ཐུགས་རྗེ་ཆེན་པོ་གསང་བ་འདུས་པའི་ཉམས་ལེན་ཐུན་ཆུང་ཉུང་བ།
ཐུགས་རྗེ་ཆེན་པོ་གསང་བ་འདུས་པའི་ཉམས་ལེན་ཐུན་ཆུང་ཉུང་བ་བཞུགས་སོ།།
སྤྱི་གཙུག་པད་སྡོང་ཉི་ཟླའི་སྟེང་རྩ་བ་གསུམ་གྱི་ལྷ་ཚོགས་དང་༔ སྐྱབས་གནས་དཀོན་མཆོག་ཐམས་ཅད་ལ༔ ཕ་མས་གཙོར་བྱས་འགྲོ་བ་རྣམསཿ སྒོ་གསུམ་གུས་པས་འདི་སྐད་བརྗོད༔ ན་མོ༔ བླ་མ་དཀོན་མཆོག་ཡི་དམ་ལྷ༔ རྒྱལ་བ་རྒྱ་མཚོའི་ཚོགས་བཅས་ལ༔ བདག་དང་འགྲོ་བ་སེམས་ཅན་རྣམས༔ སྒོ་གསུམ་གུས་པས་སྐྱབས་སུ་མཆི༔ རང་རིག་ལྷ་ལ་ཕྱག་འཚལ་ལོ༔ མ་འགགས་རང་གསལ་མཆོད་པར་འབུལ༔ མུ་བཞིར་ལྟུང་བ་མཐོལ་ལོ་བཤགས༔ དུས་གསུམ་མཉམ་ཉིད་རྗེ་ཡི་རང་༔ འཁོར་བ་དོང་ནས་སྤྲུགས་པར་
བསྐུལ༔ ཀ་དག་ཟང་ཐལ་རྗེན་པར་བཞུགས༔ ཀུན་ཀྱང་རང་རིག་རྟོགས་པར་བསྔོ༔ སྐུ་གསུམ་ཡོངས་རྫོགས་ཐོབ་པར་ཤོག༔ ཀྱེ་མ༔ བདག་གིས་འགྲོ་ཀུན་བསྒྲལ་བའི་ཕྱིརཿ ཐུགས་རྗེ་ཆེན་པོའི་དཀྱིལ་འཁོར་དུ༔ འཁོར་བ་དོང་ནས་སྤྲུགས་པའི་ཕྱིར༔ ཚད་མེད་བཞི་རུ་སེམས་བསྐྱེད་དོ༔ རང་ཉིད་ཐུགས་རྗེ་ཆེན་པོར་བསྒོམ༔ ཞལ་གཅིག་ཕྱག་གཉིས་སྐུ་མདོག་དམར༔ ཕྱག་གཡས་པད་ཕྲེང་ཐུགས་ཀར་འཛིན༔ ཕྱག་གཡོན་པད་སྡོང་བདུད་རྩི་བུམ༔ རྡོ་རྗེ་སྐྱིལ་ཀྲུང་རང་འདྲའི་ཡུམ༔ གསང་བ་ཡེ་ཤེས་མདངས་ལྡན་མ༔ གཉེན་
ལྕགས་འཁྲིལ་ཞིང་དབྱེར་མེད་བསྒོམ༔ རིལ་བུ་དམ་ཚིག་ཡེ་ཤེས་སུ༔ དབྱེར་མེད་ཐུགས་རྗེ་ཆེན་པོར་བསྒོམ༔ སྤྱི་གཙུག་རིགས་བདག་ཐུགས་ཀར་ནི༔ ཟླ་སྟེང་ཧྲུལ་ཡིག་དྲུག་བསྐོར༔ ཐུགས་ཀར་རྟ་མགྲིན་རྔམ་བརྗིད་འཇིགས༔ བདག་དང་མཐའ་ཡས་རྟ་མགྲིན་གསུམ༔ ཐུགས་ཀར་ཟླ་སྟེང་ཧཱུྃཡིག་མཐར༔ ཡིག་དྲུག་གཡས་སུ་བསྐོར་བར་བསམ༔ ཨོཾ་མ་ཎི་པདྨེ་ཧཱུྃ་ཧཱུྃ༔ སྔགས་ལས་འོད་ཟེར་དཀར་པོ་འཕྲོས༔ རྒྱལ་བའི་སྐུ་ལ་མཉེས་མཆོད་འབུལ༔ དངོས་གྲུབ་མ་ལུས་བདག་ལ་བསྡུས༔ ཁམས་གསུམ་སེམས་ཅན་ལས་སྒྲིབ་སྦྱངས༔ མ་ལུས་སྡུག་བསྔལ་ཞི་བར་བསམ༔ མཐའ་ཡས་ཐུགས་ཀར་སྔགས་ཕྲེང་ལས༔ འོད་ཟེར་དམར་པོ་དཔག་མེད་འཕྲོས༔ རྒྱལ་བའི་གསུང་ལ་མཉེས་མཆོད་འབུལ༔ གསུང་གི་དངོས་གྲུབ་བདག་ལ་བསྡུས༔ ཀུན་ཀྱང་ང་ག་གི་དབང་འདུས་བསམ༔ རྟ་མགྲིན་ཐུགས་ཀའི་སྔགས་ཕྲེང་ལས༔ འོད་ཟེར་མཐིང་ག་རབ་འཕྲོས་པས༔ རྒྱལ་བའི་ཐུགས་ལ་མཉེས་མཆོད་འབུལ༔ ཐུགས་ཀྱི་དངོས་གྲུབ་བདག་ལ་ཐིམ༔ སེམས་ཅན་ཀུན་གྱི་ཡིད་སྒྲིབ་སྦྱངས༔ སྣང་བ་ཐམས་ཅད་དབང་བསྡུས་བསམ༔
