ཐུགས་རྗེ་ཆེན་པོ་གསང་བ་འདུས་པའི་ལོ་རྒྱུས་དབང་གི་མཚམས་སྦྱར་ཟབ་རྒྱས་ཆོས་ཀྱི་འབྲུག་སྒྲ།
ཐུགས་རྗེ་ཆེན་པོ་གསང་བ་འདུས་པའི་ལོ་རྒྱུས་དབང་གི་མཚམས་སྦྱར་ཟབ་རྒྱས་ཆོས་ཀྱི་འབྲུག་སྒྲ་བཞུགས་སོ།།
འོ་ན་ད་ལམ་ཁྱེད་རྣམས་ལ་ཐུགས་རྗེ་ཆེན་པོ་གསང་བ་འདུས་པའི་དབང་མོ་ཆེ། སངས་རྒྱས་སྟོང་རྩ་གཉིས་ཀྱི་དབང་དང་བཅས་པ་བསྐུར་བའི་ཐོག་མར་ལོ་རྒྱུས་ཅུང་ཟད་ཅིག་ཞུ་ན། དེ་ལ་བཅོམ་ལྡན་འདས་ཐུགས་རྗེ་ཆེན་པོ་ཉིད་ཀྱི་ལོ་རྒྱུས་དང་། དེའི་རྒྱུད་གསུངས་ཚུལ་དང་རྒྱུད་དེའི་མན་ངག་བརྒྱུད་ཚུལ་དང་། དེ་གཏེར་དུ་སྦས་ཤིང་བཏོན་ཚུལ་དང་། དེ་ལ་བརྟེན་ནས་འགྲོ་དོན་སྔར་འབྱུང་ཚུལ་དང་། མ་འོངས་པ་ན་བྱུང་ཚུལ་ལུང་བསྟན། དབང་འདི་ཐོབ་པའི་ཕན་ཡོན་བསྟན་པ་དང་ས་བཅད་བདུན་ནོ། །དང་པོ་ལྷ་ཐུགས་རྗེ་ཆེན་པོའི་ལོ་རྒྱུས་ནི། །
སྤྱན་རས་གཟིགས་ཐུགས་ཆོས་ཀྱི་སྐུ་ནི་འཁོར་འདས་ཐམས་ཅད་ལ་ཁྱབ་པར་གནས་ཏེ། དང་པོའི་སངས་རྒྱས་འོད་མི་འགྱུར་བ་ཞེས་ཀྱང་བྱ་བ་སྟེ། སངས་རྒྱས་ཐམས་ཅད་ཆོས་སྐུ་གཅིག་པའི་ཕྱིར། ཐུགས་རྗེ་ཆེན་པོ་གསང་བ་འདུས་པའི་རྒྱུད་ཆེན་པོ་ཉིད་ལས་ཀྱང་། ཕྱོགས་བཅུ་དུས་གསུམ་སངས་རྒྱས་རྣམས། །ཐུགས་རྗེ་ཆེན་པོར་མ་གྱུར་མེད། །དེ་ཉིད་སྐུ་གསུང་ཐུགས་བཅས་པ། །གསང་འདུས་རྒྱུད་འདིར་མ་འདུས་མེད། །ཅེས་གསུངས་པ་དང་། མདོ་སྡེ་ཟ་མ་ཏོག་ལས། ནམ་མཁའ་ནི་ཐུགས་རྗེ་ཆེན་པོའི་ཞལ་ལོ། །རླུང་ནི་ཐུགས་རྗེ་
ཆེན་པོའི་དབུགས་ཡིན་ནོ། །ཉི་ཟླ་ནི་ཐུགས་རྗེ་ཆེན་པོའི་སྤྱན་ཡིན་ནོ། །ཞེས་སོགས་རྒྱ་ཆེར་གསུངས་སོ། །སྤྱན་རས་གཟིགས་ལོངས་སྤྱོད་རྫོགས་སྐུའི་བཀོད་པ་ནི། འོག་མིན་འཐུག་པོ་བཀོད་པ་གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་ཁམས་བསམ་ལས་འདས་པ་ཞིག་ཡོད་དེ། དེའི་དབུས་ན་སྤྱན་རས་གཟིགས་ལོངས་སྤྱོད་རྫོགས་སྐུ་རྣམ་སྣང་གངས་ཆེན་མཚོ་ཞེས་བྱ་བའི་སངས་རྒྱས་གཅིག་བཞུགས་ཏེ། དེའི་གནས་ངེས་པ་འོག་མིན། འཁོར་ངེས་པ་ས་བཅུའི་སེམས་དཔའ་ཤ་སྟག་གོ །དུས་ངེས་པ་འཁོར་བ་ཇི་སྲིད། ཆོས་ངེས་པ་ཐེག་ཆེན་འབའ་ཞིག །སྐུ་ངེས་པ་ལོངས་སྤྱོད་རྫོགས་སྐུས། བརྡའི་སྒོ་ནས་ཆོས་སྟོན་ཏེ། དེའི་བ་སྤུའི་བུ་ག་རེ་རེ་ཡང་འཇིག་རྟེན་གྱི་ཁམས་དཔག་ཏུ་མེད་པ་སྤྲུལ་ལོ། །ཟ་མ་ཏོག་བཀོད་པ་ལས་འཕགས་པ་སྤྱན་རས་གཟིགས་དབང་ཕྱུག་གི་བ་སྤུའི་བུ་ག་གཅིག་ན་ཡང་། སངས་རྒྱས་ཀྱི་ཞིང་ཁམས་བསམ་གྱིས་མི་ཁྱབ་པར་གཅིག་ཏུ་སྤྲུལ་ནས་འགྲོ་བའི་དོན་མཛད་པར་གསུངས། སངས་རྒྱས་དེའི་ཕྱག་ན་ལྷུང་བཟེད་ཀྱི་ནང་ན་སྤོས་ཆུའི་རྒྱ་མཚོ་ལས། མེ་ཏོག་པདྨ་ཉི་ཤུ་རྩ་ལྔ་བརྩེགས་མར་སྐྱེས་ཤིང་། མེ་ཏོག་དེའི་ཟེའུ་
འབྲུའི་འབྲུ་མ་རེ་རེའི་ནང་ན་ཡང་འཇིག་རྟེན་གྱི་ཁམས་དཔག་ཏུ་མེད་པར་སྤྲུལ་ནས་སེམས་ཅན་གྱི་དོན་མཛད་ཅིང་། མེ་ཏོག་བཅུ་གསུམ་པའི་ཟེའུ་དབུས་མ་གཅིག་གི་ནང་ན་སྟོང་གསུམ་མི་མཇེད་འཇིག་རྟེན་གྱི་ཁམས་འདི་ཆགས་ནས་ཡོད་ཅིང་། འདི་སངས་རྒྱས་དེའི་ཐུགས་ཀའི་ཐད་དུ་ཡོད་པའི་རྟེན་འབྲེལ་གྱིས་འཇིག་རྟེན་གྱི་ཁམས་འདི་ན་དགེ་སྡིག་གང་བྱས་སྟོབས་དང་འགྱུར་ཆེ་བར་བཤད་དེ། དེ་ལྟར་སངས་རྒྱས་རྣམ་པར་སྣང་མཛད་གངས་ཅན་མཚོ་དང་དེའི་ཞིང་འོག་མིན་འཐུག་པོ་བཀོད་དེ་ནི། ཐུགས་རྗེ་ཆེན་པོའི་སྤྲུལ་པ་སྐོར་གཅིག་ཡིན་པར་སངས་རྒྱས་ཕལ་པོ་ཆེ་ནས་ཅུང་ཟད་བཤད་དེ། གསང་བ་རྡོ་རྗེ་ཐོད་པའི་རྒྱུད་ལས་ཀྱང་བཤད་དོ། །དེ་ཡིན་པར་སྲོང་བཙན་སྒམ་པོའི་ལོ་རྒྱུས་ཆེན་པོ་ནའང་བཤད་དོ། །དེ་ལྟ་བུའི་ལོངས་སྤྱོད་རྫོགས་སྐུའི་ཞིང་ཁམས་དཔག་ཏུ་མེད་པར་སྤྲུལ་ནས་སེམས་ཅན་གྱི་དོན་མཛད་པར་ཨོ་རྒྱན་རིན་པོ་ཆེས་རྒྱས་པར་ཡང་ཡང་དུ་གསུངས་སོ། །དེ་ལྟར་ཐུགས་རྗེ་ཆེན་པོ་ནི་དང་པོའི་སངས་རྒྱས་ཡིན་ཀྱང་། སེམས་ཅན་གྱི་དོན་ལ་སླར་བྱང་ཆུབ་ཏུ་སེམས་བསྐྱེད་ཅིང་ལམ་ལ་སློབ་པ་སོགས་མཛད་པའི་ཚུལ། མ་
འོངས་པ་ན་འོད་ཟེར་དཔལ་བརྩེགས་ཀྱི་རྒྱལ་པོར་འཚང་རྒྱ་བར་ལུང་བསྟན་པ་སོགས་ནི་སེམས་ཅན་འདུལ་བའི་ཆེད་དུ་དེ་ལྟ་བུའི་ཚུལ་བསྟན་པ་ཡིན་གྱིས། དོན་ལ་ཐོག་མ་མེད་པ་ནས་སངས་རྒྱས་པ་སྟེ། བསྐལ་པ་བྱེ་སྟོང་བསམ་གྱིས་མི་ཁྱབ་པར། །དེ་ཡི་ཚད་ནི་སུས་ཀྱང་བཟུང་མེད་པར། །བྱང་ཆུབ་མཆོག་རབ་འདི་ནི་ངེས་རྙེད་དེ། །ངས་ནི་རྟག་ཏུ་ཆོས་ཀྱང་རབ་འཆད་དོ། །ཞེས་གསུངས་པ་ལྟ་བུའོ། །དེ་བཞིན་དུ་སངས་རྒྱས་སྣང་བ་མཐའ་ཡས་ཀྱི་སྤྱན་གཡས་ལས་སྤྲུལ་པ་དང་། མགྲིན་པ་ནས་སྤྲུལ་པ་དང་། སངས་རྒྱས་ཐམས་ཅད་ཀྱི་གསུང་ལས་སྤྲུལ་པ་དང་། སངས་རྒྱས་ཐམས་ཅད་ཀྱི་འཁོར་ཉེ་སྲས་སུ་བཞུགས་པ་སོགས་ནི་སེམས་ཅན་གྱི་དོན་ལ་དེ་དང་དེར་དེའི་ཚུལ་སྟོན་པ་ཡིན་ཏེ། གང་ལ་གང་འདུལ་དུ་སྤྲུལ་ནས་སེམས་ཅན་གྱི་དོན་མཛད་ཚུལ་འདམ་རྫབ་ཀྱི་སྲིན་བུ་རྣམས་ལ་བུང་བར་སྤྲུལ་ནས་ཆོས་བཤད་པ་དང་། ཚོང་པ་སྲིན་མོའི་གླིང་དུ་ཚུད་པ་ལ་རྟ་མཆོག་བ་ལ་ཧར་སྤྲུལ་ནས་དྲངས་པ་སོགས། འགྲོ་བ་རིགས་དྲུག་གི་དོན་མཛད་ཚུལ་རྒྱས་པར་ཟ་མ་ཏོག་ལས་གསུངས་ཤིང་། འགྲོ་དྲུག་འདུལ་ཕྱིར་སྐུ་ཐུབ་པ་དྲུག །གསུང་ཡི་གེ་འབྲུ་དྲུག་
ཏུ་སྤྲུལ་པ་ཡིན་ནོ། །འཕགས་པ་སྤྱན་རས་གཟིགས་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དང་མཉམ་པའི་འཇིག་རྟེན་གྱི་ཁམས་རྣམས་སུ་སངས་རྒྱས་སྟོང་རྩ་གཉིས་སུ་སྤྲུལ་ནས་སེམས་ཅན་གྱི་དོན་མཛད་ཅེས་ཆུ་ཀླུང་སྣ་ཚོགས་པའི་མདོ་ལས་གསུངས་སོ། །སྤྱན་རས་གཟིགས་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་ཁམས་བཀོད་པ་བར་མའི་འཇིག་རྟེན་གྱི་འབྱུང་བ་ཆེན་པོ་བཞིའི་རྡུལ་ཕྲ་རབ་དང་མཉམ་པའི་མཛད་པ་བཅུ་གཉིས་སུ་སྤྲུལ་ནས་སེམས་ཅན་གྱི་དོན་མཛད་པར་པུན་དྷ་རི་ཀའི་མདོ་ལས་གསུངས་སོ། །འཕགས་པ་སྤྱན་རས་གཟིགས་དབང་ཕྱུག་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། འཛམ་གླིང་བྱེ་བ་ཕྲག་བརྒྱར་སྤྲུལ་པའི་རྡོ་རྗེ་གདན་བྱེ་བ་ཕྲག་བརྒྱ་ན་ཤཱཀྱ་ཐུབ་པ་བྱེ་བ་ཕྲག་བརྒྱ། བྱང་ཆུབ་སེམས་དཔའ་ཐུགས་རྗེ་ཆེན་པོ་སྤྱན་རས་གཟིགས་བྱེ་བ་ཕྲག་བརྒྱ། སྤྲུལ་པའི་རྒྱལ་པོ་སྲོང་བཙན་སྒམ་པོ་བྱེ་བ་ཕྲག་བརྒྱ། ར་ས་འཕྲུལ་སྣང་གི་གཙུག་ལག་ཁང་བྱེ་བ་ཕྲག་བརྒྱར་སྤྲུལ་ནས་སེམས་ཅན་གྱི་དོན་མཛད་པར། སྙིང་རྗེ་རྣམ་པར་རོལ་པ་ཞེས་ཀྱང་བྱ། སྙིང་རྗེ་རྣམ་པར་རྒྱལ་བ་
ཞེས་ཀྱང་བྱ། སྙིང་རྗེ་སྣ་ཚོགས་རོལ་པའི་མདོ་ལས་གསུངས་སོ། །འཛམ་བུའི་གླིང་འདིའི་ལྷོ་ཕྱོགས་རི་བོ་ཏ་ལའི་རྩེ་མོ་ན་རིན་པོ་ཆེ་སྣ་ཚོགས་ཀྱི་གཞལ་ཡས་ཁང་སེང་གེ་དང་ཉི་ཟླ་པདྨའི་གདན་ལ་འཕགས་པ་སྤྱན་རས་གཟིགས་བསྐལ་པ་འདི་མ་རྫོགས་བར་དུ་བཞུགས་ནས་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་གྲུབ་པ་ཐོབ་པའི་མི་དང་། མི་མ་ཡིན་རྣམས་ལ་ཆོས་སྟོན་ཏེ། དེ་བཞིན་དུ་འཛམ་བུ་གླིང་བྱེ་བ་ཕྲག་བརྒྱ་ན་ཡང་དེ་ལྟར་རེ་རེ་དང་ཕྱོགས་བཅུའི་སངས་རྒྱས་ཀྱི་ཞིང་ན་སྤྱན་རས་གཟིགས་རིགས་བཅུ་དང་། སྤྱན་རས་གཟིགས་དབང་ཕྱུག་དེ་དཔག་གིས་མི་ལངས་པ་ཞིག་བཞུགས་ཀྱང་། རང་གི་ངོ་བོ་དེ་སངས་རྒྱས་སྣང་བ་མཐའ་ཡས་ཀྱི་དྲུང་དུ་ཉེ་གནས་ཀྱི་ཚུལ་དུ་བཞུགས་སོ། །ལྷའི་ངོ་བོ་དེ་ལྟར་ཡིན་ན་དེའི་རྒྱུད་ཇི་ལྟར་གསུངས་ཞེ་ན། ཕྱི་ལྟར་སྟོན་པ་ཤཱཀྱ་ཐུབ་པས། ཟ་མ་ཏོག་བཀོད་པའི་མདོ་ཆེ་ཆུང་གཉིས། པདྨ་དཀར་པོའི་མདོ། པུན་རི་ཀའི་མདོ། ཆུ་ཀླུང་སྣ་ཚོགས་པའི་མདོ། སྣང་བ་རོལ་པའི་མདོ། མཚན་བརྒྱ་རྩ་བརྒྱད་པའི་མདོ། མཚན་རབ་ཡོངས་སུ་སྟོན་པའི་མདོ་ལ་སོགས་པ། སྤྱན་རས་གཟིགས་ཀྱི་ཡོན་ཏན་ཐོབ་
པའི་མདོ་བདུན་གྱིས་གཙོར་བྱས་པའི་མདོ་སྡེ་དཔག་ཏུ་མེད་པ་དང་། མོའུ་འགལ་མདོ་རྒྱས་པ་སོགས་ནས་སྤྱན་རས་གཟིགས་ཀྱི་བསྔགས་པ་རྒྱ་ཆེར་གསུངས་ལ། །པདྨའི་སྙིང་པོ་གཟུངས་ལ་སོགས་པ་གཟུངས་བཅུ་བཞི་དང་། བྱ་རྒྱུད་ཀྱི་དབང་དུ་བྱས་པའི་རྩ་རྒྱུད་པདྨ་དྲྭ་བ་བཤད་རྒྱུད་དོན་ཡོད་ཞགས་པ། སྤྱོད་རྒྱུད་ཀྱི་དབང་དུ་བྱས་པའི་སྙིང་རྗེ་ཆེན་པོ་རང་བཞིན་གྱི་གཟུངས་ལ་སོགས་པ་དང་། རྣལ་འབྱོར་རྒྱུད་ཀྱི་དབང་དུ་བྱས་པ་པདྨ་ཅོད་པན་གྱི་རྒྱུད་དང་། བླ་མེད་རྒྱུད་ཀྱི་དབང་དུ་མཛད་པ་པདྨ་རྒྱལ་པོའི་རྒྱུད་ལ་སོགས་པ་སྤྱན་རས་གཟིགས་ཀྱི་སྒོས་རྒྱུད་དཔག་ཏུ་མེད་པ་དང་། ཞོར་འབྱུང་དུ་ནི་རྒྱུད་སྡེ་ཕལ་ཆེར་ནས་སྤྱན་རས་གཟིགས་མ་གསུངས་པ་མེད་པ་ལྟ་བུའོ། །ནང་ལྟར་ན་ཆོས་སྐུ་སྣང་བ་མཐའ་ཡས་ཀྱིས་གསུངས་པ་པདྨ་ཟབ་པའི་རྒྱུད་དང་། ཡང་སྙིང་འདུས་པའི་རྒྱུད་སོགས་མཐའ་ཡས་སོ། །ཨོ་རྒྱན་སྐད་དུ་མ་ཏི་ཙིཏྟ་ཀ་བ་ཏི་གྷ་ཏ་ཛཿ དྷཀི་གསང་བའི་སྐད་དུ། མ་ཏ་བྷོ་ནི་བྷ་དྲ་ཨཱ༔ རྒྱ་གར་སྐད་དུ་མ་ཧཱ་ཀ་ཏུ་ཙེ་རྒྱ་གྷ་ཡ་སརྦ་ཏན་ན་མ། བོད་སྐད་དུ། ཐུགས་རྗེ་ཆེན་པོ་གསང་བ་འདུས་པའི་རྒྱུད་ཅེས་བྱ་བ་འདི་ནི། བདེ་ཆེན་
