རྟ་མགྲིན་ཡང་ཕྱུང་ནག་པོའི་སྔོན་འགྲོ་སྐྱབས་སེམས་དང་དཀར་བགེགས།
རྟ་མགྲིན་ཡང་ཕྱུང་ནག་པོའི་སྔོན་འགྲོ་སྐྱབས་སེམས་དང་དཀར་བགེགས་ཀྱི་དབུ་ཕྱོགས༔
སྔོན་འགྲོ་སྐྱབས་སེམས་བླ་མའི་རྣལ་འབྱོར་དཀར་བགེགས་མཆོད་པ་བྱིན་རླབས་རྣམས་ཆ་ཚང་ཞིང་རྒྱས་བསྡུས་འཚམས་པ་གཏེར་གཞུང་རྣམས་ནས་བསྡུས་པ་ཁུངས་བཙུན་པ་ཡོད་། ཕྱི་རབས་སྔགས་ཆུང་གསར་བུ་རྣམས་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག༔ སྐྱབས་འགྲོ་ནི། ན་མོ་ཕྱོགས་བཅུའི་སངས་རྒྱས་བྱང་ཆུབ་སེམས། །བླ་མ་ཡི་དམ་མཁའ་འགྲོ་དགོངས། །རྐང་གཉིས་གཙོ་བོ་སངས་རྒྱས་དང་། །ཞི་བ་ཆགས་བྲལ་དམ་པའི་ཆོས། །ཚོགས་མཆོག་ཕྱིར་མི་ལྡོག་པ་ལ། །བདག་སོགས་འགྲོ་ཀུན་སྐྱབས་སུ་མཆི། །བྱིན་རླབས་འབྱུང་བའི་བླ་མ་རྗེ། །དངོས་གྲུབ་འབྱུང་བའི་ཡི་དམ་ལྷ། །བར་ཆད་སེལ་བའི་མཁའ་
འགྲོ་ལ། །བདག་སོགས་འགྲོ་ཀུན་སྐྱབས་སུ་མཆི། །གདལ་ཁྱབ་ཆེན་པོ་ཆོས་ཀྱི་སྐུ། །གསལ་མདངས་ཆེན་པོ་ལོངས་སྤྱོད་རྫོགས། །སྣ་ཚོགས་འཛིན་གྲོལ་སྤྲུལ་པའི་སྐུ། །བདག་སོགས་འགྲོ་ཀུན་སྐྱབས་སུ་གསོལ། །ལན་གསུམ། བཅོམ་ལྡན་འདས་པདྨ་དབང་གི་རྒྱལ་པོ་ལ་སྐྱབས་སུ་མཆིའོ། །གུ་རུ་སྐུ་ལྔ་མཚན་བརྒྱད་ལ་སྐྱབས་སུ་མཆིའོ། །རིག་འཛིན་བརྒྱུད་པའི་བླ་མ་རྣམས་ལ་སྐྱབས་སུ་མཆིའོ། སྐྱབས་འོག་དམ་པ་ལ་ཚུད་པར་མཛད་དུ་གསོལ། སེམས་བསྐྱེད་ནི། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །
སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སེམས་ཅན་ཐམས་ཅད་སྡུག་བསྔལ་མེད་པའི་བདེ་བ་དམ་པ་དང་མི་འབྲལ་བར་གྱུར་ཅིག །སེམས་ཅན་ཐམས་ཅད་ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ཆེན་པོ་ལ་ཡུན་རིང་དུ་གནས་པར་གྱུར་ཅིག །བླ་མའི་རྣལ་འབྱོར། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བླ་མ་ཡི་དམ་གྱི་སྒོམ་བཟླས་ལ་འཇུག་པར་བྱའོ། །ཨོཾ་སྭ་བྷཱ་ཝ་ཤུདྡྷསརྦ་དྷརཿསྭ་བྷཱ་ཝ་ཤུདྡྷོཉཧཾ། སྟོང་པ་ཉིད་དུ་གྱུར། སྟོང་པའི་ངང་ལས་རང་གི་སྤྱི་བོར་པཾ་ལས་པདྨ་དང་ཨ་ལས་ཟླ་བ་རཾ་ལས་ཉི་མའི་དཀྱིལ་འཁོར་གྱི་སྟེང་དུ་རང་གི་རྩ་བའི་བླ་མ་དང་གཉིས་སུ་མེད་པའི་རིགས་ཀྱི་བདག་པོ་སྣང་བ་མཐའ་ཡས་སྐུ་མདོག་དམར་པོ་ཞལ་གཅིག་ཕྱག་གཉིས་མཉམ་བཞག་གི་ཕྱག་རྒྱ་ཅན་འཆི་མེད་བདུད་རྩིས་གང་བའི་ལྷུང་བཟེད་འཛིན་པ། མཚན་དང་དཔེ་བྱད་ཀྱིས་བརྒྱན་ཅིང་ཆོས་གོས་གསུམ་གྱིས་བཀླུབས་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་
ནས་དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དཔའ་བོ་མཁའ་འགྲོའི་ཚོགས་དང་བཅས་པ་སྤྱན་དྲངས། བཛྲ་ས་མ་ཡ་ཛཿ སྤྱི་བོའི་བླ་མ་ལ་ཐིམ་པས་གཉིས་སུ་མེད་པར་གྱུར། ཨོཾ་ཨཱཿཧཱུཾ་དཔལ་ལྡན་རྩ་བའི་བླ་མ་ལ་གསོལ་བ་འདེབས་སོ། །བླ་མ་སངས་རྒྱས་རིན་པོ་ཆེ་ལ་གསོལ་བ་འདེབས་སོ། །བླ་མ་སངས་རྒྱས་ཆོས་ཀྱི་སྐུ་ལ་གསོལ་བ་འདེབས་སོ། །བླ་མ་ལོངས་སྤྱོད་རྫོགས་པའི་སྐུ་ལ་གསོལ་བ་འདེབས་སོ། །བླ་མ་སངས་རྒྱས་སྤྲུལ་པའི་སྐུ་ལ་གསོལ་བ་འདེབས་སོ། །ཆོས་སྐུ་སྣང་བ་མཐའ་ཡས་ལ་གསོལ་བ་འདེབས་སོ། །ལོངས་སྐུ་ཐུགས་རྗེ་ཆེན་པོ་ལ་གསོལ་བ་འདེབས་སོ། །སྤྲུལ་སྐུ་པདྨ་འབྱུང་གནས་ལ་གསོལ་བ་འདེབས་སོ། །མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས་སོ། །རྗེ་འབངས་ཉི་ཤུ་རྩ་ལྔ་ལ་གསོལ་བ་འདེབས་སོ། །གཏེར་སྟོན་བརྒྱ་དང་རྩ་བརྒྱད་ལ་གསོལ་བ་འདེབས་སོ། །བཀའ་བབས་རིག་འཛིན་བརྒྱུད་པ་ལ་གསོལ་བ་འདེབས་སོ། །བདག་ནི་བྱང་ཆུབ་སྙིང་པོའི་བར། །བླ་མ་དཀོན་མཆོག་ཡི་དམ་ལྷ། །པདྨ་
དབང་ཆེན་དཀྱིལ་འཁོར་ལ། །སྐྱབས་སུ་མཆིའོ་ཐུགས་རྗེས་ཟུངས། །སེམས་ཅན་མ་ལུས་ཐམས་ཅད་ཀུན། །སངས་རྒྱས་ས་ལ་འགོད་བྱའི་ཕྱིར། །རྟ་མགྲིན་དབང་གི་དཀྱིལ་འཁོར་དུ། །བདག་ཅག་འཇུག་ཅིང་བསྒྲུབ་པར་བགྱི། །ཕྱོགས་བཅུ་དུས་གསུམ་བཞུགས་པའི་ལྷ། །བླ་མ་