ཐུགས་རྗེ་ཆེན་པོ་གསང་བ་འདུས་པའི་གཏོར་དབང་གུད་དུ་བཀོལ་ནས་གབ་འཁྲུགས་བསལ་ཏེ་ཁྱེར་བདེ་བར་བྱས་པ།
ཐུགས་རྗེ་ཆེན་པོ་གསང་བ་འདུས་པའི་གཏོར་དབང་གུད་དུ་བཀོལ་ནས་གབ་འཁྲུགས་བསལ་ཏེ་ཁྱེར་བདེ་བར་བྱས་པ་གཅིག་བཞུགས་སོ། །ཁྲོམ་དབང་ལུགས་སོ། །
ན་མོ་མ་ཧཱ་ཀ་རུ་ཎི་ཀ་ཡེ། དཀྱིལ་འཁོར་པདྨ་འདབ་བརྒྱད་ཚོམ་བུའི་སྟེང་དུ་དབང་གཏོར། བྷནྡྷ་བདུད་རྩིའི་སྟེང་དུ་ཤེལ་དང་མེ་ལོང་བཞག་པ་ཡང་བཤམས། རྒྱས་པར་ལས་བྱང་བཏང་། མ་ཁོམ་ན་འོག་གི་མངོན་རྟོགས་འདོན་ཏེ་བདག་མདུན་དུས་གཅིག་བསྐྱེད་ལ་ཡིག་བདུན་བརྒྱ་སྟོང་ཅི་འགྲུབ་བཟླ། སྟོང་པའི་ངང་ལས་ལས་བུམ་མཚན་ཉིད་དང་ལྡན་པའི་ནང་དུ། ཧཱུྃ་ལས་ཁྲོ་བོ་བདུད་རྩི་འཁྱིལ་པ་དང་དབྱེར་མེད་པའི་རྡོ་རྗེ་རྣམ་འཇོམས་ལྗང་སྔོན་ཞལ་གཅིག་ཕྱག་གཉིས་སྣ་ཚོགས་རྡོ་རྗེ་དང་དྲིལ་བུ་འཛིན་པ་རྒྱན་ཐམས་ཅད་དང་ལྡན་ཞིང་པད་ཟླ་ལ་སྐྱིལ་ཀྲུང་གིས་བཞུགས་པ་དམ་ཡེ་དབྱེར་མེད་པར་གྱུར། ན་མཤྩཎྜ་བཛྲ་སོགས།
ཨོཾ་བཛྲ་ཀྲོ་ཏ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུཾ་ཕཊ་ཅི་འགྲུབ་བཟླ། བུམ་ལྷ་ཞུ་བས་བདུད་རྩི་ཆུར་གྱུར། དེ་ནས་ཁྲོམ་མང་ན་སློབ་མ་ཚོགས། བགེགས་གཏོར་བཏང་། བསྡུ་ན་སུམ་བྷ་ནིས་ཆོག །རྒྱས་པར་ན་རྔ་རོལ་དང་བཅས་ལས་བྱང་གི་མཚམས་གཅོད། ཧཱུྃ༔ ཉོན་ཅིག་སོགས་ནས་བཱིརྱ་རཱ་ཛ་ཡ་ཧཱུཾ་ཕཊ༔ ཧཱུྃ༔ ང་ནི་ནས་ཧ་ན་ཧཱུྃ་ཕཊ༔ ཅེས་རོལ་ཆེན་བྱའོ། །དེ་ནས་ལས་བུམ་ཐོགས་ལ་ཁྲོམ་མང་ན་མེ་ལོང་ངོས་དང་ཉུང་ན་ཆབ་བཏང་། ཧཱུྃ། དྲི་མེད་དག་པ་ཡེ་ཤེས་ཆུ་འདི་ནི། །ལས་དང་བག་ཆགས་སྒྲིབ་སོགས་ཀུན་སྦྱོང་ཞིང་། །བུ་རྣམས་ལུས་ངག་ཡིད་གསུམ་སྒྲིབ་དག་ནས། །དབང་བཞི་
ཡོངས་རྫོགས་སྣོད་དུ་གྱུར་པར་ཤོག །ཨོཾ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ་ཤུདྡྷོཉཧཾ། ཞེས་ཁྲུས་བྱས་ནས་མཎྜལ་ཕུལ། འོ་ན་ད་ལམ་ཐུགས་རྗེ་ཆེན་པོ་གསང་བ་འདུས་པའི་གཏོར་དབང་ཡིད་བཞིན་ནོར་བུ་བསྐུར་བ་ལ། རྩ་རྒྱུད་ལུང་གི་ཐིག་ལེ་ལས། །ལོ་རྒྱུས་དོན་གྱིས་མ་བཤད་ན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །ཞེས་གསུངས་པས་ཟུར་ཙམ་ཞུ་ན། ནུབ་ཕྱོགས་བདེ་བ་ཅན་གྱི་ཞིང་ཁམས་སུ་རིགས་བདག་འོད་དཔག་མེད་ལ། སྤྱན་རས་གཟིགས་ཀྱིས་ཞུས་ནས། །གསང་བ་འདུས་པའི་རྒྱུད་བཀའ་སྩལ་པ། མཁའ་འགྲོ་མ་རྣམས་ཀྱིས་གསེར་གྱི་ཤོག་བུ་ལ་བཻཌཱུརྱ་ཞུན་མས་བྲིས་ནས། རིན་པོ་ཆེ་སྣ་ལྔའི་སྒྲོམ་བུར་བཅུག་ནས་རི་བོ་ཏ་ལའི་དབང་ཕུག་ཏུ་སྦས་པ། སྤྱན་རས་གཟིགས་ཉིད་ཀྱིས་ཨོ་རྒྱན་ལ་གནང་ངོ་། །ཨོ་རྒྱན་རིན་པོ་ཆེས་མཁའ་འགྲོའི་བརྡ་ཡིག་དེ་དྷ་ན་ཀོ་ཤའི་གླིང་གི་ཡི་གེར་ཕབ་ཅིང་། དེ་བོད་སྐད་དུ་བསྒྱུར་རོ་ཨོ་རྒྱན་བོད་དུ་བྱོན་ནས་ལྷ་འདྲེ་ཐམས་ཅད་བཏུལ། གཙུག་ལག་ཁང་བརྒྱ་རྩ་སོགས་བཞེངས། གནས་ཆེན་རྣམས་ཞབས་ཀྱིས་བཅགས། །བཀའ་མདོ་རྒྱུད་ཐམས་ཅད་བོད་དུ་
