དགེ་བསྙེན་ནོར་བདག་ཡེ་ཤེས་གྲགས་ཀྱི་གསོལ་ཁ།
ཐུགས་རྗེ་ཆེན་པོ་གསང་བ་འདུས་པ་དང་ཐུགས་སྒྲུབ་གཉིས་ཀའི་ཐུན་མོང་བ་དགེ་བསྙེན་ནོར་བདག་ཡེ་ཤེས་གྲགས་ཀྱི་གསོལ་ཁ་བཀའ་སྲུང་དགེ་བསྙེན་ཡེ་ཤེས་གྲགས་དང་སྐྱེས་བུ་སྲིད་པ་གསལ་བྱེད་གཉིས་གཅིག་ཡིན་ནོ། །ལྷ་འདྲེ་བཀའ་ཐང་ནས་འདིས་ཆོས་པ་ལ་ཕྲག་དོག་བྱེད་ཟེར་བ་འདུག་པས་གཏོར་མཆོད་གལ་ཆེའོ། །ཨོཾ་ཨ་མྲྀ་ཏས་བསང་། སྭ་བྷ་ཝས་སྦྱང་། སྟོང་པའི་ངང་ལས་མདུན་དུ་ཡེ་གེ་ཏིཡོངས་སུ་གྱུར་པ་ལས་ནོར་བདག་ཡེ་ཤེས་གྲགས་ལེགས་པར་རྒྱུན་གྱིས་བརྒྱན་པ། གཡས་པས་རིན་པོ་ཆེ་བསྣམས་པ། གཡོན་པས་ནེའུ་ལེ་རིན་པོ་ཆེས་བཀང་སྟེ་ཁ་ནས་སྐྱུགས་པ། སྐུ་མདོག་དམར་ལ་མཛེས་པ་དེ་ལས་འོད་ཟེར་འཕྲོས་པས་རང་རྒྱུད་པ་སྤྱན་དྲངས་པར་གྱུར། ཧཱུྃ། ནོར་བདག་དགེ་བསྙེན་ཡེ་ཤེས་གྲགས། །རྣལ་འབྱོར་པ་ལ་སྙིང་ཉེ་བ། །ཡིད་མཐུན་གྲོགས་པོ་བདག་གིས་འབོད། །ཁྱོད་ནི་དགེ་བསྙེན་དམ་ཚིག་གཙང་། །དམ་ཚིག་དབང་གིས་མྱུར་དུ་བྱོན། །སྒྲུབ་ཐག་ཉེ་བའི་མྱུར་མགྱོགས་ཅན། །སྐད་ཅིག་ཉིད་དུ་གཤེགས་སུ་གསོལ། །སྐྱེས་བུ་དོན་གསལ་གཤེགས་སུ་གསོལ། །སྒྲ་སྒྲོགས་གསལ་བ་གཤེགས་སུ་གསོལ། །དཀར་པོ་ལྷ་རྒྱལ་གཤེགས་སུ་གསོལ། །ཛྙཱ་ན་ཀཱིརྟི་གཤེགས་སུ་
གསོལ། །ཏྲིའུ་ལོད་དེ་གཤེགས་སུ་གསོལ། །སྲིད་གསུམ་གསལ་བྱེད་གཤེགས་སུ་གསོལ། །མི་འབྲལ་ལུས་དང་གྲིབ་མ་བཞིན། །དགྱེས་ཤིང་བརྟན་པར་བཞུགས་ནས་ཀྱང་། །ཆེ་མཆོག་ཧེ་རུ་ཀ་དཔལ་དང་། །པདྨ་འབྱུང་གནས་བཀའ་བཞིན་དུ། །ཐུགས་རྗེ་ཆེན་པོའི་བསྟན་པ་སྲུངས། །རྣལ་འབྱོར་བདག་གི་བསམ་པ་སྒྲུབས། །ཁྱོད་དང་མཐུན་པའི་དམ་རྫས་ནི། །གཞི་དཀར་ནས་ཀྱི་གཡུ་དྲུང་རིས། །བྱ་རྒོད་མདའ་ལ་དར་དཀར་བརྒྱན། །ཕ་ཝང་ལང་རྡོ་གསེར་ཐིག་ཤེལ། །བྱི་རུ་དུང་འབུ་གཡུ་རྒོད་དང་། །ར་ལུག་སྲིན་བྱའི་ཤ་གསུར་སོགས། །དངོས་འབྱོར་ཡིད་ཀྱིས་སྤྲུལ་ཏེ་འབུལ། །དཀར་གསུམ་མངར་གསུམ་ཟས་ཀྱི་ཕུད། །བདུད་རྩི་ཇ་ཆང་སྐྱེམས་ཕུད་བཅས། །དཀར་གཏོར་རྒྱན་དང་ལྡན་པ་འབུལ། །འབུལ་ལོ་མཉེས་ཤིང་ཚིམས་གྱུར་ཅིག །ཨོཾ་ཨ་ཀཱ་རོ་སོགས། ཏྲིའུ་ཏྲིའུ་བ་ལི་ཏ་ཁཱ་ཧི། ༀ་ཨཱཧཱུྃ། སྐྱེས་བུ་སྲིད་པ་གསལ་བྱེད་ཀྱི་ཞལ་དུ་ཁ་ཁ་ཁཱ་ཧི། ཏྲིའུ་ཏྲིའུ་སརྦ་པཱུ་ཛ་ཁཱ་ཧི། ཨརྒྷཾ་སོགས། ཧྲཱིཿ དགེ་བསྙེན་ནོར་བདག་ཡེ་ཤེས་གྲགས། །གཞོན་ནུ་ཤིན་ཏུ་མཛེས་པའི་གཟུགས། །སྐུ་མདོག་དམར་ལ་འོད་ཟེར་
འབར། །དར་ཟབ་རིན་ཆེན་རྒྱན་གྱིས་སྤྲས། །ཕྱག་གཡས་ཡིད་བཞིན་ནོར་བུ་འཛིན། །གཡོན་པས་གཏེར་གྱི་ནེའུ་ལེ། །རིན་ཆེན་སྣ་ཚོགས་སྐྱུགས་པ་འཛིན། །ཕྱེད་སྐྱིལ་པད་ཟླའི་གདན་ལ་བཞུགས། །ནོར་ལྷ་ཀུན་གྱི་ཕོ་ཉ་བ། །གཏེར་བདག་དགེ་བསྙེན་ཁྱོད་ལ་བསྟོད། །རེས་འགའ་སྐུ་མདོག་སྟོན་ཟླའི་མདོག །དབུ་ལ་དར་ཐོད་གཡུ་ཡིས་བརྒྱན། །སྐུ་ལ་དར་དཀར་ན་བཟའ་ནི། །མེ་ཏོག་རི་མོ་བཀྲ་བ་གསོལ། །ཕྱག་གཡས་སྙན་གྲགས་དུང་དཀར་འབུད། །གཡོན་པས་སྨྲ་མཁས་པི་ཝང་འཛིན། །ཤིན་ཏུ་མཛེས་པ་ཡིད་འོང་བ། །ཆིབས་སུ་ལྷ་གཡག་ཁམ་པ་ཆིབས། །དགེ་བསྙེན་ཆེན་པོ་དམ་ཚིག་གཙང་། །དཀར་པོ་ལྷ་རྒྱལ་ཁྱོད་ལ་བསྟོད། །རེས་འགའ་བྱིས་པ་མཛེས་པ་ནི། །ཡིད་འོང་ལྟ་བས་ཆོག་མི་ཤེས། །མགོ་ལ་གཡུ་ཡི་ཐོད་བཅིངས་ཤིང་། །ན་བཟའ་ཁྲེ་ཚེ་མཛེས་པ་གསོལ། །རྒྱབ་ཏུ་རིན་ཆེན་ཁྲེས་པོ་ཁུར། །ལག་གཉིས་ཐལ་མོ་སྦྱར་ནས་ཀྱང་། །སྒྲུབ་པ་པོ་ཡི་བཀའ་ལ་ཉན། །ཛྙཱ་ན་ཀཱིརྟི་ཁྱོད་ལ་བསྟོད། །གཞན་ཡང་སྲིད་པ་གསལ་བྱེད་སོགས། །རིགས་དང་སྡེ་དང་བཅས་པ་ལ། །
