གནས་ཆོས་ཐུགས་ཀྱི་གཏེར་ཁ་ལས༔ གཤིན་རྗེ་འཆར་ཁ་ནག་པོའི་སྒྲུབ་ཐབས༔ ལས་བྱང་སྲུང་༔ ཟློག་པ༔ སྲེག་པ༔ བསད་པ༔ མནན་པ༔ འཕང་བ་བཅས་ཡོངས་སུ་ཚང་བའི་བསྡུས་པ་མན་ངག
གནས་ཆོས་ཐུགས་ཀྱི་གཏེར་ཁ་ལས༔ གཤིན་རྗེ་འཆར་ཁ་ནག་པོའི་སྒྲུབ་ཐབས༔ ལས་བྱང་སྲུང་༔ ཟློག་པ༔ སྲེག་པ༔ བསད་པ༔ མནན་པ༔ འཕང་བ་བཅས་ཡོངས་སུ་ཚང་བའི་བསྡུས་པ་མན་ངག་བཞུགས་སོ༔ བཀའ་རྒྱ་དམ་པར་གསུངས་པའོ༔
འཇམ་དཔལ་གཤིན་རྗེའི་གཤེད་ལ་ཕྱག་འཚལ་ལོ། །གཤིན་རྗེ་འཆར་ཀ་སྒྲུབ་པ་ནི། །ཟངས་ལྕགས་སྣོད་དུ་གཏོར་མ་ནི། །ཟུར་གསུམ་ཁྲམ་རིས་ལྡན་པ་ལ། །རྩེ་ལ་མར་གྱི་མེ་རི་དང་། །ཟུར་གསུམ་ཅུང་ཐུང་གསུམ་རེ་འཛུགས། །ལོགས་གསུམ་སྙིང་གཟུགས་ཤ་དར་བརྒྱན། །ཡོད་ན་ཙཀླུ་གསུམ་ཡང་བཙུགས། །མདུན་དུ་དོ་གལ་ཆེ་ཆུང་གི །བསྟུན་ཏེ་ཤོག་ལིང་ངམ་ཟིན་ལིང་བཞག །སྟོད་ནི་གཙོ་བོ་གསུམ་པོ་བསྒོམ། །གཏོར་མའི་སྐེད་པ་མཆོད་པའི་སྤྲིན། །སྨད་ནི་དགྲ་བགེགས་ཤ་ཁྲག་དམིགས། །རང་གི་སྙིང་ཐད་མི་མཐོ་བའི། །སྟེགས་ཁར་བཞག་མདུན་མཆོད་པ་ནི། །རྣམ་ལྔ་གཡས་གཡོན་སྨན་རཀ་བཤམས། །ན་མོ། དཀོན་མཆོག་གསུམ་དང་རྩ་
བ་གསུམ། །སྐྱབས་གནས་རྣམས་ལ་སྐྱབས་སུ་མཆི། །འགྲོ་ཀུན་སངས་རྒྱས་ལ་འགོད་ཕྱིར། །བྱང་ཆུབ་མཆོག་ཏུ་སེམས་། །ཀ་དག་ཀློང་ནས་སྤྲུལ་པ་ཡི། །གནམ་ས་གང་བའི་མཆོད་པའི་སྤྲིན། །སྨན་གཏོར་རཀྟ་ལྷ་མོར་བཅས། ཟད་མེད་གྱུར་ཅིག་པཱུ་ཛ་ཧོ། །ཧཱུཾ། ང་ནི་རང་བྱུང་གཤིན་རྗེའི་གཤེད། །འཁྲུལ་པའི་བགེགས་ཚོགས་ཕྱིར་དེངས་ཤིག །ཐབས་ཤེས་མེ་དཔུང་རྡོ་རྗེའི་གུར། །ལྷུན་གྲུབ་ལྟ་བས་མཚམས་བཅད་དོ། །རིག་པའི་སྒོ་དབྱེ་མཇལ་ཕྱག་འཚལ། །ཡེ་སངས་རྒྱ་བར་དམ་བཅའ་འོ། །ཡེ་ཤེས་ལྔ་ཡི་བྱིན་ཆེན་
ཕོབ། །གློ་བུར་དྲི་མའི་ཚོགས་རྣམས་བཤགས། །ཀུན་བཟང་མཆོད་སྤྲིན་ལྷུན་གྲུབ་ཀྱི། །ཧཱུྃ། ཆོས་རྣམས་ཡེ་ནས་སྤྲོས་དང་བྲལ། །མ་རྟོགས་སེམས་ཅན་སྙིང་རེ་རྗེ། །རྒྱུ་ཡི་ཡི་གེ་ཧཱུྃ་མཐིང་ལས། །འོད་འཕྲོས་འབྱུང་བཞིའི་རི་རབ་སྟེང་། །ཧཱུཾ་ལས་དུར་ཁྲོད་གཞལ་ཡས་ཁང་། །སྒོ་གྲུ་རྟ་བབས་ཆོས་འཁོར་རྫོགས། །འཁོར་ཡུག་རྡོ་རྭ་མེ་རིས་བསྐོར། །དེ་དབུས་གྲུ་གསུམ་ཆུ་གླང་ཟུང་། །པད་ཉི་དགྲ་བགེགས་བསྣོལ་བའི་སྟེང་། །དྲན་རྫོགས་དམ་ཡེ་དབྱེར་མེད་པའི། །རང་ཉིད་གཤིན་རྗེ་སྐུ་མདོག་ནག །ཞལ་གཅིག་ཕྱག་བཞི་ཕྱག་མཚན་ནི། །གཡས་གཉིས་རྡོ་རྗེ་ཁ་ཊཾ་དང་། །གཡོན་གཉིས་ཐོ་བ་ཞགས་པ་འཛིན། །རྒྱན་མེད་གཅེར་བུ་ཉ་སུལ་ཧྲག །པད་ཉི་བམ་སྟེང་འདོར་ཐབས་བསྒྲད། །གནས་གསུམ་འབྲུ་གསུམ་ཐུགས་དབུས་སུ། །ཉི་སྟེང་ཧཱུྃ་ལ་ཧྲཱིཿ ཊྛིས་བསྐོར། །ཞལ་གདངས་མཆེ་གཙིགས་དབུ་སྐུ་འབར། །རྔམས་བརྗིད་སྲིད་གསུམ་ཟིལ་གྱིས་གནོན་། །རང་འོད་མེ་དཔུང་ཀློང་ན་འགྱིང་། །མདུན་དུ་གཏོར་སྣོད་གྲུ་གསུམ་ནང་། །དགྲ་བགེགས་ཤ་ཁྲག་རྒྱ་མཚོའི་དབུས། །རི་རབ་རིམ་གསུམ་པད་ཉིའི་སྟེང་། །དགྲ་
