གནམ་ཆོས་ཐུགས་ཀྱི་གཏེར་ཁའི་པདྨ་ཟབ་པའི་རྒྱུད་ཀྱི་དོན་ཐུགས་རྗེ་ཆེན་པོའི་ལུས་དཀྱིལ་གྱི་སྔོན་འགྲོ་བཞི་སྦྱོར།
གནམ་ཆོས་ཐུགས་ཀྱི་གཏེར་ཁའི་པདྨ་ཟབ་པའི་རྒྱུད་ཀྱི་དོན་ཐུགས་རྗེ་ཆེན་པོའི་ལུས་དཀྱིལ་གྱི་སྔོན་འགྲོ་བཞི་སྦྱོར་བཞུགས་སོ༔
གུ་རུ་དེ་བ་ཌཱ་ཀི་ནཱི་ཧཱུྃ༔ པདྨ་ཟབ་པའི་རྒྱུད་ཀྱི་དོན༔ ཐུགས་རྗེ་ཆེན་པོའི་ལུས་དཀྱིལ་ནི༔ རང་བྱུང་རྡོ་རྗེའི་མཛད་པ་ལས༔ སྔོན་འགྲོའི་རིམ་པ་ཡོངས་རྫོགས་ནས༔ གསུང་ཕྱིར་སྔོན་འགྲོ་བཞི་སྦྱོར་ནི༔ དལ་འབྱོར་ལུས་འདི་ཤིན་ཏུ་རྙེད་པར་དཀའ༔ ཅི་དང་ཅི་ལ་སྐྱེས་ཀྱང་མི་རྟག་འཆི༔ དགེ་བ་ཆོས་ལ་འབད་ན་སངས་རྒྱས་རྒྱུ༔ སྡིག་པ་གང་བྱས་དེ་ལྟའི་རིགས་དྲུག་འཁྱམས༔ ཡི་དྭགས་བཀྲེས་སྐོམ་དུད་འགྲོ་གླེན་ལྐུགས་དང་༔ དམྱལ་བ་ཚ་གྲངས་མི་སྐྱེ་རྒ་ན་འཆི༔ ལྷ་མིན་འཐབ་རྩོད་ལྷ་ཡི་སྡུག་བསྔལ་ཡོད༔ འགྲོ་ཀུན་སྡུག་བསྔལ་དེ་ལས་སྐྱོབ་པའི་ཕྱིར༔
མདུན་གྱི་ནམ་མཁར་ཀུན་ཏུ་བཟང་པོ་ལ༔ སངས་རྒྱས་བྱང་སེམས་དཔག་ཏུ་མེད་པས་བསྐོར༔ ཀུན་བཟང་རྒྱལ་བ་སྲས་བཅས་ཐམས་ཅད་ལ༔ བདག་ནི་རྩེ་གཅིག་ཡིད་ཀྱི་སྐྱབས་སུ་མཆི༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ སེམས་ཅན་དོན་དུ་བྱང་ཆུབ་སེམས་བསྐྱེད་དོ༔ ཚིག་རྐང་བཞི་པོ་གསུམ་མམ་བདུན་སོགས་བརྗོད༔ སྐྱབས་ཡུལ་འོད་ཞུ་བདག་གཞན་རྣམས་ལ་ཐིམ༔ རང་གི་སྤྱི་བོར་རྡོར་སེམས་སྐུ་མདོག་དཀར༔ ཕྱག་གཉིས་རྡོ་རྗེ་དྲིལ་བུ་བཏུར་ཐབས་འཛིན༔ དེ་ཡི་སྐུ་ལས་བདུད་རྩིའི་རྒྱུན་བབས་པས༔ ལུས་ཀུན་གང་སྟེ་སྡིག་སྒྲིབ་ནག་
