ཐུགས་རྗེ་ཆེན་པོ་གསང་བ་འདུས་པ་ལས་བུམ་སྒྲུབ་སོགས་ཀྱི་ཉུལ་ལེ་བསྐྲད་པའི་ཟིན་བྲིས།
ཐུགས་རྗེ་ཆེན་པོ་གསང་བ་འདུས་པ་ལས་བུམ་སྒྲུབ་སོགས་ཀྱི་ཉུལ་ལེ་བསྐྲད་པའི་ཟིན་བྲིས་བཞུགས་སོ།།
ཐུགས་རྗེ་ཆེན་པོ་གསང་བ་འདུས་པའི་སྒྲུབ་ཆེན་བུམ་སྒྲུབ་སོགས་ཀྱི་ཉུལ་ལེ་བསྐྲད་པའི་ཟིན་བྲིས་ནི། སྒྲུབ་ཆེན་དུ་བཤད་ལྟར་ཉུལ་ལེའི་ལིང་ག་བྲུབ་ཁུང་དུ་བཅུག་པ་དེ་ཁ་ཕྱེས་ལ༔ བླ་མ་རྡོ་རྗེ་སློབ་དཔོན་ཡོད་ན་དེ་ཚེ་ཉམས་ལེན་ལྟ་བའི་ངང་ལ་བཞུགས༔ ཉུལ་ལེ་སྤྲོད་མཁན་བསྐོས་ཡོད་ན་དེས་བྱ༔ སྤྲོས་པ་ལ་དགའ་ན༔ འབག་དཀར་ནག་གཉིས་འཆམ་པའི་ལག་ཏུ་བོང་མཛེ་འུག་མགོའི་ཐོ་བ་དང་༔ མི་རྐང་གི་ལྕག་ཚན་མི་ལྤགས་ཀྱི་ལྕག་འབྲས་བཏགས་པ་ཡོད་ན་རབ༔ མི་གྲིར་ཤི་བའི་ལག་པ༔ ཁྲག་དང་མཚལ་གྱིས་བྱུགས་པའི་རལ་གྲི་སོ་གཉིས༔ ཐུན་རྫས་སྣ་ཚོགས་ཐོགས་ལ་འཆམ་ཞིང་ལིང་ག་ལ་གཟིར༔ མེད་ན་ཕུར་པ་དང་ཡུངས་དཀར་ཐུན་རྫས་གང་རྙེད་ཐོགས༔ འབག་འཆམ་སོགས་མི་འཛོམ་ན་ཐུན་དཔོན་ནམ་ཉུལ་ལེ་སྐྱོད་མཁན་རང་
གིས་འདོན་ཆ་དུས་ཕུར་པས་གཟིར༔ ཐུན་བྲབ་པས་ཆོག༔ དང་པོ་རང་ཉིད་ཐུགས་རྗེ་ཆེན་པོའི་ཐུགས་ཀ་ནས་ཁྲོ་བོ་རྟ་མགྲིན་དམར་པོ་གྲི་ཐོད་འཛིན་པ་ཞིག་སྤྲོས་ལ༔ དེའི་ང་རྒྱལ་དུ་བཟུང་ནས་ལས་བྱང་ནང་གི་ཆེ་བ་བསྐྱེད་པ་འདི་འདོན་ཏེ༔ ཧཱུྃ༔ སྟོང་གསུམ་འཇིག་རྟེན་དབང་གི་དལ༔ ཡེ་ཤེས་མེ་དཔུང་ཕྱོགས་བཅུར་འབར༔ གཟུགས་སྣང་ཐམས་ཅད་ཁྲོ་བོའི་རྒྱལ༔ དབང་གི་རྟ་སྐད་སྟོང་གསུམ་ཁེངས༔ མ་མོ་མཁའ་འགྲོ་དབང་དུ་སྡུད༔ སྣང་སྲིད་ཐམས་ཅད་བྲན་དུ་ཁོལ༔ སྟོང་གསུམ་འདི་ན་སུ་ཡང་རུང་༔ ང་ལས་ཆེ་བཙན་སུ་ཡང་མེད༔ ང་ཡིས་བསྒོས་པའི་བཀའ་བཞིན་དུ༔ བཅོལ་བའི་ཕྲིན་ལས་
