུགས་རྒྱུད་བསྐུལ། །ཐུགས་རྗེས་བརྩེ་བ་ཆེན་པོའི་བདག་ལ་དགོངས། །དེ་ཡི་ཐུགས་སྲོག་ཧཱུྃ་གི་ཞབས་ཀྱུ་ནས། །སྔགས་ཕྲེང་ཕྱུང་སྟེ་མདུན་བསྐྱེད་གསང་གནས་ནས། །ཡབ་ཡུམ་སྦྱོར་མཚམས་ནས་བྱུང་རང་ཉིད་ཀྱི། །གསང་གནས་ནས་ཞུགས་ཐུགས་ཀའི་ཧཱུྃ་ལ་ཐིམ། །དེ་ལྟར་མགལ་མེ་འཁོར་བ་ཇི་བཞིན་དུ། །རྒྱུན་ཆད་མེད་པར་འཁོར་བར་གྱུར་པ་ཡིན། །ཕར་
ལ་མཆོད་པ་ཚུར་ལ་དངོས་གྲུབ་ཚུལ། །བདག་མདུན་བར་དུ་འཁོར་ཚེ་སྔགས་ཕྲེང་ལས། །འོད་ཟེར་མེ་ཡི་ཚྭ་ཚྭ་ལྟ་བུ་ཡིས། །གནོད་བྱེད་གདོན་བགེགས་བསྲེག་ཅིང་ཚར་བཅད་བསྒོམ། །གལ་ཏེ་བདག་བསྐྱེད་ཁོ་ན་ཡིན་ན་ནི། །བདག་ཉིད་ཡབ་ཀྱི་ཞལ་ནས་ཡུམ་གྱི་ཞལ། །ཡུམ་གྱི་བྷ་ག་ནས་ནི་རང་ཉིད་ཀྱི། །རྡོ་རྗེའི་ལམ་ནས་རང་གི་ཐུགས་ཀར་ཐིམ། །དྲག་པོའི་ཡུམ་ནི་ཁྲོས་མ་ནག་མོ་སྟེ། །ཐུགས་ཀའི་ལྟེ་བར་ཐུགས་སྲོག་ཨ་འམ་ཧྲི། །མཐིང་ནག་མཐའ་མར་སྔགས་འདི་གཡོན་བསྐོར་བསམ། །ཨོཾ་བཛྲ་བྷ་ར་ཧི་ཀྲོ་ཏི་ཀ་ལི་ཧ་རི་ནི་ས་ཧཱུྃ་ཕཊ། དེ་ནི་བསྒོམས་པས་ཆོག་གི་འདོན་མི་དགོས། །དེ་ནི་སྒྲུབ་པ་ཆེན་པོའི་བཟླས་པ་ཡིན། །དེ་ལྟར་རྒྱུན་ཁྱེར་ཉམས་ལེན་བྱས་པ་ཡིས། །གུ་དྲག་སངས་རྒྱས་ཀུན་གྱི་ཡེ་ཤེས་ལ། །གདུག་རྩུབ་ཕྲག་དོག་སློང་སོགས་མ་མཆིས་ཏེ། །དྲག་པོ་བསྒྲུབས་པའི་གཟི་བརྗིད་ལྷ་འདྲེ་ལ། །རྒྱལ་འགོང་དམ་སྲིའི་ཚོགས་ཀྱིས་མ་བཟོད་ནས། །རྨི་ལམ་ངན་ཅིང་རྟགས་མཚན་རྩུབ་མོ་སྟོན། །བནྡེ་བུད་མེད་གཅན་གཟན་ཁྱི་སོགས་ཀྱིས། །འཛིངས་འཐབ་མུན་རུབ་ཉི་ཟླ་ཐང་ལ་ལྷུང་། །ཁ་ཆར་སེར་བ་ཆབ་ཀྱིས་དེད་སོགས་རྨི། །དེ་རྣམས་རྣམ་རྟོག་
