རྟ་མགྲིན་ནག་པོའི་བསྟོད་པ་ཚིག་བར་སུམ་ཅུ།
རྟ་མགྲིན་ནག་པོའི་བསྟོད་པ་ཚིག་བར་སུམ་ཅུའི་དབུ་ཕྱོགས་ལེགས་པར་བཞུགས་སོ། །ཀྭ་ཡེ་རྟ་མཆོག་རྒྱལ་པོ་ཧེ་རུ་ཀ །ཁ་དོག་ཆར་སྤྲིན་གཏིབས་པ་ལྟ་བུའི་མདོག །ག་ཤལ་ཁྲག་འཛག་མི་མགོའི་ཕྲེང་བས་བརྒྱན། །ང་རོ་ཧཱུྃ་ཕཊ་རྟ་སྐད་དྲག་པོའི་སྒྲ། །ཅ་ཅོའི་འུར་སྒྲ་དང་བཅས་བདུད་དགྲ་མནན། །ཆ་ལུགས་བེར་ནག་དཔའི་ཆོས་ཡོངས་སུ་རྫོགས། །ཇ་ཆང་སྨན་རཀ་གཏོར་མའི་མཆོད་པ་བཞེས། །ཉ་རྒྱས་ཟླ་ལྟར་ཐུགས་རྗེའི་འོད་ཟེར་གྱིས། །ཏ་ཐཱ་ག་ཏའི་སྤྲུལ་པ་ཁྲོ་རྒྱལ་ཁྱོད། །ཐ་མལ་ཟ་འདྲེ་ཤི་གཤེད་བྱད་མ་སོགས། །ད་ལོ་ནི་ཁྱོད་ཀྱིས་ཚར་གཅོད་དྲག་པོས་སྒྲོལ། །ན་ཚ་ཤི་ཆད་རྒྱུན་འདི་ད་ཆོད་ཅིག །པ་དེ་པུ་དེའི་བསམ་ངན་མཐུ་གཏད་སོགས། །ཕ་རོལ་གནོད་བྱེད་གདུག་རྩུབ་ནུས་པ་རྣམས། །བ་མོར་ཉི་ཟེར་ཕོག་ལྟར་མེད་པར་མཛོད། །མཱ་ར་ཡ་ཡི་ཕྲིན་ལས་དུས་ལ་བབ། །རྩ་རླུང་ཐིག་ལེ་བསྒོམ་པའི་གེགས་སྐྱོན་དང་། །ཚ་གྲང་འདུས་པའི་ནད་ཀུན་ཞི་བར་མཛོད། །ཛ་ཡེ་སྣང་མཐའི་སྤྱན་སྔར་དམ་བཅས་ལྟར། །ཝ་ལེར་དུས་གསུམ་མཁྱེན་པའི་ལྷ་ཁྱོད་ནི། །ཞྭ་ལྟར་སྤྱི་བོར་བཀུར་ཞིང་བསྙེན་བསྒྲུབ་ན། །ཟ་བྱེད་ལྷ་སྲིན་སྡེ་བརྒྱད་དྲེགས་པའི་
ཚོགས། །འ་འུར་འབྲུག་སྒྲ་ཆེན་པོའི་ཆོ་འཕྲུལ་བཅས། །ཡ་མ་རཱ་ཙ་ལ་སོགས་སྡེ་བརྒྱད་འཁོར། །རྭ་ཅན་འབུམ་གྱི་འཁོར་དང་སྤྲུལ་པར་བཅས། །ལ་ཆེན་བདག་ཅག་སློབ་འབངས་བརྒྱུད་པར་བཅས། །ཤ་ནས་བརྩེ་བས་མ་ལྟར་སྲུང་སྐྱོབ་དང་། །ས་དང་ལམ་གྱི་བར་ཆད་ཐམས་ཅད་བཟློག །ཧ་ཡ་གྷི་ཝའི་ཐུགས་དམ་ད་མ་གཡེལ། །ཨ་ལ་ལ་ཡི་ངོ་མཚར་དངོས་གྲུབ་སྩོལ། །ཅེས་པ་འདི་ཡང་ཁྲོ་ཆུའི་ཟོར་ལྟས་ལོག་པས། སླར་ཡང་རྟ་མགྲིན་གྱི་བཟློག་པ་བཅས་པའི་ཉིན་མོ་ཀ་བསྟོད་ཀྱི་ཚུལ་དུ་རཱ་ག་ཨ་སྱས་བྲིས། བཀྲ་ཤིས་དཔལ་འབར་འཛམ་གླིང་གཡུལ་ལས་རྒྱལ་བའི་བཀྲ་ཤིས་ཤོག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།