འགྲུབ་པར་མཛོད༔ ཧཱུྃ་ཧཱུྃ་ཧྲཱིཿཧྲཱིཿབྷྱོ་བྷྱོཿ ཞེས་གྱེར་རོ༔ དེ་ནས་རྟ་མགྲིན་གྱི་ཐུགས་ཀ་ནས་འོད་ཟེར་འཕྲོས་པས་རང་བཞིན་གྱི་གནས་ནས་པདྨ་གསུང་གི་བཀའ་སྲུང་ཐམས་ཅད་དང་ཀུན་ཐུབ་རྒྱལ་མོ་སྤྱན་དྲངས་པར་བསམ་ལ་དམར་གཏོར་གཉིས་བྲན་ནས་བཞག་པ་ལ་གསོ་ཁྲན་རྣམས་བྱ༔ ཡང་ན་དམར་གཏོར་ཆུང་ངུ་གཉིས་བྲན་ལཿ ཧཱུྃ༔ རབ་འཇིགས་དུར་ཁྲོད་རྔམས་པའི་ཀློང་དཀྱིལ་ནས༔ པདྨ་གསུང་གི་བཀའ་སྲུང་སྐུར་བཞེངས་ཤིག༔ དམ་རྫས་བརྒྱན་པའི་གཏོར་མ་འདི་བཞེས་ལ༔ ཐུགས་དམ་གནད་ནས་བསྐུལ་ལོ་ཕྲིན་ལས་མཛོད༔ ཁམས་བརྒྱ་མ་དྲུག་དམུས་ལོང་སུམ་ཅུ་གཉིས༔ ཁྱི་བརྒྱད་སྤྱང་བརྒྱད་མེ་འབྲུག་རླུང་འབྲུག་དང་༔ དཀར་སེར་དམར་ལྗང་དྲ་བ་གློག་འགྱུ་མ༔ ཕོ་ཉ་བཀའ་སྲུང་དགྲ་འདུལ་ཐུགས་རྗེ་ཅན༔ དམ་རྫས་བརྒྱན་པའི་གཏོར་མ་འདི་བཞེས་ལ༔ དགྲ་བགེགས་གནོད་བྱེད་ཐལ་བ་རྡུལ་དུ་རློགས༔ ཐུགས་དམ་གནད་ནས་བསྐུལ་ལོ་ཕྲིན་ལས་མཛོད༔ ཨོ་ཀྲོ་དྷི་ཤྭ་རི་ཨ་མྲྀ་ཏ་བ་ལི་ཏ་རཀྟ་ཁཱ་ཧི༔ ཏྲི་པ་ཏྲི་པ་ཧཱུཾ་ཕཊ༔ ཁ་ལ་རོ་ཤ་ཁ་ལ་རོ་ཤ་ཧཱུཾ་ཕཊ༔ ཡཀྵ་ཀུན་བཻ་ཛཧཱུྃ་ཕཊ༔ ཛྭ་ལ་རཾ་ཛྭ་ལ་རཾ་ཧཱུྃ་ཕཊ༔ ཛྭ་ལ་ཨ་མུ་ཀཾ་ཛྭ་ལ་ཨ་མུ་ཀཾ་རཾ་ཧཱུྃ་ཕཊ༔ ཨ་་ཏ་རཀྟ་བ་ལིཾ་ཏ་ཁཱ་ཧི༔ ཞེས་
