ལས་ཀྱི་གཤིན་རྗེ་ཁྲོ་ཆུ་དུག་གདོང་གདུག་པ་ཀུན་སྒྲོལ་གྱི་དོན་གསལ་བར་བྱེད་པ་ལས་རབ་རྒྱ་མཚོ།
ལས་ཀྱི་གཤིན་རྗེ་ཁྲོ་ཆུ་དུག་གདོང་གདུག་པ་ཀུན་སྒྲོལ་གྱི་དོན་གསལ་བར་བྱེད་པ་ལས་རབ་རྒྱ་མཚོ་ཞེས་བྱ་བ་བཞུགས་སོ།།
ལོ་ཀི་ཤྭ་ར་ཡ། ན་མོ་མཉྫ་ཤི་ཡ། བཅོམ་ལྡན་འཇམ་དཔལ་དབྱངས་ཡི་དམ་ཆོས་སྐྱོང་དབྱེར་མེད་དུ་སྒྲུབ་པའི་ཐབས་གདུག་པ་ཀུན་སྒྲོལ་གྱི་དོན་གསལ་བར་བྱེད་པ་ལས་རབ་རྒྱ་མཚོ་ཞེས་བྱ་བ། བླ་མ་དང་ལྷག་པའི་ལྷ་ལ་ཕྱག་འཚལ་ལོ། །ཆོས་ཀྱི་རྩ་བ་འཁོར་བར་ངེས་འབྱུང་དང་། །ཐར་པ་དོན་གཉེར་ལས་འབྲས་ཡིད་ཆེས་དང་། །བྱམས་དང་སྙིང་རྗེ་བྱང་ཆུབ་སེམས་མཆོག་དང་། །རྒྱུད་ལ་གང་སྐྱེས་གཤིན་རྗེ་ཉིད་དེ་རྒྱལ་། །བླ་མ་གཙུག་ཏུ་ཁུར་ཞིང་ལེགས་པར་མཆོད། །དྲི་མེད་དབང་མནོས་དམ་ཚིག་སྲོག་ལྟར་བསྲུང་། །གཡོ་མེད་སེམས་ཀྱི་བསྙེན་སྒྲུབ་མཐར་
ཕྱིན་པ། །བསྟན་པའི་སྲོག་ཤིང་བསྟན་སྲུང་གཤིན་རྗེའི་རྒྱལ། །བདག་དང་ཆོས་ལ་བརྟག་ཅིང་དཔྱད་པའི་ཚེ། །བསྐྱེད་བྱ་སྐྱེད་བྱེད་དོན་ལ་གཏན་མ་གྲུབ། །ཐ་སྙད་སྒྱུ་མའི་རོལ་པ་དཔག་ཏུ་མེད། །སྣང་སྟོང་འཇོག་ཚེ་ཤེས་པ་གཤིན་རྗེའི་རྒྱལ། །ཞི་གནས་མེད་ན་ལྷག་མཐོང་མི་རྟོགས་ཤིང་། །ལྷག་མཐོང་མེད་ན་ཉོན་མོངས་མི་སྤོང་ངོ་། །ཟུང་དུ་འཇུག་ཕྱིར་ཐོག་མར་ལོག་པ་ཡི། །གཡེང་བ་ཞི་བྱེད་གཤིན་རྗེའི་གཤེད་པོའི་རྒྱལ། །དེས་ན་སོ་སོར་རྟོགསཔས་རབ་བརྟགས་པས། །བདག་མེད་གཉིས་ཀྱི་རྣམ་པར་བཤད་པ་ན། །དྲན་པ་རྒྱང་སོ་ཟུང་འབྲེལ་ལེགས་གོམས་
པས། །མཉམ་བཞག་མི་རྟོག་ཡེ་ཤེས་གཤིན་རྗེའི་རྒྱལ། །རྗེས་ཐོབ་དུས་ཀྱང་ལྟ་བ་དེས་དྲངས་པའི། །བློ་ཡི་རྒྱུན་གྱི་ཕྱི་ནང་དངོས་པོ་ཀུན། །ཆུ་ཟླ་ལྟར་དུ་རང་བཞིན་མེད་ཤེས་པའི། །དག་པའི་འཇིག་རྟེན་ཡེ་ཤེས་གཤིན་རྗེ་རྒྱལ། །མཉམ་བཞག་ནམ་མཁའ་ལྟ་བུའི་སྟོང་པ་ལ། །རྗེས་ཐོབ་སྒྱུ་མ་ལྟ་བུའི་རྟེན་འབྲེལ་ཞིག །བམ་་་་་་སྲིད་དབྱེར་མེད་རོ་གཅིག་པས། །མཐར་ཐུག་རྒྱལ་བའི་དགོངས་པ་གཤིན་རྗེའི་རྒྱལ། །མདོར་ན་གང་ཤར་སྣང་བོ་ཐམས་ཅད་ཀུན། །ཐད་ཀ་ཐད་ཀར་གཅོད་པའི་རྣལ་འབྱོར་པས། །འཕྲད་ལེགས་རང་གྲོལ་ཤེས་པ་ལེགས་པར་སྐྱོངས། །བཅིང་གྲོལ་རེ་དོགས་བྲལ་བ་གཤིན་རྗེའི་རྒྱལ། །ཉོན་མོངས་སྡུག་བསྔལ་བྱད་གདོན་བར་ཆད་རྣམས། །རྣམ་པར་གྲོལ་བ་རྒྱལ་བ་ལས་ལྷག་གསུངས་། །སེམས་དང་བདུད་གཉིས་དབྱེར་མེད་རོ་གཅིག་པས། །ལམ་གྱི་གྲོགས་དང་སོ་སོར་ཤེས་པ་རྒྱལ། །འོན་ཀྱང་དེ་ཡི་ནང་ནས་རྒྱལ་བ་ཡི། །སྔགས་ཀྱི་ཁྱད་ཆོས་ཐབས་ལམ་བོགས་འདོན་ལོ། །བསམ་གྱིས་མི་ཁྱབ་སྐབས་འདིར་སྤྱི་དགོས་ཀྱི། །རུ་ཏྲ་འཇོམས་པའི་རྒྱལ་པོ་གཤིན་རྗེ་ཡི། །གདམས་པ་དུ་མ་འཐོར་འདི་བསྟན་པ་དང་། །སེམས་ཅན་
དོན་དུ་རྣམ་གྲངས་གོ་རིམ་རྣམས། །བླ་མའི་དྲིན་གྱིས་རྩ་བ་ཐོ་རུ་བསྡེབས། །དམ་ཅན་རྒྱ་མཚོས་བཟོད་གསོལ་གནང་བར་མཛོད། །དེ་ཡང་འཇམ་དཔལ་གཤིན་རྗེའི་བཤད་པ་འཐོར་བུ་རྣམས་རྩ་བ་ཐོ་རུ་བསྡེབས་པ་ལས་རབ་རྒྱ་མཚོ་ཞེས་བྱ་བ་འདི་ལ་དོན་རྣམ་པ་གསུམ་སྟེ། གདམས་པ་གང་ནས་བྱུང་བའི་ལོ་རྒྱུས་བསྟན་པ་དང་། །དེ་ལྟ་བུའི་གདམས་པ་དེ་ཉིད་ཀྱི་ཆེ་བའི་ཡོན་ཏན་བསྟན་པ་དང་། ཡོན་ཏན་གྱི་གདམས་པ་འདི་ཇི་ལྟར་ལེན་པའི་ཚུལ་བསྟན་པའོ། དང་པོ་ནི། ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཀྱིས། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་པ་མདོ་རུ་བསྡུ་ན་ཐེག་པ་རིམ་པ་དགུར་འདུས་སོ། ༈ །དེ་ཡང་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའི་ཐེག་པ་སྟེ། ཐེག་པ་ཐུན་མོང་བ་གསུམ། ཐུན་མོང་མ་ཡིན་པ་སྔགས་ཀྱི་ཐེག་པ་ལ། ཀྲི་ཡ། ཨུ་པ། ཡོ་ག་སྟེ། རྒྱུད་སྡེ་འོག་མ་གསུམ། བླ་མེད་ལ་བསྐྱེད་པ་མ་ཧཱ་ཡོ་ག་ལུང་ཨ་ནུ་ཡོ་ག༔ རྫོགས་པ་ཆེན་པོ་ཨ་ཏི་ཡོ་ག་སྟེ། ཐེག་པ་རིམ་པ་དགུ་ཞེས་གསུངས། ༈ དམ་པ་ལས། ཐེག་པ་གོང་གི་དབང་དུ་ཡིན་པས། དགུ་ཞེས་པ་མི་རིགས་པར་གསུང་
འདུག་ཀྱང་། ཐེག་པ་དགུ་ཞེས་པ་འདི་ནི། ཐེག་ཆེན་ལ་ཐུན་མོང་དང་། ཐུན་མོང་མ་ཡིན་པ་གཉིས་སུ་ཕྱེ་ན། རྒྱུད་སྡེའི་རིགས་ལ་ཐ་སྙད་བཏགས་པ་ཡིན་པས། དོན་ལ་ཐེག་པ་ཆེ་འབྲིང་ཆུང་གསུམ་ལས་མི་གདའ་ཞིང་། འགལ་བ་མེད་པའི་རྒྱུད་ལུང་རིགས་དང་བཅས་པ། རྗེ་བཙུན་དམ་པ་ཨུ་རྒྱན་གཉིས་པས་གསུངས་སོ།། ༈ དེ་ཡང་བཤད་བྱའི་ཆོས་གཤིན་རྗེའི་གདམས་པ་འདི་ནི་ཤེས་པ་རྣམ་པ་བཅུའི་སྒོ་ནས་འཆད་པ་ལ། དང་པོ་ཁུངས་ཤེས་པ་ནི། གདམས་པ་འདི་ནི་བསྐྱེདཔ་མ་ཧཱ་ཡོ་གར་གཏོགས་ཤིང་། རྒྱུད་ནི་གཤིན་རྗེ་ཟླ་གསང་ནག་པོའི་རྒྱུད་ནས་བཏུས་སོ། །དེ་ཡང་མུ་སྟེགས་ཐམས་ཅད་ཕྲིན་ལས་བཞིའི་སྒོ་ནས་འདུལ་བའི་ཆེད་གཙོ་བོར་རྟོན་པ་མུ་སྟེགས་ཟླ་གསང་ནག་པོ་ཞེས་ཀྱང་ཟེར་རོ།། གཉིས་པ་རིགས་ཞེས་པ་ནི་འཇམ་དཔལ་རིགས་ཡིན་ནོ།། གསུམ་པ་མཚན་ཞེས་པ་ནི་གཤིན་རྗེ་སྐུ་ཡི་རིགས། འཆི་བདག་གསུང་གི་རིགས། ཚེ་བདག་ཐུགས་ཀྱི་རིགས། སྲོག་བདག་གཤིན་རྗེ་རིགས་སུ་འདུས་པའི་བདག་ཉིད་ཡིན་པས། མཚན་ཡང་གཤིན་རྗེ་ཁྲོ་ཆུ་དུག་གདོང་ཞེས་གསོལ། གཞན་ཡང་མུ་སྟེགས་སྲོག་གི་སྤུ་གྲི་ནག་པོ་བྱད་མ་འབུམ་གྱི་སྲོག་གཅོད།