པདྨོ་བཀོད་པའི་ཞིང་ཁམས། འདུས་མ་བྱས་ཤིང་ལྷུན་གྱིས་གྲུབ་པའི་གནས་མཆོག་ཀུན་ཏུ་འོད་ཀྱི་རང་བཞིན་རྣམ་པར་འཁྱིལ་བ། རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ལ། ཕྱི་ནང་ཟང་ཐལ་ཆེན་པོ་ཡོངས་སུ་རྫོགས་པའི་གཞལ་ཡས་ཁང་ཆེན་པོ་ན། སེང་གེ་གླང་ཆེན་རྟ་ཁྱུང་རྨ་བྱ་ལ་སོགས་པའི་ཁྲིའི་སྟེང་། པདྨ་འདབ་མ་སྟོང་དང་ལྡན་པའི་དབུས་སུ་ཉི་ཟླའི་གདན་ལ་སངས་རྒྱས་འོད་དཔག་ཏུ་མེད་པ་གསང་ཆེན་པདྨ་དབྱིངས་ཕྱུག་མ་དང་གཉིས་སུ་མེད་པར་བཞུགས་པ་ལ། པདྨ་རིགས་ཀྱི་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པས་ཡོངས་སུ་བསྐོར་ནས་བཞུགས་སོ། །དེའི་ཚེ་སངས་རྒྱས་འོད་དཔག་ཏུ་མེད་པའི་སྤྱན་གྱི་མཛོད་སྤུ་ནས། སྐུའི་རིག་འཛིན་དུ་འཇམ་དབྱངས་སུ་སྤྲུལ་ལོ། །ལྗགས་ཀྱི་པདྨོ་ལས་གསུང་གི་རིག་འཛིན་དུ་སྤྱན་རས་གཟིགས་སུ་སྤྲུལ་ལོ། །ཐུགས་ཀ་ནས་ཐུགས་ཀྱི་རིག་འཛིན་དུ་ལག་ན་རྡོ་རྗེར་སྤྲུལ་ལོ། །གཞན་ཡང་རང་སྣང་དག་པའི་འཁོར་རིགས་ཀྱི་སེམས་དཔའ་ཡབ་ཡུམ་བཅུ་དྲུག་ལ་སོགས་ཏེ་དཔག་ཏུ་མེད་པ་དང་། རྫོགས་པའི་སངས་རྒྱས་སྟོང་དང་ཐུབ་པ་དྲུག་དང་། རིགས་ལྔ་དང་། སྟེང་ཕྱོགས་ན་
པདྨ་ཧེ་རུ་ཀ་ལ་སོགས་པ་ཁྲོ་བོའི་དཀྱིལ་འཁོར་བསམ་གྱིས་མི་ཁྱབ་པ་དང་བཅས་ཏེ། འདུ་འབྲལ་མེད་པའི་ངང་དུ་རྟག་པ་རྒྱུན་གྱི་མཐར་བཞུགས་སོ། །དེ་ནས་མགོན་པོ་སྤྱན་རས་གཟིགས་ཉིད་འཁོར་རྒྱ་མཚོ་དཔག་ཏུ་མེད་པ་རྣམས་ཀྱིས་ཐུགས་ཀྱི་བསྐུལ་བར་མཁྱེན་ནས། རང་གི་པདྨའི་གདན་ལས་བཞེངས་ཏེ་རིགས་ཀྱི་བདག་པོ་ལ་གུས་པའི་ཚུལ་གྱིས་བཏུད་དེ་ཞུས་པའི་ངོར། གསང་བ་འདུས་པའི་རྒྱུད་ལེའུ་བཅོ་ལྔ་པ་འདི་གསུངས་སོ། །འོ་ན་རྒྱུད་དེ་རྣམས་མི་ཡུལ་དུ་ཇི་ལྟར་དར་ཞེ་ན། བཅོམ་ལྡན་འདས་ཤཱཀྱ་ཐུབ་པ་སྐུ་མྱ་ངན་ལས་འདས་ནས། མདོ་སྡེ་རྣམས་ཀུན་དགའ་བོས་བཀའི་བསྡུ་བ་མཛད་དེ་གླེགས་བམ་རྣམས་ལྷ་ཀླུ་སོགས་ལྷ་མ་སྲིན་སྡེ་བརྒྱད་ཀྱིས་སོ་སོའི་ཡུལ་དུ་གདན་དྲངས་སོ། །སྔགས་བྱ་སྤྱོད་རྣལ་འབྱོར་གྱི་རྒྱུད་རྣམས་རིགས་གསུམ་མགོན་པོས་བཀའི་བསྡུ་བ་མཛད་དེ་ལྷ་གནས་དང་ལྕང་ལོ་ཅན་སོགས་སུ་བཞུགས་སོ། །གསང་སྔགས་བླ་མེད་ཕལ་ཆེར་རྡོ་རྗེ་སྙིང་པོས་བསྡུས་ཏེ་ཕལ་ཆེར་མཁའ་འགྲོའི་ཕྱག་ཏུ་བཞུགས་པས། མི་ཡུལ་དུ་ཆེར་མེད་པ་ལ། སྤྲིན་ཆེན་པོ་དང་རྔ་བོ་ཆེ་སོགས་མདོ་སྡེ་བཅུ་གཉིས་ནས་ལུང་བསྟན་པའི་
འཕགས་པ་ཀླུ་སྒྲུབ་སོགས་རིག་འཛིན་བརྒྱད་དུར་ཁྲོད་བསིལ་བ་ཚལ་དུ་མཆོད་རྟེན་བདེ་བྱེད་བརྩེགས་པའི་དྲུང་དུ་དགོངས་པ་མཛད་པས། ཐུགས་རྗེ་ཆེན་པོ་ཞི་དྲག་གི་རྒྱུད་ཕལ་ཆེར་ཀླུ་སྒྲུབ་ཀྱི་ཕྱག་ཏུ་བབས་ཤིང་། ལྷ་མོ་ཀུ་རུ་ཀུལླེས་དབང་བསྐུར་བས་པདྨ་གསུང་གི་རིག་འཛིན་དུ་གྲགས་སོ། །རྒྱལ་པོ་ཛའི་ཕོ་བྲང་དུ་ཟ་མ་ཏོག་བཀོད་པའི་གསང་སྔགས་ཏན་བཅོ་བརྒྱད་སོགས་གླེགས་བམ་གྱི་ཆར་བབས་ཤིང་ཕྱག་ན་རྡོ་རྗེས་དབང་བསྐུར་རོ། །རྒྱལ་པོའི་སྲས་མི་ཏྲ་ལ་མཁའ་འགྲོ་ཨེ་ཀ་ཙ་ཏིས་དབང་བསྐུར་ལུང་བསྟན་ནས་ཁ་སར་པ་ཎིའི་ལྷ་ཁང་དུ་བསྒོམས་ཤིང་ཡི་གེ་དྲུག་པ་བཟླས་པས་ཐུགས་རྗེ་ཆེན་པོ་ཞལ་གཟིགས་ནས་ཐུགས་རྗེ་ཆེན་པོའི་སྒྲུབ་ཐབས་བརྒྱ་རྩ་བརྒྱད་གནང་འཆི་མེད་འཇའ་ལུས་གྲུབ་བོ། །ཁྱད་པར་དུ་གསང་བ་འདུས་པའི་རྒྱུད་འདི་ནི་བཅོམ་ལྡན་འདས་མ་རྡོ་རྗེ་ཕག་མོས་བཀའི་བསྡུ་བ་མཛད་དེ། ཨོ་རྒྱན་གན་དྷོ་ལའི་ཤར་ཕྱོགས། རི་བོ་གྲུ་འཛིན་ཏ་ལའི་གནས་རིགས་གསུམ་མགོན་པོའི་ཕོ་བྲང་རང་བྱུང་དུ་ཡོད་པའི་སར་གཏེར་དུ་སྦས་སོ། །དེ་ནས་ཕྱིས་ཨོ་རྒྱན་རིན་པོ་ཆེ་པདྨ་འབྱུང་གནས་ཀྱི་གསུང་གི་རིག་འཛིན་འཕགས་པ་ཀླུ་སྒྲུབ་ལ་ཐུགས་རྗེ་ཆེན་པོ་ཞི་
བ་དང་ཁྲོ་བོའི་སྐོར་ཐམས་ཅད་ཞུས་སོ། །རྒྱལ་པོ་ཛའི་སྲས་མོ་གོ་མ་དེ་བའི་ལ་ཡང་ཞུས་སོ། །གྲུབ་ཆེན་མི་ཏྲ་ལ་ཡང་ཐུགས་རྗེ་ཆེན་པོ་ཡང་གསང་བླ་མེད་སོགས་སྒྲུབ་ཐབས་བརྒྱ་རྩ་བརྒྱད་ཞུས་སོ། །ལྷ་ལྕམ་ལེགས་སྨིན་ཀ་ར་ལ་མཛེ་བྱུང་ནས་ཐུགས་རྗེ་ཆེན་པོ་ལྷ་ཁང་བླ་མེད་རྒྱབ་ཏུ་ཡི་གེ་དྲུག་པ་བཟླས་ཤིང་ཐུགས་རྗེ་ཆེན་པོ་བསྒྲུབས་ཏེ་མཛེ་སོས་ལྷ་ཁང་གི་སྒོ་མོའི་ཕྱོགས་སུ་འགྱུར་གྲུབ་པ་ཐོབ་བོ། །དེ་ལ་ཨོ་རྒྱན་ཆེན་པོས་དབང་ཞུས་པས། རྡོ་རྗེ་ཕག་མོར་དངོས་སུ་བཞེངས་ནས་སློབ་དཔོན་ཡི་གེ་ཧཱུྃ་དུ་བྱས་ཏེ་ཤངས་སུ་རྔུབས་ནས་སྐུའི་རྩ་གནས་རྣམས་སུ་ཕྱི་ཐུགས་རྗེ་ཆེན་པོ་འགྲོ་བ་འདུལ་བའི་དབང་། ནང་རྟ་མགྲིན་དྲེགས་པ་ཟིལ་གྱིས་གནོན་པའི་དབང་ལ་སོགས་པ་གནང་ནས། གསང་བའི་པད་མོར་བཏོན་ཏོ། །དབང་དེའི་བྱིན་རླབས་ཀྱིས་དེ་མ་ཐག་འོག་མིན་དུ་སྐད་ཅིག་ལ་འཕག་སྟེ་རྡོ་རྗེ་འཆང་ཆེན་པོ་དང་རིག་འཛིན་རྡོ་རྗེ་ཆོས་ལ་སོགས་པས་ཡོངས་རྫོགས་ཆེན་པོའི་དབང་ཐམས་ཅད་བསྐུར་རོ། །ཁྱད་པར་དུ་གསང་བ་འདུས་པའི་རྒྱུད་ཉིད་ལས། འགྲོ་འདུལ་ལུང་ཆེན་གྱི་ལེའུ་ནས། ངས་སྤྲུལ་ཀོ་ཤའི་མཚོ་གླིང་དུ། །པདྨ་ལས་བྱུང་
སྤྲུལ་པའི་སྐུ། །ཚེ་ལ་དབང་བའི་རིག་འཛིན་ལ། །བཀའ་ཡི་བབ་དང་བཅས་ཏེ་གནང་། །ཨོ་རྒྱན་རྒྱ་གར་ཤར་ནུབ་ཏུ། །དེ་ཡིས་བསྟན་པ་དར་བར་བྱེད། །ཅེས་ལུང་བསྟན་པ་ལྟར། ཨོ་རྒྱན་རིན་པོ་ཆེ་བྲག་ཕུག་མ་ར་ཏི་ཀར་ལྷ་ལྕམ་མནྡྷ་ར་བས་བསྒྲུབས་པའི་གྲོགས་བྱས་ཏེ་ཚེའི་རིག་འཛིན་བསྒྲུབས་པས། སངས་རྒྱས་སྣང་བ་མཐའ་ཡས་དངོས་སུ་བྱོན་ནས་དབང་བཞི་རྫོགས་པར་བསྐུར་བས་འཆི་མེད་ཚེའི་རིག་འཛིན་ཐོབ། ཐུགས་རྗེ་ཆེན་པོ་གསང་བ་ཡང་ཐོག་གི་རྒྱུད་དང་། ཐུགས་རྗེ་ཆེན་པོ་ལྟ་བ་ཡང་རྩེའི་རྒྱུད་གཉིས་སྣང་བ་མཐའ་ཡས་ཀྱིས་དངོས་སུ་གསུངས། དེ་ནས་ཐུགས་རྗེ་ཆེན་པོ་སྤྱན་རས་གཟིགས་དངོས་སུ་བྱོན་ནས་ཐུགས་རྗེ་ཆེན་པོའི་རྒྱུད་བརྒྱ་རྩ་བརྒྱད་གནང་ཞིང་དབང་ཐམས་ཅད་རྫོགས་པར་བསྐུར། ཁྱད་པར་དུ་ཡང་ཐུགས་རྗེ་ཆེན་པོ་གསང་བ་འདུས་པའི་དབང་བསྐུར། འདིའི་རྒྱུད་ཀྱང་གསང་བ་ཡེ་ཤེས་ཀྱི་མཁའ་འགྲོ་མ་རྡོ་རྗེ་ཕག་མོས་ཨོ་རྒྱན་ཉིད་ལ་གཏད་དོ། །དེ་ནས་ཨོ་རྒྱན་རིན་པོ་ཆེ་རི་བོ་པོ་ཊ་ལའི་རྩེར་བྱོན་ནས་ཡི་གེ་དྲུག་པ་དུང་ཕྱུར་སྟོང་ཙམ་བསྙེན་པ་མཛད་པར་གསུངས་ཏེ་མ་འོངས་པ་རྣམས་ཀྱིས་ཀྱང་བསྙེན་པ་གལ་ཆེ་
བའི་བརྡ་ཡིན་པར་སྣང་ངོ་། །དེ་ནས་རྒྱ་གར་གྱི་པཎ་གྲུབ་རྣམས་ཀྱིས་རྒྱུད་སྡེ་དེ་དག་ལ་བརྟེན་ནས་ཐུགས་རྗེ་ཆེན་པོའི་སྒྲུབ་ཐབས་ཁྲིད་རིམ་མང་དུ་མཛད་དོ། །དེ་དག་ལ་བརྟེན་ནས་གྲུབ་པ་ཐོབ་པ་མང་དུ་བྱུང་སྟེ། རྒྱ་གར་ནུབ་ཕྱོགས་སུ་བྲམ་ཟེའི་བུ་མོ་གཅིག་ལ་ཁྱེའུ་ཤེལ་གྱི་གྲི་གུག་ཐོགས་པ་ཞིག་གིས་སྤྱོད་པ་རྨིས་པས། ཕ་མེད་པའི་བུ་ཞིག་བྱུང་བས་བདེ་མཆོག་དུས་ཀྱི་སྙིང་པོ་བཏགས། དེས་སློབ་དཔོན་དགའ་རབ་རྡོ་རྗེ་ལ་དབང་ལུང་ཞུས་ནས། བྲག་ཕུག་ལྷ་ཞལ་ཅན་དུ་ཡི་གེ་དྲུག་པའི་སྒོམ་སྒྲུབ་བྱས་པས། ཁོང་རང་ཕུང་པོ་ལྷག་མེད་ཏུ་སངས་རྒྱས་བྲག་དེ་ཤེལ་གྱི་མཆོད་རྟེན་རྡོ་རྗེས་བརྒྱན་པ་ཞིག་ཏུ་གྱུར་ནས། བྲག་དེ་ལ་བསྐོར་བ་ལན་རེ་བྱས་ན་ངན་སོང་དུ་མི་འགྲོ་བྱང་ཆུབ་ཀྱི་ལམ་དུ་ཞུགས་པར་གྱུར་སྐད་དོ། །མ་ཧེའི་རྫི་བོ་གཅིག་གིས་སློབ་དཔོན་ཀླུ་སྒྲུབ་ལ་དབང་ལུང་ཞུས་ནས། མ་ཧེ་འཚོ་ཞིང་ཐུགས་རྗེ་ཆེན་པོ་བསྒོམས་ཤིང་ཡི་གེ་དྲུག་པ་བཟླས་པས། ལོ་གཅིག་སོང་དུས་མ་ཧེའི་སྙིང་ག་ནས་གྲོད་པ་ཞིག་བྱུང་། དེའི་ནང་ནས་ཤེལ་གྱི་ཁྱེའུ་ལག་ན་གསེར་གྱི་ཆགས་ཤིང་ལ་མུ་ཏིག་གི་ཡི་གེ་དྲུག་པ་འབུར་དུ་དོད་པ་ཐོགས་པ་གཅིག་བྱུང་
