བཅོམ་ལྡན་འདས་འཇམ་དཔལ་སྤྱི་གཤེད་པད་མ་ནག་པོའི་སྒྲུབ་ཐབས་ལས་མཐའ་དུག་གི་སོག་ལེ་ནག་པོའི་ལོ་རྒྱུས།
བཅོམ་ལྡན་འདས་འཇམ་དཔལ་སྤྱི་གཤེད་པད་མ་ནག་པོའི་སྒྲུབ་ཐབས་ལས་མཐའ་དུག་གི་སོག་ལེ་ནག་པོའི་ལོ་རྒྱུས་དང་ཡིན་ལུགས་བརྗོད་པ་བྷི་ཛ་ཧ་རཾ༔ ཁ་ཐཾ༔ རྒྱ་རྒྱ་རྒྱ༔
འཇམ་དཔལ་ནག་པོ་ལ་ན་མོ༔ བདག་འདྲ་པདྨ་འབྱུང་གནས་ཀྱིས༔ ཕྱི་རབས་དུས་ཀྱི་ཐ་མ་ལ་ཡ་བནེ་དཔུང་ཆུང་དོན་དུ་ནི༔ པདྨ་བདག་གི་ཐུགས་བཅུད་ཕྱུངས༔ འཇམ་དཔལ་གཤིན་རྗེའི་ལས་མཐའ་བསྟན༔ དམ་ལྡན་རྣལ་འབྱོར་སྙིང་ལ་ཆོངས༔ དམ་མེད་ལག་ཏུ་མ་སྤེལ་ཅིག༔ ས་མ་ཡ༔ དེ་ལ་དང་པོ་ལྷ་སྒོམ་དང་སྒྲུབ་པ་དང་༔ སྲུང་མ་སྐུལ་བ་དང་༔ དགྲ་བགེགས་བསད་པ་དང་༔ སྲུང་བའི་འཁོར་ལོ་དང་༔ བསད་པའི་འཁོར་ལོ་དང་༔ ཇག་རྐུན་འཆིང་བ་དང་༔ དགྲ་བོ་བྱད་མ་མནན་པ་དང་༔ ལས་ཀྱི་མཐའ་
བསྡུས་སྦྱིན་སྲེག་དང་༔ ཕྲིན་ལས་ཁ་བསྒྱུར་བ་དང་བཅུའོ༔ དང་པོ་ལོ་རྒྱུས་ནི༔ སྔོན་འདས་པའི་དུས་ན་མུ་སྟེགས་ཀ་ལ་ཞེས་བྱ་བའི་འཁོར་དུ་མུ་སྟེགས་བརྒྱ་ཕྲག་ལྔ་ཙམ་གྱིས༔ ཐུབ་པའི་བསྟན་པ་སྣུབ་པའི་ཆེད་དུ་ངན་སྔགས་ཀྱིས་རྒྱ་གར་རྡོ་རྗེ་གདན་སོགས་འཇིག་པ་ལ་ཐུག་པའི་ཚེ༔ དུས་གསུམ་གྱི་སངས་རྒྱས་བཀའ་ཡི་བགྲོ་བ་མཛད་པ་ལས༔ འཇམ་དཔལ་ཁྲོ་ཆུ་དུག་གདོང་འདི་བྱད་ཁ་ཟློག་པ་ལ་མྱུར་བ་ལྟར༔ དགྲ་བགེགས་བསད་པ་ལ་མེ་ལྕེ་བས་ཚ༔ གློག་དམར་བས་མྱུར༔ ཐོག་མདའ་དང་འདྲ་སྟེ། གཤིན་རྗེ་འདི་བས་ལྷག་པའི་ལྷ་མེད་གསུངས་ནས་སྒྲོས་
མཛད༔ དེ་ཅིའི་ཕྱིར་ན༔ ལས་ཀྱི་གཤིན་རྗེ་ཡ་མ་ར་ཙའི་ལྟོ་བ་སྟོང་གསུམ་ཆེ་བའི་ནང་དུ་གཤིན་རྗེ་ཆོས་རྒྱལ་བཞུགས༔ གཤིན་རྗེ་ཆོས་རྒྱལ་གྱི་ལྟོ་བའི་ནང་དུ་གཤིན་རྗེ་ཁྲོ་ཆུ་བཞུགས་གཤིན་རྗེ་ཁྲོ་ཆུའི་ལྟོ་བའི་ནང་དུ་རིགས་དྲུག་གི་སེམས་ཅན་ཐམས་ཅད་དེར་ཆགས་པའོ༔ དེ་ནས་སྲིད་པ་གསུམ་ལ་གཤིན་རྗེ་བས༔ འདི་བས་ལྷག་པའི་ལྷ་མེད་པས་སྲིད་པ་གསུམ་སྟོང་གསུམ་སྟོང་པར་འདོད་ཀྱང་༔ ཁྲོ་ཆུ་ཁོ་རང་དབང་ཆེ་བས་བྱད་མ་མུ་སྟེགས་ཙམ་ལ་ལྟ་ཅི་སྨོས༔ ཞེས་གསུངས་སོ༔ དེར་རིགས་གསུམ་མགོན་པོས་དབང་བསྐུར༔ དུས་གསུམ་གྱི་སངས་རྒྱས་ཀྱི་སྤྱན་སྔར་ཁས་བླངས༔ ཁྲོ་ཆུ་ཞེས་པའི་མཚན་གསོལ༔ སློབ་དཔོན་པདྨས་དུག་གདོང་མངའ་གསོལ༔ གང་སྒྲུབ་བུ་བཞིན་སྐྱོང་༔ དེར་གནོད་པའི་དགྲ་བགེགས་སྒྲོལ་བར་ཞལ་གྱིས་བཞེས་པའི་ལྷ་ཡིན་ཏེ༔ ཡི་དམ་ཆོས་སྐྱོང་གང་ཡིན་ཀྱང་རྣལ་འབྱོར་པ་རང་ལ་རག་གསུངས༔ དེ་ནས་གཤིན་རྗེ་ཁྲོ་ཆུ་ལས་ལ་དགའ་སྟེ༔ ཞག་བདུན་གྱི་ཕྱིར་ནང་མུ་སྟེགས་ཀ་ལ་ནག་པོ་འཁོར་མུ་སྟེགས་བརྒྱ་ཕྲག་དང་བཅས་པ་ཁྲག་སྐྱུག་ནས་ཤིའོ༔ དེ་ནས་རྒྱ་གར་བྷ་ར་དྷ་ཛཱ་ཞེས་པའི་གནས་དེ་ཡི་ལྷོ་ཕྱོགས་དུར་ཁྲོད་གན་འཇང་
ཞེས་པར༔ རིགས་གསུམ་མགོན་པོ་གཅིག་ཏུ་དྲིལ་བའི་གཤིན་རྗེ་ཐམས་ཅད་གཅིག་ཏུ་བསྒྱུར་ནས་ཁྲོ་ཆུའི་སྤྲུལ་པ་འགྱེད་དེ༔ ཕྱི་རབས་དུས་ཀྱི་ཐ་མ་ལྔ་བཅུ་ཁ་རལ་ལ་འབྱུང་བའི་དུས༔ སྤྱིར་སངས་རྒྱས་བསྟན་པ་ལ་དགྲ་དར་ན༔ བླ་མ་ལ་ཁྱད་དུ་གསོད༔ མཆེད་གྲོགས་ནང་དམེ་བྱེད༔ སྔགས་པ་དགྲར་ལང་མང་༔ རྣལ་འབྱོར་པ་ལ་མི་རྩི་བའི་དགྲ་རྐུན་མང་༔ ཕྱུགས་ཀྱང་ནོར་ཟད་ལ་ཐུག༔ ནད་དང་ཤི་ཆད་མང་༔ ཐན་དང་ལྟས་ངན་མང་དུ་བྱུང་བ་དང་་ཁྲོ་ཆུ་དུག་གདོང་མ་གཏོགས་ལྷ་གང་ལ་ཡང་འདུལ་བའི་སྐལ་པ་མེད༔ ༈ ཕྱི་མའི་དུས་ཀྱི་ཚེ་ལའང་ལས་མཁན་རྣམས་རང་དབང་ཆེ་བས་ཁྲོ་ཆུའི་རྣལ་འབྱོར་པ་ཕེབས་བྱུང་བས་ལས་མཁན་རྣམས་ལ་ཕྱག་གྱིས་ཤིག༔ ཞེས་ཆོས་རྒྱལ་གྱི་ཞལ་ནས་གསུངས་སོ༔ ༈ ད་ལྟ་ལྷོ་ཕྱོགས་རིམ་པ་བདུན་གྱི་ས་འོག་ཏུ་གནམ་ལྕགས་ཀྱི་ཁང་སྒྲོམ་འབར་བའི་ནང་དུ་བཞུགས་ཀྱང་༔ འཇིག་རྟེན་འདིར་ཉིན་རེ་བཞིན་དུ་ལེགས་ཉེས་ཐམས་ཅད་རྩིས་ལ་འདེབས་པ་དང་༔ རྣལ་འབྱོར་གྱི་རྟགས་དང་དྲོད་ཚད་ཉུལ་བ་དང་༔ སྒྲུབ་པའི་ཚོགས་ཁང་ཐམས་ཅད་འགྲིམ་པ་ཡིན་པས་ཁྲོ་ཆུ་སྒྲུབ་ཐག་ཉེ་བ་ཡིན་ནོ༔ སྔགས་པ་ནང་འགྲས་
བྱུང་ནའང་ཕ་རོལ་གྱི་ལྷ་གང་བསྒྲུབས་ཐམས་ཅད་ཚུར་རང་གི་སྲུང་མར་བསྐོས་ཏེ༔ བྱད་མའི་གཤེད་དུ་ཕབ་ནུས་པའི་སྟོབས་ཡོད་ངེས་པས་གཞན་ལས་ལྷག་པའི་ལྷ་གཤིན་རྗེ་ཡིན་ནོ། ཁྱད་པར་མུ་སྟེགས་དང་ཐོན་ལ་མྱུར༔ དེ་ནས་ཡིན་ལུགས་བརྗོད་པ་ནི་དབུའི་མཆོད་རྟེན་གསུམ་གྱི་ནང་དུ་ནི་དུས་གསུམ་གྱི་སངས་རྒྱས་བཞུགས༔ དབུ་གསུམ་རིགས་གསུམ་གྱི་མགོན་པོ༔ དབུ་རྒྱན་ཐོད་སྐམ་ལྔ་ནི་རྒྱལ་བ་རིགས་ལྔ༔ ཐུགས་ཀ་ན་འཇམ་དཔལ་རིགས་ལྡ༔ ཕྱི་རོལ་གསེར་གྱི་འཁོར་ལོ་རྩིབས་སྟོང་དང་ལྡན་པའི་ནང་དུ་བསྐལ་བཟང་གི་སངས་རྒྱས་སྟོང་རྩ་གཉིས་ཡོད་པའི་ལྷ་མ་ཚང་བ་མེད་པ༔ རྫུ་འཕྲུལ་རྣོ་མྱུར་དྲག་རྩལ་དང་ལྡན་པ་དེ་ལྟ་བུའོ༔ སངས་རྒྱས་ཀྱི་ཞིང་ཁམས་ཐམས་ཅད་རིན་པོ་ཆེ་སྣ་བདུན་གྱིས་བཀང་ནས་དུས་གསུམ་གྱི་སངས་རྒྱས་ཐམས་ཅད་མཆོད་པའི་བསོད་ནམས་བས་ཀྱང་འཇམ་དཔལ་ཁྲོ་ཆུ་དུག་གདོང་ལ་ལན་གཅིག་མཆོད་པ་བསོད་ནམས་ཆེའོ༔ ཞེས་སློབ་དཔོན་པདྨས་གསུངས་སོ། དེ་ལྟར་མཚན་ནས་བརྗོད་པ་དང་༔ བསྐུལ་པ་དང་གཡབ་མོས་ཀྱང་དགྲ་བགེགས་ཕྲན་བུ་ཙམ་ལ་ཅི་སྨོས༔ དེ་གང་ཞེ་ན་སངས་རྒྱས་སྟོང་རྩ་གཉིས་ཀྱི་མཐུ་སྟོབས་ཁྲོ་ཆུ་དུག་གདོང་ལ་
