གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་ཐུགས་རྗེ་ཆེན་པོ་རྒྱལ་བ་རྒྱ་མཚོའི་མྱོང་གྲོལ་སྐྱེ་བདུན་རིལ་བུ་དམར་པོའི་དཀར་ཆག
གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་ཐུགས་རྗེ་ཆེན་པོ་རྒྱལ་བ་རྒྱ་མཚོའི་མྱོང་གྲོལ་སྐྱེ་བདུན་རིལ་བུ་དམར་པོའི་དཀར་ཆག༔
གུ་རུ་ལོ་ཀི་ཤྭ་ར་ཡེ༔ དེ་ཡང་གཏེར་ཁ་ལུང་སྟོན་པའི་སྤྲུལ་སྐུ་མི་འགྱུར་རྡོ་རྗེ་བདུད་འདུལ་རོལ་པ་རྩལ་དེ༔ དགུང་ལོ་བཅུ་གཉིས་བཞེས་པ་སྤྲེལ་ལོ་ཁྲུམས་ཟླ་བའི་ཉི་ཤུ་བརྒྱད་ལ་ཐུགས་རྗེ་ཆེན་པོ་རྒྱལ་བ་རྒྱ་མཚོ་དངོས་སུ་ཞལ་གཟིགས་ནས༔ རྒྱལ་བ་རྒྱ་མཚོའི་བུམ་སྒྲུབ་ཀྱི་གདམས་པ་ཞལ་གདམས་དང་བཅས་པ་དངོས་སུ་གནང་ངོ་༔ དེའི་གཞུང་ལས་རྒྱལ་བ་རྒྱ་མཚོའི་བུམ་སྒྲུབ་ནི་ཏེ་ལོ་ནཱ་རོ་ནས་བརྒྱུད་པ་དང་༔ དགའ་རབ་རྡོ་རྗེ་ནས་བརྒྱུད་པའི༔ བརྒྱུད་པ་མ་འཕྱུགས་དད་རྟེན་བསྲེ༔ འཕྱུག་ན་མི་ནུབ་རུ་རུ་འགྱུར༔ ཞེས་དང་༔ དེའི་ཞལ་གདམས་ལས༔ དགའ་རབ་རྡོ་
རྗེ་ཞེས་པ༔ འདིའི་དམ་རྫས་གཙོ་བོ་གཏེར་རྣམས་ནས་བྱུང་བའི་སྐྱེ་བདུན་གྱི་རུ་རྩི་གལ་ཆེ༔ ཏེ་ལོ་ནཱ་རོ་ཞེས་པ་ཀརྨ་བཀའ་བརྒྱུད་ཁོ་ནའི་བྱིན་རླབས་རྟེན་སླད་མེད་དོ༔ རིལ་བུ་ཆེ་ཆུང་སྲན་ཆུང་ལེབ་མོའི་ཚད་ཙམ་མདོག་དམར་པོ་བྱས་ན་ལེགས༔ ཞེས་གསུངས་སོ༔ དེ་ལ་འདིའི་རུ་རྩིའི་གཙོ་བོ་ནི༔ ཡཾ་བུ་ཤ་རི་རམ་ཡིན་ཏེ༔ དེ་ཡང་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་བཞེས་པ་བྱ་ལོ་ནག་པ་ཟླ་བའི་ཚེས་གཉིས་ལ༔ གུ་རུ་པདྨ་རྒྱལ་པོ་དངོས་སུ་ཞལ་གཟིགས་ཏེ༔ སྒྲུབ་ཐབས་ཟབ་མོ་གཅིག་བརྒྱུད་མགུལ་ཁུག་མ་གནང་ངོ་༔ དམ་རྫ་ས་ཡང་བུ་ཤ་རི་རམ་བྱ་བ་