དབང་བསྐུར་ཆོས་བསྟན་ནས་མི་སྣང་བར་ཡལ་ནས། རྫི་བོ་འཇའ་ལུས་མཁའ་སྤྱོད་འགྲུབ་སྟེ། ཞག་རེ་ལ་འཛམ་བུའི་གླིང་གི་མི་རྣམས་ལ་མཆོག་ཐུན་མོང་གི་དངོས་གྲུབ་འདོད་ན་ང་ལས་ལོངས་གསུངས་ཀྱང་། ལས་མ་དག་པས་མི་མཐོང་བ་ཡིན་ཏེ་དེ་ནི་གྲུབ་ཆེན་ཀླུའི་བྱང་ཆུབ་ཅེས་གྲགས་སོ། །ཆགས་ཤིང་ཡི་གེ་དྲུག་མ་རང་བྱོན་དེ་ནུབ་ཕྱོགས་པར་པ་ཏའི་ཡུལ་ཀླུ་སྒྲུབ་ཀྱི་དགོན་པ་གསེར་གྱི་བྱ་རྐང་ཅན་ན། ད་ལྟ་ཡང་ཡོད་སྐད་དོ། །ཡུལ་མ་ག་ཏའི་ནུབ་ཕྱོགས་སུ། ཚོང་དཔོན་མཛེས་པའི་ཏོག་གིས་ཡི་གེ་དྲུག་པ་བཟླས་ཤིང་ཙནྡན་གྱི་སྡོང་པོ་ཞིག་ལ་བསྐོར་བ་ཁོ་ན་བྱས་པས། ཁོང་འདས་ནས་ཙནྡན་སྡོང་པོའི་རྩ་བར་ཕུང་པོ་བསྲེགས་པས། སང་ཕོད་རོ་བསྲེགས་ཤུལ་གྱི་ཙན་དན་དེ་ལ་ལྷ་བ་ཆེན་པོ་ཞིག་བྱུང་ངོ་། །དེའི་ནང་ནས་སྤྱན་རས་གཟིགས་རིགས་ལྔའི་སྐུ་རང་བྱོན་དུ་འཁྲུངས་སོ། །དཀར་པོ་བཅུ་གཅིག་ཞལ་ནི་རྡོ་རྗེ་གདན་ན་བཞུགས། །སྔོན་པོ་བལ་པོ་ན། སེར་པོ་ཨུ་རྒྱན་ཡུལ་ན། དམར་པོ་ཁ་ཆེ་ན། ལྗང་གུ་ཟ་ཧོར་ཡུལ་ན་བཞུགས་སོ། །ཡང་མ་ག་ཏའི་རྐུན་མ་གཅིག་ལ་རྣལ་འབྱོར་པ་གཅིག་གིས་གདམས་ངག་བསྟན་ཏེ། མཆོད་རྟེན་གཅིག་གི་
ནང་ན་སྤྱན་རས་གཟིགས་ཀྱི་སྐུ་བྱིན་རླབས་ཅན་ཞིག་ཡོད་པ་ལ། ཞག་ཉེར་གཅིག་ལ་ཉིན་མཚན་མེད་པར་བསྐོར་བ་བྱས་པས་སྐུའི་ཞབས་ནས་སྦྲུལ་ནག་གཅིག་བྱུང་དེ་དངོས་གྲུབ་ཡིན་པར་ཤེས་ནས་འཇུས་པས་ཡེ་ཤེས་ཀྱི་རལ་གྲི་འོད་འབར་བ་གཅིག་རེད་ནས། སྐད་ཅིག་དེ་ལ་གྲུབ་པ་ཐོབ་སྟེ། མཁའ་སྤྱོད་དུ་གཤེགས་ཏེ་གྲུབ་ཆེན་ཁངྒ་པའོ། །བྲམ་ཟེའི་བུ་གཅིག་གིས་སྤྱན་རས་གཟིགས་ཀྱི་སྐུ་གཅིག་ལ། མ་ཧཱ་དེ་ཝ་ཡིན་བསམས་ནས་ལོ་བཅུ་གཉིས་ལ་མེ་ཏོག་ཕུལ་ཞིང་འགྱོད་པ་བྱས་པ་ལ། ཀླུ་སྒྲུབ་དེར་བྱོན་ནས་མེ་ཏོག་ཕུལ་བས་སྐུ་འདྲ་དེའི་ཕྱག་གིས་བླངས་ནས་དབུ་ཐོག་ཏུ་བཞག་གོ །བྲམ་ཟེས་ངས་ལོ་བཅུ་གཉིས་མཆོད་པ་ལ་མེ་ཏོག་མ་བླངས། འདིས་ལན་གཅིག་མེ་ཏོག་ཕུལ་བ་བླངས་སྙམ་དུ་སེམས་ཁྲོས་པ་དང་། སྐུ་དེས་གསུང་བསྒྲགས་ནས་ཁྱོད་རང་བསམ་པ་མ་དག་པ་ཡིན་ང་མ་ལེན་གསུངས་པས། ཀླུ་སྒྲུབ་ལ་གདམས་པ་ཞུས་ནས་ཐུགས་རྗེ་ཆེན་པོ་བསྒྲུབས་པས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་སྟེ། གྲུབ་ཆེན་པ་པཾ་ག་ཛ་ཞེས་གྲགས་སོ། །ཡུལ་ཙམ་པ་ཀའི་མི་དབུལ་པོ་ཞིག་ལ་སྤྲུལ་པའི་དགེ་སློང་གིས་ཐུགས་རྗེ་ཆེན་
པོའི་དབང་དང་ཡི་གེ་དྲུག་པའི་བསྒོམ་ལུང་གནང་ངོ་། །དེས་ཉམས་སུ་ལེན་ཞིང་ཁུར་བ་མང་པོ་ཉོས་པ་ལ། རིན་མ་འཕྲོད་ནས་མིས་བཟུང་ནས་རྡུང་པ་དང་། ང་གཅིག་པུས་ནི་མ་ཟོས་ཕྱེད་དེ་ཐུགས་རྗེ་ཆེན་པོ་ལ་མཆོད་པ་ཡིན་པས་ང་གཅིག་པུ་མ་རྡུང་སྨྲས་པས། རྩིག་པ་དང་ཀ་བ་ཐམས་ཅད་ནས་གད་མོའི་སྒྲ་ཆེན་པོ་བྱུང་། མི་དེས་སྒྲ་དེ་ལ་ངའི་ཁུར་བ་ཁྱོད་ཀྱིས་ཁྱེར་བ་ཡིན་མོད་སྨྲས་པས། སྤྱན་རས་གཟིགས་ཀྱིས་ཁུར་བའི་རིན་ཏོ་ལོ་བརྒྱ་གནང་བ་མི་དེ་ལ་བྱིན། ཁོང་པོ་ཊ་ལ་ནས་འགྲོ་བ་ལ་བྱོན་པས་ཚེར་མ་ཟུག་ནས་སྨྲེ་སྔགས་བཏོན་པས། ཐུགས་རྗེ་ཆེན་པོས་དངོས་སུ་ཞལ་བསྟན་ནས་ད་སེམས་ཅན་གྱི་དོན་གྱིས་གསུངས་པས། ཤིང་རྟ་ལ་བདུན་ཙམ་གྱིས་ནམ་མཁའ་ལ་འཕགས་ཏེ། གྲུབ་ཆེན་ཙམ་པ་རི་པ་ཞེས་གྲགས་སོ། །ལོ་ལྔ་བརྒྱ་བཞུགས་ནས་འཁོར་བདུན་སྟོང་དང་བཅས་ཏེ་མཁའ་སྤྱོད་དུ་གཤེགས་སོ། །དེ་ལྟར་རྒྱ་གར་དུ་རྒྱུད་མན་ངག་བྱུང་ཞིང་དེ་ལ་བསྟེན་ནས་གྲུབ་པ་ཐོབ་ཚུལ་སོང་ནས། བོད་དུ་དར་ཚུལ་ནི། སྟོན་པ་ཤཱཀྱ་ཐུབ་པ་མྱ་ངན་ལས་འདའ་ཁར། སྤྱན་རས་གཟིགས་ཀྱིས་ད་དུང་བོད་ཁ་བ་ཅན་ཞབས་ཀྱིས་མ་བཅིགས་སྐུའི་འོད་ཀྱིས་
ཀྱང་མ་ཁྱབ་པས། མྱ་ངན་ལས་མི་འདའ་བར་བཞུགས་པར་ཞུས་པས། དེ་ནི་བྱང་ཆུབ་སེམས་དཔའ་ཁྱེད་ཀྱི་འདུལ་ཞིང་ཡིན་པས་ཐུལ་ཞིག་ཅེས་བཀའ་བསྒོས་པ་དང་། བདེ་བ་ཅན་དུ་བྱོན་པས་སངས་རྒྱས་འོད་དཔག་མེད་ཀྱིས། བོད་ཁ་བ་ཅན་དེ་བྱང་ཆུབ་སེམས་དཔའ་ཁྱོད་ཀྱི་འདུལ་ཞིང་ཡིན་པས་དང་པོ་ཟང་ཟིང་གིས་བསྡུས། དེ་ནས་ཆོས་ཀྱིས་སྨིན་པར་གྱིས་ལ་མཐར་ངའི་དྲུང་དུ་ཁྲིད་ལ་ཤོག་ཅིག །ངས་ཀྱང་གདུལ་བྱའི་གྲོགས་བྱའོ་གསུངས། དེར་སྤྱན་རས་གཟིགས་ཀྱིས་ང་དང་འབྲེལ་པ་ཆེར་བཞག་པའི་སེམས་ཅན་རྣམས་མཐར་བདེ་བ་ཅན་དུ་ཁྲིད་ནས་འོང་གིས་ཞེས་ཞུས་ནས་འཇིག་རྟེན་གྱི་ཁམས་འདིར་བྱོན་ནས། ལྷོ་པོ་ཊ་ལ་ནས་ཞལ་བྱང་ཁ་བ་ཅན་དུ་གཟིགས་ནས་བཞུགས་ཏེ། དེ་ནས་བོད་ཀྱི་འོག་ཏུ་གྲང་དམྱལ་ཟ་མ་ཏོག་ཁ་བཅད་པ་ལྟ་བུ་ཡོད་པ་འོད་ཟེར་གྱི་ཚལ་པ་བཞིར་བཀས་ནས་དྲངས་པས། གངས་རྣམས་ཞུ་ནས་མཚོར་གྱུར། མཚོ་ནང་ནས་བོད་ཀྱི་ས་ཆ་རྣམས་བྱུང་། དེར་སྤྱན་རས་གཟིགས་ཀྱིས་སྤྲེའུ་ཧ་ལུ་མ་དྷ་དང་། སྒྲོལ་མས་བྲག་སྲིན་མོར་སྤྲུལ་ནས་བསྡེབས་པས་དེའི་རིགས་རྒྱུད་མིར་གྱུར་ཞིང་འཕེལ་ཆེ་བས་
བོད་མིས་གང་ཡང་། མཐའ་འཁོབ་ཏུ་འདྲེ་ལྟར་མི་ཆོས་མི་ཤེས་སོ། །དེ་ནས་སྤྱན་རས་གཟིགས་ལ་བྱང་ཆུབ་སེམས་དཔའ་ནམ་མཁའི་སྙིང་པོས་བོད་དུ་འབྱོན་དགོས་པར་ཞུས་ཕས་རྒྱ་གར་ཤཱཀྱ་ལི་ཙ་བྱིའི་གདུང་རྒྱུད་རྒྱལ་པོ་གཉའ་ཁྲི་བཙན་པོར་སྤྲུལ་ནས་བོད་ལ་རྒྱལ་ཁྲིམས་དང་མིའི་ཆོས་རྣམས་བསྟན་པས། དེ་བྱུང་ཆུབ་སེམས་དཔའ་ནམ་མཁའི་སྙིང་པོའི་སྤྲུལ་པ་ཡིན་པར་གྲགས་སོ། །དེའི་རྒྱལ་རབས་ཉི་ཤུ་རྩ་ལྷག་གི་རིང་ལ་བོན་དར་རོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཐུགས་རྗེ་ཆེན་པོ་བོད་དུ་བྱོན་པར་ཞུས་པས་། རྒྱལ་པོ་ཐོ་ཐོ་རི་སྙན་ཤར་དུ་སྤྲུལ་ཏེ་རྒྱལ་པོའི་ཕོ་བྲང་གི་རྩེར་བཞུགས་པས་འཇའ་འོད་མེ་ཏོག་གི་ཆར་རོལ་མོའི་སྒྲ་དང་བཅས། ཐུགས་རྗེ་ཆེན་པོའི་མདོ་ཟ་མ་ཏོག་དང་། །ཤེལ་གྱི་མཆོད་རྟེན་ནམ་མཁའ་ནས་བབས་ཤིང་། མི་རབས་ལྔ་ནས་འདིའི་དོན་ཤེས་པ་བྱུང་ཟེར་བའི་ལུང་བསྟན་བྱུང་བས། དེ་ལ་གཉེན་པོ་གསང་བའི་མིང་བཏགས་ནས་མཆོད་པ་བྱས་པས། རྒྱལ་པོ་རྒས་པ་གཞོན་ནུར་གྱུར་ཏེ་ལོ་བརྒྱ་དང་ཉི་ཤུ་ཐོབ་བོ། །དེ་ལ་ཀུན་ཏུ་བཟང་པོའི་སྤྲུལ་པར་གྲགས་སོ། །དེ་ནས་མི་རབས་ལྔ་ནས་རྒྱལ་པོའི་སྲས་ཀྱི་དབུ་
སྟེང་ན་འོད་དཔག་མེད་ཀྱི་དབུ་ཡོད་པ་ཞིག་འཁྲུངས་པས། དབུ་སྟེང་མ་རྭ་བས་དཀྲིས་པས་ལ་ཐོད་བྱུང་ངོ་། །དེ་ལ་སྲོང་བཙན་སྒམ་པོ་བཏགས་ཏེ་སངས་རྒྱས་ཐམས་ཅད་ཀྱིས་དབང་བསྐུར། ཐུགས་རྗེ་ཆེན་པོས་ཀྱང་ཐུགས་རྒྱུད་ལ་སོགས་པ་ཡི་གེ་དྲུག་མའི་གདམས་པ་གནང་། ལྷ་ས་བཞེངས་པ་སོགས་གཙུག་ལག་ཁང་བརྒྱ་རྩ་བརྒྱད་བཞེངས་། ཐུགས་དམ་བཅུ་གཅིག་ཞལ་རང་བྱོན་དུ་བྱུང་། ཐོན་མི་སམ་བྷོ་ཊས་ཡི་གེ་བསླབས་ཤིང་ལོ་ཙཱ་བྱས་ནས། ཨོ་རྒྱན་གྱི་སློབ་མ་བལ་པོ་ཤྲཱི་ལ་མཉྫལས་ཐུགས་རྗེ་ཆེན་པོའི་ཆོས་སྐོར་རྒྱལ་པོས་གསན། མདོ་རྒྱུད་ཉི་ཤུ་རྩ་གཅིག་སོགས་ཐུགས་རྗེ་ཆེན་པོའི་ཆོས་མང་དུ་བསྒྱུར། རྒྱལ་པོ་ཉིད་ཀྱིས་ཀྱང་ཐུགས་རྗེ་ཆེན་པོའི་གདམས་པ་མང་དུ་གསུངས་པས་བློན་འབངས་ཐམས་ཅད་བྱང་ཆུབ་ཀྱི་ལམ་ལ་བཀོད་དོ། །དེ་ཚེ་ཨོ་རྒྱན་རིན་པོ་ཆེ་རྫུ་འཕྲུལ་གྱིས་བོད་དུ་བྱོན་ནས་སྲོང་བཙན་གྱིས་མཛད་པའི་ཐུགས་རྗེ་ཆེན་པོའི་སྐོར་རྣམས་གསན་པར་མཛད་དོ། །རྒྱལ་པོ་ཡབ་ཡུམ་གསུམ་སྐུ་གདུང་མ་བཞག་པར་བཅུ་གཅིག་ཞལ་ལ་ཐིམ་མོ། །དེ་ནས་རྒྱལ་རབས་བཞིའི་དུས་ལ། འཇམ་དབྱངས་ཀྱི་ཐུགས་རྗེ་ཆེན་པོ་
བོད་དུ་འབྱོན་པར་ཞུས་པས་རྒྱལ་པོ་ཁྲི་སྲོང་ལྡེའུ་བཙན་དུ་སྤྲུལ། ཨོ་རྒྱན་ཆེན་པོ་ལ་སོགས་པའི་པཎྜི་ཏ་མཁས་པ་བརྒྱ་རྩ་བརྒྱད་གདན་དྲངས། བོད་ཀྱི་ལྷ་འདྲེ་དམ་ལ་བཏགས་ནས་སྲུང་མར་བསྐོས་སོ། །བསམ་ཡས་སོགས་གཙུག་ལག་ཁང་ཆེན་བརྒྱ་དང་རྩ་བརྒྱད། ཕྲན་བུ་སྟོང་དང་རྩ་གཉིས་བཞེངས། ལང་གྲོ་ལོ་ཙཱ་དཀོན་མཆོག་འབྱུང་གནས་ལ་སོགས་པ་ལོ་ཙཱ་བ་བརྒྱ་རྩ་བརྒྱད་ཀྱིས་མདོ་སྔགས་ཀྱི་ཆོས་རྒྱ་མཚོ་ལྟ་བུ་བོད་དུ་བསྒྱུར་རོ། །དེའི་ཚེ་ལང་གྲོ་ལོ་ཙཱ་ཆོས་མཁས་ཤིང་མགུ་དཀའ་བས། ཚིག་ལེགས་ཤིང་དོན་ཟབ་པ་མང་ཉུང་རན་པ་རྣམས་གནང་ཞིང་། བསམ་ཡས་ཨཱརྱ་པ་ལོའི་གླིང་དུ་འབྲུག་ལོ་ནས་དབུ་བཙུགས་ཏེ། ཐུགས་རྗེ་ཆེན་པོ་གསང་བ་འདུས་པའི་རྒྱུད་འདི་ནི་མཁའ་འགྲོ་བརྡའི་རྒྱ་དཔེ་ལ་ཨོ་རྒྱན་ཆེན་པོ་ཉིད་ཀྱིས་སྒྲ་རང་འགྱུར་དུ་མཛད། གཞན་ཕལ་ཆེར་ནི་ལང་གྲོ་ལོ་ཙཱ་ཉིད་དང་། རྒྱལ་བ་མཆོག་དབྱངས་དང་ནམ་མཁའི་སྙིང་པོ་སྐ་ཅོག་རྣམ་གཉིས་སོགས་ཀྱིས་བསྒྱུར་ཞིང་གཏན་ལ་ཕབ། ཕྱིས་དགེ་བསྙེན་མཁའ་རིས་གདན་དྲངས་དུས་ཤོག་སེར་ལ་བཀོད་དོ། །སྤྲེལ་ཟླའི་ཚེས་བཅུ་ལ་བསམ་ཡས་དབུ་རྩེའི་བར་ཁང་དུ་ཨོ་རྒྱན་ཆེན་པོ་
