སྒྲུབ་པ་བཀའ་བརྒྱད་བདེར་གཤེགས་མདོས་ཆེན་གྱི༔ མི་མངོན་དབྱིངས་བསྐུལ།
སྒྲུབ་པ་བཀའ་བརྒྱད་བདེར་གཤེགས་མདོས་ཆེན་གྱི༔ མི་མངོན་དབྱིངས་བསྐུལ་བཞུགས་སོ༔
ཐུཊྛཐུམ༔ ཧཱུྃ༔ མི་མངོན་དབྱིངས་ན་བཞུགས་པ་རྒྱལ་བ་ཞི་ཁྲོའི་ཚོགས༔ ཨཱཿ བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས༔ ཨོཾ༔ བསྐུལ་ལོ་བསྐུལ་ལོ་སེམས་ཅན་དོན་ལ་བསྐུལ༔ ཧྲཱིཿ མཛོད་ཅིག་མཛོད་ཅིག་བཅོལ་བའི་ཕྲིན་ལས་མཛོད༔ ཨཱཿ ཆོས་སྐུ་སྐྱེ་བ་མེད་པའི་ངང་ཉིད་ལས༔ ཨོཾ༔ སྐྱེ་བའི་ཆོ་འཕྲུལ་ལོངས་སྤྱོད་རྫོགས་པའི་སྐུ༔ ཧཱུྃ༔ སྤྲུལ་སྐུའི་འགྲོ་བའི་སེམས་ཅན་དོན་མཛད་ཕྱིར༔ ཧཱི༔ ཞི་ཁྲོ་བཀའ་བརྒྱད་ལྷ་ཚོགས་ཐུགས་དམ་ཅན༔ དབྱིངས་ནས་སྐུ་བསྐྱོད་དམ་རྫས་འདི་བཞེས་ལ༔ ཐུགས་
དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ ཨོ༔ གཟུགས་སྣང་ཐམས་ཅད་སྐུ་ཡི་རང་བཞིན་ལ༔ ཨཱཿ སྒྲ་གྲག་ཐམས་ཅད་གསུང་གི་ངོ་བོར་སྣང་༔ ཧཱུྃ༔ དྲན་རྟོག་ཐམས་ཅད་ཐུགས་རྗེས་དགོངས་པར་འདུས༔ ཧཱུྃ༔ ཕྱོགས་བཅུ་དུས་གསུམ་བདེ་གཤེགས་བཅོམ་ལྡན་འདས༔ དབྱིངས་ནས་སྐུ་བསྐྱོད་དམ་རྫས་འདི་བཞེས་ལ༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ ཧཱུྃ༔ ཞི་བ་ལྷུན་གྱིས་གྲུབ་པའི་དཀྱིལ་འཁོར་ནས༔ སེང་ཆེན་ལ་སོགས་ཉི་ཟླ་པདྨའི་སྟེང་༔ དཔལ་འབར་ཞི་བ་ཡོངས་རྫོགས་ལྷ་ཚོགས་ནི༔ རྡོ་རྗེ་སེམས་