བསྟིམས་ནས་དབང་བསྐུར༔ ལྷ་འདྲེ་མི་གསུམ་གྱི་དང་བན་བོན་བརྒྱ༔ བྱད་མ་ལྷ་སྲུང་འབུམ་ཕྲག་ཙམ་ཡང་ཞག་བདུན་ནས་བརླག་པར་ཁས་བླངས༔ དགྲ་བགེགས་བྱད་མ་ལྷ་ཚངས་པའི་ཚེ་དང་ལྡན་པ་ཡང་ཞག་གསུམ་ནས་ཁ་ནས་ཁྲག་སྐྱུག་ནས་གྲིར་གསོད་པར་ཞལ་གྱིས་བཞེས་ནས་རྡོ་རྗེའི་ཐ་ཚིག་བཞག༔ དགྲ་བགེགས་བྱད་མའི་མཐུ་དང་ནུས་པ་ཆེ་བ་དང་༔ སྲུང་ཟློག་མང་ཡང་ལོག་སྡུག་འཁྱམས་གསུམ་མེད་པར་ཕྲིན་ལས་བཅོལ་ནས་སྤྱི་གཤེད་ཡ་མ་ནག་པོར་གྲགས་ཏེ༔ དེ་ལྟར་གཤིན་རྗེ་ཁྲོ་ཆུ་དུག་གདོང་ལས་ལྷག་པའི་ལྷ་མེད་པར་སློབ་དཔོན་པདྨས་གསུངས་སོ༔ སྒྲུབ་ཐབས་ལོ་རྒྱུས་ཀྱི་ལེའུ་སྟེ་དང་པོའོ༔ ས་མ་ཡ༔ དེ་ནས་ལྷ་བྷྱོ་པའི་རིམ་པ་ནི༔ རང་རྟོགས་པ་མཐོ་ཞིང་ཡི་དམ་གྱི་བསྙེན་སྒྲུབ་ཚད་ལྡན་སྐྱེལ་བའི་རྣལ་འབྱོར་པ་ཡིན་ན༔ རང་ཡི་དམ་གསལ་བའི་མདུན་དུ་ཆོས་སྐྱོང་བའི་ཚུལ་དུ་ཁྲོ་ཆུ་དུག་གདོང་གཞུང་ལྟར་བསྐྱེད༔ བར་དུ་བྲུབ་ཁུང་དགྲ་བགེགས་བསྐྱེད༔ ཅི་བཅོལ་སྒྲུབ་པར་ཁས་བླངས་པར་བསམ༔ དེ་ལྟར་སྒྲུབ་པའི་ཐུན་མཚམས་སུ་གཏོར་མ་འབུལ་བ་དང་སྲུང་མ་བསྐུལ་ལོ༔ ཕྲིན་ལས་གང་བྱེད་ཀྱང་གཞུང་དང་མཐུན་ནོ༔ རང་རྟོགས་པ་
དམའ་བ་དང་ཡི་དམ་གཞན་གྱི་ཁོག་མི་ཕུབ་ན༔ རང་ཉིད་སྐད་ཅིག་དྲན་རྫོགས་སུ་ཁྲོ་ཆུ་དུག་གདོང་བསྐྱེད༔ དབུ་གསུམ་གྱི་སྟེང་དུ་རིགས་གསུམ་མགོན་པོ་བསྐྱེད༔ མདུན་དུ་བཀའ་སྲུང་གཟའ་བདུད་མཁའ་འགྲོ་དུག་ཏི་ནག་པོ༔ བདུད་པོ་ལྕམ་དྲལ༔ ཡ་མ་རཱ་ཙ་རྣམས་བསྐྱེད༔ བར་དུ་བྲུབ་ཁུང་དགྲ་བགེགས་བསྐྱེད༔ ཡ་མ་རཱ་ཙ་ལས་མཁན་དུ་བསམ༔ བཀའ་སྲུང་རྣམས་ཀྱིས་ཅི་སྒྲུབ་པར་ཁས་བླངས་པར་བསམ་ལ་ཐུན་མཚམས་སུ་གཏོར་མ་འབུལ༔ ཕྲིན་ལས་གང་བྱེད་ཀྱང་གཞུང་དང་མཐུན་ནོ༔ ལྷ་སྒོམ་པའི་རིམ་པ་སྟེ་གཉིས་པའོ༔ ས་མ་ཡ༔ རྒནཉམྦུ༔ དེ་ནས་སྒྲུབ་པ་བྱ་བའི་རིམ་པ་ནི༔ དཀྱིལ་འཁོར་མདའ་གང་ཙམ་ལ་མཎྜལ་གྲུ་བཞི་བྱས་ཏེ༔ དུག་ཁྲག་དང་རོ་སོལ་གྱིས་ནག་པོར་བྱུག༔ ཆོས་འབྱུང་གྲུ་གསུམ་བསྣོལ་མ་བྲིས་པའི་དབུས་སུ་པདྨ་འདབ་དྲུག་བྱ་འདབ་དྲུག་དབུས་དང་བདུན་དུ༔ འབྲུ་ནག་གི་གཏོར་མ་ལ་ཤ་ཁྲག་དང་ཐུན་རྫས་སྣ་ཚོགས་ཀྱིས་བརྒྱན་པ་བཤམས༔ སྟེང་དུ་ཨོཾ་བཙུགས༔ སྣོད་དུ་སྒྲུབ་གཏོར་རིན་ཆེན་འབར་བ་བཤམས༔ དེའི་གཡས་གཡོན་དཀྱིལ་གསུམ་དུ་སྲུང་ཟློག་བསད་གསུམ་གྱི་སྔགས་བཞུགས་སོ༔ ལོགས་སུ་གཏོར་ཟློག་གཞུང་
ལྟར་བཅས་ལ་བཞག་གོ༔ གཏོར་ཟློག་འོག་ཏུ་དགྲ་བོ་བྱད་མའི་ལིང་ག་དཔེའུ་རིས་ལྟར༔ གང་བྱེད་པ་ལྟར་བྲིས་ལ༔ གཟུ་དཔང་བཀུག་གཞུག་ལྷ་དབྱེ་སོགས་བྱས་ལ་བཞག་གོ༔ དེ་ནས་སྨན་རཀ་གཏོར་གསུམ་མཆོད་པ་སོགས་དང་༔ ཁྱད་པར་ཁྲག་གི་ཡོན་ཆབ༔ དབང་པོ་ལྔ་ཡི་མེ་ཏོག༔ ཚིལ་ཆེན་གྱི་བདུག་སྤོས༔ ཞུན་ཆེན་གྱི་སྣང་གསལ༔ མཁྲིས་པའི་དྲི་ཆབ༔ ཤ་ཁྲག་གི་ཞལ་ཟས༔ རྔ་གླིང་རོལ་མོ་ལ་སོགས་དྲག་པོའི་རོལ་ཆས་དང་ལྡན༔ སྟ་གོན་བྱས་ལ༔ ཨོཾ༔ གསང་སྒྲུབ་ཀྱི་མཆོད་གཞུང་གབ་པ་སྡེ་དགུའི་དམག་གི་གད་རྒྱང་ནག་པོ་བཞུགས་སོ༔ སྐྱབས་འགྲོ་སེམས་བསྐྱེད་ཚད་མེད་པ་སོགས་སྔོན་འགྲོ་གཞུང་ལྟར་ལས༔ ཨོཾ་སྭ་བྷ་ཝ་ཤུདྡྷསོགས། དཀྱིལ་འཁོར་མི་དམིགས་པ་སྟོང་པ་ཉིད་དུ་གྱུར༔ མདུན་དུ་ཆོས་འབྱུང་དམར་ནག་གྲུ་གསུམ་བསྣོལ་མ་དང་བྱད་མ་ཉི་ཟླ་པདྨའི་གདན་གྱི་སྟེང་དུ༔ སྐད་ཅིག་གིས་བརྫུས་སྐྱེས་སུ་ལས་ཀྱི་གཤིན་རྗེ་ཁྲོ་ཆུ་དུག་གདོང་སྐུ་མདོག་དམར་ནག་མེ་ལྟར་འབར་བ༔ ཞལ་གསུམ་ཕྱག་དྲུག་པ་ཞལ་གཡས་ལྗང་བ༔ གཡོན་དམར་བ་དབུས་མཐིང་ནག་ཏུ་འབར་བ༔ སྤྱན་དགུ་སྡང་མིག་བགེགས་ལ་གཟིར་བ༔ ཞལ་གདངས་བ་