ལོ་པཎ་རྣམས་དང་བཅས་པ་བཞུགས་པའི་ཚེ། ཨོ་རྒྱན་ཆེན་པོའི་མཛོད་སྤུ་ནས་འོད་ཟེར་ཕྱོགས་བཅུར་འཕྲོས་པས། སངས་རྒྱས་བྱང་སེམས་ཞི་ཁྲོའི་ལྷ་ཚོགས་ཐམས་ཅད་ཀྱིས་ནམ་མཁའ་གང་། དབུ་ཐོག་ན་ཐུགས་རྗེ་ཆེན་པོ་གསང་བ་འདུས་པ་གཙོ་འཁོར་གསུམ། གསང་བ་ཡེ་ཤེས་སྒྲོལ་མ་ཐུབ་པ་དྲུག་དང་བཅས་པ། ཐུགས་རྗེ་ཆེན་པོའི་དབུ་སྟེང་འདོམ་གང་ཙམ་ན་སངས་རྒྱས་སྣང་བ་མཐའ་ཡས་སེམས་དཔའ་ཡབ་ཡུམ་གྱིས་བསྐོར་བ། རྟ་མགྲིན་ཡབ་ཡུམ་མཁའ་འགྲོ་སྡེ་བཞི་དང་བཅས་པ་དེར་ཚོགས་པ་ཐམས་ཅད་ཀྱིས་དངོས་སུ་དར་ཅིག་མཐོང་ངོ་། །དེར་ལང་གྲོ་ལོ་ཙཱས་བསྟན་གཙོའི་གསེར་སྐུ་སོགས་རྟེན་དང་མཆོད་ཆ་གསེར་གཡུའི་མཎྜལ་ཕུལ་ནས། བདག་གིས་འགྲོ་བ་སེམས་ཅན་གྱི་དོན་དུ་སྨོན་ལམ་དབང་གིས་སྐྱེ་བ་མཐོ་དམན་བཟང་ངན་གང་འདུལ་དུ་སྐྱེ་ཞིང་འགྲོ་དོན་དཔག་ཏུ་མེད་པ་འགྲུབ་པར་གྱུར་ཅིག །བདག་གི་ཤ་རུས་ཁྲག་ལ་སོགས་པ་སྲན་མ་ཡུངས་འབྲུ་ཙམ་ལྟོར་སོང་བ་དང་། མདོར་ན་བདག་ལ་རེ་ཞིང་ལྟོས་པ་དང་། འབྲེལ་གྱུར་ཐམས་ཅད་ཇི་སྲིད་བདག་སངས་མ་རྒྱས་ཀྱི་བར་དུ་འཁོར་གྱི་ལས་ཅན་དུ་གྱུར་ཞིང་། མཐར་
དག་པའི་ཞིང་དུ་བདེ་བ་ཅན་དུ་ལྷན་ཅིག་ཏུ་གྱུར་ཏེ། སྐུ་གསུང་ཐུགས་ཀྱི་སྤྲུལ་པས་འཁོར་བ་མ་སྟོངས་ཀྱི་བར་དུ་སྤྱོད་པར་གྱུར་ཅིག །ཅེས་སོགས་སྨོན་ལམ་བཏབ་པས་ཐམས་ཅད་ཀྱིས་མཐུན་འགྱུར་མཛད། ལྷ་ཚོགས་རྣམས་གུ་རུ་ལ་ཐིམ། ལང་གྲོས་ཕྱག་སྟོང་ཕྲག་གཅིག་འཚལ་ལོ། །ཐུགས་རྗེ་ཆེན་པོ་གསང་བ་འདུས་པ་འདིའི་སྒྲུབ་ཆེན་ཨཱརྱ་པ་ལོའི་གླིང་དང་མཁར་ཆུ་སོགས་སུ་དཀྱིལ་འཁོར་ཞལ་ཕྱེས་ཤིང་། བཀའ་སྲུང་རྣམས་ལ་བཀའ་བསྒོས་མཛད་པས། སོ་སོས་ཁས་བླངས་དམ་བཅས་སོ། །དེ་ནས་བསེ་སྒྲོམ་དམར་པོའི་ནང་དུ་བཅུག་ནས། དགེ་བསྙེན་ཤེའུ་མཁའ་རི་དང་། །ཀླུ་བདུད་ནག་པོ་མགོ་དགུ་དང་། །མ་མོ་སྔགས་ཀྱི་སྲུང་མ་དང་། །དམ་ཅན་རྡོ་རྗེ་ལེགས་པ་ལ། །བཀའ་འདི་གཏད་དོ་ས་མ་ཡ། །ཐུགས་གཏེར་གསང་གཏེར་ཡང་གཏེར་ལ་སོགས་པ། །ཡོངས་གྲགས་གཏེར་ཁ་བྱེ་བ་སར་སྦས་ཀྱང་། །ཐུགས་གཏེར་ཡང་གཏེར་སྙིང་པོའི་གསང་གཏེར་གསུམ། །གཏེར་བདག་བཟང་ཕྱིར་གནམ་སྐས་བྲག་ལ་སྦས། །ལྷག་ཆད་མེད་དོ་ཐུགས་རྗེའི་ལས་ཚོགས་ཚང་། །ལྷག་ཆད་མེད་དོ་ཡང་གསང་ཆོས་སྐོར་ཚང་། །མཐར་ཐུག་
ཡིན་ནོ་སྙིང་ལ་ཏིག་གོ་རྒྱུ། །མ་འོངས་རྩོད་ལྡན་དུས་ཀྱི་ཐ་མ་ལ། །པདྨའི་རིགས་ཅན་ལྕགས་ཁམས་ལུག་གི་ལོ། །བུ་དང་འཕྲད་ནས་བསྟན་པ་མཐའ་རྒྱས་ཤོག། ཅེས་གསུངས་ནས་སྦས་སོ། །དེ་ནས་ཨོ་རྒྱན་རིན་པོ་ཆེ་སྲིན་ཡུལ་དུ་བྱོན་རྗེས། མངའ་བདག་ཁྲི་རལ་གྱིས་ལོ་པཎ་མང་པོ་གདན་དྲངས་ཆོས་རྣམས་སྐད་གསར་བཅད་ཀྱིས་སམ་སྐྲྀ་ཏའི་སྐད་ལས་བསྒྱུར་བ་སོགས་དར་རྒྱས་མཛད་ཀྱང་། ནུ་བོ་གླང་དར་གྱིས་ཆོས་བསྣུབས་ནས་གཏེར་དུ་སོང་བ་མ་གཏོགས་ཕལ་ཆེར་མེད་པར་བྱས་པས། ལོ་དྲུག་ཅུར་དབུས་གཙང་དུ་བསྟན་པ་ནུབ་བོ། །དེ་ནས་གཏེར་སྟོན་སངས་རྒྱས་བླ་མ་སོགས་རིམ་པར་བྱོན་ཏེ་རྙིང་མ་རྣམས་དར། རཏྣ་གླིང་པ་ཡན་ཆད་དུ་ཡང་གཏེར་སྟོན་བཞི་བཅུ་ལྷག་ཙམ་བྱོན་ནོ། །དེ་དག་གི་གཏེར་ཁ་རེ་རེ་ནས་ཐུགས་རྗེ་ཆེན་པོའི་ཆོས་སྐོར་རེ་རེ་བྱོན་པས་འགྲོ་དོན་དུས་སྐབས་སོ་སོར་བྱུང་། གསར་མའི་ལོ་ཆེན་རིན་བཟང་གིས་ཐུགས་རྗེ་ཆེན་པོ་པདྨ་རྒྱལ་པོ་དང་པདྨ་ཟབ་པའི་རྒྱུད་བསྒྱུར་བ་དང་། ཇོ་བོ་རྗེ་བོད་དུ་བྱོན་ནས་གསང་འདུས་འཇིག་རྟེན་དབང་ཕྱུག་སོགས་ཡི་གེ་དྲུག་པའི་སྒྲུབ་ཐབས་བསྒྱུར་བ་ལས་ཞལ་གཟིགས་
པ་མང་དུ་བྱོན། གྲུབ་ཐོབ་ཅེར་སྒོམ་པ་དང་སྐྱེར་སྒང་པ་སོགས་ཀྱིས་ཡི་གེ་དྲུག་པ་ཁོ་ན་ཐུགས་དམ་མཛད་ཅིང་ཞལ་གཟིགས། གཏེར་སྟོན་གྲུབ་ཐོབ་དངོས་གྲུབ་དང་། ཉང་དང་ཆོས་དབང་གསུམ་གྱིས་ནི་ཐུགས་རྗེ་ཆེན་པོ་ཁོ་ན་ལ་ཐུགས་དམ་མཛད་པས་འགྲོ་དོན་གཏེར་སྟོན་གཞན་བས་ལྷག་པ་བྱུང་ངོ་། །དེ་ནས་གཏེར་འདི་ཇི་ལྟར་བཏོན་ཚུལ་ནི། པདྨ་བཀའ་ཐང་རྒྱས་བསྡུས་རྣམས་ནས། གཏེར་སྟོན་བརྟགས་པའི་སྐབས་ནས། གཏེར་ཁ་མང་མཐུན་ལུང་གིས་ཟིན་ལ་བྱེད། །ཅེས་གསུངས་པ་ལྟར་སྔོན་གྱི་གཏེར་ཁ་བརྒྱད་ནས་རཏྣ་གླིང་པ་ལུང་བསྟན་པ་ཡིན་ཏེ། མངའ་བདག་ཉང་གི་གཏེར་ཁ་ལུང་བསྟན་གཏེར་རྒྱ་ཞེས་བྱ་བ་ནས། ལོ་ནི་ལྔ་བཅུ་ཁ་རལ་དུས། །ཉི་མ་ཤར་ལྷོའི་ཕྱོགས་དག་ཏུ། །ཆོས་ཀྱི་རྒྱལ་པོ་རཏྣ་གླིང་། །ཕྲིན་ལས་བཞི་ལ་མངའ་བརྙེས་པས། །མཚོ་རྒྱལ་ཁྱེད་ཀྱི་སྤྲུལ་པའམ། །བྱིན་གྱིས་བརླབས་པའི་སྐྱེས་བུ་འབྱུང་། །ཞེས་དང་། གུ་རུ་ཆོས་དབང་གི་གཏེར་ཁ་སྐུ་གསུམ་སྒྲུབ་པའི་ལུང་བྱང་ནས། འདི་ནས་བྱང་ཕྱོགས་ཤིང་སྒོའི་མཚམས། །རི་བོ་ཁྱུང་ཆེན་ལྟ་བུའི་སར། །ལུག་ལོར་པདྨ་དབང་ཆེན་རྩལ། །བསྐྱེད་རྫོགས་དོན་
ལ་མཁས་པ་འབྱུང་། །ཞེས་དང་། རིན་ཆེན་གླིང་པའི་གཏེར་ཁ་སྤྱི་འདུས་འཁོར་ལོའི་ལུང་བྱང་ལས། རིགས་ལྡན་གསུང་གི་སྤྲུལ་པ་ནི། །གངས་རིས་བསྐོར་བའི་ས་ཕྱོགས་སུ། །སྐྱེས་བུ་བློ་གྲོས་སྟོབས་ལྡན་པ། །རཏྣ་གླིང་ཞེས་གྲགས་པ་འབྱུང་། །ཞེས་དང་། གཏེར་སྟོན་ཤེས་རབ་མེ་འབར་གྱི་གཏེར་ཁའི་དྲི་མེད་ཟླ་ཤེལ་སྤྱི་ལུང་ལས། གཏེར་གྱི་བསྟན་སྐྱོང་འགྲོ་འདུལ་གླིང་། །མོན་བོད་གཉིས་ཀྱི་མཚམས་སུ་འབྱུང་། །ཞེས་དང་། གུ་རུ་ཇོ་རྩེའི་གཏེར་ལུང་ལས། །མོན་བུ་སྤྱི་བཅིངས་སྐུ་ཡི་ལཱ་བ་ཅན། །རི་བོ་ཁྱུང་ཆེན་ལྡིང་བའི་ཞོལ་དུ་འབྱུང་། །དེ་དུས་མོན་བུས་ཡི་དམ་འདི་ལ་གྱིས། །ཞེས་དང་། གུ་རུ་ཚེ་བརྟན་གྱི་གཏེར་ཁའི་ལུང་ནས། ཨོ་རྒྱན་བསྟན་འཛིན་འགྲོ་འདུལ་གླིང་། །གནས་ལུགས་དོན་གྱི་དགོངས་གཏེར་རྡོལ། །ཆོས་ཀྱི་བསྟན་འཛིན་རཏྣ་འབྱུང་། །ཞེས་དང་། ཚེ་བརྟན་གཏེར་ཁའི་གནད་ཡིག་ལས། །རྣལ་འབྱོར་སྐུ་ཡི་ལྭ་བ་ཅན། །བོད་ཡུལ་མཐའ་དབུས་ཀུན་ཁྱབ་པར། །ལོ་ནི་ལྔ་བཅུ་ཁ་རལ་དུས། །ང་ཡི་བསྟན་པ་རྒྱས་བྱེད་འབྱུང་། །ཞེས་དང་། ཨོ་རྒྱན་གླིང་པའི་བཀའ་ཐང་
ལས། ཁྱུང་ཆེན་བྲག་ལ་སྦས་པའི་གཏེར་ཁ་འདི། །མི་བཞག་འདོན་པའི་རྟགས་དེ་བསྟན་ནས་འབྱུང་། །གཏེར་སྟོན་ཞིག་པོ་གླིང་པ་ཞེས་བྱ་འབྱུང་། །ཞེས་སོགས་ལུང་བསྟན་མང་དུ་གསལ་བ་དང་མཐུན་པར། སྤྲུལ་པའི་རྣལ་འབྱོར་པ་ཞིག་གིས་ཁ་བྱང་ཤོག་སེར་གཏད་ནས།——དང་པོ་ཁྱུང་ཆེན་བྲག་ནས་གཏེར་བཏོན་པས་གཏེར་སྲུང་གི་ཆོ་འཕྲུལ་རྡོ་ལག་མགོ་ཙམ་ལུག་མགོ་ཙམ་གྱི་ཆར་ཕབ། སེར་བ་ཅོ་གའི་སྒོ་ང་ཙམ་བྱུང་བས་ང་ཨོ་རྒྱན་གྱིས་ལུང་བསྟན་པའི་གཏེར་སྟོན་ཡིན་ན་ཆོ་འཕྲུལ་མ་སྟོན། མིན་ན་ཅི་འདོད་གྱིས་གསུངས་ནས་ན་བཟའ་བརྡབས་པས་ཆོ་འཕྲུལ་ཞི་སྟེ་གཏེར་ཐོན། དེ་ནས་རིམ་པ་ལྟར་གཏེར་ཁ་ཉི་ཤུ་རྩ་ལྔ་བཏོན་པས་ཨོ་རྒྱན་དང་ལན་ཉི་ཤུ་རྩ་ལྔ་མཇལ། ཁྱད་པར་དུ་ཐུགས་རྗེ་ཆེན་པོ་གསང་འདུས་ཇི་ལྟར་བཏོན་ཚུལ་ནི། ཁ་བྱང་ནི་ཐུགས་སྒྲུབ་གཉལ་སྨད་དགེ་རིས་ལང་གྲོས་ཞུས་ལེན་གྱི་ཤོག་སེར་གཤམ་ན། བདག་འདྲ་པདྨ་འབྱུང་གནས་ཀྱིས། །ངོ་མཚར་ཁ་བྱང་བསྟན་པར་བྱ། །ལ་ཡག་མོན་མཁར་སྟེང་ཞེས་བྱ། །ཕ་ཝང་གཡུ་སྒྲོམ་ཐད་ཀྱི་བྱང་། །རྟགས་ལ་གནམ་སྐས་ཅན་གྱི་བྲག །དེའི་ཐད་ལྷོ་ཕྱོགས་རྫ་སྣ་ལ། །ཕ་ཝང་
རྒོད་པོ་གསུམ་ཚོགས་འདྲ། །དེ་ནས་སྲིན་ཚད་བྱང་དུ་འཇལ། །བརྒྱད་ཚད་ཚང་ནས་ཕ་ཝང་སྤྲེའུ། །དཀར་པོ་འདྲ་བའི་བྱང་ཐད་ན། །གནམ་སྐས་བྲག་གི་ཤར་ཕྱོགས་ལ། །རྟ་ལྕགས་འདྲ་བའི་བྲག་དཀྱིལ་ན། །བྲག་སྲུབ་གཞུ་འདྲའི་ཆང་ཟུང་ན། །སྲིན་ཚད་ཁྲུ་བདུན་བྱང་དུ་འཇལ། །བྲག་ལུང་བྲག་ངན་གྲུམ་པ་འདྲ། །ཁྲུ་གསུམ་གསང་ཚད་རིམ་པས་འབྱུང་། །མཐོ་དམན་གསང་ཚད་ལྷོ་ངོས་ཀྱི། །བྲག་སྣར་མཚལ་གྱི་གཡུང་དྲུང་དམར། །ཉི་ཟླ་རིས་ཡོད་དེ་དང་མཉམ། །རིན་ཆེན་བསེ་སྒྲོམ་དམར་པོའི་ནང་། །ཐུགས་རྗེ་ཆེན་པོ་གསང་བ་འདུས། །བོད་ཡུལ་གཏེར་གྱི་སྙིང་ཁྲག་ཡིན། །རྒྱུད་དང་མན་ངག་ལ་སོགས་བཅས། །ཡིད་བཞིན་ནོར་བུའི་བང་མཛོད་འདྲ་། །བྲམ་ཟེ་དྲི་མེད་ཤ་རིལ་དང་། །དགའ་རབ་ཤྲཱི་སེང་ཨོ་རྒྱན་གྱི། །ཆོས་སྨན་གསུམ་ཡོད་ངོ་མཚར་མཆོག །རིལ་བུ་སེར་པོ་དགའ་རབ་སྟེ། །སྨུག་པོ་ཤྲཱི་སེང་ཧ་ཡིན། །ཕྱེ་མ་རྗེ་འབངས་ཉེར་ལྔ་ཡིས། །བསམ་ཡས་བསྒྲུབས་པའི་སྨན་ཕུད་ཡིན། །བེ་རོ་ཙ་ནའི་དབང་ཕུར་དང་། །ནམ་མཁའི་སྙིང་པོའི་དབུ་སྐ་དང་། །གཞན་ཡང་ངོ་
མཚར་རྫས་མཆོག་བཅས། །སྙིང་པོའི་བྱང་གཏེར་འདི་ཉིད་དེ། །རྩི་དུག་སྲུང་བའི་རིལ་བུ་བསྲེགས། །ལུས་ལ་གཞུང་བཞིན་རྒྱན་འཁོར་བཏགས། །བུ་མོ་སྤྲེལ་ལོའི་མཐུན་གྲོགས་གཅེས། །གཏེར་ཚབ་བུམ་པ་རྫས་ལྡན་སྦ། །གསང་ལུག་གཡག་དང་བཤོས་བུ་དང་། །རྩི་སྨན་ཆབ་གཏོར་སྨན་ཕུད་ཀྱིས། །མཁའ་རི་ཀླུ་བདུད་གཏེར་སྲུང་མཆོད་། །པདྨ་བདག་ལ་གསོལ་བ་ཐོབ། །དཔའ་བའི་གདེང་སྐྱེད་བསྐྱེད་རིམ་བསྒོམ། །རྫས་སྲུང་འཁྲུལ་དམིགས་བཞིན་དུ་བྱ། །བདེན་པ་བདར་ལ་ཐ་ཚིག་བརྗོད། །སྐྱེས་བུའི་དོན་འགྲུབ་ཨེ་མ་ཧོ། །ཞེས་པ་བྱུང་བ་ལ། ཆོས་དབང་གི་གདུང་རྒྱུད་སོགས་བླ་མ་གསུམ་གྱིས། ཁྱོད་ཀྱི་གཏེར་རྣམས་ངོ་མཚར་ཆེ། ཨོ་རྒྱན་དངོས་ཀྱི་འདུན་པ་ཡོད་ཀྱང་། ཁྲོམ་གཏེར་ཞིག་མཛད་ན་སྙིགས་མའི་མི་རྣམས་ཐེ་ཚོམ་ཆོད་པ་ཡིན་ཞེས་ཟེར་མཁན་མང་ངོ་། །ངེད་རྣམས་ཀྱང་སྤྲོ་བས་འདི་ཕྱོགས་སུ་གཏེར་འདོན་རྒྱུ་གདའ་ན་ཅིས་ཀྱང་ཁྲོམ་གཏེར་མཛད་པར་ཞུ་ཟེར་བ་དང་། བླ་མ་རས་པ་བས་ཀྱང་དེ་ལྟར་ཟེར་ནན་གྱིས་བསྐུལ་བ་ལ་བརྟེན་ནས། ཁོ་བོ་ལ་མྱུར་པོ་ཅིག་ཐུགས་རྗེ་ཆེན་པོའི་སྒྲུབ་སྐོར་བོད་གངས་ཅན་