བསྒྱུར། ཁྱད་པར་ཐུགས་རྗེ་ཆེན་པོ་གསང་འདུས་སྐོར་བསམ་ཡས་ཨཱརྱ་པ་ལོའི་གླིང་དུ། ལོ་ཙཱ་བ་མཆོག་དབྱངས་སོགས་ཀྱིས་བསྒྱུར་ཞིང་། འགའ་ཞིག་གུ་རུའི་རང་འགྱུར་དུ་མཛད། དེ་ནས་དགེ་བསྙེན་མཁའ་རིས་གདན་དྲངས་དུས། ཤོག་སེར་ལ་བཀོད་ནས་གནམ་སྐས་ཅན་དུ་སྦས། དགེ་བསྙེན་ཤེའུ་མཁའ་རི་དང་། །ཀླུ་བདུད་ནག་པོ་མགོ་དགུ་དང་། །མ་མོ་སྔགས་ཀྱི་སྲུང་མ་དང་། །དམ་ཅན་རྡོ་རྗེ་ལེགས་པ་ལ། །བཀའ་འདི་གཏད་དོ་ས་མ་ཡཱ། །མ་འོངས་དུས་ཀྱི་ཐ་མ་ལ། །ལས་ཅན་ཐུགས་རྗེ་ཆེན་པོ་ཡི། །ལས་ཅན་གཅིག་དང་འཕྲད་པར་ཤོག །ཅེས་སྨོན་ལམ་བཏབ་བོ། །དེ་ནས་ཕྱིས་དུས་ལ་བབ་པ། ལང་གྲོ་ལོ་ཙཱའི་སྐྱེ་བ་རཏྣ་གླིང་པས་གཏེར་ནས་བཏོན་ཁྲོམ་གཏེར་བྱས་པས་ཡིད་ཆེས། དགེ་བསྙེན་མཁའ་རི་ཁྲོམ་གྱི་མཐོང་བར་དངོས་སུ་འོང་ནས་གཏེར་ངོ་སྤྲད། དྲི་བཟང་གིས་ལུང་པ་ཁྱབ། འཇའ་དར་ཡུག་འདྲ་བ་ལྔ་དེར་ཟུག །མཁའ་འགྲོ་མ་ཨེ་ཀ་ཙ་ཏིས་ལུང་བསྟན་ནས། འཕན་ཡུལ་དུ་བུམ་སྒྲུབ་དང་པོ་བཙུགས་དུས་བུམ་པའི་སྟེང་དུ་ཐུགས་རྗེ་ཆེན་པོ་ཞལ་གཟིགས། རིལ་བུ་རྣམས་
འཕེལ་ཞིང་འཕུར། ཁྲོམ་ཁྲི་ཕྲག་དྲུག་བདུན་ཙམ་ལ་གཏོར་དབང་འདི་བསྐུར་ཞིང་རིལ་བུ་བཀྱེ་དུས། མེ་ཏོག་གི་ཆར་ཆུང་གྲྭ་ཡང་སེ་བའི་མེ་ཏོག་ཙམ་དཔག་ཏུ་མེད་པ་ཉི་མ་རྩེ་ཤར་ནས་ཉིན་ཕྱེད་བར་དུ་བབས། རྗེ་ཀརྨ་པ་ཆོས་གྲགས་རྒྱ་མཚོ་དང་།འབྲུག་པ་རྒྱལ་དབང་ཆོས་རྗེ་དང་། སྣེལ་སྡོང་གོང་མ་ཆེན་པོ་རྣམས་ཀྱིས་ཀྱང་འདིའི་དབང་ལུང་ཐམས་ཅད་ཞུས་པས་ཡིད་ཆེས་སོ། །རཏྣ་གླིང་པ་ཉིད་ཀྱིས་ནི། སྒྲུབ་ཆེན་བུམ་སྒྲུབ་སུམ་ཅུ་ལྷག་ཙམ་བཙུགས་པས་བར་ཆད་ཅུང་ཟད་མེད་པར་འཇའ་ཟུག་པ་དང་འོད་ཟེར་འཕྲོ་བ་དང་། དྲི་བཟང་ངད་པས་ས་ཕྱོགས་ཁྱབ་པ་དང་། ཏོག་གི་ཆར་འབེབས་པ་དང་། ཐུན་པ་རྣམས་ཀྱིས་ཐུགས་རྗེ་ཆེན་པོ་ཞལ་མཐོང་བ་སོགས་ངོ་མཚར་བ་ཁོ་ན་བྱུང་བར་གདའ། དེ་ནས་ཕྱོགས་ཐམས་ཅད་དུ་དར་ན་ཡང་། རཏྣ་གླིང་པ། ཚེ་དབང་གྲགས་པ། ཤཱཀྱ་བཀྲ་ཤིས། མཁའ་དྲུང་བསོད་ནམས་བཀྲ་ཤིས། ཚེ་ཆོག་བླ་མ་པདྨ་དབང་ཕྱུག །སྔགས་འཆང་དབང་ཕྱུག་རྒྱལ་པོ། རིག་འཛིན་ཀརྨ་དོན་ཡོད། རཱ་ག་ཨ་སྱ་ལ་བཀའ་རྫོགས་ལུང་རྫོགས་དང་། གཞན་གཏོར་དབང་ཁོ་ནའི་བརྒྱུད་པ་ནི། ཚེ་
དབང་གྲགས་པ། ངག་དབང་གྲགས་པ། ཀུན་དགའ་གྲགས་པ། ཀུན་དགའ་བསྟན་འཛིན། ཨོ་རྒྱན་བསྟན་འཛིན། གཏེར་བཞེད་སྙིང་པོ། རྭ་ག་ཨ་སྱའོ། །བཀའ་བབས་དག་སྣང་གི་བརྒྱུད་པ་ནི། །རཏྣ་གླིང་པ། མི་འགྱུར་རྡོ་རྗེ། རཱ་ག་ཨ་སྱའོ། །དེ་ཡང་དབང་འདི་ཐོབ་པའི་ཕན་ཡོན་ནི། གསང་བ་འདུས་པའི་རྒྱུད་ལས། སངས་རྒྱས་འོད་དཔག་མེད་ཀྱིས་བཀའ་སྩལ་པ་དང་། ཨོ་རྒྱན་རིན་པོ་ཆེའི་གསུང་མཐུན་པར། ལེགས་འོང་སྐལ་ལྡན་བུ་མཆོག་རྣམས། །ཡིག་བདུན་འདྲེན་ལ་བརྩོན་པ་བསྐྱེད། །དུས་གསུམ་བདེ་བཤེགས་སྐུ་གསུང་ཐུགས། །ཡོན་ཏན་ཕྲིན་ལས་ཡོངས་རྫོགས་མ་ལུས་པ། །ཡིག་བདུན་དག་ལ་ཡང་དག་རྫོགས། །དབང་ཐོབ་ཡོན་ཏན་མཐའ་ཡས་ཏེ། །རྣམ་ཀུན་མཁྱེན་པའི་སངས་རྒྱས་ཀྱིས། །སྟོང་གསུམ་འཇིག་རྟེན་ཁམས་འདི་དག །ཏིལ་འབྲུར་བསིལ་ནས་བགྲངས་ལ་ཟད། །ཡིག་བདུན་ཡོན་ཏན་འཛད་མི་ཤེས། །འཇིག་རྟེན་སེམས་ཅན་སྲོག་བཏོན་པའི། །བསོད་ནམས་འཕགས་པས་བགྲངས་བར་ནུས། །ཡིག་བདུན་ལན་གཅིག་བཟླས་པ་ཡི། །ཡོན་
