བུམ་སྒྲུབ་ཀྱི་ཕན་ཡོན་རྒྱས་བཤད།
བུམ་སྒྲུབ་ཀྱི་ཕན་ཡོན་རྒྱས་བཤད་བཞུགས་སོ། །སྤྱན་རས་གཟིགས་ཀྱི་རིགས་གང་སྒྲུབ་ཀྱང་ཁྱད་མེད། ཐུགས་རྗེ་ཆེན་པོའི་རྣལ་འབྱོར་པས་ཡིད་ཆེས་བཅས་གཟིགས་མཛོད་མཆན་བུའོ།།
སྤྱན་རིས་གཟིགས་ཀྱི་རྩ་རྒྱུད་པདྨ་དྲ་བ་ལས། འཇིག་རྟེན་མགོན་པོ་སྤྱན་རས་གཟིགས། །དཀྱིལ་འཁོར་ཆེན་པོའི་ཚོགས་འདི་རྣམས། །གང་གིས་ཡིད་ལ་བྱེད་པའམ། །ཡང་ན་ཅི་ཙམ་དྲན་ཡང་རུང་། །སྐལ་ལྡན་རིགས་ཀྱི་བུ་དེ་ནི། །ཕྱོགས་བཅུའི་རྒྱལ་བ་རྣམས་ཀྱི་སྲས་། །བྱང་ཆུབ་སེམས་དཔའ་རྣམས་ཀྱི་བཤེས། །རིགས་ཀྱི་ལྷ་མོ་རྣམས་ཀྱི་ཡབ། །བྱིས་པ་རྣམས་ཀྱི་གཉེན་ཡིན་ནོ། །བདག་ཅག་རྣམས་ནི་དེ་ཡི་འབངས། །སྐྱེས་བུ་ཁྱུ་མཆོག་ཆེན་པོ་སྟེ། །བསོད་ནམས་ཀྱི་ནི་གཏེར་ལྡན་ཞིང་། །དེ་ཡི་ཚུལ་ཁྲིམས་རལ་བ་སོགས། །མི་དེ་སྐྱེ་བོ་དོན་
ཡོད་ལྡན། །ལྷ་རྣམས་དག་ནས་སྤྱི་གསེབ་ཏུ། །ཡེ་ཤེས་འོད་ཟེར་བདུད་རྩི་འཛུད། །འཇིག་རྟེན་འདི་ཡཾ། གདོན་རྣམས་ཇི་སྙེད་ཡོད་པ་རྣམས། །རིག་སྔགས་བྱད་སྟེམས་མ་ལུས་པས། །དེ་ལ་ཚུགས་པར་མི་འགྱུར་རོ། །ཆོ་ག་བཞིན་དུ་སྤྱད་པ་ཡིས། ཚངས་པའི་ཚེ་ཚད་གནས་ནས་ཀྱང་། །ཤི་བ་སེམས་དམྱལ་མེད་པར་ནི། །གནས་འཕོའི་ཚུལ་གྱིས་མཐོ་རིས་འཇུག །རྒྱལ་བའི་ཞིང་དུ་གཤེགས་ནས་ཀྱང་། །རྒྱལ་བ་རྣམས་ལ་ཆོས་ཉན་ཅིང་། །རྒྱལ་སྲས་རྣམས་ལ་སྟབས་གཅིག་ཏུ། །སྟོབས་དང་མི་འཇིགས་པ་བརྙེས་ཏེ། །མཚན་དང་དཔེ་
བྱད་ལྡན་གྱུར་ནས། །སྐད་ཅིག་གློག་འགྱུ་ཇི་བཞིན་དུ། །འགྲོ་བ་མ་ལུས་དག་བྱེད་ཅིང་། །ཞིང་རྣམས་མ་ལུས་དག་པར་བྱེད། །ཅེས་ཡེ་ཤེས་ཁྲོ་བོ་ཐམས་ཅད་ཀྱིས་སྤྱན་རས་གཟིགས་ལ་ཞུས་སོ། །དེ་ནས་སྤྱན་རས་གཟིགས་ཀྱི་ཞལ་ནས།——མགོན་པོ་སྤྱན་རས་གཟིགས་དབང་གིས། །སྔགས་དང་བརྗོད་པ་ཙམ་ལ་ཡང་། །གཤིས་ངན་འཆི་བ་བཅོ་ལྔ་མེད། །སྐྱེ་བཟང་བཅོ་ལྔ་འཐོབ་པར་འགྱུར། །མུ་གེ་རྒྱལ་པོའི་ཆད་པ་དང་། །དུག་དང་མཚོན་དང་གཡུལ་འགྱེད་དང་། །སྟག་སོགས་སྦྲུལ་སོགས་སོ་ཅན་དུག །དུག་ཅན་ཟས་དང་མེ་ཆུས་འཆི། །སྲོག་ཆགས་བདུན་དང་ཉལ་ཉེས་དང་། །གཡོ་བྱེད་དང་ནི་ལྷ་འདྲེས་གཙེས། །གསོར་མི་རུང་དང་བདག་ལྕེབ་རྣམས། །དེ་ལ་ནམ་ཡང་མི་འཇིགས་སོ། །རྒྱལ་པོ་ཆོས་ལྡན་ཡུལ་སྐྱེ་ཞིང་། །འཕགས་པ་བཞུགས་དང་དུས་བཟང་ཡུལ། །གཉེན་བཤེས་བཟང་དང་དབང་པོ་ཚང་། །དགེ་ལ་དགའ་དང་ཚུལ་ཁྲིམས་ལྡན། །བྲན་འཁོར་བཟང་ཞིང་ནོར་མང་རྟགས། །གཞན་གྱི་ཞིང་དགོས་འདོད་ལ་སྦྱོར། །སེམས་བདེ་འཇིག་རྟེན་སྐྱོང་བས་སྲུང་། །སངས་རྒྱས་ཞལ་མཐོང་དོན་བཟང་རྟགས། །གཞན་ཡང་དམན་ལ་
བྱང་སེམས་བསྐྱེད། །སྙིང་རྗེའི་མཆི་མ་འཁྲུགས་པ་དང་། །ཡོན་ཏན་དྲན་ནས་སྤྲོ་བ་དང་། །དཀོན་མཆོག་གསུམ་ལ་དད་པ་དང་། །ཕུལ་དུ་བྱུང་བའི་བློ་ཡི་འཕེལ། །ཚུལ་བཞིན་མ་ཡིན་ཡིད་བྲལ་དང་། །བཀའ་ལུང་དད་དམ་སྣོད་སྡེ་སྣོད། །ཡང་ནས་ཡང་དུ་སྐྱེ་བར་འགྱུར། །ཞེས་གསུངས་པ་དང་། དམ་པའི་ཆོས་པདྨ་དཀར་པོ་ཞེས་བྱ་བའི་མདོ་ལས། སྤྱན་རས་གཟིགས་ཀྱིས་དབང་ཕྱུག་སྤྱོད་པ་ཉོན། །བསྐལ་པ་བསམ་ཡས་བྱེ་བ་དུ་མ་བརྒྱར། །སངས་རྒྱས་སྟོང་ཕྲག་བྱེ་བ་མང་པོ་ལ། །སྨོན་ལམ་ཇི་བཞིན་རབ་ཏུ་རྣམ་པར་སྦྱངས། དེ་དག་བདག་གིས་བཤད་ཀྱིས་རབ་ཏུ་ཉོན། །ཉན་པར་བྱེད་ཅིང་བལྟ་བར་བྱེད་པ་དང་། །རིམ་གྱིས་དེ་ལྟར་རྗེས་སུ་དྲན་པ་ཡང་། །སྲོག་ཆགས་རྣམས་ནི་འབྲས་བུ་ཡོད་པར་འགྱུར། །སྡུག་བསྔལ་ཟློས་པའི་མྱ་ངན་ཐམས་ཅད་སེལ། །གལ་ཏེ་གསོད་པས་མེ་ཡི་ནང་དུ་ཡང་། །བསད་པར་བྱ་བའི་ཕྱིར་ནི་བོར་བའི་མིས། །སྤྱན་རས་གཟིགས་ཀྱི་དབང་པོ་དྲན་ན་ནི། །ཆུ་རླབས་བཞིན་དུ་མེ་དུག་ཞི་བར་འགྱུར། །རྒྱ་མཚོ་དང་ནི་མྱ་ངན་བསྒལ་ན་ཡང་། །ཀླུ་དང་འབྱུང་པོ་ལྷ་མ་ཡིན་གནས་སུ། །སྤྱན་རས་གཟིགས་
ཀྱི་དབང་པོ་དྲན་ན་ནི། །ཆུ་ཡི་ནང་དུ་ནམ་ཡང་མི་ནུབ་བོ། །རབ་ཏུ་སྡང་བའི་ཡིད་ཀྱིས་བསད་པའི་ཕྱིར། །རི་རབ་ལྷུན་པོའི་རྩེ་ནས་བོར་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། ཉི་མ་ལྟ་བུར་ནམ་མཁར་གནས་པ་ར་འགྱུར། །གལ་ཏེ་རྡོ་རྗེ་དག་གི་རིགས་དག་ཀྱང་། །བསད་པའི་ཕྱིར་ནས་སྤྱི་བོར་འོང་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །བ་སྤུའི་ཁུང་ཙམ་གཅེས་བར་མི་ནུས་སོ། །གལ་ཏེ་མང་པོ་དག་གིས་ཡོངས་བསྐོར་ཏེ། །བསད་པའི་སེམས་ཀྱིས་ལག་ན་མཚོན་ཐོགས་ན། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་མ་ཐག་ཏུ་བྱམས་པའི་སེམས་སུ་གྱུར། །གལ་ཏེ་གནོད་པ་ཉེ་བར་འོང་ནས་སུ། །གཤེད་མའི་དབང་དུ་གྱུར་པའི་ཚེ་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། དེ་ཡི་མཚོན་ཆ་དུམ་བུ་དུམ་བུར་འགྱུར། །དེ་སྟེ་ཤིང་ངམ་ལྕགས་ལས་བྱས་པ་ཡི། །ཁོང་སྒྲིབ་དང་ནི་གདོན་གྱི་བཅིངས་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །ཤིན་ཏུ་མྱུར་བར་གདུག་པ་དེ་ནི་མེད་པར་འགྱུར། །བཟང་པོའི་གློག་ཀྱང་འབྱུང་ཞིང་སྡུག་པ་ཡི། །སྤྲིན་ལས་ལྕེ་ལས་སེར་བ་ཆར་བབ་པ། །སྤྱན་རས་གཟིགས་ཀྱི་དབང་པོ་