ལས་ཀྱི་མཐའ་སྡུད་སྤྱི་གཤེད་ནག་པོ། ཞེས་མཚན་གྱི་རྣམ་གྲངས་མང་དུ་སྣང་ངོ་། །བཞི་པ་འཁོར་ཞེས་པ་ནི་སྐུ་གསུང་ཐུགས་ཡོན་ཏན་ཕྲིན་ལས་གཤིན་རྗེ་ཐམས་ཅད་གཉིས་མེད་ཀྱི་སྤྲུལ་པ་སོགས་གཤིན་རྗེ་ཐམས་ཅད་རྩ་བའི་འཁོར། གཞན་ཡང་འཇིག་རྟེན་དང་འཇིག་རྟེན་ལས་འདས་པའི་ཆོས་སྐྱོང་དྲེགས་པའི་ཕྱི་ཐམས་ཅད་འཁོར་གྱི་ཚུལ་དུ་བཀའ་ཉན་གསུང་སྡོད་ཕྲིན་ལས་སྒྲུབ་པར་བྱེད་པ་ནི་འདི་ཡི་དམ་ཚིག་དང་ལས་ཀྱི་ཆེ་བ་ཡིན་ནོ།། ལྔ་པ་ལས་ཞེས་པ་ནི་བན་བོན་མུ་སྟེགས་ཕྱི་ནང་གསང་གསུམ་གྱི་བྱད་མ་འབུམ་ཡིན་ཀྱང་། སྐད་ཅིག་ཙམ་ཡང་བརླགས་པར། སངས་རྒྱས་སྟོང་རྩ་གཉིས་ཀྱི་སྤྱན་སྔར་ཁས་བླངས་དམ་བཅས་སྲོག་གི་སྙིང་པོ་ཕུལ་བ་ཡིན་ནོ།། དྲུག་པ་བསྐུལ་ཞེས་པ་ནི་དུས་རྒྱུན་དུ་དམ་རྫས་འཚོགས་པ་དང་འཕྲིན་ལས་གནད་ཀྱི་བསྐུལ་པ་བྱས་པས། ཁོ་རང་གི་སྔོན་གྱི་སྨོན་ལམ་གྱི་དབང་གིས་འཇིག་རྟེན་དང་འཇིག་རྟེན་ལས་འདས་པའི་ལྷ་འདྲེ་ཐམས་ཅད་སྔོན་གྱི་དམ་ཚིག་གཉན་པོ་དྲན་ནས། རང་དབང་མེད་པར་འདུས་ནས་ལས་བྱེད་པ་ཡིན་ནོ།། བདུན་པ་མཛད་པ་ཞེས་པ་ནི་སློབ་དཔོན་འཇམ་དཔལ་བཤེས་གཉེན། ཨུ་རྒྱན་གྱི་རྒྱལ་པོ་
པདྨ་འབྱུང་གནས། གུ་རུ་ཁྲག་འཐུང་ནག་པོ་རྣམས་ཀྱི་རྒྱུད་བཤད་པའི་ཚུལ་གྱིས་བལ་པོ་བཱ་སུ་དྷ་ར་ལ་གནང་ངོ་། །སློབ་དཔོན་ཆེན་པོ་དེས་གཤིན་རྗེ་ཟླ་གསང་ནག་པོའི་རྒྱུད་ནས་ཕྱུངས་ཏེ་ལྕགས་ཀྱི་པར་བུ་ནག་པོར་བཅུག་སྟེ་རྒྱ་རིམ་པ་བདུན་གྱིས་བཏབ་སྟེ་བལ་ཡུལ་བུམ་ཐང་དུ་གཏེར་དུ་སྦས་སོ། །ལ་ལར་ཀ་ཞུ་དམར་པོར་སྦས་ཟེར་བ་སྣང་ཞིང་། ལ་ལར་བསེ་སྒྲོམ་སྨུག་པོར་བཅུག་ཟེར་བ་སྣང་ངོ་། །མུ་སྟེགས་སྟོན་པ་བདག་ཉིད་ཀྱི། །ལས་ཀྱི་གཤིན་རྗེའི་ངན་སྔགས་འདི། །གཤིན་རྗེ་ནག་པོའི་རྒྱུད་ནས་བཏུས། །ལྕགས་ཀྱི་པར་བུར་བཅུག་ནས་ནི། །བལ་ཡུལ་བུམ་ཐང་གཏེར་དུ་སྦས། །ཕྱི་རབས་དུས་ཀྱི་ཐ་མ་ལ། །ལས་ཅན་གཅིག་དང་འཕྲད་པར་ཤོག །ལས་ཅན་གཅིག་གིས་ཐོན་ནས་ཀྱང་། །གདུག་པའི་དགྲ་བགེགས་སྒྲོལ་བར་ཤོག །ཅེས་གསུངས་སོ། །དེ་ལྟར་གཞུང་ཡིག་རྣམས་བལ་ཡུལ་གྱི་གཏེར་མ་ཡིན་ཀྱང་། དེ་ལས་གཞན་པའི་ཤོག་དྲིལ་མོན་བུམ་ཐང་གི་ཀ་ཞུར་བསེ་སྒྲོམ་དུ་བཅུག་ནས་སྦས་པ་ཡིན་ཅིང་གྲགས་པས། ཆོས་རྒྱུས་མེད་པ་ལ་ལ་དག་གིས་ཤོག་དྲིལ་རྣམས་ཚེ་བདག་སོགས་ཀྱི་ཡིན་པས་མ་དག་པར་སྨྲ་འདུག་སྟེ། འོ་ན་འདི་ཡི་གཞུང་རྣམས་ཀྱང་དེ་
དག་ལས་བྱུང་བས་མ་དག་པར་འདོད་དགོས་ཏེ་མི་ནུས་སོ། །དེས་ན་སྙིང་འབྱིན་སོགས་ཀྱི་ཤོག་དྲིལ་རྣམས་ཐུན་མོང་མ་ཡིན་པས་ཇི་ལྟར་བྱས་ཀྱང་རུང་བའི་རྒྱུ་མཚན་ཤེས་པ་གནད་ཡིན་ནོ། །དེ་ཡང་སློབ་དཔོན་ཆེན་པོ་འདི་ལ་མུ་སྟེགས་སྟོན་པ་ཞེས་པས། ངན་སྔགས་ཀྱི་སྒོ་ནས་མུ་སྟེགས་པ་དཔག་ཏུ་མེད་པ་བརླགས་པས། དེ་སྐད་མཚན་ལ་ཐོགས་པ་ཡིན་ཏེ། རྒྱུད་ལའང་མུ་སྟེགས་ཟླ་གསང་ནག་པོའི་རྒྱུད་ཅེས་བྱ་བ་འདྲ་བར་འདུག་གོ། བརྒྱད་པ་དོན་ཆེད་ཤེས་པ་ནི། ཕྱི་རབས་ཀྱི་རྣལ་འབྱོར་པས་སྤྱི་དགོས་ཀྱི་རུ་ཏྲ་འདུལ་བ་དང་། བནྡེ་ཁས་ཉེན་དབང་ཆུང་ལ་དགྲ་དར་བ་དེ་དག་འདུལ་བ་དང་། ཕྱི་ནང་བན་བོན་ནག་པོ་མཐུ་ཅན་མུ་སྟེགས་ཤན་པ་བྱད་མ་ཐམས་ཅད་འདུལ་བའི་ཆེད་དུ་མཛད་དོ།། དགུ་པ་གཏེར་སྟོན་ཤེས་པ་ནི། རྒྱ་ཞང་ཁྲོམ་ཞེས་བྱ་བ་གཤིན་རྗེ་དངོས་སུ་གྲུབ་པའི་རྣལ་འབྱོར་པ་གཅིག་བྱོན་པ་དེས་གཏེར་སྟོན་གྲགས་པ་ཆེན་པོ་ཐོན་ནོ། །གདམས་པ་ཆེ་བ་སྟོན་པའི་ཕྱིར་། གཏོར་མ་བསྐུལ་པ་བྱས་པ་ཙམ་གྱིས་བལ་ཡུལ་དང་གཙང་སྟོད་བར་གྱི་བྱེད་མ་བན་བོན་ལྔ་བཅུ་ཞག་བདུན་ནས་ཕྱི་རྟགས་ཐོན་ངེས་པར་བསྒྲལ་ལོ། །དེ་ལྟར་བྱས་པས་ནུས་པ་
དང་ཡོན་ཏན་ཆེ་བའི་གྲགས་པ་ཆེན་པོས་ས་སྟེང་ཁྱབ་པར་གྱུར་ཏོ།། བཅུ་པ་བརྒྱུད་པ་ཤེས་པ་ནི། དེ་ལྟ་བུའི་ཡོན་ཏན་ཕུན་སུམ་ཚོགས་པའི་རྒྱ་ཞང་ཁྲོམ་བྱ་བ་དེ་ལ། གནུབས་སྟོན་དར་བ་དབང་གིས་འབྲི་སུམ་ཅུ་སོ་གསུམ་གྱིས་ཉོས་པའི་རྟ་འབྲུག་གཤོག་བྱ་བ་གཅིག་དང་། གསེར་སྲང་གང་། སྦྱང་ཐུལ་གཅིག་ཕུལ་ནས་ཞུས། གཅིག་བརྒྱུད་བྱེད་པའི་བཀའ་རྒྱས་གདམས། ཞག་བདུན་བསྒྲུབས་པས་བསྟན་དགྲ་སུམ་ཅུ་ལ་ཕྱི་རྟགས་ཐོན་པར་བྱས་པ་ལ། ནུས་པ་དང་གྲགས་པ་ཆེན་པོ་བྱུང་ངོ་། །དེ་ལ་ཡ་བ་ཤཱཀྱ་རྡོ་རྗེས་ནང་ནོར་གཡུ་འོད་འབར་བྱ་བ་གཅིག་དང་། གསེར་སྲང་གང་ཕུལ་ནས་ཞུས་སོ། །གཅིག་བརྒྱུད་ཀྱི་བཀའ་རྒྱས་གདམས། ཞག་བདུན་བསྒྲུབས་པས་མཐུ་དང་ནུས་པས། བསྟན་དགྲ་སུམ་ཅུ་ཙམ་ཞག་བཞི་བཅུ་ནས་ཕྱི་རྟགས་ཐོན་ནོ། །དེ་ལ་ཨ་གྲགས་ཀྱིས་མཉེས་པའི་འབུལ་བ་བྱས་ནས་ཞུས་ཏེ། ཞག་བདུན་བསྒྲུབས་པས་ཕོ་ངོ་སུམ་ཅུ་ཙམ་ལ་ཕྱི་རྟགས་ཐོན་ནོ། །དེ་ལ་ཨ་དབང་གིས་འབུལ་བ་མང་དུ་བྱས་ནས་ཞུས། བསྒྲུབས་པས་མཐུ་དང་ནུས་པ་ཆེ་བའི་གྲགས་པ་ཆེན་པོ་ཐོན་ནོ། །དེ་ནས་བླ་མ་དམ་པའི་བར་ནུས་མཐུ་ཆེན་པོ་དང་ལྡན་བཞིན་དུ་བརྒྱུད་
