ཐུགས་རྗེ་ཆེན་པོ་གསང་བ་འདུས་པའི་བཀའ་སྲུང་གཙོ་མོ་དཔལ་ལྡན་སྔགས་ཀྱི་སྲུང་མའི་གསོལ་མཆོད།
ཐུགས་རྗེ་ཆེན་པོ་གསང་བ་འདུས་པའི་བཀའ་སྲུང་གཙོ་མོ་དཔལ་ལྡན་སྔགས་ཀྱི་སྲུང་མའི་གསོལ་མཆོད་བཞུགས་སོ༔
སྔགས་སྲུང་མོ་རྒྱུད་སྤྱི་གཏོར་སྙིང་གིས་མཚན༔ ན་མོ༔ རིག་འཛིན་བརྒྱུད་པའི་བླ་མ་རྣམས་ཀྱི་བདེན་པ་དང་༔ ཡི་དམ་ཞི་ཁྲོ་རབ་འབྱམས་བཀའ་སྲུང་དམ་ཅན་རྒྱ་མཚོའི་བདེན་པ་དང་༔ བདེན་པ་ཆེན་པོའི་མཐུས་བདག་གིས་ཐུགས་རྗེ་ཆེན་པོ་སྒྲུབ་པ་དང་༔ མྱང་གྲོལ་སྐྱེ་བདུན་ཤའི་སྒྲུབ་པ་བྱེད་པ་ལ་བར་དུ་གཅོད་པའི་དགྲ་བགེགས་ཐམས་ཅད་གཏོར་མ་འདི་ལ་ཁུག་ཅིག༔ བཛྲ་ཨངྐུ་ཤ་ཛཿ ཛཧཱུྃ་བཾ་ཧོ༔ གདོན་བྱེད་གྲ་བགེགས་ཀྱི་བླ་སྲོག་ཤ་ཁྲག་འོད་དུ་ཞུ་བ་ལས་བྱུང་བའི་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་ནམ་མཁའ་དང་མཉམ་པར་གྱུར༔
ཨོཾ་ཨཱཿཧཱུྃ་ཧ་ཧོ་བྷིསྭཱ་ཧཱཿ རང་མདུན་ཁྲག་མཚོ་ཀེང་རུས་རཿ ཉི་ཟླ་པདྨའི་སྟེང་དུ་ཁྲག༔ དེ་ལས་སྔགས་ཀྱི་སྲུང་མ་སྨུག་སྤྱན་གཅིག་མཆེ་གཅིག་ནུ་གཅིག་མ༔ རལ་པ་དམར་སེར་འཁྱིལ་པའི་དཀྱིལ༔ གཡུ་ཡི་རལ་གཅིག་འཁྱིལ་ཞིང་འགྲེང་༔ ཕྱག་གཉིས་ཙིཏྟ་ཞིང་དབྱུག་འཛིན༔ གཅེར་བུ་གཡས་བསྐུམ་གཡོན་བརྐྱང་འགྱིང་༔ འཁོར་ཚོགས་བཅས་པ་སྤྱན་དྲངས་གྱུར༔ བྷོ༔ ནམ་མཁའི་དབྱིངས་ཀྱི་དཀྱིལ་འཁོར་ནསཿ ཀུན་ཏུ་བཟང་མོའི་སྤྲུལ་པ་སྟེ༔ སྒེག་མོ་རལ་གཅིག་མཐུ་མོ་ཆེ༔ ཁྲོས་པའི་རྒྱལ་མོ་གཤེགས་སུ་གསོལ༔ ཡུམ་
མཆོག་ཨེ་ཀ་ཙ་ཏི་མ༔ ཡེ་ཤེས་མ་མོ་ལྔ་དང་བཅས༔ དཔོན་གཡོག་འཁོར་བཅས་གཤེགས་སུ་གསོལ༔ དུར་ཁྲོད་རོལ་པའི་དཀྱིལ་འཁོར་འདིར༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཨོཾ་རུ་ལུ་ཨེ་ཀ་ཙ་ཏི་སྙིང་ཁ་རགློ་རུ་ལུ་རུ་ལུ་ཧཱུྃ་བྷོཧཱུྃ་ཛཿ ཛཿ ཛཿཧཱུྃ་བཾ་ཧོ༔ ཏིཥྛ་ལྷན༔ ཨ་ཏི་པཱུ་ཧོ༔ བྷོ༔ དཔལ་ལྡན་སྔགས་ཀྱི་སྲུང་མ་ལ༔ མཐུན་པའི་རྫས་ཀྱིས་བསྐང་བ་ནི༔ ཤ་ཁྲག་དམར་གྱི་གཏོར་མ་དང་༔ བདུད་རྩི་སྨན་གྱི་མཆོད་པ་དང་༔ རཀྟ་དམར་གྱི་ཨརྒྱུ་དང་༔ ཞུན་ཆེན་མར་མེ་གསུར་དུད་དང་༔ ཞལ་ཟས་ཚོགས་ཀྱི་མཆོད་པ་ཡིས༔ སྨུག་ནག་འཁོར་བཅས་ཐུགས་དམ་བསྐང་༔ དཔལ་ལྡན་ཨེ་ཀ་ཙ་ཏི་མ༔ མ་དང་སྲིང་མོའི་ཚོགས་བཅས་ལ༔ མེ་ཏོག་བདུག་སྤོས་མར་མེ་དྲི༔ ཞལ་ཟས་སིལ་སྙན་རོལ་མོ་དང་༔ དངོས་འབྱོར་ཡིད་སྤྲུལ་མཆོད་པའི་ཚོགས༔ ཐུགས་དམ་གཉེན་པོ་བསྐང་ཕྱིར་འབུལ༔ སྔགས་སྲུང་འཁོར་བཅས་མཉེས་གྱུར་ཅིག༔ ཨོ་ཨེ་ཀ་ཙ་ཏི་བྷོ་ཛཿ ས་པཱ་རི་ཝཱ་ར་ཨི་དཾ་བ་ལི་ཏ་ཁ་ཁ་ཁཱ་ཧི་ཁཱ་ཧི༔ སརྦ་པཉྩ་ཨ་མྲྀ་ཏ་ཁཱ་ཧི༔ མ་ཧཱ་རཀྟ་ཁཱ་ཧི༔ ཨརྒྷཾ༴ ཧཱུྃ༔
དཔལ་ལྡན་གཙོ་མོ་ཨེ་ཀ་ཙ་ཏི་མ༔ བསྐལ་པ་ཞིང་གི་རྡུལ་རྙེད་འཁོར་དང་བཅསཿ རུ་ལུའི་སྒྲ་སྐད་ནམ་མཁའི་འབྲུག་ལྟར་སྒྲོགས༔ ཡེ་ཤེས་ལས་ཀྱི་གཙོ་མོ་ཁྱོད་ལ་བསྟོད༔ སྨུག་ནག་ཁྲོས་མ་ཞལ་གཅིག་ཕྱག་གཉིས་མ༔ རལ་པ་གཅིག་འཕྱང་མིག་གཅིག་སྟོང་ཁམས་གཟིགསཿ ཚེམས་གཅིག་ནུ་གཅིག་ཞིང་དབྱུག་སྙིང་ཞགས་འཛིན༔ བསྟན་པ་སྲུང་མཛད་ཁྱོད་ལ་ཕྱག་འཚལ་བསྟོད༔ ནམ་མཁའི་དབྱིངས་ནས་སྲིད་པའི་རྒྱལ་མོ་ནི༔ ནག་མོ་ཁྲག་རལ་དུར་ཁྲོད་ཆས་ཀྱིས་བརྒྱནེ༔ དབུ་གསུམ་སྤྱན་དགུ་སྲིད་གསུམ་བྱ་ར་མཛད༔ ཞལ་གདངས་མཆེ་གཙིག་ཁམས་གསུམ་སྐྱེ་འཆི་གཅོད༔ ཞབས་གཉིས་བརྐྱང་བསྐུམ་ཁྲག་མཚོའི་དཀྱིལ་ནས་བཞེངས༔ གཡས་ཀྱི་ཕྱག་དྲུག་མཆོག་ཆེན་ཕུར་པ་དྲུག༔ གཡོན་དྲུག་སེང་ལྡེང་ཕུར་པ་དྲུག་འདྲིལ་བ༔ དགྲ་བགེགས་དབང་པོ་ཡན་ལག་འཇོམས་པར་བྱེད༔ ཀུན་ཏུ་བཟང་མོའི་སྤྲུལ་པ་ཁྱོད་ལ་བསྟོད་སྨུག་ནག་སྐུ་ནི་ནམ་མཁའི་ཁམས་དང་མཉམ༔ ཁྲོ་གཉེར་ཞལ་ལ་སྤྱན་གཅིག་མཆེ་གཅིག་གཙིགས༔ ཐོར་ཚུགས་རལ་པའི་ཟར་བུ་གཡོན་དུ་འཁྱིལ༔ ཕྱག་གཉིས་ཁཊ་ཐོད་པ་