ཏན་བརྗོད་པར་ག་ལ་ནུས། །ཁམས་གསུམ་སེམས་ཅན་མ་ལུས་པ། །སངས་རྒྱས་སོར་བཀོད་ཡོན་ཏན་ནི། །བགྲང་བར་ནུས་ཀྱི་ཡི་གེ་བདུན། །གཅིག་བརྗོད་ཡོན་ཏན་ཐགྲང་མི་ནུས། །རྒྱལ་བ་ནམ་མཁའ་གང་ཐ་ལ།—།མཆོད་པ་ཕུལ་བའི་བསོད་ནམས་ཚོགས། །བགྲང་བར་ནུས་ཀྱི་ཡིག་བདུན་པ། །གཅིག་བརྗོད་ཡོན་ཏན་བགྲང་མི་ནུས། །ཡིག་བདུན་དབང་དང་ལུང་ཐོབ་མིའི། །ལུས་དང་ལས་ཀྱི་རྣམ་སྨིན་རུང་། །མི་དགེ་བཅུ་དང་མཚམས་མེད་ལྔ། །དུས་འདི་ཉིད་ལ་སྦྱང་བར་བྱེད། །ཡང་སྙིང་ཡིད་ལ་སུས་བྱེད་ཚད། །ཐུགས་རྗེ་ཆེན་པོ་དེ་ཡིན་ཕྱིར། །བར་ཆད་སེལ་ཞིང་འགྲོ་བ་འདུལ། །ཡང་སྙིང་མཐོང་ཐོས་དྲན་རེག་རུང་། །སྒོམ་བཟླས་འབྲི་འཆང་བསྟན་པ་རྣམས། །ཡོན་ཏན་ལྡན་ཞིང་གར་སྐྱེས་ཀྱང་། །སྤྱན་རས་གཟིགས་དང་འབྲལ་མི་སྲིད། །ཅེས་གསུངས་སོ། །དེ་ལ་དབང་རྒྱས་པར་མ་གྲུབ་ན་ཡང་། གཏོར་དབང་དུ་འབྲིང་ངམ། བསྡུས་པ་ཙམ་གྱིས་ཀྱང་དབང་རྫོགས་པར་འགྱུར་བར་གསུངས་སོ། །དོན་ལ་དབང་བཞི་རྫོགས་བྱས་རུང་། ལུས་ངག་ཡིད་གསུམ་དག་པར་བྱ་བ་དང་། རྒྱུད་སྦྱང་བར་བྱ་བ་
དང་། ཡེ་ཤེས་སེམས་དཔའ་འཇུག་པར་བྱ་བ་ཡིན་ནོ། །ཅི་སྐད་དུ། ཆུ་བོ་བཞི་འདུས་ཀྱི་རྒྱུད་ལས། །དབང་གི་ངོ་བོ་མདོར་བསྡུས་ན། །དབང་གིས་སྨིན་དང་རྒྱུད་སྦྱོང་དང་། །ཡེ་ཤེས་གཞུག་པར་བྱ་བ་དང་། །བཅུ་གསུམ་རྡོ་རྗེའི་ས་ཐོབ་པར། །འབྲས་བུ་བཞག་པར་བྱ་བ་སྟེ།། །སྨིན་པའི་ཚད་དུ་ཉམས་སུ་ལོང་། །ཞེས་གསུངས་སོ། །དེ་ལྟ་བུའི་ཟབ་ལ་ཕན་ཡོན་མཐའ་ཡས་སོ། །བོད་ཁ་བ་ཅན་གྱི་ལྷ་སྐལ། གསང་སྔགས་བླ་ན་མེད་པ། ཨོ་རྒྱན་རིན་པོ་ཆེའི་ཐུགས་བཅུད། མཁའ་འགྲོའི་གསང་གཏེར་ཉི་ཤུ་རྩ་ལྔའི་ནང་ནས་མཆོག་ཏུ་གྱུར་པ། བོད་ཡུལ་ས་འོག་ཀུན་གྱི་གཏེར་གཅིག་མ། ཐུགས་རྗེ་ཆེན་པོ་གསང་བ་འདུས་པའི་དབང་ཟབ་མོ་ཞུ་བའི་ཕྱིར་རྗེས་ཟློས་མཛོད། ཧཱུྃ། ཐུགས་རྗེ་ཆེ་དང་མཉམ་སྦྱོར་བ། །བླ་མ་གསང་སྔགས་ཆེ་བའི་མཆོག །གསང་ཆེན་དབང་གི་བདག་ཉིད་ཀྱིས། །བདག་ཅག་སྐལ་ལྡན་མཆེད་དང་ལྕམ། །ལུས་ངག་ཡིད་གསུམ་སྒྲིབ་དག་ནས། །དབང་བཞི་ཡེ་ཤེས་མཆོག་ཐོབ་པར། །མགོན་པོ་ཁྱོད་ཀྱིས་མཛད་དུ་གསོལ། །ཅེས་ལན་གསུམ་ཞུ་རྗེས་སུ། ད་སྐྱབས་འགྲོ་སེམས་བསྐྱེད་
འདིའི་རྗེས་ཟློས་མཛོད། ན་མོ། རྩ་བ་གསུམ་དང་དཀོན་མཆོག་གསུམ། །སྐྱབས་ཀྱི་དམ་པ་ཐམས་ཅད་ལ། །འདི་ནས་བྱང་ཆུབ་མ་ཐོབ་པར། །སྒོ་གསུམ་དད་པས་སྐྱབས་སུ་མཆི། །མི་དགེ་སྡིག་སོགས་ཐམས་ཅད་བཤགས། །སྨོན་པ་བྱང་ཆུབ་སེམས་བསྐྱེད་ཅིང་། །ལུས་ངག་ཡིད་གསུམ་འགྲོ་བ་ལ། །ཕན་བདེའི་སྤྱོད་པས་འཇུག་ཕར་བགྱི། །ལན་གསུམ། བླ་མས། གསང་བ་གསུམ་གྱི་དམ་ཚིག་ནི། །།ཁྱེད་ཀྱིས་གལ་ཏེ་ཉམས་གྱུར་ན། །དེས་ནི་ཡང་དག་ཉེས་ཆེན་པོ། །དེ་བས་ཚུལ་བཞིན་བསྲུང་བ་དང་། །བཀའ་བཞིན་བསྒྲུབ་པར་ཁྱོད་སྤྲོའམ། །ཁྱེད་རྣམས་སྐལ་བར་མི་ལྡན་ན། །བདག་ཅག་ཐམས་ཅད་ཉེས་གྱུར་ཏེ། །དེ་བས་ཕྱིར་དུ་དེངས་པར་རིགས། །ལན་གསུམ། ་སློབ་མས་འདིའི་རྗེས་ཟློས་མཛོད། དགོངས་ཤིག་བླ་མ་མགོན་པོ་རྗེ། །རྡོ་རྗེ་རིགས་མཆོག་ལ་སོགས་པ། །བདག་ཅག་ཉེ་བར་གྱུར་པ་སྟེ། །བཀའ་དང་དམ་ལས་མི་འདའ་སྟེ། །ཚུལ་བཞིན་བསྒྲུབ་པར་བདག་ཅག་སྤྲོ། །སྐུ་དྲིན་ཆེན་པོས་བཟུང་དུ་གསོལ། །བླ་མས་རྡོ་རྗེ་གདེངས་ཤིང་། དེ་ལྟར་ཁ་ཙམ་མ་ཡིན་པར། །མི་འགལ་རྡོ་རྗེའི་དམ་