ལ་ཟབ་པ་གཅིག་ཁོ་བོའི་ལག་ཏུ་འོང་བར་ཡོད་དོ། །ཁྱེད་ཞུ་བ་པོ་རྣམས་ཡིད་ཚིམ་པ་ཞིག་བྱའི་གསུངས། དེ་ནས་གཏེར་འདོན་པར་ཉེ་བ་ན། བླ་མ་སྐུ་ཆེ་བ་སྐྱ་སེར་ཐམས་ཅད་ལ་གཏེར་སྲུང་ཀླུ་བདུད་ཀྱི་རྟགས་དང་ཆོ་འཕྲུལ་ཤིན་ཏུ་ཆེ་བར་བྱུང་འདུག །དེ་ནས་སྟག་ཟླའི་ཚེས་གཅིག་ཉིན་བུ་ཆེན་གྲྭ་སློབ་དང་ཁྲོམ་ཚོགས་ཆེན་པོ་འཚོགས་ནས་གཏེར་བཏོན་པའི་ཚེ། གཏེར་སྲུང་མཁའ་རིའི་གངས་རིའི་རྩེ་ནས། གནམ་སྐས་ཅན་གཏེར་འདོན་ས་དེར་འཇའ་དཀར་པོ་དར་ཡུག་བརྒྱངས་པ་ལྟ་བུ་ལྔ་ཟུག །གཞན་ཡང་ཕྱོགས་ཐམས་ཅད་དུ་འཇའི་གུར་ཕུབ། དགེ་བསྙེན་མཁའ་རི་དཔོན་གཡོག་དངོས་སུ་བྱུང་ནས། རྟའི་ལྕག་ཙན་བྲག་ལ་བཙུགས་ནས། གཏེར་འདི་ན་ཡོད། སྤྱིར་བྲག་འདི་ལ་ཐུགས་གཏེར་བདུན་ཡོད་པ་ལས། འདིར་སྔོན་ཆད་གསུམ་སོང་། ད་དུས་ལ་བབ་ཅིས་ཀྱང་ཐོན་ཞིག་ཅེས་དངོས་སུ་ལུང་བསྟན། དེ་ནས་གཏེར་སྲུང་མཆོད་ཅིང་བརྐོས་པས། བྲག་རྡོ་ཁྲིག་ཅོ་ལེ་བ་ཅིག་བཀོག་པའི་རྗེས་ལ། བྲག་ཁྲིག་ས་སྤྱིན་གྱིས་སྦྱར་བའི་ཁྲིག་ཞིབ་མོ་ཞིག་བྱུང་། དེ་བཀོག་པའི་རྗེས་ལ་བྲག་སྲུབ་ཁྲ་ཤིག་གེ་བ་ཟད་དུས། བྲག་ཕུག་གྲུ་
བཞི་པ་ཞིག་གི་ནང་ན་ལྕགས་ཕུར་དཀར་རྩེ་རེ་འདུག ། དེ་བླངས་པས་རྫི་དུག་གིས་མགོ་འཁོར་སྐྱུགས་ལོག་བརྒྱལ་ལ་ཁད་བྱུང་བས། ཕར་སོང་ནས་ཅུང་ཟད་ངལ་བསོས། །འདོན་རོགས་འགའ་ལ་ཡང་རྫི་དུག་ཕོག་པའི་ནད་འགའ་བྱུང་། དེ་ནས་ཤོག་སེར་བསེ་སྒོམ་ཆོས་སྨན་གྱི་གའུ་རྣམས་བཏོན་གསོལ་བ་བཏབ་ཅིང་ཆོས་སྨན་གའུ་ནས། དེར་འཚོགས་པ་རྣམས་ལ་དངོས་གྲུབ་གནང་། ཚོགས་འཁོར་ཕུལ། གཏེར་སྲུང་ཀླུ་བདུད་རྩུབ་པས་ཉེ་གནས་ཀྱི་ལག་པ་ལ་ལྷོག་པ་བརྒྱབ། དེ་སྐོར་གྱི་བླ་མ་གདན་ས་པ་ཆེ་ཆུང་སོགས་ཐམས་ཅད་ལ་མི་ནག་དང་མོན་དང་ཨ་ཙ་ར་དང་གཡག་མགོ་ཅན་དང་། རྟ་མགོ་ཅན་གྱིས་ཁྱིམ་གང་བ་སོགས་གཏེར་བདག་གི་ཆོ་འཕྲུལ་ཆེ་དྲགས་ནས་མི་ཟུག་པ་ཙམ་བྱུང་བ་ལ་ཡང་། ཁྱུང་གི་རྗེས་གཅོད་སོགས་རྟེན་འབྲེལ་འགའ་རེ་མཛད་པས་ཆད་དོ། །དེ་ལྟར་ཁྲོམ་གཏེར་མཛད་པས་ཐམས་ཅད་ཡིད་ཆེས་པར་གྱུར་ཏོ། །གཞན་ཡང་དགེ་རིའི་ཤོག་སེར་ལས། ཨེ་མ་ངོ་མཚར་ཡ་མཚན་རྫ་ས། །སྤྱན་རིས་གཟིགས་དབང་འགྲོ་བའི་དོན། །སྤྲུལ་སྐུ་བྲམ་ཟེ་དྲི་མེད་དེ། །བལ་ཡུལ་ཡམ་བུའི་བྲག་ཁྲོད་དུ། །འདའ་བའི་ཚུལ་
བསྟན་དེ་ཡི་ཤ། །ཨོ་རྒྱན་བདག་དང་བི་མ་ལ། །རྒྱ་ནག་མཁས་པ་ཧྭ་ཤང་གིས། །རྒྱ་གར་རྒྱ་ནག་བལ་ཡུལ་དང་། །བོད་ཡུལ་འགྲོ་བའི་དོན་དུ་བགོས། །དབུ་དང་ཐུགས་དང་ནང་གཞུག་དང་། །སྒལ་ཚིགས་ཕྱག་གཡས་བོད་དུ་དྲངས། །དབུ་ཀླད་ཐུགས་དང་གློ་མཆིན་རྣམས། །གཏེར་ཁ་ཉི་ཤུ་རྩ་ལྔར་སྦས། །ཐུགས་ནི་གཏེར་ཁ་ལྔ་རུ་གཏམ། །དེ་ལ་དབུ་ཀླད་ཐུགས་མཆིན་བཅས། །ངོ་མཚར་རྫས་སྦྱར་པདྨས་བསྒྲུབས། །རིལ་བུ་དང་ནི་ཆོས་སྨན་བཅས། །རིན་པོ་ཆེ་ཡི་གའུར་བྲུབ། །བསམ་ཡས་དབུ་རྩེ་བྱང་ཆུབ་ཆེ། །སྐུ་རྒྱབ་དྲང་པོའི་གཡོན་ངོས་ཁྲི། །ས་ནས་ཁྲུ་གསུམ་རྒྱ་ཐིག་ནས། །གཡོན་ནས་ཁྲུ་གསུམ་གསང་བའི་ཚད། །སྤང་ཁྲི་ལྕགས་གཟེར་རུས་སྦལ་མགོ ། གཡོན་དུ་ཞགས་པ་སོ་ཕག་སྒོ། །མཐོ་གང་འོག་བྲུས་སྤྱང་ཁྲིའི་ནང་། །བདོག་པས་དོན་འགྲུབ་ས་མ་ཡ། །ཞེས་གསུངས་པ་ལྟར་བདེ་བླག་ཏུ་ཐོན་ནོ། །ཡང་ཁྱུང་ཆེན་བྲག་གི་ཐེམ་ཡིག་བརྒྱབས་ནས། ཨེ་མ་ཧོ། བསམ་ཡས་དབུ་རྩེ་འོག་ཁང་གི །བྱང་ཆུབ་ཆེན་པོའི་ཞབས་སེན་གཡོན། །ཟུར་ནས་སྲིན་ཚད་འདོམ་གང་རྒྱབ། །འཇལ་བས་སོ་ཕག་
ཤིང་ཁྲིའི་མཚམས། །འབུར་མོ་གསུམ་གྱི་དབུས་མ་ཕྱུང་། །རྒྱལ་བ་རྒྱ་མཚོས་སྣ་དྲངས་པའི། །སྐྱེས་རབས་ལུང་བྱང་ཐུགས་ཁྲིད་དང་། །སྒྲ་འགྱུར་ཞལ་ཐེམས་ལ་སོགས་ཡོད་། །རྒྱལ་པོ་ཕུད་གཏོར་བཤོས་བུས་མཆོད། །ཅེས་གསུངས་པ་ལྟར་གསང་ཐབས་སུ་བཏོན་པས་དཀོར་གཉེར་གྱིས་འཕྲིགས་ནས། གཏེར་སྟོན་ལ་གྲི་ལན་གསུམ་བརྒྱབ་ཀྱང་མ་ཟུག །གཏེར་ཐོན་ནས་བྲོས་པས་ཐར་ཙམ་བྱུང་ངོ་། །དེ་ལྟར་གསང་འདུས་འདིའི་ཆོས་དང་དམ་རྫས་གཏེར་ཁ་གསུམ་ནས་བཏོན་ནོ། །དེ་ནས་རིལ་བུ་བུམ་སྒྲུབ་ཀྱི་ཞལ་ཕྱེས་ཚུལ་ནི། བྱ་ལོ་ལ་དབུ་རུ་བྱང་འཕན་ཡུལ་གྱི་ཆོས་རྗེ་སྨོན་འགྲུབ་རྒྱལ་པོ་ཆོས་བདག་ཏུ་ལུང་བསྟན་པ་ལྟར་གདན་འདྲེན་བྱུང་། དེ་ནུབ་སྔགས་སྲུང་སྨུག་ནག་ཞིང་དབྱུག་དང་བྷན་དྷ་ཐོགས་པ་ཞིག་བྱོན་ནས། ད་ལེན་མྱུར་དུ་སྨན་རྩེར་ཐེགས། འགྱངས་ན་རྟེན་འབྲེལ་འཁྱུག་པ་ཡོད་ཟེར། ཕྱིར་ནངས་གདན་འདྲེན་པ་ཚོ་ལ་གསུངས་པས། ཆོས་རྗེ་སྙན་རྒྱུ་ཨེ་ཡིན་ཟེར་ནི་སྐྲག་ཅིང་མགྱོགས་པར་བྱོན་པས། སྨན་རྩེར་ཕེབས་ནུབ་མཁའ་འགྲོ་སེང་གདོང་མ་དང་སྔགས་སྲུང་གཉིས་བྱོན་ནས། ཁར་སེང་ནས་རྟེན་འབྲེལ་ཡོད་མྱུར་
དུ་བྱོན་སྨྲས་པ་མ་ཎི་དུང་ཕྱུར་ཚུགས་པར་འདུག་པས། སྐྱེ་བདུན་སྒྲུབ་པ་དོན་ལ་གཅེས་པ་ཡིན་མོད། ད་ཐུགས་བསྐྱེད་མཛོད་ཟེར་ནས་རིལ་བུ་བྲེ་བཅོ་ལྔ་ཙམ་སྦྱར་། ཚོགས་པ་སྟོང་ཚོ་ཙམ་གྱིས་ཡིག་བདུན་བརྒྱུན་ཏེ་དུང་བཏོན་ཚར་ནས། དབང་བསྐུར་ཉིན་ལ་རིལ་བུ་བུམ་པའི་ཁ་ཚང་ཁྲོད་ནས་ཡར་ཕྱུ་རུ་རུ་ཁོལ། འཇའ་ཚོན་གྱི་གུར་ཕུབ་། ཐུགས་རྗེ་ཆེན་པོ་གཙོ་འཁོར་གསུམ་དངོས་སུ་བྱོན་པ་ཞལ་གཟིགས་ཚོགས་པའི་ནང་ནས་ཀྱང་ལས་དག་པ་འགའ་རེས་མཐོང་། རིལ་བུ་བཀྱེ་དུས་མེ་ཏོག་གི་ཆར་ཆུང་གྲྭ་ཡང་སེ་བའི་མེ་ཏོག་ཙམ་ཉིན་ཕྱེད་བར་དུ་བབ་བོ། །ཡང་འཕན་ཡུལ་དུ་རིལ་བུ་བཀྱེ་དུས་མེ་ཏོག་གི་ཆར་བབ། རྒྱ་མ་རུ་ཁྲོམ་དབང་མཛད་དུས་མེ་ཏོག་གི་ཚར་ཏིང་ཕོར་ཙམ་འཕང་ལོ་ཙམ་བབ། འཇའི་གུར་ཕུབ། བདེ་ཆེན་རྩེར་ཚོགས་པ་ཁྲི་ཚོ་ཙམ་ལ་རིལ་བུ་བཀྲེས་པ་དང་དབང་བསྐུར་དུས། ནམ་མཁའ་གཡའ་དག་པ་ལ་མེ་ཏོག་གི་ཆར་ཁ་བ་ཙམ་བབས་སོ། །དེ་ཡང་བསམ་ཡས་བྱང་ཆུབ་ཆེན་པོ་ནས་བཏོན་པའི་བྲམ་ཟེའི་སྐུ་ཤ་སྲན་མ་ཉིས་འགྱུར་ཙམ་པའི་རིལ་བུ་བདུན་ཅུ་དོན་གཅིག་ཨོ་རྒྱན་གྱི་སྨན་སྒྲུབ་ཞོ་ལྔ་ཙམ་ཞིག །བི་མ་
ལའི་སྨན་སྒྲུབ་རིལ་བུ་སྲན་མ་ཉིས་འགྱུར་ཙམ་པ་བཅོ་བརྒྱད། ཨོ་རྒྱན་ཡབ་ཡུམ་བྱང་སེམས་རིལ་བུ་སྲན་མ་ཆེ་ཤོས་ཙམ་བཅུ་དྲུག །ཁྱུང་ཆེན་བྲག་ནས་ཨོ་རྒྱན་ཡབ་ཡུམ་གྱི་བྱང་སེམས་དཀར་དམར་རིལ་བུ་བཅུ་ཐམ་པ།མཁོ་མཐིང་ལྷ་ཁང་ནས་བྲམ་ཟེ་དྲི་མེད་སྙིང་པོའི་ཐུགས་ཀྱི་ཤ་རིལ་སྲན་ཚད་ཉི་ཤུ་རྩ་བརྒྱད།གུ་རུའི་ཆོས་སྨན་མང་ཞིག——།མཁོ་མཐིང་ལྷ་ཁང་ཟུར་ཀ་ནས་བྲམ་ཟེའི་ཤ་རིལ་ཨ་ཚྭ་ཏའི་ལོ་རྒྱུས་དང་བཅས་པ། བྲག་དམར་རི་མོ་ཅན་ནས་ཚེ་རིལ་བཅུ་གསུམ། གུང་ཐང་མཁར་ནས་བྲམ་ཟེའི་ཤ་རིལ་དང་ཆོས་སྨན། དགེ་རི་བྲག་ནས་དགའ་རབ་རྡོ་རྗེ་དང་ཤྲཱི་སེང་ཧའི་སྨན་སྒྲུབ། ཨཱརྱ་པ་ལོའི་གླིང་ནས་སྐྱེ་བདུན་གྱི་སྒྲུབ་པ་ལོ་རྒྱུས། གནམ་སྐས་བྲག་ནས་བྲམ་ཟེ་དྲི་མེད་ཤ་རིལ། དགའ་རབ་ཤྲཱི་སེང་ཨོ་རྒྱན་གསུམ་གྱི་ཆོས་སྨན། བསམ་འགྲུབ་བདེ་ཆེན་གྱི་གཙུག་ལག་ཁང་ནས། དགའ་རབ་རྡོ་རྗེའི་ཆོས་སྨན་བྲམ་ཟེའི་ཤ་རིལ། དབེན་རྩ་ལྷ་ཁང་ནས། དགའ་རབ་རྡོ་རྗེ་དང་ཤི་སེང་ཧའི་སྨན་སྒྲུབ་ལ་ཨོ་རྒྱན་དང་བི་མ་ལ་གཉིས་ཀྱིས་བལ་ཡུལ་ཡང་ལེ་ཤོད་དགའ་རབ་ཤྲཱི་སེང་ཨོ་རྒྱན་གསུམ་གྱི་ཆོས་སྨན། བསམ་འགྲུབ་བདེ་ཆེན་གྱི་
གཙུག་ལག་ཁང་ནས་དགའ་རབ་རྡོ་རྗེའི་ཆོས་སྨན་བྲམ་ཟེའི་ཤ་རིལ་དུ་བསྒྲུབས་པའི་རིལ་བུ་གའུ་གང་། ཨོ་རྒྱན་གྱིས་མཁའ་རི་དགེ་གོང་དུ་བསྒྲུབས་པའི་ཆོས་སྨན་ཕྱེ་མ་གའུ་གང་། དེ་རྣམས་ཀྱི་ལོ་རྒྱུས་དང་བཅས་པ། དྭགས་པོའི་དྭགས་ལུང་ཁྲ་མོ་བྲག་ནས་བྲམ་ཟེ་དྲི་མེད་ཤ་རིལ། དགའ་རབ་ཤྲཱི་སེང་ཧ་ཨོ་རྒྱན་རྣམས་ཀྱིས་བསྒྲུབས་པའི་དམ་རྫས་དེ་རྣམས་བཏོན་ནོ། །དེ་རྣམས་ཀྱི་རྒྱུན་དེང་སང་གི་རིལ་བུ་ལ་ཡོད་པའི་རྒྱུ་མཚན་ནི། གཏེར་ནས་བྱོན་པའི་རིལ་བུ་སེལ་མེད། ད་ནི་རྙེད་པར་དཀའ་ཡང་། སྔར་བསྒྲུབས་པའི་རྒྱུན་ལ་རུ་རྩི་འདྲེས་པས། ཕབས་ཡོའི་ཕབས་ཀྱིས་རུང་བ་དང་འདྲ་སྟེ། རཏྣ་གླིང་པ་ཉིད་ཀྱིས་མཛད་པའི་གཏེར་འབྱུང་ཆེན་མོ་ལས། བྲམ་ཟེའི་ཤ་རིལ་ལ་སྔ་ཕྱི་བར་གསུམ་དུ་བསྒྲུབས་ཏེ་ཕྱོགས་ཐམས་ཅད་དུ་བཀྱེས་ཏེ་རིལ་བུ་ཟོས་ཚད་སྤྱན་རས་གཟིགས་ཀྱི་ཞིང་དུ་བཀོད་དེ་འགྲོ་དོན་མཐའ་ཡས་སོ། །གུ་རུའི་ཆོས་སྨན་ལ་ཕབས་སུ་བྱས་ཏེ་སྨན་སྒྲུབ་ཕྱོགས་མཚམས་མང་པོར་མང་དུ་བསྒྲུབས་ཏེ་འགྲོ་དོན་ཆེ། བྲམ་ཟེའི་ཤའི་རིལ་བུ་ལས་ཅན་འགས་དངོས་གྲུབ་ཐོབ། སྐྱེ་བདུན་ལན་འགའ་བསྒྲུབས་ཏེ་དངོས་གྲུབ་ཐོབ། །