དྲན་ན་ནི། །དེ་མ་ཐག་ཏུ་རབ་ཏུ་མྱུར་བར་ཞི། །སྡུག་བསྔལ་མང་པོའི་བརྒྱའི་གཅེས་པ་རྣམས། །སྡུག་བསྔལ་མང་པོའི་གཅེས་པའི་སེམས་ཅན་མཐོང་། །ཡེ་ཤེས་དགེ་བའི་སྟོབས་ཀྱིས་སྤྱན་རས་གཟིགས། །དེ་བས་ལྷར་བཅས་འགྲོ་བའི་སྐྱོབ་པ་སུ། །རྫུ་འཕྲུལ་སྟོབས་ཀྱིས་ཕ་རོལ་སོན་པ་སྟེ། །ཅེས་སོགས་ནས། ་འཇིགས་ཆེན་གཡུལ་ངོར་སྐྱེས་བུ་སོང་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་མ་ཐག་ཏུ་དགྲ་རྣམས་རབ་ཏུ་ཞི། །ཞེས་སོགས་ནས། དག་པའི་སེམས་དཔའ་སྤྱན་རས་གཟིགས་དབང་ཕྱུག །ཐེ་ཚོམ་མེད་པར་དྲན་བྱོས་དྲན་པར་གྱིས། །འཆི་བའི་ཚེ་ན་ཉོན་མོངས་གཙེས་པའི་ཚེ། །མགོན་དང་སྐྱབས་དང་དཔུང་གཉེན་དག་ཏུ་འགྱུར། །ཞེས་གསུངས་པ་དང་། ཕྱག་སྟོང་སྤྱན་སྟོང་གི་གཟུངས་ལས། སྤྱན་རས་གཟིགས་ཀྱི་མཚན་ནས་བརྗོད་ན་ཡང་། །སྡིག་སྒྲིབ་གྲངས་མེད་འབྱོང་ཞིང་། བསོད་ནམས་དཔག་ཏུ་མེད་པ་ཐོབ་སྟེ། འདི་ནས་འཆི་འཕོས་ནས་བདེ་བ་ཅན་དུ་སྐྱེ་བར་འགྱུར་རོ། །ཞེས་དང་། མཚན་རབ་ཡོངས་སུ་བསྟན་པའི་མདོ་ལས། ང་ནི་ཐུགས་རྗེ་ཆེན་པོས་འགྲོ་བ་ཐམས་ཅད་སྡུད་ཅིང་སྡུག་བསྔལ་ལས་སྐྱོབ་
པ་ཡིན། ང་ཡི་མིང་དྲན་པར་འགྱུར་ན་ཕ་རོལ་གྱིས་མདའ་འཕངས་ཀྱང་ཟུག་པར་མི་འགྱུར། མཚོན་རྣོན་པོའི་བཏབ་ཀྱང་ཆོད་པར་མི་འགྱུར། གྲགས་པ་ཆེ་ཞིང་རིགས་རྒྱུད་འཕེལ་བར་འགྱུར་རོ། །ཟས་ནོར་གྱིས་འཕོང་ཤིང་ལོངས་སྤྱོད་རྒྱས་པར་འགྱུར་རོ། །ང་ཡི་མིང་དྲན་པས་སུས་ཀྱང་ཐུབ་པར་མི་འགྱུར། འབྲོག་དགོན་པའི་ནག་ཁྲོད་དུ་སོང་ན་ཡང་སེངྒེ་དང་སྟག་གཟིག་དང་གཡག་རྒོད་སྦྲུལ་དུག་དང་བ་གཅན་གཟན་རྣམས་ཀྱིས་མི་གཡེངས། ང་ཡི་མིང་དྲན་པ་ཙམ་གྱིས་བགེགས་ཐམས་ཅད་འབྲོས་པར་འགྱུར། མེ་དཔུང་འབར་བའི་ནང་དུ་བོར་ན་ཡང་། ང་ཡི་མིང་དྲན་པ་ཙམ་གྱིས་པདྨས་གང་བའི་རྫིང་བུར་འགྱུར། ང་ཡི་མིང་དྲན་པ་ཙམ་གྱིས་ཆུས་མི་བྱིང་། ཆུས་མི་འཁྱེར། མེས་མི་འཚིག །གང་གི་ངའི་མིང་དྲན་པར་བྱེད་པ་མཐོང་བ་ཙམ་གྱིས་གཞན་དག་མོས་པར་འགྱུར། དགྲས་ཟིལ་གྱིས་མི་ནོན། མིག་གིས་མི་ཚུགས། ང་ཡི་མིང་ཐོས་ནས་དྲན་པར་བྱེད་ན། དེ་དག་ལྷ་དང་ཀླུ་དང་གནོད་སྦྱིན་དང་གྲུལ་བུམ་དང་སྲིན་པོ་དང་ཤ་ཟ་དང་ཡི་དྭགས་རྣམས་ཀྱིས་མདངས་འཕྲོག་པར་མི་ནུས་སོ། །ཕ་རོལ་སྔགས་ཀྱི་ཚུགས་པར་མི་འགྱུར་རོ། །ཞེས་གསུངས་པ་དང་། མདོ་སྡེ་ཟ་མ་
ཏོག་བཀོད་པ་ལས། ཤཱཀྱ་ཐུབ་པས་བཀའ་སྩལ་པ། གང་གི་འཕགས་པ་སྤྱན་རས་གཟིགས་ཀྱིས་མིང་དྲན་པ་དེ་དག་ནི། བདེ་བ་དང་ལྡན་པ་ལགས་སོ། །སྐྱེ་བ་དང་། རྒ་བ་དང་། ན་བ་དང་། འཆི་བའི་སྡུག་བསྔལ་ལས་ཡོངས་སུ་ཐར་བ་ལགས་སོ། །བདེ་བ་ཅན་གྱི་ཞིང་ཁམས་སུ་སྐྱེས་ནས་སྣང་བ་མཐའ་ཡས་ལ་ཆོས་ཉན་པར་འགྱུར་རོ། །དེ་དག་གི་རྒྱུད་ལ་འཁོར་བའི་སྡུག་བསྔལ་མི་འབྱུང་ཞིང་། རྒྱུད་ལ་ཉོན་མོངས་པ་དང་བཀྲེས་པ་དང་སྐོམ་པ་དང་འཕོང་བའི་སྡུག་བསྔལ་མི་འབྱུང་། མངལ་ན་གནས་པའི་སྡུག་བསྔལ་མི་འབྱུང་། ཆོས་ཀྱི་རོ་བསྐྱེད་པ་པདྨ་ལས་བརྫུས་ཏེ་སྐྱེ་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་ལ་ཡི་དམ་བརྟན་པོར་མཛད་པ་དེ་སངས་རྒྱས་ཀྱི་ཞིང་རྟག་ཏུ་འཛིན་ཅིང་གནས་སོ། །ཞེས་པ་དང་། ཟ་མ་ཏོག་བཀོད་པ་ལས། སྔོན་སངས་རྒྱས་གཙུག་ལྡན་ལ་ཐུབ་པས་གསན་པ། གང་གི་འཇིག་རྟེན་ཁམས་ན་སྤྱན་རས་གཟིགས་ཀྱི་དབང་པོའི་མིང་དྲན་པ་དེས་བསོད་ནམས་ཀྱི་ཚད་ནི་བསྒྲངས་བོར་མི་ནུས་སོ། །དེ་དག་ནི་བདེ་བ་དང་ལྡན་པ་ཡིན་ནོ། །དེ་དག་ནི་རྒས་པ་དང་ན་བ་དང་འཆི་བ་དང་སྡུག་བསྔལ་ལས་ཡོངས་སུ་