བགེགས་བསྣོལ་བའི་གདན་སྟེང་དུ། །བརྫུས་སྐྱེས་ལས་ཀྱི་གཤིན་རྗེ་ནི། །འཆར་ཀ་སྐུ་མདོག་ཆར་སྤྲིན་མདོག །ཞལ་གཅིག་ཕྱག་གཉིས་རི་རབ་ནི། །སྤྱི་བོར་ལེན་ཅིང་སར་བརྡེབས་པས། །དགྲ་བགེགས་ཐམས་ཅད་རླག་པར་བྱེད། །དུར་ཁྲོད་ཆས་རྫོགས་སྦྲུལ་མཇུག་འཁྱུག །སྐུ་ལ་མོན་པའི་བེར་ཆེན་གསོལ། །སྤྱན་གསུམ་བསྐྲད་ཅིང་མཆེ་བཞི་གཙིགས། །དབུ་སྐྲ་སྨ་ར་མེ་ལྟར་འབར། །དབུ་གཙུག་རིགས་བདག་མཆོད་རྟེན་བརྒྱན། །མེ་རླུང་འཚུབ་མའི་དབུས་ན་འགྱིང་། །ཐུགས་ཀར་ཉི་སྟེང་ཧཱུཾ་ནག་མཐར། །སྔགས་ཀྱི་ཕྲེང་བ་གཡས་སུ་འཁོར། །དེ་མདུན་གཡས་སུ་ལས་མཁན་ནི། །སྐུ་མདོག་ནག་པོ་ཞལ་གཅིག་པ། །ཕྱག་གཉིས་ཕྱག་མཚན་འདི་ལྟར་རོ། །གཡས་ཀྱི་ཕྱག་ན་ཁྲམ་ཤིང་འཛིན། །གཡོན་པས་ལས་ཀྱི་མེ་ལོང་འཛིན། །ཡ་མ་པ་ཏྲི་རྔམས་པའི་གཟུགས། །དེ་མདུན་གཡོན་དུ་ལས་མཁན་ནི། །སྐུ་མདོག་ནག་པོ་ཞལ་གཅིག་པ། །ཕྱག་གཉིས་ཕྱག་མཚན་འདི་ལྟར་རོ། །གཡས་པས་ཡིག་ཆུང་གཡོས་པས་ནི། །རྡེའུ་དཀར་ནག་བཀང་བ་ཡི། །ཆགས་ཤིང་རབ་ཏུ་བཅང་བར་བྱེད། །ཡ་མ་ཀཱ་
ལ་ཁྲོ་ཞིང་གཏུམ། །གཉིས་ཀ་རྒྱན་མེད་རྟགས་བསྒྲེང་བ། །སྤྱན་གསུམ་མཆེ་གཙིགས་དབུ་སྐྲ་འབར། །ཐུགས་ཀར་ཁྲག་མཚོ་ཟུར་གསུམ་ནང་། །ཡ་ནག་སོ་སོའི་སྔགས་ཀྱིས་བསྐོར། །སྤྲུལ་པའི་ཕོ་ཉ་དཔག་མེད་འཕྲོས། །འོད་འཕྲོས་རང་འདྲ་སྤྱན་དྲངས་ཐིམ། །ཧཱུྃ། རང་བཞིན་སྐྱེ་བ་མེདི་པ་ལས། །སྐྱེ་བའི་ཆོ་འཕྲུལ་གཤིན་རྗེའི་གཤེད། །བདུད་བཞི་དཔུང་ཚོགས་འཇོམས་པའི་ལྷ། །འདིར་གཤེགས་བདག་ལ་བྱིན་གྱིས་རློབས། །ལྷོ་ཕྱོགས་འཆི་བདག་གཤིན་རྗེའི་ཡུལ། །དུར་ཁྲོད་མེ་དཔུང་འབར་བའི་དབུས། །ལྕགས་མཁར་ཐོད་པའི་གཞལ་ཡས་ནས། །འཆར་ཀ་ནག་པོ་མཐུ་བོ་ཆེ། །མ་མོ་ཐམས་ཅད་སྐུ་ལས་སྤྲུལ། །ང་རྒྱལ་ཆ་ལས་གཤིན་རྗེ་སྤྲུལ། །ཞེ་སྡང་ཆ་ལས་བདུད་ཚོགས་སྤྲུལ།། །འདོད་ཆགས་ཆ་ལས་གནམ་སྨན་སྤྲུལ། །དྲེགས་པའི་ཚོགས་ཀུན་གཡོག་ཏུ་བཀོལ། །ཡ་མ་པ་ཏྲི་ཀཱ་ལར་བཅས། །མཆོད་པའི་གནས་འདིར་གཤེགས་སུ་གསོལ། །ཆུ་གླང་པད་ཉི་དགྲ་བགེགས་སྟེང་། །འཇམ་དཔལ་ཁྲོས་པའི་གཤིན་རྗེའི་གཤེད། །བདག་དང་དབྱེར་མེད་བརྟན་པར་བཞུགས། །ཤ་རི་ཁྲག་མཚོ་དགྲ་བགེགས་སྟེང་། །
འཇིགས་བྱེད་འཆར་ཀ་གཙོ་དང་འཁོར། །སྔོན་གྱི་དམ་ཚིག་རྗེས་དགོངས་ལ། །ཕྲིན་ལས་བསྒྲུབ་ཕྱིར་བརྟན་པར་བཞུགས། །ཧཱུཾ་ཡ་མཱནྟ་ཀཿ ཤ་རི་མ་རི་བྷྱོ༔ བཛྲ་ས་མ་ཡ་ཛཿ ཛཧཱུྃ་བཾ་ཧོཿ ས་མ་ཡ་ཧོཿ ས་མ་ཡ་སཾ༔ ཧཱུཾ། ཁྲོ་བོའི་ནང་ནས་གཤིན་རྗེའི་གཤེད། །དེ་མཐོང་ནས་ནི་ཁྲོ་བོ་གཞན། །ལག་ཆ་འཆོར་ནས་འདར་གྱུར་པ། །གཤིན་རྗེའི་གཤེད་ལ་ཕྱག་འཚལ་ལོ། །དུས་གསུམ་སངས་རྒྱས་མན་ཆད་ནས། །འཇག་མའི་སྲིན་བུ་ཡན་ཆད་ཀྱི། །སྲོག་དབུག་ཟ་བའི་དབང་པོ་ཆེ། །འཆར་ཀ་ནག་པོར་ཕྱག་འཚལ་ལོ། །སྣང་སྲིད་གསལ་བའི་མེ་ལོང་འཛིན། །སང་ཕོད་སུ་འཆི་མི་རྣམས་ནི། །ད་ལོ་ཁྲམ་ལ་འདེབས་བྱེད་པ། །ཡ་མ་པ་ཏྲི་ཁྱོད་ལ་འདུད། །གང་བྱས་ལས་རྣམས་ཡིག་ཆུང་གསལ། །དགེ་སྡིག་ཆགས་ཤིང་སྲང་ལ་གཞལ། །ལེགས་ཉེས་ཆོས་བཞིན་སྤྱོད་པ་པོ། །ཡ་མ་ཀ་ལར་འདུད་པར་བགྱི། །ཧཱུྃ། ཡེ་ཤེས་ལས་དང་འཇིག་རྟེན་གཤིན་རྗེའི་ཚོགས། །ཁྱེད་རྣམས་དགྱེས་པའི་མཆོད་པ་འབུལ་བ་ནི། །བསྒྲལ་བའི་ཞིང་གྱུར་གནོད་བྱེད་དགྲ་བགེགས་ཀྱི། །ཁྲག་གི་མཆོད་ཡོན་ཞག་གི་ཞབས་
