རྟ་མགྲིན་ཡང་ཕྱུང་ནག་པོའི་སྡེ་བརྒྱད་བསྐང་བ་ལས་བཞི་ལྷུན་གྲུབ།
རྟ་མགྲིན་ཡང་ཕྱུང་ནག་པོའི་སྡེ་བརྒྱད་བསྐང་བ་ལས་བཞི་ལྷུན་གྲུབ་བཞུགས་སོ།།
རང་ཉིད་དབང་ཆེན་རྟ་མགྲིན་དུ་གསལ་བའི་ཐུགས་ཀ་ནས་འོད་ཟེར་འཕྲོས་པས་བཀའི་སྲུང་མ་སྡེ་བརྒྱད་ཀྱི་ཚོགས་དཔག་ཏུ་མེད་པ་སྐད་ཅིག་གིས་མཆོད་པའི་གནས་འདིར་སྤྱན་དྲངས་པར་གྱུར། ཨཿཡམཿདུཿརུཙཿཤཿནཿབཛྲ་ས་མ་ཡ་ཛ་ཛཿ ཨ༔ ལྷ་ཡི་རྒྱལ་པོ་ཆེན་པོ་ནི། །སྐུ་མདོག་དཀར་ལ་འོད་ཟེར་འབར། །སྐུ་ལ་དར་དཀར་བེར་ཆེན་གསོལ། །ཕྱག་གཡས་ཤེལ་གྱི་རལ་གྲི་ཕྱར། །གཡོན་པས་རང་མདོག་མདུང་དར་འཛིན། །ཆིབས་སུ་ལྷ་གཡག་དཀར་པོ་བཅིབ། །དངོས་སུ་ཡར་ལྷ་ཤམ་པོ་སྟེ། །ལྷ་འཁོར་དཀར་པོ་འབུམ་དང་བཅས། །འདིར་གཤེགས་
མཆོད་པ་དམ་པ་བཞེས། །གསོལ་ལོ་མཆོད་དོ་ཐུགས་དམ་བསྐང་། །བྱད་ཁ་ཕུར་ཁ་དགྲ་ལ་ཟློག །སློབ་དཔོན་པདྨའི་བཀའ་བཞིན་དུ། །ཕྲིན་ལས་རྣམ་བཞི་མྱུར་དུ་སྒྲུབས། །གཤིན་རྗེའི་རྒྱལ་པོ་ཆེན་པོ་ནི། །སྐུ་མདོག་མཐིང་ནག་འོད་ཟེར་འབར། །སྟག་ལྤགས་རློན་པའི་ན་བཟའ་གསོལ། །གཡས་པས་བེ་ཅོན་མཁའ་ལ་འཕྱར། །གཡོས་པས་ཐོད་ཁྲག་ཐུགས་ཀར་འཛིན། །ཆིབས་སུ་མ་ཧེ་སྔོན་པོ་བཅིབ། །དངོས་སུ་ཡ་མ་རཱ་ཙ་སྟེ། །རང་འདྲའི་འབུམ་ཕྲག་འཁོར་གྱིས་བསྐོར། །འདིར་གཤེགས་མཆོད་པ་དམ་པ་བཞེས། །གསོལ་ལོ་
མཆོད་དོ་ཐུགས་དམ་བསྐང་། །བྱད་ཁ་ཕུར་ཁ་དགྲ་ལ་ཟློག །སློབ་དཔོན་པདྨའི་བཀའ་བཞིན་དུ། །ཕྲིན་ལས་རྣམ་བཞི་མྱུར་དུ་སྒྲུབས། །མ༔ མ་མོ་ཆེན་མོ་རེ་མ་ཏཱི། །སྐུ་མདོག་དཀར་ལ་འོད་ཟེར་འབར། །སྐུ་ལ་དར་དཀར་འཇོལ་བེར་གསོལ། །ཕྱག་གཡས་མདའ་དར་མཁའ་ལ་འཕྱར། །གཡོས་པས་དངུལ་དཀར་མེ་ལོང་འཛིན། །ཆིབས་སུ་གཡུ་འབྲུག་སྔོན་མོ་བཅིབ། །དངོས་སུ་སྲིད་པའི་རྒྱལ་མོ་སྟེ། །རང་འདྲའི་མ་མོ་འབུམ་གྱིས་བསྐོར། །འདིར་གཤེགས་མཆོད་པ་དམ་པ་བཞེས། །གསོལ་ལོ་མཆོད་དོ་ཐུགས་དམ་བསྐང་། །བྱད་ཁ་ཕུར་ཁ་དགྲ་ལ་ཟློག །སློབ་དཔོན་པདྨའི་བཀའ་བཞིན་དུ། །ཕྲིན་ལས་རྣམ་བཞི་མྱུར་དུ་སྒྲུབས། །བདུད་ཀྱི་རྒྱལ་པོ་ཆེན་པོ་ནི། །སྐུ་མདོག་ནག་ལ་འོད་ཟེར་འབར། །སྐུ་ལ་དར་སྔོན་བེར་ཆེན་གསོལ། །གཡས་པས་ཁྲམ་ཤིང་མཁའ་ལ་འཕྱར། །གཡོན་པས་བདུད་ཞགས་ཁྱུགས་སེ་ཁྱུག །ཆིབས་སུ་རྟ་ནག་རྟིང་དཀར་བཅིབ། །དངོས་སུ་སྐོས་རྗེ་དྲང་དཀར་ཏེ། །རང་འདྲའི་བདུད་དམག་འབུམ་གྱིས་བསྐོར། །འདིར་གཤེགས་མཆོད་པ་དམ་པ་བཞེས། །གསོལ་ལོ་མཆོད་དོ་ཐུགས་
དམ་བསྐང་། །བྱད་ཁ་ཕུར་ཁ་དགྲ་ལ་ཟློག །སློབ་དཔོན་པདྨའི་བཀའ་བཞིན་དུ། །ཕྲིན་ལས་རྣམ་བཞི་མྱུར་དུ་སྒྲུབས། །ར༔ དགྲ་བླའི་རྒྱལ་པོ་ཆེན་པོ་ནི། །སྐུ་མདོག་དམར་སེར་མི་ཤ་དཀར། །སྐུ་ལ་ཆོས་གོས་ཤམ་ཐབས་གསོལ། །དབུ་ལ་སག་ཞུ་ཁྲ་བོ་གསོལ། །ལྷུང་བཟེད་འཁར་གསིལ་ཕྱག་ན་བསྣམས། །ཆིབས་སུ་སེང་གེ་དཀར་མོ་བཅིབ། །དངོས་སུ་རྒྱལ་པོ་པེ་ཧར་ལ། །རང་འདྲའི་སེར་གཟུགས་འབུམ་གྱིས་བསྐོར། །འདིར་གཤེགས་མཆོད་པ་དམ་པ་བཞེས། །གསོལ་ལོ་མཆོད་དོ་ཐུགས་དམ་བསྐང་། །བྱད་ཁ་ཕུར་ཁ་དགྲ་ལ་ཟློག །སློབ་དཔོན་པདྨའི་བཀའ་བཞིན་དུ། །ཕྲིན་ལས་རྣམ་བཞི་མྱུར་དུ་སྒྲུབས། །བཙན་གྱི་རྒྱལ་པོ་ཆེན་པོ་ནི། །སྐུ་མདོག་དམར་ལ་འོད་ཟེར་འབར། །སྐུ་ལ་བསེ་ཁྲབ་སེར་པོ་མནབས། །གཡས་གཡོན་མདའ་གཞུ་མདུང་དར་བསྣམས། །ཆིབས་སུ་ལྷ་རྟ་དམར་ཞུར་བཅིབ། །དངོས་སུ་ཡམ་ཤུད་དམར་པོ་སྟེ། །རང་འདྲའི་དམར་པོ་འབུམ་གྱིས་བསྐོར། །འདིར་གཤེགས་མཆོད་པ་དམ་པ་བཞེས། །གསོལ་ལོ་མཆོད་དོ་ཐུགས་