ལྗགས་འདྲིལ་བ་མཆེ་བ་ཟངས་ཡག་ཏུ་གཙིགས་པ་དབུ་གསུམ་གྱི་སྟེང་དུ་དུག་ལྕགས་ཁྲོ་ཆུའི་མཆོད་རྟེན་གསུམ་དང་ལྡན་པ་སྟེ༔ སྲིད་པའི་རྩེ་མོར་སླེབ་པ༔ ཕྱག་དྲུག་གཡས་གསུམ་གྱིས་དགྲ་སྣ་ནམ་མཁའ་ལ་ཕྱར་བ་སྣང་སྲིད་ཀྱི་ལྷ་འདྲེ་བསྔང་བར་བྱེད་པ༔ གཡོན་གསུམ་གྱིས་དགྲ་བགེགས་བྱད་མའི་ཙིཏྟ་བསྣམས་པས་དགྲ་བོ་བྱད་མའི་ཤ་ཁྲག་གསོལ་བ༔ སྤུ་གྲི་གཡས་སུ་གདེངས་བས་བྱད་མ་ཕོ་རྒྱུད་རྩད་ནས་གཅོད་པ༔ རལ་གྲིའི་གཤོག་པ་གཡོན་དུ་བསྐྱངས་པས་དགྲ་བོ་མོ་རྒྱུད་རྡུལ་དུ་བརླགས་པ༔ སྐུ་སྐེད་ཕོ་མཚན་ཆུ་སྲིན་གྱི་ཁ་གདངས་བས་སྐྱེ་འགྲོའི་ཚེ་སྲོག་གཅོད་པར་བྱེད་པ༔ སྐུ་སྨད་གནམ་ལྕགས་ཀྱི་ཕུར་པ་ཟུར་གསུམ་པ་སྦྲུལ་ནག་གི་ཆུན་པོའི་རྒྱན་པ་ལ་དུག་ཁྲག་གི་ངར་དང་ལྡན་པ་ཡིས་དགྲ་བོ་བྱད་མ་ལྷ་སྲུང་གི་སྙིང་ལ་གཟིར་བ༔ སྐུ་སྟོད་གླང་ཆེན་གྱི་ཀོ་བས་གཡོགས་ཤིང་༔ ཞིང་ཆེན་པགས་པས་སྐེད་དཀྲིས་ཤིང་སྦྲུལ་ནག་གིས་བརྒྱན་པས་ཁྲོ་ཆས་ཡོངས་སུ་རྫོགས་པ༔ མི་མགོ་སྐམ་པོ་ལྔའི་དབུ་བརྒྱན་ཞིང་༔ རློན་པ་ཁྲག་འཛག་པ་ལྔ་བཅུ་རྩ་གཅིག་གིས་དོ་ཤལ་འཕྱང་བ༔ བ་སྤུ་བུ་ག་ཐམས་ཅད་ནས་རང་འདྲ་བའི་ཁྲོ་ཆུང་གི་ཚྭ་ཚྭ་དཔག་ཏུ་མེད་པ་
འཕྲོ་བ༔ ཤིན་ཏུ་འཇིགས་པའི་ཉམས་དང་ལྡན་པ༔ དུག་རླངས་མེ་རི་འབར་བའི་ཀློང་དཀྱིལ་ན་བཞེངས་པའོ༔ ཆོས་འབྱུང་ཟུར་དྲུག་རྩིབས་དྲུག་གི་སྟེང་དུ༔ མདུན་དུ་ཆོས་འབྱུང་ལ་དགྲ་བགེགས་བྱད་མའི་སྟེང་དུ༔ འཆི་བདག་ནག་པོ༔ གཡས་སུ་ཆོས་འབྱུང་ཟུར་གཉིས་ལ་ཚེ་བདག་ནག་པོ་བྷེ་ཝ་ས་ཏ༔ གཡོན་དུ་ཆོས་འབྱུང་ཟུར་གཉིས་ལ་སྲོག་བདག་ནག་པོ་ཟ་བ་ལྗང་ནག༔ དེ་ལྔ་པོ་ཐམས་ཅད་ཞལ་གཅིག་ཕྱག་གཉིས་དགྲ་སྟ་ཙིཏྟ་བསྣམས་པ༔ རྒྱབ་ཏུ་ཆོས་འབྱུང་གི་རྩིབས་སྟེང་དུ་ཡ་མ་རཱ་ཙ་སྐུ་མདོག་མཐིང་ནག་ཞལ་གསུམ་ཕྱག་དྲུག་པ༔ ཆུ་སྲིན་སེངྒེ་ཕག་རྒོད་དབུ་ཅན༔ སྤྱན་དགུ་བར་སྣང་ལ་གཟིགས་པ་སྡེ་བརྒྱད་ལས་ལ་བསྐུལ་བ༔ ཡ་ཁ་གནམ་དུ་གདངས་ཤིང་མ་ཁ་ས་ལ་སླེབས་པ༔ མཆེ་བ་བཅུ་གཉིས་གངས་རི་ལྟ་བུར་གཙིགས་ཤིང་ལྗགས་གསུམ་བར་སྣང་གི་ཁམས་སུ་བསྐྱངས་བས་དགྲ་བོ་ཟས་སུ་ཟ་བ༔ འཇིགས་པའི་གཟུགས་ཅན་དྲག་པོའི་ཆ་ལུགས་དང་ལྡན་པའོ༔ ཀུན་ཀྱང་སྐུ་སྨད་ཁྲོ་ཆུའི་ཕུར་པ་ཟུར་གསུམ་རྣོ་ངར་དང་ལྡན་པ༔ སྐེད་པ་ཆུ་སྲིན་གྱི་ཞལ་གདངས་བས་དགྲ་བོའི་སྲོག་གཅོད་པ༔ སྤུ་གྲི་རལ་གྲིའི་
གཤོག་པ་བར་སྣང་གི་ཁམས་སུ་བསྐྱངས་བ༔ ཁྲོ་ཆས་ཡོངས་སུ་རྫོགས་པར་གསལ་བའི་འཁོར་དུ་ལས་གཤིན་བྱེ་བ་ས་ཡ་དགྲ་ལ་རྔམ་པ༔ བགེགས་ལ་འཇིགས་པ་རྫུ་འཕྲུལ་མཐུ་སྟོབས་དང་ལྡན་པའོ༔ དེའི་མདུན་དུ་བཀའ་གཉན་སྲུང་སྡོད་ལ་གཟའ་བདུད་ཀྱི་རྒྱལ་པོ་རཱ་ཧུ་ལ་སྐུ་མདོག་དུད་ཁ་དབུ་དགུ་པ༔ རྩ་ཞལ་དམར་ནག་གཟའ་བདུད་དངོས་དང་མགོ་བརྒྱད་སྡེ་བརྒྱད་ཀྱི་མགོ་ས༔ དབུ་དགུ་བྱ་རོག་མགོ་ཡིས་བསྟན་པ་སྲུང་བའོ༔ ཕྱག་བཞི་དང་པོ་གཉིས་ཆུ་སྲིན་གྱི་རྒྱལ་མཚན་དང་མདའ་གཞུ༔ འོག་མ་གཉིས་ཀྱིས་རལ་གྲི་དང་སྦྲུལ་ཞག་འཛིན་པའོ༔ མགོ་ལུས་ཐམས་ཅད་མིག་གིས་གང་བ༔ ལྟོ་བ་སྲིད་གསུམ་ཤར་ནས་ཟ་བའི་ཁ་ཆེའོ༔ སྐུ་སྨད་སྦྲུལ་འཇུག་རྒྱལ་མཚོ་དཀྲུགས་པས་ཀླུ་དང་ས་བདག་ལས་ལ་འཁོལ་བ༔ སྐུ་སྟོད་ནམ་མཁའི་དབྱིངས་སུ་འདུག་པས་ལྷ་སྲིན་སྡེ་བརྒྱད་ཕོ་ཉར་འགྱེད་པ་་འཇམ་དཔལ་གཤིན་རྗེ་ཁྲོ་ཆུ་དུག་གདོང་གི་བཀའ་ཉན་གསུང་སྡོད་ཀྱི་ཚུལ་དུ་བཞུགས་པར་བསྐྱེད༔ དེའི་མདུན་དུ་ཡུམ་གཏུམ་མོ་དུག་ཧྲུལ་མ་སྐུ་མདོག་དམར་ནག་ཞལ་གཅིག་ཕྱག་གཉིས་སྤྱན་གསུམ་དང་ལྡན་པ༔ ཕྱག་གཡས་ལྕགས་ཀྱུ་ནམ་མཁར་ཕྱར་
ཞིང་༔ གཡོན་པའི་ཞགས་པས་དགྲ་བགེགས་ཆིངས་བར་བྱེད་པ༔ རེ་ལྡེ་ནག་པོའི་ན་བཟའ་དང་རྨ་བྱའི་མདོངས་ཀྱིས་དབུ་གཙུག་བརྒྱན་པ༔ ཞིང་ཆེན་གསར་པའི་ཤམ་ཐབས་ལ་སྦྲུལ་ནག་གི་སྐུ་རེགས་བཅིངས་བ༔ ཞབས་གཉིས་གར་ཐབས་སུ་དགྲ་བགེགས་རུ་ཏྲའི་གདན་ལ་བཞུགས་པ༔ དེའི་མདུན་དུ་སྲོག་བདག་སྔགས་པ་སྡེ་དྲུག༔ བཀའ་སྲུང་བདུད་པོ་ལྕམ་དྲལ༔ དམ་ཅན་གཤིན་རྗེའི་ལྕམ་མོ་མ་གཅིག་ལྷ་མོ་དུད་པའི་སོལ་བ་མོ༔ ཡང་འཁོར་དྲེགས་པ་སྡེ་བརྒྱད་དང་བཅས་པ་གསལ་བར་གྱུར༔ གཙོ་བོའི་ཐུགས་ཀར་ཧཱུྃ་ཡིག་མཐིང་ནག་དང་ཡཱ་ཡིག་དམར་ནག་ལས་འོད་ཟེར་འཕྲོས་པས༔ ལྷོ་ཕྱོགས་རིམ་པ་བདུན་གྱི་ས་འོག་ལས་ཀྱི་གཤིན་རྗེའི་ཞིང་ཁམས༔ འབྱུང་བ་ཚ་གྲངས་འཁྲུགས་པའི་ཕོ་བྲང་ནས་འཇམ་དཔལ་གཤིན་རྗེ་ཁྲོ་ཆུ་དུག་གདོང་ནག་པོ༔ འཁོར་ལས་གཤིན་དང་ཕོ་ཉ་བཀའ་སྲུང་སྡེ་བརྒྱད་དང་བཅས་པ་ཐམས་ཅད་དགྲ་བོ་བྱད་མ་བསྒྲལ་ཕྱིར་སྐད་ཅིག་ཙམ་གྱིས་དྲག་པོའི་ལས་ལ་གནས་འདི་རུ་སྤྱན་དྲངས་པར་གྱུར༔ ཅེས་བསྐྱེད་པ་ལྟར་དམིགས་པ་གསལ་བཏབ་ལ༔ རྔ་གླིང་རོལ་མོའི་དབྱངས་དང་བཅས་པས་སྤྱན་དྲངས་ཤིང་དྲག་ཏུ་འདི་བརྗོད་དོ༔