བསིལ་དང་། །དབང་པོའི་མེ་ཏོག་ཚིལ་ཆེན་བདུག་སྤོས་དང་། །རྐང་ཆེན་མར་མེ་ཤ་ཆེན་ཞལ་ཟས་དང་། །རྐང་གླིང་རོལ་མོ་འབུལ་གྱིས་དགྱེས་པར་བཞེས། །དགྲ་བགེགས་གཟུགས་ཀྱི་ཕུང་པོ་ལིང་ག་བཅས། །ངག་གི་སྒྲ་སྐད་མིང་གི་ཡི་གེ་དང་། །དྲི་མ་ཟིག་རྫས་ཤ་ཁྲག་རྨོངས་པའི་དྲི། །ཤ་ཁྲག་དོན་སྙིང་སྒྲེ་བཅུད་རོ་དང་ལྡན། །ལྤགས་རློན་ཁྲག་འཛག་དགྱེས་པའི་ན་བཟའ་བཅས། །ཛ་གད་ཕུད་དང་པཉྩ་ཨ་མྲྀ་ཏ། །སྲིད་གསུམ་གདུག་པའི་འདུལ་བའི་ཁྲག་ཆེན་པོ། །དབྱིངས་ཀྱི་རང་བཞིན་མཚན་ལྡན་ཀ་པཱ་ལར། །ཤ་ལྔ་བདུད་རྩི་ལྔ་དང་ཡེ་ཤེས་ལྔ། །གཅིག་ཏུ་འདྲེས་པ་ཟག་མེད་བདུད་རྩིའི་མཚོ། །འདོད་ཡོན་ལྔ་ལྡན་གཏོར་མའི་མཆོད་པ་འབུལ། །ཨོཾ་ཡ་མཱནྟ་ཀ །ཤ་རི་མ་རི་བྷྱོ༔ ས་པཱ་རི་ཝ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ མ་ཧཱ་ཨ་མྲྀ་ཏ་ཁཱ་ཧི། མ་ཧཱ་རཀྟ་ལ་ཁཱ་ཧི། ཨནྡྷཾ་པཱརྱ་པུཥྛ་དྷ་པེ་ཨཱ་ལོ་ཀེ༔ གནྡྷེ་ནེ་ཝི་དྱ་ཐཱ་རཱུ་པ་ཤབྡ་གྷནེ་རཱ་ས་པཆེ་པྲ་ཏཱི་ཨཱཧཱུྃ། ཨོཾ་ཧྲཱིཿ ཊི་ཝཱི་ཊིའི་སྙིང་པོ་སྔགས་སྒྲ་ཡིས། །ས་གསུམ་པ་ཡི་འཁྲུལ་པ་སེལ་བྱེད་པ། །གང་གཱའི་བྱེ་སྙེད་རྒྱལ་བའི་མཚན་འཆང་བས། །ལན་གཅིག་འཇམ་དཔལ་
མཚན་བརྗོད་ལྷག་གསུངས་ན། །འཇམ་དཔལ་ཁྲོས་པའི་ཁྲོ་བོ་ཁྱེད་ཉིད་ལ། །རབ་ཏུ་གུས་པས་མཆོད་ཅིང་བསྟོད་ལགས་ཀྱི། །མི་ཤེས་རྨོངས་པའི་དྲྭ་བ་ད་ཆོད་ལ། །ཤེས་རབ་རིག་པའི་རྩ་ཁ་འབྱེད་པ་དང་། །དུས་མིན་འཆི་དང་གཤིན་རྗེའི་འཇིགས་པ་སོགས། །བར་དུ་གཅོད་པ་ཀུན་ལས་སྐྱོབས་པར་མཛོད། །ཧཱུཾ། ལྷ་ཆེན་དབང་ཕྱུག་ཀླུ་མོ་བཤོས་པའི་སྲས། །རུ་ཊའི་གཤེད་མ་ཟློག་བྱེད་མཐུ་མོ་ཆེ། །ཆར་སྤྲིན་མདོག་འདྲ་སྤྱན་གསུམ་གྱེན་ལ་བསྒྲད། །ཡན་ལག་སྦྲུལ་རྒྱན་སྦྲུལ་མཇུག་རྒྱ་མཚོར་འཁྱིལ། །ཞལ་གདངས་མཆེ་གཙིགས་དར་ནག་བེར་ཆེན་གསོལ། །ཕྱག་གཉིས་རི་རབ་ཀླད་ལ་བསྐོར་ནས་ཀྱང་། །དམིགས་པའི་རྟེན་དུ་གནམ་ས་ཁ་ཞབས་ལྡོག །སྲིད་པ་གསུམ་པོ་ཁྱོད་ཀྱི་ལྟོ་བར་གནས། །སྐུ་ལ་འཇའ་འོད་འཁྱིལ་ཞིང་རླུང་ནག་འཚུབ། །ཞལ་ནས་འབྲུག་སྒྲོག་སྙན་ནས་ཐོག་སེར་འབེབས། །རླུང་བས་མགྱོགས་ཤིང་ཕྱག་གིས་འཇིག་རྟེན་ཉུལ། །གཤིན་རྗེ་ཀུན་གྱི་རྗེ་བོ་ཁྱོད་ལ་བསྟོད། །མ་མོ་ཀུན་གྱི་གཙོ་བོ་ཁྱོད་ལ་བསྟོད། །སྲིད་པ་གསུམ་གྱི་བདག་པོ་ཁྱོད་ལ་བསྟོད། །དྲེགས་པ་ཀུན་གྱི་ཡང་རྗེ་