བསྲུངས་ན། །དམ་ཚིག་གིས་ནི་རྡོ་རྗེ་ཟུང་། །མི་འདའ་རྡོ་རྗེའི་བྲོ་བོར་ཅིག །ཅེས་པས། སློབ་དཔོན་གྱི་ཕྱག་ཏུ་དམ་ཚིག་གི་རྡོ་རྗེ་བཟུང་བ་ལ། སློབ་མ་ཁྱེད་རང་རྣམས་རིམ་པས་དེ་ལ་བཟུང་བའི་མོས་པས། ཉུང་ན་རྡོ་རྗེ་ལ་འཇུ་བ་རེ་བཅུག་མང་ན་བསྟན་པས་ཆོག །འདིའི་རྗེས་ཟློས་མཛོད། ཐ་ཚིག་རྡོ་རྗེའི་རྟགས་བོར་འཚལ། །དམ་ལ་འདའ་བ་ན་ར་ཀན། །ཞེས་བྲོ་བོར་ལ་གྲལ་དུ་འདུག་གོ །དེ་ནས་བླ་མས་ལས་བུམ་ཆུ་དང་བདུད་རྩི་འདྲེས་པར་སྦྱིན་ཅིང་། མང་ན་མཆོད་གཡོག་པས་བཀྱེ་བཅུག་ཁྲོམ་ཆེན་འདུས་ན་ཀུ་ཤའི་ཡུ་བས་གཏོར་ཞིང་བདུད་རྩི་བྱིན་པར་བསྒོམས་པས་འཐུས་ཏེ། ཧཱུྃ། འདི་ནི་དམ་ཚིག་རྡོ་རྗེའི་ཆུ། །གལ་ཏེ་ཉམས་ན་ལུས་ངག་ཡིད། །རྡུལ་མྱག་ཚིག་སྟེ་དམྱལ་བར་འགྲོ། །བསྲུངས་ན་ཡེ་ཤེས་སེམས་དཔར་གྱུར། །ཐར་པའི་ས་བོན་མཆོག་ཏུ་འགྱུར། །དེ་བས་དམ་ལ་གནས་པར་མཛོད། །ས་མ་ཡ་བྷ་ཤ་སི་ཧཱུྃ། ཞེས་དམ་ལ་བཞག་གོ །ད་སློབ་བུ་ཁྱེད་རང་རྣམས་ཀྱི་དཔྲལ་བར་ཨོ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་མཐིང་ག །ལྟེ་བར་ཧྲིལྗང་གུ་རྣམས་ཀྱིས་མཚན་པར་སྒོམས་ཤིག །ཉུང་ན་རྡོ་རྗེ་དཔྲལ་མགྲིན་སྙིང་ལྟེ་བཞི་ལ་གཏུགས། མང་ན་རྡོ་རྗེ་
ཕྱར་ཞིང་གཏུགས་ཚུལ་བྱས་ཏེ། ཨོཾ་ཨཱཿཧཱུྃ་ཧི༔ ཞེས་བཞག །སྐབས་འདིར་གསང་བ་འདུས་པའི་བསྐྱེད་རིམ་ཕོག །དམིགས་མེད་སྟོང་པའི་ངང་ཉིད་ལས། །ཕོ་བྲང་ལྟེ་དབུས་འོད་ལྔའི་ཀློང་། །པདྨ་ཉི་ཟླའི་གདན་སྟེང་དུ། །རང་རིག་ཡི་གེ་ཧིདམར་པོ། ཕར་འཕྲོས་རྒྱལ་བ་མཉེས་མཆོད་འབུལ། –སེམས་ཅན་ཀུན་གྱི་སྒྲིབ་པ་སྦྱངས། །ཚུར་འདུས་དངོས་གྲུབ་བདག་ལ་བསྡུས། །འཁོར་བ་དོང་ནས་སྤྲུགས་པར་བསམས། །དེ་ཉིད་ཡོངས་སུ་གྱུར་པ་ལས། །རང་ཉིད་་་་དབང་སྒྲུབ་དུས་བདག་མདུན། གསང་བ་འདུས་པའི་སྐུ། །དམར་གསལ་ཞལ་གཅིག་ཕྱག་གཉིས་པ། །ཕྱག་གཡས་པད་ཕྲེང་ཐུགས་ཀར་འཛིན། །ཕྱག་གཡོན་ཚེ་བུམ་པད་སྡོང་བསྣམས། །རིན་ཆེན་པད་ཕྲེང་རུས་རྒྱན་དང་། །དར་དཔྱངས་རྒྱན་རྫོགས་དཔག་མེད་བརྒྱན། །ཡུམ་མཆོག་གསང་བ་ཡེ་ཤེས་མ། །ཕྱག་གཡས་ཨུཏྤལ་གཡོན་བདུད་རྩི། །ཟུང་འཇུག་ཡབ་ཀྱི་མགུལ་ནས་འཁྱུད། །གཅེར་བུ་རྒྱན་དྲུག་པད་ཕྲེང་འཛིན་། །ཞབས་གཉིས་ཡབ་ཀྱི་རྐེད་ལ་འཁྲིལ། །གཉིས་མེད་ཟུང་འཇུག་དག་ཏུ་སྒོམས། །ཐུགས་ཀར་ཟླ་བའི་དཀྱིལ་འཁོར་སྟེང་།། །ཧཱིཿཡིག་དམར་པོ་འོད་ཟེར་ཅན། །
ཡིག་དྲུག་མཐའ་ལ་བསྐོར་བར་བསྒོམས། །དེ་ལས་འོད་འཕྲོས་རང་བཞིན་གྱི། །ཡེ་ཤེས་སེམས་དཔའ་སྤྱན་དྲངས་བསྟིམ། །སྐུ་གསུང་ཐུགས་ཀྱི་བྱིན་བརླབས་ནས། །ཡེ་ཤེས་ལྔ་ཡི་དབང་བསྐུར་སྒོམས། །དབང་བསྒྲུབ་དེ་ཡན་གྱིས་ཆོག །དེ་ནས་གནས་པ་དང་བརྟན་པར་བྱ་བའི་ཕྱིར། རྡོ་རྗེ་མེ་ཏོག་དང་བཅས་པ་སྤྱི་བོར་བཞག་པར་བསྒོམ་ཉུང་ན་བཞག །མང་ན་མེ་ཏོག་གཏོར། རྡོ་རྗེ་བསྟན་ནོ། །ཨོཾ་ཧྲུསུ་པྲ་ཏིཥྛ་བཛྲ་ཡེ་སྭཱ་ཧཱ། སྤོས་དང་ཤ་ཆེན་བསྲེགས་པས་སྤོས་སྐོར་བྱེད་འཇུག །དེ་ནས་ཡེ་ཤེས་པ་དབབ་པ་ནི། གོང་དུ་གསང་འདུས་ཀྱི་བསྐྱེད་རིམ་ལེགས་པར་ཕོག་པ་གསལ་ཐོབ་ལ། སློབ་བུའི་སྙིང་གི་དབུས་སུ་གསེར་གྱི་འཁོར་ལོ་རྩིབས་དྲུག་པ། དེའི་འོག་ཏུ་གཡོ་བྱེད་རླུང་གི་ས་བོན་ཡཾ་ཡིག་གིས་མཚན་པ། དེའི་སྙིང་གི་དཀྱིལ་དུ་ཡེ་ཤེས་སེམས་དཔའ་བསྒོམས་པ་དང་འདྲ་བ་ཚོན་གང་བའི་ཐུགས་ཀར་པད་འདབ་དྲུག་ལ་ཡིག་འབྲུ་དྲུག །ལྟེ་བར་ཡི་གེ་ཧཱུྃགསལ་བ། བླ་མས་ཧཱིཧིཧཱིཧི༔ ཞེས་པའི་དབྱངས་དང་། ཡཾ་ཡཾ་ཡཾ་ཡཾ། ཞེས་རིམ་པར་བརྗོད་པས། བླ་མའི་ཐུགས་ཀ་ནས་ཧཱིཝདང་ཡཾ་འཕྲོས། སློབ་མའི་ཐུགས་ཀའི་ཡིག་འབྲུ་ལ་ཕོག་པས། ཡཾ་ལས་རླུང་རེ་རེ་གཡོས་པས་འཁོར་ལོ་རྩིབས་དྲུག །སྙིང་ཁར་ཡེ་