ཁྲག་བཀང་བསྣམས༔ སྐུ་སྤྲུལ་རལ་གཅིག་མ་ལ་ཕྱག་འཚལ་བསྟོད༔ གཡུ་ཡི་རལ་གཅིག་གཤོག་གཅིག་རྐང་གཅིག་མ༔ ཕྱག་གཉིས་ཙིཏྟ་དང་ནི་ནད་རྐྱལ་བསྣམས༔ ཞབས་ནི་རྒྱ་མཚོ་ཆེན་པོའི་དབའི་ལ་བཞེངས༔ སྐུ་ལ་ན་བཟའ་སྨུག་ནག་འབར་བ་གསོལ༔ བདུད་ཀྱི་ཡུམ་ལ་གཤིན་རྗེའི་ལྕམ་མོ་སྟེ༔ གསུང་སྤྲུལ་ནག་མོ་རག་གདོང་མ་ལ་བསྟོད༔ མིག་མེད་དགྲ་བོའི་མིག་ནི་ལོང་བར་བྱེད༔ རྣ་མེད་དགྲ་བོའི་རྣ་བ་འོན་པར་བྱེད༔ སྣ་མེད་དགྲ་བོའི་སྣ་ནི་འཚུབ་པར་བྱེད༔ ཁ་མེད་དགྲ་བོའི་ཁ་ནི་ལྐུགས་པར་བྱེད༔ སོ་མེད་དགྲ་བོ་ཐམས་ཅད་ཇུར་མིད་བྱེད༔ ལྕེ་མེད་དགྲ་བོའི་ལྕེ་ནི་དིག་པར་བྱེད༔ ལག་མེད་དགྲ་བོའི་ཡན་ལག་ཞ་བར་བྱེད༔ རྐང་མེད་དགྲ་བོའི་རྐང་པ་ཟློག་ཏུ་བཅུག༔ སྙིང་མེད་དགྲ་བོའི་ཙིཏྟ་རོལ་པར་བྱེད༔ ཐུགས་སྤྲུལ་ནག་མོ་མགྱོགས་བྱེད་མ་ལ་བསྟོད༔ ཐུགས་ཀྱི་དགྱེས་སྡེ་བློན་མོ་བཞི་ལ་སོགས་སྲིད་པའི་མ་མོ་བདུན་འབུམ་བཅས་ལ་བསྟོད༔ སྔགས་སྲུང་འཁོར་བཅས་གཏོར་མ་འདི་བཞེས་ལ༔ སྔོན་ཚེ་རྟ་མགྲིན་པད་འབྱུང་བཀའ་བསྒོས་བཞིན༔ ཐུགས་རྗེ་ཆེན་པོའི་མྱང་གྲོལ་རྫ་ས་སྒྲུབ་ལ༔ བར་དུ་གཅོད་པའི་དགྲ་
བགེགས་རྡུལ་དུ་རློགས༔ བདག་ཅག་ཡོན་མཆོད་བསྲུང་བྱ་ཐམས་ཅད་ལ༔ རིམས་ནད་དུས་མིན་འཆི་སོགས་བར་ཆད་སོལ༔ ཐུགས་ཆེན་བསྟན་པ་ཕྱོགས་བཅུར་རྒྱས་པ་དང་༔ འགྲོ་ཀུན་བྱང་ཆུབ་ཐོབ་པའི་ཕྲིན་ལས་འདི༔ མ་གཡེལ་འགྲུབ་པར་མཛོད་ཅིག་ཐུགས་དམ་ཅན༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ གསོལ་ཁ་ནི༔ བྷོ༔ ཀུན་ཏུ་བཟང་མོའི་སྤྲུལ་པ་སྔགས་སྲུང་མ༔ ཁྲོས་པའི་རྒྱལ་མོ་སྨུག་ནག་དབྱིངས་ཕྱུག་མ༔ ཁྱོད་ཀྱིས་ཐུགས་རྗེ་ཆེན་པོའི་དབང་བསྐུར་ཞིང་༔ ལུང་བསྟན་བྱིན་གྱིས་བརླབས་པ་ལ་བརྟེན་ནས༔ མི་ཏྲ་ཛོ་ཀིས་མཆོག་གི་དངོས་གྲུབ་ཐོབ༔ དེ་ཕྱིར་ཐུགས་རྗེ་ཆེན་མོའི་རིག་འཛིན་མ༔ ཡེ་ཤེས་མཁའ་འགྲོ་ཨེ་ཀ་ཙ་ཏི་ལ༔ གསོལ་ལོ་མཆོད་དོ་ཐུགས་དམ་བསྐང་གྱུར་ཅིག༔ སྔོན་ཚེ་སློབ་དཔོན་པདྨ་འབྱུང་གནས་ཀྱིས༔ གསང་བ་འདུས་པའི་རྒྱུད་དང་སྐྱེ་བདུན་རྫ་སཿ ཁྱོད་ལ་གཉེར་དུ་གཏད་ནས་སྲུང་མར་བསྐོས༔ གཏེར་སྟོན་ཆེན་པོ་རཏྣ་གླིང་པ་ལ༔ ཁྱོད་ཀྱིས་ཡང་ཡང་ཞལ་བསྟན་ལུང་བསྟན་ནས༔ སྐྱེ་བདུན་བསྒྲུབ་པའི་འགྲོ་དོན་ཐོག་མར་དརཿ མེ་ཏོག་ཆར་གྱིས་འགྲོ་བའི་ཐེ་
ཚོམ་བཅད༔ དེ་ཕྱིར་མྱང་གྲོལ་བསྒྲུབས་པའི་བཀའ་སྲུང་སྟེ༔ ལས་ཀྱི་མཁའ་འགྲོ་སྔགས་ཀྱི་སྲུང་མ་ལ༔ གསོལ་ལོ་མཆོད་དོ་ཐུགས་དམ་བསྐང་གྱུར་ཅིག༔ ཁྱོད་ནི་ཕ་མ་མེད་པའི་སྔོན་ནས་བྱུང་༔ སངས་རྒྱས་རྣམས་ལས་ཤིན་ཏུ་སྔ་བ་སྟེ༔ མགོན་པོ་ལྕམ་དྲལ་དྲེགས་བྱེད་ཀུན་གྱི་མ༔ ཡེ་ཤེས་ལས་དང་འཇིག་རྟེན་མ་མོའི་ཚོགས༔ ཁྱོད་ཉིད་མཆོད་ཅིང་མངོན་པར་ཕྱག་བྱས་ཤིང་༔ ནག་པོ་ཆེན་པོ་ལ་སོགས་འཇིག་རྟེན་གྱི༔ དྲེགས་བྱེད་ཀུན་གྱིས་མཆོད་ཅིང་མངོན་པར་བསྟོད༔ དེ་བས་སྲིད་པའི་རྒྱལ་མོ་ཞེས་སུ་གྲགས༔ སྲིད་པའི་མ་མོ་ཨེ་ཀ་ཙཱ་ཏི་མ༔ གསོལ་ལོ་མཆོད་དོ་ཐུགས་དམ་བསྐང་གྱུར་ཅིག༔ ནམ་མཁའི་ཀློང་ནས་བར་སྣང་མཁའ་ལ་རྒྱུ༔ ས་གཞིའི་སྟེང་བཞུགས་ལུང་པར་དྲོད་འབེབས་མ༔ རླུང་འཚུབ་ནང་བཞུགས་རྣལ་འབྱོར་དྲོད་ཚད་ཉུལ༔ རྒྱ་མཚོའི་སྟེང་བཞུགས་ཆུ་བོའི་མདོག་འབྱིན་མ༔ རི་བོའི་རྩེར་བཞུགས་འབྲས་དྲུག་སྨིན་བྱེད་མ༔ དེ་ལྟར་གནས་ལ་ངེས་པ་མ་མཆིས་ཀྱང་༔ གཏན་གྱི་བཞུགས་གནས་དུར་ཁྲོད་སོ་ས་གླིང་༔ དུར་ཁྲོད་མཁའ་འགྲོ་ཨེ་ཀ་ཙཱ་ཏི་ལ༔ གསོལ་ལོ་མཆོད་དོ་ཐུགས་དམ་བསྐང་གྱུར་ཅིག༔ ཕྱི་ལྟར་
སྔགས་སྲུང་ཨེ་ཀ་ཙཱ་ཏི་སྟེ༔ ནང་ལྟར་དཔལ་ལྡན་ལྷ་མོ་རེ་མ་ཏི༔ གསང་ལྟར་ཤན་པ་སྲོག་སྒྲུབ་ནག་མོ་ཞེས༔ ཡང་གསང་བཅོམ་ལྡན་ཀུན་ཏུ་བཟང་མོ་ཉིད༔ འཇིག་རྟེན་འདས་ཀྱང་འཁོར་བའི་ཆ་ལུགས་འཛིན༔ བོད་སྐྱོང་མཁའ་འགྲོ་ལྷན་ཅིག་སྐྱེས་མ་སྟེ༔ ཞི་བའི་ལས་མཛད་དཀར་མོ་འོད་ལྡན་མ༔ དྲག་མོར་བཞེངས་ཚེ་དམག་ཟོར་རྒྱལ་མོར་གྲགས༔ བརྟན་མ་དམག་གི་རྒྱལ་མོ་ཆེན་པོ་སྟེ༔ རལ་གཅིག་རྡོ་རྗེ་གཡུ་ཡི་སྒྲོན་མ་ལ༔ གསོལ་ལོ་མཆོད་དོ་ཐུགས་དམ་བསྐང་གྱུར་ཅིག༔ ཆོས་ཉིད་འགྱུར་མེད་སྐུ་མདོག་མཐིང་ནག་འབར༔ ཁམས་གསུམ་དབང་སྡུད་རལ་པ་གཅིག་ཏུ་འཁྱིལ༔ སྲིད་གསུམ་རྩད་གཅོད་ཕྱག་གཡས་རྩེ་གསུམ་བསྣམསཿ ཚེ་དབང་དངོས་གྲུབ་སྟེར་ཕྱིར་ཐོད་ཁྲག་གཡོན༔ འགྲོ་དྲུག་སྐྱེ་ཤི་གཅོད་ཕྱིར་ཙིཏྟ་གཡས༔ དགྲ་བགེགས་མྱུར་སྒྲོལ་གཡོན་འོག་ལྕགས་སྤྱང་འགྱེད༔ ཐབས་ཤེས་གཉིས་མེད་ཞབས་གཉིས་འདོར་ཐབས་བཞུགསཿ སྟོང་ཁམས་དགྲ་འདུལ་སྤྱང་མོ་དགུ་འབུམ་འཕྲོ༔ དབྱིངས་ཀྱི་ཡུམ་ཆེན་ཨེ་ཀ་ཙཱ་ཏི་ལ༔ གསོལ་ལོ་མཆོད་དོ་ཐུགས་དམ་བསྐང་གྱུར་ཅིག༔ རྡོ་རྗེ་ཕག་མོའི་
སྤྲུལ་པ་ལས་བྱེད་མ༔ ཙཱ་རི་ཏྲ་ཡི་བཀའ་སྲུང་བྱ་ར་མཁནེ༔ དམར་ནག་གཅེར་བུ་ཞལ་དགུ་ཕྱག་བརྒྱད་མ་སྲིད་གསུམ་ཟ་བྱེད་ཤ་ཟ་ཁ་མོ་ཆེ༔ རབ་ཁྲོས་ཁྲག་ཞག་དུར་ཁྲོད་རྒྱན་ཆ་ཅན༔ ལྕགས་སྤྱང་མགོ་དགུ་ཆིབས་ནས་སྟོང་གསུམ་ཉུལ༔ གྲི་གུག་རལ་གྲི་དགྲ་སྟ་ཌ་རུ་གཡས༔ ཐོད་ཁྲག་ཞགས་པ་རྩེ་གསུམ་ལྕགས་ཀྱུ་གཡོན༔ རྟ་ནག་དྲེགས་པ་གསང་བའི་ཡབ་དང་རོལ༔ རལ་གཅིག་གཡུ་ཡི་སྒྲོན་མ་ཞེས་སུ་གྲགས༔ ཤ་ཟ་མཁའ་འགྲོ་ཨེ་ཀ་ཙཱ་ཏི་ལ༔ གསོལ་ལོ་མཆོད་དོ་ཐུགས་དམ་བསྐང་གྱུར་ཅིག༔ འཁོར་ནི་སྲིན་མོ་ནག་མོ་རོ་ཤལ་ཅན༔ མོན་མོ་དུང་གི་རྣ་ཆ་ཅན་མ་དང་༔ ་དཔལ་ལྡན་ལྷ་མོ་ནག་མོ་སྐུ་གཅིག་མ༔ བལ་མོ་ནག་མོ་ཀུན་རྒྱུག་མ་ལ་སོགས༔ དབང་མོ་ཆེ་བཞི་བདུད་གིང་གནོད་སྦྱིན་ཀླུ་སྨན་མོ་བཞིས་ནི་ཕཊ་དང་ཕོ་སྒྲ་སྒྲོགས༔ མ་མོ་འབུམ་ནི་བློ་ཡི་རྒྱང་གླུ་ལེན༔ ཤ་ཟ་ལས་བྱེད་ཕྲ་མེན་བརྒྱད་རྣམས་ནི༔ བྱ་ནག་འབུམ་སྡེར་སྤྲུལ་ནས་སྔོན་ལ་འགྲོ༔ གསོད་བྱེད་ལས་ཀྱི་མ་མོ་སྟོང་སྡེ་ནི༔ ཁྱི་སྤྱང་གཅན་གཟན་འབུམ་སྤྲུལ་རོལ་དུ་འབྲང་༔ དུར་ཁྲོད་འདྲེ་མོ་བུད་མེད་ནག་མོ་འབུམ༔ ཕྱི་ནས་འབྱུང་ཞིང་དམོད་མོ་
