གུ་རུ་དྲག་པོའི་ལས་ཚོགས་ལས་མ་ཧཱ་བྷ་ལའི་སྒོ་ནས་དགྲ་སྲི་མནན་ལུགས།
གུ་རུ་དྲག་པོའི་ལས་ཚོགས་ལས་མ་ཧཱ་བྷ་ལའི་སྒོ་ནས་དགྲ་སྲི་མནན་ལུགས་བཞུགས༔
ཨོཾ་སྭ་བྷཱ་ཝས་སྦྱངས། སྟོང་པའི་ངང་ལས་སྐད་ཅིག་གིས་སྐུ་གཟུགས་མི་དམིགས་པ་ལས། མ་ཧཱ་བྷ་ལ་སྐུ་མདོག་དུད་ཁ་ཞལ་གསུམ་རྩ་ཞལ་གླང་མགོ་རྭ་ཅོ་དམར་ཧྲེང་ངེ་ལྡིང་བ༔ བར་པ་མི་མགོ་དམར་པོས་སྦྲུལ་ཟ་བ༔ སྟེང་གི་མི་མགོ་སྔོན་པོ་མིག་གཅིག་པ༔ མགོ་ལ་དར་སྔོན་པོའི་ཅོད་པན་བཅིངས་བ༔ སྦྲུལ་མགོ་བདུན་གྱི་གདེངས་ཀ་ཅན༔ སྐུ་སྨད་སྦྲུལ་དུ་འཁྱིལ་བ༔ ལྟེ་བ་གྲུ་གསུམ་ཧོམ་ཁུང་འབར་བའི་ནང་དུ་དགྲ་བགེགས་ཐམས་ཅད་རང་དབང་མེད་པ་འགུགས་པ༔ ཕྱག་གཉིས་གནམ་ལྕགས་ཀྱི་ཕུར་པ་འདྲིལ་ཞིང་འདེབས་ནས་གསོད་པར་བྱེད་
པའི་གནས་གསུམ་ཐུགས་ཀའི་ཧཱུཾ་ལས་འོད་ཟེར་འཕྲོས་པས་སྤྱན་དྲངས༔ བཛྲ་ས་མ་ཡ་ཛ༔ ཧཱུྃ། འདི་ནས་ནུབ་ཀྱི་ཕྱོགས་རོལ་ན༔ རི་རབ་ལྷུན་པོའི་ནུབ་ངོས་ནས༔ ཉི་མ་ཟླ་བ་གཤེགས་ལམ་ན༔ ནམ་མཁའ་དམར་ལ་ས་གཞི་དམར༔ རྒྱ་མཚོ་དག་ཀྱང་དམར་པོ་སྟེ༔ དེ་ལ་མིང་དང་མཚན་བཏགས་པ༔ བ་གླང་སྤྱོད་ཀྱི་གླིང་ཞེས་བྱ༔ དེ་ན་བཞུགས་པའི་སྟོབས་པོ་ཆེ༔ འདྲེ་སྲིན་འདུལ་བའི་མཐུ་བོ་ཆེ༔ མ་ཧཱ་བྷ་ལ་བདུད་ཀྱི་བུ༔ གནོད་བྱེད་འདུལ་ཕྱིར་སྤྱན་འདྲེན་ནོ༔ སྐད་ཅིག་ཡུད་ཀྱིས་འདིར་བྱོན་ལ༔ སྐུ་གཟུགས་འདི་དང་དབྱེར་མེད་
དུ༔ དགྲ་བགེགས་འདུལ་ཕྱིར་བཞུགས་སུ་གསོལ༔ ཨོཾ་མ་ཧཱ་བྷ་ལ་ཨེ་ཧྱ་ཧི༔ ཛཿཧཱུྃ་བཾ་ཧོཿ ས་མ་ཡ་ཏིཥྛ་ལྷན༔ ཨོཾ་མ་ཧཱ་བྷ་ལ་ཡ་ཧཱུྃ་ཕཊ༔ བརྒྱ་རྩ་བཟླ། ཨོཾ་ཡེ་དྷརྨ་སོགས་གཏོར་མ་ཆབ་ཀྱིས་བྲན་ལ༔ ཨོཾ་སྭ་བྷ་ཝས་སྦྱངས། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར༔ ཨོཾ་ཨཱཿཧཱུྃ༔ ལན་གསུམ་བརྗོད། ཨོཾ་ཨ་ཀཱ་རོ་སོགས། ཨོཾ་མ་ཧཱ་བ་ལ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ གསུམ། ཨརྒྱུ་སོགས། དེ་ནས་བསྟོད་པ་བྱ་བ་ནི༔ ཧཱུྃ༔ འཇིག་རྟེན་ལྷ་འདྲེ་ཀུན་གྱི་གཤེད་པོ་སྟེ༔ ལས་ཀྱི་མཐུ་ལས་གྲུབ་པ་བདུད་ཀྱི་བུ༔ བ་གླང་སྤྱོད་སོགས་གླིང་ལ་དབང་བསྒྱུར་བའི་སྟོབས་ཆེན་མ་ཧཱ་བྷ་ལ་ཁྱོད་ལ་བསྟོད༔ སྐུ་གཟུགས་འདི་དང་དབྱེར་མེད་བརྟན་བཞུགས་ལ༔ ཁྱོད་ཀྱི་འདུལ་སྐལ་ཡིན་པས་འདྲེ་འདི་ནོན༔ སྟོབས་ཆེན་ཁྱོད་ཀྱི་དམ་ཚིག་དུས་ལ་བབ༔ དེ་ནས་དོང་གྲུ་གསུམ་བྲུས་པའི་ནང་དུ༔ ལིངྒ་གན་རྐྱལ་མགོ་ཕྱིར་བསྙལ་བཅུག༔ འགུགས་གཞུག་རྒྱས་པར་བྱ་ཞིང་༔ རང་ཉིད་ཡི་དམ་ཁྲོ་བོའི་ཐུགས་ཀ་ཡི༔ འོད་ཟེར་ལྕགས་ཀྱུས་ཡང་ཡང་བཀུག་ལ་བསྟིམ༔ ན་མོ་བཛྲ་པཱ་ཎི་ཡེ༔ དཀོན་མཆོག་གསུམ་དང་མ་ཧཱ་བྷ་ལའི་
བདེན་པའི་མཐུས༔ བདག་གི་སྦྱིན་བདག་རྨེའི་རྟ་ནོར་ལུག་གསུམ་ལ་གནོད་པའི་གོད་འདྲེ་སོགས་དམ་སྲི་སྨྱོ་འདྲེའམ། གནོད་བྱེད་རྒེའི་གང་དགོས་མིང་བསྒྱུར་ལ༔ གཟུགས་ལིངྒ་འདི་ལ་ཁུག་ཅིག༔ ཨོཾ་མ་ཧཱ་བྷ་ལ་ཡ་གནོད་བྱེད་ཆེ་ཨོ་བཛྲ་ཨཾ་ཀུ་ཤ་ཛ༔ ཛཿཧཱུྃ་བཾ་ཧོཿ ཞེས་བརྒྱ་རྩ་བརྒྱད་བཟླ༔ ལིང་ག་དགྲ་བགེགས་དངོས་སུ་བསམ༔ དེ་ནས་སྐུ་གཟུགས་ལག་ཏུ་བླངས་ལ༔ མ་ཧཱ་བྷ་ལ་དངོས་སུ་བསྐྱེད༔ ཤུགས་ཆེན་མི་ཡིས་བྱིསྦ་མནན་པ་ལྟར༔ མ་ཧཱ་བྷ་ལས་ནམ་ཡང་མི་བཏང་བསམ༔ ཧཱུྃ༔ འདྲེ་སྲིན་གདུག་པ་འདུལ་བའི་ཕྱིར༔ སྟོབས་ཆེན་ཁྲོ་བོའི་སྤྲུལ་པ་སྟེ༔ བ་གླང་སྤྱོད་ལ་དབང་བསྒྱུར་བའི༔ མ་ཧཱ་བ་ལ་བདུད་ཀྱི་བུ༔ སྐུ་མདོག་དུད་ཁ་རི་རབ་ཙམ༔ རྩ་ཞལ་དམར་པོ་གླང་གི་ཞལ༔ གནམ་ལྕགས་མེ་ཡི་རྭ་ཅོ་གཟེངས༔ བར་པ་ཁྲོ་ཞལ་ཀླུ་གདོན་ཟ༔ སྟེང་ཞལ་སྔོན་པོ་སྤྱན་གཅིག་པ༔ དར་སྔོན་འབར་བའི་ཅོད་པན་བཅིངས༔ སྦྲུལ་མགོ་དགུ་ཡི་གདེངས་ཀ་ཅན༔ མཇུག་མ་ཞེ་སྡང་སྦྲུལ་ལྟར་འཁྱུགས༔ ལྟེ་བ་ཟུར་གསུམ་ཧོ་ཁུང་དུ༔ དགྲ་བགེགས་བཀུག་ནས་བྲུབ་པར་བྱེད༔ ཕྱག་གཉིས་གནམ་ལྕགས་ཕུར་པ་ནི༔ འདྲིལ་ཞིང་གནོད་བྱེད་གསོད་པར་བྱེད༔ ལས་ལ་གྲུབ་པའི་མཐུ་བོ་
ཆེ༔ མིང་དང་གཟུགས་སུ་བྲིས་པ་ཡི༔ གནོད་བྱེད་སྒོ་ཞེས་པ་འདི༔ ཁྱོད་ལ་གཏད་དོ་མ་ཤོར་ཅིག༔ མནན་པ་ཡིན་ནོ་མ་ལྡང་ཞིག༔ མ་ཧཱ་བྷ་ལའི་ཞབས་སུ་མནན༔ སྟོབས་པོ་ཆེ་ཡི་འོག་ཏུ་མནན༔ བྱམས་པ་མ་བྱོན་བར་དུ་མ་ལྡང་ཞིག༔ དེ་ནས་ལོངས་ལ་བྱང་ཆུབ་སེམས་བསྐྱེད་ཞུས༔ དེ་བར་མ་ཧཱ་བྷ་ལས་མ་བཏང་ཞིག༔ ཨོ་ལཾ་ཧཱུཾ་ལཾ་སྟེ་བྷ་ཡ་ནན༔ ཞེས་མ་ཧཱ་བྷ་ལའི་ཞལ་ལིང་གའི་སྟེང་དུ་ཁ་སྦུབ་ལ་མགོ་ཕྱིར་བསྟན་ལ་བཞག་ནས་མནན༔ འདིའི་སྟེང་དུ་རོ་གཡམ་ལ་རོ་སོལ་གྱིས་རྒྱ་གྲམ་བྲིས་པས་མནན༔ མེ་བླུག་མེ་ཆུ་རླུང་གིས་མནན་ཟེར་ཆུ་བླུགས་ས་རིམ་དགུ་བླུགས་ལ། རྒྱ་གྲམ་དགུ་བྲི་རྟ་བྲོ་བརྡུང་བར་བྱའོ༔ འདི་ནི་གུ་དྲག་ལས་ཚོགས་སུ་གྲགས་པ། མ་ཧཱ་བྷ་ལའི་སྒོ་ནས་དགྲ་སྲི་མནན་ཐབས་ཞེས་བྱ་བ་རྙིང་མའི་ལུགས་དང་། ཞལ་བཞི་པའི་ལས་ཚོགས་མ་ཧཱ་བྷ་ལ་བརྟེན་ནས། འདྲེ་མནན་ཐབས་ཞེས་གསར་མའི་ལུགས་གཉིས་དོན་བསྡུས་ཏེ༔ འདོན་ཆ་ཁྱེར་བདེ་བར་ཨ་རཱ་གས་བྲིས་སོ། །མཚམས་དང་སྒྲུབ་པ་ལ་སོགས་ལྟ་ཅི་སྨོས། །ཅུང་ཟད་སྔགས་བཟླས་ཙམ་ཡང་མི་དགོས་པར། །དགྲ་འདྲེ་ཐམས་ཅད་བཙན་ཐབས་མནན་པའི་ཐབས། །འདི་འདྲ་རིན་ཆེན་གསེར་བས་མི་དཀོན་རེ། །ཕལ་གྱི་ཡིག་ཆ་མཐོང་ཡང་ཕྱག་ལེན་བྲལ། །དེ་ཕྱིར་ཕྱག་ལེན་འདི་འདྲ་གསང་བར་བྱ། །འདྲེ་མནན་གཅིག་ཆོག་ཟབ་མོ་ཨི་ཐི་རྒྱ༔ ༈ ཤོག་བུ་གཙང་མར་
སྙིང་སྤྱི་མཚམས་བྲི། །ཡན་ལག་འབྲུ་དགུ་ཕྱི་རོལ་ཛཁྲོ་བསྐོར། །སྙིང་ཁར་ཛ་ཡིག་ཁ་སྤྲོད་གཉིས་ཀྱི་བར། །ཀྲྀ་ཏྲི་ཁུག་གསུམ་བརྩེགས་མར་བྲི་བར་བྱ། །ལྟོ་བའི་ནང་དུ་བསྒྲུབ་ལ་བར་གཅོད་པའི། །དམ་སྲི་སྒབ་འདྲེ་ཤི་གཤེད་གོད་འདྲེ་སོགས། །གདོན་རིགས་གང་གནོད་མིང་མཇུག་ཁུག་ནན་བྲི། །རང་མིང་ལྷ་མིང་དེ་རུ་བྲི་མི་རུང་། །དྲི་མ་སོང་དོགས་མེ་དང་རླུང་ལ་གཡུག །མདུན་དུ་བཞག་ལ་བཀུག་གཞུག་སྤྱི་ལྟར་ལས། །ཆོས་སྐྱོང་འདི་དང་འདི་ཞེས་བསྒྲུབ་པ་ལ། །བར་དུ་གཅོད་པའི་སྒབ་འདྲེ་གང་ཡིན་པ། །ཁུག་ཅིག་ཛ༔ཧཱུྃ་བཾ་ཧོ༔ཞེས་པ་དེ། །བརྒྱའམ་ཉེར་གཅིག་བདུན་སོགས་ནན་ཏན་བྱ།། ༈ དེ་ནས་དམ་སྲི་མནན་ཐབས་ནི། དང་པོ་ལྷ་དེ་ལ་སྒབ་འདྲེ་ཡོད་མེད་ནི། དེ་ལ་སྤྱན་རས་གཟིགས་ཀྱི་རིགས་དང་། གུ་རུ་ཞི་དྲག་དང་རྟ་མགྲིན་རིགས་དང་། སྒྲོལ་མ་དང་། ཕྱག་དྲུག་པ་དང་། བེར་ནག་ཅན་དང་། བཀའ་དགོངས་ཕུར་གསུམ་དང་། བདེ་དགྱེས་གསང་གསུམ་དང་། ཞི་ཁྲོ་ཡང་དག་དེ་རྣམས་ལ་གེལ་དུ་སྒབ་འདྲེ་མེད་དོ། །སྒྲུབ་ཆེན་སྐབས་སུ་སྒབ་འདྲེ་མནན་པ་སྤྱིའི་ཡིན་ལ། ལྷ་དེ་ལ་སྒབ་འདྲེ་ཡོད་པ་མ་ཡིན་ནོ། །ཡང་འཇམ་དབྱངས་དང་གཤིན་རྗེའི་རིགས་དང་དབྱངས་ཅན་མ་དང་དཔལ་ལྡན་ལྷ་མོ་དཔོན་གཡོག་དང་། རྣམ་སྲས་དམ་ཅན་ཕྱག་བཞི་པ་མ་ནིང་ཀད་ཞིང་སྐྱོང་ཕྱག་རྡོར་སོགས། ཕལ་ཆེར་ལ་སྒབ་འདྲེ་ཡོད་པས་སོ། །མནན་ཐབས་སོ་སོའི་གཞུང་ལྟར་བྱའོ། །དེ་ལ་བླ་མ་ཡི་དམ་མན་ཆད་དང་། ཐེའུ་རང་ཡན་ཆད་ཀྱི་ལྷ་གང་བསྒྲུབ་