དོ། །གཞན་ཡང་སློབ་དཔོན་ཆེན་པོ་བཱ་སུ་དྷ་རས་གནུབས་སྟོན་ཆེན་པོ་སངས་རྒྱས་ཡེ་ཤེས་ལ་གནང་ཞིང་། དེ་ནས་གཡུང་སྟོན་རྒྱལ་བའི་རྡོ་རྗེ་ལ་སོགས་པ་ལའང་བརྒྱུད་ཚུལ་སོགས་མང་དུ་ཡོད་པར་སྣང་ངོ་། །བདག་གིས་ནི་རྗེ་བཙུན་ཆེན་པོ་སྔགས་འཆང་དམ་པ་སྟག་ཞིག་བཞད་པའི་རྡོ་རྗེ་ལ་གཞུང་དང་ཡིག་སྣ་མན་ངག་ཞིབ་མོ་མང་ཞིག་དང་བཅས་པ་བརྡ་ལེགས་པར་འཕྲོད་པར་ཞུས་སོ། །གཞན་ཡང་འདི་ལ་མཁོས་པར་བྱེད་པའི་བསོད་སྙོམས་པ་གཉིས་ལ་སོ་སོར་སྲུང་ཟློག་བསད་མནན་གང་ལའང་མན་ངག་ཁྱད་པར་ཅན་མང་ཞིག་ཞུས་ཤིང་། བདག་གིས་སྲུང་ཟློག་སོགས་ལ་ཡིད་ཆེས་པའི་གདིང་ཅུང་ཟད་དང་ལྡན་པར་བྱས་ཤིང་སྲོག་ལྟར་བཅང་བ་ཡིན་ནོ།། དང་པོ་དེ་ལྟར་བླ་མ་དམ་པ་གོང་མ་རྣམས་ཀྱིས་སློབ་མ་ལ་མན་ངག་ཆ་ཚང་ཟུར་ཙམ་རེ་ལས་མ་གནང་བ་ལ་བརྟེན་ནས་ཐར་ཐོར་དུ་སོང་འདུག་པ་ལ་རྗེས་སུ་ཡང་འདི་ལྟར་གྱུར་ན་ཤིན་ཏུ་འཕང་བར་མཐོང་ཞིང་། རྣལ་འབྱོར་དམ་ཚིག་དང་ལྡན་པའི་བསྟན་སྲུང་དམ་པར་བསམ་སྟེ། དཔེའུ་རིས་རྟགས་དང་བཅས་པ་རྣམས་མན་ངག་ཟིན་བྲིས་སུ་བྱས་ཤིང་། གཞན་རྣམས་ནི་སྔར་འདུག་པ་ལྟར་དུ་མན་ངག་གི་གོ་རིམ་གཞན་དུ་
རྩ་བ་ཐོ་རུ་བསྡེབས་ཤིང་གདམས་པ་རྣམས་ཕྱོགས་བསྡུས་སུ་བྲིས་པ་ཡིན་པས་ཡིད་ཆེས་པའི་ཁུངས་སུ་ཡོད་དོ།། གཉིས་པ་དེ་ལྟར་བྱུང་བའི་གདམས་པ་དེ་ཉིད་ཀྱི་ཆེ་བའི་ཡོན་ཏན་བསྟན་པ་ནི། མཚན་གྱི་རྣམ་གྲངས་དུ་མ་དང་ལྡན་པའི་འཇམ་དཔལ་གཤིན་རྗེ་འདི་འགྲན་གྱི་དོ་ཟླ་མེད་པ་ཡིན་ཏེ། དེ་ཡང་འདི་ལ་གཤེད་དང་གཉན་པོ་བྱ་བ་གཏན་ནས་མི་སྲིད་པས། བྱད་མ་ལྷ་སྲུང་ཐམས་ཅད་རང་གནད་ལ་འབེབས་པར་འགྱུར་ཞིང་རང་མཐུ་རང་ལ་འབེབས་པར་བྱ་བའི་ཡོན་ཏན་དང་། ཕྱི་ནང་གསང་གསུམ་མ་གཤིན་ཕུར་གསུམ་བན་བོན་མུ་སྟེགས་ལྷ་སྲིན་སྡེ་བརྒྱད་ཐམས་ཅད་ཀྱི་གཤེད་དང་གཉེན་པོ་ཡིན་པས། སྲོག་ཆགས་ཕྲ་མོ་རྣམས་ལ་ཆུ་སྲིན་གདུག་པ་ཁ་གདངས་བ་འདྲ་བ་དང་། ཁྱད་པར་དུ་མུ་སྟེགས་ཀྱི་རྫས་མཐུ་ནག་པོ་ལ་ནི་ཡེ་ཤེས་དང་འཇིག་རྟེན་གང་གིས་ཀྱང་ལྟ་བར་མི་བཟོད་ན་འདི་ལ་གནོད་པ་མེད་ཅིང་གྲོགས་སུ་འགྲོ་བ་དང་། བྱད་མ་ཕ་རོལ་པོ་ནུས་པ་ཆེ་ཞིང་སྲུང་ཟློག་ཇི་ལྟར་མང་བཞིན་དུ་ལྷག་པར་ཡང་ཕར་ལ་ཟློག་བསད་ཀྱི་ལས་མྱུར་བ་དང་། ཐང་གཅིག་བསྒྲུབས་ནས་ཕྱིས་སྒྲུབ་མི་དགོས་ཤིང་བསྙེན་པ་ཁ་གསོ་བ་ཙམ་དང་། གཏོར་མ་བསྐུལ་པ་བྱས་ནས་ཁྲོས་ནས་མཐུ་བ་བརྡབ་
པ་ཙམ་གྱིས་དགྲ་བོ་སྐད་ཅིག་ཉིད་ལ་བསྒྲལ་བ་དང་། ལོག་རྡུགས་འབྱམ་གསུམ་བྱ་བ་མི་སྲིད་ཅིང་བསྲུང་བའི་གནད་ཐམས་ཅད་ཤེས་ཤིང་། དྲན་པ་ཙམ་གྱིས་ཀྱང་ལྷ་འདྲེ་ཐམས་ཅད་མདུན་དུ་རང་ཤུགས་ཀྱིས་བྲན་དང་ཕོ་ཉར་གྱུར་པ་དང་། སྐུལ་པ་བྱེད་པའི་ཚེ་ཡང་ལྷ་འདྲེ་ཐམས་ཅད་དམ་ཚིག་དབང་གིས་འདུ་ཞིང་བཀའ་ཉན་ལས་བྱེད་པར་འགྱུར་བ་དང་། ཁྱད་པར་མཆོག་ཏུ་གྱུར་པའི་ཆེ་བ་འབོད་རྦད་བསད་གསུམ་སོགས་ཀྱི་ལས་མི་དགོས་པར། ལས་སྦྱོར་གང་བྱེད་དེ་ཉིད་ལ་ལྕོག་ཟླུམ་ལ་རལ་གྲི་ཕྱུང་རྒྱག་ལྟར་བསྒྲུབས་པས་ཆོག་པ་དང་། རླུང་སྒྲུབ་བམ་རྫུ་འཕྲུལ་གྱིས་སྒྲུབ་པ་ཡིན་པས། སྤུ་གྲི་བཀའ་མ་ལྟར་མྱུར་བ་ལ་སོགས་ཡོན་ཏན་གྱི་ཚོགས་དཔག་ཏུ་མེད་པར་གསུངས་སོ། གསུམ་པ་ལ་གསུམ་དུག་དབང་ཇི་ལྟར་བསྐུར་ཚུལ་དང་། དམ་ཚིག་ཇི་ལྟར་བསྲུང་ཚུལ་དང་། སྒྲུབ་པའི་ཐབས་ཉིད་དོ།། དང་པོ་ནི་སྐལ་པ་དང་ལྡན་པའི་རྣལ་འབྱོར་པས། ཐོག་མར་གཤིན་རྗེ་ཚེ་བདག་སོགས་ཀྱི་དབང་རྣམ་དག་ཐོབ་ཅིང་བླ་མ་གཙུག་གི་ནོར་བུ་ལྟར་བཀུར་ཞིང་། གཏོར་མ་བཟང་ཞིང་རྒྱ་ཆེ་བ་དང་འབུལ་བ་ལ་སོགས་པས་བླ་མ་མཉེས་ཤིང་གཏིང་དུ་ཡང་མཉེས་པ་ཁོ་ན་
སྒྲུབ་པ་དང་། དམ་ཚིག་སྲུང་བར་བྱེད་པའི་སློབ་མ་རྣམས་དུག་དབང་གི་ཆ་ནས་བཤད་པ་ལྟར་དུག་དབང་བསྐུར་བར་བྱའོ།། གཉིས་པ་ནི་སྤྱིར་གསང་སྔགས་ཀྱི་དམ་ཚིག་སྲུང་བར་བྱེད་པའི་སློབ་མ་རྣམས་ལ་དུག་དབང་གི་ཆོ་ག་ནས་བཤད་པ་ལྟར་གྱི་དུག་དབང་བསྐུར་བར་བྱའོ།། གསུམ་པ་ནི་སྤྱིར་གསང་སྔགས་ཀྱི་དམ་ཚིག་བསྲུང་བས་འཐུས་ཤིང་། ཁྱད་པར་གྱི་དམ་ཚིག་ལ། ཞུ་དུས་བླ་མ་ལ་དད་གུས་བྱ། གཏོར་ཚོགས་དང་འབུལ་བ་བཟང་བར་བྱ། རྟེན་རྫས་བཅའ་ཐབས་སུ་བཤད་པ་ལྟར་ཚོགས་པར་བྱ། སྒྲུབ་དུས་ཁྱི་དང་བུད་མེད་ཀྱིས་མ་མཐོང་བར་བྱ། ཁྱིམ་པ་ཡིན་ན་སྒྲུབ་དུས་བུད་མེད་སྤྱི། ཁྱད་པར་ཡུགས་ས་མོ་མི་འབག༔ དགྲ་དང་མནའ་མི་བྱ། དགྲའི་ཟ་འཕྲོ་མི་ཟ། རང་གི་གོས་དྲི་མ་ཅན་དགྲ་ལ་མི་བཀོན་། སྤྱིར་གཏོར་མ་དང་ཁྱད་པར་དགུ་གཏོར་བསྐུལ་པ་དང་བཅས་པ་མི་བཅག །འདི་ཡི་དམ་ཚིག་གཅིག་པ་མ་གཏོགས་ང་ཡི་ལྷ་འདི་ཡིན་ཞེས་མི་བསྒྲག །གལ་ཏེ་དམ་ཚིག་ཉམས་ན་རང་ལ་ལྡོག་ཅེས་ལ་ལས་ཟེར་འདུག་སྟེ། མི་ལྡོག་ཞུད་པ་ཡིན་པས་ལས་གང་ཡང་མི་འགྲུབ་པར་གསུངས་ཤིང་། ཚོགས་གཏོར་རྒྱ་ཆེན་པོ་དང་བཟོད་གསོལ་བྱ། ཐུགས་
