ཐུགས་རྗེ་ཆེན་པོ་གསང་འདུས་ཀྱི་དབང་དང་ལས་བྱང་སོགས་ཀྱི་ཟིན་བྲིས།
ཐུགས་རྗེ་ཆེན་པོ་གསང་འདུས་ཀྱི་དབང་དང་ལས་བྱང་སོགས་ཀྱི་ཟིན་བྲིས་བཞུགས་སོ།།
ཐུགས་རྗེ་ཆེན་པོ་འགྲོ་བ་སྐྱོབ་ལ་ཕྱག་འཚལ་ལོ། །ཐུགས་རྗེ་ཆེན་པོ་གསང་བ་འདུས་པའི་དབང་རྒྱས་པར་བསྐུར་བ་ལ། རབ་ནི་སྒྲུབ་ཆེན་གཞུང་ལྟར་བཙུགས་པའི་སློབ་མ་སྟ་གོན་སྐབས་སུ། དབང་ཞུ་བ་ཐམས་ཅད་ལ་སྐུ་ཤ་དཔུང་སྐུད་སོགས་སློབ་མ་སྟ་གོན་བྱས། དེ་ནས་དབང་ཞུ་བ་གསར་པ་མ་ཡིན་པའི་སྔར་དབང་ཐོབ་པ་རྣམས་ཀྱིས་ཞག་བདུན་ནམ་ལྔའམ་ཐ་མ་གསུམ་ཙམ་སྔགས་རྒྱུན་དང་སྒྲུབ་ཆེན་བཙུགས། དེ་ནས་སྒྲུབ་ཆེན་དབང་གི་དུས་སྐབས་སུ། དབང་ཆེན་མོ་གཞུང་ལྟར་བསྐུར་ཏེ་འདི་ནི་ཁྲོམ་དབང་བྱེད་སྲོལ་ལོ། །སངས་རྒྱས་སྟོང་དབང་སྐབས་སུ་རྒྱས་པར་
སངས་རྒྱས་སྟོང་སྐུ་རེ་རེ་ནས་འགྲིམ། འབྲིང་སངས་རྒྱས་བརྒྱའི་སྐུ་བྱས་ལ། བརྒྱ་རེའི་དབང་ཚིག་མཚམས་སུ་སྐོར་རེ་འགྲིམས་པས། ལན་བཅུས་སྟོང་རྫོགས་འོང་ངོ་། །ཤིན་ཏུ་བསྡུ་ན་དུས་གསུམ་སངས་རྒྱས་ཀྱི་སྐུ་བྱས་ལ་ལན་གསུམ་འགྲིམ་སྟེ། མ་འོངས་སངས་རྒྱས་དབང་བསྐུར་རོ། །ཞེས་སོགས་བསྡུས་ཏེ་བརྗོད། ཤིན་ཏུ་བསྡུ་ན་སངས་རྒྱས་སྟོང་གི་དབང་བསྐུར་རོ། །ཞེས་མཚན་འབུམ་དཔེ་མགོ་ཐོག་ཏུ་འགྲིམ་མོ། །དེ་ནས་སྒྲུབ་ཆེན་གཞུང་གི་སྐུ་གསུང་ཐུགས་ཡོན་ཏན་གྱི་རྗེས་གནང་། ཚེ་འགུགས་ལ་ཚེའི་ལྷ་མོ་འཆམས་དང་བཅས་འཇུག་ཚེ་དབང་
སོགས་སྒྲུབ་ཆེན་གཞུང་ན་ཡོད་ལྟར་བྱ། དེ་ནས་དམ་ཚིག་གཙང་ཞིང་གསང་འདུས་ཉམས་སུ་ལེན་པ་ཉུང་ཤས་ལ་ལྐོག་ཏུ་མཆོག་དབང་གསུམ་བསྐུར་རོ། །རྒྱལ་ཐོ་བསྡུ་བ་སོགས་རྗེས་ཐམས་ཅད་ཚང་བར་བྱས་ཏེ། སྟ་གོན་ཞག་གསུམ་ཙམ་མམ། དབང་སྒྲུབ་སྔགས་རྒྱུན་ཞག་བདུན་ཙམ། ཉིན་རེ་དབང་སྣ་གང་འོས་འགྲིམས་པས་བདུན་གསུམ་ཙམ་རྗེས་ཆོག་འཆམས་དང་བསྦྲགས་པས། གནས་སྲུང་བ་ཞག་གསུམ་སྟེ། ཟླ་བ་གཅིག་ལ་སྒྲུབ་ཆེན་ཁྲོམ་དབང་རྫོགས་སོ། །སྒྲུབ་ཆེན་དང་མི་སྦྲེལ་མགྱོགས་དབང་ལ། སྟ་གོན་དང་རྒྱལ་ཐོ་མཚམས་གཅོད་སློབ་མ་སྟ་གོན་ཞག་གཉིས། ཕྱིར་ཉིན་དབང་བསྐུར་བས་ཞུ་མི་ཉུང་ན་ཉིན་གཅིག་ལ་རྫོགས། མང་ན་ཉི་མ་གཉིས་ཙམ་ཐོག་གོ །མགྱོགས་དབང་རང་བསྐུར་ན་གསར་མའི་དབང་ལྟར་མི་གསུམ་མམ་ལྔ་དྲུག་ལ་ནི་ཉིན་གཅིག་རྫོགས་ཏེ། རྙིང་མའི་ལུགས་ལ་ཀུ་ཤ་སོགས་སློབ་མ་སྟ་གོན་ཡང་བྱེད་སྲོལ་ཡོད་དོ། །བཀའ་རྫོགས་ཞུ་ན་གཏོར་དབང་བསྐུར། ཁྲོམ་དབང་ལ་ཡང་བསྐུར་རོ། །དེ་ལྟར་དབང་རྒྱས་བསྡུས་གང་བསྐུར་ཡང་། ལས་བྱང་ཚར་གཅིག་གིས་བདག་མདུན་བུམ་གསུམ་གཏོར་མར་དབང་ལྷར་བསྐྱེད་དང་བཅས་