ཡི་དམ་དཀྱིལ་འཁོར་ལྷ་ཚོགས་དང་། །དཔའ་བོ་མཁའ་འགྲོར་སྐྱབས་སུ་མཆི། །ལུས་ངག་ཡིད་གསུམ་གུས་ཕྱག་འཚལ། །ཕྱི་ནང་གསང་གསུམ་མཆོད་པ་འབུལ། །སྡིག་པའི་ཚོགས་རྣམས་མཐོལ་ལོ་བཤགས། །རང་གཞན་དགེ་ལ་རྗེས་ཡི་རང་། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བཞུགས་སུ་གསོལ། །དགེ་བ་བྱང་ཆུབ་ཆེན་པོར་བསྔོ། །དེ་ལྟར་གསོལ་བ་བཏབ་པས། བླ་མ་དེ་ཉིད་འོད་དུ་ཞུ། །རང་གི་སྤྱི་བོར་ཐིམ་པས་བླ་མའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་དུ་འདྲེས། སེམས་མ་བཅོས་གཉུག་མའི་ངང་ལས། རང་ཉིད་སྐད་ཅིག་གིས་སྤྱན་རས་གཟིགས་སྐུ་མདོག་དཀར་པོ་ཞལ་གཅིག་ཕྱག་གཉིས། གཡས་མཆོག་སྦྱིན། གཡོན་པདྨ་བསྣམས་པ། དར་དང་རིན་པོ་ཆེས་བརྒྱན་ཅིང་པད་ཟླར་ཕྱེད་སྐྱིལ་གྱིས་བཞུགས་པར་གྱུར། ཨོཾ་མ་ཎི་པདྨེ་ཧཱུྃ། ཨོཾ་སྭ་
བྷཱ་ཝ་ཤུདྡྷསརྦ་དྷརྨཱསྭ་བྷཱ་ཝ་ཤུདྡྷོཉཧཾ། སྟོང་པའི་ངང་ལས་ཧཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུཾ་འོད་དུ་ཞུ་བ་ལས་བྱུང་བའི་མཆོད་སྦྱིན་གྱི་གཏོར་མ་འདོད་པའི་ཡོན་ཏན་ལྔ་དང་ལྡན་པར་གྱུར། ཨོཾ་ཨཱཧཱུཾ། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུཾ། བཅོམ་ལྡན་འདས་དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་སྐུ་འབྱམས་ཀླས་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་འཇིགས་པ་ཐམས་ཅད་ཡོངས་སུ་བྲལ་བ་ལ་ཕྱག་འཚལ་ལོ། །མཆོད་སྦྱིན་གྱི་གཏོར་མ་འདོད་པའི་ཡོན་ཏན་ལྔ་དང་ལྡན་པ་འདི་བསྔོ་ཞིང་འབུལ་བའི་གནས་སུ་གྱུར་པ་ནི། ས་བདག་ས་ཡི་ལྷ་མོ་བརྟན་མས་གཙོར་བྱས་པའི་འཛམ་བུ་གླིང་གི་གཞི་བདག །བོད་ཁམས་སྐྱོང་བའི་སྐྱོང་མ། འཛམ་གླིང་བརྟན་མ་བཅུ་གཉིས། བོད་ཀྱི་མགུར་ལྷ་བཅུ་གསུམ་ལ་སོགས་པ། ཡུལ་འདི་རྣམས་ལ་གནས་པའི་གཞི་བདག །ས་བདག །ཡུལ་བདག །གནས་བདག །དཀོར་