ཐར་བ་ཡིན་ནོ། །དེ་དག་འཁོར་བའི་ཐ་མ་གཞན་མེད་པའི་སྡུག་བསྔལ་བར་མི་འགྱུར་རོ། །དེ་དག་ནི་གོས་དཀར་པོ་སྐྱ་བོ་བཞིན་དུ་བྱ་ངང་པའི་རྒྱལ་པོ་བཞིན་དུ་འགྲོགས་པ་དང་། །རླུང་གི་ཤུགས་ཀྱིས་འདེད་བཞིན་དུ་བདེ་བ་ཅན་གྱི་འཇིག་རྟེན་གྱི་ཁམས་སུ། དེ་བཞིན་གཤེགས་པ་སྣང་བ་མཐའ་ཡས་ལ་ཆོས་མངོན་སུམ་དུ་ཉིན་ཕྱིར་འགྲོའོ། །ཐོས་ནས་ཀྱང་དེ་དག་གི་ལུས་ལ་འཁོར་བའི་སྡུག་བསྔལ་མི་འབྱུང་། འདོད་ཆགས་ཞེ་སྡང་དང་གཏི་མུག་མི་འབྱུང་། རྒས་པ་དང་ཤི་བར་མི་འགྱུར། དེ་དག་གི་ལུས་ལ་བཀྲེས་པར་མི་འགྱུར། མངལ་ན་གནས་པའི་སྡུག་བསྔལ་ཤེས་པར་མི་འགྱུར་ཏེ། ཆོས་རོས་སྤྱོད་ནས། དེ་ཉིད་པདྨའི་ནང་དུ་སྐྱེ་བར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་པོའི་ཡི་དམ་བརྟན་པོ་རྫོགས་པ་དང་། སེམས་ཅན་ཐམས་ཅད་ཐར་པ་ལ་གཞོག་གིས་བར་དུ་འཇིག་རྟེན་གྱི་ཁམས་དེ་ན་རྟག་ཏུ་འཛིན་ཅིང་གནས་སོ། །ཞེས་གསུངས་སོ། །དེ་དག་སྤྱན་རས་གཟིགས་ཡིད་ལ་དྲན་ཞིང་བསྒོམ་པའི་ཕན་ཡོན་ཡིན་ཅིང་། བུམ་སྒྲུབ་འདིས་ཐུགས་རྗེ་ཆེན་པོ་ལ་མཆོད་པ་འབུལ་བའི་གཏོར་མཆོད་འདི་དག་ཕན་ཡོན་ནི། ཟ་མ་ཏོག་བཀོད་
པའི་མདོ་སྡེ་ལས། བཅོམ་ལྡན་འདས་ཤཱཀྱ་ཐུབ་པས་བཀའ་སྩལ་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་ལ། དུས་བསྐལ་པར་ལྷ་ཡི་ན་བཟའ་དང་། བ་དན་དང་ན་བའི་རྐྱེན་སྨན་དང་། ཡོ་བྱད་ཐམས་ཅད་ཀྱིས་བསྙེན་བཀུར་བྱས་ན་གང་དེ་བཞིན་གཤེགས་པ་རྣམས་ལ་བསོད་ནམས་འཕེལ་ཞིང་རྒྱས་པར་འགྱུར་རོ། །དེ་བས་ཀྱང་བྱང་ཆུབ་སེམས་དཔའ་ཆེན་པོ་འཔགས་པ་སྤྱན་རས་གཟིགས་ལ་མཆོད་པའི་བ་སྤུའི་རྩེ་ལ་གནས་སོ། །རིགས་ཀྱི་བུ་འདི་ལྟ་སྟེ། དཔེར་ན་གླིང་བཞི་པའི་རི་རབ་དང་བཅས་པའི་རྡུལ་ཕྲ་རབ་སྙེད་ཀྱིས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ལྷའི་གསེར་རིན་པོ་ཆེ་ལས་བྱས་ཏེ། ཉིན་རེ་བཞིན་དུ་རིང་བསྲེལ་གྱི་མཆོད་རྟེན་གྱི་ནང་དུ་ཞུགས་སུ་གསོལ་ན་མཆོད་པ་བྱས་ན། བསོད་ནམས་ཀྱི་ཕུང་པོ་དེའི་ཚད་ནི་བསྒང་བར་ནུས་ཀྱིས། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་མཆོད་པའི་བསོད་ནམས་ཀྱི་ཚད་ནི་བསྒང་བར་མི་ནུས་སོ། །ཞེས་གསུངས་པས། གསང་འདུས་རྒྱུད་ལས། ཕྱི་ལྟར་བཟླས་པའི་ཡི་གེ་དྲུག །སྙན་
འཛམ་རྨ་བྱའི་མགྲིན་ལྟར་བཟླས། ཨོཾ་མ་ཎི་པདྨེ་ཧཱུྃ༔ མདོ་ཡི་ལུགས་སུ་ཤེས་པར་བྱ། ཞེས་གསུངས་པས། གསང་འདུས་མདོ་ལུགས་སུ་ཡི་གེ་དྲུག་འདོན་ཐབས་ཡོད་ཅིང་། ཡིག་བདུན་ལ་ཡང་ཡིག་དྲུག་ཚང་བས། བུམ་སྒྲུབ་ལ་ཡིག་དྲུག་གི་ཕན་ཡོན་ཡོད་པར་སོ་བཞག་ཡིན་པས། དེ་ཡི་ཕན་ཡོན་ཐོ་ཙམ་བཤད་ན། ཡི་གེ་དྲུག་པའི་མདོ་ལས། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས། འཕགས་པ་ཡི་གེ་དྲུག་པ་ཤེས་རབ་ཀྱི་རམ་འབུ་འདི་ཡིད་ལ་བྱས་ནས་རིགས་སྔགས་འདི་བཟླས་བརྗོད་བྱས་ན། ནད་ཐམས་ཅད་ལས་ཐར་བར་འགྱུར་རོ། །གདོན་གྱིས་མི་ཚུགས་པར་འགྱུར། དེ་དག་ཐམས་ཅད་ཞི་བར་འགྱུར། མཚམས་མ་མཆིས་པའི་སྡིག་པ་བྱང་བར་འགྱུར། ཚེ་རིང་ཞིང་ལོངས་སྤྱོད་འཕེལ་བར་འགྱུར་། ནད་གདོན་ཐམས་ཅད་ལས་ཐར་བར་འགྱུར། འཕགས་པ་ཡི་གེ་དྲུག་པའི་རིག་སྔགས་འདི། སྲུང་བ་དང་། ཡོངས་སུ་སྐྱོང་བ་ཡོངས་སུ་བཟུང་བ་དང་། ཡོངས་སུ་སྐྱབས་པ་དང་ཞི་བ་དང་བདེ་ལེགས་སུ་འགྱུར་རོ། །ཞེས་དང་། མཚན་བརྒྱ་པའི་མདོ་ལས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་
ཞིག་གིས་འཕགས་པ་སྤྱན་རས་གཟིགས་ཡིད་ལ་བྱས་ནས། ཨོཾ་མ་ཎི་པདྨེ་ཧཱུྃ༔ ཞེས་བཟླས་བརྗོད་བྱས་ན་ངན་སོང་གསུམ་དུ་མི་སྐྱེ། མནར་མེད་པར་མི་འགྲོའོ། །སུ་ཞིག་ནང་པར་ལངས་ནས་བཟླས་སམ། འདོན་ཏམ་བཟླས་བརྗོད་བྱས་ན། དེའི་ལུས་ལ་མཛེ་དང་ཤུ་བ་དང་གཡེན་པ་དང་། འབྲས་དང་། བལ་ལྡག་དང་། གློ་བ་ན་བ་དང་། དབུགས་མི་བདེ་བ་དང་། ནད་ཐམས་ཅད་ལས་ཐར་བར་འགྱུར་རོ། །སྐྱེས་སོ་ལྕོགས་ཏུ་སྐྱེ་བ་དྲན་པར་འགྱུར་རོ། །འཆི་བའི་ཚེ་ན་བདེ་བ་ཅན་དུ་སྐྱེ་བར་འགྱུར་རོ། །གར་སྐྱེས་གར་གནས་ཀྱང་འཕགས་པ་སྤྱན་རས་གཟིགས་དང་མི་འབྲལ་བར་འགྱུར་རོ། །རྟག་ཏུ་བཟླས་བརྗོད་བྱས་ན་ཡིད་གཞུངས་པར་འགྱུར་རོ། །དབྱངས་སྙན་པར་འགྱུར་རོ། །གཙུག་ལགས་ཐམས་ཅད་མཁས་པར་འགྱུར་རོ། །བསྟོད་པ་འདིས་བསྟོད་པ་བྱས་ན་སངས་རྒྱས་གངྒཱའི་ཀླུང་དྲུག་ཅུའི་བྱེ་མ་སྙེད་ལ་མཆོད་པར་འགྱུར་རོ། །ཞེས་དང་། མདོ་སྡེ་ཟ་མ་ཏོག་བཀོད་པ་ལས། སངས་རྒྱས་དམར་པོ་མཆོག་གི་བཀའ་སྩལ་པ། རིགས་ཀྱི་བུ་འམ་རིགས་ཀྱི་བུ་མོ་ལ་ལ་ཞིག་གིས་རིགས་སྔགས་བཟླས་པར་བྱས་ན། སྤོབ་པ་མི་ཟད་
