དཔལ་རྟ་མགྲིན་ཡང་ཕྱུང་ནག་པོ་དྲེགས་པ་སྡེ་བརྒྱད་ཀྱི་གསོལ་ཀ་འདོད་དགུ་ལྷུན་གྲུབ།
དཔལ་རྟ་མགྲིན་ཡང་ཕྱུང་ནག་པོ་དྲེགས་པ་སྡེ་བརྒྱད་ཀྱི་གསོལ་ཀ་འདོད་དགུ་ལྷུན་གྲུབ་བོ༔
ན་མོ་གུ་རུ་རྒྱ་གྲི་ཝ་ཡེ༔ དཔལ་རྟ་མགྲིན་ནག་པོའི་གསོལ་ཁའི་རིམ་པ་ཅུང་ཞིག་བྲི་བས་བཅོམ་ལྡན་འདས་པདྨ་ཧེ་རུ་ཀ་འཁོར་བཅས་ཀྱིས་བཀའི་གནང་བ་སྩོལ༔ གསོལ་ཁའི་གཏོར་མ་སོ་སོར་བཅའ་ན༔ སྣོད་ཀྱི་ནང་དུ་དམར་གཏོར་ཆེ་བ་གཅིག་ལ་འཁོར་བཞི༔ ཤར་དུ་ལྷ་བཤོས༔ ཤར་ལྷོར་ཟུར་གསུམ་གཡོན་དཀྱུས༔ ལྷོར་ཟུར་གསུམ་ཁྲམ་རིས་ཅན༔ ལྷོ་ནུབ་ཏུ་གསང་ཕྱི༔ ནུབ་ཏུ་སྨན་ཏིང་༔ ནུབ་བྱང་དུ་ཟུར་གསུམ་བཀོད༔ བྱང་ལ་ཟུར་གསུམ་གཡས་དཀྱུས༔ བྱང་ཤར་དུ་སྦྲུལ་དཀྲིས་ཅན༔ མཐར་སྐྱུ་གུ༔ ལིང་ཆུང་༔ ཤ་དུམ་རྒྱས་པར་བཀྲ་ཤིས་རྟགས་བརྒྱད་གཟུགས་འགྲོས་བྱ་རིགས་སོགས་བསྐང་འབྲས་རྣམས་བཙུགས༔ ཙཀ་ལི་དང་དར་གདུགས་ཡོད་ན་འཛུགས༔ སོ་སོར་བཅའ་མ་ཐུབ་ན་གཏོར་ཆེན་གསོ་
བྲན་བྱས་ནའང་ཆོག༔ དེ་ནས་འགུགས་གཞུག་བྱས་ལ་བྱིན་གྱིས་བརླབ་པ་ནི༔ ན་མོ་དཀོན་མཆོག་གསུམ་དང་ཡི་དམ་ལྷ༔ དཔལ་ཆེན་ཁྲོ་རྒྱལ་རྟ་མགྲིན་གྱི༔ ཕོ་ཉ་ལས་གྲུབ་འཁོར་དང་བཅས༔ བདེན་པ་ཆེན་པོའི་ནུས་པ་ཡིས༔ བྱང་ཆུབ་བསྒྲུབ་ལ་བར་ཆད་བགེགས༔ རང་དབང་མེད་པར་འདིར་ཁུག་ཅིག༔ ཨོཾ་ཨཱཿཧཱུྃ་ཧྲཱིཿ གདོད་ནས་རྣམ་དག་རང་བྱུང་རྫས་ཆེན་པོ༔ རྣམ་པ་དགྲ་བགེགས་ཤ་ཁྲག་ངོ་བོ་ལ༔ དཔལ་གཏོར་རི་རབ་ལྷུན་པོ་ལྟ་བུར་བརྗིད༔ ཕྱི་ནང་གསང་མཆོད་སྨན་རཀ་གཏོར་མ་བཅས༔ ཉེས་པ་རང་གྲོལ་ཉོན་མོངས་རང་སར་དག༔ ཡེ་ཤེས་
མདངས་ལྡན་བདུད་རྩི་ལྷུན་གྲུབ་འདི༔ གློ་བུར་ལྟར་སྣང་བག་ཆགས་སྦྱང་སླད་དུ༔ ཐུགས་རྗེ་ཡེ་ཤེས་རྩལ་ལས་འཕྲོས་པ་ཡི༔ རཾ་ཡཾ་ཁཾ་གིས་བསྲེགས་སྦྱངས་བཀྲུས་ནས་ཀྱང་༔ ལྷཨོཾ་ཨཱཿཧཱུྃ་གིས་སྤེལ་བསྒྱུར་བདུད་རྩིར་གྱུར༔ ཨོཾ་ཨཱཿཧཱུྃ་བཛྲ་ཨརྒྱུ་སོགས་ནས་ཤབྡ༔ མ་ཧཱ་མཱ་ས། རཀྟ། ཙིཏྟ། བ་སུ་ཏ། ཀཾ་ནི་རི་ཏི། གོ་རོ་ཙ་ན། པཉྩ་ཨ་མྲྀ་ཏ། བ་ལིཾ་ཏ་ཨོཾ་ཨཱཿཧཱུྃ༔ དེ་ནས་རོལ་མོ་གྱེར་དབྱངས་དང་བཅས་པས༔ ཧཱུྃ༔ ཆོས་ཉིད་ཞི་བའི་ངང་ལས་མ་གཡོས་ཀྱང་༔ གདུག་པ་ཅན་རྣམས་སྙིང་རྗེའི་རབ་བསྒྲལ་ཕྱིར༔ བདུད་བཞི་དཔུང་བཅོམ་དཔལ་ཆེན་རྟ་མཆོག་རྗེ༔ གར་གྱི་དབང་ཕྱུག་པདྨ་ཧེ་རུ་ཀ༔ དབང་ཆེན་རྟ་ནག་འབར་བ་འཁོར་བཅས་རྣམས༔ གནས་འདིར་སྤྱན་འདྲེན་བརྟན་བཞུགས་གསོལ་མཆོད་བཞེས༔ གཏོར་གཞོང་རིན་ཆེན་རྣམ་དག་ཆོས་ཀྱི་དབྱིངས༔ གཏོར་མའི་དངོས་པོ་ཡེ་ཤེས་རྒྱ་མཚོའི་ཚོགས༔ འབྲུ་བཅུད་སྟོང་སྦྱར་བདུད་རྩི་ཛ་གད་དང་༔ སྣ་ཚོགས་ཡིད་འོང་བཀོད་པའི་གཏོར་མ་ལ༔ སྔགས་དང་ཏིང་འཛིན་ཚུལ་བཞིན་བྱིན་གྱིས་བརླབས༔ དྲི་མེད་ཞལ་ཟས་བདུད་རྩིའི་རྒྱ་མཚོ་འདི༔ ཐུགས་རྗེའི་རྣམ་དག་འབུལ་བའི་
གནས་གྱུར་པ༔ རྩ་བརྒྱུད་བླ་མ་རིག་འཛིན་རྒྱ་མཚོ་དང་༔ ཡི་དམ་ཞི་ཁྲོ་དཔའ་བོ་མཁའ་འགྲོ་དང་༔ དབང་ཆེན་ཁྲོ་རྒྱལ་རྟ་མགྲིན་ནག་པོ་དང་༔ ཡཀྵ་མེ་དབལ་གནོད་སྦྱིན་ནག་པོ་དང་༔ ཁྱུང་ཆེན་འབར་བ་ལྕགས་སྡིག་ནག་པོ་དང་༔ དྲེགས་པ་སྡེ་བརྒྱད་ཕྱོགས་སྐྱོང་རྒྱལ་ཆེན་དང་བཀའ་སྲུང་གནས་བདག་ཡུལ་ལྷ་གཞི་བདག་སོགས༔ རྟ་མགྲིན་ནག་པོ་འཁོར་དང་བཅས་པ་ཡི༔ ཐུགས་དམ་གཉེན་པོ་བསྐང་ཕྱིར་བཞེས་སུ་གསོལ༔ སངས་རྒྱས་བསྟན་པ་བསྲུང་ཕྱིར་བཞེས་སུ་གསོལ༔ རྣལ་འབྱོར་ཕྲིན་ལས་བསྒྲུབ་ཕྱིར་བཞེས་སུ་གསོལ༔ གནོད་བྱེད་དགྲ་བགེགས་བསྒྲལ་ཕྱིར་བཞེས་སུ་གསོལ༔ བྱད་མ་རྦོད་གཏོང་བཟློག་ཕྱིར་བཞེས་སུ་གསོལ༔ མི་མཐུན་རྐྱེན་ངན་བཟློག་ཕྱིར་བཞེས་སུ་གསོལ༔ ཕྲིན་ལས་རྣམ་བཞི་བསྒྲུབ་ཕྱིར་བཞེས་སུ་གསོལ༔ དབང་དང་དངོས་གྲུབ་སྩོལ་ཕྱིར་བཞེས་སུ་གསོལ༔ ཚེ་དབང་ལོངས་སྤྱོད་སྤེལ་ཕྱིར་བཞེས་སུ་གསོལ༔ རྣལ་འབྱོར་ཚེ་སྲོག་བསྲིང་ཕྱིར་བཞེས་སུ་གསོལ༔ སྔ་མའི་གཏང་རག་འབུལ་ལོ་བཞེས་སུ་གསོལ༔ ད་ལྟའི་གཉེར་ཟས་འདྲེན་ནོ་བཞེས་སུ་གསོལ༔ ཕྱི་མའི་ཞུ་
སྐྱེམས་འབུལ་ལོ་བཞེས་སུ་གསོལ༔ བཞེས་ནས་བཅོལ་བའི་ཕྲིན་ལས་གྲུབ་པར་མཛོད༔ ཨོཾ་གུ་རུ་དྷེ་ཝ་ཌཱ་ཀི་ནཱི་སརྦ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ཨོཾ་བཛྲ་ཀྲོ་དྷ་ཧྱ་གྷྲཱི་ཝ་ཧཱུྃ་ཕཊ༔ ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ བཛྲ་རཀཱ་ཡ༔ ཀཱ་ག་རུ་ཊ་རུ་རུ་བྷ་ཤ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ཨོཾ་ཡ་མ་དུ་རུ་ཙ་ཤ་ན་སརྦ་དྷརྨ་ལོ་ཀ་པ་ལ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ལན་གསུམ་རེའམ་བདུན་རེ་ཕུལ་ལ༔ ཧྲཱིཿ གྲུ་གསུམ་མཐིང་ནག་མེ་འབར་ཀློང་དཀྱིལ་ན༔ རབ་འཇིགས་དུར་ཁྲོད་འབར་བའི་གཞལ་ཡས་སུ༔ དབང་གི་ལྷ་མཆོག་རྟ་མགྲིན་དབང་གི་ལྷ༔ ཞལ་གཅིག་ཕྱག་གཉིས་རབ་གཏུམ་ཁྲོས་པའི་སྐུ༔ རལ་གྲི་ལྕགས་ཀྱུས་མ་རུངས་སྙིང་ནས་འདྲེན༔ དར་ནག་བེར་གསོལ་དུར་ཁྲོད་ཆས་ཀྱིས་བརྒྱན༔ ཞབས་གཉིས་དྲེགས་བྱེད་གནོན་ཅིང་མེ་ཀློང་བཞུགས༔ ལྕགས་རལ་གསེབ་ནས་ཁྲོ་ཆུང་ཆར་ལྟར་འབེབས༔ རྟ་མགོ་ལྗང་ཞུར་སྣང་སྲིད་ཟིལ་གནོན་གཡོ༔ ཆེ་བཙན་དཔེ་མེད་འགྲན་ཟླ་བྲལ་བའི་སྐུ༔ དབུ་གཙུག་རྩ་བརྒྱུད་བླ་མ་སྤྲིན་ལྟར་གཏིབས༔ ཡི་དམ་དཔའ་བོ་མཁའ་འགྲོ་གློག་ལྟར་འཁྱུག༔
ཆོས་སྐྱོང་སྲུང་མའི་ཚོགས་རྣམས་འབྲུག་ལྟར་ལྡིར༔ བཀའ་སྲུང་ཕོ་ཉ་ལས་མཁན་སྐར་ལྟར་འཁྲུགས༔ སྤྲུལ་པ་ཡང་སྤྲུལ་འཁོར་དང་བཅས་པ་ལ༔ དམ་རྫས་བརྒྱན་པའི་གཏོར་མ་འདི་བཞེས་ཤིག༔ སྤྱན་གཟིགས་ཕྱི་ནང་མཆོད་པས་ཐུགས་དམ་བསྐང་༔ གསོལ་ལོ་མཆོད་དོ་དབང་བྱིན་དངོས་གྲུབ་སྩོལ༔ ཁྱོད་ལ་བརྟེན་ཅིང་མཆོད་་་གསོལ་བྱས་པའི་མཐུས༔ སངས་རྒྱས་བསྟན་སྲུངས་དཀོན་མཆོག་དབུ་འཕང་བསྟོད༔ དགྱེས་པའི་ཞལ་སྟོན་བསྒྲུབ་པའི་རྟགས་ཆེན་ཕྱུངས༔ རྣལ་འབྱོར་ཚེ་བསྲིང་འགྲོ་དོན་འཕེལ་བ་དང་༔ རྟག་ཏུ་ལེགས་པའི་སྙན་གྲགས་ཕྱོགས་བཅུར་སྒྲོགས༔ ཚེ་དཔལ་བསོད་ནམས་ལོངས་སྤྱོད་སྤེལ་བ་དང་༔ ཕྲིན་ལས་རྣམ་བཞི་གང་བསམ་འགྲུབ་པ་ཡི༔ མཆོག་ཐུན་དངོས་གྲུབ་དམ་པ་དུས་འདིར་སྩོལ༔ སྡང་དགྲ་གནོད་བྱེད་བྱེད་མ་མྱུར་དུ་སྒྲོལ༔ ཅི་བསམ་དོན་ཀུན་འགྲུབ་པའི་ཕྲིན་ལས་མཛོད༔ བཱི༔ གསོལ་ལོ་མཆོད་དོ་ཁྲོ་རྒྱལ་ཆེ་བའི་མཆོག༔ ཡཀྴ་མེ་དབལ་དམར་ནག་དབང་གི་སྐུ༔ ཕྱག་མཚན་རྡོ་རྗེ་ཐོ་བ་ཞགས་པ་བསྣམས༔ ཁྲོ་ཆས་ཡོངས་རྫོགས་ཞབས་གཉིས་དགྲ་བགེགས་མནན༔ དམ་