ཀྱང་སྒབ་འདྲེ་འདི་ནི་མནན་དགོས་པར་གསུངས། འདི་དག་ལ་ལ་ནས་སེང་གདོང་དང་དབང་ཕྱུག་ཆེན་པོ་གཉིས་ཀྱི་སྒབ་འདྲེ་ཡིན་པར་བཤད་ཀྱང་། འདི་ནི་ལྷ་ཐམས་ཅད་གང་བསྒྲུབ་ཀྱང་། སྤྱིའི་སྒབ་འདྲེ་ཡིན་པ་ཨོ་རྒྱན་གྱིས་གསུངས་སོ། །བདག་གིས་སློབ་དཔོན་བརྒྱུད་པའི་ཕྱག་ལེན་ཡང་འདི་མ་མནན་ན་མཚམས་སྒྲུབ་མི་སྲིད་པས། བདག་གིས་བཅུ་གཅིག་དུས་འདི་ཞག་གསུམ་བསྒྲུབས་ནས་མནན་པ་ཡིན་པས་ཕྱག་ལེན་ཅན་ནོ།། ༈ འདི་ལ་རྒྱས་བསྡུས་གཉིས་ཡོད་དེ། རྒྱས་པ་ལ་འཁོར་ལོ་དཔེའུ་བྲིས། བསྡུས་པ་ལ་ལིངྒ་བཞི་མགོ་སྤྲོད་བྲི་སྟེ། བྱིསྦྲ་དང་བུད་མེད་དང་། རི་བོང་མགོ་ཅན་དང་། དོམ་མགོ་ཅན་དང་བཞིའི་སྙིང་ཁར་ཏྲི་དང་ཛ་དང་སོ་སོའི་ལིངྒ་ལ་ཁུག་ཛས་བསྐོར། དེའི་རྒྱབ་ཏུ་སྔགས། ཊ་ཡ་མ་དམ་སྲི་མཱ་ར་ཡ་ཛ་ནན། སོགས་ཀྱིས་བསྐོར། དེ་རྒྱབ་ལིང་གའི་མཐའ་སྐོར་དུ་ཛ་ཁྲམ་གྱིས་བསྐོར་རོ། །བྲུབ་ཁུང་ངམ་ཐོད་པའམ་ཟངས་ལྕགས་ཀྱི་སྣོད་དུ་བཞག །བདེན་བདར་དང་བཀུག་གཞུག་བྱས་ཏེ། ༈ མཚམས་དང་སྒྲུབ་པ་ལ་བར་ཆད་བྱེད་པའི་མི་བླ་རྐུན་བྱིསྔའི་གཟུགས་ཕུང་འདྲེ་བསེ་རག་རི་བོང་མགོ །ཟ་ཁ་ལ་གནོད་བསེན་མོའི་གཟུགས། གོད་འདྲེ་གནོད་བྱེད་དོམ་མགོ་ཅན་ལ་སོགས། སྒབ་འདྲེ་གནོད་བྱེད་གང་ཡིན་པ་ཐམས་ཅད་ལིང་ག་འདི་ལ་ཁུག་ཅིག་ཛ༔ཧཱུྃ་བཾ་ཧོ༔ ཞེས་ལན་བདུན་ནམ་དགུ་སོགས་ཀྱིས་བཀུག །རང་ཡི་དམ་གང་རུང་སྒྲུབ་པ་དེ་བསྒོམ་