པར་འགྱུར་རོ། །ཡེ་ཤེས་ཀྱི་ཕུང་པོ་རྣམ་པར་དག་པར་འགྱུར་རོ། །བྱམས་པ་ཆེན་པོའི་སྙིང་རྗེ་ཆེན་པོ་དང་ལྡན་པར་འགྱུར་རོ། །ཉི་མ་རེ་རེ་བཞིན་ཕ་རོལ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །རིག་འཛིན་འཁོར་ལོས་བསྒྱུར་བའི་རྒྱལ་པོ་འཐོབ་པར་འགྱུར་རོ། །བྱང་ཆུབ་སེམས་དཔའ་ཕྱིར་མི་ལྡོག་པར་འགྱུར་རོ། །བླ་ན་མེད་པ་ཡང་དག་པོར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཡི་གེ་དྲུག་པའི་རིགས་སྔགས་འདི་བརྗོད་ཅིང་རྟག་ཏུ་བཟླས་བརྗོད་ལ་བརྩོན་པ་དེ་དག་ནི་བསོད་ནམས་དང་ལྡན་པ་ཡིན་ནོ། །དེ་དག་བཟླས་བརྗོད་བྱེད་པའི་ཚེ་སངས་རྒྱས་གང་གཱའི་ཀླུང་བྱེ་མ་སྙེད་དགུ་འདུ་བར་འགྱུར་རོ། །རིགས་ཀྱི་བུ་དེའི་བ་སྤུའི་ཁུང་བུ་རེ་རེ་ལ་ཡང་དེ་བཞིན་གཤེགས་པ་བཞུགས་སོ་། །བཞུགས་ནས་ཀྱང་རིགས་ཀྱི་བུ་ཁྱོད་ལ་འདི་འདྲ་བའི་ཡིད་བཞིན་གྱི་ནོར་བུ་རྙེད་པར་འཐོབ་པར་འགྱུར་རོ། །རིགས་ཀྱི་བུ་ཁྱོད་རིགས་བདུན་ཐར་བར་བྱེད་པ་ཡིན་ནོ་ང་ལེགས་སོ། །རིགས་ཀྱི་བུ་ཁྱོད་ཀྱི་ལྟོ་བ་ན་སྲོག་ཆགས་གནས་པ་དེ་དག་ཀྱང་བྱང་ཆུབ་སེམས་དཔའ་ཕྱིར་མི་ལྡོག་པར་འགྱུར་རོ། །ལེགས་སོ་བྱ་བ་སྦྱིན་པར་འགྱུར་རོ། །ཞེས་དང་། ཟ་མ་
ཏོག་བཀོད་པའི་མདོ་ལས། ཡུལ་འཁོར་འཇིགས་གིས་གྲོང་ཁྱེར་ཆོས་སྨྲ་བའི་གཤེས་གཉེན་གྱིས་བྱང་ཆུབ་སེམས་དཔའ་སྒྲིབ་པ་རྣམ་སེལ་ལ་གསུངས་པ། ཆོས་གཞན་གྱི་རྣལ་འབྱོར་ནི་ཕུབ་མ་དང་འདྲའོ། །ཡི་གེ་དྲུག་པའི་རྣལ་འབྱོར་ནི་མཆོག་ཅེས་བྱ་སྟེ། མི་མཉམ་པ་དང་མཉམ་པ་ཞེས་བྱའོ། །རིགས་ཀྱི་བུ་ཡིག་གེ་དྲུག་པ་ལན་གཅིག་བཟླས་པས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །ལ་ལ་ཞིག་གིས་ཡི་གེ་དྲུག་པ་ཡི་དམ་དུ་བྱེད་ཅིང་འཛིན་པ་དེའི་ལུས་ལ་རེག་ན་ཕྱིར་མི་ལྡོག་པའི་ས་ཐོབ་པར་འགྱུར་རོ། །ཡི་གེ་དྲུག་པ་མིང་གཅིག་བཟུང་ན་དེ་བཞིན་གཤེགས་པ་ཐམས་ཅད་ལ་མཆོད་པ་དང་མཉེས་པ་བྱས་པར་འགྱུར་རོ། །ཞེས་དང་། མདོ་སྡེ་ཟ་མ་ཏོག་བཀོད་པ་ལས་བཅོམ་ལྡན་འདས་ཤཱཀྱ་ཐུབ་པས་བཀའ་སྩལ་པ། རྣལ་འབྱོར་པ་གཞན་རྣམས་ནི་འབྲས་ཀྱི་ཕུབ་མ་དང་འདྲའོ། །རྣལ་འབྱོར་པ་ཐམས་ཅད་ཀྱི་ནང་ནས་ཡི་གེ་དྲུག་པའི་རིགས་ཀྱི་རྒྱལ་པོ་འདི་ནི་འབྲས་ཀྱི་སྙིང་པོར་གྱུར་པའོ། །རིགས་ཀྱི་བུ་སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕརོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་
པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་ཕྱིར་རོ། །ཨོཾ་མ་ཎི་པདྨེ་ཧཱུཾ། ཞེས་ལན་གཅིག་བཟླས་པས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །ཡི་གེ་དྲུག་པ་ལན་གཅིག་བཟུང་ན་དེ་བཞིན་གཤེགས་པ་ཐམས་ཅད་ལ་ན་བཟའ་དང་བཤོས་དང་མལ་སྟན་དང་ན་བའི་རྐྱེན་སྨན་དང་ཡོ་བྱད་ཐམས་ཅད་ཀྱིས་བཀུར་སྟི་བྱས་པར་འགྱུར་རོ། །ཞེས་དང་། མདོ་སྡེ་ལས་བཅོམ་ལྡན་འདས་ཤཱཀྱ་ཐུབ་པས་གསུངས་པ། གང་དག་ཕ་རོལ་གྱི་བུད་མེད་ལ་ཆགས་ནས་འདོད་ལོག་སྤྱོད་པ་དང་། སྲོག་གཅོད་པའི་ལས་དང་། ཕོ་མ་གསོད་པ་དང་། དགྲ་བཅོམ་པ་གསོད་པ་དང་། དགེ་སློང་མ་སུན་ཕྱུང་བ་དང་། མཆོད་རྟེན་བཤིགས་པ་དང་། གཙུགས་ལག་ཁང་བཤིགས་པ་དང་། དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་ཕྱུང་བ་དང་། མཚམས་མེད་པའི་ལས་ཀྱི་སྒྲིབ་པ་ཐམས་ཅད་ཀྱང་། ཟ་མ་ཏོག་བཀོད་པའི་ཡི་གེ་དྲུག་མ་འདིས་རྩ་བ་ནས་དག་པར་བྱེད་དོ། །ཞེས་དང་། མདོ་སྡེ་ཟ་མ་ཏོག་བཀོད་པ་ལས། དེ་བཞིན་གཤེགས་པ་པདྨ་མཆོག་གིས་ཡི་གེ་དྲུག་པའི་རིགས་སྔགས་ཆེན་མོ་འདིའི་ཡོན་ཏན་བསྔགས་པ་
གསུངས་པ། རིགས་ཀྱི་བུ་འདི་ལྟ་སྟེ་དཔེར་ན། ངས་རྡུལ་ཕྲ་རབ་ཀྱི་ཚད་ནི་བསྒྲུང་བར་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིགས་སྔགས་ཆེན་མོ་འདི་ལན་གཅིག་བཟླས་པའི་བསོད་ནམས་ཀྱི་ཕུང་པོའི་ཚད་ནི་བསྒང་བར་མི་ནུས་སོ། །།རིགས་ཀྱི་རྒྱ་མཚོ་འཆིང་རྣམས་ཀྱི་བྱེ་མ་ནི་རེ་རེ་ནས་བསླང་བར་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་འདི་ལན་གཅིག་བཟླས་པའི་བསོད་ནམས་ཀྱི་ཕུང་པོ་ནི་བསྒྲེང་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། སྐྱེས་བུ་ལ་ལ་ཞིག་གིས་ཁྱིམ་དཔག་ཚད་བརྒྱ་ཐམ་པ་བྱས་ཏེ། འཕང་དུ་དཔག་ཚད་ལྔ་བརྒྱར་བྱས་ཏེ་ཏིལ་གྱི་འབྲས་བུས་ཡོངས་སུ་གང་བར་བྱས་ལ། དེ་ལ་ཁ་ཙམ་གྱིས་བུ་གང་ཡང་མེད་ལ་དེའི་སྒོར་སྐྱེས་བུ་མི་རྒས་མི་འཆི་བ་ཞིག་བཞག་སྟེ། དེས་བསྐལ་པ་བརྒྱ་འདས་ཤིང་། ཏིལ་གྱི་འབྲས་བུས་གཅིག་ཕྱིར་དོར་ཏེ། རྣམ་གྲངས་དེས་ཁྱིམས་གྱི་རྨིང་དང་། གཞི་ཡན་ཆད་ཟད་པར་འགྱུར་གྱིས། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་འདི་ལན་གཅིག་བཟླས་པའི་བསོད་ནམས་ཀྱི་ཕུང་པོ་བསྒྲང་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་གླིང་བཞི་པ་རྣམས་ཀྱིས་ས་ཞིང་བྱས་ཏེ་ནས་