དམ་བསྐང་། །བྱད་ཁ་ཕུར་ཁ་དགྲ་ལ་ཟློག །སློབ་དཔོན་པདྨའི་བཀའ་བཞིན་དུ། །ཕྲིན་ལས་རྣམ་བཞི་མྱུར་དུ་སྒྲུབས། །གནོད་སྦྱིན་རྒྱལ་པོ་ཆེན་པོ་ནི། སྐུ་མདོག་ལྗང་ལ་འོད་ཟེར་འབར། སྐུ་ལ་སྟག་ལྤགས་རློན་པ་མནབས། །ཕྱག་གཡས་རལ་གྲི་མཁའ་ལ་འཕྱར། །གཡོན་པས་ཡིད་བཞིན་ནོར་བུ་འཛིན། །ཆིབས་སུ་རྒྱ་སྟག་དམར་པོ་བཅིབ། །དངོས་སུ་གང་བ་བཟང་པོ་སྟེ། །ཚོང་དཔོན་ཆ་ལུགས་འབུམ་གྱིས་བསྐོར། །འདིར་གཤེགས་མཆོད་པ་དམ་པ་བཞེས། །གསོལ་ལོ་མཆོད་དོ་ཐུགས་དམ་བསྐང་། །བྱད་ཁ་ཕུར་ཁ་དགྲ་ལ་ཟློག །སློབ་དཔོན་པདྨའི་བཀའ་བཞིན་དུ། །ཕྲིན་ལས་རྣམ་བཞི་མྱུར་དུ་སྒྲུབས། །ཀླུ་ཡི་རྒྱལ་པོ་ཆེན་པོ་ནི། །སྐུ་མདོག་དུད་ཁ་སྦྲུལ་མཇུག་ཅན། །སྦྲུལ་མགོ་བདུན་དང་དར་གྱིས་བརྒྱན། །ཕྱག་གཡས་འཁོར་ལོ་གཡོན་ཞགས་པ།་།ཀླུ་རྟ་སྔོན་པོ་ཆིབས་སུ་ཆིབས། །དངོས་སུ་མཁར་ནག་སྨྱོ་ཁ་སྟེ། །།རང་འདྲའི་ཀླུ་བདུད་འབུམ་གྱིས་བསྐོར། །འདིར་གཤེགས་མཆོད་པ་དམ་པ་བཞེས། །གསོལ་ལོ་མཆོད་དོ་ཐུགས་དམ་བསྐང་། །བྱད་ཁ་ཕུར་ཁ་དགྲ་ལ་ཟློག །སློབ་དཔོན་པདྨའི་བཀའ་བཞིན་དུ། །ཁས་བླངས་དམ་བཅས་
བཀའ་བསྒོས་ལྟར། །ཕྲིན་ལས་རྣམ་བཞི་མྱུར་དུ་སྒྲུབས། །བཅོལ་བའི་ཕྲིན་ལས་འགྲུབ་པར་མཛོད། །སྡེ་བརྒྱད་བཤོས་བུའི་མཐར་དཀར་གསུམ་མངར་གསུམ་བཀྲ་ཤིས་རྫས་་རྟགས་རྒྱལ་སྲིད་སྣ་བདུན་མཆོད་རྫས་གང་འབྱོར་བཤམས། སྡེ་བརྒྱད་ཀྱི་ཆོ་འཕྲུལ་དང་བྱད་ཁ་སྡང་ན་འདི་ལ་བརྩོན་པར་གྱིས། རྟ་མགྲིན་ཡང་ཕྱུང་ནག་པོའི་ཟུར་འགེབ་སྡེ་བརྒྱད་བསྐང་བ་འདི། སྔགས་འཆང་རཱ་ག་ཨ་སྱས་སྨྲས་པ་ཡི་གེ་པ་ནི་དགེ་བཱིརྱའོ། །བཀྲ་ཤིས། དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།