སྐྱེ་བདུན་གྱི་སྒྲུབ་ཐབས་བསམ་ཡས་མ།
སྐྱེ་བདུན་གྱི་སྒྲུབ་ཐབས་བསམ་ཡས་མའོ༔
བདག་འདྲ་པདྨ་འབྱུང་གནས་ཀྱིས༔ སྐྱེ་བདུན་སྒྲུབ་པའི་མན་ངག་མཆོག༔ ཟབ་དྲིལ་དོན་བསྡུས་བསྟན་པར་བྱ༔ དེ་ལ་སྤྱི་དོན་བསྡུ་བ་བཞི་ཡིས་བསྟན༔ བརྟག་སྒྲུབ་དབང་བསྐུར་གཞན་དོན་བྱ༔ བརྟག་ཐབས་སྐྱེ་བདུན་གང་ཡིན་དེ༔ དལ་འབྱོར་གྲུབ་ཐོབ་སྐྱེ་བ་བདུན༔ ངེས་པར་བླངས་ཤིང་དྲན་པ་སྟེ༔ ངོ་མཚར་ཅན་དེ་ལེགས་བླངས་ནས༔ མཁའ་སྤྱོད་རིག་འཛིན་ཤ་སྒྲུབ་དང་༔ བླ་མེད་བྱང་ཆུབ་མཆོག་སྒྲུབ་སྟེ༔ གཉིས་ལས་འདི་ནི་མཆོག་བསྒྲུབ་བོ༔ ཤ་ཉིད་བླངས་ཏེ་མ་རུལ་ན༔ ལེགས་པར་སྐམ་སྟེ་རྩིས་སུ་
བྱ༔ དེ་ནི་བརྟགས་པའི་རིམ་པའོ༔ གཉིས་པ་སྒྲུབ་པའི་རིམ་པ་ནི༔ དེ་ཡང་བཀྲ་ཤིས་དབེན་གནས་སུ༔ སྒྲུབ་ཁང་ཕྱི་དཀར་ནང་དམར་བ༔ ཆེ་ཞིང་ཉམས་དགའི་གནས་མཆོག་སྟེ༔ དཀྱིལ་འཁོར་འདབ་དྲུག་སྒོ་ཁྱུད་རྫོགས༔ ཕྱི་ནང་གསང་གསུམ་མཆོད་ཚོགས་བཤམས༔ སྐུ་གསུང་ཐུགས་རྟེན་རྒྱན་ཚོགས་བཀྲམ༔ སྐྱེ་བདུན་ཤ་ནི་སྲན་ཚད་ལ༔ བཟང་དྲུག་གླ་རྩི་ཨ་མྲྀ་ཏ༔ གྲུབ་ཐོབ་ཤ་ནི་ཚོགས་ཚད་དང་༔ བྱིན་རླབས་རྫ་ས་དང་རྟག་ཏུ་ངུ་༔ སྨན་དང་དབང་ལག་འབྲས་ཕྱེ་ནི༔ ཕུལ་རེ་ཕུལ་རེ་སྦྱར་བར་བྱ༔ རྒྱལ་རིགས་བུ་ཆུང་བྱ་རྒོད་
ཀྱི༔ ཤ་ཡང་ཡོད་ན་ཐེབ་ཙེ་རེ༔ སྐྱོབས་སུ་སྦྱར་ན་བཟང་བར་བཤད༔ དེ་ནས་རྟོགས་ལྡན་གྲུབ་ཐོབ་དང་༔ ཁྲིམས་ལྡན་དགེ་སློང་དྲི་ཆུས་སྦྱར༔ རིལ་བུ་བསྐམས་ཤིང་དཔག་མེད་བྱ༔ མཚལ་དང་སྐྱེར་པའི་ཁན་དང་༔ གུར་གུམ་སྦྱར་ཏེ་ཁ་དོག་བསྒྱུར༔ རིན་ཆེན་བུམ་པ་མཚན་ལྡན་ལ༔ གུ་གུལ་བདུག་ཅིང་བགེགས་བསྐད་བྱ༔ རིལ་བུས་བཀང་སྟེ་ཁ་རྒྱན་དང་༔ མགུལ་ཆིངས་གཟུངས་ཐག་རྡོ་རྗེ་སོགས༔ ཆོས་རྣམས་ལེགས་པར་རྫོགས་བྱས་ཏེ༔ བུམ་རྫས་ཉེར་ལྔ་དག་ཀྱང་གྲུབ༔ དཀྱིལ་འཁོར་དབུས་སུ་བཞུགས་སུ་གསོལ༔ ཚད་མེད་བཞི་པོ་སྔོན་སོང་ནས༔ ཁྲུས་བྱས་སེམས་བསྐྱེད་སྡོམ་པ་བཟུང་༔ ཐུགས་རྗེ་ཆེན་པོའི་ལས་གཞུང་བསྲངས༔ བླ་རྫོགས་ལ་སོགས་གཞན་ཡང་བྱ༔ དུས་བཞིར་མཆོད་ཚོགས་འབྱོར་ཚད་འབད༔ དངོས་གཞིའི་བསྐྱེད་རིམ་དམིགས་པ་ནི། རང་ཉིད་ཐུགས་རྗེ་ཆེན་པོར་སྒོམས༔ ཞལ་གཅིག་ཕྱག་གཉིས་སྐུ་མདོག་དམར༔ ཕྱག་གཡས་པད་ཕྲེང་ཐུགས་ཀར་འཛིན༔ ཕྱག་གཡོན་པད་སྡོང་བདུད་རྩི་བུམ༔ རྡོ་རྗེ་སྐྱིལ་ཀྲུང་རང་འདྲའི་ཡུམ༔ གསང་བ་ཡེ་ཤེས་མདངས་ལྡན་མ༔ མཉན་ལྕུག་འཁྲིལ་ལྡེམ་དབྱེར་མེད་བསམས༔ སྤྱི་
གཙུག་རིགས་བདག་ཐུགས་ཀར་ནི༔ ཟླ་སྟེང་ཧྲིལས་ཡིག་དྲུག་བསྐོར༔ བུམ་པ་ཧཱུྃ་ལས་གཞལ་ཡས་ཁང་༔ ཕོ་བྲང་ཡོངས་རྫོགས་ཆེན་པོར་བསྒོམ༔ བུམ་ནང་རིལ་བུ་རེ་རེ་ཡང་༔ བདག་ཉིད་ཁོ་ན་ཅི་འདྲར་བསྐྱེད༔ ཡེ་ཤེས་འགུགས་གཏུམ་དྲག་ཏུ་བྱ༔ རིལ་བུ་དམ་ཚིག་ཡེ་ཤེས་སུ༔ དབྱེར་མེད་ཐུགས་རྗེ་ཆེན་པོར་བསྒོམ༔ གཟུངས་ཐག་ཕྱོགས་བཞིར་མཐུན་པར་བྱ༔ སྒྲུབ་བྱེད་རྣལ་འབྱོར་མང་ན་མཆོག༔ ཡང་སྙིང་འདི་ནི་བསྒྲུབ་པར་བྱ༔ ཨོཾ་མ་ཎི་པད་མེ་ཧཱུྃ༔ མན་ངག་ཟབ༔ རིལ་བུ་བསྒྲུབ་སྔགས་ཀྱི་དམིགས་ཐུན༔ དཀྱིལ་འཁོར་ལྷ་ཚོགས་རྣམས་ཀྱི་སྐུ་ལས་འོད་ཟེར་བསམ་གྱིས་མི་ཁྱབ་པ་བྱུང་༔ བདག་ལྷར་གསལ་བའི་གནས་གསུམ་དུ་ཐིམ༔ ཡང་བདག་དང་དཀྱིལ་འཁོར་གྱི་ལྷ་ཚོགས་རྣམས་ཀྱི་སྐུ་ལས་འོད་ཟེར་བསམ་གྱིས་མི་ཁྱབ་པ་འཕྲོས༔ སྣོད་ཀྱི་འཇིག་རྟེན་ལྷའི་གཞལ་ཡས་ཁང་རང་སྣང་བདེ་བ་ཆེན་པོར་གྱུརཿ བཅུད་ཀྱི་སེམས་ཅན་ཐམས་ཅད་རྩ་གསུམ་གྱི་ལྷ་ཚོགས་སུ་གྱུར༔ སྒྲ་གྲག་པ་ཐམས་ཅད་ཀྱང་གཟུངས་སྔགས་ཀྱི་སྒྲར་གྱུར་པར་སྒོམསཿ ཡང་འོད་ཟེར་འཕྲོས་པས་རྒྱལ་བའི་ཞིང་རབ་འབྱམས་ནས༔ བླ་མ་རིག་འཛིན་སངས་
