ཐུགས་རྗེ་ཆེན་པོ་གསང་འདུས་ཀྱི་བུམ་སྒྲུབ་དངོས་སྒྲུབ་ལེན་ཆོག་བསྒྲིགས་ཆགས་སུ་བཀོད་པ།
ཐུགས་རྗེ་ཆེན་པོ་གསང་འདུས་ཀྱི་བུམ་སྒྲུབ་དངོས་སྒྲུབ་ལེན་ཆོག་བསྒྲིགས་ཆགས་སུ་བཀོད་པ་བཞུགས་སོ༔
གྲངས་དུས་རྟགས་ཀྱི་རིམ་པ་རྣམས་རྫོགས་ནས་བྱ་ཞིང་༔ དེ་ནས་རྒྱལ་བ་རིགས་ལྔའི་སྙིང་པོ་དང་སྒྲུབ་པའི་སྔགས་སྟོང་རེ་ཙམ་མ་ཆག་པར་བྱའོ༔ དེ་ནས་གྲོལ་ལུགས་རེས་བྱེད་ན་ཡུན་ཐུང་ངུར་སྒྲུབ་བཤད་པ་ལྟར་བྱ༔ རྒྱུན་དུ་བཙུགས་རྒྱུ་ཡིན་ན་དང་ཞག་ཉེར་གཅིག་གམ་ཟླ་གཅིག་ཙམ་སོང་ནས་དངོས་གྲུབ་བླངས་ཆོག་རྣམས་བྱ་སྟེ༔ དེ་ཡང་བུམ་ཁང་ནང་མའི་ཐུན་དཔོན་ནམ༔ ཐུན་པ་འགའ་རེ་ལ་རྟགས་ཁྱད་པར་ཅན་བྱུང་གདའ་ན༔ རྒྱུན་གྱི་དངོས་གྲུབ་བླངས་བས་སྒྲུབ་ཆེན་གཞུང་ལྟར་བྱ་སྟེ༔ ཀ་པཱ་ལ་བཟང་པོར་ཛ་གད་ལ་ཨ་མྲྀ་ཏ་བཏབ་ལ་དངོས་གྲུབ་ཀྱི་རྒྱ་མཚོར་བསམས་ལ༔ རྡོ་རྗེ་རྒྱལ་པོའི་ཕྱག་ཏུ་བསྣམས་ལ་མཆེད་ལྕམ་རྣམས་པད་ཀོར་དང་དངོས་གྲུབ་སྡུད་པའི་ཕྱག་རྒྱ་བྱ་ཞིང་ད་ལ་བསྐོར་ཏེ༔ ཧཱུྃ༔ བདེ་གཤེགས་
རྒྱལ་བ་མ་ལུས་དགོངས་སུ་གསོལ༔ རིག་འཛིན་མཁའ་འགྲོ་དམ་ཅན་སྲུང་མའི་ཚོགས༔ ལྷ་ཡི་དགེ་བསྙེན་དམ་ལྡན་ཐམས་ཅད་ཀྱིས༔ ཚུལ་བཞིན་སྒྲུབ་པའི་རྣལ་འབྱོར་བདག་ཅག་ལ༔ ཚེ་དང་ཆོས་དང་ཕྲིན་ལས་རྣམ་བཞི་དང་༔ རྐང་མགྱོགས་མིག་སྨིན་རིལ་བུ་མཁའ་སྤྱོད་དང་༔ མཐུ་དང་རྫུ་འཕྲུལ་མངོན་ཤེས་ནུས་མཐུ་དང་༔ སྲིད་ནོར་ཟས་དང་འདོད་དགུའི་དངོས་གྲུབ་སྩོལ༔ ཅེས་འདོད་པའི་དངོས་གྲུབ་ཐམས་ཅད་ཡང་ཡང་བསྟིམས་ལ༔ སྨན་མཆོད་བྱ་བ་ནི༔ ཧཱུྃ༔ རང་བྱུང་གདོད་ནས་རྣམ་པར་དག༔ རྩ་བརྒྱད་སྟོང་ལ་སྦྱར་བའི་སྨན༔ རིགས་ལྔ་དམ་
ཚིག་ལྔ་ཡི་དངོས༔ ཡེ་ཤེས་ལྔ་རྫོགས་སྒྲུབ་པའི་རྫས༔ དུག་ལྔ་སེལ་བའི་བདུད་རྩི་གྱུར༔ ཨོཾ་མ་ཎི་པདྨེ་ཧཱུྃ་ཧི༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧིཥྛ༔ དེ་ནས་བདུད་རྩི་སྨན་གྱིས་མཆོད༔ ཧཱུྃ༔ རྩ་བརྒྱད་ཡན་ལག་སྟོང་སྦྱར་བའི༔ ངོ་མཚར་རྨད་དུ་བྱུང་བའི་ཆོས༔ ཐུགས་རྗེའི་རང་བཞིན་ལྷ་ཚོགས་ལ༔ གུས་པས་འབུལ་ལོ་བཞེས་སུ་གསོལ༔ ཨོཾ་མ་ཎི་པདྨེ་ཧཱུྃ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ ལྷ་ཚོགས་རྣམས་ལ་མཚན་དོན་སྦྱར་རོ༔ ཆོས་སྐུ་སྣང་བ་མཐའ་ཡས་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ ལོངས་སྐུ་ཐུགས་རྗེ་ཆེན་པོའི་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ སྤྲུལ་སྐུ་པདྨ་འབྱུང་གནས་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ མཁའ་འགྲོ་ཡེ་ཤེས་མཚོ་རྒྱལ་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ གཏེར་སྟོན་འགྲོ་འདུལ་གླིང་པའི་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ རྒྱལ་སྲས་ཚེ་དབང་གྲགས་པའི་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ ལས་ཅན་ཆོས་བདག་རྣམས་ཀྱི་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ དྲིན་ཆེན་རྩ་བའི་བླ་མའི་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ ཡི་དམ་གསང་འདུས་ཡབ་ཡུམ་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ རྟ་མགྲིན་ནོར་འཛིན་
གསང་འཛིན་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ རྒྱལ་བ་རིགས་ལྔ་ཡབ་ཡུམ་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ སེམས་དཔའ་ཡབ་ཡུམ་བཅུ་དྲུག་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ སྤྲུལ་སྐུ་ཐུབ་པ་དྲུག་གི་ཞལ་དུ་སརྦ་པཉྩཨ་མྲྀ་ཏ་ཁ་རཾ་ཁཱ་ཧི༔ བསྐལ་བཟང་སངས་རྒྱས་སྟོང་རྩའི་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ ཁྲོ་བོ་སྒོ་བ་ཡབ་ཡུམ་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ བཀའ་སྲུང་གཏེར་སྲུང་རྒྱ་མཚོའི་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ ཨ་ལ་ལ་ཧོ༔ ཞེས་བཏུང་ངོ་༔ རྒྱུ་དེ་ལ་བསྟེན་ནས་རྒྱུན་གྱི་དངོས་གྲུབ་ངེས་པར་ཐོབ་བོ༔ རྒྱུན་གྱི་འཛབ་ལ་ནན་ཏན་བྱེད་པ་ནི་གནད་དུ་ཆེའོ༔ ༈ བཅུ་པ་དབང་བསྐུར་བའི་རིམ་པ་ནི༔ དབང་ཆེན་བསྟོད་བསྐུལ་ནས་ཡང་འདི་ནས་བསྐུར་ཏེ༔ སྒྲུབ་ཆེན་རང་ཡིན་ན་བྱེ་བྲག་དབང་ནི༔ ལྡིང་ཁྲི་སྟེང་གི་སྐུ་སྤྱི་བོར་བསྐུར༔ ཡིག་འབྲུ་མགྲིན་པ༔ ཤེལ་དང་མེ་ལོང་སྙིང་ཁ༔ རྨ་བྱ་ལྟེ་བར་བཞག༔ ཧཱུྃ༔ བདེ་གཤེགས་མ་ལུས་འདུས་པའི་སྐུ༔ སྐུ་དབང་ལུས་ལ་ཡོངས་རྫོགས་ཤོག༔ བུདྡྷ་ཨ་བྷི་ཥིཉྩༀ༔ འགགས་མེད་རྣམ་རོལ་སྙིང་པོའི་གསུང་༔ གསུང་དབང་ངག་ལ་ཡོངས་རྫོགས་ཤོག༔ བུདྡྷ་ཨ་བྷི་ཥིཉྩ་ཨཱ༔ སྤྲོས་མེད་མཐའ་བྲལ་ཡེ་ཤེས་ཐུགས༔ ཐུགས་
དབང་སེམས་ལ་རྫོགས་པར་ཤོག༔ བུདྡྷ་ཨ་བྷི་ཥིཉྩ་ཧཱུྃ༔ མ་ལུས་སྐུ་གསུང་ཐུགས་ཡོན་ཕྲིན༔ དབང་བཞི་ཡོངས་རྫོགས་ཐོབ་པར་ཤོག༔ སརྦ་ཨ་བྷི་ཥིཉྩ་ཧཱུྃ༔ ཞེས་རིམ་པར་གཏོར་དབང་བཞིན་བསྐུར་རོ༔ བཅོ་ལྔ་པ་དུས་ཀྱི་དངོས་གྲུབ་བླངས་པ་ནི༔ བྷནྡྷ་མཚན་ལྡན་དུ་དཀར་གསུམ་མངར་གསུམ་ཕྱེ་མར་ཨ་མྲྀ་ཏས་སྦྲུས་པའི་རིན་ཆེན་འབར་བ་ཨོཾ་ཨཱ༔ཧཱུྃ་གིས་མཚན་པ་དར་མཐིང་དམར་པོས་དྲིལ་ལ་དཀྱིལ་འཁོར་དབུས་སུ་བཞག༔ དེའི་དབུས་སུ་བསེ་ཕོར་སྐྱོན་མེད་བུར་ཆང་གིས་བཀང་བ་མཆེད་དང་མཉམ་པའི་ཚེ་རིལ་བཟུང་སྣ་ཚོགས་པ་བཤོས་པ༔ དལ་པས་ཁ་བཅད་པའི་སྟེང་དུ་མར་གྱི་རྡོ་རྗེ་རྩེ་ལྔ་པ་རྟ་ཞལ་མཚན་པ་བཞག་གོ་༔ སྔོན་འགྲོའི་དམ་རྫས་རིལ་བུ་ཁྱད་པར་ཅན་གྱི་བྷན་འདི་མཉྫིའི་སྟེང་དུ་བཞག་གོ༔ གཞན་ཡང་གོང་གི་རྒྱུ་དེ་རྣམས་དང་བུར་ཆང་གིས་སྦྲུས་ཏེ་དངོས་གྲུབ་རྫས་ཕྲིན་ལས་བཞིའི་གཟུགས་རིན་ཆེན་རིལ་བུ་མཆེད་དང་མཉམ་པ་བཤམས་པ་རིན་པོ་ཆེའི་སྣོད་དུ་བཞག་ལ་དལ་གྱི་སྒོ་ཐོད་དུ་བཞག༔ དེའི་མདུན་དུ་རཀྟ་ཡང་བཞག་གོ༔ གཞན་ཡང་ཟས་སྣ་ཚོགས་བསགས་ཤིང་རྣལ་འབྱོར་པ་རྣམས་ལག་གཡོན་མཐེབ་སྲིན་སྦྱར་གུང་མཛུབ་གཉིས་བསྒྲེང་༔ རྟ་མགོའི་ཚུལ་དུ་བྱས༔ ལག་གཡས་ཕྲེང་བ་འདྲེན་ཞིང་དངོས་གྲུབ་སྙིང་པོ་འདི་བཟླའོ༔ ཀཱ་ཡ་སིདྡྷི་ཨོ༔ ཝཱཀ་སིདྡྷི་ཨཱཿ ཙིཏྟ་སིདྡྷི་ཧཱུྃ༔ ཨཱ་ཡུསིདྡྷི་ཧྲཱིཿ ཞེས་བཟླའོ༔ དམིགས་པ་ནི༔ བདག་ཡི་དམ་ལྷའི་ཐུགས་ཀ་ནས་
ཧྲཱིཿལས་འོད་ཟེར་འཕྲོས་པས༔ འོག་མིན་གནས་ནས་རྒྱལ་བ་ཐམས་ཅད་སྤྱན་དྲངས་མདུན་གྱི་ནམ་མཁར་བྱོན༔ སྦྱོར་བ་མཛད་པའི་བྱང་སེམས་དྭངས་མ་དཀར་དམར་བབ༔ ཁྱད་པར་དུ་དམ་རྫ་ས་ལ་ཐིམ༔ འཇའ་འོད་དུ་འཁྲུགས་པར་བསམ༔ མདུན་གྱི་རཀྟ་ལས་འོད་འཕྲོས༔ ལྷ་མོ་པྲ་མོ་ཧཱ་ལ་སོགས་ཐམས་ཅད་དངོས་གྲུབ་ཀྱི་ངོ་བོར་ཞུ༔ རཀྟ་ལ་ཐིམ་པར་བསམ༔ ཡང་ཕྱོགས་བཅུའི་རྒྱལ་བ་ཐམས་ཅད་ཁྱད་པར་གསང་བ་འདུས་པའི་ལྷ་ཚོགས་རྣམས་ལས་ཨོ་དཀར་ཨཱཿདམར་ཧཱུྃ་མཐིང་དཔག་མེད་རྫས་ལ་ཐིམ༔ རྫས་རྣམས་ལས་འོད་ཟེར་ཚུར་འཕྲོས༔ རྣལ་འབྱོར་པའི་སྤྱི་མགྲིན་སྙིང་གར་སྐུ་གསུང་ཐུགས་ཀྱི་དངོས་གྲུབ་མ་ལུས་པ་ཐིམ་པར་བསམས་ལ༔ རྡོ་རྗེ་སློབ་དཔོན་གྱི་གོང་གི་རྫས་རྣམས་གཟུངས་ཐག་བཏགས་ལ་སྔགས་བཟླས་ཤིང་མཆེད་ལྕམ་རྣམས་པད་ཀོར་དངོས་གྲུབ་བསྡུས་པའི་ཕྱག་རྒྱ་བསྒྱུར་ཞིང་༔ ཨ་ལ་འཆམ་སྟབས་དངོས་གྲུབ་གནད་ནས་བསྐུལ་ཏེ༔ ཧཱུྃ༔ བྱམས་མགོན་ཐུགས་རྗེའི་ལྷ་ཚོགས་དགོངས་སུ་གསོལ༔ སྒྲུབ་པའི་རིག་འཛིན་རྣལ་འབྱོར་བདག་ཅག་གི༔ ལུས་ངག་ཡིད་གསུམ་གུས་པའི་ཤུགས་ཕྱུང་སྟེ༔ བསྙེན་སྒྲུབ་ཟབ་མོས་ཐུགས་དམ་གནད་ནས་