ཁྱོད་ལ་བསྟོད། །འཁོར་འདས་ཀུན་གྱི་གཞི་མ་ཁྱོད་ལ་བསྟོད། །ངན་སྔགས་ཐམས་ཅད་སྲེག་བྱེད་ཁྱོད་ལ་བསྟོད། །སྣང་སྲིད་དབང་སྡུད་བདུད་འདུལ་ཁྱོད་ལ་བསྟོད། །བཀའ་ཡི་ཕོ་ཉ་ལས་ལ་གྲུབ་པ་ཡི། །ཁྲམ་ཤིང་མེ་ལོང་ཡིག་ཆུང་ཆགས་ཤིང་བསྣམས། །ལེགས་ཉེས་སྟང་འཛིན་དགེ་སྡིག་ཤན་འབྱེད་མཁན། །ལས་ཀྱི་གཤིན་རྗེ་འཁོར་དང་བཅས་ལ་བསྟོད། །དྲག་སྔགས་མཐུ་ཡི་དངོས་གྲུབ་བསྩལ་དུ་གསོལ། །བདག་གི་ཐུགས་ཀར་ཧཱུཾ་མཐར་སྔགས་གཡས་བསྐོར། །དེ་ལས་འོད་ཟེར་མཐིང་ནག་ཕྱོགས་བཅུར་འཕྲོས། །ཕྱོགས་བཅུའི་ཞིང་བཞུགས་རྒྱལ་བ་སྲས་བཅས་མཆོད། །དེ་དག་སྐུ་ལས་གཤིན་རྗེའི་ཚོགས་ཀྱི་སྐུ། །གསུང་ལས་ཊིའི་སྔགས་ཀྱི་ཕྲེང་བ་དང་། །ཐུགས་ལས་རྡོ་རྗེ་སྔོན་པོ་རྩེ་ལྔ་པ། །ཆར་བཞིན་བབ་ནས་བདག་ལ་སིབ་སིབ་ཐིམ། །དབང་དང་བྱིན་རླབས་དངོས་གྲུབ་ཐོབ་པར་གྱུར། །སླར་ཡང་འོད་ཟེར་མཐིང་ནག་ཚ་ལ་རྩུབ། །ཕྱོགས་བཅུར་འཕྲོས་པས་སེམས་ཅན་ཐམས་ཅད་ཀྱི། །སྡིག་སྒྲིབ་ཉོན་མོངས་སྡུག་བསྔལ་ཐམས་ཅད་བསྲེགས། །ཀུན་ཀྱང་གཤིན་རྗེའི་གཤེད་ཀྱི་སྐུར་གྱུར་ནས། །རམ་བུའི་
ཚུལ་དུ་སྔགས་སྒྲ་སྒྲོག་པར་གྱུར། །ཨོཾ་ཧྲཱིཿལླི་ཝཱི་ཊི་ཏཱ་ན་ན་ཧཱུྃ་ཧཱུྃ་ཕཊ༔ མཐུན་འགོར་ཅི་འགྲུབ་བཟླ་བ་བསྙེན་པ་ཡིན། །རང་གི་ཐུགས་སྲོག་ཧཱུྃ་ལས་འོད་མཐིང་འཕྲོས། །མདུན་བསྐྱེད་འཆར་ཀའི་ཐུགས་སྲོག་ཧཱུྃ་ལ་ཕོག །སྔགས་ཕྲེང་གཡས་སུ་དྲག་ཏུ་འཁོར་བ་ཡིས། །སྔོན་གྱི་དམ་བཅས་ཐུགས་དམ་རྗེས་སུ་དྲན། །སྐུ་ལས་ཐོག་སེར་མེ་དཔུང་ཚྭ་ཚྭ་འཕྲོས། །གནོད་བྱེད་བྱེད་མི་གདོན་བགེགས་མ་ལུས་པ། །བསྲེགས་ཤིང་རྡུལ་དུ་བརླག་ནས་རྗེས་མེད་སོང་། །གཙོ་འཁོར་ཀུན་སྤྱི་ཞལ་ནས་བྷྱོཟློག་དང་། །དྲག་སྔགས་ང་རོ་འབྲུག་སྟོང་ལྡིར་བར་གྱུར། །ཤ་རི་མ་རི་བྷྱོ༔ དགྲ་བགེགས་ཨ་མུ་ཀཾ་ཙིཏྟ་རྦད། ཙིཏྟ་ཕྱུང་སྭཱ་ཧཱ། ཐུན་གྱི་དངོས་གཞི་བཟླས་ཏེ་བསྒྲུབ་པའོ། །དེ་ནས་མཆོད་གཏོར་ཐམས་ཅད་ཁ་གསོས་ལ། །གནམ་ཆོས་གཞུང་གི་སྤྱི་མཆོད་འབུལ་བ་ནི། ཧཱུྃ། འཆར་ཀའི་སྤྱན་གཟིགས་དགྱེས་པའི་ཕྱིར༔ ཞེས་སོགས་མཆོད་བསྟོད་བཤགས་པ་བྱ། །ཚོགས་ཀྱང་སྤྲོ་ན་གནམ་ཆོས་གཞུང་ལྟར་བྱེད། །སྔགས་ཚན་བཞི་པོ་སོ་སོའི་མཇུག་ཏུ་ནི། །ག་ཎ་ཙཀྲ་ཁཱ་ཧི་སྦྱར་བར་བྱ། །དེ་ནས་སླར་ཡང་མཆོད་གཏོར་ཁ་གསོས་ལ། །སྨན་རཀ་གཏོར་མའི་རླངས་པ་ལས་གྲུབ་པའི། །བསྐང་རྫས་ཕུན་སུམ་ཚོགས་པ་ཡིད་ཀྱིས་དམིགས། །ཧཱུཾ། འཇམ་
དཔལ་གྲུབ་པའི་རིག་འཛིན་ཚོགས། །ཡི་དམ་བཅོམ་ལྡན་གཤིན་རྗེའི་གཤེད། །ལས་གཤིན་འཆར་ཀ་ནག་པོ་དང་། །བཀའ་སྡོད་འཁོར་དང་སྤྲུལ་པའི་ཚོགས། །ཁྱེད་ཀྱི་ཐུགས་དམ་བསྐང་བ་ནི། །དངོས་འབྱོར་ཡིད་ཀྱིས་སྤྲུལ་པ་ཡི། །རི་རབ་གླིང་བཞི་གླིང་ཕྲན་བརྒྱད། །།མཁའ་ལྡིང་བྱ་ནག་ཁྱུང་ཀའི་ཚོགས། །ལུག་ནག་གཡོག་ནིག་རྟ་ནག་དང་། །སྤྱང་ཀི་སྟག་གཟིག་དོམ་དྲེད་ཚོགས། །མི་ནག་ཁྱུང་འབྲུག་སེང་གེ་སོགས། །སྲོག་ཆགས་མང་པོས་ཐུགས་དམ་བསྐང་། །མདའ་འཕང་ནམ་མཁའ་རྒྱང་བུ་དང་། །ཁྲམ་ཤིང་ཤྭ་རྡེའུ་མཚོན་གྲུག་སོགས། །མཐུན་པའི་རྫས་ཀྱིས་ཐུགས་དམ་བསྐང་། །བྱ་ནག་ཁྱི་ནག་གཡག་ནག་དང་། །ར་རོག་ཤ་ཁྲག་ཙིཏྟ་དང་། །བདུད་རྩི་སྨན་གཏོར་རཀྟའི་ཚོགས། །མཆོད་པའི་རྫས་ཀྱིས་ཐུགས་དམ་བསྐང་། །སྐུ་གཟུགས་སྲོག་འཁོར་མཆོད་རྟེན་དང་། །བྲུབ་ཁུང་ཐུན་རྫས་མཚོན་ཆ་སོགས། །སྒྲུབ་པའི་རྫས་ཀྱིས་ཐུགས་དམ་བསྐང་། །སྔགས་དང་ཕྱག་རྒྱ་ཏིང་འཛིན་དང་། །ལྟ་སྒོམ་སྤྱོད་པ་ལ་སོགས་པའི། །དམ་ཚིག་གཙང་མས་ཐུགས་དམ་བསྐང་། །གཤིན་རྗེ་གཤེད་པོའི་ཐུགས་དམ་
བསྐང་། །འཆར་ཀ་ནག་པོའི་ཐུགས་དམ་བསྐང་། །ཡ་མ་པ་ཏྲིའི་ཐུགས་དམ་བསྐང་། །ཡ་མ་ཀཱ་ལིའི་ཐུགས་དམ་བསྐང་། །གནམ་སྨན་བདུན་གྱི་ཐུགས་དམ་བསྐང་། །བདུད་པོ་བདུན་གྱི་ཐུགས་དམ་བསྐང་། །མ་མོ་བདུན་གྱི་ཐུགས་དམ་བསྐང་། །གཤིན་རྗེ་བདུན་གྱི་ཐུགས་དམ་བསྐང་། །སྐུ་ཡི་ལས་མཁན་ཡིན་པའི་ཕྱིར། །བནྡེ་ནག་པོའི་ཐུགས་དམ་བསྐང་། །གསུང་གི་ལས་མཁན་ཡིན་པའི་ཕྱིར། །བོན་པོ་ནག་པོའི་ཐུགས་དམ་བསྐང་། །ཐུགས་ཀྱི་ལས་མཁན་ཡིན་པའི་ཕྱིར།་།ཞང་བློན་ནག་པོའི་ཐུགས་དམ་བསྐང་། །ཡོན་ཏན་སྤྲུལ་པའི་ལས་མཁན་ཏེ། །མོན་པ་ནག་པོའི་ཐུགས་དམ་བསྐང་། །ལས་མཁན་ཕོ་ཉ་ཡིན་པའི་ཕྱིར། །ལས་གཤིན་དྲེགས་པའི་ཐུགས་དམ་བསྐང་། །ཁྱེད་ཀྱི་ཐུགས་དམ་བསྐངས་གྱུར་ནས། །བདག་གི་ཉམས་ཆག་སོར་ཆུད་མཛོད། །བདག་དང་དཔོན་སློབ་འཁོར་བཅས་ཀྱི། །ཐོག་མེད་དུས་ནས་ད་ལྟའི་བར། །མི་ཤེས་འཁྲུལ་པའི་དབང་གྱུར་པས། །རྩ་བ་ཡན་ལག་དམ་ཚིག་རྣམས། །ཉམས་ཆག་འགལ་འཁྲུལ་ཅི་མཆིས་པ། །གནོང་ཞིང་འགྱོད་པས་མཐོལ་ལོ་བཤགས། །
མི་སྒྲིབ་ཚངས་པའི་དངོས་གྲུབ་སྩོལ། །འགྱུར་མེད་སྐུ་དང་འགག་མེད་གསུང་། །འཁྲུལ་མེད་ཐུགས་ཀྱི་དངོས་གྲུབ་སྩོལ། །རེ་འདོད་སྐོང་བའི་ཡོན་ཏན་དང་། །ཕྲིན་ལས་ཐོགས་མེད་དངོས་གྲུབ་སྩོལ། །འཆི་མེད་ཚེ་དང་གཟི་མདངས་བཀྲག་།འཛད་མེད་ནོར་གྱི་དངོས་གྲུབ་སྩོལ། །མཁས་ཤིང་རྟོགས་པའི་ཤེས་རབ་དང་། །དྲག་སྔགས་མཐུ་ཡི་དངོས་གྲུབ་སྩོལ། །ཆོས་རྒྱུད་འཁོར་འབངས་འཕེལ་བ་ཡི། །བཀྲ་ཤིས་བདེ་ལེགས་དངོས་གྲུབ་སྩོལ། །ཀཱ་ཡ་སིདྡྷི་ཨོཾ། ཝཱཀ་སིདྡྷི་ཨཱཿ ཙིཏྟ་སིདྡྷི་ཧཱུཾ། དེ་ནས་ལས་ལ་སྦྱར་བ་ནི། །ཐེབ་ཙེ་ཐོད་སྟེང་གང་ཡིན་གཅིག །དམར་གཏོར་ཆུང་ངུ་ཞིག་དང་ནི། །ཤ་དུམ་ཟན་ལིང་ཁྲག་ཐིགས་བཤམས། །ན་མོ༔ དཀོན་མཆོག་གསུམ་དང་རྩ་བ་གསུམ༔ ཡི་དམ་བཅོམ་ལྡན་གཤིན་རྗེའི་གཤེད༔ ཆོས་སྐྱོང་འཆར་ཀ་ནག་པོ་ནི༔ འཁོར་དང་བཅས་པའི་བདེན་པའི་མཐུས༔ བསྒྲལ་བའི་ཞིང་བཅུ་ཚང་བ་ཡིས༔ སངས་རྒྱས་བསྟན་པའི་སྤྱི་དགྲ་དང་༔ ཁྱད་པར་རྣལ་འབྱོར་བདག་ཅག་ལ༔ གནོད་ཅིང་འཚེ་བར་བྱེད་པ་ཡི༔ དགྲ་བགེགས་དམ་སྲི་འབྱུང་པོའི་ཚོགས༔ སྐད་ཅིག་ལིངྒ་འདི་ལ་ཁུག༔ ཧཱུྃ༔ འཆར་ཀ་ནག་པོའི་དུས་ལ་