རྫས་བརྒྱན་པའི་གཏོར་མ་འདི་བཞེས་ལ༔ སྤྱན་གཟིགས་ཕྱི་ནང་མཆོད་པས་ཐུགས་དམ་བསྐང་༔ གསོལ་ལོ་མཆོད་དོ་མཐུ་རྩལ་དངོས་གྲུབ་སྩོལ༔ ཁྱོད་ལ་བརྟེན་ཅིང་མཆོད་གསོལ་བྱས་པའི་མཐུས༔ སངས་རྒྱས་བསྟན་སྲུངས་དཀོན་མཆོག་དབུ་འཕང་བསྟོད༔ དགྱེས་པའི་ཞལ་སྟོན་བསྒྲུབ་པའི་རྟགས་ཆེན་ཕྱུངས༔ རྣལ་འབྱོར་ཚེ་བསྲིང་འགྲོ་དོན་འཕེལ་བ་དང་༔ རྟག་ཏུ་ལེགས་པའི་སྙན་གྲགས་ཕྱོགས་བཅུར་སྒྲོགས༔ ཚེ་དཔལ་བསོད་ནམས་ལོངས་སྤྱོད་སྤེལ་བ་དང་༔ ཕྲིན་ལས་རྣམ་བཞི་གང་བསམ་འགྲུབ་པ་ཡི༔ མཆོག་ཐུན་དངོས་གྲུབ་དམ་པ་དུས་འདིར་སྩོལ༔ སྡང་དགྲ་གནོད་བྱེད་བྱེད་མ་མྱུར་དུ་སྒྲོལ༔ ཅི་བསམ་དོན་ཀུན་འགྲུབ་པའི་ཕྲིན་ལས་མཛོད༔ དྷཱི༔ གསོལ་ལོ་མཆོད་དོ་ལས་མཁན་སྟོབས་ལྡན་རྗེ༔ གནོད་སྦྱིན་ལྕགས་རལ་མཐིང་ནག་མོན་པའི་གཟུགས༔ ཕྱག་གཉིས་ལྕགས་རྡོར་མེ་ཡི་ལྕགས་ཀྱུ་བསྣམས༔ མོན་པ་བདུན་དང་ཤན་བདུན་ཕོ་ཉར་འགྱེད༔ དམ་རྫས་བརྒྱན་པའི་གཏོར་མ་འདི་བཞེས་ཤིག༔ སྤྱན་གཟིགས་ཕྱི་ནང་མཆོད་པས་ཐུགས་དམ་བསྐང་༔ གསོལ་ལོ་མཆོད་དོ་དགྲ་བགེགས་བྱད་མ་སྒྲོལ༔ ཁྱོད་ལ་
བརྟེན་ཅིང་མཆོད་གསོལ་བྱས་པའི་མཐུས༔ སངས་རྒྱས་བསྟན་སྲུངས་དཀོན་མཆོག་དབུ་འཕང་བསྟོད༔ དགྱེས་པའི་ཞལ་སྟོན་བསྒྲུབ་པའི་རྟགས་ཆེན་ཕྱུངས༔ རྣལ་འབྱོར་ཚེ་བསྲིང་འགྲོ་དོན་འཕེལ་བ་དང་༔ རྟག་ཏུ་ལེགས་པའི་སྙན་གྲགས་ཕྱོགས་བཅུར་སྒྲོགས༔ ཚེ་དཔལ་བསོད་ནམས་ལོངས་སྤྱོད་སྤེལ་བ་དང་༔ ཕྲིན་ལས་རྣམ་བཞི་གང་བསམ་འགྲུབ་པ་ཡི༔ མཆོག་ཐུན་དངོས་གྲུབ་དམ་པ་དུས་འདིར་སྩོལ༔ སྡང་དགྲ་གནོད་བྱེད་བྱེད་མ་མྱུར་དུ་སྒྲོལ༔ ཅི་བསམ་དོན་ཀུན་འགྲུབ་པའི་ཕྲིན་ལས་མཛོད༔ ཧཱུྃ༔ གསོལ་ལོ་མཆོད་དོ་བྱ་ཁྱུང་ཁྲོ་བོའི་རྒྱལ༔ འཇིགས་བྱེད་ལྕགས་སྡིག་ནག་པོ་མགོ་དགུ་དང་༔ སྤྲུལ་པ་ཡང་སྤྲུལ་འཁོར་དང་བཅས་པ་ཡིས༔ དམ་རྫས་བརྒྱན་པའི་གཏོར་མ་འདི་བཞེས་ཤིག༔ སྤྱན་གཟིགས་ཕྱི་ནང་མཆོད་པས་ཐུགས་དམ་བསྐང་༔ གསོལ་ལོ་མཆོད་དོ་གདོན་ཆེན་གབ་སྐུངས་ཕུད༔ ས་བདག་ཀླུ་གཉན་སྟེང་གདོན་གནོད་པ་ཟློག༔ རྒྱལ་བསེན་དམ་སྲི་འགོང་པོའི་རྩ་རྒྱུས་ཆོད༔ བདག་དང་རྒྱུ་སྦྱོར་ཡོན་བདག་འཁོར་བཅས་ཀྱི༔ བར་ཆད་རྐྱེན་སོལ་ཅི་བསམ་དོན་ཀུན་སྒྲུབས༔ ཕྲིན་ལས་རྣམ་བཞིའི་དངོས་གྲུབ་