བསྐུལ༔ དེང་སང་སྐྱ་རེངས་དང་པོ་ཤར་དུ་ཉེ༔ རྡོ་རྗེའི་སྲིན་པོའི་ནམ་ཡང་ལངས་ལ་ཁད༔ བཟླས་བརྗོད་བསྙེན་པའི་གྲངས་ཀྱང་ཐེམས་ལགས་སོ༔ བསྙེན་སྒྲུབ་ཞག་གྲངས་ཚང་ངོ་དངོས་གྲུབ་སྩོལཿ ཐུན་མོང་མ་ཡིན་ཁྱད་པར་གཅིག་པའི་གནད༔ རྒྱལ་བའི་དཔལ་མགོན་ཐུགས་ཀྱི་དཔལ་བེའུ་ནས༔ བྱང་ཆུབ་སེམས་ཀྱི་ཐིག་ལེའི་འོད་འཕྲོ་ཞིང་སྐལ་ལྡན་རྣམས་ལ་དངོས་གྲུབ་བསྩལ་དུ་གསོལ༔ དེ་རྣམས་ནམ་མཁའ་ལ་བཞུགས་པའི་རྒྱལ་བ་རྣམས་དང་ད་ལའི་ལྷ་ཚོགས་ཀྱི་གནས་གསུམ་ནས་དངོས་གྲུབ་ཀྱི་ཨོཾ་དཀར་ཨཱཿདམར་ཧཱུྃ་མཐིང་གསུམ་བདག་གི་གནས་གསུམ་དུ་འོད་ཟེར་བར་མ་ཆད་དུ་ཐིམ་པར་བསམ་ཞིང་༔ ཧཱུྃ༔ ནམ་མཁའི་མཐའ་དང་མཉམ་པའི་སྐུ་མངའ་བ༔ རྡོ་རྗེ་སྐུ་ཡི་དངོས་གྲུབ་བསྩལ་དུ་གསོལ༔ ཆགས་མེད་པདྨ་ལྟ་བུའི་ལྗགས་མངའ་བ༔ ཚངས་པའི་གསུང་གི་དངོས་གྲུབ་བསྩལ་དུ་གསོལ༔ འགྲོ་དྲུག་ཐུགས་རྗེས་ཡོངས་གྲོལ་ཐུགས་མངའ་བ༔ སྤྲོས་བྲལ་ཐུགས་ཀྱི་དངོས་གྲུབ་བསྩལ་དུ་གསོལ༔ ཡོན་ཏན་ཕྲིན་ལས་འགྲོ་བའི་རེ་འདོད་སྐོང་༔ རིན་ཆེན་གཏེར་གྱི་དངོས་གྲུབ་བསྩལ་དུ་གསོལ༔ འགྲོ་དོན་ལྷུན་གྲུབ་གཉིས་
མེད་ངང་དུ་རོལ༔ ཕྲིན་ལས་ཐོགས་མེད་དངོས་གྲུབ་བསྩལ་དུ་གསོལ༔ དངོས་གྲུབ་བསྩལ་དང་སྩོལ་བར་མི་དམིགས་ཀྱང་༔ སྔོན་གྱི་ཐུགས་རྗེའི་བྱིན་རླབས་རང་བཞིན་དང་༔ དུས་ལས་མི་འདའ་རྡོ་རྗེའི་དམ་ཚིག་ཅན༔ སྐྱབས་ལས་མི་གཡེལ་གཡར་དམ་གཅིག་པའི་མཆེད༔ ཡེ་ཤེས་ལྷ་ཁྱོད་བདག་ལ་དགོངས་སུ་གསོལ༔ འགྲོ་བའི་མགོན་པོ་འདིར་གཤེགས་ཐུགས་རྗེས་དགོངས༔ ཐུགས་རྗེས་འདི་ལ་མ་བསྩལ་མི་འགྲུབ་ཅིང་༔ སྤྱན་རས་གཟིགས་ཀྱི་ལྷ་ཚོགས་སྐུ་གསུང་ཐུགས༔ བདག་ཅག་འགྲོ་རྣམས་ལུས་ངག་ཡིད་གསུམ་ཀུན༔ ཡེ་ནས་དབྱེར་མེད་ཡང་དག་དོན་གཅིག་ཀྱང་༔ མ་རྟོགས་འཁྲུལ་པས་འཁོར་བར་འཁྱམས་ལགས་ན༔ འཁོར་བ་ཉིད་ཀྱང་ཡེ་ནས་མྱ་ངན་འདསཿ སྐྱེ་ཤི་གཉིས་ཀྱང་ཡེ་ནས་བྱང་ཆུབ་ལམ༔ མཉམ་ཉིད་དོན་ལ་མ་སྐྱེས་ཆོས་ཀྱི་སྐུ༔ གསང་བ་འདུས་པའི་དངོས་གྲུབ་ཡོངས་རྫོགས་དེ༔ སྒྲུབ་མཆོག་རྫས་ལ་བརྟེན་ནས་ད་ལྟ་སྩོལ༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་མེ་པྲ་བེ་ཤ་སིདྡྷི་ཕ་ཕོ་ཧཱུྃ་ཧཱུྃ༔ ཞེས་མདུན་གྱི་ལྷ་ཚོགས་རྣམས་ལས་བྱིན་རླབས་དངོས་གྲུབ་ཆར་ལྟར་བབས་པས་བདག་དང་དམ་རྫས་ལ་ཐིམ་པར་བསམ༔ རྡོ་རྗེ་
མཚམས་པས་བགེགས་བསྐྲད་བྱས་ལ་སྲུང་འཁོར་བསྒོམ༔ གོང་གི་དངོས་གྲུབ་རྫས་རྣམས་ཐམས་ཅད་དཀྱིལ་འཁོར་དང་རྡོ་རྗེ་སློབ་དཔོན་ལ་སུམ་ཆ་ཕུལ་ལ་མཆེད་རྣམས་རིམ་པར་ཟ་ལྷག་མི་བཞག་ཕྱི་མི་ལ་མི་སྦྱིན་པ་གལ་ཆེའོ༔ དེ་ལྟར་ལས་ཁྲི་གས་བཅོ་ལྔ་པས་དངོས་གཞིའི་སྒྲུབ་ཆེན་བསྟན་ཏོ༔ ཞེས་ཐུགས་རྗེ་ཆེན་པོ་གསང་འདུས་ཀྱི་སྒྲུབ་ཆེན་ཀུན་ལ་སྤྱི་འགྲེའོ༔ ཁྱད་པར་བུམ་སྒྲུབ་དུས་སུ་ནི༔ དེ་ནས་ཐུན་པ་ཡི་གེ་མི་ཤེས་པ་ཐམས་ཅད་ཀྱི་ཡིག་བདུན་ལྐོག་འབུག་ཏུ་བྱེད༔ ཡི་གེ་ཤེས་པ་ཐམས་ཅད་བླ་མའམ་ཐུན་དཔོན་པས་གཙོར་བྱས༔ འཆམ་གོས་མ་རལ་པད་ཞྭ་སོགས་གང་ཡོད་མེད་ན་ཆོས་གོས་སོགས་མནབ༔ སྤོས་མདའ་དར་མེ་ལོང་ཚོགས་རྣམས་ལག་ཏུ་བཀྱག་རོལ་མོ་གང་ཡོད་ཐོགས་ལ༔ བྷནྟའི་ནང་དུའམ་བསེ་ཕོར་རམ་དཀར་ཡོལ་དུ་བདུད་རྩི་ལ་ཆོས་སྨན་བཏབ་པ་བཟུང་༔ རོལ་མོ་ཐམས་ཅད་འཁྲོལ་ཞིང་དཀྱིལ་འཁོར་ལ་ལན་གསུམ་བསྐོརཿ ཕྱག་ན་ཕྱག་ཆ་མེད་པ་རྣམས་པད་ཀོར་བྱ་ཞིང་༔ དང་པོ་བྱིན་འབེབས་བྱ་བ་ནི༔ དབྱངས་དང་རོལ་མོ་བྱ་ཞིང་འདི་སྐད་དོ༔ ཧཱུྃ༔ སྟོང་གསུམ་ཕྱོགས་བཅུའི་འཇིག་རྟེན་ཁམསཿ རང་བཞིན་རྣམ་དག་དཀྱིལ་འཁོར་ནསཿ རྒྱལ་བ་རྒྱ་མཚོ་ཐམས་ཅད་ཀྱིས༔ གནས་མཆོག་འདི་རུ་བྱིན་ཕོབ་ཅིག༔ རྡོ་རྗེ་གདན་གྱི་ལྷོ་ནུབ་མཚམས༔ ཨོ་རྒྱན་ཤར་ཕྱོགས་འཕགས་པའི་གནས༔ རི་བོ་ཏ་ལའི་ཕོ་བྲང་ནས༔ ཐུགས་རྗེ་ཆེན་པོ་སྤྱན་རས་
གཟིགས༔ རྒྱལ་བ་ཀུན་གྱི་ཡབ་གཅིག་པོ༔ དཀྱིལ་འཁོར་གཙོ་དང་འཁོར་བཅས་ཀྱིས༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་རྣམས་ལ་དབང་བཞི་བསྐུར༔ ཧེ་རུ་ཀ་ཡི་གནས་བཅུ་དང་༔ དུར་ཁྲོད་ཆེན་པོའི་གནས་མཆོག་བརྒྱད༔ འོག་མིན་ལྷུན་གྲུབ་གནས་མཆོག་ནས༔ སྐུ་གསུང་ཐུགས་ཡོན་ཕྲིན་ལས་བདག༔ ལྷ་དང་རིག་འཛིན་དམ་ཅན་གྱིསཿ དཀྱིལ་འཁོར་འདི་ལ་བྱིན་ཕོབ་ཅིག༔ སྒྲུབ་མཆོག་རྣམས་ལ་དབང་ཆེན་སྐུར༔ ཞི་ཚོགས་འོད་དང་ལམས་སེ་ལམ༔ ཁྲོ་ཚོགས་ཧཱུྃ་སྒྲ་དི་རི་རི༔ རིག་འཛིན་བྱིན་ཆེན་ཐིབས་སེ་ཐིབ༔ མཁའ་འགྲོའི་གར་སྟབས་ཤིགས་སེ་ཤིག༔ ཆོས་སྐྱོང་རུ་མཚོན་ལྷུབས་སེ་ལྷུབ༔ ཀུན་ཀྱང་སྔགས་སྒྲ་ཏི་རི་རི༔ ཕོ་རྒྱུད་གཡས་ནས་ཐིབས་སེ་ཐིབ༔ མོ་རྒྱུད་གཡོན་ནས་ཐིབས་སེ་ཐིབ༔ སིལ་སྙན་མང་པོ་སི་ལི་ལི༔ རྒྱན་ཆ་མང་པོ་ཁྲོ་ལོ་ལོ༔ ཕཊ་དང་ཕེ་སྒྲ་ཏི་རི་རི༔ རྩ་བ་གསུམ་གྱི་ལྷ་ཚོགས་རྣམས༔ སྔོན་གྱི་ཐུགས་དམ་མ་གཡེལ་ཅིག༔ རྒྱལ་བ་བྱིན་རླབས་མ་ཆུང་ཞིག༔ མཁའ་འགྲོ་དངོས་གྲུབ་མ་གཡེལ་ཅིག༔ དམ་ཅན་མཐུ་རྩལ་མ་ཆུང་ཞིག༔ གདུང་
བས་ཐུགས་དམ་བསྐུལ་ལགས་སོ༔ རྟགས་དང་མཚན་མ་བསྟན་པ་དང་༔ སྐུ་གསུང་ཐུགས་ཀྱི་དངོས་གྲུབ་བསྩལ་དུ་གསོལ༔ ས་མ་ཡ་ཧོ༔ ས་མ་ཡ་སྟོ༔ ས་མ་ཡ་ཧོ༔ ཨ་ཝེ་ཤ་ཡ་ཨ་ཨཱ༔ ཞེས་གདུང་བའི་མོས་གུས་ཁ་ཙམ་མ་ཡིན་པར་བྱ༔ དེ་ནས་བསྟོད་པ་འདིའི་ཚིག་མཚམས་སུ་རོལ་མོ་དང་བཅས་བསྐོར་བའི་ཚུལ་དུ་གོམ་པ་ལྔ་དྲུག་རེ་དལ་བུའི་འཆམ་སྟབས་སུ་འགྲོ་ཞིང་འདི་སྐད་དོ༔ ཧཱུྃ༔ བདེ་གཤེགས་ཀུན་འདུས་ཐུགས་རྗེའི་ལྷ༔ རང་བྱུང་ཡེ་ཤེས་སྤྱན་རས་གཟིགས༔ དམར་གསལ་པད་ཕྲེང་བུམ་པ་འཛིན༔ གསང་ཡེ་རང་འདྲའི་ཡུམ་དང་འཁྲིལ༔ རབ་མཛེས་རྒྱན་རྫོགས་འོད་ལྔའི་ཀློང་༔ ཉི་ཟླ་པད་སྟེང་དགྱེས་པར་བཞུགས༔ སྐུ་གསུང་ཐུགས་ཡོན་ཕྲིན་ལས་རྫོགས༔ འཇིག་རྟེན་མགོན་ལ་ཕྱག་འཚལ་བསྟོད༔ དུས་གསུམ་བདེ་གཤེགས་རིགས་ཀྱི་བདག༔ ཚེ་ཡི་བདག་པོ་སྐུ་མདོག་དམར༔ མཉམ་བཞག་ཚེ་བུམ་རྒྱན་རྫོགས་སྤྲས༔ འོད་དཔག་མེད་ལ་ཕྱག་འཚལ་བསྟོད༔ ཐུགས་སྲོག་ཡེ་ཤེས་སེམས་དཔའི་སྐུ༔ དབང་ཆེན་དམར་པོ་གྲི་ཐོད་འཛིན༔ རྡོ་རྐད་འཚེར་ཞིང་བདུད་བཞི་འདུལ༔ དབང་སྡུད་མཛད་ལ་ཕྱག་འཚལ་བསྟོད༔ སྲས་མཆོག་ནོར་འཛིན་གསང་སྔགས་
འཛིན༔ དཀར་དམར་རྒྱུན་མཛེས་པད་ཕྲེང་འཛིན༔ ཐབས་ཀྱི་འགྲོ་འདུལ་རིག་པ་འཛིན༔ ཐབས་ཤེས་སྲས་ལ་ཕྱག་འཚལ་བསྟོད༔ ཧཱུྃ༔ རྣམ་སྣང་འཁོར་ལོ་དྲིལ་བུ་འཛིན༔ ནམ་མཁའི་དབྱིངས་ཕྱུག་ཡུམ་དང་འཁྲིལ༔ གཏི་མུག་རྣམ་དག་དཀར་གསལ་མདོག༔ ཆོས་དབྱིངས་ཡེ་ཤེས་སྐུ་ལ་བསྟོད༔ ཧཱུྃ༔ མི་བསྐྱོད་རྡོ་རྗེ་དྲིལ་བུ་འཛིན༔ མཱ་ཀི་དབྱིངས་ཕྱུག་ཡུམ་དང་འཁྲིལཿ ཞེ་སྡང་རྣམ་དག་མཐིང་གསལ་མདོག༔ མེ་ལོང་ཡེ་ཤེས་སྐུ་ལ་བསྟོད༔ ཧཱུྃ༔ རིན་འབྱུང་རིན་ཆེན་དྲིལ་བུ་འཛིན༔ སངས་རྒྱས་སྤྱན་མ་ཡུམ་དང་འཁྲིལ༔ ང་རྒྱལ་རྣམ་དག་སེར་གསལ་མདོག༔ མཉམ་ཉིད་ཡེ་ཤེས་སྐུ་ལ་བསྟོད༔ ཧཱུྃ༔ སྣང་མཐའ་པདྨ་དྲིལ་བུ་འཛིན༔ གོས་དཀར་དབྱིངས་ཕྱུག་ཡུམ་དང་འཁྲིལཿ འདོད་ཆགས་རྣམ་དག་དམར་གསལ་མདོག༔ སོར་རྟོག་ཡེ་ཤེས་སྐུ་ལ་བསྟོད༔ ཧཱུྃ༔ དོན་གྲུབ་རྒྱ་གྲམ་དྲིལ་བུ་འཛིན༔ དམ་ཚིག་སྒྲོལ་མ་ཡུམ་དང་འཁྲིལ༔ ཕྲག་དོག་རྣམ་དག་ལྗང་གསལ་མདོག༔ བྱ་གྲུབ་ཡེ་ཤེས་སྐུ་ལ་བསྟོད༔ ཧཱུྃ༔ ས་ཡི་སྙིང་པོ་སྐུ་མདོག་དཀར༔ ཕྱག་ན་རིན་ཆེན་མྱུ་གུ་བསྣམས༔ ལཱ་སྱ་དཀར་
མོས་མེ་ལོང་འཛིན་ཤར་གྱི་སེམས་དཔའི་སྐུ་ལ་བསྟོད༔ བྱམས་པ་མགོན་པོ་སྐུ་མདོག་དཀརཿ ཕྱག་ན་ཀླུ་ཤིང་དྲིལ་བུ་འཛིན༔ པུལླེ་དཀར་མོས་མེ་ཏོག་བསྣམས༔ ཤར་ལྷོ་སེམས་དཔའི་སྐུ་ལ་བསྟོད༔ ནམ་མཁའི་སྙིང་པོ་སྐུ་མདོག་མཐིང་༔ ཕྱག་ན་རལ་གྲི་དྲིལ་བུ་བསྣམས༔ དྷ་པེ་དཀར་མོས་སྤོས་ཕོར་འཛིན༔ ལྷོ་ཡི་སེམས་དཔའི་སྐུ་ལ་བསྟོད༔ སྒྲིབ་པ་རྣམ་སེལ་སྐུ་མདོག་དཀར། ཕྱག་ན་པུ་སྟེ་དྲིལ་བུ་བསྣམས༔ གནྡྷེ་དཀར་མོས་དུང་ཆོས་འཛིན༔ ལྷོ་ནུབ་སེམས་དཔའི་སྐུ་ལ་བསྟོད༔ སྤྱན་རས་གཟིགས་དབང་སྐུ་མདོག་དམརཿ ཕྱག་ན་པདྨ་དྲིལ་བུ་བསྣམས༔ གཱིརྟི་དམར་མོས་པི་ཝཾ་འཛིན༔ ནུབ་ཀྱི་སེམས་དཔའི་སྐུ་ལ་བསྟོད༔ ཀུན་ཏུ་བཟང་པོ་སྐུ་མདོག་མཐིང་༔ ཕྱག་ན་རིན་ཆེན་དྲིལ་བུ་བསྣམས༔ མཱ་ལེ་མཐིང་སྐྱེས་ཕྲེང་བ་འཛིན༔ ནུབ་བྱང་སེམས་དཔའི་སྐུ་ལ་བསྟོད༔ ཕྱག་ན་རྡོ་རྗེ་སྐུ་མདོག་ལྗང་༔ ཕྱག་ན་རྡོ་རྗེ་དྲིལ་བུ་བསྣམས༔ ནིརྟི་ལྗང་མོས་ཞལ་ཟས་འཛིན་ནུབ་བྱང་སེམས་དཔའི་སྐུ་ལ་བསྟོད༔ རྒྱལ་སྲས་འཇམ་དཔལ་སྐུ་མདོག་སེར༔ ཕྱག་ན་ཨུཏྤལ་དྲིལ་བུ་བསྣམས༔ ཨཱ་ལོ་སེར་མོས་མར་མེ་འཛིན༔