དྲེགས་པ་ཚར་གཅོད་དྲག་པོ་ནི༔ ལྷ་གསུམ་ཐུགས་ཀའི་སྔགས་ཕྲེང་ལས༔ ཁྲོ་ཆུང་མཚོན་ཐོགས་དཔག་མེད་འཕྲོས༔ ཧཱུཾ་དང་ཕཊ་ཀྱི་སྒྲ་སྒྲོག་ཅིང་དེ་སྒྲས་སྟོང་གསུམ་ཡོངས་གང་ནས༔ བདུད་དང་དམ་སྲི་འབྱུང་པོའི་ཚོགས༔ གང་དག་ཞི་བས་མི་ཐུལ་བ༔ མ་ལུས་ཚར་བཅད་དག་ཏུ་གྱུརཿ ཆེ་བཙན་འགྲན་ཟླ་བྲལ་བར་བསམ༔ ཨོཾ་མ་ཎི་པདྨེ་ཧཱུྃ་ཧཱུྃཕཊ༔ གསང་བ་དུས་པའི་ཐུན་ཆུང་ཉུང་བ་ཨ་རཱ་གས་སྦྱར་བའོ། །མངྒ་ལཾ།། །། ༈ འབྲེལ་ཐོགས་ཀུན་ལ་ཕན་པའི་ཕྱིར། རང་ཉིད་རྒྱལ་བ་རྒྱ་མཚོའམ༔ གསང་འདུས་སྐུ་རུ་གསལ་བ་ཡི༔ ཐུགས་ཀའི་ཧྲིལས་འོད་འཕྲོས་པས༔ འབྲེལ་ཐོགས་གཤིན་པོ་གསོན་པོ་ཡི༔ གཙོར་བྱས་སེམས་ཅན་ཐམས་ཅད་ཀྱི༔ སྤྱི་བོར་སྤྱན་རས་གཟིགས་དམར་པོ༔ རྒྱན་མེད་བཞེངས་ཤིང་བཞུགས་པར་བསྒོམས༔ ཕྱག་གཡས་བགྲང་ཕྲེང་གཡོན་བུམ་པ༔ བུམ་ནང་བདུད་རྩི་རྒྱུན་བབས་པས༔ སེམས་ཅན་ཀུན་གྱི་སྡིག་སྒྲིབ་བཀྲུས༔ ཐུགས་ཀའི་ཧཱིཿལས་ཧཱི་གཅིག་འཕྲོས་སྤྱི་བོ་ནས་ཞུགས་སྙིང་ཁར་ཐིམ༔ དེ་ཡི་འོད་ཀྱིས་སེམས་ཅན་ཀུན༔ སྤྱན་རས་གཟིགས་ཀྱི་སྐུར་གྱུར་ཏེ༔ ཀུན་ཀྱང་རང་གི་རམ་བུ་བཏེག༔ ཡིག་བདུན་སྒྲ་
ཡིས་འཇིག་རྟེན་གང་༔ ཡིག་བདུན་མཇུག་ཏུ་སྔགས་འདི་སྦྱར༔ ཨ་ར་པ་ཙ་མི་ཏ་ཧྲིད་ཡ་སྭཱ་ཧྭ༔ འདི་ནི་འགྲོ་དོན་ཆར་རྒྱུན་མ༔ སངས་གླིང་གཏེར་ཁ་ཨོ་རྒྱན་གསུངས༔ ཞེས་ཨ་རཱ་གས་སོ༔ ཨོཾ༔ ཐུགས་རྗེ་ཆེན་པོའི་སྒོ་ནས་བདུད་ཟློག་བཞུགས་སོ།། བླ་མ་སངས་རྒྱས་རྣམས་ཀྱིས་བྱིན་གྱིས་རློབས༔ བླ་མ་སངས་རྒྱས་རྣམས་ལ་སྐྱབས་སུ་མཆི༔ བླ་མ་སངས་རྒྱས་རྣམས་ཀྱི་ཐུགས་རྗེས་གཟིགས༔ ཨོ་རྒྱན་རིན་པོ་ཆེ་ཡི་ཞལ་ན་རེ༔ ཁྱད་པར་ནད་ཡམས་མུ་གེ་འཁྲུག་རྩོད་དང་༔ ཆག་ཆེ་ཉམ་ང་རྨི་ལམ་མཚན་མ་ངན༔ ལོ་ཀག་ཟླ་ཀག་མོ་རྩིས་ངན་པ་རྣམས༔ ཡིག་བདུན་འཛབ་ཀྱིས་ལུང་པ་ཆོས་སྒྲས་བཀང་༔ གཞན་ལ་མི་རེ་བློ་སེམས་གཅིག་ཏུ་དྲིལ༔ དེ་ཚེ་བར་ཆད་ཞི་ནས་ལྟས་བཟང་གྱུརཿ མཆོག་དང་ཐུན་མོང་སྨོན་ལམ་གང་བཏབ་འགྲུབ། །ཅེས་གསུངས་པས་ཇོ་རྒྱུན་ལ་བརྟེན་ནས་སྐུ་རིམ་བདུད་བཟློག་བྱ་བ་ནི། ཁྲོམ་ཐམས་ཅད་ཐལ་མོ་སྦྱར་ནས། ན་མོ་བླ་མ་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །འཕགས་པ་ཕྱག་སྟོང་འཁོར་ལོས་སྒྱུར་བའི་རྒྱལ་པོ་ལ་ཕྱག་འཚལ་ལོ། །སྤྱན་སྟོང་བསྐལ་པ་བཟང་པོ་སངས་
རྒྱས་སྟོང་ལ་ཕྱག་འཚལ་ལོ། །ཕྱོགས་བཅུའི་སྤྱན་རས་གཟིགས་བཅུ་ལ་ཕྱག་འཚལ་ལོ། །ཡབ་ཐུགས་རྗེ་ཆེན་པོ་ལ་ཕྱག་འཚལ་ལོ། །ཡུམ་ཡི་གེ་དྲུག་མ་ལ་ཕྱག་འཚལ་ལོ། །སྲས་ནོར་བུ་འཛིན་པ་ལ་ཕྱག་འཚལ་ལོ། །སྲས་མོ་གསང་སྔགས་འཛིན་མ་ལ་ཕྱག་འཚལ་ལོ། །བདག་ཅག་ཡོན་མཆོད་འདིར་ནད་པ་སོགས་མིང་འདི་ཞེས་བགྱིའོ། །མི་ནོར་འཁོར་དང་བཅས་པ་ལ་གནོད་ཅིང་འཚེ་བར་བྱེད་པའི། ནད་རིགས་བཞི་བརྒྱ་རྩ་བཞི། གདོན་རིགས་སྟོང་ཕྲག་བརྒྱད་ཅུ། དུས་མིན་འཆི་བ་བཅོ་བརྒྱད། བཀྲ་མི་ཤིས་པའི་ཕྱོགས་རིས་ངན་པ་ཐམས་ཅད་ཕྱིར་ཟློག་པར་གྱུར་ཅིག །མེད་པར་གྱུར་ཅིག །ཞི་བར་གྱུར་ཅིག །རབ་ཏུ་ཞི་བར་གྱུར་ཅིག །ཐལ་མོ་བརྡབ་ལ། ཨོཾ་མ་ཎི་པདྨེ་ཧཱུྃ་ཕཊ༔ ཨོ་གྱིས་འདུས་པའི་ནད་གདོན་ཞི། །འདུས་པའི་ནད་གདོན་ཞི་བར་ཤོག །མས་ནི་ཚད་པའི་ནད་གདོན་ཞི། །ཚད་པའི་ནད་གདོན་ཞི་བར་ཤོག །ཎི་ཡིས་རླུང་གི་ནད་གདོན་ཞི། །རླུང་གི་ནད་གདོན་ཞི་བར་ཤོག །པད་ཀྱིས་བད་ཀན་ནད་གདོན་ཞི། །བད་ཀན་ནད་གདོན་ཞི་བར་ཤོག །མེས་ནི་གྲང་བའི་ནད་གདོན་ཞི། །གྲང་བའི་ནད་གདོན་ཞི་
བར་ཤོག །ཧཱུྃ་གིས་མཁྲིས་པའི་ནད་གདོན་ཞི། །མཁྲིས་པའི་ནད་གདོན་ཞི་བར་ཤོག །ཕཊ༔ཀྱིས་བདུད་བཞི་འཇོམས་པར་བྱེད། །བདུད་དང་བར་ཆད་ཞི་བར་ཤོག །ཡི་གེ་དྲུག་པ་ཕཊསྦྱར་བ། །གསང་བ་འདུས་པའི་རྒྱུད་ནས་གསུངས། །བདུད་བཟློག་འདི་ལས་ཟབ་པ་མེད། །ཅེས་པའང་༧ ཨ་རཱ་གས་སྦྱར་བའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།