དམ་བསྐངས་བར་བྱས་ནས་སོར་ཆུད་པར་གསུངས་པས་གལ་ཤིན་ཏུ་ཆེའོ།། བཞི་པ་ལ་གཉིས། བསྙེན་སྒྲུབ་དང་ལས་སྦྱོར་ཇི་ལྟར་བྱ་བའོ།། དང་པོ་ནི་ཡར་ངོ་སོགས་གཟའ་སྐར་བཟང་པོར་དབེན་ཞིང་ཡིད་དུ་འོང་བའི་གནས་སུ་འཁྲུལ་འཁོར་གྱི་ཁང་པར་སྤྱིར་བསྟན་དགྲ། ཁྱད་པར་བསྙེན་སྒྲུབ་ལ་བར་དུ་གཅོད་པ་རྣམས་ཀྱི་རུ་པ་ཟློག་བསད་ཀྱིས་བསྐོར་བ་གཞུག༔ སྟེང་དང་གཡས་གཡོན་དུ་ཟློག་པ་ལས་བཤད་པ་ལྟར་གཏོར་མ་དམ་རྫས་དང་བཅས་པ་བཤམས། གཞན་ཡང་ཡི་དམ་ཆོས་སྐྱོང་གི་མཆོད་པ་དང་གཏོར་མ་བཟང་ལ་རྒྱ་ཆེ་བར་བཤམས། དེ་ནས་མཚམས་དམ་པར་གཅོད་བསྲུང་བའི་གནད་དགུ་ཤེས་པའི་སྒོ་ནས། སྒོམ་བཟླས་ལ་ཐུན་བཞིར་འབད་པར་བྱ་ཞིང་། ཐུན་མཇུག་ཏུ་སྒྲུབ་པའི་བར་ཆད་ཟློག་པའི་མན་ངག་ཟློག་བསད་ལས་འབྱུང་བ་ལྟར་ཅུང་ཟད་བྱས་ལ། སྒྲུབ་པ་ཚར་ནས་ལས་མཐའ་གང་རུང་ལ་སྦྱར་རོ། །སྤྱིའི་གཏོར་མ་རྒྱུན་གཏོར་བསྐུལ་པ་དང་བཅས་པ་མ་ཆག་པར་བྱའོ། །སྐབས་སུ་ཚོགས་ཀྱི་བསྐང་བ་སྦྱར་བར་བྱ་སྟེ། རྩ་སྔགས་ཀྱི་བསྙེན་པ་ནི། དུ་ཏྲི་ཡ་མ་རཱ་ཙ། ཡ་མ་རཀཱ། ཀྲོ་ཏ་པ་ཙ་ལ། ཀཱ་ལ་རཱུ་པ། ཨ་ཀྲོ་རཱ་ཙ། ཡ་མ་རཱ་
ཙ། ས་མ་ཡ་ཛ་ཛ༔ ཞེས་སོ། །དེ་ལྟར་འཕྲོད་ན་ཡང་མཚམས་སོགས་གང་བྱེད་ཀྱི་སྒོ་ནས་རྒྱུན་ཁྱེར་གྱིས་བསྒྲུབས་ཀྱང་རུང་ངོ་། །འགྲུབ་རྟགས་ནི་བསྲུང་བའི་བྱ་ལམ་ནས་བཤད་པ་ལྟར་རོ།། གཉིས་པ་ལས་སྦྱོར་ལ་སྲུང་ཟློག་བསད་མནན་གང་བྱེད་ཀྱང་མར་ངོའི་མགོ་ཕུར་ལ་སོགས་བདུད་ཀྱི་ཉི་མ་ལ་རི་གསུམ་རྩེ། ལུང་གསུམ་མདོ་ལ་གཉན་ཞིང་དབེན་པའི་གནས་སུ་གཤིས་ལ་དགྲ་ཐོག་བབས་སུ་བྱུང་ན་གནས་ལ་ཡང་མ་ངེས་པར་གསུངས་སོ། །བསྲུང་བའི་གནས་དུས་ནི་བསྙེན་པ་དང་འདྲའོ། །སོ་སོའི་བཅས་སོགས་ཇི་ལྟར་འཚོགས་པ་བཞིན་བྱ་ཞིང་། ཡི་དམ་ཆོས་སྐྱོང་གི་གཏོར་མ་བཟང་ལ་རྒྱ་ཆེ་བ་གཡོ་སྒྱུ་མེད་པར་བཤམས། སྤྱི་འགྲོས་སུ་མ་ཏི་དགུའི་སྒོ་ནས་སོ་སོའི་མན་ངག་རྣམས་ཚང་བར་བྱས་ལ། རྟགས་དང་སྦྱར་ཏེ་ལས་སྦྱོར་གྱིས་གཞུང་བསྲང་། ཚོགས་ཀྱི་མཆོད་པས་ཐུགས་དམ་བསྐང་བ་མ་ཆག་པར་བྱ། དེ་ཡང་ལྷ་གཞུང་བཞིན་བསྲང་བ་ཡིན་ལ་ལས་ཟེར་འདུག་ཀྱང་། རྫུ་འཕྲུལ་གྱི་ལྷ་དང་མཐུ་ཡིན་པས་རང་གཞུང་གི་གནད་མ་གོ་བ་ཡིན་པས་བདག་བསྐྱེད་ཀྱང་དེ་ཉིད་དང་། མདུན་བསྐྱེད་ཀྱང་རྟེན་གཏོར་རིམ་གྲི་ཕུར་གྱི་བསྐྱེད་ཆོག་ལ་གཙོར་བྱ་ཞིང་། ཡི་དམ་ཆོས་
སྐྱོང་རྣམས་རྒྱབ་རྟེན་དཔུང་བསྐྱེད་དུ་སྟེང་དང་འོག་ཏུ་སྐད་ཅིག་གིས་བསྐྱེད་ཅིང་། གཤིན་རྗེ་ཚེ་བདག་སོགས་གཤིན་རྗེ་གང་རུང་གིས་བསྐོར་ནས་སྤྱན་འདྲེན་བསྟོད་པ་སོགས་ཕྲིན་ལས་བཅོལ་བ་ལས་ལ་བསྐུལ་བ་ལ་གཙོར་བྱ་བ་ཡིན། དེ་ཡང་ཕྱི་པ་ལ་བྱེད་ན་དེ་ལྟར་རྒྱས་པར་བྱ། སྐྱེ་བོ་ཕལ་པ་ལ་ཅུང་ཟད་བྱ། ནང་པ་ལ་ལས་སྦྱོར་དེའི་སྐབས་སུ་དོན་ལས་ཞེན་པའི་ཆོས་སྤྱོད་ཅུང་ཟད་ཀྱང་མི་བྱེད་པར་ནག་སྒྲུབ་ཁོ་ནར་བྱེད་ན་མུ་སྟེགས་ལྟར་སྒྲུབ་པ་ཞེས་བྱའོ། །དེས་ན་ལས་གང་ཡིན་རྟགས་རྫོགས་པར་བྱུང་ནས་ཤ་ལྔ་བདུད་རྩི་ལྔ་དང་། མི་ནག་རྟ་ནག་བྱ་ནག་གཡག་ནག་ར་ནག་སྟག་གཟིག་སོགས་ཀྱི་ཤ་དང་། བཙན་དུག་དང་ཐང་ཕྲོམ་ལ་སོགས་པའི་དུག་སྣ་དང་། འབྲུ་སྣ་ཚོགས་ཀྱི་ཕྱེ་ཆང་དང་ཁྲག་གིས་སྦྲུས་ལ་ལས་སྦྱོར་གང་བྱེད་ཀྱི་གཏོར་མ་དང་། བསྟབ་པའི་རྫས་རྣམས་བྱ། གཏའ་གཏོར་འཛིན་གཏོར་གྱི་རྫས་རྣམས་ཀྱང་དེ་ཡིན་ནོ། །དེ་ནས་ལས་ཁུངས་ནས་ཕྱུང་སྟེ་བསད་པ་ལས་བཞི་ཚེ་ཁྲུས་ལུང་གི་སྙིང་པོ་ཅན་རྒྱས་པ་ཅིག་བྱས་ལ། ལས་མཐའ་གང་ཡིན་གྱི་མཐའ་ལ་གཏད་དོ།། ༈ དེའང་ཚེ་ཁྲུས་ལུང་གི་དགོངས་པ་མ་ཤེས་ན་ཟློག་བསད་ཀྱི་བསྙེན་སྒྲུབ་ལས་གསུམ་
ལ་རྟགས་ཇི་ལྟར་ཐོན་ཡང་སྔགས་པ་ནག་པོ་རུ་ཊར་གོལ་བའི་རྒྱུ། མི་ཚེ་མི་དགེ་བ་ལ་བསྐྱལ་བ་ཡིན་པས། རང་གཞན་ངན་འགྲོ་མུ་མཐའ་མེད་པའི་རྒྱུ་རུ་གྱུར་ཏེ། དེས་ན་སྐབས་འདིར་འཁྲུལ་པ་ཤིན་ཏུ་ཤས་ཆེ་བས། སྔགས་ཀྱི་དོན་མི་ཤེས་པ་རྣམས་ཀྱི་དོན་དུ་ཚེ་ཁྲུས་ལུང་གི་དགོངས་པ་དང་པོ་ལ་འཇུག་པའི་ཐབས་ཙམ་བཤད་པའོ། །དེ་ལྟར་འཁྲུལ་པ་ཆེ་བཞིན་དུ་ཚོགས་ཐ་མ་དང་དམར་སྤྲེངས་ཤིང་བསྟབ་ལས་བྱ་བ་དང་། ཟློག་བསད་མནན་བསྲེགས་སོགས། ལས་མཐའ་གང་འཇིགས་སུ་རུང་བ་རྣམས་བྱས་ན་ཡོན་ཏན་ཅི་ཡོད་ལ། མ་བྱས་ན་ཉེས་པ་ཅི་འབྱུང་ཞེ་ན། སྔགས་ཀྱི་རྣལ་འབྱོར་པ་རྣམས་ལ་ནི་ཤིན་ཏུ་དགོས་ཤིང་མེད་དུ་མི་རུང་བའི་མཆོག་ཡིན་ལ། ཐོག་མར་དགོས་པ་བཤད་དོ། །དེ་ཡང་སྔགས་ཀྱི་ཐབས་མཐའ་ཡས་ཁྱད་པར་ཅན་འབྲས་བུ་ལམ་དུ་བྱེད་པ་དང་། རྣམ་པ་ལམ་དུ་བྱེད་པ་ཡིན་ཏེ། ཕྱི་ན་ཁྲོ་ཚུལ་མེ་ལྟར་འབར། །ནང་ན་བྱམས་པ་ཆུ་ལྟར་བསིལ། །ཞེས་གསུངས་པ་ལྟར་། དྲག་པོའི་ཚུལ་གྱིས་སེམས་ཅན་ལ་བརྩེ་བ་ཆེན་པོའི་སྒོ་ནས་སངས་རྒྱས་ཀྱི་མཛད་པ་ཕྲིན་ལས་བཞིའི་སྒོ་ནས་སེམས་ཅན་གྱི་དོན་བྱེད་པ་བཞིན། རང་ཉིད་ཀྱང་ཁྲོ་ཆུའི་ལྷ་སྐུ་སྒྱུ་མ་