བྱས་ན་བར་ཆད་འབྱུང་། །ཡ་ཀི་ཀུན་བཟང་ཆེ་མཆོག་མན་ཆོད་ནས། །མ་ཀི་འདྲེ་མོ་ཐེའུ་རང་ཡན་ཆོད་ནི། །ཐམས་ཅད་རང་གི་སེམས་ལས་གཞན་དུ་མེད། །སེམས་ནི་ཡེ་ནས་ཆོས་སྐུ་སྟོང་པ་ཉིད། །ཡིན་པར་ཤེས་པས་རང་སེམས་ངོ་བོར་ལྟོས། །དུས་གསུམ་རྒྱལ་བའི་དགོངས་པ་ཡེ་ནས་གནས། །ལྷ་ཡིན་བསམས་ནས་ཕན་འོང་བསམ་པ་དང་། །འདྲེ་ཡིན་བསམས་ནས་གནོད་འོང་བསམ་པ་གཉིས། །ངོ་བོ་སེམས་ལ་བལྟས་པས་ཁྱད་མི་འདུག །གཉིས་ཀ་དངོས་པོ་མེད་པ་སྟོང་པ་ཉིད། །།ཡིན་པར་ཤེས་པས་རང་སེམས་ངོ་བོར་བལྟ། །དེ་ལ་ལྟ་བ་གྱད་ཀྱི་ལྷ་ཞེས་བྱ། །བདུད་རིགས་བྱེ་བ་དུང་ཕྱུར་ཟིལ་གྱིས་གནོན། །དེ་ཕྱིར་དང་པོ་ཐུན་མཚམས་སེམས་ངོ་སྐྱོང་། །བསྐྱེད་རིམ་བསྒོམ་པ་དོན་ལ་ཞི་གནས་ཡིན། །སེམས་ངོ་ལྟ་བ་ལྷག་མཐོང་བསྒོམ་པ་ཡིན། །བསྒོམས་ནས་སེམས་ངོ་ལྟ་བའི་ངང་ཉིད་ལས། །ནམ་མཁའ་སྟོང་པའི་ངང་ལས་འཇའ་ཤར་ལྟར། །བསྐྱེད་རིམ་སྐད་ཅིག་དྲན་རྫོགས་ཀློང་གིས་བྷེ། །བསྐྱེད་རིམ་བསྒོམ་མཁན་དེ་ནི་འགྱུ་བ་སྟེ། །འགྱུ་བ་ཁོ་རང་ཡེ་ནས་སྟོང་པ་ཉིད། །གནས་པའི་དུས་དང་བཟང་ངན་ཁྱད་པར་མེད། །དེ་སྟེང་
བསྐྱེད་རིམ་སེམས་ངོ་ཟུང་དུ་འཇུག །དེ་ནི་བསྐྱེད་རྫོགས་ཟུང་འཇུག་ཉམས་ལེན་ཡིན། །དང་པོ་ལྷ་བསྒོམ་དེ་ནས་སེམས་ངོ་ལྟ། །དེས་ཀྱང་བསྐྱེད་རིམ་མི་བཤོལ་ཟུང་འཇུག་སྟེ། །དཔེར་ན་ནམ་མཁའ་སྟོང་པ་ཉིད་ལ་ཡང་། །འཇའ་ཡིས་མི་གནོད་གཉིས་ཀ་ཟུང་འཇུག་འདྲ། །དེ་ལྟར་རྟོགས་ནས་གོམས་པར་གྱུར་ན་ཡང་། །ས་རྡོ་རི་བྲག་ཕྱི་ནང་སྣོད་བཅུད་ཀུན། །སོ་སོར་གསལ་ཡང་ངོ་བོ་སྟོང་པར་མཐོང་། །དཔེར་ན་ཆུ་ནང་ཤར་བའི་ཟླ་བ་བཞིན། །དེ་ལ་ཕྱག་ཆེན་ཉམས་ཀྱི་རོ་གཅིག་ཟེར། །རང་སེམས་ངོ་བོ་སྟོང་པ་ཆོས་ཀྱི་སྐུ། །རིགས་བདག་སྣང་བ་མཐའ་ཡས་དེ་ག་རང་། །སེམས་ཀྱི་རང་བཞིན་གསལ་བ་ལོངས་སྤྱོད་རྫོགས། །ཡི་དམ་གུ་རུ་དྲག་པོ་དེ་ཉིད་དངོས། །སེམས་ཉིད་འཕྲོ་འདུ་འགགས་མེད་སྤྲུལ་པའི་སྐུ། །འཁོར་ཚོགས་དཔའ་བོ་མཁའ་འགྲོ་དེ་ཉིད་རང་། །ཡིན་པར་ངོ་བོ་གོ་བ་ཙམ་ཞིག་དང་། །ཕྱིས་ནས་དངོས་སུ་རྟོགས་པའི་གདེང་ཐོབ་ནས། །རྩ་བ་གསུམ་དང་ནམ་ཡང་འབྲལ་བ་མེད། །དེ་ལ་བརྟན་པ་ཐོབ་ཅིང་རྩལ་རྫོགས་ནས། །ཚེ་གཅིག་སངས་རྒྱས་དེ་ལ་བསག་པ་ཙམ། །སེམས་ཉིད་ཀྱི་ནམ་མཁའ་ཡངས་པ་ལ། །རྣམ་རྟོག་གི་སྤྲིན་ཚོགས་མ་
དྭངས་ན། །མཁྱེན་གཉིས་ཀྱི་གཟའ་སྐར་མི་བཀྲ་བས། །ལམ་ཕྱག་ཆེན་འདི་ལ་ཉམས་ལེན་མཛོད། །ཅེས་གསུངས་ལྔ་ལྡན་དོན་རྩ་བཞི་པ་ཡིན།། ༈ །།དེ་ལྟར་འགྲོ་འདུག་སྤྱོད་ལམ་ཐམས་ཅད་དུ། །བསྐྱེད་རྫོགས་ཉམས་ལེན་འབྲལ་མེད་ཅི་ལྕོགས་བྱ། །ཕོར་སྡེར་ཡེ་ཤེས་ཀ་པཱ་ལ་ཡི་ནང་། །བཟའ་བཏུང་གང་ཡིན་ཡེ་ཤེས་བདུད་རྩིར་བསམ། །ཨོཾ་ཨཱཿཧཱུྃ་ཞེས་ངག་ཏུ་བརྗོད་པ་ཡིས། །སྐུ་གསུང་ཐུགས་ཀྱི་བདུད་རྩིར་བྱིན་གྱིས་བརླབས། །ལག་པ་སྒང་གཟར་ཁ་ནི་སྦྱིན་སྲེག་ཐབ། །ལྟོ་བའི་མེ་དྲོད་རང་བྱུང་ཡེ་ཤེས་མེ། །ལྕེ་ནི་མེ་ལྕེ་བཟའ་བཏུང་སྦྱིན་སྲེག་སྟེ། །རང་ལུས་གོ་ཆའི་ལྷ་ལ་མཆོད་པ་བྱེད། །དེ་ཡིས་ནང་གི་སྦྱིན་སྲེག་ཚོགས་རྫོགས་ཤིང་། །ནོར་ལྷ་ཀུན་གྱི་མཆོག་ཏུ་གྱུར་པར་གསུངས། །གནས་ཁང་དཀྱིལ་འཁོར་དྲག་པོའི་དཀྱིལ་འཁོར་ལྷ། །གདན་ནི་པད་ཟླ་ཡིན་པའི་མོས་པ་བྱེད། །དམ་ཚིག་རྩ་བ་སྡིག་ལ་འཛེམ་པ་དང་། །དགེ་རྩ་གང་འགྲུབ་མི་སྤང་འབད་པ་དང་། །བླ་མའི་དམ་ཚིག་བླ་མ་རིགས་ཀྱི་བདག །སྣང་བ་མཐའ་ཡས་དབྱེར་མེད་མོས་པ་བྱ། །ཡི་དམ་དམ་ཚིག་བསྐྱེད་རིམ་བསྙེན་སྒྲུབ་འབད། །མཁའ་འགྲོའི་དམ་ཚིག་
རྒྱུན་ཏུ་གཏོར་བསྔོས་དང་། །ཚེས་བཅུ་དགུ་གཏོར་མ་ཆག་རབ་ཡིན་ནོ། །ཐ་མ་ལོ་རེ་བཞིན་དུ་དུས་བཟང་དུ། །ཚོགས་འཁོར་རེ་རེ་ཙམ་ཡང་ཅི་འབྱོར་བྱ། །དེ་ནས་ཐུན་མཚམས་སམ་ནི་ནམ་དགའ་རུང་། །གོ་ཆའི་ལྷ་ལ་བསྙེན་པ་ཅུང་ཟད་བྱ། །སྤྱི་བོར་བྱ་ཁྱུང་རྭ་བར་ནོར་བུའི་སྟེང་། །པདྨ་འདབ་མ་སྟོང་ལ་སངས་རྒྱས་སྟོང་། །ལྟེ་བར་མགོན་པོ་ཚེ་དཔག་མེད་པ་ཡིན། །ཐུགས་ཀའི་ཧཱུྃ་ལས་འོད་ཟེར་འཕྲོས་པ་ཡིས། །རྒྱལ་བ་ཀུན་གྱི་བྱིན་རླབས་ཚེ་ཡི་བཅུད། །ས་ཆུ་མེ་རླུང་ནམ་མཁའ་འབྱུང་བའི་བཅུད། །ལྷ་ཀླུ་མི་ཡི་ཚེ་དང་བསོད་ནམས་ཀུན། །འོད་ཟེར་རྣམ་པར་ཕྱག་གི་བུམ་པར་བསྡུས། །བུམ་པ་ཁོལ་ཞིང་ལུད་པའི་བདུད་རྩི་ཡིས། །ཚངས་བུག་ནས་ཞུགས་ལུས་ཀུན་བདུད་རྩིས་གང་། །ནད་གདོན་ཚེ་ཡི་བར་ཆད་སྡིག་སྒྲིབ་ཀུན། །སོལ་ཁུ་ལྟ་བུར་རྐང་མཐིལ་འོག་སྒོར་བུད། །རང་ལུས་ཚེ་ཡི་བདུད་རྩིས་གང་བར་བསམ། །ཨོཾ་ཨ་མི་དྷེ་ཝ་ཨཱ་ཡུ་སིདྡྷི་ཧཱུཾ་ཧྲཱིཿ འདི་ནི་ཐོ་རངས་སྔ་དྲོ་བྱས་ན་ལེགས། །སྤྱི་བོར་བྱ་ཁྱུང་ཐུགས་ཀར་ཉི་ཟླའི་སྟེང་། །ཁྲོ་ཡིག་སྔགས་ཀྱིས་བསྐོར་བར་དམིགས་ཤིང་བཟླ། །བྱ་ཁྱུང་སྤྲུལ་པས་ནམ་མཁའ་བར་སྣང་གང་། །གནོད་བྱེད་ཀླུ་གཉན་ས་བདག་
ཐམས་ཅད་རྣམས། །སྦལ་སྦྲུལ་རྣམ་པར་ཞལ་དུ་གསོལ་བ་དང་། །གཤོག་པའི་གསེབ་ནས་བྱེ་ཚན་ཆར་བབས་པས། །གནོད་ཅིང་འཚེ་བའི་ཀླུ་རིགས་ཤ་རུས་ཕྱེས། །གཏད་སོགས་མནན་པ་སྡེར་མོས་བྲུས་ཤིང་བཏོན། །གཤོག་པ་བརྡབས་པས་བསྐལ་པའི་རླུང་འཚུབ་ཅིང་། །ལྟས་ངན་རྐྱེན་ཁ་མི་ཁ་བྲ་མཆུ་ཀུན། །ཐམས་ཅད་རྒྱ་མཚོ་ཆེན་པོའི་ཕར་འགྲམ་གཏོར། །དེ་ལྟར་བསྒོམ་ཞིང་ཁྱུང་སྔགས་ཅི་ནུས་བཟླ། །ཨོ་ཁྲོ་གྷ་རུ་ཊ་ཙ་ལེ་ཙ་ལེ་ཧཱུཾ་ཕཊ། མཐར་ནི་ཁྱུང་རྣམས་སྤྱི་བོའི་ཁྱུང་ལ་ཐིམ། །དེ་ནས་དཔྲལ་བའི་འཇམ་དཔལ་མགྲིན་པ་ཡི། །རྟ་མགྲིན་ཐུགས་ཀའི་ཕྱག་རྡོར་ལྟ་བ་ནི། །མཁའ་འགྲོ་སྡེ་ལྔ་གསང་གནས་མེ་དབལ་རྣམས། །སོ་སོའི་ཐུགས་ཀའི་ས་བོན་སྔགས་འཁོར་དམིགས། །འོད་ཟེར་འཕྲོས་པས་ཕྱོགས་བཅུའི་རྒྱལ་བ་ཡི། །སྐུ་དང་གསུང་དང་ཐུགས་དང་ཡོན་ཏན་དང་། །ཕྲིན་ལས་རྣམས་ལ་མཉེས་པའི་མཆོད་པ་ཕུལ། །སོ་སོའི་སྐུ་གསུང་ཐུགས་ཡོན་ཕྲིན་ལས་ཀྱི། །བྱིན་རླབས་དངོས་གྲུབ་ཐམས་ཅད་འོད་ཟེར་གྱིས། །རྣམ་པར་བསྡུས་ནས་སོ་སོའི་ལྷར་ཐིམ་བྷེ། །ལས་བྱང་ནང་ལྟར་སོ་སོའི་སྔགས་རྣམས་བསྙེན། །དེ་ལྟར་བསྙེན་སྒྲུབ་རྒྱུན་ཁྱེར་
བྱས་པ་ཡི། །བནྡེ་བུད་མེད་སྐྱེས་ཤར་མི་དཔོན་སོགས། །ཕྱག་འཚལ་བཀའ་ཉན་འབུལ་བ་གུས་འདུད་བྱེད། །ཉི་ཟླ་ཤར་དང་གོ་གྱོན་མཚོན་ཆ་ཐོགས། །རྫོང་བརྩེགས་དར་ཕྱར་དུང་འབུད་ནམ་མཁར་འགྲོ། །བག་དྲོ་བྱིན་ཆགས་བསྐྱེད་རིམ་ཏིང་འཛིན་གསལ། །བཟང་རྟགས་བྱུང་ཡང་ཧ་ཅང་དགའ་བྲོད་སྤང་། །དམ་ཚིག་མི་གཅིག་པ་ལ་བཤད་མི་བྱ། །ལས་སྦྱོར་སྡེ་བརྒྱུད་སྔགས་ཤམ་དམིགས་པ་སོགས། །ད་རུང་བསྙེན་པ་དྲོད་རྟགས་མ་ཐོན་པར། །སྦྱར་དུ་མི་རུང་ཕྱིར་ན་འདིར་མ་བྲིས། །དུས་བབ་བྱུང་ན་རྗེས་སོར་བྲི་བར་བྱ།། ༧ དེ་ལྟར་རྒྱུན་ཁྱེར་ཉམས་སུ་ལེན་པའི་ཚེ། །ནུབ་མོ་ཉལ་ཁ་དེ་རིང་བསྙེན་སྒྲུབ་སོགས། །དགེ་སྦྱོར་གང་བྱུང་འཕྲལ་དུ་བསྔོ་བ་ཡིན། །རྒྱས་འདེབས་བྱས་ན་དགེ་བ་ཆུད་མི་བྱ། འཕེལ་རྒྱས་སངས་རྒྱས་ཐོབ་པའི་ཐབས་ཟབ་པ། །བདག་གིས་བསྐྱེད་རྫོགས་ཉམས་ལེན་བྱས་པ་སོགས། །དུས་གསུམ་དགེ་བའི་རྩ་བ་གང་བསགས་དེས། །ཚེ་འདིར་ཚེ་རིང་ནད་མེད་ཉམས་རྟོགས་འཕེལ། །ནམ་ཞིག་ཚེ་འཕོས་བདེ་ཆེན་ཞིང་སྐྱེས་ནས། །འགྲོ་བའི་དོན་དུ་སངས་རྒྱས་འགྲུབ་པར་ཤོག །ཅེས་སོགས་བསྔོ་བ་གང་ཤེས་བྱེད་ཚེ་ཡང་། །སེམས་ངོ་
མ་ཡེངས་འཁོར་གསུམ་ཡོངས་དག་ཡིན། །སེམས་ངོ་ཡེངས་ན་བསྔོ་བ་དུག་བཅས་ཏེ། །བྱང་ཆུབ་ཐོབ་པའི་ལམ་དུ་མི་འགྲོ་བས། །བསྔོ་བ་དུས་སུ་སེམས་ངོ་མ་ཡེངས་བྱ། །སྔོན་བསོད་ནམས་མ་བསགས་པ་ཞིག་མ་ལགས་ཏེ། །ཡུན་རིང་པོ་ཞིག་ནས་འཁོར་བར་འཁྱམས། །གནད་