གཡང་གཞི་རྡེབ༔ ཕོ་ཉ་ཡང་སྤྲུལ་ལས་མཁན་བཅས་པ་ལ༔ གསོལ་ལོ་མཆོད་དོ་ཐུགས་དམ་བསྐང་གྱུར་ཅིག༔ སྔགས་སྲུང་མཁའ་འགྲོ་ཨེ་ཀ་ཙཱ་ཏི་མ༔ དགྱེས་པའི་ཞལ་བཟང་བདག་ལ་བསྟན་དུ་གསོལ༔ མྱང་གྲོལ་སྒྲུབ་པའི་རྟགས་མཚན་མྱུར་དུ་ཕྱུངསཿ འདོད་པའི་དོན་རྣམས་ཡིད་བཞིན་འགྲུབ་པར་མཛོད༔ དཔལ་དང་མངའ་ཐང་གཟི་མདངས་བསྐྱེད་དུ་གསོལ༔ ཚེ་དང་བསོད་ནམས་འབྱོར་པ་ལོངས་སྤྱོད་སྤེལ༔ འཁོད་དང་བསྟན་པ་སྦྱིན་བདག་སྲུང་སྐྱོབ་མཛོད༔ ཆག་ཆེན་ཉམ་ང་སྒྲུབ་པའི་བར་ཆད་ཟློག༔ སྡང་བའི་དགྲ་སོད་གནོད་པའི་བགེགས་རྣམས་ཐུལ༔ མདུན་གྱི་འཁར་བ་རྒྱབ་ཀྱི་བརྟེན་མ་གྱིས༔ ཉིན་གསུམ་བྱ་ར་མཚན་གསུམ་མེལ་ཚེ་མཛོད༔ ནད་དང་གནོད་པ་འཇིགས་པ་ཀུན་ལས་སྐྱོབས༔ རྐྱེན་ངན་བར་དུ་གཅོད་པ་ཐམས་ཅད་སོལ༔ སྙན་པ་སྒྲུབས་ལ་གྲགས་པ་ཕྱོགས་བཅུར་སྒྲོགས༔ བདག་ཅག་དཔོན་སློབ་ཡོན་མཆོད་འཁོར་བཅས་ལ༔ མི་ལ་ན་ཚ་ཤི་ཆད་མ་བཏང་ཞིག༔ ཕྱུགས་ལ་གོད་ཁ་དགྲ་ཇག་མ་བཏང་ཞིག༔ དཀོར་རྫས་ཀ་ཅ་གཏོར་བརླག་མ་བཏང་ཞིག༔ བསམ་པའི་དོན་ལ་བར་ཆད་མ་
བཏང་ཞིག༔ བཀྲ་ཤིས་བདེ་ལེགས་ཕུན་སུམ་ཚོགས་པ་ཡི་ཕྲིན་ལས་སྡོང་གྲོགས་མ་གཡེལ་དུས་ལ་བབ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ མ་མ་ཏྲག་རཀཱ་ཨེ་ཀ་ཙཱ་ཏི་ཨི་དཾ་བ་ལིཾ་ཏ་པཱ་ཙ་ཧོ་ཁ་ཁ་ཁཱ་ཧི་ཁཱ་ཧི༔ བསྐང་བ་ནི༔ ཧཱུྃ༔ སྔོན་ཚེ་འདས་དུས་བསྐལ་པའི་དང་པོ་ལ༔ ཡམས་ནད་རིམས་ནད་འགོ་བའི་ནད་རྣམས་ནི༔ མ་མོ་མིག་གཅིག་ཁྱོད་ཀྱི་མིག་ནས་བྱུང་༔ དེ་ཕྱིར་ནད་དང་རིམས་ཀྱི་བདག་མོར་གྲགསཿ བསྐལ་པ་རྩོད་ལྡན་ལྔ་བརྒྱའི་ཐ་མ་ལ༔ སྐྱེ་བོ་ཁྲེལ་མེད་བཙུན་པ་སྡོམ་ཁྲིམས་མེད༔ སྔགས་པ་དམ་མེད་ལོག་སྤྱོད་སྣ་ཚོགས་དརཿ དེ་ཚེ་སྲིད་པའི་མ་མོ་ཁྱོད་ཁྲོས་ནས༔ རྒྱ་མཚོའི་ཀློང་ནས་ནམ་མཁའི་དབྱིངས་སུ་བཞེངས༔ བར་སྣང་ཁམས་སུ་དམོད་པའི་ཐལ་མོ་རྡེབ༔ སྐུ་གསུང་ཐུགས་ཡོན་ཕྲིན་ལས་སྤྲུལ་པ་ཡི༔ བུད་མེད་དཀར་སེར་དམར་ལྗང་ནག་མོའི་ཚོགས༔ སྟོང་གསུམ་གང་ཞིང་ཁ་རླངས་ནད་སྤྲིན་འཁྲིགས༔ མི་ནད་ཕྱུགས་ནད་ཡམས་ནད་དུས་འཁྲུགས་སློང་༔ ཁྲོས་ཤིང་འཁྲུགས་པའི་མ་མོ་བསྐང་ཞིང་བཅོསཿ ཚོགས་དང་གཏོར་མ་དམ་རྫས་ཨ་མྲྀ་ཏ༔ རཀྟ་སུ་རཱ་ཞུན་མར་མདངས་དང་
ལྡན༔ བྱ་ནག་ལུག་ནག་རྔ་དུང་རོལ་མོའི་སྒྲ༔ སྔགས་དང་ཕྱག་རྒྱ་ཏིང་འཛིན་ལྟ་དགོངས་ཀྱིས་འཁྲུགས་པའི་མ་མོ་རྣམས་ཀྱི་ཐུགས་དམ་བསྐང་༔ སྔགས་སྲུང་ཨེ་ཀ་ཙཱ་ཏིའི་ཐུགས་དམ་བསྐང་༔ སྲིད་པའི་རྒྱལ་མོ་ཆེན་མོའི་ཐུགས་དམ་བསྐང་༔ ནག་མོ་རག་གདོང་མ་ཡི་ཐུགས་དམ་བསྐང་༔ ནག་མོ་མགྱོགས་བྱེད་མ་ཡི་ཐུགས་དམ་བསྐང་༔ དཔལ་ལྡན་རེ་མ་ཏི་ཡི་ཐུགས་དམ་བསྐང་༔ ཤན་པ་སྲོག་སྒྲུབ་ནག་མོའི་ཐུགས་དམ་བསྐང་༔ སྔགས་སྲུང་ཁྲོས་མ་ནག་མོའི་ཐུགས་དམ་བསྐང་༔ ཡང་གསང་ཀུན་ཏུ་བཟང་མོའི་ཐུགས་དམ་བསྐང་༔ བོད་སྐྱོང་ལྷན་ཅིག་སྐྱེས་མའི་ཐུགས་དམ་བསྐང་༔ ཞི་མཛད་དཀར་མོ་འོད་ལྡན་ཐུགས་དམ་བསྐང་༔ དྲག་མོ་དམག་ཟོར་མ་ཡི་ཐུགས་དམ་བསྐང་༔ བརྟན་མ་དམག་གི་རྒྱལ་མོའི་ཐུགས་དམ་བསྐང་༔ རལ་གཅིག་གཡུ་ཡི་སྒྲོན་མའི་ཐུགས་དམ་བསྐང་༔ དབྱིངས་ཕྱུག་ཨེ་ཀ་ཙཱ་ཏིའི་ཐུགས་དམ་བསྐང་༔ ཌཱ་ཀི་ཟ་བྱེད་གདོང་གི་ཐུགས་དམ་བསྐང་༔ བཀའ་འཁོར་མ་མོ་རྣམས་ཀྱི་ཐུགས་དམ་བསྐང་༔ སྲིན་མོ་རོ་ཤལ་ཅན་གྱི་ཐུགས་དམ་བསྐང་༔ མོན་མོ་དུང་རྣ་ཅན་གྱི་ཐུགས་དམ་བསྐང་༔ ལྷ་
