ཐུགས་རྗེ་ཆེན་པོ་གསང་བ་འདུས་པའི་བཀའ་སྲུང་། །དུར་ཁྲོད་ཀྱི་བདག་མོ་མཁའ་འགྲོ་ངས་ནུས་མ་ཡི་བསྐང་གསོལ།
ཐུགས་རྗེ་ཆེན་པོ་གསང་བ་འདུས་པའི་བཀའ་སྲུང་། །དུར་ཁྲོད་ཀྱི་བདག་མོ་མཁའ་འགྲོ་ངས་ནུས་མ་ཡི་བསྐང་གསོལ་བཞུགས་སོ།།
དུར་ཁྲོད་བདག་མོ་མཁའ་འགྲོ་ངས་ནུས་མ་ཡི་བསྐང་བ་ནི། བསྐང་རྫས་ཅི་འབྱོར་བཤམས་ཤིང་བྲན་ལ། རོལ་མོ་དང་བཅས་དབྱངས་སྙན་པོས། ཨོཾ་ཨཱཧཱུྃ་ཧ་ཧོཧཱུྃསྭཱ་ཧཱ། བཛྲ་སྤ་ར་ཎ་ཁཾ། བྷྱོ༔ བླ་མ་མཆོག་དང་ཡི་དམ་མཁའ་འགྲོའི་ཚོགས། །དཀོན་མཆོག་རིན་ཆེན་གསུམ་གྱི་བདེན་སྟོབས་དང་། །དྲང་སྲོང་རིག་སྔགས་འཆང་བའི་བདེན་ཚིག་གིས། །རབ་འབྱམས་ཞིང་ཀུན་གང་བའི་མཆོད་པའི་སྤྲིན། །རྒྱ་ཆེ་རྒྱུན་མི་འཆད་པ་ནམ་མཁའི་མཛོད། །རྡོ་རྗེ་ངས་ནུས་མ་ཡི་སྤྱན་ལམ་དུ། །།འབྱུང་ཞིང་དམ་ཚིག་ཉམས་ཆག་བསྐང་གྱུར་ཅིག །དངོས་འབྱོར་ཡིད་སྤྲུལ་བློས་བླངས་
ལས་བྱུང་བའི། །ཡན་ལག་བརྒྱད་ལྡན་མཆོད་ཡོན་མཚོ་ལྟར་འཁྱིལ། །རབ་མཛེས་མེ་ཏོག་སྣ་ཚོགས་སྐར་ལྟར་བཀྲམ། །དྲི་ཞིམ་བདུག་སྤོས་ཚོགས་ནི་སྤྲིན་ལྟར་གཏིབས། །སྣང་གསལ་མར་མེའི་འོད་ནི་ཉི་ལྟར་གསལ། །དྲི་ཞིམ་ཆབ་ཀྱི་རྒྱུན་ནི་ཆར་ལྟར་འབེབས། །རོ་བརྒྱའི་ཞལ་ཟས་ཚོགས་ནི་རི་ལྟར་སྤུངས། །རྔ་གླིང་རོལ་མོའི་སྒྲ་དབྱངས་འབྲུག་ལྟར་སྒྲོགས། །ལྷ་རྫས་ཉེར་སྤྱོད་ཕྱི་ཡི་མཆོད་པ་འདིས། །ཞིང་སྐྱོང་དུར་ཁྲོད་བདག་མོའི་ཐུགས་དམ་བསྐང་། །མ་མོ་མཁའ་འགྲོ་འཁོར་བཅས་ཐུགས་དམ་བསྐང་། །དུར་ཁྲོད་བདག་མོའི་ཐུགས་དམ་
བསྐངས་གྱུར་ནས། །རྣལ་འབྱོར་བདག་གི་ཉམས་ཆག་བྱང་གྱུར་ཅིག །ཕྲིན་ལས་རྣམ་བཞི་ལྷུན་གྱིས་འགྲུབ་པར་མཛོད། །དགྲ་བགེགས་བསྒྲལ་བའི་སྙིང་ཁྲག་རྦ་ཀློང་འཁྱིལ། །དབང་པོ་རྣམ་ལྔའི་མེ་ཏོག་རྫ་ལྟར་སྤུངས། །གསུར་ཆེན་དྲི་ཡི་དུད་པ་ཕྱོགས་བཅུར་འཁྲིགས། །ཞུན་ཆེན་རྐང་གི་མར་མེ་སྐར་ལྟར་བཀྲམ། །མཁྲིས་པའི་དྲི་ཆབ་དམར་སེར་རྒྱ་མཚོར་འཁྱིལ། །ཤ་སྣ་སྟོང་གི་ཞལ་ཟས་རི་ལྟར་སྤུངས། །མི་རྐང་གླིང་བུ་ཐོད་རྔ་ཅང་ཏེའུ་འཁྲོལ། །དྲག་པོའི་དགྲ་བགེགས་བསྒྲལ་བའི་ཉེར་སྤྱོད་བདུན།་། ཞིང་སྐྱོང་དུར་ཁྲོད་བདག་མོའི་ཐུགས་དམ་བསྐང་། །མ་མོ་མཁའ་འགྲོ་འཁོར་བཅས་ཐུགས་དམ་བསྐང་། །དུ་ཁྲོད་བདག་མོའི་ཐུགས་དམ་བསྐངས་གྱུར་ནས། །རྣལ་འབྱོར་བདག་གི་ཉམས་ཆག་བྱང་གྱུར་ཅིག །ཕྲིན་ལས་རྣམ་བཞི་ལྷུན་གྱིས་འགྲུབ་པར་མཛོད། །འཇིགས་སུ་རུང་བ་དུར་ཁྲོད་ཆེན་པོའི་ནང་། །རོ་ལངས་ལྕེ་སྤྱང་ཤ་ཟ་འཇིགས་རུང་སྒྲ་། །ཞིང་ཆེན་གཡང་གཞི་བླ་བྲེ་རྒྱལ་མཚན་དང་། །ཐོད་པའི་གཞལ་ཡས་རུས་ཆེན་ཁ་བད་ཅན། །རོ་ཚལ་དུམ་བུ་རུས་པ་གཅལ་དུ་བཀྲམ། །རབ་འཇིགས་དུར་ཁྲོད་ཆེན་
པོའི་མཆོད་རྫས་འདིས། །ཞིང་སྐྱོང་དུར་ཁྲོད་བདག་མོའི་ཐུགས་དེམ་བསྐང་། །མ་མོ་མཁའ་འགྲོ་འཁོར་བཅས་ཐུགས་དམ་བསྐང་། །དུར་ཁྲོད་བདག་མོའི་ཐུགས་དམ་བསྐངས་གྱུར་ནས། །རྣལ་འབྱོར་བདག་གི་ཉམས་ཆག་བྱང་གྱུར་ཅིག །ཕྲིན་ལས་རྣམ་བཞི་ལྷུན་གྱིས་འགྲུབ་པར་མཛོད། །གཞན་ཡང་གླིང་བཞི་རི་རབ་ཉི་ཟླ་བཅས་། །གཞལ་མེད་ཁང་དང་སྐྱེད་ཚལ་རིན་ཆེན་བདུན། །བཀྲ་ཤིས་རྫས་རྟགས་རིན་ཆེན་ཁྲི་བཟང་བརྒྱན། །རིན་ཆེན་ཕྲེང་བ་སྤུ་གྲི་བ་དན་འཕུར། །ལྷ་ཀླུ་མི་ཡི་ལོངས་སྤྱོད་ཅི་མཆིས་པ། །གླང་ཆེན་ལྤགས་པ་མི་ལྤགས་སྟག་གཟིག་ལྤགས། །ཐོད་པ་སྐམ་རློན་རྒྱུ་ཕྲེང་དོ་ཤལ་སོགས། །ཞིང་སྐྱོང་དུར་ཁྲོད་བདག་མོའི་ཐུགས་དམ་བསྐང་། །མ་མོ་མཁའ་འགྲོ་འཁོར་བཅས་ཐུགས་དམ་བསྐང་། །དུར་ཁྲོད་བདག་མོའི་ཐུགས་དམ་བསྐངས་གྱུར་ནས། །རྣལ་འབྱོར་བདག་གི་ཉམས་ཆག་བྱང་གྱུར་ཅིག །ཕྲིན་ལས་རྣམ་བཞི་ལྷུན་གྱིས་འགྲུབ་པར་མཛོད། །རྟ་ནག་རྒྱ་བོང་དྲེད་དང་སྟག་གཟིག་དོམ། །འཕར་སྤྱང་ལུག་ནག་བྱ་རིགས་ཁྱི་ནག་ར། །གླང་ཆེན་འབྲུག་སེང་མ་ཧེ་འདོད་འཇོའི་བ། །ཤ་སྤྱང་