བསྩལ་དུ་གསོལ༔ ཁྱོད་ལ་བརྟེན་ཅིང་མཆོད་གསོལ་བྱས་པའི་མཐུས༔ སངས་རྒྱས་བསྟན་སྲུངས་དཀོན་མཆོག་དབུ་འཕང་བསྟོད༔ དགྱེས་པའི་ཞལ་སྟོན་བསྒྲུབ་པའི་རྟགས་ཆེན་ཕྱུངས༔ རྣལ་འབྱོར་ཚེ་བསྲིང་འགྲོ་དོན་འཕེལ་བ་དང་༔ རྟག་ཏུ་ལེགས་པའི་སྙན་གྲགས་ཕྱོགས་བཅུར་སྒྲོགས༔ ཚེ་དཔལ་བསོད་ནམས་ལོངས་སྤྱོད་སྤེལ་བ་དང་༔ ཕྲིན་ལས་རྣམ་བཞི་གང་བསམ་འགྲུབ་པ་ཡི༔ མཆོག་ཐུན་དངོས་གྲུབ་དམ་པ་དུས་འདིར་སྩོལ༔ སྡང་དགྲ་གནོད་བྱེད་བྱད་མ་མྱུར་དུ་སྒྲོལ༔ ཅི་བསམ་དོན་ཀུན་འགྲུབ་པའི་ཕྲིན་ལས་མཛོད༔ ཅེས་རྟ་མགྲིན་ལྷ་ལྔའི་གསོལ་ཀ་དང་༔ སྤྲོ་ན་འཁོར་དྲེགས་པ་སྡེ་བརྒྱད་ཀྱི་གསོལ་ཀ་འདི་སུ་ཐོད་ཐོད་ཀྱི་དོན་དུ་མི་རུང་བས་བཙའ་ཤེས་པར་བྱའོ༔ འཁོར་དྲེགས་པ་སྡེ་བརྒྱད་ཀྱི་གསོལ་ཀ་ནི༔ ཧྲཱིཿ གསོལ་ལོ་མཆོད་དོ་ཤར་ཕྱོགས་ལྷ་ཡི་རྗེ༔ སྐུ་མདོག་དཀར་གསལ་དར་དཀར་རལ་ག་གསོལ༔ ཕྱག་གཉིས་རལ་གྲི་དར་མདུང་དཀར་པོ་ཕྱར༔ ལྷ་གཡག་དཀར་པོ་ཆིབས་ཤིང་ལྷ་དམག་བསྐུལ༔ ཧྲཱིཿ གསོལ་ལོ་མཆོད་དོ་ལྷོ་ཕྱོགས་གཤིན་རྗེའི་རྗེ༔ སྐུ་མདོག་སྨུག་ནག་སྟག་ལྤགས་རློན་པ་གསོལ༔ ཕྱག་མཚན་བེ་ཅོན་ཐོད་དབྱུག་འབར་བ་བསྣམས༔ མ་ཧེ་
ཆིབས་ཤིང་གཤིན་རྗེའི་ལས་ལ་བསྐུལ༔ ཧཱི༔ གསོལ་ལོ་མཆོད་དོ་ནུབ་ཕྱོགས་མ་མོའི་རྗེ༔ སྐུ་མདོག་དཀར་གསལ་དར་དཀར་གོ་ཟུ་གསོལ༔ ཕྱག་མཚན་མདའ་དར་འཕྲུལ་གྱི་མེ་ལོང་ལྟ༔ གཡུ་འབྲུག་ཆིབས་ཤིང་མ་མོའི་ལས་ལ་བསྐུལ༔ དྷཱི༔ གསོལ་ལོ་མཆོད་དོ་བྱང་ཕྱོགས་བདུད་ཀྱི་རྗེ༔ སྐུ་མདོག་མཐིང་ནག་དར་ནག་འཇོལ་བེར་གསོལ༔ ཕྱག་མཚན་ཁྲམ་ཤིང་དགྲ་སྟ་འབར་བ་བསྣམས༔ བདུད་རྟ་ཆིབས་ཤིང་བདུད་དམག་ཕོ་ཉ་འགྱེད༔ ཧྲཱིཿ གསོལ་ལོ་མཆོད་དོ་ཤར་ལྷོ་བཙན་གྱི་རྗེ༔ སྐུ་མདོག་དམར་སེར་དར་དམར་འཇོལ་བེར་གསོལ༔ ཕྱག་མཚན་མདའ་གཞུ་བཙན་མདུང་དམར་པོ་འཛིན༔ རྟ་དམར་ཆིབས་ཤིང་བཙན་དམག་ལས་ལ་འགྱེད༔ བཱི༔ གསོལ་ལོ་མཆོད་དོ་ལྷོ་ནུབ་རྒྱལ་པོ་རྗེ༔ སྐུ་མདོག་དཀར་སྨུག་ཆོས་གོས་ངུར་སྨྲིག་གསོལ༔ ཕྱག་མཚན་འཁར་གསིལ་ལྕགས་ཀྱི་ལྷུང་བཟེད་བསྣམས༔ སེང་དཀར་ཆིབས་ཤིང་རྒྱལ་འགོང་ཕོ་ཉར་འགྱེད༔ བཱི༔ གསོལ་ལོ་མཆོད་དོ་ནུབ་ཕྱོགས་གནོད་སྦྱིན་རྗེ༔ སྐུ་མདོག་མཐིང་ག་ཟ་འོག་བེར་ཆེན་གསོལ༔ ཕྱག་མཚན་རལ་གྲི་རིན་ཆེན་དབང་རྒྱལ་