བབ༔ ཁྱེད་ཀྱི་ལས་བྱེད་ཕོ་ཉ་ནི༔ ཡ་མ་པ་ཏྲི་མུན་པའི་མདོག༔ གནོད་བྱེད་དགྲ་བགེགས་མྱུར་དུ་ཁུག༔ གང་ལ་བྱ་བ་ཁྱོད་ཀྱིས་ཤེས༔ སྲོག་ལ་རྔམས་པའི་མཆེ་བ་གཙིགས༔ ཕྱག་གཡས་ལས་ཀྱི་མེ་ལོང་ནང་༔ ཁམས་གསུམ་སྲིད་གསུམ་ས་ལེར་གསལ༔ གཡོན་པས་ཁྲམ་ཤིང་ནག་པོ་འཛིན༔ དགྲ་བགེགས་ཁྲམ་ལ་ད་ཐོབ་ཅིག༔ ཨཱ་ཡཱ་མ་པ་ཏྲི་ཧཱུྃ་ཕཊ༔ གནོད་བྱེད་དགྲ་བགེགས་ཨཾ་ཀུ་ཤ་ཛཿ ཛཧཱུྃ་བཾ་ཧོཿ ཧཱུྃ༔ འཆར་ཀ་ནག་པོའི་དུས་ལ་བབ༔ ཁྱོད་ཀྱི་ལས་བྱེད་ཕོ་ཉ་ནི༔ ཡཱ་མ་ཀཱ་ལ་མཐིང་ནག་འབར༔ ཁྲོ་གཏུམ་ཞེ་སྡང་མེ་ལྟར་འབར༔ ཡིག་ཆུང་རྒྱ་མ་ཕྱག་ན་བསྣམས༔ འཁོར་བ་ཐོག་མ་མེད་པ་ནས༔ དམིགས་པའི་དགྲ་བགེགས་འདི་ཉིད་ཀྱི༔ ལས་ངན་སྡིག་སྒྲིབ་ཅི་བསགས་ཀུན༔ ཁྱོད་ཀྱི་ཡིག་ཆུང་ནང་དུ་གསལ༔ བསོད་ནམས་དགེ་བའི་འབྲས་བུ་ཅི་ཡོད་རྣམས༔ ཕྱི་དུས་བསྲིང་ལ་ཕྱི་མ་སྨིན་པར་མཛོད༔ སྡིག་སྒྲིབ་ཉམས་ཆག་ཉེས་ལྟུང་ཅི་ཡོད་ཀུན༔ དམིགས་པའི་གནོད་བྱེད་དགྲ་བགེགས་འདི་ཉིད་ཀྱི༔ ལུས་བརྟེན་འདི་ལ་ད་ལྟ་སྨིན་དུ་ཆུག༔ སྐད་ཅིག་ཉིད་ལ་རྡུལ་དུ་བརླག་པར་གྱིས༔
ཡ་མཱནྟ་ཀའི་བཀའ་མ་བཅག༔ དགེ་སྡིག་ལེགས་ཉེས་ཤན་འབྱེད་དུ༔ སྲིད་པས་བསྐོས་པའི་དམ་མ་འད༢༔ ད་ལྟ་ཉིད་དུ་ལས་སྒྲུབས་ཤིག༔ ཤ་རི་མ་རི་བྷྱོ༔ ཨཱ་ཡཱ་མ་པ་ཏྲི་ཧཱུཾ་ཕཊ༔ ཡ་མ་ཀཱ་ལ་ཧཱུྃ་ཕཊ༔ དགྲ་བགེགས་ཨ་མུ་ཀཾ་ཙིཏྟ་རྦད་སྙིང་ཕྱུངས་སྭཱ་ཧཱ༔ སྔགས་དེ་བཀའ་བསྒོའི་ཚུལ་དུ་བརྗོད་པ་ཡིས༔ འཆར་ཀ་དཔོན་གཡོག་གསུམ་པོ་རབ་ཏུ་ཁྲོས་སྐུ་ལས་མཚོན་ཆ་སྣ་ཚོགས་ཆར་བབ་པས༔ ལིང་ག་དགྲ་བགེགས་དངོས་སུ་གསལ་བ་དེ༔ ཤེ་མོང་སེར་བས་བྲབ་བཞིན་གཏུབ་པར་བསམ༔ ཐུན་གཅིག་ཅི་འགྲུབ་བཟླས་པ་ལས་སྦྱོར་ཡིན༔ ཧཱུྃ༔ ལས་ཀྱི་གཤིན་རྗེ་འཆར་ཀ་ནག་པོ་དང་༔ ཡཱ་མ་པ་ཏྲི་ཡཱ་མ་ཀ་ལར་བཅས༔ གནམ་ས་ལྟ་བུར་ཡངས་པའི་ཞལ་གདངས་ལ༔ གངས་རི་ལྟ་བུར་རྔམས་པའི་མཆེ་བ་གཙིགས༔ གློག་དམར་ལྟ་བུར་མྱུར་བའི་ལྗགས་སྐྱོང་ལ༔ བསྟན་པའི་སྤྱི་དགྲ་རྣལ་འབྱོར་སྒོས་དགྲ་དང་༔ དམ་སྲིད་སྒབ་འདྲེ་གནོད་བྱེད་དམིགས་ཡུལ་ཀུན༔ བཞེས་ཤིག་རོལ་ཅིག་སྲོག་བདག་གཤིན་རྗེའི་ཚོགས༔ རྣམ་ཤེས་དམིགས་མེད་ཆོས་དབྱིངས་ཀློང་དུ་བསྟིམ༔ ཧ་ཧ་ཧོ་ཧོ་ཧི་ཧི་དང་རོལ་ཅིག༔ གཤིན་རྗེ་དགའ་བའི་ཤ་ཁྲག་སྲོག་དབུགས་འབུལ༔ རྣལ་འབྱོར་དགའ་བའི་ཕྲིན་ལས་མྱུར་དུ་
སྒྲུབས༔ ༈ བྷྱོ༔ མདོས་ཟོར་ཤ་ཁྲག་གཏོར་མ་འདིས༔ ད་ལྟ་རྣལ་འབྱོར་བདག་ཅག་ལ༔ སྡེ་བརྒྱད་ཆད་པ་བྱུང་བ་ཟློག༔ བྱད་ཟོར་ཕུར་ཁ་ཐམས་ཅད་ཟློག༔ བན་དེའི་སྔགས་ཟོར་འདུས་པ་ཟློག༔ མུ་སྟེགས་བོན་པོའི་ཙོ་དམར་ཟློག༔ ལྷ་འདྲེའི་ཟ་ཁ་ཟུག་པ་ཟློག༔ རྒྱལ་པོ་ལོ་ཡི་བདུན་ཟུར་ཟློག༔ བློན་པོ་ཟླ་བའི་དབང་བཙན་ཟློག༔ དམག་མི་ཞིག་གི་དཔུང་དྲངས་ཟློག༔ མཚོན་ཆ་དུས་ཀྱི་རྣོ་ངར་ཟློག༔ སྤར་ཁའི་སྐྱ་མདའ་ཟུག་པ་ཟློག༔ སྨེ་བ་དུར་དུ་ཚུད་པ་ཟློག༔ ས་བདག་ཀོ་ལོང་གདུག་རྩུབ་ཟློག༔ འབྱུང་བའི་དགྲ་གཤེད་འཐོབ་པ་ཟློག༔ གཟའ་སྐར་དུས་ཚོད་ངན་པ་ཟློག༔ ལོ་ཟླ་ཞག་དུས་བབ་པ་ཟློག༔ ཁྲོམ་དང་བྱད་དུ་བཅུག་པ་ཟློག༔ ཧོམ་དང་པར་བུ་བསྐོར་བ་ཟློག༔ དགྲ་ཆེན་བདུད་དུ་ལོང་བ་ཟློག༔ ལྟས་ངན་གློ་བུར་ཡེ་འདྲོགས་ཟློག༔ དུས་མིན་འཆི་བ་རྣམ་བརྒྱད་ཟློག༔ མི་ཁ་བྲ་མཆུ་ཐམས་ཅད་ཟློག༔ ཆག་ཆེན་ཉམ་ང་ཐམས་ཅད་ཟློག༔ སྔོན་སྒུག་ཕྱི་ནས་དེད་པ་ཟློག༔ དགྲ་སྣ་ཕུང་སྣ་གྱོད་སྣ་ཟློག༔ ནད་སྣ་རིམས་སྣ་ཡམས་སྣ་ཟློག༔ དགྲ་སྲི་རྨི་ངན་ཐམས་ཅད་ཟློག༔ ཆེ་