དང་གྲོ་དང་འབྲས་དང་རྒྱ་སྲན་དང་བལ་སྲན་ལ་སོགས་པ་དང་། རྒྱ་ཤུག་དང་སྲན་ཆུང་ལ་སོགས་པ་རྣམ་པ་སྣ་ཚོགས་པ་བྱས་ཏེ། ཀླུའི་རྒྱལ་པོས་ཀྱང་དུས་སུ་ཆར་པའི་རྒྱུན་ལེགས་པར་ཕབ་ནས། འབྲས་བུ་དེ་དག་གྲུབ་པ་དང་། སྨིན་ཅིང་བརྗེས་ནས་འཛམ་བུའི་གླིང་གཡུལ་གཅིག་བྱས་ལ། ཤིང་རྟ་དང་། ཁུར་བ་དང་། བེམས་པོ་བསྐོན་སྟེབས་བཅས་སྟེ་གཡུལ་དེའི་ནང་དུ་བཅུག་ནས། བ་ལང་དང་བོང་བུ་དག་གིས་བཅག་སྟེ་ཕུང་པོར་བྱས་ཀྱང་། རིགས་ཀྱི་བུ་ངས་འབྲས་བུས་རེ་རེ་བསྒང་བར་ནུས་ཀྱིས། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་ལན་གཅིག་བཟླས་པའི་བསོད་ནམས་ནི་བགྲང་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། ཆུ་བོ་ཆེན་པོ་འཛམ་བུའི་གླིང་དུ་ཉིན་མཚན་འབབ་པ་འདི་ལྟ་སྟེ། སི་ཏ་དང་། གངྒཱ་དང་། ཡ་མུ་ན་དང་། སིནྡྷུ་དང་། པཀྵ་དང་། ཤ་ཏ་རུ་དང་། ཙནྡྲ་བ་ག་དང་། ཨའི་ར་ཏི་དང་། སུ་མ་ག་དང་། ཧི་མ་ཀ་ལ་དང་། ཀོ་ཏ་བ་རི་རྣམས་ཆུ་བོ་རེ་རེ་བཞིན་འཁོར་ལྔ་བརྒྱ་ལྔ་བརྒྱ་ཡོད་པ། ཉིན་མཚན་དུ་རྒྱ་མཚོའི་འཆིང་རྣམས་སུ་འབབས་སོ། །རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་པོ་འདི་ལན་གཅིག་བཟླས་
པའི་བསོད་ནམས་ཀྱི་ཕུང་པོ་ཡང་དེ་བཞིན་དུ་འཕེལ་ལོ། །དེ་ནས་ཆུ་བོ་ཆེན་པོ་དེ་དག་གི་ནི་ངས་ཐིག་པ་རེ་རེ་བགྲང་བར་ནུས་ཀྱིས་ཡི་གེ་དྲུག་མའི་རིག་སྔགས་ལན་གཅིག་བཟླས་པའི་བསོད་ནམས་བསྒྲང་བར་མི་ནུས་སོ། །རིགས་ཀྱི་བུ་འདི་ལྟ་སྟེ་རྐང་བཞི་པའི་བ་གླང་དང་། བོང་བུ་དང་། མ་ཧེ་དང་། རྟ་དང་བ་གླང་དང་། ཁྱི་དངཝ་དང་ར་དང་ཕྱུགས་དེ་དག་དང་། དེ་བཞིན་ཏུ་སེངྒེ་དང་སྟག་དང་རྟ་རག་ཀླུ་དང་རི་དྭགས་དང་། སྤྲེའུ་དང་རི་བོང་དང་། ཕག་དང་བྱི་བ་ལ་སོགས་པའི་སེམས་ཅན་དེ་དག་གིས་སྤུ་རེ་རེ་ནས་བསྒྲང་བར་ནུས་ཀྱི། ཡི་གེ་དྲུག་པའི་རིག་སྔགས་ལན་གཅིག་བཟླས་པའི་བསོད་ནམས་ཀྱི་ཕུང་པོ་ནི་ངས་བསྒྲང་བར་མི་ནུས་སོ། །རིགས་ཀྱི་བུ་འདི་ལྟ་སྟེ། དཔེར་ན། རྡོ་རྗེ་ལྕགས་ཀྱུ་ཞེས་བྱ་བའི་རི་ཡི་རྒྱལ་པོ་འཕངས་སུ་དཔག་ཚད་དགུ་ཁྲི་དགུ་སྟོང་ཡོད་པའི་ས་འོག་ཏུ་དཔག་ཚད་བརྒྱད་ཁྲི་བཞི་སྟོང་ཡོད་དེ། རིའི་རྒྱལ་པོ་རྡོ་རྗེ་ལྕགས་ཀྱུ་དེའི་ངོས་རེ་རེ་ཞིང་དཔག་ཚད་བརྒྱད་ཁྲི་བཞི་སྟོང་ཡོད་ལ། རིའི་རྒྱལ་པོ་དེའི་ངོས་ལ་སྐྱེས་བུ་མི་རྒས་མི་འཆི་བ་ཞིག་ཡོད་ལ། དེ་བསྐལ་པ་གཅིག་འདས་ཤིང་ཡུལ་ཀ་ཤི་ཀ་ནས་བྱུང་བའི་གོས་ཀྱི་ལན་གཅིག་ཕྱིས་
ཏེ་དེ་ལྟར་བྱས་ཀྱང་དེ་ཟད་ཅིང་དེང་པར་འགྱུར་གྱིས། ཡི་གེ་དྲུག་པའི་རིག་སྔགས་ཆེན་པོ་འདི་ལན་གཅིག་བཟླས་པའི་བསོད་ནམས་ཀྱི་ཕུང་པོ་ནི་ངས་བསྒྲུངས་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་རྒྱ་མཚོའི་འཆིང་ནམ་ཆེན་པོ་ཟབས་སུ་དཔག་ཚད་བརྒྱད་ཁྲི་བཞི་སྟོང་། ཞིང་དུ་རྟ་རྒོད་མའི་གདོང་པའི་མཐའི་བར་དུ་དཔག་ཏུ་མེད་པ། ངས་སྐྲ་ཡི་རྩེ་མོ་བརྒྱར་འཆར་ཐིགས་པ་རེ་རེ་ནས་བསྒང་བར་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་པོ་ལན་གཅིག་བཟླས་པའི་བསོད་ནམས་ཀྱི་ཕུང་པོ་ནས་ངས་བསྒྲང་བར་མི་ནུས། རིགས་ཀྱི་བུ་འདི་ལྟ་སྟེ་དཔེར་ན་ཤིང་ཤིར་ཤ་ཚལ་གྱི་ལོ་མ་ནི་ངས་རེ་རེ་བསྒྲུངས་བར་ནུས་ཀྱི། ཡི་གེ་དྲུག་པའི་རིག་སྔགས་ཆེན་པོ་འདིས་བསོད་ནམས་ཀྱི་ཕུང་པོ་ནི་བསྒྲང་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་གླིང་ཆེན་པོ་བཞི་ན་གནས་པའི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དེ་དག་ཐམས་ཅད་བྱང་ཆུབ་སེམས་དཔའ་ས་བདུན་པ་ལ་གནས་པར་འགྱུར་ན། བྱང་ཆུབ་སེམས་དཔའ་བསོད་ནམས་ཀྱི་ཕུང་པོ་དེ་བས་ཡི་གེ་དྲུག་པའི་རིག་སྔགས་ཆེན་པོ་འདི་ལན་གཅིག་བཟླས་པའི་བསོད་ནམས་ཀྱི་ཕུང་པོ་ནི་ཤིན་ཏུ་ཆེའོ། །རིགས་ཀྱི་
