ཐུགས་རྗེ་ཆེན་པོ་གསང་བ་འདུས་པ་ལས་དཀོར་སྲུང་དུར་ཁྲོད་ཀྱི་བདག་མོ་ངན་ནེ་མ་ཡི་གསོལ་ཀ
ཐུགས་རྗེ་ཆེན་པོ་གསང་བ་འདུས་པ་ལས། ལྟས་ངན་ངན་ནེ་དམག་རྒྱལ་སྤུན་གསུམ་ཟེར་བའི་བཀའ་སྲུང་ནི་ངས་ནུས་མ་ཡི་སྒྲུབ་ལུགས་གཅིག་རེད་དོ། །ཐུགས་རྗེ་ཆེན་པོ་གསང་བ་འདུས་པ་ལས་དཀོར་སྲུང་དུར་ཁྲོད་ཀྱི་བདག་མོ་ངན་ནེ་མ་ཡི་གསོལ་ཀ་བཞུགས་སོ། །ཐུགས་རྗེ་ཆེན་པོའི་སྒྲུབ་ཆེན་དུས་ཀྱི་བཀའ་སྲུང་གྲ་རེད་པས་གཏོར་མ་བསྔོ་ཕྱིར་སྦྱར་བའོ།།
ཐུགས་རྗེ་ཆེན་པོའི་བཀའ་སྲུང་ངས་ནུས་མ་ཡི་སྒྲུབ་གཏོར་ནི། དཀར་གཏོར་མར་ཐུད་འོ་མས་བྲན་པར་གསུངས། ཨོཾ་བཛྲ་ཨ་མྲྀ་ཏས་བསང་། སྭ་བྷ་ཝས་སྦྱང་། ཧཱུྃ་ལས་རིན་པོ་ཆེའི་སྣོད་དུ་གཏོར་མ་འདོད་པའི་ཡོན་ཏན་སྣ་ཚོགས་ཀྱིས་གང་བར་གྱུར། ཨོཾ་ཨ་ཀཱ་རོས་བྱིན་གྱིས་བརླབས་ནས། མདུན་དུ་ཧཱུཾ་ལས་རིན་ཆེན་གཞལ་ཡས་ཁང་། །པད་ཟླའི་སྟེང་དུ་བྷོ་ཡིག་ཡོངས་གྱུར་ལས། །དུར་ཁྲོད་རྡོ་རྗེ་མཁའ་འགྲོ་ངན་ནེ་མ། །དཀར་མོ་འཛུམ་མདོངས་ནོར་བུ་ནེའུ་ལེ་འཛིན། །གཟིག་ཤམ་དར་དང་རིན་ཆེན་རྒྱན་གྱིས་བཀླུབས། །རྫུ་འཕྲུལ་ཤུགས་ལྡན་བོང་བུ་གྲྭ་དམར་ཆིབས། །འོད་
འཕྲོས་དུར་ཁྲོད་གནས་ནས་སྤྱན་དྲངས་གྱུར། ཡུལ་གྱི་མིང་ནི་རྒྱ་གར་རྡོ་རྗེ་གདན། །དུར་ཁྲོད་མིང་ནི་རབ་འཇིགས་བསིལ་བའི་ཚལ། །བདེན་བྲལ་མུན་པ་ཅན་གྱི་དུར་ཁྲོད་དང་། །གནས་མཆོག་མཁར་ཆུ་ཉེ་བའི་ཚནྡྷོ་ཧ། །དེར་བཞུགས་མ་མོ་དགའ་བྱེད་དབང་ཕྱུག་དང་། །དཀོར་གྱི་སྲུང་མ་ཁྲོ་མོ་དུང་རྣ་ཅན། །དམར་མོ་ཁྲག་མདོག་སྲོག་སྒྲུབ་ངན་ན་མ། །བདག་གིས་གདུང་བས་མ་གཅིག་ཁྱོད་འབོད་ན། །གློག་དམར་བང་དང་བཅས་ཏེ་ད་ཚུར་བྱོན། །མ་གཅིག་ཁྱོད་ལ་འབོད་པ་བརྒྱ་ཡོད་ཀྱང་། །དམ་ཚིག་སྲུང་མཁན་རྣལ་འབྱོར་