དཔའ་སངས་རྒྱས་ཀུན་གྱི་གཙོ༔ གཉིས་མེད་ཡུམ་ཆེན་ཀུན་ཏུ་བཟང་མོ་འཁྲིལ༔ རིགས་བཞི་ཡབ་ཡུམ་སེམས་དཔའ་ལྕམ་དྲལ་དང་༔ ཡིད་ཆོས་ཐུབ་དྲུག་མཐར་བྱེད་ལ་སོགས་ཏེ༔ བཞི་བཅུ་རྩ་གཉིས་རྒྱལ་བའི་ཐུགས་དམ་ཅན༔ དབྱིངས་ནས་སྐུ་བསྐྱོད་དམ་རྫས་འདི་བཞེས་ལ༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ མཆོད་གཡོག་པས་མཐེབ་སྐྱུ་དང་འབྲུ་སྣ་ཞི་བའི་གཏོར་མའམ་མེད་ན་བླ་མ་གཏོར་མར་བླུག༔ བདུད་རྩི་འཐོར་ཞིང་༔ ཧོ༔ བདེར་གཤེགས་ཞི་བའི་ལྷ་ཚོགས་ཐུགས་དམ་ཅན༔ ཁྱེད་ལ་མཆོད་པ་འབུལ་བ་ནི༔ ཕྱི་ནང་གསང་བའི་དམ་རྫས་དང་༔ སྨན་རཀ་གཏོར་མའི་མཆོད་པ་འདི་བཞེས་ཤིག༔ མ་ཧཱ་པཉྩ་བ་ལི་ཏ་རཀྟ་སརྦ་པཱུཙྪ་ཁཱ་ཧི༔ སྤྱི་དང་ཁྱད་པར་རྩ་བ་ཡན་ལག་གི་དམ་ཚིག་ཉམས་ཆག་འགལ་འཁྲུལ་དུ་གྱུར་པ་ཐམས་ཅད་མཐོལ་ཞིང་བཤགས་སོ༔ ས་མ་ཡ་ཨཱ༔ ཞི་རྒྱས་དབང་དྲག་གི་ཕྲིན་ལས་རྣམ་པ་བཞི་བདག་གི་ཡིད་བཞིན་དུ་སྒྲུབས་ལ༔ ལོག་ལྟ་ཐམས་ཅད་མྱུར་དུ་ཚར་ཆོད་ཅིག༔ ཤཱནྟཾ་པུཊྚི་པ་ཤང་མཱ་ར་ཡ་ཀུ་རུ་ཡེ་སྭཱ་ཧཱ༔ བདེར་གཤེགས་སྤྱི་བསྐུལ་འབྲིང་པོ་ལས་ཞི་བའི་བསྐུལ་པ་ལགས་སོ།། ༈ ཞི་བ་བཞི་བསྟོད་ནི། ཧཱུྃ༔ ཆོས་སྐུ་སྟོང་པ་
ཉིད་ལ་རང་བཞིན་མེད༔ ཆོས་སྐུ་ཁྱབ་བརྡལ་ཆེན་པོའི་ངང་དུ་གཅིག༔ ཆོས་ཉིད་མཉམ་པའི་ངང་དུ་འདུ་འབྲལ་མེད༔ ཀུན་བཟང་ཡབ་ཡུམ་གཉིས་ལ་ཕྱག་འཚལ་བསྟོད༔ རྣམ་ཤེས་རྣམ་དག་བཅོམ་ལྡན་རྡོ་རྗེ་སེམས༔ ཞེ་སྡང་རྣམ་དག་མེ་ལོང་ཡེ་ཤེས་ངང་༔ སྟོབས་ལྡན་ཁྲི་ལ་མཐིང་ཀ་རྡོ་རྗེ་བསྣམས༔ ཐུགས་མཆོག་རྡོ་རྗེ་སེམས་ལ་ཕྱག་འཚལ་བསྟོད༔ གཟུགས་ཕུང་རྣམ་དག་བཅོམ་ལྡན་རྣམ་སྣང་མཛད༔ གཏི་མུག་རྣམ་དག་ཆོས་དབྱིངས་ཡེ་ཤེས་ངང་༔ སེང་ཆེན་ཁྲི་ལ་དུང་མདོག་འཁོར་ལོ་བསྣམས༔ སྐུ་མཆོག་རྣམ་སྣང་མཛད་ལ་ཕྱག་འཚལ་བསྟོད༔ ཚོར་བ་རྣམ་དག་བཅོམ་ལྡན་རིན་ཆེན་འབྱུང་༔ ང་རྒྱལ་རྣམ་དག་མཉམ་ཉིད་ཡེ་ཤེས་ངང་༔ ཤུགས་འཆང་ཁྲི་ལ་གསེར་མདོག་རིན་ཆེན་བསྣམས༔ ཡོན་ཏན་རིན་ཆེན་འབྱུང་ལ་ཕྱག་འཚལ་བསྟོད༔ འདུ་ཤེས་རྣམ་དག་བཅོམ་ལྡན་སྣང་མཐའ་ཡས༔ འདོད་ཆགས་རྣམ་དག་ཀུན་རྟོགས་ཡེ་ཤེས་ངང་༔ མཛེས་ལྡན་ཁྲི་ལ་ལེ་བརྒན་པདྨ་བསྣམས༔ གསུང་མཆོག་སྣང་མཐའ་ཡས་ལ་ཕྱག་འཚལ་བསྟོད༔ འདུ་བྱེད་རྣམ་དག་བཅོམ་ལྡན་དོན་ཡོད་གྲུབ༔ ཕྲག་དོག་རྣམ་དག་ནན་ཏན་
ཡེ་ཤེས་ངང་༔ མཁའ་ལྡིང་ཁྲི་ལ་ལྗང་གུ་རྒྱ་གྲམ་བསྣམས༔ ཕྲིན་ལས་དོན་ཡོད་གྲུབ་ལ་ཕྱག་འཚལ་བསྟོད༔ འབྱུང་བ་རྣམ་དག་རིགས་ཀྱི་ཡུམ་ཆེན་ལྔ༔ ཀུན་བཟང་སངས་རྒྱས་སྤྱན་དང་མཱ་མ་གོས་དཀར་སྒྲོན༔ ཐབས་ཀྱི་སྐུ་ལ་ཤེས་རབ་དགྱེས་པར་འཁྲིལ༔ རིགས་ཀྱི་ཡུམ་ཆེན་ལྔ་ལ་ཕྱག་འཚལ་བསྟོད༔ སྐལ་བཟང་བྱང་ཆུབ་སེམས་དཔའ་བརྒྱད་རྣམས་ནི༔ དུས་གསུམ་སངས་རྒྱས་རྣམས་ཀྱི་སྤྲུལ་པ་སྟེ༔ ཡོན་ཏན་མི་བཟད་བསྐལ་པ་མཐའ་ཡས་པ༔ སེམས་དཔའ་ཆེན་པོ་བརྒྱད་ལ་ཕྱག་འཚལ་བསྟོད༔ སྒེག་མོ་ཕྲེང་བ་དབྱངས་དང་གར་ལ་སོགས༔ བདུག་སྤོས་མེ་ཏོག་མར་མེ་དྲི་ཆབ་མ༔ རྒྱལ་བ་རྒྱ་མཚོའི་ཚོགས་ལ་མཆོད་འབུལ་མ༔ མཆོད་པའི་ལྷ་མོ་རྣམས་ལ་ཕྱག་འཚལ་བསྟོད༔ ཡེ་ཤེས་ལྔ་ལ་རིགས་ལྔའི་སངས་རྒྱས་ཀྱི༔ སྤྲུལ་པས་ཞིང་ཁམས་བྱེ་བ་ཕྲག་བརྒྱ་འདུལ༔ སྤྲུལ་པ་བྱེ་བ་ཕྲག་བརྒྱས་འགྲོ་དྲུག་གི༔ དོན་མཛད་ཐུབ་པ་དྲུག་ལ་ཕྱག་འཚལ་བསྟོད༔ ཡེ་ཤེས་ཆེན་པོ་སྒོ་བ་ཡབ་ཡུམ་ནི༔ གཤིན་རྗེ་རྟ་མགྲིན་སྟོབས་ཆེན་བདུད་རྩི་འཁྱིལ༔ ལྕགས་ཀྱུ་ཞགས་པ་ལྕགས་སྒྲོག་དྲིལ་ཁྲོལ་མ༔ སྒོ་བ་ཡབ་ཡུམ་བརྒྱད་ལ་ཕྱག་འཚལ་