ལ་སོགས་རི་དྭགས་སྣ་ཚོགས་དང་། །ཆུ་སྲིན་ཉ་སྦྲུལ་སྦལ་སོགས་ཆུ་གནས་དང་། །གདུག་པའི་ཤ་ཟན་རྣམས་དང་དཀོར་ནོར་སོགས། །གཟུགས་མཛེས་སྤུ་སྡུག་སྲོག་ཆགས་ཅི་མཆིས་པས། །ཞིང་སྐྱོང་དུར་ཁྲོད་བདག་མོའི་ཐུགས་དམ་བསྐང་། །མ་མོ་མཁའ་འགྲོ་འཁོར་བཅས་ཐུགས་དམ་བསྐང་། །དུར་ཁྲོད་བདག་མོའི་ཐུགས་དམ་བསྐངས་གྱུར་ནས། །རྣལ་འབྱོར་བདག་གི་ཉམས་ཆག་བྱང་གྱུར་ཅིག །ཕྲིན་ལས་རྣམ་བཞི་ལྷུན་གྱིས་འགྲུབ་པར་མཛོད། །སྲ་བརྟན་གོ་ཆ་རྣོ་ངར་མཚོན་ཆའི་ཚོགས། །མདའ་མདུང་རལ་གྲི་ཁཊཾ་གྲི་གུག་ཕུར། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་དང་། །དགྲ་བགེགས་བྲུབ་པའི་ཐུན་ཁུང་ཐུན་རྫས་དང་། །དྲག་པོའི་ཆས་ལྡན་ཞྭ་གོས་དར་ནག་སོགས། །དྲུག་པོའི་དགྲ་བགེགས་བསྒྲལ་བའི་དམ་རྫ་ས་རྣམས། །ཞིང་སྐྱོང་དུར་ཁྲོད་བདག་མོའི་ཐུགས་དམ་བསྐང་། །མ་མོ་མཁའ་འགྲོ་འཁོར་བཅས་ཐུགས་དམ་བསྐང་། །དུར་ཁྲོད་དག་མོའི་ཐུགས་དམ་བསྐངས་གྱུར་ནས། །རྣལ་འབྱོར་བདག་གི་ཉམས་ཆག་བྱང་གྱུར་ཅིག །ཕྲིན་ལས་རྣམ་བཞི་ལྷུན་གྱིས་འགྲུབ་པར་མཛོད། །ནལ་བུའི་རྒྱལ་མཚན་སྦ་
དཀར་གླིང་བུ་དང་། །མདའ་མོ་རྒོད་སྒྲོ་དར་སྣ་སྟག་གཟིག་རས། །སྤོས་དཀར་དུད་པ་དངུལ་དཀར་མེ་ལོང་དང་། །རིན་ཆེན་སྣ་ལྔ་སྲོག་འཁོར་ནལ་བུའི་སྙིང་། །རྟེན་གཏོར་བསྐང་གཏོར་ར་ཤ་ར་ཁྲག་སོགས། །ཁྱེད་དང་མཐུན་པའི་དམ་རྫས་ཅི་མཆིས་པ། །ཞིང་སྐྱོང་དུར་ཁྲོད་བདག་མོའི་ཐུགས་དམ་བསྐང་། །མ་མོ་མཁའ་འགྲོ་འཁོར་བཅས་ཐུགས་དམ་བསྐང་། །དུར་ཁྲོད་བདག་མོའི་ཐུགས་དམ་བསྐངས་གྱུར་ནས། །རྣལ་འབྱོར་བདག་གི་ཉམས་ཆག་བྱང་གྱུར་ཅིག །ཕྲིན་ལས་རྣམ་བཞི་ལྷུན་གྱིས་འགྲུབ་པར་མཛོད། །ཛ་གད་སྨན་ཕུད་དམར་ཆེན་རིཀྟ་དང་། །དམ་རྫས་གཏོར་མ་མྱོས་བྱེད་གསེར་སྐྱེམས་དང་། །ཤ་ལྔ་བདུད་རྩི་རྣམ་ལྔའི་ཟས་སྣའི་ཚོགས། །འབྲུ་སྣ་སྨན་སྣ་དཀར་གསུམ་མངར་གསུམ་དང་། །ཤ་སྣ་ཤིང་སྣ་སྦྱར་བྱུང་སྤོས་ཀྱི་རིགས། །མཆོག་ཆེན་མཆོག་ཕྲན་མཚན་ལྡན་རྐང་གླིང་སྒྲ། །ཡིད་འོང་གཟུགས་མཛེས་ཕྱག་རྒྱ་ལ་སོགས་པ། །དཔའ་བོ་མཁའ་འགྲོ་མཉེས་བྱེད་ཚོགས་འཁོར་བཅས། །ཞིང་སྐྱོང་དུར་ཁྲོད་བདག་མོའི་ཐུགས་དམ་བསྐང་། །མ་མོ་མཁའ་འགྲོ་འཁོར་བཅས་ཐུགས་དམ་བསྐང་། །