ལྟ་བུ་དེ་ལྟར་མོས་པར་བྱས་ནས། མྱུར་བར་མཆོད་པས་འགྲུབ་པར་གསུངས་ཏེ། སྐྱེ་བོ་ཞེ་སྡང་ཅན་རྣམས་ལ་བརྒྱལ་བས་ཤིན་ཏུ་ཁྲོས་པའི་སྐུ་དང་། འདོད་ཆགས་ཅན་རྣམས་ལ་འདོད་ཆགས་ཤིན་ཏུ་ཆེ་བ་དང་། གཏི་མུག་ཅན་རྣམས་ལ་རབ་ཏུ་ཞི་བའི་དགོས་པ་དང་ཆེ་བ་ཡིན་ནོ། །དེ་ལྟར་བྱེད་པ་ནི་འབྲས་བུ་ལམ་དུ་བྱེད་པ་དང་། རང་བཞིན་གྱི་བདག་འཛིན་རུ་ཏྲ་དེ་ཤ་ཁྲག་གི་འབྱུང་གནས་དང་། གཟུགས་སུ་བྱས་ནས་གཉིས་མེད་བདེ་ཆེན་གྱི་ཡེ་ཤེས་ཆོས་སྐུ་དེ་ཉིད་ལྷའི་གཟུགས་སུ་ཤར་བའི་སྒྱུ་མའི་སྐྱེས་བུའི་ཆོས་ཉིད་བདེན་པར་ཅུང་ཟད་ཙམ་སྟོང་པ་ཉིད་ཀྱི་ངང་ནས་སྤྱིར་ཡང་བྱར་གཏུབ་པའི་རྟེན་འབྲེལ་གྱི་རྩལ་ཀ་མ་འགགས་པའི་ཚུལ་གྱི་ཕོ་ཉ་དུ་མས་དེ་ལ་བཟའ་སྟེ་རུ་ཊ་རྗེས་མེད་དུ་བཏང་ནས་གཟུགས་དེའི་ངོ་བོ་ཡེ་ཤེས་ཀྱི་བདུད་རྩི་ལ་རྣམ་པ་དུག་གསུམ་གྱི་རང་བཞིན་ཤ་ཁྲག་རུས་པའི་རྒྱ་མཚོར་བྱས་ལ། ལྷ་རྣམས་ཁྲོ་བ་དང་། ཆགས་པ་དང་བཞད་པའི་ཉམས་ཅན་ཞལ་གདངས་ཤིང་རྔམ་པའི་ཚུལ་གྱིས་བཞུགས་པའི་ལྷ་རྣམས་ལ་ལྷག་མ་མེད་པར་ཕུལ་བས་བདེ་བའི་རང་བཞིན་གཅིག་ཏུ་གྱུར་ཏེ། རང་གཞན་གྱི་ཉོན་མོངས་དྲུང་ནས་འབྱིན་ཏེ་སྐུ་གསུམ་གོ་འཕང་ཐོབ་པ་ནི་རྣམ་པ་
ལམ་བྱེད་པ་དང་། ཅི་རིགས་པར་སྦྱར་བའོ། །དེ་དག་ནི་སྤྱི་དགྲ་འདུལ་བའི་ཐབས་ངེས་པ་ཅན་དུ་བྱ་དགོས་པ་རྣམས་སོ། །སྒོས་དགྲ་ལ་ཡང་། སྤྱི་དགྲས་བླངས་བའི་སེམས་ཅན་རང་ཁ་བ། རུ་ཊ་ལ་གཟུགས་སུ་བྱས་པ་མ་ཡིན་པ། མི་དང་མི་མ་ཡིན་པ་དག་གི་གཟུགས་སུ་བྱས་པ། སྤྱིར་བསྟན་པ་དང་སེམས་ཅན་ལ་གནོད་པར་བྱེད་པ་དང་། སྒོས་སུ་རང་གཞན་ལ་སྲོག་དང་གཅོང་ཐང་དང་ཀ་ཅ་ཤོར་བ་སོགས་ཀྱི་གནོད་པ་བྱེད་པ་རྣམས་སོ། །དེ་འདུལ་བ་ལའང་རང་དོན་དུ་མི་རུང་ཞིང་གཞན་དོན་དུ་ལྷག་བསམ་རྣམ་དག་གི་སྒོ་ནས་བྱ་བར་གསུངས་སོ། །དེའང་རང་ཁར་ཀ་ཆ་སྦྱིན་གནས་བཅོལ་བའམ། རང་གི་ཀ་ཅའི་ཕྱིར་མི་རུང་ངོ་། །ལྷག་བསམ་ཡོད་ན་ནི་རང་དོན་བྱས་ཀྱང་གཞན་དོན་ཉིད་དོ། །དེའི་ཚུལ་ནི་སྡུག་བསྔལ་ཡིན་ཀྱང་གང་ཕན་དང་། ཞེས་པས། ཁོས་གཞན་ལ་གནོད་པ་བྱས་པ་ཉིད། ཁོ་རང་གི་ལས་འཁོར་བ་མཐའ་མེད་ཀྱི་ལས་བྱས་པ་མ་ཤེས་པ་ལ་སྙིང་རྗེ་བསྐྱེད་དོ། །ཁོའི་གཏན་སྡུག་གི་རྒྱུ་དེ་དང་འཕྲལ་བདེ་རྗེས་ནས་སྡུག་བསྔལ་དེའང་ད་ལྟ་ཉིད་དུ་སྨིན་པར་བྱས་ཏེ་རྣམ་སྨིན་གྱི་ལུས་འདི་དང་ཕྲལ་ནས། དེ་མ་ཐག་ཏུ་སངས་རྒྱས་པར་བྱའོ། །སྙམ་པའི་
བཅོས་མིན་སྐྱེ་བའོ། །དེ་ནས་བྱམས་པ་སྒོམ་པ་སོགས་བྱ་བའི་ནུས་པས་བསྐལ་པ་མང་པོར་ངན་སོང་དུ་འགྲོ་བའི་ལས་བསགས་པ་གཅིག་ཡིན་ནའང་ཚེ་འདི་ལ་མགོ་ན་བ་ཙམ་ཞིག་འབྱུང་སྟེ་ལས་འདག་པར་གསུངས་པ་དང་འདྲའོ། །དེ་ཡང་ལུས་ངག་གི་སྒོ་ནས་ཁྲོ་ཚུལ་དུ་མ་ཞིག་དགོས་ཤིང་སེམས་ཀྱིས་ཀྱང་ལྷག་བསམ་བཅོས་མིན་དང་ལྡན་པའི་སྒོ་ནས་དམིགས་པ་དྲག་དྲག་དུ་མ་ཞིག་དགོས་སོ། །དེ་ལྟར་བྱས་པས་སྙིང་རྗེ་བྱས་ན་མི་དགེ་མེད། ཅེས་གསུངས་ཤིང་། དེར་མ་ཟད་རྫུ་འཕྲུལ་སྡིག་པ་སོགས་མི་བྱེད་ཅེས་དང་། རྩ་ལྟུང་བཅུ་བཞི་སོགས་ཁེག་པར་གསུངས་སོ། །གཞན་དུ་ན་ལྷག་བསམ་ཡོད་བཞིན་དུ་དེ་ལྟར་མ་བྱས་པའི། ལྷག་བསམ་མེད་བཞིན་དུ་རང་རྒྱུད་པར་བྱས་ན་ནི་རྩ་ལྟུང་བཅུ་བཞི་སོགས་ཀྱང་འབྱུང་བར་གསུངས་ཤིང་། སེམས་ཅན་དེའི་གཏན་བདེ་དང་འཕྲལ་སྡུག་ཅུང་ཟད་ཙམ་ཞིག་རང་ལ་བྱམས་མེད་པའི་རྒྱུན་གྱི་རྗེས་པ་ཡིན་པས་བདེ་ཡང་མི་ཕན་མི་བྱའོ། །ཞེས་གསུངས་པ་སོགས་དང་འགལ་ལོ། །དེ་ཡང་ནུས་པ་ཡོད་ན་དེ་ལྟར་ཡིན་གྱིས་མེད་ན་མིན་ནོ་ཞེ་ན། དེ་ལྟར་མེད་ན་འདི་ནི་རྗེ་བཙུན་པདྨས་ལྷག་བསམ་དང་ལྡན་པས་དང་པོ་ནས་སྦྱང་པའི་ཕྱིར་བརྡ་
དོན་རྣམས་འཕྲོད་པར་གྱིས་ཤིག་དང་འབྲས་བུ་རྣམ་པ་ལམ་བྱེད་ཀྱིས་ཐབས་མཁས་ཁྱད་པར་ཅན་གྱི་སྒོ་ནས་འདོད་དོན་དཀར་དམར་སྣ་ཚོགས་ཀྱི་སྒོ་བྱས་ཏེ་ལྷ་ལ་འབུལ་ཞིང་། དེ་ཡང་བདེ་སྟོང་ཡེ་ཤེས་ཀྱི་ངང་ནས་བྱེད་པས་ཚོགས་གཉིས་ལེགས་པར་རྫོགས་ནས་བཙན་ཐབས་སུ་འཚང་རྒྱའོ། །ཞེས་རྒྱས་པར་བྱ་བ་ལ། དོན་བསྡུས་པ་ལ་འདི་ཁོ་ན་ལྟར་སྒྲུབ་ཐབས་མང་པོར་གསུངས། དེ་ལྟ་བུའི་དགོས་པ་དང་། ཡོན་ཏན་ཅན་གྱི་འདི་ཉམས་སུ་ལེན་པའི་དམིགས་པ་རྣམས་སྐྱོངས་ཚུལ་དངོས་བཤད་དེ། དེ་ཡང་བདག་ཕུར་ འབེན 