བསྟོད༔ ཆོས་སྐུ་ཀུན་ཁྱབ་ཆེན་པོའི་ཡེ་ཤེས་ཀྱི༔ ཆེ་བའི་ཡོན་ཏན་བརྗོད་ཀྱིས་མི་ལང་ཡང་༔ རིག་འཛིན་རྣལ་འབྱོར་བདག་ཅག་འཁོར་བཅས་ཀྱི་ལས་དང་ཉོན་མོངས་སྒྲིབ་པ་ཀུན་བྱུང་ནས༔ འབྲས་བུ་སངས་རྒྱས་སྐུ་གསུམ་འགྲུབ་པར་ཤོག༔ རྫོགས་སོ༔ བདེར་གཤེགས་ཁྲོ་བོ་དྲུག་བསྟོད་ནི། བཅོམ་ལྡན་བདེར་གཤེགས་ཀུན་བཟང་རིགས་ལྔ་ཡབ༔ གདུག་པ་འདུལ་མཛད་ཁྲག་འཐུང་སྐུ་ལྔར་སྟོན༔ བཟང་མོ་ལ་སོགས་ཀྲོ་ཏི་ཡུམ་དང་སྦྱོར༔ སེམས་དཔའ་ལྕམ་དྲལ་མཐར་བྱེད་ཐུབ་པ་དྲུག༔ དྲེགས་པ་འཛོམས་མཛད་གཏུམ་རྔམས་ཚོགས་དང་བཅས༔ ཞི་ཁྲོ་ཡོངས་རྫོགས་ལྷ་ལ་ཕྱག་འཚལ་བསྟོད༔ འདི་ནས་དཔལ་དགུ་བཀའ་སྲུང་རྣམས་འོག་ཏུ་གབ་སྤྲད་པ་ཕྱག་ལེན་ལྟར་བྲིས་ཡོད་དོ༔ རྣམ་དག་ཡེ་ཤེས་ཐུགས་ཀྱི་དཀྱིལ་འཁོར་ནས༔ འགྲོ་དོན་འདོད་དགུ་བསྒྱུར་བའི་གཙོ་དང་འཁོར༔ ཅིར་ཡང་སྤྲུལ་པ་ཡེ་ཤེས་རིག་པའི་རྩལ༔ རང་ཤར་རང་གྲོལ་བདེ་ཆེན་གཡུང་དྲུང་ལྷ༔ རྣམ་དག་ཆོས་ཀྱི་དབྱིངས་ལ་གཡོ་བ་མེད༔ ཐམས་ཅད་ཆོས་སྐུ་ཡོངས་རྫོགས་བདེ་ཆེན་ལྷ༔ རང་བཞིན་དཀྱིལ་འཁོར་གནས་འདིར་གཤེགས་སུ་གསོལ༔ དམ་ཚིག་
དཀྱིལ་འཁོར་འདི་ལ་བཞུགས་སུ་གསོལ༔ གཉིས་མེད་ངང་དུ་ཕྱག་འཚལ་མཆོད་པ་འབུལ༔ སྨན་གཏོར་རཀྟའི་མཆོད་པ་འདི་བཞེས་ལ༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ སྐུ་གསུང་ཐུགས་ཀྱི་དངོས་གྲུབ་བསྩལ་དུ་གསོལ༔ བསྟོད་བྱང་བསྐུལ་བའོ།། ཧཱུྃ༔ བདེར་གཤེགས་ཞི་བའི་ལྷ་ཚོགས་བཞི་བཅུ་གཉིས༔ ཕུང་ཁམས་སྐྱེ་མཆེད་ཉོན་མོངས་དག་པའི་སྐུ༔ བླ་མེད་མཆོག་གི་མཆོད་པ་འདི་བཞེས་ལ༔ འཁྲུལ་པས་འཁོར་བར་འཁྱམས་པའི་སེམས་ཅན་རྣམས༔ དག་པ་སྐུ་དང་ཡེ་ཤེས་ངང་དུ་ཟློག༔ བྷྱོ། མ་ཏྲཾ་རུ་ཏྲ་ཚོགས་སུ་བསྒྲལ་བའི་དུར་ཁྲོད་ནས༔ བདུད་བཞིའི་མགོ་བོ་བཅད་པའི་གཞལ་ཡས་ནས༔ དུག་ལྔ་སྨན་དུ་བསྒྱུར་བའི་དུར་ཁྲོད་ནས༔ ཉི་ཟླ་འོད་ཟེར་འབར་བའི་ཕོ་བྲང་ནས༔ སྐྱེ་འགྲོ་གདན་དུ་བཏིང་བའི་ཁྲི་སྟེང་ནས༔ བཅོམ་ལྡན་དཔལ་ཆེན་བདེར་གཤེགས་ཞི་བའི་ལྷ༔ སྐུ་མདོག་དཀར་པོ་གངས་ལ་ཉི་ཤར་འདྲ༔ སྐུ་ལས་འོད་ཟེར་དཀར་པོ་འཕྲོ་བ་ཡིས༔ ཤར་ཕྱོགས་དྲི་ཟའི་དམག་དཔུང་དགྲ་ལ་ཟློག༔ གསུང་ལས་འོད་ཟེར་དམར་པོ་འཕྲོ་བ་ཡིས༔ ནུབ་ཕྱོགས་ཀླུ་དབང་དམག་ཚོགས་དགྲ་ལ་ཟློག༔
ཐུགས་ལས་འོད་ཟེར་སྔོན་པོ་འཕྲོ་བ་ཡིས༔ བྱང་ཕྱོགས་གནོད་སྦྱིན་དམག་ཚོགས་དགྲ་ལ་ཟློག༔ ཡོན་ཏན་སྤྲུལ་པའི་འོད་ཟེར་སེར་པོ་ཡིས༔ ལྷོ་ཕྱོགས་གཤིན་རྗེའི་དམག་ཚོགས་དགྲ་ལ་ཟློག༔ ཕྲིན་ལས་སྤྲུལ་པའི་འོད་ཟེར་ལྗང་གུ་ཡིས༔ མཚམས་བཞིའི་དམག་ཚོགས་དགྲ་ལ་བཟློག་ཏུ་གསོལ༔ ཤར་ཕྱོགས་གསང་བའི་དུར་ཁྲོད་ནས༔ མཁའ་འགྲོ་དཀར་མོ་ཞི་བའི་སྐུ༔ མཁའ་འགྲོ་དཀར་མོའི་དམོད་པ་དགྲ་ལ་བཟློག་ཏུ་གསོལ༔ ལྷོ་ཕྱོགས་གསང་བའི་དུར་ཁྲོད་ནས༔ མཁའ་འགྲོ་སེར་མོ་རྒྱས་པའི་སྐུ༔ མ་མོ་སེར་མོའི་དམོད་པ་དགྲ་ལ་བཟློག་ཏུ་གསོལ༔ ནུབ་ཕྱོགས་གསང་བའི་དུར་ཁྲོད་ནས༔ མཁའ་འགྲོ་དམར་མོ་དབང་གི་སྐུ༔ མ་མོ་དམར་མོའི་དམོད་པ་དགྲ་ལ་བཟློག་ཏུ་གསོལ༔ བྱང་ཕྱོགས་གསང་བའི་དུར་ཁྲོད་ནས༔ མཁའ་འགྲོ་སྔོན་མོ་དྲག་མོའི་སྐུ༔ མ་མོ་སྔོན་མོའི་དམོད་པ་དགྲ་ལ་བཟློག་ཏུ་གསོལ༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཨོ་བོ་དྷི་ཙིཏྟ་མ་ཧཱ་སུ་ཀ་ཛྙཱ་ན་དྷརྟ་ཨཱ༔ ཞེས་ཞི་ཟློག་བསྡུས་པ་ཡིན་ལ། དེ་ནས་མཁྱེན་པར་གསོལ་ཞིང་གནད་ནས་བསྐུལ་བ་ནི། ཆང་ཕུད་གཏོར་ཞིང་། ཧཱུཾ་བྷྱོ༔ གདོད་ནས་མ་སྐྱེས་བྱང་ཆུབ་སེམས་ཉིད་