བདག་གཉུག་མར་གནས་པ་ཐམས་ཅད་དང་། སངས་རྒྱས་ཀྱི་བསྟན་པ་སྲུང་བར་ཞལ་གྱིས་བཞེས་པའི་གཞི་བདག་རྣམས་ལ་འབུལ་ལོ། །རྣལ་འབྱོར་པ་བདག་གིས་སྲུང་ཟློག་གི་བྱ་བ་མཐར་མ་ཕྱིན་གྱི་བར་དུ་རྐྱེན་ཕྱི་ནང་བར་ཆད་ཐམས་ཅད་ཉེ་བར་ཞི་བའི་ཕྲིན་ལས་དམ་པ་མཛད་དུ་གསོལ། ཨོཾ་ད་ཤ་དིཀ་ལོ་ཀ་པ་ལ་བྷུ་མི་པ་ཏི་ས་པ་རི་ཝཱ་ར་ཨི་དཾ་བ་ལིང་ཏ་ཁ་ཁ་ཁཱ་ཧི་ཁཱ་ཧི། ལན་གསུམ། ཧཱུྃ། སྔོན་གྱི་བསྐལ་པའི་དང་པོ་ལ། །སློབ་དཔོན་པདྨ་འབྱུང་གནས་ཀྱིས། །བཀའ་དང་དམ་ལ་བཏགས་པ་ཡི། །འཇིག་རྟེན་ཆོས་སྐྱོང་དམ་ཚིག་ཅན། །ཚངས་པ་དང་ནི་བརྒྱ་བྱིན་དང་། །རྒྱལ་ཆེན་བཞི་དང་ཕྱོགས་སྐྱོང་བཅུ། །ལྷ་ཆེན་བརྒྱད་དང་ཀླུ་ཆེན་བརྒྱད། །གཟའ་ཆེན་བརྒྱད་དང་གནོད་སྦྱིན་བརྒྱད། །བོད་ཁམས་སྐྱོང་བའི་བརྟན་མ་དང་། །མ་མོ་འབྱུང་པོ་ཤ་ཟ་དང་། །སྲིན་པོ་ཡི་དྭགས་སྨྱོ་བྱེད་དང་། །ཡུལ་ཕྱོགས་འདི་ལ་གནས་པ་ཡི། །གཞི་བདག་ཚོགས་རྣམས་ཐམས་ཅད་དང་། །ས་བདག་ཡུལ་བདག་གྲོང་བདག་དང་། །དཀོར་བདག་གཉུག་མར་གནས་པ་རྣམས། །ལྷ་སྲིན་སྡེ་བརྒྱད་ཚོགས་དང་བཅས། །འདིར་གཤེགས་བདག་ལ་
དགོངས་སུ་གསོལ། །མཆོད་སྦྱིན་གཏོར་མ་འདི་བཞེས་ལ། །སྔོན་གྱི་བཀའ་ལས་མ་འདའ་བར། །རྣལ་འབྱོར་བདག་ཅག་འཁོར་བཅས་ཀྱི། །ནད་སོགས་མི་མཐུན་ཞི་བ་དང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ལོག་ལྟ་དབང་དུ་སྡུད་པ་དང་། །མངོན་སྤྱོད་མི་མཐུན་འཇོམས་པ་དང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །མཐུ་རྩལ་ཅན་གྱིས་སྡོང་གྲོགས་མཛོད། །དུས་མིན་འཆི་བའི་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་བ། །བདེ་ལེགས་ཕུན་སུམ་ཚོགས་པ་ཡི། །ཡིད་ལ་འདོད་པ་ཀུན་འགྲུབ་ཅིང་། །བཅོལ་བའི་ཕྲིན་ལས་འགྲུབ་པར་མཛོད། །ཅེས་དཀར་གཏོར་ཕྱི་རོལ་གཙང་སར་འབུལ། གཏོ་དུས་ཡིན་ན་བགེགས་གཏོར་སྟེང་དུ་ཁྲུས་བྱས་མ་བྱས་ཀྱང་རུང་ཆུས་བྲན་ལ། ཨོཾ་བཛྲ་ཀྲོ་དྷ་ཧྱ་གཱི་ཝ་ཧུ་ལུ་ཧུ་ལུ་ཧཱུྃ་ཕཊ། སྐད་ཅིག་གིས་སྤྱན་རས་གཟིགས་གནས་འགྱུར་ནས། རང་ཉིད་རྟ་མགྲིན་ལྗང་གུ་