བྱང་ཤར་སེམས་དཔའི་སྐུ་ལ་བསྟོད༔ ཧཱུྃ༔ བཅོམ་ལྡན་ལྷ་དབང་བརྒྱ་བྱིན་ནི༔ སྐུ་མདོག་དཀར་པོ་པི་ཝཾ་འཛིན༔ ཉོན་མོངས་ང་རྒྱལ་དག་པའི་སྐུ༔ ལྷ་ཡི་ཐུབ་པའི་སྐུ་ལ་བསྟོད༔ བཅོམ་ལྡན་ཐགས་བཟང་རྒྱལ་པོ་ནི༔ སྐུ་མདོག་སྔོན་པོ་རལ་གྲི་འཛིན༔ ཉོན་མོངས་ཕྲག་དོག་དག་པའི་སྐུ༔ ལྷ་མིན་ཐུབ་པའི་སྐུ་ལ་བསྟོད༔ བཅོམ་ལྡན་ཤཱཀྱ་ཐུབ་པ་ནི༔ སྐུ་མདོག་སེར་ཆེན་གསེག་ཤང་འཛིན༔ ཉོན་མོངས་འདོད་ཆགས་དག་པའི་སྐུ༔ མི་ཡི་ཐུབ་པའི་སྐུ་ལ་བསྟོད༔ བཅོམ་ལྡན་སེང་གེ་རབ་བརྟན་ནི༔ སྐུ་མདོག་སེར་ནག་པོ་ཏི་འཛིན༔ ཉོན་མོངས་གཏི་མུག་དག་པའི་སྐུ༔ བྱོལ་སོང་ཐུབ་པའི་སྐུ་ལ་བསྟོད༔ བཅོམ་ལྡན་ཁ་འབར་རྒྱལ་པོ་ནི༔ སྐུ་མདོག་དམར་པོ་སྒྲོམ་བུ་འཛིན༔ ཉོན་མོངས་སེར་སྣ་དག་པའི་སྐུ༔ ཡི་དྭགས་ཐུབ་པའི་སྐུ་ལ་བསྟོད༔ བཅོམ་ལྡན་ཆོས་ཀྱི་རྒྱལ་པོ་ནི༔ སྐུ་མདོག་མཐིང་ནག་མེ་ཆུ་འཛིན༔ ཉོན་མོངས་ཞེ་སྡང་དག་པའི་སྐུ༔ དམྱལ་བའི་ཐུབ་པའི་སྐུ་༔ ཧཱུྃ༔ བསྐལ་པ་བཟང་ལ་ཐུགས་བསྐྱེད་ནས༔ མཚན་མཆོག་སུམ་ཅུ་གཉིས་མངའ་ཞིང་༔ དཔེ་བྱད་བརྒྱད་ཅུས་རྣམ་པར་
སྤྲས༔ སངས་རྒྱས་སྟོང་གི་སྐུ་ལ་བསྟོད༔ ཚངས་དབྱངས་གསུང་གི་ང་རོ་ཡིསཿ བསམ་གྱིས་མི་ཁྱབ་ཆོས་རྣམས་ནི༔ གང་ལ་གང་འདུལ་དེར་སྟོན་པའི༔ སངས་རྒྱས་སྟོང་གི་གསུང་ལ་བསྟོད༔ སྤྲོས་པ་མེད་པ་དབྱིངས་ཀྱི་ངང་༔ སྨྲ་བསམ་བརྗོད་དུ་མེད་པ་ལས༔ ཐུགས་རྗེས་འགྲོ་ཀུན་སྲིད་མཚོར་སྒྲོལ༔ སངས་རྒྱས་སྟོང་གི་ཐུགས་ལ་བསྟོད་ཁམ་གསུམ་སྲིད་པའི་སེམས་ཅན་རྣམསཿ ཉོན་མོངས་དུག་ལྔས་གཟིར་བ་ལཿ བརྩེ་ཆེན་ཐུགས་རྗེས་མ་ལུས་འདྲེན༔ སངས་རྒྱས་སྟོང་གི་ཡོན་ཏན་བསྟོད༔ འགྲོ་བའི་ལས་དང་བག་ཆགས་ཀྱི༔ གང་ལ་གང་འདུལ་མཛད་པ་ནི༔ འཁོར་བ་མ་སྟོང་བར་དུ་མཛད༔ སངས་རྒྱས་སྟོང་གི་ཕྲིན་ལས་བསྟོད༔ ཧཱུྃ༔ འཇིགས་བྱེད་བཛྲ་ཧེ་རུ་ཀ །ལྕགས་ཀྱུ་གཡས་ལ་སྡིགས་མཛུབ་གཡོན༔ འཇིགས་བརྒྱད་ཞི་བའི་ལས་མཛད་པའི༔ ཤར་སྒོའི་བདག་ལ་ཕྱག་འཚལ་བསྟོད༔ འཇིགས་བྱེད་རཏྣ་ཧེ་རུ་ཀ༔ བེ་ཅོན་གཡས་ལ་ཞགས་པ་གཡོན༔ འབྱོར་དྲུག་རྒྱས་པའི་ལས་མཛད་ཅིང་༔ ལྷོ་སྒོའི་བདག་ལ་ཕྱག་འཚལ་བསྟོད༔ འཇིགས་བྱེད་པདྨ་ཧེ་རུ་ཀ༔ དབྱུག་ཐོ་གཡས་ལ་ལྕགས་སྒྲོག་གཡོན༔