ཧཱུཾ་ཡ་བྷྱོ༔ དད་པ་དང་ནི་དམ་ཚིག་གི༔ ཚུར་གཤེགས་ཚུར་བྱོན་ལས་ཀྱི་གཤིན་རྗེའི་ཚོགས༔ ལྷོ་ཕྱོགས་རིམ་པ་བདུན་གྱི་ས་འོག་ནས༔ སྲོག་ལ་རྔམས་པའི་གཤིན་རྗེ་ནག་པོ་ནི༔ ཁྲོ་ཆུ་དུག་གདོང་དགྲ་བགེགས་བྱད་མའི་གཤེད་མ་གཡེལ་མ་འདའ་རིགས་གསུམ་སྤྲུལ་པའི་ལྷ་་་་རྣལ་འབྱོར་བདག་གི་གདུང་བས་འབོད་ལགས་ན༔ མ་ཐོགས་མྱུར་དུ་གནས་འདིར་གཤེགས་སུ་གསོལ༔ ཚེ་བདག་འཆི་བདག་སྲོག་བདག་གཅིག་བསྡུས་པ་རྫུ་འཕྲུལ་དྲག་རྩལ་ཐོགས་མེད་གཤིན་རྗེའི་གཤེད༔ གཞན་གྱི་དོ་ཟླ་མེད་པའི་མཐུ་སྟོབས་ཅན༔ དྲག་པོའི་ལས་ལ་ཐོགས་མེད་གཤེགས་སུ་གསོལ༔ ཡ་མ་རཱ་ཙ་འཆར་ཁ་ཆོས་ཀྱི་རྒྱལ༔ ཨརྱ་མེ་རུ་རལ་པ་ཚལ་དགུ་དང་༔ འཇོམས་བྱེད་ཁ་ཐུན་ཀིང་ཀང་དམར་ནག་སོགས༔ ཐམས་ཅད་གཅིག་བསྡུས་དུག་གདོང་གནས་འདིར་གཤེགས༔ སངས་རྒྱས་སྟོང་རྩ་མཐུ་སྟོབས་དབང་བསྐུར་ནས༔ ལྷ་འདྲེ་མི་གསུམ་བན་བོན་མཐུ་ཆེན་དང་༔ གཏད་མཁན་སྟོང་དང་སྔགས་པ་ནང་རྒྱས་སོགས༔ དགྲ་བགེགས་བྱད་མ་བསྒྲལ་བར་ཁས་བླངས་པའི་སྤྱི་གཤེད་ཡ་མ་ནག་པོ་གཤེགས་སུ་གསོལ༔ ལས་གཤིན་
དྲུག་དང་མོན་བཞི་བདུད་པོ་བཞི༔ གཤིན་ཆེན་སྡེ་བཞི་འཆི་བདག་བཅུ་གཉིས་དང་༔ ཕོ་གཤེད་མོ་གཤེད་མོན་པ་ཕོ་མོ་སོགས༔ དུག་གསུམ་ལས་ལ་གྲུབ་པའི་གཤིན་རྗེ་གསུམ༔ རུ་ཏྲ་སྡེ་བཞི་དང་བཅས་གཤེགས་སུ་གསོལ༔ རིགས་གསུམ་འདུས་པ་རྔ་ཐོགས་སྟོང་གི་ལྷ༔ བྱད་མ་འབུམ་གྱི་སྲོག་གཅོད་སྤུ་གྲི་ས༔ སྔོན་གྱི་ཁས་བླངས་དམ་བཅའ་དྲན་མཛོད་ལ༔ དགྲ་བགེགས་བྱད་མ་བསྒྲལ་ཕྱིར་གཤེགས་སུ་གསོལ༔ ཕྱི་ནང་མཆོད་པ་འབུལ་ཕྱིར་གཤེགས་སུ་གསོལ༔ ཐུགས་དམ་གཉན་པོ་བསྐང་ཕྱིར་གཤེགས་སུ་གསོལ༔ སྲེག་བླུགས་ཞལ་ཟས་འབུལ་ཕྱིར་གཤེགས་སུ་གསོལ༔ བཀའ་ཡི་གཏོར་མ་ལེན་ཕྱིར་གཤེགས་སུ་གསོལ༔ བྱད་དང་དྲོད་གཏོང་བཟློག་ཕྱིར་གཤེགས་སུ་གསོལ༔ ཆག་ཆེན་ཉམ་ང་བཟློག་ཕྱིར་གཤེགས་སུ་གསོལ༔ རྐྱེན་ངན་བར་ཆད་བཟློག་ཕྱིར་གཤེགས་སུ་གསོལ༔ རྣལ་འབྱོར་བདག་གིས་བསྒྲུབ་ཕྱིར་གཤེགས་སུ་གསོལ༔ མ་ཐོགས་མྱུར་དུ་གནས་འདིར་གཤེགས་སུ་གསོལ༔ བྷྱོ་ཡ་ཛཿ དུག་གདོང་སྦྱོར་ཡུམ་གཏུམ་མོ་དུག་ཏི་མ༔ མ་གཅིག་ལྷ་མོ་མཁའ་འགྲོའི་ཚོགས་བཅས་དང་༔ འཇམ་དཔལ་
ཁྲོ་ཆུ་དུག་གདོང་བཀའ་བྱུང་གིས༔ མ་ཐོགས་མྱུར་བར་གནས་འདིར་གཤེགས་སུ་གསོལ༔ བཀའ་སྲུང་གཟའ་བདུད་ཆེན་པོ་གཤེགས་སུ་གསོལ༔ ཕོ་ཉ་སྔགས་པ་སྡེ་དྲུག་གཤེགས་སུ་གསོལ་་་གཏེར་སྲུང་བདུད་པོ་ལྕམ་དྲལ་གཤེགས་སུ་གསོལ༔ ཡང་འཁོར་དྲེགས་པ་སྡེ་བརྒྱད་གཤེགས་སུ་གསོལ༔ ཨོཾ་ཡ་མཱནྟ་ཀཿ ཡ་མ་རཱ་ཙ་ཀཱ་ལ་རུ་པ་དུ་ཏྲི་ཡ་མ་རཱ་ཙ་ཡ་མ་རཀྵ་ཀྲོ་ཏ་པ་ཙ་ལ་ཏི་ཀ་ལ་རུ་པ་ཨ་ཀྲོ་ར་ཙ་ཡ་མ་རཱ་ཙ་ཀ་ལ་ས་མ་ཡ་ཛ་ཛཿ ཛཧཱུྃ་བཾ་ཧོཿ ཨོཾ་མ་མ་ཏྲག་རཀྵ་བྷྱོ་ཛཿ ཀེ་ཏ་རཱ་ཧུ་ལ༔ དུ་ཏྲི་ཤུ་ཏྲི་ཤུ་ལ་ཛཿ ཨ་ཡ་མ་དུ་རུ་ཙ་ཤ་ན༔ བཛྲ་ས་མ་ཡ་ཛཿཧཱུྃ་བཾ་ཧོཿ ཞེས་བཀའ་སྲུང་དང་བཅས་ཏེ་མྱུར་དུ་བྱོན་པར་བསམས་ལ༔ བྷྱོ་ཡ༔ ཆོས་འབྱུང་དམར་ནག་པད་ཉི་རུ་ཏྲ་དང་༔ དགྲ་བགེགས་བྱད་མ་བསྒྲལ་བའི་བམ་གྱི་སྟེང་༔ ཁྲོ་ཆུ་དུག་གདོང་ལས་གཤིན་བཀའ་འཁོར་བཅས༔ དགྱེས་ཤིང་མི་གཡོ་བརྟན་པར་བཞུགས་སུ་གསོལ༔ དུ་ཏྲི་ཡ་མ་རཱ་ཙ་ཡ་མ་རཀྵ་ཀྲོ་ཏ་པ་ཙ་ལ་ཏི་ཀ་ལ་རུ་པ་ཨ་ཀྲོ་ར་ཙ་ཡ་མ་རཱ་ཙ་ཀ་ལ་ས་མ་ཡ་ཏིཥྛ་ལྷན༔ དཀྱིལ་འཁོར་དང་གཏོར་མ་དབྱེར་མེད་པར་བཞུགས་པར་བྷེ༔ བྷྱོ་ཡ༔ རིགས་གསུམ་སྤྲུལ་པའི་འཇམ་དཔལ་གཤིན་རྗེ་
གཤེད༔ ཁྲོ་ཆུ་དུག་གདོང་འཁོར་བཅས་ལ༔ རྣལ་འབྱོར་བདག་གི་ལུས་ངག་གིས༔ རྩེ་གཅིག་གུས་པའི་ཚུལ་གྱིས་ཕྱག་འཚལ་ལོ༔ དུ་ཏྲི་ཡ་མ་རཱ་ཙ་ཡ་མ་རཀཱ་ཀྲོ་ཏ་པ་ཙ་ལ་ཏི་ཀ་ལ་རུ་པ་ཨ་ཀྲོ་ར་ཙ་ཡ་མ་རཱ་ཙ་ཀ་ལ་ཨ་ཏི་པཱུ་ཧོཿ པྲ་ཏི་ཛ་ཧོཿ བྷྱོ་ཡ༔ འཇམ་དཔལ་ཁྲོས་པའི་ལྷ་ཚོགས་གཤིན་རྗེའི་གཤེད༔ ཁྱོད་ལ་མཆོད་འབུལ་དམ་རྫས་ནི༔ དགྲ་བགེགས་བྱད་མ་རྣམས་ནི་བསྒྲལ་བ་ཡི༔ དམར་ཆེན་ཁྲག་གི་ཡོན་ཆབ་དམ་པ་འདི༔ དབང་པོའི་མེ་ཏོག་ཚིལ་ཆེན་བདུག་སྤོས་དང་༔ ཞུན་ཆེན་སྣང་གསལ་མཁྲིས་པའི་དྲི་མཆོག་དང་༔ ཤ་ཁྲག་ཞལ་ཟས་རྐང་གླིང་རྔ་སྒྲ་དང་༔ སྨན་གཏོར་རཀྟ་དགྲ་བགེགས་བླ་ཚེ་དང་༔ ཁ་རྗེ་དབང་ཐང་སྟོབས་དང་ནུས་མཐུ་བཅས༔ ཞལ་དུ་བསྟབ་བོ་བཞེས་ཤིག་ཁ་རཾ་ཁཱ་ཧི༔ དུ་ཏྲི་ཡ་མ་སོགས༔ ས་མ་ཡ་ཨངྒྷཾ་སོགས་ཤབྟ་ཨཱཿཧཱུྃ༔ མ་ཧཱ་པཉྩ་ཨ་མྲྀ་ཏ་རཀྟ་བྷ་ལིཾ་ཏ་ཁཱ་ཧི༔ ཞེས་མཆོད་པའོ༔ ཧཱུྃ༔ ཁྲོ་ཆུ་དུག་གདོང་དུས་ལ་བབ༔ ཁྱེད་ཀྱི་ཐུགས་རྗེའི་འོད་ཟེར་གྱིས༔ རྒྱལ་བ་སྲས་དང་བཅས་རྣམས་ཀྱི༔ བྱིན་རླབས་ནུས་མཐུ་དཔག་མེད་ཀྱི༔ དྲེགས་པ་ལྷ་སྲིན་རྣམས་ཀྱིས་ཀྱང་༔ མཐུ་