སྲི་ཆུང་སྲི་རྒན་སྲི་ཟློག༔ གཞོན་སྲི་དར་སྲི་གོད་སྲི་ཟློག༔ དགྲ་སྲི་མཚོན་སྲི་ནད་སྲི་ཟློག༔ མདོར་ན་སྲིད་པའི་ཆགས་སྒོ་དང་༔ བདག་ལ་གནོད་པའི་དགྲ་བགེགས་རྣམས་སྡང་བྱེད་དགྲ་ཡི་སྟེང་དུ་ཟློག༔ གནོད་བྱེད་བགེགས་ཀྱི་སྟེང་དུ་བྷྱོ༔ བར་ཆོད་བདུད་ཀྱི་སྟེང་དུ་བྷྱོ༔ ཟ་འདྲེ་ཕུང་སྲིའི་སྟེང་དུ་བྷྱོ༔ དམ་ཉམས་བྱེད་མའི་སྟེང་དུ་བྷྱོ༔ སྤྲོ་ན། ཧྲཱིཿ ཀྐི་ཤ་རི་མ་རི་བྷྱོ༔ སོགས་སྔགས་རིང་ཚར་གསུམ་མམ་བདུན་སོགས་བརྗོད༔ དེ་ལྟར་ཐུན་གསུམ་བཞི་ལ་སོགས་འབད་དེ༔ ཞག་ནི་ལྔ་བདུན་དགུ༔ སྒྲུབ་པ་རྟགས་ཀྱི་རིམ་པ་ནི༔ ཕྱི་རྟགས་སྤྲིན་ནག་འབྲུག་སྒྲ་དང་༔ ཐོག་སེར་འཚུབ་མ་ནག་པོ་འབྱུང་༔ ནང་རྟགས་རྨི་ལམ་བློན་པོ་དང་༔ བྱ་ནག་མང་པོ་བྱུང་ན་བཟང་༔ མི་ནག་མོན་ནག་ཨ་ཙ་ར༔ མདུང་ཐོགས་དར་ནག་གྱོན་པ་དང་༔ གཡག་རྒོད་ལུག་དང་ཁྱི་དང་གཅན་སྤྱང་དང་༔ མང་པོ་བྱུང་ན་གཉན་སྡང་ཡིན༔ དེ་རྣམས་མི་མཐུན་གཅོད་པ་དང་༔ ཐག་རིང་འདུག་རྨིས་ཐ་མའོ༔ འོད་འཁྱུགས་འུར་སྒྲ་ཐོས་པ་འབྲིང་༔ ཡུགས་ས་མཛེ་ཕོ་རྨིས་པ་འབྲིང་༔ བསྐང་བ་མང་འདོན་ཚོགས་ཀྱང་བྱེད༔ གཡུལ་གཏུག་རླུང་འཚུབ་རང་ལ་བརྒྱབས༔ ཐོག་སེར་བརྒྱབ་བྱུང་བྱད་ཁའི་བརྟགས༔ མི་དང་བུད་མེད་མཚོན་ཆ་ཐོགས༔ སྔོན་བརྒྱབ་བྱས་བརྒྱབ་སྲོག་ཆགས་བསད༔ ལས་སྦྱོར་རན་པས་མཐའ་བསྡུད་བྱེད༔ གཡུལ་འགྱེད་མཐའ་བསྡུད་ཕ་རོལ་
ཐུབ༔ གཏོར་མ་འཕངས་ཤིང་ཟློག་སྔགས་བཟླས༔ དམ་ཚིག་བླ་མ་དཀོན་མཆོག་དང་༔ གཤིན་རྗེ་ཉིད་ལ་དད་གུས་བསྐྱེད༔ སྒྲུབ་རྫས་སྐུ་གཟུགས་མི་སྟོན་སྦས༔ ཕྲེང་བ་མི་ལ་རེག་མི་འཇུག༔ བྷ་ལིཏྟའི་སྔགས་བསྔོས་མ་ཆག་བྱེད༔ བྱ་ནག་ཁྱི་ནག་གཡག་ནག་དང་༔ གཅན་གཟན་ལ་སོགས་བླ་རྟགས་ལ༔ བྱམས་ཤིང་སྤྲོ་དགའི་སེམས་འཆང་ངོ་༔ དེ་རྣམས་བསྲུང་ན་དངོས་གྲུབ་ཐོབ༔ མ་སྤེལ་བསྲུང་ན་འགྲུབ་ཐག་ཉེ༔ ༈ དེ་ནས་རྗེས་ཀྱི་བྱ་བ་ནི༔ ཞག་གྲངས་ཐེམ་པའི་རྟགས་ཐོན་ནས༔ ཚེར་ཤིང་གྲུ་གསུམ་ཧོ་དུ་བརྩེགས༔ གཏོར་མའི་ནང་གི་ལིང་རོ་རྣམས༔ ལིང་ག་གསར་པ་གཅིག་བྲན་ལ༔ བདག་སྐྱེད་གཞུང་ལྟར་མདུན་བསྐྱེད་ནི༔ མདུན་དུ་མེ་ཧོ་གྲུ་གསུམ་ནང་༔ དགྲ་བགེགས་ཤ་ཁྲག་ཅེས་པ་ནས༔ བསྟོད་པ་ཡན་ཆད་གཞུང་ལྟར་འདོན༔ ལིང་ག་བྲན་ལ་བཀུག་གཞུག་བྱེད༔ ཞལ་བསྟབ་བར་དུ་བཏོན་པའི་རྗེས༔ ཨོཾ་ཧྲཱིཿལླི་ཝཱི་ཊི་ཏཱ་ན་ན་ཧཱུྃ་ཕཊ༔ ཤ་རི་མ་རི་བྷྱོ༔ དགྲ་བགེགས་ཛྭ་ལ་རཾ་ཁཱ་ཧི༔ སྔགས་དེ་ལིང་ག་ཤ་དུམ་རེ༔ སྤྲད་ནས་རབ་ཏུ་བརྒྱ་རྩ་འབུལ༔ འབྲིང་ལ་དྲུག་ཅུ་རེ་བཞི་སྟེ༔ ཐ་མ་ཉེར་གཅིག་ཕུལ་བས་ཆོག༔ འཁོར་གཉིས་སྔགས་ལ་ཛྭ་ལ་རཾ༔ བཏགས་པ་བདུན་རེ་འབུལ་བར་བྱ༔ སླར་ཡང་གོང་ལྟར་མཆོད་པ་བྱ༔ ཐབ་ནང་བཞུགས་པའི་ལྷ་གསུམ་པོ༔ མདུན་བསྐྱེད་གཏོར་མ་གསུམ་ལ་ཐིམ༔ ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱཿ ཐལ་བ་