ཁམས་གསུམ་དབང་དུ་སྡུད་མཛད་པའི༔ ནུབ་སྒོའི་བདག་ལ་ཕྱག་འཚལ་བསྟོད༔ འཇིགས་བྱེད་ཀརྨ་ཧེ་རུ་ཀ༔ རྒྱ་གྲམ་གཡས་ལ་དྲིལ་བུ་གཡོན༔ དགྲ་བགེགས་སྒྲོལ་བའི་ལས་མཛད་པའི༔ བྱང་སྒོའི་བདག་ལ་ཕྱག་འཚལ་བསྟོད༔ གཞན་ཡང་གསང་བ་འདུས་པ་ཡི༔ དཀྱིལ་འཁོར་མུ་རན་སྐྱོང་མཛད་པའི༔ དམ་ཚིག་རྗེས་གཅོད་བར་ཆད་སེལ༔ གིང་དང་ལང་ཀ་དབང་ཕྱུག་བཅས༔ དཀྱིལ་འཁོར་ལྷ་ལ་ཕྱག་འཚལ་བསྟོད༔ གཞན་ཡང་བཀའ་དང་བསྟན་པ་སྲུང་༔ ཆོས་སྐྱོང་སྲུང་མ་གཙོ་དང་འཁོར༔ ཤ་ཁྲག་སྲོག་ལ་མངའ་མཛད་ཅིང་༔ དགྲ་དང་བགེགས་ཀྱི་གཉན་པོར་ཆེ༔ མངོན་སྤྱོད་དྲག་པོའི་ཕྲིན་ལས་མཛད༔ དམ་ཅན་ཚོགས་ལ་ཕྱག་འཚལ་བསྟོད༔ དེ་ནས་བུམ་སྒྲུབ་གཞུང་གི་གསོལ་འདེབས་ཐུགས་དམ་གནད་ནས་བསྐུལ་བ་དེ་བྱ༔ དེ་ནས་རོལ་མོ་དང་རྒྱན་རྣམས་ཕུད་ལ་ཕྱག་འཚལ༔ ཐམས་ཅད་ཀྱིས་ཐལ་མོ་སྦྱར་ནས་ཐུན་དཔོན་གྱི་རྗེས་ཟློས་བྱས་ལ་ཧྲཱིཿ མ་བཅོས་ཆོས་དབྱིངས་སྤྲོས་དང་བྲལ་བ་ལས༔ ཐུགས་རྗེའི་རྣམ་འཕྲུལ་ཡིད་བཞིན་ནོར་བུ་ལྟརཿ བྱམས་མགོན་ཐུགས་རྗེའི་ལྷ་ཁྱོད་དགོངས་སུ་གསོལ༔ བདག་ཅག་མ་རིག་ལས་ངན་སྡིག་པོ་
ཆེ༔ ཁམས་གསུམ་འཁོར་བའི་གནས་སུ་གཏན་འཁྱམ་ཞིང་༔ རིགས་དྲུག་འཁོར་བའི་གནས་ནས་ཐར་དུས་མེད༔ མཐའ་མེད་ཡུན་དུ་ཉམ་ཐག་འདི་འདྲ་མྱོང་༔ བྱམས་མགོན་ཐུགས་རྗེའི་སྤྱན་གྱིས་མ་གཟིགས་སམཿ འདི་ལ་མགོན་པོས་ཐུགས་རྗེའི་ཕྱག་བརྐྱངས་ལ༔ ཐར་པའི་ལམ་དུ་འདྲེན་པར་མཛད་དུ་གསོལ༔ རང་གི་རྣམ་སྨིན་སྡུག་བསྔལ་རྒྱུན་སྤྱོད་ན༔ འཕགས་པའི་ཐུགས་རྗེས་བདག་ལ་ཅི་ཞིག་བྱ༔ ཐབས་མཁས་ཐུགས་རྗེའི་ཞགས་པས་མཆིས་ལགས་ན༔ ད་ལྟ་ཉིད་དུ་འདྲེན་པར་མཛད་དུ་གསོལ༔ མས་གདུང་བུ་ལ་བརྩེ་བ་ཇི་བཞིན་དུ༔ ཐུགས་དམ་མ་གཡེལ་ཐུགས་རྗེའི་དབང་གི་ལྷ༔ ལས་ངན་མཐའ་ཟད་འཁོར་བ་དོང་སྤྲུགས་ནས༔ མགོན་པོ་ཁྱེད་ཀྱི་ཞབས་དྲུང་འདྲེན་དུ་གསོལ༔ བུམ་སྒྲུབ་གཞུང་ནས་གསོལ་བ་འདེབས༔ ་ཐུགས་དམ་གནད་ནས་བསྐུལ་བ་དེ་ཚར་གཅིག༔ དེ་ནས་རུ་ཏྲའི་སྨྲེ་བཤགས༔ ཐུགས་རྗེ་ཆེན་པོའི་སྨྲེ་སྔགས་ཀྱི་བསྟོད་པ་གཉིས་གཅིག་ཡིན་པས༔ ཐུགས་རྗེ་ཆེན་པོའི་སྨྲེ་སྔགས་བསྟོད་པ་དེ༔ དྲི་མེད་ཤེལ་མདོག་ཅེས་ཚིག་ཟུར་བསྒྱུར་ལ་ཚར་གཅིག་འདོན་ཏེ༔ རྗེས་ཟློས་མ་ཐོན་ཀྱང་གང་ཤེས་ཀྱིས་འདོན༔ ཤེལ་ལ་རིགས་མང་བས་དམར་པོར་འཇུག་རྒྱུའོ༔ བཀའ་སྲུང་བསྐང་གསོ་རྒྱས་པར་བྱ༔ དེ་ནས་ཐུན་པ་འགྲོ་དགོས་པ་
རྣམས་ཀྱིས་ཤེས་ན་འདོན༔ མི་ཤེས་ན་རྗེས་ཟློས་བྱས་ལ་བཤགས་པ་དང་བསྡུ་ཆོག་བཀྲ་ཤིས་རྣམས་བྱ༔ ཕྱག་འཚལ་ནས་སོ་སོར་འགྲོའོ༔ འདུག་མི་རྣམས་སྔར་ལུགས་ལྟར་བྱ༔ ཤུ་བྷཾ༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།