འཇམ་དཔལ་ཕ་རོལ་རྒོལ་འཇོམས་ཀྱི་ཟིན་བྲིས།
འཇམ་དཔལ་ཕ་རོལ་རྒོལ་འཇོམས་ཀྱི་ཟིན་བྲིས་བཞུགས་སོ། །
ན་མོ་མཉྫུ་ཁྲི་ཡ་མཱན་ཀ་ཡེ། འཇམ་དཔལ་ཕ་རོལ་རྒོལ་འཇོམས་འདོན་འགྲིགས་ནི། །བཅའ་ཚོགས་ཞིབ་པར་མཐོང་བ་བརྒྱུད་པ་ལྟར། །མདོས་གཞི་སྟེང་དུ་གྲུ་གསུམ་གཅིག་བྲིས་ལ། །དེ་རྒྱབ་གྲུ་བཞི་བྲིས་པ་ཟུར་བཞི་ལ། །མདུན་རྒྱབ་གཡས་གཡོན་འཁོར་བཞིའི་གཏོར་མ་བཤམས། །དེ་རྒྱབ་རྩིབས་བཅུར་རྒྱལ་ཆེན་སྡེ་བཞི་དང་། །མ་མགོན་དྲེགས་པ་དྲུག་གི་གཏོར་མ་བཤམས། །དེ་རྒྱབ་འཁོར་ལོ་རྩིབས་བཅུར་ཕྱོགས་སྐྱོང་བཅུ། །གྲུབ་ན་འཁོར་ལོ་ཐམས་ཅད་ནག་པོ་སྟེ། །འཁོར་ལོའི་རྩིབས་ཀྱི་ནང་དུ་ཧོམ་ཁུང་བྲུ། །ཁྲག་བླུག་ནང་དུ་ཟན་ལིང་གཅིག་
བཞག་གོ །གལ་ཆེ་གཙོ་བོའི་འོག་ཏུ་ཟན་ལིང་བཞག །གཏོར་མ་ཐམས་ཅད་དམར་གཏོར་ཁོ་ན་སྟེ། །གཙོ་བོར་མར་གྱི་མེ་རི་རྐྱང་པས་བརྒྱན། །འཁོར་རྣམས་ཟོར་ཡིན་མར་རྒྱན་མི་བཏགས་སོ། །གཙོ་བོ་ལ་ནི་རྩང་དམར་ཉི་ཤུ་གཅིག །ལས་མཁན་བཞི་ལ་རྩང་ནི་བདུན་རེ་བཙུགས་། །དེ་རྒྱབ་བཅུ་ལ་རྩང་ནི་གསུམ་རེ་འཛུགས། །དེ་རྒྱབ་རྩང་རིང་སྟོད་དམར་སྨད་ནག་པོ། །སྐེད་པ་རྒྱ་མདུད་ལྡན་པ་ཉི་ཤུ་བརྒྱད། །སྲིན་མོ་འགྲོས་སུ་རྩང་བསླས་བྱས་པ་བཙུགས། །ཕྱོགས་བཞིར་སྒོ་རྩང་བཞི་པོ་འགྲེང་ཐབས་བཙུགས། །ཤར་དུ་རྩང་ཕུར་དཀར་པོ་ཟླུམ་པོ་སྟེ།
ལྷོ་རུ་སེར་པོ་གྲུ་བཞི། །ནུབ་ཏུ་དམར་པོཟླ་གམ། །བྱང་དུ་སྔོན་པོ་གྲུ་གསུམ་སྟེ། །བཞི་ཀའི་སྐེད་པར་རྒྱུ་མདུད་དང་ལྡན་པ། །དེ་རྒྱབ་སྐུད་པ་སྔོ་དམར་དག་གིས་བསྐོར། །སྟེང་དུ་དར་གདུགས་ནག་པོ་ཞིག་ཀྱང་ཕུབ། །མེད་ན་དམའ་དར་ནག་པོ་བཙུགས་པས་འཐུས། །ཡོད་ན་སོ་སོའི་ཙཀླུ་ཡང་བཙུགས། །མེད་ཀྱང་ལྷག་ཆད་སྐྱོན་དུ་མི་འགྱུར་རོ། །གཏོར་མདོས་འོག་ཏུ་བྲུབ་ཁུང་ལིངྒ་བཅའ། །རྒྱས་པར་ཁ་ལ་རྒྱས་འདེབས་གཞུང་ལྟར་བཅའ། །འབྲིང་པོར་ཧོམ་ཁུང་དམར་ཆུང་ནང་ལྟར་ལིང་རྐྱང་བྲི། །བསྡུས་པ་བྲུབ་ཁུང་ལིངྒ་མི་དགོས་སོ། །གཏོར་མའི་འོག་གི་ལིངྒས་ཆོག་པ་སྟེ། །ཐུན་མཚམས་ལ་སོགས་མཁོ་བའི་ཡོ་བྱད་བསགས། །དེ་ནི་བཅའ་ཚོགས་ལག་ལེན་བརྗེད་ཐོ་ཡིན། ༈ །དེ་ནས་འདོན་ཆའི་རིམ་པ་འདི་ལྟ་སྟེ། །དང་པོ་བདག་བསྐྱེད་སྲུང་འཁོར་གཞུང་ལྟར་འདོན། །གཙོ་བོའི་སྲུང་སྔགས་ཅི་ནུས་འབད་ནས་བཟླས། །དེ་རྗེས་ཆོ་གའི་སྲུང་སྔགས་ཅི་འགྲུབ་དང་། །དགྲ་དོགས་ཡོད་ན་ཀིང་ཀང་སྔགས་རིང་དང་། །རཀྟ་སྦྱར་བ་གཞན་ནས་འབྱུང་ལྟར་འདོན། །དེ་ནས་མདུན་བསྐྱེད་གཞུང་ལྟར་བསྟོད་པའི་བར། །བསྟོད་ནས་མདུན་བསྐྱེད་བཟླས་པ་ཅུང་ཞིག་
བྱ། །དེ་ནས་ཟན་ལིང་ཆེ་བ་གཅིག་གམ་ནི། །ཡང་ན་ལིང་ག་སྤར་བཏབ་མང་དུ་བཞག །གཞུང་ནས་བྱུང་ལྟར་བསྒྲལ་ལས་རྒྱས་པར་བྱ། །དེ་ནས་ཟན་ལིང་རེ་དང་གཏོར་ཆུང་རེ། །སྦྲགས་ལ་རེ་རེ་བཞིན་དུ་འབུལ་བ་སྟེ། །གཙོ་བོ་ཀུན་ལ་བསྟོད་པའི་མཇུག་ཏུ་ནི། །སྨན་རཀ་གཏོར་སོགས་ཕྱི་ནང་གསང་མཆོད་འབུལ། །ཞེས་སོགས་འདོད་གསོལ་ཚང་བར་བྱས་པའམ། །འདོད་གསོལ་ལས་བཞིའི་འདོད་གསོལ་གང་འདོད་བྱ། །ལྷ་ཚོགས་རྣམས་ལ་རིམ་བཞིན་གཏོར་ཆུང་འབུལ། །དེ་ནས་ཟློག་གཞུང་མ་རྫོགས་བར་དུ་འདོན། །མཇུག་ཏུ་སྔགས་མང་བརྗོད་རྔ་དྲག་རྡུང་བྱ། །དེ་ནས་གཏོར་ཆུང་ཆེ་བ་གཅིག་བཤམས་ལ། །ཉི་མ་ལྷོ་ཕྱོགས་མ་ལ་སོགས་པ་ཡི། །ཡ་མ་རཱི་ཙའི་བསྐུལ་པས་མདོས་ནང་ཕུལ། །དེ་ལྟར་རབ་ནི་ཚར་གསུམ་ཐུན་གསུམ་སྟེ། །འབྲིང་པོ་སྔ་ཐུན་ཕྱི་ཐུན་གཉིས་ཡིན་ནོ། །ཐ་མ་ཉིན་རེ་ཚར་རེ་བཏོན་པས་འཐུས། །དོ་གལ་ཆེ་ན་ཐུན་པ་མང་པོ་ཡིས། །ཀིང་ཀང་སྔགས་རིང་སྔགས་རྒྱུན་བྱས་ནའང་ཆོག །འབྲིང་དུ་ཡིན་ན་ཐུན་པ་ཉུང་ཞིག་བཞག །ཐ་མའང་རང་ཉིད་ཐུན་སྐབས་ཅི་ནུས་བཟླས། །གལ་ཆེན་ཡིན་ན་རྨིས་རྟགས་ཐོན་པར་