དུར་ཁྲོད་བདག་མོའི་ཐུགས་དམ་བསྐངས་གྱུར་ནས། །རྣལ་འབྱོར་བདག་གི་ཉམས་ཆག་བྱང་གྱུར་ཅིག །ཕྲིན་ལས་རྣམ་བཞི་ལྷུན་གྱིས་འགྲུབ་པར་མཛོད། །བྷྱོ༔ གཞན་ཡང་། ཁྱད་པར་མཐུན་རྫས་འབུལ་བ་ནི། །རྒྱ་བོང་གྲྭ་དམར་རླུང་གི་གཤོག་པ་ཅན། །སྣ་ཚོགས་དར་སྟན་ནོར་བུའི་སྒ་སྲབ་སྤྲས། །རིན་ཆེན་དར་རྒྱན་སིལ་སིལ་སྒྲོགས་པ་འདི། །ལྷ་མོ་ཁྱོད་ལ་ཆིབས་པའི་རྟ་རུ་འབུལ། །རྐང་བཞི་རྔོག་ཆགས་འཕེལ་བའི་ཕྲིན་ལས་མཛོད། །སྣ་ཚོགས་དར་གྱི་རྟ་ཟུར་སྤྲས་པ་ཡི། །དར་དཀར་བེར་དང་རིན་ཆེན་རྒྱན་ཆའི་རིགས། །སྟག་གཟིག་མི་ལྤགས་གོས་ཟུང་སྣ་ཚོགས་རྣམས། །ལྷ་མོ་ཁྱོད་ལ་སྐུ་ཡི་རྒྱན་དུ་འབུལ། །བདག་སོགས་ཁམས་གསུམ་ཟིལ་གནོན་དངོས་གྲུབ་སྩོལ། །མདའ་དར་མེ་ལོང་ལྕགས་ཀྱུ་ནེའུ་ལེ་སོགས། །ཕྱག་མཚན་ཞི་བའི་མཐུན་རྫས་ཕྱག་ཏུ་འབུལ། །སྣང་སྲིད་གསལ་བའི་འཕྲུལ་གྱི་མངོན་ཤེས་དང་། །མི་ཟད་འདོད་དགུ་ཆར་པའི་རྒྱུན་ལྟར་ཕོབ་། །གྲི་ཐོད་ཙིཏྟ་ཐན་རྒྱལ་མཚོན་གྲུག་སོགས། །དྲག་པོ་དགྲ་བགེགས་བསྒྲལ་བའི་མཚོན་ཆ་དང་། །ཝ་མོ་དྲེད་དང་རོ་ལངས་ལ་སོགས་པ། །ཕྲིན་ལས་མྱུར་དུ་འགྲུབ་
པའི་དམ་རྫས་འབུལ། །སྡང་བའི་དགྲ་དང་གནོད་པའི་བགེགས་ལ་སོགས། །ཚར་གཅོད་དྲག་པོའི་ཕྲིན་ལས་མཛད་དུ་གསོལ། །བྷྱོ༔ མ་ཡི་ནང་ནས་མ་གཅིག་མ། །སྲིང་གི་ནང་ནས་སྙིང་ཉེ་མ། །ཁྱོད་ནི་སྲུང་མ་དམ་ཚིག་ཅན། །བདག་ནི་རྣལ་འབྱོར་གདུང་སེམས་ཅན། །དམ་ཚིག་གཅིག་པའི་ལྷ་མི་གཉིས། །ཡུན་དུ་འགྲོགས་ན་གནས་མི་འཆུགས། །བསྐལ་པར་ཞིག་ཀྱང་མི་འབྲལ་ལོ། །རྟག་ཏུ་མགོན་ཞིང་གྲོགས་མཛོད་ཅིག །ལྷ་མོ་ཁྱོད་ནི་མ་ལྟར་བསྟེན། །བྱམས་པའི་ཐུགས་ཀྱིས་བརྩེ་བས་སྐྱོང་། །ལྷ་མོ་ཁྱོད་ནི་སྲིང་ལྟར་བསྟེན། །བརྩེ་གདུང་མ་ཆུང་སྡོང་གྲོགས་མཛོད། །ཁྱོད་ནི་ཆུང་མ་ལྟར་བསྟེན་ན། །རྗེས་ཆགས་ཚུལ་གྱིས་ཕྲིན་ལས་སྒྲུབས། །ཁྱོད་ནི་མཛའ་མོ་ལྟར་དུ་བསྟེན། །འགྲོགས་པའི་ཚེ་ནི་གཞུང་མ་ངན། །ཁྱོད་ནི་བྲན་མོ་ལྟར་བསྟེན་ན། །མངག་པའི་ཚེ་ན་བང་མ་བུལ། །ཆད་པའི་གཞུང་འདི་བདག་གིས་བསྲང་། །ཉམས་པ་མཆིས་ན་བསྐང་དུ་གསོལ། །ཉེས་པ་མཆིས་ན་ཁྱོད་ལ་བཤགས། །ཕྱིན་ཆད་ཉེས་པ་མི་བགྱིད་འཚལ། །མ་གཅིག་དུར་ཁྲོད་བདག་མོ་ཁྱོད། །རྒྱང་ངེ་
གཡེལ་ལེ་མ་མཛད་པར། །བརྩེ་གདུང་གདུང་སེམས་ཅི་ཆེར་མཛོད། །བདག་ནི་ཚོར་བ་མ་ཉམས་ཀྱང་། །ཁྱོད་ཀྱི་ཐུགས་དང་འགལ་སྲིད་པས། །བཤགས་སོ་བསྐང་ངོ་སྦྱང་ལགས་སོ། །བསྒྲུབ་ལ་བར་ཆད་བྱུང་བ་དང་། །དམ་རྫས་གཉེན་པོ་མ་འཛོམས་དང་། །ཐུགས་དམ་དུས་སུ་མ་བསྐང་དང་། །སྔགས་དང་ཕྱག་རྒྱ་ནོར་བ་དང་། །ཏིང་འཛིན་དམིགས་པ་མ་གསལ་དང་། །རྩ་བའི་དམ་ཚིག་འགལ་བ་དང་། །གསང་བ་གཞན་ལ་བསྒྲགས་པ་དང་། །ཡན་ལག་དམ་ཚིག་ཉམས་པ་དང་། །བོང་བུ་ཡུགས་སར་སྡང་བ་དང་། །མེ་རླུང་འཚུབ་མར་མ་དགའ་དང་། །དུས་སུ་མཆོད་གཏོར་ཆགས་པ་དང་། །སྐུ་གསུང་ཐུགས་དང་འགལ་བ་དང་། །མ་ཚོར་མ་རིག་ཉམས་ཆག་རྣམས།་།དོ་ནུབ་བསྐང་ཞིང་བཤགས་པར་བགྱི། །ཁྱོད་ལ་རྟག་ཏུ་མཆོད་ཅིང་བསྒྲུབ། །ཁྱོད་ཀྱང་བདག་གཉིས་དམ་ཚིག་ནི། །སྲོག་ལ་བབ་ཀྱང་མི་འདའ་འཚལ། །བདག་ཅག་མི་ནོར་དགེ་འདུན་སྡེ། །གཙུག་ལག་ཁང་དང་དགོན་གནས་དང་། །རྟ་ཕྱུགས་ཀ་ཆེ་དཀོར་ཆའི་ཚོགས། །ལྷ་མོ་ཁྱོད་ལ་གཉེར་དུ་གཏད། །བཅོལ་ལོ་གཏད་དོ་མ་ཤོར་ཅིག །སྲུངས་
ཤིག་སྤེལ་ཅིག་ངན་ནེ་མ། །བྱིན་དང་ཕུལ་དང་བཙོང་ལ་སོགས། །བདག་གི་ཆེད་དུ་བྱས་པ་ལ། །ཕྲག་དོག་མ་མཛད་དེ་ལྷག་སྲུང་། །ཁྱོད་དང་བདག་གཉིས་བསམ་དགོངས་ཤིག །བསམ་པ་སྒྲུབས་ལ་རེ་བ་སྐོངས། །ལུས་དང་གྲིབ་བཞིན་འགྲོགས་པར་མཛོད། །ཀྱེ། གྲོགས་ལ་གཞུང་མེད་མི་སྲིད་ཀྱི།། །མཛའ་བོར་གདུང་མེད་ཅང་སྲིད་དམ། །མནའ་ཟན་ཁྲེལ་མེད་མི་སྲིད་ཀྱིས། །ཟས་ལ་ངོ་མེད་ཅང་སྲིད་དམ། །ཆོས་སྐྱོང་མཐུ་མེད་མི་སྲིད་ཀྱིས། །རྣལ་འབྱོར་བདག་གི་བསམ་པ་སྒྲུབས། །ཁྱེད་དོན་མི་སྒྲུབ་མི་སྲིད་ཀྱིས། །རིག་འཛིན་རྣལ་འབྱོར་བདག་ཅག་གིས། །དམ་རྫས་མཆོད་གཏོར་འདི་འབུལ་བས། །ཐུགས་དམ་གཉེན་པོ་བསྐང་གྱུར་ཅིག །ཟས་ཀྱི་ངོ་འདི་ཁྱོད་ཀྱི་གྱིས། །བསྐུལ་བའི་གཉེར་འདི་བདག་ལ་ཡོད། །སྨྲས་པའི་ཚིག་འདི་ཁྱོད་ཀྱིས་གསོན། །བཅོལ་བའི་ལས་འདི་ཁྱོད་ཀྱིས་མཛོད། །གཉིས་ཀ་ཆད་པའི་གཞུང་བསྲང་འཚལ། །དེ་ཙམ་གནད་ནས་མ་བསྐུལ་ན། །མི་ཤེས་བསམས་ནས་ལེ་ལོ་བྱེད། །སྨྲས་སོ་ཆད་དོ་དམ་ཅན་རྣམས། །གསོལ་ལོ་མཆོད་དོ་མཁའ་འགྲོ་མ། །
སོད་ཅིག་ཐུལ་ཅིག་དགྲ་དང་བགེགས། །གཏད་དོ་གཉེར་རོ་ཐུགས་དམ་ཅན། །སྤེལ་ཅིག་སྲུངས་ཤིག་ལོངས་སྤྱོད་ཚོགས། །མགོན་ཅིག་སྐྱོབས་ཤིག་མི་ནོར་བདག །བཟློག་ཅིག་བསྒྱུར་ཅིག་བར་ཆད་རྐྱེན། །སྐུ་ཤུགས་ཕྱུང་ལ་ལས་འདི་མཛོད། །ཐུགས་དམ་གཉེན་པོ་བསྐང་བ་ཡིས། །རྣལ་འབྱོར་བདག་ཅག་འཁོར་བཅས་ཀྱིས། །ཆག་ཆེན་ཉམ་ང་ཐམས་ཅད་ཟློག །བར་ཆད་རྐྱེན་ངན་ཐམས་ཅད་ཟློག །ནད་ཁ་ཡམས་ཁ་ཐམས་ཅད་ཟློག །བྱད་ཁ་ཕུར་ཁ་ཐམས་ཅད་ཟློག །གཏད་ཁ་ཁྲམ་ཁ་ཐམས་ཅད་ཟློག །མི་ཁ་བྲམ་ཆུ་ཐམས་ཅད་ཟློག །རྨིས་ལྟས་མཚན་ངན་ཐམས་ཅད་ཟློག །ཟ་འདྲེ་ཕུང་སྲི་ཐམས་ཅད་ཟློག །བསྲེ་རག་སྒབ་འདྲེ་ཐམས་ཅད་ཟློག །བཅོལ་བའི་ཕྲིན་ལས་འགྲུབ་པར་མཛོད། །སྔོན་ཚེ་པདྨའི་སྤྱན་སྔ་རུ། །ཇི་ལྟར་ཁས་བླངས་དམ་བཅས་བཞིན། །རྣལ་འབྱོར་བདག་ཅག་འཁོར་བཅས་རྣམས། །རྟག་ཏུ་སྲུང་དང་བསྐྱབ་པར་མཛོད། །ཆོས་འཁོར་སྐྱོང་བའི་དཀོར་སྲུང་མཛོད། །རྣལ་འབྱོར་སྐྱོང་བའི་དགྲ་བླ་མཛོད། །རྣལ་འབྱོར་མི་ནོར་འཁོར་བཅས་རྣམས། །ཐུབ་པར་སྲུངས་ཤིག་ཐུགས་དམ་ཅན། །བསམ་པ་
ཡིད་བཞིན་འགྲུབ་པ་དང་། །བཀྲ་ཤིས་བདེ་ལེགས་མཛད་དུ་གསོལ། །ཅེས་ཡིག་བརྒྱ་མན་ངག་ལྟར་བཟླ། སེང་གདོང་མའི་སྔགས་ཀྱིས་བར་ཆད་བཟློག་པར་བཟླའོ།། ༈ །དེ་ནས་གསོལ་ཁ་བྱ་བར་སྤྲོ་ན། ཧོ༔ དགོངས་སུ་གསོལ་ལོ། །ཆོས་དབྱིངས་སྐྱེ་བ་མེད་པའི་ཡེ་ཤེས་ཀྱི་ངང་ནས། སྤྲུལ་པའི་མ་གཅིག་དཔལ་ལྷ་མོ། ཞིང་སྐྱོང་མཁའ་འགྲོའི་དབང་ཕྱུག་མ་དུར་ཁྲོད་ཀྱི་བདག་མོ་རྡོ་རྗེ་ངས་ནུས་མ་གནས་གསུམ་མཁའ་འགྲོ་ཡོངས་ཀྱི་གཙོ་མོ་འཁོར་དང་བཅས་པ། ཁྱེད་རྣམས་སྔོན་གྱི་ཐུགས་དམ་ཞལ་གྱིས་བཞེས་པ་བཞིན་དུ་ཐུགས་བརྩེ་བ་ཆེན་པོས་བདག་ལ་དགོངས་སུ་གསོལ། ཁྱེད་རྣམས་རྒྱ་གར་རྡོ་རྗེ་གདན་ན་བཞུགས་སམ། དུར་ཁྲོད་བསིལ་བའི་ཚལ་སོགས་དུར་ཁྲོད་བརྒྱད་ན་བཞུགས་སམ། དེ་ཝི་ཀོ་ཊ་སོགས་ཡུལ་ཆེན་ཉི་ཤུ་རྩ་བཞི་ན་བཞུགས་སམ། མཁར་ཆུ་ཉེ་བའི་ཚན་དྷོ་ཧ་ལ་སོགས་གནས་མཆོག་དམ་པ་གར་བཞུགས་ཀྱང་། དེང་གི་གནས་མཆོག་དམ་པ་འདིར་རྣལ་འབྱོར་པ་བདག་གིས་སྤྱན་འདྲེན་གྱིས། ཐུགས་དམ་དབང་གིས་གནས་འདིར་བྱོན་ལ། དངོས་སུ་འབྱོར་པ་དང་ཡིད་ཀྱིས་སྤྲུལ་པའི་མཆོད་པ་དམ་པ་འབུལ་ལོ། །མུ་སྟེགས་
ཀྱི་ལྷ་མོ་སྲོག་སྒྲུབ་མ་དུར་ཁྲོད་ཀྱི་བདག་མོ་རྡོ་རྗེ་ངས་ནུས་མ་ལ་གསོལ་ལོ། །མཆོད་དོ།་།འདྲེན་ནོ། །འབུལ་ལོ། །གཞན་ཡང་དམར་མོ་ཁྲག་མདོག་མ། ལྗང་མོ་གཡུ་མདོག་མ། སེར་མོ་གསེར་མདོག་མ། སྔོན་མོ་ལྕགས་མདོག་མ། ནག་མོ་སོལ་མདོག་མོ། སྔོ་སྐུ་ཐལ་མདོག་མ། དབུ་ལྔ་དྲེད་མགོ་འཁོར་དང་བཅས་པ་རྣམས་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །ཁྱེད་རྣམས་ལ་གཙང་མ་ཕུད་ཀྱི་གསེར་སྐྱེམས། སྨན་གཏོར་རཀྟའི་མཆོད་པ་དམ་པ་འདི་འབུལ་ལོ། །ཁྱེད་རྣམས་སྔོན་གྱི་ཁས་བླངས་དང་། དམ་བཅས་རྗེས་སུ་དྲན་པར་མཛོད་ལ། རྣལ་འབྱོར་པ་བདག་གི་བཅོལ་བའི་ཕྲིན་ལས་མཛོད་ཅིག །དགྱེས་པའི་ཞལ་སྟོན་ཅིག །སྒྲུབ་པའི་རྟགས་ཐོན་ཅིག །སྙན་པའི་སྒྲ་སྒྲོགས་ཤིག །སུ་ལ་མི་རེ་ཁྱོད་རེའོ། །སུ་ལ་མི་ལྟོས་ཁྱོད་ལ་ལྟོས་སོ། །རྒྱལ་མཚན་དུ་ཁྱོད་ཕྱིར་རོ། །དཔའ་དེར་དུ་ཁྱོད་འཛུགས་སོ། །སྡང་བའི་དགྲ་ཐུལ་ཅིག །གནོད་པའི་བགེགས་ཆོམས་ཤིག །དཔལ་དང་འབྱོར་པ་སྤེལ་ཅིག །གཡང་ཆེན་གྱི་ནོར་དང་། བཅུད་ཅན་གྱི་ཟས་སྐྱོལ་ཅིག །བརྗིད་ཅན་གྱི་གོས་བཀོན་