སྐྱེ་བདུན་ལན་འགའ་བསྒྲུབས་ཏེ་འགྲོ་བ་དཔག་ཏུ་མེད་པ་ཐུགས་རྗེ་ཆེན་པོའི་ཞིང་དུ་བཀོད། ཨ་མྲྀ་ཏ་ལ་སྨན་སྒྲུབ་འགའི་ཕབས་བྱས། ཞེས་དང་། ཨ་མྲྀ་ཏ་རྣམས་བུ་ཆེན་འགས་དངོས་གྲུབ་ཐོབ། སྨན་སྒྲུབ་འགའ་བསྒྲུབས་ཏེ་ཕེབས་བྱས་སོ། །ཞེས་དང་། མི་སྟོང་ཕྲག་གསུམ་ལ་རིལ་བུ་བཀྱེས། རྗེས་སུ་ཕྱོགས་མཚམས་ཐམས་ཅད་དུ་ཡང་བཀྱེས་ཏེ་ཁམས་ཚ་བ་རོང་པའི་སློབ་དཔོན་རྒྱལ་མཚན་དཔལ་དང་ཁམས་སྟོན་ཆོས་རྒྱལ་མཚན་ལ་སོགས་ཀྱིས་ཁམས་སྟོད་སྨད། འཇམ་དབྱངས་དཔལ་སོགས་ཀྱིས་ཉང་ཀོང་རོལ་གསུམ་ལ་ཕྱི་ཆུ་བར་གྱི་བླ་མ་དབུ་མཛད་སོགས་ཀྱིས་ཀྱང་ཕྱོགས་ཐམས་ཅད་དང་། མདོར་ན་ཐམས་ཅད་དུ་ཁྱབ་སྟེ་རིལ་བུ་ཟོས་ཚད་ཐུགས་རྗེ་ཆེན་པོའི་ཞིང་དུ་བཀོད། འགྲོ་དོན་ཆེ་སྟེ་གཏེར་སྟོན་མི་གཅིག་གིས་འགྲོ་དོན་ལ་ཁོ་བོ་ཆེ་བསམ་པ་འགྲུབ། རྗེས་སུ་ཡང་སྨན་རྩེར་བསྒྲུབས་པའི་ཆ་དང་། བསྒྲུབས་པའི་སྤྱོད་རྒྱུ་ཡང་མང་དུ་བཞུགས། བདག་ཀྱང་བྲེ་དོ་ཙམ་གདན་དྲངས་ཏེ་དབུས་ཕྱོགས་ཡར་ལུང་ལྷོ་བྲག་ཤར་ནུབ། རྗེས་སུ་སྨན་རྩེར་སྒྲུབ་པའི་ཕབ་དང་། སྒྲུབ་པའི་སྤྱོད་རྒྱུ་མང་དུ་གཉལ་དང་ལོ་རོ་སོགས་ལྷོ་མོན་ཐམས་ཅད་
ལ་བཀོད་དེ། ཨོ་རྒྱན་རིན་པོ་ཆེའི་ཐུགས་དགོངས་རྫོགས་པར་བྱས་ཤིང་། གཞན་ཡང་སེལ་མེད་རང་གི་རིལ་བུ་བུ་ཆེན་འགའ་ལ་གཏད་དེ་འགྲོ་དོན་ལ་བསྐུར། ད་རུང་སྐུ་ཤ་སེལ་མེད་ཀྱི་རིལ་བུ་འགའ་བཞུགས་ཏེ་འགྲོ་དོན་ཕྱིས་འབྱུང་ཞིང་ཡུན་དུ་གནས་པར་གྱུར་རོ། །ཞེས་དང་བླ་མ་ཙ་རི་བ་དང་། ཞོང་ཁ་བ་དང་། སློབ་དཔོན་རྒྱལ་མཚན་གྲགས་པ་རྣམས་ལ། རིལ་བུ་སེལ་མེད་རེ་དངོས་གྲུབ་གནང་། གཞན་ཕྱོགས་ཕྱོགས་ཀྱི་བུ་ཆེན་རྣམས་ལ་ཡང་བཀྱེས། རིལ་བུ་ལ་བརྟེན་མ་ཎི་རིལ་བུ་བསྒྲུབས་པའི་ཐུན་ཁ་མང་དུ་བཙུགས་ནས་སྙིགས་མའི་འགྲོ་བ་རྣམས་ཐུགས་རྗེ་ཆེན་པོའི་ཞིང་དུ་བཀོད། ཆོས་སྨན་རྣམས་ལ་རང་དང་བུ་ཆེན་རྣམས་ཀྱིས་སྨན་གྱི་ཕབས་བྱས་ཏེ། བདུད་རྩི་སྨན་སྒྲུབ་ཕྱོགས་མཚམས་ཀུན་ཏུ་མང་དུ་བསྒྲུབས་ཏེ་འགྲོ་དོན་མཐའ་རྒྱས་སོ། །ཞེས་དང་། བྲམ་ཟེའི་ཤ་རིལ་ཨ་མྲྀ་ཏ་བྱང་སེམས་དཀར་དམར་རྣམས་ལ་རང་དང་བུ་ཆེན་རྣམས་ཀྱིས་སྒྲུབ་ཀ་དུ་མ་ཚུགས་ཏེ་ཕྱོགས་མཐའ་དབུས་ཐམས་ཅད་དུ་འགྲོ་དོན་དཔག་མེད་འགྲུབ་ཅིང་དར་རྒྱས་སུ་འགྱུར་རོ། །ཞེས་གསུངས་སོ། །དེས་ན་ད་རེས་སྒྲུབ་ཆེན་
དབང་དང་བཅས་པ་འདིའི་དམ་རྫས་ཀྱང་། རཏྣ་གླིང་པའི་ཕྱག་གི་བདུད་རྩི་རིལ་བུ་གཅིག་དང་། རཏྣའི་དམ་རྫས་ལ་མཁར་དྲུང་གིས་བསྒྲུབས་པའི་བདུད་རྩི་ཆོས་སྨན་མང་བ་ཞིག་དང་། སངས་རྒྱས་གླིང་པས་བསྒྲུབས་པའི་བདུད་རྩི་ཆོས་སྨན་སེལ་མེད་བུངས་ཆེ་བ་གུང་ར་ལོ་ཆེན་གྱི་ཕྱག་ནས་བྱུང་བ་དང་། སྐྱེ་བདུན་ནི་སྐྱོ་བྲག་པ་དང་དྲུང་པ་སོགས་ནས་བྱུང་བའི་རྒྱུན་རིལ་བུ་བརྒྱ་དང་བཞི་བཅུ་ལྷག་ཙམ་གྱིས་རུ་རྩི་བྱས་པ་ཡིན་པས། དམ་རྫས་དེ་དག་ངེས་པར་རྒྱུན་ཡོད་པར་ངེས་སོ། །ཁྱད་པར་དུ་རཏྣ་གླིང་པས་ཀརྨ་པ་ཆོས་གྲགས་རྒྱ་མཚོ་ལ་ཕུལ་བའི་བྲམ་ཟེའི་ཤ་རིལ་སླད་མེད་རྣམས་བརྡུལ་ཏེ་རྗེ་ཉིད་ཀྱིས་ཤངས་མཚལ་གྱིས་སྦྲུས་ཏེ་གསེར་གྱི་པ་ཏྲ་རུ་བཏུམས་ནས་ནང་རྟེན་དུ་བཞུགས་པ་དམ་ཅན་སྐྱེས་བུའི་ཕྲིན་ལས་ཀྱིས་བདག་གི་ལག་ཏུ་ཕྱིན་པ་རུ་རྩིའི་གཙོ་བོ་ངོ་མཚར་ཆེའོ། །དེ་ནས་གཏེར་ཆོས་འདིའི་འགྲོ་དོན་བྱུང་ལུགས་སྤྱིར་བཤད་པ་དང་། ཁྱད་པར་དབང་ལུང་འདི་གང་ལས་བརྒྱུད་ཚུལ་གཉིས་ལས། དང་པོ་ནི་ཨོ་རྒྱན་ལུང་བསྟན་ཆེན་པོ་ལས། ལྔ་བཅུ་ཁ་རལ་དུས་ཀྱི་ཐ་མ་ལ། །ད་ལྟའི་ལོ་ཙཱ་ལང་གྲོ་དཀོན་མཆོག་འདི། །སྨོན་ལམ་དབང་གིས་སྐྱེ་བ་
འགའ་བརྒྱུད་ནས། །དེ་དུས་རི་བོ་ཁྱུང་ཆེན་ལྡིང་བའི་ལྷོར། །ལྕགས་ཁམས་ལུག་ལོར་པདྨའི་རིགས་ཅན་འབྱུང་། །ཁྱུང་ཆེན་རི་དང་མཁར་ཆུས་ཟབ་གཏེར་འདོན། །གསང་བའི་མཚན་ཡང་ཞིག་པོ་གླིང་པར་གྲགས། །གུང་ཐང་དགེ་རི་རྫོང་གསུམ་གཏེར་ཁ་འདོན། །གསང་བའི་མཚན་ཡང་རཏྣ་གླིང་པར་གྲགས། །བསམ་ཡས་བུམ་ཐང་གནམ་སྐས་གཏེར་ཁ་འདོན། །གསང་བའི་མཚན་ཡང་འགྲོ་འདུལ་གླིང་པར་གྲགས། །སྟོབས་ལྡན་སྐྱེས་བུ་ཤེས་རབ་བློ་གྲོས་ཅན། །དོན་གྱི་རྟོགས་ལྡན་གདུལ་བྱའི་བཀའ་བབས་པས། །འབྲེལ་ཚད་དོན་ལྡན་པདྨའི་རིགས་ཅན་ཏེ། །བུ་མཆོག་དེ་ཡིས་དོན་གཉིས་སྤྱོད་པར་འགྱུར། །ཞེས་གསུངས་པ་ལྟར། བར་ཆད་བྱུང་ན་སྐྱེ་བ་གསུམ་བཞེས་དགོས་པ་ལ་བར་ཆད་ཐམས་ཅད་བཟློག་ནས་སྐུ་ཚེ་མཐར་ཕྱིན། སྐྱེ་བ་གསུམ་གྱི་གཏེར་ཁ་ཐོན་པས་གཏེར་སྟོན་གཅིག་ལ་གླིང་པ་གསུམ་དུ་གྲགས། རྟེན་འབྲེལ་མ་འགྲིགས་པ་ཅུང་ཟད་ཀྱང་མ་བྱུང་བས་གཏེར་ཁ་འདི་བཀྲ་ཤིས་བྱིན་རླབས་ཆེ། ཞེས་སློབ་དཔོན་རྣམས་ཀྱིས་གསུངས་སོ། །དེ་ཡི་རྒྱུད་འཛིན་ལས་ཅན་ཆོས་ཀྱི་བདག །བཀའ་
བབས་བུ་ལྔ་ཉེ་བའི་ཐུགས་སྲས་བཞི། །རིགས་ལྡན་ལྔ་དང་དཀྱིལ་འཁོར་འཛིན་པ་བརྒྱད། །ལས་ཅན་སྐྱེས་བུ་ཆོས་བདག་ཉི་ཤུ་ལྔ། །རིགས་ལྡན་བུ་མོ་བཞི་དང་ཉི་ཤུ་གཅིག །དབང་རྫོགས་ཆོས་འབྲེལ་སེར་མོ་ཁྲི་ཕྲག་ལ། །འབྲེལ་ལྡན་གདུལ་བྱ་ནམ་མཁའི་སྐར་མ་ཙམ། །ཞེས་ལུང་བསྟན་པ་ལྟར་བྱུང་བར་གདའ་སྟེ། །ཀརྨ་པ་ཆོས་གྲགས་རྒྱ་མཚོ། འབྲུག་པ་རྒྱལ་དབང་ཆོས་རྗེས་གཙོར་བྱས་བླ་མ་སློབ་དཔོན་ཆེ་དགུ་དང་། ལ་ཕྱི་ཆུ་བར་མན་དང་རྒྱལ་མོ་རོང་ཡན་དུ་བླ་མའི་གོ་སར་གནས་ཤིང་དབང་བསྐུར། ཆོས་བཤད་བྱེད་པ་ཙམ་ནི་གྲོངས་ལས་འདས་ཞེས་གསུངས་པ་དང་། སྣེལ་གདོང་གོང་མ་ཆེན་པོས་གཙོར་བྱས་དབུས་གཙང་གི་སྡེ་པ་ཆེ་དགུ་ཐམས་ཅད་ཀྱིས་དབུའི་བླ་མཆོད་དང་བཀུར་སི་ཕུན་སུམ་ཚོགས་པ་བྱས་ཚུལ་རྒྱས་པར་གཏེར་སྟོན་ཉིད་ཀྱིས་མཛད་པའི་རྣམ་ཐར་ན་གསལ་ལོ། །དེ་ནས་བརྒྱུད་རིམ་ནི་དབང་ཆེན་རྟ་མགྲིན་གྱི་སྤྲུལ་པར་ལུང་བསྟན་པའི་རྒྱལ་སྲས་ཚེ་དབང་གྲགས་པ་ནི་འགྲོ་དོན་ཡབ་བས་ཀྱང་ཆེ། ཚེ་ཆུ་གསོལ་བས་དགུང་ལོ་བརྒྱ་དང་བཅུ་ཐུབ། འདས་དུས་དང་གདུང་བཞུ་དུས་ནམ་མཁའ་གཡའ་དག་པ་ལ་འཇའི་གུར་
དང་དྲྭ་བ་དྲྭ་ཕྱེད་མིག་མང་རིས་ཀྱིས་གང་བ་དང་། རིང་བསྲེལ་ཁ་དོག་སྣ་ལྔ་སྲན་མ་ཙམ་དང་ཡུངས་ཀར་ཙམ་དཔག་ཏུ་མེད་པ་བྱོན་ནོ། །དེའི་སློབ་མ་ཤཱཀྱ་བཀྲ་ཤིས་ནི་རྗོད་དུ་འཁྲུངས། སྐུ་ན་གཞོན་ནུ་ལ་རཏྣ་གླིང་པ་མཇལ་ཡང་དབང་ལུང་ཆེར་མ་ཐོབ། དད་པ་དབང་མེད་དུ་སྐྱེས་ནས་རྒྱུ་ཞིག་བསྒྲུབས་ནས་དབང་ལུང་ཞུ་སྙམ་ནས་རྔོད་དྷོ་ཁ་ན་ལོ་ཁ་ཡར་རྒྱུ་བཙལ་བས། གོས་ཆེན་ཡུག་བཟང་བ་གཅིག་ཐོན། དེ་ཁྱེར་ནི་སོང་བ་རཏྣ་གླིང་པ་ཞིང་བརྗེས་འདུག་པས་ཚེ་དབང་གྲགས་པ་ལ་གཏུགས། ཆོས་སྐོར་རེ་རེ་གནང་དུས་གོས་ཆེན་ཁ་རེ་ཕུལ་བས་གཏེར་ཆོས་རྫོགས་པ་དང་གོས་ཆེན་ཟད་པ་དང་མཉམ། ཚེ་དབང་གྲགས་པས་ཁྱེད་ལ་གོས་ཡུག་བཟང་པོ་འདི་འདྲ་གཅིག་ཡོད་ན་མ་བཅོད་པར་དང་པོ་ནས་མི་ཕུལ་བས་ཨང་གསུངས་པས། འོ་ན་ཁྱེད་ཀྱིས་ང་ལ་ཆོས་རྣམས་དུས་གཅིག་ལ་མི་གནང་དོ་ལེ་ལགས་ཞུས་པས། ཐམས་ཅད་བཞད་ཏི་རེ་སོང་སྐད། ཆོས་ཞུས་ཚེ་ཡང་ན་བཟའ་མེད་པས་སྐྱེ་ཆེ་བ་གཅིག་ཡོད་པ་ཉིན་ལ་གདན་དུ་བཏིང་། མཚན་ལ་གྱོན། དངོས་པོ་རྣམས་ཀྱིས་ཤོག་བུ་བསྒྲུབས་ནས་གཏེར་ཆོས་ཐམས་ཅད་བྲིས་ཏེ་རྔོད་དུ་བྱོན་
པས། གདུལ་བྱ་དཔག་ཏུ་མེད་པ་བྱུང་བ། ཚེ་དབང་གྲགས་པའི་དྲུང་དུ་ཁྱེར་ནས་ལན་གཉིས་བྱོན་ཏེ། ཕྱག་ལེན་ཐམས་ཅད་ལྷག་མ་ལུས་པར་བསླབས་པས། ལུང་ཟིན་གྱི་ཆོས་བདག་ཡིན་ཅིང་གཏེར་ཆོས་མཁས་པའི་གྲགས་པས་ཁྱབ་སྟེ། རི་བོ་ཆེར་ཆོས་རྗེ་མཁར་དྲུང་གིས་གདན་དྲངས་ནས་དབང་ལུང་རྣམས་གསན་པ་ལ། ཕྱེད་ཙམ་རྫོགས་ནས་ཕྱིར་ལོ་འབྱོན་ཆད་བྱས་ནས་བྱོན་སོང་། ཕྱིར་ལོ་གདན་འདྲེན་སོང་བས་ངའི་ཆོས་མཐུར་ལ་འགྲོ་བ་སྲོལ་ཡིན། འཕྲེད་ལ་ཡང་ཅུང་ཟད་རེ་འགྲོ། གྱེན་ལ་འགྲོ་ཁས་མི་ཉན་གསུངས་ནས་མ་བྱོན་ཏེ། གདན་དམའ་བ་ལ་ཅུང་ཟད་མ་དགྱེས་པར་འདུག་པས། ཆོས་རྗེ་མཁར་པས་ཀྱང་རི་བོ་ཆེའི་ཁྲི་རྒོག་འདིས་ངའི་ཆོས་དེ་རྣམས་ཚང་མ་མི་ཐོབ་པར་བྱས་ཨང་གསུངས་ནས་འགྱོད་དོ། །ཚེ་ཆོག་པདྨ་དབང་ཕྱུག་ཅེས་བྱ་བ་སྔར་ཡང་མཁར་དྲུང་ཉིད་དང་མཉམ་དུ་ཞུས་པ་ཤེས་རབ་བརྩོན་འགྲུས་དང་ལྡན་པ་དེ་ལ་འབུལ་བ་བསྐུར་ནས་འཕྲོ་ཐམས་ཅད་རྫོགས་པར་ཞུས་ཏེ། མཁར་དྲུང་ལ་ཕུལ་ལོ། །ཡང་ཚེ་དབང་གྲགས་པ་ནས་ལུང་ཟིན་གྱི་སློབ་མ་སོ་པ་མགོན་པོ་རྡོ་རྗེ། དེའི་སློབ་མ་ནི་འབྲང་བུ་ནང་སོ། དྲུང་