གསོལ་ལོ་མཆོད་དོ་ངོ་སོ་བསྟོད། །ཐུགས་རྗེ་ཆེན་པོའི་བཀའ་སྲུང་ནི། །དགེ་བསྙེན་ནོར་བདག་ཡེ་ཤེས་གྲགས། །བརྒྱན་པའི་གཏོར་མ་འདི་བཞེས་ལ། །ཐུགས་རྗེ་ཆེན་པོ་བསྒྲུབ་པ་ལ། །ཀོ་ལོང་ཕྲག་དོག་མ་བྱེད་པར། །དངོས་གྲུབ་རྒྱ་མཚོ་ལྷུད་ལྟར་སྩོལ། །འཁོར་ལོས་སྒྱུར་བའི་རྒྱལ་པོ་དང་། །ལོངས་སྤྱོད་མངའ་ཐང་མཉམ་པར་མཛོད། །འགྲོ་ཀུན་བྱམས་ཤིང་འདུད་པ་དང་། །འདོད་དགུ་ལོངས་སྤྱོད་དབང་དུ་སྡུས། །ཡིད་བཞིན་དངོས་སུ་ཁོལ་པོ་མཛོད། །ཁྱོད་ནི་སྟོང་གསུམ་ཁ་ལོ་སྒྱུར། །དེ་ཕྱིར་སྣང་སྲིད་དབང་དུ་སྡུས། །ཁྱོད་ནི་སྣང་སྲིད་ས་ལེར་མཁྱེན། །དེ་ཕྱིར་ལེགས་ཉེས་ཅི་འདོད་ཀུན། །ཐམས་ཅད་སྟོན་ཅིང་བཤད་པར་མཛོད། །བཅོལ་བའི་ཕྲིན་ལས་འགྲུབ་པར་མཛོད། །འདི་ནི་བཀྲ་ཤིས། དམ་གཙང་། ཟས་ནོར་འདུ། ཕུག་ཆེ། དོན་གསལ་ལོ། །ཆོས་ལ་དཀར། ལོངས་སྤྱོད་ཆེ། སྤྱོད་པ་འཇམ། སྙིང་ཉེ། ཟས་ནོར་འདུ། མངོན་ཤེས་རྒྱ་ཆེན་པོ་འཆར། བཀྲ་ཤིས་ཕྱི་ཐག་རིང་པའོ། །།འདི་ནི་སྙིང་ཉེ་དམ་གཙང་། འགྲུབ་ཐབ་ཉེ་ཞིང་ཕུག་བཀྲ་ཤིས། གཏོར་མ་ལ་བརྩོན་པར་བྱས་ན་ལོངས་སྤྱོད་རྒྱ་མཚོ་ལྷུད་པ་ལྟ་བུར་འགྱུར་རོ། །དང་པོ་བཀྲེས་པ་ལོངས་སྤྱོད་མེད་པ་གཅིག་གིས་བསྒྲུབས་ཀྱང་། ལོངས་
སྤྱོད་འཁོར་ལོས་སྒྱུར་བའི་རྒྱལ་པོ་དང་མཉམ་པར་འགྱུར་རོ། །ཞེས་གསུངས་སོ། །ཞེས་པ་འདི་ཡང་ཐུགས་རྗེ་ཆེན་པོ་གསང་བ་འདུས་པའི་སྒྲུབ་ཆེན་དུས་བཀའ་སྲུང་རེད་པས་གཏོར་མ་འབུལ་ཕྱིར་ཨ་རཱ་གས་སྦྱར་བ་བཀྲ་ཤིས་དཔལ་དུ་འབར་བས་སེམས་ཅན་བདེ་སྐྱིད་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས། །
ཤོག་སྟོང་།