བུ་འདི་ལྟ་སྟེ་དཔེར་ན་ཟླ་བ་བཅུ་གཉིས་ལོའམ་ཟླ་བ་གཅིག་ལྷག་པར་བསྒྲུང་བའི་ཟླ་བ་བཅུ་གསུམ་གྱི་ལོ་ཚང་བར་འགྱུར་གྱི་བར་ཉིན་མཚན་དུ་ཆར་བབ་ན་རིགས་ཀྱི་བུ་ངས་ཐིག་པ་རེ་རེ་བསྒྲུང་བར་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་པོ་འདི་ལན་གཅིག་བཟླས་པའི་ཕན་ཡོན་ངས་བསྒྲང་བར་མི་ནུས་སོ། །དེ་ལྟེ་རིགས་ཀྱི་བུ་མང་དུ་བརྗོད་མི་དགོས་ཀྱིས་ང་དང་འདྲ་བའི་དེ་བཞིན་གཤེགས་པ་བྱེ་བ་གནས་གཅིག་ཏུ་ལྷའི་བསྐལ་བ་ན་བཟའ་དང་། བཤོས་དང་མལ་བསྟན་དང་། ན་བའི་རྐྱེན་གྱི་སྨན་གྱི་ཡོ་བྱད་ཀྱི་གནས་པར་བྱས་ཏེ། བསྙེན་བཀུར་ཐམས་ཅད་བྱས་ཀྱང་དེ་བཞིན་གཤེགས་པ་དེ་དག་གིས་ཡི་གེ་དྲུག་པའི་རིགས་སྔགས་ཆེན་མོའི་བསོད་ནམས་ཀྱི་ཕུང་པོ་བསྒྲང་བར་མི་ནུས་ན་ང་གཅིག་པུའི་འཇིག་རྟེན་གྱི་ཁམས་འདི་ན་གནས་པ་ལྟ་ཅི་སྨོས། ཅེས་གསུངས་སོ། །པདྨ་རྒྱལ་པོའི་རྒྱུད་ལས། ཨོཾ་མ་ཎི་པདྨེ་ཧཱུཾ། རྒྱ་མཚོ་ནང་གི་རིན་ཆེན་བཞིན་ལན་གཅིག་མོས་པས་བརྗོད་པ་ན་སེམས་ཅན་དམྱལ་བའི་ནད་ལས་ཐར། ལན་གཉིས་བརྗོད་པས་ཡི་དྭགས་སུ། འགྲོ་བའི་སྒོ་ཡང་འགགས་པར་འགྱུར། གསུམ་བརྗོད་དུད་འགྲོའི་སྒོ་ཡང་འགགས། འདོད་
པའི་ཡོན་ཏན་ལྔ་སྤྱོད་ཀྱང་། འདི་དང་མ་བྲལ་རྡུང་མར་གནས། བཟའ་དང་བཏུང་བའི་ལོངས་སྤྱོད་ཀྱང་། འདི་ཉིད་དྲན་པས་ཉེས་པ་མེད། བདུད་ཀྱི་བར་དུ་གཅོད་པ་ཀུན། །སྔགས་ཀྱི་རྒྱལ་པོ་བསྒྲངས་བས་ཞི། ཞེས་གསུངས་སོ། སྤྲུལ་པའི་རྒྱལ་པོ་སྲོང་བཙན་སྒམ་པོའི་ཞལ་ནས་ཐུགས་རྗེ་ཆེན་པོའི་མཐའ་ནི། ཨོཾ་མ་ཎི་པདྨེ་ཧཱུྃ། ཅེས་པའི་ཡི་གེ་དྲུག་པ་འདི་ལ་ཐུག་གོ །རང་དོན་སྒྲིབ་པ་སྦྱང་བ་ཡང་ཡི་གེ་དྲུག་པ་འདི་ཡིན་ནོ། །གཞན་དོན་འགྲོ་དྲུག་གནས་སྦྱོངས་ཡི་གེ་དྲུག་པ་འདི་ཡིན་ནོ། །ཚེ་འདི་ལ་ཐུན་མོང་གི་དངོས་གྲུབ་འབྱུང་བ་ཡང་ཡི་གེ་དྲུག་པ་འདི་ཡིན་ནོ། །ཕྱི་མ་ཕྱག་རྒྱ་ཆེན་པོ་མཆོག་གི་དངོས་གྲུབ་འབྱུང་བ་ཡང་ཡི་གེ་དྲུག་པ་འདི་ཡིན་ནོ། །ཨོཾ་མ་ཎི་པདྨེ་ཧཱུྃ། ཅེས་པའི་ཡི་གེ་དྲུག་པ་འདི་ཟློས་ཤིག ། སྒྲུབས་ཅིག་སྒྲོངས་ཤིག་སྟོན་ཅིག་ཤོད་ཅིག །སྔ་མའི་སངས་རྒྱས་གྱི་གཤེགས་ཤུལ། ད་ལྟར་སངས་རྒྱས་ཀྱི་བསྟན་པ། ཕྱི་མའི་སངས་རྒྱས་ཀྱི་ལམ་ཡིན་ནོ། །ཞེས་དང་། མི་ཀུན་བསོད་ནམས་མར་འགྲིབ་པའི་དུས་ངན་པ་གཅིག་འོང་། དུས་དེ་ཙམ་ན་བདེ་སྐྱིད་འཛོམ་འདོད་ན། ཐུགས་རྗེ་ཆེན་པོ་སྤྱན་རས་གཟིགས་ལ་གསོལ་བ་ཐོབ་ཅིག་།ཞེས་དང་སྙིང་པོ་ཡི་
གེ་དྲུག་པ་ཨོཾ་མ་ཎི་པདྨེ་ཧཱུཾ་ཞེས་པ་འདི་ཟློས་ཤིག །ཚེ་འདི་ཡི་དགོས་འདོད་བདེ་སྐྱིད་ཐམས་ཅད་འདི་ལས་འབྱུང་བས་རིན་པོ་ཆེ་ལ་གསོལ་བ་ཐེབས་པ་དང་འདྲའོ། །ཕྱི་མ་སྒྲིབ་པ་བྱང་ནས་བྱང་ཆུབ་ཐོབ་པ་ལ་གདོན་མི་ཟའོ། །ཚེ་འདི་ལ་ཡིད་གཉིས་དང་ཐེ་ཚོམ་མ་བྱེད་ཅིག །ཅེས་སྤྲུལ་པའི་རྒྱལ་པོའི་ཞལ་ཆེམས་སུ་བཞགས་སོ། །ཨུ་རྒྱན་རིན་པོ་ཆེས་དུས་ངན་སྙིགས་མ་འབྱུང་ཚུལ་ལུང་བསྟན་སྐབས། དེ་དུས་ལྷ་གོང་བྱིན་རླབས་ཆེ། ཆོས་བྱས་ན་འབྲས་བུ་ཡོད་དམ་མེད་ཞུས་པས། ལྷ་ཚོགས་བྱིན་རླབས་ཐུགས་རྗེ་ཆེན་པོ་ཆེ། དམ་ཆོས་བྱས་ན་འབྲས་བུ་དེ་དུས་ཆེ། ཞེས་གསུངས་སོ། །ཨུ་རྒྱན་རིན་པོ་ཆེས། མི་གང་དག་ནད་གདོན་གྱི་ཉེན་པ་ལ། འཇིག་རྟེན་རྐྱེན་ཟློག་རིམ་གྲོ་ཅི་བྱ་བ་བས། ཡི་གེ་དྲུག་པ་རྐྱེན་བཟློག་ཆེའོ། །སྨན་དཔྱད་རིམ་གྲོ་ཅི་བྱས་པས་ཡི་གེ་དྲུག་པ་སྟོབས་ཆེའོ། །ཡི་གེ་དྲུག་པའི་ཕན་ཡོན་ནི་དུས་གསུམ་གྱི་སངས་རྒྱས་ཐམས་ཅད་ཅེས་ཀྱང་བརྗོད་པ་དང་། བསྒྲུང་བའི་ཚད་ལས་འདས། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སྤྱན་རས་གཟིགས་ཀྱིས་འགྲོ་བ་རིགས་དྲུག་ལ་ཐུགས་རྗེ་རྒྱུན་ཆད་མེད་པར་གཟིགས་པའི་ཐུགས་རྗེ་ཡང་སྙིང་ཡིན་
པས། སེམས་ཅན་ཐམས་ཅད་འཁོར་བ་ལས་བསྒྲལ་བའི་ཕྱིར་རོ། །དེས་ན་ཕྱི་རབས་རྗེས་འབྲངས་ཐམས་ཅད་ཐུགས་རྗེ་ཆེན་པོ་ཟུངས་ཤིག །ཡི་གེ་དྲུག་པ་ཟློས་ཤིག །ངན་སོང་དུ་འགྲོ་བའིདོགས་པ་མེད་དོ། །བོད་ཁ་བ་ཅན་གྱི་ལྷ་སྐལ་ཡིན་པས་དད་གུས་མོས་པས་གསོལ་བ་ཐོབ་ཅིག །བྱིན་རླབས་དངོས་གྲུབ་འབྱུང་ངོ་ཡིད་གཉིས་ཐེ་ཚོམ་མ་བྱེད་ཅིག །ཆོས་འདི་ལས་ཟབ་པ་འབྱུང་བ་ནི་དུས་གསུམ་སངས་རྒྱས་རྣམས་ཀྱིས་ཀྱང་མ་གསུངས་ཏེ། པདྨ་འབྱུང་གནས་བདག་གིས་ཀྱང་མ་གསུངས་མ་ཤེས་སོ། །ད་ལྟར་བཞུགས་དང་ཕྱི་རབས་འབྱོན་པ་ཡི། བོད་ཀྱི་རྗེ་འབངས་རྣམས་ཀྱིས་ཐུགས་ལ་དེ་ལྟར་ཞོག །ཅེས་ཞལ་ཆེམས་བཞགས་ནས་གཤེགས་སོ། །མ་གཅིག་ལབ་སྒྲོན་གྱི་ཞལ་ནས་ཀྱང། སྙིང་པོ་ཡི་གེ་དྲུག་པོ་ནི། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་མདོ་དོན། རྒྱུད་སྡེ་ཐམས་ཅད་ཀྱི་གཞི་མ། མདོ་སྔགས་གཉིས་ཀྱི་བཅུད་བསྡུས་པ། གསུང་རབ་རྒྱ་མཚོ་འདྲ་བ་རྣམས་ཀྱི་འོ་མ་ལྟར་བསྲུབ་པའི་སྙིང་པོ་མར་བྱུང་བ་ལྟ་བུའི་ཆོས་ཡིན་ནོ། །ནད་གདོན་བགེགས་རིགས་སོགས་མི་མཐུན་པའི་ཕྱོགས་ཐམས་ཅད་འཇོམས་པར་བྱེད་པ་ནི། རྫས་ཀྱི་རྡོ་རྗེ་ཕ་ལམ་དང་འདྲ་ཞིང་། འདོད་