མདོ་སྡེ་རྒྱ་མཚོ་ཞེས་བྱ་བ་གོ་ཤྲིའི་ལས་ཀ་ཡོད་པས་ཐོབ་ཐང་ཆེ་ཞིང་། རཏྣ་ལུགས་ལ་མཁས་པའི་གྲགས་ཆེ་བ་དེ། རི་བོ་ཆེར་གདན་དྲངས་ནས་མཁར་དྲུང་དང་ཚེ་ཆོག་པ་གཉིས་ཀས་ཞུས་སོ། །དྲུང་མདོ་སྡེ་རྒྱ་མཚོ་ནི་བོན་པོ་ཚེ་དབང་རིག་འཛིན་ཞེས་པ་དང་མཐུ་ཁ་ཚད་པས་འདས་པ་ལ། མཁར་དྲུང་གིས་ངའི་བླ་མ་བསད་པའི་ཤ་ལེན་གསུངས་ནས་ཡང་བཟློག་རྡོ་རྗེ་ཕ་ལམ་དང་གུར་དྲག་གི་ཟློག་པ་སྤུ་དྲི་རང་གཤེད་བསྒྲུབས་ནས་བོན་པོ་དང་ཁ་ཆད་སྤར་རོ། །དེར་ཞག་ཉེར་གཅིག་ཙམ་ནས་བོན་པོ་ན་རེ། མདང་མཁར་དྲུང་གི་གྲ་ཁྲིའི་ཞབས་སུ་ང་བཀྱིགས་གདའ་བ་རྨིས་ཟེར་ནས་བོན་པོ་ལྐུགས་ནས་འདས་སོ། །ཚེ་དབང་གྲགས་པ་དང་ཞལ་སྤྲོད་ཤཱཀྱ་བཀྲ་ཤིས་འདྲ་སྐུའི་གསེར་ཐང་བཞེངས་ནས་དད་རྟེན་མཛད་པར་གདའ་བས། བླ་མ་དེ་ཉིད་མཁར་དྲུང་པའི་རྩ་བའི་བླ་མར་ཡིན་པར་སྣང་ངོ་། །མཁར་དྲུང་ནི་རྡོ་རྗེ་འཇིགས་བྱེད་ཀྱི་སྤྲུལ་པ། སྟག་ལུང་ངག་དབང་གྲགས་པའི་སྐུ་སྐྱེ་ཡིན་པར་བཤད་འདུག་ཅིང་། འཁྲུངས་དུས་འདས་དུས་གཉིས་ཀ་ཚེས་བཅུ་ལ་བྱུང་ཞིང་ཨོ་རྒྱན་གྱི་སྤྲུལ་པར་གྲགས། ཀུན་སྐྱོང་གླིང་པ་སོགས་ཀྱི་ལུང་ཟིན་གྱི་
སློབ་མ་སྟེ། བར་ལམ་ཁོག་འདིར་རྙིང་མའི་བསྟན་པ་ལ་ནི་ཁོང་བས་ཕན་སྟོབས་ཆེ་བ་མ་བྱུང་ངོ་། །ཚེ་ཆོག་པ་པདྨ་དབང་ཕྱུག་ནི་མཁར་དྲུང་གི་སློབ་དཔོན་དང་སློབ་མ་དང་མཆེད་གྲོགས་གསུམ་ཀ་ཡིན་ཏེ། རྙིང་མའི་དབང་ལུང་ཐམས་ཅད་ཕྱོགས་ཀུན་ཏུ་ཞུ་བ་ལ་བཏང་ནས་མཁར་དྲུང་གིས་གསན། —་བསྙེན་སྒྲུབ་དང་སྐུ་ཚེ་མཐར་ཕྱིན་པས། ཆོས་རྗེ་མཚོ་སྐྱེས་རྡོ་རྗེས་ཀྱང་དབང་ལུང་ཕལ་ཆེར་གསན། འདས་ཁ་དུས་ཆོས་རྗེའི་ཕྱག་ནས་བྱིན་རླབས་རྟེན་མང་དུ་བསྐུར་ནས་འདི་རྣམས་གསོལ་བ་དང་བདུག་པ་མཛོད། དེ་རིང་ཚེས་བཅོ་ལྔ་ཡིན་པས་དྲང་སྲོང་སོགས་སྐྱོར་པ་འོང་དོགས་གསུངས་པས། ཨ་ཨ་ངའི་ཕྲིན་ལས་ཐམས་ཅད་དྲང་སྲོང་གིས་སྒྲུབ་ཅིང་ཡོད་ཛ་ངའི་སྲོག་གཅོད་ཨང་། དེ་རིང་དུས་བཟང་ལ་ང་རང་འགྲོ་བསམ་སྟེ། ད་འདི་འདྲ་རྫི་ནས་ང་སང་ཉིན་བར་མི་འགྲོ། ངས་མར་ཐང་གི་བསྟན་པའི་དོན་ལ་གཏད་རྟ་རྒྱབ་གཅིག་ཙམ་ཡང་བརྒྱབ་སྟེ་ང་ནི་ཟངས་མདོག་དཔལ་རི་ན་འགྲོ་གསུངས་སྐད། དེ་ལྟར་ནམ་འཆི་དང་གར་འགྲོ་ལ་རང་དབང་ཡོད་པའི་རིག་འཛིན་ཆེན་པོ་ཞིག་ལགས་སོ། །དེའི་སློབ་མ་ནི་བཀྲ་ཤིས་དབང་ཕྱུག་ཅེས་བྱ་སྟེ་འདུལ་ཁྲིམས་
དགེ་བསྙེན་ཙམ་ཡང་ཞུ་མ་མྱོང་ཁྱིམ་པ་རྡོ་རྗེ་འཛིན་པ་སྟེ། ་ཆ་ལུགས་གཟན་ཤམ་པད་ཞྭ་ཁཊཾ་སོགས་ཨོ་རྒྱན་གྱི་ཆ་ལུགས་ལྟར་མཛད། སྔགས་ཆོས་གསར་རྙིང་། སྒྲ་ས་རིས་ལྷ་བཟོ་སོགས་ཡོན་ཏན་ཤིན་ཏུ་ཆེ་བ་དེ་རི་བོ་ཆེར་ལན་མང་དུ་བྱོན་ཞིང་ཞྭ་ཐུལ་སོགས་དངོས་པོ་ཅི་འབྱོར་འབུལ་བ། རི་མོ་བྲི་བ་སོགས་ཕྱག་གཡོག་ཀྱང་ཅུང་ཟད་ཞུས་ཏེ། ཐུགས་རྗེ་ཆེན་པོ་གསང་འདུས་ཀྱི་བཀའ་རྫོགས་ལུང་རྫོགས་སོགས་རཏྣའི་ཆོས་སྐོར་དང་། དྲེགས་པ་ཉི་ཤུ་རླུང་དམར་སོགས་དྲག་སྔགས་མང་པོའི་ཕྱག་ཁྲིད་དཔྱིས་ཕྱིན་པར་མཛད་དོ། །རྟ་མགྲིན་གསང་འདུས་དང་རྣམ་སྲས་དང་། ཚེ་སྒྲུབ་རྡོ་རྗེ་ཕྲེང་བ་དང་། ཐུགས་རྗེ་ཆེན་པོ་གསང་འདུས་པོ་ཏི་སོགས། ཚེ་ཆོག་པ་རང་གི་ཕྱག་བྲིས་ཤཱཀྱ་བཀྲ་ཤིས་ཀྱི་ཕྱག་བྲིས་ལས་ཞལ་བཤུས་པ་རྣམས་ཀྱང་ཁོང་གི་ཕྱག་ན་གདའ་བས་ཐུགས་གཏད་ངེས་པའི་སློབ་མར་གདའ་འོ། །ཁོང་ནི་བོད་ཆོས་རྒྱལ་གྱི་གདུང་རིགས་མཁའ་སྤྱོད་པའི་གདུང་རབས་བདུན་པ་སྟེ། སྡོང་ལྷ་རྒོད་རྒྱལ་གྱི་སྐྱེ་བ་ཡིན་པ་དང་། སྐུ་གསུམ་སྒྲུབ་དུས་བླ་མ་སྐུ་གསུམ་རྨི་ལམ་དུ་ཞལ་གཟིགས་པ་དང་། མ་ནིང་གི་སེལ་རྫས་དྲེགས་པ་
སོགས་ལ་རྟེན་ནས་རི་བསྙིལ་བ་དང་། དགྲ་བོ་ལ་ཐོག་བརྒྱབ་ཅིང་ཆོ་འཕྲུལ་བཏང་བས་ནུས་པ་ཆེ་བའི་གྲགས་པ་ཐོན། དགུང་ལོ་བརྒྱད་ཅུ་གྱ་གཉིས་བཞུགས་པས། བདག་གིས་ཀྱང་མཇལ་ཞིང་བྱིན་རླབས་དང་བཀའ་སྲུང་སྒྲུབ་པའི་ཞལ་བསྒོས་ཅུང་ཟད་གནང་། འདས་ཁ་ཟངས་མདོག་དཔལ་རིའི་སྨོན་ལམ་དང་བདེ་སྨོན་བརྩམས། ལེའུ་བདུན་མའི་ཙིཏྟ་ཨོ་རྒྱན་གནས་སུ་བབ་པ་ལས་ཞེས་པའི་ཚིག་དང་འགྲིགས་པར་འདས། བདུན་གསུམ་ལ་འོད་གསལ་བརྟན་པོ་ཟིན་ཅིང་ཐུགས་ལྗགས་སྤྱན་གསུམ་ཀུན་ཏུ་བཟང་པོ་དང་ཨོ་རྒྱན་གྱི་སྐུ། རིང་བསྲེལ་ཞུན་ཐིགས་མང་དུ་བྱོན། ཁོང་སྔགས་པ་ཡིན་ཀྱང་བྱང་བདག་པོ་བཀྲ་ཤིས་སྟོབས་རྒྱལ་བས། གཤིན་རྗེ་འཇོམས་མཛད་འབར་བ་སོགས་དབང་ལུང་གསན། དེ་མོ་སྐུ་སྐྱེ་ལྷ་དབང་ཕྱོགས་ལས་རྣམ་རྒྱལ་གྱིས་ཀྱང་ལྐོག་ཏུ་དབང་ལུང་གསན་ཞིང་གནང་སྦྱིན་མང་དུ་མཛད། སློབ་མ་བླ་མ་ཞིག་པོ་ཞེས་པ་གཙང་བཙུན་བསྙེན་སྒྲུབ་རེམ་ཞིང་རྫོགས་ཆེན་སོགས་ཕན་ཆེ་བ་གཅིག་བྱུང་། དེའི་ཚ་བོ་པདྨ་དབང་དྲག་ནི་ཁུ་བོ་ལས་དབང་ལུང་ཐམས་ཅད་གསན། གཞན་བླ་མ་མང་དུ་བསྟེན་ཀྱང་ཐུགས་རྗེ་ཆེན་པོ་འདི་
ནི་བཀྲ་ཤིས་དབང་ཕྱུག་ལས་བཀའ་རྫོགས་ལུང་རྫོགས་གསན། ང་རང་གི་རྡོ་རྗེ་འཆང་ཡིན་གསུངས་ནས་དད་འདུན་དཔག་ཏུ་མེད། ཕྱིས་གདུང་གཡོག་སོགས་ཆག་ཕྱི་ཡང་ཕན་ཆེ་བ་བསྒྲུབས་སོ། །ཁོང་གིས་གུར་དྲག་ལོ་ཞུགས་སོགས་བསྙེན་སྒྲུབ་མང་དུ་ཐེམས་ཏེ། མཚམས་ཁུང་དུ་མཁའ་འགྲོ་མས་མར་ཁུ་དངོས་སུ་འདྲེན་པ་དང་། དགུན་རྒྱལ་ཟླ་བའི་ཚེས་བཅུ་ནུབ་ཚོགས་ཀྱི་གྲིབ་དེར་སྲུག་རློན་པ་དབྱར་གྱི་འདྲ་བ་སྤུངས་ནས་འདུག་པ་དེ་ཚོགས་པ་ཀུན་གྱིས་ཟ་རྒྱུ་ཡོད་པ་དང་། ཆོས་སྐུའི་སྒྲུབ་པ་དུས་རྡོ་རྗེ་ཕག་མོ་དངོས་སུ་མཇལ་བ་དང་། སྐུ་གསུམ་སྒྲུབ་པ་ལན་འགའ་མཛད་པས་རྨི་ལམ་དུ་ཨོ་རྒྱན་ཡང་ཡང་མཇལ་བ་དང་། དྲག་སྔགས་ཞིག་སྒྲུབ་དུས་ལིངྒ་འཕར་བ་དང་ཐུན་ཁུང་ཁ་བཅད་པའི་ནང་དུ་ཁྲག་སློ་སླེབས་པ་སོགས་ནུས་པ་ཐོན། གཞན་ལ་ཡང་ཕན་ཐོགས་ཆེ། ཇོ་ཟོར་འཕངས་པ་མདའ་རྒྱང་ཙམ་དུ་སོང་ནས་འདྲས་པའི་ཐོག་ཁར་སླེབས་པ་སོགས་བྱུང་། ཕྱིས་དྲུང་པ་ཚེར་ལུང་བའི་དྲུང་དུ་རྒན་ཞུགས་མཛད་པས་ཀརྨ་དོན་ཡོད་བཏགས། མ་འདས་བར་ཆབ་ལེན་ལྷམ་ཕུད་གདན་གཅིག་མཐར་ཕྱིན། ད་ཁྱེད་རྣམས་འཛོམ་ཚེ་ང་ཤི་ན་
དགའ་བས་ཟངས་མདོག་དཔལ་རིར་འགྲོ་བ་ཐེ་ཚོམ་མེད་གསུངས་ནས། ཆོས་སྐུ་འོད་གསལ་གྱི་འཕོ་བ་མཛད་པས་ཞག་བདུན་བཀྲག་མདངས་གསོན་དུས་བས་སུམ་འགྱུར་བཟང་། གདུང་སྦྱངས་པས་ཀུན་གྱིས་མཐོང་བར་མེ་ཏོག་གི་ཆར་ལྷོ་ནུབ་ངོས་ནས་བབ། ལ་ལས་མཐོང་བ་འཇའི་ཀ་བ་དང་ནམ་མཁར་ཉི་ཟླ་སྐར་གསུམ་འཛོམ་པ་བྱུང་། བདག་གིས་མཐོང་བ་ལ་སྤྲིན་འཇའ་དཀར་པོ་ལ་བཀྲ་ཤིས་པའི་རྟགས་བརྒྱད་ལ་པདྨ་མ་གཏོགས་གསལ་བར་ཤར། ཐུགས་ལྗགས་སྤྱན་གསུམ་ཨ་ཡིག་གཉིས་ཧཱུཾ་གཉིས་ཞིང་སྐྱོང་དང་ཕྱག་བཞི་པ་དང་དམ་ཅན་གྱི་སྐུ། ཆུ་ཤེལ་འདྲ་བའི་ཤ་རི་རཾ་ངོ་མཚར་བ་མཁྱུད་གང་ཙམ། རིང་བསྲེལ་མཆོང་གི་མདོག་འདྲ་གཉིས་ཚེམས་ལས་བྱོན། ཁྱད་པར་དུ་དུང་དཀར་གཡས་འཁྱིལ་མོན་སྲན་ཙམ་ཤིན་ཏུ་དོད་པ་ཞིག་བྱོན་པ་སུས་མཐོང་ངོ་མཚར་དུ་བྱས། དགོངས་ཞག་མ་རྫོགས་བར་མཁར་གྱི་ཐད་ནམ་མཁའ་ལ་འཇའ་ཚོན་འཁྱིལ་བ་སོགས་བྱུང་སྟེ། །ཐུགས་རྗེ་ཆེན་པོའི་སྒོ་ནས་ཁོང་གར་སྐྱེའི་རྨི་ལམ་བརྟགས་པས་ཀྱང་ཟངས་མདོག་དཔལ་རིར་སྐྱེ་བའི་རྟགས་གསལ་པོར་བྱུང་། ཕྱིས་མི་འགྱུར་རྡོ་རྗེས་གསུང་གིས་ཁོང་རྒྱལ་པོ་ཁྲི་སྲོང་
གི་ཧོར་འདྲ་བསམ་ཡས་བཞེངས་དུས་འུ་ལག་པ་རྣམས་བརྡུང་བཙོག་བྱེད་མཁན་འདོད་རྒྱལ་ཞེས་བྱ་བ་གཅིག་རེད། ད་ལྟ་ཨོ་རྒྱན་གྱི་དྲུང་ན་བཞུགས་གདའ། ད་དེ་ལོ་བརྒྱ་ཙམ་ན་རིག་འཛིན་གྱི་ས་ཐོབ་ནས་སྤྲུལ་པ་གཅིག་རིགས་རྒྱུད་འདི་ལ་འཁྲུངས་ཏེ་རང་གི་ཆོས་རྒྱུད་འཛིན་པ་གཅིག་འོང་བར་གདའ་གསུངས་སོ། །ཁོང་ལ་སློབ་མ་ཡང་བླ་མ་ལྔ་ཙམ་དང་། སྔགས་པ་བསྙེན་སྒྲུབ་ཐོན་པ་ལྔ་ཙམ་བྱུང་ངོ་། །དེ་ལ་བདག་གིས་ཐུགས་རྗེ་ཆེན་པོ་འདི་དབང་རྫོགས་ལུང་རྫོགས་སུ་ཞུས་སོ། །དེའི་བརྒྱུད་པ་ནི་ཚེ་དབང་གྲགས་པ། ཤཱཀྱ་བཀྲ་ཤིས། མཁར་དྲུང་བསོད་ནམས་བཀྲ་ཤིས། ཚེ་ཆོག་བླ་མ་པདྨ་དབང་ཕྱུག །སྔགས་འཆང་བཀྲ་ཤིས་དབང་ཕྱུག །སྦས་པའི་རྣལ་འབྱོར་ཀརྨ་དོན་ཡོད། དེས་བདག་ལ་སྟེ། ཉེ་རྒྱུད་ལ་མཁར་དྲུང་མི་དགོས་སོ། །ཡང་ན་ཚེ་དབང་གྲགས་པ་ནས། སོ་པ་མགོན་པོ་རྡོ་རྗེ། དྲུང་མདོ་སྡེ་རྒྱ་མཚོ། མཁར་དྲུང་དང་པདྨ་དབང་ཕྱུག་གཉིས་ཀ་ལའོ། ཡང་ཚེར་ལུང་བ་འདི་སངས་རྒྱས་མོས་པའི་སྤྲུལ་པར་རྣམ་ཐར་རྣམས་སུ་འདུག་པས་བྱིན་རླབས་ཆེ་བར་བསམས་ནས། ཐུགས་རྗེ་ཆེན་པོ་གསང་འདུས་གསང་