རིལ་བུ་སྨུག་པོ་ལྔ་ཕྲག་གཅིག་གནང་བ་དངོས་སུ་གཅིག་ལས་མི་སྣང་༔ དེ་ནས་དེའི་བསྒྲུབས་པ་བྱས་དུས་ཀྱང་རིལ་བུ་བདུན་ཕྲག་གཅིག་གནང་བ་དངོས་སུ་གཅིག་ལས་མི་སྣང་སྟེ༔ རིལ་བུ་དེ་རྣམས་བཅུ་དོ་ཙམ་རེ་འདུག་གོ༔ དེ་ནས་རིལ་བུ་དེ་དག་པདྨ་རྒྱལ་པོའི་སྒྲུབ་གཞུང་ནས་གསུངས་པ་ལྟར་མང་ཞིག་སྤེལ་ནས་སྒྲུབ་པ་ཁ་གསོ་ཡང་མཛད་དོ༔ དེ་ལྟར་ཡང་བུ་ཤ་རི་རམ་དང་༔ བྲམ་ཤུ་རིལ་བུ་དང་༔ ཙུན་དྷ་རིལ་བུ་བྲེ་དོ༔ གནམ་ཆོས་ཀྱི་དམ་རྫས་དང་༔ སྤྲུལ་སྐུ་ཉིད་ཀྱི་ཤངས་མཚལ་བུང་ཆེ་བ་དང་༔ སྐུ་གོང་མ་འཁྲུལ་ཞིག་དབང་དྲག་རྒྱ་མཚོའི་སྐུ་ཤ་རིལ་བུ་མང་ཞིག་རྣམས་གཙོ་བོ་ཡིན་ལ༔ དེ་ནས་དགའ་རབ་རྡོ་རྗེ་ནས་བརྒྱུད་པའི་དམ་རྫས༔ སངས་རྒྱས་གླིང་པའི་གཏེར་ཁ་དམ་རྫས་རོལ་པ་ཆེན་པོ༔ རཏྣ་གླིང་པའི་གཏེར་ཁ་བྲམ་ཟེའི་ཤ་རིལ༔ འཇའ་ཚོན་སྙིང་པོའི་དམ་རྫས་རིལ་བུ༔ ཚེར་ལུང་དྲུང་པ་ཀུན་དགའ་རྣམ་རྒྱལ་བས༔ རྗེ་ཆོས་གྲགས་རྒྱ་མཚོའི་སྐུ་ཤ་དང་༔ དབང་དྲག་རྒྱ་མཚོའི་སྐུ་ཤ་གཉིས་ལ་གཞི་བྱས་ནས་སྒྲུབ་པའི་མ་ཎི་རིལ་བུ་བརྒྱ་དང་སུམ་ཅུ༔ སྐྱོ་བྲག་བསྟན་འཛིན་བཟང་པོའི་མ་ཎི་རིལ་བུ༔ སྐྱོ་བྲག་ཀརྨ་དོན་དམ་པའི་ཕྱག་ནས་བྱུང་བའི་མ་ཎི་རིལ་བུ༔ འབྲི་
གུང་པའི་མ་ཎི་རིལ་བུ་༔ ཆོས་རྗེ་མཁར་དྲུང་གི་སྨན་སྒྲུབ༔ ཀོང་པོ་རྩེ་ལེ་སྤྲུལ་སྐུའི་མ་ཎི་རིལ་བུ༔ ཤར་ཀཿཐོག་པའི་མ་ཎི་རིལ་བུ་མང་བ༔ བྷ་ཁ་སྤྲུལ་སྐུའི་ཕྱག་ནས་བྱུང་བའི་གཏེར་སྟོན་བརྒྱ་རྩའི་དམ་རྫས༔ འབྲི་གུང་ཆོས་ཀྱི་གྲགས་པའི་དམ་རྫས་རིལ་བུ༔ ལྷོ་པ་སྤྲུལ་སྐུའི་དགོངས་འདུས་སྒྲུབ་པའི་དམ་རྫས་རྣམས༔ རིག་འཛིན་བདུད་འདུལ་རྡོ་རྗེའི་བསམ་ཡས་ནས་རྫུ་འཕྲུལ་གྱིས་བཏོན་པའི་ཟག་མེད་འཇའ་ལུས་འགྲུབ་པའི་རིལ་བུ༔ མ་བསྒོམས་སངས་རྒྱས་རིལ་བུ་བྲམ་ཟེ་དུང་རྣ་ཅན་གྱི་ཤ༔ ཐབས་ཤེས་ཕྱག་ཆེན་རིལ་བུ་བྲམ་ཟེའི་འཕེལ་གདུང་རིལ་བུ༔ གཞན་ཡང་རྒྱ་བོད་ཀྱི་རིག་འཛིན་གྲུབ་ཐོབ་རྣམས་ཀྱི་གདུང་རུས་རྣམས་གཅིག་ཏུ་དྲིལ་བ་ཟླ་ཤེལ་རིལ་བུ༔ སྐུ་ཤ་རྣམས་གཅིག་ཏུ་དྲིལ་བ་ས་ལེ་སྦྲམ༔ སྐུ་མཚལ་རྣམས་གཅིག་ཏུ་དྲིལ་བ་པདྨ་རཱ་ག༔ དམ་རྫས་རྣམས་གཅིག་ཏུ་དྲིལ་བ་ཨ་དོ་དམར་པོ༔ ཏེ་ལོ་ནཱ་རོ་ནས་བརྒྱུད་པའི་བྱིན་རླབས་རྟེན་ནི༔ རྒྱལ་བ་ཡབ་སྲས་རྣམས་ཀྱི་རིལ་ནག་ཕྱག་དྲིལ་མ་འགའ༔ ཞྭ་དམར་ཆོས་ཀྱི་དབང་ཕྱུག་གི་སྐུ་མཚལ༔ ཆབ་ཚ་དབུ་ལོ༔ རྗེ་བཙུན་རི་མགོ་བའི་གདུང་རུས་ཚན་ཆེ་བ༔ གཞན་ཡང་རྒྱལ་བ་ཡབ་སྲས
རྣམས་ཀྱི་སྐུ་མཚལ༔ གསང་ཆབ་ན་བཟའ་དབུ་ལོ༔ གཞན་ཡང་བྱང་ཆུབ་ཤིང་གི་དུམ་བུ༔ ས་སྐྱ་པའི་བདུད་རྩི་རིལ་བུ༔ ཨ་མི་ལོག་གི་སྨན་སྒྲུབ་མང་བ༔ དེའི་བདུད་རྩི་རིལ་བུ༔ འབྲི་གུང་ཞབས་དྲུང་ཆོས་ཀྱི་གྲགས་པའི་སྨན་སྒྲུབ་མང་བ༔ རྩེ་དང་ཞབས་དྲུང་གི་བདུད་རྩི་རིལ་བུ༔ རྟ་ནག་ཐུབ་བརྟན་པའི་བདུད་རྩི་རིལ་བུ་ཚན་ཆེ་བ༔ གཏེར་སྟོན་ནམ་མཁའ་འཇིགས་མེད་ཀྱི་དམ་རྫས་རིལ་བུ༔ མཁན་པོ་བོ་དྷི་སཏཱིའི་ན་བཟའ། གླིང་རྗེ་རས་པའི་དྲྭ་བ་དུམ་བུ༔ ལྷ་ལུང་དཔལ་གྱི་རྡོ་རྗེའི་བེར་སྨུག་དུམ་བུ༔ ཕག་མོ་གྲུ་པའི་ན་བཟའ༔ འགྲོ་མགོན་རས་ཆེན་ན་བཟའ༔ བྱང་ཆུབ་རྡོ་རྗེའི་ཞབས་ཆགས༔ དེ་བཞིན་གཤེགས་པའི་ན་བཟ༢༔ ཆོས་གྲགས་རྒྱ་མཚོའི་ཞབས་ཆགས༔ དབང་ཕྱུག་རྡོ་རྗེའི་སྐུ་རེག༔ མི་བསྐྱོད་རྡོ་རྗེའི་ཞབས་ཆགས༔ སངས་རྒྱས་དབོན་གྱི་དབུ་ཞྭ༔ སངས་རྒྱས་ཡེལ་པའི་གདུང་ལྕིབས་ན་བཟའ༔ ཨོ་རྒྱན་མགོན་པོའི་དབུ་ཞྭ༔ ངོམ་པ་མཁའ་སྤྱོད་པའི་ཨང་གི་དུག་པོ་དང་སྒོམ་ཐག༔ ཆོས་དབྱིངས་རྡོ་རྗེའི་ན་བཟའ༔ སི་ཏུ་ཆོས་ཀྱི་གོ་ཆའི་དབུ་ཞྭ༔ མཁའ་འགྲོ་བསོད་ནམས་དཔལ་འདྲེན་གྱི་ན་བཟའ༔ འབྲིང་གུང་ཞབས་དྲུང་ན་
བཟའ༔ གར་དབང་ཀརྨ་བསྟན་སྐྱོང་གི་ཤངས་མཚལ༔ དྲུང་པ་ཚེར་ལུང་ཀུན་དགའ་རྣམ་རྒྱལ་གྱི་སྐུ་མཚལ༔ ཆབ་སེར༔ འཇའ་ཚོན་སྙིང་པོའི་དབུ་ལོ་ན་བཟ༢༔ གར་དབང་པའི་གདུང་རུས༔ རི་པ་ཚེ་མཚམས་ཀརྨ་ཚེ་དབང་གི་དབུ་ཐོད་དུམ་བུ་རྒྱལ་ཚབ་གྲགས་པ་མཆོག་དབྱངས་ཀྱི་གསང་ཆབ༔ ན་བཟའི༔ གངས་ཏི་སེའི་ཇུ་གངས༔ གངས་ཐིག༔ མཚོ་མ་ཕམ་གྱི་བྱེ་མ་སྣ་ལྔ༔ གསང་འདུས་དང་རྒྱལ་བ་རྒྱ་མཚོ་དགོངས་འདུས་རྣམས་ཀྱི་སྒྲུབ་ཆེན་གྱི་བུམ་ཆུ་སོགས་དམ་རྫས༔ མཆོད་རྟེན་བྱ་རུང་ཁ་ཤོར་གྱི་ས་དང་དབུ་ལོ༔ འབྲས་མོ་ལྗོངས་ཀྱི་བྲག་དཀར་བཀྲ་ཤིས་སྟེང་གི་ས་ལ་སོགས་པ་བྱིན་རླབས་རྟེན་དཔག་ཏུ་མེད་པ་འདྲེས་ཤིང་༔ གནམ་ཆོས་ཀྱིས་གཞུང་ལྟར་སྒྲུབ་པ་ཐེམས་པར་བྱས་པ་ཡིན་ནོ༔ དེ་ནས་འདིའི་ཕན་ཡོན་ནི༔ གནམ་ཆོས་རིལ་བུ་འདིའི་སྒྲུབ་ཐབས་གཞུང་ལས༔ རིལ་བུ་ཀུན་ལ་བཀྱེ་སྟེ༔ ཕན་ཡོན་ནི་བརྗོད་ལས་འདས༔ ཞེས་གསུངས་པའི་དོན་ནི༔ ཐུགས་རྗེ་ཆེན་པོ་ཡང་སྙིང་འདུས་པའི་རྒྱུད་ལས༔ རིལ་བུ་སུ་ཡི་ལྟོར་སོང་བ༔ ཚེ་རབས་གང་དང་གར་སྐྱེས་ཀྱང་༔ སྤྱན་རས་གཟིགས་དང་འབྲལ་མི་སྲིད༔ ཅེས་
དང་༔ ཐུགས་རྗེ་གསང་བ་འདུས་པའི་རྒྱུད་ལས༔ རིལ་བུ་སུ་ཡི་ལྟོར་སོང་བ༔ ཚེ་རབས་གང་དང་གར་སྐྱེས་ཀྱང་༔ སྤྱན་རས་གཟིགས་དང་འབྲལ་མི་སྲིད༔ བདག་བས་གཞན་གཅེས་འགྲོ་དོན་སྤྱོད༔ ཡིག་བདུན་བཟླས་ཤིང་དམ་ཚིག་སྲུང་ཐམས་ཅད་འཁོར་བ་དོང་ནས་སྤྲུག༔ ཅེས་དང་༔ གནམ་ཆོས་ཐུགས་ཀྱི་གཏེར་ཁ་འདི་ཉིད་ཀྱི་གཞུང་ལས༔ ཡང་བུ་ཤ་རི་རམ་ཟོས་པས༔ ཚེ་རིང་བས་ན་ཚེ་རིལ་འདྲ༔ ནོར་འཕེལ་བས་ན་ནོར་བུ་འདྲ༔ ཁམས་གསུམ་སྲིད་གསུམ་ཐམས་ཅད་ཀུན༔ དབང་དུ་འདུ་བ་རྒྱལ་པོ་འདྲ༔ དམྱལ་བར་མི་འགྲོ་བཏགས་གྲོལ་འདྲ༔ ཆུ་ལ་མི་བྱིངས་ཉ་མོ་འདྲ༔ བྲག་ལ་མི་རྦབ་བྱ་རྒོད་འདྲ༔ དགྲ་ཡིས་མི་གནོད་དངོས་མེད་འདྲ༔ འདི་ཡི་ཕན་ཡོན་བསམ་མི་ཁྱབ༔ ཅེས་དང་༔ གཞན་ཡང་རིལ་བུ་ཤ་རི་རམ༔ འདི་ཡི་བསྒྲུབས་པ་བྱས་པའི་རིལ་བུ་ལ༔ འབྲུག་རུས་དང་ཨ་རུ་ར་བསྲེས་ན་ནོར་དང་བསོད་ནམས་འཕེལ་བ་དང་༔ འབྲུ་སྣ་དང་དར་རས་བསྲེས་ན༔ ཟས་གོས་ལོངས་སྤྱོད་འཕེལ་བ་དང་༔ ཙན་དན་དཀར་པོ་དང་ཨ་རུ་ར་མཆུ་སྙིང་བསྲེས་པས་ཚེ་རིང་བའི་རྟེན་འབྲེལ་འབྱུང་བར་གསུངས་པ་ལྟར༔ རྫས་དེ་དག་ཚང་བར་བྱས་པ་ཡིན་