ང་ལས་མེད། །དམ་ཚིག་གཉན་ལ་དགོངས་ཏེ་མྱུར་དུ་བྱོན། །སྐྱི་སེར་རླུང་དང་སྐར་མདའ་ཇི་བཞིན་དུ། །སྐད་ཅིག་ཡུད་ཀྱིས་གནས་འདིར་གཤེགས་སུ་གསོལ། །རིན་ཆེན་ཕོ་བྲང་པད་ཟླའི་གདན་ལ་བཞུགས། །སྔོན་ཚེ་སློབ་དཔོན་པདྨ་འབྱུང་གནས་ཀྱིས། །ཐུགས་རྗེ་ཆེན་པོ་གསང་བ་འདུས་པ་ཡི། །བསྟན་པ་སྲུང་བར་སུས་ནུས་བཀའ་སྩལ་ཚེ། །ང་ཡིས་ནུས་ཞེས་ཁྱོད་ཀྱིས་ཁས་བླངས་ཕྱིར། །མཁའ་འགྲོ་ངས་ནུས་མ་ཞེས་མཚན་གསོལ་བའི། །སྔོན་གྱི་དམ་ཚིག་རྗེས་སུ་དྲན་མཛོད་ལ། །ཐུགས་རྗེ་ཆེན་པོ་སྒྲུབ་པའི་བར་ཆད་སོལ། །མཐུན་རྐྱེན་སྒྲུབ་ཅིང་དཀོར་ནོར་བསྲུང་བར་མཛོད། །ཁྱོད་ལ་མཐུན་པའི་མཆོད་པ་འབུལ་བ་ནི། །མེ་ཏོག་སྣ་ཚོགས་སྤོས་དཀར་དུད་པ་དང་། །གསེར་དངུལ་བྱི་རུ་མུ་ཏིག་ཤེལ་གྱི་འོད། །ཇ་ཆང་ཕུད་རྒོད་དཀར་གསུམ་མངར་གསུམ་བཤམས། །རྔ་དུང་ཌཱ་རུ་དྲིལ་བུ་པི་ཝང་སྒྲ། །བདུད་རྩི་ར་ཁྲག་དམར་གཏོར་ར་ཤས་བརྒྱན། །མདའ་མོ་རྒོད་སྒྲོ་དར་སྣ་སྟག་གཟིག་རིས། །དངུལ་དཀར་མེ་ལོང་སྦ་སྨྱུག་གླིང་བུ་སོགས། །དངོས་འབྱོར་ཡིད་སྤྲུལ་དུ་མས་ཐུགས་དམ་བསྐང་། །ཁྱད་པར་དགྲ་ཇག་རྐུན་པོའི་ཤ་ཁྲག་
རུས། །རྣམ་པ་དཀར་གསུམ་བདུད་རྩིར་བྱིན་བརླབས་ནས། །དུར་ཁྲོད་བདག་མོ་ངན་ནེ་མ་ལ་འབུལ། །དམར་མོ་ཁྲག་མདོག་སྔོན་མོ་གཡུ་མདོག་མ། །སེར་མོ་གསེར་མདོག་སྔོན་མོ་ལྕགས་མདོག་མ། །ནག་མོ་སོལ་མདོག་སྔོ་སྐྱེ་ཐལ་མདོག་མ། །དབུ་ལྔ་དྲེད་མགོ་ལ་སོགས་འཁོར་བཅས་ལ། །འབུལ་ལོ་རབ་ཏུ་མཉེས་ཤིང་ཚིམས་གྱུར་ཅིག །ཨོཾ་ར་ལི་པྲ་མ་ཡ་ཛཿ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨ་མྲྀ་ཏ་རཀྟ་སརྦ་པཱུ་ཛ་ཧོ༔ བྷྱོ༔ དུར་ཁྲོད་བདག་མོ་མཁའ་འགྲོ་ངན་ནེ་མ། །སྨན་གྱི་གཙོ་མོ་མཛད་ཚེ་སྨན་བཙུན་གཟུགས། །རབ་མཛེས་དཀར་མོ་བྱི་རུའི་ཐོར་ཚུགས་ཅན། །དར་དཀར་གོ་ཟུ་གསེར་གཡུ་རིན་ཆེན་བརྒྱན། །ལྕགས་ཀྱུ་མདའ་དར་མེ་ལོང་ནེའུ་ལེ་བསྣམས། །སྙན་པའི་གསུང་དབྱངས་སྒྲ་ཡིས་ནམ་མཁའ་གང་། །དྲི་ཞིམ་ངད་འཐུལ་བརྐྱང་བསྐུམ་གར་སྟབས་འཁྱུག །རེས་འགའ་ཁྲོ་མོ་དུང་གི་རྣ་རྒྱན་ཅན། །ཁྲོ་འཛུམ་རིན་ཆེན་ནེའུ་ལེས་དངོས་གྲུབ་སྟེར། །གཟིག་གི་ཤམ་ཐབས་རིན་ཆེན་དར་དཔྱངས་འཕུར། །རེས་འགའ་དམར་མོ་སྲིན་མོ་ཁྲོས་པའི་གཟུགས། །གྲི་གུག་སྤུ་གྲི་ཐན་གྱི་
