ཐུགས་རྗེ་ཆེན་པོ་གསང་བ་འདུས་པའི་བཀའ་སྲུང་གནོད་སྦྱིན་ཨ་པ་རཱ་ཛི་ཏའི་གཏོར་ཆོག་གསོལ་ཁ།
ཐུགས་རྗེ་ཆེན་པོ་གསང་བ་འདུས་པའི་བཀའ་སྲུང་གནོད་སྦྱིན་ཨ་པ་རཱ་ཛི་ཏའི་གཏོར་ཆོག་གསོལ་ཁ་བཞུགས་སོ།།
འདི་གསང་འདུས་པོད་གཞུང་ནས་གསུངས་པའི་ནོར་ལྷ་ཡིན། ཨོཾ་ཨ་མྲྀ་ཏ་སོགས། སྭ་བྷ་ཝས་སྦྱང་། སྟོང་པའི་ངང་ལས་ཧཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། གཏོར་མ་དཀར་གསུམ་མངར་གསུམ་འདོད་པའི་ཡོན་ཏན་ལྔ་དང་ལྡན་པར་གྱུར། ཨོཾ་ཨ་ཀཱ་རོ་སོགས། ཨོཾ་སྭ་བྷ་ཝ་སོགས། རང་གི་མདུན་དུ་མི་དམིགས་པ་ལས། ཨ་པ་རཱ་ཛི་ཏ་ནོར་བདག་ཆེན་པོ་སྐུ་མདོག་དཀར་པོ་ཁྲོ་བོའི་ཆ་བྱད་ཅན་རལ་པ་རྟིང་པར་སླེབས་པ། སྤྱན་མིག་འབུར་ཞིང་འབྲུལ་ལ་ཁད་པ། ཁྲོ་གཉེར་མཆེ་བ་གཙིགས་པ། ཕྱག་གཡས་རིན་པོ་ཆེ་འབར་བ་བསྣམས་པ། གཡོན་
པས་ནེའུ་ལེའི་རྐྱལ་པའི་ཁ་ནས་རིན་པོ་ཆེ་སྣ་ཚོགས་སྐྱུགས་ནས་སྒྲུབ་པ་པོ་ལ་ལོངས་སྤྱོད་དཔག་མེད་སྟེར་བ། དེའི་སྤྱི་བོར་ཨོ་། མགྲིན་པར་ཨཱཿ ཐུགས་ཀར་ཙིཏྟ་ཧཱུྃ། དེ་ལས་འོད་ཟེར་འཕྲོས་པས་བྱང་ཕྱོགས་ལྕང་ལོ་ཅན་ནས་སྤྱན་དྲངས། ཛཧཱུྃ་བཾ་ཧོ༔ ཧཱུྃ། གླིང་བཞིའི་བྱང་ཕྱོགས་གསེར་རི་བདུན་གྱི་རྩེ། །གནོད་གནས་དབང་པོའི་ཕོ་བྲང་ལྕང་ལོ་ཅན། །རིན་ཆེན་སྣ་བདུན་བརྩེགས་པའི་གཞལ་ཡས་ནས། །གཏེར་གྱི་བུམ་པ་དཔག་བསམ་ལྗོན་པའི་ཚལ། །གཏེར་ཆེན་བྱེ་བ་བདུན་སྟོང་བདག་པོ་སྟེ། །རྣམ་ཐོས་བུ་ཡི་བང་མཛོད་གཉེར་ཁ་
བ། །ལག་ན་རྡོ་རྗེའི་བཀའ་སྡོད་མཐུ་བོ་ཆེ། །གནོད་སྦྱིན་དབང་པོ་གཞན་གྱིས་མི་ཐུབ་པ། །ནོར་བདག་ཨ་པར་ཛི་ཏ་གཤེགས་སུ་གསོལ། །རིན་ཆེན་ཁང་བཟང་པད་ཟླའི་གདན་ལ་བཞུགས། །གསང་བའི་བདག་དང་པདྨ་ཐོད་ཕྲེང་གིས། །ཇི་ལྟར་བཀའ་བསྒོས་དམ་ཚིག་དྲན་མཛོད་ལ། །ཐུགས་རྗེ་ཆེན་པོ་བསྒྲུབ་པའི་བར་ཆད་སོལ། །མཐུན་སྐྱེན་འདོད་དགུ་བསྒྲུབ་པའི་གྲོགས་མཛོད་ཅིག །དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །གཙང་མའི་ཨརྒྱུ་མཛེས་སྡུག་པུཊྚེའི་ཚལ། །སྤོས་དཀར་དྷ་པེ་རྩི་མར་ཨཱ་ལོ་ཀེ། །ཙན་དན་གནེ་འབྲས་དཀར་ནེ་ཝི་བྱ། །རྔ་དུང་ཆ་ལང་ཤརྡ་སྣ་ཚོགས་འབུལ། །མཛེས་པའི་རཱུ་པ་སྙན་པའི་ཤརྡ་དང་། །ཞིམ་པའི་གནེ་མངར་བའི་ར་ས་དང་། །འཇམ་པའི་སྤངྒེ་སྣ་ཚོགས་ཁྱོད་ལ་འབུལ། །གསེར་གྱི་ཙཀྲ་བེའི་མ་ཎི་དང་། །ཕུལ་བྱུང་པ་ཏཱི་ཤེས་ལྡན་པུ་རུ་ཁ། །སྟོབས་ལྡན་ཧསྟི་རྫུ་འཕྲུལ་རུ་རང་ག །རྒོལ་འཇོམས་ཁངྒ་རཏྣ་ཁྱོད་ལ་འབུལ། །རྣམ་པར་རྒྱལ་བའི་ཁང་བཟང་མཛེས་བྱེད་རྒྱན། །གསེར་གྱི་ཡུ་བ་རབ་བརྟན་ཚྭ་ཏྲང་། །གཡུ་ཡི་གཤོག་པ་རབ་མཛེས་གསེར་གྱི་ཉ། །སྒྲ་ལྡན་གཡས་སུ་འཁྱིལ་
བའི་ཤཾ་ཁ་ཀ །འདབ་བརྒྱད་ཟེའུ་འབྲུས་མཛེས་པའི་པདྨ་དང་། །གསེར་གྱི་ཀུམྦྷ་དཔག་བསམ་ཁ་རྒྱན་ཅན། །ཐུགས་མཚན་ཝཏྠ་ཤི་མཆོག་རྣམ་པར་སྤྲས། །རྩིབས་སྟོང་ལྡན་པའི་ཙཀྲ་གསེར་ལས་གྲུབ། །དབང་གི་རྒྱལ་པོའི་ཏོག་ཅན་དྷ་ཛ་འབུལ། །ཁ་དོག་དྲི་རོ་ཕུན་སུམ་ཚོགས་པ་ཡི། །དཀར་གསུམ་མངར་གསུམ་འབྲུ་སྣ་ཤིང་ཏོག་འབུལ། །ཇ་ཆང་ཟས་ཕུད་སྣ་ཚོགས་དང་བཅས་པའི། །དམ་རྫས་བདུད་རྩིའི་གཏོར་མ་དགྱེས་པར་བཞེས། །ཨོ་ཧྲིཨ་པ་རཱ་ཛི་ཏ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། །པཉྩ་ཨ་མྲྀ་ཏ་ཁཱ་ཧི། སརྦ་པཱུ་ཛ་ཁཱ་ཧི། ཨརྒྷཾ་སོགས། ཧཱུྃ། འཕགས་མཆོག་ཐུགས་རྗེ་ཆེན་པོའི་སྤྲུལ་པ་སྟེ། །འདོད་རྒྱལ་ཁྲོ་བོ་ཆེན་པོའི་ངོ་བོ་ཉིད། །གནོད་སྦྱིན་སྡེ་དཔོན་ཆེན་པོ་རྫུ་འཕྲུལ་ཅན། །གཞན་གྱིས་མི་ཐུབ་དྲག་ཤུལ་སྟོབས་ཅན་པོ། །ཨ་པར་ཛི་ཏ་ནོར་བདག་ཆེན་པོ་ནི། །སྟོན་ཟླའི་མདོག་ཅན་ཞལ་གཅིག་ཕྱག་གཉིས་པ། །མི་བཟད་ཁྲོ་གཉེར་དཔྲལ་བའི་དབྱིངས་སུ་བསྡུས། །འཇིགས་པའི་སྤྱན་གཉིས་འབུར་ཞིང་འབྲུལ་ལ་ཁད། །ཁྲོ་ཞིང་བཞད་པའི་ཞལ་ནི་མཆེ་བཞི་གཙིགས། །རལ་པ་ཐུར་འཕྱང་
ཟར་བུ་རྟིང་པར་སླེབས། །ལྷབ་ལྷུབ་དར་དང་རིན་ཆེན་རྒྱན་གྱིས་ཀླུབས། །པད་ཟླའི་སྟེང་ན་ཕྱེད་སྐྱིལ་འགྱིང་ཞིང་བརྗིད། །ཕྱག་གཡས་ཡིད་བཞིན་ནོར་བུ་འབར་བ་བསྣམས། །གཡོན་པས་ནེའུ་ལེ་རིན་ཆེན་ཆར་རྒྱུན་འབེབས། །ནོར་ལྷ་ཆེན་པོ་ཁྱོད་ལ་བདག་བསྟོད་དོ། །རེས་འགའ་དམར་གསལ་ལྕགས་ཀྱུ་ནེའུ་ལེ་འཛིན། །རེས་འགའ་མཐིང་མདོག་ལྕགས་ཀྱུ་ཞགས་པ་ཐོགས། །རེས་འགའ་རྔམ་བྱེད་དྲེད་མོང་ཁམ་པ་ཆིབས། །ཞི་ཁྲོ་ཞི་མ་ཁྲོ་སོགས་ཅིར་ཡང་སྟོན། །སྣ་ཚོགས་སྤྲུལ་པའི་བདག་ལ་གུས་པས་བསྟོད། །གནོད་སྦྱིན་ནོར་བདག་གཞན་གྱིས་མི་ཐུབ་པ། །དམ་རྫས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་བདག་ཅག་དཔོན་སློབ་འཁོར་བཅས་ལ། །གཞན་གྱིས་མི་ཐུབ་སྟོབས་ཀྱི་དངོས་གྲུབ་སྩོལ། །གཟུགས་མེད་བགེགས་ལས་རྒྱལ་བའི་ཕྲིན་ལས་མཛོད། །ནད་དང་གདོན་ལས་རྒྱལ་བར་མཛད་དུ་གསོལ། །གཟུགས་ཅན་དགྲ་ལས་རྒྱལ་བའི་ཕྲིན་ལས་མཛོད། །དམག་ཇག་གཡུལ་ལས་རྒྱལ་བར་མཛད་དུ་གསོལ། །རྩོད་པ་ཀུན་ལས་རྒྱལ་བའི་ཕྲིན་ལས་མཛོད། །སྨྲ་མཆུ་ཤག་ལས་རྒྱལ་བར་མཛད་དུ་གསོལ། །
ཚོང་དང་རྒྱན་ལས་རྒྱལ་བའི་ཕྲིན་ལས་མཛོད། །ཕྱོགས་ལས་རྣམ་པར་རྒྱལ་བར་མཛད་དུ་གསོལ། །རྨ་གཡང་ཟས་ཀྱི་དངོས་གྲུབ་བསྩལ་དུ་གསོལ། །བང་མཛོད་འབྲུ་ཡི་དངོས་གྲུབ་བསྩལ་དུ་གསོལ། །རྐང་བཞི་ཕྱུགས་ཀྱི་དངོས་གྲུབ་བསྩལ་དུ་གསོལ། །ལྷབ་ལྷུབ་གོས་ཀྱི་དངོས་གྲུབ་བསྩལ་དུ་གསོལ། །ཇ་དར་ལོངས་སྤྱོད་དངོས་གྲུབ་བསྩལ་དུ་གསོལ། །གསེར་དངུལ་རིན་ཆེན་དངོས་གྲུབ་བསྩལ་དུ་གསོལ། །རྒྱལ་བློན་འབངས་འཁོར་ཡུལ་ཁམས་དབང་སྡུད་ཅིང་། །ཆེ་བཙན་དྲགས་པས་སྲིད་གསུམ་ཟིལ་གནོན་པ། །གཞན་གྱིས་མི་ཐུབ་འགྲན་ཟླ་མེད་པ་ཡི། །ཁྱོད་ཀྱི་དངོས་གྲུབ་མཆོག་དེ་མྱུར་དུ་སྩོལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཆོས་དང་འཇིག་རྟེན་གང་ལ་ཡང་། །བསོད་ནམས་བསག་ཕྱིར་ལོངས་སྤྱོད་དགོས། །དེ་ཕྱིར་ནོར་བདག་སྒྲུབ་པ་བསྟན། །དང་པོ་ཕྱུགས་འཕེལ། དེ་ནས་ཟས་ནོར་ལོངས་སྤྱོད་རྒྱལ་པོ་དང་འདྲ་བར་འོང་བར་ཐེ་ཚོམ་མེད། ཤིན་ཏུ་ཟབ་པའི་ནོར་སྒྲུབ་སྙིང་ལྟ་བུ། ཞེས་གསུང་པའི་གནད་ལ་དང་པོ་རྫས་འབྱོར་ན། ཕྱིས་ལོངས་སྤྱོད་ཆེ་བས། ཁལ་ཕྱེད་ལ་གཏོར་མ་བྱ། བྲེ་གང་ལ་ཆང་ཕུད་བྱ། ཤ་ཁོག་ཕྱེད་ཀྱིས་དམར་གཏོར་རམ་རྒྱན་བྱའོ། །ཨ་རཱ་གས་བྲིས་པ་མངྒ་ལཾ།
ཤོག་སྟོང་།