གྲི་གུག་ཐོད་ཁྲག་འཛིན་པ། དུར་ཁྲོད་ཆས་བརྒྱད་ཀྱིས་བརྒྱན་ཅིང་མེ་དཔུང་གི་ཀློང་ན་བཞུགས་པ། སྤྱི་གཙུག་ནས་རྟ་སྐད་འཚེར་བས་བགེགས་རྣམས་དབང་དུ་སྡུད་པའི་སྐུར་གྱུར། ༈ ན་མོ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། །དགེ་འདུན་གྱི་བཀའ་བདེན་པ་དང་། སློབ་དཔོན་པདྨ་འབྱུང་གནས་ཀྱི་བཀའ་བདེན་པ་དང་། ཡི་དམ་ཞི་ཁྲོའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་། བཀའ་སྡོད་དམ་པ་ཆོས་སྐྱོང་སྲུང་མ་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུ་དང་བྱིན་རླབས་ལ་བརྟེན་ནས་བགེགས་ཀྱི་རྒྱལ་པོ་བི་ན་ཡ་ཀས་གཙོར་བྱས་པའི་བགེགས་རིགས་སྟོང་ཕྲག་བརྒྱད་ཅུའི་ཚོགས་དང་བཅས་པ། ཁྱད་པར་དུ་ཡང་རྣལ་འབྱོར་པ་བདག་ཅག་ཡོན་མཆོད་ཀྱི་ལུས་ངག་ཡིད་གསུམ་ལ་གནོད་པའི་བགེགས་དང་ལོག་འདྲེན་འབྱུང་པོ་གང་ཡིན་པ་ཐམས་ཅད་ལན་ཆགས་གླུད་གཏོར་ཆེན་པོ་འདི་བཞེས་པའི་སླད་དུ་འདིར་མཆིས་པར་གྱུར་ཅིག །ཨོཾ་བཛྲ་ཨངྐུ་ཤ་ཛཿ བཛྲ་པཱ་ཤ་ཧཱུཾ།
བཛྲ་སྤོ་ཊ་པཾ། བཛྲ་གྷནྡྷེ་ཧོ༔ བཛྲ་ཨཱ་ཝེ་ཤ་ཡ་ཨཱཿ གཉིས་སུ་མེད་པར་གྱུར། ཨོཾ་སྭ་བྷ་ཝ་ཤུདྡྷསརྦ་དྷརཿསྭ་བྷ་ཝ་ཤུདྡྷོཉཧཾ། ཧཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ལན་ཆགས་གླུད་ཀྱི་གཏོར་མ་རིན་པོ་ཆེ་སྣ་ལྔ་ལས་རྒྱུ་བྱས་པ། ཁོག་སྟོད་གསེར་ལས་བྱས་པ། ཁོག་སྨད་དངུལ་ལས་བྱས་པ། རྐེད་པ་མཆོང་ལས་བྱས་པ། ལུང་ཐང་གི་མིག །མགྲོན་བུའི་སོ། བྱི་རུའི་ལྗགས། ལག་པ་གཡས་པ་གསེར་ལས་བྱས་པ། ལག་པ་གཡོན་པ་དངུལ་ལས་བྱས་པ། རྐང་པ་གཡས་པ་ལྕགས་ལས་བྱས་པ། རྐང་པ་གཡོན་པ་ཟངས་ལས་བྱས་པ། ཁ་ནས་སྙན་པའི་གླུ་ལེན་པ། ལག་ན་འདོད་པའི་ཡས་བཟུང་བ། འགྲོ་མཁན་དེ་ནི་ལྡེམ་ལྡེམ་བྱེད་པ། སྨྲ་མཁོས་དེ་ནི་ལྗགས་ལྗགས་བྱས་པ། འདོད་པའི་ཡོན་ཏན་ལྔ་དང་ལྡན་པ་འདི་བསྔོ་ཞིང་འབུལ་བའི་གནས་སུ་གྱུར་པ་ནི། བགེགས་ཀྱི་རྒྱལ་པོ་བྷི་ན་ཡ་ཀས་གཙོར་བྱས་པའི་བགེགས་རིགས་སྟོང་ཕྲག་བརྒྱད་ཅུའི་ཚོགས་དང་བཅས་པ་རྣམས་ལ་བསྔོའོ། །སྦྱིན་ནོ། །ན་མ༔ སརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ། དེ་བཞིན་གཤེགས་པ་རིན་ཆེན་མང་ལ་
ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག་འཚལ་ལོ། །དེ་བཞིན་གཤེགས་པ་སྐུ་འབྱམས་ཀླས་ལ་ཕྱག་འཚལ་ལོ། །དེ་བཞིན་གཤེགས་པ་འཇིགས་པ་ཐམས་ཅད་ཡོངས་སུ་བྲལ་བ་ལ་ཕྱག་འཚལ་ལོ། །ལན་ཆགས་གླུད་ཀྱི་གཏོར་མ་འདི་བསྔོས་པས། རྣལ་འབྱོར་པ་བདག་ཅག་ཡོན་མཆོད་འཁོར་དང་བཅས་པའི་བསད་བསད་བཅད་བཅད་སྲོག་གི་ལན་ཆགས། བརྡུངས་བརྡུངས་བཙོག་བཙོག་ན་ཚའི་ལན་ཆགས།་རྐུས་རྐྱེས་འཕྲོག་འཕྲོག་རྒྱུའི་ལན་ཆགས། མཐོ་བ་མཁར་ཕབ་པའི་ལན་ཆགས། དམའ་བ་ཡུལ་བཅོམ་པའི་ལན་ཆགས། མི་རྟ་གྲི་རུ་བསད་པ་ལ་སོགས་ལན་ཆགས་ཐམས་ཅད་བྱང་། བུ་ལོན་སོད། ཤ་འཁོན་ཐམས་ཅད་བྱང་ནས་མྱུར་དུ་རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་གོ་འཕང་ཐོབ་པར་གྱུར་ཅིག །ཧཱུྃ། ཉོན་ཅིག་མ་ལུས་བགེགས་ཀྱི་ཚོགས། །བདག་གིས་དེ་རིང་ཁྱོད་མཆོད་ཀྱི། །བདག་ཅག་རྒྱུ་སྦྱོར་ཡོན་བདག་ལ། །གནོད་པར་བྱེད་པ་གང་ཡང་རུང་། །མཆོད་སྦྱིན་གཏོར་མ་འདི་ལོངས་ལ། །བཟུང་བ་ལས་ནི་ཐར་བ་དང་། བཅིངས་བ་ལས་ནི་གྲོལ་བར་མཛོད། །རིན་དང་གླུད་དུ་འདི་
བཞེས་ལ། །སོང་ཞིག་བགེགས་ཆེན་འགྲོ་བར་གྱིས། །ཕྱིན་ཆད་འཁོར་འདིར་མ་གནོད་ཅིག །ཁྱོད་ཀྱི་སྟོབས་དང་རྩལ་མཐོང་ན། །ཁྱོད་ཀྱིས་བགེགས་བྱེད་མི་ནུས་མིན། །ཁྱོད་ནི་ལྷ་ཡི་སྤྲུལ་པ་སྟེ། །ཁྱོད་ཀྱིས་བགེགས་ཀྱང་བྱེད་པར་ནུས། །སྔོན་ཆད་མཆོད་སྦྱིན་མ་ཐོབ་ན། །དེ་རིང་བདག་གིས་ཁྱོད་མཆོད་ན། །ལན་། ཆགས་གླུད་གཏོར་འདི་བཞེས་ཤིག །ཕྱིན་ཆད་གནོད་པ་མ་བྱེད་ཅིག །ཧཱུྃ། ཤར་ཕྱོགས་བགེགས་ཀྱི་རྒྱལ་པོ་ནི། །སྟོང་གསུམ་སྟོང་གི་བདག་པོ་དང་། །ལྷོ་ཕྱོགས་བགེགས་ཀྱི་རྒྱལ་པོ་ནི། །སྤྲིན་གྱི་སྒྲོན་མེ་ཞེས་བྱ་དང་། །ནུབ་ཕྱོགས་བགེགས་ཀྱི་རྒྱལ་པོ་ནི། །རྡོ་རྗེའི་མཆུ་ཅན་ཞེས་བྱ་དང་། །བྱང་ཕྱོགས་བགེགས་ཀྱི་རྒྱལ་པོ་ནི། །བྷི་ན་ཡ་ཀ་བཞི་པོ་ལ། །འཁོར་དུ་བགེགས་ཆེན་སྟོང་གིས་བསྐོར། །སྟོང་ཕྲག་བརྒྱད་ཅུ་ཕོ་ཉར་འགྱེད། །ལན་ཆགས་གླུད་གཏོར་འདི་བཞེས་ལ། །ཕྱིན་ཆད་གནོད་པ་མ་བྱེད་ཅིག ། ལྕགས་ཀྱུ་དཀར་མོ་ཞེས་བྱ་དང་། །སྣ་ཆད་མ་དང་སོ་གཙིགས་སོགས། །ལྷ་རྣམས་ཀུན་གྱི་རྗེས་འབྲངས་ནས། །སྔགས་དང་སྒྲུབ་ལ་བར་ཆད་པའི། །རིག་པ་མཆོག་ལས་
གསུངས་པ་ཡི། །བགེགས་ཆེན་བཅུ་དྲུག་གླུད་འདི་ལོངས། །སྔགས་འཆང་བདག་ལ་མ་གནོད་ཅིག །ས་ཡི་འོག་ནས་རིག་བྱེད་པའི། །ལྷ་ཡི་ལོ་སྟོང་བསགས་པ་ཡི། །བསོད་ནམས་རླག་པར་བྱེད་པའི་བགེགས། །ལོག་པར་འདྲེན་པའི་གཙུག་ཕུད་ཁྱོད། །གླད་འདི་ལོངས་ལ་མ་འཆེ་ཞིག །མེ་ཏོག་བདུག་སྤོས་མར་མེ་ལ། །ཞུགས་ནས་ལྷ་མི་མྱོས་བྱེད་པའི། །མཆོད་པའི་བགེགས་གསུམ་གླུད་འདི་ལོངས། །མཆོད་པའི་མདངས་འཕྲོག་མ་བྱེད་ཅིག །དམ་སྲི་སྒབ་འདྲེ་ཐམས་ཅད་ཀུན། །ལན་ཆགས་གླུད་གཏོར་འདི་བཞེས་ཤིག །མ་ཉེ་མ་འཁོར་གཞན་དུ་དེངས། །རང་གི་ལུས་ལ་དཔེ་ལོངས་ལ། །གཞན་ལ་གནོད་པ་མ་བྱེད་ཅིག །སྔོན་གྱི་ལན་ཆགས་ཡོད་ན་ཡང་། །མཆོད་སྦྱིན་འདི་ཡིས་བྲལ་བར་གྱིས། །འཕྲལ་གྱི་རྐྱེན་ཁ་ཡོད་ན་ཡང་། །གླུད་གཏོར་འདི་ཡིས་ཟློག་པར་གྱིས། །དོན་མེད་གནོད་པ་བྱས་ན་ཡང་། །གླུད་གཏོར་འདི་ཡིས་བྱང་བར་མཛོད། བུ་ལོན་ལན་ཆགས་ཡོད་ན་ཡང་། །གླུད་གཏོར་འདི་ཡིས་བྱང་བར་གྱིས། །སྔོན་ཡང་ལས་ངན་སྡིག་ཆེ་བས། །ད་ལྟ་བགེགས་ཀྱི་རིགས་སུ་སྐྱེས། །བགེགས་ཆེན་ཁྱོད་ནི་ད་