པའམ་ཡང་ན་ཁྲོ་བོ་སྟོབས་པོ་ཆེའམ་ཕྱག་རྡོར་བསྒོམས་ལ་ཡི་དམ་གང་སྒྲུབ་དེའི་སྔགས་སམ་ཕྱག་རྡོར་རམ། སྟོབས་པོ་ཆེའི་སྔགས་ཤམ་དུ། ཨོ་མི་ལ་ཀུ་རུ། བསེ་རག་ཤན་ཏཱི། གོད་འདྲེ་ཙཀྲ། །བསེན་མོ་རུ་ཏྲི། ཀ་ཡ་ཤན་ཏྲི། གནོད་བྱེད་ནན་ནན། བྷ་སུ་དྷ་ར་དུང་དུང་། འདུས་འདུས། བསྡུས་བསྡུས་བསྡུས་སྭཱ་ཧཱ། ཞེས་བཟླས་ཐུན་གྱིས་བྲབ། ཞག་གསུམ་བསྒྲུབས་ནས་སྒོ་ཐེམ་ཞབས་སུ་མནན། ལིང་ག་བཅུག་སྣོད་ར་རུ་ཡོད་ན་ལེགས། འདི་སྔར་ལན་གཅིག་མནན་ཡང་ལོ་འགའ་སོང་ནས་གོས་ཁ་སོགས་མི་ཤིས་པ་རྣམས་ནམ་བྱུང་མནན་ཝིག་བྱས་ཏེ། ལམ་རྒྱ་གྲམ་མམ་ཟམ་ཞབས་སུ་མནན། རཏྣའི་གཏེར་ཁ་སོགས་མང་པོའི་དོན་བསྡུས་པའོ། །འདིབསེ་རག་འདྲེ་ངན་ཁ་བཅིངས་ན་སྡིག་པ་ཆེ་བར་གསུངས་པས། རྗེས་སུ་ཁོ་ལ་སྙིང་རྗེ་བསྒོམ་ཞིང་སྡིག་སྦྱངས་ཡིག་བརྒྱ་ལྟུང་བཤགས་བརྒྱ་ཕྱག་བྱའོ། །གལ་ཏེ་དེ་ལྟར་བསྒྲུབས་ནས་མནན་པ་མ་འཕྲོད་ན། ལྷ་སྤྱིའི་སྒབ་འདྲེ་རའི་སོག་པའམ་མ་རྙེད་ན་གྲོ་གའམ་ཐོག་གུ་ལ་ལིང་ག་བྱའི་མགོ་ཅན་བྲིས་པའི་སྙིང་ཁར། ཎི་ཛ་ཏྲི་ཛ་ཁུག་ཛ༔ དེའི་མཐར་ཡིག་མགོ་ཕྱི་ལ་བསྟན་ནས། ཡ་མ་དམ་སྲི་མཱ་ར་ཡ་ཛ་ནན་ཡ་མ་དམ་སྲི་ཡཾ་པ་རི་ཁུག་ཛ༔ རྦད་ནན། ཏྲིའུ་ཏྲིའུ་ཤོ་ན་ཛ་ཡཾ་པ་རི་ཁུག་ཛ་ནན། ཞེས་བྲིས་ལ། དེ་རྒྱབ་ལིང་གའི་མཐའ་བསྐོར་དུ་ཛ་ཁྲམ་གྱིས་བསྐོར་རོ། །དེ་ཐོད་པའམ་ལྕགས་སྣོད་
དུ་བཞག །ཤོག་གུའམ་གྲོ་བ་ལ་སྟོབས་ཆེན་མ་ཧཱ་པཱ་ལ་སྐུ་མདོག་དུད་ཁ་གླང་གི་མགོ་རྭ་ཅོ་དམར་པོ་སྦྲུལ་མགོ་དགུའི་ལྡེང་ཀ་ཅན། བར་མ་མི་མགོ་སྔོན་པོ་སྦྲུལ་ཟ་བ། དེ་སྟེང་ཁྲོ་རྒྱལ་ཞལ་སྔོན་པོ་སྤྱན་གཅིག་པ། དབུ་སྐྲ་དར་སྔོན་པོས་བཅིང་བ། ཕྱག་གཉིས་ཀྱིས་ཐུགས་ཀར་ཕུར་པ་འདྲིལ་བ། ལྟེ་བ་ནང་ཟུར་གསུམ་ཧོམ་ཁུང་ནང་དུ་ནི་ཏྲི་ཛ་མགོ་ཐུར་བསྟན་ལ་ཚད་པ། སྐུ་སྨད་སྦྲུལ་དུ་འཁྱིལ་བ་བྲིས། དེའི་རྒྱབ་ཏུ་སྔགས་འདི་ཐུར་དུ་ཐོ་བརྩེགས་སུ་བྲིས། ཨོ་ཤ་མ་ར་ན་པྲ་མ་ཤག་དུན་ཧཱུཾ་ཧཱུཾ། ནན་དུལ་དུལ་ནན་ཆད་སོད། སྙིང་ལ་མཱ་ར་ཡ་སོད། ཅེས་བྲིས་མདུན་དུ་བཞག་།གཏོར་ཆུང་གཅིག་བཤམས་ལ། ནུབ་བ་ལང་སྤྱོད་ནས་བྲིས་པ་དེ་འདྲ་མང་པོ་ཡིད་ཀྱིས་སྤྱན་དྲངས་ལ་བསྟིམ། ཨོཾ་མ་ཧཱ་བཱ་ལ་བཛྲ་ས་མཱ་ཛ༔ ཛཿཧཱུྃ་བཾ་ཧོཿ མ་ཧཱ་བཱ་ལ་ཨི་དཾ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི། དེ་ནས་བསྟོད་པ་ནི། ཧཱུྃ༔ འཇིག་རྟེན་ལྷ་འདྲེ་ཀུན་གྱི་གཤེད་པོ་སྟེ། ལས་ཀྱི་མཐུ་ལས་གྲུབ་པ་བདུད་ཀྱི་བུ༔ བ་གླང་སྤྱོད་སོགས་གླིང་ལ་དབང་བསྒྱུར་བའི༔ སྟོབས་ཆེན་མ་ཧཱ་བྷ་ལ་ཁྱོད་ལ་བསྟོད༔ སྐུ་གཟུགས་འདི་དང་དབྱེར་མེད་བརྟན་བཞུགས་ལ༔ ཁྱོད་ཀྱི་འདུལ་སྐལ་ཡིན་པས་འདྲེ་འདི་ནོན༔ སྟོབས་ཆེན་ཁྱོད་ཀྱི་དམ་ཚིག་དུས་ལ་བབ༔ ཡེ་དྷརྨཱས་རབ་གནས་བྱའོ། །དེ་ནས་དམ་སྲིའི་ལིང་ག་མདུན་དུ་བཞག་ལ་རང་ཡི་དམ་གང་རུང་
བསྒོམས་ལ། བདེན་བདར་བྱས་རྗེས་རང་གི་བླ་མ་ཡི་དམ་མཁའ་འགྲོ་ཆོས་སྐྱོང་བཀའ་སྲུང་གཏོར་ཁ་བསྟན་ཚད་ཀྱི་མཚན་བརྗོད་ལ། འདི་རྣམས་བསྒྲུབ་པ་ལ་བར་དུ་གཅོད་པར་བྱེད་པའི་དམ་སྲི་སྒབ་འདྲེ་གང་ཡོད་པ་ཐམས་ཅད་གཟུགས་ལིང་ག་འདི་ལ་ཁུག་ཅིག །ཛཿཧཱུྃ་བཾ་ཧོཿ ཞེས་ལན་གསུམ་མམ་བདུན། ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དམ་སྲི་སྒབ་འདྲེ་ཐམས་ཅད་ལིང་ག་འདི་ལ་ཁུག་ཅིག་ཛཿཧཱུྃ་བཾ་ཧོཿ ཞེས་བརྒྱ་རྩ་བརྒྱད་བརྗོད་ནས་སྒྲུབ་ཁང་ཐེམ་པའི་འོག་གམ། སྦྲ་དང་གུར་ཡང་སྒོ་རྩ་ན་གོམ་པ་བདུན་གྱི་སོར་དོང་གྲུ་གསུམ་བྲུས་པར་བཅུག ། དེའི་སྟེང་དུ་མ་ཧཱ་བཱ་ལའི་སྐུ་མགོ་ཕྱིར་བསྟན་ཁ་སྦུབ་པས་བཀབ་བོ། །གོང་འོག་གི་མནན་པ་གཉིས་གང་བྱེད་ཀྱང་ཁྲག་གམ་སྣ་ཚ་ལ་དུག་ཁྲག་བཏབ་པས་བྲི་ཞིང་རང་གི་དྲི་མ་ཁ་རླངས་མ་ཤོར་བ་དང་། བཀུག་གཞུག་ཚར་ནས་ཚོན་སྐུད་སྣ་ལྔའམ་ར་སྤུ་ཁྱི་སྤུའི་སྐུད་པས་རྒྱ་གྲམ་དུ་བཅིང་དོང་ནང་བཙུག་ཚར་ནས་བཀུག་གཞུག་ལན་གསུམ་བྱ། དེ་སྟེང་རོ་རྡོའམ་མ་རྙེད་ཀྱང་རྡོ་ལེབ་འོག་ཏུ་རྒྱ་གྲམ་དང་སྟེང་དུ་རི་རབ་གླིང་བཞི་བྲིས་པས་མནན། ས་རིམ་པ་དགུ་ལ་རྒྱ་གྲམ་རེ་བྲི་ཞིང་བཀབ། དེ་སྟེང་མེ་ཁྲོལ་བླུག་ཆུ་བླུག །དམ་སྲི་སྒབ་འདྲེ་ཁྱོད་ཀྱི་ཕྱི་རབ་ཀྱི་སྟོན་པ་བྱམས་པ་མགོན་པོ་མ་བྱོན་གྱི་བར་དུ་མ་ལྡང་ཞིག་བྲུབ་ཅིག་ནོན་ཞིག །ཨོཾ་ལཾ་ཧཱུཾ་ལཾ་སྟ་བྷ་ཡ་ནན།
བྱམས་པ་བྱོན་དུས་ལོང་ལ་ཆོས་ཉོན་ཅིག །བརྗོད་རྟ་བྲོ་ཤེས་ན་རང་རང་ལྟར་བརྡུང་། མ་ཤེས་ན་རྐང་པས་རྒྱ་གྲམ་བཅག་གོ་།དེ་བཞིན་རྙིང་མའི་སྒྲུབ་པ་སྤྱིའི་དམ་སྲི་མནན་པ་དང་། གསར་མའི་གཉན་ལོཙྪབའི་གདམས་པ་མ་ཧཱ་བཱ་ལའི་གདམས་པ་སྔགས་བཟླ་མི་དགོས་པར་འདྲེ་བཙན་ཐབས་སུ་མནན་པའི་གདམས་ངག་གཉིས་ཁོ་བོས་གབ་སྤྲད། ལག་ཏུ་བླང་བདེར་བྱས་པས་ཁུངས་བཙུན་ལས་སླ་ཞིང་ཟབ་པའི་གདམས་པ་ལགས་སོ། །༧ རཱ་ག་ཨ་མྱས་སྦྱར་བའོ། །མངྒ་ལཾ།། །། ༈ གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅས་དང་། །འཚོ་བ་སྦྱོར་བའི་ཡོན་བདག་རྣམས། །ཚེ་འདིར་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་༧ ཨ་རཱ་གས་སོ།། །། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།