པ་དུས་གཅིག་ལ་བསྐྱེད་ཆོག་གི །གསར་མ་ལྟར་མངོན་རྟོགས་སོགས་འདོན་མི་དགོས་པ་ནི་རྙིང་མ་སྤྱི་ཡི་ལུགས། ཁྱད་པར་རཏྣ་ལུགས་ཀྱི་ཁྱད་ཆོས་ཡིན་ནོ། །གཏན་ནས་སོ་སོར་མི་སྲིད་པ་ནི་མིན་ཏེ་རཏྣ་ལུགས་སྒྲུབ་ཐབས་འགའ་ཟུང་སོ་སོར་བསྐྱེད་ཅིང་ལྷ་གྲངས་མཉམ་པ་ཡང་ཡོད་དོ། །རབ་སློབ་དཔོན་དེས་གསང་འདུས་བསྙེན་སྒྲུབ་ཐེམ་པ། ཐ་ན་ཡང་ཡི་དམ་གང་རུང་ཞིག་གི་བསྙེན་སྒྲུབ་མ་ཐེམས་པ་ནི་མི་རུང་ངོ་། །དང་པོ་ཆོ་ག་དང་དབང་བསྙེན་བརྒྱ་རྩ་བརྒྱད་ཡན་གང་འགྲུབ་ཚར་ནས་ཏིང་ངེ་འཛིན་གྱི་དབང་བླང་། རྩ་སྔགས་ལ། ཀཱ་ཡ་ཨ་བྷི་ཥིཉྩ་ཨོ། ཝཱཀ་བྷི་ཥིཉྩ་ཨཱ༔ ཙིཏྟ་ཨ་བྷི་ཥིཉྩ་ཧཱུཾ། སརྦ་ཨ་བྷི་ཥིཉྩ་ཧཱུྃ༔ ཞེས་བདུན་ནམ་ཉེར་གཅིག་ཙམ་བཟླས་ཚེ། མདུན་བསྐྱེད་ཀྱི་སྤྱི་མགྲིན་སྙིང་ག་ལྟེ་བ་བཞི་ནས། འོད་ཟེར་དཀར་དམར་མཐིང་ལྗང་བཞི་འཕྲོས་རང་གི་གནས་བཞིར་ཐིམ་པས་དབང་བཞི་ཐོབ་པར་བསྒོམས་པས་འཐུས་ཀྱི། གསར་མ་ལྟར་དབང་ཚང་མ་རང་གིས་ལེན་སྲོལ་ནི་རཏྣ་ལུགས་ལ་མེད། རྙིང་མ་ཕལ་ཆེར་ཡང་དེ་ལྟར་ཡིན་ཀྱང་། དགོངས་འདུས་སོགས་གཏེར་རྒྱས་པ་ལ་ནི་རྒྱས་པར་གསར་མ་ལྟར་དང་བསྡུ་ན་ཏིང་ངེ་འཛིན་གྱིས་ཆོག་པར་
གསུངས་གདའོ། །དབང་ཚར་ན་ཏིང་ངེ་འཛིན་གྱིས་དབང་བླང་། བསྙེན་པ་ཅུང་ཞིག་བཟླས་པས་རང་གི་ནུས་པ་མི་ཉམས་པའི་མན་ངག་གོ །སྒྲུབ་ཆེན་དང་འབྲེལ་བའི་དབང་བྱིན་རླབས་ཅན་བསྐུར་ན་དབང་རྫས་རྣམས་ཐོག་མར་རང་གི་མགོ་ཐོག་ཏུ་བཞག་ཅིང་གཞན་ལ་འགྲིམས་པས་དངོས་གྲུབ་གཞན་ལ་མི་འཚལ་ལོ། །གཏོར་དབང་ལ་རྒྱས་བསྡུས་གཉིས་ཡོད་པ་གཞུང་ན་གསལ་ལྟར་བསྡུས་པ་ཁྲོམ་ཆེན་ལ་ལན་གཅིག་འགྲིམ་ཆོག་གོ །མཆོག་དབང་སྐོར་གསུམ་གསང་དབང་རྫ་ས་མ་ཎི་རིལ་བུ་བྷནྡྷའི་བདུད་རྩི་དང་བསྲེ། ཤེས་རབ་ཡེ་ཤེས་དབང་མུ་ཏྲའི་ཙཀྲི་གཏད་གཞན་གཞུང་ལྟར་རོ། །མཇུག་དབང་གི་བཤད་པ་དེ་སོ་སོར་སྦྱར་ཤེས་ན་ལེགས། མ་བྱུང་ན་མཇུག་ཏུ་བརྗོད་པས་འཐུས་སོ། །དམ་ཅན་བཀའ་གཏད་གསོལ་ཀ་རྒྱས་པར་བྱས་ལ་གཞུང་ལྟར་ལས། དབང་གི་སྔོན་དུ་གསོལ་གདབ་བདུན་རྣམ་དག་དེ་ནས་སློབ་མ་རྟ་མགྲིན་ནམ་ཕྱག་རྡོར་བསྐྱེད་ལ་གཞུང་ལྟར་རོ། །མཇུག་ཏུ་གསོལ་ཉོབ་མའི་འདོད་གསོལ་སྦྱར་རོ། །གསང་འདུས་རིང་རྐང་ལ་བཀའ་སྲུང་གཞན་ཚོ་བཀའ་གཏད་མ་གསུངས་ཀྱང་རཏྣ་ལུགས་ཀྱི་བཀའ་སྲུང་སྤྱིའི་བཀའ་གཏད་གུ་དྲག་དབང་འབྲིང་ལ་སྦྱར་ཕྱིར་བཀའ་གཏད་
བཀའ་བསྒོ་འདྲ་བ་བྱས་པ་ལ་འགལ་བ་མེད་དོ། །དེ་བྱ་ཚུལ་སློབ་དཔོན་ལྷར་གསལ་བ་སློབ་མ་ལྷར་གསལ་བ་ལ་བྲན་དུ་བཀའ་བསྒོ་བའི་ཚུལ་དུ་བཀའ་སྲུང་ཐམས་ཅད་ཀྱི་གསོལ་ཀ་རྒྱས་པར་བྱས་རྗེས། གཏོར་མ་ཀ་ཏོ་ར་འདྲ་ཞིག་ཏུ་ཐམས་ཅད་བཞག་པ་སློབ་མའི་ཕྱག་ཏུ་བཟུང་བཅུག །བཀའ་སྲུང་རྣམས་ཀྱི་སྔགས་བརྗོད་མིང་བརྗོད་ནས། རྡོ་རྗེའི་སློབ་མ་འདི་མཐོ་སར་ཉིན་གྱི་བྱ་ར་གྱིས་སོགས་བཀའ་བསྒོ་བྱའོ། །སློབ་མས་ཆོས་སྐྱོང་དུ་བསྟེན་པར་ཁས་བླངས། མཎྜལ་འབུལ་ལོ། །དབང་གི་ཟིན་བྲིས་སོ།། སྤྱིཤ ། ༈ དེ་ནས་ལས་བྱང་གི་ཟིན་བྲིས་ནི། སྐྱབས་སེམས་གཏེར་སྟོན་གྱིས་རྒྱས་པར་མཛད་པ་ཡོད་ཀྱང་། ཁྲིད་དུས་འདྲ་མ་གཏོགས་ལས་བྱང་ལ་ཀ་དཔེ་མི་དགོས། ལས་བྱང་ནང་གི་དེས་འཐུས་། སྔོན་འགྲོ་གཏོར་མ་དང་པོ་སྒྲུབ་པ་ལ་འཇུག་ཁ་རྒྱས་པར་གཞན་གང་རུང་ལྟར་བྱའོ། །རྒྱུན་དུ་ལྕོག་རྡོག་གཅིག །ཆངས་བུ་གཅིག་བྲན་ལ། ཨ་ཀཱ་རོས་བྱིན་གྱིས་རློབས། སཾ་བྷ་རིས་བསྔོས་ལ་སྒྲུབ་ཆེན་ནང་གི་ཉུང་ངུ་དེས་ཆོག་གོ །དེ་ནས་ལས་བྱང་ལྟར་མཚམས་བཅད། །དེ་ནས་སྒྲུབ་ཆེན་དུས་བར་ཆད་འབྱུང་དོགས། སྐྲག་ན་རྒྱལ་ཆེན་བཞིའི་གཏོར་
འབུལ་དཀར་གཏོར་གཅིག་ལ་བསྔོ། སྒོ་སྲུང་ཁྲོ་བོ་གཉིས་ལ་དམར་གཏོར་ཆུང་ངུ་བསྔོ། དེ་ནས་ལས་བྱང་ལྟར་སྲུང་འཁོར་བསྒོམ་སྟེ། རྒྱས་པར་ཁྲོ་བཅུའི་མཚམས་གཅོད་འདོན། །སྒྲུབ་ཆེན་དུས་མིན་པར་ནི་མི་དགོས། བུམ་སྒྲུབ་རྒྱུན་པ་ལ་ཡང་མི་དགོས། དེ་ནས་གཞུང་ལྟར་ལས་སྒྲུབ་ཐབས་གང་ཡིན་མངོན་རྟོགས་འཛུད་དེ། ཐུམ་སྒྲུབ་དུས་ཐུམ་སྒྲུབ་མངོན་རྟོགས་སོ། །ལྷ་བསྐྱེད་དུས་བདག་དཀྱིལ་འཁོར་ཚང་མ། རྡུལ་ཚོན་ནམ་རས་བྲིས་དཀྱིལ་འཁོར་ཚང་མ། གཏོར་མ་རིན་ཆེན་འབར་བ་ལ་དཀྱིལ་འཁོར་ཚང་མ་གཅིག །བུམ་པའི་ནང་དུ་ལྷ་ཚོགས་ཚང་མ་དེ་ཡང་བུམ་པ་ལྔའམ་དགུ་ཡོད་ན་སོ་སོར་ཕྱོགས་ཕྱོགས་ཀྱི་ལྷ་བསྒོམ། རིལ་བུ་བུམ་པར་རིལ་བུ་རེ་རེ་ལ་ཐུགས་རྗེ་ཆེན་པོ་རེ་རེ་བསྒོམས་ནས། སྤྱན་དྲངས་ཚེ་བདེ་བ་ཅན་དང་པོ་ཏ་ལ་ནས་ལྷ་ཚོགས་དཔག་མེད་སྤྱན་དྲངས་ལ་བདག་མདུན་བུམ་པ་རིལ་བུ་བུམ་པ་རྣམས་ལ་བསྟིམ། དེ་ནས་ཐུགས་ཀ་ནས་མཆོད་པའི་ལྷ་མོ་དཔག་མེད་སྤྲུལ་ལ་ལྷ་སོ་སོར་ལྷ་མོ་མང་པོས་བཞུགས་གསོལ་མཆོད་བསྟོད་སོགས་བྱེད་པར་བསྒོམ་སྟེ། སྨན་རཀ་གཏོར་མ་བདུད་རྩི་དང་རཀྟ་དང་འདོད་ཡོན་སྣ་ཚོགས་པའི་རྒྱ་མཚོ་ལས། ལྷ་མོ་རྣམས་ཀྱིས་
བྷནྡའི་སྐྱོགས་ཀྱིས་བཅུས་ཤིང་བདག་མདུན་སོ་སོ་ལ་མཆོད་པར་བསྒོམ་པར་བྱའོ། །དེ་ནས་ལས་བྱང་གི་འཛབ་དགོངས་བཏོན་ལ་སྔགས་རྣམས་ཅུང་ཟད་རེ་སྔགས་མཆོད་ཀྱི་ཚུལ་དུ་བཟླ། དེ་ནས་སྒྲུབ་ཐབས་སོ་སོའི་བུམ་སྒྲུབ་ཀྱི་སྔགས་དམིགས་ལ་འབད་དོ། །དངོས་གྲུབ་ལེན་ཆོག་འདི་གྲོལ་ཁ་བར་མི་དགོས་པས་སྒྱུར། ཆེ་བ་བསྐྱེད་པ་ཡང་བསྒྲལ་ལས་དུས་སྦྱར་བ་ལེགས་པས་སྐྱུར། སྐབས་འདིར་བདེ་མཆོག་ཕག་མོ། གུ་རུ་ཞི་དྲག །གྲོ་ལོད། རྟ་མགྲིན་ལ་སོགས་པ་ཡི་དམ་གང་ཡིན་རང་གིས་ཆག་མེད་ཀྱི་དམ་བཅའ་གང་ཡོད་བདག་བསྐྱེད་འདོན་རུང་སྟེ། ཚིག་མེད་དམ་བཅའ་མེད་ན་རང་གཞུང་གི་རྩ་བ་ལེགས། དེ་བསྒོམ་ལུགས་ལ་བདག་བསྐྱེད་བསྡུས་ནས་གཞན་བསྒོམ་མི་རུང་། གནས་འགྱུར་དུས་གཞན་མི་བསྒོམ་སྟེ། རང་གསང་འདུས་ཀྱི་དཀྱིལ་འཁོར་ཚང་བར་བསྒོམ་ཡོད་པའི་དཀྱིལ་འཁོར་གཞལ་ཡས་ཁང་གི་ཕྱི་རྡོ་རའི་ནང་གི་བར་ཁྱམས་དེར་བསྒོམ་སྟེ། གསང་འདུས་ལྷ་ཚོགས་རང་ཉིད་ཡིན་ཀྱང་། དེའི་ཐུགས་ཀ་ནས་རང་ཐ་མལ་པའི་ལུས་སུ་ཐོན་ནས། བདག་བསྐྱེད་ཀྱི་དཀྱིལ་འཁོར་གྱི་ནུབ་ངོས་སུ་གནས་ནས་ཀྱང་ཕག་མོ་ལྟ་བུའི་བདག་
བསྐྱེད་ཞིག་བསྒོམ། དེ་བཞག་ནས་དེའི་ཐུགས་ཀ་ནས་རང་ཐོན་ནས་བདེ་མཆོག་ལྟ་བུ་གཅིག་བསྒོམ། དེས་རིག་འགྲེས་ཐམས་ཅད་ཀྱང་རང་ཉིད་ཡིན་པར་མོས་ཤིང་རང་གི་ངོ་བོ་གསང་འདུས་ཀྱི་ཐུགས་ཀར་ཞུགས། དེ་ནས་མདུན་བསྐྱེད་བེར་ནག་ཅན་ཕྱག་བཞི་པ། ལྷ་མོ་སོགས་མདུན་བསྐྱེད་དུ་ཡོད། གཏོར་མགྲོན་ཐམས་ཅད་རིམ་པར་འདོན་ཏེ། མདུན་བསྐྱེད་ཀྱི་དཀྱིལ་འཁོར་གྱི་ནུབ་དང་བྱང་དང་ལྷོ་གསུམ་ནས་ཞལ་རིང་ལ་གྱུ་བར་བསྐྱེད་ལ། སོ་སོའི་གཏོར་ཆོག་འདོན། ཚོགས་མེད། ཆོས་སྐྱོང་གཞན་མེད་ན་འཛབ་དགོངས་རྒྱབ་ནས་དང་། བེར་ནག་བྱེད་ན་དེའི་གཏོར་བསྔོས་སྐབས་སུ་ཀཾ་ཚང་གསང་སྔགས་ནང་གཏོར་འདོན། དེའི་བླ་མའི་གྲལ་འདིའི་བརྒྱུད་རིམ་ཆོས་སྐུ་སྣང་བ་མཐའ་ཡས། །ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། ་མཁའ་འགྲོ་ཡེ་ཤེས་མཚོ་རྒྱལ། གཏེར་སྟོན་རཏྣ་གླིང་པ། རྒྱལ་སྲས་ཚེ་དབང་གྲགས་པ། ཆོས་བདག་ལས་ཅན་ཐམས་ཅད། དྲིན་ཆེན་རྩ་བརྒྱུད་བླ་མ་རྣམས་ཀྱི་ཞལ་དུ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་སྦྱར། ཡི་དམ་སྐབས་སུ། ཨོཾ་མ་ཎི་པདྨེ་ཧཱུཾ་ཧྲཱིཿ ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཡི་དམ་
ཐུགས་རྗེ་ཆེན་པོ་གསང་བ་འདུས་པའི་ལྷ་ཚོགས་རྣམས་ཀྱི་ཞལ་དུ་འབུལ་ལོ། །ཞེས་སྦྱར་བས་འཐུས་ཀྱི། དེ་བཞིན་དུ་རང་གི་གཏོར་བསྔོས་གང་ཡིན་དེའི་ནང་དུ། །དེའི་ཁ་སབ་པས་ཆོག་གོ །དེའི་ཅིའི་ཕྱིར་ཞེ་ན། གཏེར་གཞུང་ནས་ནི། ཧྲཱིཿ སྣང་སྲིད་བདེ་ཆེན་གཏོར་གཞོང་དུ༔ ཞེས་སོགས་ཚིགས་བཅད་དེས་ཆོག་པར་མཛད་འདུག་པས་གསང་འདུས་རང་གཞུང་ལ་གཏོར་བསྔོས་གུད་དུ་མི་དགོས་ལ། རཏྣ་གླིང་པས་མཛད་པའི་ཐུགས་དམ་ནང་གི་གཏོར་མ་དོན་གསལ་སྙིང་གི་ཟེའུ་འབྲུ་ཞེས་བྱ་བ་ཡོད་ཀྱང་། དེ་གསང་འདུས་ཀྱི་གཏོར་བསྔོས་ཁོ་ན་མ་ཡིན། གཏེར་སྟོན་རང་གི་ཐོབ་ཚད་ཀྱིས་བཀའ་གསར་རྙིང་སྤྱིའི་གཏོར་བསྔོས་ཡིན་པས་འདི་ལ་ཆེར་མི་འབྲེལ་ལོ། །དེ་ནས་ཚོགས་ཡོད་ན་བྱེད་ལུགས་འདི་ལ་འཁྲུགས་བཤང་དགོས་ཏེ། དཀྱིལ་འཁོར་གྱི་མདུན་དུ་སྟག་གཟིག་ལྤགས་པ་རབ། མེད་ན་རས་ཀྱི་སྙན་ཁེབས་ཆེན་པོའི་སྟེང་ངམ། ཁྲོམ་ཡིན་ན་གཞི་ཆེན་པོའི་སྟེང་དུ་ཤ་ཆང་ཟན་རྣམས་འཚོགས་ཚད། མཆོད་གཡོག་པ་ལངས་ནས་ཕྱག་གསུམ་འཚལ་ལ། ཟླུམ་ཁྱེར་ཐལ་མོ་སྦྱར་ནས་ཞུ་བ། ཧོ༔ དགོངས་སུ་གསོལ་ལོ། །སོགས་བརྗོད། སློབ་