སོང་ཞིག །ཧཱུཾ། རི་རབ་ཆེན་པོའི་ཤར་ཕྱོགས་ན། །ཕོ་བྲང་ཆེན་པོ་སྤོས་ངད་ལྡན། །དེ་ན་རྒྱལ་པོ་ཡུལ་འཁོར་སྲུང་། །དྲི་ཟ་མང་པོའི་གླུ་དབྱངས་་ལེན། །ངོ་མཚར་ལྟད་མོ་དེ་ན་ཆེ། །སྒྲ་སྙན་པི་ཝང་ཙི་རི་རི། །སོངས་ཤིག་བགེགས་རྣམས་དེར་སོང་ཞིག །རི་རབ་ཆེན་པོའི་ལྷོ་ཕྱོགས་ན། །ཕོ་བྲང་ཆེན་པོའི་བཻཌཱུརྱ། །དེ་ན་རྒྱལ་པོ་འཕགས་སྐྱེས་པོ། །གཤིན་རྗེ་བྱེ་བ་འབུམ་གྱིས་བསྐོར། །ཤ་ཁྲག་ལོངས་སྤྱོད་དེ་ན་རེ། །སོངས་ཤིག་བགེགས་རྣམས་དེར་སོང་ཞིག །རི་རབ་ཆེན་པོའི་ནུབ་ཕྱོགས་ན། །ཕོ་བྲང་ཆེན་པོ་རྒྱ་མཚོའི་ངོགས། །དེ་ན་རྒྱལ་པོ་སྤྱན་མི་བཟང་། །ཀླུ་རིགས་བྱེ་བ་འབུམ་གྱིས་བསྐོར། །ཟད་མེད་ཀླུ་ཡི་གཏེར་ཁ་ཡོད། །སོང་ཞིག་བགེགས་རྣམས་དེར་སོང་ཞིག །རི་རབ་ཆེན་པོའི་བྱང་ཕྱོགས་ན། །ཕོ་བྲང་ཆེན་པོ་ལྕང་ལོ་ཅན། །དེ་ན་རྒྱལ་པོ་རྣམ་ཐོས་སྲས། །ལྷ་ཀླུ་མི་ཡི་ལོངས་སྤྱོད་ལྡན། །རིན་ཆེན་གཏེར་ཁ་དེ་ན་ཡོད། །སོང་ཞིག་བགེགས་རྣམས་དེར་སོང་ཞིག །དཀོན་མཆོག་གསུམ་གྱི་བཀའ་མ་བཅག །དམ་པའི་བདེན་ཚིག་སུན་མ་ཕྱུང་། །གལ་ཏེ་བཀའ་ལས་འདའ་བྱེད་ན། །
སྙིང་ལ་ནད་སོགས་མེ་ལྟར་འབར། །མགོ་ལུས་དུམ་བུ་སྟོང་དུ་འགྱུར། །དེ་བས་མྱུར་བ་ཉིད་དུ་དེངས། ༈ །འབྱུང་པོ་མི་མིན་མི་རུ་བརྫུ་བ། ལྷ་མིན་ལྷ་རུ་བརྫུ་བ། རྣལ་འབྱོར་སྒྲུབ་པ་པོའི་ཉམས་ལེན་པ། ཐོ་འཚམས་པ། གསང་སྔགས་ཟབ་མོའི་དཀྱིལ་འཁོར་དུ་འཇུག་ཅིང་བཟླས་བརྗོད་སྒོམ་སྒྲུབ་ལ་བར་དུ་གཅོད་པའི་བགེགས་དང་ལོག་པར་འདྲེན་པ་ཐམས་ཅད་འདིར་མ་འདུག་པར་གཞན་དུ་དེངས་ཤིག །སརྦ་བིགྷཱན་གཙྪ་གཙྪ། ཨོཾ་ཨ་མྲྀ་ཏེ་ཧཱུཾ་ཕཊ། གནོད་བྱེད་འབྱུང་པོ་ཨུཙྪཏ་ཡ་ཧཱུྃ་ཕཊ། ཅེས་བགེགས་གཏོར་ཕྱི་རོལ་འབུལ། མཆོད་པ་གཏོར་མ་རྣམས་བྲན་ལ། ཨོཾ་ཨ་མྲྀ་ཏེ་ཧཱུཾ་ཕཊ། སྭ་བྷཱ་ཝ་ཤུདྡྷསརྦ་དྷརྨསྭ་བྷཱ་ཝ་ཤུདྡྷོཉཧཾ། ཀ་དག་ཀློང་ནས་སྤྲུལ་པ་ཡི། །གནམ་ས་གང་བའི་མཆོད་པའི་སྤྲིན། །སྨན་གཏོར་རཀྟ་ལྷ་མོར་བཅས། །ཟད་མེད་གྱུར་ཅིག་པཱུ་ཛ་ཧོ། །དེ་ནས་ཞི་དྲག་སོགས་ལྷ་གཞུང་རྣམས་འདོན། ཞེས་སྔགས་ཆུང་ཨོ་རྒྱན་ཕྲིན་ལས་ཀྱི་དོན་དུ་རཱ་ག་ཨ་སྱས་བསྒྲིགས་པའི་ཡི་གེ་པ་ནི་པདྨ་འགྲོ་དོན་ནོ། །སརྦ་མངྒ་ལཾ།། །།