ཤེས་སེམས་དཔའ་དང་བཅས་དྲག་ཏུ་འཁོར་བ་ལ། རིག་པ་རྩེ་གཅིག་ཏུ་གཏད་ཅིང་། ཡེ་ཤེས་དཔའི་ཧིལས་འོད་ཟེར་ཕྱོགས་བཅུར་ཁྱབ་ཅིང་། སྤྱིར་ཕྱོགས་བཅུའི་སངས་རྒྱས་བྱང་སེམས་ཐམས་ཅད་དང་། ཁྱད་པར་དུ་པོ་ཊ་ལ་ནས་ཡེ་ཤེས་པ་བྱང་ཆུབ་སེམས་དཔའི་འཁོར་དཔག་ཏུ་མེད་པ་དང་། འོག་མིན་ནས་རྒྱལ་བ་རིགས་ལྔའི་ཚོགས་ཐམས་ཅད་ཁ་བ་བུ་ཡུག་འཚུབ་པ་ལྟར་ཐིབ་ཐིབ་ནམ་མཁའ་ལ་བྱོན། སློབ་བུའི་སྤྱི་བོ་ནས་མར་ཐིམ་ཞིང་ཁྱད་པར་དུ་ཐུགས་ཡེ་ཤེས་སེམས་དཔའ་ལ་ཐིམ་པར་སྒོམས་ཤིག །རོལ་མོ་རྣམས་བསྒྲགས་དབྱངས་དང་བཅས་པས། ཧཱུྃ་ཧཱུྃ༔ རྣམ་དག་སྤྲོས་དང་བྲལ་བའི་ངང་ཉིད་ལས། །མ་འགགས་ཐུགས་རྗེའི་རང་བཞིན་གཙོ་དང་འཁོར། །གནས་འདིར་སྐུ་གསུང་ཐུགས་ཀྱི་བྱིན་ཕོབ་ལཤ །ཡེ་ཤེས་ལྔ་ཡི་དབང་མཆོག་བསྐུར་དུ་གསོལ། །ཨོཾ་མ་ཎི་པདྨེ་ཧཱུྃ་ཧཱུྃ༔ ཧྲིང་ཧྲིང་། བཛྲ་ས་མཱ་ཡ་ཛཿ ས་མ་ཡ་སྟེ། ས་མ་ཡ་ཧྲིང་། ཨཱ་ཝེ་ཤ་ཡ་ཨ་ཨཱ༔ ཞེས་མ་ཕེབས་བར་དུ་དབབ་བོ། །དབང་གི་དོན་འདི་རང་ལ་ཐུག་གོ །དེ་ནས་འདིའི་དམིགས་པ་ཤིན་ཏུ་ཟབ་བོ། །གསུངས་སོ། །དེ་ནས་དབང་བསྐུར་བ་ནི། གཏོར་མ་གསང་བ་འདུས་པའི་ལྷ་ཚོགས་དངོས་སུ་གསལ་
བ། ཁྱེད་རང་སློབ་བུ་རྣམས་ཀྱི་སྤྱི་བོར་བཞག་པས། ཐུགས་རྗེ་ཆེན་པོའི་སྐུ་ལས་འོད་ཟེར་དཀར་པོ་འཕྲོས་ནས། ཁྱེད་རང་རྣམས་ཀྱི་ལུས་ལ་ཐིམ་པར་སྒོམས་ཤིག །ཧཱུྃ། རང་བཞིན་སྐྱེ་བ་མེད་པ་ལས། །ལོངས་སྐུ་རྒྱལ་བའི་སྤྲིན་ཚོགས་གཏིབས། །ཐུགས་རྗེ་སྤྲུལ་སྐུ་བླ་ན་མེད། །གཏོར་མ་སྐུ་གསུམ་ཡོངས་རྫོགས་དཔལ། །སྐལ་ལྡན་དབང་བཞི་ཡོངས་རྫོགས་ནས། །འབྲས་བུ་སྐུ་བཞི་ཐོབ་པར་ཤོག །ཧཱུྃ། བདེ་གཤེགས་མ་ལུས་འདུས་པའི་སྐུ། །སྐུ་དབང་ལུས་ལ་ཡོངས་རྫོགས་ཤོག །ཨོཾ་མ་ཎི་པདྨེ་ཧཱུྃ་ཧི༔ ཀཱ་ཡ་ཨ་བྷི་ཥིཉྩ་ཨོཾ། བུདྡྷ་ཨ་བྷི་ཥིཉྩ་ཨོཾ། ཞེས་སྤྱི་བོར་བཞག་སྟེ། ཁྲོམ་ཤིན་ཏུ་ཆེ་ན་བསྡོམས་ཏེ་འགྲིམ་རུང་བས་སྐབས་དང་བསྟུན་ནོ། །ཧི༔ དངོས་གྲུབ་ཀུན་གྱི་འབྱུང་གནས་གཏེར། །བླ་མ་དམ་པའི་བཀྲ་ཤིས་ཤོག །འགྲོ་བ་མ་ལུས་འདྲེན་མཛད་པ། །གསང་འདུས་ཐུགས་རྗེའི་བཀྲ་ཤིས་ཤོག །དེས་ལུས་ཀྱི་སྒྲིབ་པ་དག །སྐུའི་དབང་ཐོབ། །སྣང་བ་སྐུའི་ཁྱེར་སོ་བསྒོམ་པ་ལ་དབང་། འབྲས་བུ་སྤྲུལ་སྐུ་འགྲུབ་པ་སྐུ་ཡི་དབང་ངོ་། །ཡང་རིགས་མཆོག་སྣང་བ་མཐའ་ཡས་ཀྱི་ཐུགས་ཀ་ནས་འོད་ཟེར་དམར་པོ་དཔག་མེད་
འཕྲོས་ནས། ཁྱེད་རང་རྣམས་ཀྱི་མགྲིན་པར་ཐིམ་པར་སྒོམས་ཤིག །ཧཱུྃ། རང་བཞིན་སྐྱེ་བ་མེད་པ་ལས། །ལོངས་སྐུ་ཐུགས་རྗེའི་སྤྲིན་ཚོགས་གཏིབས། །ཐུགས་རྗེ་སྤྲུལ་སྐུ་བླ་ན་མེད། གཏོར་མ་སྐུ་གསུམ་ཡོངས་རྫོགས་དཔལ། །སྐལ་ལྡན་དབང་བཞིར་ཡོངས་རྫོགས་ནས། །འབྲས་བུ་སྐུ་བཞི་མཆོག་ཐོབ་ཤོག །འགགས་མེད་རྣམ་གྲོལ་སྙིང་པོའི་གསུང་། །གསུང་དབང་ངག་ལ་ཡོངས་རྫོགས་ཤོག །ཨོཾ་མ་ཎི་པདྨེ་ཧཱུྃ་ཧྲཱིཿ ཝཱཀ་ཨ་བྷི་ཥིཉྩ་ཨཱ༔ བུདྡྷ་ཨ་བྷི་ཥིཉྩ་ཨཱ༔ མགྲིན་པར་རོ། །དུས་མིན་འཆི་བ་བཟློག་མཛད་པའི། །འོད་དཔག་མེད་པའི་བཀྲ་ཤིས་ཤོག །བར་ཆད་བདུད་དཔུང་འཇོམས་མཛད་པ། །རྟ་མགྲིན་དབང་གི་བཀྲ་ཤིས་ཤོག །མེ་ཏོག་གཏོར། དེས་གསུང་དབང་ཐོབ། གྲག་པ་གསུང་གི་ཁྱེར་སོ་རུང་། ངག་སྒྲིབ་དག །ལོངས་སྐུའི་འབྲས་བུ་ཐོབ་བོ། །ཡང་ཐུགས་སྲོག་རྟ་མགྲིན་གྱི་ཐུགས་ཀ་ནས་འོད་ཟེར་མཐིང་གི་རབ་ཏུ་འཕྲོས་ནས་ཁྱེད་རང་རྣམས་ཀྱི་སྙིང་གར་ཐིམ་པར་སྒོམས་ཤིག །ཧཱུྃ། རང་བཞིན་སྐྱེ་བ་མེད་པ་ལ། །ལོངས་སྐུ་རྒྱལ་བ་སྤྲིན་ཚོགས་གཏིབས། །ཐུགས་རྗེ་སྤྲུལ་སྐུ་བླ་ན་མེད། །གཏོར་མ་སྐུ་གསུམ་