སྟོབས་ཚུར་འདུས་བདག་ལ་ཐིམ༔ དགྲ་བགེགས་བྱད་མ་བསྒྲལ་བ་དང་༔ གང་ལ་དམིགས་པ་ལས་འགྲུབ་གྱུར༔ ཨོཾ་ཡ་མཱནྟ་ཀ་ཡ་མ་རཱ་ཙ་ཀ་ལ་རུ་པ་ཧཱུྃ་ཕཊ༔ ཅེས་བཟླས་སོ་ས་མ་ཡ༔ རྒྱ་རྒྱ་རྒྱ༔ རྐམལཉྩནང༔ ཅེས་བཟླས་པའི་དམིགས་རིམ་ནི༔ རང་གི་ཐུགས་ཀར་ཧཱུྃ་ཡིག་མཐིང་ནག་ཡ་ཡིག་དམར་ནག་གི་མཐའ་བསྐོར་དུ་སྔགས་ཕྲེང་གཡས་སུ་བསྐོར་བར་རྒྱུན་ཆད་མེད་པར་འཁོར་བར་བསམ༔ དེ་ལས་འོད་ཟེར་ཁ་དོག་སྣ་ཚོགས་འཕྲོས་ནས༔ ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་མཆོད༔ དེ་རྣམས་ཀྱི་བྱིན་རླབས་དང་འོད་ཟེར་འགྲོ་བ་སེམས་ཅན་ཐམས་ཅད་ལ་ཕོག་པས་ནད་གདོན་བྱད་དང་སྡིག་སྒྲིབ་བག་ཆག་སྦྱངས༔ འོད་ཟེར་ཚུར་འདུས་བདག་ཉིད་ལ་ཐིམ་པས་འགྲོ་བ་སེམས་ཅན་ཚེ་དང་བསོད་ནམས་ལྷ་སྲིན་སྡེ་བརྒྱད་ཀྱི་མཐུ་དང་ནུས་པ་ཐམས་ཅད་རྡོ་ཁབ་ལེན་གྱིས་ལྕགས་ཕྱེ་བླང་པ་བཞིན་འུབ་ཀྱིས་བསྡུས་ནས་བདག་ལ་ཐིམ་པར་བྷྱོ་ལ་སྔགས་ཅི་ནུས་བཟླས་པར་བྱའོ༔ དུ་ཏྲི་ཡ་མ་ར་ཙ༔ ཡ་མ་རཀྵ་སོགས༔ ཞེས་བཟླའོ༔ ཡང་བདག་བསྐྱེད་ཀྱི་ཞལ་ནས་སྔགས་ཕྲེང་མདུན་བསྐྱེད་ཞལ་དུ་ཞུགས༔ ཐུགས་ཀ་ནས་ཕྱིར་ཐོན་རང་གི་ཐུགས་ཀར་ཐིམ༔ ཡང་བདག་བསྐྱེད་ཀྱི་ཞལ་ནས་མདུན་བསྐྱེད་ཀྱི་ཞལ་དུ་ཞུགས༔ ཡང་མདུན་བསྐྱེད་ཀྱི་ཐུགས་ཀ་ནས་ཕྱིར་ཐོན་ཏེ་བདག་བསྐྱེད་ཐུགས་ཀར་ཐིམ༔ དེ་ལྟ་བུའི་སྔགས་ཕྲེང་རྒྱུན་ཆད་མེད་པར་འཁོར་བར་བྷེ་ལ་བཟླའོ༔ བདག་མདུན་བར་དུ་འཁོར་ཚེ་མེ་དཔུང་ཚྭ་ཚྭའི་
འོད་ཟེར་དཔག་ཏུ་མེད་པར་འཁོར་བས་དགྲ་བགེགས་བྱད་མ་གནོད་བྱེད་ཐམས་ཅད་བསད་བཅད་གཏུབ་ནས་རྡུལ་དུ་བརླག་པར་བསྒོམས་ལ་བཟླས༔ རྒྱུན་ཆད་མེད་པར༔ སྐུ་གསུང་ཐུགས་ལ་ཁྲི་ཕྲག་གསུམ་བསྒྲུབ་པའི་ཚད་ལ་འབུམ་ཕྲག་གཅིག་ཐོས་པ་ཙམ་གྱིས་ཀྱང་༔ དྲེགས་པ་ལྷ་སྲིན་སྡེ་བརྒྱད་ཀྱང་༔ ལས་ལ་འཁོར་བར་ཐེ་ཚོམ་མེད༔ དེ་ནས་མདུན་བསྐྱེད་ཀྱི་ཐུགས་ཀ་ནས་འོད་ཟེར་དཀར་དམར་མཐིང་གསུམ་འཕྲོས་པས་དེ་ལྟར་རང་གི་གནས་གསུམ་དུ་ཐིམ་པ་ལས༔ ཁྲོ་ཆུ་དཀར་དམར་མཐིང་གསུམ་དུ་གྱུར་པར་བྷྱོ་ལ༔ དངོས་གྲུབ་བླང་བའི་སྒོམ་བཟླས་ཏེ༔ དུ་ཏྲི་ཡ་མ་ར་ཙ༔ ཡ་སོགས་ས་མ་ཡ་ཀཱ་ཡ་སིདྡྷི་ཨོ༔ ཝཱཀ་སིདྡྷི་སརྦ་སིདྡྷི་ཧཱུྃ༔ ཞེས་དབང་དང་དངོས་གྲུབ་དཔག་ཏུ་མེད་པར་ཐོབ་པར་བསྒོམ༔ དབྱངས་གསལ་དང་རྟེན་འབྲེལ་སྙིང་པོ་བཟླའོ༔ ས་མ་ཡ་རྒྱ་རྒྱ་རྒྱ༔ ཨོཾ༔ དེ་ནས་ལས་སྦྱོར་དུས་ཀྱི་བཟླས་པ་ནི༔ ལིངྒ་ལ་བཀུག་གཞུག་གསུམ་བྱས་ལ༔ དུ་ཏྲི་ཡ་མ་ར་ཙ༔ ཡ་མ་རཀྵ༔ ཀ་ལ་རུ་པ༔ ས་མ་ཡ་རཀྵ༔ ཡཀྵེ་ཡ་ཙ༔ ཀྲོ་ཏ་པ་ཙ་ལ་ཏི༔ ཨ་ཡ་མ་དུ་རུ་ཙ་ཤ་ན༔ གནོད་བྱེད་དགྲ་བོ་བྱད་མའི་བླ་སྲོག་རྣམ་པར་ཤེས་པ་སྲིད་པ་གསུམ་པོ་གར་གནས་ཀྱང་རང་དབང་མེད་པར་གཟུགས་ལིང་ག་འདི་ལ་ཁུག་ཅིག༔ བཛྲ་ཡ་མ་ར་ཙ་བྷིཧཱ་ས་མ་ཡ༔ ཀ་ལ་རུ་པ༔ དགྲ་བོའི་མིང་ལ་ཁུག་ཅིག༔ མྱོགས་
ལིང་ཁུག་ཅིག༔ བླ་ཤ་རེ་མ་ཏི་འགྲིམ༔ ཏྲི་ཤ་ཡ་ཛཿཧཱུྃ་བཾ་ཧོཿ ཏྲི་ཏིལ་ཐཾ་ཧྲཱིཿལ་ཛཿ ཏྲི་ཨ་ཀར་ཡ་ཛཿ ཏྲེ་ཨ་ཝེ་ཤ་ཡ་ཛཿ སརྦ་ཏྲི་མཱ་ར་ཡ་ཛཿ ཞེས་ཐུན་མཚམས་སུ་དེ་ལ་བདུན་གསུམ་རེ་བཟླས་པའི་དམིགས་པས་གཟིར་བར་བྱས་ཏེ་མཚམས་སུ་ཐུན་གཏོར་འབུལ་བ་ནི༔ ཞང་ཁྲོམ་ཕྱག་ལེན་ནོ༔ བསྙེན་འགྲུབ་ཀྱི་ལེའུ་སྟེ་གསུམ་པའོ༔ ས་མ་ཡ༔ ཉནགྷག་ཏུ༔ དེ་ནས་སྒྲུབ་པའི་སྒབ་འདྲེ་མནན་པར་བ་བྱ་བ་ནི༔ བསྙེན་སྒྲུབ་ཀྱི་ཐུན་མཚམས་སུ་སྒབ་འདྲེ་དཔེའུ་རིས་ལྟར་བྲིས་ལ༔ བདེན་བདར་བཀུག་གཞུག་བྱས་ཏེ་སྒྲུབ་ཁང་གི་ཕྱི་རོལ་མཚམས་ཐོའི་འོག་གམ་བྱང་ཤར་དུ་མནན་ནོ༔ ཁྱད་པར་ཁྲོ་ཆུའི་འཁོར་དུ་ཡི་དྭགས་མང་བའི་ཕྱིར༔ འགྲུབ་ན་ནོར་དབུལ་པོར་འགྱུར་དོགས་པས༔ སྒབ་འདྲེ་བསེ་རག་མནན་པ་གལ་ཆེའོ༔ ཕཊ༔ མདུན་དུ་ཨེ་ཏྲི་ནག་པོ་ཡོངས་སུ་གྱུར་པ་ལས༔ གནོད་བྱེད་སྒབ་འདྲེ་གླ་བའི་མགོ་ཅན་སྙིང་ཁར་ཏྲི་ནག་པོའི་མཚན༔ བདེན་བདར་བརྗོད༔ འཇམ་དཔལ་ཁྲོ་ཆུ་དུག་གདོང་ནག་པོ་འཁོར་དང་བཅས་པའི་བདེན་པས་གནོད་བྱེད་སྒབ་འདྲེ་བསེ་རག་དཀོར་རྐུན་ཐམས་ཅད་རང་དབང་མེད་པར་གཟུགས་ལིང་ག་འདི་ལ་ཁུག་ཅིག༔ ཛཧཱུྃ་བཾ་ཧོཿ དུ་ཏྲི་ཡ་མ་ར་ཙ་སོགས་སྔགས་ཤམ་དུ༔ ཨོཾ་རྦད་རྦད་ཎི་ཏྲི་ནི་ཧཱུྃ༔ ཡཀྵ་ཤུདྡྷེ་དམ་ཛཿ ཏྲི་ཛ་ཁུག་ཛ་ཆིངས་ཛ་དམ་ལ་
འདུས་ཤིག་སྭཱ་ཧཱ༔ ཞེས་བཀུག་གཞུག་ལན་གསུམ་བྱས་ལ༔ ཐུན་མཚམས་དགུ་བར་གཟིར་བར་བྱས་ལ༔ དེ་ནས་མནན་པའི་དུས་སུ་གཤིན་རྗེའི་ང་རྒྱལ་དང་ལྡན་པས་དོང་གྲུ་གསུམ་བསྐོས་ལ་དེའི་ནང་དུ་ལིང་ག་ཁ་ཐུན་དུ་བསྟན་ལ་གནོན༔ དེའི་དུས་སུ༔ དུ་ཏྲི་ཡ་མ་ར་ཙ་སོགས། རྩ་སྔགས་ཤམ་དུ༔ ས་མ་ཡ་ཛ་ཛཿ ཨ་ཡ་མ་དུ་རུ་ཙ་ཤ་ན༔ གནོད་བྱེད་སྒབ་འདྲེ་བསེ་རག་དཀོར་རྐུན་ཐེའུ་རང་ཐམས་ཅད་མཱ་ར་ཡ་ནན༔ སྟེ་བྷ་ཡ་ནན༔ སྒྲུབ་བར་ཆད་བྱེད་པའི་སྒབ་འདྲེ་བསེ་རག་དཀོར་རྐུན་མཱ་ར་ཡ་ནན༔ སྟེ་བྷ་ཡ་ནན༔ ཞེས་རྐང་ཞབས་རྡོ་རྗེ་རྒྱ་གྲམ་དུ་བསམ་ལ་མནན་ནོ། སྟེང་དེར་མཆོད་རྟེན་ནག་པོའམ༔ ཡང་ན་མཆོད་རྟེན་དུ་བསམ་ལ་ཐོ་བརྩེགས་སྲུང་འཁོར་བྷྱོ་པ་གལ་ཆེའོ༔ དེ་ནས་བསྙེན་པའི་དམིགས་རིམ་གསལ་བརྟན་ལ་བཟླ་བར་བྱའོ༔ ས་མ་ཡ༔ འཇམ་དཔལ་གཤིན་རྗེ་ཁྲོ་ཆུ་དུག་གདོང་ནག་པོའི་འཁོར་ལོ་བསྐོར་བ་དང་ཕོ་ཉ་བསྐུལ་བའི་སོག་ལེ་ནག་པོས་བཀའ་སྲུང་གབ་པའི་མན་ངག་ཁ་ཐིམ་བརྡ་ཐིམ༔ དེ་ནས་ཐུན་མཚམས་སུ་གཏོར་མ་འབུལ་བ་ནི༔ ཟངས་ལྕགས་སམ་ཐོད་པའི་སྣོད་དུ་གཏོར་མ་དུག་ཁྲག་གིས་སྦག་སྟེ་གཞུང་ལྟར་བཀུག་གཞུག་ལན་གསུམ་བྱས་ལ་དགྲ་བགེགས་བྱད་མའི་ཤ་ཁྲག་ཏུ་བསམས་ལ༔ ལས་ཀྱི་གཤིན་རྗེ་ཞལ་གནམ་ས་ཙམ་གྱི་ཞལ་དུ་དགྲ་བོའི་ཤ་ཁྲག་དམར་བསྟིམ་གསོལ་བར་བསམ་ལ༔ དྲག་ཏུ་བསྐུལ༔ ཧཱུྃ་ཡ་བྷྱོ༔