པའི་དོན་རྣམས་མྱུར་དུ་འགྲུབ་པར་བྱེད་པ་ཡིད་བཞིན་གྱི་ནོར་བུ་དང་འདྲ་བའི་ཡི་གེ་དྲུག་པ་ཞེས་སྲས་ལ་གདམ་པའོ། །དེ་ལྟར་ཕན་ཡོན་ཆེ་ཆོས་འདི་ལ་རྩིས་མེད་པ་སྐད་བྱེད་པ་ནི་དུས་ངན་པ་མཐར་ཐུགས་པའི་རྟགས་ཡིན་པར་གསུངས་ཏེ། སྙིགས་དུས་མ་ཎི་པདྨེ་ཆོས་སུ་མི་རྩི་བའི་དུས་ངན་འབྱུང་བར་ཨུ་རྒྱན་རིན་པོ་ཆེས་ལུང་བསྟན་ནོ། །རྒྱལ་པོ་སྲོང་བཙན་སྒམ་པོས། ཨོཾ་མ་ཎི་པདྨེ་ཧཱུཾ། ཞེས་པ་འདི་རྒན་པོ་དང་བྱིས་པའི་ཆོས་ཡིན་ཟེར་ནས་ཁྱད་གསོད་བྱེད་པ་འགའ་འོང་བས། དེ་རྣམས་བདུད་ངག་ལ་ཞུགས་པ་བྱ་བ་ཡིན་པས་ཕྱི་མ་གཏན་སྡུག་དམྱལ་བའི་དཀྱིལ་དུ་འགྲོ་བ་ཡིན་པས་ཐུགས་རྗེ་ཆེན་པོའི་ཆོས་ལ་ཐེ་ཚོམ་མི་ཟ་བར་སྒྲུབས་ཅིག །སྒྲུབ་ཐབས་འགྲུབ་ཐག་འདི་བས་ཉེ་བ་མེད་དོ། །ཞེས་གསུངས་སོ། །གཤིན་རྗེ་ཆོས་རྒྱལ་གྱི་ཀུ་སུ་ལུ་པ་ལ་གསུངས་འཕྲིན་བཀུར་བ་ལས་ཀྱང་། གཤིན་ཡུལ་ཁྲ་མོ་འགྲིམས་ནས་འོང་ཙ་ན། ཟོག་ཡོད་བརྒྱ་བས་མ་ཎི་པདྨེ་རྡོག་གཅིག་ངོ་ཆེ་དོ་གྱིས། བྲ་ང་ཁམས་ལ་བདག་འཛིན་མགོ་བོ་མ་ནོན་པའི་མིས་ཕྱི་ནང་གསང་གསུམ་གྱི་ཆོས་མ་ལུས་པ་འཆད་ཉན་ཤེས་པ་བས། འདི་ན་འོང་ཆིས་ཀྱི་དེ་ཁོ་ན་ལ་དམིགས་པའི་མ་ཎི་རྡོག་
གཅིག་ཙམ་གྱི་ངོ་ཆེ་དོ་གྱིས། ཅེས་གསུངས་སོ། །དེ་ཡན་ཆོད་ཡི་གེ་དྲུག་པའི་ཕན་ཡོན་ནོ། །དེ་ནས་བུམ་སྒྲུབ་དུས་ཐུགས་རྗེ་ཆེན་པོ་སངས་རྒྱས་སྟོང་དང་བཅས་པའི་ཕྱག་རབ་མཚན་འབུམ་འདོན་དགོས་པའི་ཕན་ཡོན་ནི། རྣལ་འབྱོར་པ་གང་ཞིག་གིས། ཉན་ཐོས་སོ་ཐར་བྱང་སེམས་དང་། རིག་འཛིན་བླ་མེད་སྔགས་སོགས་ཀྱི། ཉམས་ཆགས་དག་ཅིང་བསྐང་བ་དང་། བླ་མ་རྒྱལ་པོ་ཆེ་བཙུན་སོགས། ་རྐྱེན་བཟློག་སྐུ་ཡི་རིམ་གྲོ་སོགས། །སྟོབས་ཆེན་གསོན་པོའི་ཆོ་ག་དང་། །གཤིན་དོན་བར་དོའི་འགྲོ་བ་རྣམས། །ངན་སོང་གནས་ནས་དྲངས་བའི་ཕྱིར། །བདག་ཉིད་པདྨ་འབྱུང་གནས་ཀྱིས། །དུས་གསུམ་སངས་རྒྱས་མཚན་འབུམ་བསྟན། །ཅེས་པ་ནས་དུས་གསུམ་སངས་རྒྱས་མཚན་འབུམ་འདི། །རྣ་བར་ལན་གཅིག་ཐོས་པས་ཀྱང་། །ངན་སོང་འཁོར་བ་དོང་ནས་སྤྲུག །འཇིགས་པ་བརྒྱད་སོགས་ཞི་བ་དང་། །སྐྱབས་གནས་རིམ་གྲོ་ཆེ་བར་འགྱུར། །ཞེས་དང་། པདྨ་དཀར་པོ་ལས། སངས་རྒྱས་གངྒཱའི་ཀླུང་དྲུག་ཅུ་རྩ་གཉིས་ཀྱི་བྱེ་མ་སྙེད་ལ་བསྙེན་བཀུར་བྱས་པ་བས། སྤྱན་རས་གཟིགས་ཀྱི་མཚན་བརྗོད་ཅིང་ཕྱག་འཚལ་ན་བསོད་ནམས་ཆེ་བར་གསུངས་པ་དང་། །
མདོ་སྡེ་བསྐལ་བ་བཟང་པོ་ལས། བསྐལ་བ་འདི་ལ་སངས་རྒྱས་གང་དེ་དག །དེ་དག་གི་ནི་མཚན་འདི་བསྒྲགས་པ་རྣམས། །འབྲས་བུ་མྱ་ངན་འདས་ཞེས་བྱ་བ་གང་། །ཉན་པ་དེ་དག་འདི་ལ་རྨོངས་མི་འགྱུར། །སོགས་ནས། དེ་དག་གི་ནི་མཚན་རྣམས་ལེགས་ཐོས་ནས། །མྱ་ངན་སྡུག་བསྔལ་ཞི་ཕྱིར་མྱོང་མི་འགྱུར། །སོགས་ནས། གང་གི་མི་ཤེས་བསྐལ་པ་བྱེ་བར་ནི། །སྡིག་པའི་ལས་བྱང་འབྲས་བུས་རྣམ་སྨིན་ཀུན། །དེ་ནས་ཟད་བྱས་རྒྱལ་བ་དེ་དག་གིས། །མཚན་ནི་བཟུང་ནས་ཀྱང་ནི་རྒྱལ་བར་འགྱུར། །ཞེས་དང་། སྙིང་རྗེ་པདྨ་དཀར་པོའི་མདོ་ལས། གཡེང་བའི་སེམས་ཀྱིས་སངས་རྒྱས་ཕྱག་འཚལ་ཞེས། །ཚིག་གཅིག་ལན་འགའ་བརྗོད་པར་བྱས་པས་ཀྱང་། །དེ་དག་ཀུན་གྱི་བྱང་ཆུབ་མཆོག་འདི་ཐོབ། །ཅེས་དང་། རྒྱལ་པོ་གསལ་རྒྱལ་གྱིས་ཞུས་པ་ལས། མི་རྣམས་གང་དག་སངས་རྒྱས་མཆོད་རྟེན་ནི། །སྐུ་གཟུགས་དག་ལ་མགོས་བཏུག་གུས་ཕྱག་འཚལ། །དེ་དག་ལྷ་རྣམས་དང་ནི་མི་རྣམས་ཀྱིས། །ཆེར་ཡང་ངག་ཏུ་བསྐུར་བའི་གནས་སུ་འགྱུར། ཞེས་གསུངས་སོ། །བུམ་སྒྲུབ་འདི་དུས་མར་མེ་སྨོན་ལམ་དང་། མཚན་ཐུབ་