དཔོན་གྱིས། ཨེ་མ་ཧོ་སོགས་གནང་བ་བྱིན། དེ་ནས་ཚོགས་བྲན་ལ། ཧཱུྃ༔ རྡོ་རྗེ་ལྟ་བུའི་ཏིང་འཛིན་གྱིས༔ ཞེས་སོགས་བྱིན་གྱིས་བརླབས། ཧཱུྃ༔ ཆོས་སྐུ་སྐྱེ་མེད་ངང་ཉིད་ལས༔ སོགས་ལྷ་ཚོགས་སྤྱན་དྲངས། དེ་ནས་ཚོགས་ཕུད་ཕུལ། བླ་མ་གཏོར་མའི་ནང་དུ་བཞག་བྲན་ལ།—གསང་བ་མཆོག་གི་སོགས་བརྗོད། གོང་དུ་གཏོར་བསྔོས་མ་བྱས་ན་འདིར་གཏོར་བསྔོས་རྒྱས་བསྡུས་གང་རུང་བྱ། དེ་ནས་ཚོགས་དུམ་གཅིག་གིས་བསྐང་གཏོར་གསོ། བསྐང་གཏོར་མེད་ན་ཡི་དམ་གཏོར་མ་གསོ། དེ་ནས་ཐུགས་རྗེ་ཆེན་པོ་གསང་འདུས་ཀྱི་སྒྲུབ་ཆེན་གཞུང་ནས་བསྐང་བ་བྱ་གསུངས་ཀྱང་། ཐུགས་རྗེ་ཆེན་པོ་རང་ལ་གཏེར་གཞུང་ན་བསྐང་བ་མེད་པས། གཏེར་སྟོན་གྱིས་མཛད་པ་ཞིག་འདུག་ཀྱང་། ཚོགས་དང་བསྲེ་ན་ཅུང་ཟད་མང་བ་དང་། དེའི་ལུང་རྒྱུན་ཀྱང་མེད་པས་བདག་གིས་བྱས་པ་འདི་ཨོ་རྒྱན་གྱི་གསུང་བྱིན་རླབས་ཆེ་བར་སྙམ་ནས་བསྒྲིགས་པ་ཡིན་པས་བྱ། གཞན་སྤྱིའི་བསྐང་བ་གང་འདོད་འདོན་ཏེ། བེར་ཆེན་གྱི་བསྐང་ཐུང་ལྟ་བུ་ཡང་ལེགས། སྒྲུབ་ཆེན་ནས་བཤགས་པ་ཐམས་ཅད་བྱ་བར་གསུངས་ཀྱང་དྲི་མེད་བཤགས་རྒྱུད་ཡིན་ཀྱང་མང་དྲག །རུ་ཏྲའི་སྨྲེ་
བཤགས་དང་ཐུགས་རྗེ་ཆེན་པོའི་སྨྲེ་སྔགས་ཀྱི་བསྟོད་པ་ནི་མིང་བསྒྱུར་ཁ་ཙམ་ལས་དོན་གཅིག་པས་དེ་འདོན་པས་འཐུས། དེའི་དོན་ནི་སྒྲུབ་ཆེན་གཞུང་ནས་བསྐང་བཤགས་རྒྱས་པར་བྱ་ཞེས་གསུངས་པའི་དོན་ནོ། དེ་ནས་ལས་བྱང་ནང་གི །བླ་མ་ཡི་དམ་མཁའ་འགྲོ་དགོངས་ཞེས་བཤགས་པ་བྱ། དེ་ནས་ཡོད་ན་ཚོགས་ཟན་ལ་ལིངྒ་པར་བཏབ་པའམ་བཟོ། མ་འཕྲོད་ན་ཚོགས་ཟན་ཤ་དུམ་བདུད་རྩི་མིན་པས་བྲན། སྒྲུབ་པ་ལ་བར་ཆད་བྱེད་པ་དང་རང་ཡོན་མཆོད་ལ་གནོད་བྱེད་ཀྱི་དགྲ་བགེགས་འགུགས་གཞུག་སྤྱི་ལྟར་བྱ། །ཧཱུྃ༔ ང་ནི་རབ་འཇིགས་སོགས་ཀྱིས་ཕུར་པ་བཏབ། དེ་ནས་མཆོད་གཡོག་པས་བཀྱག་ལ། ཧཱུྃ༔ ཕྱེས་ཤིག་སོགས་བསྟབས་པ་བྱས་ལ། མཁའ་འགྲོ་དང་ཆོས་སྐྱོང་སྤྱི་གཏོར་ལ་གསོའམ་བྲན་ནོ། །དེ་ནས་མཆོད་གཡོག་གིས་སློབ་དཔོན་ལ་ཚོགས་འདྲེན་ཞིང་། ཧྲཱིཿ གཟིགས་ཤིག་སོགས་བརྗོད། སློབ་དཔོན་གྱིས། ཨ་ལ་ལ་ཧོ༔ སོགས་ཚིག་བརྗོད་ལ་པད་ཀོར་དང་བཅས་པས་བླངས། བླ་མ་ཡི་དམ་མཁའ་འགྲོ་དགོངས༔ ཞེས་སོགས་སྨོན་ལམ་བཏབ་ལ་བཟའ། ཐུན་པ་ཚོ་ལ་ཡང་རིམ་པར་དྲངས། གསོལ་ཚེ་རང་ཐུགས་