ལམ་མདོ་རྒྱ་གྲམ་མམ༔ ས་ནོན་ཆེ་སར་བླུག་པར་བྱ༔ ༈ སླར་ཡང་བདག་མདུན་ཚར་གཅིག་འདོན༔ བདག་བསྐྱེད་ང་རྒྱལ་བརྟན་བྱས་ལ༔ སྔོན་དུ་གསེར་སྐྱེམས༔ གནོད་པའི་ཕྱོགས་སམ་གཙང་ཕྱོགས་སུ༔ སྒྲུབ་གཏོར་ཟོར་དུ་འཕེན་པ་སྟེ༔ བྷྱོ་མདོས་ཟོར་ཤ་ཁྲག་གཏོར་མ་འདིས༔ སོགས།་བཟློག་ཐུང་འདོན་ཏེ་བཞེས་འབོད་བྱ༔ མདུན་བསྐྱེད་འཆར་ཁ་དཔོན་གཡོག་གསུམ༔ སྤྲིན་ནག་རླུང་གིས་བསྐྱོད་པ་བཞིན༔ འུར་སྒྲ་ཐུག་ཆོམ་དྲག་པོར་བཅས༔ སྡང་དགྲ་གནོད་བྱེད་ཐམས་ཅད་ནི༔ རང་དབང་མེད་པར་བཟུང་སྟེ་ཁྱེར༔ ལྷོ་ཕྱོགས་གཤིན་རྗེའི་ཡུལ་དུ་སོང་༔ བསད་བཅད་ཤ་ཁྲག་ལོངས་སྤྱོད་བསམ༔ ཕྱི་མིག་མི་ལྟ་ནང་དུ་ལོགས༔ བདག་བསྐྱེད་བསྒོམས་ཤིང་བསྙེན་པ་བྱ༔ ཧྲཱིཿཊྛི་སྔགས་ཀྱི་མཇུག་ཏུ་ནི༔ མ་མ་རཀྵ་ཀུ་རུ་ཡེ་སྭ་ཧྭཿ བདག་བསྐྱེད་འོད་ཞུ་ཧཱུྃ་ལ་ཐིམ༔ ཧཱུྃ་ཡང་གྱེན་ཡལ་སྟོང་པར་ཡལ༔ འདི་ལྟར་བགྱིས་པའི་དགེ་བ་ཡིས༔ བདག་ལ་འབྲེལ་ཐོགས་འགྲོ་བ་ཀུན༔ བདུད་བཞིའི་གཡུལ་ལས་རབ་རྒྱལ་ནས༔ མ་འོངས་མགོན་པོ་ཀུན་གཟིགས་ཀྱི༔ ཞིང་གི་དཔལ་ལ་ལོངས་སྤྱོད་ཤོག༔ གནས་སྐབས་འབྲེལ་ཐོགས་འགྲོ་བ་ཀུན༔ སྐྱོན་བྲལ་ཡོན་ཏན་ཀུན་རྫོགས་པའི༔ འཇམ་དཔལ་དབྱངས་ཀྱི་བཀྲ་ཤིས་སྩོལ༔ ཞེས་པ་འདི་ནི་གནམ་ཆོས་ཐུགས་གཏེར་ལས༔ འཆར་ཁ་དཔོན་
གཡོག་གསུམ་གྱི་སྒྲུབ་ཐབས་གསུངས༔ འོན་ཀྱང་རྒྱུད་ཚིག་ཤིན་ཏུ་གོ་དཀའ་བས༔ འཆར་ཀ་ཐུགས་དམ་བྱས་པའི་སྔགས་པ་འགས༔ གཏེར་རྙིང་རྒྱས་པ་མང་པོ་འདོན་མོད་ཀྱང་༔ སྒྲུབ་ཐབས་ལག་ལེན་ཁོང་དུ་མ་ཆུད་པས༔ སྒྲུབ་པ་མ་ཤེས་གཏོ་ཆོག་ལྟ་བུར་སོང་༔ དེ་ལ་མ་བཟོད་བདག་གིས་འདི་ཉིད་བསྒྲིགས༔ བཀའ་མ་འགོས་ལོས་བསྒྱུར་བའི་གླེགས་བམ་དང་༔ གནོད་སྦྱིན་གདོང་གསུམ་པ་ཡི་རྒྱུད་ལ་སོགས༔ བཀའ་གཏེར་འདི་ཡི་རྒྱུད་གཞུང་མང་དུ་མཐོང་༔ གཏེར་མ་ཞང་ཁྲོམ་ལུགས་ཀྱི་རྒྱས་པ་དང་༔ རྙིང་མ་བཀའ་མའི་ལུགས་ཀྱི་གླེགས་བམ་མཐོང་༔ སངས་གླིང་ལུགས་སོགས་འགའ་རེའི་དབང་ལུང་ཐོབ༔ གདམ་ཆོས་ལུགས་ལ་བསྙེན་ཆེ་རྟགས་ཀྱང་ཐོན༔ གནམ་ཆོས་ལུགས་ལ་སྒྲུབ་ཐབས་གཉིས་ཡོད་པས༔ གཙོ་འཁོར་གསུམ་པོ་འདི་ཉིད་གཉན་ཅིང་ཟབ༔ སྔགས་འཆང་གསར་བུ་རྣམས་ལ་ཕན་པའི་ཕྱིར༔ རྒྱུད་གཞུང་མན་ངག་དུ་མའི་དོན་བསྡུས་ཤིང་༔ གནམ་ཆོས་གཞུང་གིས་ཁ་བཀང་ལྷན་ཐབས་སུ༔ གཏེར་བློན་རཱ་ག་ཨ་སྱས་ལེགས་པར་སྦྱར༔ འདི་ལ་ཉེས་འགལ་འཁྲུལ་པ་ཅི་མཆིས་པ༔ སྐུ་མཆོག་འཇམ་དཔལ་ལྷ་ཚོགས་རྣམས་ལ་བཤགས༔ དགེ་བས་འདི་ལ་འབྲེལ་པ་ཐོགས་ཚད་ཀུན༔ འཇམ་དཔལ་འགྲུབ་པའི་རིག་འཛིན་འབྱུང་བར་ཤོག༔ མངྒ་ལཾ། བཀྲ་ཤིས་ཤོག། །༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།