སྐྱེ་བདུན་སྒྲུབ་པའི་གཞུང་རྣམས་ནས་བཤད་པ་ལྟར༔ གཏེར་མ་ཚད་ལྡན་གྱི་བྲམ་ཟེ་སྐྱེ་བ་བདུན་པའི་ཤ་རིལ༔ མ་གཅིག་ཡེ་ཤེས་མཚོ་རྒྱལ་གྱི་ཕྱག་དྲིལ་ཨ་དང་མའི་ཡི་གེས་མཚན་པ་རྣམས་དང་གྲུབ་ཐོབ་ཀྱི་ཤ་ཆེན་གསུངས་པ་ལྟར༔ རྗེ་ཆོས་གྲགས་རྒྱ་མཚོ་དང་༔ འབྲི་གུང་ཆོས་རྒྱལ་ཕུན་ཚོགས་དང་༔ རིག་འཛིན་དབང་དྲག་རྒྱ་མཚོ་རྣམས་ཀྱི་སྐུ་ཤ་ལ་རུ་རྩིའི་གཞི་བྱས་པ་ཡིན་པས༔ འདིའི་ཕན་ཡོན་ཨོ་རྒྱན་རིན་པོ་ཆེས་པདྨ་ཀ་ཐང་ལ་སོགས༔ གཏེར་ཁ་ཚད་ལྡན་རྣམས་ནས་གསུངས་པ་ནི་འདི་ལྟར་ཏེ༔ མ་བསྒྲུབས་སངས་རྒྱས་ཐོབ་པ་ལ་བཞི་སྟེ༔ རྒྱུད་བཏགས་གྲོལ༔ ཕྱག་རྒྱ་པདྨ་ཅན༔ གསང་ལམ་འཕོ་བ༔ དམ་རྫས་སྐྱེ་བདུན༔ དཔེར་ན་མཐེབ་དང་གཞུའི་ནུས་པས་མདའ་ཕ་རོལ་དུ་འགྲོ་བ་དང་༔ གྲུ་དང་མཉན་པའི་རྩོལ་བས་ཆུ་བོ་ལས་སྒྲོལ་བ་ལྟར༔ ངེས་པར་སྤྱན་རས་གཟིགས་ཀྱི་དྲུང་དུ་སྐྱེ་བར་འགྱུར་རོ༔ ཞེས་དང་རིལ་བུ་སུས་ཐོབ་པ་ཐུགས་རྗེ་ཆེན་པོའི་ཞིང་དུ་འགྲོ༔ འདི་ལ་ཐེ་ཚོམ་མི་འཚལ་ཏེ༔ མ་བསྒྲུབས་སངས་རྒྱས་ཐོབ་ཐབས་ལྔ༔ སྔོན་སྦྱང་ལས་སད་རྟོག་གྲོལ་དང་༔ རང་བྱུང་རྒྱུད་མཆོག་བཏགས་གྲོལ་དང་༔
མཚན་ལྡན་པད་ཅན་རྩ་ཡི་གནས༔ གསང་ལམ་ཟབ་མོའི་འཕོ་བ་དང་༔ ངོ་མཚར་རྫས་མཆོག་སྐྱེ་བདུན་ནོ༔ དེ་ཕྱིར་འདི་སྤྱོད་སྐྱེས་བུ་ལོ༔ བྱང་ཆུབ་སེམས་ལྡན་མཆོག་ཏུ་གཅེས༔ རིལ་བུ་གཅེས་སྤྲས་ཆེར་བྱས་ཏེ༔ འགྲོ་དོན་དཔག་མེད་རྒྱ་ཆེན་སྤྱོད༔ ཅེས་དང་༔ གཟུངས་ཆུ་གཟུངས་རིལ་མང་དུ་ནི༔ བསྒྲུབས་ནས་འགྲོ་བ་ཡོངས་ལ་སྤེལ༔ རིན་ནི་མ་ཎི་འུར་རྒྱག་བླངས༔ འདི་འདྲའི་ཡོན་ཏན་བརྗོད་མི་ལོང་༔ སྐྱེ་བ་བདུན་ནས་པདྨ་ཅན༔ འོད་དཔག་མེད་ཀྱི་སྲས་སུ་འགྱུར༔ ཞེས་དང་༔ པདྨ་བཀའི་ཐང་ཡིག་ལས་ཀྱང་སྐྱེ་བདུན་རིལ་བུའི་ཕན་ཡོན་གསུངས་པ༔ དབང་པོ་ལྔ་དང་ཟག་ཆུ་ཤ་དང་རུས༔ ཤིག་གི་སྙིང་ཙམ་སུ་ཡི་ལྟོར་སོང་བ༔ རྨོངས་པོས་ལྟོར་སོང་མི་ཡི་དངོས་གྲུབ་འབྱུང་༔ དབུལ་པོའི་ལྟོར་སོང་ནོར་གྱི་དངོས་གྲུབ་ཐོབ༔ འཆི་འཕོའི་ལྟོར་སོང་ཚེ་ཡི་དངོས་གྲུབ་ཐོབ༔ དད་ཅན་ལྟོར་སོང་ཆོས་ཀྱི་དངོས་གྲུབ་ཐོབ༔ དེ་ལ་སོགས་པའི་ཡོན་ཏན་མང་ཡོད་ཀྱང་༔ ལོག་ལྟ་ཅན་གྱི་ཡོན་ཏན་སྐྱོན་དུ་མཐོང་༔ དེ་ཡང་འབྲེལ་པ་སྣ་གཅིག་ཐོབ་པ་ཡིན༔ སྒྲིབ་པ་དག་སྟེ་ཆོས་ཉིད་ལས་སད་ཡིན༔ དེ་ཕྱིར་མཆོག་སྒྲུབ་སྐྱེ་བ་བཅུ་གསུམ་བར༔ མཐོང་ཐོས་དྲན་
རེག་དོན་དང་དྲན་པ་སྟེ༔ དྲི་མ་དག་པ་ཏིལ་འབྲུ་ཙམ་ཞིག་དེས༔ ངན་སོང་འགྲོ་ངེས་ཤེས་པ་མཐོ་རིས་སྐྱེ༔ དགེ་བཅུའི་རྒྱུ་ཡང་འབྲུ་རྩམ་ས་བོན་འདེབས༔ དྲང་སྲོང་གཟའ་ནད་འབྱུང་པོའི་གདོན་བགེགས་ནད༔ འདྲེ་ཡི་གཙེས་པ་རྣམས་ཀྱང་གྲོལ་བར་འགྱུར་མཚམས་མེད་ལྔ་སྤྱོད་ལྟོར་སོང་རིག་འཛིན་གྲོལ༔ ལས་ཀྱི་དུད་འགྲོའི་གནས་སུ་སྐྱེས་ན་ཡང་༔ ཡུལ་བཟང་བདག་བྱམས་བརྡུང་བཙོག་མེད་པར་འགྱུར༔ དེ་སོགས་ཡོན་ཏན་མང་པོ་ཟུར་ཙམ་ཡིན༔ གཞན་ཡང་བསོད་ནམས་ཆུང་བའི་དུད་འགྲོ་ཡིན་ཡང་རུང་༔ མི་ཚེར་སྡིག་བྱེད་ཤན་པ་ཡིན་ཡང་རུང་༔ སྐྱེ་བ་དམན་པའི་བུད་མེད་ཡིན་ཡང་རུང་༔ ལས་ཀྱི་འཕྲོ་མེད་མི་ནག་ཡིན་ཡང་རུང་༔ ཆུ་ལ་གནས་པའི་སེམས་ཅན་ཡིན་ཡང་རུང་༔ མཁའ་ལ་གནས་པའི་འདབ་ཆགས་ཡིན་ཡང་རུང་༔ སྡིག་པ་དག་ཅིང་མི་ལུས་གཙང་མ་ཐོབ༔ དད་པ་ཤེས་རབ་བརྩོན་འགྲུས་སྤྱོད་པར་འགྱུར༔ སྐྱེ་བདུན་ཤ་ཡིས་འདུལ་བའི་དུས་ཚོད་ཀྱང་༔ སངས་རྒྱས་བསྟན་པ་ལྔ་བརྒྱ་ཕྲག་འབུམ་ནུབ༔ དུས་ངན་གྱུར་ཏེ་ས་སྟེང་མིས་གང་གྱུར༔ རྒྱལ་ཁམས་ཞིག་པས་བོད་ཁམས་རྒྱ་བྱེད་ཆད༔ སིལ་བུ་སིལ་བུར་སོང་སྟེ་འཁྲུག་
ཐབས་བྱེད༔ ཁྱད་པར་ཉོན་མོངས་དུག་ལྔ་རང་ཁར་སྤྱོད༔ ཐམས་ཅད་འཁྲུལ་ནས་མཚོན་གྱི་བསྐལ་པ་དར༔ རྟགས་ཙམ་འཛིན་པའི་བསྟན་པ་དཀོར་གཉེར་ཏེ༔ བཙུན་པས་ཁྱིམ་བྱེད་སྡོམ་པ་རྒྱབ་ཏུ་བོར༔ བུ་ཕྲུག་པང་དུ་བླངས་ནས་སྔགས་པ་ཟེར༔ སྔགས་པ་མགོ་སྤུ་བྲེག་ནས་བཙུན་ཆས་བྱེད༔ དགེ་བཤེས་ཧོར་ལས་གྲི་མདུང་དམག་དཔོན་བྱེད༔ གཏམ་དུ་དམག་ལབ་གོས་སུ་གོ་མཚོན་གྱོན༔ ལས་སུ་རྫོང་བརྩིག་ནོར་དུ་སྡིག་པ་བསོགས༔ ལྷ་ཆོས་མི་བྱེད་ཁྱད་པར་སྡིག་ལ་དགའ༔ དམག་དང་མུ་གེ་ནད་ཡམས་དུས་ཤིག་འབྱུང་༔ བཀའ་ཁྲིམས་ཞིག་པས་སྤྱི་འདུན་བུད་མེད་བཟུང་༔ ཕ་ཚན་ནང་བྱེ་སྤྱི་མདུན་ཆེན་པོ་ཞིག༔ ཤེས་པ་ཕྱིར་ལྡོག་གསལ་བའི་མིང་ལོགས་བྱུང་༔ གནས་པའི་ལུས་དུབ་ལུས་སེམས་གཉིས་ཀ་བྲེལ༔ གནས་གཞི་ལྷ་ཁང་བཤིགས་ནས་རྫོང་ལ་འགེབས༔ མི་རིགས་མི་མཐུན་ཀུན་དང་འགྲོགས་དགོས་འབྱུང་༔ སྐྱེ་འགྲོ་མི་སྲུན་ཟུག་རྔུ་སུས་མི་བཟློག༔ ལས་སུ་ཤན་པའི་སེམས་ཅན་ཨ་རེ་སྡུག༔ གཏེར་ལ་མོས་ཤིང་འདྲི་བ་མང་དུ་འབྱུང་༔ དེ་དུས་སྐྱེ་བདུན་ཤ་འདི་ལྟོར་སོང་བས༔ དུག་གསུམ་ནད་ཞི་བདུད་རྩི་མཆོག་ཏུ་གསུངས༔ ཞེས་དང་༔ མྱོང་
གྲོལ་དཀར་ཚིག་ལས༔ ཚེ་གཅིག་སངས་རྒྱས་འགྲུབ་པའི་མྱོང་གྲོལ་འདི༔ ལུས་ལ་བཅང་ན་ནད་མཚོན་འཆི་བརྒྱུད་ཁོག༔ རྩ་གསུམ་རྒྱ་མཚོའི་ལྷ་ཚོགས་སྤྲིན་བཞིན་འདུ༔ མ་སྲིན་མཁའ་འགྲོའི་ཚོགས་རྣམས་གྲིབ་བཞིན་འགྲོགས༔ དམ་ཅན་རྒྱ་མཚོའི་ཚོགས་རྣམས་བྲན་ལྟར་འཁོར༔ ནག་ཕྱོགས་ལྷ་སྲིན་གདུག་པའི་གདུབ་རྩུབ་ཞི༔ ཕམ་ལྟུང་ཉམས་པའི་ལས་སྒྲིབ་ཐམས་ཅད་དག༔ མྱོང་ཙམ་གྱིས་ནི་ཚེ་གཅིག་སངས་རྒྱས་འགྲུབ༔ ཐ་ན་ཁྱི་ཕག་ལྟ་བུ་ཡིན་མོད་ཀྱང་༔ སྲོ་མ་ཙམ་ཞིག་ཁ་རུ་རེག་གྱུར་ན༔ དལ་འབྱོར་ཆོས་ལྡན་མི་ལུས་ཐོབ་ནས་ནི༔ ཚེ་གཅིག་ཀུན་མཁྱེན་འབྲས་བུ་རྙེད་པར་ངེས༔ ཞེས་དང་༔ དེ་ལྟར་སྒྲུབ་པའི་རིལ་བུ་དེ་གང་གི་ཁོག་ཏུ་སོང་ཡང་༔ འཁོར་བ་དང་ངན་སོང་གི་སྒོ་ཁེག་གྱུར་རོ༔ ཡ་རབ་བརྒྱད་ལྡན་གྱི་ལུས་ཐོབ་ནས་ཚེ་གཅིག་ལ་འཕགས་བའི་སྐུར་འཚང་རྒྱ་བར་ཐེ་ཚོམ་མེད་དོ༔ རིལ་བུ་འདི་ཉིད་སྲོག་ཆགས་གང་གི་ཁོང་དུ་སོང་ཡང་༔ ཚེ་རབས་ཐོག་མེད་ནས་བསགས་པའི་ལས་སྒྲིབ་དག་པར་འགྱུར་རོ༔ ནད་གདོན་བར་ཆད་ཐམས་ཅད་ཞི་ནས་སངས་རྒྱས་པར་འགྱུར་རོ༔ རིལ་བུ་འདི་ཉིད་ལོའམ་ཟླ་བ་དང་༔ ཞག་