མོ་སྐུ་གཅིག་མ་ཡི་ཐུགས་དམ་བསྐང་༔ བལ་མོ་ཀུན་རྒྱུག་མ་ཡི་ཐུགས་དམ་བསྐང་༔ དབང་མོ་ཆེན་མོ་བཞི་ཡི་ཐུགས་དམ་བསྐང་༔ བདུད་དང་གིང་གི་འཁོར་ཚོགས་ཐུགས་དམ་བསྐང་༔ ཀླུ་དང་གནོད་སྦྱིན་འཁོར་ཚོགས་ཐུགས་དམ་བསྐང་༔ བཀའ་སྡོད་བློན་མོ་བཞི་ཡི་ཐུགས་དམ་བསྐང་༔ སྲིད་པའི་མ་མོ་བདུན་འབུམ་ཐུགས་དམ་བསྐང་༔ ཤ་ཟ་ཕྲ་མེན་བརྒྱད་ཀྱི་ཐུགས་དམ་བསྐང་༔ ལས་ཀྱི་མ་མོ་སྟོང་ཕྲག་ཐུགས་དམ་བསྐང་༔ དུར་ཁྲོད་དམན་མོ་འབུམ་སྡེའི་ཐུགས་དམ་བསྐང་༔ སྲིད་པའི་མ་མོའི་ཐུགས་དམ་བསྐངས་གྱུར་ནས༔ རིམས་ནད་ཡམས་ནད་ཐམས་ཅད་བཟློག་ཏུ་གསོལ༔ ཕྱུགས་ནད་གོད་ཁ་ཐམས་ཅད་བཟློག་ཏུ་གསོལཿ གློ་བུར་ཡེ་འདྲོགས་ཐམས་ཅད་བཟློག་ཏུ་གསོལ༔ རྐྱེན་ངན་བར་ཆད་ཐམས་ཅད་བཟློག་ཏུ་གསོལ༔ འཐབ་རྩོད་འཁྲུག་ལོང་ཐམས་ཅད་བཟློག་ཏུ་གསོལ༔ རྨིས་ལྟས་མཚན་ངན་ཐམས་ཅད་བཟློག་ཏུ་གསོལ༔ མོ་ངན་ལྟས་ངན་ཐམས་ཅད་བཟློག་ཏུ་གསོལ༔ ཀག་དང་སྲི་ལངས་ཐམས་ཅད་བཟློག་ཏུ་གསོལ༔ བྱད་ཀ་དྲོད་གཏོང་རྦད་འདྲེ་བཟློག་ཏུ་གསོལ༔ ཆག་ཆེན་ཉམ་ང་ཐམས་ཅད་བཟློག་ཏུ་གསོལ༔ དུས་
མིན་འཆི་བ་ཐམས་ཅད་བཟློག་ཏུ་གསོལ༔ བསྒྲུབ་པའི་བར་ཆད་ཐམས་ཅད་བཟློག་ཏུ་གསོལཿ སྲིད་པའི་དབང་ཆེན་མ་ཚོགས་མཐུ་མ་ཆུང་༔ གདུག་པའི་སྲོག་གཅོད་མ་མོ་རྩལ་མ་ཞན༔ དགྲ་བགེགས་ཙིཏྟ་ཕྱུང་ལ་ཞལ་དུ་གསོལ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ བདག་ཅག་དཔོན་སློབ་བསྲུང་བྱ་འཁོར་བཅས་ཀྱིསཿ ཐོག་མེད་དུས་ནས་ད་ལྟ་ཡན་ཆད་དུ༔ འགལ་འཁྲུལ་ཉམས་ཆག་སྡིག་ལྟུང་ཅི་བསགས་པ༔ མ་མོ་འཁོར་དང་བཅས་ལ་མཐོལ་ལོ་བཤགས༔ བྱང་ཞིང་དག་ནས་ཉམས་ཆག་སོར་ཆུད་དེ༔ མི་སྒྲིབ་ཚངས་པའི་དངོས་གྲུབ་བསྩལ་དུ་གསོལ༔ ཨོ་ས་མ་ཡ༔ ཨཱས་མ་ཡ༔ ཧཱུྃ་ས་མ་ཡ༔ ཏྲཀ་རཀྵ་ཁ་མུན་ཨེ་ཀ་ཛ་ཊི་སྙིང་ཁ་རག་མོ་བྷོཛཿ ཨོཾ་བཛྲ་སཏ་སོགས། ཡིག་བརྒྱ་ནས་སཏྭ་ཨཱཿ ཞེས་ཐུགས་རྗེ་ཆེན་པོ་གསང་འདུས་ཀྱི་སྒྲུབ་ཆེན་ལ་ཉེ་བར་མཁོ་ཕྱིར་སྔགས་འཆང་ཨ་རཱ་གས་སྦྱར་བ་ལས། ཉེས་པ་གང་མཆིས་བཤགས་ཤིང་དགེ་བས་ཐུགས་རྗེ་ཆེན་པོའི་བསྟན་པ་དར་ཞིང་རྒྱས་པར་གྱུར་ཅིག། སརྦ་མངྒ་ལཾ།། །།
ཤོག་སྟོང་།