་གསུམ་སྟེ་གསལ་བ་སྐུ་གསུམ་གྱི་བདག་ཉིད་ཅན། དེ་ཉིད་གཞི་ལམ་འབྲས་བུ་གསུམ་ཐམས་ཅད་དུ་སེམས་ཉིད་ཆོས་ཀྱི་སྐུ་གཅིག་པུ་ལས་ཐ་མི་དད་པར་ཤེས་པར་བྱ་ཞིང་། བདག་ཕུར་
འབེན ་གསུམ་གཞི་ལམ་འབྲས་གསུམ་དུ་གྲུབ་མཐའ་གཅིག་པའི་དོན་དེའི་རྫོང་སྟེ་ལྟ་བའོ། །གསལ་བ་གསུམ་དང་ལྡན་པ་འཕྲང་སྟེ་སྒོམ་པའོ། །ཚེ་ཁྲུས་ལུང་གི་དགོངས་པས་བསྒྲལ་བ་ནི་སྲོག་འཕྲོག་པ་སྟེ་སྤྱོད་པའོ། སླར་ཡང་ཁྲུས་ལུང་གི་དགོངས་པས་གནས་སྤར་ནས་རྒྱལ་བའི་སྲས་སུ་བསྐྱེད་པ་འབྲས་བུའོ། །དེ་ལྟར་རྫོང་འཕྲང་སྲོག་གསུམ་སྟེ། ལྟ་སྒོམ་སྤྱོད་གསུམ་འབྲས་བུ་གསུམ་
དང་བཞིའི་དོན་ཤེས་ཤིང་རིགས་པ་ནི། རིགས་པ་ཡེ་ཤེས་ཀྱི་ཕུར་པའོ། །དེའི་དོན་ཤེས་པ་རྣམས་ལ་སྙིང་རྗེ་བསྐྱེད་པ་ནི། ཚད་མེད་སྙིང་རྗེའི་ཕུར་པའོ། །ཕྱག་གཡས་ཀྱི་སོར་མོ་ལྔ་ཁྲག་འཐུང་ཡབ་ལྔ། གཡོན་གྱི་སོར་མོ་ལྔ་ཁྲག་འཐུང་ཡུམ་ལྔར་གསལ་བའི་བར་དུ་ཕུར་པ་བསྒྲིལ་བ་ནི། སྦྱོར་མཚམས་བྱང་ཆུབ་ཀྱི་ཕུར་པའོ། །དམིགས་རྟེན་གྱི་ཕུར་པ་དངོས་ནི་མཚན་མ་རྫས་ཀྱི་ཕུར་པ་སྟེ། དེ་ལྟ་བུའི་ཕུར་པ་བཞི་ལེགས་པར་ཤེས་པར་བྱས་ནས་རུ་ཊ་ལ་འདེབས་པ་ནི་གནད་དམ་པའོ། །དམིགས་པ་རྣམས་དངོས་ནི་བློ་ནུས་ཆེ་ན་གནས་ལུགས་བསྐྱེད་པ་མང་དུ་བྱ། ཆུང་ན་བླ་མའི་མན་ངག་ལྟར་ཆོས་ཐམས་ཅད་ཐག་ཆོད་ངེས་ཤེས་དྲག་པོས་སྐྱོངས། དེ་ནས་སྔགས་ཀྱི་ཁྱད་ཆོས་ཡིན་པས་དེ་ལྟ་བུའི་ཡུལ་སྟོང་ཉིད་དང་ཡུལ་ཅན་ལྷན་སྐྱེས་ཀྱི་བདེ་བ་གཉིས་དབྱེར་མེད་པའི་ཡེ་ཤེས་ཆོས་སྐུ་ཁྱབ་གདལ་ཆེན་པོ་དེ་ངའོ་སྙམ་པའི་ང་རྒྱལ་དེ་བསྐྱང་། དེ་ནས་ཡེ་ཤེས་ཁྱབ་གདལ་ཆེན་པོ་དེ་ཉིད་ཀྱིས་གཟུགས་རྣམས་འཇམ་དཔལ་གཤིན་རྗེའི་སྐུར་བསྟན་པའི་ཟུང་འཇུག་སྒྱུ་མའི་སྐྱེས་བུ་དེ་ངའོ་སྙམ་པའི་ང་རྒྱལ་བསྐྱེད་དོ། །དེ་དང་ནམ་ཡང་མི་འབྲལ་བའི་སྤྱོད་ལམ་རྣམ་དག་བྱ་བ་ནི། རང་ཉིད་
ལྷར་གསལ་ཏེ་ཆོས་སྐུའོ། །རང་ལས་ཕོ་ཉ་རྣམ་པ་སྣ་ཚོགས་སྤྲོས་ནས་ལས་བྱེད་དང་ཕུར་པ་ལས་ཀྱི་གཤིན་རྗེ་བསྐྱེད་པ་ནི། ལས་མཁན་ཕོ་མོར་གསལ་བ་སྟེ་ལོངས་སྐུའོ། །དེ་ནས་བདག་གཞན་འདི་དང་འདི་ལ་དེ་ལྟར་མ་གཏོགས་པའི་གནོད་བྱེད་འདི་དང་འདིས་རང་ཉིད་འཁོར་བའི་རྒྱུར་གནོད་པ་འདི་དང་འདི་བྱས་པ་སྙིང་རེ་རྗེ། དེས་ན་འདིའི་ངན་སོང་རྒྱུན་གཅོད་པའི་ཕྱིར། མངོན་སྤྱོད་དྲག་པོའི་སྒོ་ནས་ལུས་སེམས་ཕྲལ་ཏེ་འཚང་རྒྱའོ་སྙམ་པ་བཅོས་མིན་མ་སྐྱེས་ཀྱི་བར་དུ་སྦྱང་ངོ་།། ༈ དེ་ནས་མདུན་དུ་རྣམ་ཐར་སྒོ་གསུམ་གྱི་དྲག་པོ་ཆོས་དབྱིངས་ཨེའི་བཙོན་ཁང་དུ། སྤྱི་དགོས་ཀྱི་རུ་ཊ་རྣམས་གཟུགས་བརྙན་གཅིག་ཏུ་བསྐྱེད་བསྟིམས་བྱས་པ་ནི་དམིགས་བྱ་རུ་ཊར་གསལ་བ་སྟེ་སྤྲུལ་སྐུའོ། །དེ་ནས་ཚེ་ཁྲུས་ལུང་གི་དགོངས་པ་བྱ་སྟེ། དེའང་མཁྱེན་གསོལ་དང་གཟུ་དཔང་ཚར་ནས། ལས་མཁན་གྱི་རྩེ་གསུམ་ཧཱུྃ་གསུམ་ཕཊ༔ གསུམ་གྱིས་མཚན་པ་དེ། གཟས་པ་པོའི་སྙིང་དུ་ཚེའི་སྦྲ་རྒྱ་ཁྲག་གི་དྭངས་མ་བྱིའུའི་སྒོ་ང་ཙམ་གྱི་ནང་དུ་ཚེའི་ངོ་བོ་ཨ་དཀར་པོ། དེའི་ནང་དུ་སྲོག་གི་ངོ་བོ་ནི་དམར་པོ་གནས་པ་ལ་བཏབ་པས་ཚེའི་སྦ་རྒྱ་བཀྲལ། ཨ་ཧྲི་དང་བཅས་པ་དེ་དང་ཡེར་གྱིས་བླངས་ཏེ། །
རང་གི་སྙིང་ཁར་བཅུག་པས་ཚེའི་ངོ་བོར་བཀུག་ནས་རང་ལ་ཐིམ་པས་ཚེ་དཔལ་རྒྱས་པར་བྱས་པ་ནི་ཚེ་ལུང་ངོ་། །དེས་ཁོ་ཉོན་མོངས་བྲལ་ཏེ་སེམས་དག་པའི་ངོ་བོ་ཡིན་ཀྱང་གླ་རྩིའི་ཐུམ་ཤུན་ལྟར་བག་ཆགས་ཀྱི་དྲི་མ་དང་། རང་གི་རྩོལ་སྒྲིབ་ཀྱི་དྲི་མ་སྤང་སྲིད་པས། དེ་སྤང་བའི་ཕྱིར་སླར་ཡང་ཧཱུྃ་གསུམ་གྱིས་ཚིགས་ཕྱིར་བླངས་ནས་ཕཊ་གསུམ་གྱིས་འོག་མིན་དུ་དཔལ་ཆེན་པོའི་ཐུགས་ཀར་འཕངས་ཏེ་ཞུ་བས་ཡུམ་གྱི་མཁར་བབས་ནས་སྲས་སུ་བསྐྱེད་དེ། དེ་མདུན་དུ་ཐོན་ནས་འཁོར་བ་ཁྲུས་ལུང་ངོ་། །དེ་ནས་དུག་ཅན་གྱི་དུག་བྱིན་ནས་སླར་ལོག་ཏུ་མེད་པ་ལྟར། ཁོའི་རུ་ཊ་རྒྱུན་གཅོད་པ་ལ་ཉོན་མོངས་ཡེ་ཤེས་སུ་བསྒྱུར་དགོས་སོ། །འདི་ལ་ཁྲུས་ལུང་གི་དགོངས་པ་སངས་རྒྱས་ཚར་ནས། ད་དུང་ཉོན་མོངས་ཞེན་ན། སྐྱོན་མེད་རྣམ་པ་ལམ་བྱེད་ཀྱི་ཐབས་མཁས་སོ། །དེ་ལྟར་མིན་ན་འབྲས་བུ་ལམ་བྱེད་ཐམས་ཅད་དེ་ལྟར་འགྱུར་བའི་སྐྱོན་བཅས་སོ། །དེས་སེམས་ཉིད་སྤར་བའི་ལམ་དེར་ཁོའི་དུག་གསུམ་དང་སྤྱིའི་རུ་ཊ་ཐམས་ཅད་ཀྱི་ངོ་བོ་ནི་དུད་ཁ་གཅིག་ལུས་པ་དེ་དང་ཁོས་བླངས་པའི་རྣམ་སྨིན་གྱི་ཕུང་པོ་དེའང་དོན་ཅན་དུ་འགྱུར་བའི་ཕྱིར་དུས་གཅིག་ཏུ་གཟིར་བས་འདོད་ཆགས་རྣམས་ཤ་