ནུར་སོང་༔ མཐར་ནི་རྡོར་སེམས་རང་ཐིམ་རང་རྡོར་སེམས༔ ཐུགས་ཀར་ཟླ་སྟེང་ཧཱུྃ་ལ་ཡིག་བརྒྱས་བསྐོར༔ བདུད་རྩིའི་རྒྱུན་བབས་ཉམས་ཆག་སྡིག་སྒྲིབ་ཀུན༔ མ་ལུས་དག་ནས་ཤེལ་གོང་ལྟ་བུར་གྱུར༔ ཨོཾ་བཛྲ་སཏྭ་ཧཱུྃ༔ ཞེས་པ་བརྒྱ་རྩའམ་ཅི་འགྲུབ་དང་༔ སྤྲོ་ན་ཡི་གེ་བརྒྱ་པ་བཟླ་བར་བྱ༔ རང་གི་མདུན་གྱི་ནམ་མཁར་ཀུན་བཟང་ལ༔ སངས་རྒྱས་བྱང་སེམས་དཔག་ཏུ་མེད་པས་བསྐོར༔ ཡེ་ནས་དམ་ཡེ་དབྱེར་མེད་དྲན་རྫོགས་གསལ༔ ལུས་དང་ལོངས་སྤྱོད་དགེ་བའི་རྩ་བར་བཅས༔ གླིང་བཞིའི་དགེ་ཀུན་གཅིག་བསྡུས་མཎྜལ་འབུལ༔ གུ་རུ་དེ་བ་ཌཀི་ནཱི་རཏྣ་མཎྜལ་ལ་པྲ་ཏིཙྪ་སྭཱ་ཧཱཿ ཚིག་གཉིས་སྔགས་བཅས་བརྒྱ་འམ་ཅི་འགྲུབ་འབུལ༔ མདུན་གྱི་ལྷ་ཚོགས་བདག་དང་བསྲུང་བྱར་ཐིམ༔ བསོད་ནམས་ཡེ་ཤེས་ཚོགས་གཉིས་འཕེལ་བར་གྱུར༔ རང་གི་སྤྱི་བོར་པདྨ་འབྱུང་གནས་ལ༔ སངས་རྒྱས་བྱང་སེམས་ཐམས་ཅད་འདུས་པར་བསམ༔ ཆ་ལུགས་པདྨ་ངོ་བོ་རྩ་བའི་བླ༔ དེ་ལ་ཕྱོགས་བཅུའི་དཀོན་མཆོག་ཐམས་ཅད་ཐིམ༔ སྐབས་འདིར་སྤྲོ་ན་གནམ་ཆོས་རང་གཞུང་གི༔ རྫོགས་ཆེན་ནམ་ནི་གཏེར་མའི་གསོལ་འདེབས་འཛུད༔ བསྡུ་ན་འདི་ཙམ་བརྗོད་པས་འཐུས་པ་ཡིན༔ ཨེ་མ་ཧོ༔ གདོད་
ནས་རྣམ་དག་སྐུ་གསུམ་ཞིང་ཁམས་ན༔ ཨོ་རྒྱན་ཆོས་སྐུ་སྣང་བ་མཐའ་ཡས་ལ༔ གསོལ་བ་འདེབས་སོ་བདག་ལ་དབང་མཆོག་བསྐུར༔ བདག་རྒྱུད་སྨིན་ཅིང་གྲོལ་བར་བྱིན་གྱིས་རློབས༔ ཡི་དམ་འཕགས་པ་འཇིག་རྟེན་དབང་ཕྱུག་ལ༔ གསོལ་བ་འདེབས་སོ་བདག་ལ་དབང་བཞི་བསྐུར༔ ཕུང་པོ་ལྔ་པོ་རིགས་ལྔར་གནས་འགྱུར་ནས༔ འབྲེལ་ཚད་དོན་དང་ལྡན་པར་བྱིན་གྱིས་རློབས༔ འཕགས་བཞི་བསྐྱེད་ཡུམ་རྡོ་རྗེ་རྣལ་འབྱོར་མ༔ གསོལ་བ་འདེབས་སོ་རིག་པའི་རྩལ་དབང་བསྐུར༔ རང་རིག་ཆོས་སྐུ་མངོན་དུ་རྟོགས་ནས་ཀྱང་༔ ཚེ་གཅིག་སངས་རྒྱས་འགྲུབ་པར་བྱིན་གྱིས་རློབས༔ ཡུམ་མཆོག་སྤྱན་མ་མཱ་ཀི་གོས་དཀར་སྒྲོལ༔ གསོལ་བ་འདེབས་སོ་བདག་ལ་དབང་བསྐུར་སྩོལ༔ ལུས་ཀྱི་ཤ་ཁྲག་དྲོད་དབུགས་ཁམས་གཞི་དག༔ ནད་མེད་བདེ་སྟོང་འབར་བར་བྱིན་གྱིས་རློབས༔ རྡོ་རྗེ་རིན་ཆེན་པདྨ་ལས་མཁའ་འགྲོ༔ གསོལ་བ་འདེབས་སོ་ཡེ་ཤེས་དབང་བསྐུར་སྩོལ༔ དགའ་བཞིའི་ཡེ་ཤེས་རྒྱུད་ལ་སྐྱེ་བ་དང་༔ ཕྲིན་ལས་རྣམ་བཞི་འགྲུབ་པར་བྱིན་གྱིས་རློབས༔ གཟུགས་སྒྲ་དྲི་རོ་རེག་བྱའི་ལྷ་མོ་ལྔ༔ གསོལ་བ་
འདེབས་སོ་རབ་འབྱམས་དབང་བསྐུར་སྩོལ༔ ཚོགས་དྲུག་ཉམས་སྣང་བདེ་བ་འབར་བ་དང་༔ དག་པ་རབ་འབྱམས་འཆར་བར་བྱིན་གྱིས་རློབས༔ དེ་ལྟར་གསོལ་བ་རྩེ་གཅིག་བཏབ་པ་ཡིས༔ མཐར་ནི་དེ་རྣམས་རང་ལ་ཐིམ་པར་གྱུར༔ ༈ རང་སེམས་ཡེ་ནས་ཡེ་ཤེས་སེམས༔ རང་ལུས་ཡེ་ནས་དཀྱིལ་འཁོར་ལྷ༔ ཡིན་ལ་ཡིན་པའི་ངེས་ཤེས་ཀྱིས༔ རང་ཉིད་ཐུགས་ཆེན་སྐུ་མདོག་དམར༔ ཞལ་གཅིག་ཕྱག་བཞི་དང་པོ་གཉིས་ཐལ་སྦྱར་འོག་གཉིས་ཕྲེང་བ་པད༔ ལོངས་སྐུའི་ཆས་རྫོགས་སྐྱིལ་ཀྲུང་བཞུགས༔ སྐུ་ལས་རྡོ་རྗེ་ཕག་མོ་འཁྲིལ་གྲི་ཐོད་འཁྱུད་སྟོབས་ཕག་ཞལ་ངུར༔ དབུ་རྒྱན་འོད་དཔག་མེད་མགོན་བསྐྱེད༔ དཔྲལ་བ་མགྲིན་པ་སྙིང་ག་དང་༔ ལྟེ་བ་རྣམས་སུ་འདི་ལྟར་བསྐྱེད༔ སངས་རྒྱས་སྤྱན་མ་གོས་དཀར་མོ༔ མཱ་མ་ཀཱི་དང་སྒྲོལ་མའོ༔ འཁོར་ལོ་པད་དཀར་རིན་ཆེན་སྔོ༔ ཨུཏྤལ་གཡས་འོག་ཕྱག་གིས་འཛིན༔ རྡོ་རྗེའི་སྐྱིལ་ཀྲུང་པད་ཟླར་བཞུགས༔ རྡོ་རྗེ་མཁའ་འགྲོ་དཔྲལ་བའི་ནང་༔ པདྨ་མཁའ་འགྲོ་རྐན་ཕུག་གོ༔ ལྟེ་བར་རིན་ཆེན་མཁའ་འགྲོ་བསམ༔ ལས་ཀྱི་མཁའ་འགྲོ་གསང་བར་བསྒོམ༔ མཐིང་
དམར་སེར་དང་ལྗང་བའི་མདོག༔ རྡོ་རྗེ་པདྨ་ནོར་བུ་དང་༔ རལ་གྲི་གཡས་འོག་ཕྱག་གིས་འཛིན༔ མིག་སྙན་སྣ་ལྕེ་ལུས་རྣམས་སུ༔ གཟུགས་སྒྲ་དྲི་རོ་རེག་བྱ་ཡི༔ ལྷ་མོ་ལྔ་པོ་བསམ་པའོ༔ དཀར་སྔོ་དམར་སེར་ལྗང་བའི་མདོག༔ མེ་ལོང་གླིང་བུ་སྤོས་སྣོད་དང་༔ ཟངས་གཞོང་ན་བཟའ་གཡས་འོག་འཛིན༔ ལྷ་མོ་དེ་རྣམས་པད་ཟླའི་སྟེང་༔ གཡས་བརྐྱང་གཡོན་བསྐུམ་འདོར་སྟབས་བཞེངས༔ ཀུན་ཀྱང་ཞལ་གཅིག་ཕྱག་བཞི་མ༔ དང་པོས་ཐུགས་ཀར་ཐལ་མོ་སྦྱར༔ གཡོན་འོག་པདྨ་དམར་པོ་འཛིན༔ ཡུམ་བཞི་མཆོད་པའི་ལྷ་མོ་རྣམས༔ ཞི་འཛུམ་དར་དང་རིན་ཆེན་བརྒྱན༔ མཁའ་འགྲོ་བཞི་པོ་ཅུང་ཞིག་ཁྲོས༔ སྤྱན་གསུམ་གཅེར་བུ་རུས་པས་བརྒྱན༔ གྲུ་མོར་ཁ་ཊོ་གྱེན་དུ་བསྒྲེངས༔ ཀུན་ཀྱང་དབུ་རྒྱན་ཐོར་ཚུགས་ཅན༔ ཀུན་གྱི་ཐུགས་ཀར་པད་ཟླའི་སྟེང་༔ རིགས་བདག་ཕག་མོའི་ཐུགས་ཀར་ཧྲཱིཿ༔ ལཾ་པཾ་མཾ་ཏཾ་ཡུམ་བཞིའི་ཐུགས༔ ཧ་རི་ནི་ས་མཁའ་འགྲོ་བཞི༔ མཆོད་ལྷ་ལྔ་ཀར་པཾ་ཡིག་རེ༔ གཙོ་བོའི་ཐུགས་ཀར་པདྨ་དང་༔ ཉི་ཟླའི་གདན་ལ་ཧྲཱིཿཡིག་མཐར༔ ཡི་གེ་དྲུག་པ་གཡས་སུ་འཁོར༔ དེ་ལས་འོད་
ཟེར་ཕྱོགས་བཅུར་འཕྲོས༔ ཞིང་ཁམས་རྒྱ་མཚོར་བཞུགས་པ་ཡི༔ རྒྱལ་བ་སྲས་བཅས་ཐམས་ཅད་མཆོད༔ ཀུན་ཀྱང་ཐུགས་རྗེ་ཆེན་པོར་གྱུར༔ ཆར་བཞིན་བྱོན་ནས་བདག་ལ་ཐིམ༔ ཧཱུྃ༔ ཐུགས་རྗེ་ཆེན་པོའི་ལྷ་ཚོགས་མ་ལུས་རྣམས༔ གནས་འདིར་སྤྱན་འདྲེན་བྱིན་ཆེན་དབབ་ཏུ་གསོལ༔ སྐལ་ལྡན་དད་ལྡན་བདག་ལ་དབང་མཆོག་བསྐུར་ལོག་འདྲེན་ཚེ་ཡི་བར་ཆད་བསལ་དུ་གསོལ༔ ཨོཾ་མ་ཧཱ་ཀཱ་རུ་ཎི་ཀ༔ བཛྲ་ཨཱ་བེ་ཤ་ཡ་ཨ་ཨཱཿ ཛཧཱུྃ་བཾ་ཧོ༔ ཏིཥྛ་ལྷན༔ སྤྱི་བོར་རིགས་བདག་འོད་ཟེར་གྱིས༔ ཕྱི་སྣོད་འཇིག་རྟེན་གཞལ་ཡས་ཁང་༔ ནང་བཅུད་སེམས་ཅན་ཡི་དམ་ལྷ༔ སྒྲ་རྣམས་ཐམས་ཅད་ཡིག་དྲུག་སྒྲ༔ དྲན་རྟོག་རང་གྲོལ་ཆོས་ཀྱི་སྐུ༔ འཁོར་བ་དོང་ནས་སྤྲུགས་པར་གྱུར༔ ལུས་ལྷ་མཆོད་པའི་ལྷ་མོ་ལྔས༔ སྔགས་གཟུགས་སྐུ་ལས་འོད་འཕྲོས་པས༔ གཟུགས་ཀུན་གཟུགས་ཀྱི་རྡོ་རྗེ་མར༔ གྱུར་ནས་རྒྱལ་ཀུན་སྤྱན་ལ་མཆོད༔ སྣང་སྟོང་སྐུ་ཡི་ཐུགས་དམ་བསྐང་༔ སྒྲ་ཀུན་སྒྲ་ཡི་རྡོ་རྗེ་མར༔ གྱུར་ནས་རྒྱལ་ཀུན་སྙན་ལ་མཆོད༔ གྲག་སྟོང་སྙན་གྱི་ཐུགས་དམ་བསྐང་༔ དྲི་ཀུན་དྲི་ཡི་རྡོ་རྗེ་མར༔ གྱུར་ནས་རྒྱལ་
ཀུན་ཤངས་ལ་མཆོད༔ ཚོར་སྟོང་ཐུགས་དམ་བསྐང་གྱུར་ཅིག༔ རོ་ཀུན་རོ་ཡི་རྡོ་རྗེ་མར༔ གྱུར་ནས་རྒྱལ་ཀུན་ལྗགས་ལ་མཆོད༔ མྱང་སྟོང་ཐུགས་དམ་བསྐང་གྱུར་ཅིག༔ རེག་ཀུན་རེག་གི་རྡོ་རྗེ་མར་གྱུར་ནས་རྒྱལ་ཀུན་སྐུ་ལ་མཆོད༔ རེག་སྟོང་ཐུགས་དམ་བསྐང་གྱུར་ཅིག༔ ལྷ་མོ་སྤྱན་སོགས་གནས་ལྔར་ཐིམ༔ ཟག་མེད་བདེ་བས་ཐུགས་དམ་བསྐང་༔ མཆོག་ཏུ་མི་འགྱུར་བདེ་ཆེན་པོ༔ ད་ལྟ་ཉིད་དུ་ཐོབ་པ་དང་༔ མངོན་ཤེས་དྲུག་ལྡན་དངོས་གྲུབ་སྩོལ༔ ཨོཾ་མ་ཧཱ་ཀཱ་རུ་ཎི་ཀ་པཉྩཔཱུ་ཛ་ཧོ༔ ཡོན་ཆབ་དང་ནི་མེ་ཏོག་དང་༔ བདུག་སྤོས་མར་མེ་དྲི་ཆབ་དང་༔ ཞལ་ཟས་སིལ་སྙན་སྣ་ཚོགས་དང་༔ གཟུགས་སྒྲ་དྲི་རོ་རེག་བྱ་དང་༔ བདེ་བའི་མཆོད་པ་འདི་རྣམས་ནི༔ བདག་ཅག་མོས་པས་འབུལ་ལགས་སོ༔ བཞེས་ཤིག་བདེ་བ་ཆེན་པོར་བཞེས༔ སངས་རྒྱས་པདྨ་རབ་དགྱེས་དང་༔ འཕགས་པ་སྤྱན་རས་གཟིགས་ལ་འབུལ༔ མཁའ་འགྲོ་མ་ལུས་གསུང་གཅིག་ཏུ༔ མགོན་པོ་གསུམ་པོའི་སྙན་ཐད་དུ༔ ཕྱག་གཉིས་ཐལ་མོ་རབ་སྦྱར་ཏེ༔ བཏུད་ནས་བསྟོད་པ་ཆེར་མཛད་པ༔ ཁྱོད་ནི་སྐུ་མཆོག་རྣམ་པར་སྣང་མཛད་