བསྣམས༔ སྟག་མོ་ཆིབས་ཤིང་གནོད་སྦྱིན་ལས་ལ་བསྐུལ༔ ཧཱི༔ གསོལ་ལོ་མཆོད་དོ་བྱང་ཤར་ཀླུ་ཡི་རྗེ༔ སྐུ་མདོག་དུད་ཀ་སྦྲུལ་ལྤགས་ན་བཟའ་གསོལ༔ ཕྱག་གཉིས་སྦྲུལ་ཞགས་ནད་རྐྱལ་དགྲ་ལ་འདེབས༔ ཆུ་སྲིན་ཆིབས་ཤིང་ཀླུ་བདུད་ཕོ་ཉ་འགྱེད༔ འཁོར་དང་བཅས་པ་སྐད་ཅིག་འདིར་བྱོན་ལ༔ མཐུན་པའི་དམ་རྫས་མཆོད་གཏོར་གསོལ་མཆོད་བཞེས༔ སངས་རྒྱས་བསྟན་པ་གཉན་པོ་ཁྱོད་ཀྱིས་སྲུངས༔ དཀོན་མཆོག་གསུམ་གྱི་དབུ་འཕང་ཁྱོད་ཀྱིས་བསྟོད༔ དཔལ་ལྡན་བླ་མའི་སྐུ་ཚེ་ཁྱོད་ཀྱིས་སྲིངས༔ འཁོར་སྲུངས་རྐྱེན་བཟློག་བར་ཆད་ཁྱོད་ཀྱིས་སོལ༔ རྣལ་འབྱོར་བདག་གི་སྒོས་དགྲ་ཁྱོད་ཀྱིས་སྒྲོལ༔ གྲོས་ངན་བློ་ངན་བསམ་ངན་མགོ་བསྐོར་དང་༔ དགྲ་དང་དམག་ཇག་ངན་དགུ་ཤོམ་པ་རྣམས༔ སྲུང་མ་ཁྱོད་ཀྱིས་ཤོལ་ཐོབ་བསམ་ངན་བསྒྱུར༔ དགྲ་སྣ་དམག་སྣ་ཇག་སྣ་རྐུན་སྣ་ཟློག༔ ཁ་ཡོག་བྱུར་དང་མི་ཁ་བྲ་མཆུ་ཟློག༔ རྒྱལ་པོའི་བཀའ་ཆད་བཙན་སྣ་གྱོད་སྦྱོར་ཟློག༔ སྔ་དགྲ་བརྡར་དང་ད་དགྲ་ཐད་དུ་ལང་༔ ཕྱིན་ཆད་གནོད་པར་བྱེད་པའི་སྡང་བའི་དགྲ༔ གང་ཡིན་ཐམས་ཅད་སྲུང་མ་ཁྱོད་ཀྱིས་ཤོལ༔ དྲེགས་བྱེད་འཁོར་
བཅས་ཁྱོད་ཀྱི་ཟ་སྐལ་གྱིས༔ གཏད་དོ་ལས་བཅོལ་བསྟན་སྲུང་མཐུ་མ་ཆུང་༔ དམ་རྫ་ས་བརྒྱན་པའི་གཏོར་མ་འདི་བཞེས་ལ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཧོ༔ དགོངས་སུ་གསོལ་ལོ༔ ཆོས་སྐུ་སྣང་བ་མཐའ་ཡས༔ ལོངས་སྐུ་སྤྱན་རས་གཟིགས་དབང་༔ སྤྲུལ་སྐུ་པདྨ་རྒྱལ་པོ༔ མཁའ་འགྲོ་ཡེ་ཤེས་མཚོ་རྒྱལ༔ མངའ་བདག་ཆོས་རྒྱལ་ཡབ་སྲས༔ གཏེར་སྟོན་ཉི་མ་འོད་ཟེར༔ དྲིན་ཅན་རྩ་བརྒྱུད་བླ་མ་ལ་སོགས་རིག་འཛིན་རྒྱ་མཚོའི་ཞལ་དུ་ཨོཾ་ཨཱཿཧཱུྃ༔ གསོལ་ལོ་མཆོད་དོ་འབུལ་ལོ་བཞེས་སུ་གསོལ༔ རིག་འཛིན་པདྨ་འབྱུང་གནས༔ ཡབ་དབང་ཆེན་རྟ་མགྲིན༔ ཡུམ་རྡོ་རྗེ་ཕག་མོ་ལ་སོགས་ཏེ་གུ་རུ་རྩ་བ་གསུམ་གྱི་ལྷ་ཚོགས་རྣམས་ཀྱི་ཞལ་དུ་ཨོཾ་ཨཱཧཱུྃ༔ གསོལ་ལོ་མཆོད་དོ་འབུལ་ལོ་བཞེས་སུ་གསོལ༔ དབང་གི་རྒྱལ་པོ་རྟ་མགྲིན་ནག་པོ༔ དགྲ་བགེགས་འདུལ་བའི་དཔའ་བོ༔ སངས་རྒྱས་ཀྱི་བསྟན་སྲུངས༔ རྣལ་འབྱོར་གྱི་དགྲ་ལྷ༔ རྫུ་འཕྲུལ་གྱི་དབང་ཕྱུག༔ ཡེ་ཤེས་ཀྱི་སྤྱན་ལྡན༔ རིག་འཛིན་གྱི་སྲོག་ཤིང་༔ སྡེ་བརྒྱད་ཀྱི་དམག་དཔོན༔ དམ་ཉམས་དགྲ་ཡི་གཤེད་མ༔ གཟའ་ཀླུ་