ཁྲག་གི་རྒྱ་མཚོ། ཞེ་སྡང་རུས་པའི་གྲམ་ཁྲོད། གཏི་མུག་རྣམས་ཤ་ཡི་རི་བོ་སྟོང་གསུམ་ཁེངས་པ་ངོ་བོ་ཡེ་ཤེས་ཀྱི་བདུད་རྩིའི་རྣམ་པ་ཤ་ཁྲག་རུས་གསུམ་ནུས་པ་ཉོན་མོངས་རྣམས་སྐད་ཅིག་ལ་འཇོམས་ནུས་པ། ཡོན་ཏན་ཟག་མེད་ཀྱི་བདེ་བ་སྟེར་བ། འབྲས་བུ་སྐུ་གསུམ་གྱི་གོ་འཕང་དེ་མ་ཐག་ཏུ་ཐོབ་པར་བྱེད་པའི་ནུས་མཐུ་དང་ལྡན་པར་བསམས་ནས། འབུལ་བའི་ཡུལ་སྐབས་སུ་གང་བབས་ཀྱི་ལྷ་ཚོགས་རྣམས་ཀྱི་ཞལ་དུ་ཉམས་བྱུང་རྒྱལ་གྱིས་བཞེས་སྒྲའི་གད་མོ་དང་བཅས་ཏེ་ཕུལ་བས། ལྷ་ཐམས་ཅད་ཟག་མེད་ཀྱི་བདེ་བས་མཉེས་ཤིང་ཁོས་གཙོར་བྱས་བདག་གཞན་གྱི་ཉོན་མོངས་དྲུང་ནས་འབྱིན་ཏེ་སྐུ་གསུམ་གྱི་གོ་འཕང་ཐོབ་ནས་བདེ་བ་ཆེན་པོའི་རང་བཞིན་དུ་གནས་པར་བསམ་ཞིང་རླུང་རོ་སངས་ཀྱིས་འབུད། ལྟ་སྟངས་ནམ་མཁར་ཅེ་རེ་བྱ། རང་རིག་པའི་ངོ་བོ་ལམ་གྱིས་བཟུང་། ཤེས་པ་ཧུར་ལིང་ངེ་བ་བྱས་ལ་སྟབས་གང་ཡིན་གྱི་བཟླས་སྒོམ་སོགས་གང་དགོས་རྣམས་བྱ། དེ་ནས་གོང་དུ་བཤད་པའི་ཟུང་འཇུག་སྒྱུ་མའི་རྣལ་འབྱོར་ཡུན་རིང་དུ་སྐྱོང་། དེ་ལྟར་སྤེལ་མར་ཉམས་སུ་བླངས་བར་བྱའོ། །དེ་ལྟར་ཤེས་བཞིན་དུ་ཉམས་སུ་བླངས་ན་འདོད་དོན་ཐམས་ཅད་བཤད་པ་བཞིན་དུ་འགྲུབ་ཅིང་། །
ཁྱད་པར་དུ་སྤྱིའི་རུ་ཏྲ་བདག་འཛིན་དང་། སྒོས་ཀྱི་རུ་ཏྲ་འདྲེ་གདོན་བྱ་བའི་མིང་ཡང་མི་ལུས་ཤིང་། སྒྲིབ་པ་ནི་ལྟ་ཡང་མི་སྨོས་ཤིང་ལམ་གྱི་བོགས་འདོན་དང་རིག་པའི་རྩལ་སྦྱང་དུ་འགྱུར་བར་བྱ། ཚུལ་དེ་ལྟར་མི་ཤེས་པར་ལྷ་སྔགས་རྣམས་ཚིག་ཙམ་ལ་བརྟེན་ཏེ་ཧོམ་ཁུང་སོགས་བྱེད་ཅིང་དང་པོ་ནས་བསྡིག་བསྡིག་འདྲ་བ་རེ་བྱས་ཀྱང་འདྲེ་གདོན་ཤི་བའི་རོ་ནི་སུས་ཀྱང་མ་མཐོང་ངོ་། འོན་ཀྱང་བྱིན་རླབས་ནུས་པ་ཡོད་པ་ལྟར་སྣང་བ་ནི་སྔོན་གྱི་ལས་སམ་འཕྲུལ་གྱི་ལྷ་སྔགས་ཀྱི་ནུས་པ་ཙམ་རེ་ཡིན་ཞིང་། ལས་ཀྱང་ཆ་རེ་འགྲུབ་མོད་ཀྱང་དམྱལ་བར་འགྲོའོ། །ཞེས་རྡོ་རྗེ་འཆང་ཉིད་ཀྱིས་གསུངས་པ་དང་དོན་འདྲའོ། །འདིར་ལས་ཀྱི་ཕོ་བྲང་གྲུ་གསུམ་བྱེད་དགོས་པའི་རྒྱུ་མཚན་ནི། ཆོས་དབྱིངས་རང་བཞིན་གྱིས་རྣམ་པར་དག་པ་སྣང་སྲིད་འཁོར་འདས་ཐམས་ཅད་རོ་མཉམ་དུ་གྱུར་པ་སྤྱི་སྒོས་རུ་ཏྲའི་མིང་ཙམ་ཡང་མེད་པ་ཆོས་སྐུ་ཁྱབ་གདལ་ཆེན་པོ་དེ་ཉིད་མངོན་དུ་མ་གྱུར་པའི་རྣལ་འབྱོར་པས། དེ་ལྟར་མྱུར་དུ་རྟོགས་པར་བྱེད་པའི་ཐབས་མཁས་སྔགས་ཀྱི་ཁྱད་ཆོས་རྣམ་པ་ལམ་བྱེད་ཡིན་ནོ། །དེ་ཡང་གྲུ་གསུམ་གྱི་ཆོས་ཐམས་ཅད། རང་བཞིན་གྱི་རྣམ་པར་དག་པ་སྟོང་པ་ཉིད་དང་། མཚན་
མ་མེད་པ་དང་། སྨོན་པ་མེད་པ་དང༔ རྣམ་པར་ཐར་པ་སྒོ་གསུམ་མཚོན། ཕྱི་མཐིང་ནག་གི་ཆོས་སྐུ་འགྱུར་བ་མེད་པ་དང་། ནང་དམར་ནག་ནི་སྔགས་ཀྱི་ཁྱད་ཆོས་ལྷན་སྐྱེས་ཀྱི་བདེ་བ་ཆེན་པོ་དང་། འགྱུར་མེད་ཀྱི་ཆོས་སྐུ་གཉིས་མེད་རོ་གཅིག་ཏུ་བདེ་སྟོང་གཉིས་མེད་དུ་གྱུར་པ་མཚོན། དེའི་ནང་ན་སྤྱི་དགོས་ཀྱི་རུ་ཏྲ་ཐམས་ཅད་གཞུག་པ་ནི་འཁོར་འདས་ཐམས་ཅད་ཆོས་ཉིད་དུ་རོ་མཉམ་པ་དང་། སྤྲུལ་པའི་ཕོ་ཉ་དང་མཚོན་ཆ་སྣ་ཚོགས་པས་སྐད་ཅིག་གིས་བསྒྲལ་ཞིང་གཏན་མེད་དུ་བརླགས་པ་ཡིན་ནོ། །ཆོས་ཉིད་མངོན་དུ་གྱུར་པའི་ངོ་བོར་འཁོར་འདས་ཀྱི་མིང་ཡང་མེད་པའི་དོན་མཚོན་པའོ། །གཞན་ཡང་མཐུ་ལ་དོར་བའི་མན་ངག་ཁྱད་པར་བ་རྣམས་རྫོང་འཕྲང་ཆེན་མོར་ཤེས་པར་བྱའོ། །དེ་ལྟར་ཧོམ་ཁུང་གྲུ་གསུམ་བྱེད་པའི་མཚོན་དོན་ཙམ་རེ་ཚིག་ཏུ་ཡང་མི་ཤེས་པར་རུ་ཏྲ་བསྒྲལ་སྐད་བྱས་ཀྱང་རུ་ཏྲ་དེ་ཉིད་ཁོ་ནར་མངོན་ནོ། །འདིའི་སྐབས་སུ་འཁྲུལ་པ་ཆེ་བར་སྣང་ཞིང་ཡིག་ཆ་ཡང་ཐར་ཆགས་སུ་མི་སྣང་བས་རྫོང་འཕྲང་ཆེ་ཆུང་། སྒྲུབ་ཆེན། གཤིན་རྗེ་ཚེ་བདག །ཨུར་མོ་ཁ་ཐུན། ཁྲོ་འདུལ། འཆར་ཀ །དམ་ཅན་ཆོས་རྒྱལ། མགོན་པོ་འབྲོང་ཞོལ། གཞན་ཡང་མ་མགོན་གྱི་
སྐོར་མང་པོ་དང་། བསད་པ་ལས་བཞི་མ་བསླད་པ་དང་། ལྷ་རྒྱུད་སྡེ་གསུམ་སོགས་གསར་རྙིང་གི་ལས་མཐའ་ཅན་ཐན་ཐུན་རྣམས་དང་། རྒྱུད་མཆོག་མ་ཧཱ་ཡོ་གའི་སྒོམ་ཁོག་སོགས། རྙིང་མའི་སྒྲུབ་ཐབས་འགའ་ཞིག་གི་དགོངས་པ་རྣམས་རང་བཟོ་མེད་པར་ཕྱོགས་གཅིག་ཏུ་བླང་བདེ་བར་བྱས་པ་ཡིན་པས། རིག་སྔགས་འཆང་བའི་རྣལ་འབྱོར་པ་རྣམས་ཐུགས་རྣལ་དུ་ཕོབ་ལ་ཉམས་སུ་ལོངས་ཤིག༔ ཤེས་བྱེད་བཞེད་ནའང་དེ་རྣམས་སུ་གཟིགས་དང་ཁྱེད་རང་རྣམས་ཐུགས་རང་སར་འགྱུར་བ་ཡོད་དོ། །ལག་ཏུ་ལེན་པ་ཆོ་གའི་རིམ་པ་ནི༔ ཏིང་ངེ་འཛིན་གྱི་བཟློག་པའི་སྐབས་སུ་མདོར་བསྡུས་བཤད་པ་ལྟར་ཡིན་ལ། ཆོ་ག་དངོས་དང་གདབ་ལས་སོགས་ཇི་ལྟར་བྱ་བ་ནི་གཞན་དུ་ཤེས་ཤིང་། གསང་སྔགས་ལག་ལེན་གྱི་མཐའ་ཅན་ཡིན་པས་མཐོང་བ་དང་པོ་ཡིག་ཁྲིད་ལས་ཤེས་པར་བྱའོ།། འདི་ལ་ཁ་ཅིག་དེ་ལྟར་ན་ལེགས་འདུག་ཀྱང་། དེ་ལྟར་དེ་འདྲ་ཤེས་པ་རྣམས་ནི་ནུས་པ་འོང་ཅང་ཅིང་འདུག༔ སྔར་གྱི་དེ་འདྲ་མི་ཤིས་པ་རྣམས་ལ་ནི་བྱིན་རླབས་དང་ཐུགས་རྗེ་ནུས་པ་ཐམས་ཅད་འགྲན་ཟླ་མེད་པར་བྱུང་ཞེས་ཟེར་འདུག་སྟེ། དེ་ལྟར་ཤེས་ཀྱང་བྱིན་རླབས་མེད་པ་ནི་བསྙེན་སྒྲུབ་ལ་