ཕྱོགས་ཕྱོགས་དག་ཀྱང་ཕ་ཀི་ན༔ ཉི་མ་ལྷོ་ཕྱོགས་ཕ་ཀི་ན༔ རིམ་པ་བདུན་གྱི་ས་འོག་ཏུ༔ ཚ་བའི་མེ་དང་གྲང་བའི་ཆུ༔ ཚ་གྲང་འཁྲུགས་པའི་དཀྱིལ་འཁོར་ནས༔ ཁྲོ་ཆུ་གནམ་ལྕགས་མཁར་གྱི་ནང་༔ གྲུ་གསུམ་བསྣོལ་སྟེང་བྱད་མ་དང་་་དགྲ་བགེགས་བམ་གྱི་གདན་སྟེང་དུ་ལས་ཀྱི་གཤིན་རྗེ་བཞུགས་པ་ནི་ཁྲོ་ཆུ་དུག་གདོང་མཐུ་སྟོབས་ཆེ༔ སྐུ་མདོག་དམར་ནག་མེ་ལྟར་འབར༔ ཞལ་གསུམ་ཕྱག་དྲུག་འཇིགས་པའི་གཟུགས༔ སྤྱན་དགུ་གདངས་མིག་བགེགས་ལ་གཟིར༔ ཤངས་ནས་རླུང་ནག་འཚུབ་མ་འཚུ༔ ལྗགས་གསུམ་འདྲིལ་ཞིང་རྐན་སྒྲ་རྡེབ༔ སྟོང་གསུམ་ལྷ་འདྲེ་འདར་བར་བྱེད༔ དུག་ལྕགས་ཁྲོ་ཆུ་ལས་གྲུབ་པའི༔ དབུ་གསུམ་མཆོད་རྟེན་གསུམ་དང་ལྡན༔ ཕྱག་དྲུག་དགྲ་སྣ་ཙིཏྟ་བསྣམས༔ འདབ་གཤོག་བར་སྣང་ཁམས་སུ་རྒྱུག༔ སྐུ་སྨད་ཕུར་པས་བྱད་མ་གཟིར༔ རྒྱན་པའི་འཇིག་པའི་ཆ་ལུགས་རྫོགས༔ ལས་སུ་དགྲ་བགེགས་ཁྲམ་ལ་འདེབས༔ ཟས་སུ་བྱད་མའི་ཤ་ཁྲག་གསོལ༔ དགེ་བ་ཀུན་གྱི་སྟང་འཛིན་པ༔ སྡིག་ཆེན་རྣམས་ལ་ཆད་པ་ཆོད༔ དགེ་སྡིག་ཡིག་ཆུང་བྱང་བུར་བྲིས༔ ཁྱོད་ནི་ལམ་རྒྱུད་ལྔ་
ཡི་བདག༔ སྐྱེ་འགྲོའི་སྲོག་ལེན་མཐུ་སྟོབས་ཅན༔ ལས་ཀྱི་གཤིན་རྗེ་སྲོག་གི་བདག༔ འཁོར་དུ་གཤིན་རྗེ་འབུམ་གྱིས་བསྐོར༔ ཁྱོད་ཀྱི་ཐུགས་དམ་དུས་ལ་བབ༔ ཁྲོ་ཆུ་དུག་གདོང་དུས་ལ་བབ༔ སྤྱི་གཤེད་དུག་གདོང་དུས་ལ་བབ༔ ཆོས་ཀྱི་རྒྱལ་པོའི་དུས་ལ་བབ༔ ལས་གཤིན་དྲུག་གི་དུས་ལ་བབ༔ འཁོར་གྱི་གཤིན་རྗེ་དུས་ལ་བབ༔ དུས་ལ་བབ་བོ་ས་མ་ཡ༔ བརྒྱན་པའི་གཏོར་མ་འདི་བཞེས་ལ༔ དགྲ་བགེགས་བྱ་མ་ལས་ངན་དང་༔ ལིངྒ་འདི་ལ་བྲིས་པ་དང་༔ ས་སྟེང་གནམ་འོག་གར་འདུག་ཀྱང་༔ གནས་འདིར་མྱུར་དུ་ཁུག་ལ་ཤོག༔ གཟུགས་ལིངྒ་འདི་ལ་ཁུག་ལ་ཤོག༔ བླ་འཁོར་ལོ་འདི་ལ་བསྐོར་ལ་ཤོག༔ མིང་བྱང་བུ་འདི་ལ་ཐོབ་ལ་ཤོག༔ གནད་ནས་བསྐུལ་ལོ་ཐུགས་དམ་ཅན༔ མ་གཡེལ་དུག་གདོང་དུས་ལ་བབ༔ དུས་ལ་བབ་བོ་ས་མ་ཡ༔ ཞེས་ཐུན་མཚམས་སུ་བཟློག་བཟླས་ཀྱི་སྔགས་དམིགས་ལ་དྲག་ཏུ་སྤྲད་ལ་གཏོར་མ་དགྲ་ཕྱོགས་སུ་བསྟན་ནོ༔ ནམ་གུང་ཉིན་གུང་སོགས་དུས་དྲུག་ལ་བསྐུལ་ལོ༔ བྲང་བརྡུང་འོ་དོད་འབོད་པ་དགྲ་ལ་བརྡར༔ དེས་ནི་དགྲ་བགེགས་བསྒྲལ་བར་ཐེ་ཚོམ་མེད་དོ༔ འདི་ནི་ལས་སྦྱོར་ཀུན་གྱི་སྒྲུབ་པ་མ་གཏོགས་གང་རུང་མི་བྱའོ༔ སྲུང་ཟློག་དུས་གལ་ཆེ་
ནས་ཐུན་སྐབས་བཅད་པ་ལ་འདི་བཟང་ངོ་༔ ཁྱད་པར་མདོས་ཟོར་ལ་སོགས་མ་བྱུང་ནས་གན་ཐུག་དུས་སུ་ལན་རེ་ཙམ་བསྐུལ་ན་བཟང་བའོ༔ ས་མ་ཡ༔ བརྡ་ཐིམ༔ རྒྱ་རྒྱ་རྒྱ༔ ༈ དེ་ནས་དགྲ་བོ་བྱད་མའི་ལིངྒ་གཞུང་ལྟར་བྲིས་པ་ལ་བཀུག་གཞུག་ལྷ་དབྱེ་སོགས་བྱས་ཏེ༔ བཀའ་སྲུང་རྣམས་བསྐུལ་པ་བྱ་བ་ནི་གཏོར་མ་ག་ཞུང་ལྟར་དུག་ཁྲག་སྔག་སྟེ༔ དགྲ་བགེགས་དུ་གསལ་ལ་བདེན་བརྡར་ལན་གསུམ་བྱའོ༔ ༀདྷ་ཟུཊཀྲྀན་ཏྲཊི༔ བྷྱོ་ཡ༔ ཡ་འཇམ་དཔལ་གཤིན་རྗེ་ཁྲོ་ཆུ་དུག་གདོང་གིས༔ སྦྱོར་ཡུམ་མཁའ་འགྲོ་བདུད་མོ་དུག་ཏི་མ༔ སྐུ་མདོག་དམར་ནག་འཇིགས་པའི་ཁ་གདངས་ཤིང་༔ སྤྱན་གསུམ་ཁྲོ་གཉེར་གདངས་མིག་གློག་ལྟར་འཁྱུག༔ རིལ་པ་སེར་ནག་གྱེན་བསྒྲེང་ལྷ་རྣམས་དང་༔ གཡས་པས་ལྕགས་ཀྱུའི་དགྲ་བགེགས་སྙིང་ནས་འདྲེན༔ གཡོན་པས་ཞགས་པ་ནག་པོས་བྱད་མ་ཆིངས༔ རེ་ནག་གོས་དང་རྨ་བྱའི་རྒྱལ་མཚན་སྤྲས༔ ཞིང་ཆེན་ཤམ་ཐབས་སྦྲུལ་ནག་སྐུ་རེགས་བཅིངས༔ མཆོང་རྩལ་བྱེད་ཅིང་ནུབ་མོ་གཡབ་མོ་རྡེབ༔ རྫུ་འཕྲུལ་མེ་འབར་མྱུར་མགྱོགས་གློག་ལྟར་འཁྱུག༔ བདུད་དང་གཤིན་རྗེ་བྲན་དང་ཕོ་ཉར་འགྱེད༔ ཁྲོ་ཆུ་དུག་གདོང་གསང་བའི་ཡུམ་མཆོག་ཐུགས་དམ་བསྐུལ་ལོ་མ་གཡེལ་གཤེགས་སུ་
གསོལ༔ མ་བདུད་ལས་ལ་ཆས་ཏེ་གཤེགས་སུ་གསོལ༔ དགྲ་བགེགས་བྱད་མའི་གཤེད་དུ་གཤེགས་སུ་གསོལ༔ དུས་ལ་བབ་བོ་མ་གཡེལ་མྱུར་དུ་བྱོན༔ ཨོཾ་མ་མ་ཏྲག་རཀྵ་བྷྱོ་ཛཿ སྲོག་དུང་དུང་མ་མ་ཛ་ཐུན་རྦད༔ དགྲ་བགེགས་བྱད་མའི་ཤ་ཁྲག་ལ་ཏིམ་ཏིམ་ཛ་ཛ་རྦད་རྦད་ཁཱ་ཧི་ཁཱ་ཧི༔ བྱོ་བྷྱོ༔ ང་ནི་རིགས་གསུམ་མགོན་པོའི་སྤྲུལ་པ་སྟེ༔ ཕོ་ཉ་མཁའ་འགྲོ་དུག་ཏི་ནག་མོ་ཁྱོད༔ བཞེངས་ཤིག་མ་བདུད་གཤིན་རྗེའི་ཡུལ་ནས་བཞེངས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ བསྟན་དང་བདག་ལ་སྡང་བའི་དགྲ་བོ་རྣམས༔ བསམ་ངན་སྦྱོར་རྩུབ་འཆང་བའི་བྱད་མ་དང་༔ ཡིད་ལ་དམིགས་པའི་དགྲ་བགེགས་མིང་བྱང་འདི༔ ལོ་ཟླ་ཞག་དུས་མ་འགྱང་མྱུར་དུ་སྒྲོལ༔ མཁའ་འགྲོའི་ཚོགས་ཀྱིས་གཤིན་རྗེའི་དམག་སྣ་དྲོངས༔ མ་མོའི་ཚོགས་ཀྱིས་བྱད་སྣ་དགྲ་ལ་དྲོངས༔ ཕྲ་མེན་ཚོགས་ཀྱིས་དགྲ་ལ་ཡམས་ནད་ཐོངས༔ ཤན་པའི་ཚོགས་ཀྱིས་དགྲ་བོ་དུམ་བུར་གཏུབས༔ མ་གཡེལ་མ་གཡེལ་མཁའ་འགྲོ་དུག་ཏི་མ༔ དུག་གསུམ་ཤ་ཁྲག་གཏོར་མ་འདི་བཞེས་ལ༔ ལས་ཀྱི་གཤིན་རྗེའི་དམག་ཚོགས་དུས་ལ་བབ༔ མཁའ་
འགྲོ་དུག་ཏི་ནག་མོའི་དུས་ལ་བབ༔ གཏེར་སྲུང་བདུད་པོ་ལྕམ་དྲལ་དུས་ལ་བབ༔ དུས་ལ་བབ་བོ་མ་གཡེལ་ལས་མཛོད་ཅིག༔ དུ་ཏྲི་ཡ་མ་ར་ཙ༔ ཡ་མ་རཀཱ༔ ཀྲོ་ཏ་པ་ཙ་ལ་ཏི་ཀ་ལ་རུ་པ་ཨ་ཀྲོ་ར་ཙ་ཡ་མ་ར་ཙ་ས་མ་ཡ་ཛ་ཛཿ རྩ་སྔགས་ཤམ་དུ—ཨོཾ་མ་མ་ཏྲག་རཀཱ་ཧཱུྃ་བཛྲ་ཙ་ཙ་ཨ་ཤུག་མ་ཐུན་བྷྱོ་ཛཿ མ་མ་ཐུན་ཧྲཱིཿལཨ་ཧབ་ཨ་ཧབ༔ མ་མ་དུ་དུང་དུང་བྷྱོ༔ ཙ་ཏྲི་ཡ་མ་དགྲ་བོ་ནི་ཏྲི་ཁུག་ཛཿ བཻ་རིལ་བྷྱོ་བྷྱོ་ཛཿ ཞེས་སྲུང་ཟློག་བསད་གསུམ་གྱི་དམིགས་པ་དང་སྦྱར༔ ས་མ་ཡ༔ ཁ་ཐཾ༔ རྒཊྛཔཏཱད༔ མི་མངོན་པར་སྦོས་ཤིག༔ བརྡ་ཐིམ༔ རྒྱ་རྒྱ་རྒྱ༔ ཞེས་བསྐུལ་པ་གཏོར་མ་དགྲ་བགེགས་ཕྱོགས་སུ་བརྡེག་གོ༔ ས་ཁོ་མ་ཐི་ཡ༔ དྷཱིཧཱུྃ།པསཏི་ནུསུཾཏ་ཉམལ༔ འཇམ་དཔལ་གཤིན་རྗེ་གཤེད་ལ་ཕྱག་འཚལ་ལོ༔ ལས་མཐའ་དུག་གི་སོག་ལེ་དང་༔ མྱུར་བྱེད་བྱུང་བུ་གཅིག་རྒྱུག་དང་༔ མནན་གཏད་བཟློག་མེད་ནག་པོ་དང་༔ སྡེ་བརྒྱད་སེང་གེའི་ཁ་འཐབས་དང་༔ སྒྲུབ་པའི་ལས་མཐའ་གང་བྱེད་ཀྱང་༔ སྲུང་བ་རྣོ་མྱུར་ལས་ལ་མྱུར༔ སྔགས་པ་སྡེ་དྲུག་མ་བསྐུལ་ན༔ ལོང་བས་ལོང་བ་ཁྲིད་དང་མཚུངས༔ འདི་ཉིད་བསྐུལ་ན་དགྲ་བོ་ལ༔ གང་བསམ་ཐོག་མེད་མྱུར་དུ་འགྲུབ༔ ཚང་ཕྱིར་གཞུང་ནས་མ་ཕྲི་ཞིག༔ ས་མ་ཡ༔ ཏཐཾཏ༔ དགྲ་ལ་རྟགས་འོང་བའི་མན་ངག་ལ༔ གཞུང་
ལྟར་ལིངྒ་བསྐྱེད་བསྟིམ་དང་༔ བཀུག་གཞུག་དྲག་ཏུ་བྱས་ལ༔ གཏོར་མ་དུག་ཁྲག་ཤ་ཁྲག་གིས་བརྒྱན་པ་བཤམས༔ རང་ཉིད་གཤིན་རྗེ་གཤེད་དུ་བསྒོམ༔ ལས་མཁན་སྔགས་པ་སྡེ་དྲུག་གིས་ཅི་བཅོལ་བསྒྲུབ་པར་ཁས་བླངས་ནས༔ དགྲ་བོའི་བླ་སྲོག་ཁྱེར་ནས་ཁྲོ་ཆུའི་ཞལ་དུ་བསྟབ་པར་བསམས་ལ༔ དྲག་ཏུ་བསྐུལ་ཞིང་རཀྟ་སྦྲེང་༔ ཤ་ཆེན་བསྲེགས་རྐང་གླིང་འབུད་ལ་རྔ་རྡུང་ཞིང་འདི་སྐད་དོ༔ བྷྱོ་ཡ༔ ང་ནི་འཇམ་དཔལ་གཤིན་རྗེའི་གཤེད༔ ཕོ་ཉ་སྔགས་པ་སྡེ་དྲུག་པོ༔ ལས་ལ་བསྐུལ་ལོ་མ་གཡེལ་བར༔ སྔོན་གྱི་དམ་བཅའ་དྲན་མཛོད་ལ༔ དགྲ་བགེགས་བསྒྲལ་ཕྱིར་གནས་འདིར་བྱོན༔ ཧཱུྃ༔ ཤར་ཕྱོགས་དྲི་ཟའི་སྔགས་པ་ནི༔ དཀར་པོ་སྟག་གི་མགོ་བོ་ཅན༔ ཕྱག་ན་ཁྲམ་ཤིང་ལྕགས་ཀྱུ་བསྣམས༔ དགྲ་བོ་བྱད་མ་ལས་ངན་འདི༔ ཤར་གྱི་ཕྱོགས་ནས་ཁུག་ལ་ཤོག༔ ལིང་ག་འདི་ལ་ཐིམ་པར་གྱིས༔ ཁྲོ་བོ་དུག་གདོང་ཞལ་དུ་ཐོབ༔ ཁྱེད་ཀྱི་ཐུགས་དམ་དུས་ལ་བབ༔ བརྒྱན་པའི་གཏོར་མ་འདི་བཞེས་ལ༔ མ་གཡེལ་དགྲ་ལ་ལས་མཛོད་ཅིག༔ ཧཱུྃ༔ ལྷོ་ཕྱོགས་གཤིན་རྗེའི་སྔགས་པ་ནི༔ སེར་པོ་འབྲུག་གི་མགོ་བོ་ཅན༔ ལག་ན་ཁྲམ་ཤིང་ཞགས་པ་བསྣམས༔ དགྲ་བོ་བྱད་མ་ལས་ངན་འདི༔ ལྷོ་ཡི་ཕྱོགས་
ནས་ཁུག་ལ་ཤོག༔ ལིང་ག་འདི་ལ་ཐིམ་པར་གྱིས༔ ཁྲོ་བོ་དུག་གདོང་ཞལ་དུ་ཐོབ༔ ཁྱེད་ཀྱི་ཐུགས་དམ་དུས་ལ་བབ༔ བརྒྱན་པའི་གཏོར་མ་འདི་བཞེས་ལ༔ མ་གཡེལ་དགྲ་ལ་ལས་མཛོད་ཅིག༔ ཧཱུྃ༔ ནུབ་ཕྱོགས་ཀླུ་ཡི་སྔགས་པ་ནི་དམར་པོ་བྱ་ཡི་མགོ་བོ་ཅན་་་་ལག་ན་ཁྲམ་ཤི་ང་ལྕགས་སྒྲོག་འཛིན་་་་དགྲ་བོ་བྱད་མ་ལས་ངན་འདི་ནུབ་ཀྱི་ཕྱོགས་ནས་ཁུག་ལ་ཤོག༔ ལིང་ག་འདི་ལ་ཐིམ་པར་གྱིས༔ ཁྲོ་བོ་དུག་གདོང་ཞལ་དུ་ཐོབ༔ ཁྱེད་ཀྱི་ཐུགས་དམ་དུས་ལ་བབ༔ བརྒྱན་པའི་གཏོར་མ་འདི་བཞེས་ལ༔ མ་གཡེལ་དགྲ་ལ་ལས་མཛོད་ཅིག༔ ཧཱུྃ༔ བྱང་ཕྱོགས་གནོད་སྦྱིན་སྔགས་པ་ནི༔ སྔོན་པོ་སྦལ་པའི་མགོ་བོ་ཅན༔ ལག་ན་ཁྲམ་ཤིང་དྲིལ་བུ་ཐོགས༔ དགྲ་བོ་བྱད་མ་ལས་ངན་འདི༔ བྱང་གི་ཕྱོགས་ནས་ཁུག་ལ་ཤོག༔ ལིང་ག་འདི་ལ་ཐིམ་པར་གྱིས༔ ཁྲོ་བོ་དུག་གདོང་ཞལ་དུ་ཐོབ༔ ཁྱེད་ཀྱི་ཐུགས་དམ་དུས་ལ་བབ་བརྒྱན་པའི་གཏོར་མ་འདི་བཞེས་ལ༔ མ་གཡེལ་དགྲ་ལ་ལས་མཛོད་ཅིག༔ ཅེས་གཏོར་མ་དགྲ་ཕྱོགས་སམ་ཡང་ན་གཏོར་ཟློག་ཡོད་ན་རྩང་གི་ཕྱི་རོལ་དུ་ཕུལ་ལོ༔ དེ་ནི་ལས་ལ་ཐོགས་པ་མེད་པར་དགྲ་བོ་འགུགས་པར་ཐེ་ཚོམ་མེད༔ ས་མ་