སྒྲུབ་ཀྱི་ལུང་ཞུ་ཝིག་བྱས་པའི་བརྒྱུད་པ་ནི། རཏྣ་གླིང་པ། ཀཿཐོག་ནམ་མཁའ་སེང་གེ །བྱང་ཆུབ་སེང་གེ །བཀྲ་ཤིས་རྒྱ་མཚོ། དཀོན་མཆོག་བློ་གྲོས། ཀརྨ་རབ་གསལ། ལུང་རིགས་ཉི་མ། ཀརྨ་སྒྲུབ་བརྒྱུད།བསྟན་པ་རྣམ་རྒྱལ། བདག་རཱ་ག་ཨ་སྱའོ། ། ་་་ཡང་གཏེར་སྟོན་བདུད་འདུལ་རྡོ་རྗེ་ལ་འདིའི་གཏོར་དབང་ཞུས་སོ། བརྒྱུད་པ་གོང་མ་དེའི་བླ་མ་དེ་དག་གི་ལུང་བྱུང་ཡང་། ཐུགས་རྗེ་ཆེན་པོ་གསང་བ་འདུས་པའི་ཞལ་གདམས་ལས། མ་གཅིག་མཚོ་རྒྱལ་གྱིས་གསུངས་པ། མ་འོངས་གཏེར་ལ་མོས་པའི་གང་ཟག་རྣམས་། །དེང་སང་གུ་རུའི་ཞལ་མཐོང་སྨོན་ལམ་བཏབ། །ཐམས་ཅད་ལས་ཅན་ཡིན་པས་དགའ་བ་བསྒོམ། །ཁོ་མོའི་ཚིག་འདི་རིན་ཆེན་གསེར་བས་དཀོན། །ཞེས་དང་། །ལུང་བསྟན་བཀའ་རྒྱ་མར། མདོར་ན་ཨོ་རྒྱན་ངའི་བསྟན་ཆོས་རྣམས་ལ། །གཞུང་བཞིན་སུ་དང་སུ་ཡིས་སྤྱོད་པ་ཀུན། །ཐམས་ཅད་ང་ཡི་སྤྲུལ་པ་ཡིན་པར་ངེས། །ཕྱི་རབས་ཀུན་གྱིས་ཡིད་གཉིས་ཐེ་ཚོམ་སྤོངས། །གུས་པས་བཀུར་སྟི་ཕུ་དུད་འབྲེལ་པ་ཐོགས། །ཞེས་གསུངས་པ་ལྟར་ཡིན་པར་ངེས་སོ། །ཡང་སྤྲུལ་སྐུ་མི་འགྱུར་རྡོ་རྗེ་ལ་འདིའི་དབང་
ལུང་ཐམས་ཅད་ཕུལ་བ་ཡིན་ཀྱང་། ཁོང་རནྣའི་ཆོས་བདག་ཏུ་ལུང་བསྟན་ཡོད་པ་ལྟར། རྨོང་ལམ་དུ་རཏྣ་གླིང་པ་ཡབ་ཡུམ་གཉིས་བྱོན་ནས། དབང་བཞི་ཆགས་ལམ་ལྟར་བསྐུར་རཏྣའི་གཏེར་ཆོས་ཐམས་ཅད་རྫོགས་པར་གནང་། ཕྱིར་ནངས་རཏྣ་གླིང་པ་དངོས་སུ་བྱོན་ནས་རཏྣ་གླིང་པ་ཉིད་ཀྱི་བླ་སྒྲུབ་ཕྱི་ནང་གསང་གསུམ་གནང་གདའ་བས། བཀའ་བབས་བརྒྱུད་པ་ཉེ་བསམས་ནས་ཐུགས་རྗེ་ཆེན་པོའི་གཏོར་དབང་དང་པོད་དབང་ཞུས་སོ། །ཁོང་གིས་གསུངས་པའི་ཐུགས་རྗེ་ཆེན་པོ་ཕྱི་ནང་གསང་གསུམ་གྱི་ཞལ་གདམས་གེགས་སེལ་སོགས་གདམས་ངག་ཁྱད་པར་ཅན་ཡང་ཡོད་དོ། །བདག་གི་རྨི་ལམ་དུ་རྒྱལ་དབང་བཅུ་པ་ལ་ཡིག་བདུན་གྱི་ལུང་ཐོབ་པ་ནི་རྟེན་འབྲེལ་བཟང་སྙམ་མོ། །དེ་ལྟར་བརྒྱུད་པ་བཞི་ཙམ་ལས་ཐོབ་པའི་དབང་མོ་ཆེ་འདི་ལྟ་བུ་ཐོབ་པའི་ཕན་ཡོན་ནི། གསང་བ་འདུས་པའི་རྒྱུད་ཉིད་ལས། ཀྱེ་སྟོན་པ་བཅོམ་ལྡན་འདས། །ས་ལམ་རིམ་པ་དབང་གིས་འགྲོད། །སྨིན་བྱེད་དབང་བསྐུར་གང་ལྟར་ལགས། །ཞེས་ཞུས་པས་དབང་གི་ལེའུ་གསུངས་ནས། དེ་ནས་འགྲོ་འདུལ་དབང་ཡང་བསྐུར། །ལྷ་བསྒོམ་སྔགས་ཀྱི་
བཟླས་ལུང་སྦྱིན། །ཁྱད་པར་ཡོན་ཏན་ཆེ་བ་བརྗོད། །ལེགས་འོང་སྐལ་ལྡན་བུ་མཆོག་རྣམས། །ཡིག་བདུན་འདྲེན་ལ་བརྩོན་པ་བསྐྱེད། །དུས་གསུམ་བདེ་གཤེགས་སྐུ་གསུང་ཐུགས། །ཡོན་ཏན་ཕྲིན་ལས་མ་ལུས་པ། །ཡིག་བདུན་དག་ལ་ཡང་དག་རྫོགས། །དབང་ཐོབ་ཡོན་ཏན་མཐའ་ཡས་ཏེ། །ཞེས་སོགས་ནས། ཡིག་བདུན་དབང་དང་ལུང་ཐོབ་མིས། །ལས་དང་ལས་ཀྱི་རྣམ་སྨིན་རུང་། །མི་དགེ་བཅུ་དང་མཚམས་མེད་ལྔ་། །དུས་འདི་ཉིད་ལ་སྦྱང་བར་བྱེད། །ཅེས་དང་། དེ་བཞིན་དུ་ཡང་སྙིང་འདུས་པའི་རྒྱུད་ལས་ཀྱང་། དེ་ནས་དབང་གི་ཕན་ཡོན་བརྗོད་པ་ནི། ཨེ་མ་ཧོ། ལེགས་འོང་བུ་ཁྱོད་སྐལ་བ་བཟང་། །དེ་ལྟར་དབང་རྫོགས་སྤྱན་རས་གཟིགས། །ཁྱོད་ནི་སངས་རྒྱས་སྐུ་གསུམ་འཆང་། །མཁའ་མཉམ་འགྲོ་དོན་ད་སྤྱོད་ཅིག །དུས་གསུམ་བདེ་གཤེགས་སྐུ་གསུང་ཐུགས། །ཡོན་ཏན་ཕྲིན་ལས་མ་ལུས་ཀུན། །ཡིག་བདུན་དབང་ལ་ཡང་དག་རྫོགས་། །དབང་ཐོབ་ཡོན་ཏན་མཐའ་ཡས་ཏེ། །རྣམ་ཀུན་མཁྱེན་པའི་སངས་རྒྱས་ཀྱིས། །སྟོང་གསུམ་འཇིག་རྟེན་ཁམས་འདི་དག །ཏིལ་འབྲུར་བསིལ་ནས་བགྲང་ན་
འཛད། །འདི་ཐོབ་ཡོན་ཏན་ཟད་མི་ཤེས། །ཡིག་བདུན་དབང་ཐོབ་འཛིན་བཟླས་མི། །ལས་དང་ལས་ཀྱི་རྣམ་སྨིན་རུང་། །མི་དགེ་བཅུ་དང་མཚམས་མེད་ལྔ། །དུས་འདི་ཉིད་ལ་སྦྱོང་བར་བྱེད། །ཅེས་ཆོས་སྐུ་སྣང་བ་མཐའ་ཡས་ཀྱིས་བཀའ་སྩལ་ཏོ། གཞན་ཡང་དབང་བསྐུར་རྒྱལ་པོའི་རྒྱུད་ལས། དབང་བསྐུར་བ་ཡི་ཡོན་ཏན་ནི། །ཡང་དག་ཏུ་ནི་བཤད་བྱ་སྟེ། །ཆོས་ཀྱི་འཁོར་ལོ་བསྐོར་བ་ཡང་། །དབང་བསྐུར་ནས་ནི་བསྐོར་བར་བྱ། །སྒྲུབ་པ་ཡི་ནི་དཀྱིལ་འཁོར་ཡང་། །དབང་བསྐུར་ནས་ནི་བསྒྲུབ་པར་བྱ། །ཕྲིན་ལས་ཐམས་ཅད་བྱ་བ་ཡང་། །དབང་བསྐུར་ནས་ནི་གནང་བར་བྱ། །དབང་བསྐུར་གནང་བ་ཐོབ་ནས་ནི། །གང་བརྩམས་ལས་ནི་འགྲུབ་པར་འགྱུར། །སངས་རྒྱས་བྱང་སེམས་ཐམས་ཅད་ལ། །ཡིད་ལ་ཅི་དགའ་དབང་ལས་འགྲུབ། །མ་མོ་མཁའ་འགྲོ་བྲན་བཞིན་འཁོར། །ཚེ་དང་ལོངས་སྤྱོད་ཕུན་སུམ་ཚོགས། །འཇིག་རྟེན་འདི་ཡི་ཡོན་ཏན་ཡང་། །བསམ་གྱིས་མི་ཁྱབ་འགྲུབ་པར་འགྱུར། །དམྱལ་བར་སྐྱེ་བར་ངེས་ན་ཡང་། །དབང་བསྐུར་པ་ཡི་ཡོན་ཏན་གྱིས། །དམྱལ་བར་ནམ་ཡང་
མི་ལྟུང་སྟེ། །ངན་སོང་གསུམ་པོ་ཀུན་སྤངས་ནས། །བླ་མེད་འབྲས་བུ་འགྲུབ་པར་འགྱུར། །ཚེ་ཟད་འཆི་བར་ངེས་ན་ཡང་། །དབང་འདི་རབ་ཏུ་བསྐུར་ནས་ནི། །ཚེ་ཚད་དཔག་མེད་འཐོབ་པར་འགྱུར། །འཇིག་རྟེན་པ་ཡི་ཡོན་ཏན་ནི། །རང་བཞིན་རྣམ་གསུམ་ཡན་ཆད་ནས། །ཀུན་ཏུ་བཟང་པོའི་དགོངས་པ་ཀུན། །སེམས་ཀྱིས་བསམ་པ་ལྷུན་གྱིས་འགྲུབ། །ཆོས་ཀྱི་དབྱིངས་སུ་སངས་རྒྱས་ཏེ། །འབྲས་བུ་རྫོགས་པའི་ངང་ལ་གནས། །ཞེས་གསུངས་པ་དང་། ཀློང་གསལ་ཉི་མའི་རྒྱུད་ལས། །དབང་བསྐུར་རིགས་ཀྱི་བུ་དེ་ནི། །ཚེ་འདིར་བསམ་པ་ཀུན་འགྲུབ་ཅིང་། །ཕྱི་མ་མངོན་པར་རྫོགས་སངས་རྒྱས། །ཞེས་དང་། རྡོ་རྗེ་སྙིང་པོའི་རྒྱུད་ལས། དབང་བསྐུར་པ་ཡི་ཆོ་ག་མཆོག ། གང་གི་ལེགས་པར་བྱས་གྱུར་ན། །དེ་ནི་སངས་རྒྱས་ཉིད་དུ་འགྲུབ། །ཅེས་དང་། ཨོ་རྒྱན་རིན་པོ་ཆེའི་ཞལ་ནས། འདི་ཉིད་མཐོང་ཐོས་རེག་པ་འམ། །རླུང་གི་ཕྱོགས་སུ་སྐྱེས་པ་ཡང་། །མ་སྨིན་པ་ནི་སྨིན་བྱེད་དེ། །སྐད་ཅིག་ཉིད་ལ་གྲོལ་གྱུར་ཏེ། །རིག་འཛིན་ཐོབ་པར་སྨོས་ཅི་དགོས། །ཞེས་གསུངས་སོ། །ཞེས་དེ་དག་གི་དོན་བཀྲོལ་ཏེ་
བཤད་པར་བྱའོ། །སྤྱིར་གཏེར་ཆོས་རྣམས་དུས་སྐབས་སོ་སོར་དར་ནས། གཏེར་ཆོས་མཁའ་འགྲོས་གདན་འདྲེན་པས། སངས་རྒྱས་བླ་མ་སོགས་སྔ་སྔ་རྣམས་ཀྱི་དཔེ་ཆ་ཡང་མེད་པ་ཆེས་མང་བར་འདུག་ཅེས་བྱང་བདག་པོས་སོགས་གསུངས། དེ་བཞིན་དུ་ཉང་དང་ཆོས་དབང་སོགས་ཀྱང་མི་རབས་བརྒྱད་ནས་ཉམས་པ་དང་། པདྨ་གླིང་པ་ནི་མི་ལོ་སུམ་ཅུ་ནས་ཉམས་པར་གསུངས་ཀྱང་། རཏྟ་ལུགས་དང་ཐུགས་རྗེ་ཆེན་པོ་འདི་མཐའ་རྒྱས་སུ་འགྲོ་བར་ལུང་བསྟན་ཏེ། གསང་བ་འདུས་པའི་རྒྱུད་ལས། ཁ་བ་ཅན་གྱི་རྒྱལ་ཁམས་སུ། །འགྲོ་མགོན་ཐུགས་རྗེའི་འདུལ་ཞིང་དེར། །ཐུགས་རྗེའི་སྤྲུལ་སྲས་རྒྱུད་འཛིན་གྱིས། །ཡིག་བདུན་བསྟན་པ་འཛིན་སྐྱོང་སྲུང་། །རིམ་པ་བཞིན་དུ་དོན་གཉིས་སྤྱོད། །ཅེས་དང་། ལང་གྲོའི་ཞུས་ལན་ལས། བུ་བས་ཀྱང་ཡང་སློབ་རྗེས་སློབ་ཀྱི་དུས་ནས་མར་ལ་བསྟན་པ་མཐའ་རྒྱས་སུ་འགྲོ་བར་འགྱུར་རོ། །ཞེས་དང་། ལུང་བསྟན་ཆེན་པོ་ནས། རཏྣ་གླིང་པ་ཉིད་ལུང་བསྟན་ནས། སྐལ་ལྡན་དེ་ཡི་གདུལ་བྱ་རྗེས་འཇུག་རྣམས། །སློབ་མ་ནས་ཡང་སློབ་རྗེས་སློབ་དུས། །རིམ་པ་བཞིན་དུ་བསྟན་
པ་མཐའ་རྒྱས་འགྱུར། །ཕྱོགས་མཚམས་མཐའ་དབུས་ཀུན་ཏུ་ཆོས་འདི་དར། །སྙིགས་མའི་འགྲོ་བ་ཕྱམ་གཅིག་ཐར་ལམ་བགྲོད། །ཕྲད་ཆོག་མཐོང་གྲོལ་འགྱུར་ཏེ་ངོ་མཚར་ཆེ། ཞེས་དང་། དག་སྣང་ཡིད་བཞིན་ནོར་བུའི་སྐབས་སུ། མ་གཅིག་མཚོ་རྒྱལ་གྱི་དུང་དཀར་གཅིག་དང་། རྡོ་རྗེ་དྲིལ་བུ་གཅིག་གནང་བ་ཨོ་རྒྱན་ལ་ཕྱག་རྟེན་ཕུལ་བས། ཨོ་རྒྱན་ཆེན་པོའི་ཞལ་ནས། ཁྱོད་ཀྱི་རྟེན་འབྲེལ་བཟང་། རྡོ་རྗེ་འདིས་ཁྱོད་ཀྱི་བུ་སློབ་ཡང་སློབ་བརྒྱུད་པར་བཅས་པ་རྣམས། མི་འགྱུར་རྡོ་རྗེ་ལྟ་བུའི་དོན་རྟོགས་པས། དུང་འདིས་ཁྱོད་ཀྱིས་སྤྱོད་པའི་གཏེར་ཆོས་འདི་རྣམས་ཀྱིས་མི་ཁྱབ་པ་དང་། མ་ཐོས་པ་མེད་པ་གཅིག་འོང་བ་ཡིན། དྲིལ་བུ་འདིས་ཐབས་ཤེས་དབྱེར་མེད་ཀྱི་དོན་གྱིས། ཁྱོད་འཁོར་བཅས་འདིར་མྱུར་དུ་འོང་བར་འདུག་གོ །ཞེས་སོགས། དེས་ན་ད་རུང་བྱིན་རླབས་ཀྱི་སོ་མ་ཉམས་པ་དང་། མ་འོངས་པ་ན་ཡང་ཆོས་འདི་དར་ཞིང་། ཕྱོགས་ཀུན་ཏུ་འཕེལ་བའི་རྟེན་འབྲེལ་ཡོད་པས། མཐའ་བཟང་ཞིང་བསྟན་པའི་རྒྱུན་རིང་བ་དང་། འབྲེལ་ཚད་དོན་དང་ལྡན་པ་ཡིན་ནོ། །ཞེས་པ་ཐུགས་རྗེ་ཆེན་པོའི་དབང་ཆེན་པོའི་མཚམས་སྦྱོར་ཆེན་པོ་རྣལ་འབྱོར་པ་
རཱ་ག་ཨ་སྱས་སྦྱར་བ་ལ། ཉེས་པ་མཆིས་ན་ལྷ་དང་བཀའ་སྲུང་ཚོགས་ལ་བཤགས་ཤིང་དགེ་བས་སེམས་ཅན་ཐམས་ཅད་མྱུར་དུ་སྨིན་ཅིང་གྲོལ་ནས་བདེ་བ་ཅན་གྱི་ཞིང་ཁམས་སུ་སྐྱེས་ཏེ་འཕགས་པ་ཐུགས་རྗེ་ཆེན་པོ་དང་། སྐུ་གསུང་ཐུགས་ཡོན་ཏན་ཕྲིན་ལས་མཉམ་པར་གྱུར་ཅིག །མངྒ་ལཾ། བྷ་ཝནྟུ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།