རྗེ་ཆེན་པོའི་ཐུགས་ཀའི་རྟ་མགྲིན་ལ་མཆོད། ཁ་མེ་ཐབ་ལག་པ་དགང་གཟར་བླུག །ཚོགས་སྲེག་རྫས་སུ་བསམ་ལ་བཟའ་གསོལ་ཚར་ནས་བླ་མ་ཡི་དམ་མཁའ་འགྲོ་དགོངས༔ ནས་།ཚོགས་གཉིས་རྫོགས་གྱུར་ཅིག་བར་གྱིས་བསྔོ་སྨོན་བྱ། ལྷག་མ་ནི། དམ་ཚིག་གཙང་ན་ཐུན་པའི་བསྡུ། དེ་ཡང་ཐེ་ཚོམ་ན་གསོལ་ལྷག་བྱ་བར་བཤད་ཀྱང་། ལྷག་མ་འདི་ཤིན་ཏུ་བཀའ་གཉན་པས་སློབ་དཔོན་ལ་དྲངས་ཚར་ནས་ཐུན་པ་ལ་མ་དྲངས་གོང་དུ་གཙང་ལྷག་བཞག་ན་ལེགས། དེ་ནས་ཨོཾ་ཨཱཿཧཱུྃ་གིས་བྱིན་གྱིས་བརླབས་ནས་གཞུང་ལྟར་འདོན་ནོ། །དེ་ནས་རང་གི་ལུགས་གང་ཡོད་ཀྱི་གཞི་བདག་དཀར་གཏོར་བསྔོ། དེ་ནས་འབུལ་གཏོར་ཞེས་པ་ཐུན་གཏོར་ཏེ་དམར་གཏོར་འགུགས་གཞུག་སྤྱི་ལྟར་ལ་རྒྱས་བསྡུས་གང་རུང་ལས། བདག་ཅག་ཡོན་མཆོད་ལ་གནོད་པའི་དགྲ་བགེགས་དམ་སྲི་བཀུག་ལ། དེ་ནས་ལས་བྱང་གི་ཐུགས་དམ་བསྐུལ་བ་འདོན། དེ་ནས་བེར་ཡབ་ཡུམ་ཕྱག་བཞི་པ་སོགས་ཆོས་སྐྱོང་གང་འདོན་བསྐུལ་ཐུང་འདོན། དེ་ནས་ལས་བྱང་གི་ཆད་མདོ་བརྟན་སྐྱོང་འདོན། དེ་ནས་བེར་རམ་རང་གི་ཡི་དམ་ཆོས་སྐྱོང་གང་བྱེད་ཀྱི་ཟློག་ཐུང་། རྡོ་རྗེ་གར་གྱི་སྐག་ཟློག་མ་ཞེས་སམ། ཞིང་
སྐྱོང་མཇུག་གི་ཟློག་པ་སྤྱིའི་ཟློག་པ་ཡིན་པས་སྦྱར་རུང་ངོ་། །དེ་ནས་བཟློག་སྔགས་གང་ཤེས་བཅས། རང་དང་ཡོན་བདག་གི་ལོ་ཐོག་མིན་པ་ཞིག་ཏུ་འབུལ། ཚིག་བསྒྱུར་ལུགས། མགོན་པོ་སེང་གདོང་ཡབ་ཡུམ་འཁོར་བཅས་ཀྱི། །ཞེས་པ་ལ། བཀའ་སྲུང་དམ་ཅན་རྒྱ་མཚོ་འཁོར་བཅས་ཀྱི། །ཞེས་དང་། མ་ཧཱ་ཀ་ལ་སེང་གདོང་མཐུ་རྩལ་ཅན། །ཞེས་པ་ལ། བཀའ་སྲུང་དམ་ཅན་རྒྱ་མཚོ་མཐུ་རྩལ་ཅན། །ཞེས་བསྒྱུར། ཐོན་ན་སླར་གཏོར་སྣོད་ཆང་གིས་བཀང་། བདུད་རྩིས་བྲན་ལ། མ་མ་ཧྲིང་ཧྲིང་སྔགས་བརྗོད་ལ་གཏོར། མ་ཐོན་ཀྱང་རུང་། སེང་གདོང་མ་ཆོས་སྤྱོད་ནང་ལྟར་རམ། ཚེ་བདག་ལ་སོགས་རང་གི་བཟློག་པའི་ལྷ་གང་ཤེས་ཞིག །མངོན་རྟོགས་འདོན་མི་དགོས། སྐད་ཅིག་དྲན་རྫོགས་བསྒོམ་ལ་ཟློག་སྔགས་བརྒྱའམ་ཉེར་གཅིག་གམ་ཐ་ན་བདུན་ཙམ་བརྗོད་ལ་ཐལ་མོ་བརྡབ། ཟབ་མདོ་ཆག་མེད་དམ་བཅའ་ཡོད་ན་འདིར་སྦྱར། བདུད་བཟློག་བྱ།། དམ་བཅའ་མེད་ན་མི་དགོས། དེའི་དོན་ནི་སྒྲུབ་ཆེན་གཞུང་ནས། རྗེས་སུ་བཟློག་པ་ཡང་བྱ། ཞེས་གསུངས་པའི་དོན་ཡིན་ནོ། །དེ་ནས་གཏོར་སྣོད་སློབ་དཔོན་གྱི་དྲུང་དུ་སྦུབས་
ལ། གནོད་བྱེད་དམ་སྲི་ཐམས་ཅད་གཏོར་གཞོང་རི་རབ་འབར་བའི་འོག་ཏུ་ཁུག་ཅིག །ཛཧཱུྃ་བཾ་ཧོ༔ ཞེས་བརྗོད། འཕྲོད་ན་བྲོ་བརྡུང་བར་བཤད་ཀྱང་རྟག་ཏུ་མི་འཕྲོད་པས། རྡོ་རྗེ་དེ་གཏོར་སྣོད་སྟེང་དུ་རྒྱ་གྲམ་དུ་བཞག་ཚུལ་བྱས་ལ། ལས་བྱང་གི་རྟ་བྲོ་འདོན། དེ་ནས་དཀྱིལ་འཁོར་བསྡུ་ཆོག་སྒྱུར། རྒྱས་པར་འདོད་ན་རང་དང་ཡོན་མཆོད་སྐུ་རིམ་བྱེད་ན། སྒྲུབ་ཆེན་ནང་གི་ཚེ་འགུགས་འདིར་སྦྱར་ཀྱང་རུང་། ད་ནངས་བཏང་ན་མི་དགོས། ཨཱ་ལི་ཀཱ་ལི་ཡིག་བརྒྱ་ཚར་རེ་བརྗོད་པས་ལྷག་ཆད་ཁ་བཀང་རྫོགས་རིམ་མི་བསྡུ་བར་དཀྱིལ་འཁོར་བསྡུ་ཆོག་སྐྱར། དེའི་དོན་གསར་མའི་ལུགས་ལ་ཞག་རེ་རེ་ལ་རྫོགས་རིམ་དུ་ལན་རེ་དཀྱིལ་འཁོར་བསྡུ་བའི་དམིགས་རིམ་མ་བསྒོམ་ན་རྟག་པ་ཐེར་ཟུག་ཏུ་གོལ་བའི་ཉེས་པ་ཡོད་པར་འཆད་ཀྱང་། རྙིང་མ་ལ་སྒྲུབ་པ་དབུ་བཙུགས་ནས་མ་ཚར་བར་དཀྱིལ་འཁོར་བསྡུ་བའི་དམིགས་རིམ་བྱས་ན་རྟགས་མཚན་མི་གསལ་བས། སྒྲུབ་པ་ཚར་ནས་དཀྱིལ་འཁོར་བསྡུ་དུས་བར་བསྡུ་ཆོག་མི་བྱ། འོ་ན་ཐེར་ཟུག་ཏུ་གོལ་ལམ་ཞེ་ན། མཐེའ་ནས་དབུས་སུ་ཡལ་ཏེ་སྟོང་པར་གྱུར་པར་བསྒོམ་པ་དེས་སྟོང་ཉིད་གོ་ཆོད་པོ་མི་འོང་། དེ་ལས་དང་པོ་པ་ཡིན། འདིར་
སེམས་ཉིད་ཡེ་ནས་སྟོང་ཞིང་ཆོས་སྐུ་ཡིན་པས། བསྐྱེད་རིམ་སྒོམ་ཚེ་རང་ནས་སྟོང་ཉིད་ལས་མ་གཡོས་ལ། དེ་ཡང་ནམ་མཁའ་སྟོང་པ་ལ་འཇའ་ཤར་ན་ཡང་ནམ་མཁའ་སྟོང་པ་ལས་མ་གཡོས་པ་ལྟར། ཉམས་ལེན་སྟོང་ཉིད་ཀྱི་རྩི་མ་ཤོར་བའི་ངང་ནས་བསྐྱེད་རིམ་སྒོམ་པ་གལ་ཆེ། དེ་ཙམ་མ་ཐུབ་ན་སྐབས་སུ་བསྐྱེད་རིམ་སྒོམ་པ་དེའི་བསྒོམ་མཁན་སེམས་ལ་བལྟས་པས། གཟུགས་ཁ་དོག་དངོས་པོ་མེད་པར་ལྷག་གིས་མཐོང་སྟེ། བསྐྱེད་རིམ་ལྷའི་སྐུ་ལ་སེམས་གནས་པ་ཞི་གནས། དེའི་ངོ་བོ་ལ་བལྟས་པས་སྟོང་པར་ལྷག་གིས་མཐོང་བ་ལྷག་མཐོང་། དེ་གཉིས་སེམས་ཉིད་ཀྱི་ངང་དུ་དབྱེར་མེད་པ་ཟུང་འཇུག་སྟེ། དེ་ནས་ཐུན་གྱི་མཐའ་དབུས་ཐམས་ཅད་དུ་ཉམས་ལེན་གྱི་གཙོ་བོ་ཡིན་པས་ཉམས་ལེན་གལ་ཆེ་སྟེ། གསང་འདུས་རྒྱུད་ཀྱི་སྒྲུབ་པ་དངོས་གཞིའི་ལེའུ་ལས། དེ་ནས་རྫོགས་པའི་རིམ་པ་ནི། །ལྷ་ཉིད་སེམས་སུ་ཤེས་བྱས་ཏེ། །བསྒོམ་བྱའི་ལྷ་དང་སྒྲུབ་བྱེད་ཀྱི། །མཁན་པོ་དག་ཀྱང་སེམས་ཉིད་དེ། །སེམས་ཉིད་སྐྱེ་མེད་ཆོས་སྐུའི་ངང་། །དེ་ཉིད་མ་འགགས་འགྲོ་བ་འདུལ། །ཡི་དམ་ལྷ་ལ་རང་རྒྱུད་ཀྱི། །རྩིས་གདབ་ཁྲིགས་སུ་བཅད་པ་མེད། །གདུལ་
བྱའི་མོས་བློ་དང་མཐུན་པར། །གང་ལ་གང་འདུལ་དེ་ལྟར་སྣང་། །ཀུན་ཀྱང་ཐ་དད་མ་ཡིན་ཏེ། །སྣང་སྟོང་གཉིས་འཛིན་བློ་ལས་འདས། །གཉིས་མེད་དབྱིངས་སུ་ཤེས་པར་བྱ། །སྟོང་གསལ་སྤྲོས་བྲལ་ཆོས་ཀྱི་སྐུ། །བདེ་ཆེན་ཐིག་ལེ་གཅིག་ཏུ་རྫོགས། །མཐར་ཐུག་སྒྲུབ་པའི་མཐའ་ཉིད་དོ། །ཞེས་བཀའ་བསྩལ་པའི་ཕྱིར། དུས་ཐམས་ཅད་དུ་བསྐྱེད་རྗེ་གས་ཟུང་དུ་ཅི་ཚུད་བྱ་བ་ཡིན་པས། ཐུན་པ་ལ་ལ་དག་གིས་ཐུགས་དགོངས་ལ། ང་རི་ཁྲོད་ཞིག་ཏུ་ཉམས་ལེན་སེམས་ངོ་ཞིག་ཅི་འཕེལ་བསམ་ཛ། ད་ནི་འདིར་བཞག་པས་མི་འདུག་དཀའ་མེད་ཉམས་ལེན་མི་འོང་བསམ་པ་ནི་ཧ་མ་གོ་བ་ཆེན་པོ་ཡིན་པར་ཤེས་པར་བྱའོ། །གཞན་ཡང་ཐུགས་རྗེ་ཆེན་པོ་ལྟ་བ་ཡང་ཐོག་གི་རྒྱུད་དང་། ལྟ་བ་ཡང་རྩེའི་རྒྱུད་གཉིས་ལས་ཡི་གེ་དྲུག་པ་ཕྱག་རྒྱ་ཆེན་པོའི་སྙིང་པོ་ཡིན་པས། དེ་གཉིས་ཐ་དད་མེད་ཚུལ་རྒྱ་ཆེར་གསུངས་པ་ལ་ལྟོས་ཤིག །དེ་ནས་ལས་བྱང་མཇུག་གི་བཀྲ་ཤིས་རྐྱང་པ་སྒྲུབ་ཆེན་གྲོལ་དུས་བྱས་པས་འཐུས་ཀྱང་། ཡོན་མཆོད་བཀྲ་ཤིས་པའི་རྟེན་འབྲེལ་དུ་ནུབ་རེ་ལ་ཚར་རེ་བརྗོད་པར་བྱའོ། །དེ་ལྟར་ལས་བྱང་གི་སྔོན་འགྲོ་གཏོར་མ་དང་། མཚམས་གཅོད་རྒྱས་པ་ནི་སྔ་དྲོ་གཅིག་གིས་ཆོག་
