ཐུགས་རྗེ་ཆེན་པོ་གསང་བ་འདུས་པའི་བསྟན་སྲུང་སྐྱེས་བུ་ལུང་བཙན་ལྕམ་སྲིང་གི་གཏོར་ཆོག་གསོལ་ཁ་གུད་དུ་བཀོལ་བ།
ཐུགས་རྗེ་ཆེན་པོ་གསང་བ་འདུས་པའི་བསྟན་སྲུང་སྐྱེས་བུ་ལུང་བཙན་ལྕམ་སྲིང་གི་གཏོར་ཆོག་གསོལ་ཁ་གུད་དུ་བཀོལ་བ་བཞུགས་སོ།།
བཤོས་བུ་ཟུར་གསུམ་ཆེ་བ་གཅིག་ལ། གཡས་སུ་འབྲང་རྒྱས༔ གཡོན་དུ་སྨན་ལེབ། མདུན་དུ་མཁར་ཐབས། ཆང་ཕུད་ར་ཁྲག་མེ་ཏོག་སྣ་ཚོགས་བཤམ། ཨོཾ་ཨ་མྲྀ་ཏས་བསང་། སྭ་བྷ་ཝས་སྦྱང་། སྟོང་པའི་ངང་ལས་ཧཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། གཏོར་མ་ཡིད་དང་མཐུན་པའི་ལོངས་སྤྱོད་བསམ་གྱིས་མི་ཁྱབ་པར་གྱུར། ཨ་ཀཱ་རོ་སོགསཾ་ཀྱིས་བྱིན་བརླབ། རང་གི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུས་བཙན་རྒྱལ་སྐྱེས་བུ་ལུང་བཙན་ལྕམ་སྲིང་སྐད་ཅིག་ལ་སྤྱན་དྲངས། ཀྱཻ༔ བཙན་རྒྱལ་ཆེན་པོ་དྲག་རྩལ་ཅན༔ ཁྱོད་ཀྱི་ཕོ་བྲང་མཚན་གསོལ་བ༔ དང་པོ་
གཡས་རུ་བྲག་དམར་ཡིན༔ ཡུལ་གླིང་རེ་ན་ཕོ་བྲང་རེ༔ སྟོད་ཀྱི་བཙན་ཡུལ་ཡ་ཀི་ན༔ ཡ་ཀི་སྒོ་མོ་བྲག་དམར་ན༔ བྲག་དམར་གནམ་དུ་ཟངས་སེ་ཟང་༔ གཡུ་མཚེ་སྨུག་ནག་ཀྱི་ལི་ལི༔ སྨན་མཚོ་འོད་དུ་ལམས་སེ་ལམ༔ དེ་ལ་ན་བུན་ཐུ་ལུ་ལུ༔ སྟེང་ན་བྱ་རྒྱལ་ལིངས་སེ་ལིང་༔ ལོགས་ན་ཤ་རྐྱང་ཁྲལ་མ་ཁྲོལ༔ ཟུར་ན་ཁུ་འཕང་ཤ་ར་ར༔ བཙན་བྱའི་གསུང་སྙན་ལྷངས་སེ་ལྷང་༔ མདུན་གྱི་སྤང་ཐོག་བདེ་མོ་ན༔ མཛེས་པའི་མེ་ཏོག་ཁྲ་ལྟེམ་མེ༔ དེ་འདྲའི་གནས་མཆོག་ཡ་མཚན་ཅན༔ བཙན་རྒྱལ་སྐྱེས་བུ་ལུང་བཙན་ཁྱོད༔ སྙིང་གཏད་
གྲོགས་པོ་བདག་གིས་འབོད༔ ཆུམ་ཆུམ་དེ་ནི་གནས་འདིར་ཆུམ༔ འདུར་འདུར་མདུར་གྱིས་གནས་འདིར་བྱོན༔ འཁོར་བཅས་ཐམས་ཅད་རྟེན་ལ་བྱོན༔ རིན་ཆེན་མཛེས་པའི་བཙན་མཁར་ན༔ འདོད་ཡོན་ལོངས་སྤྱོད་བསམ་མི་ཁྱབ༔ སྐྱེས་བུ་ལུང་བཙན་དེ་ན་བཞུགས༔ དམ་ཚིག་གཅིག་པའི་མནའ་ཐོ་བཅད༔ ཤག་རོག་གྲོགས་ལ་མནའ་མ་ཟ༔ བུ་ཡི་སྤུན་ལ་དུག་མ་བླུད༔ ཕུད་དང་བཤོས་དང་མཆོད་གཏོར་བཞེས༔ ཨོ་བྱི་ཤུ་ཙ་ན་ས་མ་ཡ༔ ཁྲག་ཏ་ཀུ་ཤུ་ར་ཙ་ན༔ ཧཱ་ཧཱ་ན་རུ་ཙ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ཨ་མྲྀ་ཏ་རཀྟ་ཁཱ་ཧི་ཁཱ་ཧི༔ ཀྱེ༔ ཇོ་བོ་བཙན་གྱི་རྒྱལ་པོ་ནི༔ བཙན་རྒོད་སྐྱེས་བུ་ལུང་བཙན་ནི༔ ཞལ་མདོག་དཀར་དམར་མཛེས་པ་ལ༔ གཡུ་ཡི་སྨིན་མ་ཁྱུགས་སེ་ཁྱུག༔ དུང་སོ་དཀར་པོ་མཁྲེགས་པ་ལ༔ འཛུམ་པའི་ཞལ་མདངས་ཡ་ལ་ལ༔ སྐུ་ལ་དར་དམར་མཛེས་པ་གསོལཿ གསེར་སྐྱེད་རིན་ཆེན་སྐེད་ལ་བཅིངསཿ དབུ་ལ་དར་ཐོད་དམར་པོ་བཅིང་༔ ཐང་དཀར་རྒོད་ཕོད་ལྡེམས་སེ་ལྡེམ༔ དར་ཚོན་སྣ་ལྔ་ཕྱ་ར་ར༔ སྟག་དོང་གཡས་ལ་གཟིག་ཤུབས་གཡོན༔ བསེ་ཡི་གྲི་དམར་སྐེད་ལ་བཅུག༔ མདུང་
དར་དམར་པོ་གནམ་དུ་ཕྱར༔ བསེ་ཡི་གཞུ་མདུང་ཕྲག་ལ་བཀལ༔ གཡུ་ཡི་མདའ་བཀྲ་ཕྱག་ན་བཟུང་༔ ཆིབས་སུ་བཙན་རྟ་དམར་པོ་ཆིབས༔ སེང་ལྡེང་སྒ་གཏད་ཝངས་སེ་ཝང་༔ ཕྲ་མེན་ཡོབ་ཆེན་སི་ལི་ལི༔ གསེར་སྲབ་གཡུ་མཐུར་སྤྲིངས་སེ་སྤྲིང་༔ མུ་མན་གོང་སྨད་ཁྱུགས་སེ་ཁྱུག༔ དེ་འདྲའི་བཙན་འཁོར་མང་པོ་ཡང་བཙན་རྟ་རྒྱུག་དང་སྤྲིངས་སེ་སྤྲིང་༔ བཤེར་སྒྲ་སིལ་ཆོམ་དི་རི་རི༔ ཀུ་དང་བསོ་སྒྲ་ལྷངས་སེ་ལྷང་༔ བཙན་རྒྱལ་འཁོར་དང་བཅས་ལ་བསྟོད༔ བརྒྱན་པའི་གཏོར་མ་འདི་བཞེས་ལ༔ སློབ་དཔོན་པདྨའི་བཀའ་བཞིན་དུ༔ ཐུགས་རྗེ་ཆེན་པོའི་བསྟན་པ་སྲུངས༔ བསྒྲུབ་ལ་བར་ཆད་མེད་པ་དང་༔ མཐུན་རྐྱེན་བསམ་པ་འགྲུབ་པར་མཛོད༔ རྣལ་འབྱོར་བདག་ཅག་འཁོར་བཅས་དང་༔ རིགས་དང་བརྒྱུད་པར་བཅས་རྣམས་ལ༔ འཁོར་དང་བདེ་ལེགས་རྒྱས་པ་དང་༔ བཀྲ་ཤིས་ཐམས་ཅད་འབྱུང་བ་དང་༔ མི་ནོར་བཙན་ཕྱུག་འཛོམ་པ་དང་༔ སྙན་གྲགས་ས་སྟེང་ཁྱབ་པ་དང་༔ ཕོ་རྣམས་བཙན་རྒོད་ལྟར་དྲག་ཅིང་༔ མོ་རྣམས་སྨན་ལྟར་འབྱོར་པ་དང་༔ གཞི་བྱེས་ལམ་གསུམ་མགོ་ཐོན་པའི༔
གྲོགས་དང་མངོན་སྐྱབས་ཆེན་པོ་མཛོད༔ རྟག་ཏུ་ལུས་དང་གྲིབ་བཞིན་འགྲོགས༔ ལྷང་ལྷང་སྙིང་གཏམ་རྣ་བར་སྨོས༔ ཙེར་ཙེར་སྤྱི་དང་ལེགས་ཉེས་སྟོན༔ སྣང་སྲིད་ཐམས་ཅད་ས་ལེར་སྟོན༔ བཅོལ་བའི་ཕྲིན་ལས་འགྲུབ་པར་མཛོད༔ ཀྱེ༔ མ་ཀི་སྨན་ལུང་སྨན་ར་ན༔ ཁྲ་ཚང་རིན་ཆེན་འབྲུག་གཤོང་ན༔ རིན་ཆེན་མཛེས་པའི་སྨན་ལུང་ན༔ གཡུ་མཚོ་སྔོན་མོའི་ཕོ་བྲང་ནས༔ ལྕམ་སྲིང་རྡོ་རྗེ་གཡུ་སྒྲོན་མ༔ མིང་པོའི་གྲོགས་དང་རྟེན་ལ་བྱོན༔ ལྷང་ལྷང་ཙེར་ཙེར་འབོད་ཀྱིས་བྱོན༔ མ་ཐོགས་མྱུར་དུ་གནས་འདིར་བྱོན༔ རིན་ཆེན་མཛེས་པའི་ཤེལ་གུར་ན༔ འདོད་ཡོན་ལོངས་སྤྱོད་བསམ་མི་ཁྱབ༔ ལྕམ་གཅིག་ཆེན་མོ་དེ་ན་བཞུགས༔ མཐུན་པའི་མཆོད་གཏོར་འབུལ་གྱིས་བཞེསཿ མ་མ་འུར་འུར་སྨན་སིལ་སིལ༔ རུ་རུ་ཏིང་ལཾ༔ ཏིང་མ་མ་ཛཛཿ ཨི་དཾ་བ་ལི་ཏ་ཁ་ཁ་ཁཱ་ཧི་ཁཱ་ཧི༔ པཉྩ་ཨ་མྲྀ་ཏ་ཁཱ་ཧི༔ པུཥཱ་པཱུ་ཛ་ཧོ༔ ཀྱེ༔ སྲིང་གཅིག་རྡོ་རྗེ་གཡུ་སྒྲོན་མ༔ སྐུ་ལུས་མཛེས་པའི་དྲང་ལྡེམ་མ༔ དར་དཀར་གཡུ་ཡི་ཐིག་ཕྲན་ཅན༔ རིན་ཆེན་རྒྱན་མཛེས་པུ་རུ་རུ༔ དབུ་ལ་གཡུ་ཡི་ཐོད་བཅིངས་ནས༔ རྒོད་ཕོད་དར་སྣ་ཕྱ་ར་
