ངན་ནེ་མའི་གཏོར་ཆོག
ངན་ནེ་མའི་གཏོར་ཆོག་བཞུགས་སོ༔ བྷྱོ༔ དུར་ཁྲོད་མཁའ་འགྲོ་ངན་ནེ་མ༔ ཤིན་ཏུ་ཞི་ཞིང་རབ་ཏུ་ཞི༔ སྐུ་མདོག་དཀར་མོ་གཡས་གྲི་གུག༔ གཡོན་པས་ཐོད་པ༔ བདུད་རྩི་འཛིན༔ དབུ་སྐྲ་ཐོར་ཅོག་རིན་ཆེན་བརྒྱན༔ མ་ཡི་ནང་ནས་མ་གཅིག་མ༔ སྲིང་གི་ནང་ནས་སྙིང་ཉེ་མ༔ ཁྱོད་ལ་འབོད་པ་བརྒྱ་ཡོད་ཀྱང་༔ དམ་ཚིག་སྲུང་མི་ང་བས་མེད༔ རླུང་དམར་སྐར་མདའི་བང་དང་བཅས༔ མུན་པ་ཅན་གྱི་དུར་ཁྲོད་དང་༔ ཉེ་བའི་ཚན་དྷོ་ཧ་ནས་བྱོན༔ ཀ་ཆ་དཀོར་ལ་བརྟན་པར་བཞུགས༔ དམ་རྫས་མཆོད་གཏོར་འདི་བཞེས་ལ༔ དཀོར་རྣམས་སྲུང་ཞིང་སྤེལ་བར་མཛོད༔ དཀོར་བདག་ཆེན་མོ་ཞི་བའི་སྐུ༔ སྐུ་མདོག་དཀར་ལ་ནག་མདངས་ཅན༔ དེ་ཡི་གཡས་པས་གྲི་གུག་དང་༔ གཡོན་པས་བྷན་དྷའི་ནང་དུ་ནི༔ ཁྲག་དང་བདུད་རྩི་བསྲེས་པ་འཛིན༔ ཞབས་གཉིས་འདོར་སྟབས་བྱས་ནས་ནི༔ ཐོར་ཅོག་རིན་པོ་ཆེ་ཡིས་བརྒྱན༔ མཆན་གཡོན་མཚོན་གྱི་གྲུ་གུ་བཅུག༔ ཞལ་ནི་ཞི་ལ་སྤྱན་ནི་ཁྲོ༔ བརྒྱན་པའི་གཏོར་མ་འདི་བཞེས་ལ༔ ཀ་ཆ་དཀོར་ནོར་ཐུབ་པར་སྲུངས༔ ཀ་ཆ་མ་བྱིན་ཁྱེར་བའི་ཚེ༔ ལྷ་མོ་ཅུང་ཟད་
ཁྲོས་ནས་ནི༔ ཞལ་གཅིག་ཕྱག་བཞི་རིན་ཆེན་བརྒྱན༔ དང་པོ་གཉིས་ནི་གྲི་གུག་དང་༔ ཐོར་ཅོག་འཛིན་ཏེ་དེ་འོག་གཉིས༔ ལྕགས་དྲྭ་དང་ནི་ནད་རྐྱལ་འཛིན༔ ཞབས་། བགྲད་འོག་ཏུ་མི་རོ་མནན༔ ཞལ་ནི་ཞི་མ་ཁྲོས་པའི་ཞལ༔ སྟོད་གཡོགས་སྔོན་མོ་སྐུ་མདོག་སྔོ༔ བརྒྱན་པའི་གཏོར་མ་འདི་གསོལ་ལ༔ རྒྱ་མཚོའི་སྟེང་དུ་ཁྱེར་ན་ཡང་༔ བརྐུས་པའི་ཀ་ཆ་ཚུར་ལོངས་ཤིག༔ དགྲ་དང་ཇག་པ་བྱུང་ཙ་ན༔ ལྷ་མོ་ཤིན་ཏུ་ཁྲོས་ནས་ནི༔ ཞལ་གཅིག་ཕྱག་ནི་དྲུག་པ་སྟེ༔ དང་པོ་གཉིས་ནི་གྲི་གུག་དང་༔ བྷན་ཀླད་ཁྲག་བཀང་བ་གསོལ༔ དེ་འོག་གཉིས་ཀྱིས་ནད་རྐྱལ་དང་༔ མཚོན་གྱི་གྲུ་གུ་འཛིན་པའོ༔ འོག་མ་གཉིས་ཀྱིས་ལྕགས་དྲྭ་དང་༔ ཁྲམ་ཤིང་འཛིན་ལ་དྲེལ་དམར་ཞུར༔ ལ་ཆིབས་ཁྲག་གི་རལ་པ་གསེགས༔ སེན་མོ་ཐམས་ཅད་ཁྲག་གི་མདོག༔ ཉིན་ལམ་གཅིག་འཆང་གནོད་བྱེད་འགུགས༔ ཞལ་ཁུག་གཉིས་ནས་ཁྲག་རྣམས་འབབ༔ གཡས་ཀྱི་མཆན་ཁུང་གསུམ་པོ་ན༔ མཚོན་གྱི་གྲུ་གུ་ཁྲ་གསུམ་བཅུག༔ མཆན་ཁུང་གཡོན་གྱི་གསུམ་པོ་ན༔ ནད་ཀྱི་རྐྱལ་པ་རེ་རེ་བཅུག༔ སྤྱན་ནི་དམར་པོ་ཁྲག་གི་མདོག༔ ནུ་མའི་
རྩེ་ནས་ཁྲག་རྒོད་འབབ༔ ཞལ་ནི་སྲིན་མོ་ཁྲོས་པའི་གཟུགས༔ སྡང་བའི་དགྲ་བོ་ལས་ངན་གྱི༔ ཤ་ཁྲག་སྲོག་དབུགས་ཁྱོད་ཀྱིས་ཟོ༔ ཆོ་འཕྲུལ་མི་རུང་སྣ་ཚོགས་ཐོངས༔ རྟག་ཏུ་ཕྲིན་ལས་མཛད་པའི་ཚེ༔ དཀར་མོ་ཁྲོ་འཛུམ་གཟིག་ཤམ་ཅན༔ དུང་གི་རྣ་ཆ་རིན་ཆེན་བརྒྱན༔ གཟིག་ཤམ་གསོལ་ཞིང་བོང་དམར་ཆིབས༔ ཕྱག་གཉིས་གྲི་གུག་ཐོད་ཁྲག་འཛིན༔ མཆོད་གཏོར་བདུད་རྩི་འདི་གསོལ་ལ༔ དེང་ནས་བདག་གི་དཀོར་དང་ནོར༔ ལྷ་མོ་ཁྱོད་ཀྱིས་བདག་ཏུ་ཟུང་༔ དགྲ་རྐུན་ལག་ཏུ་མ་ཤོར་ཅིག༔ བདག་དང་ཞལ་ད་པ་རྣམས་ཀྱིས༔ བྱིན་དང་བཙོང་ལ་ཕྲ་མ་དོག༔ དཀོར་ཕྱུགས་རྟ་ནོར་འཕེལ་རྒྱས་ཤིང་༔ བཅོལ་བའི་ཕྲིན་ལས་འགྲུབ་པར་མཛོད༔ ཨོཾ་རཱ་ལི་པྲ་མ་ཡ་ཛཿ ཨི་དམ་བ་ལིང་ཏ་ཁ་ཁ་ཁཱ་ཧི་ཁཱ་ཧི༔ པཉྩ་ཨ་མྲྀ་ཏ་ལ་ཁཱ་ཧི༔ སརྦ་པཱ་ཙ་ཁཱ་ཧི༔ འདི་ཞི་སྒྲུབ་དཀར་གཏོར་འོ་མས་བྲན་ན་ལེགས་སོ། །དཀོར་སྲུང་འདི་ཟབ་ཅིང་རྣོ་བས་མན་ངག་གཞུང་དུ་ཤེས་སོ། །ཞེས་རཱ་གས་སོ། །སརྦ་མངྒ་ལཾ།། །།
ཤོག་སྟོང་།