ལ། ལས་བྱང་ནང་བསྟོད་པ་ཡན་ཐུན་བཞི་དང་ཚོགས་མན་ཆད་ནུབ་རེ་རེ་རེས་ཆོག་མོད་ཀྱང་། ཕྱི་ནས་གློ་བུར་དུ་ཚོགས་འཁོར་ཞུ་བ་བྱུང་ན་ལས་བྱང་ཐུན་བཞི་གང་རུང་ཞིག་ལ་ཚོགས་བཏང་ཆོག་གི་ནུབ་མོ་ཚོགས་སྒྲུག་མི་དགོས་སོ། །ཚོགས་ཤ་ནི་ཚོགས་ཤ་ལ་དམིགས་ནས་བསད་པས་ནི་མི་རུང་བར་གསར་རྙིང་ཐམས་ཅད་ནས་བཤད་ལ། དེ་མ་ཡིན་པར་འབྱོར་ན་ཐུན་པ་ཐམས་ཅད་ལ་འདྲེན། མ་འཛོམས་ན་ལྷ་ཚོགས་ཡིན་པས་མཆོད་རྫས་ཙམ་ལས་མ་འབྱོར་ཡང་རུང་། ཚང་ཡང་དེ་དང་འདྲ་སྟེ་བྷན་གང་བས་མང་འདྲེན་མི་རུང་། སྔགས་པ་ཆང་གིས་བཟི་ན་བར་ཆད་འབྱུང་ཚུལ་བདེ་མཆོག་སྡོམ་འབྱུང་ནས་རྒྱ་ཆེར་གསུངས་པ་ལྟར་རོ། །རྒྱ་རུ་འབྱོར་ན་ནུབ་ཚོགས་ཤ་བྱེད་པ་ལེགས། ་ཅིས་ཀྱང་དྲོ་ལ་བཏགས་དགོས་པའི་སྲོལ་ཡོད་ནའང་ཚོགས་ཚང་ཡང་དེ་དང་འདྲ། བྱིན་གྱིས་མ་བརླབས་ཤ་ཆང་དག །ཞག་གསུམ་བར་དུ་སྔགས་ཀྱི་ནུས་པ་ཉམས། །ཞེས་གསུངས་སོ། །ཆུས་ཁ་མི་བཤལ་ཟེར་བ་ཆུ་བྱིན་མ་བརླབས་པ་ལ་ཟེར་བ་ཡིན། པདྨ་རྒྱལ་པོའི་རྒྱུད་སོགས་ནས། ངེག་གི་དྲི་མ་བཤལ་ནས་ཀྱང་། །གསང་སྔགས་ཉམས་མེད་བཟླ་བར་བྱ། །ཞེས་
དང་། ནཱ་རོ་པ་སོགས་ཀྱིས། ཁ་མ་བཤལ་བར་སྔགས་མི་བཟླ་གསུངས་སོ། །ལས་བུམ་རྟ་མགྲིན་བསྐྱེད་པའི་ཆུས་ནངས་སྔ་སྔ་ཆབ་འགྲིམ་ན་ལེགས། དེ་མིན་ཆབ་མི་ལེན། དགེ་ཚུལ་དགེ་སློང་གི་ས་སྔ་ཚབ་བྱེད་ཆུས་ཁ་བཤལ་བ་དང་མེ་ལ་ཕུ་བྱས་པས་སྔགས་ནུས་ཉམས་པར་བཤད། ་་་ཐུན་པ་གཉིད་དུས་དཀྱིལ་འཁོར་ལ་འཕོངས་བསྟན་ན་སྐྲག་སྔངས་དང་རྨི་ལམ་འཚུབས་པས་འཛེམ། བཀའ་སྲུང་གཏོར་མར་ཁ་རླངས་མཆིལ་སྣབ་ཤོར་ན་སོ་སོ་ལ་ནད་འབྱུང་བས་ཐུན་ཁང་ཡང་ན་ལེགས། མ་འཛོམས་ན་ཡོལ་བ་སོགས་དེ་ལུགས་བྱ། དེ་སྒྲུབ་ཆེན་དུས་ཡིན། རྒྱུན་སྒྲུབ་གཏོར་སྒམ་ཡོད་པས་མི་སྐྱོན། ལས་བྱང་གི་ངག་ཁྲིད་སྤྱི། དེ་ལྟར་བླ་མ་རིན་པོ་ཆེས་བསྙེན་སྒྲུབ་གྲངས་བསྙེན་ཙམ་ཞིག་འགྲུབ་ནས། ཉི་མ་མཁའ་ཁྱབ། ཆུ་བོ་བྱིངས་ཁྱབ། མེ་ལོང་མཐོང་གྲོལ། མཆོད་རྟེན་མཐོང་གྲོལ། གའུ་ཀ་ནི་ཀ་མཐོང་གྲོལ་སོགས་ཕྱག་ལེན་ལ་འདེབས་ལུགས་གཞུང་ལྟར་བྱས་པ་གསལ། བཏགས་གྲོལ་པར་བརྐོས་སྣག་ཚ་ལ་རིན་པོ་ཆེའི་ཕྱེ་མ་དང་རིལ་བུ་བསྲེ་བ་སོགས་འཁོར་བ་དོང་སྤྲུགས་འབྲེལ་ཚད་དོན་ལྡན་མཛད་པར་ཞུ། ཞེས་དགེ་སློང་མ་ཎི་བ་རཱ་ག་ཨ་སྱས་བྲིས་པ་མངྒ་
ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།