བདུད་དཔུང་འདུལ་བའི་དེད་དཔོན༔ གདོན་བགེགས་དམ་སྲི་འདུལ་བའི་གཉེན་པོ༔ རྒྱ་གྷི་ཝ་དབང་ཆེན་རྟ་མགྲིན་ནག་པོ༔ ཡཀྴ་མེ་དབལ༔ གནོད་སྦྱིན་ལྕགས་ཀྱི་རལ་པ་ཅན༔ ཁྱུང་ཆེན་འབར་བ༔ ལྕགས་སྡིག་ནག་པོ༔ སྤྲུལ་པ་ཡང་སྤྲུལ་ལ་སོགས་དབང་ཆེན་རྟ་མགྲིན་ནག་པོའི་ལྷ་ཚོགས་རྣམས་ཀྱི་ཞལ་དུ་ཨོཾ་ཨཱཧཱུྃ༔ གསོལ་ལོ་མཆོད་དོ་འབུལ་ལོ་བཞེས་སུ་གསོལ༔ དབང་ཆེན་རྟ་མགྲིན་ནག་པོའི་བཀའ་ཉན་གསུང་སྡོད་པ་བཀའ་སྲུང་སྲིད་པ་ལྷའི་གཙོ་བོ༔ གཤིན་རྗེ་ཡ་མ་རཱ་ཛཿ མ་མོ་སྲིད་པའི་རྒྱལ་མོ༔ བདུད་ཕོ་སྐོས་རྗེ་དྲང་དཀར༔ བཙན་རྗེ་སྲོག་གཟན་དམར་པོ༔ རྒྱལ་པོ་པེ་དཀར་དགྲ་བླ༔ གནོད་སྦྱིན་ཀཱ་ལ་ཡཀྵ༔ ཀླུ་བདུད་འཆི་བདག་མགོ་དགུ་ལ་སོགས་འཁོར་དྲེགས་པ་སྡེ་བརྒྱད་ཀྱི་ཚོགས་དང་བཅས་པ་རྣམས་ཀྱི་ཞལ་དུ་ཨོཾ་ཨཱཧཱུྃ༔ གསོལ་ལོ་མཆོད་དོ་འབུལ་ལོ་བཞེས་སུ་གསོལ༔ ཕྱོགས་སྐྱོང་བ་གཉན་པོ་བཅུ༔ རྒྱལ་པོ་ཆེན་པོ་སྡེ་བཞི༔ བཀའི་ལྷ་སྲིན་སྡེ་བརྒྱད༔ འཇིག་རྟེན་གྱི་དྲེགས་པ་ཅན༔ ཤ་ལ་དགའ་བ༔ ཁྲོག་ལ་རྒྱས་པ༔ གསོད་ལ་རྔམ་པ༔ ཁྲོ་ལ་གཏུམ་པ༔ དྲག་ལ་རྩུབ་པ་ཅན་གྱི་དམག་ཚོགས་རྣམས་
ཀྱི་ཞལ་དུ་ཨོཾ་ཨཱཧཱུྃ༔ གསོལ་ལོ་མཆོད་དོ་བཞེས་སུ་གསོལ༔ གཞན་ཡང་ས་ཕྱོགས་ཡུལ་རིས་རྒྱལ་ཁམས་འདི་སྐོར་ལ་གནས་པ་རྣམས་དང་༔ གནས་ཁང་འདི་ཡི་ཕྱོགས་མཚམས་བརྒྱད་སྟེང་འོག་གཉིས་དང་བཅུ་ལ་གནས་པའི་ཕ་མྱེས་རྒྱུད་བསྲུང་༔ སློབ་དཔོན་གཉན་སྲུང་༔ དབེན་གནས་ཆགས་པའི་སྲུང་མ༔ ལས་སྐལ་འབྲེལ་བའི་སྲུང་མ༔ འགོ་བའི་ལྷ༔ སྐྱོབ་པའི་ལྷ༔ ཡུལ་ལྷ་ཟོ་དོར༔ དབེན་གནས་སྲུང་མ་གཞི་བདག་གནས་སྲུང་གི་རིགས་སུ་གྱུར་པ་རྣམས་ཀྱི་ཞལ་དུ་ཨོཾ་ཨཱཏྟཱཧཱུྃ༔ གསོལ་ལོ་མཆོད་དོ་འབུལ་ལོ་བཞེས་སུ་གསོལ༔ དགྱེས་པར་བཞེས་ལ་ཁྱེད་རྣམས་ཀྱིས་སངས་རྒྱས་ཀྱི་བསྟན་པ་སྲུངས༔ དཀོན་མཆོག་གི་དབུ་འཕང་བསྟོད༔ གཙུག་ལག་གི་དཀོར་ཁང་སྲུངས༔ དགེ་འདུན་གྱི་སྡེ་སྐྱོངས༔ རྣལ་འབྱོར་པའི་སྐུ་ཚེ་སྲིངས༔ ཁྱད་པར་དུ་བདག་དང་ཡོན་བདག་འཁོར་དང་བཅས་པའི་ཚེ་བསྲིང་དཔལ་བསྐྱེད་ཅིག༔ འཁོར་དང་ལོངས་སྤྱོད་སྤེལ་ཞིག༔ སྡང་བའི་དགྲ་སོད༔ གནོད་པའི་བགེགས་ཆོམ༔ བར་ཆད་ཀྱི་རྐྱེན་སོལ༔ བྱད་ཁ་ཕུར་ཁ་ཟློག༔ མོ་ངན་རྨི་ངན་ཟློག༔ ནད་སྣ་གདོན་སྣ་རིམས་
ཁ་ཡམས་ནད་ཐམས་ཅད་དགྲ་ལ་ཟློག་ཅིག༔ ལེགས་པ་བརྒྱ་དང་སྤྱོད༔ ཉེས་པ་སྟོང་དང་བསྣོལ༔ སྙན་པའི་དུང་བུས༔ གྲགས་པའི་བ་དན་ཕྱོར༔ མཆོག་ཐུན་མོང་གི་དངོས་གྲུབ་དམ་པ་མྱུར་དུ་སྩོལ་ཞིག༔ ཧཱུྃ་ཧཱུྃ༔ ལྷ་ཡི་ལྷ་མཆོག་རྟ་མགྲིན་དབང་གི་ལྷ༔ དུས་རྣམས་རྟག་ཏུ་ཁྱོད་གསོལ་ཁྱོད་བསྒྲུབ་སྟེ༔ སྲོག་གི་ཕྱིར་ཡང་ཡི་དམ་མི་སྤང་ན༔ ཡེ་ཤེས་ཐུགས་རྗེ་སྤྱན་གྱིས་གཟིགས་སུ་གསོལ༔ ཁྲོ་རྒྱལ་འཁོར་བཅས་ཁྱེད་ཀྱི་གཟི་བྱིན་གྱིས༔ བར་ཆད་བགེགས་ཀྱི་ཚོགས་རྣམས་བསལ་ནས་ཀྱང་༔ བྱམས་པའི་ཞལ་བཟང་དངོས་སུ་བསྟན་པ་དང་༔ བསྒྲུབ་པའི་འབྲས་བུ་དུས་འདིར་བསྟན་དུ་གསོལ༔ ཧཱུྃ་ཧྲཱིཿ རྟ་མགྲིན་ནག་པོ་འཁོར་བཅས་དགོངས་སུ་གསོལ༔ བདག་གིས་བསྙེན་སྒྲུབ་མཆོད་གསོལ་ཕྲིན་ལས་ཀྱི༔ ལམ་འདི་བརྩམས་པའི་དགེ་བའི་ནུས་མཐུ་ཡིས༔ སངས་རྒྱས་བསྟན་དང་བསྟན་འཛིན་སྐུ་ཚེ་སྲིངས༔ དཀོན་མཆོག་དབུ་འཕང་བླ་མའི་ཐུགས་དགོངས་རྫོགས༔ རྣལ་འབྱོར་ཚེ་རིང་ཡོན་བདག་བར་ཆད་ཞི༔ བསོད་ནམས་དཔལ་རྒྱས་བསམ་དོན་ཕུན་ཚོགས་ཤིང་༔ བདག་གཞན་ཐམས་ཅད་སངས་རྒྱས་སར་འགོད་
ཤོག༔ ཅེས་འདོད་དོན་ཕྲིན་ལས་བཅོལ་ལོ༔ ཉང་ལུགས་ཀྱི་རྟ་ནག་ཁ་འཕངས་གསོལ་ཀ་ཞིག་དགོས་ཞེས་ཆབ་གཤིས་ཀྱི་འཚོ་མཛད་སྔགས་འཆང་གིས་ཡང་ཡང་ནན་གྱིས་བསྐུལ་ངོར༔ སངས་རྒྱས་གླིང་པའི་རྟ་ནག་སོགས་ཀྱི་དོན་བསྡུས་ཏེ༔ རཱ་ག་ཨ་སྱས་འཕྲལ་དུ་བྲིས་པ་ཉེས་པ་མཆིས་ན་ལྷ་ལ་བཤགས་ཤིང་༔ དགེ་བས་འཚོ་མཛད་བསོད་ནམས་རྡོ་རྗེ་གཙོས་པའི་སྔགས་པརྣམས་ལ་ཕན་ཐོགས་ཤོག༔ ཡི་གེ་པ་ནི་དགེ་སློང་བརྩོན་འགྲུས་ཀྱིས་བགྱིས་སོ༔ བཀྲ་ཤིས། དགེའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།