ཡོངས་རྫོགས་དཔལ། །སྐལ་ལྡན་དབང་བཞི་ཡོངས་རྫོགས་ནས། །འབྲས་བུ་སྐུ་བཞི་མཆོག་ཐོབ་ཤོག །སྤྲོས་མེད་མཐའ་བྲལ་ཡེ་ཤེས་ཐུགས། །ཐུགས་དབང་སེམས་ལ་ཡོངས་རྫོགས་ཤོག །ཨོཾ་མ་ཎི་པདྨེ་ཧཱུྃ་ཧཱུྃ༔ ཙིཏྟ་ཨ་བྷི་ཥིཉྩ་ཧཱུྃ། བུདྡྷ་ཨ་བྷི་ཥིཉྩ་ཧཱུྃ། ཞེས་སྙིང་གར་བཞག །སྐུ་ལྔ་ཡེ་ཤེས་མངོན་གྱུར་པ། །རྒྱལ་བ་རིགས་ལྔའི་བཀྲ་ཤིས་ཤོག །ཚོགས་བརྒྱད་གནས་སུ་དག་མཛད་པའི། །སེམས་དཔའ་བརྒྱད་ཀྱི་བཀྲ་ཤིས་ཤོག །དེས་ཡིད་སྒྲིབ་དག །ཐུགས་ཀྱི་དབང་ཐོབ། དྲན་རྟོགས་ཐུགས་ཀྱི་ཁྱེར་སོ་བསྒོམ་པར་དབང་། འབྲས་བུ་ཆོས་སྐུ་འགྲུབ་པའོ། །ཡང་ལྷ་ཚོགས་ཐམས་ཅད་ཀྱི་སྐུ་ལས་འོད་ཟེར་ཁ་དོག་སྣ་ཚོགས་འཕྲོས་ནས་ཁྱེད་རང་རྣམས་ལ་ཐིམ་པར་སྒོམས་ཤིག །ཧཱུྃ། རང་བཞིན་སྐྱེ་བ་མེད་པ་ལས། །ལོངས་སྐུ་རྒྱལ་བ་སྤྲིན་ཚོགས་གཏིབས། །ཐུགས་རྗེ་སྤྲུལ་སྐུ་བླ་ན་མེད། །གཏོར་མ་སྐུ་གསུམ་ཡོངས་རྫོགས་དཔལ། །སྐལ་ལྡན་དབང་བཞི་ཡོངས་རྫོགས་ནས། །འབྲས་བུ་སྐུ་བཞི་མཆོག་ཐོབ་ཤོག །མ་ལུས་སྐུ་གསུང་ཐུགས་ཡོན་ཕྲིན། །དབང་བཞི་ཡོངས་རྫོགས་ཐོབ་པར་ཤོག །ཨོཾ་མ་ཎི་
པདྨེ་ཧཱུྃ་ཧཱུྃ༔ སརྦ་བྷི་ཥིཉྩ་ཧཱུྃ༔ ཞེས་ལྟེ་བར་གཏུགས་སོ། །ཡུལ་བརྒྱད་གནས་སུ་དག་མཛད་པའི། །སེམས་མ་བརྒྱད་ཀྱི་བཀྲ་ཤིས་ཤོག །རིགས་དྲུག་སྡུག་བསྔལ་སྐྱོབ་མཛད་པའི་། །ཐུབ་པ་དྲུག་གི་བཀྲ་ཤིས་ཤོག །མེ་ཏོག་འཐོར། དེས་ལུས་ངག་ཡིད་གསུམ་གྱི་སྒྲིབ་པ་དག །སྐུ་གསུང་ཐུགས་ཡོན་ཏན་ཕྲིན་ལས་བཞིའི་བྱིན་རླབས་ཐོབ། དབང་བཞི་ཡོངས་སུ་རྫོགས་པ་ཐོབ་པར་ངེས་ཤེས་བསྐྱེད་མཛོད། ཁྲོམ་ཆེན་ལ་བྷནྡྷ་མེ་ལོང་སོགས་མ་འཐུས་ཀྱང་རུང་ངོ་། །དེ་རང་གིས་ཀྱང་དབང་བཞི་རྫོགས་པར་ཐོབ་པ་ཡིན་ཅིང་། ད་རུང་ཁྱད་པར་བྷནྡྷ་འདིའི་ནང་ན་ཡེ་ཤེས་ཀྱི་བདུད་རྩི་བྱང་ཆུབ་སེམས་ཀྱི་རང་བཞིན་ཁྱེད་རང་རྣམས་ཀྱི་མགྲིན་པ་ནས་ཞུགས། རྩ་གནས་ཐམས་ཅད་གང་བས་བདེ་སྟོང་གི་ཏིང་འཛིན་རྒྱུད་ལ་སྐྱེ་བར་སྒོམས་ཤིག །ཧཱུྃ། གསང་བ་ཡེ་ཤེས་བདུད་རྩི་ཆེ། །བྱང་ཆུབ་སེམས་ཀྱི་འཕྲོ་འདུར་གསལ། །རྩ་ཁམས་གང་བའི་རང་བཞིན་ལ། །ཐབས་ཤེས་ཟུང་འཇུག་དབང་ཐོབ་ཤོག །ཨོཾ་མ་ཎི་པདྨེ་ཧཱུྃ་ཧཱུྃ༔ བོ་དྷི་ཙིཏྟ་ཨ་ཧོ་སུ་ཁ་ཨཱཿ ཉུང་ན་མགྲིན་པར་གཏུགས་ཤིང་བླུད། ཁྲོམ་ལ་བྷནྡྷ་ཕྱར་ཞིང་བསྟན་ནས་མཆོད་གཡོག་ལ་བདུད་རྩི་བཀྱེ་འཇུག་གོ །དེ་རེད་ན་མེ་ལོང་དང་མཉམ་དུ་
འགྲོའོ། །དེ་ནས་ཤེལ་དང་མེ་ལོང་གསེར་གྱིས་བྲིས་པའི་ཡིག་བདུན་རྨ་བྱའི་མདངས་རྣམས་གཅིག་ལ་བྲིས་པ་ཐོགས་ལ་ཕྱར་ནས། མེ་ལོང་སྤྲོས་བྲལ་ཆོས་སྐུ་ཟླུམ། །ཤེལ་སྒོང་ལྟར་དག་དྲི་མེད་ཐུགས། །ཀ་དག་ཐུགས་ཀྱི་དབང་བསྐུར་རོ། །ཆོས་དབྱིངས་སྤྲོས་བྲལ་དབང་ཐོབ་ཤོག །ཨོཾ་མ་ཎི་པདྨེ་ཧཱུྃ་ཧཱུྃ༔ ཙིཏྟ་བཛྲ་ས་མ་ཏི་ཛྙཱ་ན་ཨ་བྷི་ཥིཉྩ་ཧཱུྃ། ཞེས་ཉུང་ན་མགྲིན་པ་སྙིང་ག་ལྟེ་བར་བཞག་མང་ན་སྤྱི་བོར་འགྲིམ། དེ་ཡང་མ་ལྕོགས་ན་འོག་གི་གཏོར་དབང་དང་མཉམ་དུ་མཆོད་གཡོག་པ་ལ་ལག་ཏུ་འགྲིམ་བཅུག་གོ །གང་འདུལ་འགྲོ་བ་འདྲེན་མཛད་པའི། །སངས་རྒྱས་སྟོང་གི་བཀྲ་ཤིས་ཤོག །ཕྲིན་ལས་རྣམ་བཞི་བསྒྲུབ་མཛད་པའི། །སྒོ་བ་བཞི་ཡི་བཀྲ་ཤིས་ཤོག །གང་ལ་བསམ་པའི་དོན་འགྲུབ་པའི། །དམ་ཅན་རྒྱ་མཚོའི་བཀྲ་ཤིས་ཤོག །ཅེས་མེ་ཏོག་གཏོར། ཁྱེད་རང་རྣམས་ལུས་རྣམ་སྣང་གི་ཆོས་བདུན་བཅས་ལ། སེམས་ཐུགས་ཀའི་ཡེ་ཤེས་སེམས་དཔའི་ཧྲུལ་རིག་པ་རྩེ་གཅིག་ཏུ་གཏད་དོ། །བླ་མས། ཧཱུྃ། སྟོང་གསལ་རིག་སྟོང་མ་འགགས་གསལ། །མི་བསྒོམ་མ་ཡེངས་ངང་ལ་ཞོག །རང་བྱུང་རྩལ་དབང་ཡོངས་རྫོགས་དཔལ། །བསྐུར་ཐོབ་མེད་པའི་དབང་ཐོབ་ཤོག །ཨོཾ་མ་ཎི་པདྨེ་
ཧཱུྃ་ཧྲཱི༔ ཨོཾ་ཨཱཿཧཱུྃ་ཧྲཱིཿ སརྦ་ཙིཏྟ་བཾ་ཨ་བྷི་ཥིཉྩ་ཧཱུྃ༔ ཞེས་ལན་གསུམ་བསྐྱལ་ལ་ངོ་སྤྲད་པར་བྱའོ། །བསྡུ་ན་བྷནྡྷ་ནས་འདིའི་བར་བསྐུར་ཆོག་སྟེ། མི་བསྐུར་ན། དེ་ནི་ཐུགས་རྗེ་ཆེན་པོ་གསང་བ་འདུས་པའི་དབང་བཞི་འབྲིང་དུ་བསྐུར་བ་ཟབ་གཉན་བཀའ་རྒྱ་ཅན་ཡིན་ནོ། །གཏོར་མ་འདི་ཉིད་ཐུགས་རྗེ་ཆེན་པོ་གསང་བ་འདུས་པའི་ལྷ་ཚོགས་སྟེང་གི་ཆ་ལ་བཀའ་བརྒྱུད་རིག་འཛིན་གྲུབ་ཐོབ་བརྒྱུད་པའི་ཚོགས་དང་བཅས་པ་སྤྲིན་འཁྲིགས་པ་ལྟར་སྤྱི་བོར་བྱོན་ནས། འོད་དུ་ལྟེམ་གྱིས་ཞུ་ནས་ཐིམ་པས་ཐུགས་རྗེ་ཆེན་པོའི་སྐུ་གསུང་ཐུགས་དང་ཁྱེད་རང་རྣམས་ཀྱི་ལུས་ངག་ཡིད་གསུམ་དབྱེར་མེད་དུ་ཆུ་ལ་ཆུ་བཞག་པ་ལྟར་གྱུར་པར་བསྒོམས་ལ། སེམས་མ་བཅོས་པར་རང་བབས་སུ་ཀློད་ལ་ཞོག་ཅིག །ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། ལོ་ཙཱ་བ་རྒྱལ་བ་མཆོག་དབྱངས། གཏེར་སྟོན་རཏྣ་གླིང་པ། རྒྱལ་སྲས་ཚེ་དབང་གྲགས་པ། རང་བྱུང་མཚོ་སྐྱེས་རྡོ་རྗེ་ལ་སོགས་པ་བཀའ་བབས་རིག་འཛིན་བརྒྱུད་པའི་བླ་མ་དམ་པ་རྣམས་དང་། ཐུགས་རྗེ་ཆེན་པོ་གསང་བ་འདུས་པ། ཡུམ་གསང་བ་ཡེ་ཤེས་ཀྱི་མཁའ་འགྲོ། རིགས་བདག་
འོད་དཔག་མེད། ཐུགས་སྲོག་དབང་ཆེན་རྟ་མགྲིན། སྲས་ནོར་བུ་འཛིན་པ། སྲས་མོ་གསང་སྔགས་འཛིན་མ། རྒྱལ་བ་རིགས་ལྔ་ཡབ་ཡུམ་ལྔ། སེམས་དཔའ་བརྒྱད། སེམས་མ་བརྒྱད། སྤྲུལ་སྐུ་ཐུབ་པ་དྲུག །བསྐལ་བཟང་གི་སངས་རྒྱས་སྟོང་རྩ་གཉིས། སྒོ་བ་བཞི། སྒོ་མ་བཞི་རྣམས་ཀྱིས་རྡོ་རྗེའི་སློབ་མ་འདི་ལ་བྱིན་གྱིས་རློབས་ཤིག །དབང་བཞི་རྫོགས་པར་མཛད་དུ་གསོལ། སྨིན་ཅིང་གྲོལ་བར་མཛད་དུ་གསོལ། སྡིག་ལྟུང་གི་དྲི་མ་དག་པར་མཛད་དུ་གསོལ། ནད་གདོན་བར་ཆད་ཞི་བར་མཛད་དུ་གསོལ། འཇིགས་པ་ཆེན་པོ་བརྒྱད་དང་བཅུ་དྲུག་ལས་ཐར་བར་མཛད་དུ་གསོལ། ཚེ་བསོད་ཉམས་རྟོགས་འཕེལ་བར་མཛད་དུ་གསོལ། འཁོར་བ་དང་ངན་སོང་གི་སྐྱེ་སྒོ་ཆོད་པར་མཛད་དུ་གསོལ། ནམ་འཆི་བའི་ཚེ་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་སྐྱེ་བར་བྱིན་གྱིས་རློབས་ཤིག །ཨོཾ་མ་ཎི་པདྨེ་ཧཱུྃ་ཧི༔ ཨོཾ་ཨ་མི་དྷེ་ཝ་ཨཱ་ཡུ་སིདྡྷི་ཧཱུྃ་ཧི༔ ཨོཾ་བཛྲ་ཀྲོ་ཏ་ཧྱ་གྲི་ཝ་ཧཱུྃ༔ ཨོཾ་ཧཱུཾ་སྭཱ་ཨོཾ་ཧཱ༔ མཱུ་ལཱ་མཱཡཱཾ་ཏཱཾ༔ ཨོཾ་ཀ་པ་ཙ་ཁ་ཕ་ཚ་ཡ༔ ག་པ་ཛ་རཿ ཕ་གྷ་ལ་ཛྷཱ་ན་སྭཱ་ཧཱཿ ཨོཾ་མུ་ནེ་ཀཾ་ཡེ་ཧཱུྃ་ཀྲི་ནི་ཏྲི་ཧཱུྃ༔ ཨཱོཾ་