ཅིག །རྣལ་འབྱོར་པ་བདག་གི་ཡུལ་དང་འཁོར་སྐྱོངས་ཤིག །བྱེས་སུ་རྐྱེན་ཟློག་ཅིག །བསམ་པ་སྒྲུབས་ཤིག །རེ་བ་སྐོངས་ཤིག །སྤོ་ལ་དར་སྦྱོར་ཁྲོམ་ལ་དུང་བུས་ཤིག །བཟང་པོ་བརྗེད་ན་སྐུལ་ཅིག །ངན་པ་དྲན་པས་ཟློག་ཅིག །མི་ནོར་ཕྱུགས་གསུམ་སྤེལ་ཅིག །ཆག་ཆེན་ཉམ་ང་ཟློག་ཅིག །དགྲ་ཇག་ཆོམ་རྐུན་ཆིངས་ཤིག །ཟོད་གཏོང་རྦད་འདྲེ་ཟློག་ཅིག །རྨིས་ལྟས་མཚན་མ་ངན་པ་ཐམས་ཅད་ཟློག་ཅིག །རྣལ་འབྱོར་པ་བདག་གི་འདོད་དོན་བསམ་པ་ཐམས་ཅད་ཡིད་བཞིན་དུ་འགྲུབ་པར་མཛད་དུ་གསོལ། ཨོཾ་དྷ་མ་གྷ་ཡེ་ན་མ་ཧ་རི་ནི་ས་ཧྲིཏ་སྭཱ་ཧཱ། དེ་ལྟར་བསྐང་གསོལ་ལ་བརྩོན་ན་དམ་ཚིག་ཉམས་ཆག་བྱུང་ནས་ལྷ་མོ་རང་བཞིན་ཤུགས་ཀྱིས་འཁོར། ལུས་དང་གྲིབ་མ་བཞིན་དུ་འགྲོགས་ནས། རྟ་ནོར་ར་ལུག་སྒབ་སྤེལ་ལ། སྤྱིར་བདག་ཏུ་བཟུང་བའི་ཟས་ནོར་ཀ་ཆ་ཐམས་ཅད་ལྕགས་མཁར་དགུ་རིམ་ནང་དུ་ཚུད་པ་ལྟར། ཉིན་མཚན་ཐང་ལྷོད་མེད་པར་དུས་རྒྱུན་དུ་སྲུང་བ་ནི། རྒྱུད་ཀྱི་རྒྱལ་པོ་དགོངས་པ་འདུས་པ་དང་། ཕྱག་རྡོར་རྩ་རྒྱུད་རྩལ་ཆེན་འདུས་པ་དང་། ཕག་མོ་མངོན་བྱུང་རྒྱུད་ནས་གསུངས་པ་དང་། གཏེར་གཞུང་ཚད་ལྡན་རྣམས་སུ་གསུངས་པ་དང་། སྔར་གྱི་ཡིག་རྙིང་རྣམས་སུ་བྱུང་བའོ། །གཏེར་གཞུང་ལས། སངས་རྒྱས་
བསྟན་པའི་དཀོར་སྲུང་མ། །དེ་ཕྱིར་མོ་ཉིད་ནོར་ཕྱིར་འབྲང་། །ནོར་སྲང་གཅིག་གི་རྗེས་གཅོད་མ། །རྩྭ་འཛག་གཅིག་གི་ཤུལ་སྙོག་མ། །ཞེས་གསུངས་པ་ལ། ཟས་ནོར་དཀོར་རྣམས་སྲུང་བ་ལ། ལྷ་མོ་འདི་བས་རྣོ་མྱུར་ཆེ་བ་སྲུང་མ་གཞན་གང་ཡང་མེད་དོ། །རྦད་ན་ཡང་དགོན་ཆེན་དཔུང་མང་དང་། སྔགས་པ་ནུས་ལྡན་མང་ན་ཡང་མྱུར་མགྱོགས་དྲག་རྩལ་ལྡན་པར་འགྱུར་ཞིང་། དེ་མ་ཐག་ཏུ་ཆོ་འཕྲུལ་ལྟས་ངན་སྣ་ཚོགས་སྟོན་ཅིང་རྣོ་མྱུར་གློག་དང་འདྲའོ། །ཞེས་པ་ཐུགས་རྗེ་ཆེན་པོའི་སྒྲུབ་ཆེན་དུས་ཐུན་མཚམས་གཅིག་ལ་༧ རཱ་ག་ཨ་སྱས་སྦྱར་བའོ།། །།སརྦ་མངྒ་ལཾ་ཛ་ཡནྟུ། ༈ འདི་ལས་ཟབ་པ་མེད། ཨོཾ་ཏཱ་རེ་ཏུཏྟ་ཏུ་རེ་སརྦ་ཧི་ཧི་ཙ་ལེ་ཙ་ལེ་བྷནྡྷ་ཕཊ་སྭཱ་ཧཱ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།