འདི༔ མ་དག་སྐྱེ་བོ་རྣམས་ཀྱིས་མ་རྟོགས་པས༔ སྐྱེས་མཆོག་བདག་གིས་དྲངས་ཤིང་དོན་བགྱི་རུ༔ བདུད་དང་སྲིན་པོས་ཚེ་ལ་བར་གཅོད་ཅིང་༔ བགེགས་དང་འབྱུང་པོས་འདི་ལ་གླག་ལྟ་ན༔ ཀུན་མཁྱེན་མགོན་པོས་འདི་ལ་དཔང་མཛོད་ཅིག༔ མ་ནོངས་ཡེ་ཤེས་ལྷ་ལ་མཁྱེན་དཔང་གསོལ༔ ངེས་པའི་དོན་རྟོགས་འབྲས་བུ་ཆུད་མ་གསན༔ དམ་ཅན་སྲུང་མ་མེད་དམ་ར་མདའ་ཟློག༔ ཧཱུྃ་བྷྱོ༔ ཐོས་བསམ་སྒོམ་དང་ཤེས་རབ་རྣམ་པ་གསུམ༔ ཞི་གནས་ལྷག་མཐོང་སྙོམས་ཤིང་འབྲེལ་པའི་ཚེ༔ ཏིང་འཛིན་གྲོགས་མཆོག་སྐྱེ་བའི་རྒྱུ་ཡིན་ཡང་༔ གནོད་བྱེད་བགེགས་ཀྱིས་བསྒོམ་དུ་མ་སྟེར་རོ༔ ཀུན་མཁྱེན་མགོན་པོས་འདི་ལ་དཔང་མཛོད་ཅིག༔ མ་ནོངས་ཡེ་ཤེས་ལྷ་ལ་མཁྱེན་དཔང་གསོལ་ངེས་པའི་དོན་རྟོགས་འབྲས་བུ་ཆུད་མ་གསན༔ དམ་ཅན་སྲུང་མ་མེད་དམ་ར་མདའ་ཟློག༔ ཧཱུཾ་བྷྱོ༔ འཇིག་རྟེན་ཁམས་འདིར་འདུས་བྱས་ཟས་དང་ནོར༔ འཕགས་པ་མཆོད་དང་འགྲོ་དོན་བགྱིད་དགོངས་ཀྱང་༔ དམ་ཉམས་དགྲ་བོས་བགྱིད་དུ་མ་སྟེར་རོ༔ ཀུན་མཁྱེན་མགོན་པོས་འདི་ལ་དཔང་མཛོད་ཅིག༔ མ་ནོངས་ཡེ་ཤེས་ལྷ་ལ་མཁྱེན་དཔང་
གསོལ༔ ངེས་པའི་དོན་རྟོགས་འབྲས་བུ་ཆུད་མ་གསན༔ དམ་ཅན་སྲུང་མ་མེད་དམ་ར་མདའ་ཟློག༔ ཧཱུཾ་བྷྱོ༔ བདག་ནི་ཟོར་མེད་ངེས་པའི་རྣལ་འབྱོར་པ༔ བླ་མེད་བྱང་ཆུབ་འགྲོ་བའི་དོན་བགྱིད་པར༔ སེམས་ཀྱིས་ཐག་བཅད་སྐྱེས་བུ་བདག་ལྟ་བུས༔ བཤགས་ཀྱང་མི་ཚང་སྨྲས་ཀྱང་མི་དགོངས་ན༔ བྱམས་མགོན་ཐུགས་རྗེ་ཆུང་བར་མི་འགྱུར་རམ༔ བཅོལ་ཡང་མི་མཛད་བསྐུལ་ཡང་མི་གསན་ན༔ སྔོན་གྱི་དམ་བཅའ་འགལ་བར་མི་འགྱུར་རོ༔ ཐུགས་དམ་གནད་ནས་བསྐུལ་ལོ་ཕྲིན་ལས་མཛོད༔ ཐུགས་ཉིད་ཞི་བའི་ངང་ལས་མ་གཡོས་ཀྱང་༔ གཟུགས་སྐུ་འཇིགས་པའི་ཆ་ལུགས་རྫོགས་མཛད་ནས༔ བསྟན་པའི་རུ་ཏྲ་དགྲ་བགེགས་རྣམ་གཉིས་པོ༔ མངོན་སྤྱོད་ཚུལ་གྱིས་མྱུར་བསྒྲལ་ཕྲིན་ལས་མཛོད༔ ཅེས་ཕུད་གཏོར་རོ། །འདི་ཡན་ལ་གབ་སྤྲད་རྒྱུ་མེད་དོ། ༈ འདི་ཡན་ཚར་གཅིག་ཡིན། འདི་མན་ཆད་གབ་སྤྲོད་དོ༔ མི་མངོན་དབྱིངས་བསྐུལ་དང་གཅིག༔ ཕོ་ཉ་སྒོས་བསྐུལ་དང་གཉིས༔ འགུགས་ལས་དང་གསུམ༔ ཕུར་སྐོར་དང་བཞི༔ ཉེས་པ་སྒོ་བསྒྲགས་དང་ལྔ༔ ཉ་བོ་བསྒྲལ་བ་དང་དྲུག༔ ཕུར་ཐུན་ཚོམ་བསྐུལ་དང་བདུན༔ ཐུན་དྲུག་དང་བརྒྱད༔ དམར་སྒྲེང་བ་དང་དགུ༔ བསྟབ་པ་དང་བཅུ༔
དེ་ནས་ཟློག་གཞུང་གཉིས་གང་འདོད་དང་བཅུ་གཅིག༔ ཁྲམ་ཟློག་དང་བཅུ་གཉིས༔ གཏོར་ཆུང་འབུལ་བ་དང་བཅུ་གསུམ༔ དྲུག་བསྟོད་དང་བཅུ་བཞི༔ བྷྱོས་གདབ་པ་དང་བཅོ་ལྔ༔ བཅོལ་གཏད་དང་བཅུ་དྲུག༔ བདེན་སྟོབས་ཐན་ཟློག་དང་བཅུ་བདུན༔ དེ་ལྟར་སྣ་ཁ་བཅུ་བདུན་པོ་གབ་སྤྲད་དཔལ་དགུ་བཀའ་སྲུང་དང་བཅུ་ལ་འགྲེས་བཤང་ངོ་༔ དེ་ནས་ཁྱུང་བསྐྱེད་སྤྱན་འདྲེན༔ ཁཱ་ཧི་དུས་ཉ་བོ་གཏོར་ཆུང་འབུལ༔ དེ་ནས་གཏེར་གོང་འོག་གི་ཁྱུང་ཟློག་གཉིས་གང་རེད་འདོན༔ དེ་ལ་ཐན་ཟློག་བསྡུས་པ་སྦྱར༔ དེ་ནས་ཟློག་བྱུང་སོགས་ཁ་བཀང་དེ་འདོན༔ དེ་ནས་ཟློག་པའི་སྔགས་བྱང་ཆེན་མོ༔ ཚོགས་ལ་རོལ༔ ལྷག་མ་འབུལ༔ རྩང་གྱེར་འདོན༔ དེ་ལྟར་ཉིན་རེ་ཚར་རེ་འདོན༔ ནུབ་ལས་བྱང་ཚར་གཅིག་བཏང་༔ ཚོགས་ཐོན་ན་ལེགས༔ བསྐང་བ་ཉུང་བ༔ ཟློག་གཞུང་ཤིན་ཏུ་བསྡུས་པ་བདག་གིས་བྱས་པ་དེའི་མདུན་བསྐྱེད་ནས་འབུལ་བའི་མཚམས་བར་འདོན༔ ལྷག་མ་དང་། དཀར་གཏོར། བཀའ་བརྒྱད་ཆད་མདོ་རྣམས་བྱའོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།