འབྱུང་པོ་ནོར་བདག་ལ་མཆོད་པ།
བླ་མ་དང་ཡི་དམ་ལ་ཕྱག་འཚལ་ལོ། །འབྱུང་པོ་ནོར་བདག་མཆོད་འདོད་ན། །དཀར་གཏོར་དང་ནི་ཟས་སྣ་བཤམས། །ར་ཚིལ་སྤོས་དཀར་དུད་པས་བདུག །དར་དཀར་གཡབ་ཅིང་འདི་སྐད་དོ། །ཨོཾ་ཨ་ཀཱ་རོ༔ སྐད་ཅིག་གིས་དགེ་བསྙེན་ཡེ་ཤེས་གྲགས་གནས་འདིར་སྤྱན་འདྲེན་ནོ། །ཏྲིའུ་ཤུ་ལ་ས་མ་ཡ་ཛ་ཛཿ ཀྱི། ཏྲི་ལས་བྱུང་བའི་དགེ་བསྙེན་ཡེ་ཤེས་གྲགས་། །གཞོན་མཛེས་སྐུ་མདོག་དམར་ལ་འོད་ཟེར་འབར། །ཕྱག་གཡས་བསམ་འཕེལ་ཡིད་བཞིན་ནོར་བུ་བསྣམས། །གཡོན་པས་ནེའུ་ལེའི་རྐྱལ་པ་ནོར་སྐྱགས་འཛིན། །ཡིད་འོང་བལྟ་བས་མི་ངོམས་མཛེས་པའི་སྐུ། །ལོངས་སྤྱོད་ཅི་འདོད་འབྱུང་བར་མངའ་གསོལ་ལོ། །ཁྱོད་མཐུན་དམ་རྫས་གཞི་མ་དཀར་པོའི་སྟེང་། །འབྲས་དཀར་གཡུང་དྲུང་རིས་བཀོད་བྱ་རྒོད་མདའ། །ཕ་ཝཾ་ལོང་བུ་གསེར་གཡུ་བྱི་རུ་ཤེལ། །དུང་དང་དར་དཀར་སྐུ་རྟེན་བླ་རྡོ་དང་། །ར་ལུག་སྲིན་བྱའི་ཤ་གསུར་སྒོག་གླུམ་དང་། །དཀར་གཏོར་རྒྱན་ལྡན་དཀར་དམར་རྫས་ཀྱི་རིགས། །དགྱེས་རྫ་ས་མཆོད་པའི་རྫ་ས་ཀྱིས་མངའ་གསོལ་ལོ། །སྔོན་ཆེ་ཆེ་མཆོག་ཧེ་རུ་ཀ་དཔལ་དང་། །པད་འབྱུང་སྤྱན་སྔར་ཁས་བླངས་དམ་བཅས་
བཞིན། །སྔགས་འཆང་བདག་ལ་འདོད་དགུ་ཆར་ལྟར་ཕོབ། །ལེགས་ཉེས་གསལ་བ་པྲ་ཡི་མངོན་ཤེས་སྟོན། །ཅི་འདོད་ལོངས་སྤྱོད་རྒྱ་མཚོ་ལྷུད་ལྟར་སྩོལ། །བཅོལ་བའི་ཕྲིན་ལས་མ་ལུས་འགྲུབ་པར་མཛོད། །ཅེས་རྒྱུན་དུ་བརྟེན་ཞིང་གལ་ཆེན་པོ་གཞུང་གི་བརྟེན་ཐབས་སུ་དམིགས་ཏེ། རཱ་ག་ཨ་སྱས་སྦྱར་བའོ།། །། ༈ གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅས་དང་། །འཚོ་བ་སྦྱོར་བའི་ཡོན་བདག་རྣམས། །ཚེ་འདིར་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་༧ ཨ་རཱ་གས་སོ།། །།
པར་བྱང་སྨོན་ཚིག །རྣམ་གྲོལ་ཞི་བའི་རྒྱ་མཚོར་རོ་གཅིག་ཏུ། །།གཞོལ་བའི་མཐའ་ཡས་ཆོས་ཚུལ་དལ་འབབས་ཀླུང་། །ཚིག་གི་ཟེགས་མ་རེས་ཀྱང་དུག་གསུམ་གྱི། །དྲི་མ་ཡོངས་འཁྱུད་ལེགས་བཤད་བདུད་རྩི་འདི། །པར་དུ་བསྐྲུན་པའི་རྣམ་དཀར་ཕུང་པོའི་མཐུས། །ཡང་དག་ཆོས་ཀྱི་སྒོ་མོ་སྟོང་ཕྲག་བརྒྱ། །གདངས་ཏེ་རྒྱུད་ལྔའི་འགྲོ་བ་མ་ལུས་པ། །ངེས་ལེགས་ནོར་བུའི་མཛོད་ལ་དབང་འབྱོར་ཤོག །ཅེས་པ་འདི་ཡང་ནང་བསྟན་གྲུབ་མཐའ་རིས་མེད་ཀྱི་གསུང་རབ་དག་པར་དུ་བསྐྲུན་དང་བསྐྲུན་འགྱུར་གང་ལའང་སྦྱར་ཆོག་པའི་དགེ་བའི་སྨོན་ཚིག་ཏུ། ཤཱཀྱའི་དགེ་སྦྱོང་ཆོས་སྨྲ་བ་ངག་དབང་བློ་བཟང་བསྟན་འཛིན་རྒྱ་མཚོས་སྦྱར་བའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།