བདུན་ཚུན་ཆད་བཅུད་ལེན་བྱས་ནི༔ གནས་སྐབས་སུ་ཚེའི་བར་ཆད་ཞི་བ་དང་༔ ལུས་བཀྲག་མདངས་གཟི་བརྗིད་ལྡན་ཞིང་༔ སྐྲ་དཀར་གཉེར་མ་མི་འབྱུང་བ་དང་༔ ནད་གདོན་འབྱུང་པོ་མི་མ་ཡིན་གྱིས་གླགས་མི་རྙེད་ཅིང་༔ ཚེའི་རིག་འཛིན་རྙེད་པ་སོགས་བརྗོད་པར་མི་ནུས་སོ༔ ལུས་ལ་འཆང་ན་འགོས་ནད་དང་༔ མཚོན་ཆའི་རིགས་ཐམས་ཅད་ཐུབ་པར་འགྱུར་རོ༔ སྲུང་བ་ཐམས་ཅད་ཀྱི་མཆོག་ཏུ་འགྱུར་བ་དང་༔ རྫོགས་པའི་སངས་རྒྱས་ཐོབ་པར་འགྱུར་རོ༔ བསྒོམ་མི་དགོས་ཏེ་སྐད་ཅིག་ཚེ་འདི་ལ༔ ཚེ་གཅིག་སངས་རྒྱས་འགྲུབ་པའི་རྫས་མཆོག་འདི༔ པད་འབྱུང་བདག་གི་རྒྱབ་ཚབ་མན་ངག་གོ༔ ལྕགས་ཀྱི་ལྷམ་བུ་ཆ་བཅུ་བཟོས་ནས་ནི༔ འཛམ་གླིང་གསེར་གྱིས་ཁེངས་པར་བྱས་ནས་ཀྱང་༔ གླིང་བཞི་གླིང་ཕྲན་བརྒྱད་རྣམས་ཉུལ་གྱུར་ཀྱང་༔ སྐལ་ལྡན་གཞན་ལ་འདུག་གམ་མི་འདུག་ལྟོས༔ ཞེས་ཨོ་རྒྱན་རིན་པོ་ཆེས་གསུངས་པ་ལྟར༔ གཏེར་ཁ་གསར་རྙིང་དུ་མ་ནས་བྱུང་བའི་སྐྱེ་བདུན་ཨ་མ་རིལ་བུ་དང་༔ ཁྱད་པར་ཨོ་རྒྱན་རིན་པོ་ཆེས་དངོས་སུ་གནང་བའི་ཡང་བུ་ཤ་རི་རམ་དང་༔ བྲམ་ཤུ་རིལ་བུ་དང་༔ ཙུན་དྷ་རིལ་བུ་ལ་སོགས་པ་འདི་ལྟ་བུ་ནི༔ ཤིན་ཏུ་བྱིན་རླབས་
ཆེ་ཞིང་དཀོན་པ་ཡིན་ཅིང་༔ ཚེ་འདིའི་བར་ཆད་སེལ་ནས་བསྲུང་བའི་མཆོག་དམ་པ༔ ཕྱི་མ་ངན་སོང་གི་སྐྱེ་སྒོ་ཆོད་པར་བྱང་ཆུབ་ཀྱི་ས་བོན་ཐེབ་ངེས་འདི་ནི་ཡིད་བཞིན་གྱི་ནོར་བུ་རིན་པོ་ཆེ་སྟོན་མོར་འགྱེད་པ་ཡིན་ནོ༔ རང་ལུས་གཞལ་ཡས་ཁང་གི་ཤར་སྒོ་ནས༔ རིལ་བུ་ཐུགས་རྗེ་ཆེན་པོ་རྒྱལ་བ་རྒྱ་མཚོ་བྱོན་ཏེ༔ སྙིང་པདྨ་འདབ་བརྒྱད་ཀྱི་སྟེང་དུ་བཞུགས་ནས༔ རང་ཉིད་སངས་རྒྱས་མ་ཐོབ་ཀྱི་བར་དུ་འདུ་འབྲལ་མེད་པའི་མོས་པ་མཛོད་ལ་རིལ་བུ་མིད་ལ་ཡིག་དྲུག་འུར་འདོན་གཅིག་མཛོད་ཅིག༔ ཅེས་གནམ་ཆོས་བུམ་སྒྲུབ་ཀྱི་ལྷན་ཐབས་སུ་གཏེར་བློན་རཱ་ག་ཨ་སྱས་སྦྱར་བའོ༔ མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།