རྐྱལ་པ་འཛིན། །མི་ཐོད་སྐྱ་བོ་རོ་དང་ཝ་མོ་ཞོན། །རེས་འགའ་ནག་མོ་བདུད་མོ་འཇིགས་པའི་གཟུགས། །ལྕགས་ཀྱུ་སྤུ་གྲི་ཐན་རྐྱལ་ལྕགས་དྲྭ་ཐོགས། །རིལ་པ་ཐོར་ཚུགས་ལྷག་མ་ཐུར་དུ་གྲོལ། །ཡར་མར་མཆེ་བཞི་བྲང་དང་སྨིན་མཚམས་སླེབས། །སྤྱན་གསུམ་ཁྲག་འཛག་ཞལ་གདངས་བདུད་རྩི་འབེབས། །ཕྱག་ཞབས་སེན་མོ་ཟངས་སྤར་ལྕགས་ཀྱུས་འགུགས། །དུར་ཁྲོད་ཆས་བརྒྱན་བོང་བུ་གྲྭ་དམར་ཆིབས། །འདོད་དགུར་སྒྱུར་བའི་ལུས་འཆང་མཁའ་འགྲོ་མ། །རྡོ་རྗེ་ངན་ནེ་མ་ལ་བདག་གིས་བསྟོད། །དམ་རྫས་བརྒྱན་པའི་གཏོར་མ་འདི་བཞེས་ལ། །མཁས་བཙུན་ཡོངས་ཀྱི་དཀོར་བདག་བྱེད་པ་དང་། །ཁྱད་པར་ཐུགས་རྗེ་ཆེན་པོ་གསང་འདུས་ཀྱི། །དཀོར་སྲུང་བྱེད་པར་ཁས་བླངས་དམ་བཅས་ལྟར། །རྣལ་འབྱོར་བདག་གིས་དཀོར་སྲུང་ཁྱེད་ལ་བཅོལ། །གཞི་བྱེས་ལམ་གསུམ་ཀ་ཆ་ཟས་དང་ནོར། །བྱིན་པ་མ་གཏོགས་གཞན་ལ་མ་ཤོར་ཅིག །དགྲ་རྐུན་ཇག་གསུམ་ལག་ཏུ་མ་བཏང་ཞིག །གཞི་བྱེས་ཀུན་དང་གཞན་ལ་གཏམ་པ་སོགས། །ས་ཐག་ཉེ་རིང་མེད་པར་ཐུབ་པར་སྲུངས། །ཉིན་མཚན་ཐང་ལྷོད་མེད་པར་རྒྱུན་དུ་སྲུངས། །
ལྕགས་མཁར་དགུ་རིམ་ནང་དུ་ཚུད་པ་ལྟར། །མ་གཅིག་དཀོར་དད་ཅན་གྱིས་དཀོར་སྲུངས་ཤིག །རྩྭ་འཇག་གཅིག་དང་ཆུ་ཕོར་གང་གི་ཡང་། །རྩད་གཅོད་རྗེས་འབྲང་བྱེད་པའི་མ་མོ་ཁྱོད། །དེང་ནས་བདག་གི་དཀོར་གཉེར་མ་གཡེལ་ཅིག །མ་བྱིན་དགྲ་དང་རྐུན་པོས་ཁྱེར་སོང་ན། །དེ་མ་ཐག་ཏུ་ཆོ་འཕྲུལ་སྣ་ཚོགས་ཐོང་། །རྒྱ་མཚོའི་གཏིང་དུ་ཁྱེར་ཡང་མྱུར་དུ་ལོངས། །རིང་གི་གྲྭ་འཁོར་ནོར་ཕྱུགས་འཕེལ་བ་དང་། །རྟ་ཕྱུགས་སྒྲུབ་འཕེལ་གོད་ཁ་མེད་པར་མཛོད། །རྣལ་འབྱོར་བདག་དང་ཞལ་ད་པ་རྣམས་ཀྱིས། །གཞན་ལ་ཕུལ་དང་བྱིན་དང་ཚོང་པ་ཡི། །ནོར་ལ་སེར་སྣ་མ་བྱེད་བཟོད་པར་གསོལ། །དེ་རྗེས་མ་འབྲང་དེ་ལྷག་རང་ནོར་སྲུངས། །པདྨས་བཀའ་བསྒོས་རང་གི་དམ་བཅའ་རྣམས། །མ་གཡེལ་ཐུགས་རྗེ་ཆེན་པོའི་བསྟན་པ་སྲུངས། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །གཏེར་གཞུང་ལས། སངས་རྒྱས་བསྟན་པའི་དཀོར་སྲུང་མ། ཞེས་པ་དང་༔ དེ་ཕྱིར་མོ་ཉིད་ནོར་ཕྱིར་འབྲང་༔ དཔེར་ན་ཁྱི་བཟང་འབྲང་དང་མཚུངས༔ འདི་ཉིད་ནོར་ལ་ཤིན་ཏུ་ངན༔ དེ་ཕྱིར་ངན་ནེ་མ་ཞེས་བྱ༔ ནོར་སྲང་གཅིག་གི་རྗེས་གཅོད་མ༔ ནས་བྲེ་གང་གི་ཕྱིར་འབྲང་མ༔
དཀོར་བདག་ཆེན་མོ་ཞེས་གསུངས་སོ༔ འདི་ནི་རྒྱ་གཞུང་ལས། མཁས་བཙུན་རྣམས་ཀྱི་དཀོར་རྣམས་སྲུང་བར་ཞལ་གྱིས་བཞེས། ནོར་སྲང་གཅིག་གི་རྗེས་གཅོད་མ། །རྩྭ་འཇག་གཅིག་གི་ཤུལ་སྙོགས་མ། །ཡང་རྒྱ་གཞུང་གཅིག་ལས། ནོར་སྲང་གཅིག་གི་རྗེས་གཅོད་མ། །ཞེས་དང་ཡིག་སྙིང་ལས། ཆོས་སྐྱོང་ཕོ་རྒྱུད་གང་ལས་ཀྱང་། ལྷ་མོ་འདི་ཉིད་ཕྲིན་ལས་མྱུར་མགྱོགས་ཆེ། ཆོས་སྐྱོང་འདི་གཞན་བས་སྙིང་ཉེ་འགྲུབ་པར་སླ། ར་མདའ་མྱུར་བ་མགྱོགས་ལ་རེམས་པ། །དངོས་གྲུབ་ཆེ་ལ་མྱུར་བ། ཡུན་རིང་། རྒྱུ་རྫས་དང་དཀོར་ནོར་སྲུང་བ་ལ། ཉིན་མཚན་མེད་པར་སྲུང་བ། ཐང་ལྷོད་མེད་པར་སྲུང་བ། ཐག་ཉེ་རིང་མེད་པར་སྐྱོབ་པ། མི་རྟ་ནོར་ལུག་བ་ར་ཐམས་ཅད་སྒྲུབ་སྤེལ་བ་ལ་བརྩོན་པ། ལོ་ལེགས་པ། བསམ་པའི་དོན་ཐམས་ཅད་ཅི་བསམ་འགྲུབ་པ། བདག་ཏུ་བཟུང་བ་རྣམས་ནི་ལྕགས་མཁར་དགུ་རིམ་ནང་དུ་ཡོད་པ་དང་འདྲ་བར་གསུངས་སོ། །ཆད་ན་དགོན་སྡེ་ཚེ་ཡང་འགྲོ། སྔགས་པ་མང་ན་ཡང་འགྲོ་སྔགས་པ་ནུས་པ་ཆེ་ན་ཡང་འགྲོ་བར་ཐེ་ཚོམ་མེད། ཆོས་སྐྱོང་གཞན་པས་ཀྱང་སྟོབས་ཤུགས་ཆེ་ལ་མྱུར་མགྱོགས་ཆེ། རྒྱུད་རྒྱལ་དགོངས་པ་འདུས་པ་དང་། ཕྱག་རྡོལ་རྩལ་ཆེན་འདུས་པ་དང་། ཕག་མོའི་རྒྱུད་ལས་ཀྱང་གསུངས་སོ། །ཞེས་འབྱུང་ངོ་། །ཞེས་པ་འདི་ཉིད་ཨ་རཱ་གས་སོ། །མངྒ་ལཾ།། །།