གོམས་མ་སོང་བ་ཡིན་མོད་ཀྱང་། མི་ཤེས་པའི་བྱིན་རླབས་ཅན་དང་ཕྲལ་ཏིང་ཀུན་ནས་མི་འདྲ་བ་དམ་པ་ཀུན་གྱིས་གསུངས་པ་སྟེ། མི་ཤེས་ཀྱང་ནག་འདུག་མཁན་གྱི་སྔགས་ནག་དེ་ལ་བཤད་པ་ལྟར་ལྷ་སྔགས་སོགས་ཀྱི་འཕྲལ་དུ་ནུས་པ་འབྱུང་ཡང་ལེགས་ན་གཏིང་དུ་ཐར་པའི་ལམ་དུ་འགྲོ་སྲིད་ཀྱང་། ཉེས་ན་ལས་འབྲས་སོགས་ལ་རྨོངས་པའི་དོན་གྱིས། བོན་དང་མུ་སྟེགས་པ་སྒྲུབ་པའི་ཕོ་རུས་ཅན་རྫུ་འཕྲུལ་དང་ནུས་པ་ཐོན་པ་རྣམས་ཀྱང་གཏིང་རུ་དུ་ཁའི་རྒྱུན་འབའ་ཞིག་ཏུ་གྱུར་བར་གསུངས་པ་དང་འདྲ་བར་བཤད་པ་ཡིན། ཡང་སྔར་ཐུགས་རྗེ་དང་ནུས་པ་བྱུང་བྱུང་ཐམས་ཅད་ཀྱིས་མི་ཤེས་ཀྱང་། དེ་ཁོ་ན་ལྟ་བུ་མིན་ཞིང་སྒྲུབ་པ་ལ་གཙོར་འཛིན་པའི་གང་ཟག་མཆོག་རེ་བྱུང་བ་ཡིན་ལ། ད་ལྟ་ནི་ལ་ལ་ཤེས་པ་ཙམ་རེ་བྱས་པའི་ལྕེ་འདྲེན་རེ་ལ་བརྟེན་ནས་སྒྲུབ་པའི་ཕོ་རུས་མེད་པར་མ་བསྒྲུབས་པར་གྲུབ་རྟགས་འབྱུང་དུ་རེ་བའི་ངང་ནས་མི་ཚེ་ཐ་མལ་དུ་ལུས་པའི་སྐྱོན་ཡིན་པས། ཐུགས་རྣལ་དུ་ཕོབ་ལ་སྨྱོས་ཤིག །དེ་ལྟར་བཤད་པ་ལྟར་བླ་མའི་མན་ངག་དམ་པ་རྣམས་མཆན་གཅིག་ཏུ་བསྒྲིགས་པའི་ཐོ་ཡིག་གི་ས་བཅད་དུ་གསལ་བ་ལྟར་ཕྱོགས་བསྡུས་བྱས་པ་འདི་ནི་གཅིག་ལ་གཅིག་ལྟོས་དགོས་པ་རྣམས་ཁ་
འཕེན་གྱི་དགོངས་པར་གསལ་ཞིང་རང་གར་འཇུག་པ་དགག་པའི་ཕྱིར་དུ་ཚིག་ཅུང་ཟད་སྦས་ཤིང་དོན་ལ་ཅུང་ཟད་ཀྱང་མ་སྦས་པར་གསལ་བར་ཡོད་པས། འདི་ལས་གསལ་དང་འགྲིག་འགྲིག་ཏུ་འདོད་ནས་དཀྲུག་པར་མ་བྱེད་ཅིག །ཆོས་བྱེད་བསྟན་ལ་སེམས་པའི་སློབ་མ་དང་། །དམ་ཚིག་སྲོག་གི་ཕྱིར་ཡང་མི་གཏོང་བའི་རྣལ་འབྱོར་པ་ཡིན་ན་ནི། གཅིག་ལ་གཅིག་ལ་སོགས་པ་ལ་བཀའ་གདམས་ཏེ་གཏོད་ཅིག །གཞན་དུ་ན་བླ་མ་ཐན་ལྟར་གསང་ཞིང་མན་ངག་རྐུ་ཐབས་སུ་ཁྱེར་བ། བསྟན་པ་དང་སེམས་ཅན་ལ་ཕན་འདོད་ཀྱི་བློ་དང་མི་ལྡན་པའི་དམ་ཉམས་ལ་མ་གཏད་ཅིག །ལུང་དང་གདམས་པ་མ་ཐོབ་པར་རང་དགར་མ་འཇུག་ཅིག༔ གལ་ཏེ་དེ་ལྟར་བྱེད་པ་བྱུང་ན་གཤེད་ཆེན་སྡེ་བཞིས་སྲོག་འཁོར་རྣམ་བཞི་མྱུར་དུ་ཆོད་ཅིག །དྭངས་མ་བསྡུས་ལ་རྣམ་ཤེས་ཆོས་ཀྱི་དབྱིངས་སུ་སྦ་བར་མཛོད་ཅིག །ཀྱི་ཧོ་བླ་མ་རིན་ཆེན་མདུན་ལས་བྱུང་བ་ཡི། །དགོས་འདོད་གཤིན་རྗེའི་གཤེད་ཀྱི་གདམས་པ་རྣམས། །ལོ་རྒྱུས་ཡོན་ཏན་དབང་དམ་རྫས་རྣམས་གཟུགས། །དེ་ནས་རྟེན་རྫས་ནས་བཟུང་གདམས་གཏད་བར། །རིམ་བཞིན་ཆུ་རི་བུ་ག་མེ། །དྲག་པོ་འདོད་པ་མིག་མེ་མེ་ཆུ་
གཟུགས། །གཟུགས་ཏེ་ཕྱོགས་བདུན་མདའ་ཡི་ཁང་པར་གནས། །ཤོག་དྲིལ་ཐོར་སྡེབས་ལས་རབ་རྒྱ་མཚོ་འདི། །བུང་བས་ཆུ་སྐྱེས་སྦྲང་རྩི་ལེགས་བསགས་ནས། །དམ་པ་ཀུན་གྱི་དགའ་སྟོན་བྱེད་ལྟར་ཤོག །ཡེ་ཤེས་ཐོབ་འདོད་དྲན་ཤེས་རིན་ཆེན་གྱི། །རིན་ཆེ་བསྟན་སྲུང་དད་པ་རྡོ་རྗེ་ཡིས། །བསྐུལ་ཕྱིར་བླ་མའི་ཞལ་གྱི་བདུད་རྩི་མཆོག །ལེགས་བསགས་བསྟན་པ་བསྲུང་བའི་དགའ་སྟོན་བྱས། །ལེགས་སོ་ལེགས་པར་ཉམས་སུ་ལོངས་དང་སྨྲ། །རྒྱལ་བ་སྲས་བཅས་བདེན་པའི་བྱིན་རླབས་དང་། །འདི་ཡི་དགེ་བས་སྤྱི་དགོས་རྒྱུ་འདྲ་དང་། །བསྟན་དང་ཆོས་བྱེད་སེམས་ཅན་རྣལ་འབྱོར་ལ། །བཙན་ཐང་ཐོག་བབ་བྱེད་པ་དགོས་དགྲའི་སྙིང་། །གཤིན་རྗེ་ཐམས་ཅད་འདུས་པའི་ངོ་བོ་ཉིད། །གནམ་ལྕགས་རྒྱ་གྲམ་འབར་བས་དུམ་བུར་གཏུབ། །རུས་སྦལ་ནག་པོས་སྲོག་གཅོད་སྙིང་ཁྲག་འཇིབ། །སྤྱི་དགྲ་དང་ནི་སློབ་མ་དམ་ཉམས་རྣམས། །གནམ་ལྕགས་སྡིག་པས་སྲོག་རྩ་དམར་པོ་ཆོད། །དམ་ཚིག་གཅིག་ཀྱང་མཆེད་ལ་འཁུ་བ་རྣམས། །བསེ་ཡི་སྦལ་པ་ནག་པོས་ཤ་ཁྲག་ཟོ། །གནོད་བྱེད་སྔགས་པ་ནག་པོ་ཐམས་ཅད་ནི། །སྦལ་པ་དམར་པོས་སྲོག་སྙིང་བསྐོར་ཞིང་
སོང་། །བསྟན་དགྲ་མུ་སྟེགས་བོན་པོ་ནག་པོ་རྣམས། །དུག་གི་ཕག་རྒོད་ནག་པོས་བསྒྲལ་བར་གྱིས། །གཤེད་ཆེན་སྡེ་བཞིས་སྲོག་འཁོར་རྣམས་བཞི་ཆོད། །གཤིན་རྗེ་གནོད་སྦྱིན་ཁྲག་གཏོར་དལ་ཡམ་ཕོབ། །བདུད་མོ་ཁྲོ་གཉེར་ལྕགས་ཀྱུས་དགྲ་སྙིང་ཟུངས། །མོན་པ་གསོད་བྱེད་གནམ་ལྕགས་ཐོགས་མདའ་ཕོབ། །སྤྲུལ་པའི་ཁྱི་མོ་དགྲ་བོའི་བླ་ཕྱིར་རྒྱུག །གནམ་ལྕགས་བྱ་ཡི་ཁོང་ནས་ཙིཏྟ་ཕྱུང་། །དུག་སྦྲུལ་ནག་པོས་སྙིང་ལ་དུག་མདའ་རྒྱོབ། །གདུག་པའི་རུས་སྦལ་ནག་པོས་བླ་ཚེ་ཁུག །དམ་ཉམས་དགྲ་བོའི་རང་གཤེད་རང་ལ་ཕོབ། །ཁ་ཁ་ཁཱ་ཧི་ཁཱ་ཧི་དགྲ་བོ་མཱ་ར་ཡ། །གཤིན་རྗེའི་དམག་ཚོགས་རབ་ཏུ་དགྱེས་པར་བགྱི། །རྣམ་ཤེས་ཆོས་ཀྱི་དབྱིངས་སུ་སྦ་བར་མཛོད། །སྤྱི་དགོས་རུ་ཏྲའི་མིང་ཡང་མེད་པར་གྱིས། །ཕན་བདེ་འབྱུང་གནས་བསྟན་པ་འཕེལ་གྱུར་ནས། །འགྲོ་ཀུན་རྟག་ཏུ་བདེ་བའི་གནས་ཐོབ་ཤོག །ཚུལ་འདི་ལེགས་པར་གཤིན་རྗེའི་མན་ངག་མཆོག །བཀའ་རྒྱ་པ་ཡི་ལུགས་ཞེས་རྣལ་འབྱོར་པ། །ཛྷཱ་ན་རིན་ཆེན་སྨྲ་མོད་སྐྱེས་བུ་རྣམས། །ཚིག་དོན་ལེགས་པར་ཚོལ་དང་མངོན་སུམ་གསལ། །ཨྠྀི༔ སངས་རྒྱས་བསྟན་དགྲ་མ་ལུས་འདུལ་བ་
དང་། །བསྟན་པའི་ཕྲིན་ལས་ཐམས་ཅད་འགྲུབ་པར་ཤོག། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།