སྤྱན་དྲངས་གཏོར་མ་བསྔོས་ནས་ཆད་ཅིང་བསྐུལ་པ་ནི༔ བཀའ་སྲུང་ཕོ་ཉ་རྣམས་ཀྱིས་གནོད་བྱེད་དམ་སྲི་ཉུལ་ལེ་ཐམས་ཅད་བཀུག་ཅིང་བྲུབ་ཁུང་ནང་དུ་བཅུག་པར་བསྒོམས་ཏེ༔ ཕཊ་ཨེ་ཡཾ་རཾ་ཁཾ༔ མདུན་དུ་དུག་གསུམ་ལས་གྲུབ་པའི་བཙོན་ཁང་དུས་མཐའི་ཆར་སྤྲིན་ལྟར་ནག་པ༔ ཁ་དོག་ཅིང་མཐིལ་ཡངས་པ༔ ཟིན་ནས་ཐར་དབང་མེད་པ༔ འདོད་ཆགས་ཁྲག་གི་རྒྱ་མཚོ་ཁོལ་བ༔ ཞེ་སྡང་གི་མེ་འབར་བ༔ གཏི་མུག་གི་མུན་པ་འཐིབས་པ༔ ཕྲག་དོག་གི་རླུང་འཚུབ་པ༔ སྟེང་ནས་ཐོག་དང་མཚོན་ཆའི་ཆར་འབེབས་པའི་ནང་དུ་རྩྭ་དང་སྲིད་ལས་སྐྱེས་པའི་གནོད་བྱེད་དམ་སྲི་ཁ་ངུ་བ༔ མིག་ཤི་མིག༔ ལག་པ་གཡས་ཀྱིས་སྐྲ་འབལ་ཞིང་༔ གཡོན་པས་བྲང་རྡུང་བ༔ རྐང་ལག་ལྕགས་སུ་བཅུག་པ༔ བུ་ག་དགུ་ནས་ཁྲག་འཛག་པ༔ ཉམ་ཐག་དབུགས་དང་བྲལ་ལ་ཁད་པ་འདར་ཕྲི་ལི་ལི་བྱེད་པ་ཞིག་ཏུ་གྱུར༔ ན་མོ༔ དྲིན་ཅན་རྩ་བ་དང་བརྒྱུད་པའི་བླ་མ་དམ་པ་རིག་འཛིན་གྲུབ་ཐོབ་རྒྱ་མཚོའི་ཚོགས་དང་བཅས་པའི་བཀའ་བདེན་པ་དང་༔ ཐུགས་རྗེ་ཆེན་པོ་གསང་བ་འདུས་པ་ལ་སོགས་པ་རྒྱུད་སྡེ་དྲུག་གི་ལྷ་ཚོགས་རྣམས་ཀྱི་བདེན་པ་དང་༔ བསྐལ་པ་བཟང་པོའི་སངས་རྒྱས་སྟོང་
རྩ་གཉིས་ལ་སོགས་པ་དཀོན་མཆོག་རིན་པོ་ཆེ་གསུམ་གྱི་བདེན་པ་དང་༔ བཀའ་སྲུང་བསྟན་སྲུང་དམ་ཅན་རྒྱ་མཚོའི་བདེན་པ་དང་༔ བདེན་པ་ཆེན་པོའི་མཐུསཿ སྤྱིར་ཞིང་བཅུ་ཚང་བ་བསྟན་པའི་སྤྱི་དགྲ་རྣལ་འབྱོར་པ་བདག་ཅག་དཔོན་སློབ་ཡོན་མཆོད་བསྲུང་བྱ་མི་ནོར་འཁོར་དང་བཅས་པ་ལ་གནོད་ཅིང་འཚེ་བའི་གདོན་བགེགས༔ ཁྱད་པར་དུ་ཡང་སྒྲུབ་པ་ཟབ་མོ་འདི་ལ་བར་དུ་གཅོད་ཅིང་གླགས་ཚོལ་བར་བྱེད་པའི་ཉུལ་ལེ༔ ནག་མོ་བྱ་རོག་སྐད་འགྱུརཿ གྲོང་རྐུན་ནག་མོ༔ འདོད་ཆགས་དམར་མོ་ར་ནུ༔ གནམ་སྨན་དུན་རྩེ༔ ལག་བསེ་མགོ་དམར༔ གནམ་ཐེལ་ནག་པོ༔ ཀླུ་སྲིན་སྔོན་མོ༔ ཀླུ་ཆེན་འཁྱམས་པོ༔ ས་བདག་མ་ཡམས༔ བདུད་དང་ཐེའུ་རང་༔ དམ་སྲི་སྤུན་གསུམ༔ རྒྱལ་འགོང་ཀླུ་སྲིན༔ བཙུན་པ་ཁྲིམས་ཉམས༔ སྔགས་པ་དམ་ཉམས༔ བོན་པོ་ལྟ་ལོག༔ དྲེད་པོ་དཀོར་སྲེད་ཅན་འདྲེར་སྐྱེས་པ་ལ་སོགས་པ༔ ཏིང་ངེ་འཛིན་བྱིང་རྨུགས་སུ་གཏོང་བར་བྱེད་པ༔ གསང་བའི་དཀྱིལ་འཁོར་བཤིག་པར་བྱེད་པ༔ མར་མེའི་མདངས་འཕྲོག་པར་བྱེད་པ༔ ལྷ་ཆའི་སྐད་ཉམས་པར་བྱེད་པ༔ སྒྲུབ་པའི་དྲོད་དང་དངོས་
གྲུབ་འཕྲོག་པར་བྱེད་པ༔ ལྷ་མིན་ལྷ་རུ་བརྫུ་བར་བྱེད་པ༔ མགོ་གཡོག་མགོ་སྐོར་རྒྱུག་ལོག་འཕར་ལྡང་བྱེད་པ༔ ཚེ་བསོད་ནམས་ཁ་རྗེ་དབང་ཐང་ལ་གནོད་ཅིང་འཚེ་བར་བྱེད་པའི་འབྱུང་པོ་དམ་སྲི་སྒབ་འདྲེ་ཐམས་ཅད་ད་ལྟ་ཉིད་དུ་གཟུགས་ལིང་ག་འདི་ལ་ཁུག་ཅིག༔ བཛྲ་ཨངྐུ་ཤ་ཛཿ བཛྲ་པཱ་ཤ་ཧཱུྃ༔ བཛྲ་སྤོ་ཊ་བཾ༔ བཛྲ་གྷནྡྷེ་ཧོ༔ ཞེས་ལན་གསུམ་མམ་དྲག་ཏུ་བཀུག་ཅིང་དབྱེར་མེད་དུ་ཐིམ་པར་བསམ་ལ་རྫ་དྲག་ཏུ་བརྡུང་༔ དམ་སྲི་འདུལ་བའི་ཕོ་ཉ་བསྐུལ་ཏེ༔ སྒྲུབ་ཆེན་ཕོ་ཉ་སྒོས་བསྐུལ་བྱ་གསུངས་པའི་དོན༔ འདི་པདྨ་གསུང་གི་དཀྱིལ་འཁོར་རྐྱང་པ་ཡིན་པས་བཀའ་བརྒྱད་ཀྱི་ཕོ་ཉ་ཐམས་ཅད་བསྐུལ་ན་འབྲེལ་མི་ཆགས་པསཿ འདིར་པདྨ་གསུང་གི་ཕོ་ཉ་བསྐུལ་ཏེ༔ ཧཱུྃ༔ སྐུ་ལས་སྤྲུལ་པའི་ཁམས་བརྒྱ་མོ༔ དུང་གི་དྲེད་མོང་མགོ་གསུམ་མ༔ གསུང་ལས་སྤྲུལ་པའི་ཁམས་བརྒྱ་མོ༔ ཟངས་ཀྱི་འཕར་བ་མགོ་བརྒྱ་མོ༔ ཐུགས་ལས་སྤྲུལ་པའི་ཁམས་བརྒྱ་མོ༔ ལྕགས་ཀྱི་སྤང་མོ་མགོ་དགུ་མ༔ ཡོན་ཏན་སྤྲུལ་པའི་ཁམས་བརྒྱ་མོ༔ གཡུ་ཡི་ཁྱི་མོ་མགོ་གསུམ་མ༔ ཕྲིན་ལས་སྤྲུལ་པའི་ཁམས་བརྒྱ་མོ༔ གསེར་གྱི་སེང་གེ་མགོ་བཅུ་མ༔ གཉིས་མེད་སྤྲུལ་པའི་ཁམས་བརྒྱ་མོ༔ དུང་གི་སེང་གེ་མགོ་བཅུ་
མ༔ ཧཱུྃ༔ ཤར་ཕྱོགས་ལོང་བ་རྒྱབ་འབྲེལ་ནི༔ འབྲུག་རྗེ་སྔོན་མོ་ཆིབས་སུ་ཆིབས༔ ན་བཟའ་ལེ་བརྒན་དམར་པོ་གསོལ༔ ཕྱག་ན་ལྕགས་ཀྱུ་དགྲ་སྟ་བསྣམས༔ དབུ་ཡི་རལ་པ་ཚར་རེ་ལ༔ གཟའ་རྒོད་མིག་དམར་ཆར་དུ་འབེབས༔ སྤྲུལ་པ་དམུས་ལོང་བཅོ་ལྔས་བསྐོར༔ ཧཱུྃ༔ ལྷོ་ཕྱོགས་ལོང་བ་རྒྱབ་འབྲེལ་ནི༔ ལྕགས་ཀྱི་སྡིག་པ་ཆིབས་སུ་ཆིབས༔ ན་བཟའ་ཞིང་གི་རས་སྨད་གསོལ༔ ཕྱག་ན་ལྕགས་ཀྱི་ཁྱུང་ཆེན་བསྣམས༔ དབུ་ཡི་རལ་བ་ཚལ་རེ་ལ་ཉི་མ་འབུམ་གྱི་ཆར་དུ་འབེབས༔ སྤྲུལ་པ་དམུས་ལོང་བཅོ་ལྔས་བསྐོརཿ ཧཱུྃ་ནུབ་ཕྱོགས་ལོང་བ་རྒྱབ་འབྲེལ་ནི༔ བ་གླང་དམར་པོ་ཆིབས་སུ་ཆིབས༔ ན་བཟའ་གཡུ་འབྲུག་ལྤགས་པ་གསོལ༔ ཕྱག་ན་སྦྲུལ་གྱི་ཞགས་པ་བསྣམས་དབུ་ཡི་རལ་བ་ཚར་རེ་ལ༔ དུག་དང་མེ་ཡི་ཆར་དུ་འབེབས༔ སྤྲུལ་པ་དམུས་ལོང་བཅོ་ལྔས་བསྐོར༔ ཧཱུྃ༔ བྱང་ཕྱོགས་ལོང་བ་རྒྱབ་འབྲེལ་ནི༔ ཆིབས་སུ་དྲེད་མོང་ཁམ་པ་ཆིབས༔ ན་བཟའ་ཞིང་གི་པགས་པ་གསོལ༔ ཕྱག་ན་ཞིང་གི་དབྱུག་ཏོ་བསྣམས༔ ་དབུ་ཡི་རལ་པ་ཚལ་རེ་ལ༔ གྲི་མཚོན་ནད་ཀྱི་ཆར་པ་འབེབས༔ སྤྲུལ་པ་