ཡ༔ གུ་ཧྱ༔ སྔགས་པ་སྡེ་དྲུག་གི་འོག་མ་གཉིས་པོ་འདི་གལ་ཆེའོ༔ དེ་མན་མ་རྟོགས་མི་བསྐུལ་བ་དེ་དམ་ཚིག་ཡོད་པ་ནི་གཏེར་གཞུང་ཉིད་ཀྱིས་གནང་བའོ༔ ཧཱུྃ༔ ཁྲོ་ཆུ་དུག་གདོང་ཕོ་ཉ་ནི༔ ལས་ལ་སྔགས་པའི་དྲག་རྩལ་ཅན༔ སྟེང་ཕྱོགས་ནམ་མཁའ་དཀྱིལ་ཡང་ནི༔ སྡེ་བརྒྱད་ཡོངས་ཀྱི་སྔགས་པ་ནི༔ སྣང་སྲིད་ཟིལ་གནོན་ཁྱུང་མགོ་ཅན༔ ཕྱག་གཉིས་ཉི་ཟླ་ཆ་ལང་རྡེབ༔ ཁྱུང་གཤོག་འབར་བས་མེ་དཔུང་འབར༔ ཁ་རླངས་དགྲ་ལ་ཐོག་སེར་འབེབས༔ སྤྲིན་ནག་བརྒྱུད་ཅིང་རླུང་ནག་གཏོར༔ གཟའ་བདུད་མིག་དམར་ཞེས་ཀྱང་དྲག༔ གཤིན་རྗེའི་ཕོ་ཉ་མཐུ་རྩལ་ཅན༔ ལས་ལ་སྔགས་པ་མཐུ་མ་ཆུང་༔ དགྲ་བོ་བྱད་མ་ལས་ངན་འདི༔ ཕྱོགས་བཞི་མཚམས་བརྒྱད་གར་འདུག་ཀྱང་༔ ལིང་ག་འདི་ལ་མྱུར་དུ་ཁུག༔ ཉི་ཟླ་ཆ་ལང་རྡོབས་ལ་ཤོག༔ སྐར་མདས་དགྲ་བགེགས་སོད་ལ་ཤོག༔ བཀའ་ཡི་གཏོར་མ་འདི་ལོངས་ལ༔ ལས་མཁན་ཁྱོད་ཀྱི་དུས་ལ་བབ༔ མ་གཡེལ་དགྲ་ལ་ལས་མཛོད་ཅིག༔ ཧཱུྃ༔ འོག་ཕྱོགས་ས་བདག་སྔགས་པ་ནི༔ ནག་པོ་གླང་གི་མགོ་བོ་ཅན༔ ལག་ན་ནད་རྐྱལ་ཁྲམ་ཤིང་བསྣམས༔ སྐུ་སྨད་ཕུར་པའི་དབལ་དང་ལྡན༔
གཤིན་རྗེ་ཆོས་ཀྱི་རྒྱལ་པོ་ཡི༔ ཕོ་ཉ་སྔགས་པ་མཐུ་བོ་ཆེ༔ དམ་ལ་མ་འདའ་མྱུར་དུ་བྱོན༔ སྡང་བའི་དགྲ་བོ་བྱད་མ་འདི༔ ལོ་དང་ཟླ་བར་མ་བཞག་ལ༔ ཞག་དང་ཟ་མ་ཉིད་དུ་སྒྲོལ་་དགྲ་བོ་བྱད་མ་ཁྲམ་ལ་ཐོབ༔ ་ནད་ཀྱི་རྐྱལ་པ་དགྲ་ཡུལ་ཁོངས་དམྱལ་སྲུང་གཤིན་རྗེའི་སྔགས་པ་ཁྱོད༔ དུས་ལ་བབ་བོ་ས་མ་ཡ༔ བཀའ་ཡི་གཏོར་མ་འདི་ལོངས་ལ༔ ལིངྒ་བྲིས་པའི་དགྲ་བོ་འདི༔ ས་སྟེང་གང་དུ་འདུག་ཀྱང་རུང་༔ ད་ལྟ་ཉིད་དུ་ཁུག་ལ་ཤོག༔ རི་རབ་ཚོགས་པོར་འཕོངས་ལ་ཤོག༔ རྒྱ་མཚོ་ཧུབ་ཀྱིས་འཐུང་ལ་ཤོག༔ མིང་བྱང་འདི་ལ་བརྡས་ལ་ཤོག༔ འཁོར་ལོ་འདི་ལ་བསྐོར་ལ་ཤོག༔ ཉ་བོ་འདི་ལ་ཐིམ་པར་གྱིས༔ དུག་གདོང་ནག་པོའི་ཞལ་དུ་བསྟབ༔ ཁྱོད་ཀྱི་ཐུགས་དམ་དུས་ལ་བབ༔ བརྒྱན་པའི་གགཏོར་མ་འདི་བཞེས་ལ༔ མ་གཡེལ་དགྲ་ལ་ལས་མཛོད་ཅིག༔ ཅེས་བསྐུལ་པ་འདི་གར་ཐོད་ཐོད་དུ་མི་བྱའོ༔ བཀའ་སྲུང་སྔགས་པ་སྡེ་དྲུག་གི་བསྐུལ་པ་རྫོགས་སོ༔ སྲུང་མ་བསྐུལ་བའི་ལེའུ་སྟེ་བཞི་པའོ༔ ས་མ་ཡ༔ བཀའ་སྲུང་གཟའ་བདུད་ནག་པོས་བཀའ་འདི་ཐུབ་པར་སྲུངས་ཤིག༔ རྒཔཾཏཱཐཁྱཆ། བརྡ་ཐིམ་རྒྱ༔ ཏཐཾ༔ རྒྱ་རྒྱ་རྒྱ༔ ༁ཾ༔ ཕ་ཁོལ་ལུགས་ཀྱི་སྔགས་བྱང་
བཞུགས་སོ༔ ༁ཾ༔ གཆ།གགཎ༔ དུག་གདོང་ནག་པོ་ལ་ཕྱག་འཚལ་ལོ༔ མུ་སྟེགས་ཀྱི་པཎྜི་ཕ་ཁོལ་ལུགས་ཀྱི་སྒྲུབ་ཐབས་དང་༔ གཞན་ཐམས་ཅད་ཞང་ཁྲོམ་ལུགས་དང་འདྲ་ཞིང་མངོན་རྟོགས་སྐབས་སུ་བསྐུལ་མ་དུག་སྦྲུལ་གྱི་པགས་པ་མནན་ཞིང་སྐུ་སྨད་ལྕགས་ཕུར་རོ༔ བསྙེན་སྔགས་ནི༔ དུ་ཏྲི་ཡ་མ་ར་ཙ༔ རཀྵ་སརྦ་དུཊྚི༔ ཀྲོ་ཏ་པ་ཙ་ལ༔ ཀ་ལ་རུ་པ༔ ཨ་ཀྲོ་ར་ཙ་རྦད༔ ཨོཾ་ཨེ་ཨ་མུ་ཀ་མྱག་རྦད་ས་མ་ཡ་ཛཿ ཞག་བདུན་ནོ༔ ༈ དེ་ནས་གོང་ན་བསྒྲལ་ལས་བསད་སྔགས་ནི༔ དུ་ཏྲི་ཡ་མ་ར་ཙ་ཡ་མ་རཀྵ་ཀྲོ་ཏ་པ་ཙ་ལ་དུཊྚ་ཨེ་ཛཿ དགྲ་བོ་ཆེའི་སྲོག་རྩ་ལ་མྱོགས་མྱོགས་ཡཾ་ཡཾ་རྦད༔ ལ་ལི་ཐ་བ་ནི༔ ར་ཙ་ཕྲ་བ་ནི༔ དགྲ་བོ་བྱད་མའི་སྲོག་སྙིང་ལ་ནི་ཆད་ཨ་མུ་ཀ་མྱོགས་རྦད་ཆུད་ཀྲོ་ཏ་མཱ་ར་ཡ་རྦད་ཆད་ཛ་ཛཿ བསྙེན་སྔགས་ལ་བཟློག་སྔགས་སྤྲེལ༔ དུ་ཏྲི་ཡ་མ་རཀཱ་ཀྲོ་ཏ་པ་ཙ་ལ་སརྦ་དུཏྟཾ༔ ཨེ་ཛ་བྷྱོ་དགྲ་བོ་ཆེའི་བྱད་མ་ལྷ་སྲུང་དང་བཅས་པ་རྣམས་མཱ་ར་ཡ་བྷྱོ་བྷྱོ་བཟློག་བཟློག་ཨ་ཕ་ལ་ཨ་ལ་ལ་བསྒྱུར་ཅིག་བསྒྱུར་ཅིག༔ ཅེས་པ་ཕྱི་པའི་ལུགས་ཡིན་ཏེ༔ མཁས་པ་འགའ་ཞིག་གིས་འདི་གཤིན་རྗེ་ཁྲག་བསོད་ཞིབ་རྩིས་ཆུང་ཞིང་ཚད་ལྡན་མིན་པར་བཞེད༔ འོན་ཀྱང་འདི་མུ་སྟེགས་ལུགས་སུ་སྣང་ན་རྣལ་འབྱོར་རང་ཉམས་སྔགས་འདི་རླུང་ལ་བསྐོར་བའི་མན་ངག་ཟབ་མོ་ཞིག་ཡོད་པ་ཐུགས་
ལ་གབ་བོ༔ ཤམཛཐཾ། ཨེ་མ་ཐུབ་པ་ཆེན་པོ་ཡིས༔ འཇམ་དཔལ་རྩ་བའི་རྒྱུད་དག་ལས༔ ལུང་བསྟན་ཐོན་པའི་པཎྜི་ཏ༔ མུ་སྟེགས་ཕ་ཁོལ་དེ་ཉིད་ལ༔ དབང་ཕྱུག་ཆེན་པོས་དངོས་སུ་གནང་༔ རྒྱ་གར་ལྷོ་ཕྱོགས་ཐམས་ཅད་ཀྱིས༔ སངས་རྒྱས་བསྟན་པ་རྡུལ་དུ་བརླགས་་་མངལ་སྐྱེས་སུས་ཀྱང་མ་ཐུབ་བོ༔ སློབ་མ་མུ་སྟེགས་པཎྜི་ཏ༔ འདི་ཉིད་སླག་ཕ་ཅན་ལ་གནང་པ་དེ་ཡིས་བལ་པོས་ཡུལ་དུ་སྦས༔ འདི་ཉིད་ཟབ་པར་ཐེ་ཚོམ་མེད༔ འོན་ཀྱང་མུ་སྟེགས་ལུགས་ལྟ་བས༔ མཁས་པ་ཕལ་ཆེར་ཐུགས་རྩིས་ཆུང་༔ ཕྱི་ནང་སྒྲུབ་ཐབས་མི་གཅིག་མང་༔ སྒྲུབ་གནས་སོ་སོ་ཡིན་པའི་ཕྱིར༔ བྱང་ཆུབ་བསྒྲུབ་ལ་འདི་ཡིས་མཁོ༔ ཚེ་འདིར་མཐུ་ནུས་བསྒྲུབ་པ་དང་༔ དགྲ་བོའི་སྲོག་དབུགས་སྡུད་པ་ལ༔ མུ་སྟེགས་ལུགས་ཡིན་འདི་ཉིད་ཟབ༔ དེ་ཕྱིར་ཡི་དམ་མི་བྱ་ཞིང་༔ རླུང་འཁོར་ལ་སོགས་ལས་སྦྱོར་ལ༔ བརྟག་ན་དུག་གི་ངར་བླུད་འདྲ༔ འདི་འདྲའི་ཟབ་གནད་ཁོ་བོའི་ཤེས༔ སྤྱི༔ ཞེས་ཀརྨ་ཨ་རཱ་གས་བྲིས༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།