བསྔོ་བ་མ་ཤེས་གཅིག་པུས་ལེན། །རྗེས་བསྔོ་བ་འདི་ལ་ནན་ཏན་མཛོད། །ཅེས་གསུངས་ལྔ་ལྡན་དོན་རྩ་དེ་ཡིས་ཚང་། །ཕྱག་རྒྱ་ཆེན་པོ་སེང་གེ་ལ། །ལྔ་ལྡན་མེད་ན་མིག་མེད་ཡིན། །ཞེས་གསུངས་ལྟར་དུ་མན་ངག་དོན་འདུས་སོ། །དྲག་ལུས་ཤོག་བུ་མང་ཞིག་གཏད་བྱུང་བས། །དྲག་ལུས་དྲག་པོ་བསྙེན་པའི་ཟིན་བྲིས་འདི། །དྲག་པོའི་རྣལ་འབྱོར་༧རཱ་ག་ཨ་སྱས་བྲིས། །དྲག་པོ་བསྙེན་འདོད་འགའ་ལ་ཕན་པར་ཤོག །ཤུ་བྷཾ། དགེའོ།། །། ༔ བླ་མ་དྲག་པོའི་སྒོ་ནས་འཕོ་བ་སྦྱངས་ཐབས་ཡོད་ཀུན་ལ་སྤེལ་ཅིག །ན་མོ་མ་ཧཱ་མུ་དྲ་ཡེ། །དགེ་སློང་ཀརྨ་ལེགས་བྱས་ཁྱེད། །ཆུང་ནས་རབ་བྱུང་ཚུལ་ཁྲིམས་ལྡན། །བླ་མ་སངས་རྒྱས་མང་དུ་བསྟེན། །བསྐྱེད་རྫོགས་རྩེ་གཅིག་ཉམས་བླངས་པས། །ཆོས་བཤད་བྱེད་དགོས་མི་འདུག་ཀྱང་། །ད་ནི་འཆི་བ་ཆོས་ཀྱི་སྐུ། །
འཚང་རྒྱ་བ་ཡིས་གདམས་ངག་གི །གསོལ་འདེབས་ཚིག་གསུམ་སྙན་དུ་གསོལ། །རང་ཉིད་གུ་རུ་དྲག་པོའི་སྐུ། །གཞུང་ལྟར་བསྐྱེད་རིམ་གསལ་བར་བསྒོམ། །རྩ་གསུམ་འཁོར་ལོ་ལྔར་གསལ་བའི། །རྩ་མདུད་ལྔ་རུ་གོ་ཆའི་ལྷ། །སྤྱི་གཙུག་རིགས་བདག་འོད་དཔག་མེད། །རྩ་བའི་བླ་མ་དབྱེར་མེད་བསྒོམ། །མ་དག་འཁོར་བའི་སྒོ་བརྒྱད་དེ། །ཡི་གེ་ཧཱུཾ་དམར་རེ་རེས་དགག །ལྟེ་འོག་རང་སེམས་ཐིག་ལེ་ནི། །དཀར་དམར་སྲན་མ་ཆེ་ཤོས་ཙམ། །གོ་ཆའི་ལྷ་ལ་བསྐོར་བ་སྟེ། །བྱས་ནས་འོད་དཔག་མེད་ལ་ཐིམ། །སླར་ཡང་མར་བྱུང་ལྟེ་བར་གནས། །དེ་འདྲའི་དམིགས་པ་འགའ་རེ་བྷེ། །དེ་ནས་འཆི་བར་ངེས་པའི་ཚེ། །ལུས་དང་ལོངས་སྤྱོད་གཉེན་འདུན་བཅས། །མཎྜལ་གཅིག་ཏུ་བསྡུས་བྱས་ནས། །སྤྱི་བོར་འོད་དཔག་མེད་ལ་འབུལ། །ཆགས་ཞེན་འཁྲི་བ་རྩད་ནས་སྤང་། །འོད་གསལ་ཟིན་པར་གསོལ་བ་འདེབས། །བདག་ནི་སེམས་ཅན་ཀུན་དོན་དུ། །འཆི་བ་ཆོས་སྐུར་སངས་རྒྱས་ནས། །བར་དོ་ལོངས་སྤྱོད་རྫོགས་སྐུར་བཞེངས། །སྐྱེ་བ་སྤྲུལ་པའི་སྐུ་དེ་ནི། །བདེ་བ་ཅན་གྱི་ཞིང་ཁམས་སུ། །པདྨའི་སྦུབ་ལ་བརྫུས་སྐྱེས་ནས། །སྤྲུལ་པ་བྱེ་བ་ཕྲག་བརྒྱ་