བཞི་སོགས་མར་མེ་ཕུལ་བའི་ཕན་ཡོན་ནི། མར་མེ་ཕུལ་བའི་མདོ་ལས། མར་མེ་ཕུལ་བའི་རྣམ་སྨིན་འདི་ཡིན་ཏེ། འཆི་དུས་བྱེད་ཚེ་དྲན་པ་ཉམས་མི་འགྱུར། །དེ་ལ་ཕྱོགས་རྣམས་སྣང་བར་བྱེད་པར་འགྱུར། །སྔོན་ཆད་མ་མཐོང་གཟུགས་མཆོག་རྣམས་ཀྱང་མཐོང་། །དེ་ནས་ཤི་ནས་མཐོ་རིས་ངེས་འགྲོ་ཞིང་། །ལྷ་ཡི་སྟན་ལ་དེ་ལུས་འདུག་པར་ཤེས། །དེ་ནི་དེ་ཡི་མར་མེ་ཕུལ་བའི་འབྲས། །དེ་དང་དེ་ནས་ཚེ་རབས་དེར་དྲན་འགྱུར། །བྱ་བའི་འོས་མིན་ལ་ནི་དེས་མི་སྤྱོད། །གདོན་མི་ཟ་བར་དེ་ནི་ཁྱིམ་ནས་འབྱུང་། །ལོང་བར་མི་འགྱུར་ཞ་བོ་མི་འགྱུར་ཞིང་། །དེའི་མིག་ནི་མེད་པ་འགྱུར་མ་ཡིན། །ནད་ཅན་མ་ཡིན་འཇིགས་རུང་དགྲ་སྡང་མིན། །བླུན་པོར་མི་འགྱུར་མི་ཤེས་མི་འགྱུར་རོ། །མིག་མེད་པར་ནི་ནམ་ཡང་མི་འགྱུར་ཞིང་། །དེ་ཡི་མིག་ནི་ན་བར་འགྱུར་མ་ཡིན། །མིག་གཅིག་མ་ཡིན་ཁྲག་ལོང་མིག་མ་ཡིན། །དེ་ཡི་མིག་ལ་མི་གསལ་མེད་པར་འགྱུར། །མིག་གི་རང་བཞིན་གཞན་ལས་རྣམ་པར་གསལ། །སྲིད་པའི་མིག་ནི་དག་འགྱུར་བ་སྟེ། །ནོར་བུ་འོད་བཟང་ལྟར་ནི་དོན་ཞིབ་རྟོགས། །བསྐལ་པ་གྲངས་མེད་དཔག་ཏུ་ནམ་ཡང་དེའི། །ཤ་ཡི་མིག་ནི་ཡོངས་སུ་ཉམས་
མི་འགྱུར། །དེ་ལ་མིག་ནད་དག་ནི་མི་འབྱུང་སྟེ། །མར་མེ་ཕུལ་བའི་རྣམ་སྨིན་དེ་ཡིན་ནོ། །ཞེས་དང་། སྤྱན་རས་གཟིགས་ཀྱི་མདོ་ལས། གལ་ཏེ་བརྒྱ་སྟོང་ཁྲག་ཁྲིག་སངས་རྒྱས་ཞིང་། །ཡུངས་འབྲུ་དག་གིས་ཕྱུར་བུར་གང་འགྱུར་པ། །བསྒྲངས་དང་གཞལ་ཞིང་བརྗོད་པར་ནུས། །བདེ་གཤེགས་མར་མེ་གཅིག་ཕུལ་དེ་ལྟར་མིན། །ཞེས་སོགས་རྒྱ་ཆེར་གསུངས་སོ། །བུམ་སྒྲུབ་ཚེ་ནུབ་རེ་ཚོགས་རེ་དགོས་པའི་ཕན་ཡོན་ནི། །བདེ་མཆོག་ངེས་བརྗོད་བླ་མ་ལས། སྐྱེ་བོ་ཉན་ཐོས་དཔག་མེད་ལ། །སྦྱིན་དངབསོད་ནམས་སྤེལ་བ་ལས། །ཚོགས་ཆུང་གཅིག་བྱས་བསོད་ནམས་ཀྱང་། །འབུམ་གྱི་ཆར་ཡང་མི་འཕོད་དོ། །ཞེས་དང་། ཚོགས་ཀྱི་འདུ་བ་ལས། ཚོགས་ཀྱི་འཁོར་ལོ་གཅིག་བསྐོར་ལ། །མུ་གེའི་བསྐལ་པ་དག་ལས་ཐར། །གཉིས་བསྐོར་ན་སྟོང་འཁོར་ལོ་བསྒྱུར་བའི་རྒྱལ་སྲིད་འཐོབ། གསུམ་བསྐོར་ན་གྲུབ་ཆེན་བརྒྱ་ཐོབ། བཞི་བསྐོར་ཧེ་རུ་ཀའི་གོ་འཕང་ཐོབ། ་ལྔ་བསྐོར་ན་དོན་གཉིས་ཕུན་སུམ་ཚོགས་པར་འགྱུར་རོ། །ཞེས་སོགས་གསུངས་སོ། །འདི་ལྟར་སྒྲུབ་ཆེན་དཀྱིལ་འཁོར་ཕོ་བྲང་བཞེངས་པའི་ཕན་ཡོན་རྒྱལ་པོ་གསལ་རྒྱལ་གྱིས་ཞུས་པའི་
མདོ་ལས། དཀོན་མཆོག་གསུམ་ཕྱིར་མི་རྣམས་གང་དག་གིས། །འཕགས་པ་རྒྱལ་བའི་དཀྱིལ་འཁོར་བྱས་པ་ནི། །རྐང་ལགས་སོར་མི་དྲ་བས་འབྲེལ་བ་དང་། །ཡན་ལག་ཐམས་ཅད་ཀྱང་ནི་སྐྱོན་མེད་འགྱུར། །ཞེས་གསུངས་སོ། །འདི་ལྟར་སྒྲུབ་ཆེན་བྱེད་ཚེ་ཐུན་པ་རྣམས་ལ་གསོལ་བ་དང་ཐུན་ཇི་དྲངས་བའི་ཕན་ཡོན་ནི། གསལ་རྒྱལ་གྱིས་ཞུས་པ་ལས། སུ་དག་རབ་ཏུ་བྱུང་དང་འཚམས་པ་ཡི། ཁ་ཟས་བཟང་པོ་དགེ་འདུན་སྦྱིན་བྱེད་པ། །དེ་དག་འཁོར་བའི་དགོན་པར་གནས་པ་ན། །ཁ་ཟས་ཁ་དོག་རོ་ལ་སོགས་ལྡན་འཐོབ། །སུ་དག་རབ་ཏུ་བྱུང་དང་འཚམས་པ་ཡི། །འཁོར་བར་ཡོངས་སུ་འཁོར་བ་ན། །སྦྱིན་པ་མ་གཏོགས་གཉེན་མེད་པས། བཏུང་བ་རྒྱ་ཆེན་དགེ་འདུན་སྦྱིན་བྱེད་པ། །དེ་དག་འཁོར་བའི་དགོན་པར་གནས་པ་ན། །བཏུང་བ་ཁ་དོག་སོགས་ལྡན་སྣ་ཚོགས་འཐོབ། །ཅེས་དང། སའི་མདོ་ལས། བློ་ལྡན་ཕུན་ཚོགས་འདོད་པ་ཡིས། །རབ་ཏུ་འབད་དེ་སྦྱིན་པར་བྱིན། །ཞེས་སོ། །སྒྲུབ་ཆེན་དུས་ཇ་མ་ལག་བདེ་བ་འདྲེན་པ་སོགས་དད་གུས་ཀྱིས་བྱས་ན། ཕན་ཡོན་ནི། སྐྱེས་བུ་དམ་པའི་མདོ་ལས། དད་པས་སྦྱིན་པ་བྱིན་ན་ཕྱུགས་དང་ནོར་དང་ལོངས་
སྤྱོད་བྲན་འཁོར་མང་ཞིང་། གུས་པས་བྱིན་པ་དང་། རང་གི་ལག་གིས་བྱིན་པ་དང་། དུས་སུ་བྱིན་པས་ནོར་དུས་སུ་འཐོབ་པ་དང་། ནོར་དང་ལོངས་སྤྱོད་བྲན་འཁོར་མང་བར་གསུངས་སོ། །བུམ་སྒྲུབ་དུས་ཐུན་ཇ་སོགས་དུས་ལ་ཁྲིག་ཁྲིག་འཕྲོད་ན་ཕན་ཡོན་ནི། ཆོས་གསུམ་པའི་མདོ་ལས། དུས་སུ་སྦྱིན་པ་སྦྱིན་བྱེད་ན། །ཤི་ཡང་དེ་ནི་ཤི་བ་མིན། །བརྒྱག་བཟང་པ་ཡི་མགྲོན་པོ་བཞིན། །ཞེས་གསུངས་སོ། །དེ་ལྟར་མ་ཎི་བུམ་སྒྲུབ་ཀྱི་སྒྲུབ་ཆེན་འདི་ནི་ཕན་ཡོན་གང་ཆེ་ཆེ་གཅིག་ཏུ་བསྡུས་པ་ལྟ་བུ་ཡིན་པས། འདི་ལ་ཉམས་ལེན་དང་ཐུན་བཟུང་བ་དང་མཐུན་རྐྱེན་གྱི་དངོས་པོ་སྦྱར། རྒྱུ་བ་རོག་དན་དང་། འཚོགས་ཆུ་ལེན་པ་སོགས་བྱས་ན་ཕན་ཡོན་བསམ་ལས་འདས། འདི་ནི་ཚོགས་གཉིས་རྫོགས་པའི་ཐབས་མཆོག་ཏུ་གྱུར་པ་ཡིན་པས་ཕྱི་རབས་རྣམས་ཀྱི་འདི་ལ་བློ་རྩེ་གཏད་པར་ཞུ་ཞུ། ཞེས་པ་འདི་ནི་ཐུགས་རྗེ་ཆེན་པོའི་རྣལ་འབྱོར་པ་རཱ་ག་ཨ་སྱས་རང་གི་དད་པ་གསོ་བ་དང་། གཞན་ལ་ཕན་པའི་བསམ་པས་སྦྱར་བ་ལ། ཉེས་འགལ་དུ་མཆིས་ན་ལྷ་དང་བཀའ་སྲུང་རྣམས་ལ་བཤགས། དགེ་བས་འགྲོ་ཀུན་བདེ་ཆེན་ཞིང་དུ་སངས་རྒྱས་པའི་རྒྱུར་གྱུར་ཅིག །
མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།