རྟ་མཆོག་རོལ་པའི་རྒྱུད་ཀྱི་དུམ་བུ་ལས་ནག་པོ་ཀླུ་འདུལ་གྱི་ཉམས་ལེན་གཅིག་དྲིལ།
རྟ་མཆོག་རོལ་པའི་རྒྱུད་ཀྱི་དུམ་བུ་ལས་ནག་པོ་ཀླུ་འདུལ་གྱི་ཉམས་ལེན་གཅིག་དྲིལ་རཱ་ག་ཨ་སྱས་ཁྱད་ཆོས་ཞེས་བྱ་བ་ཡོད་དོ༔ ཨོཾ་བཛྲ་ཀྲོ་ཏ་ཧྱ་གྲི་ཝ་ཧཱུྃ་ཕཊ༔ སྐད་ཅིག་དྲན་རྫོགས་ཏིང་འཛིན་གྱིས༔ གྲུ་གསུམ་མཐིང་ནག་དཀྱིལ་འཁོར་དུ༔ བདག་ཉིད་ཁྲོ་བོ་རྟ་མགྲིན་སྐུ༔ མཐིང་ནག་ཞལ་གཅིག་ཕྱག་གཉིས་པ༔ སྤྱན་གསུམ་མཆེ་བ་རབ་ཏུ་གཙིགས༔ ཕྱག་གཡས་སྒྲོལ་བྱེད་རལ་གྲི་ཡིས༔ དགྲ་བགེགས་མགོ་ལུས་དུམ་བུར་གཏུབ༔ གཡོན་པས་འཛིན་བྱེད་ལྕགས་ཀྱུ་ཡིས༔ དགྲ་བགེགས་མ་ལུས་སྙིང་ནས་འདྲེན༔ ཞབས་གཉིས་དགྲ་བགེགས་ནོན་པར་མནན༔ སྐུ་ལ་དར་ནག་བེར་ཆེན་གསོལ༔ དབུ་གཙུག་རྟ་མགོ་ལྗང་ཞུར་གདེངས༔ རྟ་སྐད་དྲག་པོ་ནམ་མཁར་འཚེར༔ ཁམས་གསུམ་མ་ལུས་དབང་དུ་སྡུས༔ སྲིད་གསུམ་མ་ལུས་ཟིལ་གྱིས་གནོན༔ སྐུ་སྟོད་ཞིང་ཆེན་གཡང་གཞི་དང་༔ སྐུ་སྨད་སྟག་གི་ཤམ་ཐབས་གསོལ༔ ཐོད་སྐམ་ལྔ་ཡིས་དབུ་ལ་བརྒྱན༔ ཐོད་རློན་ལྔ་བཅུའི་དོ་ཤལ་བྱས༔ བ་སྤུ་མེ་ཡི་ཚྭ་ཚྭ་འཕྲོ༔ བསྐལ་པའི་མེ་དཔུང་ཀློང་ན་བཞུགས༔ དབུ་སྐྲ་གནམ་ལྕགས་རལ་པ་ཅན༔ རལ་པ་བསིགས་
པའི་སྐྲ་གསེབ་ནས༔ ཁྲོ་ཆུང་དཔག་མེད་ཕྱིར་འཕྲོས་པས༔ དགྲ་བགེགས་ཐམས་ཅད་ཚར་བཅད་ནས༔ ཚུར་འདུས་ཁྲོ་བོའི་གུར་ཁང་གྱུར༔ བདག་ཉིད་དམ་ཚིག་སེམས་དཔའ་ཆེ༔ ཐུགས་ཀར་ཡེ་ཤེས་སེམས་དཔའ་ནི༔ ཉི་ཟླའི་གདན་ལ་ཧཱུཾ་མཐིང་ག༔ གཟི་བརྗིད་ལྡན་པའི་མཐའ་བསྐོར་དུ༔ རྩ་སྔགས་གཡས་སུ་འཁོར་བ་ལས༔ འོད་ཟེར་སྤྲོ་བསྡུས་ཏིང་འཛིན་གྱིས༔ སྣོད་བཅུད་དངོས་པོ་ཐམས་ཅད་ཀུན༔ མེ་རི་ཁྲོ་བོའི་རང་བཞིན་ལས༔ གནོད་བྱེད་མིང་ཡང་མེད་པར་གྱུར༔ ཨོཾ་བཛྲ་ཀྲོ་ཏ་རྒྱ་གྲི་ཝ་ཧཱུྃ་ཕཊ༔ དོན་ལྡན་ལུགས་ལ་ཀྲོ་ཏ་སྦྱར་བ་ཡིན༔ སེམས་ཉིད་སྐྱེ་མེད་སྟོང་གསལ་འདི༔ ཡེ་ནས་རང་བཞིན་ལྷ་ཡི་སྐུ༔ དམ་ཚིག་ཡེ་ཤེས་གཉིས་མེད་ལ༔ སྤྱན་འདྲེན་རྒྱས་གདབ་མི་འཚལ་བ༔ དྲན་པ་ཙམ་གྱིས་རྫོགས་པ་ཆེ༔ ལྟ་བ་གྱད་ཀྱི་ལྷ་ཞེས་བྱ༔ རྡོ་རྗེ་ལྟ་བུའི་ཏིང་འཛིན་གྱིས༔ བསྲུང་བ་ཀུན་གྱི་མཆོག་ཡིན་ནོ༔ ཞེས་གསུངས༔ ཞེས་པ་འདི་ནི་རང་གིས་ཉབ་ཉོབ་མང་བ་མི་ལྕོགས་ཀྱང་༔ སྔགས་འཆང་གསར་བུ་འགའ་ལ་ཕན་པའི་གདེང་ཐོབ་ཕྱིར༔ རཱ་ག་ཨ་སྱས་སྦྱར་བའོ༔