ཡིས། །འགྲོ་བ་སེམས་ཅན་མ་ལུས་པ། །སངས་རྒྱས་ས་ལ་བཀོད་པར་བྱ། །བསམ་པའི་སེམས་བསྐྱེད་འདུན་པ་བྱ། །དེ་ནས་ལྟེ་བའི་ཐིག་ལེ་དེ། །ཡར་འཕྲོས་སྣང་བ་མཐའ་ཡས་ལ། །ཐིམ་པའི་དམིགས་པ་ལན་བདུན་བྱ། །དེ་ནས་གུ་རུ་དྲག་པོ་ཡི། །ཐུགས་སྲོག་ཧཱུྃ་ལ་རིག་པ་གཏད། །དེ་ནས་ཅི་ཡང་མི་བསྒོམ་པར། །ཉམས་ལེན་ཕྱག་ཆེན་ངང་ལ་བཞག །ཐིམ་རིམ་དཀར་ལམ་དམར་ལམ་སོགས། །འཁྲུལ་པའི་སྣང་བ་ཅི་ཤར་ཡང་། །སེམས་ཉིད་ཁོ་རང་མ་ཡིན་པའི། །གཞན་ནས་འཆར་རྒྱུ་ཅི་ཡང་མེད། །གང་ཤར་དེ་ཡི་ངོ་བོར་ལྟ། །ཞག་གྲངས་དུ་ཙམ་འདུག་པ་ནི། །འཆི་བའི་ཕན་ལ་དམ་བཅའ་བྱ། །ཕྱི་དབུགས་ཆད་པའི་དུས་དེ་རུ། །འོད་གསལ་སྟོང་རྗེན་ལྷང་ངེ་འཆར། །དེ་ཡི་ངང་ལ་གནས་པར་བྱ། །ལུས་སེམས་བྲལ་ནས་བག་ཆགས་ཀྱིས། །གུ་དྲག་བསྐྱེད་རིམ་ཟིན་མ་ཐག །ལྷ་སྐུ་ཕྱག་རྒྱ་ཆེན་པོ་སྟེ། །ཡིད་ཡུལ་དྲག་པོ་དངོས་སུ་འགྱུར་། །བར་དོ་ཡིན་པར་ངོས་ཟིན་ནས། །བདེ་བ་ཅན་དུ་འཕུར་ཏེ་བྱོན། །དེ་མ་ཐག་ཏུ་སྐྱེ་བར་ངེས། །ཨོ་རྒྱན་རྗེ་དང་དྭགས་པོ་ཡི། །གདམས་ངག་གཅིག་དྲིལ་གོ་བདེ་
འདི། །ཐུགས་དམ་བརྟན་ཅིང་འགྲོགས་ན་ཡང་། །ཉེས་སྐྱོན་མེད་ཅིང་ཚིག་དོན་ཡིད་ལ་འཆང་། །ཞེས་པ་༧རཱ་ག་ཨ་སྱས་སྦྱར་བའོ།། དགེའོ། ། ༈ གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅས་དང་། །འཚོ་བ་སྦྱོར་བའི་ཡོན་བདག་རྣམས། ཚེ་འདིར་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་༧ ཨ་རཱ་གས་སོ།། །། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།