བྱ། །སྐབས་སུ་ནུབ་རེར་ཚོགས་རེ་འཛོམ་ན་བཟང་། མེད་ན་རྗེས་ནས་གཏང་རིཀ་ཚོགས་རེ་བྱ། །འབུལ་ཁ་སྔ་དྲོ་མདུན་བསྐྱེད་བསྡུས་པ་ཙམ། །བཏོན་ནས་བསྒྲལ་ལས་ལ་སོགས་གོང་ལྟར་ལས། གཏོར་ཆུང་ལིངྒ་ལ་སོགས་སྦྲགས་ལོ་བཤམས་བྱས་ཏེ། །གཙོ་བོ་གོ་ཆ་ལྷ་ལྡེ་སྲས་མཆོག་བཞི། །ཡོན་ཏན་གཞན་རྣམས་སྒྱུར་བ་དང་། །ཧཱུྃ་བྷྱོ༔ བཅོམ་ལྡན་དཔལ་ཆེན་ལ་སོགས་ཟློག་པའི་སྔགས། །ཡན་ཆད་གཞུང་ལྟར་འདོན་པར་བྱ་བའི་རྗེས། །ཟོར་ཕྲན་ཉི་མ་ལྷོ་ཕྱོགས་ལ་སོགས་ནས། །ཟོར་གྱི་སྐུལ་པ་གསུམ་དེ་འདོན་པར་བྱ། །དེ་ནས་གཏོར་མའི་སྟོད་ཆ་ལྷ་གསལ་ནས། །ནམ་མཁར་བཏེག་ནས་སྤྲིན་ལྟར་འཁྲིགས་པར་བསམ། །དེ་ནས་གཞི་གདན་ནག་པོ་བཏིང་བའི་ནང་། །གཏོར་མདོས་དགྲ་ཕྱོགས་ཁ་བསྟན་བཞག་པར་བྱ། །མཐའ་སྐོར་གཏོར་ཆུང་ཉི་ཤུ་རྩ་བཞིས་བསྐོར། །དེ་དག་བཀུག་གཞུག་ཅུང་ཟད་བྱས་ཀྱང་ལེགས། །མིན་ཀྱང་དགྲ་བགེགས་ཤ་ཁྲག་དམིགས་པས་འཐུས་།དེ་ནས་སྔོན་འགྲོ་འདོན་འཕྲོ་བསྟོད་པའི་མཐར། །མ་གཤིན་བཙན་བདུད་བཅས་པའི་ལས་མཁན་བཞི། །མ་མགོན་གཟའ་ཀླུ་པེ་གཙང་དྲེགས་པ་དྲུག །རྒྱལ་ཆེན་སྡེ་
བཞིའི་སོ་སོའི་བསྟོད་པའི་མཇུག །དམ་རྫས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་བརྗོད་པའི་རྗེས་ནས་གཏོར་ཆུང་འབུལ། །དེ་ནས་ཕྱོགས་སྐྱོང་བཅུ་ཡི་གཏོར་མ་ནི། །དབྱངས་དང་བཅས་པས་ཤོ་ལོ་ཀ་རེས་འབུལ། །དྲེགས་པ་བཅུ་ལ་གཅིག་ཕུལ་ཏེ། །ཕྱི་ནང་གསང་བའི་ལྷ་སྲིན་སྡེ་བརྒྱད་སོགས། །གཞུང་གི་བསྟོད་པའི་བར་ན་ཡོད་ལྟར་ཡིན། །དེ་ནས་གཞུང་གི་གསེར་སྐྱེམས་འགྲོ་ཕྱོགས་གཏོར་བྱ་ཞིང་། །བདག་ནི་མ་ཉེས་མ་ཡོ་ལ་སོགས་འདོན། །སྒོ་རྩང་བཞི་ནི་བླངས་བྱས་ཤིང་། །ཕྱོགས་ནི་གཙང་སར་ཁ་བསྟན་འདུག་བྱས་ལ། །མདུན་དུ་སླ་ངའི་ནང་དུ་གྲུ་གསུམ་བྲི། །གྲུ་གསུམ་ནང་དུ་ཨེ་བྲིས་ལིངྒ་བཞག །ལིང་ག་བསྐྱེད་ཆོག་བཀུག་གཞུག་སྔོན་ལྟར་བྱ། །དེ་ནས་ཀོང་ཟོར་ནས་བཟུང་ཟོར་རྣམས་འཕང་། །དེ་ནས་ཟློག་པའི་རྩང་རྣམས་ལེན་པར་བྱ། །སོ་སོའི་ཙཀླུ་བལྟས་ལ་མ་ནོར་བར། །ཕྱོགས་སྐྱོང་བཅུ་པོ་སོ་སོའི་ཚིགས་བཅད་མཇུག །དོ་ནུབ་དྲག་པོའི་ཟོར་སོགས་ཤོ་ལོ་ཀ །པྲ་ཧ་ལ་སོགས་སོ་སོའི་ཚིག་མཇུག་ཏུ། །གནོད་བྱེད་དགྲ་བགེགས་ལ་སོགས་སོ་སོའི་ཤམ་བུ་