རྒྱས་བྱང་སེམས་དཀྱིལ་འཁོར་གྱི་ལྷ་ཚོགས་ཚེ་ལ་དབང་བའི་དྲང་སྲོང་རིག་འཛིན་མཁའ་འགྲོ་ཆོས་སྐྱོང་རྣམས་ཀྱི་ཐུགས་ཀ་ནས༔ མཆོག་ཐུན་མོང་གི་བྱིན་རླབས་འོ་མའི་རྒྱུན་ལྟར་དཀར་ནར་གྱིས་བཀུག་ནས་ཐུགས་རྗེ་ཆེན་པོ་ཡབ་ཡུམ་གྱི་སྤྱི་བོར་ཐིམ༔ སྐུ་ལུས་གང་ཡབ་ཡུམ་སྦྱོར་མཚམས་ནས་བདུད་རྩི་བབསཿ སྒྲུབ་རྫས་རིལ་བུ་དང་དབྱེར་མེད་འདྲེས་པར་བསམ་ཞིང་༔ ཨོཾ་མ་ཎི་པད་མེ་ཧཱུྃ་ཧཱུྃ༔ ཨ་ར་པ་ཙ་མི་ཏ་ཧྲི་དཱ་ཡ་སྭཱ་ཧཱཿ དེ་ཚེ་རྟགས་ཀྱི་རིམ་པ་ཡང་༔ འོད་དང་དུ་བ་སྒྲ་དང་དྲི༔ ཞལ་མཐོང་དག་སྣང་དཔག་མེད་འབྱུང་༔ མཚན་རྟགས་རྫོགས་ནས་སྔགས་འདི་སྦྲེལཿ ཨོཾ་ཨཱཿཧཱུྃ་སྭཱ་ཧཱཿ མཱུ་ལཱ་མཱ་པཱི་ཏཾ༔ སརྦ་ཏ་ཐཱ་ག་ཏ༔ མ་ཧཱ་པཉྩ་ཨོཾ་ཨཱ་ཡུ་ཛཱ་ན་མ་ཧཱ་པུཎྱེ་ཏིཥྛ་ཨཱ༔ རྒྱལ་བ་རིགས་ལྔས་ཡེ་ཤེས་སྐུ་ལྔར་སྦྱོར༔ ཡེ་ཤེས་བདུད་རྩི་སྔགས་ཀྱི་འཆི་མེད་ཚེ༔ རྣམ་རྟོག་བག་ཆགས་སྦྱངས་ཤིང་མངོན་སངས་རྒྱ༔ རྨི་ལམ་དག་ཏུ་རྟགས་བཟང་འབྱུང་བར་ངེས་ཐུགས་རྗེ་ཆེན་པོ་འཁོར་བ་མྱང་འདས་སྦྱོར༔ སྐྱེ་བདུན་སྙིང་པོ་མ་བསྒྲུབས་སངས་རྒྱས་ཐོབ༔ བདུན་ནམ་བཅུ་གཅིག་ཉེར་གཅིག་དག་ཏུ་བསྒྲུབ༔ ཚོགས་འཁོར་བྱ་ཞིང་དངོས་གྲུབ་དག་ཀྱང་བསྐུལ༔ རྗེས་ཀྱི་རིམ་པ་
བསྟན་པ་ནི༔ དེ་ནས་བུམ་པའི་དབང་བསྐུར་བྱ༔ ཧཱུྃ༔ དོན་གྱི་ཡེ་ཤེས་ཀུན་རྒྱས་ཀྱང་༔ མ་རིག་གཟུང་འཛིན་བག་ཆགས་འཐས༔ ངོ་མཚར་རྨད་བྱུང་མཆོག་གི་རྫས༔ བག་ཆགས་རྣམ་རྟོག་སྦྱོང་བྱེད་ཅིང་༔ འདི་ཡིས་མངོན་པར་སངས་རྒྱས་འཐོབ༔ རྣམ་གྲོལ་ཡེ་ཤེས་མཆོག་ཐོབ་ཤོག༔ ཨོཾ་མ་ཎི་པད་མེ་ཧཱུྃ་ཧཱུྃ༔ སརྦ་ཏ་ཐཱ་ག་ཏ་ཨ་བྷི་ཥིཉྩ་ཧྲཱིཿ ཨཱཿ རང་ཉིད་དམ་ཚིག་སེམས་པར་བསྒོམ༔ རིལ་བུ་ཡེ་ཤེས་སེམས་དཔར་བསྐྱེད༔ དམ་ཚིག་ཡེ་ཤེས་དབྱེར་མེད་པརཿ ཐུགས་རྗེ་ཆེན་པོར་བདག་གྱུར་བསམ༔ རིལ་བུ་རེ་ནི་དྲི་ཆུ་ཡི༔ ཕུལ་ཏེ་ལྟོ་སྟོང་བཏང་བར་བསམ༔ རྒྱས་པར་བྱེད་ན་དབང་ལེན་གསུམ༔ རིལ་བུ་ལན་གསུམ་སྦྱིན་པར་བྱ༔ དེ་ནས་གཞན་དོན་སྤྱོད་པའི་ཚེ༔ རིལ་བུ་སུས་འདོད་གོང་ལྟར་ཚོགས༔ གདུལ་བྱ་སྦྱང་ཕྱིར་ཁྲུས་ཀྱང་བྱ༔ ཞག་ནི་གསུམ་བདུན་ལྔ་ལ་སོགས༔ སྒྲུབ་པ་ཁ་གསོ་རྗེས་གནང་སྦྱིན༔ དུག་ལྔ་སྐུ་གསུང་ཐུགས་སུ་བསྒྱུར༔ མ་བསྒྲུབས་སངས་རྒྱས་ངོ་མཚར་ཆེ༔ དེ་ནས་འགྲོ་བ་ཡོངས་ལ་སྤེལ༔ ཐུགས་རྗེ་ཆེན་པོའི་སྡོམ་པ་དང་༔ བསྐྱེད་རིམ་ཕོག་ལ་ཡིག་བདུན་བཟླས༔ སྡོམ་པ་ལམ་ཁྱེར་རྣམ་གསུམ་
ཡིན༔ དེ་ནས་ཡོན་ཏན་བཤད་པ་ནི༔ ཡང་སྙིང་འདུས་པའི་རྒྱུད་དག་ལས༔ རིལ་བུ་སུ་ཡི་ལྟོར་སོང་བ༔ ཚེ་རབས་གང་དང་གར་སྐྱེས་ཀྱང་༔ སྤྱན་རས་གཟིགས་དང་འབྲལ་མི་སྲིད༔ ཅེས་པས་རིལ་བུ་སུས་ཐོབ་པ༔ ཐུགས་རྗེ་ཆེན་པོའི་ཞིང་དུ་འགྲོ༔ འདི་ལ་ཐེ་ཚོམ་མི་འཚལ་ཏེ༔ མ་བསྒྲུབས་སངས་རྒྱས་ཐོབ་ཐབས་ལྔ༔ སྔོན་སྦྱངས་ལས་སད་རྟོགས་གྲོལ་དང་༔ རང་བྱུང་རྒྱུད་མཆོག་བཏགས་གྲོལ་དང་༔ མཚན་ལྡན་པད་ཅན་རྩ་ཡི་གནད༔ གསང་ལམ་ཟབ་མོ་འཕོ་བ་དང་༔ ངོ་མཚར་རྫ་ས་མཆོག་སྐྱེ་བདུན་ནོ༔ དེ་ཕྱིར་འདི་སྤྱད་སྐྱེས་བུ་ལ༔ བྱང་ཆུབ་སེམས་ལྡན་མཆོག་ཏུ་གཅེས༔ རིལ་བུ་གཅེས་སྤྲས་ཆེར་བྱས་ཏེ༔ འགྲོ་དོན་དཔག་མེད་རྒྱ་ཆེན་སྤྱོད༔ སྙིང་ནོར་མིག་འབྲས་ཟབ་མོའི་གཏེར༔ བསམ་ཡས་དབུ་རྩེའི་ཁྲི་ལ་སྦསཿ ལྔ་བཅུ་ཁ་རལ་དུས་ཀྱི་ཚེ༔ ལས་ཅན་གཅིག་དང་ཕྲད་ནས་ཀྱང་༔ འགྲོ་ཀུན་འཁོར་བ་དོང་སྤྲུགས་ཤོག༔ ས་མ་ཡཱ༔ ཁ་ཐཾ༔ གུ་ཧྱ༔ རྒྱ་རྒྱ་རྒྱ༔ ཨྠྀི༔ བསམ་ཡས་དབུ་རྩེའི་ཁྲི་ནས་གཏེར་སྟོན་རཏྣ་གླིང་པས་བཏོན་པའི་གཏེར་མ་ལགས་སོ༔