དམུས་ལོང་བཅོ་ལྔས་བསྐོར༔ ཧཱུྃ༔ ཤར་ཕྱོགས་ཁྱབ་པར་རྒྱུག་པའི་ཁྱི༔ དུང་གི་ཁྱི་མོ་རལ་པ་ཅན༔ ལྷོ་ཕྱོགས་ཁྱབ་པར་རྒྱུག་པའི་ཁྱི༔ གསེར་གྱི་ཁྱི་མོ་རལ་པ་ཅན༔ ནུབ་ཕྱོགས་ཁྱབ་པར་རྒྱུག་པའི་ཁྱི༔ ཟངས་ཀྱི་ཁྱི་མོ་རལ་པ་ཅན༔ བྱང་ཕྱོགས་ཁྱབ་པར་རྒྱུག་པའི་ཁྱི༔ གཡུ་ཡི་ཁྱི་མོ་རལ་པ་ཅན༔ ཤར་ལྷོ་མཚམས་ནས་རྒྱུག་པའི་ཁྱི༔ བྱི་རུའི་ཁྱི་མོ་རལ་པ་ཅན༔ ལྷོ་ནུབ་མཚམས་ནས་རྒྱུག་པའི་ཁྱི༔ མཆོང་གི་ཁྱི་མོ་རལ་པ་ཅན༔ ནུབ་བྱང་མཚམས་ནས་རྒྱུག་པའི་ཁྱི༔ བསེ་ཡི་ཁྱི་མོ་རལ་པ་ཅན༔ བྱང་ཤར་མཚམས་ནས་རྒྱུག་པའི་ཁྱི༔ ཤེལ་གྱི་ཁྱི་མོ་རལ་པ་ཅན༔ དཔལ་གྱི་ཁྲི་བརྒྱད་ཐུགས་དམ་ཅན༔ ཀུན་ཀྱང་འཇིགས་ཚུལ་རྔམས་པའི་གཟུགས༔ མཆེ་བ་སྤུ་གྲི་གཏམས་པ་འདྲ༔ མིག་ནས་ཉི་ཟླའི་ཟེར་ལྟར་འཚེར༔ དགྲ་བགེགས་བསྒྲལ་བའི་ཕྲིན་ལས་མཛོད༔ ཧཱུྃ༔ ཤར་གྱི་ཕྱོགས་ནས་རྒྱུག་པ་ནི༔ དུང་གི་སྤྱང་མོ་རལ་པ་ཅན༔ ལྷོ་ཡི་ཕྱོགས་ནས་རྒྱུག་པ་ནི༔ གསེར་གྱི་སྤྱང་མོ་རལ་པ་ཅན་ནུབ་ཀྱི་ཕྱོགས་ནས་རྒྱུག་པ་ནི༔ ཟངས་ཀྱི་སྤྱང་མོ་རལ་པ་ཅན༔ བྱང་གི་ཕྱོགས་ནས་རྒྱུག་པ་ནི༔ གཡུ་
ཡི་སྤྱང་མོ་རལ་པ་ཅན༔ ཤར་ལྷོ་མཚམས་ནས་རྒྱུག་པ་ནི༔ མཐིང་གི་སྤྱང་མོ་རལ་པ་ཅནུ༔ ལྷོ་ནུབ་མཚམས་ནས་རྒྱུག་པ་ནི༔ མུ་མེན་སྤྱང་མོ་རལ་པ་ཅན༔ ནུབ་བྱང་མཚམས་ནས་རྒྱུག་པ་ནི༔ མཆོང་གི་སྤྱང་མོ་རལ་པ་ཅན༔ བྱང་ཤར་མཚམས་ནས་རྒྱུག་པ་ནི༔ ར་གན་སྤྱང་མོ་རལ་པ་ཅན༔ སྤྱང་མོ་རོ་ཤལ་ཐུགས་དམ་ཅན༔ ཀུན་ཀྱང་སྤྱན་གྱིས་དུར་ཁྲོད་གཟིགསཿ ལས་སུ་དུར་ཁྲོད་གནས་སུ་རྒྱུག༔ ཁ་ནས་རོ་ཤལ་དུར་ཐག་གཅོད༔ མ་ཐོགས་མྱུར་དུ་ཕྲིན་ལས་མཛོད༔ ཧཱུྃ༔ ཤར་གྱི་ཕྱོགས་ཀྱི་ཕོ་ཉ་ནི༔ དཀར་མོ་ཟླ་འདབ་འཇིགས་པའི་གཟུགས༔ ལྷོ་ཡི་ཕྱོགས་ཀྱི་ཕོ་ཉ་ནི༔ སེར་མོ་ཉི་འདབ་འཇིགས་པའི་གཟུགས༔ ནུབ་ཀྱི་ཕྱོགས་ཀྱི་ཕོ་ཉ་ནི༔ དམར་མོ་བསེ་འདབ་འཇིགས་པའི་གཟུགས༔ བྱང་གི་ཕྱོགས་ཀྱི་ཕོ་ཉ་ནི༔ སྔོན་མོ་ཆུ་འདབ་འཇིགས་པའི་གཟུགས༔ ཀུན་ཀྱང་ལྗགས་ལ་གློག་འགྱུ་མ༔ འཇིག་རྟེན་ཁམས་རྣམས་སྲེག་པར་བྱེད༔ ཞལ་ནས་ཆུ་འབབ་རྦ་རླབས་འཁྲུགས༔ ཤངས་ནས་རླུང་འཐོར་བུ་ཡུག་འཚུབ༔ སྤྱན་ནས་ཁྲོ་ཆུའི་ཐོག་ཀྱང་འབེབས༔ ལྗགས་ལས་སྤྲུལ་པའི་ཕོ་ཉ་འགྱེད༔ མཆེ་བས་ཁམས་
གསུམ་སྒྲོལ་བར་བྱེད༔ ཕོ་ཉ་ཆེན་པོ་ཁྱེད་རྣམས་ཀྱང་༔ མ་ཐོགས་མྱུར་དུ་ཕྲིན་ལས་མཛོད༔ ཧཱུྃ༔ རླུང་འབྲུག་སྐུ་མདོག་མཐིང་ནག་ལ༔ རིན་ཆེན་གཡུ་ཡི་འདབ་གཤོག་ཅན༔ མེ་འབྲུག་སྐུ་མདོག་དམར་པོ་ལ༔ འབར་བ་མེ་ཡི་འདབ་གཤོག་ཅན༔ ཆུ་འབྲུག་སྐུ་མདོག་སྔོ་ནག་ལཿ གདུག་པ་སྦྲུལ་གྱི་འདབ་གཤོག་ཅན༔ གཅིག་ནི་སྣ་ཚོགས་གཟུགས་ཅན་མ༔ རྡོ་རྗེའི་འདབ་གཤོག་འབར་བས་གཏམས༔ ཀུན་ཀྱང་འབྲུག་སྒྲ་འུ་རུ་རུ༔ ཁ་ནས་གློག་དམར་ཁྱུགས་སེ་ཁྱུག༔ དམ་ཉམས་དགྲ་ལ་རྒོད་པའི་ཚེ༔ རྐད་ཅིག་ཡུད་ཀྱིས་དགྲ་བགེགས་སྒྲོལ༔ པདྨ་གསུང་གི་བཀའ་སྲུང་ཐུགས་དམ་ཅན༔ དམ་རྫས་བདུད་རྩིའི་མཆོད་པ་འདི་བཞེས་ལ༔ ཡིད་ལ་བརྣག་པའི་དགྲ་བགེགས་མྱུར་དུ་སྒྲོལ༔ ཏྲི་པ་ཏྲི་པ་ཧཱུྃ་ཕཊ༔ ཁ་ལ་རོ་ཤ་ཁ་ལ་རོ་ཤ་ཧཱུཾ་ཕཊ༔ ཡཀྵ་ཀུན་བཻ་ཛཧཱུྃ་ཕཊ༔ ཛྭ་ལ་རཾ་ཛྭ་ལ་རཾ་ཧཱུྃ་ཕཊ༔ ས་མ་ཡ་ཡཀྵ་ཧཱུྃ་ཕཊ༔ ཛྭ་ལ་ཨ་མུ་ཀ་ཛྭ་ལ་ཨ་མུ་ཀ་རཾ་ཧཱུྃ་ཕཊ༔ ཅེས་བྱས་ལ་གཏོར་མ་འབུལ། དེ་ནས་ཀུན་ཐུབ་རྒྱལ་མོ་བསྐུལ་ལ་གཏོར་མ་འབུལ་ལོ། །ཨ་རཱ་གས་སོ།། །།
ཤོག་སྟོང་།