བཏགས། །ཕྱོགས་སྐྱོང་གཏོར་མ་རིམ་བཞིན་འཕང་བར་བྱ། །དེ་ནས་ལེགས་ལྡན་ལ་སོགས་དྲེགས་པའི་ཚོགས། །གཞུང་ལྟར་ཤོ་ལོ་ཀ་དྲུག་སྔགས་བཅས་འཕང་། །དེ་ནས་མ་གཤིན་ལ་སོགས་ལས་མཁན་ལོ། །གོང་གི་ཁྲིམ་ཟོར་མདའི་ཟོར་དང་། །རྡོ་ཟོར་ལ་སོགས་སོ་སོའི་ཚིག་བསྒྱུར་ཏེ། །བསྟན་པ་བཤིག་པའི་དགྲ་ལ་གཏོར་ཟོར་རྒྱོབ། །བླ་ཚེ་མན་ཆད་སྔགས་བཟླས་སྔོན་ལྟར་རོ། །རྐྱེན་ཟློག་ལ་ནི་གཙོ་བོའི་གཏོར་མ་དེ། །ལག་ཏུ་བཟུང་ནས་མགོ་ཐོག་འགྲིམ་པའམ། །རྐྱེན་ཟློག་མིན་ན་ལག་ཏུ་ཐོགས་བྱས་ནས། །ཧཱུྃ། ཡབ་གཅིག་དཔལ་ཆེན་ལ་སོགས་བསྐུལ་བྱུང་མཐར། །ཀིང་ཀང་སྔགས་རིང་ཨེ་ཀ་དུ་ནའི་མཇུག །བཞེས་འབོད་རིང་བ་བཏོན་ལ་གཏོར་མ་དེ། །ལིང་གའི་སྟེང་དུ་གཏོར་རྩེ་བསྟན་ལ་རྒྱབ། །དར་ནག་གཡབ་ཅིང་གཏོར་སྣོད་སྦུབ་པའི་སྟེང་། །བསྟན་པའི་དགྲ་བགེགས་ལ་སོགས་གཏོར་བྲོ་བརྡུངས། །ཡུད་ཙམ་ངལ་བསོ་ཚོགས་འཁོར་དགའ་སྤྲོ་བྱ། །ལྷག་མ་ཕུལ་ཞིང་ཚོགས་དུམ་ཤ་ཆང་བླུག །དེ་ནས་ཚོགས་མཇུག་ཚད་མདོ་གཏོར་སྐྱོང་བྱ། །བཀྲ་ཤིས་རྗེས་ཆོག་ལ་སོགས་གཞུང་ལྟར་རོ། །དེ་ནས་རང་གཞན་བསྲུང་བ་བྱ་བ་ནི། །གལ་ཏེ་
དགྲ་ཆིངས་དགྲ་བྲུབ་བྱས་པའམ། །ཁ་ལ་རྒྱས་འདེབས་རྒྱས་བསྡུས་གང་བྱས་ཀྱང་། །དེ་དག་ཐམས་ཅད་འདོན་ལུགས་གཅིག་པའོ། །གཏོར་ཆུང་མཇུག་གི་འདོད་གསོལ་དེ་ཉིད་ནི། །གལ་ནི་གང་ཆེ་འདོན་ཞིང་གཞན་རྣམས་དོར། །དེ་ནས་ཀིང་ཀཾ་ནག་པོའི་འདོན་འགྲིགས་སོ། །བདུད་རྩི་དིལ་གྱི་སྔགས་འཆང་རྣམས་ཀྱིས་བསྐུལ་ཕྱིར་སྔགས་འཆང་རཱ་ག་ཨ་སྱས་བསྒྲིགས་པའོ། །ཉེས་འགལ་ལྷ་དང་སྲུང་མའི་ཚོགས་ལ་བཤགས། །དགེ་བས་སྙིང་པོ་དོན་གྱི་བསྟན་པ་ལ། །སྡང་བའི་དགྲ་བོ་གཏན་ནས་བརླག་པར་ཤོག༔ སརྦ་དཱ་ཀ་ལྱཱ་ཎཾ་བྷ་ཝནྟུ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།