བཛྲ་རཏྣ་པདྨ་ཀརྨ་ཧེ་རུ་ཀ་ཧཱུྃ་ཕཊ༔ ཨོཾ་བུདྡྷ་ཛྙཱ་ན་སརྦ་སིདྡྷི་ཧཱུྃ༔ ཞེས་ཉུང་ན་སྤྱི་བོར་བཞག་ཅིང་སྔགས་བརྗོད། མང་ན་དེ་ནས་འཛབ་དབྱངས་གཅིག་བྱས་ལ་ཡིག་བདུན་འདོན་ཅིང་འགྲིམ་མོ། །དེ་ནས་བཟླས་ལུང་བྱིན་གསུངས་པས། མེ་ཏོག་དམར་པོའི་ཕྲེང་བ་རེ་ཕུལ་བའི་མོས་པས་རྗེས་ཟློས་མཛོད། ཐུགས་རྗེ་ཆེན་པོ་བདག་གིས་བཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །ཉེ་བར་མཛད་དུ་གསོལ། བརྟན་པར་མཛད་དུ་གསོལ། དེ་ལྟར་གསོལ་བ་བཏབ་པས་ཐུགས་རྗེ་ཆེན་པོའི་ལྷ་ཚོགས་ཀྱི་ཐུགས་ཀ་ནས་སྔགས་ཕྲེང་བྱུ་རུའི་ཕྲེང་བ་ལྟར་བྱོན་ནས། ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀར་བྷིཡིག་གི་མཐར་འཁོད་པའི་མོས་པས་རྗེས་ཟློས་མཛོད། ཨོཾ་མ་ཎི་པདྨེ་ཧཱུྃ་འོ་ན་ད་ལམ་ཁྱེད་རྣམས་ལ་ཐུགས་རྗེ་ཆེན་པོ་གསང་བ་ལན་གསུམ་འཛབ་དབྱངས་སུ་བྱ། ད་སྔགས་ཕྲེང་མེ་ཏོག་དམར་པོའི་ཕྲེང་བར་བྱས་ཏེ་སྤྱི་བོར་འཆིང་བར་སྒོམས་ཤིག་།ཉུང་ན་རྡོ་རྗེ་དང་ཙམ་པ་ཀའམ་ནས་འབྲུ་སྤྱི་བོར་བཞག །མང་ན་མེ་ཏོག་གཏོར་ཞིང་། ཐུགས་རྗེ་ཆེན་པོ་འདི་ལ་བསྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །རྡོ་རྗེའི་སློབ་མ་འདི་རྣམས་ལ་སྔགས་ཡི་གེ་བདུན་པའི་བྱིན་རླབས་འཇུག་པར་གྱུར་ཅིག །ཨོཾ་སུ་པྲ་ཏིཥྛ་བཛྲ་ཡེ་སྭཱ་
ཧཱ། དེས་ནི་ཐུགས་རྗེ་ཆེན་པོ་གསང་བ་འདུས་པའི་དབང་འདི་འབྲིང་ངམ་བསྡུས་པ་ལེགས་པར་གྲུབ་པ་སྟེ། གཞུང་ལས། ཤིན་ཏུ་བསྡུས་པ་ལ་དགའ་ན། གོང་གི་གསོལ་བཏབ་རྣམས་བྱས་རྗེས་གཏོར་དབང་རང་བསྐུར་ཀྱང་འོང་ལ། ཁྲོམ་སོགས་ལ་གོང་གི་ཆོ་ག་མ་གྲུབ་ན་ཡང་། བསྐྱེད་རིམ་ཕོག་ལ་གཏོར་མ་ཡེ་ཤེས་པའི་ཚུལ་དུ་བཞུགས་ནས། བྱིན་རླབས་དབྱེར་མེད་དུ་ངོ་སྤྲད་ནས། བཟླས་ལུང་ཡིག་བདུན་བྱིན་ནས། ཕྱག་རྒྱ་ཆེན་པོར་ངོ་སྤྲད་པས་ཀྱང་རྫོགས་པར་གྱུར་རོ། །ཞེས་གསུངས་པ་ལྟར་དབང་རྫོགས་པར་ཐོབ་པ་ཡིན་པས། ཐུགས་རྗེ་ཆེན་པོ་གསང་བ་འདུས་པ་ཡི་དམ་དུ་འཛིན། སྔགས་ཡི་གེ་བདུན་པ་ལ་ཐུགས་དམ་བྱ་སྙམ་པ་གྱིས། དབང་འདི་མ་ཐོབ་ན་ཡིག་དྲུག་ལ་ཧི༔སྦྱར་མི་རུང་སྟེ། གཞུང་ལས། དེ་ནས་དབང་མ་ཐོབ་པའི་སྐྱོན་ནི། བསྙེན་སྒྲུབ་ཐོས་བསམ་སྒོམ་གསུམ་ཐམས་ཅད་འབྲས་བུ་མེད་ཅིང་བཀླག་པར་འགྱུར་ཏེ། མི་དབང་བའི་ས་བདག་བཞིན་ནོ། །དབང་ཐོབ་པའི་དགོས་ཆེད་ནི། གསང་སྔགས་ཀྱི་ཡོན་ཏན་ཐམས་ཅད་དབང་ལས་འབྱུང་ཞིང་། བསྙེན་སྒྲུབ་ཕྲིན་ལས་རྣམ་བཞིའི་མཆོག་དང་
ཐུན་མོང་རང་གཞན་གྱི་དོན་གཉིས་སྤྱོད་པ་ཐམས་ཅད། རྒྱལ་པོས་རྒྱལ་སྲིད་ཐམས་ཅད་ལ། འཁོར་ལོས་སྒྱུར་བ་ལྟར་ཐམས་ཅད་ལྷུན་གྲུབ་ཏུ་འབྱུང་ཞིང་། ལོངས་སྤྱོད་པ་ལྟ་བུའོ། །ཞེས་གསུངས་པས་ཡི་གེ་དྲུག་པ་ཐུབ་པ་དྲུག་གི་སྙིང་པོ། ཧྲཱིཿཐུགས་རྗེ་ཆེན་པོའི་སྙིང་པོ་ཡིན་པས་ཤིན་ཏུ་ཟབ་པས་ཡིག་བདུན་འདོན་པའི་ཁས་ལེན་མཛོད། གཙོ་བོས་ཇི་ལྟར་སོགས། མཎྜལ་ཕུལ། ཅེས་སྒྲུབ་ཆེན་ནས་སྒྲུབ་དབང་དང་བུམ་དབང་གཏོར་དབང་སྤེལ་བར་གསུངས་པ་ལྟར། གཏོར་དབང་དང་དབང་འགྲུབ་གབ་སྤྱད་དེ་ཆ་ཚང་ཞིང་ཁྱེར་བདེ་བར་རཱ་ག་ཨ་སྱས་བཀོད་དེ་དབོན་པོ་བླ་མ་རྒྱལ་མཚན་གྱིས་བསྐུལ་ཕྱིར་ཤིང་སྦྲུལ་ས་ག་ཆེན་པོའི་ཚེས་བརྒྱད་ལ་བྲིས་པ་ལ། ཉེས་འགལ་མཆིས་ན་ཆོས་བདག་རྣམས་ལ་བཤགས་ཤིང་། དགེ་བས་སེམས་ཅན་མཐའ་ཡས་པ་བདེ་བ་ཅན་དུ་སྐྱེ་བའི་རྒྱུར་གྱུར་ཅིག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།