རཿ ཞལ་ནི་སེར་མོ་ཁྲོ་འཛུམ་ལ༔ དུང་སོ་དཀར་པོ་ཁྲིགས་སེ་ཁྲིག༔ གཡུ་ཡི་སྨིན་མ་ཁྱུགས་སེ་ཁྱུག༔ གསེར་གཡུ་རིན་ཆེན་སི་ལི་ལི༔ ཕྱག་ན་དངུལ་དཀར་མེ་ལོང་ཐོགསཿ རྒྱང་གླུ་ལེན་ཅིང་མེ་ཏོག་ཐུ༔ སྨན་ཕྲན་མང་པོའི་འཁོར་གྱིས་བསྐོརཿ མཛེས་པའི་བྲོ་བརྡུང་ཁྲབས་སེ་ཁྲབ༔ སྨན་གྱི་ཤོན་སྐོར་སྒོ་རོ་རོ༔ མཛེས་པའི་གར་སྟབས་ལིངས་སེ་ལིང་༔ སྙན་པའི་ཀླུ་ལེན་ཀྱུ་རུ་རུ༔ གཡུ་སྒྲོན་འཁོར་དང་བཅས་ལ་བསྟོད༔ བརྒྱན་པའི་གཏོར་མ་འདི་བཞེས་ལ༔ སློབ་དཔོན་པདྨའི་བཀའ་བཞིན་དུ༔ བདག་ནི་རྣལ་འབྱོར་དམ་ཚིག་ཅན༔ གསལ་བྱེད་པྲ་ཡི་སྒོ་ཕྱེས་ལ༔ ལོངས་སྤྱོད་འདོད་དགུའི་དངོས་གྲུབ་སྩོལ༔ མོ་བདག་ཆེན་མོས་མོ་སྟོན་ཅིག༔ པྲ་བདག་ཆེན་མོས་པྲ་སྟོན་ཅིག༔ ཐུགས་རྗེ་ཆེན་པོ་བསྒྲུབ་པ་ལ༔ བར་དུ་གཅོད་པ་ཐམས་ཅད་སོལ༔ བཅོལ་བའི་ཕྲིན་ལས་འགྲུབ་པར་མཛོད་རྣལ་འབྱོར་དམ་ཚིག་ཅན་ནམ་སྐྱེས་པ་གཙང་མ་སྐད་བདེ་བས་བསྒྲུབས་ན༔ འཁོར་ལེགས་པ་དང་བཀྲ་ཤིས་པ་ཐམས་ཅད་འབྱུང་༔ ཁྱད་པར་དུ་པྲ་དང་རྣོ་མཐོང་དང་ལྷ་ཁ་འབབ་པ་རྣམས་ཤིན་ཏུ་གསལ་བར་འོང་༔ གྲོགས་དང་མགོན་སྐྱབས་ཆེ༔ མི་ནོར་བཙན་ཞིང་ཕྱུག་པ་འོང་༔ ཕོ་
སྐྱེས་བཙན་རྒོད་ལྟར་དྲག༔ མོ་སྐྱེས་ཐམས་ཅད་སྨན་ལྟར་འཕྱོར༔ སྙན་གྲགས་ལས་ཅི་བྱས་མགོ་ཐོན་པར་འོང་ངོ་༔ ཞེས་གསུངས་སོ༔ གཏེར་གཞུང་རྒྱུད་ཚིག་འཁྲུགས་ཆེ་བར་འདུག་པས༔ ཐུགས་རྗེ་ཆེན་པོ་བསྒྲུབ་དུས་བཀའ་སྲུང་གི་གྲ་རེད་པས་གཏོར་མ་འབུལ་བའི་ཆེད་དུ་ཨ་རཱ་གས་འཁྲུགས་བསྡེབས་བསལ་ཏེ་བྲིས་པ༔ ཉེས་འགལ་མཆིས་ན་ལུང་བཙན་ལྕམ་བྲལ་འདི་ལ་བཤགས་ཤིང་༔ དགེ་བས་ཐུགས་རྗེ་ཆེན་པོ་གསང་འདུས་བསྟན་པ་དར་ཞིང་རྒྱས་པའི་རྒྱུར་གྱུར་ཅིག ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།