ཡིན༔ པདྨ་བསྣམས་པས་པདྨའི་རིགས་སུ་འཁྲུངས༔ ཐལ་མོ་སྦྱར་བས་རྡོ་རྗེའི་རིགས་རྒྱུད་འཛིན༔ རྒྱན་གྱིས་བརྒྱན་པས་རིན་ཆེན་རིགས་སུ་མཛེས༔ ཕྲེང་བ་བསྣམས་པས་ལས་ཀྱི་རིག་པ་འཛིན༔ རིགས་ལྔས་ཁྱོད་སྤྲུལ་འགྲོ་དོན་གྱིས་ཤིག་ཅེས༔ མཚན་ཙམ་ཐོས་པས་སྡུག་བསྔལ་ཐམས་ཅད་འདྲེན༔ ཡིད་ལ་བསམས་པས་ཐ་མལ་རྟོག་པ་འགགས༔ རྣམ་རྟོག་དྲན་པས་ཆོས་ཀྱི་ཕུང་པོ་འདུས༔ ཡང་ཡང་བརྗོད་པས་བདུད་ཀྱི་བར་ཆད་ཞི༔ པདྨའི་གདན་ནི་རྡུལ་བྲལ་དྲི་མ་མེད༔ ཉི་མའི་གདན་ནི་ཐུགས་རྗེས་ཀུན་ལ་ཁྱབ༔ ཟླ་བའི་གདན་ནི་དྲི་མ་ཐམས་ཅད་དག༔ སྐུ་ཡི་མདོག་ནི་ཤེལ་སྒོང་ཕྱིས་པ་འདྲ༔ རིན་ཆེན་རིགས་མི་འདྲ་བས་སྐུ་ལ་བརྒྱན༔ ཚད་མེད་བཞི་ཡིས་འཁོར་བ་མ་སྟོང་བར༔ འགྲོ་བའི་དོན་ལས་ཡུད་ཙམ་མཉམ་མི་བཞག༔ པདྨའི་རིགས་སུ་ཁྱོད་ཀྱིས་ཞལ་བཞེས་ན༔ ཁྱོད་འདྲའི་བྱང་ཆུབ་སེམས་དཔའ་གཞན་ན་མེད༔ རབ་ཏུ་གུས་པས་ཕྱག་འཚལ་གསོལ་བ་འདེབས༔ ཐུགས་རྗེ་ཆེན་པོས་བྱིན་གྱིས་བརླབ་ཏུ་གསོལ༔ འགྲོ་བའི་མགོན་པོས་བྱིན་གྱིས་བརླབ་ཏུ་གསོལ༔ རང་དང་རིགས་བདག་ལུས་ལྷའི་ཚོགས༔
ཀུན་གྱི་ཞལ་ནས་སྔགས་གསུང་བཞིན༔ འོད་ཟེར་ཕྱོགས་བཅུར་འཕྲོས་པ་ཡིས༔ སངས་རྒྱས་བྱང་སེམས་ཌཱ་ཀིའི་ཚོགས་ཐམས་ཅད་འགྲོ་བའི་དོན་ལ་བསྐུལ༔ འགྲོ་དྲུག་ཀུན་གྱི་སེམས་རྒྱུད་ལ༔ ཤེས་རབ་སྒོ་བྱེ་ཡེ་ཤེས་འབར༔ འོད་ཟེར་རྩེ་ལ་འདོད་ཡོན་ཆར༔ བབས་པས་འགྲོ་བའི་རེ་འདོད་བསྐང་༔ སྡུག་བསྔལ་ཀུན་བྲལ་བདེ་བ་ཐོབ༔ ཀུན་ཀྱང་ཐུགས་རྗེ་ཆེན་པོར་གྱུར༔ ཀུན་གྱིས་སྔགས་སྒྲ་འུར་འུར་སྒྲོགས༔ ཨོཾ་མ་ཎི་པདྨེ་ཧཱུྃ༔ ཞེས་པའི་སྔགས་དེ་བརྗོད་པས་འགྲུབ༔ ཐེབ་གཅིག་མོས་པས་བརྗོད་པ་ན་སེམས་ཅན་དམྱལ་བའི་ནད་ལས་ཐར༔ ཐེབ་གཉིས་བརྗོད་པའི་ཡི་དྭགས་ཀྱི་༔ འགྲོ་བའི་སྒོ་ཡང་འགགས་པར་འགྱུར༔ གསུམ་བརྗོད་དུད་འགྲོའི་འགྲོ་བ་འགགས༔ འདོད་པའི་ཡོན་ཏན་ལྔ་སྤྱད་ཀྱང་༔ འདི་དང་མི་འབྲལ་གཙང་མར་གནས༔ ཟས་དང་གོས་དང་བཏུང་ན་ཡང་༔ འདི་དག་དྲན་པས་ཉེས་པ་མེད༔ འབྲས་ཀྱི་ཕུབ་མའི་གསེབ་ནས་ནི༔ སྙིང་པོ་འབྲས་བུ་ལེན་པ་ཡིན༔ དཔག་བསམ་ཤིང་གི་སྡོང་པོ་ལས༔ མེ་ཏོག་ལེན་པ་ལྟ་བུ་ཡིན༔ ལྷ་དང་ཀླུ་དང་གནོད་སྦྱིན་དང་༔ དྲི་ཟ་མེ་ལྷ་གཤིན་རྗེ་དང་༔ ཚངས་པ་བརྒྱ་བྱིན་གྲུལ་བུམ་དང་༔ ཕྱི་དང་ནང་གི་འཚེ་བ་ཀུན༔ སྔགས་ཀྱི་རྒྱལ་པོ་བགྲང་བས་ཞི༔ སེམས་ལ་ཡེ་ཤེས་ཆེན་པོ་སྐྱེ༔ སྣང་ལ་རང་བཞིན་མེད་པར་མཐོང་༔ གསལ་
ལ་མི་རྟོག་འོད་གསལ་ལོ༔ ཐམས་ཅད་སྤྲོས་པ་མེད་པར་རྟོགས༔ བདེ་དང་སྟོང་པ་གཅིག་ཏུ་སྣང་༔ འབྲས་བུ་ཞེས་བྱ་ཟུང་འཇུག་ཡིན༔ རྗེས་ཀྱི་བསྔོ་བ་སྨོན་ལམ་ནི༔ གནམ་ཆོས་གཞུང་གི་བསྔོ་སྨོན་བྱ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ རྒྱ་རྒྱ༔ ༔ རྒྱལ་བ་རྒྱ་མཚོ་ལུས་དཀྱིལ་འདོན་འགྲིགས་འདི༔ ཆོས་བདག་ལས་ཅན་ཀུན་བཟང་ཤེས་རབ་ཀྱིས་གསེར་གྱི་མཎྜལ་དང་བཅས་བསྐུལ་བའི་ཕྱིར༔ པདྨ་རྒྱལ་པོའི་རྒྱུད་དང་ཟབ་པའི་རྒྱུད༔ གྲུབ་ཆེན་ཛ་ལེན་དྷ་རའི་རྒྱ་གཞུང་དང་༔ རང་བྱུང་རྡོ་རྗེས་མཛད་སོགས་བོད་གཞུང་དང་༔ བླ་མའི་གསུང་དང་རང་གི་ཉམས་མྱོང་ཀུན༔ ལྷ་འདི་ཆོས་འདི་རྩེ་གཅིག་ཉམས་ལེན་པ༔ གཏེར་བློན་རཱ་ག་ཨ་སྱ་ཞེས་བྱས་བསྒྲིགས༔ སོ་སྐྱེའི་དབང་གིས་ནོངས་པར་གྱུར་སྲིད་ན༔ རྩ་གསུམ་ཆོས་བདག་སྲུང་མའི་ཚོགས་ལ་བཤགས༔ དགེ་བས་འདི་ལ་འབྲེལ་པ་ཐོགས་ཚད་ཀུན༔ འཕོས་མ་ཐག་ཏུ་བདེ་ཆེན་ཞིང་སྐྱེས་ནས༔ འོད་དཔག་མེད་དང་ནམ་ཡང་འབྲལ་མེད་ཤོག༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།